2018.10.19

གཏམ་པདྨ་ཚལ་གྱི་ཟློས་གར་ལས།

གོང་གི་དཔོན་ལ་འཇལ་འཇལ་ནི་འཇལ་ཡོད། །

འཇལ་ཚོད་མི་འདུག་གང་དགའ་རུ་བསྐྱུར་ཐོངས། །

འོག་གི་གཡོག་ལ་བྱིན་བྱིན་ནི་བྱིན་ཡོད། །

བྱིན་ཚོད་མི་འདུག་གང་དགའ་རུ་བསྐྱུར་ཐོངས། །

བར་གྱི་གཉེན་ལ་བསྐྱང་བསྐྱངས་ནི་བསྐྱངས་ཡོད། །

བསྐྱང་ཚོད་མི་འདུག་གང་དགའ་རུ་བསྐྱུར་ཐོངས། །

སྡང་བའི་དགྲ་ལ་འཐབ་འཐབ་ནི་འཐབས་ཡོད། །

འཐབ་ཚོད་མི་འདུག་གང་དགའ་རུ་བསྐྱུར་ཐོངས། །

རྨོས་པའི་ཞིང་ལ་བཏབ་བཏབ་ནི་བཏབ་ཡོད། །

འདེབས་ཚོད་མི་འདུག་ཐལ་རྒོད་དུ་བསྐྱུར་ཐོངས། །

བརྩེགས་པའི་མཁར་དུ་བསྡད་བསྡད་ནི་བསྡད་ཡོད། །

འདུག་ཚོད་མི་འདུག་དབེན་རི་ལ་ཆས་འགྲོ། །

བཟའ་བའི་ཟས་ལ་ཟོས་ཟོས་ནི་ཟོས་ཡོད། །

ཟ་ཚོད་མི་འདུག་དཀའ་ཐུབ་ལ་བསྟེན་འགྲོ། །

བགོ་བའི་གོས་ལ་གྱོན་གྱོན་ནི་གྱོན་ཡོད། །

གྱོན་ཚོད་མི་འདུག་གཅེར་བུ་ལ་འཕྱོངས་འགྲོ། །

ད་བྱེད་ད་བྱེད་ལྷ་ཆོས་རང་བྱེད་དོ། །

ད་སྒྲུབ་ད་སྒྲུབ་འཆི་ཆོས་ཤིག་སྒྲུབ་བོ། །

དམ་བཅའ་ཡིན་ནོ་ལྷ་རྣམས་ཀྱིས་དགོངས་མཛོད། །

ཁས་ལེན་ཡིན་ནོ་རང་སེམས་འདི་དཔང་ངོ་། །

ཞེས་གསུངས།