2019.07.19

རྡོ་ལེ་ཁ་སྤུ་ཅན་ལ་གདམས་པའི་ཉམས་ལེན་གནད་བདུན་མ།

བླ་མ་དམ་པ་རྣམས་ལ་ཕྱག་འཚལ་ལོ། །

ཉིད་ནས་ཁ་ཙམ་མ་ཡིན་པར་སྙིང་ནས་དམ་པའི་ཆོས་ཤིག་སྒྲུབ་པར་འདོད་ན། ལས་འབྲས་བསླུ་མེད་ལ་ཡིད་ཆེས་ཀྱི་ངེས་པ་རྙེད་ནས་བླང་དོར་བྱེད་པ་དང་གཅིག འཁོར་བ་སྡུག་བསྔལ་གྱི་རྒྱ་མཚོ་ཆེན་པོ་ལས་ཐར་འདོད་ཀྱི་བློ་ཤུགས་དྲག་པོ་བཅོས་མིན་རྒྱུད་ལ་སྐྱེ་བ་དང་གཉིས། མཁའ་ཁྱབ་ཀྱི་སེམས་ཅན་ཐམས་ཅད་དྲིན་ཆེན་གྱི་ཕ་མར་ཤེས་ནས་བྱམས་སྙིང་རྗེ་བྱང་ཆུབ་ཀྱི་སེམས་རིན་པོ་ཆེ་སྒོམ་པ་དང་གསུམ། ཕྱི་ནང་སྣོད་བཅུད་ཀྱི་གནས་ཚུལ་སྐུ་དང་ཡེ་ཤེས་ཀྱི་རང་བཞིན་ཡིན་པས་དག་སྣང་སྦྱང་པ་དང་བཞི། ཆོས་དང་དམ་ཚིག་གིས་བསྡུས་པ་རྣམས་རྡོ་རྗེའི་སྤུན་གྲོགས་ཡིན་པས་བརྩེ་གདུང་རྒྱུན་ཆད་མེད་པར་བྱེད་པ་དང་ལྔ། དུས་གསུམ་སངས་རྒྱས་ཀྱི་ངོ་བོ་དྲིན་ཆེན་གྱི་བླ་མ་ཡིན་པས་ཡིད་ཁྱེད་ཤེས་ཀྱི་དད་པས་གསོལ་འདེབས་བྱས་ཏེ་ཐུགས་ཡིད་དབྱེར་མེད་དུ་བསྲེ་བ་དང་དྲུག ཉམས་ཞེན་གྱི་སྦུབས་དང་བྲལ་བའི་རིག་སྟོང་ཟང་ཐལ་གྱི་ལྟ་བ་ཡང་དག་གཉུག་མའི་དྲན་པས་རྒྱུན་དུ་སྐྱོང་བ་དང་བདུན་པོ་འདི་ཉིད་ཉིན་མཚན་ཐང་ལྷོད་མེད་པར་ཉམས་ལེན་མཛད་པར་ཞུ་ཞུ་ཞེས་བླ་མ་ནས་རྡོ་ལེ་ཁ་སྤུ་ཅན་ལ་གདམས་པའོ། །དགེའོ། །