第1课

འབབ་ཚུགས་ལྔ་པ། ཨ་རིའི་ཝ་ཧྲིང་ཐོན།

༼ ༧·༢༣~༧·༣༡ ༽

མཛད་རིམ།

ཕྱི་ཟླ་༧པའི་ཚེས་༢༣ཉིན། ཝ་ཧྲིང་ཐོན་དུ་འབྱོར།

ཕྱི་ཟླ་༧པའི་ཚེས་༢༤ཉིན། བདེན་བཞིའི་ཆོས་འཁོར་གསུངས།

ཕྱི་ཟླ་༧པའི་ཚེས་༢༥ཉིན། ཕྱི་དྲོར་ཕུར་པ་མགུལ་ཁུག་མའི་དབང་གནང་།

ཕྱི་ཟླ་༧པའི་ཚེས་༢༦ཉིན། རྒྱལ་ཁབ་མདུན་ཐང་དུ་སྤྲོ་འཁྱམ་མཛད། དགོང་མོར་འཇམ་དཔལ་ཞི་སྒྲུབ་ཀྱི་དབང་གནང་།

ཕྱི་ཟླ་༧པའི་ཚེས་༢༧ཉིན། མཁའ་འགྲུལ་དབྱིངས་བསྐྱོད་དངོས་མང་བཤམས་སྟོན་ཁང་དུ་བྱོན། དགོང་མོར་སངས་རྒྱས་ལག་སྟེར་གྱི་ཁྲིད་ཐུན་དང་པོ་གསུངས།

ཕྱི་ཟླ་༧པའི་ཚེས་༢༨ཉིན། ཚུལ་ཁྲིམས་བསྲུངས་བའི་ཕན་ཡོན་དང་དགོང་མོར་སངས་རྒྱས་ལག་སྟེར་གྱི་ཁྲིད་ཐུན་གཉིས་པ་གསུངས།

ཕྱི་ཟླ་༧པའི་ཚེས་༢༩ཉིན། དགོང་མོར་སངས་རྒྱས་ལག་སྟེར་གྱི་ཁྲིད་ཐུན་གསུམ་པ་གསུངས།

ཕྱི་ཟླ་༧པའི་ཚེས་༣༠ཉིན། ཕོ་བྲང་དཀར་པོར་གཟིགས་སྐོར་དང་ཀྲུང་གོའི་གཞུང་ཚབ་ཁང་དུ་བྱོན།

ཕྱི་ཟླ་༧པའི་ཚེས་༣༡ཉིན། གྱེས་ཁའི་ཞལ་གདམས་གནང་།

རྒྱལ་ས་ཝ་ཧྲིང་ཐོན་དུ་འབྱོར།

ནུབ་མཚོའི་འགྲམ་ནས་ཆུ་ཚོད་དྲུག་ལ་མཁའ་ལམ་དུ་འཕུར་སྐྱོད་བྱས་ཏེ། ཤར་མཚོའི་འགྲམ་རྒྱུད་ཀྱི་ཨ་རིའི་རྒྱལ་ས་ཝ་ཧྲིང་ཐོན་དུ་འབྱོར་བ་དང་། གནམ་གྲུ་ལས་བབས་མ་ཐག མི་རྒྱུད་དཀར་པོ་དང་ནག་པོ། སེར་པོ། བོད་ཀྱི་བླ་སེར། ནུབ་ཕྱོགས་པའི་རབ་བྱུང་སོགས་སྐྱ་སེར་མང་པོས་ལག་ཏུ་ཁ་བཏགས་བཟུང་ཞིང་ཕྲེང་བསྒྲིགས་ནས་རྗེ་ཉིད་བྱོན་པ་ལ་དགའ་བསུ་ཞུས། ཁོང་ཚོས་ལོ་དང་ཟླ་བར་བསྒུགས་པའི་ཆོས་རྗེ་ཉིད་དངོས་སུ་གནས་འདིར་ཕེབས་པ་ལ་དགའ་སྤྲོ་ཚད་མེད་སྐྱེས་ཤིང་བཞིན་རས་འཛུམ་གྱིས་ཁེངས་འདུག

གནམ་ཐང་ལས་ཕྱིར་ཐོན་པ་ན། རང་བྱུང་གི་བཀོད་པའི་ཁྱད་ཆོས་ལྡན་པའི་ས་ཚིགས་སྔོན་མའི་ཨ་རིའི་ནུབ་རྒྱུད་ཀྱི་གྲོང་ཁྱེར་རྣམས་དང་བསྡུར་ན། ཝ་ཧྲིང་ཐོན་གྱི་གྲོང་ཁྱེར་ལ་རིག་གནས་ལོ་རྒྱུས་ཀྱི་མཁའ་དབུགས་ཧ་ཅང་རྔམ་མཐུག་པར་འདུག གྲོང་ཁྱེར་འདིར་ལོ་ངོ་སུམ་བརྒྱ་ལ་ཉེ་བའི་ལོ་རྒྱུས་ལས་མེད་ཀྱང་། ཨ་རིའི་སྲིད་འཛིན་གྱི་ལྟེ་གནས་ཡིན་པའི་རྐྱེན་གྱིས། ཕོ་བྲང་དཀར་པོ་དང་རྒྱལ་ཚོགས་མཁར་ཆེན་སོགས་འཛུགས་སྐྲུན་སྣ་ཚོགས་ཀྱིས་བརྒྱན་པས་མཛེས་སྡུག་དང་རྔམ་བརྗིད་ལྡན་ཞིང་། ཐུན་མོང་མ་ཡིན་པའི་རིག་གནས་ཀྱི་ཁྱད་ཆོས་ལྷག་པར་མངོན།

ས་གནས་དེ་གའི་མི་རྣམས་ཀྱིས་བཤད་པ་ལྟར་ན། ཨ་རིའི་རྒྱལ་ཁབ་ཚུགས་ནས་རྒྱལ་ས་གཏན་ཁེལ་བྱེད་པ་ལ། ལྷོ་ཕྱོགས་དང་བྱང་ཕྱོགས་ཀྱི་མངའ་སྡེ་སོ་སོས་རང་རང་གི་ས་ཆར་གཟུག་འདོད་ཆེ་བས་ཕན་ཚུན་རྩོད་པར་གྱུར། རྗེས་སུ་མཉམ་གཅིག་ཏུ་གྲོས་མོལ་བྱས་ཏེ་ལྷོ་བྱང་གཉིས་ཀྱི་ས་མཚམས་སུ། དབྱིན་ལེ་གྲུ་བཞི་མ་བརྒྱ་ཡོད་པའི་ནགས་ཚལ་མང་བའི་རི་གྲོང་ཐར་ཐོར་ལས་མེད་པའི་ས་ཆ་ཞིག་ཏུ་གཟུག་རྒྱུའི་གྲོས་ཆོད་བྱུང་། རྒྱལ་སའི་གྲོང་ཁྱེར་དེར་ཨ་རིའི་སྲིད་འཛིན་དང་པོ་ལྗོར་ལྗི་ཝ་ཧྲིང་ཐོན་གྱི་མིང་བཏགས།

ང་ཚོ་གནས་འདིར་བསྡད་ནས་ཆོས་རྗེ་ཉིད་ཀྱིས་གཟའ་འཁོར་གཅིག་གི་རིང་ལ་ཆོས་ཁྲིད་གསུངས།

བདེན་བཞིའི་ཆོས་འཁོར།

ཕྱི་ཟླ་༧པའི་ཚེས་༢༤ཉིན། ཆོས་རྗེ་ཉིད་ཀྱིས་ལན་སཱི་པེར་ཀི་ཟློས་གར་གླིང་（Lansberg Thesatre）དུ། རྒྱལ་ས་ཝ་ཧྲིང་ཐོན་ལ་འབྱོར་བའི་ཐེངས་དང་པོའི་སྤྱི་བསྒྲགས་འཆད་ཁྲིད་གནང་། ཉིན་དེར་བོད་རྩིས་ཀྱི་ཟླ་༦པའི་ཚེས་༤སྟེ། སྟོན་པ་ཐུགས་རྗེ་ཅན་གྱིས་བདེན་བཞིའི་ཆོས་འཁོར་བསྐོར་བའི་དུས་ལ་ཐུག་ཡོད་པ་དང་། ཆོས་རྗེ་ཉིད་ཀྱིས་བདེན་བཞིའི་ཆོས་གསུངས་པ་གཉིས་རྟེན་འབྲེལ་ལེགས་ཕྱོགས་སུ་འགྲིགས།

ཆོས་ཁྲིད་མ་གསུངས་སྔོན། གཙོ་སྒྲུབ་ཕྱོགས་ནས་ངོ་སྤྲོད་བྱས་པ་འདི་ལྟར།

ཕྱི་དྲོ་བཟང་། དེ་རིང་འདི་ནས་ཆོས་རྗེ་འཇིགས་མེད་ཕུན་ཚོགས་རིན་པོ་ཆེ་ངོ་སྤྲོད་བྱ་རྒྱུ་བྱུང་བ་ནི་ང་རང་གི་བསོད་ནམས་དང་གཟི་བརྗིད་ཡིན།

ཆོས་རྗེ་རིན་པོ་ཆེ་ཁོང་ནི། དེང་སྐབས་འཛམ་གླིང་ན་འགྲན་ཟླ་བྲལ་བའི་ཕུལ་བྱུང་གི་བསྟན་འཛིན་གྱི་སྐྱེས་བུ་ཞིག་ཡིན་ལ། ང་ཚོས་ཁོང་ཉིད་རྒྱལ་ས་ཝ་ཧྲིང་ཐོན་ལ་གདན་ཞུ་བྱས་ཏེ་གསེར་ཞལ་མཇལ་ཐུབ་པ་ནི་རང་རེས་བསོད་ནམས་མང་དུ་བསགས་པའི་འབྲས་བུ་ཡིན། དེ་བས། ཚང་མས་ཕུན་སུམ་ཚོགས་པའི་གོ་སྐབས་འདི་འབད་བརྩོན་དང་བཅས་ཏེ་དམ་འཛིན་བྱེད་པ་ནི་བདག་གི་རེ་བ་ཡིན།

ཆོས་པ་ལས་དང་པོ་པས་ངེས་པར་སློབ་དགོས་པའི་གདམས་ངག་གཙོ་བོ་ཞིག་ནི། ཆོས་སྒོར་ཞུགས་ནས་བཟུང་ཐོས་བསམ་སྒོམ་གསུམ་གྱི་ལས་ལ་དཀའ་བ་བརྒྱ་ཕྲག་ཁྱད་དུ་བསད་ནས། རིན་པོ་ཆེའི་གླིང་དུ་ཕྱིན་ན་ལག་སྟོང་དུ་ཕྱིར་ཡོང་མི་རིགས་པ་བཞིན། ངེས་པར་དུ་གྲུབ་འབྲས་ལོན་ཐབས་ལ་འབད་དགོས་པ་དེ་ཡིན། དེ་རིང་གི་སྤྱི་བསྒྲགས་གསུང་བཤད་ཀྱི་ཁ་བྱང་ནི་བདེན་བཞི་དང་རྫོགས་ཆེན་སྐོར་ཡིན་ལ། འདི་ནི་ནང་པའི་ཆོས་ཀྱི་ཉིང་བཅུད་ཀྱང་ཡིན་པས། རྣམ་པ་ཚོ་ཕྱིར་ཁྱིམ་ལ་ལོག་སྐབས་ལག་སྟོང་མཆན་དུ་བཅུག་ནས་འགྲོ་བ་མ་ཡིན་པར་ཕན་འབྲས་ལེགས་པོ་འཐོབ་པའི་སྨོན་འདུན་ཞུ་བ་ཡིན།

མཇུག་ཏུ། ངས་གོ་སྐབས་འདི་ནི་ཁྱེད་ཅག་གི་བློ་ཡུལ་ལས་འདས་པའི་གོ་སྐབས་ལེགས་པོ་ཞིག་ཡིན་ཞེས་བཤད་པ་ལས། གོ་སྐབས་འདིའི་གལ་ཆེན་རང་བཞིན་ནི་སྒྲ་ཚིག་གི་ལམ་ནས་བརྗོད་ཐབས་བྲལ་བས། ཁྱེད་ཅག་འདིར་སླེབས་པར་དགའ་བསུ་ཞུ། འདི་ལྟར་ཚོགས་ལེགས་པོ་བསགས་ནས་ལྷན་དུ་ཆོས་ཞུ་བའི་གོ་སྐབས་བྱུང་བར་སླར་ཡང་བཀའ་དྲིན་ཞུ།

ཞེས་གཙོ་སྒྲུབ་ཕྱོགས་ཀྱི་སྔོན་འགྲོའི་གཏམ་གླེང་སོང་བའི་རྗེས་སུ་ཆོས་རྗེ་མཆོག་གིས་སྤྱི་བསྒྲགས་གསུང་བཤད་འདི་ལྟར་གནང་།

ཐོག་མར་བཤད་པར་བྱ་བའི་དོན་ནི། བདག་ཅག་གི་སྟོན་པ་ཐབས་མཁས་ལ་ཐུགས་རྗེ་ཆེན་པོ་དང་ལྡན་པ་དེ་ཉིད་ཀྱིས་བསྐལ་པ་མང་པོའི་གོང་རོལ་ནས་བྱང་ཆུབ་མཆོག་ཏུ་སེམས་བསྐྱེད། བར་དུ་བསྐལ་པ་གྲངས་མེད་དུ་མའི་རིང་ལ་ཚོགས་བསགས། མཐར་རྒྱ་གར་རྡོ་རྗེ་གདན་དུ་མངོན་པར་རྫོགས་པར་སངས་རྒྱས་ནས། ཞག་བདུན་ཕྲག་བདུན་གྱི་རྗེས་སུ་ལྷ་དང་མི་ལ་སོགས་པའི་འགྲོ་བ་ཐམས་ཅད་ལ་ཕན་པ་དང་བདེ་བ་འབྱུང་བའི་ཕྱིར་དུ་ཆོས་ཀྱི་འཁོར་ལོ་བསྐོར་བའི་དུས་ཚེས་ཀྱང་དེ་རིང་གི་ཉི་མ་འདི་རེད། འདི་ཡང་རྟེན་འབྲེལ་མ་བསྒྲིགས་རང་འགྲིགས་སུ་གྱུར་བས་ཕྱི་ནང་གསང་གསུམ་གྱི་བཀྲ་ཤིས་དགེ་མཚན་ཕུན་སུམ་ཚོགས་པ་འབྱུང་བའི་རྟགས་མངོན་དུ་གྱུར་པ་ཡིན།

དེ་ལྟ་བུའི་དུས་ཚེས་ཕུན་སུམ་ཚོགས་པ་ལ་གནས་ཀྱི་དབང་དུ་བྱས་ན། འཛམ་བུ་གླིང་འདིར་རྒྱལ་ཁབ་ཉིས་བརྒྱ་ལ་ཉེ་བ་ཙམ་ཞིག་ཡོད་པ་ཐམས་ཅད་ཀྱི་སྤྱི་བོའི་གཙུག་གི་རྒྱན་ལྟ་བུའི་སྟོབས་འབྱོར་ཕུན་སུམ་ཚོགས་པ། འགྲན་པའི་ཟླ་ཐམས་ཅད་དང་བྲལ་བ་ནི་ཨ་རིའི་རྒྱལ་ཁབ་འདི་རེད། ཨ་རིའི་རྒྱལ་ཁབ་ཀྱི་ནང་ནས་ཀྱང་ཁྱད་པར་དུ་རྒྱལ་སའི་ལྟེ་བ་འདི་ལ་དེ་རིང་དངོས་སུ་ཐོན་པར་ང་རང་ལ་དགའ་སྤྲོ་ཧ་ཅང་ཆེན་པོ་སྐྱེས་བྱུང་།

དེ་ལ་རྒྱུ་མཚན་རྣམ་པ་གསུམ་ཡོད། དང་པོ། ཨ་རིའི་རྒྱལ་ཁབ་ཀྱི་མགོ་ཁྲིད་རྣམས་ལ་བསམ་བློ་བཏང་ན། ཁོང་རྣམ་པ་ཚང་མ་འཛམ་བུ་གླིང་གི་མིའི་རིགས་ཀྱི་འགྲོ་བ་མཐའ་དག་ཞི་བདེའི་ལམ་ལ་འགོད་པའི་སྙིང་སྟོབས་དང་ཡོན་ཏན། བརྩོན་འགྲུས་ཆེ་བ་སོགས་གཞན་གང་དང་ཡང་མི་འདྲ་བའི་ཡོན་ཏན་ཅན་མང་པོ་ཞིག་ས་གནས་འདི་རུ་བཞུགས་མྱོང་ཡོད་པ་རེད་བསམ་ནས་དགའ་ཚོར་ཆེན་པོ་ཞིག་སྐྱེས་སོང་། གཉིས་པ། ཨ་རིའི་མི་དམངས་ལ་བསམ་བློ་བཏང་ན་ཡང་། ཚང་མ་སྟོབས་འབྱོར་དང་ལྡན་ཞིང་རང་དབང་ཕུན་སུམ་ཚོགས་པའི་བདེ་སྐྱིད་ལ་ལོངས་སྤྱོད་པ་འདི་ནི་ཤིན་ཏུ་ངོ་མཚར་བའི་གནས་ཤིག་ཡིན་པ་དང་། ཁྱད་པར་དུ་ཡུལ་ཁམས་འདིའི་ཁོར་ཡུག་མཛེས་ཤིང་ལྟ་ན་སྡུག་པ། རྩྭ་རི་ནགས་ལྗོངས་སྡོད་ཁང་ལ་སོགས་པ་གང་ཅིའི་ཐད་ནས་ཀྱང་། ལྷའི་གྲོང་ཁྱེར་མི་ཡུལ་དུ་འཕོས་པ་ལྟ་བུའི་གནས་འདི་ལ་ཐོན་པས་དགའ་སྤྲོ་ཁྱད་པར་ཅན་ཞིག་སྐྱེས། གསུམ་པ། ང་རང་ཤར་ཕྱོགས་ཨེ་ཤ་ཡའི་རྒྱལ་ཁབ་ན་ཡོད་པའི་དུས་སྐབས་སུ། འདི་ལྟ་བུའི་ཡུལ་ཁམས་ཤིག་ཡོད་པ་ཚོར་མྱོང་ཞིང་། དེ་ལ་ཐོན་པའི་དུས་ཚོད་ཅིག་ཡོད་ན་སྙམ་ནས་རེ་སྨོན་ཡུན་རིང་ལ་བྱས་པ་ཡིན། དེ་རིང་གི་དུས་ཚོད་འདིར་རེ་འབྲས་དོན་སྨིན་དུ་བྱུང་སོང་བས། བསམ་གྱིས་མི་ཁྱབ་པའི་དགའ་བ་དང་སྤྲོ་བ་བླ་ལྷག་ཏུ་འཕེལ་བྱུང་།

ཁྱེད་ཅག་ཆོས་ཚོགས་སོ་སོའི་གཙོ་འགན་པ་དང་འཁོར་སློབ་ཐམས་ཅད་ཀྱང་ཆོས་ལ་དགའ་བ་དང་བླ་མ་ལ་དད་པ་ཆེ་བ། ཐ་ན་བརྩི་བཀུར་གྱི་རྣམ་འགྱུར་ཚུན་ཆད་ཀྱང་ཧ་ཅང་བཟང་པོ་འདུག ཁྱེད་རྣམ་པའི་མཛད་ཚུལ་ནི་ནང་པ་སངས་རྒྱས་པའི་ཀུན་སྤྱོད་དང་འགྲོ་བ་མིའི་ཡ་རབས་ཀྱི་སྤྱོད་ཚུལ་དང་མཐུན་པས། ང་ལ་ཡིད་འགུལ་ཐེབས་ཤིང་དགའ་སྤྲོ་ཡང་ཆེན་པོ་སྐྱེས།

ཨ་རིའི་ལུང་པ་འདིར་བོད་ཀྱི་བླ་མ་ཡང་ཆེས་མི་ཉུང་བ་ཞིག་བྱོན་མྱོང་བ་དང་། དེ་ཐམས་ཅད་ཀུན་ཀྱིས་ཀྱང་ཡུན་རིང་པོའི་བར་དུ་བསྟན་པ་ལ་མཛད་རྗེས་བསམ་གྱིས་མི་ཁྱབ་པ་བཞག་ཡོད། དེ་རིང་འུ་ཅག་གི་ཚོགས་ཁང་འདིར་མཚོན་ནའང་། དགེ་ཚུལ་སློང་དམར་སེར་ངུར་སྨྲིག་འཛིན་པའི་སྡེ་འདི་འདྲ་མང་པོ་ཞིག་བཞུགས་པ་ནི་ལྷག་པར་དུ་དགའ་སྤྲོ་སྐྱེ་བའི་གནས་ཤིག་རེད།

དེ་ཡང་ཡུལ་ཁམས་གང་དང་གང་ཡིན་ཡང་རབ་ཏུ་བྱུང་བའི་སྡེ་དགེ་ཚུལ་སློང་དང་། གོས་དཀར་འཆང་བའི་སྡེ་དགེ་བསྙེན་ཕ་མ་གཉིས་ཏེ་དེ་བཞི་པོ་ཡོད་ན་སངས་རྒྱས་ཀྱི་བསྟན་པ་ཆ་ཚང་བ་ཞིག་ཡོད་ཟེར་དགོས་པ་ཡིན། དེ་དག་ལས་གང་རུང་མེད་ན་སངས་རྒྱས་ཀྱི་བསྟན་པ་ཁ་འཐོར་བ་ཞིག་ཡིན་གསུངས་པས། རབ་བྱུང་རྐྱང་པའམ་ཁྱིམ་པ་རྐྱང་པའི་གནས་ཤིག་ཡིན་ན་དེ་ཡང་སངས་རྒྱས་ཀྱི་བསྟན་པ་ཁ་མ་ཚང་བ་རེད། ཡིན་ཡང་ས་ཆ་འདི་ལ་བསམ་བློ་བཏང་ན། སངས་རྒྱས་ཀྱི་བསྟན་པ་ཁ་ཚང་བས་བསྟན་པའི་ཡུལ་དབུས་ཞེས་བརྗོད་ཀྱང་ཆོག་པ་ལྟ་བུ་ཡིན།

ཁྱད་པར་དུ་དགེ་ཚུལ་སློང་དེ་ཧ་ཅང་གལ་ཆེན་ཡིན། རྒྱུ་མཚན་ཅི་རེད་ཟེར་ན། སངས་རྒྱས་ཀྱི་བསྟན་པ་གནས་མི་གནས་ཟེར་བ་དེ་དགེ་ཚུལ་སློང་ཡོད་མེད་ལ་ལྟོས་ནས་བཏགས་པ་མ་གཏོགས། སྔགས་པ་ལྟ་བུ་ཡིན་ན་ལྷ་དང་ཀླུ་དང་གནོད་སྦྱིན་དང་དྲི་ཟ་དང་ནམ་མཁའ་ལྡིང་ལ་སོགས་པའི་ཡུལ་ཐ་དད་པ་རྣམས་སུ་གསང་སྔགས་ཉམས་ལེན་པ་ཡོད་པས། སྔགས་ཀྱི་བསྟན་པ་ནམ་ཡང་ནུབ་པར་འགྱུར་བའི་དུས་ཤིག་ཡོད་པ་མིན། དེས་ན་སངས་རྒྱས་ཀྱི་བསྟན་པ་ཡུལ་གང་ལ་ནུབ་པ་དང་། གང་ལ་དར་གྱིན་ཡོད་ཟེར་བ་དེ་ཡང་དགེ་ཚུལ་སློང་ཡོད་མེད་ཁོ་ན་ལ་གསུངས་པ་ཡིན། དེའི་ཕྱིར་ན་ཡུལ་འདི་ལྟ་བུ་ལ་དགེ་ཚུལ་སློང་འདི་འདྲའི་མང་པོ་ཡོད་པ་ནི་ཧ་ཅང་ངོ་མཚར་བའི་གནས་ཤིག་ཡིན།

སངས་རྒྱས་ཀྱི་བསྟན་པ་གནས་པའི་ཡུན་ཅི་ཙམ་ཡིན་ཞེ་ན། ལྔ་བརྒྱ་བ་ཕྲག་བཅུའི་བར་དུ་གནས་པ་ཡིན། དེ་ཡང་བཅོམ་ལྡན་འདས་ཀྱི་ལུང་གི་ནང་དུ། བསྟན་པ་འཇིག་ལ་ཉེ་བའི་དུས་སུ་བྱང་ནས་བྱང་དུ་དར་བར་འགྱུར་ཞེས། ལི་ཡུལ་དང་བོད་ཁ་བ་ཅན་གྱི་ཡུལ་སོགས་ལས། གཞན་རྒྱ་གར་སོགས་ཚང་མ་ལ་བསྟན་པ་ནུབ་པར་འགྱུར་བར་གསུངས་པ་ནི་དམ་ཆོས་འདུལ་བའི་བསྟན་པ་ནུབ་པར་འགྱུར་བ་ལ་གོ་དགོས་ན། ད་ལྟ་ཁ་བ་ཅན་དུ་མ་ཟད་ནུབ་ཕྱོགས་ཀྱི་རྒྱལ་ཁབ་འདི་ལྟ་བུ་ལ་ཡང་། འདུལ་བ་འཛིན་པ་འདི་འདྲ་མང་པོ་ཞིག་ཡོད་པ་ནི། ཡུལ་ཁ་བ་ཅན་དུ་བསྟན་པ་བསྡུ་མ་རན་པར་མ་ཟད། འཛམ་གླིང་སྤྱི་ལ་ཡང་བསྟན་པ་ད་རུང་ཡུན་རིང་པོའི་བར་དུ་དར་བའི་རྟེན་འབྲེལ་ཕུན་སུམ་ཚོགས་པ་ཞིག་འགྲིགས་པ་ཡང་ཧ་ཅང་བཟང་པོ་རེད།

དེས་ན་རྗེས་སུ་ཡང་ཁྱེད་རྣམ་པ་ཚང་མས་སྤྱིར་སངས་རྒྱས་ཀྱི་བསྟན་པ་དང་། ཁྱད་པར་དུ་དགེ་ཚུལ་སློང་གི་བསྟན་པ་དར་ཞིང་རྒྱས་པ་ཞིག་འབྱུང་བར་བྱས་ན། འཇིག་རྟེན་གྱི་ཁམས་ཀུན་ཏུ་བདེ་སྐྱིད་ཕུན་སུམ་ཚོགས་པ་ཡོང་བ་དང་། ནད་མུག་འཁྲུག་རྩོད་ཐམས་ཅད་ཞི་བའི་དགོས་པ་ཁྱད་པར་ཅན་རེ་ཡོད་པའི་ཕྱིར་ན། དེ་ལུགས་ཐུགས་ལ་འཛིན་པར་ང་རང་གིས་ཅིས་ཀྱང་གསོལ་བ་འདེབས་པ་ཡིན།

དེ་དག་ནི་འཇིག་རྟེན་པའི་ཚུལ་ལུགས་ལ་བསྟུན་ཏེ་འཚམས་འདྲི་དང་འབྲེལ་བའི་སྐད་ཆ་ཚིག་གསུམ་སྔོན་དུ་བཤད་པ་ཡིན།

ད་ནི་དམ་པའི་ཆོས་ཀྱི་ཚུལ་ལུགས་དང་བསྟུན་ནས་གཏམ་བཤད་མདོར་བསྡུས་ཙམ་ཞིག་ཞུ་རྒྱུ་ཡོད། བདག་ཅག་གི་སྟོན་པ་ཐབས་མཁས་ལ་ཐུགས་རྗེ་ཆེན་པོ་དང་ལྡན་པ་དེ་ཉིད་ཀྱིས། རྒྱ་གར་གྱི་ཡུལ་ཝ་ར་ཎཱ་སིའི་དྲང་སྲོང་ལྷུང་བ་རི་དྭགས་ཀྱི་ནགས་ཚལ་དུ། མིའི་འཁོར་ལྔ་སྡེ་བཟང་པོ་དང་ལྷ་བརྒྱད་ཁྲི་དང་བཅས་པ་ལ། བཀའ་དང་པོ་བདེན་པ་བཞིའི་ཆོས་ཀྱི་འཁོར་ལོ་བསྐོར་ནས་དེ་རིང་ཡན་ཆད་ལ་ཕལ་ཆེར་ལོ་སུམ་སྟོང་ལ་ཉེ་བ་ཞིག་སྟེ། དཔལ་ལྡན་ཕུག་པའི་ལུགས་ལ་འདས་ལོ་༢༨༧༣དང་། གཞན་ཡང་གནས་བརྟན་པའི་ལུགས་སུ་འདས་ལོ་༢༥༣༧ཙམ་སོང་ཟིན། གང་ལྟར་ཡང་དེ་རིང་ཁྱེད་རྣམ་པ་ལ་རྗེས་དྲན་གྱི་ཚུལ་དུ་ཁོང་གིས་གསུངས་པའི་ཆོས་མདོར་བསྡུས་ཙམ་ཞིག་ཞུ་རྒྱུ་ཡིན།

བདེན་བཞི་སྤྱིར་བསྟན་པ།

བཅོམ་ལྡན་འདས་ཁོང་གིས་ཆོས་གང་གསུང་ན། རྟེན་འབྲེལ་སྙིང་པོ་འདི་གསུངས་ཏེ། ཨོཾ་ཡེ་དྷརྨཱ་ཧེ་ཏུ་པྲ་བྷ་ཝཱ་ཧེ་ཏུནྟེ་ཥཱནྟ་ཐཱ་ག་ཏོ་ཧྱ་བ་དཏ། ཏེ་ཥཱཉྩ་ཡོ་ནི་རོ་དྷ་ཨེ་ཝཾ་བཱ་དཱི་མ་ཧཱ་ཤྲཱ་མ་ཎཿ སྭཱ་ཧཱ། ཆོས་རྣམས་ཐམས་ཅད་རྒྱུ་ལས་བྱུང་། །དེ་རྒྱུ་དེ་བཞིན་གཤེགས་པས་གསུངས། །རྒྱུ་ལ་འགོག་པ་གང་ཡིན་པ། །དགེ་སྦྱོང་ཆེན་པོས་འདི་སྐད་གསུངས། །དེ་དག་གི་དོན་གང་ཡིན་ཞེ་ན། བཅོམ་ལྡན་འདས་ཀྱིས་ཐོག་མར་བདེན་བཞིའི་ཆོས་འཁོར་གསུངས་སྐབས་འཁོར་རྣམས་ལ། འདི་ནི་སྡུག་བསྔལ་འཕགས་པའི་བདེན་པའོ། །འདི་ནི་སྡུག་བསྔལ་ཀུན་འབྱུང་བའོ། །འདི་ནི་སྡུག་བསྔལ་འགོག་པའོ། །འདི་ནི་སྡུག་བསྔལ་འགོག་པར་འགྱུར་བའི་ལམ་འཕགས་པའི་བདེན་པའོ། །ཞེས་བདེན་པ་བཞིའི་ངོ་བོ་ལ་བཟླས་པ་དང་། དེ་ནས་སྡུག་བསྔལ་ཤེས་པར་བྱའོ། །ཀུན་འབྱུང་སྤང་བར་བྱའོ། །འགོག་པ་མངོན་དུ་བྱའོ། །ལམ་རྒྱུད་ལ་བསྟེན་པར་བྱའོ། །ཞེས་བྱ་བ་ལ་བཟླས་པ་དང་། དེ་ནས་ཡང་སྡུག་བསྔལ་ཤེས་པར་བྱས་ཏེ་སླར་ཤེས་པར་བྱར་མེད་དོ། །ཀུན་འབྱུང་སྤང་བར་བྱས་ཏེ་སླར་སྤང་བར་བྱར་མེད་དོ། །འགོག་པ་མངོན་དུ་བྱས་ཏེ་སླར་མངོན་དུ་བྱར་མེད་དོ། །ལམ་རྒྱུད་ལ་བསྟེན་པར་བྱས་ཏེ་སླར་བསྟེན་པར་བྱར་མེད་དོ། །ཞེས་མཐར་ཐུག་པ་ལ་བཟླས་པ་སྟེ། དེ་ལྟར་བཟླས་པ་གསུམ་དང་རྣམ་པ་བཅུ་གཉིས་པའི་ཆོས་ཀྱི་འཁོར་ལོ་བསྐོར་བ་ན། མིའི་འཁོར་ལྔ་སྡེ་བཟང་པོ་ལ་སོགས་པ་རིམ་གྱིས་དགྲ་བཅོམ་པའི་གོ་འཕང་ཐོབ་པ་དང་། ལྷ་བརྒྱད་ཁྲི་དང་བཅས་པས་ཆོས་ཉིད་ཀྱི་བདེན་པ་མངོན་སུམ་དུ་མཐོང་བར་གྱུར་པ་ཡིན། དེའང་བཅོམ་ལྡན་འདས་ཀྱིས་གོང་གི་ཚིག་རྐང་བཅུ་གཉིས་པོ་མ་གཏོགས་གཞན་གང་ཡང་མ་གསུངས་མོད། བཅོམ་ལྡན་འདས་ནི་ཐབས་མཁས་ལ་ཐུགས་རྗེ་ཆེན་པོ་དང་ལྡན་པའི་མཐུ་དང་། དེའི་འཁོར་དུ་གཏོགས་པ་ཐམས་ཅད་ཀུན་ཀྱང་དད་པ་དང་ལྡན་པའི་སྲིད་པ་ཐ་མ་པ་ཡིན་པས། དེ་ཙམ་ཞིག་གིས་འཕགས་རྒྱུད་ཀྱི་སྤང་བ་དང་རྟོགས་པའི་ཡོན་ཏན་མངོན་དུ་བྱས་སོང་བ་ཡིན། དེས་ན་དེ་ལྟར་གདམས་པའི་དང་པོའི་ཚིག་རྐང་བཞི་དེའི་དོན་ད་སྐབས་མདོར་བསྡུས་ཙམ་ཞིག་ཞུ་རྒྱུ་ཡིན།

ད་ལྟ་དགའ་ལྡན་ལྷའི་ཡུལ་ན་མངོན་སུམ་དུ་བཞུགས་ཡོད་པའི་བྱམས་པ་མགོན་པོ་ནི་སངས་རྒྱས་བཅོམ་ལྡན་འདས་ཀྱི་རྒྱལ་ཚབ་ཡིན། དེ་ཉིད་ཀྱིས་རྒྱུད་བླ་མ་ལས་བདེན་བཞིའི་དོན་གསལ་བར་བཀྲལ་ཡོད་པ་དེའི་དོན་བཞིན་དུ་ཁྱེད་རྣམ་པ་ལ་ཞུས་ན། དང་པོ། བཅོམ་ལྡན་འདས་ཀྱིས་དཔེའི་སྒོ་ནས་གསུངས་ཡོད་པ་འདི་ལྟར། གང་ཟག་ཅིག་ནད་ཚབས་ཆེན་གྱིས་མནར་བཞིན་ཡོད་ན་དང་པོ་ནད་ངོས་ཟིན་དགོས་པ་བཞིན། དང་པོ་སྡུག་བསྔལ་ཡིན་པ་ཤེས་དགོས་པར་གསུངས། གཉིས་པ། ནད་ཞི་བར་འདོད་ན་ནད་ཀྱི་རྒྱུ་ཟ་མ་དང་སྤྱོད་ལམ་ལ་སོགས་པ་གང་གིས་བསྐྱེད་ཡོང་ན་དེ་སྤང་དགོས་པ་བཞིན་ཀུན་འབྱུང་སྤང་དགོས་པར་གསུངས། གསུམ་པ། ནད་དེ་མེད་པར་གྱུར་ན་ལུས་སེམས་ལ་དགའ་བདེ་སྐྱེ་བ་བཞིན་དུ་སྡུག་ཀུན་གཉིས་འགོག་པའི་བདེན་པ་རང་གི་རྒྱུད་ལ་མངོན་དུ་བྱ་དགོས་གསུངས། བཞི་པ། དེ་ལྟ་བུའི་སྡུག་ཀུན་དང་བྲལ་བའི་འགོག་པ་ཟེར་བ་ཡང་རྒྱུ་མེད་རྐྱེན་མེད་དུ་མི་འབྱུང་བས། དཔེར་ན་ནད་ལས་གྲོལ་དགོས་ན་སྨན་བསྟེན་དགོས་པ་བཞིན་དུ། འགོག་པ་མངོན་དུ་བྱ་བའི་ཕྱིར་ལམ་ཡང་དག་པ་ཞིག་བསྒོམ་དགོས། དེའི་ཕྱིར་ལམ་རྒྱུད་ལ་བརྟེན་པར་བྱ་ཞེས་གསུངས།

སྡུག་བསྔལ་བདེན་པ།

དེའི་ནང་གི་དང་པོ་ནད་ངོས་ཟིན་དགོས་པ་བཞིན་དུ། ང་ཚོས་སྲིད་པ་ཁམས་གསུམ་འཁོར་བའི་གནས་གང་དུ་སྐྱེས་ཀྱང་སྡུག་བསྔལ་གྱི་རང་བཞིན་དང་སྡུག་བསྔལ་གྱི་ཡོ་ལང་། དཔེར་ན་མེའི་འོབས་དང་རལ་གྲིའི་སོ་སྟེང་དུ་མཆོངས་པ་ལྟ་བུ་མ་གཏོགས་བདེ་བའི་གོ་སྐབས་ཅུང་ཟད་ཙམ་ཡང་མེད་པ་ངོ་ཤེས་དགོས། འོ་ན་ཁམས་གསུམ་འཁོར་བའི་སེམས་ཅན་ཐམས་ཅད་སྡུག་བསྔལ་འབའ་ཞིག་གི་ནང་དུ་ཇི་ལྟར་ཆུད་ཡོད་པ་རེད་ཅེ་ན། ང་ཚོའི་ལུས་ལ་ན་ཚ་དང་སེམས་ལ་སྡུག་བསྔལ་འབྱུང་བ། དེ་བཞིན་དུ་རྒྱུ་རྫས་ལོངས་སྤྱོད་ཐོབ་མངའ་ཐང་སོགས་མི་ཐོབ་པ་དང་། གནས་སྐབས་མཐོན་པོ་གནམ་ལྟ་བུ་ཡིན་ཡང་དམའ་མོའི་ས་ལྟ་བུ་ལ་ལྷུང་བ་དེ་དག་ནི་སྡུག་བསྔལ་ཡིན་པར་སུས་ཀྱང་ཤེས་སླ་བ་ཡིན། དེ་ལ་འགྱུར་བའི་སྡུག་བསྔལ་ཟེར།

དེ་ནས་ང་ཚོས་བདེ་བར་རློམ་པའི་སྟོབས་འབྱོར་དང་མངའ་ཐང་། སྙན་གྲགས་ལ་སོགས་པ་ཐམས་ཅད་ཀུན་ཀྱང་སྡུག་བསྔལ་ཡིན། སྡུག་བསྔལ་ཡིན་པའི་ཚུལ་ཇི་ལྟར་ཡིན་ཞེ་ན། འབྱོར་བ་གཅིག་པུ་ལ་བསམ་བློ་བཏང་ན། འབྱོར་བ་གཅིག་ཡོད་ན་གཉིས་ཨེ་འཐོབ་བསམ། གཉིས་ཡོད་ན་གསུམ་ཨེ་འཐོབ་བསམ། དཔེར་ན་རྒྱལ་ཁབ་གཅིག་གི་སྲིད་འབྱོར་མཐའ་དག་ལ་དབང་བྱེད་རྒྱུ་ཡོང་ན་ཡང་། ད་དུང་རྒྱལ་ཁབ་གཞན་ཞིག་གི་འབྱོར་བ་ཨེ་འཐོབ་བསམ། སེམས་ཁ་མི་གང་བར་སླར་ཡང་འདོད་པ་ཁོ་ནས་གཡེང་སྟེ་སྡུག་བསྔལ་བ་ལས་བདེ་བ་གཏན་ནས་ཡོད་པ་མིན། དེ་བཞིན་རྒྱུ་རྫས་ལོངས་སྤྱོད་ལ་བསམ་བློ་བཏང་ན་ཡང་། དང་པོ་གསོག་དུས་ངལ་རྩོལ་རྣམ་པ་སྣ་ཚོགས་བྱས་ནས་སྡུག་བསྔལ་ཤིན་ཏུ་མང་པོ་མྱོང་དགོས་པ་ནི་གསོག་པའི་སྡུག་བསྔལ་ཡིན། བར་དུ་དགྲ་རྐུན་ལ་སོགས་པས་བརླག་འགྲོ་བར་བསམ་ནས་དོགས་པ་སྐྱེ་བ་བསྲུང་བའི་སྡུག་བསྔལ་ཡིན། ཐ་མ་ཉིན་མཚན་ཀུན་ཏུ་རྒྱུ་རྫས་ལོངས་སྤྱོད་རྣམས་གཅིག་གི་ཁར་གཉིས་དང་གཉིས་ཀྱི་ཁར་གསུམ་ཨེ་སོག་སྙམ་ནས་སྡུག་བསྔལ་འབའ་ཞིག་མྱོང་བ་མ་གཏོགས། རྒྱུ་རྫས་ལོངས་སྤྱོད་ཀྱིས་བདེ་བ་ཐོབ་ཚར་ཟེར་བ་ཞིག་རྩ་བ་ནས་ཡོད་པ་མིན།

རང་གིས་ལོངས་སུ་སྤྱོད་ཚུལ་ལ་བསམ་བློ་བཏང་ན། དཔེར་ན་ཨ་རིའི་རྒྱབ་ཁབ་གཅིག་གི་རྒྱུ་རྫས་ཚང་མ་མི་གཅིག་ལ་དབང་སྲིད་ན། དེས་ཀྱང་རང་གིས་ཟ་མ་ཞིམ་པོ་ལྟོ་འགྲངས་རེ་ཟོས། གོན་པ་འཇམ་པོ་དང་ཡག་པོ་རེ་གོན། ཉལ་ས་དང་གནས་ཁང་སྐྱིད་པོ་རེ་ལོས་དགོས། དེ་མ་གཏོགས་ལོངས་སུ་སྤྱོད་པའི་ནུས་པ་དང་སྤྱོད་པའི་དུས་ཚོད་ཀྱང་ཡོད་པ་མིན། དེའི་ཕྱིར་ན་ཁ་ཟས་རྒྱབ་གོས་ཙམ་ཞིག་མ་གཏོགས་གཞན་མང་པོ་ཞིག་ཡོད་ཀྱང་དགོས་པ་ཆེར་མེད་ལ། སྡུག་བསྔལ་མང་པོ་བསྐྱེད་པའི་རྒྱུ་ཡིན། གཞན་ཡང་འཛམ་བུ་གླིང་གི་རྒྱུ་རྫས་ཚང་མ་མི་གཅིག་ལ་དབང་ཡང་། རང་ཉིད་ཤི་བའི་སྐབས་སུ་རྒྱུ་རྫས་ཁབ་གཅིག་ཀྱང་འཁྱེར་བའི་དབང་ཆ་མེད། དེ་བཞིན་དུ་འཛམ་བུ་གླིང་གི་མི་ཐམས་ཅད་ཀྱི་དཔོན་པོ་ཡིན་ན་ཡང་། འཆི་བའི་སྐབས་མི་གཅིག་ཀྱང་འཁྲིད་དབང་མེད་པར་རང་ཉིད་གཅིག་པུ་རྒྱུས་མེད་ཀྱི་ཡུལ་དུ་གྲོགས་མེད་ཁེར་རྐྱང་ལ་ལག་སྟོང་མཆན་དུ་བཅུག་ནས་འགྲོ་དགོས་པའི་དུས་ཚོད་ཅིག་ཡོད་ན། ཡུན་ཐུང་འདི་ལ་རྒྱུ་རྫས་མང་པོ་ཞིག་ལ་ཆགས་བསྡད་ནས་དགོས་པ་ཡོད་པ་མིན།

དེས་ན་སངས་རྒྱས་ཀྱི་གསུང་གི་ནང་ན། འདོད་ཆུང་ཆོག་ཤེས་ཟེར་བ་ནི་བདེ་བ་དང་འབྱོར་བ་ཐམས་ཅད་ཀྱི་མཆོག་ཏུ་གྱུར་པ། ལྷའི་དབང་པོ་བརྒྱ་བྱིན་གྱིས་ཀྱང་རྙེད་དུ་མེད་པའི་ཡོ་བྱད་ཐམས་ཅད་ཀྱི་མཆོག་ཡིན་ཞེས་གསུངས་པའང་དངོས་གནས་དྲང་གནས་རེད། ཚང་མས་རྒྱུ་རྫས་ལོངས་སྤྱོད་སོགས་ལ་ཞེན་ཅིང་ཆགས་པར་མི་བྱ་བར་ཆོས་རྣམ་དག་རེ་བསྒྲུབ་རྒྱུ་གལ་ཆེ་བ་ཡིན། གཉེན་ཉེ་དུ་དང་གྲོགས་དགའ་མཛའ་སོགས་ཅི་ཙམ་མང་ན་དེ་ཙམ་ཞིག་དགའ་སྣང་འཆར་ཡང་། ངོ་མ་བཤད་ན་ཅི་ཙམ་མང་བ་དེ་ཙམ་གྱིས་སྡུག་བསྔལ་ཆེ་བ་ཡིན། དེ་དག་ཐམས་ཅད་ཀྱི་ཁ་ལ་ཟ་རྒྱུ་དང་རྒྱབ་ལ་གོན་རྒྱུ། འགལ་སྤང་མཐུན་སྒྲུབ་ཀྱི་བྱ་བ་མང་པོར་གཡེང་གཡེང་ནས་རང་ཉིད་སྡུག་བསྔལ་བར་འགྱུར་བ་མ་གཏོགས་ཕན་པ་ཅུང་ཙམ་ཡང་ཡོད་པ་མིན། དེ་ཐམས་ཅད་ཀུན་ཀྱང་སྡུག་བསྔལ་གྱི་སྣོན་པ་རེད།

དེ་བཞིན་དུ་ཐོབ་མངའ་ཐང་མཚན་སྙན་གྲགས་ལ་སོགས་པ་ཐམས་ཅད་ཀུན་ཀྱང་སྡུག་བསྔལ་ལས་མ་འདས་པ་ཡིན། སྤྱིར་བཏང་སྤྲང་པོ་ཞིག་གིས་རྒྱུ་རྫས་རེ་འཐོབ་པའི་རེ་བ་འགྲུབ་ཕྱིར་དང་། མི་དཀྱུས་མ་ཞིག་གིས་བྱ་བ་ལེགས་པོ་ཞིག་དང་གོ་ས་མཐོན་པོ་རེ་རང་གི་ལག་ཏུ་ལོན་པའི་ཆེད་ཅི་འདྲའི་དཀའ་ངལ་དང་སྡུག་བསྔལ་མང་དུ་མྱོང་དགོས་འདུག དེ་བས་ཀྱང་མཐོན་པོ་རྣམས་ལ་གོ་ས་དམའ་སར་ལྷུང་བའི་དོགས་པ་དང་། ད་རུང་དེ་ལས་ཡར་ལ་ཨེ་འགྲོ་བསམ་ནས་མཐོ་བའི་རེ་བ་སོགས་སེམས་སྡུག་མང་བ་ཡིན། རང་བཞིན་གྱི་མི་དཀྱུས་མ་ཞིག་ལས་མཚན་སྙན་གྲགས་ཅན་གྱི་དཔོན་པོ་སོགས་རེ་བ་དང་དོགས་པ་གཉིས་ཀ་བརྒྱ་འགྱུར་སྟོང་འགྱུར་གྱིས་་ཆེ་བ་ཡིན་ལ། དེ་ཡང་སྡུག་བསྔལ་གྱི་སྣོན་མ་རེད།

དཔེར་ན་དམའ་མོས་ཁོ་རང་ལ་ཟ་རྒྱུ་གོན་རྒྱུ་གང་ཅིའི་ཐད་ནས་ཡར་ལ་ཨེ་འགྲོ་བསམ་པ་མ་གཏོགས་དམའ་སར་ལྷུང་བའི་དོགས་པ་ཡོད་པ་མིན། མཐོན་པོ་རྣམས་ཡར་མཐོན་པོའི་གོ་སར་རེ་བ་ཆེ་བའི་སྟེང་དམའ་སར་ལྷུང་བའི་དོགས་པ་ཡང་ཡོད་པས་རེ་དོགས་གཉིས་ཀྱི་སྡུག་བསྔལ་ཡོད་པ་ཡིན། ངན་པ་དེར་རེ་བའི་སྡུག་བསྔལ་མ་གཏོགས་སྔ་མ་ལ་ལྟོས་ན་དོགས་པའི་སྡུག་བསྔལ་དེ་ཙམ་མེད། དེའི་ཕྱིར་ན་མཐོ་བ་ལའང་སྡུག་བསྔལ་ཡོད། མི་ཕལ་བ་ཞིག་ཡིན་ན་བྱ་བ་ཡག་པོ་ཞིག་ལོན། ཟས་གོས་སོགས་ལ་དཀའ་ངལ་མ་ཡོད་ན་མཚན་སྙན་དང་ཐོབ་གོ་ས་སོགས་གཞན་རེ་དོགས་མང་པོ་ཞིག་དེ་ཙམ་མེད་པས་མཚན་མོར་གཉིད་ཀྱང་སྐྱིད་པོ་ཁུག་པ་ཡིན། མི་གོ་གནས་ཅུང་ཆེ་བ་ཞིག་ཡིན་ན། མཚན་གང་བོར་རང་གཞན་གྱི་དོན་དག་འདྲ་མིན་སྣ་ཚོགས་ལ་བསམ་བློ་བཏང་ནས་གཉིད་མི་ཁུག་པའི་སྡུག་བསྔལ་ཡང་ཡོང་རྒྱུ་རེད།

དེ་ནས་རྒྱུ་རྫས་ལོངས་སྤྱོད་དང་མཚན་སྙན་གྲགས་ལ་སོགས་པ་ཐམས་ཅད་འཛོམས་པའི་དབང་དུ་བྱས་ནའང་། རྟག་པ་དང་བརྟན་པ་མེད་པའི་ཕྱིར་ན་དེ་ཡང་སྡུག་བསྔལ་གྱི་རང་བཞིན་ཡིན། དཔེར་ན་ཚེ་སྟོད་ཕྱུག་པོ་ཡིན་ཡང་ཚེ་སྨད་སྤྲང་པོ། ཚེ་སྟོད་མཐོན་པོ་ཡིན་ཡང་ཚེ་སྨད་དམའ་མོ། དེར་མ་ཟད་ཟླ་བ་སྔོན་མ་ལ་རྒྱུ་རྫས་སྟོབས་འབྱོར་གང་ཅིའི་ཐད་ནས་ཕུན་སུམ་ཚོགས་པ་ཡིན་ནའང་། ཟླ་བ་རྗེས་མ་ལ་ཤིན་ཏུ་ཉམ་ཐག་པ་དང་སྡུག་པོ་ཡོང་རྒྱུ་མང་པོ་རེད། དེས་ན་གང་ལ་ཡང་ཞེན་ཆགས་མེད་པ་ནི་བདེ་སྐྱིད་ཀྱི་རྩ་བ་ཡིན། སྟོབས་འབྱོར་དང་སྙན་གྲགས་མི་བསྒྲུབ་མཁན་གཅིག་ཀྱང་ཡོད་རྒྱུ་མ་རེད། ཡིན་ནའང་རང་ལ་སྔོན་བསགས་ཀྱི་ལས་བཟང་པོ་ཞིག་ཡོད་ན་ཆེད་དུ་མ་བསྒྲུབས་ཀྱང་འགྲུབ་ཡོང་རྒྱུ་རེད། ལས་བཟང་པོ་མ་ཡོད་ན་སྐྱེས་ནས་ཤི་མ་སོང་གི་བར་དུ་འབད་རྩོལ་རྣམ་པ་སྣ་ཚོགས་བྱས་ནའང་། དེ་ལ་རྒྱུ་རྫས་དང་མཚན་སྙན་གྲགས་མི་ཐོབ་པའི་ཕྱིར་ན་ཐམས་ཅད་ཆམ་གྱིས་འཇོག་པ་མ་གཏོགས། སྒྲུབ་ཁུལ་བྱས་རུང་འཁོར་བའི་བྱ་གཞག་གྲུབ་པའི་དུས་ཚོད་ཅིག་དཀའ་མོ་ཡིན།

དེ་སྔོན་ཡོད་མྱོང་བའི་འཁོར་བའི་བདེ་འབྱོར་སྙན་གྲགས་སོགས་དང་། མི་ཚེ་གཅིག་ལ་སྡུག་བསྔལ་མྱོང་བ་དེ་དག་ཐམས་ཅད་དྲན་རྒྱུ་ཞིག་ལོས་ཡོད་མ་གཏོགས། ཚུར་ལ་ཡོང་རྒྱུ་མེད་པ་དཔེར་ན་མདང་སུམ་རྨིས་པའི་རྨི་ལམ་དང་གཅིག་པ་ཡིན། རྨི་ལམ་དུ་ཡུན་རིང་པོའི་བར་དུ་བདེ་བ་མྱོང་བ་རྨིས་ན་འདྲ། སྡུག་བསྔལ་མྱོང་བ་རྨིས་ནའང་འདྲ། ཕྱིར་དྲན་ཙམ་མ་གཏོགས་བདེ་བ་སྡུག་བསྔལ་དེ་དག་སླར་ཡང་ཡོང་རྒྱུ་ཡོད་པ་མིན། དེ་བཞིན་དུ་ནམ་ཞིག་འཆི་བའི་གནས་སྐབས་སུ། མི་ཚེ་གང་པོར་བདེ་མོ་སྐྱིད་པོ་མྱོང་བ་དང་མི་ཚེ་གང་པོར་སྡུག་བསྔལ་དང་མི་འདོད་པ་མྱོང་བ་གཉིས་ཀ་སྙིང་པོ་མེད་པ་འདྲ་མཉམ་ཡིན། དེའི་ཕྱིར་ན་བདེ་འབྱོར་སྙན་གྲགས་སོགས་ལ་ཆགས་མི་རུང་། སྟོན་པ་ཐུགས་རྗེ་ཅན་གྱིས། དཔེར་ན་མི་གཙང་བའི་ཁང་པའི་ནང་དུ་བསྣམས་ན་དྲི་ངན་མ་གཏོགས་དྲི་ཞིམ་རྩ་བ་ནས་བྲོ་རྒྱུ་མེད། དེ་བཞིན་དུ་འགྲོ་བ་རིགས་དྲུག་གང་དུ་སྐྱེས་ཀྱང་། སྡུག་བསྔལ་མ་གཏོགས་བདེ་བའི་གོ་སྐབས་རྩ་བ་ནས་མེད་གསུངས་པ་ལ་ཞིབ་མོར་བསམ་བློ་བཏང་ན། བདེ་བ་སྡུག་བསྔལ་གཉིས་ཆར་ཡང་སྡུག་བསྔལ་ཡིན་པས་བདེ་བ་མེད་པ་ཤེས་དགོས་པ་ཡིན། དེ་ལྟ་བུའི་འཁོར་བ་མཐའ་དག་སྡུག་བསྔལ་གྱི་རང་བཞིན་ཅན་དུ་ཤེས་ན། འཁོར་བ་འདི་ལས་ཐར་འདོད་དང་། འདིར་མི་འདུག་སྙམ་པའི་བསམ་པ་བཅོས་མ་མ་ཡིན་པ་ཞིག་རྒྱུད་ལ་སྐྱེ་ཡོང་བ་ཡིན།

ཀུན་འབྱུང་བདེན་པ།

སྡུག་བསྔལ་དང་འབྲལ་བར་འདོད་ན་སྡུག་བསྔལ་སྐྱེད་བྱེད་ཀྱི་རྒྱུ་སྤང་བར་བརྩོན་དགོས་པ་རེད་མ་གཏོགས། སྡུག་བསྔལ་ཁོ་རང་ཐད་ཀར་སྤང་ཐབས་མེད། སྡུག་བསྔལ་གྱི་རྒྱུ་ནི་ཀུན་འབྱུང་ཡིན་ཞིང་། ཀུན་འབྱུང་ལ་ཉོན་མོངས་པ་དང་ལས་གཉིས་ཡོད། ཉོན་མོངས་པ་ཡང་རིགས་བསྡུ་ན་འདོད་ཆགས་དང་། ཞེ་སྡང་། གཏི་མུག་སྟེ་རྣམ་པ་གསུམ་ཡོད་པ་ལས། འདོད་ཆགས་ཞེས་པ་གང་ཡིན་ཞེ་ན། རྒྱུ་རྫས་ལོངས་སྤྱོད་དང་། ཐོབ་མངའ་ཐང་། གྲོགས་དགའ་མཛའ། མདོར་ན་ཡིད་འོང་གི་དངོས་པོ་གང་དང་གང་ལ་ཆགས་ཀྱང་དེ་ལ་འདོད་ཆགས་ཟེར་བ་ཡིན། དེའི་དབང་དུ་སོང་ན་སྡུག་བསྔལ་མུ་མཐའ་མེད་པ་འབྱུང་བ་ཡིན་པས། ཐོག་མར་འདོད་ཆགས་སྤང་བའི་ཐབས་ལ་བརྩོན་དགོས།

ཞེ་སྡང་ཞེས་པ་གཞན་ལ་ཁོང་འཁྲུགས་ནས་གཞན་གྱི་སྟེང་ལ་ཚིག་པ་ཟ་བ་ལ་ཟེར། ཞེ་སྡང་ནི་རྒྱུ་ཅི་ཞིག་གིས་བསྐྱེད་ཅེ་ན། རང་དང་རང་གི་དགའ་ས་མཐུན་གྲོགས་དང་ཉེ་རིང་རྩ་གསུམ་ཐམས་ཅད་ལ་གནོད་པ་བསྐྱལ་སོང་བསམ་པ་དང་། རང་གི་དགྲ་ལ་གཞན་གྱིས་ཕན་བཏགས་པ་དེ་ཡང་ཞེ་སྡང་སྐྱེ་བའི་རྒྱུ་ཡིན། དེ་ཐམས་ཅད་རྩ་བ་ནས་མ་སྤངས་ན་སྡུག་བསྔལ་མུ་མཐའ་མེད་པ་མྱོང་བས་ཞེ་སྡང་ཡང་སྤང་དགོས།

གཏི་མུག་ཅེས་པ་ནི་བླང་དོར་གྱི་གནས་ལ་རྨོངས་པས་དགེ་བ་བསྒྲུབ་མི་ཤེས་པ་དང་སྡིག་པ་སྤང་མི་ཤེས་པ་སོགས་ཅི་ཡང་མི་ཤེས་པ་ལ་ཟེར། གཏི་མུག་ལ་ནང་གསེས་སུ་མ་རྟོགས་པ་དང་ལོག་པར་རྟོགས་པ་གཉིས་ཡོད་པ་ལས། མ་རྟོགས་པ་ཟེར་བ་ནི་ད་ལྟའི་རང་ཅག་ཚང་མ་ལྷོ་རྒྱལ་འཛམ་བུ་གླིང་དུ་སྐྱེས། རིགས་བཟང་པོ་འགྲོ་བ་གཞན་དང་མི་འདྲ་བའི་མིའི་རིགས་སུ་སྐྱེས་ཡོད་ནའང་། དགེ་སྒྲུབ་སྡིག་སྤོང་གི་ཐབས་ལ་མི་བརྩོན་པ་དང་། གྲུབ་མཐའ་གཞན་གང་ལ་ཡང་མི་ཞུགས་པར་ཅི་འབྱུང་གང་ཤར་གྱིས་བསམ་བློ་ཅི་ཡང་མེད་པར་འདུག་པ་ནི། དཔེ་བཞག་ན་རྟ་དང་བ་གླང་ལྟ་བུ་རེད། རྟ་དང་བ་གླང་གིས་ཀྱང་ཟ་མ་ཟ་བ་དང་མི་འདོད་པ་ལ་གཟུར་བ་ཙམ་ཞིག་ཤེས་པ་ཡིན། དེས་ན་རྟ་དང་བ་གླང་ལ་གོན་པ་མེད་པ་དང་མི་རྣམས་ལ་གོན་པ་གྱོན་རྒྱུ་ཡོད་པ་ཙམ་མ་གཏོགས་ཁྱད་མེད་པ་ཡིན།

སྤྱིར་འཛམ་བུ་གླིང་འདིར་ཆོས་ལུགས་ཆེན་པོ་གསུམ་དང་ཆོས་ལུགས་ཆུང་ཆུང་མི་འདྲ་བ་མང་པོ་ཡོད། དེ་དག་གང་རུང་ཞིག་ལ་རང་ཉིད་ཞུགས་དགོས་པ་རེད་མ་གཏོགས། གང་ལའང་མི་ཞུགས་པར་རང་དགར་ཅི་འབྱུང་གང་ཤར་བྱས་ནས་བསྡད་ན་རྨོངས་པ་ཚབས་ཆེན་ཡིན། དཔེར་ན་ང་ཉེ་སྔོན་ཁཱ་ལི་ཧྥོར་ནེ་ཡ་（State of California）ཟེར་བའི་ཡུལ་ཁམས་ལ་ཐོན་དུས། དེ་ན་གསོད་ངེས་ཅན་གྱི་བ་གླང་མང་པོ་འདུག ཁོ་ཚོས་རྩྭ་ཁ་ན་སྐྱིད་སྐྱིད་ངང་རྩྭ་ཟོས་ནས་བསྡད་འདུག་པ་ལས། གཅིག་ཀྱང་འབྲོ་བའི་ཐབས་ལ་བརྩོན་གྱིན་མི་འདུག དེ་བཞིན་དུ་མི་རྣམས་ལ་ཕུགས་བསམ་ཅི་ཡང་མེད་ཅིང་ཆོས་ལུགས་གང་ཡང་མི་དགོས་བསམས་ནས་ཟ་རྒྱུ་འཐུང་རྒྱུ་རྐྱང་པ་བསྒྲུབས་ཏེ་བསྡད་ན། བ་གླང་ལས་ཀྱང་ཐ་ཆད་པ་ཡིན་པས་དེ་ལྟ་བུ་ནི་རྩ་བ་ནས་མི་རུང་།

ལོག་པར་རྟོགས་པ་ནི་དད་པ་ཅུང་ཟད་ཡོད་ཀྱང་དངོས་པོའི་གནས་ལུགས་ཕྱིན་ཅི་ལོག་ཏུ་རྟོགས་པ་ལ་ཟེར། དེ་ནས་རང་ཉིད་ཞུགས་སའི་ཆོས་ལུགས་ལའང་གཟབ་གཟབ་བྱས་ཏེ། ཡང་དག་ཡིན་མིན་ལ་རང་གིས་དཔྱད་པ་དང་གཞན་ལ་འདྲི་དགོས་པ་རེད་མ་གཏོགས། བརྟག་དཔྱད་ཅི་ཡང་མི་བྱེད་པར་ཆོས་ལུགས་གང་ཐུག་ལ་ཞུགས་པ་དེའང་བཟང་པོ་མ་རེད། དཔེར་ན་ངེད་ཅག་གིས་ཉིན་གཅིག་གི་ཟ་མ་ལའང་ཞིམ་མི་ཞིམ་དང་ཡག་བརྩོག དུག་སོགས་འདྲེས་ཡོད་མེད་ལ་བརྟག་དཔྱད་ཞིབ་མོར་དགོས་ན། ཚེ་རབས་གཏན་གྱི་དོན་ཆེན་ཆོས་ལ་ཞིབ་མོར་བརྟག་དགོས་པ་ནི་སྨོས་མ་དགོས་པ་ཡིན། མི་ལ་ལ་ཞིག་རྒྱུ་མཚན་ཅི་ཡང་མེད་པར་ཆོས་ལུགས་གཅིག་ལ་དགའ་བ་དང་ཆོས་ལུགས་གཞན་ལ་སྡང་བ་དེ་འདྲ་བྱ་མི་རུང་། རིགས་པ་དྲང་པོའི་ལམ་ནས་རང་གི་ཚེ་གང་གི་འགྲོ་ཆུས་འདུག་ཆུས་ལ་གཟབ་གཟབ་བྱས་ནས། ཆོས་ཡང་དག་པ་གང་ཡིན་དང་ཕྱིན་ཅི་ལོག་པ་གང་ཡིན། ཕན་འབྲས་ཆེ་བ་དང་ཕན་འབྲས་དེ་ཙམ་མེད་པའི་ཆོས་གང་རེད་བསམས་ནས་བརྟག་དཔྱད་ཞིབ་མོ་བྱེད་དགོས་པ་རེད་མ་གཏོགས། ཆོས་ལུགས་ལ་ཐད་ཀར་ཞུགས་པ་ལས་དཔྱད་པ་ཅི་ཡང་བྱེད་མི་ཤེས་པ་ལ་གཏི་མུག་ཟེར་བ་ཡིན་པས་དེ་ཡང་སྤང་དགོས།

དེ་ནས་འཛམ་བུ་གླིང་གི་ཆོས་ལུགས་ནང་དུའང་། འགའ་རེས་གཞན་ལ་ལོག་གཡེམ་བྱེད་པ་དང་གཞན་གྱི་རྒྱུ་རྫས་རྐུ་འཕྲོག་ལ་སོགས་པ་བྱས་ན་དགེ་བ་ཡིན་ཟེར་ནས་བཤད་མཁན་ཡོད་ལ། དེ་བཞིན་དུ་མི་མང་པོ་གསད་རྒྱུ་དང་སེམས་ཅན་གཞན་ལ་འཚེ་བ་བྱེད་པ་ཡང་དགེ་བ་ཡིན་ཟེར་ནས་བཤད་མཁན་ཡང་ཡོད་མོད། དེ་དག་ལ་བསམ་བློ་ཞིབ་པར་ཐོང་དང་། དེ་ལྟ་བུའི་འདོད་ཆགས་དང་ཞེ་སྡང་གི་ལས་ནི་ཚེ་འདིའི་རྒྱལ་ཁབ་ཀྱི་ཁྲིམས་ལུགས་དང་ཡང་འགལ་བ་ཡིན་ན། ཕྱི་མའི་བདེ་བ་ཐོབ་ཐབས་ཤིག་མིན་པ་སྨོས་མ་དགོས། དེ་ལྟ་བུའི་ཆོས་ལུགས་ངན་པ་ལ་རྩ་བ་ནས་ཞུགས་མི་རུང་ལ། གཞན་ལ་གནོད་བསྐྱལ་བས་རང་ལ་ཕན་པ་མི་འབྱུང་བ་ཤེས་དགོས་པ་ཡིན། ཡང་ཆོས་ལུགས་འགའ་རེས་ནི་བདེ་བ་བསྒྲུབ་ཐབས་ལ་བརྩོན་གྱིན་ཡོད་ཀྱང་རང་ཉིད་གཅིག་པུ་དང་། རང་གི་འཁོར་འདབ། རང་གི་ཆོས་ལུགས་འཛིན་མཁན་རྐྱང་པ་ལ་ཕན་གདགས་རྒྱུ་མ་གཏོགས་གཞན་ལ་བསམ་བློ་མི་གཏོང་བ་ལྟ་བུའང་ཡོད། དེ་ནི་འཇིག་རྟེན་ཕལ་བ་ཞིག་ལས་ཅུང་ཙམ་བཟང་བ་ལྟ་བུ་ཡོད་ཀྱང་། རང་ཕྱོགས་ཁོ་ན་ལ་ཕན་པ་བསྒྲུབས་པས་ཆོས་ལུགས་བཟང་པོ་མིན།

དེས་ན་ཆོས་ལུགས་གང་དང་གང་ཡིན་ཡང་རང་དང་སེམས་ཅན་གཞན་ཚང་མ་ལ་ཕན་པ་སྒྲུབ་པའི་ཆོས་ནི་བཟང་པོ་ཡིན་པས། དེ་ལྟ་བུ་གང་ན་ཡོད་པ་དེ་དང་དུ་ལེན་དགོས་པ་ཡིན། དེ་བཞིན་རང་གཞན་གཉིས་ཀའི་དོན་དུ་བསམ་པ་བཟང་པོ་ཙམ་གྱིས་ཀྱང་ཕན་པ་རྒྱ་ཆེན་པོ་འབྱུང་ཐུབ་པ་མིན། དཔེར་ན་རྒན་མོ་ལག་རྡུམ་མའི་བུ་ཆུས་ཁྱེར་བ་ལྟ་བུ་སྟེ། རྒན་མོ་ལག་པ་གཉིས་ཀ་མེད་པ་ཞིག་གི་བུ་ཆུས་ཁྱེར་སོང་ན། བུ་འདི་ཆུས་མ་ཁྱེར་ན་སྙམ་པའི་སྙིང་རྗེ་ཚད་མེད་སྐྱེས་པ་ལས་ཕན་མི་ཐོགས། དེས་ན་ཕ་དཔའ་བོའི་བུ་གཡུལ་དུ་ལུས་པ་ལྟ་བུའི་སྙིང་སྟོབས་དང་ལྡན་པའི་སྒོ་ནས། རང་གཞན་གཉིས་ཀ་ལ་ཕན་པ་སྒྲུབ་བྱེད་ཀྱི་ཐབས་གང་ན་ཡོད་པ་དེ་ལ་ཞུགས་དགོས་པ་ཡིན།

དེ་ལྟ་བུའི་རང་གཞན་གཉིས་ཀར་ཕན་པའི་ཐབས་ཡང་དག་པ་ནི་རིགས་པ་རྣམ་དག་གིས་གྲུབ་ཅིང་། ཉམས་མྱོང་གིས་གྲུབ་པ། ཡིད་ཆེས་པའི་ཁུངས་དང་ལྡན་པ་སྟེ་ཚད་མ་གསུམ་གྱིས་གྲུབ་པ་ཞིག་ཡིན་དགོས། དེ་ཡང་སྔོན་ཆད་ཀྱི་མཁས་པ་དང་གྲུབ་པ་མང་པོས་གཏན་ལ་ཕབ་ཡོད་པའི་བསྟན་བཅོས་ཀྱི་ཁུངས་ཡོད་དགོས་པ་རེད་མ་གཏོགས། མི་གཅིག་དང་གཉིས་ཀྱིས་བསམ་བློ་བཏང་ནས་དེའི་སྟེང་དུ་ཚོད་འཇོག་བྱས་ཏེ་བཞག་པ་ཙམ་ཞིག་གིས་གནད་ཐོག་ཏུ་ཁེལ་མི་ཐུབ་པས་ཆོས་ལ་ཐོག་མར་ཁུངས་ཤིག་ཡོད་དགོས། དེ་བཞིན་རིགས་པས་མ་གྲུབ་ཀྱང་ཁོས་བཤད་པ་དེ་ཡིན་དགོས་ཟེར་བའི་དབང་ཆ་ཆེན་པོ་ཅན་གྱི་མི་ཞིག་གི་སྐད་ཆ་ལྟར། ཁོ་བོའི་ཆོས་ལ་འབྲེལ་བ་བཞག་ན་བདེ་མོ་སྐྱིད་པོ་ཡོང་རྒྱུ་དང་། འགལ་ན་སྡུག་བསྔལ་དང་མི་འདོད་པ་ཡོང་བ་རེད་ཟེར་བ་ཙམ་གྱིས་ཡིད་མི་ཆེས་པར་རིགས་པ་རྣམ་དག་གིས་གྲུབ་པ་ཞིག་ཡིན་དགོས། དེ་ནས་ཉམས་མྱོང་གིས་ཀྱང་གྲུབ་དགོས་ཏེ། ཆོས་ལུགས་འདི་བསྒྲུབས་ན་གནས་སྐབས་དང་མཐར་ཐུག་གི་འབྲས་བུ་འདི་འདྲ་འབྱུང་ཞེས་པའི་ལོ་རྒྱུས་དང་ལྡན་པ་ཞིག་དགོས་པ་རེད་མ་གཏོགས། འབྲས་བུ་འདི་ཡིན་མེད་པར་རང་དགར་མང་པོ་ཞིག་བཤད་ཀྱང་ཕན་པ་མེད།

དེས་ན་འཛམ་བུ་གླིང་འདིར་སེམས་ཅན་ལ་ཕན་པ་དང་བདེ་བའི་ཐབས་ལ་བརྩོན་པའི་ཆོས་ལུགས་ཇི་སྙེད་ཅིག་ཡོད་པ་ཐམས་ཅད་ཀྱང་། སངས་རྒྱས་ཤཱཀྱ་ཐུབ་པའི་འཕྲིན་ལས་དང་ཐུགས་རྗེ་ཁོ་ནའི་དབང་གིས་དེ་ལྟར་སྣང་བ་ཡིན། དཔེར་ན་ཧུན་དྷུའི་ཆོས་ལུགས་རང་གི་ཟེར་སྲོལ་གྱི་དབང་དུ་བྱས་ན། ཤཱཀྱ་ཐུབ་པ་ཁྱབ་འཇུག་གི་སྤྲུལ་པ་ཡིན་ཟེར་བ་དང་། སངས་རྒྱས་ཆོས་ལུགས་ཀྱི་དབང་དུ་བྱས་ན། དབང་ཕྱུག་ཆེན་པོ་སྤྱན་རས་གཟིགས་ཀྱི་སྤྲུལ་པ་ཡིན་ཟེར། དེའང་ཆོས་ལུགས་དེར་གནས་སྐབས་སམ་ཚེ་འདིའི་བདེ་བ་སྒྲུབ་པ་ཙམ་ཡོད་པ་དེའང་སངས་རྒྱས་ཀྱི་ཐུགས་རྗེ་ཡིན། ཡེ་ཤུའི་ཆོས་ལུགས་ལྟ་བུ་ལ་མཚོན་ན། རྩ་བ་སེམས་ཅན་རྣམས་ལ་བྱམས་པ་དང་སྙིང་རྗེ་སྒོམ་པ་ཡིན་ལ། དེ་ནི་སངས་རྒྱས་ཆོས་ལུགས་ཀྱི་སྙིང་པོ་མཐར་ཐུག་པ་ཡིན། དེ་ཡང་ཕལ་ཆེར་སངས་རྒྱས་ཀྱི་འཕྲིན་ལས་ཀྱི་དབང་གིས་སྣང་བ་ཡིན།

དེས་ན་སུ་དང་སུ་ཡིན་ཡང་འཛམ་བུ་གླིང་འདིར་དར་བའི་ཆོས་ལུགས་ལ་ཕྱོགས་རིས་དང་ཆགས་སྡང་མི་བྱེད་པར། ཆོས་ལུགས་ཚང་མ་ཕན་ཚུན་འགྲིག་པོ་དང་མཐུན་མོ་བྱེད་པ་ནི་མེད་དུ་མི་རུང་བའི་རྩ་བ་ཞིག་ཡིན། ངོ་མ་བཤད་ན། ལུང་དང་རིགས་པ། ཉམས་མྱོང་གསུམ་གྱིས་གྲུབ་པ་ནི་སངས་རྒྱས་ཀྱི་གསུང་ཡིན་པ་ལས་གཞན་པ་ཚོ་ལ་ཅུང་དཀོན་མོ་ལྟ་བུ་ཡིན། དེ་ཞིབ་ཀྱིས་ཤེས་པར་འདོད་ན་གྲུབ་མཐའ་སོ་སོའི་ཆོས་ལུགས་ཀྱི་ཡིག་ཆ་ལ་བལྟས་ན་གོ་བ་སྐྱེ་རྒྱུ་ཡོད་པ་རེད་མ་གཏོགས། དེ་རིང་ཉི་མ་གཅིག་གིས་སངས་རྒྱས་ཆོས་ལུགས་ཀྱི་ཁྱད་ཆོས་དང་ཆོས་ལུགས་གཞན་པའི་འདོད་ཚུལ་འདི་ལྟ་བུ་ཡིན་ཞེས་འཆད་དགོས་ན་བཤད་ཐུབ་རྒྱུ་དཀའ་མོ་རེད། མདོར་ན་ལོ་སྟོང་ཕྲག་གཅིག་གཉིས་རིང་གི་ཡིག་བཞག་ཚང་མ་ལ་ལྟོས་དང་གསལ་པོར་ཡིད་ཆེས་སྐྱེ་ཡོང་བ་ཡིན།

ང་ལྟ་བུ་ལ་མཚོན་ན་སྐྱེས་ཙམ་ཉིད་ནས་སངས་རྒྱས་ཀྱི་བསྟན་པའི་ལྷག་ཞབས་སུ་སྐྱེས་པའི་ནང་པ་སངས་རྒྱས་པ་ཞིག་ཡིན་མོད། འོན་ཀྱང་ང་ནང་པ་སངས་རྒྱས་པ་ཡིན་བསམས་ནས་རང་ཕྱོགས་ལ་ཆགས་ཞེན་དང་གཞན་ཕྱི་རོལ་པའི་ཆོས་ལུགས་ལ་སྡང་བ་བྱེད་མ་མྱོང་། ངས་ཡུན་རིང་པོའི་བར་དུ་ཆོས་ལུགས་རྣམས་ལ་ཞིབ་འཇུག་བྱས་པའི་སྟོབས་ཀྱིས་བཟང་ངན་འབྱེད་ཤེས་པ་ཙམ་ཡིན།

སྤྱིར་དེང་སང་གི་དུས་སུ་སངས་རྒྱས་ཀྱི་བསྟན་པ་ལ་ལྷོ་ཕྱོགས་སུ་བརྒྱུད་པ་དང་། རྒྱ་ནག་ནས་བརྒྱུད་པ། བོད་བརྒྱུད་དང་གསུམ་ཡོད་པ་ལས། ངས་བོད་བརྒྱུད་ཀྱི་ནང་ཆོས་ལ་ཡུན་རིང་པོའི་བར་དུ་སློབ་སྦྱོང་དང་བརྟག་དཔྱད་བྱས་པའི་གྲུབ་འབྲས་ལ། སངས་རྒྱས་ཀྱི་བསྟན་པ་ནི་རྨད་དུ་བྱུང་བའམ་ཕུལ་དུ་བྱུང་བ་ཞིག་ཡིན་པར་ཡིད་ཆེས་རྙེད་པས་ཁྱེད་རྣམ་པ་ལ་དེ་ལྟར་ཞུས་པ་ཡིན། ཁྱེད་རྣམ་པ་ཚང་མས་ཀྱང་དུས་ད་ནས་བཟུང་ཆོས་ཀྱི་བཟང་ངན་ལ་བརྟག་དཔྱད་ཞིབ་མོ་གྱིས་ལ། རང་ཉིད་འཇུག་དགོས་ས་གང་ཡིན་སོགས་ལ་གཟབ་གཟབ་བྱས་ནས་ཞུགས་དགོས། རང་དགར་བརྟག་དཔྱད་ཅི་ཡང་མི་བྱེད་པར་ཆོས་སྒོར་འཇུག་རྒྱུ་ནི། ང་ཚོ་བོད་ཀྱི་གཏམ་དཔེ་ལ་ཁྱི་ལྟོགས་དང་གློ་བ་འཕྲད་པ་ལྟ་བུ་ཟེར་བ་ཡིན། སེམས་ཅན་གྱི་ཁོག་པའི་ནང་གི་གློ་བ་ནི་ཤ་གཞན་ལས་ཆེས་ངན་པ་དེ་ཡིན་ཡང་། ཁྱི་ལྟོགས་ཀྱིས་བརྟག་ལོང་མེད་པར་ཟ་བ་བཞིན་དུ། ཆོས་ལུགས་གང་གི་གྲུབ་མཐའ་དང་འཕྲད་ཀྱང་དཔྱད་པ་མི་བྱེད་པར་རྗེས་སུ་འཇུག་པ་ནི་རྩ་བ་ནས་མི་རུང་བ་ཡིན།

སྡུག་བསྔལ་གྱི་རྒྱུ་ཉོན་མོངས་པ་འདོད་ཆགས་དང་། ཞེ་སྡང་། གཏི་མུག་གསུམ་ཐོག་མར་ངོས་ཟིན་པར་བྱས་ནས་སྤོང་བའི་ཐབས་ལ་བརྩོན་དགོས། དེའི་འཕྲོར་སྡུག་བསྔལ་གྱི་རྒྱུ་གཉིས་པ་ནི་ལས་མི་དགེ་བ་ཡིན། དེ་ཡང་དང་པོ་འགྲོ་བ་གཞན་གྱི་སྲོག་གཅོད་པ་སུ་དང་སུ་ཡིན་རུང་སྤང་དགོས། ཆོས་ལུགས་གཞན་པ་འགའ་རེས་མི་མ་བསད་ན་གཞན་བསད་ཀྱང་སྐྱོན་མེད་ཟེར་བའང་ཡོད་མོད། དེ་ལ་བསམ་བློ་བཏང་ན། སེམས་ཅན་སུ་ཡིན་ཡང་འཆི་བ་ལ་འཇིགས་སྐྲག་དང་སྡུག་བསྔལ་ཡོད་པས་ཐམས་ཅད་གསོད་མི་རུང་། དཔེར་ན་གྲོག་མ་ཆུང་ཆུང་གཅིག་ལ་མཚོན་ན། རང་གི་སྲོག་ལ་ཕངས་སེམས་ཆེ་ཞིང་སྲོག་ལ་གནོད་པ་མི་འབྱུང་པའི་ཕྱིར་དུ་འབྲོ་བ་དང་སྲུང་བའི་ཐབས་ལ་བརྩོན་པ་བཞིན་ཐམས་ཅད་འདྲ་བ་ཡིན། རང་ལ་སྡུག་བསྔལ་ཅི་འདྲ་ཡོད་ན་གཞན་ལ་ཡང་དེ་ལྟར་ཡོད་པས་དོན་དང་པོ་སྲོག་གཅོད་པ་རྩ་བ་ནས་སྤང་དགོས།

གཉིས་པ་རྐུ་བྱེད་མི་རུང་སྟེ། གཞན་གྱིས་བདག་ཏུ་བཟུང་བའི་རྒྱུ་རྫས་ལོངས་སྤྱོད་ཅིག་རང་འདོད་ཡིད་བྱེད་ཀྱི་བསམ་པས་བརྐུས་ན། གཞན་སྡུག་བསྔལ་དང་གནོད་པ་ལ་སྦྱོར་བར་མ་ཟད་རང་ཡང་བརྒྱུད་ནས་སྡུག་བསྔལ་བར་འགྱུར་བའི་ཕྱིར་ན། གཞན་གྱི་རྒྱུ་ཆེ་ཕྲ་གང་ཡིན་ཡང་མི་བརྐུ་བའི་ཐབས་ལ་བརྩོན་དགོས།

གསུམ་པ་རྫུན་བཤད་མི་རུང་སྟེ། རྫུན་གྱིས་གཞན་ལ་མགོ་སྐོར་ཆེན་པོ་བཏང་ན་གཞན་ལ་གནོད་པ་ཚབས་ཆེན་དང་སྡུག་བསྔལ་ལ་སྦྱོར་བ། རང་ཡང་དམ་པའི་ཚུལ་ལུགས་ལས་ཉམས་པར་འགྱུར་བ་ཡིན་པའི་ཕྱིར་ན་རྫུན་སྨྲ་བ་དེའང་སྤང་དགོས།

བཞི་པ་འདོད་པས་ལོག་པར་གཡེམ་པ་ནི། གཞན་གྱིས་བདག་ཏུ་བཟུང་བའི་བུད་མེད་དང་སྐྱེས་པ་སུ་ཡིན་རུང་དེ་དག་ལ་ལོག་པར་སྤྱོད་ན། གོང་དུ་བཤད་པ་བཞིན་ཉེས་པ་ཚབས་ཆེན་ཡོད། རྒྱུ་མཚན་གཞན་ཕ་རོལ་པོར་རང་གི་ཆུང་མ་དང་རང་གི་སྐྱེས་པ་ལས་ཆེས་ཞེན་ཆགས་སྐྱེ་ས་དང་ཆེས་བདག་ཏུ་འཛིན་ས་ཞིག་མེད་པས་རྐུ་བ་ལས་ཀྱང་ཉེས་ཚབས་ཆེ་བ་ཡིན།

ལྔ་པ་ཉེས་པ་ཐམས་ཅད་ཀྱི་རྩ་བ་ཆང་སྤང་དགོས་པ་རེད་མ་གཏོགས། ཆང་འཐུང་ན་རང་གི་ལུས་ལ་ནད་མང་པོ་བསྐྱེད་པ་དང་ཆོས་སྒྲུབ་པའི་འགལ་རྐྱེན་དུ་འགྱུར་བ། སེམས་རང་དབང་དུ་མ་གྱུར་ནས་བསླབ་པ་གཞན་ཐམས་ཅད་ཀྱང་ཉམས་པར་འགྱུར་པས་སྤང་དགོས། དེ་ལྟར་སྤང་བྱ་ལུས་ངག་གི་མི་དགེ་བ་བཞི་དང་ཆང་བཅས་ལྔ་ལ་རྩ་བཞི་ཆང་ལྔ་ཟེར་བ་ཡིན་པས། དེ་དག་ཐམས་ཅད་ནི་ནང་པ་སངས་རྒྱས་པའི་ཆོས་ལ་ཞུགས་པའི་གང་ཟག་ཅིག་ཡིན་ནས་བཟུང་སྟེ་སུ་ཡིན་རུང་སྤང་དགོས། སྤངས་ན་ཕན་ཡོན་བསམ་གྱིས་མི་ཁྱབ་པ་ཡོད། ཁྱད་པར་དུ་དགེ་བསྙེན་གྱི་སྡོམ་པ་རེ་བླངས་ནས་བསྲུངས་ན། ལྷག་པར་དུ་ཡང་ཕན་ཡོན་བརྒྱ་འགྱུར་སྟོང་འགྱུར་གྱིས་ཆེ་ལ། རྗེས་མ་ཁྱེད་རྣམ་པས་དགེ་བསྙེན་སོགས་ཀྱི་སྡོམ་པ་རེ་བླངས་ནས་དགེ་བ་བསྒྲུབ་ན་ཧ་ཅང་བཟང་པོ་ཡིན།

ཁྱེད་རྣམ་པ་འདིར་ཡོད་པའི་དགེ་ཚུལ་དང་དགེ་སློང་། དགེ་སློང་མ་དང་དགེ་ཚུལ་མ་ཚང་མའི་བསྲུང་བྱ་ཕལ་ཆེར་གཅིག་པ་ཡིན་ཡང་ཁྱིམ་པ་རྣམས་དང་མི་འདྲ་བའི་ཁྱད་པར་གཉིས་ཡོད། དང་པོ་ནི་བླ་སེར་གྱི་ན་བཟའ་རྒྱུན་དུ་གྱོན་དགོས་པ་རེད་མ་གཏོགས་ན་བཟའ་མ་གོན་ན་ཁྱིམ་པ་དང་འདྲ་འདྲ་ཡིན་པ་ལས། རབ་བྱུང་གི་རྟགས་ཅན་ཟེར་བ་མིན་པས། གཞན་ཐམས་ཅད་ལ་མེད་པའི་བསྲུང་བྱ་གཅིག་པུ་དེ་ན་བཟའ་རྒྱུན་དུ་གོན་དགོས་པ་ཡིན། གཉིས་པ་ནི་ཁྱིམ་པ་ཞིག་ཡིན་ན་རང་གི་ཆུང་མ་དང་ཁྱོ་བོར་འཁྲིག་པ་སྤྱོད་ནའང་ལོག་གཡེམ་གྱི་ཉེས་པ་མི་འབྱུང་མོད། རབ་ཏུ་བྱུང་བ་ཞིག་ཡིན་ནས་བཟུང་སྟེ་མི་ཚངས་སྤྱོད་པ་རྩ་བ་ནས་སྤང་དགོས། དེ་མ་སྤངས་ན་སྡོམ་པ་རྩ་བ་ནས་ཉམས་པར་འགྱུར་བ་ཡིན། ཁྱད་པར་དེ་རིང་གི་ཆོས་ཚོགས་འདིར་རབ་བྱུང་རྣམས་ཀྱི་གཙོས་མི་སྣ་ཤིན་ཏུ་མང་པོ་ཞུགས་ཡོད་པས། ངས་ཁྱེད་རྣམ་པའི་ཆེད་དུ་རྩ་བཞི་ཆང་ལྔ་གསལ་པོར་བཤད་པ་ཡིན། རྗེས་མ་ཁྱེད་རྣམ་པས་སེར་གོས་ཡག་པོ་མནབ་རྒྱུ་དང་རྩ་བཞི་ཆང་ལྔ་སྲུངས་དང་། དེ་ལས་གཞན་ཆེན་པོ་སྲུང་མ་ཐུབ་ཀྱང་སྐྱོན་རྒྱུ་མ་རེད།

སྤྱིར་བོད་ཀྱི་ལུང་པ་ལྟ་བུ་ལ་མཚོན་ན། དགེ་ཚུལ་གྱི་སྡོམ་པ་རྒྱུད་ལ་མ་བླངས་བར་སེར་གོས་གོན་རྒྱུའི་སྲོལ་ཆེར་མེད། འོན་ཀྱང་ཡུལ་ཁམས་འདི་ལྟ་བུ་ལ་གནས་སྐབས་སུ་ཟླ་བ་ཁ་ཤས་དང་ལོ་ཁ་ཤས་ལ་དགེ་ཚུལ་སྒྲུབ་པའི་མཐུན་རྐྱེན་མི་འཛོམས་ན། ན་བཟའ་རེ་གོན་ནས་དགེ་ཚུལ་གྱི་བསྲུང་བྱ་སྲུང་བསྡད་ན་དེ་ཡང་ཧ་ཅང་བཟང་པོ་རེད། སངས་རྒྱས་ཀྱི་ན་བཟའ་ལུས་ལ་གྱོན་པ་ཙམ་གྱིས་ཀྱང་། དེ་མཐོང་བའི་འགྲོ་བ་ཐམས་ཅད་ཀྱི་རྒྱུད་ལ་ཐར་བའི་ས་བོན་ཐེབས་པ་དང་། རང་ཉིད་ལ་འདྲེ་བགེགས་འབྱུང་པོ་ཐམས་ཅད་ཀྱི་བར་ཆད་ཀྱིས་མི་ཚུགས་པ། རྒྱུད་ལ་ཡང་ཉམས་རྟོགས་བདེ་མྱུར་དུ་སྐྱེ་བ་ཡིན། ནམ་ཞིག་མཐུན་རྐྱེན་འཛོམས་པའི་དུས་ན་ངེས་པར་དུ་ཉིན་གཅིག་ཀྱང་ཕྱིར་འགྱངས་མི་བྱེད་པར་དགེ་ཚུལ་སློང་གི་སྡོམ་པ་ཞུ་དགོས་པ་རེད་མ་གཏོགས། མཐུན་རྐྱེན་འཛོམས་བཞིན་དུ་དགེ་ཚུལ་སློང་གི་སྡོམ་པ་རང་རྒྱུད་ལ་མི་ལེན་པར་འདུག་པ་ནི་གཏན་ནས་མི་འགྲིག

འགོག་པ་དང་ལམ་གྱི་བདེན་པ།

དགེ་བའི་ལས་ཀྱི་འབྲས་བུ་མཐར་ཐུག་གང་ཡིན་ན། སངས་རྒྱས་བཅོམ་ལྡན་འདས་ཀྱི་གོ་འཕང་ཡིན། དེ་ནི་སྡུག་བསྔལ་མེད་པ་དང་བདེ་བ་མཐར་ཐུག་པ་ཡིན་པས། དེའི་གོ་འཕང་འཐོབ་པར་བྱེད་པ་ལ་འགོག་པ་མངོན་དུ་བྱའོ་ཞེས་གསུངས། དེ་ལྟ་བུའི་འགོག་པ་འཐོབ་པར་བྱེད་པ་ལ་ལམ་རྒྱུད་ལ་བསྟེན་པར་བྱའོ་ཞེས་གསུངས་ཡོད།

ལམ་རྒྱུད་ལ་བསྟེན་པ་ནི། ལམ་ཡང་དག་པ་རྒྱུད་ལ་བསྟེན་པར་བྱ་བ་ལ་འཛམ་བུ་གླིང་འདིར་སངས་རྒྱས་ཀྱི་བསྟན་པ་ལ་ཐེག་པ་དམན་པ་དང་ཐེག་པ་ཆེན་པོ་གཉིས་ཡོད་པ་ལས། ཐེག་ཆེན་ལའང་མདོ་དང་གསང་སྔགས་རྡོ་རྗེའི་ཐེག་པ་སྟེ་གསུམ་ཡོད། ཐེག་པ་དམན་པ་ཟེར་བ་ནི། སྟོན་པ་ཤཱཀྱ་ཐུབ་པ་ལ་སྐྱབས་སུ་སོང་ནས། དེའི་སྟེང་དུ་གཞན་ལ་གནོད་པའི་བསམ་པ་དང་སྤྱོད་པ་ཐམས་ཅད་སྤངས་ཤིང་རང་དོན་རྐྱང་པ་སྒྲུབ་པ་ཡིན། ཐེག་པ་དམན་པའི་ཆོས་ཉམས་སུ་ལེན་མཁན་ནི་དེང་སང་གི་དབང་དུ་བྱས་ན་སིངྒ་ལ་དང་འབར་མ། ཐེ་ལན་དི་སོགས་སུ་མང་པོ་ཡོད།

ཐེག་པ་ཆེན་པོའི་ཆོས་པ་རྣམས་ཀྱིས། རང་དོན་ལས་ཀྱང་གཞན་དོན་གཙོ་བོར་འཛིན་ཞིང་། གཞན་དོན་འབའ་ཞིག་ལ་བསམ་པ་དང་། སྤྱོད་པ་ཡང་གཞན་ལ་ཕན་པ་ཁོ་ན་སྒྲུབ་ལ། སེམས་ཅན་ཐམས་ཅད་སངས་རྒྱས་ཀྱི་ས་ལ་བཀོད་པའི་ལམ་གྱི་སྲོག་ཤིང་བྱམས་པ་དང་སྙིང་རྗེ་དང་དུ་ལེན་པ་ལ་ཐེག་པ་ཆེན་པོ་པ་ཟེར། ཐེག་པ་དམན་པ་ཡིན་ན་གཞན་གནོད་གཞི་བཅས་སྤོང་བ་དང་། ཐེག་པ་ཆེན་པོས་ནི་གཞན་གནོད་གཞི་བཅས་སྤོང་བར་མ་ཟད་གཞན་ལ་ཕན་པ་འབའ་ཞིག་སྒྲུབ་པ་ཡིན། དེ་ལྟ་བུའི་ཆོས་ཉམས་སུ་ལེན་མཁན་ད་ལྟ་རྒྱ་ནག་གི་ཡུལ་གྲུ་ཕལ་ཆེར་དང་ཉི་ཧོང་གི་ལུང་པ་སོགས་ན་ཡོད།

ཐེག་པ་ཆེན་པོ་ཡིན་པ་གཞིར་བཞག་སྟེ་མན་ངག་གི་ཁྱད་པར་ཆེས་མང་པོ་དང་ལྡན་པ་ལ་གསང་སྔགས་རྡོ་རྗེ་ཐེག་པ་ཟེར། གསང་སྔགས་རྡོ་རྗེ་ཐེག་པ་ནི། འབྲས་བུ་སངས་རྒྱས་ཀྱི་གོ་འཕང་སྒྲུབ་པར་བྱེད་པ་ལ་ཡུན་རིང་པོའི་དཀའ་ཚེགས་མི་དགོས་པར། ཐབས་དང་ཤེས་རབ་མང་བའི་སྟོབས་ཀྱིས་ཚེ་ལུས་གཅིག་གིས་སངས་རྒྱས་ཀྱི་གོ་འཕང་སྒྲུབ་པར་བྱེད་པ་ཡིན། ཐབས་བསྐྱེད་པའི་རིམ་པ་ནི་རང་ཉིད་ལྷ་རུ་བསྒོམ་རྒྱུ་ལྟ་བུ་དང་། ཤེས་རབ་རྫོགས་པའི་རིམ་པ་ཆོས་ཐམས་ཅད་སྟོང་ཉིད་དུ་སྒོམ་པ་སོགས་བསྐྱེད་རྫོགས་ཀྱི་ལམ་གཉིས་ལ་གསང་སྔགས་རྡོ་རྗེ་ཐེག་པ་ཟེར། དེ་ལྟ་བུའི་གསང་སྔགས་རྡོ་རྗེ་ཐེག་པའི་ཆོས་ཉམས་སུ་ལེན་མཁན་ནི་བོད་ཀྱི་ལུང་པ་དང་འབྲུག་ཡུལ་སོགས་སུ་དར་བ་ཡིན།

ད་ལྟ་ཨ་རི་ན་ཡང་བོད་བརྒྱུད་ཀྱི་བླ་མ་རྣམས་ཀྱི་ཆོས་ཚོགས་དང་སློབ་མ་མང་པོ་ཡོད་ལ། དེ་ཚང་མས་ཀྱང་གསང་སྔགས་རྡོ་རྗེ་ཐེག་པ་ཉམས་སུ་ལེན་གྱིན་ཡོད། ཡུལ་གཞན་ན་ཡང་བོད་ཀྱི་བླ་མ་རྣམས་ཀྱིས་ཆོས་ཚོགས་མང་པོ་སྤེལ་ནས་གསང་སྔགས་རྡོ་རྗེ་ཐེག་པའི་ཆོས་སྤེལ་དང་སྤེལ་བཞིན་པ་ཡིན།

གསང་སྔགས་རྡོ་རྗེའི་ཐེག་པ་ལའང་ལམ་ཐམས་ཅད་ཀྱི་མཐར་ཐུག སངས་རྒྱས་ཐམས་ཅད་ཀྱི་དགོངས་པ། མ་དང་མཁའ་འགྲོ་བྱེ་བའི་སྙིང་ཁྲག་གི་དྭངས་མ་ལྟ་བུ་དེ་གང་ཡིན་ན་འོད་གསལ་རྫོགས་པ་ཆེན་པོ་ཡིན། ཆོས་འདི་སྒྲུབ་ཐབས་ཀྱི་མན་ངག་དེ་ཡག་པོ་ཞིག་ཤེས་ན་ཆོས་རང་གི་ངོ་སྐལ་གྱིས་ཉིན་བསྒོམས་ན་ཉིན་སངས་རྒྱས། ནུབ་བསྒོམས་ན་ནུབ་སངས་རྒྱས། གང་ཟག་ལས་འཕྲོ་ཅན་ཡིན་ན་མ་བསྒོམས་ཀྱང་འཚང་རྒྱ་བར་བྱེད་པའི་ཆོས་ཡིན་གསུངས། ཆོས་འདི་ནི་རྣ་བར་ཐོས་པ་ཙམ་གྱིས་ཀྱང་ངན་སོང་གི་སྐྱེ་སྒོ་བཀག་ནས་གྲོལ་བར་བྱེད་པ་ཡིན། དེ་བཞིན་དུ་གླེགས་བམ་ལ་བྲིས་ཡོད་པ་མཐོང་བ་དང་རེག་པ། ཡིད་ལ་དྲན་པ་ཙམ་གྱིས་ཀྱང་སངས་རྒྱས་ཀྱི་སར་བདེ་མྱུར་དུ་བགྲོད་པར་བྱེད་པའི་ཕུན་སུམ་ཚོགས་པའི་ལམ་འདི་ལྟ་བུ་ནི། དུས་ཐམས་ཅད་དུ་བྱུང་མ་མྱོང་བ་ཡིད་བཞིན་གྱི་ནོར་བུ་ལྟ་བུ་ཡིན་གསུངས།

དེས་ན་ཆོས་འདི་ནི། དོན་མང་བའམ་བྱ་བ་མང་བ། ཚེ་འདིའི་བྱ་བ་བསྒྲུབ་དགོས་པའི་གང་ཟག་ཅིག་གིས་ཀྱང་ཉམས་སུ་བླང་ན་ལེན་བདེ་མོ་ཡིན་ལ། དུས་ཡུན་ཐུང་ཐུང་ཙམ་གྱིས་འབྲས་བུ་ཐོབ་པར་བྱེད་པའི་ལམ་རྨད་དུ་བྱུང་བ་ཞིག་ཡིན། ཆོས་འདི་ལ་སྐལ་བ་དང་ལྡན་པ་མ་གཏོགས་འཕྲད་མི་སྲིད་ལ། འཕྲད་ན་ཆོས་འདིས་མི་གྲོལ་བའང་མི་སྲིད་པ་ལྟ་བུ་ཡིན།

བོད་ཀྱི་ལུང་པ་ལ་བསམ་བློ་བཏང་ན། ཐོག་མར་གསང་སྔགས་ཀྱི་བསྟན་པ་འཛུགས་པ་པོ་ཨོ་རྒྱན་ཆེན་པོ་དང་བི་མ་ལ་མི་ཏྲ་ཁོང་གཉིས་ལས་ལྷག་པའི་གྲུབ་བརྙེས་ཀྱི་གང་ཟག་ཅིག་བོད་ལ་བྱོན་མ་མྱོང་ཞིང་། ཁོང་གཉིས་ཀྱིས་ཀྱང་སློབ་མ་སྙིང་དང་འདྲ་བ་རྣམས་ལ་གཅེས་ནོར་གྱི་ཚུལ་དུ་གནང་བའི་ཟབ་ཆོས་ཡིན། བོད་ཀྱི་ལུང་པའི་ནང་ནས་ཀྱང་ཆོས་འདི་འཐོབ་དགོས་ན་ཧ་ཅང་དཀའ། བོད་ཡུལ་དུ་སྒྲུབ་བརྒྱུད་ཤིང་རྟ་བརྒྱད་ཟེར་བའི་ཆོས་མང་པོ་ཞིག་ཡོད་པ་ཐམས་ཅད་ཀྱི་ནང་ནས་འོད་གསལ་རྫོགས་པ་ཆེན་པོ་ནི་གསང་སྔགས་རྙིང་མ་པ་ཁོ་ནའི་སྒེར་ཆོས་ཡིན། ངས་དེ་སྔོན་སན་ཧྥི་རན་སའེ་སི་ཁོ་（San Francisco）ནས་སྐད་ཆ་འདི་འདྲ་བཤད་མྱོང་། ཁྱེད་ཨ་རི་ལུང་པ་ལྟ་བུ་ལ་མཚོན་ན་ཕལ་ཆེར་རྫོགས་པ་ཆེན་པོའི་གདུལ་བྱ་ཡིན་རྒྱུ་རེད། དཔེར་ན་ངས་ཆོས་གཞན་མང་པོ་བཤད་ཀྱང་ཐམས་ཅད་ཀྱིས་འདི་ལྟ་བུའི་དགའ་བསུ་མི་བྱེད་ཀྱང་། རྫོགས་པ་ཆེན་པོའི་ཆོས་བཤད་ཡོང་དུས་ཚང་མས་ཀྱང་དགའ་བ་དང་སྤྲོ་བའི་སྒོ་ནས་དད་གུས་ཀྱི་རྣམ་འགྱུར་ལྷག་པར་ཆེ་བས། ཁྱེད་རང་ཚོའི་ས་ཆ་འདི་སྟོབས་འབྱོར་ཆེ་བས་མི་རྣམས་ལ་བྱ་བ་དང་དོན་ཡང་མང་པོ་ཡིན། ཆོས་གཞན་བསྒྲུབས་ནས་དོན་འབྲས་མངོན་དུ་འགྱུར་དཀའ་མོ་ཡིན་ཡང་། བྱ་སླ་ལ་ཆོད་ཆེ་བའི་ཆོས་འདི་ལྟ་བུ་ནི་ཁྱེད་ཚོ་ལ་འོས་པ་ཞིག་རེད་བསམ་ནས། ཁྱེད་ནུབ་ཕྱོགས་ལུང་པའི་མི་སེར་ཆོས་ལ་དགའ་བ་ཕལ་ཆེར་རྫོགས་པ་ཆེན་པོའི་གདུལ་བྱ་ཡིན་རྒྱུ་རེད་ཅེས་ངས་ངོས་འཛིན་ཞིག་བྱས་ཡོད།

ཁྱེད་རྣམ་པ་ཚང་མས་ད་ལྟ་དང་རྗེས་མ་རྣམས་སུ་རྫོགས་པ་ཆེན་པོ་ལ་ཉམས་ལེན་རེ་བྱེད་པ་ནི་ངའི་རེ་བ་ཡིན། བཀྲ་ཤིས་བདེ་ལེགས།

ཀུན་བཟང་དཔལ་ཡུལ་ཆོས་གླིང་དུ་བཞུགས་པ།

ཝ་ཧྲིང་ཐོན་ནས་ཆོས་ཁྲིད་གསུང་བའི་རིང་ལ། ཆོས་རྗེ་ཉིད་ཀུན་བཟང་དཔལ་ཡུལ་ཆོས་གླིང་དུ་བཞུགས། གནས་འདིའི་ཁོར་ཡུག་ནི་ཤིན་ཏུ་དབེན་ཞིང་ཉམས་དགའ་ལ། རྩི་ཤིང་ནགས་ཚལ་གྱིས་མཐའ་ནས་བསྐོར་ཞིང་རི་དྭགས་མང་པོ་ཅི་དགར་རྒྱུ་བས། སྟོན་པའི་དུས་ཀྱི་དྲང་སྲོང་ལྷུང་བ་རི་དྭགས་ཀྱི་ནགས་ཚལ་ལྟ་བུ་ཞིག་ཡིན།

ཆོས་ཚོགས་འདི་ནི་རྗེ་བཙུན་མ་ཨ་དཀོན་ལྷ་མོས་ཕྱག་བཏབ་གནང་བ་དང་། ཁོང་ནི་གྲུབ་དབང་པད་མ་ནོར་བུ་སྐུ་དངོས་ཀྱིས་ངོས་འཛིན་གནང་བའི་མཁའ་འགྲོ་མ་ཞིག་ཡིན། ལུས་རྟེན་ཁྱིམ་པ་ཡིན་ཡང་རབ་ཏུ་བྱུང་བ་མི་ཉུང་བ་གསོ་སྐྱོང་བྱས་འདུག་པ་ནི། ནུབ་ཕྱོགས་རྒྱལ་ཁབ་ལ་མཚོན་ན་ཆེས་མཐོང་བར་དཀོན་པ་ཡིན།

ཁོང་མཁའ་འགྲོ་མར་ངོས་མ་བཟུང་བའི་སྔོན་དུ། ཆུ་ཤེལ་སྣ་ཚོགས་བསྡུ་ཉར་བྱེད་པར་དགའ་པོ་ཡོད་པས། ཆོས་ཚོགས་ཀྱི་ལྷ་ཁང་སོ་སོའི་ནང་དུ་མདོག་དབྱིབས་མི་འདྲ་བའི་རང་བྱུང་གི་ཆུ་ཤེལ་ཆེས་མང་པོ་བཞག་འདུག ཁོང་གིས་ཆོས་རྗེ་ཉིད་ཆེད་དུ་གདན་ཞུ་བྱས་ཏེ་ཆུ་ཤེལ་རྣམས་ལ་གཟིགས་སྐོར་དང་བྱིན་རླབས་གནང་དུ་བཅུག ཆོས་རྗེ་ཉིད་ཀྱིས་རྫོགས་པ་ཆེན་པོའི་ཆོས་ཉམས་སུ་ལེན་པར་མཁོ་བའི་ཟུར་བརྒྱད་པའི་ཆུ་ཤེལ་ཞིག་བཙལ་གནང་མཛད་ཀྱང་ཐུགས་ལ་འབབ་པ་ཞིག་རྙེད་མ་སོང་།

དེ་རྗེས་ཉིན་འགའ་ཤས་ཀྱི་རིང་ལ། ཆོས་རྗེ་ཉིད་ཉིན་རེ་བཞིན་ཉིན་དཀར་ཝ་ཧྲིང་ཐོན་གྱི་ཡུལ་ལྗོངས་གྲགས་ཅན་རྣམས་སུ་སྤྲོ་གསེང་དང་གཟིགས་སྐོར་ལ་ཕྱིན་ཅིང་། དགོང་མོར་ཐམས་ཅད་ལ་དབང་ལུང་སོགས་ཆོས་ཁྲིད་གསུངས།

རྟེན་འབྲེལ་བཟང་པོའི་དུས་ཚེས།

ཕྱི་ཟླ་༧པའི་ཚེས་༢༥ཉིན་གྱི་ཕྱི་དྲོར། ཕུར་བ་མགུལ་ཁུག་མའི་དབང་གི་སྐབས་སུ་འདི་ལྟར་གསུང་།

ཟས་གང་ཟ་བའི་ཐོག་མར་མཆོད་ཅིག་དང་བྱ་བ་གང་བསྒྲུབ་པའི་ཐོག་མར་གཏམ་ཞིག་དགོས་ཟེར་བའི་དཔེ་ལྟར་དུ། ངས་ཆོས་དངོས་སུ་མ་བཤད་པའི་སྔོན་དུ་གཏམ་བཤད་མདོར་བསྡུས་ཙམ་ཞིག་ཞུ་བ་ཡིན།

ང་ཚོ་བོད་ཀྱི་སྲོལ་རྒྱུན་ལྟར་ཐོག་མར་ཆོས་ཚོགས་འདིའི་གཙོ་འཛིན་ལ་ཁམས་བདེ་དང་འཚམ་འདྲི་བཀྲ་ཤིས་བདེ་ལེགས་ཞུ་བ་ཡིན། དེ་ནས་ཨ་རིའི་ལུང་པའི་མི་ཡུན་རིང་ལ་བོད་ཡུལ་ནས་ཆོས་ཞུས་ཤིང་གདམས་པ་ཉན་པའི་སློབ་མ་རྣམས་ལའང་བཀྲ་ཤིས་བདེ་ལེགས་ཞུ་བ་ཡིན། ང་ཚོ་བོད་ཡུལ་ནས་འོངས་པའི་ང་དང་ཕ་ཡུལ་གཅིག་པའི་གསེར་རྟའི་བན་དེ་དེ་དང་། ཁྱད་པར་དུ་བལ་བོའི་ཡུལ་ནས་ཁོ་དང་ལྷན་དུ་འགྲོགས་ནས་ཡོང་བའི་བོད་པ་སྟོད་གངས་དཀར་ཕྱོགས་ནས་ཡོང་བ་རྣམས་ལ་ཡང་བཀྲ་ཤིས་བདེ་ལེགས་ཞུ་བ་ཡིན། དེ་བཞིན་ཚོགས་ར་འདི་ན་ཡོད་པའི་ཆོས་ཞུ་རུ་ཡོང་མཁན་ཐམས་ཅད་ལ་བཀྲ་ཤིས་བདེ་ལེགས་ཞུ་བ་ཡིན། དེ་ལས་གཞན་རྣམས་ནི་ང་རང་ཚོ་དང་ལྷན་དུ་ཡོང་བའི་མགྲོན་པོ་ཡིན་པས་བཀའ་དྲིན་ཞུ་དགོས་མི་འདུག ༼དགོད་སྒྲ།༽ ཁྱེད་རྣམས་ཀྱི་སྐུ་ཁམས་དྭངས་ཤིང་སངས་རྒྱས་ཀྱི་བསྟན་པ་རྒྱས་པའི་སྨོན་འདུན་ཞུ་བ་ཡིན།

ད་ཐེངས་ངེད་ཅག་གིས་གནས་འདིར་ཆོས་འཆད་པ་དེ་ཡང་། གཞན་དང་མི་འདྲ་བར་ཧ་ཅང་གི་རྟེན་འབྲེལ་བཟང་པོ་འགྲིགས་པས་དགའ་སྤྲོ་ཕུན་སུམ་ཚོགས་པར་གྱུར་པ་ཞིག་ཡིན། དེ་ཡང་གང་ཞེ་ན། ཁ་རྩང་ཞུས་པ་ནང་བཞིན་དུ་གནས་འདི་ལ་བསམ་བློ་བཏང་ན། འཛམ་བུ་གླིང་གི་མཆོག་ཏུ་གྱུར་པའི་ཨ་རིའི་རྒྱལ་ཁབ་ཀྱི་རྒྱལ་ས་ཝ་ཧྲིང་ཐོན་ཡིན། ཕྱོགས་འདིར་སངས་རྒྱས་ཀྱི་བསྟན་པ་རྒྱ་ཆེར་སྤེལ་བ་ནི་གནས་ཀྱི་སྒོ་ནས་ཀྱང་དགའ་འོས་པ་ཞིག་རེད།

དེ་ནས་ཆོས་དང་སྟོན་འཁོར་གྱི་དབང་དུ་བྱས་ན། དེང་སྐབས་འཛམ་བུ་གླིང་གི་སྟེང་དུ་སྟོབས་དང་འབྱོར་བ་ལ་ཨ་རིའི་རྒྱལ་ཁབ་བཟང་ཤོས་ཡིན་ཞིང་། ཆོས་ནི་འཛམ་བུ་གླིང་འདིར་བོད་ཁ་བ་ཅན་དེ་བཟང་ཤོས་ཡིན། དེས་ན་ཁ་བ་ཅན་གྱི་ཆོས་དང་ཨ་རིའི་སྟོབས་འབྱོར་གཉིས་ཀ་ཟུང་དུ་འཇུག་ཐུབ་ན། འཛམ་བུ་གླིང་ཀུན་ཏུ་བདེ་ཞིང་དགེ་བའི་དཔལ་ཕུན་སུམ་ཚོགས་པ་ཞིག་འཆར་རྒྱུ་ཡིན་པས། དུས་ཚོད་འདི་ལྟ་བུ་ལ་འཛོམས་པ་ནི་བཀྲ་ཤིས་ཤིང་དགའ་སྤྲོ་ཧ་ཅང་འཕེལ་བའི་གནས་ཤིག་ཡིན།

དུས་ཚོད་ཀྱི་དབང་དུ་བྱས་ན། ཁ་རྩང་གི་དུས་ཚོད་དེ་ནི་བདག་ཅག་གི་སྟོན་པ་ཐུགས་རྗེ་ཅན་གྱིས་ཆོས་ཀྱི་འཁོར་ལོ་དང་པོ་བསྐོར་བའི་དུས་ཆེན་ཡིན། འདིའི་ཚེས་པ་བཅུའི་ཉིན་ནི། ཨོ་རྒྱན་རིན་པོ་ཆེ་ལྷོ་ནུབ་འོ་མ་ཅན་གྱི་རྒྱ་མཚོའི་ནང་དུ་ཕ་ཡི་རྒྱུ་ལས་མ་བྱུང་མ་ཡི་རྐྱེན་ལས་མ་བྱུང་བར་རང་བྱུང་རིག་པ་ཐོལ་སྐྱེས་ཀྱི་ཚུལ་དུ་འཁྲུངས་བའི་དུས་ཆེན་དང་། དེར་མ་ཟད་རྔ་ཡབ་སྲིན་པོའི་གླིང་དུ་སྲིན་པོ་རྣམས་གདུལ་བར་བྱོན་པའི་དུས་ཆེན་ཁྱད་པར་ཅན་ཏེ་དུས་ཚོད་ཕུན་སུམ་ཚོགས་པ་ཞིག་ལ་ཐུག་འདུག

སངས་རྒྱས་ཀྱི་བསྟན་པ་ལ་ཞུགས་སོ་འཚལ་གྱི་རབ་ཏུ་བྱུང་བ་ཚང་མས། གཙོ་བོ་འདུལ་བ་གཞི་གསུམ་གྱི་ཆོ་ག་ཉམས་བཞེས་མཛད་པའི་དུས་ཚེས་ཁྱད་པར་ཅན་ཏེ། ཟླ་འདིའི་ཚེས་བཅོ་ལྔ་ནས་བཟུང་དབྱར་ཟླ་བ་གསུམ་གྱི་བར་དུ་དབྱར་གནས་པར་བྱས། རིམ་བཞིན་གསོ་སྦྱོང་དང་དགག་དབྱེ་ལ་སོགས་པ་ལ་འཇུག་པའི་འདུལ་བའི་སྤྱོད་པ་རྒྱ་ཆེར་སྤེལ་བའི་དུས་ཚེས་ཁྱད་པར་ཅན་ཞིག་ཀྱང་ཡིན། སངས་རྒྱས་ཀྱི་བསྟན་པ་ལ་ཞུགས་སོ་འཚལ་གྱི་སྔགས་པ་ཡོངས་རྫོགས་ལ་མཚོན་ན། ཚེས་བཅུ་ནི་དཔའ་བོ་དང་མཁའ་འགྲོ་ཐམས་ཅད་དབང་མེད་དུ་འདུ་བའི་དུས་ཁྱད་པར་ཅན་ཡིན་པས། ཨོ་རྒྱན་རིན་པོ་ཆེས་ཀྱང་། བྱུང་ངོ་ཟླ་བའི་ཚེས་བཅུ་ཐམས་ཅད་ལ། །ཨོ་རྒྱན་བོད་ཁམས་ཀུན་ཏུ་བྱོན་པར་འགྱུར། །དབང་ཆེན་སྤྲེལ་ལོ་སྤྲེལ་ཟླའི་ཚེས་བཅུ་ལ། །སྤྲུལ་བས་བོད་ཁམས་ཁྱབ་པར་མི་འགྱུར་རེ། །ཞེས་བོད་ཁམས་གཙོ་བོར་གྱུར་པའི་འཛམ་བུ་གླིང་གི་ཡུལ་ཁམས་ཐམས་ཅད་ལ། ཨོ་རྒྱན་སངས་རྒྱས་གཉིས་པས་ཞབས་ཀྱིས་བཅགས། གསང་སྔགས་གསར་མའི་རྒྱུད་སྡེ་ཐམས་ཅད་ཀྱི་དགོངས་པ་ལྟར་ན་ཡང་། དཔའ་བོ་དང་མཁའ་འགྲོ་རང་བཞིན་གྱིས་འདུ་བའི་དུས་ཚེས་ཁྱད་པར་ཅན་འདི་ལ། སྔགས་པ་ཐམས་ཅད་ཀྱིས་ཀྱང་རང་བཞིན་གྱིས་གསང་སྔགས་ཀྱི་དཀྱིལ་འཁོར་གཉན་པོའི་སྒོ་ཕྱེ་བའི་དུས་ཡིན། ཁྱད་པར་དུ་རྫོགས་པ་ཆེན་པོ་ཉམས་བཞེས་མཛད་མཁན་ཐམས་ཅད་ཀྱིས། བོད་ཟླ་དྲུག་པའི་ཚེས་བཅོ་ལྔ་ནས་བཟུང་སྟེ་ཟླ་བ་དྲུག་གི་བར་དུ་ནམ་མཁའ་སུམ་སྤྲུགས་སོགས་རྫོགས་པ་ཆེན་པོའི་ལྟ་བ་ལ་གཙོ་བོར་ཉམས་བཞེས་མཛད་པའི་དུས་ཚེས་ཁྱད་པར་ཅན་ཞིག་ལ་ཐུག་ཡོད།

སྤྱིར་རྫོགས་པ་ཆེན་པོའི་ཆོས་འདི་ནམ་ཉམས་སུ་བླངས་ཀྱང་བྱིན་རླབས་དང་དངོས་གྲུབ་འབྱུང་བ་ཡིན། དཔེར་ན་རྒྱ་གར་གྱི་ཡུལ་དང་ཝ་ཧྲིང་ཐོན་ནི་ཚད་པ་ཧ་ཅང་ཆེན་པོ་རེད། ད་སྐབས་ཚད་པ་ཅུང་དམའ་རུ་ཕྱིན་ནས་འབྱུང་ཁམས་སྙོམས་པའི་དུས་ལ་ཐུག་འདུག འབྱུང་ཁམས་སྙོམས་པའི་དུས་སུ་ལས་དང་པོ་པ་རྣམས་ཀྱིས་ཟླ་འདིའི་ཚེས་བཅོ་ལྔ་ནས་ཟླ་བ་དྲུག་གི་རིང་ལ་བསྒོམས་ན། རིག་པ་ཧ་ཅང་འཆར་བདེ་བ་དང་ཉམས་ལེན་སྐྱོང་བདེ་བ་ཞིག་ཡོང་བས་ན། རིག་འཛིན་གོང་མ་ཐམས་ཅད་ཀྱིས་ཕྱག་བཞེས་གཙོ་བོ་ཟླ་བ་འདིའི་ཚེས་བཅོ་ལྔ་ཕན་ཆོད་ནས་ཉམས་ལེན་མཛད་པ་ཡིན། དེ་ལྟ་བུའི་དུས་ཚོད་ཁྱད་པར་ཅན་ལ་དགོངས་ནས། བསྟན་རྒྱམ་རིན་པོ་ཆེ་ཡང་བར་སྐབས་འདིར་གནས་འདིར་འབྱོན་པའི་ཐུགས་བཞེད་ཡོད་ཅེས་ཁྱེད་རྣམ་པའི་ངག་སྒོ་ནས་གོ་སོང་། འོན་ཀྱང་གནས་སྐབས་སུ་ཁོང་ཟླ་བ་རེ་རེ་དང་གཉིས་རེ་ཙམ་ལ་ཕྱིར་འགྱངས་སུ་གྱུར་ཀྱང་། ཁོང་གི་ཆོས་ཕྱོགས་ཀྱི་ཐུགས་བཞེད་མཐའ་དག་ཀྱང་རང་རེ་ཚང་མས་བསྒྲུབ་ཐུབ་རྒྱུ་རེད་སྙམ་པའི་ཡིད་ཆེས་ཡོད།

དེས་ན་བོད་ཀྱི་ཚིག་དཔེ་ལ། རྟེན་འབྲེལ་བསྒྲིགས་ན་འགྲིགས་པ་མིན། རྟེན་འབྲེལ་འགྲིགས་ན་འགྲིག་པ་ཡིན། ཟེར་བ་ལྟར། རྟེན་འབྲེལ་ཆེད་དུ་བསྒྲིགས་ནས་འགྲིགས་སོང་ན་དེ་ཙམ་བཟང་བ་མིན་པར། རྟེན་འབྲེལ་རང་ཤུགས་ཀྱིས་འགྲིགས་སོང་ན་ཧ་ཅང་བཟང་བས། ངས་ཀྱང་ཁྱད་པར་ཅན་གྱི་ཆུ་སྟོད་ཟླ་བའི་ཆོས་འཁོར་སྐོར་བའི་དུས་ཚེས་འདི་ལ། ཨ་མེ་རི་ཀའི་རྒྱལ་ས་འདིར་ཡོང་ནས་བདེན་བཞིའི་ཆོས་ཤིག་བཤད་རྒྱུ་བྱུང་ན་སྙམ་པའི་བསམ་པ་མེད་ལ། ཁྱེད་རྣམ་པ་ལ་ཡང་དེ་ལྟ་བུའི་བསམ་པ་ཡོད་རྒྱུ་མ་རེད། ཡིན་ན་ཡང་བླ་མ་དཀོན་མཆོག་གསུམ་གྱི་ཐུགས་རྗེ་ཡིས་རྟེན་འབྲེལ་འདི་རང་ཤུགས་ཀྱིས་འགྲིགས་སོང་བ་ནི། རང་གཞན་ཐམས་ཅད་དགའ་འོས་པའི་གནས་སུ་གྱུར་པ་ཞིག་ཡིན།

ང་རང་སྒེར་ལ་མཚོན་ན། རང་ལོ་ཉི་ཤུ་རྩ་ལྔའི་དུས་ནས་ད་ལ་མ་ཐུག་གི་བར་དུ། སྤྱིར་བསྟན་པ་དང་སེམས་ཅན་གྱི་དོན་གང་བསྒྲུབ་ཀྱང་ཕལ་ཆེར་ཟླ་བ་འདིའི་ནང་དུ་མགོ་རྩོམ་རྒྱུ་ཡིན། ཟླ་བ་འདིའི་ནང་དུ་མགོ་བརྩམས་པའི་བྱ་བ་ཐམས་ཅད་གེགས་མེད་བདེ་བླག་ཏུ་འགྲུབ་པ་དང་། འགལ་རྐྱེན་བར་ཆད་གང་ཡང་མ་བྱུང་བ་ཞིག་ཡིན། ངས་ཁྱེད་རྣམ་པ་ལ་འདས་པའི་ལོ་ཁ་ཤས་ཀྱི་ནང་དུ་བྱ་བ་ལེགས་འགྲུབ་ཡོང་བའི་ལོ་རྒྱུས་མདོ་ཙམ་ཞིག་ཞུ།

ཕྱི་ལོ་༡༩༨༥ལོར་ང་རང་གཏེར་སྟོན་ལས་རབ་གླིང་པའི་གདན་སར་སོང་ནས་ཁོང་གི་ཁྲི་སྟེང་དུ་བསྡད་ཅིང་ཆོས་ཀྱི་མཛད་པ་རྒྱ་ཆེན་པོ་བསྐྱངས། དུས་དེ་ནས་བཟུང་སྟེ་གངས་རིའི་ལྗོངས་ཀྱི་ཕྱོགས་ཀྱི་ཐ་གྲུ་ཀུན་ཏུ་དགེ་འདུན་པ་ཐམས་ཅད་ཀྱང་ཐུགས་མཐུན་པ་དང་ཁྲིམས་གཙང་བ། སྤོང་བ་བསམ་གཏན་དང་ཀློག་པ་ཐོས་བསམ་གྱི་ལས་ལ་བརྩོན་པའི་བྱ་བ་རྒྱ་ཆེ་ཞིང་ཤིན་ཏུ་བརྗོད་པར་དཀའ་བ། སྔོན་གྱི་དུས་ན་འགྲུབ་མ་མྱོང་བ་ལྟ་བུའི་བྱ་བ་ཡག་པོ་འགྲུབ་སོང་།

ཕྱི་ལོ་༡༩༨༦ལོའི་ཆུ་སྟོད་ཟླ་བའི་ཚེས་༤ཉིན། ང་རང་གིས་བསྟན་པ་དང་སེམས་ཅན་གྱི་དོན་དུ་བྱང་ཆུབ་མཆོག་ཏུ་སེམས་བསྐྱེད། དེ་ནས་རིམ་བཞིན་མདོ་ཁམས་སྨད་ཀྱི་གནས་ཆེན་ཉི་ཤུ་རྩ་ལྔ་དང་ཡུལ་ཁམས་སོ་སོའི་དགོན་སྡེ་རྣམས་ལ་ལྟ་སྐོར་ལ་སོང་བ་ཡིན། དེའི་སྐབས་སུ་གནས་ཆེན་ཉེར་ལྔ་རྣམས་སུ་ཡང་སྔོན་བྱུང་མ་མྱོང་བའི་ཡིག་འབྲུ་དུ་མ་དང་། སྐུ་གཟུགས་དང་མཆོད་རྟེན་ལ་སོགས་པ་རང་བྱུང་གི་ཚུལ་དུ་བརྡོལ། དེ་བཞིན་ཟབ་མོའི་གཏེར་ཁ་མང་པོ་བརྡོལ་བར་གྱུར་པ་ལ་སོགས་པའི་རྟགས་མཚན་བསམ་གྱིས་མི་ཁྱབ་པ་བྱུང་། ཕྱོགས་ཀྱི་དགེ་འདུན་པ་ལས་རབ་བྱུང་ངུར་སྨྲིག་འཛིན་པའི་སྡེ་རྐྱང་པ་ལ་བསམ་བློ་བཏང་ན། སྔོན་ཆད་རིག་གནས་གསར་བརྗེ་ཆེན་པོ་སོགས་ཀྱི་དུས་སུ་བསྟན་པ་ཉམས་དམས་སུ་གྱུར་སྐབས། ཡུལ་ཁམས་རེ་རེ་ལ་དགེ་སློང་དང་དགེ་ཚུལ་རེ་རེ་གཉིས་རེ་ཙམ་ལས་མེད། དེ་ནས་ང་རང་དང་གཙོ་བོ་ང་རང་གི་སློབ་མ་ཐམས་ཅད་ཀྱིས་སྤེལ་བའི་དགེ་ཚུལ་སློང་བསྒྲུབས་པ་དེ་དག ད་སྐབས་ང་རང་གི་ཕ་ཡུལ་གྱི་ཉེ་འཁོར་དུ་ཡང་གཙང་ངེས་ཅན་གྱི་འདུལ་བ་འཛིན་པའི་དགེ་འདུན་པ་ཁྲི་གཉིས་ཙམ་ཞིག་ཡོད་པའི་མཛད་པ་ཆེན་པོ་ཡང་འགྲུབ་པ་ཡིན།

ཕྱི་ལོ་༡༩༨༧ལོར་ང་རང་གིས་གཙོ་འགན་ཁུར་ནས། བོད་ཀྱི་གྲྭ་པ་དང་མི་སེར་ཁྲི་ཕྲག་གཅིག་ཙམ་ཞིག་དང་། གཞན་ཡང་རྒྱ་དང་སོག་པོ་ལ་སོགས་པའི་མི་ཆེས་མང་པོ་དང་མཉམ་དུ་ཤར་ཕྱོགས་རི་བོ་རྩེ་ལྔ་ལ་སོང་ནས་བཟང་སྤྱོད་སྨོན་ལམ་བྱེ་བ་ཁ་ཤས་བཏོན་པ་ཡིན། དེ་ལ་ཡོང་བའི་བོད་མི་ཚང་མས་ལས་དང་སྐལ་བ་དང་འཚམ་པར། རབ་རྣམས་ཀྱིས་མགོན་པོ་འཇམ་པའི་དབྱངས་ཀྱི་ཞལ་མཇལ་གསུང་ཐོས་ཐུགས་ཀྱི་བྱིན་རླབས་འཕོས་པ་དང་། ཐ་མ་རྣམས་ཀྱིས་ཀྱང་འཇའ་དང་འོད་དང་ཆོ་འཕྲུལ་གྱི་རྟགས་རྣམ་པ་སྣ་ཚོགས་པ་མ་མཐོང་བ་གཅིག་ཀྱང་མེད་པ་ལྟ་བུའི་གྲུབ་འབྲས་མངོན་དུ་གྱུར་བ་ཡིན།

ཕྱི་ལོ་༡༩༨༨ལོའི་དུས་ཚེས་འདི་ལ་ཉག་རོང་གི་དགོན་ཁག་བཅུ་གསུམ་གྱི་དགེ་འདུན་པ་རྣམས་ལ་དབང་ལུང་ཁྲིད་གསུམ་དང་བཤད་སྒྲུབ་ཀྱི་བསྟན་གཞི་བཙུགས།

ཕྱི་ལོ་༡༩༨༩ལོར་མི་ཉག་བེ་ལོའི་རི་ཁྲོད་དུ་འཁོར་སློབ་སུམ་སྟོང་ཙམ་ལ་སྙིང་ཐིག་ཡ་བཞིའི་དབང་བསྐུར་བ་ཡིན། ལོ་དེ་དག་གི་རིང་ལ་ངའི་སློབ་གླིང་གི་དགེ་འདུན་པའི་འདུ་བ་ཇེ་རྒྱས་ཇེ་འཕེལ་ལ་སོང་ནས། མང་བའི་གནས་སྐབས་ན་དགེ་འདུན་པ་སྟོང་ཕྲག་དྲུག་ཙམ་ཡོད་པའི་དུས་ཀྱང་ཡོད་ཅིང་། དུས་རྟག་ཏུ་དུས་ཚོད་འདི་ལ་བྱང་ཆུབ་མཆོག་ཏུ་སེམས་བསྐྱེད་པའི་བྱ་བ་ལ་བརྩོན་པ་ཡིན།

ཕྱི་ལོ་༡༩༩༠ལོར་གྲུབ་དབང་པདྨ་ནོར་བུ་དང་དིལ་མགོ་མཁྱེན་བརྩེ་རིན་པོ་ཆེ་སོགས་འགའ་ཞིག་གི་ཐུགས་བཞེད་བཞིན་དུ་ང་རང་རྒྱ་གར་དུ་སོང་ཞིང་། ཟླ་བ་འདིའི་ཚེས་བཞི་ཉིན་འདི་ན་ཡོད་པའི་མཁན་པོ་རྣམ་གྲོལ་དང་། དངོས་གྲུབ་རྡོ་རྗེ། བསོད་དར་རྒྱས་དང་ངེད་བཟའ་མི་གསུམ། གཞན་ཡང་བན་དེ་གཉིས་བཅས་ངེད་ཅག་དཔོན་གཡོག་བརྒྱད་པོ་ཚང་མ་བསྟན་རྒྱམ་རིན་པོ་ཆེའི་གཟིམས་ཆུང་ནང་མའི་ནང་དུ་སོང་ནས། སྐྱིད་གྲོང་ཇོ་བོ་ཝ་ཏི་ཤྭ་རའི་སྐུ་མདུན་ལ་སོང་སྟེ་བསྟན་རྒྱམ་རིན་པོ་ཆེ་དང་གདན་ཐོག་གཅིག་ཏུ་བསྡད་ནས། བྱང་ཆུབ་མཆོག་ཏུ་སེམས་བསྐྱེད་པའི་དུས་ཀྱང་ཟླ་བ་འདིའི་ཚེས་བཞིའི་ཉིན་ཡིན།

ཟླ་བ་འདིའི་ཚེས་བཅུའི་ཉིན་རྒྱ་གར་ལྷོ་ཕྱོགས་མའེ་སོར་（Mysore）གྱི་ས་ཆ་ལ་ཐོན་ནས། གྲུབ་དབང་པདྨ་ནོར་བུ་མཆོག་གི་གདན་ས་ཐེག་ཆེན་རྣམ་གྲོལ་དར་རྒྱས་གླིང་དུ། མཁན་སྤྲུལ་བཞི་བཅུ་ལ་ཉེ་བ་དང་བཅས་པའི་དགེ་འདུན་པ་སྟོང་ཕྲག་གཅིག་ལ་འཇམ་དཔལ་རྫོགས་པ་ཆེན་པོའི་དབང་བསྐུར་བ་ཡིན། དེ་ནས་བཟུང་སྟེ་ང་རང་གི་བྱ་བ་གང་བརྩམས་ཐམས་ཅད་ལམ་འགྲོ་ཡོད་པ་དང་འགལ་རྐྱེན་མེད་པ། ཕུན་སུམ་ཚོགས་པ་ཞིག་ཏུ་གྱུར་པ་ཡིན།

དེ་ཚོ་བཤད་དགོས་དོན་ནི་ང་རང་གི་ཆེ་བ་འདོན་པའི་ཆེད་ཙམ་ཡང་མིན་པར་ཁྱེད་རྣམས་དགའ་སྤྲོ་འཕེལ་བའི་ཆེད་ཡིན། དེས་ན་ད་རེས་ས་གནས་འདི་ནས་འུ་ཅག་གིས་རྟེན་འབྲེལ་མ་བསྒྲིགས་རང་འགྲིགས་སུ་གྱུར་ནས་ཆོས་འཆད་ཉན་བགྱིས་པས། བསྟན་པ་དང་སེམས་ཅན་གྱི་དོན་རྒྱ་ཆེན་པོ་འགྲུབ་རྒྱུ་དང་ང་རང་ཉིད་ཀྱི་བསམ་པའི་དོན་ཐམས་ཅད་རྫོགས་རྒྱུ་རེད་བསམ། འདི་ལྟ་བུའི་བྱ་བ་ནི་ཧ་ཅང་དགའ་འོས་པ་དང་སྤྲོ་འོས་པ་ཞིག་རེད་མ་གཏོགས། རང་བཞིན་གྱི་སྟབས་ལྟེས་དབང་གིས་མ་ཡིན། དེས་ན་ངས་སྐད་ཆ་མདོར་བསྡུས་ཙམ་ཞིག་ཞུ་དོན་ཡང་ཁྱེད་རྣམ་པའི་དགའ་སྤྲོ་འཕེལ་བའི་ཆེད་དུ་ཡིན།

གོང་དུ་ཞུས་པ་ལྟར་ཁྱེད་ཨ་རི་བའི་སྟོབས་འབྱོར་ནི་ཟ་མ་བཟང་པོ་ལྟ་བུ་དང་ངེད་བོད་ཀྱི་ཆོས་ནི་སྤོད་ཡ་བཟང་པོ་ལྟ་བུ་ཡིན་པས་དེ་གཉིས་ཡ་བྲལ་མི་རུང་མ་གཏོགས། སྤོད་ཡ་མེད་པའི་ཟ་མ་ཇི་ལྟར་བཟང་ཡང་ཟ་སྙིང་མི་བྲོད་པ་བཞིན་དུ། སྟོབས་འབྱོར་ཇི་ལྟར་ཆེ་ཡང་ཆོས་ཀྱི་བྱ་བ་དང་མ་འབྲེལ་ན་ཚེ་འདི་ཙམ་ཞིག་ལ་སྐྱིད་ཀྱང་ཕྱི་མར་སྐྱིད་པོ་ཡོང་དཀའ། ཆོས་སྤོད་ཡ་བཟང་པོ་ལྟ་བུ་དེ་ཡང་སྟོབས་འབྱོར་གྱི་ཟ་མ་དང་སྦྱར་དགོས་པ་རེད་མ་གཏོགས། ཟ་མ་མེད་ན་སྤོད་ཡ་རྐྱང་པའང་ཟ་ལོ་རྒྱུ་མ་རེད། ད་སྐབས་སྤོད་ཡ་བཟང་པོ་དང་ཟ་མ་བཟང་པོ་མཉམ་དུ་བསྡེབས་ནས་ཟ་བའི་དུས་ཚོད་ལ་ཐོན་པ་ཡིན། ༼དགོད་སྒྲ།༽

ང་མ་ཡིན་པའི་འབྱོར་བ་ཅན་ཞིག་དེ་རིང་ས་གནས་འདི་ལ་ཐོན་ན། ཁྱེད་ཚོའི་ཆོས་ཚོགས་ཀྱི་ཆོས་པ་ཚང་མ་ལ་ཟས་ཀྱི་མགྲོན་སྟོན་ཆེན་པོ་ཞིག་བཤམ་སྲིད་ཀྱང་། ང་རང་གིས་ཁྱེད་རྣམ་པ་ཚང་མ་ལ་ཆོས་ཀྱི་མགྲོན་སྟོན་ཞིག་འགྱེད་པ་ཡིན་ན། ཁྱེད་རང་ཚོ་མགྲོན་སྟོན་དེར་རོལ་འདོད་དམ། ༼ཐལ་སྒྲ།༽

རྒྱལ་ཁབ་མདུན་ཐང་དུ་ཉིན་གཅིག་ལ་སྤྲོ་འཁྱམ་མཛད།

ཕྱི་ཟླ་༧པའི་ཚེས་༢༦ཉིན། ཆོས་རྗེ་ཉིད་ཝ་ཧྲིང་ཐོན་གྱི་ལྟེ་གནས་ཀྱི་རྒྱལ་ཁབ་མདུན་ཐང་（National Mall）དུ་བྱོན། འདི་ནི་ཨ་རིའི་རྒྱལ་ཁབ་རིམ་པའི་མཛད་སྒོ་གལ་ཆེན་སྤེལ་སའི་གནས་ཡིན་ཞིང་། སྤྲོ་འཁྱམ་བྱ་སའི་ལྗོངས་གནས་མང་པོ་ཞིག་ཀྱང་འདིར་འདུས་ཡོད།

ངེད་ཅག་གིས་ཐོག་མར་ལྗོར་ལྗི་ཝ་ཧྲིང་ཐོན་གྱི་རྗེས་དྲན་རྡོ་རིང་（Washington Monument）ལ་ལྟ་སྐོར་བྱས་པ་ཡིན། རྡོ་རིང་འདི་ནི་གྲོང་ཁྱེར་གྱི་མཚོན་རྟགས་ལྟ་བུར་གྱུར་འདུག་པ་དང་། ཨ་རིའི་སྲིད་འཛིན་དང་པོ་ལྗོར་ལྗི་ཝ་ཧྲིང་ཐོན་ལ་དྲན་རྟེན་དུ་བཙུགས་པ་ཡིན་ཞིང་མཐོ་ཚད་ལ་སྨི་༡༦༩འདུག སྔོན་ཆད་ཨ་རིའི་སྲིད་གཞུང་གིས། ཝ་ཧྲིང་ཐོན་གྲོང་ཁྱེར་གྱི་འཛུགས་སྐྲུན་གང་ཡིན་ཡང་དྲན་རྟེན་གྱི་རྡོ་རིང་འདི་ལས་མཐོ་མི་ཆོག་པའི་ཁྱབ་བསྒྲགས་ཀྱང་བྱས་མྱོང་། རྡོ་རིང་འདི་ནི་རྒྱ་ནག་གི་རྒྱལ་མོ་ཝུའུ་ཙེ་ཐེན་གྱི་ཡི་གེ་མེད་པའི་རྡོ་རིང་ཇི་བཞིན་ཡི་གེ་གཅིག་ཀྱང་བྲིས་མི་འདུག དེ་ལ་འགའ་རེས་ཁོང་གི་བྱས་རྗེས་རྣམས་ཚིག་གི་ལམ་ནས་མཚོན་དུ་མེད་པས་ཡིན་ཟེར། འགའ་རེས་ཁོང་གི་སྐྱོན་དང་ཡོན་ཏན་ལ་མི་རབས་ཕྱི་མ་དག་གིས་དཔྱད་འཇོག་བྱ་ཆེད་ཡིན་ཟེར།

དེ་ནས། སྲིད་འཛིན་ལིན་ཁིན་གྱི་དྲན་རྟེན་ཁང་（Lincoln Memorial）དུ་ཕྱིན། དྲན་རྟེན་ཁང་འདི་ནི་ཨ་རིའི་སྲིད་འཛིན་ཁྲི་རབས་བཅུ་དྲུག་པ་སྐུ་ཞབས་ཨེ་པཱར་ཧམ་ལིན་ཁིན་ལ་རྗེས་དྲན་བྱ་ཆེད་བཞེངས་པ་ཡིན་ལ། རྗེས་དྲན་ཁང་གི་དཀྱིལ་དུ་ཁོང་གི་བརྐོས་བརྙན་ཆེན་པོ་ཞིག་འདུག་ཅིང་། དེའི་སྟེང་ཕྱོགས་སུ་ཁོང་གིས་ཨ་རིའི་མི་དམངས་རྣམས་གཅིག་གྱུར་བྱས་པའི་དྲན་རྟེན་ཞུ་ཚིག་བྲིས་འདུག འདི་ནི་ཞི་བདེ་བརྩོན་ལེན་པ་མཱར་ཐིན་ལུའུ་དྷེར་ཁིང་（Martin Luther King）གིས་ང་ལ་རེ་བའི་རྨི་ལམ་ཞིག་ཡོད་ཅེས་པའི་སྤྱི་བསྒྲགས་གྲགས་ཅན་སྤེལ་བའི་གནས་ཀྱང་ཡིན།

དེ་རྗེས་ང་ཚོ་ཝེད་ནཱམ་དམག་འཁྲུག་གི་དྲན་རྟེན་རྡོ་རིང་（Vietnam Veterans Memorial）ལ་བལྟ་རུ་སོང་། རིང་ཚད་ལ་དབྱིན་ཁྲི་༥༠༠ལྷག་གི་རྡོ་ནག་པོའི་ངོས་སུ། ཝེད་ནཱམ་དམག་འཁྲུག་ཁྲོད་འདས་གྲོངས་སུ་སོང་བའི་དམག་དཔོན་དང་དམག་མི་རྣམས་ཀྱི་མིང་བཀོད་ཡོད་པ་དང་། ཆོས་རྗེ་མཆོག་གིས་དེར་དུས་ཡུན་རིང་ཙམ་དུ་ཤི་བོ་རྣམས་ལ་ཐུགས་བསྐྱེད་སྨོན་ལམ་གནང་།

མཇུག་ཏུ་རྒྱལ་ཚོགས་མཁར་ཆེན་（United States Capitol）དུ་ལྟ་སྐོར་ལ་ཕྱིན། འདི་ནི་ཨ་རིའི་དཀྱིལ་སྙིང་ལྟ་བུའི་འཛུགས་སྐྲུན་ཡིན་ལ་ཁྱོན་ཐོག་བརྩེགས་ལྔས་གྲུབ་ཡོད། སྲིད་འཛིན་མང་ཆེ་བའི་ཁྲི་འདོན་མཛད་སྒོ་ཡང་འདི་ནས་སྤེལ་བ་ཡིན། དེ་དག་ལས་ཆེས་མིག་དབང་འཕྲོག་པ་ནི་དཀྱིལ་གྱི་ཚོམས་ཆེན་སྒོར་དབྱིབས་ཅན་དེ་ཡིན་ཏེ། དེར་ཡོད་རྔམ་བརྗིད་ལྡན་པའི་ལྡེབས་རིས་དང་གསོན་ཉམས་ལྡན་པའི་མི་སྣའི་འཇིམ་བརྙན་སོགས་ཀྱིས་ཨ་རིའི་ལོ་རྒྱུས་ཐོག་ཏུ་བྱུང་བའི་རླབས་ཆེན་གྱི་མཛད་པ་རྣམས་གསལ་བར་མཐོང་ཐུབ། ཚོམས་ཆེན་གྱི་ལྷོ་བྱང་གཉིས་སུ་གྲོས་ཚོགས་ཁང་གོང་མ་དང་འོག་མ་གཉིས་ཡོད་ཅིང་། དེས་ཨ་རིའི་གལ་ཆེའི་ཇུས་གཞི་རྣམས་ཀྱི་མཐའ་མཇུག་གི་ཐག་གཅོད་ལ་མཐོང་དཔང་བྱས་ནས་ཡོད།

འཇམ་དཔལ་ཞི་སྒྲུབ་ཀྱི་བྱུང་བ།

ཉིན་དེའི་དགོང་མོར་ཆོས་རྗེ་ཉིད་ཀྱིས་འཇམ་དཔལ་ཞི་སྒྲུབ་ཀྱི་དབང་གནང་བའི་སྔོན་དུ་ཚང་མར་འདི་ལྟར་གསུང་།

འཇམ་དཔལ་ཞི་སྒྲུབ་བྱིན་རླབས་མྱུར་སྩོལ་ཞེས་བྱ་བ་འདི་ཉིད་ཀྱི་དབང་བསྐུར་བའི་སྐབས་སུ་བབས་པ་ཡིན།

ཆོས་འདིའི་ལོ་རྒྱུས་མདོར་བསྡུས་ཙམ་ཞུ་ན། ཁ་སང་བཤད་པ་བཞིན་ཐོག་མར་ཕྱི་ལོ་༡༩༨༧ལོར། ང་རང་བོད་ཀྱི་སེར་སྐྱ་ཁྲི་ཕྲག་གཅིག་དང་མཉམ་དུ་ཤར་ཕྱོགས་རི་བོ་རྩེ་ལྔའི་གནས། མགོན་པོ་འཇམ་པའི་དབྱངས་མངོན་སུམ་དུ་བཞུགས་པའི་ས་ཆ་ལ་ཕྱིན། དེའི་དུས་སུ་བོད་རིགས་ཙམ་དུ་མ་ཟད་རྒྱ་ནག་དང་། སོག་པོ། གཞན་ཡང་ལྟ་སྐོར་དུ་ཕེབས་པའི་ཕྱི་རྒྱལ་ལུང་པའི་མི་མང་པོ་དང་མཉམ་དུ། དེ་བཞིན་གཤེགས་པ་ཤཱཀྱ་ཐུབ་པའི་རིང་བསྲེལ་མཆོད་རྟེན་གྱི་དྲུང་དུ་བཟང་སྤྱོད་སྨོན་ལམ་བྱེ་བ་ཁ་ཤས་བཏོན་པ་ཡིན། དེ་དུས་མགོན་པོ་འཇམ་པའི་དབྱངས་ཀྱི་ཐུགས་ཀྱི་རྩལ་ལས། དེར་འཁོད་པའི་སྐྱེ་བོ་མཆོག་དམན་རབ་འབྲིང་ཚང་མ་ལ་རང་རང་གི་ལས་དང་མཐུན་པར། རབ་མགོན་པོ་འཇམ་པའི་དབྱངས་ཀྱི་ཞལ་མཇལ་གསུང་ཐོས་ཐུགས་ཀྱི་བྱིན་རླབས་རྒྱུད་ལ་འཕོས་པ་དང་། འབྲིང་ཉམས་ལ་དེ་ལྟར་བྱུང་བ། ཐ་མ་རྨི་ལམ་དུ་མགོན་པོ་འཇམ་པའི་དབྱངས་ཀྱི་ཞལ་མཇལ་བ། ཡང་ཐ་རྣམས་ཀྱིས་ཀྱང་འཇམ་དཔལ་དབྱངས་ཀྱི་བྱིན་རླབས་ཀྱི་རྟགས་མཚན་རྣམ་པ་བཅུ་གནས་ཡིག་ཏུ་བཤད་པ་བཞིན་བྱིན་རླབས་མ་བྱུང་བ་གང་ཡང་མེད་པ་ལྟ་བུ་བྱུང་།

སྨོན་ལམ་ཆེན་མོ་མཇུག་དྲིལ་བ་དང་མཉམ་དུ། མི་སྐྱ་ཕལ་མོ་ཆེས་རང་རང་གི་ཚེ་འདི་དང་ཕྱི་མའི་རེ་འདོད་ཐམས་ཅད་གྲུབ་ནས་རང་ཡུལ་དུ་བདེ་འཚམས་ངང་ཕྱིར་ལོག་ཅིང་། ཚེ་གཅིག་གིས་སངས་རྒྱས་ཀྱི་གོ་འཕང་སྒྲུབ་པར་འདོད་པའི་བླ་སེར་ལྔ་བརྒྱ་ལྷག་གནས་ཆེན་རི་བོ་རྩེ་ལྔ་དེ་ཉིད་དུ་ཞག་བརྒྱའི་བར་དུ་བཞུགས་ནས། མགོན་པོ་འཇམ་དབྱངས་རིགས་ལྔ་བཞུགས་པའི་རི་བོའི་རྩེ་ལྔ་ཀ་དང་། གཞན་ཡང་བྱང་ཆུབ་སེམས་དཔའ་དང་གྲུབ་པ་ཐོབ་པའི་གང་ཟག་མང་པོ་བྱོན་པའི་ས་ཆ་དུ་མ་ལ་སོང་ནས་སྒྲུབ་པ་ཉམས་ལེན་བྱས་པ་ཡིན།

ཁྱད་པར་དུ་ངེད་ཅག་བླ་སེར་མང་ཆེ་བ་སྡོད་པའི་ས་ཁུལ་འགའ་ཞིག་ཡོད་དེ། གཅིག་ནི་རི་བོ་རྩེ་ལྔའི་ནུབ་རིའི་ཕྱོགས་ཀྱི་མགོན་པོ་འཇམ་པའི་དབྱངས་ཀྱི་རྫུ་འཕྲུལ་གྱིས་བཞེངས་པའི་བཞུགས་ཁྲི་ཞིག་ཡོད་པ་དེའི་སྟེང་དུ། ང་རང་གིས་ཟླ་བ་འདིའི་ཚེས་བཞི་ནས་བཅུའི་བར་དུ་འཁོར་སློབ་མང་པོ་ལ་ཆོས་བཤད་པ་ཡིན། ཚེས་བཅུའི་ཉིན་ཚོགས་ཀྱི་འཁོར་ལོ་རྒྱ་ཆེར་སྐོར་པའི་གནས་སྐབས་ན། ནམ་མཁའ་ནས་འཇའ་དང་འོད་ཀྱི་རང་བཞིན་ཅན་གྱི་འཇམ་དཔལ་དབྱངས་ཀྱི་སྐུ་དང་། སེངྒེ་། ཡིག་འབྲུ། ཕྱག་མཚན་ལ་སོགས་པ་དེར་འཁོད་ཀྱི་བླ་སེར་ལྔ་བརྒྱ་པོ་ཚང་མས་ཀྱང་མ་མཐོང་བ་མེད་པར་མངོན་སུམ་དུ་མཇལ།

དེའི་སྔོན་དུ་ངེད་ཅག་རྣམས་ཤར་རིའི་ཉེ་འདབས། མགོན་པོ་འཇམ་པའི་དབྱངས་ཀྱི་སྐུ་དྲུང་དུ་གཞོན་ནུ་ནོར་བཟང་གིས་བྱང་ཆུབ་མཆོག་ཏུ་སེམས་བསྐྱེད་ཅིང་། ཀུན་ཏུ་བཟང་པོའི་རྣམ་ཐར་རྒྱ་མཚོ་ལྟ་བུ་ལ་རང་དབང་འབྱོར་ནས། བཟང་སྤྱོད་སྨོན་ལམ་གསུངས་པའི་ས་གནས་ནོར་བཟང་ཕུག་པ་ཞེས་བྱ་བ་རུ་འགྲོ་བའི་སྐབས་སུ། དེར་འཁོད་ཀྱི་རྒྱ་རིགས་དད་ལྡན་མི་སྐྱ་དྲུག་བརྒྱ་ལྷག་ཙམ་ལ། ཕལ་ཆེར་གྱིས་ནམ་མཁའ་ནས་འཇམ་པའི་དབྱངས་གནས་དེར་གཤེགས་པའི་སྣང་བ་དང་། འགའ་ཞིག་གིས་སེངྒེ་སོགས་གཤེགས་པའི་སྣང་བ་ཡང་མཐུན་སྣང་དུ་གྲུབ་པ་ཡིན།

དེ་ནས་ངེད་ཅག་དཔོན་སློབ་རྣམས་སྡོད་གནས་གཞན་ཞིག་ནི། ཤར་རིའི་རྩེ་ཡི་ཉེ་འདབས་ཨ་སུ་ར་ཡི་ཕུག་པའམ་སྲེད་མེད་བུའི་ཕུག་པ་ཞེས་བྱ་བ་ཡིན། དེ་ནི་དེ་བཞིན་གཤེགས་པའི་མདོ་ཕལ་པོ་ཆེ་ལས། བསྐལ་པ་ཐོག་མའི་དུས་ནས་ཐ་མའི་བར་དུ་འཇམ་པའི་དབྱངས་འཁོར་ཁྲི་ཕྲག་དང་བཅས་པ་ཐམས་ཅད་རྟག་ཏུ་བཞུགས་ཡོད་པར་ལུང་གིས་བསྟན་པའི་གནས་ཡིན། ཕུག་པ་དེ་ནས་འཇམ་དཔལ་དབྱངས་ཀྱི་བྱིན་རླབས་རྒྱུད་ལ་ཞུགས་པའི་སྟོབས་ཀྱིས་ཆོས་འདི་ཉིད་ཡིག་ཐོག་ཏུ་ཕབ། ཆོས་འདི་ཉམས་སུ་ལེན་པའི་གང་ཟག་ཐམས་ཅད་ཀྱི་རྒྱུད་ལ་ཉམས་རྟོགས་རྩོལ་མེད་དུ་སྐྱེས་པ་དང་། ཐ་ན་ཡང་དད་པ་དང་སྙིང་རྗེ་སྔར་དང་མི་འདྲ་བ་སྐྱེས་པ་སོགས་ཆོས་འདིའི་ཁྱད་ཆོས་མངོན་སུམ་དུ་མཐོང་བར་གྱུར་པས། གངས་རིའི་ལྗོངས་ཀྱི་མཐའ་དབུས་ཀུན་ཏུ་དར་ཁྱབ་ཧ་ཅང་ཆེ་བར་གྱུར།

རྗེས་སུ་ཕྱི་ལོ་༡༩༩༠ལོར། ང་རང་རྒྱ་གར་དུ་འགྲོ་བའི་སྐབས་སུ་མཁས་ཤིང་གྲུབ་པ་བརྙེས་པའི་བསྟན་འཛིན་གྱི་སྐྱེས་ཆེན་དུ་མ་ལ། ཆོས་འདིའི་དབང་དང་ཁྲིད་དང་གདམས་པ་མ་ལུས་པ་ང་རང་གིས་ཕུལ་བ་ཡིན། དེའི་སྟོབས་ཀྱིས་ཆོས་འདི་སྔར་ལས་ཀྱང་རྒྱ་གར་དང་བལ་པོ། འབྲུག་པ། རྒྱ་ནག་ལ་སོགས་པའི་ཡུལ་ཀུན་ཏུ་དར་ཁྱབ་རྒྱ་ཆེ་བར་གྱུར།

ད་ལོའི་གནས་སྐབས་སུ་སྔོན་གྱི་ལས་དང་སྨོན་ལམ་གྱི་དབང་གིས་ཨ་རིའི་རྒྱལ་ཁབ་འདི་རུ་འབྱོར་བ་ན། ཐོག་མར་ང་རང་ལ་ཆོས་འདིའི་དབང་བསྐུར་འདོད་ཀྱི་བཀོད་སྒྲིག་ཆེར་མེད་ཀྱང་། ཁོང་རྣམ་པས་བསྐུལ་མ་ཡང་ཡང་བྱས་པ་དང་། སྨོན་ལམ་དུས་སུ་སྨིན་པའི་དབང་གིས། གནས་ཆུང་རྡོ་རྗེ་སྒྲ་དབྱངས་གླིང་དུ་ཐོན་ཏེ་ཆོས་འདི་ཉིད་སྤེལ་བའི་སྐབས་སུ། ཐམས་ཅད་ལ་དད་གུས་ཚད་མེད་པ་སྐྱེས་ནས་ཆོས་འདིའི་རྒྱུད་འཛིན་དངོས་ལྟ་བུ་ཉིད་དུ་གྱུར།

དེ་ནས་ཁོ་ལོར་རཱ་ཏོའི་ས་ཁུལ་གྱི་ཆོས་ཚོགས་སུ་སོང་ནས་འཁོར་ཚོགས་མང་པོ་ལ་དབང་འདི་ཉིད་སྐུར་བའི་དུས་སུ། སྔོན་ཆད་ང་རང་རི་བོ་རྩེ་ལྔ་ལ་ཐོན་སྐབས་གློ་བུར་དུ་བྲིས་པའི་ལུང་བྱང་ཡིད་ལ་དྲན་ནས་ཀུན་ལ་བསྒྲགས་པ་ཡིན། དེར་ཅི་ཞིག་གསུངས་ཡོད་ཅེ་ན། ཆོས་འདི་བྱུང་ས་ཤར་གྱི་ཕྱོགས་ཡིན་ཡང་འགྲོ་དོན་རྒྱ་ཆེན་དར་ས་ནུབ་ཀྱི་ཕྱོགས་ཡིན་པར་གསུངས་པས། ཁོང་རྣམས་ཀྱིས་ཀྱང་ཡིད་ཆེས་རྒྱ་ཆེན་པོ་ཐོབ་ནས་ཚང་མས་ཉམས་བཞེས་བྱེད་པར་ཁས་ལེན་དམ་བཅའ་བྱས་སོང་། དེས་ན་ཁོང་རྣམ་པའི་དད་པ་དེ་ལ་མོས་པ་ལས་བྱུང་བའི་དད་པ་ཟེར།

ཁྱད་པར་དུ་ཁཱ་ལི་ཧྥོར་ནེ་ཡའི་ནང་པའི་ཆོས་ཚོགས་ཁག་ཏུའང་ཆོས་འདི་ཉིད་ཀྱི་དབང་བསྐུར་ཞིང་ཁྲིད་བཤད་པ་ཡིན། ཆོས་ཚོགས་དེའི་བླ་མ་རྣམ་པར་མཚོན་ན། སངས་རྒྱས་ཆོས་ལུགས་ཀྱི་ནང་དུ་བཤད་པའི་ཡོན་ཏན་ལྡན་པའི་སྐྱེས་བུ་དམ་པ་རེད། སྐབས་དེར་ཆོས་འདི་ཉིད་ཐོབ་པའི་རྟེན་འབྲེལ་གྱི་དབང་གིས་དཔོན་སློབ་འཁོར་ཚོགས་མང་ཆེ་བའི་རྒྱུད་ལ། ཤེས་ནས་བྱུང་བའི་དད་པའམ་མི་ལྡོག་པའི་དད་པ་སྟེ་དབང་པོ་རྣོན་པོ་ལ་སྐྱེ་བའི་དད་པ་བླ་ལྷག་ཏུ་འཕེལ་བ་ཡིན།

དེས་ན་ཁྱེད་རྣམ་པ་ལའང་མོས་པ་ལས་བྱུང་བའི་དད་པ་ཙམ་སྐྱེས་པས་མི་ཆོག་པར། ཆོས་འདི་ལ་ཤེས་ནས་དད་པ་སྐྱེ་དགོས་པ་ཡིན། ཤེས་ནས་དད་པ་ཞེས་པ་ནི་ཆོས་འདི་ཆོས་གཞན་དང་མི་འདྲ་བར། ཚིག་དང་དོན་གྱི་ཆ་ལ་བྱིན་རླབས་ཁྱད་པར་ཅན་ཡོད་པ་ལ་ངེས་པ་འདྲོངས་ནས་གཟོད་དད་པ་སྐྱེ་དགོས་པ་མ་གཏོགས། རང་གར་མིའི་ཁ་ལ་ཉན་ནས་དད་པ་སྐྱེས་ན་དེ་ལྡོག་སླ་བ་སྟེ་དེ་རིང་དད་ཀྱང་སང་ཉིན་མི་དད་པ་ཡོང་སྲིད།

གཞན་ཡང་ཁྱེད་རྣམ་པས་བདག་ལ་དད་གུས་བྱེད་ཚུལ་འདི་ཡང་ཤེས་ནས་དད་པའི་ཕྱོགས་སུ་གཏོགས་ཆོག་པར་སྙམ། གང་ཡིན་ཞེ་ན། ཁྱེད་རྣམ་པའི་བླ་མ་དང་ངེད་གཉིས་བསྡུར་བ་བྱས་ན། མཚན་སྙན་གྲགས་དང་ཐོབ་གོ་གནས། ནང་གི་ཡོན་ཏན་སོགས་ཀྱི་ངོས་ནས་དངོས་གནས་བརྒྱ་འགྱུར་སྟོང་འགྱུར་གྱིས་བཟང་བ་ནི་ཁོང་ཡིན་ཡང་། ད་སྐབས་ཁོང་རྣམ་པ་ངའི་ཕྱི་བཞིན་དུ་འབྲངས་ནས། བྲན་གཡོག་ཐ་མ་ལས་ཀྱང་ཐ་མ་ལྟ་བུའི་གུས་བཀུར་ཁྱད་པར་ཅན་ཞུ་རྒྱུ་འདི་ནི། ཐམས་ཅད་ལ་གུས་པ་ཁྱུ་མཆོག་རྭ་ཆད་པ་ལྟ་བུའི་འདུ་ཤེས་བསྐྱེད་པར་བྱའོ་ཞེས་བཅོམ་ལྡན་འདས་ཀྱིས་སྡེ་སྣོད་ཀྱི་ནང་དུ་གསུངས་ཡོད་པས། དངོས་གནས་དད་གུས་ཁྱད་པར་ཅན་ཡོད་པས་རེད་མ་གཏོགས་འདི་ལྟ་བུ་རྩ་བ་ནས་འབྱུང་མི་སྲིད།

ཁོང་རྣམ་པ་ཙམ་དུ་མ་ཟད་ད་སྐབས་ང་རང་གི་འཁོར་དུ་གྱུར་པ་ལྔ་ཡོད་པ་ལས། མེ་སྒྲོན་དང་མུ་མཚོ་ངེད་ཅག་ཁྱིམ་ཚང་གཅིག་རེད། ཁོང་རྣམ་པ་གཉིས་ཀྱི་དད་གུས་ཀྱང་ངོ་མ་བསམ་གྱིས་མི་ཁྱབ་པ་ཞིག་ཡིན། དེ་བཞིན་མཁན་པོ་རྣམ་གྲོལ་དང་། མཁན་པོ་བསོད་དར་རྒྱས། དངོས་གྲུབ་རྡོ་རྗེ་ཁོང་རྣམ་པ་ཡིན་ཡང་། དགུ་ནིང་ངེད་ཅག་རྒྱ་གར་དུ་འགྲོ་སྐབས། ཟླ་བ་དྲུག་གི་རིང་དུས་རྟག་ཏུ་ང་ལ་གཡོག་པོ་ལྟ་བུ་བྱས་ནས་ཞབས་ཕྱི་བསྒྲུབས་ནས་སུན་པར་མ་གྱུར། ད་ལོ་ཡང་ཨ་རིའི་རྒྱལ་ཁབ་འདི་ནས་ཉིན་མཚན་ཀུན་ཏུ་སྐྱོ་ངལ་མེད་པར་ང་ནི་འཁོར་ལོས་བསྒྱུར་བའི་རྒྱལ་པོ་ལྟ་བུ་དང་། ཁོང་རྣམ་པ་ནི་སྤྲང་པོ་མུ་ཏོ་བ་ལྟ་བུའི་འདུ་ཤེས་བཞག་ནས་ཞབས་ཕྱི་སྒྲུབ་པ་ནི་དངོས་གནས་མི་ལྡོག་པའི་དད་པ་ཡོད་པར་མཚོན་པ་ཡིན།

བླ་མ་ལ་གུས་པ་དང་དད་པ་ཡོད་པ་དེ་མི་ལྡོག་པའི་དད་པ་ཡིན་པའི་རྟགས་མཚན་གང་གིས་ཤེས་ཤེ་ན། སྔོན་གྱི་ལོ་རྒྱུས་ཀྱི་དབང་དུ་བྱས་ན་ཡང་ཤེས་པར་ནུས་ཏེ། སྔོན་དེ་བཞིན་གཤེགས་པ་ཤཱཀྱ་ཐུབ་པ་དངོས་སུ་བཞུགས་པའི་སྐབས་སུ། རྒྱལ་པོ་གཟུགས་ཅན་སྙིང་པོ་ཞེས་པའི་རྒྱལ་པོ་ཆེན་པོ་ཞིག་ཡོད། ཁོང་བཅོམ་ལྡན་འདས་ལ་མི་ལྡོག་པའི་དད་པ་སྐྱེས་ནས། བཅོམ་ལྡན་འདས་དངོས་མ་ཟད་དེའི་འཁོར་དུ་གྱུར་པ་ཡན་ཆད་མཐོང་ཡོང་སྐབས། དུས་རྟག་ཏུ་ཕྱག་འཚལ་བ་རེད། ཉིན་ཞིག་འཚོ་བ་པོ་མང་པོ་ཐོན་ཡོང་དུས། རྒྱལ་པོས་བཅོམ་ལྡན་འདས་ཀྱི་རྗེས་འཇུག་རེད་སྙམ་ནས་གླང་ཆེན་ལས་བབས་ཏེ་ཕྱག་འཚལ་བ་ན། ཡུལ་ཁམས་དེའི་མི་རྣམས་ཀྱིས། རྒྱལ་པོ་ཆེན་པོ་ཞིག་གིས་འཚོ་བ་པོ་མང་པོ་ལ་ཕྱག་འཚལ་མི་འོས་སོ་ཞེས་འཕྱ་བརྗོད་བྱས། དེས་ན་གཟུགས་ཅན་སྙིང་པོས་བཅོམ་ལྡན་འདས་ལ། ཁྱེད་ཀྱི་ཉན་ཐོས་ཐམས་ཅད་ལ་འཚོ་བ་པོ་དང་མི་འདྲ་བའི་ཆ་བྱད་ཅིག་གནང་བར་མཛད་དུ་གསོལ་ཞུས་པས། ད་ལྟ་བླ་སེར་རྣམས་ཀྱིས་མནབས་པའི་ཆོས་གོས་རྣམ་གསུམ་དེ་བཅོམ་ལྡན་འདས་ཀྱིས་སྐབས་དེར་གནང་བ་ཡིན། སྔོན་རྒྱ་གར་གྱི་དབང་དུ་བྱས་ན་ཡང་། བླ་མ་ལ་དད་པ་དང་གུས་པ་ཁྱད་པར་ཅན་ཡོད་པ་དེ་མི་ལྡོག་པའི་དད་པ་ཡོད་པའི་རྟགས་ཡིན།

བོད་ཡུལ་ལ་མཚོན་ན་སྔོན་ཆོས་རྒྱལ་ཁྲི་རལ་པ་ཅན་ཟེར་བ་ཞིག་ཡོད། ཁོང་ཡང་ཡུལ་གྲུ་མང་པོ་དབང་བསྒྱུར་བའི་རྒྱལ་པོ་ཆེན་པོ་ཉིད་དུ་གྱུར། ཁོང་ལ་རལ་པ་ཧ་ཅང་རིང་པོ་ཡོད་ལ། དགེ་འདུན་པ་རྣམས་འབྱོན་ཡོང་སྐབས་རལ་པ་དེ་ཉིད་གདན་དུ་བཏིངས་ནས་ཚང་མ་རལ་བའི་གདན་ཐོག་ནས་འབྱོན་པར་བྱེད་པ་ཡིན། ཁོང་དགེ་འདུན་པར་གུས་པ་ཆེན་པོ་ཡོད་པས་མཚན་ལ་ཡང་ཆོས་རྒྱལ་ཁྲི་རལ་པ་ཅན་ཞེས་ཡོངས་སུ་གྲགས། དེ་ལྟར་རྒྱལ་པོ་ལ་ཡང་བླ་མར་གུས་པ་ཁྱད་པ་ཅན་ཡོད་ན་མི་ལྡོག་པའི་དད་པ་ཡོད་པའི་རྟགས་ཡིན།

ང་ཨ་རིའི་ལུང་པར་ཐོན་རྗེས། ཧཱ་ཝ་ཡའེ་དང་ཁཱ་ལི་ཧྥོར་ནེ་ཡ་ལས་ལྷག་པའི་འགྲོ་དོན་རྒྱ་ཆེན་པོ་ཞིག་ཝ་ཧྲིང་ཐོན་ནས་ཡོང་རྒྱུ་རེད་བསམ་པའི་རེ་བ་ཡོད། རྒྱུ་མཚན་ཡང་ད་ལྟ་སྤྱི་ཁྱབ་ནས་བསམ་བློ་བཏང་ན། གྲུབ་དབང་པདྨ་ནོར་བུ་ཁོང་ནི་གསང་སྔགས་རྙིང་མ་པ་ཡོངས་སུ་རྫོགས་པའི་བསྟན་པའི་བདག་པོ་ཉིད་དུ་མངའ་གསོལ་ཡོད།

རྙིང་མ་པར་ཁོང་ལས་ལྷག་པའི་སྐད་ཆ་བཤད་མཁན་དང་དབང་ཆ་འཛིན་མཁན་ཞིག་ད་ལྟའི་དུས་ན་མེད། ང་རང་ཉིད་ལ་མཚོན་ན། ཡུན་རིང་པོའི་བར་དུ་ཁོང་གི་ཆོས་ཕྱོགས་ཀྱི་ཡོན་ཏན་དང་འཇིག་རྟེན་ཕྱོགས་ཀྱི་འགྲོ་སྟངས་གང་ཅིའི་ཐད་ནས་བརྟག་དཔྱད་ཞིབ་མོ་བྱས་མྱོང་བ་ཡིན། ཁོང་ནི་ཆོས་ལུགས་ཀྱི་ཐད་ནས་མཁས་པ་དང་གྲུབ་པ། བཟང་པོའི་མཛད་སྤྱོད་སུས་ཀྱང་འགྲན་དུ་མེད་པ་དང་། མི་ལུགས་ཀྱི་ཐད་ནས་ཀྱང་ངང་བཟང་བ་དང་ཕྱི་ཐག་རིང་བའམ་འདྲིས་རྟག་པོ། མངོན་ལྐོག་མེད་པའི་བླ་མ་ཁོང་འདྲ་བ་ནི། དེང་སང་སའི་སྟེང་དུ་དངོས་གནས་མི་འདུག་སྙམ་པའི་ཡིད་ཆེས་ཁྱད་པར་བ་སྐྱེས་སོང་།

གྲུབ་དབང་རིན་པོ་ཆེས་ངོས་འཛིན་མཛད་པའི་ཨ་དཀོན་ལྷ་མོ་ལ་མཚོན་ན། ད་ལྟ་སྐད་གྲགས་ཆེ་ལ་མཛད་འཕྲིན་ཡང་རྒྱས་འདུག དེས་ན་མིང་སྟོང་བ་ཙམ་དུ་མི་འགྱུར་བར་དོན་དངོས་ཐོག་ཏུ་གནས་པ་ཞིག་ཡོང་དགོས། རྩ་བའི་བླ་མ་བརྒྱ་ཡོད་ཀྱང་གཙུག་གི་ནོར་བུ་གཅིག་པུ་ནི་གྲུབ་དབང་པདྨ་ནོར་བུ་རེད། ཐོག་མཐའ་བར་གསུམ་ཀུན་ཏུ་ཁོང་གི་ཐུགས་བཞེད་རྒྱ་ཆེན་པོ་ཞིག་འགྲུབ་པར་འབད་བརྩོན་བྱེད་པ་ནི་དོན་དག་དང་པོ་ཡིན། ཁོང་གིས་སྒྲིབ་མེད་ཡེ་ཤེས་ཆེན་པོས་གཟིགས་ནས་ས་ཆ་འདི་ལུང་བསྟན། མོ་རང་ཡང་ས་ཆ་འདིའི་ཆོས་ཀྱི་བདག་པོ་ཉིད་དུ་མངའ་གསོལ་ཡོད་ན། ས་ཆ་འདི་ནི་ཡུལ་ཁམས་གཞན་དང་མི་འདྲ་བར་ཨ་རིའི་རྒྱལ་ས་ཡིན་པས། འདི་ལ་སངས་རྒྱས་ཀྱི་བསྟན་པ་གཞན་གང་དང་ཡང་མི་འདྲ་བའི་ཁྱད་ཆོས་ཅན་དང་བསྟན་པའི་རྨང་གཞི་ངེས་པར་དུ་གདིང་ཐུབ་དགོས་པ་དོན་དག་གཉིས་པ་ཡིན།

དེ་ལྟ་བུའི་བསྟན་འགྲོའི་དོན་སྒྲུབ་པར་བྱེད་པ་ཡང་རྒྱུ་མེད་རྐྱེན་མེད་དུ་མི་འབྱུང་ཕྱིར་དང་པོ་རང་ཉིད་ཡོན་ཏན་ལྡན་པར་བྱ་དགོས། དེས་ན་མོ་ལ་མཚོན་ནའང་། ལྷན་སྐྱེས་ཀྱི་ཡོན་ཏན་ནི་རང་ཤུགས་ཀྱིས་ཡོད་རྒྱུ་རེད་བསམ་པའི་ཡིད་ཆེས་ཁ་ཞེ་གཉིས་མེད་དུ་ཡོད་མོད། འོན་ཀྱང་འཁོར་སློབ་ཀྱི་ཚོགས་སྐྱོང་བར་བྱེད་པ་ལ། ལྷན་སྐྱེས་ཀྱི་ཡོན་ཏན་རྐྱང་བས་མི་ཆོག་པར་སྦྱངས་སྟོབས་ཀྱི་ཡོན་ཏན་ཡང་ངེས་པར་དུ་ཡོད་དགོས། སྦྱངས་སྟོབས་ཀྱི་ཡོན་ཏན་དགོས་པའི་རྒྱུ་མཚན་རྣམ་པ་གཉིས་ཡོད་དེ། དང་པོ་ནི། རང་ཉིད་ལ་མཁས་པ་དང་གྲུབ་པའི་ཡོན་ཏན་རྨད་དུ་བྱུང་བ་ཡོད་དུ་ཟིན་ཀྱང་། གཞན་གདུལ་བྱ་རྣམས་ཡིད་ཆེས་པ་དང་དད་པར་བྱ་བའི་ཕྱིར་དུ་ཆོས་ལ་སྦྱང་བ་རྒྱ་ཆེན་པོ་བྱ་དགོས།

དཔེར་ན་འཇིག་རྟེན་ཁམས་འདིར་མཚོན་ན། སྟོན་པ་ཤཱཀྱ་ཐུབ་པ་ལས་ལྷག་པའི་ལྷན་སྐྱེས་ཀྱི་ཡོན་ཏན་ཅན་ཞིག་ཡོད་མི་སྲིད། ཁོང་གིས་ཀྱང་འཇིག་རྟེན་པ་རྣམས་དད་པར་བྱ་བའི་ཕྱིར་དུ་རིང་འཕུར་དང་ལྷག་སྤྱོད་ཅེས་པའི་བླ་མ་གཉིས་བསྟེན་པ་དང་། ཨོ་རྒྱན་རིན་པོ་ཆེ་ལས་ལྷག་པའི་གྲུབ་པ་བརྙེས་པའི་གང་ཟག་ཅིག་ཡོད་མི་སྲིད་ཀྱང་། ཁོང་གིས་ཀྱང་གྲུབ་པ་ཐོབ་པའི་གང་ཟག་བརྒྱད་ལ་སོགས་པ་ཡུན་རིང་པོའི་བར་དུ་བླ་མར་བསྟེན། དེ་བཞིན་དུ་བི་མ་མི་ཏྲས་ཀྱང་སློབ་དཔོན་ཤྲཱི་སིངྷ་ལོ་ཉེར་གཅིག་གི་བར་དུ་བསྟེན་ནས་གདམས་པ་མ་ལུས་པ་ཞུས་པ་ཡིན། དེའི་ཕྱིར་ན་ལྷན་སྐྱེས་ཀྱི་ཡོན་ཏན་ཡོད་དུ་ཟིན་ཀྱང་བླ་མ་བསྟེན། གདམས་ངག་ཉན། དེ་ལ་སྦྱང་བ་མཐར་ཕྱིན་པར་བྱ་བ་ཅི་ནས་ཀྱང་གལ་ཆེ།

གཉིས་པ་ནི། བླ་མ་ཕལ་ཆེ་བ་ཞིག་ལ་བསམ་བློ་བཏང་ན། སྐུ་སྐྱེ་གོང་མར་ཡོན་ཏན་བསམ་གྱིས་མི་ཁྱབ་པ་ཡོད་དུ་ཟིན་ཀྱང་། བག་ཆགས་ཀྱི་སྒྲིབ་པ་དང་མངལ་གྱི་སྒྲིབ་པ་ལ་སོགས་པས་ཡོན་ཏན་ཕལ་ཆེར་སྒྲིབ་འགྲོ་བ་ཡིན་པས། དེ་བསལ་བར་བྱ་བའི་ཕྱིར་དུ། རང་ཉིད་ཡོན་ཏན་ཕུན་སུམ་ཚོགས་པ་ཡིན་ཡང་བླ་མ་བསྟེན་ཅིང་ཆོས་ལ་སྦྱང་པ་རྒྱ་ཆེན་པོ་བྱ་དགོས། སངས་རྒྱས་ཀྱིས་ཡོན་ཏན་ཡོངས་བཟུང་གི་རྒྱུད་ལས། བླ་མ་མེད་པའི་གོང་རོལ་ན། །སངས་རྒྱས་བྱ་བའི་མིང་ཡང་མེད། །བསྐལ་པ་སྟོང་གི་སངས་རྒྱས་ཀྱང་། །བླ་མ་དག་ལ་བསྟེན་ནས་བྱུང་། །ཞེས་གསལ་པོར་གསུངས་ཡོད།

ངས་རྒྱང་རིང་པོ་ནས་གོ་ཚོད་ལྟར་ན། མོ་རང་གིས་གྲུབ་དབང་པདྨ་ནོར་བུ་སོགས་བསྟེན་ནས་རིན་ཆེན་གཏེར་གྱི་མཛོད་ལ་སོགས་པའི་དབང་ལུང་ཁྲིད་གསུམ་ཞུས་ཤིང་། གཞན་ཡང་བོད་ཡུལ་ནས་བྱོན་པའི་བླ་མ་ཆེས་ཤིན་ཏུ་མང་པོ་བསྟེན་པ་རེད་ཅེས་གོ་སོང་། དེས་ན་ཁོང་ལ་སྦྱངས་པའི་ཡོན་ཏན་ཡང་ཡོད་རྒྱུ་རེད་བསམ་པའི་ཡིད་ཆེས་ཡོད། གལ་ཏེ་དེ་ལྟ་བུའི་ཡོན་ཏན་ལྡན་དུ་ཟིན་ཀྱང་། སློབ་མ་རྗེས་སུ་འཛིན་པར་བྱེད་པ་ལ་ཡོན་ཏན་དཀྱུས་མ་ཞིག་གིས་མི་ཆོག་པར་ཡོན་ཏན་ཕུལ་དུ་བྱུང་བ་ཡོད་དགོས། དེ་ལྟར་དགོས་ཚུལ་ཡང་། སངས་རྒྱས་སྣང་བ་མཐའ་ཡས་དངོས་སུ་མི་གཟུགས་སུ་ཤར་བ་མཉམ་མེད་ཇོ་བོ་རྗེ་དཔལ་ལྡན་དཱི་པཾ་ཀ་རས་ཀྱང་། སྐུ་ཚེ་གཅིག་ལ་བླ་མ་བརྒྱ་དང་ལྔ་བཅུ་ཙམ་བསྟེན་ནས་གདམས་ངག་ཐམས་ཅད་ཞུན་མཐར་བཅད་པ་ཡང་སློབ་མ་སྐྱོང་བའི་ཆེད་ཡིན།

དེས་ན་གཞན་རྗེས་སུ་འཛིན་པར་བྱེད་པ་ལ། རང་ཉིད་འཚང་རྒྱ་བའི་ལམ་ཆ་ཚང་ཤེས་དགོས་པ་སྨོས་མ་དགོས་ཀྱང་། དེ་ཙམ་གྱིས་མི་ཆོག་པར་གདུལ་བྱ་དབང་པོ་རབ་འབྲིང་ཐ་གསུམ་དང་འཚམ་པའི་ཆོས་སྣ་ཚོགས་སྟོན་ཤེས་དགོས་པས་ཡོན་ཏན་སྣ་གཅིག་ཙམ་གྱིས་དོན་མི་ཐོན། དཔེར་ན་ནད་ཅིག་ལ་མཚོན་ན། ཚ་བའི་ནད་ལ་ཚ་བའི་སྨན་དང་གྲང་བའི་ནད་ལ་གྲང་བའི་སྨན་བསྟེན་དགོས་པ་ལྟར། ནད་སྣ་ཚོགས་ཡོད་པ་བཞིན་དུ་སྨན་ཡང་སྣ་ཚོགས་གཏོང་ཤེས་དགོས་པ་མ་གཏོགས། སྨན་གཅིག་གིས་ནད་ཐམས་ཅད་སེལ་མི་ནུས། ཨ་རིའི་ལུང་པའི་སྨན་ཁང་ཚང་མས་ཀྱང་ནད་སོ་སོ་ལ་སྨན་སོ་སོར་གཏོང་གིན་ཡོད་རྒྱུ་རེད་མ་གཏོགས། སྨན་གཅིག་གིས་ནད་ཐམས་ཅད་སེལ་རྒྱུ་མ་རེད་སྙམ། དེས་ན་གདམས་ངག་གཅིག་གིས་མི་ཆོག་པར་གདམས་ངག་མང་པོ་ཤེས་དགོས་པ་ཡིན།

མོ་རང་གིས་ཀྱང་སྔར་གྱི་ཡོན་ཏན་གྱི་སྟེང་ལ་ད་དུང་ཡོན་ཏན་གྱི་ཆ་ཚད་དང་ལྡན་པའི་བླ་མ་མང་པོ་བསྟེན་ཏེ། ཡོན་ཏན་གོང་ནས་གོང་དུ་འཕེལ་བར་བྱེད་པ་ལ་འབད་པ་ཅི་ནས་ཀྱང་གལ་ཆེ། སངས་རྒྱས་ཀྱིས་ཀྱང་། ཁྱོད་ཉིད་མི་སློབ་གྱུར་ཀྱང་སློབ་ཚུལ་སྟོན། །ཞེས་སངས་རྒྱས་ཀྱི་སར་ཐོན་ཚར་ཡང་ད་རུང་ཆོས་ལ་སློབ་ཚུལ་སྟོན་དགོས་པར་གསུངས་པ་ལྟར། མོ་རང་གིས་ཀྱང་ད་དུང་དམ་པའི་ཆོས་ལ་སྦྱང་པ་རྒྱ་ཆེན་པོ་བྱ་རྒྱུའི་རེ་བ་ཡོད།

ཁྱེད་འཁོར་སློབ་ཚང་མའི་དབང་དུ་བྱས་ན། ཚེ་འདིའི་ཟས་ནོར་དང་སྙན་གྲགས་ལ་སོགས་པ་གང་ཡང་གཙོ་བོར་མི་བསྒྲུབ་པར་ཐམས་ཅད་དོར་ནས་ཆོས་འདི་ཞུས་ཏེ་ཉམས་སུ་ལེན་པ་ནི། ངའི་ཆོས་འདི་ཉིད་གཏད་སའི་སྣོད་དུ་གྱུར་པ་ཡིན་རྒྱུ་རེད་སྙམ་ནས་དགའ་སྤྲོ་ཧ་ཅང་ཆེ། དེས་ན་ངས་དེ་རིང་དབང་བསྐུར་བ་དང་སང་ཉིན་ཁྲིད་འཆད་རྒྱུ་ཡིན། དེ་ཡང་ཁྱེད་རྣམ་པར་ཚིག་གཅིག་ཀྱང་མི་གསང་བར་ཚང་མ་འཆད་རྒྱུ་ཡིན་པས། ཁྱེད་རྣམ་པས་ཀྱང་ཆུད་ཟོས་སུ་མི་གཏོང་བ་གལ་ཆེ། ཉིན་གཅིག་གཉིས་ཙམ་ལ་ཉམས་སུ་ལེན་ཁུལ་བྱས་ནས། ང་སོང་རྗེས་སྣང་མེད་བྱེད་མི་རུང་མ་གཏོགས་ངས་ཆོས་བཤད་པ་དོན་མེད་དུ་འགྱུར་འགྲོ།

ད་རེས་ཁྱེད་གཙོ་འཁོར་ཚང་མ་ལ་ངས་རེ་བ་ཚིག་གསུམ་བཅོལ་རྒྱུ་ཡིན། དོན་དང་པོ་ནི་གྲུབ་དབང་རིན་པོ་ཆེ་གཙོ་བོར་གྱུར་པའི་བསྟན་འཛིན་གྱི་སྐྱེས་བུ་ཐམས་ཅད་ཀྱི་ཐུགས་བཞེད་ཅི་ནུས་སུ་སྐོང་བར་བྱེད་པ་དང་། གཉིས་པ་ནི་སངས་རྒྱས་ཀྱི་བསྟན་པ་ཡུལ་ཁམས་འདི་ལ་དར་རྒྱས་ཕུན་སུམ་ཚོགས་པ་ཞིག་འབྱུང་བའི་ཐབས་ལ་བརྩོན་པ། གསུམ་པ་ནི་འཇམ་དཔལ་རྫོགས་པ་ཆེན་པོའི་ཆོས་འདི་ཆུད་ཟོས་སུ་མི་གཏོང་བར་ཉམས་བཞེས་མཛད་རྒྱུའི་རེ་བ་ཡིན། རྗེས་མ་ཡང་ང་དངོས་སུ་ཨ་རིའི་ལུང་པ་འདིར་ཐོན་ཐུབ་རྒྱུ་དཀའ་མོ་ཡིན། གལ་ཏེ་མ་ཐོན་རུང་ཡི་གེ་ལ་བཀག་འགོག་མེད་པས། ཕན་ཚུན་ལ་ཡི་གེ་བསྐུར་ནས་ངས་ཁྱེད་ཅག་གིས་ཉམས་བཞེས་ཇི་ལྟར་བྱེད་ཚུལ་གསལ་པོར་གོ་དགོས། དེས་ན་ཁྱེད་རྣམ་པས་ཀྱང་མུ་མཐུད་དུ་ཉམས་བཞེས་མཛད་རྒྱུའི་རེ་བ་ཡིན།

དེ་ལྟར་ཡོན་ཏན་ཕུན་སུམ་ཚོགས་པའི་ཁྱེད་རྣམ་པ་ལ། ཡོན་ཏན་གྱི་ཆ་སྣ་གཅིག་མེད་ལ་སྐྱོན་གྱི་ཆ་ཡོངས་སུ་རྫོགས་པའི་ངས་སློབ་སྟོན་མང་པོ་བྱེད་པ་ནི། དཔེར་ན་ཁྱིས་སེངྒེ་ལ་ཁ་ཏའམ་སློབ་སྟོན་བྱས་པ་ལྟར་མི་འོས་པ་ཡིན་ནའང་། ཨ་རིའི་རྒྱལ་ས་འདི་སྐད་གྲགས་ཆེ་བ་དང་ང་རང་སྡོད་སའི་ཆོས་ཁྲི་འདི་དཔངས་མཐོ་བ། དེ་རིང་ནད་ཁམས་ཀྱང་ཧ་ཅང་དྲག་སྐྱེད་བྱུང་འདུག་པའི་དབང་གིས་སྐད་ཆ་མང་པོ་ཤོར་ཐལ། ཐུགས་ལ་འཕྲོད་ཡོད་ན་ཐུགས་ཀྱི་རྒྱན་དུ་བཞེས་པར་མཛོད། གལ་ཏེ་ཐུགས་ལ་མ་འཕྲོད་ན་བཟོད་པར་གསོལ།

མཁའ་འགྲུལ་དབྱིངས་བསྐྱོད་དངོས་མང་བཤམས་སྟོན་ཁང་དུ་བྱོན།

ཕྱི་ཟླ་༧པའི་ཚེས་༢༧ཉིན་གྱི་སྔ་དྲོར། ཆོས་རྗེ་ཉིད་ཨ་རི་རྒྱལ་ཁབ་ཀྱི་མཁའ་འགྲུལ་དབྱིངས་བསྐྱོད་དངོས་མང་བཤམས་སྟོན་ཁང་（National Air and Space Museum）དུ་བྱོན་ནས་གཟིགས་སྐོར་མཛད། མཁའ་འགྲུལ་དབྱིངས་བསྐྱོད་ཀྱི་བྱུང་འཕེལ་ལ་ལོ་ངོ་བརྒྱ་ཕྲག་ལྷག་གི་ལོ་རྒྱུས་ལས་མེད་པས། དེར་ལོ་རབས་མང་པོ་ལོན་པའི་ལོ་རྒྱུས་རིག་དངོས་བཤམས་སྟོན་བྱས་མི་འདུག་ཀྱང་། མིའི་རིགས་ཀྱི་ཆེས་ཐོག་མའི་ཚན་རྩལ་གྲུབ་འབྲས་ཡོངས་སུ་མངོན་ཡོད།

བཤམས་སྟོན་ཁང་གི་ཚོམས་ཆེན་གྱི་དཀྱིལ་དུ། ལོ་རྒྱུས་བསླབ་དེབ་ཏུ་བཀོད་པའི་རའེ་ཐུ་སྤུན་མཆེད་གཉིས་（Brother Wright）ཀྱིས་ཐོག་མར་བཟོས་པའི་མི་ཐེག་སྒུལ་ཤུགས་གནམ་གྲུ་འཕུར་སྐྱོད་པ་དང་པོ་དང་། སྒྲ་ལས་མྱུར་བའི་དངོས་བརྟག་གནམ་གྲུ་རབས་དང་པོ། ཨ་རིའི་འཁོར་སྐར་དང་པོ་སོགས་མཐོང་ཐུབ་ཅིང་། དེ་མིན་འགྲོ་བ་མིའི་རིགས་ཀྱི་ལོ་རྒྱུས་ཀྱི་རྡོ་རིང་ལྟ་བུའི་ངོ་མཚར་ཆེ་བའི་གསར་གཏོད་དེ། གནམ་གྲུ་དང་མེ་ཤུགས་འཕུར་མདའ། བསྒྱུར་མདའ། འཇིག་རྟེན་འཕུར་གྲུ། དབྱིངས་འགྲུལ་པས་བེད་སྤྱོད་བཏང་མྱོང་བའི་འཕུར་སྐྱོད་ཡོ་བྱད་སོགས་བསྡུ་ཉར་བྱས་འདུག བཤམས་སྟོན་བྱས་པའི་དངོས་རྫས་ཕལ་མོ་ཆེ་ནི་དག་མ་ཡིན་ཞིང་། ལད་བཟོ་བྱས་པ་འགའ་ཡོད་པ་དག་ཀྱང་ཚད་མཐོའི་ལག་རྩལ་གྱིས་བཟོས་པས་ཕལ་ཆེར་དངོས་དང་ཁྱད་པར་མེད་པ་ལྟ་བུར་འདུག ཚད་ཡོད་པའི་བཤམས་སྟོན་ཁང་གི་བར་སྟོང་དེ་ནས། གནམ་གྲུ་དང་ཤེད་འཕྲུལ། མེ་ཤུགས་འཕུར་མདའ་སོགས་དངོས་སུ་མཐོང་བས་སེམས་ལ་གོ་རྟོགས་དང་ཚོར་སྣང་བརྗོད་ལས་འདས་པ་སྐྱེས་བྱུང་།

ཆོས་རྗེ་ཉིད་ཀྱིས་ཆེད་དུ་མིའི་རིགས་ཐོག་མར་ཟླ་བའི་གོ་ལའི་སྟེང་དུ་བསྐྱོད་པར་བཀོལ་བའི་ཨ་ཕོ་ལོ་ཟླ་འཛེག་འཕུར་གྲུ་ལ་ཞིབ་གཟིགས་གནང་། དེ་ནི་མཁའ་འགྲུལ་པ་མ་གྲུ་ལས་གྱེས་ཏེ་ཐད་ཀར་དུ་ཟླ་བའི་སྟེང་ལ་འབབ་བྱེད་ཀྱི་ཆ་ཤས་ཤིག་ཡིན། ཟླ་འཛེག་འཕུར་གྲུ་ནི་ཐེངས་གཅིག་མ་གཏོགས་བེད་སྤྱོད་མེད་ཅིང་། མཁའ་འགྲུལ་པ་ཟླ་བའི་ཐོག་ཏུ་བབས་ཚར་རྗེས་ཟླ་བའི་ཕྱི་ངོས་སུ་གཡུགས་པ་ཡིན། དེར་བརྟེན་བཤམས་སྟོན་ཁང་དུ་ཡོད་པ་དེ་ནི་ཐེབས་བཀོལ་གྱི་ཨ་ཕོ་ལོ་གཉིས་པ་ཡིན་པ་ལས། ཕྱི་ལོ་༡༩༦༩ལོར་ཐོག་དང་པོར་ཟླ་བའི་སྟེང་ལ་འཕུར་བའི་ཨ་ཕོ་ལོ་བཅུ་གཅིག་པ་དེ་མིན། ཟླ་འཛེག་འཕུར་གྲུའི་འཁྲིས་སུ་བརྙན་འཕྲུལ་ཞིག་ཏུ་ཨ་ཕོ་ལོ་བཅུ་གཅིག་པ་ཟླ་བའི་སྟེང་དུ་འཕུར་བའི་དངོས་ཟིན་གློག་བརྙན་བསྐྱར་ཟློས་སུ་གཏོང་གིན་འདུག

འགྲོ་བ་མིའི་རིགས་ཀྱི་ལོ་རྒྱུས་དེབ་ཐེར་དུ་བཀོད་ཅིང་དུས་རབས་ཀྱི་དབྱེ་མཚམས་འབྱེད་པའི་དོན་སྙིང་ལྡན་པའི་ཟླ་འཛེག་གྲུབ་འབྲས་དེ་ནི། མི་སྒེར་གྱི་གོམ་ཆུང་ཞིག་མིའི་རིགས་ཀྱི་གོམ་ཆེན་ཉིད་དུ་གྱུར་ཅེས་ཤིན་ཏུ་གྲགས་ཆེ་བ་ཡིན། ཆོས་རྗེ་ཉིད་འདི་དག་ལ་ཐུགས་མོས་ཤིན་ཏུ་ཆེ་ཞིང་མིའི་རིགས་ཐེངས་དང་པོར་ཟླ་བའི་གོ་ལའི་ཐོག་ཏུ་འཕུར་བསྐྱོད་བྱས་པའི་བརྒྱུད་རིམ་ཧྲིལ་པོར་རྒྱུས་ལོན་ཞིབ་མོ་མཛད། ལྟད་མོ་འདི་དག་མཐོང་རྗེས། ཨ་རི་ནི་དངོས་གནས་ཚན་རྩལ་གྱི་རྒྱལ་ཁབ་སྟོབས་ཅན་ཞིག་ཡིན་པའི་ངེས་ཤེས་སྐྱེས་ཤིང་། ཁོ་ཚོའི་ཚན་རྩལ་གསར་གཏོད་ཀྱི་ལོ་རྒྱུས་འདི་ཡང་། ད་ལྟ་འཛམ་གླིང་གི་རྒྱལ་ཁབ་གཞན་དང་བསྡུར་ན་ཧ་ལས་པའི་བྱས་རྗེས་ཤིག་ཡིན་ངེས་པར་སེམས།

སངས་རྒྱས་ལག་སྟེར་གྱི་ཁྲིད་ཐུན་དང་པོ།

སྤྱིར་ཆོས་རྗེ་ཉིད་ནུབ་གླིང་དུ་ཕེབས་ནས་ཁྲིད་ཡིག་འདི་ཐེངས་ལྔར་གསུངས་ཤིང་། དེ་དག་ལས་དེང་དུས་ཀྱི་མིའི་ཁམས་དང་མཐུན་པའི་ཉམས་ལེན་སྟབས་བདེ་ལ་ཆ་ཚང་བ་ནི་འདི་ཉིད་ཁོ་ནར་མཐོང་བས། འདིར་ཆེད་དམིགས་ཀྱིས་བཀོད་པ་ཡིན།

ཁྱོན་ཁྲིད་ཐུན་གསུམ་ཡོད་པ་ལས་དགོང་མོ་འདིར་ཁྲིད་ཐུན་དང་པོ་གསུངས།

དེ་ལ་གང་གསན་པར་བྱ་བའི་ཆོས་ནི། འཇམ་དཔལ་རྫོགས་པ་ཆེན་པོའི་ཁྲིད་ཡིག་སངས་རྒྱས་ལག་སྟེར་ཞེས་བྱ་བ་འདི་ཉིད་འཆད་པའི་སྐབས་སུ་བབས་པ་ཡིན།

དེ་ལ་ལམ་གྱི་རིམ་པ་སྤྱིར་བསྟན་པ་དང་ཁྲིད་ཡིག་དངོས་བཤད་པ་གཉིས་ལས། ལམ་གྱི་རིམ་པ་སྤྱིར་བཤད་པ་ནི། འདི་ཉིད་ཀྱི་ཆ་ལག་སྙིང་གཏམ་སྙིང་གི་ཐིག་ལེ་ལས་ལམ་གྱི་གོ་རིམ་འདི་ལྟར་བཤད་པ་ཡིན་ཏེ། ཐོག་མར་འདོད་པ་ཆུང་ཞིང་ཆོག་ཤེས་པའི་གང་ཟག་ཅིག་གིས་ཆོས་འདི་ཉིད་ཉམས་སུ་ལེན་དགོས། དེ་ཡང་རང་ལ་རྒྱུ་རྫས་ལོངས་སྤྱོད་ཐོབ་མངའ་ཐང་ཅི་ཡོད་པ་དེ་ཁོ་ནས་ཆོག་ཤེས་པར་བྱེད་པ་ལ་ཆོག་ཤེས་པ་ཟེར། འདོད་པ་ཆུང་བ་ཞེས་བྱ་བ་ནི། གཞན་གྱི་རྒྱུ་རྫས་ལོངས་སྤྱོད་ལ་སོགས་པ་རང་གི་ལག་ཏུ་ཐོབ་ན་སྙམ་པའི་འདོད་ཆེན་མེད་པ་ལ་ཟེར་བ་ཡིན། ཚེ་འདིའི་རྒྱུ་རྫས་ལོངས་སྤྱོད་བདེ་འབྱོར་སྙན་གྲགས་ལ་སོགས་པ་གང་ལ་ཡང་སྙིང་པོ་མེད་པ་དང་། འདོད་པ་གང་དང་གང་ཡིན་ཡང་ལོངས་སྤྱད་ཅིང་སྤྱད་ཅིང་དེ་ལྟར་དུ་འདོད་པ་དང་ཆགས་པ་ལ་སོགས་པ་འཕེལ་ཡོང་བའི་ཕྱིར་ན་འདོད་པ་ལའང་དགོས་པ་ཡོད་པ་མིན། དེར་མ་ཟད་འདོད་པ་དེ་ཇི་ལྟར་བསྒྲུབས་ཀྱང་རང་གི་སྔོན་གྱི་བསོད་ནམས་ཙམ་མ་གཏོགས་འགྲུབ་པའི་སྐལ་བ་ཡང་མེད་པས། ཚེ་འདིའི་བདེ་འབྱོར་སྙན་གྲགས་གང་ལ་ཡང་འདོད་ཅིང་ཆགས་པ་མེད་པ་ཞིག་གིས་ལམ་དེ་བསྒྲུབ་དགོས།

རང་གི་ཁ་ལ་ཟ་རྒྱུ་དང་རྒྱབ་ལ་གོན་རྒྱུ་ཙམ་མི་བསྒྲུབ་ཐབས་མེད་ཡིན། དེ་མ་གཏོགས་རྒྱུ་རྫས་ལོངས་སྤྱོད་ཐམས་ཅད་ལ་རྩ་བ་ནས་ཞེན་པ་མེད་པ་ཞིག་དགོས། དེ་བཞིན་དུ་ཐོབ་མངའ་ཐང་ཡང་རང་བཞིན་ཤུགས་ཀྱིས་འབྱུང་བའི་ཐོབ་གོ་གནས་ཤིག་མ་གཏོགས། དེ་ལས་གཞན་པའི་ཐོབ་གོ་ས་ཆེན་པོ་ཞིག་ཨེ་རྙེད་བསམ་པའི་ཞེན་པའང་རྩ་བ་ནས་ཡོད་མི་ཉན་ལ། མཚན་སྙན་གྲགས་ལ་སོགས་པ་ཕྱོགས་ཀུན་ཏུ་རྒྱས་ན་སྙམ་པའི་བསམ་པ་ཡང་རྩ་བ་ནས་ཡོད་མི་རུང་།

ཀུན་མཁྱེན་བླ་མའི་ཆོས་བཞི་རིན་པོ་ཆེའི་ཕྲེང་བ་ལས། འདོད་པ་ཟད་ན་འཕགས་པ་དངོས་ཡིན་ལ། །འདོད་པ་ཆུང་བ་འཕགས་པའི་རིགས་ཞེས་བྱ། །ཞེས་འདོད་པ་ཆུང་བ་ནི་འཕགས་པའི་རིགས་ཡིན་ལ། འདོད་པ་ཟད་སོང་ཚེ་འཕགས་པ་དངོས་ཡིན་གསུངས། དེའི་དོན་ཅི་ཡིན་ཞེ་ན། སུ་དང་སུ་ཡིན་ཡང་ཟས་གོས་ལོངས་སྤྱོད་མཚན་སྙན་གྲགས་སོགས་ཚེ་འདི་འབའ་ཞིག་གི་དོན་དུ་གཡེང་འདུག་པ་དེ་ལ་ནི་འཕགས་པའི་ལམ་བསྒྲུབས་ཀྱང་འགྲུབ་པའི་སྐལ་བ་རྩ་བ་ནས་མེད། སུ་ཞིག་ཡིན་ཡང་འདོད་པ་ཆུང་ཞིང་ཆོག་ཤེས། ཚེ་འདིའི་བྱ་གཞག་ལ་ཞེན་པ་མེད་ཅིང་ཆོས་འབའ་ཞིག་ཉམས་སུ་ལེན་འདོད་པའི་གང་ཟག་ལ་ཆོས་འདི་སྒྲུབ་པའི་སྐལ་བ་ཡོད་པས་འཕགས་པའི་རིགས་ཟེར་བ་ཡིན།

དེས་ན་ཁྱེད་རྣམ་པ་ཚང་མས་ཀྱང་ཆོས་ལ་འཇུག་པའི་ཐོག་མར་རང་གི་རྒྱུད་ལ་བརྟག་དགོས། རང་ལ་འདོད་ཆུང་ཆོག་ཤེས་ཅི་འདྲ་ཞིག་ཡོད་འདུག གལ་ཏེ་ད་སྔོན་མེད་ཀྱང་ད་ཕྱིན་ཆད་འཇིག་རྟེན་ཚེ་འདིའི་བྱ་གཞག་ཐམས་ཅད་ཆེ་བཞག་ཆུང་བསྐྱུར་བྱེད་ཐུབ་པ་དང་། རང་ལ་ཆོས་འབའ་ཞིག་སྒྲུབ་ཐུབ་སྙམ་པའི་དམ་བཅའ་བརྟན་པོ་ཡང་དག་པ་ཞིག་ཡོད་ན་ཆོས་འདི་ལ་ཞུགས་ན་བཟང་བ་ཡིན། དེ་མིན་ཆོས་འདི་ནི་གལ་ཆུང་དང་ཞོར་ལ་སྒྲུབ་པ་ཙམ་མ་གཏོགས་མོས་པ་མེད་པར། འཇིག་རྟེན་ཚེ་འདིའི་ཟ་རྒྱུ་གོན་རྒྱུ་དང་དགྲ་འདུལ་གཉེན་སྐྱོང་ལ་སོགས་པའི་བྱ་བ་ལ་ཆེས་ཆེར་བརྩོན་དགོས་སྙམ་ན། ཆོས་འདི་ལ་འཇུག་ཁུལ་བྱས་ཀྱང་ཕན་པ་དེ་ཙམ་ཡོད་པ་མིན་པས། ཐོག་མར་རང་གི་རྒྱུད་ལ་འདོད་ཆུང་ཆོག་ཤེས་ཀྱི་བསམ་པ་བཟང་པོ་སྐྱེ་བར་འབད་དགོས་པ་ཡིན།

དེ་ལྟར་འདོད་པ་ཆུང་བ་དང་ཆོག་ཤེས་པའི་གང་ཟག་དེ་ལམ་ལ་འཇུག་པར་བྱེད་པ་ལ། ཐོག་མར་མཚན་ཉིད་དང་ལྡན་པའི་བླ་མ་དགེ་བའི་བཤེས་གཉེན་ཞིག་བསྟེན་དགོས། བླ་མ་དགེ་བའི་བཤེས་གཉེན་མ་བསྟེན་ན་ཡོན་ཏན་སྣ་གཅིག་ཀྱང་རང་གི་རྒྱུད་ལ་འབྱོར་བའི་གོ་སྐབས་མེད། དེ་ཡང་སུ་ཡིན་ཡིན་གྱི་གང་ཟག་ཐམས་ཅད་བླ་མ་རུ་བསྟེན་ན་མི་རིགས་ཏེ། བླ་མ་ལའང་ཡང་དག་པ་དང་ཕྱིན་ཅི་ལོག་ཡོད་པའི་ཕྱིར་ན་མཚན་ཉིད་དང་ལྡན་པའི་བླ་མ་བསྟེན་དགོས་ཤིང་། མཚན་ཉིད་དང་མི་ལྡན་པའི་བླ་མ་བསྟེན་མི་རུང་།

མཚན་ཉིད་དང་ལྡན་པའི་བླ་མ་དེ་ཅི་འདྲ་ཞིག་ལ་ཟེར་ཞེ་ན། དཔེར་ན་རྫོགས་པ་ཆེན་པོའི་ཆོས་འདི་ལྟ་བུ་བཤད་དགོས་ན་བླ་མ་ཁོང་གི་ཐུགས་རྒྱུད་ནའང་དེའི་ཉམས་རྟོགས་ཡོད་པ་དང་གཅིག གདུལ་བྱ་གཞན་ཐམས་ཅད་རྗེས་སུ་འཛིན་པར་མོས་པའི་བརྩེ་བའི་སྙིང་རྗེ་ཡོད་པ་དང་གཉིས། དེ་དག་གི་རྒྱུད་ཀྱི་ལོག་རྟོག་དང་ཐེ་ཚོམ་ཐམས་ཅད་སེལ་བར་ནུས་ཤིང་གཞུང་ལ་མཁས་པའི་ཤེས་རབ་དང་ལྡན་པ་དང་གསུམ་སྟེ། ཡོན་ཏན་དེ་གསུམ་ཆར་ཚང་ན་བླ་མ་བཟང་པོའམ་མཚན་ཉིད་དང་ལྡན་པ་ཟེར། དེ་གསུམ་པོ་ཁ་མ་ཚང་ཞིང་རེ་རེ་ཙམ་ལས་མེད་ན་ཡང་བླ་མ་ཡང་དག་པ་མིན། སྣ་གཅིག་ཀྱང་མེད་པ་ནི་རྩ་བ་ནས་བསྟེན་མི་རུང་བའི་བླ་མ་ཡིན། དེ་ལྟ་བུའི་མཚན་ཉིད་དང་ལྡན་པའི་བླ་མ་ནི་རང་གི་མིག་དང་སྙིང་ལས་ཀྱང་ལྷག་པར་གཅེས་ཤིང་དགའ་བ་དང་སྤྲོ་བའི་སྒོ་ནས་བསྟེན་དགོས།

བསྟེན་ཚུལ་དེ་ཡང་བླ་མའི་ཐུགས་མཉེས་བྱེད་ངོ་མ་དེ་རང་གི་སེམས་འདུལ་བ་དང་དགེ་བ་རྣམ་པར་དག་པ་ལ་བརྩོན་རྒྱུ་དེ་ཡིན་པས་རབ་སྒྲུབ་པའི་མཆོད་པ་དང་། དེ་ལྟ་བུའི་དགེ་བ་རྒྱ་ཆེན་པོ་བསྒྲུབ་པར་མ་ནུས་ཀྱང་། ཆོས་དང་མཐུན་པའི་བླ་མའི་བྱ་བ་ཐམས་ཅད་ཅི་ནུས་ཀྱི་སྒོ་ནས་སྒྲུབ་པ་ལ་འབྲིང་ཞབས་ཏོག་གི་མཆོད་པ་དང་། དེ་ཡང་མི་ཐུབ་ན་ཆོས་དང་མཐུན་པའི་བླ་མའི་བྱ་བ་དགེ་སྒྲུབ་སྡིག་སྤོང་གི་ཕྱོགས་སུ་རང་གིས་ཀྱང་རྒྱུ་རྫས་ལོངས་སྤྱོད་ཐམས་ཅད་ཀུན་ཕངས་པ་མེད་པར་ཅི་ནུས་ཅི་ལྕོགས་སུ་འབུལ་རྒྱུ་དེ་ནི་ཐ་མ་ཟང་ཟིང་གི་མཆོད་པ་ཡིན། དེ་རྣམ་པ་གསུམ་གྱི་སྒོ་ནས་བླ་མ་ཡུན་རིང་པོའི་བར་དུ་བསྟེན་དགོས།

བླ་མ་བསྟེན་ནས་ཅི་ཞིག་བྱ་ཞེ་ན། བླ་མའི་དྲུང་ནས་ཆོས་མཉན་དགོས་པ་ཡིན། ཆོས་ཉན་ཚུལ་ཡང་དད་པ་རྣམ་པར་དག་པའི་སྒོ་ནས་མཉན་དགོས། དད་པ་དེ་ཡང་ཅི་ལྟ་བུ་ཞིག་དགོས་ཤེ་ན། མདོ་ཡི་ཆོས་ཤིག་ཉན་ན་བླ་མ་དང་སངས་རྒྱས་གཉིས་ཀ་མཉམ་པའམ་ཁྱད་པར་མེད་པའི་མོས་པ་བསྐྱེད་ནས་མཉན་དགོས་ལ། སྔགས་སྤྱི་ཁྱབ་ཀྱི་ཆོས་ཤིག་ཉན་ན་བླ་མ་ལ་སངས་རྒྱས་དངོས་ཀྱི་འདུ་ཤེས་བཞག་ནས་མཉན་དགོས། འོད་གསལ་རྫོགས་པ་ཆེན་པོའི་ཆོས་འདི་ཉན་པར་བྱེད་པ་ལ་ནི་བཀའ་དྲིན་གྱི་ངོས་ནས་སངས་རྒྱས་སྟོང་ལས་ཀྱང་བླ་མ་བཀའ་དྲིན་ཆེ་བ་ཡིན་པར་ཤེས་པར་བྱས་ཏེ། སངས་རྒྱས་ལས་ཀྱང་ལྷག་པའི་དད་པ་དང་གུས་པ་བཞག་སྟེ་བླ་མའི་དྲུང་ནས་ཆོས་མཉན་དགོས་པ་ཡིན།

དེས་ན་རང་རེ་ལྟ་བུ་ཞིག་ལ་དཔེ་མཚོན་ན་རྫོགས་པ་ཆེན་པོའི་ལམ་ཉམས་སུ་ལེན་པའི་གང་ཟག་ཡིན་པས། བླ་མ་ལ་སངས་རྒྱས་ལས་ཀྱང་ལྷག་པའི་དད་པ་ཡོད་དགོས་ཀྱང་། དེ་རང་གི་རྒྱུད་ལ་ཡོད་དམ་མེད། རང་གི་རྩ་བའི་བླ་མ་རྣམས་ལ་སངས་རྒྱས་ཤཱཀྱ་ཐུབ་པ་དང་ཨོ་རྒྱན་རིན་པོ་ཆེ་བས་ཀྱང་དགའ་ཞིང་། དེ་ལས་ཀྱང་ལྷག་པའི་དད་པ་ཡོད་ན་གོང་ན་མེད་པ་རེད། མིན་ན་ཡང་དེ་དག་དང་ཁྱད་པར་མེད་པ་ཞིག་དགོས། དེ་ཡང་མ་ཡོད་ན་བླ་མ་མི་རུ་བཟུང་ན་བྱིན་རླབས་ཆུ་ལས་མེད་ཟེར་བ་ལྟར་དུ། བླ་མ་དེ་རང་བཞིན་གྱི་མི་ཕལ་བ་ཞིག་ཡིན་པར་བཟུང་ན་བླ་མའི་རྒྱུད་ཀྱི་བྱིན་རླབས་རང་རྒྱུད་ལ་འཇུག་ཐབས་ཡོད་པ་མིན། གལ་ཏེ་བྱིན་རླབས་ཤིག་ཡོད་དུ་ཆུག་ཀྱང་དེ་ནི་ཐང་ན་བཞུར་བའི་ཆུ་ཙམ་ལས་བྱིན་རླབས་དངོས་གྲུབ་གཞན་འབྱུང་བ་མིན།

འདིའི་སྐབས་སུ་ཁྱེད་རྣམ་པས་གོ་དགོས་པ་ཞིག་ལ། འདི་དག་ནི་ལམ་རིམ་ཡིན་ཞིང་། ངས་གོང་དུ་བཤད་པ་དེ་དག་རེ་རེ་བཞིན་དུ་གོ་རིམ་བྱས་ནས་འགྲོ་དགོས་ཏེ། དེ་ཡང་དང་པོ་འདོད་ཆུང་ཆོག་ཤེས་ཡོད་པ་དང་། དེ་ནས་རིམ་བཞིན་བླ་མ་ཚོལ། བླ་མ་བསྟེན། བླ་མ་ལ་དད་པ་བསྐྱེད་པ་སོགས་ད་དུང་འོག་ཏུ་བཤད་པ་ཚང་མ་ཡང་ལམ་རིམ་ཡིན། སྔ་མ་སྔ་མ་ཐམས་ཅད་ཡོད་པ་གཞིར་བཞག་གི་སྟེང་ནས་ཕྱི་མ་ཕྱི་མ་ཐམས་ཅད་ལ་འཇུག་དགོས་པས་ཐམས་ཅད་ཀྱིས་ཐུགས་ལ་འཛིན་དགོས།

བླ་མ་ལ་དད་པ་བཞག་རྗེས་ཅི་དགོས་ཟེར་ན། ཐོག་མར་ལམ་གྱི་གཞི་རྟེན་ཚུལ་ཁྲིམས་སམ་སྡོམ་པ་ཞིག་རང་རྒྱུད་ལ་ལེན་དགོས། སྡོམ་པ་རྣམ་པར་དག་པ་ཞིག་མ་ཡོད་ན་མཐར་ཐུག་སངས་རྒྱས་ཀྱི་གོ་འཕང་འཐོབ་རྒྱུ་ག་ལ་ཡོད་དེ། གནས་སྐབས་ལྷ་དང་མིའི་བདེ་བ་ཡང་འཐོབ་པའི་གོ་སྐབས་རྩ་བ་ནས་མེད། དེ་བཞིན་དུ་སྡོམ་པའམ་ཚུལ་ཁྲིམས་ཉམས་པར་གྱུར་པའི་གང་ཟག་དེས་ཡར་དཀོན་མཆོག་གི་ཞིང་ས་ལ་མཆོད་པ་དང་། མར་ངན་སློང་ལ་སྦྱིན་པ་ལ་སོགས་པ་ལོ་འབུམ་ཕྲག་མང་པོའི་བར་དུ་བྱས་ནའང་། ངེས་པར་དུ་ངན་སོང་གི་ལུས་རྟེན་དུ་སྐྱེ་བ་མ་གཏོགས་མཐོ་རིས་ལྷ་མིའི་ལུས་རྟེན་འཐོབ་མི་ཐུབ། དེས་ན་སྡོམ་པ་དེ་རང་རྒྱུད་ལ་བླངས་རྗེས་ཉམས་པར་གྱུར་པའི་གང་ཟག་ནི་ངེས་པར་དུ་ངན་སོང་གི་གནས་སུ་འགྲོ་བར་འགྱུར་བ་མ་གཏོགས་དེ་ལ་འགྲོ་ས་གསུམ་པ་ཞིག་གང་ནའང་ཡོད་པ་མིན།

རང་གི་རྒྱུད་ལ་བྱང་ཆུབ་སེམས་དཔའི་ཐེག་པ་དང་། གསང་བ་རྡོ་རྗེ་ཐེག་པའི་ལམ་ནས་བཤད་པའི་ཡོན་ཏན་གང་དང་གང་ཞིག་སྐྱེ་དགོས་ཀྱང་། ངེས་པར་དུ་ཚུལ་ཁྲིམས་རྣམ་པར་དག་པ་རྒྱུད་ལྡན་གྱི་གང་ཟག་ཁོ་ན་མ་གཏོགས་གཞན་ལ་འབྱུང་ཐབས་མེད། བཅོམ་ལྡན་འདས་ཀྱིས་ཀྱང་ཚུལ་ཁྲིམས་ཟེར་བ་དེ་དཔེར་ན་ས་གཞི་ལྟ་བུ་ཞིག་ཡིན་པར་གསུངས། ས་འདིའི་སྟེང་ལ་འགྲོ་ཐུབ་པའི་མི་དང་རྟ་ནོར་ལ་སོགས་པ་དང་། འགྲོ་མི་ཐུབ་པའི་རྩི་ཤིང་ནགས་ཚལ་ཐམས་ཅད་ཀུན་ཀྱང་བརྟེན་ཡོད། གལ་ཏེ་ས་གཞི་གཏན་ནས་མེད་ན། དེ་དག་གང་ཡང་གནས་པའི་གོ་སྐབས་མེད་པ་བཞིན་དུ་ཚུལ་ཁྲིམས་རྣམ་པར་དག་པ་མེད་ན་ཡོན་ཏན་གང་ཡང་རྒྱུད་ལ་འབྱུང་བའི་གོ་སྐབས་མེད་ཅེས་གསུངས་ཡོད།

སྤྱིར་ཚུལ་ཁྲིམས་ལ་ཡང་ནང་གསེས་ཀྱིས་སོ་སོར་ཐར་པའི་ཚུལ་ཁྲིམས་དང་། བྱང་ཆུབ་སེམས་དཔའི་ཚུལ་ཁྲིམས། གསང་བ་སྔགས་ཀྱི་ཚུལ་ཁྲིམས་གསུམ་ཡོད་པ་ལས། ད་རེས་ངེས་པར་ཡོད་དགོས་ཟེར་བ་ནི་སོ་སོར་ཐར་པའི་ཚུལ་ཁྲིམས་འདི་ཡིན། འོ་ན་སོ་ཐར་གྱི་ཚུལ་ཁྲིམས་རྐྱང་བ་མེད་པར་གྱུར་ཀྱང་། བྱང་སེམས་དང་སྔགས་ཀྱི་ཚུལ་ཁྲིམས་ཡོད་ན་དེས་ཀྱང་ཐར་བ་དང་ཐམས་ཅད་མཁྱེན་པའི་གོ་འཕང་འཐོབ་ཐུབ་བམ་སྙམ་ན། དེ་ནི་རྩ་བ་ནས་འཐོབ་ཐབས་ཡོད་པ་མ་ཡིན་ཏེ། བྱང་ཆུབ་སེམས་དཔའི་སྡོམ་པ་ནི་ཐོག་མར་སོ་སོར་ཐར་པའི་སྡོམ་པ་རྒྱུད་ལྡན་གྱི་སྟེང་ནས་ལེན་དགོས། གསང་བ་སྔགས་ཀྱི་དབང་གང་ཞུས་ཀྱང་། སོ་ཐར་བྱང་སེམས་གཉིས་ཀྱི་སྡོམ་པ་གཞིར་བཞག་གི་སྟེང་ནས་དེའི་དམ་ཚིག་དང་སྡོམ་པ་ཐམས་ཅད་ལེན་དགོས་པ་ཡིན། དེའི་ཕྱིར་ན་བྱང་སེམས་དང་སྔགས་ཀྱི་སྡོམ་པ་གཉིས་ཀ་ཡང་གཙོ་བོ་སོ་སོར་ཐར་པའི་སྡོམ་པ་རྒྱུད་ལྡན་གྱི་གང་ཟག་ལ་འབྱུང་བ་ཡིན།

འོ་ན་དེ་ལྟ་བུའི་སོ་སོར་ཐར་པའི་སྡོམ་པ་དེ་རྒྱུད་ལ་ཡོད་དགོས་ན། གྲྭ་པ་དང་བཙུན་མ་ཁོ་ན་མ་གཏོགས། གཞན་མི་སྐྱ་ཕོ་མོའི་རྒྱུད་ན་སོ་སོར་ཐར་པའི་སྡོམ་པ་མེད་པས་ཡོན་ཏན་རྒྱུད་ལ་མི་སྐྱེ་བ་ཡིན་ནམ་ཞེ་ན། དེ་ཡང་མ་ཡིན་ཏེ། གཙོ་བོ་ནི་དགེ་ཚུལ་དང་དགེ་སློང་གི་སྡོམ་པ་ཞུས་ཡོད་ན་འཇིག་རྟེན་ལྷ་དང་བཅས་པའི་མཆོད་སྡོང་ཟེར་བ་ཡིན་ལ། ཐམས་ཅད་ཀྱིས་མཆོད་པའི་གནས་སུ་གྱུར་ཅིང་གོང་ན་མེད་པ་ཡིན། དེ་མིན་ཁྱིམ་པའི་ཕྱོགས་ཀྱི་དགེ་བསྙེན་ཕ་མ་དང་། གསོ་སྦྱོང་གི་སྡོམ་པ་བླངས་ན་ཡང་སོ་སོར་ཐར་པའི་སྡོམ་པ་ཟེར།

དེ་ལྟར་ཡུལ་ཁམས་ཀྱི་དབང་དུ་བྱས་ན། དཔེར་ན་བོད་དང་རྒྱ་གར། འབྲུག་པ་ལ་སོགས་པར་ཆོས་རྣམ་དག་སྒྲུབ་མཁན་གྱི་དགེ་ཚུལ་སློང་རབ་ཏུ་བྱུང་བ་ཆེས་མང་པོ་ཡོད་ལ། ཁྱད་པར་དུ་ཨ་རིའི་ལུང་པ་འདི་ལྟ་བུ་ལ་མཚོན་ན་དགེ་ཚུལ་སློང་སྒྲུབ་ཟེར་བ་ནི་ཡུལ་དུས་ཀྱི་དབང་གིས་ཧ་ཅང་དཀའ་མོར་གྱུར་འདུག ངས་ཀྱང་ཨ་རིའི་ལུང་པ་འདིར་ཐོན་ནས་དགེ་ཚུལ་སློང་བསྒྲུབ་དགོས་ཟེར་བའི་ཚིག་ཅིག་རྩ་བ་ནས་བཤད་མ་མྱོང་བར། གཙོ་བོ་དགེ་བསྙེན་དང་གསོ་སྦྱོང་གི་སྡོམ་པ་ལེན་དགོས་ཞེས་རྒྱ་ཆེར་བཤད་པ་ཡིན། འོན་ཀྱང་ཆོས་ཚོགས་འདི་ལྟ་བུ་ལ་མཚོན་ན་དགེ་ཚུལ་སློང་ཡང་ཤིན་ཏུ་མང་པོ་འདུག དེ་ནི་ཧ་ཅང་ངོ་མཚར་བའི་འོས་སུ་གྱུར་པ་ཞིག་ཡིན་ཞིང་། ད་རུང་ཡང་སྲ་ཞིང་བརྟན་པ་དང་རྗེས་མ་གོང་འཕེལ་དུ་འགྱུར་རྒྱུ་ནི་ཧ་ཅང་གལ་ཆེ་བ་ཡིན་པས། འཁོར་སློབ་དང་གཙོ་འཛིན་ཚང་མས་ཐུགས་ལ་ནན་ཟབ་ཅིག་འཛིན་པ་ནི་ང་རང་ཉིད་ཀྱི་རེ་བ་ཡིན།

ངའི་ངོས་ནས་བསམ་བློ་བཏང་ན་ཡང་། ཁྱིམ་པ་དང་རབ་ཏུ་བྱུང་བ་གཉིས་ཀ་ལས་གཙོ་བོ་རབ་ཏུ་བྱུང་བའི་སྡེ་ཧ་ཅང་མང་ན་དགའ་ཚོར་ཆེ་འདུག དེའི་རྒྱུ་མཚན་ཡང་བཅོམ་ལྡན་འདས་ཀྱི་བསྟན་པ་ལ་ཁྱིམ་པ་ལས་རབ་ཏུ་བྱུང་བ་གཙོ་བོ་ཡིན། དེ་བཞིན་དུ་གྲུབ་དབང་པདྨ་ནོར་བུ་དང་། བསྟན་རྒྱམ་རིན་པོ་ཆེ་ལ་སོགས་པ་ཚང་མའི་རྒྱུད་འཛིན་གཙོ་བོ་དང་ཐུགས་ཀྱི་བུ་ཆུང་ལྟ་བུ་དེ་དག་ཀྱང་རབ་ཏུ་བྱུང་བ་ཤ་སྟག་ཡིན།

རབ་ཏུ་བྱུང་བའི་སྡོམ་པ་ལེན་པ་ལ། སྡོམ་པ་སྐྱེ་བ་དང་གནས་པ། ཁྱད་པར་དུ་གྱུར་པའི་བར་ཆད་བཅས་གསུམ་པོ་མེད་པ་གཞིར་བཞག་གི་སྟེང་ནས་དགེ་ཚུལ་སློང་སྒྲུབ་དགོས་པ་ལས། རང་བཞིན་གྱིས་ཅི་འབྱུང་གང་ཤར་དུ་དགེ་ཚུལ་སློང་བསྒྲུབ་མི་རུང་། དེ་ཡང་སྡོམ་པ་རྒྱུད་ལ་གཏན་ནས་མི་སྐྱེ་བའི་གང་ཟག་ནི་ཕ་བསད་པ་དང་མ་བསད་པ་ལ་སོགས་པ་ཡིན་ཞིང་། དེ་དག་ལ་མི་སྐྱེ་བར་གཞུང་དུ་བཤད་ཡོད་པས་དེས་ཀྱང་སྡོམ་པ་ལེན་མི་རུང་།

གནས་པའི་བར་ཆད་ཅེས་པ་ནི། སྡོམ་པ་ཡུན་རིང་དུ་གནས་པ་ལ་བར་ཆད་དུ་གྱུར་པ་སྟེ། ཕ་མས་མ་གནང་བ་དང་། ཁྱོ་ཕོ་དང་ཁྱོ་མོ་སྟེ་བཟའ་རོགས་ཀྱིས་མ་གནང་བ། དབང་ཆེ་བའི་རྒྱལ་པོས་མ་གནང་བ་སྟེ། དེ་དག་གིས་མ་གནང་བཞིན་དུ་རབ་ཏུ་བྱུང་ན། རྗེས་མར་བསླབ་པ་ལ་བར་ཆད་དུ་སོང་ནས་ཕྱིར་ཁྱིམ་དུ་འབབ་དགོས་ཐུག་པས། དེ་འདྲ་མེད་པ་ཡང་གལ་ཆེ་བ་ཡིན། འོ་ན་རྒྱལ་པོ་དང་ཕ་མ་དང་བཟའ་རོགས་རྣམས་ཀྱིས་མ་གནང་བའི་གང་ཟག་གི་རྒྱུད་ལ་སྡོམ་པ་བླངས་ནའང་མི་སྐྱེ་བ་ཡིན་ནམ་ཞེ་ན། མི་སྐྱེ་བ་མིན་ཡང་སྡོམ་པ་ལ་བར་ཆད་དུ་འགྱུར་བ་ཡིན། གལ་ཏེ་བར་ཆད་དུ་མ་སོང་ན་དེ་ལ་ཉེས་འགལ་ཆེན་པོ་མེད་དེ། ཕ་མས་མ་གནང་ན་ཡང་རབ་ཏུ་འབྱུང་ཆོག་ལ། བཟའ་རོགས་ཀྱིས་མ་གནང་ན་ཡང་རབ་ཏུ་འབྱུང་ཆོག གཙོ་བོ་དེ་ལ་བར་ཆད་འབྱུང་མི་འབྱུང་ལ་བསམ་བློ་གཏང་དགོས།

སྡོམ་པའི་ཡོན་ཏན་ཁྱད་པར་དུ་གྱུར་པའི་བར་ཆད་ཟེར་བ་ནི། ནད་པ་ཚབས་ཆེན་དགེ་བ་གཏན་ནས་བསྒྲུབ་མི་ཐུབ་པའི་གང་ཟག་རབ་ཏུ་འབྱུང་མི་རུང་། དེ་བཞིན་དུ་འཇིག་རྟེན་གྱི་བྱ་བ་མང་པོ་བསྒྲུབ་དགོས་མཁན་ལ་དགེ་བ་སྒྲུབ་པའི་སྐལ་བ་གཏན་ནས་མེད་པ་ཡིན་པས་རབ་ཏུ་འབྱུང་མི་རུང་མ་གཏོགས་སྡོམ་པ་གནས་ཀྱང་བསླབ་པ་ལ་སྦྱོར་མི་བཟོད་པས་ཡོན་ཏན་ཁྱད་པར་དུ་འཕགས་མི་ནུས་པ་ཡིན། དེ་ཡང་བར་ཆད་དུ་མ་གྱུར་ན་རབ་ཏུ་འབྱུང་ཆོག་པ་ཡིན།

ཁྱེད་ཆོས་ཚོགས་ཀྱི་དགེ་ཚུལ་སློང་ལས་གཞན་པ་རྣམས་ཀྱིས་རབ་ན་དགེ་བསྙེན། ཐ་ན་ཡང་གསོ་སྦྱོང་ཡན་ལག་བརྒྱད་པའི་སྡོམ་པ་རེ་མ་བླངས་ཐབས་མེད་རེད་མ་གཏོགས་མི་ལུས་ཐོབ་པ་དོན་མེད་ཡིན། དེ་དག་གི་བསྲུང་བྱ་ནི། ཉེ་ཆར་འུ་ཅག་གིས་རྒྱལ་ས་ཝ་ཧྲིང་ཐོན་ནས་ཆོས་འཆད་སྐབས་རྒྱ་ཆེར་བཤད་པ་ཡིན། རབ་ཏུ་བྱུང་བ་ཞིག་ཡིན་ན་སེར་གོས་གོན། འདོད་པ་རྩ་བ་ནས་སྤང་དགོས། ཁྱིམ་པ་ཞིག་ཡིན་ནས་བཟུང་སྟེ་དགེ་བསྙེན་དང་གསོ་སྦྱོང་ཡིན་ན་ཡང་རབ་ཏུ་བྱུང་བའི་ཆས་གོས་གོན་མི་དགོས་ལ། རང་གི་བཟའ་རོགས་ལ་འདོད་པ་ཡང་སྤང་མི་དགོས། དེ་ཙམ་གྱི་ཁྱད་པར་མ་གཏོགས་ཧ་ལམ་གཅིག་པ་ཡིན།

དེ་རིང་སྡོམ་པ་རྒྱུད་ལ་ལེན་ཚུལ་རྒྱས་པར་འཆད་དགོས་པའི་རྒྱུ་མཚན་ནི། ས་གནས་གཞན་དང་མི་འདྲ་བར་ཆོས་ཚོགས་འདི་ན་རབ་བྱུང་དང་ཁྱིམ་པ་གཉིས་ཀ་ཧ་ཅང་མང་པོ་ཞིག་ཡོད་པས་ཆེད་དུ་གསལ་བཤད་བྱས་པ་ཡིན། རྗེས་མར་སྐབས་གང་བདེ་ཞིག་ལ་དགེ་ཚུལ་སློང་ཁ་ཤས་བསྒྲུབ་རྒྱུ་ཡིན། ད་རུང་བསྒྲུབ་འདོད་ཡོད་པ་ཚང་མས་ཀྱང་གོང་གི་བར་ཆད་གསུམ་པོ་ཡོད་མེད་ལ་ཞིབ་པར་བརྟགས་ཏེ་གཟོད་རབ་ཏུ་བྱུང་ན་ཧ་ཅང་བཟང་པོ་ཡིན། མ་འོངས་པར་བླ་མ་རྣམས་ས་ཆ་འདི་ལ་འབྱོན་སྐབས་ཀྱང་དགེ་ཚུལ་སློང་བསྒྲུབ་རྒྱུ་རེད།

རབ་ཏུ་བྱུང་བའི་སྡེ་འདི་ཇེ་མང་ཇེ་རྒྱས་སུ་སོང་ན་དགོས་པ་ཁྱད་པར་ཅན་ཡོད། དགོས་པ་ཅི་ཞིག་ཡོད་ཅེ་ན། བཅོམ་ལྡན་འདས་ཀྱི་བསྟན་པ་དར་བའི་ཡུལ་དབུས་དང་མི་དར་སའི་མཐའ་འཁོབ་གཉིས་ཡོད་པ་ལས། ཡུལ་དབུས་ནི་གང་དུ་དགེ་སློང་ཕ་མ་དང་དགེ་བསྙེན་ཕ་མ་སྟེ་འཁོར་རྣམ་པ་བཞི་ཡོད་ས་དེ་ལ་ཟེར། དེ་གང་རུང་མེད་པའམ་གཏན་ནས་མེད་པའི་ཡུལ་ཡིན་ན་མཐའ་འཁོབ་ཟེར་བ་ཡིན་པས། དེ་ལྟར་བསམ་བློ་བཏང་ན་ཨ་རིའི་ལུང་པ་འདི་ཡང་དེ་སྔོན་ཡན་ཆད་དུ་ཧ་ལམ་མཐའ་འཁོབ་ཀྱི་ཡུལ་ལྟ་བུར་གྱུར་ཡོད། ཡིན་ཡང་རྗེས་སུ་ཆོས་ཚིགས་ཀྱི་ཡུལ་དབུས་ཤིག་ཏུ་གྱུར་སོང་བ་ཡིན་ལ། དེ་ལ་དགོས་པ་ཧ་ཅང་ཆེན་པོ་ཡོད་པས། ད་རེས་དང་རྗེས་མའི་གནས་སྐབས་ན་ཡང་ཐམས་ཅད་ཀུན་གྱིས་འབད་རྩོལ་ཆེར་བཞེས་སུ་མཛད་པར་མ་འཆུགས།

འོ་ན་ཚུལ་ཁྲིམས་རྣམ་པར་དག་པ་ལྡན་ན་དེ་རྐྱང་པས་ཆོག་གམ་ཞེ་ན། དེ་རྐྱང་པས་ཆོག་པ་མིན། ད་རུང་དེའི་སྟེང་དུ་ཐོག་མར་ཐོས་པ་འཚོལ་དགོས་ཏེ། མཚན་ཉིད་དང་ལྡན་པའི་བླ་མའི་དྲུང་ནས་མདོ་སྔགས་རིག་གཞུང་དང་བཅས་པའི་ཆོས་ཐོས་པར་བྱེད་དགོས། ཐོས་པས་རང་གི་རྒྱུད་ལ་ཐར་བའི་ས་བོན་འཇོག་པ་དང་། མ་རིག་པའི་རྨོངས་པའི་མུན་པ་ཐམས་ཅད་སེལ་བ། སྡིག་སྒྲིབ་ཉེས་ལྟུང་ཐམས་ཅད་འདག་པར་འགྱུར་བའི་དགོས་པ་ཡོད། སངས་རྒྱས་ཀྱི་ཆོས་ཐོས་པའི་ཕན་ཡོན་ལ་བསམ་བློ་བཏང་ན། ཆོས་དངོས་སུ་ཐོས་པ་ལ་ཕན་ཡོན་ལོས་ཡོད་དེ་ཐ་ན་ཆོས་ཉན་པའི་དུས་ཚོད་སྟོན་པའི་ཕྱིར་དུ་རྔ་བརྡུངས་བ་དང་། དུང་བུས་པའི་སྒྲ་ཐོས་པའི་དུད་འགྲོ་ཡན་ཆད་ལའང་ཐར་བའི་གོ་འཕང་འཐོབ་པར་འགྱུར་བར་གསུངས་ཡོད་པས། བཅོམ་ལྡན་འདས་ཀྱི་གསུང་རབ་དགོངས་འགྲེལ་དང་བཅས་པ་ཐམས་ཅད་མཉན་པ་ལ་ལྷག་པར་བརྩོན་པ་བྱ་རྒྱུ་དེ་གལ་ཆེ་བ་ཡིན།

འོ་ན་ཐོས་པ་རྐྱང་པས་ཆོག་གམ་ཞེ་ན་ཆོག་པ་མིན་ཏེ། ཐོས་པའི་དོན་ལ་བསམ་བློ་གཏོང་བའི་བསམ་པའི་ཤེས་རབ་བསྐྱེད་དགོས། དཔེར་ན་དེ་རིང་འུ་ཅག་གིས་ཆོས་བཤད་པ་ཐོས་ཀྱང་མར་སོང་རྗེས་ལས་ཀར་གཡེངས་ནས་བསྡད་པ་ཙམ་གྱིས་མི་འགྲིག་པར། ཚིག་ཅི་གསུངས་དང་དོན་ཅི་ཡིན་ལ་རང་གིས་ཡང་ནས་ཡང་དུ་བསམ་བློ་བཏང་། གཞན་ལ་དྲིས། དེ་ལ་ཐེ་ཚོམ་མེད་པའི་བརྟག་དཔྱད་བྱ་དགོས། བསམ་པའི་ཤེས་རབ་མེད་ན། འུ་ཅག་གིས་ཁྲིད་ཡིག་སངས་རྒྱས་ལག་སྟེར་ད་ལྟ་བཤད་མ་རག་པ་རེད། ཆོས་འདི་ནི་ཚིག་ཉུང་ལ་དོན་འདུས་པ་གཞན་ལ་མེད་པ་ལྟ་བུ་ཡིན་ཡང་། རང་གར་བསམ་བློ་མ་བཏང་བར་ཚར་གཅིག་ཐོས་པ་ཙམ་གྱིས་སུས་ཀྱང་ཉམས་སུ་ལེན་མི་ཤེས། དེའི་ཕྱིར་ན་སངས་རྒྱས་ཀྱི་བཀའ་སྤྱི་དང་ཁྱད་པར་དུ་རང་གི་རྒྱུད་ལ་ཕན་པའི་ཆོས་དེ་ལ་བསམ་བློ་ཡང་དག་པ་ཞིག་བཏང་ནས་ཉམས་སུ་ལེན་ངེས་ཅན་ཞིག་བྱ་དགོས་མ་གཏོགས། ཚོད་འཇོག་དང་དེ་འདྲ་ཞིག་ཡིན་ན་ཐང་སྙམ་པ་ལྟ་བུས་སྒོམ་ཁུལ་བྱས་ནའང་དོན་ཡོད་པ་མིན།

དེ་ནས་སྒོམ་པའི་སྐབས་སུ། དང་པོ་བསམ་པ་སྔོན་དུ་སོང་ནས་ཐེ་ཚོམ་མེད་པར་ཡང་དག་པ་ཞིག་ཤེས་དགོས། ཇི་ལྟར་ཤེས་པར་བྱ་ཚུལ་ནི་བླ་མའི་ཞལ་ནས་གསུངས་པའི་ཚིག་དང་། ཡིག་ཐོག་གི་དོན། རང་གི་རྒྱུད་ཀྱི་ཉམས་ལེན་གསུམ་པོ་ཕན་ཚུན་བསྡུར་ནས་སྦྱོང་བརྡར་ཡང་དག་པ་ཞིག་སྔོན་དུ་འགྲོ་དགོས། འཇིག་རྟེན་གྱི་བྱ་གཞག་ཕལ་བ་ཞིག་ལ་བསམ་བློ་ཐོང་དང་། དེ་ལ་ཡང་བསམ་པ་ཞིག་སྔོན་དུ་འགྲོ་དགོས་ཏེ། དཔེར་ན་རླངས་འཁོར་ཞིག་སྐོར་དགོས་ཀྱང་དེ་ལ་དུས་ཡུན་ངེས་ཅན་ཞིག་ལ་སྦྱོང་བརྡར་མ་བྱས་ན་སྐོར་མི་ཤེས། སྒོམ་ཟེར་བ་དེ་བས་ཀྱང་དཀའ་བ་ཡིན། སྔོན་ལ་རླངས་འཁོར་སྦྱོང་པ་ལྟ་བུ་དེ་བསམ་བྱུང་གི་ཤེས་རབ་བསྐྱེད་པ་ཡིན། རྗེས་སུ་རླངས་འཁོར་གཞུང་ལམ་དུ་སྐོར་ཤེས་པ་དེ་སྒོམ་པ་ཡིན། སྒོམ་པ་ལ་དང་པོ་བསམ་པ་ལ་ཤིན་ཏུ་གཟབ་ནན་དགོས་པ་རེད་མ་གཏོགས། བསམ་པ་སྔོན་དུ་མ་སོང་བར་སྒོམ་ཁུལ་བྱས་ན་ཕན་པ་ལས་ཀྱང་གནོད་པ་ཆེ་བ་ཡིན།

བསམ་བྱུང་གི་ཤེས་རབ་ཡང་དག་པ་ཞིག་སྔོན་དུ་མ་སོང་བར་སྒོམ་ཁུལ་བྱས་པ་ལ། བོད་ཀྱི་བླ་མ་ས་སྐྱ་པཎྜི་ཏ་ཟེར་བ་དེས། བླུན་པོས་ཕྱག་རྒྱ་ཆེན་པོ་བསྒོམ་པ་ནི་ཕལ་ཆེར་དུད་འགྲོར་སྐྱེ་བྱེད་ཡིན་ཞེས་བསམ་བློ་མ་བཏང་། བླ་མ་མ་བསྟེན་པར་ཚོད་འཇོག་བྱས་ནས་སྒོམ་ཁུལ་བྱས་པ་ཕལ་ཆེར་ནི། རི་བོང་དང་འཕྱི་བ་སོགས་ཀྱི་སྐྱེ་བ་ལེན་བྱེད་མ་གཏོགས་དགོས་པ་མི་འདུག་པར་གསུངས་ཡོད་ཅིང་། དེ་ནི་དན་དན་ཏིག་ཏིག་གི་གསུང་ཡིན་པའི་ཕྱིར་ན། དང་པོ་ནས་གཟབ་གཟབ་བྱས་ཏེ་སྒོམ་ཤེས་ཐག་ཆོད་ཅིག་དགོས་པ་ལས། ཅི་ཡང་མ་ཤེས་པར་ཙོག་པུར་བསྡད་པ་ལ་སྒོམ་རྩ་བ་ནས་ཟེར་བ་མིན།

དེས་ན་སྒོམ་ཡང་དག་པ་ཞིག་ཤེས་ན་གོང་ན་མེད་པ་ཡིན་པས་བརྩོན་འགྲུས་བསྐྱེད་ནས་བསྒོམ་དགོས། གལ་ཏེ་སྒོམ་ཡང་དག་པ་ཞིག་མ་ཤེས་ན། མ་ཎི་དང་སིདྡྷི་བཏོན། དཀོན་མཆོག་གསུམ་ལ་གསོལ་བ་བཏབ་ན་དེའི་ཁེ་ཆེ་བ་ཡིན། སྒོམ་ཅི་ཡང་མི་ཤེས་པར་ཙོག་པུར་འདུག་པ་ནི་སྐེད་པ་ན་བྱེད་ཡིན་པས། སྒོམ་དེ་ཡང་དག་པ་ཤེས་དགོས། ཤེས་ནས་སྒོམ་དགོས་པ་རེད་མ་གཏོགས། ཤེས་པ་ཙམ་ལས་ཉམས་སུ་མ་བླངས་ན་ཕན་པ་ཡོད་པ་མིན།

དེ་ཡིས་ལམ་གྱི་རིམ་པ་སོང་ནས་ད་སྒོམ་དངོས་ལ་ཐུག་པ་ཡིན། སྒོམ་ཚུལ་ངོ་མ་དེ་སྔོན་འགྲོ་བློ་ལྡོག་རྣམ་བཞི་ནས་བཟུང་སྟེ་རྫོགས་པ་ཆེན་པོའི་བར་རིམ་པ་བཞིན་དུ་བསྒོམ་དགོས། དེ་སྒོམ་ཚུལ་གྱི་ཉམས་ལེན་དངོས་ནི་སངས་རྒྱས་ལག་སྟེར་འདི་ཡིན། ཁྱེད་རྣམ་པས་ཡི་གེའི་ཁ་ཕྱེས་ནས་ལྟོས་དང་རིམ་བཞིན་དུ་འགྲེལ་ཡོང་།

འཇམ་དཔལ་ཞི་སྒྲུབ་ཀྱི་ཆ་ལག་ཁྲིད་ཡིག་སངས་རྒྱས་ལག་སྟེར་ཞེས་བྱ་བ་བཞུགས་སོ། །

ཞེས་འཇམ་དཔལ་ཞི་སྒྲུབ་ཟེར་བ་ནི། སྤྱིར་འཇམ་པའི་དབྱངས་ལ་ཞི་བའི་སྒྲུབ་ཐབས་དང་། དྲག་པོ་གཤིན་རྗེ་གཤེད་ཀྱི་སྒྲུབ་ཐབས་གཉིས་ཡོད་པ་ལས། འདིར་འཇམ་དཔལ་ཞི་སྒྲུབ་ཀྱི་དབང་དང་ལས་བྱང་ཐམས་ཅད་ཁ་སང་སྔོན་དུ་སོང་ཟིན་པ་ཡིན། དེའི་ཆ་ལག་ལ་ཁྲིད་ཡིག་འདི་ནི་སངས་རྒྱས་ལག་ནང་དུ་དངོས་སུ་སྦྱིན་འོང་བྱེད་ཀྱི་ཁྲིད་ཡིན་ཞེས་པའི་དོན་ཡིན།

རིག་སྟོང་གདོད་མའི་མགོན་པོ་འཇམ་པའི་དབྱངས། །

འདུ་འབྲལ་མེད་པར་རྟོགས་པས་ཕྱག་འཚལ་ཏེ། །

ཞེས་རང་གི་སེམས་ཀྱི་ཆོས་ཉིད་མ་ནོར་བར་རྟོགས་ན་མགོན་པོ་འཇམ་པའི་དབྱངས་ཀྱང་དེ་ལ་ཟེར་བ་ཡིན། དེ་རང་གི་སེམས་ཀྱི་སྟེང་དུ་གསར་དུ་འདུ་ཡོང་བ་དང་ཕར་འབྲལ་འགྲོ་བ་ཞིག་མ་ཡིན་པར། མགོན་པོ་འཇམ་པའི་དབྱངས་དེ་ཉིད་རང་དང་ཡེ་ནས་དབྱེར་མེད་ཀྱི་ཚུལ་དུ་བཞུགས་ཡོད་པར་རྟོགས་པ་ལ་རབ་ལྟ་བ་མཇལ་བའི་ཕྱག་ཟེར་བས་ཕྱག་འཚལ་ཏེ་གསུངས་པ་ཡིན།

གནད་ཀྱི་མན་ངག་སྙིང་གི་བུ་ལ་གདམ། །

དེས་ཀྱང་ཡལ་བར་མ་འདོར་ཉམས་སུ་ལོངས། །

ཞེས་གནད་ཀྱི་མན་ངག་ཟེར་བ་དེ་རྫོགས་པ་ཆེན་པོའི་རྒྱུད་ལུང་མན་ངག་ཇི་སྙེད་ཡོད་པ་ཐམས་ཅད་ཀྱི་གནད་ཚུར་བསྡུས་པའི་ཚིག་ཉུང་ལ་དོན་འདུས་པ་དང་། དཀའ་མོ་ཞིག་བདེ་མྱུར་དུ་རྟོགས་འགྲོ་བ་ལ་ཟེར། དེ་ནི་སྙིང་དང་འདྲ་བའི་སློབ་མ་ཁྱེད་རྣམས་ལ་གདམས་པ་ཡིན་པས། ཁྱེད་རྣམས་ཀྱིས་ཀྱང་འདི་ཐོས་པ་ཙམ་གྱིས་སྐྱུར་མི་འཇོག་པར་ཉམས་སུ་ལོངས་ཤིག་ཅེས་གསུངས།

དེ་ཡང་སྐལ་བ་དང་ལྡན་པ་རྣམས་ཀྱིས་ཐོག་མ་ཁོ་ནར་འདི་ལྟར་བསམ་པར་བྱ་སྟེ།

ཞེས་ཆོས་འདི་ཉམས་སུ་ལེན་པའི་སྐལ་བ་ལྡན་ཞིང་ཆོས་འདི་ལ་མོས་པའི་གང་ཟག་སྣོད་ལྡན་རྣམས་ཀྱིས་དང་པོ་འདི་ལྟར་བསམ་དགོས་གསུངས།

ད་རེས་རྒྱུ་དཔེ་གྲངས་གསུམ་གང་ནས་བསམས་ཀྱང་རྙེད་པར་དཀའ་ཞིང་།

ཞེས་དལ་འབྱོར་བཅོ་བརྒྱད་ཚང་བའི་མི་ལུས་རིན་པོ་ཆེ་འདི་རྙེད་པར་དཀའ་བ་ཡིན། ཇི་ལྟར་རྙེད་པར་དཀའ་ན། རྒྱུའི་སྒོ་ནས། ཚུལ་ཁྲིམས་རྣམ་པར་དག་པ་བསྲུངས། སྨོན་ལམ་རྣམ་པར་དག་པས་མཚམས་སྦྱར། སྦྱིན་པ་ལ་སོགས་པས་གྲོགས་མ་བྱས་པར་མི་འཐོབ། དཔེའི་སྒོ་ནས། གྱང་ངོས་འཇམ་པོ་ལ་སྲན་མ་གཏོར་ན་ཆགས་སྲིད་པ་དེ་བས་ཀྱང་རྙེད་པར་དཀའ་བ་ཡིན། གྲངས་ཀྱི་སྒོ་ནས། ངན་སོང་གསུམ་གྱི་སེམས་ཅན་རྣམས་ནི་ས་ཆེན་པོའི་རྡུལ་ཙམ་ཞིག་ཡོད་ན། ལྷ་མི་གཉིས་ལ་ནི་སེན་མོའི་སྟེང་གི་རྡུལ་ཙམ་ཞིག་ལས་མེད། དེ་བས་ཀྱང་ཆོས་སྒྲུབ་པའི་གང་ཟག་ནི་ཧ་ཅང་དཀོན་མོ་ཡིན། དེའི་ཕྱིར་ན་རྒྱུ་དཔེ་གྲངས་གསུམ་གང་ཅིའི་ཐད་ནས་བསམ་བློ་བཏང་ན་ཡང་དལ་འབྱོར་གྱི་མི་ལུས་རིན་པོ་ཆེ་འདི་རྙེད་པར་དཀའ་བ་ཡིན་གསུངས།

སྐྱེས་བུ་གསུམ་གྱི་གོ་འཕང་གང་བསྒྲུབས་ཀྱང་འགྲུབ་ནུས་པའི་དལ་འབྱོར་གྱི་མི་ལུས་རིན་པོ་ཆེ་ཐོབ།

ཅེས་མི་ལུས་དེ་ཡང་རྙེད་དཀའ་བ་ཙམ་གྱིས་མི་ཚད་པར་རྙེད་ན་དོན་ཆེ་བ་ཡིན། ཇི་ལྟར་དོན་ཆེ་ཞེ་ན། དེ་ལ་སྐྱེས་བུ་ཆུང་ངུ་ཞེས་ངན་སོང་གསུམ་གྱི་སྡུག་བསྔལ་དང་བྲལ་ནས། མཐོ་རིས་ལྷ་མིའི་གོ་འཕང་ཙམ་ཞིག་བསྒྲུབ་པར་འདོད་ན་ཡང་དེ་སྒྲུབ་པའི་རྟེན་ཁྱད་པར་ཅན་ཞིག་ཐོབ་ཡོད། སྐྱེས་བུ་འབྲིང་ཞེས་འཁོར་བ་མཐའ་དག་གི་སྡུག་བསྔལ་དང་བྲལ་ནས་རང་དོན་དུ་ཉན་རང་དགྲ་བཅོམ་པའི་གོ་འཕང་འཐོབ་པར་འདོད་ན་ཡང་ལུས་རྟེན་འདི་ཡིས་འགྲུབ་པ་ཡིན། སྐྱེས་བུ་ཆེན་པོ་ཞེས་རང་གཞན་སེམས་ཅན་ཐམས་ཅད་གཏན་བདེ་སངས་རྒྱས་ཀྱི་གོ་འཕང་རིན་པོ་ཆེ་འཐོབ་པར་འདོད་ན་ཡང་ལུས་རྟེན་འདིའི་སྟེང་ནས་འགྲུབ་ནུས། དེའི་ཕྱིར་ན་སྐྱེས་བུ་གསུམ་གྱི་ལམ་གང་བསྒྲུབས་ཀྱང་འགྲུབ་པར་ནུས་པའི་མི་ལུས་རིན་པོ་ཆེ་དེ་ད་རེས་རང་ལ་ཐོབ་ཡོད་གསུངས།

མ་ཟད་མཚན་ཉིད་དང་ལྡན་པའི་དགེ་བའི་བཤེས་གཉེན་དང་འཕྲད་དེ།

ཞེས་མི་ལུས་ཐོབ་པ་ཙམ་གྱིས་མ་ཚད་པར་བླ་མ་དགེ་བའི་བཤེས་གཉེན་དང་འཕྲད་པ་འདི་དེ་བས་ཀྱང་ཧ་ཅང་རྙེད་པར་དཀའ་བ་ཡིན་གསུངས།

ཟབ་མོའི་ཆོས་ཀྱི་གདམས་པ་སྟོན་པའི་མཐུན་རྐྱེན་ཕུན་སུམ་ཚོགས་པའི་སྐབས་འདིར།

ཞེས་ད་རུང་འཇིག་རྟེན་གྱི་ཁམས་འདིར་སངས་རྒྱས་བྱོན། ཆོས་གསུངས། བསྟན་པ་གནས། མ་ཚད་བླ་མ་དགེ་བའི་བཤེས་གཉེན་གྱིས་རང་ཉིད་རྗེས་སུ་བཟུང་། རང་གི་སྐལ་བ་དང་འཚམ་པའི་ཆོས་རྣམ་པར་དག་པ་གསུང་རྒྱུ་འདི་ག་ཤིན་ཏུ་རྙེད་པར་དཀའ་བ་ཡིན་ཡང་། ད་རེས་མཐུན་རྐྱེན་ཚང་མ་རང་ལ་འབྱོར་ཡོད་པ་ཡིན་གསུངས།

དམ་པའི་ལྷ་ཆོས་སྒྲུབ་པ་ལ་ཐང་ལྷོད་མི་བྱ་སྙམ་དུ་དམ་བཅའ་ཡང་ཡང་བྱ།

ཞེས་འདི་ལྟ་བུའི་ལུས་རྟེན་ཁྱད་པར་ཅན་ཐོབ་ཡོད་ཚེ། དོན་མེད་དུ་མི་གཏོང་བར་ངས་དམ་པའི་ལྷ་ཆོས་རྣམ་པར་དག་པ་ཞིག་བསྒྲུབ་དགོས་བསམས་ནས་དམ་བཅའ་བྱ་དགོས། དེ་ནི་དལ་འབྱོར་རྙེད་པར་དཀའ་བ་ལ་བསམས་ནས་ཆོས་སྒྲུབ་པར་དམ་བཅའ་བ་སྟེ་ཁྲིད་རྐང་དང་པོ་ཡིན།

ལུས་རྟེན་དེ་ཡང་ངེས་པར་འཆི་བ། ནམ་འཆི་ཆ་མེད། འཆི་ཚེ་ཆོས་མིན་པ་གང་གིས་ཀྱང་མི་ཕན་པའི་ཚུལ་ལ་བསམས་ནས།

ཞེས་དེ་ལྟ་བུའི་དལ་འབྱོར་གྱི་མི་ལུས་རིན་པོ་ཆེ་ཐོབ་ཀྱང་། དེ་ཡང་ངེས་པར་འཆི་བ་ཡིན། སྐྱེ་བ་ཡོད་པ་ནས་བཟུང་སྟེ་འཆི་བ་མ་གཏོགས་འགྲོ་ས་གཞན་མེད། འཆི་རྐྱེན་དེ་ཡང་ངེས་པ་མེད་ཅིང་ཧ་ཅང་མང་པོ་ཡིན་ཏེ། དཔེར་ན་ནད་དང་གདོན། དགྲ་མེ་གཅན་གཟན་གཡང་ས་ལ་སོགས་པ་ཆེས་ཤིན་ཏུ་མང་པོ་ཞིག་གིས་འཆི་བར་འགྱུར་བ་ཡིན། གསོན་བྱེད་ཀྱི་རྐྱེན་ནི་ཆེས་ཉུང་ཉུང་ཡིན། ཟ་མ་དང་གོན་པ་རྐྱང་བ་ཙམ་ཞིག་གསོན་རྐྱེན་ཡིན་ཡང་། དེ་ཡང་ཟས་ཟ་ཉེས་ཀྱིས་གཤེད་དུ་འགྱུར་བ་དང་། གོས་ཀྱི་ཕྱིར་དུ་དགྲ་དང་འཐབ་ནས་འཆི་བར་འགྱུར་བས་འཚོ་རྐྱེན་ཡང་འཆི་རྐྱེན་ཉིད་དུ་འགྱུར་མིན་མི་ཤེས། དེས་ན་གསོན་རྐྱེན་ཉུང་ལ་འཆི་རྐྱེན་མང་བའི་ཕྱིར་འཆི་རྐྱེན་ཡང་ངེས་མེད་ཡིན། སྔ་ཕྱིའི་འགྲོ་བ་ལ་བསམས་ན་ནམ་འཆི་ཆ་མེད་ཡིན་ཏེ། ད་སྔོན་ཡན་ཆད་ཀྱི་ས་སྟེང་གི་འགྲོ་བ་འདི་དག་ཐམས་ཅད་ཀུན་ཀྱང་མི་རྟག་པ་ཡིན། ལོ་བརྒྱའི་གོང་རོལ་གྱི་མི་གཅིག་ཀྱང་ད་ལྟ་ས་སྟེང་འདི་ན་མེད་པ་ལྟ་བུར་གྱུར་པ་ཡིན་ན། རང་རེ་ཚང་མ་ཡང་དེའི་རང་བཞིན་ལས་མ་འདས། དེ་བཞིན་དུ་འཛམ་བུ་གླིང་གི་སེམས་ཅན་སྤྱི་ལ་བསམས་ན་ཡང་དེ་ལྟ་བུ་ཡིན་ཏེ། ད་སྐབས་ཨ་རིའི་རྒྱལ་ཁབ་ཆེན་པོ་འདི་དབུ་བརྙེས་ནས་ལོ་ཉིས་བརྒྱ་བཅུ་བདུན་ཙམ་ཞིག་སོང་བ་ཡིན། ཐོག་མའི་སྐབས་ཀྱི་མི་རྣམས་ད་ལྟ་ཚང་མ་ཤི་ཚར་ལ། ཨ་རིའི་སྲིད་འཛིན་ཁྲི་རབས་བཞི་བཅུ་ཞེ་གཉིས་ལ་ཐོན་ཡོད་ཀྱང་ད་ལྟ་འགའ་རེ་ཙམ་མ་གཏོགས་ཕལ་ཆེར་ཤི་ཚར་བ་ཡིན། དེས་ན་སྔར་གྱི་སྐྱེ་འགྲོ་ལ་བསམ་བློ་བཏང་ན་ཡང་ཚང་མ་མི་རྟག་པ་ཡིན། ཕྱིས་འབྱུང་གི་སྐྱེ་འགྲོ་ལ་བསམས་ན་ཡང་། ལོ་བརྒྱ་སོང་བའི་རྗེས་སུ་ས་སྟེང་གི་འགྲོ་བ་འདི་དག་གཅིག་གཉིས་ཙམ་མ་གཏོགས་ཐམས་ཅད་ཤི་ཚར་བ་བཞིན་རང་ཉིད་ཀྱང་དེའི་རང་བཞིན་ལས་མ་འདས། ཁྱད་པར་དུ་སང་ཕོད་ད་ཚོད་ཀྱི་དུས་སྐབས་ལ་མི་མང་པོ་ཞིག་ཕྱི་མའི་ཡུལ་ལ་འགྲོ་དགོས་ཐུག་པ་ཡིན། དེའི་ཁྲོད་དུ་རང་ཉིད་མེད་ཟེར་ནས་སྨྲ་ཐག་ཆོད་པ་མིན། དེའི་ཕྱིར་ན་རང་ཡང་ངེས་པར་འཆི་བ་དང་ནམ་འཆི་ཆ་མེད་ཀྱི་བདག་ཉིད་ཅན་ཡིན་པ་ཤེས་དགོས། དེ་ནས་བཅོམ་ལྡན་འདས་ཀྱི་བཀའ་ཡི་ནང་དུ་སང་ཉིན་ཙམ་ན་ཁྱོད་མི་འཆི་ཟེར་བའི་དཔའ་གདེང་ཅི་ཞིག་ཡོད་དེ། འཆི་བདག་གཤིན་རྗེ་དང་ཁྱོད་གཉིས་ཀ་ཁ་ཐུག་པའམ་གྲོས་བྱས་པ་ནི་མེད། ཁྱོད་ཀྱི་དགའ་ས་མཐུན་གནས་ཡིན་པས་ཁྱེད་མི་འཆི་བའི་ཐམ་ག་ནི་བརྒྱབས་མེད། དེས་ན་ཁྱོད་སང་ཉིན་ཙམ་ན་ཡང་ཡོད་པའི་དཔའ་གདེང་ཅི་ཡང་ཡོད་པ་མིན་པས། དེའི་སྔོན་དུ་དགེ་བ་བསྒྲུབ་དགོས་གསུངས།

མྱུར་བ་ཉིད་དུ་དགེ་བ་སྒྲུབ་པར་དམ་བཅའ་ནན་པོ་བྱ།

ཞེས་ནམ་འཆི་མི་གོ་ཞིང་མགྱོགས་མྱུར་དུ་ཨེ་འཆི་ཡང་མི་ཤེས་པས། ཆོས་དེ་སང་ཕོད་ལ་བསྒྲུབ། གནངས་ཕོད་ལ་བསྒྲུབ། ངས་ཟླ་བ་སྔོན་མའི་ནང་ལ་ལས་ཀ་མང་པོ་བསྒྲུབས་ནས་སྒོར་མོ་མང་པོ་བསགས། ཟླ་བ་རྗེས་མའི་ནང་ལ་གནང་བ་ཞུས་ནས་གཟོད་ཆོས་བསྒྲུབ་བསམས་ནས་དེ་ལྟར་ཕྱི་འགྱངས་བྱ་མི་རུང་ཞིང་། ཤི་བ་ཟེར་བ་ནམ་ཐོན་མི་ཤེས་པས་མྱུར་བ་ཉིད་དུ་ངས་དགེ་བ་ཞིག་བསྒྲུབ་དགོས་བསམས་ནས་དམ་བཅའ་བྱ་དགོས་གསུངས། དེ་ནི་ཚེ་མི་རྟག་པ་ལ་བསམས་ནས་མྱུར་དུ་དགེ་བ་སྒྲུབ་པར་ཐག་བཅད་པ་སྟེ་ཁྲིད་རྐང་གཉིས་པ་ཡིན།

ཤི་ནས་མེད་དུ་མི་འགྲོ་བར་ལས་དཀར་ནག་གི་རྗེས་སུ་འབྲངས་ཏེ། བདེ་སྡུག་བསླུ་མེད་དུ་མྱོང་དགོས་ཤིང་།

ཞེས་ཤི་ཚར་དུས་མེ་ཤི་བ་དང་ཆུ་ཆད་པ་ལྟ་བུ་ཞིག་ཡིན་ན་དྲག་ཀྱང་། དེ་ལྟར་མ་ཡིན་པར་ལས་དགེ་བ་བསྒྲུབས་ན་བདེ་འགྲོ་ལྷ་དང་མི་ལ་སོགས་པའི་བདེ་བ་ཁྱད་པར་ཅན་འཐོབ་ཡོང་བ་དང་། མི་དགེ་བ་བསྒྲུབས་ན་ངན་སོང་གསུམ་གྱི་སྡུག་བསྔལ་ལ་སོགས་པ་མྱོང་ཡོང་བ་ཡིན། དེའི་ཕྱིར་ན་རྒྱུ་འབྲས་ནམ་ཡང་བསླུ་བ་མེད་པ་རེད་གསུངས། བཅོམ་ལྡན་འདས་ཀྱིས་ཀྱང་། རྒྱ་མཚོ་ཆེན་པོ་ལ་རླབས་དང་བྲལ་འགྲོ་བའི་གནས་སྐབས་ཤིག་སྲིད་ཀྱང་། ལས་རྒྱུ་འབྲས་ལ་འགྱུར་བ་གཏན་ནས་འབྱུང་མི་སྲིད་གསུངས། དེས་ན་ལས་དགེ་བ་ཆུང་ངུ་ནས་ཀྱང་བསྒྲུབས། མི་དགེ་བ་ཆུང་ངུ་ནས་ཀྱང་སྤངས་ནས་ལས་རྒྱུ་འབྲས་ལ་ཡིད་ཆེས་ཀྱི་སྒོ་ནས་དགེ་སྡིག་སྤང་བླང་ནན་ཏན་བྱེད་པ་ནི་ཅི་ནས་ཀྱང་གལ་ཆེ་བ་ཡིན། དེ་ནི་ལས་རྒྱུ་འབྲས་བསླུ་བ་མེད་པ་ལ་བསམས་ནས་དགེ་སྡིག་བླང་དོར་ལ་བསྐུལ་བ་སྟེ་ཁྲིད་རྐང་གསུམ་པ་ཡིན།

ཁྱད་པར་འཁོར་བའི་སྡུག་བསྔལ་ཐམས་ཅད་རྒྱ་ཆེ་ཞིང་རྒྱུན་རིང་བ་བཟོད་མི་ནུས་པའི་ཚུལ་བློ་ལ་ངེས་པར་བྱས་ཏེ།

ཞེས་ལས་རྒྱུ་འབྲས་ཀྱི་དབང་གིས་འཁོར་བའི་གནས་གང་དུ་སྐྱེས་ཀྱང་སྡུག་བསྔལ་གྱི་རང་བཞིན་ཡིན་ལ། ཁྱད་པར་དུ་ངན་སོང་གསུམ་གྱི་སྡུག་བསྔལ་ནི་རྒྱ་ཆེན་པོ་དང་རྒྱུན་རིང་བ་ཡིན། དེ་རང་གི་བློ་ཡུལ་དུ་ལེན་དགོས། དེ་ཡང་འཁོར་བའི་སྡུག་བསྔལ་དེ་རྒྱ་ཅི་ཙམ་ཆེ་ཞེ་ན། དཔེར་ན་ངན་སོང་དམྱལ་བའི་སྡུག་བསྔལ་ལ་མཚོན་ན། དེ་ལ་མགོན་པོ་ཀླུ་སྒྲུབ་ཀྱིས། འདི་ན་ཉིན་གཅིག་མདུང་ཐུང་སུམ་བརྒྱ་ཡིས། །རབ་ཏུ་དྲག་བཏབ་སྡུག་བསྔལ་གང་ལགས་པ། །དེས་ནི་དམྱལ་བའི་སྡུག་བསྔལ་ཆུང་ངུ་ལའང་། །འོལ་ཡང་མི་བགྱིད་ཆར་ཡང་མི་ཕོད་དོ། །ཞེས་དཔེར་ན་འཇིག་རྟེན་ཁམས་ཀྱི་མི་ཉེས་ཆེན་ཞིག་ལ་ཉིན་རེ་བཞིན་དུ་མདའ་མདུང་གྲི་ལ་སོགས་པས་གསོན་བཤའ་བྱས་ནས་བསད། སླར་ཡང་ཚུར་ལ་སོས། དེ་ལྟར་ངན་གསོད་བྱས་ན་ཐམས་ཅད་ཀྱིས་སྡུག་བསྔལ་ཆེ་བར་བརྩི་ཡང་། དེ་ཡིས་ནི་དམྱལ་བའི་སྡུག་བསྔལ་ཆེས་ཆུང་ངུ་ཞིག་གི་དཔེ་ཙམ་ཡང་མི་འོས་ཤིང་། ངན་སོང་གི་སྡུག་བསྔལ་ནི་དེ་ལས་ཤིན་ཏུ་ཆེ་བར་གསུངས།

ཁྱད་པར་དུ་ཚ་དམྱལ་ལྟ་བུ་ཞིག་ལ་སྐྱེས་སོང་ན། ས་གཞི་ཐམས་ཅད་ཀྱང་ལྕགས་སྲེག་གི་མེ་ལྕེ་རབ་ཏུ་འབར་བའི་སྟེང་དུ། རང་ལུས་དེ་ཡང་ཧ་ཅང་ཆེན་པོ་སྡུག་བསྔལ་མི་བཟོད་མཁན་ཞིག་ཏུ་གྱུར་ནས། ལས་མཁན་རྣམས་ཀྱིས་སྟ་རེ་དང་སོག་ལེ་ལ་སོགས་ཀྱིས་ལུས་སྟོད་འདྲ་གཅོད་བྱེད་པའི་གནས་སྐབས་ན་ལུས་སྨད་ཡར་ལ་སོས། སྨད་གཅོད་པ་ན་སྟོད་སོས། དེ་ལྟ་བུའི་སྡུག་བསྔལ་བཟོད་མི་ནུས་པ་ཡུན་རིང་པོའི་བར་དུ་མྱོང་དགོས། རྒྱུན་རིང་ཚད་ལ་བསམས་ན་ཡང་། དམྱལ་བ་ཡང་སོས་ནི་དམྱལ་བའི་ནང་གི་ཚེ་ཐུང་ཤོས་ཡིན། མི་ལོ་འབུམ་ཕྲག་མང་པོ་སོང་ཡང་དམྱལ་བ་ཡང་སོས་ཀྱི་ཞག་མ་གཅིག་ཀྱང་སོང་མེད། དེ་ལྟར་མི་ལོ་བྱེ་བ་མང་པོའི་བར་དུ་སྡུག་བསྔལ་བར་མ་ཆད་པར་མྱོང་ནས་སྡོད་དགོས་ཤིང་། དམྱལ་བ་ཡང་སོས་ནི་སྡུག་བསྔལ་ཡང་ཤོས་ཡིན་པར་བཤད་ཀྱང་། དེ་ལ་ཡང་དེ་ལྟ་བུའི་སྡུག་བསྔལ་ཡོད། དེ་བཞིན་དུ་བསྡུས་འཇོམས་དང་ངུ་འབོད་སོགས་ཚ་དམྱལ་གཞན་ཐམས་ཅད་དེ་ལས་ཀྱང་རིམ་བཞིན་བདུན་འགྱུར་གྱིས་སྡུག་བསྔལ་ཆེ་བ་ཡིན། གཞན་ཡང་གྲང་དམྱལ་བརྒྱད་ཟེར་བ་ཞིག་ཡོད་པ་དེར་ཡང་གྲང་བའི་སྡུག་བསྔལ་ཤིན་ཏུ་བཟོད་པར་དཀའ་བའི་ཕྱིར་ན། ངན་སོང་དམྱལ་བའི་གནས་ན་ཚ་བ་དང་གྲང་བའི་སྡུག་བསྔལ་བཟོད་དུ་མེད་པ་ཡོད།

དེ་ནས་ཡི་དྭགས་ལ་བསམ་བློ་བཏང་ན། ཡི་དྭགས་ཀྱི་འགྲོ་བ་རྣམས་ཀྱིས་ཟས་ལྟ་ཅི། ཕལ་ཆེར་ལོ་བཅུ་གཉིས་རེ་ལའང་ཆུ་ཐིགས་པ་ཙམ་རེ་ཡང་འཐུང་རྒྱུ་མི་རྙེད་པའི་སྡུག་བསྔལ་ཡོད། ཟ་མ་དང་བཏུང་བ་མ་རྙེད་ཀྱང་ད་རུང་ལས་ཀྱི་དབང་གིས་འཆི་མི་ཐུབ་ཅིང་སྡུག་བསྔལ་མྱོང་དགོས། གལ་ཏེ་ཟ་མ་ཅུང་ཟད་ཙམ་རེ་རྙེད་ཀྱང་དེ་ལས་མེ་ལྕེ་འབར་ནས་ལུས་ཀྱི་ཕྱི་ནང་ཐམས་ཅད་བསྲེགས། སླར་ཡང་སོས་ནས་བཀྲེས་སྐོམ་གྱི་སྡུག་བསྔལ་མྱོང་དགོས་པ་ཡིན།

དུད་འགྲོ་ལ་བསམ་བློ་བཏང་ན། བྱིངས་ན་གནས་པའམ་རྒྱ་མཚོ་ཆེན་པོའི་ནང་དུ་གནས་པའི་དུད་འགྲོ་ནི། སྲོག་ཆགས་ཆེན་པོའི་ལུས་ལ་ཆུང་ཆུང་རྣམས་ཀྱིས་ཚང་བཅས་ནས་དེའི་ཤ་ལ་རྟག་ཏུ་རོལ་བ་དང་། ཆེན་པོ་དག་གིས་ཆུང་ཆུང་རྣམས་ཁྱུར་མིད་བྱས་ནས་ཟ་བ། ཕན་ཚུན་གཅིག་གིས་གཅིག་ཟ་བའི་སྡུག་བསྔལ་ཡང་བཟོད་དུ་མེད་པ་ཡོད། ཁ་འཐོར་བ་ནི་དཔེར་ན་མིའི་ཡུལ་ན་ཡོད་པའི་རི་དྭགས་དང་གཡུང་དྭགས་ལྟ་བུ་ཡིན། ལ་ལ་ཤ་ཡི་དོན་དུ་གསོད། ལ་ལ་པགས་པའི་དོན་དུ་གསོད། ལ་ལ་རུས་པའི་དོན་དུ་གསོད། ལ་ལ་བཀོལ་ཞིང་སྤྱོད་ནས་འགྲོ་འདོད་ཀྱང་འགྲོ་དབང་མེད། འདུག་བསམ་ཡང་འདུག་དབང་མེད་པར། ཁལ་བཀལ། ཞོན་པ་སོགས་ཀྱི་སྡུག་བསྔལ་དཔག་ཏུ་མེད་པ་མྱོང་དགོས།

དེ་ལྟར་དགེ་བ་མ་བསྒྲུབས་པའི་སྐྱེ་བོ་ཐམས་ཅད་ཀྱི་མདུན་ན་ངན་སོང་གསུམ་གྱི་སྡུག་བསྔལ་གྱིས་བསྒུག་ནས་བསྡད་ཡོད་པ་ལྟ་བུ་ཡིན་པས། རང་རང་སོ་སོས་བསམ་བློ་ཐོང་དང་། ཁྱོད་ཀྱིས་མི་ཚེ་གང་པོར་དགེ་བ་ཅི་འདྲ་བསྒྲུབས་ཡོད། སྡིག་པ་ཅི་འདྲ་ཞིག་བསགས་འདུག ངས་བསམས་ན་རེ་རེ་གཉིས་རེ་མ་གཏོགས་དགེ་བ་ཉུང་ཉུང་ལས་བསྒྲུབས་ཡོད་རྒྱུ་མ་རེད། མི་དགེ་བ་གྲངས་མང་པོ་བསགས་ཡོད་ན་ཐང་། དེས་ན་ཁྱོད་འགྲོ་ས་ངན་སོང་ལས་མེད། ངན་སོང་ན་དེ་ལྟ་བུའི་སྡུག་བསྔལ་ཡོད་པས་ད་ལྟ་རང་དབང་ཡོད་པའི་གནས་སྐབས་ན་ཁྱོད་ཀྱི་ཚེ་སྟོད་དོན་མེད་དུ་གྱུར་ཀྱང་། ཚེ་སྨད་ལ་དགེ་བ་རྣམ་དག་རེ་བསྒྲུབ་པར་ཐམས་ཅད་ཀྱིས་འབད་དགོས། དེ་ནི་འཁོར་བའི་སྡུག་བསྔལ་ལ་བསམས་ནས་ཆོས་སྒྲུབ་པར་བསྐུལ་བ་སྟེ་ཁྲིད་རྐང་བཞི་པ་ཡིན།

འཁོར་བ་མཐའ་དག་ལས་གྲོལ་བར་ནུས་པའི་ཆོས་རྒྱ་ཆེན་པོ་ཞིག་སྒྲུབ་པར་དམ་བཅའ།

ཞེས་འཁོར་བའི་ཉེས་དམིགས་དང་ལས་རྒྱུ་འབྲས་ལ་བསམ་བློ་བཏང་ནས། ཆོས་རྒྱ་ཆེན་པོ་ཞིག་བསྒྲུབ་པར་དམ་བཅའ་དགོས་གསུངས།

དེ་ལྟར་དམ་བཅའ་གསུམ་པོ་དེ་ཡང་འགྲུབ་པར་བྱིན་གྱིས་བརླབ་ཏུ་གསོལ་སྙམ་དུ་བླ་མ་དང་ཡི་དམ་ལ་གསོལ་བ་དྲག་ཏུ་གདབ་པར་བྱའོ། །

ཞེས་གོང་དུ་དལ་འབྱོར་རྙེད་དཀའ་ལ་བསམས་ནས་ཆོས་སྒྲུབ་པར་དམ་བཅའ། ཚེ་མི་རྟག་པ་ལ་བསམ་སྟེ་ཆོས་མྱུར་དུ་སྒྲུབ་པར་དམ་བཅའ། ལས་རྒྱུ་འབྲས་དང་འཁོར་བའི་ཉེས་དམིགས་ལ་བསམ་སྟེ་ཆོས་རྒྱ་ཆེན་པོ་ཞིག་སྒྲུབ་པར་དམ་བཅའ་བ་སྟེ། དམ་བཅའ་གསུམ་པོ་དེ་ཡང་མྱུར་དུ་འགྲུབ་པར་བྱིན་གྱིས་བརླབ་ཏུ་གསོལ་སྙམ་དུ་རྩ་བའི་བླ་མ་དང་ཡི་དམ་ལ་གསོལ་བ་གདབ། བླ་མའི་བཀའ་བཞིན་དུ་སྒྲུབ་པ་ནི་གཙོ་བོ་བཤེས་གཉེན་བསྟེན་པའི་ཁྲིད་ཡིན།

དེ་ལྟར་བློ་ལྡོག་རྣམ་པ་བཞི་པོ་ནི་ཐེག་དམན་ཉན་རང་རྣམས་དང་ཐུན་མོང་གི་ཕྱིའི་སྔོན་འགྲོའི་ཁྲིད་ཡིན་ལ། དེ་ལྟ་བུའི་བློ་ལྡོག་རྣམ་པ་བཞིས་ནི་འཁོར་བ་མཐའ་དག་ལ་ཞེན་པ་མེད་པའི་བློ་སྐྱོ་སང་ངེ་བ་ཞིག་སྐྱེས་དུས་གཟོད་ཐེག་པ་ཆེན་པོའི་ལམ་ལ་འཇུག་དགོས། དེ་རིང་གི་ཁྲིད་མཚམས་དེ་ཡིན།

སྤང་ལྗོངས་སྟེང་གི་ཆོས་གོས་དམར་སེར།

ཕྱི་ཟླ་༧པའི་ཚེས་༢༨ཉིན། ཆོས་རྗེ་ཉིད་ཀྱིས་ཆོས་ཚོགས་འདིའི་རབ་ཏུ་བྱུང་བ་རྣམས་ལ་ཚུལ་ཁྲིམས་བསྲུངས་བའི་ཕན་ཡོན་དང་ཉམས་པའི་ཉེས་དམིགས་སྐོར་གྱི་གསུང་བཤད་གནང་། ཁོང་གིས་དུས་རྟག་ཏུ་འདུལ་སྡོམ་ལ་ཤིན་ཏུ་གཙིགས་ཆེན་མཛད་ཅིང་། དུས་རབས་དམིགས་བསལ་བའི་ནང་ལ་བོད་ཡུལ་དུ་ཚུལ་ཁྲིམས་རྣམ་པར་དག་པའི་རབ་བྱུང་བ་ཆེས་མང་པོ་གསོ་སྐྱོང་མཛད་པ་ཡིན། ཆོས་ཚོགས་འདིར་སྔར་ནས་རབ་ཏུ་བྱུང་བ་ཅུང་མང་པོ་ཡོད་ལ། ཆོས་རྗེ་ཉིད་བྱོན་རྗེས་སླར་ཡང་རབ་ཏུ་བྱུང་ནས་སྡོམ་པ་ལེན་མཁན་ཡང་གང་མང་བྱུང་། འདིར་ཁྱོན་བསྡོམས་རབ་བྱུང་བཅུ་ཕྲག་འགའ་ཞིག་ལས་མེད་པས། བོད་ཡུལ་གྱི་དགེ་འདུན་པ་ཁྲི་སྟོང་མང་པོ་དང་བསྡུར་ཐབས་ཁྱོན་ནས་མེད་ཀྱང་། ཨ་རིའི་ས་ཆ་འདི་ལ་མཚོན་ན། རབ་བྱུང་བའི་ཚོགས་པ་འདི་འདྲ་ཞིག་ཡོད་པ་ནི་དངོས་གནས་ལས་སླ་པོ་ཞིག་གཏན་ནས་མིན།

ངས་ད་ལྟའི་བར་དུ་ནམ་ཡང་བརྗེད་དུ་མེད་པ་ཞིག་ལ། ཉིན་དེར་ཆོས་རྗེ་ཉིད་སྤང་ཐང་གི་ལྗོན་པའི་བསིལ་གྲིབ་འོག་ཏུ་བཞུགས་ཏེ་འདུལ་བའི་གནང་བཀག་སྐོར་གྱི་བསླབ་བྱ་གནང་ཞིང་། ཆོས་གོས་དམར་སེར་མནབས་པའི་དགེ་འདུན་པ་རྣམས་ཀྱིས་དད་གུས་དང་བཅས་མཐའ་སྐོར་དུ་བསྡད་ནས་ཆོས་ཉན་བཞིན་པའི་སྣང་ཚུལ་དེ་མཐོང་བ་ན། སྔོན་སྟོན་པ་ཐུགས་རྗེ་ཅན་གྱིས་ཡུལ་དྲང་སྲོང་ལྷུང་བ་རི་དྭགས་ཀྱི་ནགས་སུ་འཁོར་ལྔ་སྡེ་བཟང་པོ་ལ་ཆོས་ཀྱི་འཁོར་ལོ་བསྐོར་བའི་ངང་ཚུལ་ཡང་འདི་འདྲ་ཞིག་ཡིན་ཤས་ཆེ་སྙམ་པའི་ཚོར་བ་བྱུང་། བདག་གིས་ཚེ་འདིར་དགེ་འདུན་པའི་འདུ་བ་སྣ་ཚོགས་པ་ཞིག་མཐོང་མྱོང་ཡང་། དེ་འདྲའི་ནུབ་ཕྱོགས་པའི་བཞིན་རས་ཅན་གྱི་རབ་ཏུ་བྱུང་བ་མང་པོ་ལྷན་དུ་འདུས་པ་ཐོག་དང་པོར་མཐོང་བས། དགའ་བ་དང་ཡིད་སྨོན་གྱི་ཚོར་སྣང་ཁྱད་པར་བ་ཞིག་སྐྱེས།

ཉིན་དེར། ཆོས་རྗེ་ཉིད་ཀྱིས་རབ་ཏུ་བྱུང་བའི་ཕན་ཡོན་དང་འབྲེལ་བའི་གསུང་བཤད་གནང་བ་ན། དེར་འདུས་ཀྱི་དགེ་འདུན་པ་རྣམས་ལ་དགའ་སྤྲོ་དཔག་མེད་སྐྱེས་ཤིང་། ཆོས་ཚོགས་འདི་ལའང་སྔ་ན་མེད་པའི་ཁ་དོག་གསར་པ་ཞིག་བྱིན་པར་སྣང་ངོ་། །

སངས་རྒྱས་ལག་སྟེར་གྱི་ཁྲིད་ཐུན་གཉིས་པ།

ཉིན་དེའི་དགོང་མོར་སངས་རྒྱས་ལག་སྟེར་མུ་མཐུད་དུ་གསུང་།

དེ་རིང་གི་སྐབས་འདི་འཛམ་གླིང་གི་ཡུལ་གྲུ་ཀུན་ལ་ཤིན་ཏུ་དགེ་བའི་དུས་ཚེས་ཧ་ཅང་བཟང་པོ་ཡིན་ཏེ། བོད་ཡུལ་ལུང་པའི་གསང་སྔགས་རྙིང་མ་པ་ཡོད་དོ་ཅོག་གིས་ཨོ་རྒྱན་རིན་པོ་ཆེའི་རྗེས་དྲན་གྱི་དུས་མཆོད་འཚོགས་བཞིན་པའི་སྒང་ཡིན། དཔེར་ན་ང་ཚོའི་རི་ཁྲོད་དམ་སློབ་གླིང་ལ་དཔེ་མཚོན་ན། ན་ནིང་དགེ་འདུན་པ་སྟོང་ཕྲག་གསུམ་གྱིས་མཉམ་དུ་འཇམ་དཔལ་རྒྱུད་ལུགས་ཀྱི་ཚོགས་ཀྱི་འཁོར་ལོ་བསྐོར་བ་ལ་ལོངས་སུ་སྤྱོད་པའི་དུས་ཚོད་ཡིན། ད་ལོའི་གནས་སྐབས་ལ་མཚོན་ན་ཡང་། དེ་རིང་གི་ཉི་མ་འདི་ལ་སྐལ་བ་ཧ་ཅང་བཟང་པོའི་དུས་ཚོད་ཅིག་ཤར་ཐལ། དེ་ཡང་གཙོ་བོ་མཁན་པོ་ཁོང་རྣམ་པའི་བདག་རྐྱེན་ལ་བརྟེན་ནས་རབ་ཏུ་བྱུང་བའི་སྡེ་ཡང་ཁྱོན་བསྡོམས་སུམ་ཅུ་ལྷག་བསྒྲུབས་འདུག་པས། ངས་སྙིང་ཐག་པ་ནས་ཚང་མ་ལ་ཐུགས་རྗེ་ཆེ་ཞུ་རྒྱུ་ཡིན།

སྤྱིར་ཨ་རིའི་རྒྱལ་ཁབ་ལ་ཆོས་སྒོར་ཞུགས་པ་མང་ཡང་རབ་ཏུ་བྱུང་བའི་སྡེ་ཟེར་བ་དེ་ཧ་ཅང་དཀོན་མོ་རེད། དེ་རིང་གི་ཉི་མ་འདི་ལ་མཚོན་ན། བསྟན་པའི་སྒོར་ཞུགས་པ་ཙམ་དུ་མ་ཟད་སླར་ཡང་རབ་ཏུ་བྱུང་མཁན་ཡང་མང་པོ་ཞིག་ཡོད། དེ་ཡང་བསྟན་པའི་སྒོར་ཞུགས་ཟེར་བ་ནི། ནང་པ་སངས་རྒྱས་པའི་ཆོས་ལ་དད་པ་སྐྱེས། སྐྱབས་འགྲོའི་སྡོམ་པ་བླངས། དཀོན་མཆོག་གསུམ་གྱི་རྗེས་སུ་ཞུགས་ནས་ཆོས་རྣམ་པར་དག་པ་སྒྲུབ་པ་དེ་ལ་ཟེར། རབ་ཏུ་བྱུང་བའི་སྡེ་དེ་ནམ་ཚུགས་ན་དེ་ནས་བཟུང་སྟེ་བསྟན་པའི་གཞི་ཚུགས་ཟེར་བ་ཡིན། གཞན་ནང་པ་སངས་རྒྱས་པ་ལ་སྐྱབས་སུ་སོང་བ་དང་དད་པ་སྐྱེ་བ་ཙམ་ནི་གཞན་དུ་འགྱུར་འགྲོ་བའི་ཉེན་ཁ་ཆེ། རབ་ཏུ་བྱུང་ཚར་ནས་བཟུང་སྟེ་བཅོམ་ལྡན་འདས་ཀྱི་བསྟན་འཛིན་དག་མར་གྱུར་ཚར་བ་སྟེ། རབ་ཏུ་བྱུང་བ་དེ་ཕྱི་རོལ་པར་གྱུར་པ་ལྟ་བུ་དཀོན་པ་ཡིན།

དེས་ན་རབ་ཏུ་བྱུང་བའི་སྡེ་འདི་ལྟ་བུ་ཞིག་ཨ་རིའི་ལུང་པར་ཚུགས་ཡོད་པ་ནི། ངས་ལོ་རྒྱུས་གསལ་བོ་གོ་བ་མིན་ཡང་ཧ་ལམ་ཚོད་འཇོག་བྱས་ན། ཨ་རིའི་རྒྱལ་ཁབ་ཀྱི་ལོ་རྒྱུས་སྟེང་དུའང་ངོ་མཚར་དང་གཟི་བརྗིད་ཆེ་བའི་དོན་ཞིག་ཡིན་རྒྱུ་རེད་བསམ། དཔེར་ན་བོད་ཡུལ་དུ་ཆོས་དར་བའི་ལོ་རྒྱུས་ཀྱི་དབང་དུ་བྱས་ན། བོད་ལ་རྒྱལ་པོ་ཐམས་ཅད་ཀྱི་ཐོག་མ་རྒྱལ་པོ་གཉའ་ཁྲི་བཙད་པོ་ཟེར་བ་དེ་བྱོན་ཅིང་། དེ་ནས་རྒྱལ་རབས་ཉི་ཤུ་རྩ་བརྒྱད་པ་ལྷ་ཐོ་ཐོ་རི་སྙན་བཙན་གྱི་རིང་ལ་དམ་པ་ཆོས་ཀྱི་དབུ་བརྙེས་པ་ཡིན། དེའི་སྔོན་ལ་གནམ་ལ་ཁྲི་བདུན་དང་། སྟོད་ཀྱི་སྟེང་གཉིས། ས་ལ་ལེགས་དྲུག ཆུ་ལ་ལྡེ་བརྒྱད། བར་གྱི་བཙན་ལྔ་བཅས་རྒྱལ་པོ་མང་པོ་བྱོན་ཅིང་། ལྷ་ཐོ་ཐོ་རི་ནས་རིམ་བཞིན་སངས་རྒྱས་ཀྱི་བསྟན་པའི་སྒོར་ཞུགས་པའི་ཆོས་ལ་དད་མཁན་དང་དགའ་མཁན། སྐྱབས་སུ་འགྲོ་བའི་སྡོམ་པ་ལེན་མཁན་མང་པོ་བྱུང་ཡང་། རབ་ཏུ་བྱུང་བའི་གཞི་དེ་རྩ་བ་ནས་ཚུགས་མ་ཐུབ་པ་ཡིན། དེའི་རྗེས་སུ་ཆོས་རྒྱལ་ཁྲི་སྲོང་ལྡེའུ་བཙན་གྱི་སྐུ་རིང་ལ། མཁན་པོ་བོ་དྷི་ས་ཏྭ་རྒྱ་གར་ནས་སྤྱན་དྲངས་ཏེ་བོད་ཀྱི་སད་མི་མི་བདུན་ཞེས་རབ་ཏུ་བྱུང་བ་བདུན་ཐོག་མར་བྱུང་། དེ་ནས་བཟུང་སྟེ་བསྟན་པའི་གཞི་ཚུགས་ཞེས་བོད་ལ་ཡོངས་སུ་གྲགས་པ་ཡིན།

དེས་ན་ཁྱེད་རྣམ་པའི་ཡུལ་འདིར་རབ་ཏུ་བྱུང་བའི་སྡེ་ལེགས་པོར་ཚུགས་ཡོད་པས། རྗེས་མ་ཡང་བོད་དུ་བསྟན་པ་དར་བ་བཞིན་དུ་རབ་ཏུ་བྱུང་བའི་སྡེ་ཕུན་སུམ་ཚོགས་པ་ཞིག་འབྱུང་བ་ལ་དཔོན་སློབ་ཚང་མས་འབད་རྩོལ་བརྒྱ་འགྱུར་དུ་བསྐྱེད་དགོས། དེས་ན་ཁྱེད་རྣམ་པ་ཤུལ་ན་ཡོད་པ་ཚང་མས་ཀྱང་ད་རུང་ཞིབ་ཏུ་བསམ་བློ་ཐོང་དང་། རབ་ཏུ་བྱུང་བར་བྱེད་པ་ལ་བར་ཆད་གསུམ་པོ་མེད་ཅིང་། རང་མོས་ཀྱི་སྒོ་ནས་རབ་ཏུ་བྱུང་མཁན་རེ་ཡོད་ན་མྱུར་དུ་བསྒྲུབས་ན་ཧ་ཅང་ཡག་པོ་རེད། ངེད་ཅག་ཀྱང་ད་ནི་ཉིན་གསུམ་མ་གཏོགས་འདུག་ཁོམ་མི་འདུག དེའི་རིང་ལ་རབ་བྱུང་སྒྲུབ་མཁན་ཡོད་ན་མཁན་པོ་རྣམ་པ་བཞུགས་ཡོད་པས་རབ་ཏུ་བྱུང་ཆོག་པ་ཡིན། རྗེས་མ་ཁྱེད་རྣམ་པས་བསྒྲུབ་བསམས་ན་ཡང་། རབ་ཏུ་བྱུང་བའི་རྟགས་རེ་འཆང་ནས་ལོ་ཁ་ཤས་ལ་སྒུག་རྒྱུ་མ་གཏོགས། རབ་ཏུ་བྱུང་བ་སྒྲུབ་མཁན་དེ་ས་ཆ་འདིར་ཐད་ཀར་འབྱོན་ཟེར་བ་ཧ་ཅང་དཀའ་མོ་ཡིན། གལ་སྲིད་བླ་མ་རེ་རེ་གཉིས་རེ་བྱོན་ཡང་དེས་ཨེ་བསྒྲུབ་མི་ཤེས་ལ། སྒྲུབ་ཨེ་ཁོམ་ཡང་མི་ཤེས། དེས་ན་ད་རེས་ཁོམ་ལོང་ཡོད་པ་ཐམས་ཅད་ཀྱིས་ད་རུང་ཡང་རབ་ཏུ་བྱུང་བ་རེ་རེ་གཉིས་རེ་བསྒྲུབ་རྒྱུ་བྱུང་ན་ཧ་ཅང་བཟང་པོ་རེད།

ཁྱེད་རྣམ་པ་ཁྱིམ་པ་རྣམས་ཀྱིས་ཀྱང་། དུས་རྒྱུན་དུ་རབ་ཏུ་བྱུང་བའི་སྡེ་འདི་ལ་གང་ཅིའི་ཐད་ནས་རྒྱབ་སྐྱོར་དང་རོགས་རམ་ཕུན་སུམ་ཚོགས་པ་རེ་ཡོང་ཐུབ་ན། རང་གི་འདི་ཕྱི་ཀུན་ཏུ་བྱས་པ་དོན་དང་ལྡན་པ་ཡིན་ཞེས་ངས་རེ་བ་བཅོལ་བ་ཡིན། དེས་ན་ཁྱེད་རྣམ་པ་རབ་ཏུ་བྱུང་བ་ཐམས་ཅད་ཀྱིས་ཀྱང་བསླབ་པ་དོ་དོ་ཏན་ཏན་གྱིས་སྲུངས་དང་། རང་ངོས་ནས་ངན་པར་མ་གྱུར་ན་ཡུལ་རྐྱེན་དེ་ནི་ཧ་ཅང་བཟང་པོ་རེད་བསམ། ངས་ཁ་སང་ཁ་ཉིན་སྐད་ཆ་འདི་འདྲ་ཚོར། ཆོས་ཚོགས་འདིའི་གཟན་ཤམ་གྱོན་པའི་ཨ་ནེ་ཇོ་མོ་ཞིག་གིས་ཕོ་བྲང་དཀར་པོའི་ནང་དུ་ལས་ཀ་བྱེད་ཀྱིན་ཡོད་ཟེར། དེ་ཡང་ཧ་ཅང་གཟི་བརྗིད་ཆེན་པོ་ཡིན། སྲིད་འཛིན་རྒན་གཞོན་རྣམས་ཡོད་པའི་དྲུང་དུ་སངས་རྒྱས་ཀྱི་ན་བཟའ་གོན་ནས་ལས་ཀ་བྱེད་བཞིན་ཡོད་པ་ནི་འཛམ་གླིང་གི་རྒྱལ་ཁབ་རྣམས་ཀྱི་ནང་ན་ཧ་ཅང་དཀོན་མོ་ཡིན། ཁོང་གིས་སངས་རྒྱས་ཀྱི་ན་བཟའ་གོན་ནས་ཕོ་བྲང་དཀར་པོའི་ནང་དུ་ལས་ཀ་བྱེད་ཀྱིན་ཡོད་པ་ལ། ངས་དགའ་རྟགས་ཀྱི་ཚུལ་དུ་དར་ཁ་ཞིག་ཁོང་ལ་འབུལ་བ་ཡིན། བཀྲ་ཤིས་བདེ་ལེགས། ༼ཐལ་སྒྲ།༽ དེ་དག་ནི་འཕྲོས་དོན་ཡིན། ད་ཆོས་ངོ་མ་འཆད་རན་པ་ཡིན།

དེ་ལ་གང་གསན་པར་བྱ་བའི་ཆོས་ནི། འཇམ་དཔལ་ཞི་སྒྲུབ་ཀྱི་ཁྲིད་ཡིག་སངས་རྒྱས་ལག་སྟེར་འདི་ཉིད་འཆད་པར་བྱེད་པ་ལ། ཐོག་མར་བློ་ལྡོག་རྣམ་བཞིའི་ཁྲིད་བཤད་གྲུབ་ནས། ཐུན་མིན་གྱི་སྔོན་འགྲོ་ལས་ཐོག་མར་སྐྱབས་སུ་འགྲོ་བའི་ཁྲིད་ཀྱི་སྐབས་ཡིན།

དེ་ནས་ལམ་ཐམས་ཅད་ཀྱི་གཞི་རྟེན།

ཞེས་སྐྱབས་སུ་འགྲོ་བ་འདི་ནི་སངས་རྒྱས་ཀྱིས་གསུངས་པའི་ཆོས་གང་ཞིག་ཉམས་སུ་བླངས་ཀྱང་དེའི་གཞི་རྟེན་མེད་དུ་མི་རུང་བ་ཡིན། སྐྱབས་འགྲོ་མ་ཡོད་ནས་བཟུང་སྟེ་སངས་རྒྱས་ཀྱིས་གསུངས་པའི་ཆོས་གང་ཡང་ཉམས་སུ་ལེན་ཐབས་མེད་གསུངས།

ནང་པ་སངས་རྒྱས་པའི་གྲལ་དུ་འཛུད་པར་བྱེད་པ་ནི།

ཞེས་སྐྱབས་སུ་འགྲོ་བ་འདི་ཡོད་ན་ནང་པ་སངས་རྒྱས་པ་ཡིན། སྐྱབས་སུ་འགྲོ་བ་འདི་མ་ཡོད་ནས་བཟུང་སྟེ་ནང་པ་སངས་རྒྱས་པ་མི་ཟེར། དེའི་ཕྱིར་ན་སྐྱབས་སུ་འགྲོ་བ་འདི་ནི་ནང་པ་སངས་རྒྱས་པའི་གྲལ་དུ་འཛུད་བྱེད་ཡིན་གསུངས།

སྐྱབས་སུ་འགྲོ་བ་འདི་ཁོ་ན་ཡིན་པས་ན་འདི་ལྟར་བསྒོམ་པར་བྱ་སྟེ།

ཞེས་སྐྱབས་འགྲོ་སྒོམ་ཚུལ་དེ་ལ་དང་པོ་ཚོགས་ཞིང་གསལ་གདབ་དགོས་ལ་ཚོགས་ཞིང་འདི་ལྟར་བསྒོམ་པར་བྱ་སྟེ་ཞེས་གསུངས།

རང་མདུན་ནམ་མཁར་འཇའ་འོད་སྤྲིན་དཀར་གྱི་བཀོད་པ་ཤིན་ཏུ་མཛེས་པའི་ཀློང་ན། ངོ་བོ་རྩ་བའི་བླ་མ་ལ་རྣམ་པ་འཇམ་དཔལ་ཡེ་ཤེས་སེམས་དཔའ་རྒྱན་ཆ་ལུགས་སྒྱུ་འཕྲུལ་གྱི་བཀོད་པ་ཐམས་ཅད་གཞུང་བཞིན་གསལ་ལ།

ཞེས་རང་གི་མདུན་དུ་འཇའ་དང་འོད་དང་སྤྲིན་དཀར་པོ་དཔག་ཏུ་མེད་པ་འཁྲིགས་པའི་དབུས་ན། ངོ་བོ་རང་གི་རྩ་བའི་བླ་མ་ཡིན་པར་བསྒོམ་དགོས་ཤིང་། རྣམ་པ་འཇམ་དཔལ་ཡེ་ཤེས་སེམས་དཔའ་སྐུ་མདོག་རྒྱན་ཆ་ལུགས་དང་བཅས་པ་གཞུང་བཞིན་དུ་གསལ་ལ་ཞེས་ཏེ། འཇམ་དཔལ་ཞི་སྒྲུབ་ཀྱི་སྐབས་ན་བཤད་པ་ལྟ་བུའི་འཇམ་དཔལ་ཡེ་ཤེས་སེམས་དཔའ་སྐུ་མདོག་སེར་པོ་དང་ཞལ་གཅིག་ཕྱག་གཉིས། ཕྱག་གཡས་ཤེས་རབ་ཀྱི་རལ་གྲི་མཁའ་ལ་ཕྱར་བ། གཡོན་པས་ཨུཏྤལ་གྱི་སྟེང་ན་གླེགས་བམ་བསྣམས་པ། སྐུ་ལ་དར་དང་རིན་པོ་ཆེའི་རྒྱན་གྱིས་བརྒྱན་པ། ཞབས་རྡོ་རྗེའི་སྐྱིལ་མོ་ཀྲུང་གིས་པད་ཟླའི་གདན་ལ་བཞུགས་པ། སྐུ་ལ་རང་བྱུང་རྒྱུད་སྡེའི་དཀྱིལ་འཁོར་གྱི་ལྷ་ཐམས་ཅད་རྫོགས་པ། སྟེང་གི་ཆ་ལ་བླ་མ། བར་གྱི་ཆ་ལ་མཁའ་འགྲོ། འོག་གི་ཆ་ལ་ཆོས་སྐྱོང་སྲུང་མ་ཐམས་ཅད་བཞུགས་ཡོད་པ་ཞིག་བསྒོམ་དགོས་གསུངས།

དུས་ད་ནས་བྱང་ཆུབ་སྙིང་པོའི་བར་དུ།

ཞེས་ད་ནས་བཟུང་བྱང་ཆུབ་སྙིང་པོའམ་སངས་རྒྱས་ཀྱི་ས་མ་ཐོབ་བར་དུ། དྲིན་ཆེན་རྩ་བའི་བླ་མ་འཇམ་དཔལ་ཡེ་ཤེས་སེམས་དཔའ་དང་དབྱེར་མེད་པ་ཁྱེད་ཁོ་ན་ལ་བསྟེན་གསུངས།

ཁྱེད་ཁོ་ན་ལ་བསྟེན་ཏེ་ཅི་གསུང་གི་བཀའ་ཉམས་སུ་བླངས་ནས་རང་དང་ལྟ་སྤྱོད་མཐུན་པའི་གྲོགས་རྣམས་དང་ལྷན་ཅིག་ཏུ།

ཞེས་དྲིན་ཆེན་རྩ་བའི་བླ་མ་ཁྱེད་མ་གཏོགས་སྐྱབས་དང་སྐྱོབ་པ། མགོན་དང་དཔུང་གཉེན་གཞན་གང་ཡང་དངོས་སུ་མི་འཚོལ་བར་མ་ཟད། ཐ་ན་རྨི་ལམ་དུ་ཡང་མི་འཚོལ་བར་ཁྱེད་ཁོ་ན་ལ་བསྟེན་བསམ་པ་དེ་ནི་སངས་རྒྱས་ལ་སྟོན་པའི་འདུ་ཤེས་བཞག་ནས་སྐྱབས་སུ་འགྲོ་བ་དང་ཕྱོགས་འདྲ་བ་ཡིན། བླ་མ་དེས་ཅི་གསུངས་ཀྱང་དེ་ཁོ་ན་བསྒྲུབ་པ་མ་གཏོགས་གཞན་བྱ་བ་གང་ཡང་མི་བསྒྲུབ་ཟེར་བ་དེ། ཆོས་ལ་ལམ་གྱི་འདུ་ཤེས་བཞག་སྟེ་སྐྱབས་སུ་འགྲོ་བ་དང་གཅིག་ཡིན། དེ་ནས་བླ་མ་ཁྱེད་ཀྱི་རྗེས་སུ་འཇུག་པའི་སློབ་མ་རྣམས་དང་ལྟ་སྤྱོད་མཐུན་པར་བྱས་ནས། བྱང་ཆུབ་ཀྱི་ལམ་བསྒྲུབ་བསམ་པ་དེ་དགེ་འདུན་པ་ལ་གྲོགས་ཀྱི་འདུ་ཤེས་བཞག་ནས་སྐྱབས་སུ་འགྲོ་བ་སྟེ། སྤྱི་ཁྱབ་ཀྱི་སྐྱབས་འགྲོ་དང་ཁོག་འདྲ་བ་ཡིན་པ་ལ་ད་རེས་བླ་མ་ཁོ་ནར་བརྟེན་ནས་སྐྱབས་སུ་འགྲོ་བ་ཡིན་ཞེས་གསུངས།

མགོན་པོ་ཁྱེད་དང་སྐལ་བ་མཉམ་པར་གྱུར་གྱི་བར་དུ་འབད་པར་བྱ་སྙམ་དུ།

ཞེས་དེ་ལྟ་བུའི་སྟོན་པ་ལམ་གྲོགས་ཀྱི་ཚུལ་དུ་ལམ་ཡང་དག་པ་ཞིག་བསྒྲུབས་པ་དེ་རྒྱུའི་སྐྱབས་འགྲོ་ཡིན། མགོན་པོ་འཇམ་དཔལ་དབྱངས་དང་དབྱེར་མེད་པ་དྲིན་ཆེན་རྩ་བའི་བླ་མ་ཁྱེད་ཀྱི་གོ་འཕང་མ་ཐོབ་བར་སྒྲུབ་བསམ་པ་དེ་ནི་འབྲས་བུའི་སྐྱབས་འགྲོ་ཡིན། དེ་འདྲའི་དམ་བཅའ་དེ་རྒྱུད་ལ་བསྟེན་དགོས་གསུངས།

དམ་བཅའ་བ་མདོ་དང་ཐུན་མོང་དང་།

ཞེས་དེ་ལྟར་རྒྱུའི་སྐྱབས་འགྲོ་དང་འབྲས་བུའི་སྐྱབས་འགྲོ་གཉིས་ཀྱི་ཚུལ་གྱིས་སྐྱབས་སུ་འགྲོ་བ་དེ་ནི་མདོ་ཕར་ཕྱིན་ཐེག་པ་དང་འདྲ་བར་ཐུན་མོང་ཡིན་པར་གསུངས།

རང་རིག་ཀ་དག་ཆེན་པོ་ངེས་དོན་འཇམ་དཔལ་དཔའ་བོའི་བདག་ཉིད་དུ་ཤེས་པའི་ངང་སྐྱོང་བ་ཐུན་མིན་རང་ལམ་གྱི་སྐྱབས་འགྲོའི་འདུན་པ་དང་མ་བྲལ་བའི་ངང་ནས།

ཞེས་རང་གི་སེམས་ཉིད་ཡེ་ནས་སྐྱེ་བ་མེད་པ་སྟོང་ཉིད་ཀྱི་རང་བཞིན་ཅན་དེ་ནི། ངེས་པ་དོན་གྱི་དབང་དུ་བྱས་ན་འཇམ་དཔལ་ཡེ་ཤེས་སེམས་དཔའ་ཟེར་བ་ཡིན། དེ་ཡིན་པར་ངོ་ཤེས་ནས་རང་སེམས་རྣལ་མའི་ངང་དུ་རྩེ་གཅིག་ཏུ་མཉམ་པར་འཇོག་པ་ནི་རྫོགས་པ་ཆེན་པོ་རང་རྐང་གི་སྐྱབས་སུ་འགྲོ་ཚུལ་ཡིན་གསུངས།

གཞི་དབྱིངས་ཀ་དག་སོགས། སྐྱབས་སུ་མཆི། ཞེས་ཅི་མང་བསགས།

ཞེས་གོང་གི་སྐྱབས་འགྲོ་ཚིག་བཞི་དེ་བརྒྱ་སྟོང་ཁྲི་འབུམ་ཅི་ནུས་བསོག་དགོས། དེ་ལྟར་སྐྱབས་སུ་སོང་བའི་བསླབ་བྱ་ནི། བླ་མ་དང་དཀོན་མཆོག་གསུམ་ལ་དུས་རྒྱུན་དུ་གསོལ་བ་འདེབས་པ་ལས་མི་འདའ་བར་བྱ་བ་དང་། སེམས་ཅན་མཆོག་དམན་རབ་འབྲིང་གང་ལའང་གནོད་པའི་ལས་མི་བྱ་བ། འཕགས་པའི་དགེ་འདུན་པ་ཐམས་ཅད་ལ་དད་གུས་ཕུན་སུམ་ཚོགས་པའི་སྒོ་ནས་འགྲོག་པར་བྱ་བ་ཡིན། སྐྱབས་སུ་སོང་བའི་ཕན་ཡོན་ནི། ཚེ་འདིར་ནད་དང་། གདོན། དགྲ། གཅན་གཟན་ལ་སོགས་པའི་འཇིགས་པ་བརྒྱད་དང་བཅུ་དྲུག་སོགས་ཐམས་ཅད་ཀུན་ཀྱང་ཞི། ཕྱི་མར་ངན་སོང་གནས་གསུམ་ལ་སོགས་པའི་སྡུག་བསྔལ་ཐམས་ཅད་དང་འབྲལ་བར་འགྱུར་བར་མ་ཟད། གནས་སྐབས་སུ་ལྷ་དང་མི་ཡི་ཡུལ་དུ་ཡིད་ལ་དགའ་བ་དང་ལུས་ལ་བདེ་བ་ཇི་སྙེད་ཡོད་པ་ཐམས་ཅད་ལ་ལོངས་སྤྱད། མཐར་ཐུག་ཏུ་རྣམ་པ་ཐམས་ཅད་མཁྱེན་པ་རྫོགས་པའི་སངས་རྒྱས་བཅོམ་ལྡན་འདས་ཀྱི་གོ་འཕང་འཐོབ་པར་འགྱུར་བ་ཡང་སྐྱབས་སུ་འགྲོ་བ་འདི་ཁོ་ནར་བརྟེན་དགོས་པའི་ཕྱིར་ན། ཐམས་ཅད་ཀྱིས་འབད་པར་བྱ་དགོས་པ་ཡིན་གསུངས།

དེ་ནས་བྱང་ཆུབ་མཆོག་ཏུ་སེམས་བསྐྱེད་པའི་ཁྲིད་ནི། སླར་ཡང་སེམས་བསྐྱེད་པ་ནི།

སྡུག་བསྔལ་མུ་མཐའ་མེད་པ་ལ་ཁོར་མོར་སྤྱོད་པའི་སེམས་ཅན་རྣམས་སྡུག་བསྔལ་དེ་དང་བྲལ་ན་ཅི་མ་རུང་སྙམ་པའི་སྙིང་རྗེ་ཤུགས་དྲག་པོ་མིག་ནས་མཆི་མ་ཐོན་གྱི་བར་ལ་བསྒོམ།

ཞེས་བྱང་ཆུབ་མཆོག་ཏུ་སེམས་བསྐྱེད་པ་ཟེར་བ་དེ་ཅི་འདྲ་ཞིག་དགོས་ཟེར་ན། ནམ་མཁས་གར་ཁྱབ་ཀྱི་སེམས་ཅན་ཐམས་ཅད་ཕ་མར་མ་གྱུར་པ་གཅིག་ཀྱང་མེད། ཕ་མར་གྱུར་པའི་དུས་སུ་ད་ལྟའི་ཕ་མ་བཞིན་དུ་ཟས་ཀྱི་ཕུད་བྱིན། གོས་ཀྱི་རྩེས་གཡོགས། ཤིན་ཏུ་བྱམས་པའི་བསམ་སྦྱོར་གྱིས་སྐྱེད་བསྲིངས་པའི་དྲིན་ཆེན་ཤ་སྟག་ཡིན། དྲིན་ཆེན་དེ་དག་ཐམས་ཅད་ཀྱིས་འདོད་པ་བདེ་བ་འདོད་ཀྱང་བདེ་བའི་རྒྱུ་དགེ་བ་ནི་སྒྲུབ་མི་ཤེས། མི་འདོད་པ་དེ་སྡུག་བསྔལ་ཡིན་ཡང་སྡུག་བསྔལ་གྱི་རྒྱུ་སྲོག་གཅོད་པ་དང་མ་བྱིན་པ་ལེན་པ་སོགས་ལ་ཁོར་མོ་ཡུག་ཏུ་སྤྱད་ནས། ཞེ་ལ་འདོད་པ་དང་ལག་ལ་ལེན་པ་གཉིས་ཀ་རྒྱབ་འགལ་དུ་གྱུར་ཡོད། དེའི་ཕྱིར་ན་ཕ་མར་གྱུར་པའི་སེམས་ཅན་དེ་དག་ཐམས་ཅད་སྐྱབས་མེད་མགོན་མེད་ལོང་བ་ཐང་དཀྱིལ་དུ་ལུས་པ་འདྲ་བར་གྱུར་ཡོད་པ་རེད་བསམས་ནས་ཐམས་ཅད་ལ་སྙིང་རྗེ་བསྐྱེད་དགོས་གསུངས།

སྙིང་རྗེ་ཟེར་བ་དེ་ཅི་འདྲ་ཞིག་ལ་ཟེར་ཞེ་ན། སེམས་ཅན་ཐམས་ཅད་སྡུག་བསྔལ་དང་བྲལ་སོང་ན་སྙམ་པའི་བསམ་པ་དེ་ཡིན། དེ་ཡང་སེམས་ཅན་རེ་རེ་བཞིན་དུ་སྡུག་བསྔལ་དང་བྲལ་ན་བསམ་པ་དེ་ཡུན་ཏུ་བསྒོམས་ན། ནམ་ཞིག་སེམས་ཅན་སྡུག་བསྔལ་ཅན་ཞིག་མཐོང་ཚེ་མིག་ནས་མཆི་མ་ཤོར་ཡོང་བ་ཡིན། དེ་མ་ཡོང་གི་བར་དུ་བསྒོམ་དགོས། སྙིང་རྗེ་སྐྱེས་པའི་ཚད་ཅི་འདྲ་རེད་ཟེར་ན། ད་ལྟའི་ལུས་རྟེན་གྱི་དྲིན་ཆེན་ཕ་མ་གང་ཞིག་རྒྱལ་པོ་དབང་ཡོད་ཅིག་གིས་བཟུང་ནས། དེ་ལ་མདའ་མདུང་མཚོན་ཆ་རྣམ་པ་སྣ་ཚོགས་ཀྱིས་ངན་གསོད་བྱེད་ཀྱིན་ཡོད་ན། དེ་སྐྱོབ་པའི་ཐབས་དང་ནུས་པ་ནི་བདག་ལ་མེད་པས། དེ་ལ་ཤ་ཚ་ནས་རང་དབང་མེད་པར་མིག་ནས་མཆི་མ་ཐོན་ཡོང་བ་ལྟར། མཐའ་ཡས་པའི་སེམས་ཅན་ཐམས་ཅད་ཕ་མ་དངོས་ཀྱི་འདུ་ཤེས་མ་སྐྱེས་བར་དུ་སྙིང་རྗེ་བསྒོམ་དགོས་པ་ཡིན། དེ་ནི་སེམས་བསྐྱེད་ལ་ཟུར་གཉིས་བརྩི་རྒྱུ་ཡོད་པ་ལས་ཟུར་དང་པོ་སྙིང་རྗེས་གཞན་དོན་ལ་དམིགས་པའི་ཟུར་ཟེར་བ་དེ་ཡིན་གསུངས།

འགྲོ་ཀུན་སྒྲོལ་ནུས་པ་སངས་རྒྱས་ཀྱི་གོ་འཕང་དམ་པ་བདག་གིས་བསྒྲུབ་པར་བྱ།

ཞེས་དེ་ལྟར་བསམ་བློ་བཏང་ན། འགྲོ་བ་སེམས་ཅན་ཐམས་ཅད་སྙིང་རྗེ་ཡང་འགྲོ་ཀུན་སྒྲོལ་བའི་ནུས་པ་ནི་ད་ལྟ་བདག་ལ་མི་འདུག ད་འགྲོ་ཀུན་སྒྲོལ་ནུས་བྱེད་ཅིག་ལ་ཅི་ཡིས་དགའ་བསམས་ན་སངས་རྒྱས་ཀྱི་གོ་འཕང་ལས་གཞན་མེད། དེའི་ཕྱིར་ན་རང་གིས་སངས་རྒྱས་ཀྱི་གོ་འཕང་བསྒྲུབ་སྙམ་པ་དེ་ཤེས་རབ་རྫོགས་བྱང་ལ་དམིགས་པའི་ཟུར་ཡིན། དེ་ལྟར་སྙིང་ཐག་པ་ནས་སེམས་ཅན་ཐམས་ཅད་ཀྱི་དོན་དུ་སངས་རྒྱས་ཀྱི་གོ་འཕང་བསྒྲུབ་སྙམ་པའི་དམ་བཅའ་ཡང་དག་པ་ཞིག་རྒྱུད་ལ་སྐྱེས་ན། དེ་ནི་སྨོན་པ་བྱང་ཆུབ་མཆོག་ཏུ་སེམས་བསྐྱེད་པ་ཡིན་ཞེས་གསུངས།

དེ་ཉིད་ཡུན་རིང་པོའི་ཚེགས་ལ་མི་ལྟོས་པར་བདེ་མྱུར་དུ་འགྲུབ་པའི་ལམ་ནི་འོད་གསལ་རྫོགས་པ་ཆེན་པོ་ཁོ་ན་ཡིན་པས་ཉམས་སུ་བླང་བར་བྱའོ་སྙམ་དུ།

ཞེས་སྤྱིར་མདོ་ཕར་ཕྱིན་ཐེག་པ་ལ་སོགས་པའི་ལམ་ཉམས་སུ་བླངས་ན་ཡུན་རིང་པོ་ཞིག་ནས་སངས་རྒྱས་ཀྱི་གོ་འཕང་འཐོབ་རྒྱུ་ཡོད་ཀྱང་། དེ་དང་མི་འདྲ་བར་མྱུར་བ་ཉིད་དུ་སྟེ་ཟླ་བ་ཁ་ཤས་ཀྱིས་སངས་རྒྱས་ཀྱི་གོ་འཕང་འགྲུབ་པར་བྱེད་པའི་ཐབས་ནི་འོད་གསལ་རྫོགས་པ་ཆེན་པོ་ཡིན། དེའི་ཕྱིར་ན་རང་གིས་འོད་གསལ་རྫོགས་པ་ཆེན་པོའི་ལམ་དེ་ཉམས་སུ་བླང་བར་བྱ་སྙམ་པ་དེ་འཇུག་པ་སེམས་བསྐྱེད་ཡིན་གསུངས།

མཐའ་གྲོལ་ཅོག་གཞག་གི་ངང་ལ་གནས་བཞིན་དུ། གློ་བུར་འཁྲུལ་སྣང་སོགས། སེམས་བསྐྱེད་དོ། །ཞེས་ཅི་མང་བསགས་མཐར།

ཞེས་རྫོགས་པ་ཆེན་པོའི་ལམ་ཉམས་སུ་ལེན་བསམ་པ་ཙམ་གྱིས་མི་ཆོག་པར་མཐའ་གྲོལ་ཅོག་གཞག་གི་ངང་དུ་འཇོག་དགོས། འཇོག་བཞིན་དུ་གཞི་དབྱིངས་ཀ་དག་ཅེས་པའི་གཞུང་གི་སེམས་བསྐྱེད་ཀྱི་ཚིག་དེ་ཡང་བརྒྱ་སྟོང་ཁྲི་འབུམ་གྱི་བར་དུ་བསོག་དགོས་གསུངས།

སྐྱབས་ཡུལ་གྱི་ཐུགས་ཀ་ནས་འོད་ཟེར་དཔག་ཏུ་མེད་པ་འཕྲོས། རང་དང་སེམས་ཅན་རྣམས་ལ་ཕོག སྡིག་སྒྲིབ་ཐམས་ཅད་ལྷག་མེད་དུ་སྦྱངས། རང་ལུས་ཀྱང་འོད་དུ་ཡལ་ཏེ་སྐྱབས་ཡུལ་ལ་ཐིམ་པར་བསམས་ལ་འཛིན་མེད་དུ་མཉམ་པར་གཞག་གོ །

ཞེས་དེ་ནས་སྐྱབས་འགྲོ་དང་སེམས་བསྐྱེད་གང་ཡིན་ཡང་རྗེས་སུ་སྐྱབས་ཡུལ་གྱི་ཐུགས་ཀ་ནས་འོད་ཟེར་འཕྲོས་ཏེ། རང་དང་སེམས་ཅན་ཐམས་ཅད་ལ་ཕོག་པས་སྡིག་སྒྲིབ་ཐམས་ཅད་དག མཐར་རང་དང་སེམས་ཅན་ཐམས་ཅད་ཀུན་ཀྱང་འོད་དུ་ཞུ་ནས་བླ་མའི་ཐུགས་ཀར་ཐིམ་སོང་བར་བསམས་ནས་འཛིན་མེད་ཀྱི་ངང་དུ་མཉམ་པར་གཞག མཐར་དགེ་རྩ་བྱང་ཆུབ་ཏུ་བསྔོ་བ་དེ་ནི་སྐྱབས་འགྲོ་དང་སེམས་བསྐྱེད་གང་ཡིན་ཡང་རྗེས་སུ་ཐུན་འཇོག་རན་ཁར་དེ་ལྟར་བསྔོ་དགོས།

སྐྱབས་སུ་འགྲོ་བ་དང་སེམས་བསྐྱེད་ཀྱི་སྡོམ་པ་ནི། དོ་ཞག་དབང་སྐུར་བའི་དུས་སུ་ཐོབ་ཚར་བ་ཡིན། དེའི་རྗེས་སུ་ཡང་སྐྱབས་འགྲོ་དང་སེམས་བསྐྱེད་བརྒྱ་སྟོང་ཁྲི་འབུམ་མང་པོ་གསོག་དུས། སྔོན་ཆད་བདག་ལ་དབང་བསྐུར་བའི་སྐབས་སུ་སྡོམ་པ་ཐོབ་ཡོད་སྙམ་པའི་བསམ་པ་རེ་རྒྱུད་ལ་སྐྱེ་དགོས། བྱང་ཆུབ་སེམས་ཀྱི་སྡོམ་པ་ཐོབ་དུས་བསླབ་བྱ་ལ་སྤྱིར་མང་པོ་ཡོད་ཀྱང་། མདོར་བསྡུས་ན་ཚད་མེད་པ་བཞི་ལ་དུས་རྟག་ཏུ་གོམས་པར་བྱེད་པ་འདིའི་ནང་དུ་འདུ་བ་ཡིན།

ཚད་མེད་པ་བཞི་གང་ཡིན་ཞེ་ན། སེམས་ཅན་ཐམས་ཅད་ཀྱི་སེམས་ལ་དགའ་བ་དང་ལུས་ལ་བདེ་བ་ཐོབ་སོང་ན་སྙམ་པའི་བསམ་པ་རྒྱུད་ལ་སྐྱེས་པ་ལ་བྱམས་པ་ཟེར། སེམས་ཅན་ཐམས་ཅད་ཀྱི་ལུས་ལ་ན་ཚ་དང་སེམས་ལ་སྡུག་བསྔལ་སོགས་མི་འདོད་པ་གང་ཡང་མ་བྱུང་ན་སྙམ་པ་དེར་སྙིང་རྗེ་ཟེར། སེམས་ཅན་ཐམས་ཅད་བདེ་སྐྱིད་ཕུན་སུམ་ཚོགས་པ་དང་ལྡན་པ་དེ་ལ་སྙིང་ཐག་པ་ནས་དགའ་བ་སྐྱེས་པ་ལ་དགའ་བ་ཟེར། དེ་ནས་རང་གི་ཉེ་རིང་རྩ་གསུམ་ལ་ཆགས་པ་དང་གཞན་དགྲ་བོ་སོགས་ལ་སྡང་བ་མེད་པར། ཐམས་ཅད་མཉམ་པར་བདེ་བ་དང་ལྡན་ལ་སྡུག་བསྔལ་དང་བྲལ་ན་སྙམ་པ་དེ་ལ་བཏང་སྙོམས་ཟེར། དེ་ལྟ་བུའི་བསམ་པ་ལ་ཉིན་མཚན་དུས་དྲུག་ཏུ་སྒོམ་པར་བྱེད་པ་ནི་རྩ་བ་ཡིན།

སྐྱབས་སུ་འགྲོ་བ་དང་སེམས་བསྐྱེད་པ་གཉིས་ཆར་གྱི་སྡོམ་པ་གཏོང་བྱེད་ཅིག་ཡོད་པས་དེ་ལ་ནི་གཟབ་གཟབ་བྱ་དགོས། སྐྱབས་འགྲོའི་སྡོམ་པ་དེ་ཅི་ཞིག་གིས་གཏོང་བ་ཡིན་ཞེ་ན། གང་ཟག་སུ་ཡིན་ཡང་། བདག་ནི་ནང་པ་སངས་རྒྱས་པ་མིན། དཀོན་མཆོག་གསུམ་ལ་སྐྱབས་སུ་མི་འགྲོ། དམ་པའི་ཆོས་ཀྱང་ཉམས་སུ་མི་ལེན་བསམ་ནས་དཀོན་མཆོག་གསུམ་ལ་རྒྱབ་འགལ་གྱི་ལས་དེ་དངོས་སུ་བསྒྲུབས་པའམ་སེམས་ཀྱིས་བསམས་ནའང་འདྲ། དུས་དེ་ནས་བཟུང་སྟེ་སྐྱབས་འགྲོའི་སྡོམ་པ་དེ་ཉམས་འགྲོ་བ་ཡིན། སྐྱབས་འགྲོའི་སྡོམ་པ་དེ་ཉམས་སོང་ན་ཉེས་པ་ཅི་ཞིག་ཡོད་ཟེར་ན། སྐྱབས་འགྲོའི་སྡོམ་པ་ཉམས་པའི་གང་ཟག་དེར་ངན་སོང་གནས་གསུམ་མ་གཏོགས་མཐོ་རིས་ལྷ་མིའི་གོ་འཕང་ཡང་རྩ་བ་ནས་འཐོབ་མི་ཐུབ་པའི་ཉེས་པ་ཚད་མེད་པ་ཡོད་གསུངས།

བྱང་ཆུབ་སེམས་ཀྱི་སྡོམ་པ་ཉམས་བྱེད་ཀྱི་རྒྱུ་གང་ཡིན་ཞེ་ན། རང་གིས་སེམས་ཅན་ཐམས་ཅད་བདེ་བ་ལ་དགོད་ཐུབ་ཀྱང་མི་འགོད་སྙམ་པ་དང་། སེམས་ཅན་ཐམས་ཅད་ལ་སྙིང་ཐག་པ་ནས་སྡུག་བསྔལ་དང་ལྡན་ན་བསམ་པའམ་སྡུག་བསྔལ་ལ་སྦྱོར་བར་བྱེད་པ་རྣམས་ཀྱིས་བྱང་ཆུབ་སེམས་དཔའི་བསླབ་པ་དེ་ཉམས་པར་འགྱུར་བ་ཡིན། བྱང་ཆུབ་སེམས་ཀྱི་སྡོམ་པ་ཉམས་པར་གྱུར་ན་རང་གཅིག་པུའི་རྒྱུད་ཀྱི་དགེ་བ་ཉམས་པས་མི་ཚད། མཐའ་ཡས་པའི་སེམས་ཅན་ཐམས་ཅད་ལ་ཕན་བདེ་སྒྲུབ་པའི་སྤྱོད་པ་ལས་ཉམས་སོང་བ་ཡིན་པས། སྡིག་པ་དེ་ནི་འཇིག་རྟེན་ཁམས་ཀྱི་སྡིག་པ་གཞན་གང་གིས་ཀྱང་འགྲན་དུ་མེད་པའི་སྡིག་པ་ཚབས་ཆེན་ཡིན། རྣམ་སྨིན་ཡང་ཤིན་ཏུ་ལྕི་བ། ཡུན་རིང་པོའི་བར་དུ་འཁོར་བའི་གནས་སུ་འཁོར་བྱེད་དང་སྡུག་བསྔལ་མི་བཟད་པ་མྱོང་བྱེད་ཡིན།

དེ་ནས་བྱང་ཆུབ་སེམས་ཀྱི་ཕན་ཡོན་དེ་ཡང་མདོར་བསྡུས་ཏེ་ཚིག་ཁ་ཤས་ཀྱིས་ཞུས་ན། དེ་བཞིན་གཤེགས་པས་ཆོས་ཀྱི་སྒོ་མོ་བརྒྱད་ཁྲི་བཞི་སྟོང་གསུངས་ཀྱང་། དེ་ཐམས་ཅད་ཀྱི་ནང་ནས་ཟབ་པ་མཐར་ཐུག་པ་དེ་ནི་བྱང་ཆུབ་ཀྱི་སེམས་བསྒོམ་པ་འདི་ཁོ་ན་ཡིན། བྱང་ཆུབ་ཀྱི་སེམས་དེ་རྒྱུད་ལ་སྐྱེས་པར་གྱུར་ན། འཁོར་བའི་གནས་ཀྱི་ལུས་དང་སེམས་ཀྱི་སྡུག་བསྔལ་ཐམས་ཅད་ཀུན་ཀྱང་ཡོངས་སུ་ཞི་བར་འགྱུར་བ་དང་། བདེ་བ་དང་དགའ་བ། ཡོན་ཏན་དཔག་ཏུ་མེད་པ་ཡང་དེ་མ་ཐག་ཏུ་འབྱུང་བར་འགྱུར་བ་ཡིན་པའི་ཕྱིར་ན། གཞན་གང་གིས་ཀྱང་འགྲན་དུ་མེད་པའི་ཡོན་ཏན་ཚད་མེད་པ་ཡོད།

བྱང་ཆུབ་ཀྱི་སེམས་འདི་ཉིད་རྒྱུད་ལ་སྐྱེས་པ་ཙམ་གྱི་མོད་ལ་གང་དེའི་མིང་ལའང་བྱང་ཆུབ་སེམས་དཔའ་ཟེར། དོན་གྱི་ངོས་ནས་བསམ་བློ་བཏང་ན་ཡང་། བྱང་ཆུབ་སེམས་དཔའ་དེ་དངོས་སུ་བཞུགས་ན་འཇིག་རྟེན་གྱི་ལྷའི་དབང་པོ་བརྒྱ་བྱིན་དང་ཚངས་པ། གནོད་སྦྱིན་ལ་སོགས་མངོན་ཤེས་དང་ལྡན་པ་ཐམས་ཅད་ཀྱིས་ཕྱག་འཚལ་བ་སྨོས་མ་དགོས། ཐ་ན་བྱང་ཆུབ་སེམས་དཔས་ཞབས་རྐང་གིས་བཅགས་པའི་སའི་རྡུལ་ལ་ཡང་སྤྱི་བོའི་གཙུག་ཏུ་མཆོད་པར་བྱེད་པ་ཡིན།

བྱང་ཆུབ་སེམས་ཀྱིས་མ་ཟིན་པའི་ལུས་ཀྱིས་ཕྱག་འཚལ་བ་དང་སྐོར་བ་བྱེད་པ། ངག་གིས་ཁ་ཏོན་བཟླས་བརྗོད་ལ་སོགས་པ་བྱས་པའི་དགེ་རྩ་རྣམས་ནི་ཁོང་ཁྲོ་ངན་པ་སྐྱེས་ན་ཟད་པར་འགྱུར་ཀྱང་། བྱང་ཆུབ་སེམས་ཀྱིས་ཟིན་ནས་བཟུང་སྟེ་ཁོང་ཁྲོ་ལ་སོགས་པ་གཞན་གང་གིས་ཀྱང་གནོད་པ་མི་ཚུགས་པར་དགེ་བ་དེ་གོང་ནས་གོང་དུ་འཕེལ་བར་འགྱུར། བྱང་ཆུབ་སེམས་ཀྱིས་མ་ཟིན་ན་དགེ་བ་རང་གི་ཚོད་ཀྱི་འབྲས་བུ་ཞིག་སྨིན་ཡང་། འབྲས་བུ་དེ་ལན་གཅིག་སྨིན་ནས་ཟད་པར་འགྱུར་བ་ཡིན། དཔེར་ན་མ་ཎི་ཚིག་གཅིག་མ་གཏོགས་མ་བཏོན་ཀྱང་། བྱང་ཆུབ་སེམས་ཀྱིས་ཟིན་པའི་དགེ་རྩ་ནི་གནས་སྐབས་སུ་མིའི་གནས་སུ་འཁོར་ལོས་བསྒྱུར་བའི་རྒྱལ་པོ་དང་། ལྷའི་གནས་སུ་ཚངས་པ་དང་བརྒྱ་བྱིན་ལ་སོགས་པའི་སྐྱེ་བ་མང་དུ་བླངས། དེར་མ་ཟད་རྣམ་པ་ཐམས་ཅད་མཁྱེན་པ་རྫོགས་པའི་སངས་རྒྱས་བཅོམ་ལྡན་འདས་ཀྱི་གོ་འཕང་ཡང་འཐོབ་པར་འགྱུར་བ་ཡིན།

བྱང་ཆུབ་ཀྱི་སེམས་རྒྱུད་ལ་སྐྱེས་ན་རང་གའི་སྡིག་པ་ཆུང་ངུ་དག་ནི་རྩ་བ་ནས་འདག་པར་འགྱུར་བ་མ་ཟད། སྡིག་པ་ཆེན་པོ་ཕ་བསད་པ་དང་མ་བསད་པ་ལྟ་བུ་ངན་སོང་གི་གནས་སུ་སྐྱེ་ངེས་ཀྱི་ལས་ཡིན་ཡང་། སེ་གོལ་རྡེབ་ཡུན་ཙམ་མ་གཏོགས་ངན་སོང་གི་སྡུག་བསྔལ་མྱོང་མི་དགོས་པར་ཐར་བར་འགྱུར་བ་སོགས་ཕན་ཡོན་དཔག་ཏུ་མེད་པ་ཡོད། དེས་ན་འདས་མ་འོངས་ད་ལྟ་དུས་གསུམ་གྱི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་གཤེགས་ཤིང་འབྱོན་པར་འགྱུར་བའི་ལམ་མམ། ཐམས་ཅད་ཀྱི་ཉམས་སུ་བླང་བྱ་མཐར་ཐུག་པ་ནི་བྱང་ཆུབ་ཀྱི་སེམས་འདི་ཁོ་ན་ཡིན། འདི་ལ་བརྟེན་ནས་སངས་རྒྱས་དང་བྱང་ཆུབ་སེམས་དཔའི་གོ་འཕང་འཐོབ་པར་འགྱུར་བ་ཡིན། བྱང་ཆུབ་ཀྱི་སེམས་འདི་ཉིད་མེད་ན་དེ་དག་གི་གོ་འཕང་ཐོབ་པའི་རྒྱུ་རྩ་བ་ནས་ཡོད་པ་མིན།

རང་རེ་རྣམས་ཀྱིས་བླ་མ་བཟང་པོ་དང་བླ་མ་ངན་པ་ཟེར་བ་དེ་ཡང་། གང་ལ་བྱང་ཆུབ་ཀྱི་སེམས་འདི་ཉིད་ཐུགས་རྒྱུད་དུ་ཡོད་ན་དེ་བླ་མ་བཟང་པོ་ཡིན། བྱང་ཆུབ་ཀྱི་སེམས་འདི་ཉིད་རྩ་བ་ནས་མེད་པ་ཞིག་ཡིན་ན་དེ་ལ་བླ་མ་སྡུག་པོ་ཟེར། བླ་མ་བཟང་མི་བཟང་ཟེར་བ་འདི་ཡང་བྱང་ཆུབ་ཀྱི་སེམས་འདི་ཡོད་མེད་ཁོ་ནས་ཕྱེ་དགོས་པ་ཡིན། བྱང་ཆུབ་ཀྱི་སེམས་ཐུགས་རྒྱུད་ན་ཡོད་པའི་བྱང་ཆུབ་སེམས་དཔའ་ཁོང་རང་བདེ་ཞིང་སྐྱིད་པ་ཡིན་པ་བཤད་མི་དགོས་ཀྱང་། དེར་མ་ཟད་དེ་ཉིད་གང་དུ་བཞུགས་པའི་ཡུལ་ཁམས་ཀུན་ཏུ་བདེ་ཞིང་སྐྱིད་པར་འགྱུར་བའི་ཕན་ཡོན་ཡོད། དེར་བརྟེན་པའི་སེམས་ཅན་ཐམས་ཅད་ལ་བདེ་སྐྱིད་དང་སངས་རྒྱས་ཀྱི་ལུང་དང་རྟོགས་པའི་བསྟན་པ་རིན་པོ་ཆེ་ཡང་རང་ཤུགས་ཀྱིས་དར་ཞིང་རྒྱས་པར་འགྱུར་བ་ཡིན། དཔེར་ན་ཉི་མ་ཤར་ན་མུན་པ་རང་ཤུགས་ཀྱིས་དེངས་ནས་འོད་སྣང་གསལ་ཡོང་བ་ལྟ་བུ་ཡིན་གསུངས།

དེ་དག་གིས་བྱང་ཆུབ་སེམས་ཀྱི་ངོ་བོ་དང་། བསླབ་བྱ། སྡོམ་པ་ཉམས་བྱེད་ཀྱི་རྒྱུ། ཕན་ཡོན་ལ་སོགས་པ་ཐམས་ཅད་ཅུང་ཟད་རྒྱས་པའི་ཚུལ་དུ་བཤད་བ་ཡིན།

དེ་བཤད་དགོས་པའི་རྒྱུ་མཚན་ནི། འུ་ཅག་གི་ལས་རིམ་ནང་དུ་བྱང་ཆུབ་སེམས་ཀྱི་ཁྲིད་དེ་ལས་རིམ་གཅིག་ལ་བཞག་འདུག་ཀྱང་། ཁ་སང་ཉིན་དང་པོའི་སྐབས་གཙོ་བོ་བདེན་བཞིའི་ཆོས་ཁྲིད་བཤད་ནས་དུས་ཚོད་ཀྱི་ཁ་གང་སོང་བས། བྱང་ཆུབ་སེམས་ཀྱི་ཕན་ཡོན་དང་བསླབ་བྱ་ལ་སོགས་པ་རྒྱ་ཆེར་བཤད་ཁོམ་མ་སོང་། དེ་རྗེས་ཀྱང་ཁྲིད་ཡིག་སངས་རྒྱས་ལག་སྟེར་ལ་སོགས་པའི་ཁྲིད་ཀྱིས་དུས་ཚོད་རྫོགས་སོང་བས་ཁྱེད་རྣམ་པའི་ཐུགས་བཞེད་དེ་བསྐངས་མ་ཐུབ། དེས་ན་དེ་རིང་གི་སྐབས་འདིར་ཧ་ཅང་བདེ་མོ་རེད་བསམས་ནས་རྒྱས་སྤྲོས་ཀྱི་ཚུལ་དུ་ཅུང་ཟད་ཞུས་པ་ཡིན།

བླ་མའི་རྣལ་འབྱོར་ནི་བླ་མ་སྔར་ལྟར་དུ་གསལ་ལ།

ཞེས་བླ་མའི་རྣལ་འབྱོར་གྱི་ཁྲིད་ནི། སྔར་སྐྱབས་འགྲོའི་ཚོགས་ཞིང་གི་སྐབས་སུ་བཤད་པ་བཞིན་དུ་མདུན་གྱི་ནམ་མཁའ་ལ་བསྒོམ་དགོས་གསུངས།

ད་ནས་ཚེ་རབས་ཀུན་ཏུ་སྐྱབས་གནས་ཀུན་འདུས་དྲིན་ཆེན་རྩ་བའི་བླ་མ་ཁྱེད་ལས་གཞན་པའི་རེ་ས་རྨི་ལམ་དུ་ཡང་མི་འཚོལ།

ཞེས་དུས་ད་ནས་བྱང་ཆུབ་སྙིང་པོ་མ་ཐོབ་ཀྱི་བར་དུ། བླ་མ་ཁྱེད་ཁོ་ན་མ་གཏོགས་སྐྱབས་དང་སྐྱོབ་པ་མགོན་དང་དཔུང་གཉེན་རྨི་ལམ་དུ་ཡང་མི་འཚོལ་བསམ་པ་དེ་བླ་མའི་སྐུ་ལ་སངས་རྒྱས་ཀྱི་འདུ་ཤེས་བཞག་སྟེ་སྐྱབས་སུ་འགྲོ་བ་ཡིན་གསུངས།

ཁྱེད་ཁོ་ན་སྐྱབས་གནས་སུ་བསྟེན་ནས་ལུས་ལོངས་སྤྱོད་དུས་གསུམ་གྱི་དགེ་བ་མཐའ་དག་ཁྱེད་ལ་འབུལ།

ཞེས་དྲིན་ཆེན་རྩ་བའི་བླ་མ་ཁྱེད་ཁོ་ན་སྐྱབས་གནས་སུ་བསྟེན། རང་གི་གཅེས་པར་འཛིན་ཞིང་སེམས་ཀྱིས་རྩ་བ་ནས་གཏོང་མི་ཐུབ་པ་དེ་གང་ཡིན་ན་རང་གི་ལུས་པོ་འདི་ཡིན། དྲིན་ཆེན་རྩ་བའི་བླ་མ་ཁྱེད་ལ་རང་གི་ལུས་པོ་འདི་ཡང་འབུལ། དེ་ནས་གཅེས་རྒྱུ་དམར་རྒྱུ་དེ་རང་གི་རྒྱུ་རྫས་ལོངས་སྤྱོད་ཡིན། ལོངས་སྤྱོད་དེ་ཡང་རྩ་བའི་བླ་མ་ཁྱེད་ལ་འབུལ། དེ་རྗེས་ཆགས་ཤིང་ཞེན་འདུག་ས་དེ་རང་གི་དུས་གསུམ་གྱི་དགེ་རྩ་ཅུང་ཟད་བསགས་པ་དེ་ཡིན། དུས་གསུམ་གྱི་དགེ་རྩ་ཡང་ཁྱེད་ལ་འབུལ་ཞེས་བདག་ཏུ་འཛིན་པའི་གཞི་གསུམ་པོ་ཁྱེད་ལ་འབུལ་བ་ཡིན། དེ་རྣམས་ཀྱིས་གཙོ་བོ་བྱས་ནས་འཇིག་རྟེན་གྱི་ཁམས་འདི་ན། བདག་ཏུ་བཟུང་བ་དང་མ་བཟུང་བའི་ཡིད་འོང་གི་དངོས་པོ་ཡོད་ཚད་ཐམས་ཅད་ཀྱང་དྲིན་ཆེན་རྩ་བའི་བླ་མ་ཁྱེད་ལ་འབུལ་བསམ་ནས། དངོས་སུ་ཡང་ཡོན་ཆབ་བཤམས་པ་དང་། མར་མེ་འབུལ་བ། བདུག་སྤོས་བདུགས་པ་སོགས་མཆོད་པ་འབུལ་རྒྱུ་དེ་ནི་གཙོ་བོ་བླ་རྣམ་དང་འབྲེལ་བའི་མཎྜལ་གྱི་ཁྲིད་ཡིན་གསུངས།

ཐོག་མེད་ནས་བསགས་པའི་སྡིག་ལྟུང་མ་ལུས་པ་མཐོལ་ཞིང་བཤགས་ན།

ཞེས་ཚེ་རབས་འཁོར་བ་ཐོག་མ་མེད་པའི་དུས་ནས་ད་ལ་མ་ཐུག་གི་བར་དུ། སེམས་ཉོན་མོངས་པ་འདོད་ཆགས་ཞེ་སྡང་གཏི་མུག་གི་དབང་གིས་མི་དགེ་བ་ཇི་སྙེད་ཅིག་བསགས་པ་ཐམས་ཅད་བློ་ཡུལ་དུ་བླངས་ནས། རྒྱལ་བ་སྲས་བཅས་ཐམས་ཅད་ལ་མཐོལ་ཞིང་། སྔར་བྱས་ཀྱི་སྡིག་པ་ལ་འགྱོད་པ་སྐྱེས། ཕྱིན་ཆད་མི་བྱ་སྙམ་པའི་དམ་བཅའ་བཞག་ནས་ཡོངས་སུ་བཤགས་པའི་གཉེན་པོ་སྟོབས་བཞི་ཚང་བའི་སྒོ་ནས་བཤགས། དེ་ལྟར་ཡོངས་སུ་བཤགས་པར་བྱེད་པ་དེ་ནི་བླ་རྣམ་ལ་བརྟེན་ནས་སྒྲིབ་སྦྱོང་གི་ཁྲིད་ཡིན་གསུངས།

བདག་གི་རྒྱུད་སྨིན་ཅིང་གྲོལ་བར་མཛད་དུ་གསོལ། འོད་གསལ་རྫོགས་པ་ཆེན་པོའི་ལམ་མཐར་ཕྱིན་ཏེ་འདྲེན་མཆོག་ཁྱེད་ཀྱི་གོ་འཕང་འཐོབ་པར་བྱིན་གྱིས་བརླབ་ཏུ་གསོལ་སྙམ་དུ།

ཞེས་འོད་གསལ་རྫོགས་པ་ཆེན་པོའི་ལམ་ཟབ་མོས་དང་པོ་རང་གི་རྒྱུད་མ་སྨིན་པ་དེ་དབང་གིས་སྨིན་པར་བྱས། མ་གྲོལ་བ་དེ་གདམས་ངག་གིས་གྲོལ་བར་བྱས། འོད་གསལ་རྫོགས་པ་ཆེན་པོའི་ཀ་དག་ཁྲེགས་ཆོད་དང་ལྷུན་གྲུབ་ཐོད་རྒལ་གྱི་ལམ་དེ་མཐར་ཕྱིན་ནས། མཐར་ཐུག་དྲིན་ཆེན་བླ་མ་ཁྱེད་དང་སྐལ་བ་མཉམ་པའམ་ཁྱེད་ཀྱི་གོ་འཕང་འཐོབ་པར་བྱིན་གྱིས་བརླབ་ཏུ་གསོལ་སྙམ་ནས་གདུང་ཤུགས་དྲག་པོས་འོག་ནས་འབྱུང་བའི་གསོལ་འདེབས་འདི་གདོན་དགོས་གསུངས།

གཞོན་ནུའི་སྐུ་ལུས་འཆང་བ་པོ། །ཡེ་ཤེས་སྒྲོན་མེས་རབ་ཏུ་བརྒྱན། །

འཇིག་རྟེན་གཏི་མུག་མུན་སེལ་བ། །འཇམ་པའི་དབྱངས་ལ་གསོལ་བ་འདེབས། །

ཞེས་རྩེ་གཅིག་ཏུ་གསོལ་བ་བཏབ་མཐར།

ཞེས་མགོན་པོ་འཇམ་པའི་དབྱངས་ཁྱེད་ནི་ཕར་ལྟར་སྣང་ལ་ལོ་བཅུ་དྲུག་ལོན་པའི་ན་ཚོད་ཅན་གྱི་གཞོན་ནུའི་སྐུ་ལུས་འཆང་བ་དང་། སངས་རྒྱས་ཀྱི་ཐུགས་རྣམ་པར་མི་རྟོག་པའི་ཡེ་ཤེས་ཀྱི་སྒྲོན་མེས་རབ་ཏུ་བརྒྱན་པ། འཇིག་རྟེན་པ་ཐམས་ཅད་ཀྱི་རྒྱུད་ཀྱི་མ་རྟོགས་ལོག་རྟོག་ཐེ་ཚོམ་གྱི་མུན་པ་ཐམས་ཅད་སེལ་བར་བྱེད་པ། མགོན་པོ་འཇམ་པའི་དབྱངས་ཁྱེད་ལ་གསོལ་བ་འདེབས་སོ་བདག་གི་རྒྱུད་བྱིན་གྱིས་བརླབ་པར་མཛད་དུ་གསོལ་ཟེར་ནས་ཚིགས་བཅད་དེ་བརྒྱ་སྟོང་ཁྲི་འབུམ་གྱི་བར་དུ་ཅི་ནུས་སུ་བསོག་དགོས་གསུངས།

བླ་མའི་གནས་གསུམ་ལས་འོད་ཟེར་དཀར་དམར་མཐིང་གསུམ་བྱུང་། རང་གི་གནས་གསུམ་དུ་ཐིམ་པས་སྒོ་གསུམ་གྱི་སྒྲིབ་པ་དག སྐུ་གསུང་ཐུགས་ཀྱི་ཡོན་ཏན་མཐའ་དག་མངོན་དུ་གྱུར། མཐར་བླ་མའང་འོད་དུ་ཞུ་ནས་རང་ལ་ཐིམ་པར་བསམས་ལ་བློ་འདས་གཉུག་མའི་ངང་དུ་མཉམ་པར་གཞག

ཅེས་ཐུན་འཇོག་རན་ཁར་བླ་མའི་སྤྱི་བོའམ་དཔྲལ་བ་ལས་འོད་ཟེར་དཀར་པོ་བྱུང་། མགྲིན་པ་ལས་འོད་ཟེར་དམར་པོ་བྱུང་། སྙིང་ཁ་ལས་འོད་ཟེར་མཐིང་ག་བྱུང་སྟེ། རང་གི་དཔྲལ་བ་མགྲིན་པ་སྙིང་ཁ་གསུམ་ལ་ཐིམ་པའི་སྟོབས་ཀྱིས་རང་གི་ལུས་ངག་ཡིད་གསུམ་གྱི་སྒྲིབ་པ་དག བླ་མའི་སྐུ་གསུང་ཐུགས་གསུམ་གྱི་ཡོན་ཏན་ཐམས་ཅད་རང་ལ་ཐོབ། དེའི་རྗེས་སུ་བླ་མ་ཡང་འོད་ཀྱི་གོང་བུ་གཅིག་ཏུ་གྱུར་ནས་རང་གི་སྤྱི་བོ་ནས་མར་ཞུགས་ཏེ་སྙིང་དབུས་སུ་ཐིམ་པས། བླ་མའི་ཐུགས་དང་རང་སེམས་དབྱེར་མེད་པའི་ངང་ལ་ཅི་གནས་སུ་འཇོག་དགོས་གསུངས།

སླར་དེ་ལས་ལྡང་བ་ན་སྣང་སྲིད་བླ་མའི་ངོ་བོར་མོས་ལ། དགེ་རྩ་བྱང་ཆུབ་ཏུ་བསྔོ་བར་བྱའོ། །

ཞེས་ཅི་གནས་སུ་བཞག སླར་ཡང་ཏིང་ངེ་འཛིན་དེ་ཡི་ངང་ལས་ལྡང་བ་ན་སྣང་སྲིད་ཐམས་ཅད་བླ་མ་ཡིན་པར་བསམ། ཕྱི་སྣོད་ཀྱི་འཇིག་རྟེན་ཡང་བླ་མ་ཡིན། ནང་བཅུད་ཀྱི་སེམས་ཅན་ཡང་བླ་མའི་རྣམ་རོལ་ཡིན་བསམས་ནས་དག་སྣང་འབའ་ཞིག་གི་ངང་དགེ་རྩ་བྱང་ཆུབ་ཏུ་བསྔོ་དགོས་གསུངས།

དེ་ནས་རྫོགས་རིམ་ནི། རང་ལུས་ཐ་མལ་དུ་གནས་པའི་དབུས་དྲང་པོར་དབུ་མ་སྔོ་བསངས་མདའ་སྨྱུག་ཙམ་ཡར་སྣེ་སྤྱི་བོ་དང་མར་སྣེ་ལྟེ་འོག་ཏུ་ཟུམ་པ།

ཞེས་རྫོགས་རིམ་གྱི་ཁྲིད་ནི། དང་པོ་རང་གི་ལུས་དེ་ལྷ་སྐུ་ལྟ་བུར་གསལ་མི་དགོས་པར། རང་གི་ལུས་དེ་ཅི་འདྲ་ཡིན་པ་དེ་འདྲ་ཞིག་སྒོམ་རྒྱུ་དེར་རང་ལུས་ཐ་མལ་དུ་གནས་པ་ཟེར། དེའི་དབུས་སུ་ཡ་ཡོ་འཁྱག་འཁྱོག་མེད་པར་དྲང་པོར་གནས་ཡོད་པ་དེ་ལ་རྩ་དབུ་མ་ཟེར། དེ་མདོག་སྔོ་མདངས་ཅན་དང་སྦོམ་ཕྲ་མདའ་སྨྱུག་ཙམ་མམ་རང་གི་སྲིན་མཛུབ་ཀྱི་ཚད་ཙམ་ཞིག་བསྒོམ། དེའི་ཡར་སྣེ་སྤྱི་བོར་ཁ་ཕྱེས་ཡོད་པ་དང་། མར་སྣེ་ལྟེ་འོག་ན་ཚུར་ཁ་ཟུམ་ཡོད་པ་དེ་འདྲ་ཞིག་བསྒོམ་དགོས་གསུངས།

གཡས་སུ་རོ་མ་དམར་པོ་དང་གཡོན་དུ་རྐྱང་མ་དཀར་པོ་མར་སྣེ་དབུ་མ་དང་ཡི་གེ་ཆ་ཡི་དབྱིབས་སུ་འབྲེལ། ཡར་སྣེ་སྣ་བུག་གཉིས་ལ་ཟུག་པར་བསྒོམས་ལ་རླུང་རོ་བསལ།

ཞེས་གཡས་སུ་རོ་མ་དམར་པོ་དང་གཡོན་དུ་རྐྱང་མ་དཀར་པོ་དེ་གཉིས་ཀ་ཡང་ཡར་སྣེ་སྣ་བུག་གཡས་གཡོན་གཉིས་ལ་ཟུག་ཡོད་པ་དང་། མར་སྣེ་ལྟེ་འོག་ན་དབུ་མ་དང་འབྲེལ་ནས་བོད་ཀྱི་ཡི་གེ་ཆ་ཡི་དབྱིབས་འདྲར་གྲུབ་ནས་ཐམས་ཅད་འདུས་མདོ་གཅིག་ཏུ་སོང་ཡོད་པ་དེ་འདྲ་ཞིག་བསྒོམ་དགོས། དེ་ནས་ལུས་ཀྱི་ནང་གི་ནད་གདོན་སྡིག་སྒྲིབ་ཉེས་ལྟུང་དྲི་མའི་ཚོགས་ཐམས་ཅད་བྱང་ཞིང་དག་པར་བསམས་ནས། སྣ་བུག་གཉིས་ནས་རླུང་ལན་གསུམ་གྱི་བར་དུ་ཕྱིར་བུས་ནས་རླུང་རོ་བསལ་དགོས་གསུངས།

རླུང་ཚུར་རྔུབ་པ་སྣ་བུག་གཉིས་ནས་རོ་རྐྱང་གི་ལམ་བརྒྱུད་དེ་ལྟེ་འོག་རྩ་གསུམ་འདུས་མདོར།

ཞེས་རླུང་ཚུར་རྔུབ་པའི་གནས་སྐབས་ན་རོ་རྐྱང་གཉིས་ཀའི་ལམ་ནས་ཚུར་བརྒྱུད་དེ་ལྟེ་འོག་རྩ་གསུམ་འདུས་མདོར་ཐོན་ཡོང་བར་བསམ་དགོས་གསུངས།

གཏུམ་མོ་ཡེ་ཤེས་ཀྱི་མེ་རྩ་བ་བརྟན་པ། རྩེ་མོ་རྣོ་བ། རེག་བྱ་ཤིན་ཏུ་ཚ་བ་ནས་འབྲུ་ཙམ་ལ་ཕོག་པས་མེ་ལྕེ་ཆེར་འབར། ཟག་བཅས་ཀྱི་ལུས་རྩ་རླུང་ཐིག་ལེ་དང་བཅས་པ་ལྷག་མེད་དུ་བསྲེགས་ཏེ་མི་དམིགས་པར་ཡལ།

ཞེས་ལྟེ་འོག་དེ་ན་གཏུམ་མོའི་མེ་རྩ་བ་བརྟན་པ། རྩེ་མོ་ཕྲ་བ། རེག་བྱ་ཤིན་ཏུ་ཚ་བ་ཅན་ཞིག་ཡོད་པ་ལ་རླུང་དེ་ཕོག་སོང་བར་བསམ། དེ་ནས་རླུང་གི་སྟོབས་ཀྱིས་མེ་ལྕེ་ཆེར་འབར་བས་རང་གི་ལུས་མ་དག་པའི་རྩ་རླུང་ཐིག་ལེ་དང་བཅས་པ་ཐམས་ཅད་བསྲེགས་ཏེ་མི་དམིགས་པ་སྟོང་པ་ཉིད་ཀྱི་ངང་དུ་ཡལ་སོང་བར་བསམ་དགོས་གསུངས།

སྟོང་པའི་ངང་ལས་རང་ཉིད་འཇམ་དཔལ་རྡོ་རྗེའི་སྐུ་ཕྱི་ནང་ཟང་ཐལ་བ་ཕྲུ་མ་ཕུས་བཏབ་པ་ལྟ་བུའི་དབུས་སུ།

ཞེས་སྟོང་པའི་ངང་ལས་རང་ཉིད་འཇམ་དཔལ་རྡོ་རྗེའི་སྐུ་ལུས་ཕྱི་གསལ་ནང་གསལ་ཕྲུ་མ་ཕུས་བཏབ་པ་ལྟ་བུའམ། ཤེལ་སྒོང་ལྟ་བུ་རྒྱན་ཆ་ལུགས་ལ་སོགས་པ་གཞུང་བཞིན་དུ་བསྒོམ་པ་དེ་ནི་ཕྱི་ལུས་ལ་དམིགས་པ་ཡིན་གསུངས།

རྩ་གསུམ་འཁོར་ལོ་བཞི་ལྟེ་བའི་ཨ་ཐུང་དང་བཅས་པ། དབུ་མའི་ཡར་སྣེར་སངས་རྒྱས་ཐམས་ཅད་འདུས་པའི་ངོ་བོ་དྲན་པ་ཙམ་གྱིས་བདེ་སྟོང་བསྐྱེད་ནུས་པ་ཧཾ་ཡིག་དཀར་པོ་མགོ་ཐུར་ལ་བསྟན་པ་གསལ་བཏབ་ལ།

ཞེས་སྔར་བཤད་པའི་དབུས་སུ་དབུ་མ་དང་། གཡས་སུ་རོ་མ། གཡོན་དུ་རྐྱང་མ་སྟེ་རྩ་གསུམ་པོ་དང་། འཁོར་ལོ་བཞི་ཞེས་སྤྱི་བོ་བདེ་ཆེན་གྱི་འཁོར་ལོར་རྩ་འདབ་དཀར་པོ་སུམ་ཅུ་སོ་གཉིས་ཡོད་པ་དང་། མགྲིན་པ་ལོངས་སྤྱོད་ཀྱི་འཁོར་ལོར་རྩ་འདབ་དམར་པོ་བཅུ་དྲུག་ཡོད་པ། སྙིང་ཁ་ཆོས་ཀྱི་འཁོར་ལོར་རྩ་འདབ་མཐིང་ག་བརྒྱད་ཡོད་པ། ལྟེ་བ་སྤྲུལ་པའི་འཁོར་ལོར་རྩ་འདབ་སེར་པོ་དྲུག་ཅུ་རྩ་བཞི་ཡོད་པ་ཞིག་ཡིན། རྩ་འདབ་ཟེར་བ་དེ་ཡང་གདུགས་ཀྱི་རྩིབས་མ་ལྟ་བུར་རྩ་བ་རེ་རེ་ནས་ཕར་ལ་གྱེས་ཡོད་པ་དང་། སྤྱི་བོ་དང་མགྲིན་པ་གཉིས་ཀའི་རྩ་འདབ་རྣམས་ཧ་ལམ་ཁ་ཡར་མར་ལ་འཁོར་ནས་སྦྱར་ཡོད་ཅིང་། ལྟེ་བ་དང་སྙིང་ཁ་གཉིས་ཀའི་རྩ་འདབ་ཀྱང་ཁ་སྦྱར་ཡོད་པ་དེ་འདྲ་ཞིག་ཏུ་བསྒོམ། དེའི་སྤྱི་བོ་ན་དབུ་མའི་ཡར་སྣེར་སངས་རྒྱས་ཐམས་ཅད་འདུས་པའི་ངོ་བོ། དྲན་པ་ཙམ་གྱིས་བདེ་སྟོང་གི་ཡེ་ཤེས་བསྐྱེད་ནུས་པའི་བོད་ཀྱི་ཡི་གེ་ཧཾ་ལྟ་བུ་ཞིག་བསྒོམ། མདོར་ན་ཐིག་ལེ་དཀར་པོའི་རྣམ་པ་ཡིན་ཞིང་ཐིག་ལེ་ཟག་ལ་ཁད་པ་དེ་ལྟ་བུ་ཞིག་བསྒོམ་རྒྱུ་ནི་ནང་རྩ་ལ་དམིགས་པ་ཡིན་གསུངས།

སྣ་ནས་རླུང་རྔུབ་པ་ལྟེ་བའི་ཨ་ཤད་ལ་ཕོག དེ་ལས་མེ་ལྕེ་རྒྱ་ཁབ་ཙམ་ཡར་སོང་། སྤྱི་བོའི་ཧཾ་ལ་ཕོག་པའི་ཐིགས་པ་མེ་ལ་ཕོག་སྟེ་མེ་ལྕེ་ཆེར་འབར་བས་བདུད་རྩི་རྟག་ཏུ་བབས། མེ་དང་ཐིག་ལེ་བྲོས་དེད་ཀྱི་ཚུལ་དུ།

ཞེས་སྣ་བུག་གཉིས་ནས་རླུང་ཚུར་རྔུབ་དུས་ལྟེ་འོག་རྩ་གསུམ་འདུས་མདོ་ན་གཏུམ་མོ་ཡེ་ཤེས་ཀྱི་མེ་ཡོད་པ་དེ་ལ་ཕོག་ཚེ་མེ་ལྕེ་དབུ་མའི་ནང་ནས་གྱེན་དུ་འབར། སྤྱི་བོའི་ཧཾ་ལ་རེག་དུས་ཧཾ་ཞུ་ནས་ཐིགས་པ་གཅིག་མེ་ལྕེའི་སྟེང་ལ་བབས་པས། མེ་འབར་བ་ལ་སྣུམ་རེག་པ་ལྟར་མེ་ལྕེ་ལྷག་པར་འབར་བ་སྤྱི་བོའི་ཧཾ་བཞུས་ཡོང་དུས། ཇི་ལྟར་ཞུ་བ་དེ་བཞིན་དུ་རྩ་གནས་ཐམས་ཅད་རིམ་བཞིན་བདུད་རྩིས་གང་ཡོང་བ་ཡིན། མེ་དང་ཐིག་ལེ་བྲོས་དེད་ཀྱི་ཚུལ་དུ་མར་མར་འབབ་ཡོང་གིན་ཡོད་པ་དེ་ལ་སེམས་འཛིན་དགོས་གསུངས།

འཁོར་ལོ་བཞི་རིམ་བཞིན་གང་བས་དགའ་བ་བཞི་དང་སྟོང་བཞིའི་ཡེ་ཤེས་ཉམས་སུ་མྱོང་། བདེ་སྟོང་དོན་གྱི་ཡེ་ཤེས་མངོན་དུ་གྱུར་པའི་ངང་ལ་ཅི་གནས་སུ་བཞག་མཐར་དགེ་བསྔོ་བྱ།

ཞེས་ཐིག་ལེ་མར་བབས་ནས་སྤྱི་བོ་བདེ་ཆེན་གྱི་འཁོར་ལོ་གང་། དེ་ལྟར་རིམ་བཞིན་མར་བབས་ནས་མགྲིན་པ་དང་སྙིང་ཁ། ལྟེ་བའི་རྩ་འཁོར་ཐམས་ཅད་གང་། དེའི་སྟོབས་ཀྱིས་སྤྱི་བོ་ལ་སོགས་པར་རིམ་བཞིན་སྦྱར་ནས་དགའ་བ་དང་། མཆོག་དགའ། ཁྱད་པར་གྱི་དགའ་བ། ལྷན་སྐྱེས་ཀྱི་དགའ་བ་བཞི་ཐོབ། དེ་ནི་དགའ་བ་བདེ་བའི་ངོ་བོ་ཡིན། དགའ་བ་དེ་རབ་ཏུ་མ་གྲུབ་པའི་ཆ་ནས་སྟོང་པ་བཞི་ཟེར། དེ་བཞི་རིམ་པ་བཞིན་དུ་སྤྱི་བོ་ལ་བབས་དུས་སྟོང་པ་དང་། མགྲིན་པ་ལ་བབས་དུས་ཤིན་ཏུ་སྟོང་པ། སྙིང་ག་ལ་བབས་དུས་སྟོང་པ་ཆེན་པོ། ལྟེ་བ་ལ་བབས་དུས་ཐམས་ཅད་སྟོང་པའི་བདག་ཉིད་ཅན་ཏེ་དགའ་བ་བཞི་དང་སྟོང་པ་བཞིའི་ཡེ་ཤེས་རྒྱུད་ལ་སྐྱེས་པར་བསམས་ནས་བརྗོད་མེད་ཀྱི་ངང་ལ་མཉམ་པར་འཇོག་དགོས་གསུངས།

རྫོགས་རིམ་དེ་ཡང་ལན་གཅིག་ཙམ་མ་ཡིན་པར། རང་གི་རྒྱུད་ལ་དགའ་བ་དང་སྟོང་བའི་ཉམས་མྱོང་ཁྱད་པར་ཅན་མ་སྐྱེས་ཀྱི་བར་དུ་ཡང་ནས་ཡང་དུ་བསྐྱར་ནས་བསྒོམ་དགོས། མཐར་དེ་ལས་ལྡང་བ་ན་རྫོགས་རིམ་བསྒོམས་པའི་དགེ་བའི་རྩ་བ་དེ་སེམས་ཅན་ཐམས་ཅད་སངས་རྒྱས་ཀྱི་གོ་འཕང་འཐོབ་པར་བྱ་བའི་ཕྱིར་དུ་བསྔོ་དགོས་གསུངས།

བླ་རུང་ལ་བྱིན་རླབས་གནང་།

ཝ་ཧྲིང་ཐོན་དུ་བཞུགས་པའི་རིང་ལ། ནུབ་གཅིག་ཆོས་རྗེ་ཉིད་རྨི་ལམ་སྒྱུ་ལུས་ལ་བརྟེན་ནས་ཕྱིར་བླ་རུང་ལ་ཐེངས་གཅིག་བྱོན་ཡོད་ཚོད་འདུག

ཕྱི་ཉིན་ནངས་མོར། ཆོས་རྗེ་ཉིད་ཀྱིས་ངེད་ཅག་སློབ་མ་འགའ་ལ། མདང་དགོང་ང་རང་རྨི་ལམ་སྒྱུ་ལུས་ལ་བརྟེན་ནས་ཕྱིར་སློབ་གླིང་དུ་སོང་སྣང་ཤར། གྲྭ་པ་འགའ་རེ་ལ་ནད་ཚབས་ཆེན་ཞིག་ཕོག་གིན་ཡོད་ཤས་ཆེ་བས། ངེད་ཅག་གིས་ཚང་མ་ལ་ཐུགས་གཏད་སྐྱབས་འཇུག་རེ་བྱ་དགོས་གསུངས་ནས་འདོན་པ་འགའ་རེ་གསུངས།

གཞན་ཡང་སྐབས་དེར་ཁོང་མཁན་པོ་སྒེག་རྡོར་སོགས་ཀྱི་གྲྭ་ཤག་ཏུ་བྱོན་ནས་དེ་ཚོས་ཁ་བརྡ་གནང་བར་གསན་པ་སོགས་སློབ་གླིང་གི་གནས་ཚུལ་རྣམས་ལ་རྒྱུས་ལོན་མཛད་ཚུལ་གསུངས་པ་འགའ་རེ་ད་ལྟའང་དྲན་གྱིན་འདུག

རྗེས་སོར་ཕྱིར་སློབ་གླིང་དུ་འབྱོར་དུས་གནས་ཚུལ་དེ་དག་ལ་རྒྱུས་ལོན་བྱས་པ་ན། སྐབས་དེ་དུས་དངོས་གནས་འགོས་ནད་ཅིག་མཆེད་ཀྱང་ཉིན་ཁ་ཤས་ལས་མ་འགོར་བར་སངས་དྲག་ཏུ་སོང་བར་བཤད། དེ་དང་ཆོས་རྗེ་ཉིད་རྨི་ལམ་ནས་བླ་རུང་དུ་བྱོན་པ་གཉིས་ཀྱི་དུས་ཚོད་ཏག་ཏག་ཐོ་ཐུག་ནས་འདུག

སངས་རྒྱས་ལག་སྟེར་གྱི་ཁྲིད་ཐུན་གསུམ་པ།

ཕྱི་ཟླ་༧པའི་ཚེས་༢༩ཉིན་ཆོས་རྗེ་ཉིད་ཀྱིས་སངས་རྒྱས་ལག་སྟེར་གྱི་ཁྲིད་ཐུན་རྗེས་མ་འདི་ལྟར་གསུང་།

ད་རེས་ཕྱི་ནང་གསང་གསུམ་གྱི་མཐུན་རྐྱེན་ཕུན་སུམ་ཚོགས་པའི་སྐབས་འདིར། ཁྱེད་རང་རྣམས་ཀྱིས་རང་མགོ་རང་གིས་མི་སྐོར་བར་རྒྱལ་བའི་བསྟན་པ་རིན་པོ་ཆེ་ལ་འཇུག་པར་བྱེད་པ་ནི་ཅི་ནས་ཀྱང་གལ་ཆེ་བ་ཡིན། སངས་རྒྱས་ཀྱི་བསྟན་པ་རིན་པོ་ཆེ་ལ་འཇུག་པར་བྱེད་པ་ལ། དེའི་ངོ་བོ་ངོས་མ་ཟིན་ན་གང་ལ་འཇུག་པའི་ཡུལ་མི་ཤེས་པས། ཐོག་མར་དེ་ངོས་ཟིན་པ་གལ་ཆེ་བ་ཡིན། སངས་རྒྱས་ཀྱི་བསྟན་པ་ལ་ཐོག་མར་འཇུག་པའི་སྒོ་འབྱེད་པར་བྱེད་པ་ནི་དད་པ་ཡིན། བར་དུ་ཉམས་སུ་ལེན་པའི་གཞུང་ཤིང་ནི་བྱམས་པ་དང་སྙིང་རྗེ་གཉིས་ཡིན། མཐར་ཐུག་གི་འབྲས་བུ་ནི་སེམས་ཅན་གྱི་དོན་ཡོངས་སུ་འགྲུབ་པའི་བྱེད་པ་ཡིན།

ཐོག་མར་དད་པ་ཞེས་བྱ་བ་ནི་སངས་རྒྱས་དཀོན་མཆོག་ལ་དམིགས་ནས་དང་བའི་དད་པ་དང་། ཆོས་དཀོན་མཆོག་ལ་དམིགས་ནས་འདོད་པའི་དད་པ། དགེ་འདུན་དཀོན་མཆོག་ལ་དམིགས་ནས་ཡིད་ཆེས་པའི་དད་པ་གསུམ་བསྐྱེད་དགོས་པ་ཡིན། དེ་ལ་སངས་རྒྱས་དཀོན་མཆོག་ལ་དམིགས་པ་སྟེ་མཁྱེན་བརྩེ་ནུས་པའི་ཡོན་ཏན་གཞན་གང་གིས་ཀྱང་འགྲན་དུ་མེད་པའམ་ཕུལ་དུ་བྱུང་བ་ཡོད་པའི་རྒྱུ་མཚན་ཡོངས་སུ་ཤེས་པའི་སྒོ་ནས་དང་བ་བསྐྱེད་པ་ལ་དང་བའི་དད་པ་དང་། ཆོས་དཀོན་མཆོག་ལ་དམིགས་པ་སྟེ་སངས་རྒྱས་ཀྱི་གསུང་ཡོངས་སུ་རྫོགས་པ་བདེན་པ་བཞིའི་ནང་དུ་འདུ་ལ། དེ་ཡང་སྡུག་བསྔལ་དང་ཀུན་འབྱུང་གཉིས་སྤང་བར་འདོད་པ་དང་། འགོག་པ་དང་ལམ་གཉིས་རང་རྒྱུད་ལ་སྐྱེ་བར་འདོད་པའི་འདོད་པ་ཡང་དག་པ་ཞིག་བསྐྱེད་པ་ནི་འདོད་པའི་དད་པ་དང་།

དགེ་འདུན་དཀོན་མཆོག་ལ་དམིགས་པ་སྟེ་ལྷ་དང་བཅས་པའི་འཇིག་རྟེན་པ་གང་དང་ཡང་མི་འདྲ་བར་ཚོགས་རྣམས་ཀྱི་མཆོག་ཏུ་གྱུར་པའི་དགེ་འདུན་པ་ཞིག་ཡིན་ན། རང་རྒྱུད་ལ་ཚུལ་ཁྲིམས་དང་ཉམས་རྟོགས་ཀྱི་ཡོན་ཏན་ལྡན་ཞིང་ཉེས་པའི་སྐྱོན་ལས་གྲོལ་བའི་ལྡན་གྲོལ་གྱི་ཡོན་ཏན་གཉིས་དང་ལྡན་པ་ཡིན་པའི་ཕྱིར་ན། དེ་ལ་ཡིད་གཏིང་ནས་ཆེས་པར་བྱེད་པ་ནི་ཡིད་ཆེས་པའི་དད་པ་བསྐྱེད་ཚུལ་ཡིན།

བར་དུ་བསྟན་པའི་གཞུང་ཤིང་ནི་རིས་སུ་མ་ཆད་པར་མཐའ་ཡས་པའི་སེམས་ཅན་ཐམས་ཅད་བདེ་བ་དང་ལྡན་པར་འདོད་པའི་བྱམས་པ་དང་། སྡུག་བསྔལ་དང་འབྲལ་བར་འདོད་པའི་སྙིང་རྗེ་འདི་རང་གི་རྒྱུད་ལ་རྩེ་གཅིག་ཏུ་གོམས་པར་བྱ་བ་གལ་ཆེ་བ་ཡིན། ཆོས་ལུགས་དང་གྲུབ་མཐའ་གཞན་ཁ་ཅིག་གིས་འདོད་ཆགས་ཆོས་སུ་སྨྲ་བ་དང་ཞེ་སྡང་ཆོས་སུ་སྨྲ་བ། གཏི་མུག་ཆོས་སུ་སྨྲ་བ་ལྟ་བུ་ཐམས་ཅད་ནི་ཆོས་ལོག་པའམ་ཆོས་མ་ཡིན་པ་ཞེས་བྱ་བ་ཡིན།

ཁ་ཤས་ཀྱིས་བྱམས་སྙིང་རྗེ་ཙམ་ཆོས་སུ་སྨྲ་བ་ཡོད་ཀྱང་དེ་ནི་རང་གི་ཉེ་རིང་རྩ་གསུམ་ཙམ་ལ་བྱམས་སྐྱོང་བྱེད་པ་ལས་གཞན་རྣམས་ལ་སྡང་བ་དེ་ཡང་བྱམས་བརྩེ་ཉི་ཚེ་བ་ཡིན། ཁ་ཅིག་གིས་འགྲོ་བ་མིའི་རིགས་མཐའ་དག་ལ་བྱམས་བརྩེ་བྱེད་ཀྱང་། གཞན་དུད་འགྲོ་ལ་སོགས་པ་ལ་བྱམས་བརྩེ་མེད་པ་ཡང་བྱམས་བརྩེ་ཉི་ཚེ་བ་ཡིན། སངས་རྒྱས་པས་ནི་སེམས་ཅན་ཡོད་དོ་ཅོག་ཐམས་ཅད་རང་དང་ཁྱད་པར་མེད་པར་བདེ་བ་དང་ལྡན་པར་འདོད་པ་དང་། སྡུག་བསྔལ་དང་འབྲལ་བར་འདོད་པའི་བསམ་པ་བཟང་པོ་དེ་དུས་རྟག་ཏུ་སྒོམ་པར་བྱེད་པ་ཡིན་ཕྱིར་ཁྱད་པར་དུ་འཕགས་པའི་ཆོས་ཡིན།

མཐར་སངས་རྒྱས་ཀྱི་བསྟན་པའི་གྲུབ་དོན་ནམ་གྲུབ་འབྲས་མཐར་ཐུག་པ་དེ་གང་ཡིན་ཞེ་ན། སེམས་ཅན་ཐམས་ཅད་བདེ་ཞིང་སྐྱིད་པའི་ས་ལ་འགོད་ཐུབ་ན་དེ་ཡིན། སེམས་ཅན་ཐམས་ཅད་བདེ་བ་དང་ལྡན་ལ་སྡུག་བསྔལ་དང་འབྲལ་དགོས་ན། ཐབས་གཞན་གང་གིས་ཀྱང་མི་ནུས་པས། རྒྱལ་བའི་ལུང་དང་རྟོགས་པའི་བསྟན་པ་རིན་པོ་ཆེ་འདི་ཉིད་དར་བར་བྱེད་པ་ཁོ་ནའི་ནང་དུ་འདུ་བ་ཡིན།

སངས་རྒྱས་ཀྱི་བསྟན་པ་ཞེས་བྱ་བ་དེ་ཡང་ལུང་དང་རྟོགས་པའི་བསྟན་པ་གཉིས་ཡིན་ཏེ། ལུང་གི་བསྟན་པ་ལ་འཆད་ཉན་བྱེད་པ་དང་རྟོགས་པའི་བསྟན་པ་ལ་སྒོམ་སྒྲུབ་བྱེད་པའི་གང་ཟག་དེ་ལ་བསྟན་འཛིན་གྱི་སྐྱེས་བུ་ཆེན་པོ་ཞེས་འཇིག་རྟེན་གྱི་ཁམས་ན་ཡོངས་སུ་གྲགས་པ་ཡིན། དེ་གཉིས་འཛིན་མཁན་ཁོ་ན་མ་གཏོགས་གཞན་ལ་བསྟན་འཛིན་གྱི་སྐྱེས་བུ་ཆེན་པོ་ཞེས་ཐ་སྙད་འདོགས་པ་མིན།

དེས་ན་བདག་ཅག་གི་སྟོན་པ་ཐབས་མཁས་ལ་ཐུགས་རྗེ་ཆེན་པོ་དང་ལྡན་པ་དེ་ཉིད་ཀྱིས་ཀྱང་། དང་པོ་བྱང་ཆུབ་མཆོག་ཏུ་སེམས་བསྐྱེད། བར་དུ་བསྐལ་ཆེན་གྲངས་མེད་གསུམ་དུ་ཚོགས་བསགས། མཐའ་མར་མངོན་པར་རྫོགས་པར་སངས་རྒྱས་པའི་གྲུབ་དོན་མཐར་ཐུག་པ་དེ་ཡང་སེམས་ཅན་ཐམས་ཅད་བདེ་བའི་ཆེད་དུ་ཡིན་ལ། སེམས་ཅན་རྣམས་བདེ་བར་བྱེད་པ་ལ་ལུང་དང་རྟོགས་པའི་བསྟན་པ་དར་ཞིང་རྒྱས་པར་བྱེད་པ་འདི་ཁོ་ན་ཡིན། རང་རེ་ཡང་ཐུགས་རྗེ་ཆེན་པོ་དང་ལྡན་ཞིང་བཀའ་དྲིན་ཅན་གྱི་སྟོན་པའི་རྗེས་སུ་འཇུག་པ་ཁོ་ན་ཡིན་པའི་ཕྱིར་ན། ཚང་མས་ཀྱང་ལུང་གི་ཆོས་ལ་འཆད་ཉན་དང་རྟོགས་པའི་ཆོས་ལ་སྒོམ་སྒྲུབ་བྱེད་པ་ཅི་ནས་ཀྱང་གལ་ཆེ།

ད་སངས་རྒྱས་ལག་སྟེར་གྱི་གཞུང་དོན་གྱི་མཚམས་ནས་འཆད་རྒྱུ་ཡིན།

འདི་ལ་ཐོག་མར་དགེ་བ་དང་བར་དུ་དགེ་བ། ཐ་མར་དགེ་བའི་ཁྲིད་གསུམ་ཡོད་དེ། ཐོག་མར་དགེ་བ་མདོ་དང་མཐུན་པའི་ཁྲིད་དང་། བར་དུ་དགེ་བ་སྔགས་སྤྱི་ཁྱབ་དང་མཐུན་པའི་ཁྲིད་གཉིས་པོ་ནི་ཁ་སང་དང་ཁ་ཉིན་གཉིས་ལ་གྲུབ་ཚར་བ་ཡིན། ཐ་མར་དགེ་བ་རྫོགས་པ་ཆེན་པོ་དངོས་ཀྱི་ཁྲིད་ལ། སྔོན་འགྲོ་དང་དངོས་གཞི་དང་རྗེས་ཀྱི་ཁྲིད་བཅས་རྣམ་པ་གསུམ་ཡོད།

དེ་ནས་རྫོགས་པ་ཆེན་པོ་ལ་སྦྱོར་དངོས་རྗེས་གསུམ་ལས། སྦྱོར་བ་ལ་གསུམ། དང་པོ་སྒོ་གསུམ་གྱི་སྣ་འཁྲིད་པ་ལུས་ངག་ཡིད་ཀྱི་སྔོན་འགྲོ་སྟེ། འདི་ལའང་གསུམ་ལས།

ཞེས་རྫོགས་ཆེན་སྔོན་འགྲོ་ལ་ནང་གསེས་སུ་རྣམ་པ་གསུམ་ཡོད་པ་ལས། དང་པོ་སྒོ་གསུམ་གྱི་སྣ་འཁྲིད་པར་བྱེད་པ་ལ་ལུས་ངག་ཡིད་གསུམ་གྱི་སྔོན་འགྲོ་ཟེར་གསུངས།

ཐོག་མར་རང་ལུས་རྡོ་རྗེ་སྔོན་པོ་མེ་ཡི་ཚ་ཚ་འཕྲོ་བ་ཅན་དུ་བསྒོམས་ལ།

ཞེས་དང་པོ་རང་ལུས་རྡོ་རྗེ་སྔོན་པོ་རྩེ་གསུམ་པ་ཞིག་ཏུ་བསྒོམས།

དེ་ནས་རྡོ་རྗེའི་འདུག་སྟངས་བྱས་ནས་ཡུན་རིང་པོའི་བར་དུ་བསྒོམ་དགོས་པར་གསུངས། རྡོ་རྗེའི་འདུག་སྟངས་ཡུན་རིང་པོར་བྱས་པས་ལུས་དབང་མེད་དུ་འགྱེལ། རྣམ་རྟོག་གི་འཕྲོ་བ་རྒྱུན་ཆད་པར་གྱུར་ཚེ་རང་བབས་སུ་བཞག་ལ་ངལ་གསོ། དེ་ལྟར་ཡང་ཡང་བྱ།

ཞེས་རྡོ་རྗེའི་འདུག་སྟངས་ཡུན་རིང་དུ་བྱས་པས། ལུས་དབང་མེད་དུ་འགྱེལ་མ་སོང་གི་བར་དུ་བྱ། ལུས་དབང་མེད་དུ་འགྱེལ་སོང་དུས་འགྱེལ་དུ་བཅུག་ནས་སེམས་ཀྱི་ངོ་བོ་ལ་བལྟས་ནས་རང་བབས་སུ་འཇོག་དགོས་གསུངས།

གཉིས་པ། སྙིང་ནང་དུ་གཞི་གནས་ཀྱི་རིག་པ་ཧཱུྃ་སྔོན་པོའི་རྣམ་པར་གནས་པ་ལས།

ཞེས་གཉིས་པ་ངག་གི་སྔོན་འགྲོ་ནི། རང་གི་སེམས་དང་རླུང་རྣམས་དབྱེར་མེད་རོ་གཅིག་ཏུ་གྱུར་པ་དེ་སྙིང་ནང་དུ་ཧཱུྃ་སྔོན་པོ་ཞིག་ཡོད་པར་བསྒོམ་དགོས་གསུངས།

ཧཱུཾ་ཡིག་ཕྲ་མོ་གྲངས་མེད་པ་གཅིག་རྗེས་གཅིག་མཐུད་དུ་འཕྲོས།

ཞེས་གཞི་གནས་ཀྱི་ཧཱུྃ་དེ་ལས་ཧཱུྃ་ཕྲ་མོ་གྲངས་མེད་པ་གཅིག་གི་མཇུག་ལ་གཅིག་མཐུད་དུ་འཕྲོས་གསུངས།

རི་གླིང་ཁང་ཁྱིམ་སོགས་ལ་ཕོག་པས་ཐམས་ཅད་ཧཱུྃ་འབའ་ཞིག་ཏུ་གྱུར། ཞེས་རི་བོ་དང་། གླིང་། ཁང་པ། ཁྱིམ་ཡོད་ཚད་ལ་ཕོག་པས་ཐམས་ཅད་ཧཱུྃ་འབའ་ཞིག་ཏུ་གྱུར་བར་བསྒོམས་གསུངས། སླར་ཕྱིའི་ཧཱུྃ་རྣམས་རང་གི་ལུས་ལ་ཞུགས། རང་ལུས་ཀྱང་ཧཱུྃ་དུ་གྱུར་མཐར་ཧཱུྃ་མཐའ་དག་དབྱིངས་སུ་ཡལ་བར་བསམ་ལ་རང་བབས་སུ་ངལ་གསོ།

ཞེས་དང་པོ་ཕྱི་སྣོད་ཐམས་ཅད་ཧཱུྃ་དུ་གྱུར་སོང་བསམ། ཧཱུྃ་ཐམས་ཅད་ཚུར་བསྡུས་ནས་རང་གི་ལུས་ལ་ཐིམ། རང་གི་ལུས་ཀྱང་ཧཱུྃ་འབའ་ཞིག་ཏུ་གྱུར་སོང་བསམ། མཐར་ཧཱུྃ་ཐམས་ཅད་གཅིག་ལ་གཅིག་བསྡུས་ནས་གཞི་གནས་ཀྱི་ཧཱུྃ་ལ་ཐིམ་སྟེ་དབྱིངས་སུ་ཡལ་སོང་བར་བསམ་གསུངས། དེ་ཐམས་ཅད་ཀྱི་ཚེ་ཧཱུྃ་གླུ་སྙན་ལ་རིང་བ་བྱ། ཞེས་དེ་ཐམས་ཅད་ཀྱི་ཚེ་ངག་ནས་ཧཱུྃ་ཧཱུྃ་ཧཱུྃ་ཧཱུྃ་ཧཱུྃ་ཧཱུྃ་ཧཱུྃ་ཟེར་བཞིན་ཧཱུྃ་གླུ་སྙན་ལ་རིང་བ་ལེན་པ་དང་མཉམ་དུ་སྔོན་གྱི་སྒོམ་རིམ་དེ་བསྒོམ་དགོས་གསུངས།

གསུམ་པ་འཁོར་འདས་ཐམས་ཅད་སེམས་ཀྱི་ཆོ་འཕྲུལ་དུ་ཐག་བཅད།

ཅེས་གསུམ་པ་སེམས་ཀྱི་སྔོན་འགྲོ་ནི། དཔེར་ན་རྨི་ལམ་གྱི་གནས་སྐབས་སུ་རྨི་ལམ་ཇི་ལྟར་རྨིས་ཀྱང་སེམས་ཀྱི་ཆོ་འཕྲུལ་ཙམ་ལས་ཕྱི་རོལ་ན་རི་མཐོན་པོ་དང་། ཆུ་ཆེན་པོ། འཕྲང་དོག་མོ་གང་ཡང་མེད་པར་སེམས་ཀྱི་ཆོ་འཕྲུལ་ཡིན། དེ་བཞིན་དུ་ད་ལྟའི་སྣང་བ་སྣ་ཚོགས་པ་འདི་ཡང་སེམས་ཀྱི་བག་ཆགས་ཀྱིས་སྣང་བ་ཙམ་ལས། ཕྱི་རོལ་དུ་མེད་པར་ཤེས་རྒྱུ་དེ་རྩ་བ་སེམས་སུ་ཐག་ཆོད་དགོས་གསུངས།

སེམས་ཁོ་རང་གང་ལས་བྱུང་། གང་ལ་གནས། གང་དུ་འགྲོ་དཔྱད་པས།

ཞེས་སེམས་ཁོ་རང་དང་པོ་གང་ལས་བྱུང་། ད་ལྟ་གང་ལ་གནས། མཐའ་མར་གང་དུ་བུད་འགྲོ་བསམ་ནས་དཔྱད་པ་བཏང་བས་གསུངས།

བེམ་པོ་རྣམས་ནི་རགས་པ་རྡུལ་ཕྲན། རྡུལ་ཕྲན་ཆ་མེད། ཆ་མེད་གཞི་མེད་དུ་གཏན་ལ་ཕབ་པས་སྐྱེ་འགག་གནས་པ་མེད་པར་ཐག་ཆོད།

ཅེས་སེམས་དེ་བེམ་པོ་རྡུལ་དུ་གྲུབ་པ་རགས་པ་ཀ་བ་ལྟ་བུ་ཞིག་ལས་བྱུང་བར་འདོད་ན། དེ་དུམ་བུ་གསུམ་དུ་བྱས་ཚེ། དེ་གསུམ་པོ་ལས་སེམས་གསུམ་བྱུང་ཐབས་མེད། དེའི་དབུས་མ་ལྟ་བུ་གཅིག་ལས་བྱུང་ན། དེ་ཡང་དུམ་བུ་གསུམ་དུ་བྱོས། དེ་ལྟར་རགས་པ་རྣམས་རྡུལ་ཕྲན་དང་། རྡུལ་ཕྲན་ཆ་མེད། དེ་ཡང་གཞི་མེད་ཀྱི་བར་དུ་གཏན་ལ་དབབ་དུས། བེམ་པོའི་སྟེང་དུ་སེམས་བྱུང་ས་དང་གནས་ས། འགྲོ་ས་ཡང་མེད་པར་ཐག་ཆོད་པ་ཡིན་གསུངས།

སེམས་ནི་དབྱིབས་དང་ཁ་དོག་སྒྲ་དང་དྲི་རོ་རེག་བྱ་གང་ཡིན་བརྟགས་ན་གང་དུའང་མ་གྲུབ། གསལ་རིག་ཙམ་པོའང་ངག་གིས་བརྗོད་པ་ཙམ་མ་གཏོགས། བདེན་པར་ངེས་པའི་གཏད་སོ་ཅན་ཞིག་རྙེད་པའི་ཐབས་མེད་པས། བདེན་ཞེན་གྱི་ཁང་བུ་བཤིགས་ལ་བདག་མེད་ཀྱི་དོན་ལ་ངེས་པ་འདྲོང་བར་བྱའོ། །

ཞེས་སེམས་ཁོ་རང་ལ་བརྟག་ན་གྲུ་བཞི་ཟླ་གམ་ལ་སོགས་པའི་དབྱིབས་རྙེད་རྒྱུ་མེད་ལ། དཀར་པོ་དམར་པོ་སེར་པོ་མཐིང་ཁ་ལ་སོགས་ཁ་དོག་ཀྱང་མེད་པས་གཟུགས་མིན་པར་ཡང་ཐག་ཆོད། དེ་བཞིན་སེམས་ལ་སྙན་མི་སྙན་བར་མའི་སྒྲ་མེད་པས་སེམས་དེ་སྒྲ་མིན་པར་ཐག་ཆོད། སེམས་ལ་དྲི་ཞིམ་དང་མི་ཞིམ་བར་མ་ཨེ་ཡོད་བལྟས་ན་དེ་ཡང་མི་འདུག་པས་སེམས་དྲི་མིན་པར་ཐག་ཆོད། དེ་བཞིན་དུ་ལྕེ་ཡིས་མྱོང་བའི་རོ་མངར་བ་སྐྱུར་བ་ཁ་བ་བསྐ་བ་ཚ་བ་ལན་ཚྭ་དེ་དག་ཀྱང་སེམས་ལ་མེད་པས་རོ་མ་ཡིན་པར་ཐག་ཆོད། དེ་ནས་ལུས་ཤེས་ཀྱི་ཡུལ་དུ་གྱུར་བའི་རེག་བྱ་འཇམ་པ་ལྕི་བ་ཡང་བ་དྲོ་བ་སོགས་མེད་པས་རེག་བྱ་མ་ཡིན་པར་ཐག་ཆོད། སེམས་གསལ་ཞིང་རིག་པ་ཙམ་ཞིག་འདུག་ཟེར་ན། གསལ་ཞིང་རིག་པ་དེ་ཡང་ཁ་ཡིས་བརྗོད་པ་ཙམ་མ་གཏོགས་དོན་ལ་གཏན་ནས་མ་གྲུབ་པ་ཞིག་ཡིན། མ་གྲུབ་པ་དེས་ནི་བདེན་པར་ཞེན་པའི་སེམས་ཀྱི་ཁང་བུ་འདྲ་བ་དེ་བཤིག་པ་ལ། སྔོན་འགྲོ་སེམས་ཀྱི་ཁང་བུ་བཤིགས་པ་ཞེས་པ་ཡིན། དེ་ལྟ་བུའི་བདག་མེད་ཀྱི་དོན་ལ་ངེས་པ་འདྲོང་བར་འབད་དགོས་གསུངས།

གཉིས་པ་སྐུ་གསུམ་གྱི་སྣ་འཁྲིད་པ་འབྱུང་བཞིའི་རྣལ་འབྱོར་ནི། ས་ཆུ་མེ་རླུང་གི་སྒྲ་ལ་སེམས་ཐིམ་འགྲོ་བ་ལྟར་གཏད་ལ་བཞག་པས།

ཞེས་གཉིས་པ་སྐུ་གསུམ་གྱི་སྣ་འཁྲིད་པའི་སྔོན་འགྲོ་འབྱུང་བཞིའི་རྣལ་འབྱོར་ནི། དཔེར་ན་ལག་པ་ས་ལ་བརྡབས་པའི་ས་ཡི་སྒྲ་ལྟ་བུ་དང་། ཆུ་བཞུར་བཞིན་པའི་སྒྲ། མེ་འབར་གྱིན་ཡོད་པའི་སྒྲ། ནམ་མཁའི་ཁམས་སུ་རླུང་གཡུག་པའི་སྒྲ་ཐམས་ཅད་ལ་སེམས་ཐིམ་འགྲོ་བ་ལྟ་བུར་གཏད་ལ་བཞག་པས་གསུངས།

འཛིན་རྟོག་གང་ཡང་མི་འཕྲོ་བ་ལྟར་གྱུར་དུས། དེའི་ངང་དུ་རང་བབས་སུ་གློད་ལ་སེམས་ཀྱི་རང་བཞིན་ཇི་འདྲ་ཡིན་ངོས་ཟིན་པར་བྱའོ། །

ཞེས་ཅི་ཡང་མི་བསམ་པར་འདུག་དུས་དེར་སེམས་ཀྱི་རང་བཞིན་ཅི་འདྲ་ཡིན་པ་ཤེས་དགོས་གསུངས།

གསུམ་པ་རིག་པའི་སྣ་འཁྲིད་པ་འཁོར་འདས་རུ་ཤན་ནི། འགྲོ་དྲུག་གི་བསམ་སྤྱོད་བརྗོད་པ་ཐམས་ཅད་བྱུང་རྒྱལ་དུ་མངོན་དུ་བྱས་ལ་འཕྲོ་བདོ་བ་ན་ཕཊ་སྒྲ་དྲག་པོ་རེས་འཕྲོ་བཅད་ལ། ཤེས་པའི་ངོ་བོ་ལ་བལྟས་པས་གཞི་མེད་རྩ་བྲལ་ལ་ངེས་པ་མ་རྙེད་བར་དུ་ཡང་ཡང་སྦྱང་།

ཞེས་འཁོར་འདས་རུ་ཤན་འབྱེད་པ་སྟེ། འཁོར་བའི་རུའམ་མཐའ་དང་། མྱང་འདས་ཀྱི་རུའམ་མཐའ་དེ་གཉིས་ཤན་འབྱེད་དགོས། ཤན་འབྱེད་པར་བྱེད་པ་ལ། ཐོག་མར་སེམས་ཀྱིས་དམྱལ་བ་ཡི་དྭགས་དུད་འགྲོ་སོགས་འགྲོ་དྲུག་གིས་སྡུག་བསྔལ་མྱོང་བཞིན་ཡོད་པ་ལྟ་བུ་བློ་ཡུལ་ལ་བླངས། ངག་གིས་ཀྱང་འགྲོ་དྲུག་གི་སྐད་སྣ་ཚོགས་བརྗོད། ལུས་ཀྱིས་ཀྱང་འགྲོ་དྲུག་གི་སྤྱོད་ལམ་མང་པོ་བྱས། དེའི་སྐབས་སུ་ཕཊ་སྒྲ་དྲག་པོ་རེ་བྱས་ནས་སེམས་ཀྱི་ངོ་བོ་ལ་བལྟས་པའི་གནས་སྐབས་ན་གཞི་མེད་རྩ་བྲལ་ཡིན་པར་ཤེས་པ་ལ་མྱང་འདས་ཟེར་བ་ཡིན། དེའི་ངང་དུ་ཡང་ཡང་རྒྱུན་བསྐྱང་དགོས་གསུངས། མཐར་སྒོ་གསུམ་གཡོ་མེད་དུ་རྣལ་དུ་ཕབ་ལ། ཞེས་རྣལ་དབབ་ཀྱི་ཁྲིད་ཟེར་བ་ཡང་རུ་ཤན་གྱི་མཇུག་དེར་ལུས་མི་གཡོ། ངག་མི་སྨྲ། སེམས་ཀྱིས་མི་བསམ་པར་ཐང་ཆད་དུས་ངལ་གསོ་བ་ལྟར་རྣལ་དུ་ཕབ་ནས་འཇོག་པ་དེ་ལ་རྣལ་དབབ་ཀྱི་ཁྲིད་ཟེར་གསུངས།

སེམས་གནས་པའི་ངོ་བོ་ལ་རང་བབས་སུ་བལྟས་པས་མི་རྟོག་ཆོས་སྐུའི་ལྟ་བ་ལ་ངེས་པ་འདྲོང་པར་འགྱུར་རོ། །དེ་ནས་ཉན་ཐོས་ལྟར་སྤྱོད་པ་ཞི་བ། བྱང་སེམས་ལྟར་སྤྱོད་ལམ་འབྲིང་པོ། ཁྲོ་བོ་ལྟར་སྤྱོད་པ་དྲག་པོ་དང་བསྲེས་ལ་སྔོན་འགྲོའི་དུས་སུ་རྒྱུད་ལ་འབྱོར་པའི་ཞི་ལྷག་ལམ་དུ་བཅུད་དེ་སོར་གཞུག་པར་བྱའོ། །

ཞེས་དང་པོ་སྤྱོད་ལམ་ཞི་ཞིང་དུལ་བ་དང་རྣམ་སྣང་ཆོས་བདུན་བྱས་པའི་སྟེང་དུ་ཞི་ལྷག་གི་ངང་ལ་འདུག་ཨེ་ཐུབ་བལྟ། བར་དུ་འགྲོ་འདུག་ལ་སོགས་པ་སྤྱོད་ལམ་འབྲིང་པོ་ཙམ་བྱས་ནས་དེའི་ངང་དུ་ཞི་ལྷག་བསྲེ་ཨེ་ཐུབ་བལྟ། མཐར་སྤྱོད་ལམ་དྲག་པོ་ཧ་ཧ་དང་ཧི་ཧི་ཟེར་བཞིན་རྒྱུག་མཆོང་རྩེད་འཇོ་ལ་སོགས་བྱེད་པའི་གནས་སྐབས་སུའང་ཞི་ལྷག་གི་ངང་དུ་འདུག་ཐུབ་དུས། དེར་སོར་གཞུག་པའམ་ལམ་དུ་བཅུག་ཐུབ་པ་ཡིན་པས། དེའི་བར་དུ་བསྒོམ་པར་བྱ་དགོས་གསུངས།

སྤྱིར་སྔོན་འགྲོ་འབུམ་ལྔ་གསོག་ལུགས་ནི་ད་ལྟ་ཚང་མ་ལ་ཕྱག་བཞེས་ཡོད་པས་གསར་དུ་བཤད་དགོས་མི་འདུག ཁྱད་པར་དུ་རྫོགས་ཆེན་གྱི་སྔོན་འགྲོ་ནི་ཧ་ཅང་ཞག་ཡུན་རིང་པོ་ལ་སྦྱང་དགོས། དེ་རིང་ང་ཚོས་ཁྲིད་བཤད་པའི་དབང་དུ་བྱས་པ་ལས་ཁྲིད་སྦྱོང་བྱས་པ་མིན། ཁྲིད་སྦྱོང་བྱེད་པའི་དུས་སུ་རེ་རེ་ལ་ཞག་གྲངས་ཧ་ཅང་མང་པོ་དགོས་ཏེ། དཔེར་ན་རུ་ཤན་ལྟ་བུ་གཅིག་ལ་མཚོན་ན། སྔོན་གྱི་རིག་འཛིན་རྣམས་ཀྱིས་ནི་ལོ་བདུན་གྱི་རིང་ལ་རུ་ཤན་སྦྱངས་བའི་ལོ་རྒྱུས་ཡོད། ཐ་མ་དེང་སང་གི་དུས་སུ་ཇི་ལྟར་དམན་ཡང་རུ་ཤན་རྐྱང་བ་དེ་ཞག་བརྒྱ་ལས་ཉུང་བར་བྱས་ན་རུ་ཤན་གྱི་གོ་ཆོད་པ་མིན། ལུས་ངག་ཡིད་ཀྱི་སྔོན་འགྲོ་དང་། འབྱུང་བཞིའི་རྣལ་འབྱོར་ཡང་དེ་དང་མཚུངས་པ་ཡིན་པས་རྗེས་མར་ཚང་མས་ཡུན་རིང་པོའི་བར་དུ་སྦྱང་རྒྱུ་གལ་ཆེ་གསུངས།

གཉིས་པ་དངོས་གཞི་ཀ་དག་ཁྲེགས་ཆོད་ནི།

ཞེས་གཉིས་པ་དངོས་གཞི་ལ་ཀ་དག་ཁྲེགས་ཆོད་ནི། ཆོས་ཐམས་ཅད་སྐྱེ་མེད་དུ་གཏན་ལ་དབབ་པར་བྱེད་པ་ཡིན་གསུངས།

རང་གི་སེམས་འདི་མ་བཅོས་རང་སར་བཞག་ལ།

ཞེས་དང་པོ་རང་གི་སེམས་འདི་གང་ལ་ཡང་མི་བསམ་པར་རང་བབས་སུ་འཇོག་དགོས་གསུངས།

རང་གཤིས་ལ་བབས་ཀྱིས་བལྟས་ཚེ། ཡེ་སྟོང་རྩ་བྲལ་ཟང་ཐལ་ལེ་བ། ཕྱི་ནང་མཐའ་དབུས་དང་བྲལ་བ། རང་གདངས་འགག་པ་མེད་པ། འགྱུ་དྲན་གྱི་རྣམ་རྟོག་ཐམས་ཅད་དང་བྲལ་བ། བརྗོད་མེད་ཀྱི་དོན་ལ་ཁོ་ཐག་ཆོད་པས་དུས་གསུམ་རྒྱལ་བའི་ཐུགས་དང་མ་དག་སེམས་ཅན་གྱི་སེམས་ལ་བཟང་ངན་མེད་པར་རིག་སྟོང་ཡེ་ཤེས་དེའི་ཀློང་དུ་འུབ་ཆུབ་པར་ངོ་ཤེས་པ་ལྟ་བ་རི་བོ་ཅོག་གཞག་ཅེས་བྱའོ། །

ཞེས་རང་གི་སེམས་འདི་སྐྱེ་མེད་དུ་ཤེས་པ་ནི་ངོ་བོ་སྟོང་པ་ཆོས་ཀྱི་སྐུ་ཡིན། སྐྱེ་བ་མེད་བཞིན་དུ་རང་གཤིས་ལ་སེམས་ཐག་ཆོད་པ་ནི་རང་བཞིན་གསལ་བ་ལོངས་སྐུ་ཡིན། དེ་ནས་སངས་རྒྱས་ཀྱི་ཐུགས་དང་སེམས་ཅན་གྱི་སེམས་ལ་ཡང་བཟང་ངན་མེད་པར་གསལ་སྟོང་གི་ངང་དུ་རོ་གཅིག་ཡིན་པ་དེ་ནི་ཐུགས་རྗེ་ཀུན་ཁྱབ་སྤྲུལ་བའི་སྐུ་ཡིན། དེ་ནི་ལྟ་སྒོམ་སྤྱོད་འབྲས་བཞི་ཡོད་པའི་ནང་གི་ལྟ་བ་རི་བོ་ཅོག་གཞག་ཟེར་གསུངས།

ལྟ་བ་དེའི་རང་ངོ་ཤེས་བཞིན་རང་བབས་སུ་བཞག་ཚེ་ཡོད་མེད་ཡིན་མིན་དུ་འཛིན་པའི་དམིགས་གཏད་ཀྱི་བསྒོམ་བྱ་གང་ཡང་མེད་ལ། དགག་སྒྲུབ་རྟོག་དཔྱོད་ཀྱི་བསླད་དང་བྲལ་བས་ཡེངས་པ་མེད་པར་ཆོས་ཉིད་བབས་ཀྱི་བསམ་གཏན་དང་རང་ངོ་རང་གསལ་གྱི་ལྷག་མཐོང་ཟུང་དུ་འཇུག་པ་སྒོམ་པ་རྒྱ་མཚོ་ཅོག་གཞག་ཅེས་བྱའོ། །

ཞེས་ལྟ་བ་དེའི་ངང་དུ་རང་བབས་སུ་བཞག་ན་ཡོད་མེད་ཡིན་མིན་གྱི་འཛིན་སྟངས་གང་ཡང་མེད། སྒོམ་དུ་ཡང་མེད། རྣམ་རྟོག་གི་རྗེས་སུ་འབྲང་སོང་ཟེར་བའི་ཡེངས་པ་ཡང་མེད། སྒོམ་དུ་མེད་པ་ལ་ཆོས་ཉིད་དུ་རྟོགས་པ་ལ་ལྷག་མཐོང་དང་། རང་བབས་སུ་འཇོག་པ་ལ་ཞི་གནས་ཟེར་བ་ཡིན། ཞི་གནས་དང་ལྷག་མཐོང་ཟུང་དུ་འཇུག་པའི་ངང་དུ་རྒྱུན་སྐྱོང་བ་ནི་སྒོམ་པ་རྒྱ་མཚོ་ཅོག་གཞག་ཅེས་བྱ་བ་ཡིན་གསུངས།

སྒོམ་པའི་རྒྱུན་སྐྱོང་བ་དེའི་ཚེ་ཚོགས་དྲུག་གི་སྣང་ཤེས་གང་ཤར་ཐམས་ཅད་ལ་བཅོས་བསྒྱུར་སྤང་བླང་མི་བྱ་བར་རིག་སྟོང་གཉུག་མའི་རང་ཚུགས་མ་ཤོར་བར་བྱས་པས་རྩལ་སྣང་གང་གིས་ཀྱང་ཕན་གནོད་མེད་པ་རྦ་རླབས་རྒྱ་མཚོར་ཐིམ་པ་ལྟར་གྱུར་པ་སྤྱོད་པ་སྣང་བ་ཅོག་གཞག་ཅེས་བྱའོ། །

ཞེས་སྒོམ་པའི་རྒྱུན་སྐྱོང་བའི་སྐབས་སུ། ཚོགས་དྲུག་ནི། མིག་རྣ་བ་སྣ་ལྕེ་ལུས་ཡིད་རྣམས་ཡིན། ཡུལ་ཅན་གྱི་རྣམ་རྟོག་གང་ཡིན་ཡང་རུང་། དེ་དག་ལ་ཡུལ་གཟུགས་སྒྲ་དྲི་རོ་རེག་བྱ་ཆོས་ཀྱི་ཁམས་གང་སྣང་ན་ཡང་ཐམས་ཅད་ལ་ཞེན་འཛིན་དང་དགག་སྒྲུབ་ཅི་ཡང་མི་བྱ་བར་རིག་པ་ཁོ་རང་གི་ངང་བསྐྱངས་ན། དཔེར་ན་རྒྱ་མཚོའི་རྦ་རླབས་དེ་རྒྱ་མཚོ་ལ་ཐིམ་འགྲོ་བ་ལྟར་རྣམ་རྟོག་ཐམས་ཅད་ཕན་གནོད་མེད་པར་རིག་པའི་ཀློང་དུ་ཐིམ་འགྲོ་བ་ལ་སྤྱོད་པ་སྣང་བ་ཅོག་གཞག་ཟེར་གསུངས།

དེ་ལྟར་གོམས་ཚེ་དང་པོ་རིག་པ་ངོ་ཤེས་ཚེ་རྣམ་རྟོག་རང་གྲོལ་བ་སྦྲུལ་གྱི་མདུད་པ་ལྟ་བུ།

ཞེས་སྒོམ་པའི་སྐབས་སུ་ཐོག་མར་རྣམ་རྟོག་གང་སྐྱེས་ན་དེ་ངོས་ཟིན་ཚེ་རྣམ་རྟོག་དེའི་རྒྱུན་མཐུད་མི་ཐུབ་སྟེ། དཔེར་ན་སྦྲུལ་ལ་མདུད་པ་བརྒྱབ་ན་རྒྱག་ལོང་མེད་པར་ཞིག་འགྲོ་བ་བཞིན། རྣམ་རྟོག་རང་སར་རང་གྲོལ་དུ་འགྲོ་བ་ཡིན་གསུངས།

བར་དུ་རྩལ་རྫོགས་ཚེ་རྟོག་ཚོགས་གང་གིས་ཀྱང་ཕན་གནོད་མེད་པ་ཁང་སྟོང་དུ་རྐུན་མ་ཞུགས་པ་ལྟ་བུ།

ཞེས་བར་དུ་སེམས་སྟོང་ཉིད་དུ་ཤེས་ཤིང་རྟོགས་པའི་རྩལ་རྫོགས་དུས། རྣམ་རྟོག་བཟང་པོ་ཤར་བས་དགའ་བ་དང་སྡུག་པོ་ཤར་བས་སྡུག་རྒྱུ་གང་ཡང་ཡོད་པ་མིན། དཔེར་ན་ཁང་སྟོང་དུ་རྐུན་མ་ཞུགས་ན། དེར་འཁྱེར་འགྲོ་བའི་རྒྱུ་རྫས་ཅི་ཡང་མེད་པས་སྡུག་རྒྱུ་ཅི་ཡང་མི་འདུག་ལ། མ་ཞུགས་ནས་དགའ་རྒྱུའང་མེད། དེ་འདྲ་བའི་ཉམས་བར་གྱི་དུས་སུ་འབྱུང་བ་ཡིན་གསུངས།

མཐར་བརྟན་པ་ཐོབ་ཚེ་མ་དག་པའི་ཆོས་བཙལ་ཀྱང་མི་རྙེད་པ་རང་བཞིན་དོན་གྱི་ཡེ་ཤེས་མངོན་དུ་གྱུར་པས་གསེར་གླིང་དུ་ས་རྡོ་མི་རྙེད་པ་ལྟར་གྱུར་པ་འབྲས་བུ་རིག་པ་ཅོག་གཞག་ཅེས་བྱའོ། །

ཞེས་མཐར་ཐ་མལ་བའི་རྣམ་རྟོག་གང་ཡང་མི་སྐྱེ་བར་རིག་པ་འབའ་ཞིག་མ་གཏོགས་སྐྱེ་བ་མེད་པ་དེ། དཔེར་ན་གསེར་གླིང་དུ་ཐོན་དུས་གསེར་མ་གཏོགས་ས་རྡོ་ཕལ་བ་བཙལ་ཀྱང་རྙེད་རྒྱུ་མེད་པ་ལྟར། ཆོས་སྐུ་འབའ་ཞིག་ཏུ་གྱུར་སོང་བ་ནི་ཁྲེགས་ཆོད་ཀྱི་ལྟ་བ་མཐར་ཕྱིན་པའི་འབྲས་བུ་རིག་པ་ཅོག་གཞག་ཡིན་གསུངས།

གསུམ་པ་རྗེས་ལྷུན་གྲུབ་ཐོད་རྒལ་ནི། རིག་པ་འོད་གསལ་བའི་སྦུབས་ཡིད་དཔྱོད་བློ་ཡིས་བཞག་པ་མིན་པར་མངོན་སུམ་དུ་མཐོང་བར་བྱ་བའི་ཆེད་དུ།

ཞེས་གསུམ་པ་རྗེས་ལྷུན་གྲུབ་ཐོད་རྒལ་གྱི་ཁྲིད་ནི། རང་གི་སྙིང་གི་དབུས་ན་ཆོས་སྐུ་ཀུན་ཏུ་བཟང་པོ་ཡེ་ནས་གནས་ཡོད། དེ་ཡང་ཡོད་ན་ཐང་བསམ་པའམ་ཡོད་ཤས་ཆེ་སྙམ་དུ་དཔྱད་པས་བཞག་པ་ཙམ་མ་ཡིན་པར། མངོན་སུམ་དུ་མཐོང་རྒྱུ་ཡོད་པ་དེ་མཐོང་བའི་ཆེད་དུ་ལྷུན་གྲུབ་ཐོད་རྒལ་གྱི་ལམ་སྒོམ་པ་ཡིན་གསུངས།

ལུས་གནད་སྐུ་གསུམ་གྱི་བཞུགས་སྟངས་གང་རུང་ལྡན་པས།

ཞེས་ཐོད་རྒལ་སྒོམ་པར་བྱེད་པ་ལ་ནང་གསེས་སུ་གནད་རྣམ་པ་དྲུག་ཡོད་པ་ལས། ལུས་གནད་ནི་ཆོས་སྐུའི་བཞུགས་སྟངས་སེང་གེ་ལྟ་བུ་དང་། ལོངས་སྐུའི་བཞུགས་སྟངས་གླང་ཆེན་ཉལ་བ་ལྟ་བུ། སྤྲུལ་སྐུའི་བཞུགས་སྟངས་དྲང་སྲོང་ཙོག་པུ་ལྟ་བུ་གང་རུང་དང་ལྡན་པའི་སྒོ་ནས་སྒོམ་པས་གསུངས།

ངག་གནད་སྨྲ་བ་བཅད་ལ་རླུང་དལ་བུར་ཁ་ནས་གདོན།

ཞེས་ངག་གི་གནད་ནི་ངག་བཅད་དམ་ཁ་ཡིས་སྐད་ཆ་མང་པོ་མི་བཤད་པར་རླུང་དལ་བུར་ཁ་ནས་འདོན་པ་ཡིན་གསུངས།

སེམས་གནད་ཁྲེགས་ཆོད་ཅོག་གཞག་ཤེས་རབ་རང་བྱུང་གི་སྒྲོན་མའི་ངང་ནས།

ཞེས་སེམས་ཀྱི་གནད་ནི། གོང་དུ་ཁྲེགས་ཆོད་ཀྱི་སྐབས་སུ་བཤད་པ་དེ་ལྟ་བུའི་ངང་དུ་འཇོག་པ་ལ་ཤེས་རབ་རང་བྱུང་གི་སྒྲོན་མ་ཟེར་ཞིང་། གནད་དེའི་ངང་ནས་འདུག་དགོས་གསུངས།

ཡུལ་གནད་ནམ་མཁའ་རྐྱེན་བྲལ་དང་ཉི་ཟླ་མར་མེ་སོགས་ལ།

ཞེས་ཡུལ་གྱི་གནད་ནི་ནམ་མཁའ་རྐྱེན་བྲལ་ལ་གཏད་ན་ཆོག་ལ། ཡང་ན་ཉི་མ་ཟླ་བ་མར་མེ་གསུམ་གང་རུང་ལ་གཏད་དགོས་གསུངས།

སྒོ་གནད་ལྡོག་ཕབ་ཟུར་གྱིས་བལྟས་པས།

ཞེས་སྒོའི་གནད་ནི་ཆོས་སྐུའི་གཟིགས་སྟངས་གྱེན་དུ་སྨིན་མཚམས་སུ་བལྟ་བ་དང་། སྤྲུལ་སྐུའི་གཟིགས་སྟངས་ཕབ་ནས་བལྟ་བ་དང་། ལོངས་སྐུའི་གཟིགས་སྟངས་མིག་གཉིས་ཀྱིས་ཟུར་གཉིས་ལ་མཉམ་པོར་བལྟ་བ་ཡིན་གསུངས།

སྣང་བའི་གནད་དབྱིངས་རྣམ་དག་གི་སྒྲོན་མ་མཐིང་དབྱིངས་ཁྱབ་པ་ཆེན་པོ་འོད་ལྔའི་མུ་ཁྱུད་ཅན་དང་། ཐིག་ལེ་སྟོང་པའི་སྒྲོན་མ་འོད་ལྔའི་ཐིག་ཟླུམ་ཕྱི་ནང་རིམ་པ་མང་པོ་ཅན་གྱི་དབུས་སུ། རིག་གདངས་ལུ་གུ་རྒྱུད་གསེར་གྱི་སྐུད་པ་དུ་མ་ལ་ཤེལ་ཕྲེང་གིས་བརྒྱན་པ་ལྟ་བུ་དེ་གཡོ་འགུལ་མེད་པར་བཙོན་དུ་བཟུང་ལ། རླུང་མིག་ཡིད་གསུམ་དེར་ཐིམ་འགྲོ་བ་ལྟར་གཏད་ལ་ཡིད་དཔྱོད་མཚན་མའི་རྟོག་ཚོགས་གང་ཡང་མེད་པར་ཡུན་རིང་དུ་གོམས་པས་དབྱིངས་ཐིག་རིག་པ་རྣམས་གསལ་བར་མཐོང་བ་ཆོས་ཉིད་མངོན་སུམ།

ཞེས་རྣམ་རྟོག་ཐམས་ཅད་བྲལ་ནས་དབྱིངས་ཐིག་རིག་པ་གསལ་བར་མཐོང་བ་ནི་སྣང་བ་བཞིའི་ནང་གི་ཆོས་ཉིད་མངོན་སུམ་ཟེར་བ་ཡིན་གསུངས།

དེ་དག་ཇེ་གསལ་ཇེ་བརྟན་ཇེ་རྒྱས་སུ་མཆེད་དེ་འོད་སྣང་དཔག་ཏུ་མེད་པར་སྣང་བ་ཉམས་གོང་འཕེལ། ཞེས་དབྱིངས་ཐིག་རིག་པ་ཐམས་ཅད་ཇེ་གསལ་ཇེ་བརྟན་ཇེ་རྒྱས་ཇེ་མང་དུ་ཡར་འཕེལ་ཡོང་བ་དེ་ལ་ཉམས་གོང་འཕེལ་ཟེར་བ་ཡིན་གསུངས། དབྱིངས་སྣང་ཞིང་ཁམས་སུ་དག་ཐིག་ལེ་གཞལ་ཡས་ཁང་དུ་རྫོགས། རིག་པ་སྐུར་སྨིན་ནས་དག་པ་འབའ་ཞིག་གི་གདངས་མངོན་དུ་གྱུར་པ་རིག་པ་ཚད་ཕེབས།

ཞེས་དབྱིངས་རྣམ་དག་གི་སྒྲོན་མ་ཞིང་ཁམས་སུ་དག ཐིག་ལེ་སྟོང་པའི་སྒྲོན་མ་གཞལ་ཡས་ཁང་དུ་རྫོགས། རིག་གདངས་རྡོ་རྗེ་ལུ་གུ་རྒྱུད་སྐུ་རུ་སྨིན་ནས་མ་དག་པ་གཅིག་ཀྱང་མེད་པར་ཤར་བ་རིག་པ་ཚད་ཕེབས་ཟེར་བ་ཡིན་གསུངས།

སྐུ་དང་ཡེ་ཤེས་ཀྱི་སྣང་བ་མུ་མེད་པའི་ཆོས་ཅན་གྱི་སྣང་བ་ཐམས་ཅད་ཆོས་ཉིད་གཞོན་ནུ་བུམ་སྐུའི་ཀློང་དུ་བཙན་ས་ཟིན་ཏེ་མི་སྣང་བར་གྱུར་པ་ཆོས་ཉིད་ཟད་སའོ། །

ཞེས་མ་དག་པའི་སྣང་བ་ཐམས་ཅད་རིག་པ་ཚད་ཕེབས་སྐབས་སུ་ཟད་ཚར་ཡང་། དག་པ་སྐུ་དང་ཡེ་ཤེས་ཀྱི་སྣང་བ་ཐམས་ཅད་ཀུན་ཀྱང་ནང་དབྱིངས་སུ་བཙན་ས་ཟིན་དགོས་ཤིང་། ནང་ཀློང་དུ་མི་སྣང་བར་ཐིམ་འགྲོ་བ་ལ་ཆོས་ཉིད་ཟད་སའི་སྣང་བ་ཟེར་གསུངས།

སླར་ཡང་གདུལ་བྱའི་ཞིང་དུ་སྐུ་གསུམ་གྱི་བཀོད་པ་ཅིར་ཡང་ངོམ་པར་འགྱུར་བ་ནི་ལེགས་སྨོན་ཟུང་དུ་ཚོགས་པའི་རང་འབྲས་བསླུ་བ་མེད་པ་ཡིན་ནོ། །

ཞེས་སངས་རྒྱས་ཆོས་སྐུའི་གོ་འཕང་མངོན་དུ་བརྙེས་ཀྱང་། གདུལ་བྱའི་ཁམས་ལ་སངས་རྒྱས་ཀྱི་སྨོན་ལམ་དང་གདུལ་བྱའི་ལེགས་ཚོགས་ཀྱི་དགེ་བ་རྣམ་པར་འཕེལ་བའི་སྟོབས་ཀྱིས། སྤྲུལ་སྐུ་དང་ལོངས་སྐུ་སོགས་ཅིར་ཡང་སྣང་བ་ནི་ལེགས་སྨོན་ཟུང་དུ་ཚོགས་པའི་རྟེན་འབྲེལ་གྱིས་སྣང་བ་ཡིན་གསུངས།

ཚེ་འདི་ལ་བརྟན་པ་མཆོག་མ་ཐོབ་ན་འཆི་ཁར་རང་སེམས་ཨ་དཀར་པོ་སྙིང་གར་གནས་པ་རླུང་གིས་བསྐྱོད་དེ་སྤྱི་གཙུག་ན་བཞུགས་པའི་བླ་མའི་ཐུགས་ཀར་ཐིམ། བླ་མའང་ཇེ་མཐོ་ཇེ་མཐོར་བདེ་བ་ཅན་གྱི་ཞིང་དུ་གཤེགས་པར་མོས་ལ་རང་སེམས་བླ་མའི་ཐུགས་དང་དབྱེར་མེད་དུ་མཉམ་པར་བཞག་ལ་འཕོ་བར་བྱའོ། །

ཞེས་འཆི་ཁ་བར་དོའི་ཁྲིད་ནི། གཟོད་འཆི་ཁར་རང་སེམས་སྙིང་ནང་དུ་ཨ་དཀར་པོ་ཞིག་ཏུ་སྒོམ། དེ་ནས་སྤྱི་གཙུག་ན་བཞུགས་པའི་བླ་མ་ལ་གསོལ་བ་རྩེ་གཅིག་ཏུ་བཏབ་པས་ཨ་དེ་ཡང་ཡར་བླ་མའི་ཐུགས་ཀར་ཐིམ་སོང་བར་བསམ། བླ་མ་ཡང་ཇེ་མཐོ་ནས་ཇེ་མཐོར་བདེ་བ་ཅན་གྱི་ཞིང་ཁམས་སུ་གཤེགས། དེ་ལྟར་རང་སེམས་དང་བླ་མའི་ཐུགས་དབྱེར་མེད་ཀྱི་ངང་དུ་མཉམ་པར་བཞག་ནས་འཕོ་བར་བྱས་ན་ཆོས་སྐུའི་གཏན་སྲིད་ཟིན་ཡོང་བ་ཡིན་གསུངས།

ཆོས་ཉིད་བར་དོའི་སྣང་བ་སྒྲ་འོད་ཟེར་གསུམ་སྐུ་དང་ཡེ་ཤེས་ཀྱི་རོལ་པ་གང་ཤར་ཡང་རང་སྣང་དུ་ངོ་ཤེས་པར་བྱས། ཤེས་ཐོག་དེར་ཅོག་གཞག་ལྟ་བས་བཙན་ས་བཟུང་ལ་གནས་པར་བྱ། རྩལ་སྣང་ཐམས་ཅད་གཞི་ཀློང་དུ་མ་ཐིམ་བར་དུ་གནས་པ་ལས་སླར་མི་ལྡོག་པར་བྱའོ། །

ཞེས་ཆོས་ཉིད་བར་དོ་རུ་སྒྲ་ཡི་སྣང་བ། འོད་ཀྱི་སྣང་བ། ཟེར་གྱི་སྣང་བ། སྐུའི་སྣང་བ། ཡེ་ཤེས་ཀྱི་སྣང་བ་སོགས་མང་པོ་ཤར་ཡོང་བ་ཡིན། སྐབས་དེར་ཐམས་ཅད་ཀུན་ཀྱང་རང་སྣང་ཡིན་པ་ཤེས་པར་བྱས་ལ། དེའི་ངང་དུ་བཞག་ནས་རྣམ་རྟོག་ཐམས་ཅད་དབྱིངས་སུ་ཐིམ་དུ་འཇུག་པ་དེ་ཆོས་ཉིད་བར་དོའི་ཁྲིད་ཀྱི་སྙིང་པོ་ཡིན་གསུངས།

སྲིད་པ་བར་དོའི་སྣང་བ་རྨི་ལམ་ལྟར་ཤར་དུས་ལྷ་དང་བླ་མ་ལ་མོས་གུས་རྩེ་གཅིག་ཏུ་བྱས་ལ། འཆི་ཁ་བར་དོའི་མན་ངག་གནད་དུ་བསྣུན་པས་རང་བཞིན་སྤྲུལ་སྐུའི་ཞིང་དུ་དབུགས་དབྱུང་བར་འགྱུར་རོ། །

ཞེས་སྲིད་པ་བར་དོར་འགྲོ་དྲུག་གི་ལས་སྣང་ཤར་ཡོང་དུས་ལྷ་དང་བླ་མ་ལ་གསོལ་བ་བཏབ། འཆི་ཁ་བར་དོའི་མན་ངག་གྲོང་འཕོ་གྲོང་འཇུག་རང་སེམས་ཨ་དཀར་པོར་གསལ་ནས་བླ་མའི་ཐུགས་ཀར་བསྟིམས། བླ་མ་བདེ་བ་ཅན་གྱི་ཞིང་ཁམས་སུ་གཤེགས་པར་བསྒོམ་ན་རང་བཞིན་སྤྲུལ་སྐུའི་ཞིང་དུ་གྲོལ་བར་འགྱུར་རོ་གསུངས།

དེ་ལྟར་ཁྲིད་ཡིག་སངས་རྒྱས་ལག་སྟེར་འདིའི། །

སྙིང་པོའི་གནད་རྣམས་རིག་སྟོང་ཀློང་ནས་རྡོལ། །

ཚིག་ཚོགས་ཕལ་ཆེར་རྟོག་དཔྱོད་བློ་ཡིས་བཟོས། །

འོན་ཀྱང་དང་པོའི་ལས་ཅན་འགའ་རེ་ལ། །

ཕན་པ་ཅུང་ཟད་སྲིད་སྙམ་ཡི་གེར་བཀོད། །

དགེ་འདིས་མཁའ་ཁྱབ་འགྲོ་བ་མ་ལུས་ཀུན། །

ཕྱམ་གཅིག་གདོད་མའི་དབྱིངས་སུ་དབུགས་དབྱུང་ཤོག །

ཅེས་སངས་རྒྱས་ལག་སྟེར་གྱི་གནད་ངོ་མ་ནི་རིག་སྟོང་རྫོགས་པ་ཆེན་པོའི་ཀློང་ནས་ཤར་ཡོང་བ་ཞིག་ཡིན་ཀྱང་། རྗེས་སུ་ཚིག་ཇི་མ་ཇི་བཞིན་དུ་ཞེ་ལ་ཤར་མ་ཐུབ་ཀྱང་། ལས་དང་པོ་པ་ཐམས་ཅད་ལ་ཕན་པ་རེ་འབྱུང་སྲིད་རྒྱུ་རེད་བསམ་ནས་ཚིག་ཚོགས་ཁ་ཤས་བསམ་བློ་བཏང་ནས་ཡི་གེར་བཀོད་པ་ཡིན། བོད་ལ་མཚོན་ན། འདི་ལས་དང་པོ་བའི་ཉམས་ལེན་ཞིག་ཡིན་ལ། ད་དུང་ཡང་རྫོགས་པ་ཆེན་པོའི་རྒྱུད་ལུང་མན་ངག་ཧ་ཅང་མང་པོ་ལ་བལྟ་དགོས་པ་ཡིན་ཡང་། ནུབ་ཕྱོགས་རྒྱལ་ཁབ་ཕལ་ཆེར་ལ་མཚོན་ན། ཐོག་མཐའ་བར་གསུམ་དུ་འདི་ལས་གཞན་པའི་ཆོས་ཤིག་དགོས་རྒྱུ་མ་རེད། འདི་ལས་མང་པོ་ཞིག་ལ་བལྟ་མི་ཐུབ་ལ་སྒོམ་ཡང་ཐུབ་རྒྱུ་མ་རེད། ད་དུང་སྒོམ་ལོང་ཡང་དཀོན་མོ་ཡིན། དེ་ལྟར་བརྩམས་པའི་དགེ་བ་འདིས་འགྲོ་བ་ཐམས་ཅད་ཀུན་ཀྱང་ཆོས་སྐུའི་གོ་འཕང་འཐོབ་པར་གྱུར་ཅིག་གསུངས།

ཅེས་འཇམ་དབྱངས་སྤྲུལ་པའི་ཞིང་མཆོག་རི་བོ་རྩེ་ལྔའི་ཡང་དབེན་ཨ་སུ་རའམ་སྲེད་མེད་བུའི་བྲག་ཕུག་ཏུ་ངག་དབང་བློ་གྲོས་མཚུངས་མེད་པས་སྔ་དྲོའི་ཐུན་གསེང་དུ་ཡི་གེར་བཀོད་པ་དགེའོ།། །།

ཞེས་ཁྲིད་ཡིག་སངས་རྒྱས་ལག་སྟེར་གྱི་ཁྲིད་ཆ་ཚང་རྫོགས་པ་ཡིན་ལ། ཁྱེད་ཅག་རྣམས་ཀྱི་བཞེད་དོན་དང་མཐུན་པར་འུ་ཅག་གིས་ཆོས་འཆད་ཉན་བྱས་པའི་ལས་རིམ་ཚང་མ་ཡང་ལེགས་པར་རྫོགས་པ་ཡིན།

ཨ་རིའི་སྲིད་འཛིན་གཞོན་པས་བསྐུར་བའི་འཕྲིན་ཡིག

ཆོས་རྗེ་ཉིད་ཀྱིས་ཆོས་ཚོགས་འདིར་ཆོས་ཁྲིད་གསུང་བཞིན་པའི་སྐབས་སུ། ཨ་རིའི་སྲིད་འཛིན་གཞོན་པ་སྐུ་ཞབས་ཨལ་བྷེར་ཐི་ཀོར་（Albert Arnold Gore Jr.）གྱིས་ཕྱི་ལོ་༡༩༩༣ལོའི་ཟླ་༧པའི་ཚེས་༢༣ཉིན་བྲིས་པའི་འཕྲིན་ཡིག་ཅིག་འབྱོར་བའི་ནང་དོན་གཙོ་བོ་ནི་འདི་ལྟར།

སྐྱབས་རྗེ་འཇིགས་མེད་ཕུན་ཚོགས་མཆོག་ཨ་རིའི་རྒྱལ་ཁབ་ལ་འཚམས་འདྲིར་ཐོན་པར་ཧ་ཅང་དགའ་སྤྲོ་ཆེ། དེ་ལྟ་ནའང་ང་རང་གཟའ་འཁོར་འདིའི་གཟའ་མཇུག་ལ་ཚོགས་འདུར་ཞུགས་དགོས་པས། སྤྱི་ཟླ་༧པའི་ཚེས་༣༠དང་ཚེས་༣༡སྟེ་ཉིན་གཉིས་ལ་ཝ་ཧྲིང་ཐོན་དུ་མེད། དེ་བས་ད་ལན་སྐྱབས་རྗེ་འཇིགས་མེད་ཕུན་ཚོགས་མཆོག་དང་མཇལ་འཕྲད་མ་བྱུང་བར་ཡིད་ཧ་ཅང་ཕམ་པོ་བྱུང་། འོན་ཀྱང་། བདག་གིས་ཁྱེད་རང་ཕོ་བྲང་དཀར་པོ་ལ་ལྟ་སྐོར་དུ་འབྱོན་པར་སྣེ་ལེན་གྱི་ལས་སྒྲུབ་པ་བཀོད་སྒྲིག་བྱས་ཡོད་ཅིང་། ད་དུང་དོན་དག་གཞན་གང་ཡོད་རྣམས་ནམ་ཡིན་ཡང་བདག་ལ་འབྲེལ་གཏུག་གནང་རོགས།

འཚམས་འདྲིའི་སྨོན་འདུན་བཟང་པོ་དང་བཅས།

ཨལ་བྷེར་ཐི་ཀོར་ནས།

དེའི་རྗེས་སུ་ཆོས་རྗེ་མཆོག་གིས་ཆོས་ཁྲིད་ཀྱི་མཇུག་ལེགས་པར་གྲུབ་ནས། ཨ་རིའི་སྲིད་འཛིན་གཞོན་པའི་བཀོད་སྒྲིག་ལྟར་ཕོ་བྲང་དཀར་པོར་བྱོན།

ཕོ་བྲང་དཀར་པོར་གཟིགས་སྐོར་དུ་ཕྱིན་པ།

ཕྱི་ཟླ་༧པའི་ཚེས་༣༠ཉིན། ཆོས་རྗེ་ཉིད་ཕོ་བྲང་དཀར་པོར་（The White House）གཟིགས་སྐོར་དུ་ཕེབས། ཕོ་བྲང་དཀར་པོ་ནི་ཨ་རིའི་སྲིད་འཛིན་རིམ་བྱོན་གྱི་སྡོད་གནས་དང་རྒྱལ་ཁབ་ཀྱི་སྲིད་དོན་ལས་ཀ་ཐག་གཅོད་བྱ་སའི་གཞུང་སྒྲུབ་ཁང་ཡིན་པས། གནས་འགའ་རེར་གཏན་ཁེལ་གྱི་དུས་ཚོད་ནང་དུ་ལྟ་སྐོར་བྱ་ཆོག་ཅིང་། དེའང་ཨ་རིའི་མངའ་ཁོངས་ཀྱི་སྤྱི་དམངས་མ་གཏོགས་ཕྱི་རྒྱལ་ནས་ཡོང་བ་དག་ལ་ཐད་ཀར་དུ་སྒོ་འབྱེད་ཀྱིན་མི་འདུག

སྲིད་འཛིན་གཞོན་པ་ཨལ་བྷེར་ཐི་ཀོར་གྱིས་མངགས་བཅོལ་གནང་བ་ལྟར། སྣེ་ལེན་མཁན་ལྕམ་ཁཱ་རཱེན་ཝའེ་ལེམ་སི་（Karen Williams）ཡིས་ང་ཚོ་ཕོ་བྲང་དཀར་པོར་ལྟ་སྐོར་དུ་ཁྲིད། ཕོ་བྲང་དཀར་པོ་འདི་ནི་རྩ་བའི་ཐོག་ཁང་དང་ཤར་ཁང་། ནུབ་ཁང་བཅས་ཀྱིས་གྲུབ་ལ། ཤར་ཁང་ནི་གསོལ་སྟོན་ཁང་དང་ནུབ་ཁང་ནི་སྲིད་འཛིན་གྱི་གཞུང་སྒྲུབ་ཁང་རེད། ཕྱི་ནས་བལྟས་ན་ཐོག་བརྩེགས་རིམ་པ་གསུམ་ཡོད་པ་ལྟར་སྣང་ཡང་དོན་དུ་བརྩེགས་རིམ་དྲུག་དང་ཁང་མིག་བརྒྱ་དང་སོ་གཉིས་ཀྱིས་གྲུབ་འདུག སྣེ་ལེན་མཁན་གྱིས་ངེད་ཅག་ལ་བཅད་ཁུལ་རེ་རེ་བཞིན་ངོ་སྤྲོད་ཞིབ་ཅིང་རྒྱས་པར་བྱས་པ་མ་ཟད། ནམ་རྒྱུན་ལྟ་སྐོར་པ་རྣམས་ལ་སྒོ་མི་ཕྱེ་བའི་གནས་དག་ལའང་གཟིགས་སྐོར་ཕྱིན་པ་ཡིན། མོ་ནི་ཨ་རིའི་རབ་བྱུང་བ་ཞིག་ཡིན་ལ། བོད་བརྒྱུད་ནང་བསྟན་གྱི་སེར་གོས་གྱོན་ནས་རྒྱུན་དུ་ཕོ་བྲང་དཀར་པོའི་ནང་དུ་ལས་ཀ་སྒྲུབ་བཞིན་ཡོད་པ་ནི་ཤིན་ཏུ་ངོ་མཚར་ཞིང་མཐོང་དཀོན་པ་ཞིག་རེད།

ཕོ་བྲང་དཀར་པོའི་གྱང་ལྡེབས་ངོས་སུ། སྲིད་འཛིན་རིམ་བྱོན་དང་ཁོང་ཚོའི་ལྷ་ལྕམ་གྱི་འདྲ་པར་ཆེ་ཆུང་མང་པོ་གོ་རིམ་མེད་པར་བཤམས་འདུག་ལ། བར་ཁྱམས་དང་ཁང་པའི་ནང་ཐམས་ཅད་དུ། ཕོ་བྲང་དཀར་པོ་རུ་བེད་སྤྱོད་བྱས་མྱོང་བའི་སྤུས་ལེགས་རྫ་ཆས་དང་ཤེལ་སྣོད། གསེར་དངུལ་གྱི་ཟས་ཆས་སོགས་ལོ་རྒྱུས་རིག་གནས་ཀྱི་བྲོ་བ་སྟུག་པོ་མངའ་བའི་སྒྱུ་རྩལ་ཐོན་རྫས་སྣ་ཚོགས་བཤམས་སྟོན་བྱས་ཡོད། སྐབས་དེ་དུས་ཨ་རིའི་ལས་ཐོག་སྲིད་འཛིན་ནི་ཁཱི་ལིན་ཐོན་（william jefferson clinton）ཡིན་པས། ཁོང་དང་ཁོང་གི་ཁྱིམ་མིའི་འདྲ་པར་དང་བརྙན་ཐུང་སོགས་ཀྱང་མང་ཙམ་ཡོད།

ཕྱི་དྲོར་ཆོས་རྗེ་ཉིད་དང་ངེད་ཅག་ཨ་རིར་བཅའ་སྡོད་བྱས་པའི་ཀྲུང་གོའི་གཞུང་ཚབ་ཁང་དུ་ཕྱིན་པ་དང་། ང་ཚོར་སྣེ་ལེན་བྱེད་མཁན་གྱི་གཞུང་ཚབ་མགོ་དཔོན་ནི་མི་ཞི་དུལ་ངག་འཇམ་ཞིག་རེད། ང་ཚོས་གནས་འདིར་ཡོང་བའི་ལས་རིམ་ནང་དོན་དང་ཕྱི་སྡོད་དུས་ཡུན་སོགས་འབྲེལ་ཡོད་ཀྱི་དོན་རྣམས་གསལ་བཤད་བྱས་ཤིང་། ཁོས་ཀྱང་ཞིབ་ཕྲའི་གནས་ཚུལ་གང་མང་དྲིས་བྱུང་། མཐར་ང་ཚོ་ཕྱིར་ཆོས་ཚོགས་སུ་ལོག་པ་ཡིན།

གྱེས་ཁའི་ཞལ་གདམས།

ཕྱི་ཟླ་༧པའི་ཚེས་༣༡ཉིན། ཆོས་རྗེ་ཉིད་ཀྱིས་གནས་འདི་ནས་ཆོས་ཁྲིད་གསུང་པའི་མཛད་རིམ་རྣམས་ལེགས་པར་གྲུབ་སྟེ་དགའ་སྟོན་རྟེན་འབྲེལ་མཚོན་པའི་ཆེད་དུ། པགས་མདོག་མི་གཅིག་ཅིང་རྒྱལ་ཁབ་ཐ་དད་པའི་ཆོས་པ་རྣམས་ཀྱིས་སྔོ་ལྗང་གི་སྤང་ཐང་དུ་སྦྲ་གུར་ཕུབ་ནས་སྤྲོ་སྐྱིད་ཀྱི་རང་འདེམས་གསོལ་སྟོན་བཤམས།

ཉིན་དེར། གནམ་གཤིས་དྭངས་ཤིང་བསིལ་ལ་ལྗོན་པའི་གཡུ་མདངས་ལྷག་པར་མིག་ལ་མཛེས་པ་དང་། བྱ་རིགས་སྣ་ཚོགས་ཀྱིས་སྙན་འཇེབས་ཀྱི་གྲེ་འགྱུར་སྒྲོག་པ། མེ་ཏོག་གི་དྲི་བསུང་མངར་མོས་དྲི་འཛིན་དབང་པོའི་བརྟན་པ་དབང་མེད་དུ་འཕྲོག་པའི་ཁོར་ཡུག་དེ་ནས། ཚང་མས་ལྷན་ཅིག་ཏུ་གུ་ཡངས་བག་ཕེབས་ཀྱིས་ཟས་མཆོག་ལ་རོལ་ཞིང་སེམས་པའང་ཧ་ཅང་སྐྱིད་པོ་བྱུང་།

ཆོས་རྗེ་ཉིད་དེར་ཡོད་དད་ལྡན་རྣམས་དང་ཞལ་གྱེས་ལ་ཉེ་བའི་སྔོན་དུ་ཐམས་ཅད་ལ་ཞལ་གདམས་འདི་ལྟར་གསུང་།

དེ་རིང་གི་སྐབས་སུ་ངས་ཁྱེད་རྣམ་པ་ལ་སློབ་སྟོན་ནམ་རེ་འདུན་ཚིག་ཀ་འགའ་ཞུ་རྒྱུ་ཡོད།

སྤྱིར་ང་ལྟ་བུའི་ཡོན་ཏན་མེད་ཅིང་སྐྱོན་ཆེ་བའི་གང་ཟག་ཅིག་གིས་ཁྱེད་རྣམ་པ་ལྟ་བུར་སློབ་སྟོན་བྱེད་པ་དེ་མི་འོས་པའི་གནས་ཤིག་ཡིན་ཡང་། ད་རེས་ཀྱི་གནས་སྐབས་ན་ང་ཚོ་ཚང་མ་བླ་མ་དང་སློབ་མའི་དམ་ཚིག་གིས་འབྲེལ་ནས་ཚེ་འདི་ཙམ་དུ་མ་ཟད་སྐྱེ་བ་ཚེ་རབས་ཀྱི་བར་དུ་འབྲལ་བ་མེད་པར་གྱུར་བ་ཡིན། དེས་ན་ངས་ཀྱང་སྙིང་སྟོབས་བསྐྱེད་ནས་ཚིག་ཀ་འགའ་ཞུ་རྒྱུ་ཡིན།

ཐོག་མར་ཚོགས་གཙོ་ཨ་དཀོན་ལྷ་མོ་ལགས་ལ་རེ་བ་གཉིས་ཞུ་རྒྱུ་ཡོད། ཁོང་གི་ཡོན་ཏན་ཐམས་ཅད་རིགས་བསྡུ་ན། རང་རྒྱུད་ལ་ཉམས་རྟོགས་ཀྱི་ཡོན་ཏན་ཡོད་པ་དང་། གཞན་དོན་དུ་བསྟན་པ་དང་སེམས་ཅན་ལ་ཕན་ཐོགས་པའི་ཕྲིན་ལས་གཉིས་ཡོད་རྒྱུ་རེད་བསམ། ཡོན་ཏན་དེ་གཉིས་པོ་སྔར་ཡོད་མི་ཉམས་པའི་ཐབས་ལ་བརྩོན་པ་དང་། སྔར་མེད་ཀྱི་ཡོན་ཏན་ད་དུང་མང་པོ་འཐོབ་རྒྱུ་ཡོད་པས་དེ་འཐོབ་པར་བརྩོན་ཐུབ་པའི་རེ་བ་ཡིན།

དེ་ནས་རབ་ཏུ་བྱུང་བ་ཁོང་རྣམས་ལའང་རེ་བའི་ཚིག་ཀ་གསུམ་ཞུ་རྒྱུ་ཡོད། དེ་གང་ཡིན་ཞེ་ན། ཁྱེད་རྣམ་པ་ཐུགས་མཐུན་པ་དང་ཁྲིམས་གཙང་བ། སྤོང་ཀློག་གི་ལས་ལ་བརྩོན་པ་དང་གསུམ་ཡིན།

དང་པོ་ཐུགས་མཐུན་པ་ཟེར་བ་ནི། ནང་པ་སངས་རྒྱས་པ་ཙམ་མ་ཡིན་པར། ཡེ་ཤུ་དང་ཧིན་དྷུའི་ཆོས་ལུགས་སོགས་ལའང་མཐུན་འབྲེལ་ལེགས་པོ་བྱེད་པ་ལས་ཐམས་ཅད་ལ་འཁྲུག་སློང་བྱས་ན་གནོད་པ་མ་གཏོགས་བདེ་བའི་རྒྱུ་རུ་འགྱུར་མི་སྲིད། དོན་དང་པོ་ནི་ཆོས་ལུགས་ཡོངས་སུ་རྫོགས་པ་ལ་མཐུན་འབྲེལ་བྱེད་པ་དེ་རྩ་བ་ཡིན། ཁྱད་པར་དུ་སངས་རྒྱས་ཀྱི་བསྟན་པ་ལ་ཞུགས་སོ་ཅོག་ཐམས་ཅད་ལ་མཐུན་འབྲེལ་དམ་ཟབ་བྱེད་པ་དང་། ཡང་དགོས་སུ་བོད་ཡུལ་ནས་དར་ཡོང་བའི་གྲུབ་མཐའ་ཆེན་པོ་བཞི་ལ་སོགས་པ་མང་པོ་ཡོད། དེ་ཚང་མར་ཡང་མཐུན་འབྲེལ་ལེགས་པོ་བྱེད་པ་ནི་མེད་དུ་མི་རུང་བ་ཡིན།

སྔོན་ཆད་ལོ་ཉི་ཤུ་དང་སུམ་ཅུའི་གོང་རོལ་དང་བསྡུར་ན། ད་སྐབས་འཛམ་གླིང་གི་རྒྱལ་ཁབ་གང་ལ་ཡང་སངས་རྒྱས་ཀྱི་བསྟན་པ་འདི་ཧ་ཅང་དར་བ་ཡིན་ཡང་། འདི་ལ་ད་སྐབས་སྲི་ཆེན་པོ་ཞིག་ཞུགས་ཡོད་པ་ནི་མཐུན་འབྲེལ་མེད་པ་དེ་ཡིན། ངོ་མ་བཤད་ན་བླ་མ་གཉིས་ས་ཆ་གང་དང་གང་ལ་སོང་ན་ཡང་མཐུན་མོ་ཡོང་བ་དཀོན་པོ་ཡིན་ལ། ཆོས་ཚོགས་ཁག་གཉིས་ཡོད་ན་ཡང་མཐུན་པོ་ཡོང་རྒྱུ་དཀའ་མོ་ཡིན། དེ་བཞིན་དུ་དགེ་འདུན་གྱི་སྡེ་གཉིས་ཡོད་ན་ཡང་མཐུན་པོ་ཡོང་བ་དེ་དཀའ་མོ་ཡིན་པས་མཐུན་པོ་བྱ་རྒྱུ་དེ་ནི་ཅི་ནས་ཀྱང་གལ་ཆེ་བ་ཡིན། བཅོམ་ལྡན་འདས་ཀྱིས། དགེ་འདུན་མཐུན་པ་བདེ་བ་སྟེ། །མཐུན་པ་རྣམས་ཀྱི་དཀའ་ཐུབ་བདེ། །ཞེས་དགེ་འདུན་པ་མཐུན་པ་དེ་བདེ་བ་ཐམས་ཅད་ཀྱི་མཆོག་ཐོབ་བྱེད་ཡིན་ལ། དགེ་འདུན་པ་མཐུན་ནས་དགེ་སྒྲུབ་སྡིག་སྤོང་བྱེད་པ་དེ་བས་ཀྱང་བདེ་བ་ཆེན་པོ་ཡིན་པས། དེ་ནི་མེད་དུ་མི་རུང་བ་ཡིན་པར་གསུངས།

གཉིས་པ་ཚུལ་ཁྲིམས་གཙང་རྒྱུ་དེ་རྩ་བ་ཡིན། ཁྱེད་རྣམ་པའི་རྒྱུད་ལ་ཚུལ་ཁྲིམས་ཀྱི་སྡོམ་པ་བླངས་ཟིན། སྡོམ་པ་དེ་བསྲུངས་ན་འདི་དང་ཕྱི་མ་ཀུན་ཏུ་བདེ་བ་མ་གཏོགས་སྡུག་བསྔལ་འབྱུང་རྒྱུ་ཡོད་པ་མིན། གལ་སྲིད་ཚུལ་ཁྲིམས་དེ་འཆལ་སོང་ན་ངེས་པར་དུ་ངན་སོང་གི་གནས་སུ་འགྲོ་བ་ལས་འགྲོ་ས་གཞན་ཡོད་པ་མིན། དེའི་ཕྱིར་ན་ཁེ་ཉེན་ཆེ་བ་ཞིག་ཏུ་གྱུར་ཡོད་པས་གཟབ་གཟབ་བྱས་ནས་སྡོམ་པ་བསྲུང་དགོས།

གསུམ་པ་སྤོང་ཀློག་གི་ལས་ལ་བརྩོན་པ་ནི། སྤོང་ཟེར་བ་ཅི་འདྲ་ཞིག་ཡིན་ཞེ་ན། སྒོམ་ཉམས་ལེན་ལ་དོ་དོ་ཏན་ཏན་བྱེད་པ་ལ་ཟེར། ཀློག་ཅེས་པ་ནི་ཐོས་བསམ་སྟེ་ཆོས་འཆད་ཉན་གྱི་ལས་ལ་ཅི་ནུས་ཅི་ལྕོགས་བྱ་དགོས་ཏེ། ཕར་ཆོས་འཆད་ཐུབ་ན་བཟང་པོ་རེད། དེ་མ་ཐུབ་ན་ཡང་རང་གིས་ཆོས་མཉན་པར་བརྩོན་དགོས། གལ་ཏེ་གཉིས་ཀ་ཡོད་ན་གོང་ན་མེད་པ་ཡིན། གཉིས་ཀ་མེད་ན་ཡང་གང་རུང་རེ་མེད་དུ་མི་རུང་བ་ཡིན།

ཁྱིམ་པའི་ཚོགས་ལའང་རེ་བ་གཉིས་ཡོད། ཁྱེད་རྣམས་ཀྱིས་ཀྱང་སྲོག་མི་གཅོད་པ་དང་མ་བྱིན་པ་མི་ལེན་པ་སོགས་དགེ་བ་ལ་གནས་ནས་ཕྱག་སྐོར་ཁ་ཏོན་ལ་སོགས་པའི་ལས་ལ་ཅི་ནུས་སུ་འབད་པར་བྱེད་པ་དེ་དོན་དང་པོ་ཡིན། ཁྱད་པར་དུ་དཀོན་མཆོག་རིན་པོ་ཆེ་རྣམ་པ་གསུམ་དང་། དེའི་ནང་ནས་ཀྱང་དགེ་འདུན་དཀོན་མཆོག་ལ་དད་པ་ཞོག གསོལ་འདེབས་གྱིས། ཞབས་ཞུ་སྒྲུབས། རྒྱུ་རྫས་ཅུང་ཟད་རེ་ཡོད་ན་དགེ་འདུན་པ་རྣམས་ཀྱི་ཕྱོགས་སུ་ཅི་ནུས་ཀྱིས་ཕུལ་ནས་རང་གི་འདི་ཕྱི་ཀུན་གྱི་དོན་སྒྲུབ་པ་དེ་དོན་གཉིས་པ་ཡིན།

དེ་ནས་ཚང་མ་ལ་ཐུན་མོང་དུ་རེ་བ་གཅིག་ཡོད། ཁྱེད་རྣམ་པ་ཐམས་ཅད་ཀྱིས་སྤྱིར་སངས་རྒྱས་ཀྱི་བསྟན་པ་དང་། སྒོས་ཆོས་ཚོགས་འདི་ལ་ཁ་ཆག་སྣ་རལ་དང་མི་ཁ་ཁྲེལ་གྱོང་མི་འོང་བའི་ཐབས་ལ་ཅི་ནུས་སུ་འབད་དགོས། ཁྱད་པར་དུ་ཆོས་ཚོགས་འདི་ལ་སྙད་ཅིག་ཞུགས་ཡོང་ན་ཁྱེད་རྣམ་པ་མི་སྔུན་ལ་འབུད་མི་ལོ་བ་སྨོས་མ་དགོས་ཀྱང་། སངས་རྒྱས་ཀྱི་བསྟན་པ་སྤྱི་ལའང་དམའ་འབེབ་ཆེན་པོ་ཞིག་ཡོང་བ་ཡིན། དེ་ལ་ཧ་ཅང་གིས་གཟབ་གཟབ་བྱ་དགོས།

ཁྱེད་རྣམ་པའི་ཆོས་ཚོགས་འདི་ལ་ཉེན་ཁ་འབྱུང་བའི་གཟབ་དགོས་ས་དང་དོ་སྣང་བྱེད་དགོས་ས་འགའ་རེ་ཡོད། དེ་གང་ཡིན་ཞེ་ན། དང་པོ་ནི་བླ་སེར་དང་ཇོ་མོ་འདི་ཚོས་སྡོམ་པ་བསྲུང་རྒྱུ་ལ་ངོ་མ་གཟབ་དགོས་པ་རེད་མ་གཏོགས། འདི་ལ་སྙད་ཅིག་བྱུང་ན་དེ་ལས་སྡུག་གང་ཡང་ཡོད་པ་མིན།

དེའི་ཐབས་སུ་ནི་ཚོགས་གཙོ་ཁོང་གིས་སྒྲིག་ཁྲིམས་དམ་པོ་ཞིག་འཇོག་དགོས་པ་ཡིན་ལ། མཐུན་རྐྱེན་འཛོམས་ན་བླ་སེར་དང་ཇོ་མོ་རྣམས་ཀྱི་སྒྲུབ་ཁང་དེ་ཡང་ཁ་ཁ་གྱིས། བར་དུ་འདབས་འབྲེལ་མི་ཡོང་བར་དང་པོ་ནས་སྔོན་འགོག་ཡང་དག་པར་བྱེད་པ་ཅི་ནས་ཀྱང་གལ་ཆེ་བ་ཡིན། དེ་ལ་གཟབ་གཟབ་མ་བྱས་པར་ཇོ་སེར་དང་ཁྱིམ་པ་ཕོ་མོ་ཚོ་ལྷན་དུ་བསྲེས་ནས་བསྡད་ན། སྡོམ་པ་བསྲུང་ཐུབ་མཁན་དེ་ཧ་ཅང་དཀའ་མོ་ཡིན།

ང་རང་ལ་དཔེ་མཚོན་ན། ངའི་སློབ་གླིང་ལ་ཇོ་མོ་སྟོང་དང་བརྒྱ་ཕྲག་འགའ་ཞིག་ཡོད་ལ། བླ་སེར་ཡང་དེ་ཙམ་ཞིག་ཡོད་རྒྱུ་རེད། ཁོང་རྣམ་པས་ཆོས་ཞུ་བའི་སྐབས་སུ་འདུག་ས་ཁ་ཁར་ཕྱེས་ནས་བར་ཐག་རིང་པོར་འདུག་པ་མ་གཏོགས་ལྷན་དུ་འདུག་མི་ཆོག འགྲོ་བའི་གནས་སྐབས་ན་ཡང་ཁང་སྒོ་གཅིག་ནས་གཤར་མི་ཆོག་པར། ཇོ་མོ་རྣམས་ཕྱོགས་གཅིག་དང་བླ་སེར་རྣམས་ཕྱོགས་གཅིག་ནས་གཤར་དགོས། དེ་བཞིན་དུ་སྡོད་ཁང་ཡང་བར་ཐག་རིང་པོ་ཡིན་ལ། ཁོང་རྣམས་ནམ་རྒྱུན་འབྲེལ་གཏུག་བྱེད་ཆོག་པ་མིན། དེ་ལྟར་མ་བྱས་ནས་ཡུན་རིང་པོའི་བར་ལྷན་དུ་བསྡད་ན། ནམ་ཞིག་སྡོམ་པ་སྲུང་ཟེར་བ་དེ་དཀའ་མོར་འགྱུར་ཡོང་བ་ཡིན། ཁྱེད་རྣམ་པ་ཚང་མས་དང་པོ་རང་རྒྱུད་ཀྱི་སྡོམ་པ་བསྲུང་དགོས་པ་རེད་མ་གཏོགས། དེ་ཉམས་པ་ནི་ཤིན་ཏུ་ཉེས་ཚབས་ཆེ་ཞིང་ཚེ་རབས་འབུམ་ཕྲག་མང་པོའི་བར་དུ་ངན་སོང་གསུམ་ནས་མི་ཐར་བའི་ལས་ཡིན་པས། དང་པོ་ནས་རང་རྒྱུད་ཀྱི་སྡོམ་པ་ལ་གཟབ་གཟབ་བྱ་དགོས་པ་ཡིན།

གཉིས་པ་ནི་གཞན་གྱི་སྡོམ་པ་མི་འཕྲོག་པ་ལ་ཅི་ནུས་ཀྱིས་གཟབ་དགོས་ཏེ། དཔེར་ན་གང་ཟག་གཞན་ཞིག་གི་སྡོམ་པ་འཕྲོག་པར་བྱས་ན། རང་གི་སྡོམ་པ་ཉམས་པ་ལས་ཀྱང་ཉེས་པ་ཆེ་བ་ཡིན། ཇི་ལྟར་ཡིན་ཞེ་ན། མཆོད་རྟེན་བྱེ་བ་མང་པོ་བཤིག་པ་ལས་གང་ཟག་གཅིག་གི་རྒྱུད་ཀྱི་སྡོམ་པ་འཕྲོག་ན་དེ་ཉེས་པ་ཆེ་བ་ཡིན། སྲོག་གཅོད་པ་དང་མ་བྱིན་པ་ལེན་པ་ལ་སོགས་པའི་སྡིག་པ་གཞན་བྱས་ན་ངན་སོང་དུ་སྐྱེ་ངེས་ཀྱི་ལས་ཡིན་ཡང་འདག་ཏུ་ཡོད་མོད། དགེ་ཚུལ་སློང་གི་སྡོམ་པ་འཕྲོག་པ་ནི་ཉེ་བའི་མཚམས་མེད་ཀྱི་ལས་ཏེ། ཤི་མ་ཐག་ཏུ་དམྱལ་བ་མནར་མེད་ཀྱི་གནས་སུ་སྐྱེ་བར་འགྱུར་བ་མ་གཏོགས་ཐར་བའི་གོ་སྐབས་མེད་པས་ཧ་ཅང་གཟབ་དགོས་པ་ཡིན།

ཁྱེད་རྣམ་པ་སུ་དང་སུ་ཡིན་ཡང་རང་གིས་དགེ་བ་རྒྱ་ཆེན་པོ་ཞིག་མ་འགྲུབ་ཀྱང་སྐྱོན་མི་འདུག གཞན་གྱིས་ཚུལ་ཁྲིམས་རྣམ་པར་དག་པ་སྲུང་བ་ལ་བར་ཆད་དུ་མི་འགྲོ་བའི་ཐབས་ལ་ཅི་ནུས་སུ་བརྩོན་དགོས། གཞན་ཚུལ་ཁྲིམས་དང་ལྡན་པ་ཞིག་ཚུལ་ཁྲིམས་ལས་ཉམས་པར་བྱས་ན། སྐྱེ་བ་འབུམ་ཕྲག་མང་པོའི་བར་དུ་དཀོན་མཆོག་གསུམ་ལ་དངོས་སུ་འཕྲད་པ་ལྟ་ཅི། དེའི་མིང་ཙམ་ཡང་མི་གྲགས་པའི་མཐའ་འཁོབ་མུན་ནག་གི་གནས་སུ་སྐྱེ་བར་འགྱུར་བ་ཡིན།

གལ་སྲིད་ཚུལ་ཁྲིམས་ཉམས་སོང་ཡང་སྒོམ་སྒྲུབ་དང་གསང་སྔགས་ཀྱི་ཆོས་རེ་ཉམས་སུ་བླང་པས་མི་སྐྱོན་སྙམ་ན། བཅོམ་ལྡན་འདས་ཀྱིས། ཚུལ་ཁྲིམས་འཆལ་ལ་ཐུབ་དབང་གིས། །སྔགས་གྲུབ་པར་ནི་མ་གསུངས་ཏེ། །ཞེས་ཚུལ་ཁྲིམས་འཆལ་ཚར་ནས་བཟུང་སྟེ་སྒོམ་ཉམས་ལེན་ཐོས་པ་སློབ་གཉེར་གང་དང་གང་བྱས་ཀྱང་། ཁྱོད་འགྲོ་ས་ངན་སོང་མ་གཏོགས་ཕན་པར་མི་འགྱུར་བས་ཅི་ནས་ཀྱང་གཟབ་དགོས་པ་ཡིན། རང་གིས་ཚུལ་ཁྲིམས་སྲུང་མ་ནུས་ན་གཞན་གྱི་ཚུལ་ཁྲིམས་ལ་བཀག་འགོག་མི་བྱེད་པར་མཐུན་རྐྱེན་སྒྲུབས་དང་། གཞན་གྱིས་ཚུལ་ཁྲིམས་བསྲུངས་བའི་ཕན་ཡོན་ཡང་རང་ལ་འཐོབ་པར་འགྱུར་བ་ཡིན།

དེས་ན་ངས་ཁྱེད་ཆོས་ཚོགས་ཀྱི་གཙོ་འགན་པ་ལ་སློབ་སྟོན་ཚིག་ཀ་གཉིས་དང་། བླ་སེར་དང་ཇོ་མོ་རྣམས་ལའང་སློབ་སྟོན་ཚིག་ཀ་གསུམ། ཁྱིམ་པ་ཕོ་མོ་རྣམས་ལའང་སློབ་སྟོན་ཚིག་ཀ་གཉིས་བྱས་ཡོད། དེ་དག་ཁྱེད་རྣམ་པས་དུས་རྒྱུན་དུ་ཐུགས་ལ་འཛིན་རྒྱུར་མ་འཆུགས། ང་སོང་བའི་རྗེས་སུ་འབོར་གི་མ་འཇུག ནང་ལྭའི་གློ་ཁུག་གི་རྐུབ་ནས་འབོར་དུ་མི་འཇུག་པར་ཚང་མས་དོ་ཏན་གྱིས་ཉར་ཚགས་བྱ་རྒྱུ་མ་འཆུགས། ༼དགོད་སྒྲ།༽

དེ་ནས་མཇུག་སྡུད་དུ་ངས་སྨོན་འདུན་གྱི་ཚིག་ཀ་གསུམ་ཞུ། དོན་དང་པོ་ཚོགས་གཙོའི་སྐུ་ཚེ་བརྟན་ཅིང་མཛད་འཕྲིན་རྒྱས་པའི་སྨོན་འདུན་ཞུ་བ་ཡིན། དོན་གཉིས་པ་དགེ་འདུན་པ་ཐམས་ཅད་ཚུལ་ཁྲིམས་རྣམ་པར་དག་པ་དང་ལྡན་ཞིང་ཤེས་རབ་ཕུན་སུམ་ཚོགས་པའི་ལས་ལ་བརྩོན་པའི་སྨོན་འདུན་ཞུ་བ་ཡིན། དོན་གསུམ་པ་ནི་མི་སྐྱ་ཕོ་མོ་རྣམས་ཀྱང་དཀོན་མཆོག་གསུམ་ལ་དད་པ་མི་ལྡོག་པ་དང་དགེ་བ་བཅུའི་ལམ་ལ་གནས་པར་འགྱུར་བའི་སྨོན་འདུན་ཞུ་བ་ཡིན།

དེ་ལྟར་དུ་འགྲུབ་པར་བྱེད་པ་ལ་རྒྱལ་བ་སྲས་བཅས་ཀྱིས་བྱིན་གྱིས་བརླབ་ཏུ་གསོལ་སྙམ་པའི་དགོངས་གསོལ་དང་། ཁྱེད་རྣམ་པས་ཀྱང་དེ་ལྟ་བུའི་རེ་སྨོན་ཐམས་ཅད་ཡོངས་སུ་འགྲུབ་པའི་མཐུན་འགྱུར་གནང་བར་མཛད་དུ་གསོལ་ཞེས་ཞུ་བ་ཡིན།

དྲན་ངོགས་ཀྱི་ནུབ་བསྐྱོད་ལས་ཡུལ་ཝ་ཧྲིང་ཐོན་གྱི་མཛད་རིམ་ལེགས་པར་གྲུབ་པའི་སྐབས་ཏེ་ལྔ་པའོ། །

འབབ་ཚུགས་དྲུག་པ། ཨ་རིའི་ཉིའུ་ཡོག

༼ ༨·༡~༨·༨ ༽

མཛད་རིམ།

ཕྱི་ཟླ་༨པའི་ཚེས་༡ཉིན། ཉིའུ་ཡོག་ཏུ་འབྱོར།

ཕྱི་ཟླ་༨པའི་ཚེས་༢ཉིན། དཔལ་དུས་ཀྱི་འཁོར་ལོའི་སྐོར་གྱི་ཆོས་ཁྲིད་གནང་།

ཕྱི་ཟླ་༨པའི་ཚེས་༣ཉིན། སྔ་དྲོར་མཉམ་འབྲེལ་རྒྱལ་ཚོགས་ཀྱི་སྤྱི་ཁྱབ་ཁང་དུ་བྱོན་པ་དང་། དགོང་མོར་འཇམ་དཔལ་ཞི་སྒྲུབ་ཀྱི་དབང་གནང་།

ཕྱི་ཟླ་༨པའི་ཚེས་༤ཉིན། སྔ་དྲོར་འཛམ་གླིང་ཉོ་ཚོང་ལྟེ་གནས་སུ་བྱོན་པ་དང་། དགོང་མོར་ཕུར་པ་མགུལ་ཁུག་མའི་དབང་གནང་།

ཕྱི་ཟླ་༨པའི་ཚེས་༥ཉིན། ཕུར་པའི་སྐོར་གྱི་སྤྱི་བསྒྲགས་གསུང་བཤད་གནང་།

ཕྱི་ཟླ་༨པའི་ཚེས་༦ཉིན། ཚིག་བདུན་གསོལ་འདེབས་ཀྱི་ཁྲིད་གནང་།

ཕྱི་ཟླ་༨པའི་ཚེས་༧ཉིན། སྔ་དྲོར་ལྕེ་བཙུན་སྙིང་ཐིག་གི་དབང་དང་། ཕྱི་དྲོར་ལྕེ་བཙུན་སྙིང་ཐིག་གི་ཁྲིད་གནང་།

ཕྱི་ཟླ་༨པའི་ཚེས་༨ཉིན། སྔ་དྲོ་དང་ཕྱི་དྲོ་གཉིས་སུ་ལྕེ་བཙུན་སྙིང་ཐིག་གི་ཁྲིད་གནང་།

ཉིའུ་ཡོག་གྲོང་ཁྱེར་དུ་འབྱོར་བ།

ཕྱི་ཟླ་༨པའི་ཚེས་༡ཉིན། ཆོས་རྗེ་ཉིད་ཨ་རིའི་ཆབ་སྲིད་ཀྱི་ལྟེ་གནས་རྒྱལ་ས་ཝ་ཧྲིང་ཐོན་དང་ཞལ་གྱེས་ཏེ། གནམ་གྲུར་བཞུགས་ནས་དུས་ཚོད་གཅིག་ཙམ་བསྐྱོད་པ་ན། ཨ་རིའི་དཔལ་འབྱོར་གྱི་ལྟེ་གནས་གྲོང་ཁྱེར་ཉིའུ་ཡོག་གི་ལཱ་ཀུར་དྷི་ཡ་གནམ་ཐང་（LaGuardia Airport）དུ་འབྱོར།

ཉིའུ་ཡོག་ནི་ཨ་རིའི་གྲོང་ཁྱེར་ཆེས་ཆེ་ཤོས་ཡིན་ལ། ཕྱི་ལོ་༡༧༨༩ལོར། ཨ་རིའི་སྲིད་འཛིན་ཐོག་མ་ལྗོར་ལྗི་ཝ་ཧྲིང་ཐོན་ཁྲི་འདོན་བྱས་ཏེ་རྒྱལ་སྲིད་སྐྱོང་སའི་གནས་སྐབས་ཀྱི་རྒྱལ་སའང་ཡིན། དུས་རབས་བཅུ་དགུ་པ་ནས་བཟུང་། ཐུན་མོང་མ་ཡིན་པའི་ས་ཁམས་གནས་སྟངས་ཀྱི་དབང་གིས། ཉིའུ་ཡོག་གྲོང་ཁྱེར་ནི་གནའ་ནས་ད་ལྟའི་བར་དུ་ཨ་རི་རྒྱལ་ཁབ་ཀྱི་དཔལ་འབྱོར་དང་དངུལ་རྩའི་དཀྱིལ་སྙིང་དང་ལྟེ་གནས་སུ་གྱུར་ཡོད་པར་མ་ཟད། འཁྲུག་ཆེན་གཉིས་པ་མཇུག་རྫོགས་རྗེས། འཛམ་གླིང་གི་དཔལ་འབྱོར་འཁོར་རྒྱུག་ཁྲོད་ཨ་སྒོར་གྱི་སྟངས་འཛིན་ནུས་པ་ཆེ་རུ་སོང་བ་དང་བསྟུན་ནས། གྲོང་ཁྱེར་འདིའང་འཛམ་གླིང་གི་དཔལ་འབྱོར་དང་དངུལ་རྩའི་ལྟེ་གནས་ཉིད་དུ་གྱུར། སྤྱི་ལེ་གྲུ་བཞི་མ་དྲུག་ཅུ་ཙམ་ལས་མེད་པའི་མན་ཧཱ་ཐིན་（Manhattan）གྱི་གླིང་ཕྲན་སྟེང་དུ། དངུལ་རྩ་དང་ཕྱི་ཕྱོགས་ཉོ་ཚོང་གི་སྡེ་ཁག་བགྲང་གིས་མི་ལང་བ་ཆགས་ཡོད་ཅིང་། འཛམ་གླིང་གི་ཆ་འཕྲིན་ཐམས་ཅད་གཅིག་ཏུ་འདུས་པའི་བང་མཛོད་ལྟ་བུའང་གནས་འདི་ཉིད་ཡིན་པས། ས་སྒང་རིལ་མོའི་སྟེང་དུ་གནས་ཚུལ་གང་བྱུང་ཐམས་ཅད་གྲོང་ཁྱེར་འདི་དང་དམ་པོར་འབྲེལ་ནས་ཡོད།

ཆོས་རྗེ་ཉིད་གྲོང་ཁྱེར་འདིའི་བྷ་ཝེ་རའེ་ཁྲོམ་ལམ་གྱི་ཁང་རྟགས་༢༢༢པར་（222 Bowery Street）བཞུགས། ཐོག་ཁང་དེ་དག་ལ་ལོ་ངོ་བརྒྱ་ཕྲག་གི་ལོ་རྒྱུས་ལྡན་པར་མ་ཟད། སྔོན་སྐད་གྲགས་ཅན་གྱི་སྒྱུ་རྩལ་པ་རྣམས་ཀྱི་སྡོད་གནས་ཡིན་པས། མི་རྣམས་ཀྱིས་དེ་ལ་བཙན་རྫོང་（bunker）ཞེས་འབོད་ཅིང་། ད་ལྟའི་བར་དུ་ཉིའུ་ཡོག་གྲོང་ཁྱེར་གྱི་མཚོན་བྱེད་བཟོ་བསྐྲུན་དུ་གྱུར་ཡོད། དུས་རབས་གོང་མའི་ལོ་རབས་བདུན་ཅུའི་ནང་། སྐྱབས་རྗེ་བདུད་འཇོམས་རིན་པོ་ཆེའི་སློབ་མ་ཞིག་གིས་གནས་ཁང་དེ་ཉོས་ནས་སྔ་འགྱུར་རྙིང་མའི་ཆོས་ཚོགས་སུ་བསྒྱུར་ཅིང་། མིང་ལའང་ཨོ་རྒྱན་ཆོས་ཚོགས་སམ་ཡེ་ཤེས་སྙིང་པོའི་ཆོས་ཚོགས་ཞེས་བཏགས་འདུག

ཆོས་རྗེ་ཉིད་ཀྱིས་གཟའ་འཁོར་གཅིག་གི་རིང་ལ་གནས་འདི་ནས་དབང་ཁྲིད་གནང་བ་ཡིན།

ཉིའུ་ཡོག་གི་མཛད་རིམ་རགས་བསྡུས།

ལོ་ངོ་སུམ་ཅུ་ཕྱིན་པའི་དེ་རིང་གི་དུས་སྐབས་འདིར། ཆོས་རྗེ་ཉིད་ཀྱིས་སྔོན་ཆད་ཉིའུ་ཡོག་དང་བྷོ་སི་ཐིན་（Boston）གྲོང་ཁྱེར་གཉིས་ཀྱི་ས་ཚིགས་སུ་གསུངས་པའི་འབྲེལ་ཡོད་རྒྱུ་ཆ་རྣམས་ད་ལྟ་སོ་སོར་འཐོར་སོང་རྐྱེན། ཕྱོགས་ཀུན་ལ་འདྲི་རྩད་གང་མང་བྱས་ཀྱང་ཉུང་ཙམ་ལས་ལག་སོན་མ་བྱུང་། ལག་སོན་བྱུང་བ་རྣམས་གཞིར་བཞག་གི་སྟེང་དུ། སྐབས་དེའི་མཛད་རིམ་རགས་བསྡུས་ཀྱི་བརྗེད་ཐོ་ཙམ་ཞིག་འདིར་བཀོད་པ་ཡིན། རྗེས་སུ་ཁོང་གི་གསུང་དག་མའི་སྒྲ་བརྙན་ཡིག་ཆ་སོགས་རྙེད་བྱུང་ན། མྱུར་དུ་ཁ་གསབ་བྱས་ཏེ་གཟིགས་མོར་དབུལ་ཆོག

ཕྱི་ཟླ་༨པའི་ཚེས་༢ཉིན། ཇོ་ནང་པའི་ཆོས་ཚོགས་སུ་དཔལ་དུས་ཀྱི་འཁོར་ལོའི་སྐོར་གྱི་ཆོས་ཁྲིད་གནང་།

ཕྱི་ཟླ་༨པའི་ཚེས་༣ཉིན། སྟོན་པའི་དྲིན་དྲན་གླིང་དུ་འཇམ་དཔལ་རྫོགས་པ་ཆེན་པོའི་དབང་གནང་།

ཕྱི་ཟླ་༨པའི་ཚེས་༤ཉིན། ཨོ་རྒྱན་ཆོས་ཚོགས་སུ་ཕུར་བ་མགུལ་ཁུག་མའི་དབང་གནང་།

ཕྱི་ཟླ་༨པའི་ཚེས་༥ཉིན། ཨོ་རྒྱན་ཆོས་ཚོགས་སུ་ཕུར་བའི་སྐོར་གྱི་སྤྱི་བསྒྲགས་གསུང་བཤད་གནང་།

ཕྱི་ཟླ་༨པའི་ཚེས་༦ཉིན། གུ་རུ་རིན་པོ་ཆེའི་ངོ་སྤྲོད་ཀྱི་ཁྲིད་གནང་།

ཕྱི་ཟླ་༨པའི་ཚེས་༧ཉིན། ཨོ་རྒྱན་ཆོས་ཚོགས་སུ། སྔ་དྲོར་ལྕེ་བཙུན་སྙིང་ཐིག་གི་དབང་དང་ཕྱི་དྲོར་ལྕེ་བཙུན་སྙིང་ཐིག་གི་ཁྲིད་གནང་།

ཕྱི་ཟླ་༨པའི་ཚེས་༨ཉིན། ཨོ་རྒྱན་ཆོས་ཚོགས་སུ་སྔ་དྲོ་དང་ཕྱི་དྲོ་གཉིས་སུ་ལྕེ་བཙུན་སྙིང་ཐིག་གི་ཁྲིད་གནང་།

ཉིའུ་ཡོག་བླ་རུང་མདོ་སྔགས་རིགས་པའི་ཆོས་ཚོགས།

ཆོས་རྗེ་ཉིད་ཉིའུ་ཡོག་ཏུ་བཞུགས་སྐབས། གནས་འདིའི་མི་རྣམས་ཀྱིས་ཐོས་བསམ་སྒོམ་གསུམ་ཆ་ཚང་བའི་སྒོ་ནས་མདོ་སྔགས་ཀྱི་ཆོས་ཉམས་ལེན་བྱ་བདེ་བའི་ཆེད་དུ། བླ་རུང་གི་ཡན་ལག་ཆོས་ཚོགས་ཤིག་གཟུག་པའི་ཐུགས་དགོངས་ཡོད་ཚུལ་བདག་ལ་གསུངས།

ང་ལ་ས་ཆ་འདིར་ཆ་རྒྱུས་མེད་ཅིང་སྐད་ཀྱང་ཆེར་མི་འཕྲོད་མོད། འོན་ཀྱང་ཕྱི་རྒྱལ་ནས་ཆོས་ཚོགས་ཐོ་འགོད་བྱེད་པར་དེ་ཙམ་དཀའ་ལས་མི་འདུག་པས། བདག་གིས་འབྲེལ་ཡོད་དད་ལྡན་འགའ་དང་ཐེངས་མང་དུ་གྲོས་བསྡུར་བྱས་ཏེ། ཉིན་ཁ་ཤས་ཀྱིས་མདོ་སྔགས་ཆོས་ཚོགས་ཐོ་འགོད་དང་འདུ་ཁང་གཏན་ཁེལ་སོགས་ཀྱི་བྱ་བ་ལེགས་གྲུབ་བྱུང་ནས། མིང་ལའང་བླ་རུང་མདོ་སྔགས་རིགས་པའི་ཆོས་ཚོགས་ཞེས་བཏགས། དེར་ཞུགས་མི་སྣ་རྣམས་དང་འབྲེལ་འདྲིས་སྟབས་བདེ་བའི་ཆེད། ཚོགས་མི་ཕལ་ཆེར་རྒྱ་ནག་པས་གྲུབ་ཡོད།

ཆོས་ཚོགས་ལེགས་པར་གྲུབ་རྗེས། ཆོས་རྗེ་ཉིད་སྐུ་དངོས་སུ་དེར་བྱོན་ནས་འཇམ་དཔལ་ཡེ་ཤེས་སེམས་དཔའི་དབང་དང་བྱིན་རླབས་གནང་། བླ་རུང་མདོ་སྔགས་རིགས་པའི་ཆོས་ཚོགས་གསར་དུ་ཚུགས་པའི་སྐོར་ཉིའུ་ཡོག་འཛམ་གླིང་ཚགས་པར་དང་ཉིའུ་ཡོག་གཟའ་འཁོར་དུས་དེབ་སོགས་ཀྱི་པར་ངོས་དང་པོར་བཀོད་འདུག

ཆོས་ཚོགས་འདི་ལས་གཉེར་ཡུན་རིང་བྱས་པའི་རྗེས་སུ། འཕྲིན་སྐྱེལ་སྟབས་མི་བདེ་བ་སོགས་རྒྱུ་རྐྱེན་འགའ་ཡིས་རྒྱུན་སྐྱོང་མ་ཐུབ་ཀྱང་། ཐོག་མའི་རྟེན་འབྲེལ་འདི་ཡིས། མི་རྣམས་ལ་རྗེ་ཉིད་ཀྱི་ཆོས་བརྒྱུད་ལ་འབྲེལ་བ་དང་ཐར་བའི་ས་བོན་འཇོག་པར་ནུས་པ་ཆེན་པོ་ཐོན། ད་ལྟ་ཡང་མི་མང་པོས་བླ་རུང་དང་འབྲེལ་བའི་ནང་ཆོས་ལ་མུ་མཐུད་དུ་ཐོས་བསམ་བྱས་ཏེ་ཤུགས་རྐྱེན་ལེགས་པོ་ཐེབས་པར་ཐོས།

མཉམ་འབྲེལ་རྒྱལ་ཚོགས་ཀྱི་སྤྱི་ཁྱབ་ཁང་དུ་གཟིགས་སྐོར་ལ་ཕེབས་པ།

ཆོས་རྗེ་ཉིད་ལ་མཉམ་འབྲེལ་རྒྱལ་ཚོགས་ཀྱི་དྲུང་ཡིག་གཞོན་པ་སྐུ་ཞབས་མཱོ་རའེ་སི་བྲང་（Maurice Strong）གིས་བསྐུར་བའི་འཕྲིན་ཡིག་འབྱོར་ཏེ། མཉམ་འབྲེལ་རྒྱལ་ཚོགས་ཀྱི་སྤྱི་ཁྱབ་བཀོད་འདོམས་ཁང་（United Nations Headquarters）དུ་གཟིགས་སྐོར་ལ་ཕེབས་པར་གདན་ཞུ་བྱས་ཤིང་། འབྲུག་རྒྱལ་ཁབ་ཀྱི་གཞུང་ཚབ་ཁང་ལ་སྣེ་ལེན་བྱེད་པར་མངགས་བཅོལ་གནང་འདུག

ཕྱི་ཟླ་༨པའི་ཚེས་༣ཉིན། ཆོས་རྗེ་ཉིད་མཉམ་འབྲེལ་རྒྱལ་ཚོགས་ཀྱི་སྤྱི་ཁྱབ་ཁང་དུ་བྱོན། ཐོག་ཁང་གི་མདུན་ཕྱོགས་སུ། སྐབས་དེའི་མཉམ་འབྲེལ་རྒྱལ་ཚོགས་ཀྱི་ཁོངས་ཞུགས་རྒྱལ་ཁབ་༡༨༤ཡི་༼ད་ལྟ་ཁོངས་ཞུགས་རྒྱལ་ཁབ་༡༩༣ཡོད་༽རྒྱལ་དར་རྣམས་གྲལ་འགྲིག་པོར་བསྒྲེངས་ཤིང་། དེ་དག་གི་དཀྱིལ་དུ་མཉམ་འབྲེལ་རྒྱལ་ཚོགས་ཀྱི་དར་ཆ་བསྒྲེངས་ནས་འདུག

འབྲུག་རྒྱལ་ཁབ་ཀྱི་སྐུ་ཚབ་པ་རྣམས་ཀྱི་སྣེ་ཁྲིད་འོག ཆོས་རྗེ་ཉིད་ཀྱིས་དྲུང་ཡིག་ཐོག་ཁང་དང་ཚོགས་ཁང་ཆེན་མོ། གྲོས་མོལ་ཐོག་ཁང་། དཔེ་མཛོད་ཁང་སོགས་སུ་རིམ་པ་བཞིན་དུ་གཟིགས་སྐོར་གནང་། ལྷག་པར་དུ་ངེད་ཅག་ལ་གསེར་གྱི་གཏན་སྲོལ་ཞེས་པའི་མོ་སེ་ཁིའམ་རྒྱན་ཕག་（mosaic）རི་མོ་སྐད་གྲགས་ཆེ་བ་ཞིག་ངོ་སྤྲོད་བྱས་སོང་། སྒྱུ་རྩལ་བརྩམས་ཆོས་འདི་ལས། རིགས་རྒྱུད་དང་པགས་མདོག དད་མོས་སོགས་ཐ་དད་པའི་མི་རྣམས་འཆམ་མཐུན་མཉམ་གནས་ཡོང་བ་དང་། ཞི་བདེ་དང་བརྩི་བཀུར་གྱིས་འཚོ་བའི་ཁེ་དབང་འདྲ་མཉམ་དུ་ཡོད་པ་བསྟན་ཡོད་པར་བཤད། རི་མོ་དེའི་ངོས་སུ་དབྱིན་ཡིག་གི་ལམ་ནས། ཕ་རོལ་པོས་ཁྱོད་ལ་ཇི་ལྟར་བྱས་ན་དགའ་བ་ནང་བཞིན། ཁྱོད་ཀྱིས་ཀྱང་ཕ་རོལ་པོར་དེ་ལྟར་བྱ་དགོས་（Do unto others, as you would have them do unto you.）ཞེས་བཀོད་འདུག

དེ་ནས་ཆོས་རྗེ་ཉིད་ཀྱིས་མཉམ་འབྲེལ་རྒྱལ་ཚོགས་ཀྱི་ཚོགས་ཁང་ཆེན་མོའམ། རྒྱལ་ཁབ་སོ་སོའི་འཐུས་མི་རྣམས་ལྷན་ཅིག་ཏུ་འཚོགས་སའི་ཚོགས་ཁང་དུ་གཟིགས་མོ་གནང་། ཉིན་དེར་ཚོགས་འདུ་གང་ཡང་མེད་པར་སྟོང་ལྷང་ངེར་འདུག་ནའང་། ཁོང་ཐུགས་ཤིན་ཏུ་སྤྲོ་བའི་ངང་ནས་འཛམ་གླིང་ཞི་བདེ་ཡོང་བར་ཐུགས་བསྐྱེད་དང་སྨོན་ལམ་རྒྱ་ཆེར་གནང་ཞིང་། ངེད་ཅག་སྐུ་འཁོར་རྣམས་དང་མཉམ་གཅིག་ཏུ་དབང་སྡུད་གསོལ་འདེབས་ཀྱང་གསུངས།

ཧཱ་ཝར་ཌི་སློབ་ཆེན་གྱི་དགེ་རྒན་ཆེན་མོ་ཞིག་གི་ཕྱིར་དྲན།

ཧཱ་ཝར་ཌི་སློབ་ཆེན་དུ་དགེ་རྒན་ཆེན་མོ་ལྗ་ནའེ་ཐུ་རྒྱ་མཚོ་（Janet Gyatso）ཟེར་བ་ཞིག་ཡོད་ཅིང་། བདག་ཐེངས་གཉིས་ལ་ཧཱ་ཝར་ཌི་སློབ་ཆེན་དུ་ནང་ཆོས་འཆད་ཁྲིད་བྱེད་དུ་འགྲོ་སྐབས། སྔ་གཞུག་ཏུ་ཁོང་གིས་སྣེ་ལེན་བྱས་པ་ཡིན། ཕྱི་ལོ་༡༩༩༣ལོར། མོས་ཆོས་རྗེ་ཉིད་ཞལ་མཇལ་མྱོང་བ་མ་ཟད་ཆོས་ཁྲིད་སྐད་སྒྱུར་ཡང་བྱས་མྱོང་། ཉེ་ཆར་བདག་གིས་ཁོང་ལ་བཅར་འདྲི་བྱས་ཤིང་། ཕྱིར་དྲན་གྱི་དོན་ཕལ་མོ་ཆེ་ཡིག་ཐོག་ཏུ་བཀོད་པ་འདི་ལྟ་སྟེ།

སྐབས་དེར་ང་རང་ལཱན་ཧྥོ་སི་ཐྲེར་སློབ་ཆེན་（Lan Foster University）དུ་སློབ་ཁྲིད་བྱེད་བཞིན་ཡོད་པ་ལས་ཧཱ་ཝར་ཌི་སློབ་ཆེན་དུ་ལས་སྤོར་བྱས་མེད། ཆོས་རྗེ་མཆོག་གི་སྐད་སྒྱུར་བའི་ཕ་རྒན་ན་ནས་ཕ་ཡུལ་དུ་སྐོར་རྒྱག་ཏུ་འགྲོ་དགོས་བྱུང་བས། ཉིའུ་ཡོག་ཏུ་བཞུགས་པའི་དུས་སྐབས་ངེས་ཅན་གྱི་རིང་ལ་ངས་ཁོང་ལ་སྐད་སྒྱུར་བྱས་པ་ཡིན། ཁོང་གི་གསུང་སྐད་ནི་མགོ་ལོག་གི་འབྲོག་སྐད་རེད་འདུག ངས་བོད་སྐད་ཧ་ཅང་ཡག་པོ་མི་ཤེས་ཀྱང་། ཁོང་ནི་གོ་སླ་བའི་ཚིག་གིས་བརྡ་སྤྲོད་པར་ཤིན་ཏུ་མཁས་ཤིང་རིགས་ལམ་གྱི་འཁོར་ཕྱོགས་ཀྱང་ཧ་ཅང་གསལ་བས། ཅི་གསུངས་རྣམས་བདེ་བླག་ཏུ་ཤེས་ཐུབ་པ་བྱུང་།

ཁོང་ནི་སྐུ་གཟུགས་ཧ་ཅང་སྟོབས་ཤིང་ཆེ་བ་ཞིག་རེད། ངས་ཐེངས་དང་པོར་ཁོང་མཇལ་བ་ན། གཟི་བརྗིད་ཆེ་བའི་སྐུ་གཟུགས་ཀྱི་བཀོད་པས་ང་རང་ཧ་ལས་སུ་བཅུག

སྐབས་དེར་ངས་རིག་འཛིན་འཇིགས་མེད་གླིང་པའི་རྣམ་ཐར་དབྱིན་ཡིག་ཏུ་བསྒྱུར་ནས་པར་སྐྲུན་བྱ་བར་སྟ་གོན་བྱེད་བཞིན་པའི་སྒང་ཡིན་པས། ངས་ཁོང་ལ་དཔེ་ཆ་དེ་དང་འབྲེལ་བའི་དྲི་བ་མང་པོ་བཏོན་པ་ཡིན། དེ་ལས་དྲི་བ་གཅིག་ནི་ད་ལྟའང་གསལ་པོར་དྲན་ཀྱིན་འདུག འཇིགས་མེད་གླིང་པའི་རང་རྣམ་ལ་དེབ་གཉིས་ཡོད་པ་ལས། གཅིག་གི་མིང་ལ་མཁའ་འགྲོའི་གསང་གཏམ་ཆེན་མོ་ཞེས་བཏགས་འདུག་པས། ངས་ཆོས་རྗེ་མཆོག་ལ་འཇིགས་མེད་གླིང་པ་སྐྱེས་པ་ཡིན་བཞིན་དུ། ཁོང་གི་རྣམ་ཐར་ལ་བུད་མེད་ཀྱི་གསང་གཏམ་ཆེན་མོ་ཞེས་འདོགས་དགོས་དོན་ཅི་ཡིན་ཞེས་དྲིས་པ་ན། ཁོང་གིས་ཤིན་ཏུ་ཞིབ་ཕྲའི་སྒོ་ནས་འགྲེལ་བཤད་གསལ་པོ་གནང་སོང་བས། ངའི་ཡིད་ཀྱི་ཐེ་ཚོམ་ཐམས་ཅད་རྨེག་མེད་དུ་བཏང་།

དེ་རྗེས་ཀྱི་ཉིན་ཞིག་ལ། ཆོས་རྗེ་མཆོག་ངེད་ཅག་མི་ལྔ་དྲུག་ཙམ་དང་མཉམ་དུ་མཉམ་འབྲེལ་རྒྱལ་ཚོགས་ཀྱི་སྤྱི་ཁྱབ་བཀོད་འདོམས་ཁང་ལ་གཟིགས་སྐོར་དུ་སོང་། མཉམ་འབྲེལ་རྒྱལ་ཚོགས་སུ་འཛམ་གླིང་གི་རྒྱལ་ཁབ་སོ་སོ་ནས་ཡོང་བའི་སྐུ་ཚབ་སྡེ་ཁག་ཡོད་པ་ལས། ཆོས་རྗེ་མཆོག་ལ་འབྲུག་རྒྱལ་ཁབ་ཀྱི་སྐུ་ཚབ་པས་སྣེ་ལེན་བྱས་ཤིང་ཚོགས་ཁང་གི་ཕྱོགས་ཀུན་ཏུ་གཟིགས་སྐོར་ལ་ཁྲིད། ཁོང་གིས་དེར་རྒྱལ་ཁབ་སོ་སོའི་སྐུ་ཚབ་རྣམས་ཀྱིས་མཉམ་དུ་གྲོས་མོལ་བྱ་སའི་ཚོགས་ཁང་ཆེན་མོ་ཞིག་འདུག་པ་གཟིགས་ཚེ། འདི་འདྲའི་རྒྱལ་ཁབ་མང་པོའི་སྐུ་ཚབ་རྣམས་མཉམ་གཅིག་ཏུ་འཛོམས་ནས། གནད་དོན་སྣ་ཚོགས་གྲོས་མོལ་བྱེད་པ་ནི་ཆེས་ལེགས་པར་མཐོང་ཞེས་བསྟོད་བསྔགས་གནང་ཞིང་། འབྲུག་རྒྱལ་ཁབ་ཀྱི་སྐུ་ཚབ་རྣམས་ལ། འོས་འདེམས་དང་གྲོས་མོལ་ཇི་ལྟར་བྱེད་ཚུལ་སོགས་མཉམ་འབྲེལ་རྒྱལ་ཚོགས་ཀྱི་འགྲོ་སྟངས་སྐོར་ལ་རྒྱུས་ལོན་ཞིབ་ཕྲ་མཛད།

མ་གཞི་ཁོང་ནི་ཧ་ཅང་རླབས་ཆེ་བའི་སྐྱེས་ཆེན་ཞིག་རེད། གཞན་མང་པོ་མ་སྨོས་ཀྱང་། བླ་རུང་ལྔ་རིག་ནང་བསྟན་སློབ་གླིང་ཕྱག་བཏབ་གནང་བ་འདི་ཁོ་ནའང་འགྲན་པའི་ཟླ་དང་བྲལ་བའི་མཛད་པ་ཞིག་ཡིན་ཏེ། བླ་རུང་གི་གཞི་རྒྱ་ཆེ་ཞིང་ནུས་སྟོབས་ཁྱད་དུ་འཕགས་པས་བོད་བརྒྱུད་ནང་བསྟན་སྤྱི་ལ་ཤུགས་རྐྱེན་གལ་ཆེན་ཐེབས་ཡོད་པར་མ་ཟད། ལྷག་པར་དུ་བླ་རུང་ན་བླ་སེར་དང་བཙུན་མ་མང་པོ་ཡོད་པས་ཀྱང་། བོད་བརྒྱུད་ནང་བསྟན་ཡུན་དུ་གནས་པར་གལ་ཆེ་བའི་ཕན་ནུས་ཐོན་འདུག

གཞན་ཡང་གླེང་རིན་ཆེ་བ་ཞིག་ལ། བླ་རུང་གི་ཨཱརྱ་ཏཱ་རེའི་ཆོས་ཚོགས་ཀྱི་མཁན་མོ་རྣམས་ཀྱིས་བོད་ཀྱི་བུད་མེད་དམ་པ་དག་གི་གསུང་ཆོས་བསྡུ་སྒྲིག་དཔེ་ཡག་པོ་གནང་འདུག་ལ། དེ་ཡིས་བོད་བརྒྱུད་ནང་བསྟན་ལ་བྱས་རྗེས་ཆེན་པོ་བཞག་འདུག ཁོང་ཚོས་དེ་ལྟ་བུའི་བྱ་བ་རླབས་ཆེན་འགྲུབ་པ་དེ་ཡང་། ཆོས་རྗེ་མཆོག་གི་བྱིན་རླབས་དང་ཐུགས་བསྐྱེད་ཀྱི་མཐུ་ལས་བྱུང་བ་རེད་སྙམ།

འཛམ་གླིང་ཉོ་ཚོང་ལྟེ་གནས་སུ་ཕྱིན་པ།

ཕྱི་ཟླ་༨པའི་ཚེས་༤ཉིན། ཆོས་རྗེ་ཉིད་སྐད་གྲགས་ཆེ་བའི་འཛམ་གླིང་ཉོ་ཚོང་ལྟེ་གནས་ཀྱི་ཆ་གཅིག་ཐོག་ཁང་（World Trade Center）ལ་གཟིགས་སྐོར་དུ་བྱོན། རྩེ་མོ་ཨ་སྔོན་དབྱིངས་སུ་ཟུག་པ་ལྟ་བུའི་ཐོག་ཁང་འདི་གཉིས་ལ། བརྩེགས་རིམ་བརྒྱ་དང་བཅུ། མཐོ་ཚད་ལ་སྨི་བཞི་བརྒྱ་བཅུ་བདུན་ཡོད། དེ་ནི་འཛམ་གླིང་ལ་ལྟ་བའི་སྒེའུ་ཁུང་ཞེས་གྲགས་པ་ནང་བཞིན། སྐབས་དེའི་འཛམ་གླིང་སྟེང་གི་ཆེས་མཐོ་བའི་འཛུགས་སྐྲུན་དུ་གྱུར་བར་མ་ཟད། ཨ་རི་རྒྱལ་ཁབ་ཀྱི་ཕུན་སུམ་ཚོགས་པའི་དར་རྒྱས་ཀྱི་མཚོན་རྟགས་སུའང་གྱུར་ཡོད།

ཐོག་ཁང་འདིའི་མདུན་ཐང་དུ། མི་ཚོགས་ཀྱི་འདུ་བ་རྒོད་པའི་དྲན་རྟེན་ཚོང་ཁང་སྣ་ཚོགས་ཡོད་ཅིང་། ངེད་ཅག་དེར་སོང་བ་ན། སྤྲོ་འཁྱམ་པ་དག་གིས་སྲིད་འཛིན་ཁཱི་ལིན་ཐོན་གྱི་འདྲ་གཟུགས་སྣ་ཚོགས་ཀྱི་འགྲམ་དང་། མགོ་བོ་ཁཱི་ལིན་ཐོན་དང་ལུས་པོ་ཁྱི་ཡི་དབྱིབས་ཅན་སོགས་ལ་ཞོན་ནས་རྣམ་འགྱུར་སྣ་ཚོགས་སྟོན་བཞིན་འདྲ་པར་ལེན་མཁན་མང་དུ་མཆིས། དེ་མིན་ཁཱི་ལིན་ཐོན་ལ་དམའ་འབེབས་བྱེད་པའི་རྩེད་ཆས་ཀྱང་མང་པོ་འཚོང་བཞིན་འདུག ངེད་ཅག་གིས་ཆོས་རྗེ་ཉིད་ལ་སྐུ་པར་ལེན་པའི་རེ་བ་ཞུས་པ་ལྟར། ཁོང་གིས་ཕྱག་གཡས་ཁཱི་ལིན་ཐོན་གྱི་ཕྲག་མགོར་བཞག་ནས་དྲན་རྟེན་གྱི་འདྲ་པར་བསྐྱོན།

དེ་ནས་ངེད་ཅག་གློག་སྐས་ལ་བསྡད་དེ་ཐད་ཀར་ཁང་བརྩེགས་བརྒྱ་དང་བཅུ་པའི་སྟེང་དུ་སོང་ཞིང་། དེར་རྒྱང་ཤེལ་མང་ཙམ་ཡོད་པར་ཚང་མས་རེས་མོས་སུ་བལྟས་པ་ན། འཛམ་གླིང་གི་དངུལ་རྩའི་གྲོང་ཁྱེར་ཉིའུ་ཡོག་གི་བཀོད་པ་གསལ་བར་མཐོང་ཐུབ། སླར་ཡང་ཁང་བརྩེགས་ཀྱི་ཡང་སྟེང་དུ་སོང་བ་ན། དེ་ནི་ལྷག་ཏུ་ཁད་ཡངས་མོ་ཡིན་ལ་མན་ཧཱ་ཐིན་གྱི་གྲོང་ཁྱེར་ཧྲིལ་པོ་མིག་འོག་ཏུ་ཚུད་པར་མ་ཟད། ཐག་མི་རིང་བའི་མཚམས་ཀྱི་རང་དབང་ལྷ་མོའི་འདྲ་སྐུ་ལའང་ལྟད་མོར་རོལ་ཆོག འདྲ་སྐུ་དེ་ནི་ཧྥ་རན་སི་རྒྱལ་ཁབ་ཀྱིས་ཨ་རི་རྒྱལ་ཁབ་དབུ་བརྙེས་ནས་ལོ་བརྒྱ་ལོན་པར་ལེགས་སྐྱེས་སུ་ཕུལ་བ་ཡིན་ལ། ད་ལྟ་ཨ་རིའི་མཚོན་རྟགས་དང་འཛམ་གླིང་སྟེང་རང་དབང་མཚོན་བྱེད་ཀྱི་བརྐོས་བརྙན་གྲགས་ཆེ་ཤོས་སུ་གྱུར་ཡོད།

འཛམ་གླིང་ཉོ་ཚོང་ལྟེ་གནས་ནི་ཤིན་ཏུ་ངོ་མཚར་ཆེ་བའི་འཛུགས་སྐྲུན་ཞིག་སྟེ། ཨ་སྒོར་དུང་ཕྱུར་བརྒྱ་དང་ལྔ་བཅུ་ང་ལྔ་ཙམ་འགྲོ་གྲོན་དུ་བཏང་ནས་ལོ་བདུན་གྱི་རིང་འཛུགས་སྐྲུན་བྱས་ནས་གྲུབ་པ་རེད། གང་གིས་ཀྱང་མི་ཚུགས་པའི་བརྟན་ཅིང་བརླིང་བའི་ཐོག་ཁང་མཐོན་པོ་དེ་ལྟ་བུ་ཡང་། མཐར་ཕྱི་ལོ་༢༠༠༡ལོའི་ཟླ་༩པའི་ཚེས་༡༡ཉིན། འཇིགས་སྐུལ་རིང་ལུགས་པའི་ཐོལ་རྒོལ་ཐེབས་ཏེ་ཆུ་ཚོད་གཉིས་ཙམ་གྱི་རིང་ལ་ཐལ་བ་རྡུལ་དུ་བརླགས། ཕྱིས་སུ་ཉིའུ་ཡོག་གྲོང་ཁྱེར་གྱི་སྲིད་འཛིན་སྡེ་ཁག་གིས། འཛམ་གླིང་ཉོ་ཚོང་ལྟེ་གནས་ཀྱི་ཐོག་ཁང་སླར་ཡང་འཛུགས་སྐྲུན་བྱ་རྒྱུའི་འཆར་གཞི་བཞག་སྟེ། ཐོག་ཁང་ལྔ་དང་འདས་གྲོངས་སུ་སོང་བ་དག་ལ་དྲན་རྟེན་ཁང་བཅས་བཞེངས་ཤིང་། ད་ལྟ་འཛུགས་སྐྲུན་དེ་དག་གྲུབ་ལ་ཉེ་བར་གྱུར་འདུག

སྐབས་དེ་དུས་ཀྱི་འཛམ་གླིང་ཉོ་ཚོང་ཐོག་ཁང་ཆེན་མོ་ད་ལྟ་རྡུལ་དུ་བརླགས་ཟིན་ལ། ཆོས་རྗེ་ཉིད་ཀྱང་ང་ཚོ་དང་བྲལ་ནས་ལོ་ཉི་ཤུ་སོང་འདུག་ཀྱང་། དེ་དུས་དྲན་རྟེན་དུ་བསྒྲོན་པའི་སྐུ་པར་རྣམས་ནི་བདག་གིས་ད་དུང་ཡང་ཉར་ཚགས་བྱས་ནས་ཡོད།

བླ་རུང་གི་དགེ་བསྙེན་ཆོས་ཚོགས་ཀྱི་བྱུང་བ།

ང་ཚོ་བོད་ཡུལ་དུ་མི་སེར་ཡོངས་རྫོགས་ཆོས་ལ་དད་མཁན་ཤ་སྟག་ཡིན་ཡང་། ཁྱིམ་པ་རྣམས་མཉམ་གཅིག་ཏུ་ཚོགས་ནས་ནང་ཆོས་སློབ་སྦྱོང་བྱེད་པའི་སྲོལ་རྒྱུན་ཆེར་མེད། ཉིན་ཞིག་ཆོས་རྗེ་ཉིད་ཀྱིས། བདག་ལ་སྔགས་སྲུང་མས་དབུགས་དབྱུང་གནང་སྟེ། བླ་རུང་ནས་དགེ་བསྙེན་གྱི་ཆོས་སྡེ་ཞིག་བཙུགས་ན་དད་ལྡན་གྱི་ཁྱིམ་པ་མང་པོར་ཕན་ཐོགས་ཤིང་ཐར་ལམ་ཟིན་པར་འགྱུར་བར་ལུང་བསྟན་པས། ཕྱིར་རང་ཡུལ་དུ་ལོག་རྗེས་དགེ་བསྙེན་གྱི་ཆོས་སྡེ་ཞིག་གཟུག་རྒྱུ་ཡིན་ཞེས་ངེད་ཅག་འགའ་ལ་གློ་བུར་དུ་གསུངས།

བདག་གིས་ཆོས་རྗེ་ཉིད་ལ་ལུང་བསྟན་དེ་སྔགས་སྲུང་མ་སྐུ་དངོས་སྣང་ནས་གསུངས་སམ་ཉམས་དང་རྨི་ལམ་དུ་བྱུང་ཞེས་འདྲི་མ་སྤོབས་ཀྱང་། གསུང་དེ་ཐོས་མ་ཐག་སེམས་པ་ཤིན་ཏུ་དགའ་བར་གྱུར། ངའི་ཕ་མ་གཉིས་ཀྱང་སྐབས་དེར་གསེར་རྟ་རུ་ཡོད་ཅིང་། ཕྱིར་ལོག་སྐབས་ཕ་ཡུལ་དུ་སོང་མ་ཚར་ན་བླ་རུང་ནས་སྡོད་དུ་འཇུག་དགོས་སྙམ་ཞིང་། རྗེ་ཉིད་ལ་རྟེན་འབྲེལ་ཡོད་ཤས་ཆེ་བས། ངས་ཀྱང་ཕ་མ་གཉིས་དགེ་བསྙེན་ནང་དུ་འཇོག་ཨེ་ཐུབ་བལྟ་རྒྱུ་ཡིན་ཞེས་ཞུས།

སྟོན་ཁར་རྗེ་ཉིད་ཕྱིར་བླ་རུང་ལ་བྱོན་རྗེས། བླ་རུང་ལུང་པའི་སྨད་ཕྱོགས་སུ་ས་དཔྱད་མཛད་དེ་དགེ་བསྙེན་གྱི་གཙུག་ལག་ཁང་བཞེང་བའི་དབུ་བརྩམས། དེ་ནི་བོད་ཡུལ་གྱི་ཁྱིམ་པ་རྣམས་ཀྱི་གཙུག་ལག་ཁང་དང་པོ་དེ་ཡང་ཡིན་ཤས་ཆེ། ཐོག་མར་གནས་དེར་ངའི་ཕ་མ་དང་བཅས་དགེ་བསྙེན་ཁྱིམ་ཚང་བཞི་ཙམ་ལས་མེད་ཀྱང་། གཙུག་ལག་ཁང་འཛོམས་རྗེས་རིམ་གྱིས་ཆོས་པ་ཇེ་མང་དུ་གྱུར་ནས་དགེ་བསྙེན་གྱི་ཆོས་སྡེའི་གཞི་རྒྱ་ཆེ་རུ་སོང་། ཆོས་སྡེ་འདི་ནས་ཁྱིམ་པ་རྣམས་ཀྱིས་ནང་ཆོས་ཉམས་ལེན་ལ་འབད་བརྩོན་བྱས་པས། འཆི་ཁར་གྲུབ་པའི་རྟགས་མཚན་སྣ་ཚོགས་ཐོན་མཁན་ཡང་མང་དུ་བྱུང་།

རྗེས་སུ་བོད་ཡུལ་གྱི་ས་ཆ་མང་པོ་ཞིག་གིས་འདི་ལ་དཔེར་བྱས་ཏེ། དགེ་བསྙེན་གྱི་ཆོས་སྡེ་བཙུགས་ནས་ཁྱིམ་པ་རྣམས་ཀྱིས་མཉམ་དུ་ནང་ཆོས་ཉམས་ལེན་བྱེད་པའི་སྲོལ་བཟང་ཆགས།

རླངས་འཁོར་ཁ་ལོ་པ་ཞིག་གི་ཕྱིར་དྲན།

མ་གཞི་ཆོས་རྗེ་མཆོག་གིས་ཉིའུ་ཡོག་གྲོང་ཁྱེར་དུ་ཆོས་ཁྲིད་གསུངས་བའི་རྒྱུ་ཆ་ཅི་ཡང་ལག་སོན་མ་བྱུང་མོད། འོན་ཀྱང་སྟབས་ལེགས་པ་ཞིག་ལ། སྐབས་དེར་ང་ཚོའི་རླངས་འཁོར་ཁ་ལོ་པ་སྐུ་ཞབས་ཨེ་བོན་（Yvon Chausseblanche）གྱིས་ཆོས་ཁྲིད་འགའ་ཞིག་ཁོ་རང་སྒེར་གྱི་སྒྲ་ཐག་ཏུ་ཕབ་འདུག་པ་རྣམས་རྙེད་སོང་། དེ་དག་ལས་ཀྱང་ཆོས་ཁྲིད་ཀྱི་སྒྲ་ཕལ་ཆེ་བ་ལོ་མང་འགོར་བའི་དབང་གིས་གསལ་པོར་ཚོར་ཐབས་མེད་ཀྱང་། ཅུང་ཟད་གོ་ཐུབ་པའི་ཆོས་ཐུན་གཅིག་འདིར་བཀོད་པ་ཡིན། ང་ཚོས་སྐུ་ཞབས་ཨེ་བོན་ལ་བཀའ་དྲིན་ཞུ་བ་དང་མཉམ་དུ་ཁོང་ལ་བཅར་འདྲི་ཐེངས་གཅིག་བྱས་པ་ཡིན། ཁོང་གིས་ཆོས་རྗེ་མཆོག་གི་སྐོར་གླེང་བ་ན། དད་པ་ཤུགས་དྲག་པོའི་ངང་མིག་ནས་མཆི་མ་འཐོར་བཞིན་སེམས་འགུལ་ཐེབས་པའི་སྒོ་ནས་འདི་ལྟར་བཤད།

ཆོས་རྗེ་མཆོག་ཉིའུ་ཡོག་ལ་བྱོན་སྐབས་ཀྱི་སྡོད་གནས་ནི་བྷ་ཝེ་རའེ་ཁྲོམ་ལམ་གྱི་ཁང་རྟགས་༢༢༢པ་ཡིན་ལ། དེ་ནི་སྒྱུ་རྩལ་པ་མང་པོའི་འདུ་ལོང་ཆེ་ཞིང་བསྟན་འཛིན་གྱི་སྐྱེས་བུ་མང་པོར་སྣེ་ལེན་བྱ་ཡུལ་ཞིག་ཀྱང་ཡིན།

གཟའ་འཁོར་དེའི་ནང་དུ། ངས་དུས་ཚོད་མང་ཆེ་བར་ཆོས་རྗེ་མཆོག་དང་སྐུ་འཁོར་རྣམས་ཀྱི་བཞུགས་འཁོར་ཁ་ལོ་པའི་ལས་འགན་ཁུར་བ་ཡིན། ནམ་རྒྱུན། ཆོས་རྗེ་མཆོག་དང་སྐུ་འཁོར་རྣམས་ཆོས་ཚོགས་སུ་བསྐྱལ་ནས་རླངས་འཁོར་ལས་བབས་རྗེས། ངས་ཐོག་མར་རླངས་འཁོར་འཁོར་ལྷས་སུ་བཞག་ནས་གཟོད་ཆོས་གསུང་སའི་ཚོགས་ཁང་དུ་ཕྱིན་པ་ཡིན་ལ། ཁོང་ཉིའུ་ཡོག་ལ་བྱོན་པའི་གོ་སྐབས་ཧ་ཅང་དཀོན་མོ་ཡིན་རྒྱུ་རེད་སྙམ་ནས། སྒྲ་ཕབ་ཆས་ཤིག་གྲ་སྒྲིག་བྱས་ཏེ་ཁོང་གི་གསུང་ཚང་མ་སྒྲ་འཇུག་བྱས། འོན་ཀྱང་། སྐབས་འགར་རླངས་འཁོར་འཇོག་པར་དུས་ཡུན་ངེས་ཅན་འགོར་འགྲོ་བས། གསུང་ཁ་ཚང་བར་སྒྲ་འཇུག་བྱེད་མ་ཐུབ་པའི་ཁར། གྲལ་མཐའ་ནས་སྒྲ་ཕབ་པ་ལ་ཙག་སྒྲ་མང་དུ་འདྲེས་ནས་སེམས་ཚིམ་པོ་ཞིག་ཡོང་མེད།

ཆོས་རྗེ་མཆོག་གིས་དབང་གནང་བ་ན། ང་རང་ལ་འཇམ་དཔལ་དབྱངས་དངོས་ཀྱིས་དབང་སྐུར་བཞིན་པའི་སྣང་བ་ཤར་བ་ཡིན། ཁོང་གིས་གཏེར་ཆོས་དེ་བཞེས་ནས་ཡུན་རིང་མ་འགོར་བ་ཡིན་ཚོད་འདུག རྗེས་སུ་ང་རང་བྷོ་སི་ཐིན་ལ་སོང་ནས་དབང་ཞུ་སྐབས། ཁོང་གིས་རི་བོ་རྩེ་ལྔ་ནས་གཏེར་བཞེས་པའི་སྐོར་གྱི་སྐུ་པར་ཞིག་ཀྱང་རྙེད་བྱུང་།

ལྕེ་བཙུན་སྙིང་ཐིག་གི་དབང་སྐུར་སྐབས་སྐད་རིགས་གསུམ་ལ་བསྒྱུར་ཏེ་གསུངས་ཤིང་། དེ་ལས་རྒྱ་སྐད་དུ་སྒྱུར་མཁན་ནི་མཁན་པོ་བསོད་དར་རྒྱས་རེད། ཆོས་རྗེ་མཆོག་གིས་ངེས་འབྱུང་སྒོམ་ཐབས་གསུངས་རྗེས་ཚང་མར་སྒོམ་རྒྱག་ཏུ་བཅུག ཅུང་ཙམ་འགོར་རྗེས། ཁོང་གི་ཞལ་ནས། དེ་རིང་ང་ཚོའི་ཚོགས་རར་ནུབ་ཕྱོགས་པ་དང་བོད་རིགས། རྒྱ་རིགས་བཅས་འདུས་ཡོད་པ་ལས། རིགས་གཅིག་གིས་ལུས་པོ་དང་མགོ་བོ་གཉིས་ཀ་མི་འགུལ་བར་མཉམ་པར་བཞག་འདུག རིགས་གཅིག་གིས་མགོ་བོ་མི་འགུལ་ཡང་མིག་གིས་ཕར་ལྟ་ཚུར་ལྟ་བྱེད་ཀྱིན་འདུག ཡང་རིགས་གཅིག་གིས་ནི་མགོ་དང་ལུས་པོ་གཉིས་ཀ་འགུལ་བཞིན་འདུག་པས་ཅུང་ཟད་མི་བཟང་བའི་ཆ་རེད། ཁྱེད་ཚོས་རང་ཉིད་རིགས་གང་དུ་གཏོགས་པ་ཨེ་ཁེད་ལྟོས་གསུངས་པ་ན། ཚོགས་ར་ཡོངས་སུ་དགོད་སྒྲས་གང་བར་གྱུར། དེ་ནི་སྐབས་དེར་ང་ལ་བཞག་པའི་བརྗེད་པར་དཀའ་བའི་བག་ཆགས་ཤིག་ཡིན།

ཆོས་རྗེ་ཉིད་ཉིའུ་ཡོག་ཏུ་བཞུགས་པའི་ཉིན་ཐ་མའི་དུས་སུ། ངས་ཁོང་མྱུར་དུ་ས་ཆ་འདི་ནས་ཕེབས་རན་པ་རེད་ཨང་སྙམ་ནས། བུ་ཆུང་ཨ་མ་དང་འབྲལ་བ་ལྟར་སྡུག་བསྔལ་ཞིང་ངུས་པ་ཡིན། ཁོང་བྷོ་སི་ཐིན་ལ་བྱོན་ནས་ཉིན་གཉིས་འགོར་རྗེས། ངས་བླ་མ་ཁོང་ཧ་ཅང་དྲན་དྲགས་པས། མགོ་ཁྲིད་ལ་དགོངས་པ་ཞུས་ཤིང་འཕྲུལ་རྟར་ཞོན་ཏེ་བྷོ་སི་ཐིན་གྱི་ཕྱོགས་སུ་བསྐྱོད། ཉིན་དེར་གནམ་གཤིས་མི་ལེགས་ཤིང་དྲག་ཆར་རྒྱུན་ཆད་མེད་པར་བབས་པས། ལམ་བར་ནས་ཟམ་འོག་ཏུ་ཆར་ཡིབ་བྱེད་ཞོར་བྷོ་སི་ཐིན་ལ་སླེབས་སོང་།

སྐལ་བ་བཟང་པོ་ཞིག་ལ། ཆོས་རྗེ་མཆོག་གིས་དབང་གནང་བ་དག་ང་ལ་སླར་ཡང་ཐོབ་སོང་བར་མ་ཟད། ང་ཚོ་འགའ་ཞིག་གིས་རེ་བསྐུལ་ཞུས་པ་ལྟར། ཆེད་དུ་ཆོས་ཁྲིད་དང་ལུང་འགའ་ཞིག་ཀྱང་གསུངས་བྱུང་བས་སེམས་འགུལ་ཚད་མེད་པ་ཐེབས། སྐབས་དེར་ཁོང་གི་སྐུ་ལུས་མི་བདེ་ཞིང་སྙུང་གཞི་ཅུང་ཙམ་ཚབས་ཆེ་བར་གྱུར་པས། ཅུང་མིན་ན་ལས་རིམ་ཕྱི་མ་རྣམས་ཀྱང་བསྟུང་དགོས་ཐུག་པ་སོགས་ཕྱིས་སུ་ད་གཟོད་ཤེས་པ་ཡིན། ཁོང་གིས་ང་ཚོ་ལ་ཐུགས་རྗེ་ཆེན་པོས་གཟིགས་ཏེ་རེ་བ་ཡོངས་སུ་བསྐང་བ་ནི་ཆེས་ངོ་མཚར་ཞིང་ཡིད་འགུལ་ཐེབས་པ་ཞིག་རེད།

གུ་རུ་རིན་པོ་ཆེའི་ངོ་སྤྲོད།

ཕྱི་ཟླ་༨པའི་ཚེས་༦ཉིན། ཆོས་རྗེ་ཉིད་ཀྱིས་ཨོ་རྒྱན་ཆོས་ཚོགས་སུ་གུ་རུ་རིན་པོ་ཆེའི་སྒྲུབ་ཐབས་གསུངས། ཆོས་ཐུན་འདིའི་ནང་དོན་ནི་དཀའ་ཁག་མང་དུ་བརྒྱུད་ནས་རྙེད་པ་ཡིན་ལ། གསུང་ཆོས་ཀྱི་རྒྱུ་ཆ་མཁོ་སྤྲོད་གནང་མཁན་ནི་སྐབས་དེར་ཆོས་རྗེ་ཉིད་ཀྱི་བཞུགས་འཁོར་ཁ་ལོ་པ་ཡིན། ཁོང་ནམ་རྒྱུན་རླངས་འཁོར་འཇོག་ཏུ་འགྲོ་དགོས་པས། ཆོས་ཁྲིད་ཀྱི་མགོའི་ཆ་ཤས་ཉུང་ཙམ་ཆད་འདུག་ཀྱང་ནང་དོན་ཕལ་ཆེར་ཁ་ཚང་བས། འདིར་ཡི་གེར་བཀོད་དེ་ཀུན་ལ་མིག་དང་སེམས་ཀྱི་དགའ་སྟོན་དུ་ཕུལ་བ་ལགས།

བསམ་པ་དེ་ཡང་ཇི་ལྟར་བཅོས་པར་བྱ་ཞེ་ན། བསམ་པ་རྒྱ་ཆེ་བ་བྱང་ཆུབ་སེམས་ཀྱི་ཀུན་སློང་དང་། ཐབས་རྒྱ་ཆེ་བ་གསང་བ་སྔགས་ཀྱི་ཀུན་སློང་རྣམ་པ་གཉིས་གང་རུང་གི་སྒོ་ནས་འཆོས་པར་བྱ་དགོས་པ་ཡིན། བསམ་པ་རྒྱ་ཆེ་བ་བྱང་ཆུབ་སེམས་ཀྱི་ཀུན་སློང་དེ་ཇི་ལྟ་བུ་ཞིག་ཡིན་སྙམ་ན། ནམ་མཁས་གར་ཁྱབ་སེམས་ཅན་གྱིས་ཁྱབ། སེམས་ཅན་གྱིས་གར་ཁྱབ་ལས་དང་ཉོན་མོངས་པས་ཁྱབ། ལས་དང་ཉོན་མོངས་པས་གར་ཁྱབ་ཀྱི་སེམས་ཅན་རྣམས་ལ་སྡུག་བསྔལ་མུ་མཐའ་མེད་པས་ཁྱབ་ཡོད། སྡུག་བསྔལ་མུ་མཐའ་མེད་པ་ལ་སྤྱོད་པའི་སེམས་ཅན་རྣམས་ཀྱང་ཐོག་མ་མེད་པའི་དུས་ནས་རང་གི་ཕ་མ་མ་བྱས་པ་གཅིག་ཀྱང་མེད་ཚུལ་བཅོམ་ལྡན་འདས་ཀྱིས་མདོ་སྡེ་རྣམས་སུ་གསལ་པོར་གསུངས་ཡོད། ཕ་མར་གྱུར་པའི་དུས་སུ་ད་ལྟའི་ཕ་མ་དང་ཁྱད་མེད་པར་བསམ་པ་དཀར་པོ་དང་སྤྱོད་པ་བཟང་པོའི་སྒོ་ནས་དྲིན་ཆེན་པོས་བསྐྱངས་པ་ཤ་སྟག་ཡིན། དྲིན་ཆེན་པོས་བསྐྱངས་པའི་སེམས་ཅན་དེ་དག་ཐམས་ཅད་ཀྱིས་འདོད་པ་བདེ་བ་འདོད་ཀྱང་བདེ་བའི་རྒྱུ་དགེ་བ་ནི་བསྒྲུབ་མི་ཤེས། མི་འདོད་པ་སྡུག་བསྔལ་ཡིན་ཡང་སྡུག་བསྔལ་གྱི་རྒྱུ་དང་དུ་བླངས་ནས་ཞེ་འདོད་དང་ལག་ལེན་གཉིས་རྒྱབ་འགལ་དུ་གྱུར་པ་རེད།

དེ་བས་སྡུག་བསྔལ་དང་ལྡན་པའི་སེམས་ཅན་དེ་དག་ཐམས་ཅད་སྡུག་བསྔལ་དང་བྲལ་བར་གྱུར་ན་ཅི་མ་རུང་སྙམ་པའི་བསམ་པ་བཟང་པོ་རེ་བསྐྱེད་དགོས་པ་ཡིན། སྡུག་བསྔལ་དང་བྲལ་ན་སྙམ་པའི་བློ་དེ་ཡང་སེམས་ཅན་དེ་དག་ལུས་བདེ་བ་དང་སེམས་སྐྱིད་པ་སོགས་ཕུན་སུམ་ཚོགས་པའི་བདེ་བ་ལ་དགོད་དགོས་སྙམ་པའི་བསམ་པ་བཟང་པོ་བསྐྱེད་དགོས། བདེ་བ་དང་ལྡན་པའི་རྟེན་དེ་ཡང་ངན་སོང་གནས་གསུམ་ལྟ་བུ་ལ་ནི་བདེ་བའི་གོ་སྐབས་ཤིག་རྩ་བ་ནས་མེད་ཅིང་། མཐོ་རིས་ལྷ་མིའི་ལུས་རྟེན་རྐྱང་བ་ལ་བདེ་བ་མྱོང་དགོས་པ་ཡིན་མོད། འོན་ཀྱང་ལྷ་དང་མིའི་བདེ་བ་ཡང་གནས་སྐབས་བདེ་བ་ཙམ་དུ་སྣང་ཡང་། དོན་དུ་མི་རྟག་པ་དང་འགྱུར་བའི་སྡུག་བསྔལ་ལས་མ་འདས་པ་ཡིན་པས་དེ་ལ་ཡང་སྙིང་པོ་མེད། དེའི་ཕྱིར་ན་སེམས་ཅན་ཐམས་ཅད་གནས་སྐབས་ལྷ་དང་མིའི་བདེ་བ་ཙམ་ལ་བཀོད་ན་ཡང་ཕན་འབྲས་ཆེན་པོ་ཞིག་མེད་པ་ཤེས་དགོས། འཁོར་བའི་རྒྱུ་ལས་དང་ཉོན་མོངས་པ། དེའི་འབྲས་བུ་སྡུག་བསྔལ་ཐམས་ཅད་དང་བྲལ་བ་ཉན་ཐོས་དང་རང་སངས་རྒྱས་ཀྱི་གོ་འཕང་ཐོབ་ན་ཡང་རང་དོན་དུ་བདེ་བ་ཕུན་སུམ་ཚོགས་པ་ཡོད་ཀྱང་། གཞན་དོན་རྒྱ་ཆེན་པོ་བསྒྲུབ་པའི་གོ་སྐབས་མེད་པའི་ཕྱིར་ན། དེ་ལ་སེམས་ཅན་ཐམས་ཅད་བཀོད་ཀྱང་ཕན་འབྲས་ཆེན་པོ་མེད་པར་ཤེས་དགོས། དེས་ན་བདག་མེད་རྟོགས་པའི་ཤེས་རབ་ཀྱིས་སྲིད་པའི་སྡུག་བསྔལ་ཐམས་ཅད་རྩ་བ་ནས་སྤོང་པ་དང་། སྙིང་རྗེ་ཆེན་པོས་ཞི་མཐའ་ལ་མི་གནས་པར་ནམ་མཁའ་ཇི་སྲིད་དུ་སེམས་ཅན་གྱི་དོན་མཛད་པ་སྟེ། སྲིད་ཞི་གཉིས་ཀྱི་མཐའ་ལ་མི་གནས་པ་རྫོགས་པའི་སངས་རྒྱས་ཀྱི་གོ་འཕང་ལ་སེམས་ཅན་ཐམས་ཅད་དགོད་པར་བྱའོ་སྙམ་དུ་བྱང་ཆུབ་མཆོག་ཏུ་སེམས་བསྐྱེད་དགོས།

དེ་ལྟ་བུའི་སངས་རྒྱས་ཀྱི་གོ་འཕང་ཡང་རྒྱུ་མེད་རྐྱེན་མེད་དུ་འབྱུང་བ་མ་ཡིན་པར་དེ་འགྲུབ་པར་བྱེད་པའི་རྒྱུ་ཕུན་སུམ་ཚོགས་པ་ལ་བསླབ་དགོས། རྒྱུ་ཕུན་སུམ་ཚོགས་པ་གང་ཞེ་ན། ཚུལ་ཁྲིམས་ཕུན་སུམ་ཚོགས་པ་དང་། ཏིང་ངེ་འཛིན་ཕུན་སུམ་ཚོགས་པ། ཤེས་རབ་ཕུན་སུམ་ཚོགས་པ་སྟེ་རྣམ་པ་གསུམ་ལ་བསླབ་དགོས་པ་ཡིན།

དང་པོ་ཚུལ་ཁྲིམས་རྣམ་པར་དག་པ་ཇི་ལྟར་སྲུང་བར་བྱེད་ཅེ་ན། གཞན་ལ་གནོད་པ་རྩ་བ་ནས་སྤོང་བར་བྱེད་པ་ནི་སོ་སོར་ཐར་བའི་ཚུལ་ཁྲིམས་ཞེས་བྱ་བ་ཡིན། བསྐལ་མང་གི་ཡུན། འགྲོ་མང་གི་གྲངས། བྱ་དཀའ་བའི་གནས་ལ་སོགས་པ་ལ་མི་འཇིགས་མི་སྐྲག་པར་སེམས་ཅན་ཐམས་ཅད་ལ་ཕན་པ་དང་བདེ་བ་སྒྲུབ་པར་བྱེད་པ་ནི་བྱང་ཆུབ་སེམས་དཔའི་ཚུལ་ཁྲིམས་ཡིན། རང་དང་གཞན་གྱི་དོན་རྒྱ་ཆེན་པོ་བདེ་མྱུར་དུ་སྒྲུབ་པར་བྱེད་པ་ནི་གསང་སྔགས་རྡོ་རྗེ་ཐེག་པའི་ཚུལ་ཁྲིམས་ཡིན།

དེ་ཡང་བདེ་མྱུར་ཞེས་པའི་བདེ་བ་ནི་འདོད་ཡོན་ལྔ་པོ་མ་སྤངས་པར་ཅི་དགར་ལོངས་སུ་སྤྱོད་བཞིན་དུ་སེམས་ཀྱི་བདེ་བ་རྒྱ་ཆེན་པོ་ཐོབ་པར་བྱེད་པའི་ཐབས་དེ་ཡིན། མྱུར་བ་ནི་ཡུན་རིང་པོའི་ཚེགས་ལ་མི་ལྟོས་པར་སྙིགས་དུས་ཀྱི་ཚེ་ཐུང་གཅིག་ལ་སངས་རྒྱས་རྡོ་རྗེ་འཆང་གི་སྐུ་འགྲུབ་པར་བྱེད་པའི་ལམ་ཡིན།

སེམས་རྩེ་གཅིག་ཏུ་གནས་པར་བྱེད་པ་ལ་ཏིང་ངེ་འཛིན་ཞེས་བྱ། སེམས་གནས་པར་བྱེད་པའི་མན་ངག་ནི་ཉེས་པ་ལྔ་སྤངས། འདུ་བྱེད་བརྒྱད་བསྟེན། སེམས་གནས་པའི་ཐབས་དགུ་ལ་བསྟེན་ནས་སེམས་གནས་དགོས། དེ་དག་གི་འབྲས་བུ་ནི་མཐར་གྱིས་གནས་པའི་སྙོམས་པར་འཇུག་པ་དགུ་ཞེས་བྱ་ཞིང་། རྒྱས་པར་བྱམས་པ་མགོན་པོའི་གཞུང་ལས་ཇི་ལྟར་གསུངས་པ་བཞིན་དུ་ཤེས་པར་བྱ། མན་ངག་གི་དབང་དུ་བྱས་ན། རང་གི་སེམས་ཀྱིས་སེམས་ལ་བལྟས་ཏེ་རང་བབས་སུ་བཞག་ནས་རྣམ་རྟོག་ཐམས་ཅད་རིམ་གྱིས་ཞི་རུ་འཇུག་པའི་བློ་དེ་ཡིན།

ཤེས་རབ་ཅེས་བྱ་བ་ལ་ཐོས་པའི་ཤེས་རབ་དང་བསམ་པའི་ཤེས་རབ། སྒོམ་པའི་ཤེས་རབ་སྟེ་རྣམ་པ་གསུམ་ཡོད། ཐོས་པའི་ཤེས་རབ་ནི། མཚན་ཉིད་དང་ལྡན་པའི་བླ་མའི་མདུན་ནས་མདོ་སྔགས་ཀྱི་ཆོས་སྤྱི་དང་། ཁྱད་པར་དུ་རང་གིས་གང་ཉམས་སུ་བླང་བའི་ཆོས་དེ་གསལ་བོར་ཐོས་པ་ལས་བྱུང་བའི་བློ་དེ་ལ་ཟེར། བསམ་པའི་ཤེས་རབ་ནི། གང་ཐོས་པའི་ཆོས་དེ་དག་གི་ཚིག་དང་དོན་གྱི་ཆ་ལ་ཡང་ནས་ཡང་དུ་དཔྱད་ནས། མ་རྟོགས་ལོག་རྟོགས་ཐེ་ཚོམ་གྱི་མུན་པ་ཐམས་ཅད་བསལ་ཏེ་གནས་ལུགས་ཀྱི་དོན་ལ་ངེས་པ་འདྲོང་བའི་བློ་དེ་ལ་ཟེར། སྒོམ་པའི་ཤེས་རབ་ནི། གང་ཐེ་ཚོམ་ཆོད་པའི་དོན་དེ་རང་གི་རྒྱུད་ལ་ཡང་ནས་ཡང་དུ་སྦྱར་ཞིང་ཉམས་སུ་ལེན་པའི་བློ་དེ་ལ་ཟེར། སངས་རྒྱས་འཐོབ་པར་བྱེད་པའི་རྒྱུ་ཚུལ་ཁྲིམས་ཏིང་འཛིན་ཤེས་རབ་ཀྱི་བསླབ་པ་གསུམ་ཉམས་སུ་ལེན་པ་ཡིན།

ད་རེས་ཀྱི་སྐབས་སུ་བབ་པ་ནི། ཆོས་རྣམ་དག་ཅིག་རང་གིས་ཉམས་སུ་བླང་བར་བགྱིའོ་སྙམ་དུ་ཀུན་སློང་བཅོས་ནས་ཆོས་མཉན་དགོས་པ་ཡིན།

དེ་ནས་ཐབས་རྒྱ་ཆེ་བ་གསང་བ་སྔགས་ཀྱི་ཀུན་སློང་ནི། ཕུན་སུམ་ཚོགས་པ་ལྔས་གསལ་བཏབ་ནས་མཉན་དགོས་པ་ཡིན། ཕུན་སུམ་ཚོགས་པ་ལྔ་ནི། ཆོས་འཆད་ཉན་བྱེད་པའི་གནས་སྐབས་འདིར་མཚོན་ན། གནས་ཕུན་སུམ་ཚོགས་པ་ཟངས་མདོག་དཔལ་གྱི་རི་བོ་པདྨ་འོད་ཀྱི་ཕོ་བྲང་དངོས་ཡིན་སྙམ་པ་དང་། སྟོན་པ་ཕུན་སུམ་ཚོགས་པ་ཆོས་འཆད་པ་པོའི་གང་ཟག་དེ་ཡང་ཨོ་རྒྱན་པདྨ་འབྱུང་གནས་དངོས་ཡིན་སྙམ་པའི་དད་གུས་དང་ལྡན་པའི་སྒོ་ནས་མཉན། ཆོས་ཕུན་སུམ་ཚོགས་པ་གསང་སྔགས་རྡོ་རྗེ་ཐེག་པའི་ལམ་གང་ཞིག ཟབ་པ་དང་རྒྱ་ཆེ་བའི་ཆོས་ཚུལ་རྨད་དུ་བྱུང་བ་ཡིན་པ་ལ་ཡིན་པར་ཤེས་པའི་བློ་བཞག་ནས་མཉན། དུས་ཕུན་སུམ་ཚོགས་པ་སྐལ་བ་དང་ལྡན་པའི་གང་ཟག་ནམ་གནས་ཀྱི་བར་དུ། འཕྲིན་ལས་དུས་ལས་མི་ཡོལ་བར་ཆོས་འཆད་པའི་རང་བཞིན་ཅན་ཡིན་པར་ཤེས་པའི་སྒོ་ནས་མཉན། འཁོར་ཕུན་སུམ་ཚོགས་པ་ཉན་པ་པོའི་གང་ཟག་རྣམས་འཁོར་རིག་འཛིན་དཔའ་བོ་དཔའ་མོའི་རང་བཞིན་ཡིན་པར་ཤེས་པའི་སྒོ་ནས་མཉན་དགོས་པ་ཡིན།

ཐོག་མར་ཁྱེད་རྣམས་ཀྱིས་དེ་ལྟ་བུའི་མདོ་སྔགས་ཀྱི་ཀུན་སློང་རྣམ་པ་གཉིས་བཅོས་ནས་གང་གསན་པར་བྱ་བའི་ཆོས་ནི། དེ་ཡང་ཁྱེད་རང་རྣམས་སྐྱེ་བོ་གཞན་དང་མི་འདྲ་བར་ཆོས་སྒྲུབ་པའི་མཐུན་རྐྱེན་རྣམ་པ་བཞི་ཚང་བ་ལ་དགའ་སྤྲོ་བསྐྱེད་དགོས། མཐུན་རྐྱེན་བཞི་ནི། སྐྱེ་བར་དཀའ་བ་ལྷོ་རྒྱལ་འཛམ་བུ་གླིང་དུ་སྐྱེ་བ་བླངས་པ་ལ་དགའ་བ་དང་སྤྲོ་བ་བསྐྱེད་པ་དང་། འཛམ་བུ་གླིང་གི་མི་ལུས་ཐོབ་པ་ཙམ་དུ་མ་ཟད་སྐྱེས་བུ་དམ་པ་དང་ཆོས་སྟོན་པའི་བླ་མ་དགེ་བའི་བཤེས་གཉེན་དང་འཕྲད་པ་འདི་ཡང་སྐལ་བ་བཟང་པོ་ཡིན་པར་ཤེས་དགོས། དེ་ལྟ་བུའི་མཐུན་རྐྱེན་སྔ་མ་གཉིས་འགྲུབ་པར་བྱེད་པའི་རྒྱུ་ནི་སྔོན་གྱི་དུས་སུ་བདག་ཉིད་ལེགས་པར་སྨོན་པ་དང་། བསོད་ནམས་བསགས་པའི་གྲུབ་འབྲས་ད་ལྟ་མངོན་དུ་གྱུར་བས་ཁྱེད་རྣམས་ཀྱིས་དགའ་སྤྲོ་ཁྱད་པར་ཅན་བསྐྱེད་དགོས་ཤིང་། དེ་ལྟ་བུའི་མཐུན་རྐྱེན་ཕུན་སུམ་ཚོགས་པ་དང་ལྡན། རང་ཡང་སྐྱེ་བོ་ཕལ་བ་གཞན་དང་མི་འདྲ་བར་ཆོས་ལ་མོས་པ་ཡོད་པ་ཡང་ཆོས་སྒྲུབ་པའི་མཐུན་རྐྱེན་ཁྱད་པར་ཅན་ཡིན། དེས་ན་ཆོས་སྒྲུབ་པར་བྱེད་པ་ལ་མཐུན་རྐྱེན་དེ་བཞི་ངེས་པར་ཚང་དགོས། ཁྱེད་རྣམ་པ་ལ་མཐུན་རྐྱེན་ཆེན་པོ་དེ་དག་ཀྱང་ཚང་འདུག

མཐུན་རྐྱེན་ཆེན་པོ་བཞི་ཚང་ཡང་མི་ཞེས་པ་ནི་ངེས་པར་འཆི་བ་དང་ནམ་འཆི་ཆ་མེད་ཀྱི་བདག་ཉིད་ཅན་ཡིན་པའི་ཕྱིར་དང་། འཆི་བའི་ཚེ་ན་ཆོས་མིན་པ་གང་གིས་ཀྱང་ཕན་པ་མེད་པས། ད་ལྟ་ཉིད་ནས་ཆོས་རྣམ་པར་དག་པ་ཞིག་བསྒྲུབ་དགོས། དེས་ན་སངས་རྒྱས་ཀྱི་ཆོས་དེ་ཡང་གང་ཟག་གི་ཁམས་རབ་འབྲིང་ཐ་མ་དང་། དབང་པོ་ཡང་རབ་འབྲིང་ཐ་མ། མོས་པ་ཡང་རབ་འབྲིང་ཐ་མ་མང་པོ་ཡོད། དེའི་ཕྱིར་ན་ཁམས་དབང་མོས་པ་བསམ་པའི་བྱེ་བྲག་གིས་བཅོམ་ལྡན་འདས་ཀྱིས་ཆོས་ཀྱི་སྒོ་མོ་བརྒྱད་ཁྲི་བཞི་སྟོང་གསུངས་ཡོད་ཀྱང་། དེ་ཚང་མ་ཉམས་སུ་ལེན་ཤེས་རྒྱུ་མ་རེད་ལ་ཉམས་སུ་ལེན་ཡང་མི་དགོས། དེ་དག་ཐམས་ཅད་ཀྱི་གནད་གཅིག་ཏུ་བསྡུས་པ་སྙིང་རྗེ་དང་དད་པ་འདི་གཉིས་ཁོ་ན་སྒོམས་དང་དེས་ཆོག མཐའ་ཡས་པའི་སེམས་ཅན་ཐམས་ཅད་ཀྱི་ལུས་ཀྱི་ན་ཚ་དང་སེམས་ཀྱི་སྡུག་བསྔལ་ལ་སོགས་པ་ཡོངས་སུ་ཞི་བར་བྱ་བའི་ཐབས་ལ་ཡང་ནས་ཡང་དུ་བརྩོན་པར་བྱ་བ་ནི་སྙིང་རྗེ་ཡིན། སེམས་ཅན་གྱི་སྡུག་བསྔལ་ཞི་བར་བྱ་བའི་ཐབས་སུ་སངས་རྒྱས་དང་བྱང་ཆུབ་སེམས་དཔའ་རྣམས་ལ་དད་པ་བཞག གསོལ་བ་བཏབ་ན་སེམས་ཅན་གྱི་སྡུག་བསྔལ་སེལ་ཐུབ་རྒྱུ་རེད་མ་གཏོགས། རང་བཞིན་རྒྱུ་མེད་རྐྱེན་མེད་ཀྱིས་སེམས་ཅན་གྱི་སྡུག་བསྔལ་བྲལ་སོང་ན་བསམ་ན་ཡང་དེ་ཙམ་གྱིས་ཞི་བར་མི་འགྱུར།

གུ་རུའི་ཐུན་མིན་གྱི་ཡོན་ཏན།

སངས་རྒྱས་དང་བྱང་ཆུབ་སེམས་དཔའ་རྣམས་ལ་གསོལ་བ་འདེབས་དགོས་ན། ད་ལྟ་རང་རེ་རྣམས་ལ་སྣང་བའི་དམ་པའི་ཆོས་ཀྱི་ནང་དུ་ཡོད་པའི་སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་མཚན་རྐྱང་པ་བརྗོད་དགོས་ན་ཡང་བརྗོད་ཐུབ་རྒྱུ་མ་རེད། དེས་ན་སངས་རྒྱས་དང་བྱང་ཆུབ་སེམས་དཔའ་ཐམས་ཅད་གཅིག་ཏུ་འདུས་པའི་ངོ་བོ་དེ་གང་ཡིན་ན་བླ་མ་ཨོ་རྒྱན་ཆེན་པོ་རེད། ཨོ་རྒྱན་ཆེན་པོ་ལ་གསོལ་བ་རྩེ་གཅིག་ཏུ་བཏབ་ན་དེའི་ནང་དུ་མ་འདུས་པ་གང་ཡང་མེད། ཨོ་རྒྱན་རིན་པོ་ཆེ་ནི་ཆོས་སྐུའི་སངས་རྒྱས་ཐམས་ཅད་ཀྱི་ཐུགས་དགོངས་ལས་ཤར། ལོངས་སྐུའི་སངས་རྒྱས་ཐམས་ཅད་ཀྱིས་བྱིན་གྱིས་བརླབས། སྤྲུལ་སྐུའི་སངས་རྒྱས་ཐམས་ཅད་ཀྱིས་རྒྱལ་ཚབ་ཏུ་མངའ་གསོལ་བ་ཡིན།

ཨོ་རྒྱན་རིན་པོ་ཆེ་སངས་རྒྱས་ཐམས་ཅད་འདུས་པའི་ངོ་བོ་ཇི་ལྟར་ཡིན་སྙམ་ན། ཨོ་རྒྱན་རིན་པོ་ཆེ་ནི་གདུལ་བྱ་རྣམས་ཀྱི་བསོད་ནམས་རྣམ་པར་དག་པ་དུས་སུ་སྨིན་པའི་མཐུ་ལས། དུས་གསུམ་གྱི་སངས་རྒྱས་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་མཐའ་དག་གཅིག་ཏུ་བསྡུས་ནས་ཡི་གེ་ཧྲཱིཿ ཡི་རྣམ་པར་སངས་རྒྱས་འོད་དཔག་མེད་ཀྱི་ཐུགས་ཀར་བསྡུས་པ་ཡིན། ཡི་གེ་ཧྲཱིཿ ཡིག་དེ་ཉིད་ཨོ་རྒྱན་ལྷོ་ནུབ་འོ་མ་ཅན་གྱི་རྒྱ་མཚོའི་ནང་དུ་ཕ་ཡི་རྒྱུ་དང་མ་ཡི་རྐྱེན་ལས་མ་བསྐུལ་བར་རང་བྱུང་རིག་པ་ཐོལ་སྐྱེས་ཀྱི་ཚུལ་དུ་བརྫུས་ཏེ་བལྟམས་པ་ཡིན། དེའི་སྐབས་སུ་ཁོང་གི་སྐུ་ལུས་ཀྱང་ཆོས་སྐུ་རྡོ་རྗེ་འཆང་དང་དབྱེར་མེད་པའི་རྣམ་པ་ཅན། མཁའ་འགྲོ་དང་དཔའ་བོ་རྣམས་ཀྱིས་རིགས་ཀྱི་བདག་པོ་ཉིད་དུ་མཆོད་ཅིང་བཀུར་བསྟི་བྱེད་པའི་གནས་སུ་གྱུར་པ་ནི་ཨོ་རྒྱན་མཚོ་སྐྱེས་རྡོ་རྗེ་ཞེས་བྱ་བ་ཡིན། ཨོ་རྒྱན་གྱི་རྒྱལ་པོ་ཨིནྟྲ་བོ་དྷིས་འགྲོ་བ་མཐའ་དག་གི་དབུལ་བའི་སྡུག་བསྔལ་བསལ་བར་བྱ་བའི་ཕྱིར་དུ་རྒྱ་མཚོའི་གླིང་དུ་ནོར་བུ་ལེན་དུ་སོང་བའི་གནས་སྐབས་ན། ལམ་བར་ནས་ལྷོ་ནུབ་འོ་མ་ཅན་གྱི་རྒྱ་མཚོའི་ནང་ནས་སྤྲུལ་པའི་སྐུ་དང་འཕྲད་དེ་རྒྱལ་པོའི་བུ་སྐལ་དུ་གདན་དྲངས། རྒྱལ་ཚབ་ཏུ་བསྐོས། རྒྱལ་སྲིད་ཚང་མ་ལ་མངའ་དབང་བསྒྱུར། རྒྱལ་སྲིད་ཆོས་བཞིན་དུ་སྐྱོང་བའི་རྒྱལ་པོའི་ཆ་བྱད་དང་ལྡན་པ་ལ་པདྨ་རྒྱལ་པོ་ཞེས་མཚན་གསོལ་བ་ཡིན། དེ་ནས་རྒྱལ་སྲིད་སྤངས་ཏེ་རིག་པ་བརྟུལ་ཞུགས་ཀྱི་སྤྱོད་པས་དུར་ཁྲོད་ཆེན་པོ་བརྒྱད་ལ་སོགས་པར། དཔའ་བོ་དང་མཁའ་འགྲོ་མ་ཐམས་ཅད་ལ་ཐེག་པ་ཆེན་པོའི་ཆོས་ཀྱི་འཁོར་ལོ་བསྐོར་བའི་གནས་སྐབས་ན་གུ་རུ་ཉི་མ་འོད་ཟེར་ཞེས་བྱ་ལ། འགྲོ་འདུག་གི་དུས་སུ་ཉི་མའི་ཟེར་ལ་ཆིབས་ནས་རླུང་བཞིན་ཐོགས་པ་མེད་པར་རྒྱུ་བའི་རྫུ་འཕྲུལ་དང་ལྡན་པ་ཡིན། སློབ་དཔོན་པྲ་བྷ་ཧསྟི་སོགས་རྒྱ་གར་གྱི་གྲུབ་ཆེན་བརྒྱད་ལ་སོགས་པ་བསྟེན་ནས་ཐུན་མོང་དང་ཐུན་མོང་མ་ཡིན་པའི་གཞུང་ལུགས་རབ་འབྱམས་ལ་མཁས་པའི་ཤེས་རབ་དང་ལྡན་པ་ལ་སློབ་དཔོན་བློ་ལྡན་མཆོག་སྲེད་ཅེས་བྱ་བའི་མཚན་བཏགས་པ་ཡིན། ཨ་སུ་ར་ཡི་བྲག་ཕུག་ཏུ་བཅོམ་ལྡན་འདས་ཀྱི་ཉེར་གནས་ཀུན་དགའ་བོའི་དྲུང་དུ་རབ་ཏུ་བྱུང་སྟེ་ཚུལ་ཁྲིམས་རྣམ་པར་དག་པ་བསྲུངས་ནས་དགེ་སློང་གི་ཚུལ་འཛིན་པ་ནི་དགེ་སློང་པདྨ་སཾ་བྷ་ཝ་ཞེས་ཡོངས་སུ་གྲགས་པ་ཡིན། རྡོ་རྗེ་གདན་དུ་བྱོན་པའི་གནས་སྐབས་ན་སྐུ་ལུས་གསེར་བཙོ་མའི་མདོག་ལྟར་དུ་གྱུར། མཛད་པ་གང་ལ་བརྟག་ཀྱང་སྟོན་པ་སངས་རྒྱས་དང་གཉིས་སུ་མེད་པ་ལྟ་བུར་གྱུར་པ་ལ་ཤཱཀྱ་སེངྒེ་ཞེས་པའི་མཚན་གསོལ་བ་ཡིན། རྒྱ་གར་བྱང་ཕྱོགས་སུ་བྱོན་ནས་ཟ་ཧོར་རྒྱལ་པོ་ཆོས་ལ་དགོད་པའི་ཕྱིར་ལས་ཀྱི་ཕྱག་རྒྱ་མོ་ལྷ་ལྕམ་མན་དཱ་ར་བ་ལ་བརྟེན་ནས་རིག་པ་བརྟུལ་ཞུགས་ཀྱི་སྤྱོད་པ་མཛད་པའི་དུས་སུ། ཟ་ཧོར་རྒྱལ་པོས་གསོན་སྲེག་མཛད་པའི་ཚེ་འབྱུང་བ་མེ་ཡིས་མ་ཚིག་པར། མཚོ་ཡན་ལག་བརྒྱད་ལྡན་གྱི་དབུས་སུ་པད་སྡོང་གི་རྩེ་ལ་རང་བྱུང་གི་ཚུལ་དུ་བཞུགས་པ་ནི་གུ་རུ་ཐོད་ཕྲེང་རྩལ་ཞེས་བྱ་བ་ཡིན།

དེ་ནས་བལ་ཡུལ་དུ་བྲག་ཕུག་མ་ར་ཏི་ཀ་རུ་བྱོན་ནས། གཟུངས་མ་མནྡྷ་ར་བ་ལ་བརྟེན་ནས་འཆི་མེད་ཚེ་ཡི་རིག་འཛིན་གྲུབ་པར་གྱུར་པ་ལ་འཆི་མེད་པདྨ་འབྱུང་གནས་ཞེས་བྱ་བའི་མཚན་བཏགས་པ་ཡིན། བལ་ཡུལ་ཡངས་ལེ་ཤོད་ཀྱི་བྲག་ཕུག་ཏུ་བྱོན་ནས་ཕྱག་རྒྱ་ཆེན་པོའི་དངོས་གྲུབ་མངོན་དུ་བརྙེས་ནས། བདུད་སྲིན་དམ་སྲི་མ་རུངས་པ་ཐམས་ཅད་གདུལ་བར་བྱ་བའི་ཕྱིར་དུ་ཁྲོ་བོའི་རྒྱལ་པོ་དཔལ་ཕྱག་ན་རྡོ་རྗེའི་རྣམ་པར་བཞེངས་པ་ལ་གུ་རུ་སེངྒེ་སྒྲ་སྒྲོག་ཅེས་བྱ་བ་ཡིན། དེའི་རྗེས་སུ་མཁའ་འགྲོ་མ་སེངྒེའི་གདོང་པ་ཅན་ལ་བསྟེན་ནས་མུ་སྟེགས་པའི་གྲོང་ཁྱེར་བསམ་གྱིས་མི་ཁྱབ་པ་མང་པོ་བརླགས་པར་མཛད། དེ་དག་ནི་འཆི་མེད་པདྨ་འབྱུང་གནས་དང་གུ་རུ་སེངྒེ་སྒྲ་སྒྲོག་གཉིས་ཀྱིས་དེང་སང་གི་བལ་པོའི་ཡུལ་ཞེས་ཡོངས་སུ་གྲགས་པ་ནས་བསྟན་པ་དང་སེམས་ཅན་གྱི་དོན་ཇི་ལྟར་བསྒྲུབས་པའི་ཚུལ་ཡིན།

དེ་དག་ནི་ཨོ་རྒྱན་རིན་པོ་ཆེས་རྒྱ་གར་འཕགས་པའི་ཡུལ་དང་བལ་པོའི་ཡུལ་དུ་བསྟན་པ་དང་སེམས་ཅན་གྱི་དོན་ཇི་ལྟར་མཛད་པའི་ཚུལ་ཡིན།

དེ་ནས་དེང་སང་གི་གནས་སྐབས་ན་འབྲུག་པ་ཞེས་རྒྱལ་ཁབ་ལོགས་སུ་ཆགས་ཡོད་པའི་གནས་སྤ་གྲོ་སྟག་ཚང་ཞེས་བྱ་བར། སྣང་སྲིད་ཀྱི་དྲེགས་པ་མ་ལུས་པ་དབང་དུ་བསྡུས་ཏེ་དམ་འོག་ཏུ་བཙུད། དེ་ནས་བོད་ཀྱི་སྟོད་མངའ་རིས་སྐོར་གསུམ། བར་དབུས་གཙང་རུ་བཞི། སྨད་མདོ་ཁམས་སྒང་དྲུག་ཐམས་ཅད་ལ་ཆོས་གཏེར་དང་རྫས་གཏེར་སོགས་གཏེར་ཁ་བསམ་གྱིས་མི་ཁྱབ་པ་སྦས། ཕྱི་མའི་དུས་ན་ཡང་གཏེར་སྟོན་བརྒྱ་རྩ་བརྒྱད་ལ་སོགས་པ་མང་པོ་ཞིག་འབྱུང་བར་ལུང་བསྟན། སྨོན་ལམ་གྱི་གཏད་རྒྱ་དང་བཅས་པར་མཛད་པ་ལ་གུ་རུ་རྡོ་རྗེ་གྲོ་ལོད་ཅེས་གྲགས།

དེ་ལྟར་ཨོ་རྒྱན་རིན་པོ་ཆེ་བོད་ཡུལ་དུ་ལོ་ང་ལྔ་ཙམ་ལ་བཞུགས་ཏེ་ལྷོ་འཛམ་བུ་གླིང་སྤྱི་དང་བོད་ཀྱི་ཡུལ་དུ་སྐུ་དངོས་ཀྱི་གདུལ་བྱ་རྫོགས་རྗེས། སྲིན་པོ་མ་རུངས་པ་ཐམས་ཅད་ཁ་དར་བས་དེ་དག་གདུལ་བར་བྱ་བའི་ཕྱིར་རྔ་ཡབ་སྲིན་པོའི་གླིང་དུ་གཤེགས། དེ་ལྟར་སྲིན་པོ་རྣམས་ཀྱི་ཁ་གནོན་མཛད་པ་དང་སངས་རྒྱས་ཀྱི་བསྟན་པ་དར་བར་མཛད་ནས། སྲིན་པོ་མ་རུངས་པ་རྣམས་ཆོས་ལ་བཙུད་པའི་ཕྱིར་དྲག་པོའི་སྐུར་བཞེངས་པ་དེར་གུ་རུ་དྲག་པོ་རྩལ་ཞེས་བྱ་བའི་མཚན་ཆགས། དེ་ཡང་རྒྱས་པའི་གཏེར་ཁ་རྣམས་སུ་གྲུབ་རྟགས་འདྲ་མིན་མཚོན་ཕྱིར་ཞལ་ཕྱག་ཀྱང་མང་པོ་ཅན་ཡོད།

གུ་རུ་དྲག་པོ་ནི་རྔ་ཡབ་དཔལ་གྱི་རི་བོ་ན། སྐུ་ལུས་མ་སྤངས་པར་འཇའ་ལུས་འཕོ་བ་ཆེན་པོའི་སྐུར་བཞེངས་ནས་ད་ལྟ་ཡང་སྐུ་འཚོ་ཞིང་གཞེས་ལ་ཆོས་སྟོན་པའི་སྒང་ཡིན། ད་ལྟ་གུ་རུ་རིན་པོ་ཆེ་བཞུགས་པའི་ས་ཆ་ལ་རྔ་ཡབ་སྲིན་པོའི་གླིང་ཞེས་བྱ། དེ་ལ་མཐའ་སྐོར་དུ་སྲིན་པོའི་ཡུལ་གླིང་ཉི་ཤུ་རྩ་གཅིག་དང་། དབུས་ན་ཟངས་མདོག་དཔལ་གྱི་རི་བོ་ཞེས་བྱ་བ་ཙིཏྟའི་དབྱིབས་ལྟ་བུ་ཞིག་ཡོད། རི་བོ་དེའི་རྩེ་ན་པདྨ་འོད་ཀྱི་ཕོ་བྲང་ཞེས་བྱ་བ་བརྩེགས་གསུམ་ཅན། འོག་ན་སྤྲུལ་སྐུའི་ཞིང་ཁམས་དང་སྲིན་རྒྱལ་རཀྴ་ཐོད་ཕྲེང་གིས་སྲིན་པོ་རྣམས་ལ་ཆོས་སྟོན་པ། བར་དུ་ལོངས་སྐུ་ཐུགས་རྗེ་ཆེན་པོའི་རྣམ་པས་ངེས་པ་ལྔ་ལྡན་གྱི་སྒོ་ནས་ཆོས་གསུངས་པ། སྟེང་ན་ཆོས་སྐུ་ཀུན་ཏུ་བཟང་པོའི་རྣམ་པས་ཆོས་ཉིད་སྐྱེ་བ་མེད་པའི་དོན་ལ་མཉམ་པར་བཞག་པ་དེ་ལྟ་བུའི་གཞལ་ཡས་ཁང་ཁྱད་པར་ཅན་ཞིག་ཡོད་པ་ཡིན།

རྔ་ཡབ་དཔལ་གྱི་རི་བོ་པདྨ་འོད་ཀྱི་ཕོ་བྲང་གི་ཕྱོགས་མཚམས་སྟེང་འོག་སྟེ་གནས་སུམ་ཅུ་སོ་དྲུག་ན། ཨོ་རྒྱན་རིན་པོ་ཆེས་སྤྲུལ་བ་མི་འདྲ་བ་སུམ་ཅུ་སོ་དྲུག་གི་སྒོ་ནས་འགྲོ་དོན་མཛད་བཞིན་པའི་སྒང་ཡིན། ཁོང་གི་སློབ་མར་གྱུར་པའི་རྗེ་འབངས་གྲུབ་ཐོབ་རིག་པ་འཛིན་པའི་ཚོགས་བསམ་གྱིས་མི་ཁྱབ་པ་ཡང་འཁོར་དུ་འདུས་ཤིང་། སྐལ་བ་དང་ལྡན་པའི་གདུལ་བྱ་གཞན་རྣམས་ལའང་ཆོས་ཀྱི་འཁོར་ལོ་སྐོར་བཞིན་བཞུགས་ཡོད་པ་ཡིན།

གུ་རུའི་གཏེར་ཆོས།

དེ་ནས་བོད་ཡུལ་དུ་བྱོན་པའི་སྤྲུལ་པའི་གཏེར་སྟོན་རྣམས་ཀྱང་ཨོ་རྒྱན་རིན་པོ་ཆེའི་ཚོགས་ཀྱི་འདུ་བ་ལ་ལོངས་སྤྱོད་པའི་དུས་སུ། ཨོ་རྒྱན་རིན་པོ་ཆེས་ཁོང་གི་ཚོགས་ཀྱི་དྲངས་བ་དེ་སྤྲུལ་པའི་སྐུ་གང་ལ་གཏད་པ་དེ་ཉིད་བོད་ཁ་བ་ཅན་གྱི་ཡུལ་དུ་འགྲོ་དོན་ལ་བྱོན་དགོས་ཞེས་བཀའ་བསྩལ་བ་དང་། ཨོ་རྒྱན་རིན་པོ་ཆེའི་སྤྲུལ་པ་རྣམས་ལས་མང་ཆེ་བ་ཞིག་ཟབ་པ་ས་ཡི་གཏེར་དང་རྒྱ་ཆེ་བ་དགོངས་པའི་གཏེར་ལ་དབང་འབྱོར་བ་ཡིན། སྤྲུལ་པའི་གཏེར་སྟོན་དེ་རྣམས་ལ་བརྒྱུད་པ་གཞན་དང་མི་འདྲ་བའི་ཁྱད་པར་དུ་འཕགས་པ་གསུམ་ཡོད་དེ། དང་པོ་གཏེར་སྟོན་དེ་ལ་ཚེ་གཅིག་གི་འགྲོ་དོན་དང་མཛད་པ་ཇི་ལྟར་བསྒྲུབ་དགོས་པ་ཚང་མ་ཡང་ཨོ་རྒྱན་རིན་པོ་ཆེས་དུས་དུས་སུ་བཀའ་བསྩལ་དགོས་པ་ཡིན་པས་དེ་ལ་བཀའ་བབས་ལུང་བསྟན་གྱི་བརྒྱུད་པ་ཟེར། གཉིས་པ་ཨོ་རྒྱན་རིན་པོ་ཆེའམ་ལྡན་མ་རྩེ་མང་། བེེ་རོ་ཙ་ན། ཡེ་ཤེས་མཚོ་རྒྱལ་གང་རུང་གི་ཤོག་སེར་གྱི་ངོས་སུ་བྲིས་པའི་ཕྱག་བྲིས་ལ། ཨོ་རྒྱན་རིན་པོ་ཆེས་དགོངས་པ་གཏད་པའི་སྟོབས་ཀྱིས་ཤོག་སེར་དེའི་ཚིག་དང་དོན་གྱི་ཆ་ཐམས་ཅད་ཟབ་གཏེར་བདག་པོ་རང་ཉིད་མ་གཏོགས་གཞན་གང་གིས་ཀྱང་མི་ཁྲོལ། དེ་ལ་ནི་ཤོག་སེར་ཚིག་གི་བརྒྱུད་པ་ཟེར། གསུམ་པ་ལས་ཅན་གྱི་གཟུངས་མར་ལུང་བསྟན་ལ། སྨོན་ལམ་བཏབ་པར་མ་ཟད། ཆོས་སྲུང་བའི་མཁའ་འགྲོ་མ་བསམ་གྱིས་མི་ཁྱབ་པ་ལ་གཏད་རྒྱ་མཛད་ཅིང་། སྐྱེས་བུ་གང་དེར་སྡོངས་གྲོགས་བྱེད་པར་བཀའ་བསྒོས་ཡོད་པ་ལ་མཁའ་འགྲོ་གཏད་རྒྱའི་བརྒྱུད་པ་ཟེར།

དེ་ཡང་གཏད་རྒྱ་དེ་རྣམས་ཐོག་མར་བསམ་ཡས་དབུ་རྩེ་རིགས་གསུམ་དུ་རྗེ་འབངས་ཉེར་ལྔ་ལ་སོགས་པ་འཚོགས་པའི་དུས་སུ་ཡང་གཏད་རྒྱ་མཛད་ཡོད་པ་མང་པོ་ཡོད་ལ། དེའི་དུས་སུ་སྨོན་ལམ་གྱི་གཏད་རྒྱ་མ་ཐེབས་པར་རྗེས་སུ་རྔ་ཡབ་དཔལ་གྱི་རི་བོ་རུ་གསར་དུ་གཏད་རྒྱ་ཐེབས་པ་ཡང་མང་པོ་ཡོད་རྒྱུ་རེད། དེ་ལྟ་བུའི་སྤྲུལ་པའི་གཏེར་སྟོན་ལ་ནི་བསྟན་འགྲོའི་རྒུད་པ་གསོ་བ་དང་། སེམས་ཅན་ལ་བདེ་སྐྱིད་འབྱུང་བའི་ཐད་གང་ཟག་གཞན་དང་མི་འདྲ་བའི་ཁྱད་པར་དུ་འཕགས་པའི་ཁྱད་ཆོས་ཆེས་ཤིན་ཏུ་མང་པོ་ཡོད་པ་ཡིན།

སྤྲུལ་པའི་གཏེར་སྟོན་དེ་ས་ཆ་གང་ལ་འབྱུང་ན། སྤྱིར་འཛམ་བུ་གླིང་གང་དང་གང་ལ་ཡང་རེ་རེ་གཉིས་རེ་འབྱུང་སྲིད་ཀྱང་། མང་ཆེ་བ་བོད་ཁ་བ་ཅན་དུ་འབྱུང་བ་ཡིན། དེ་ནི་ཨོ་རྒྱན་རིན་པོ་ཆེའི་སྔར་གྱི་དགོངས་པ་གཏད་ལུགས་དང་ཆོས་སྐྱོང་སྲུང་མ་རྣམས་ལ་གཉེར་གཏད་ལུགས། གཏེར་གནས་བྱིན་རླབས་མཛད་ལུགས་ཀྱི་དབང་གིས་རེད། སྤྲུལ་པའི་གཏེར་སྟོན་ཞེས་བྱ་བའི་གྲུབ་པ་ཐོབ་པའི་གང་ཟག་དེ་ཆོས་ལུགས་གང་ལ་ཡོད་ན། ཨོ་རྒྱན་རིན་པོ་ཆེའི་རྗེས་སུ་འཇུག་པའི་རྙིང་མ་པ་ལ་ཡོད་རྒྱུ་རེད་མ་གཏོགས། གཞན་དག་ལ་དེ་ལྟ་བུའི་གྲུབ་པ་ཐོབ་པའི་གང་ཟག་དཀོན་མོ་ཡིན་རྒྱུ་རེད།

ཨོ་རྒྱན་རིན་པོ་ཆེའི་གཏེར་ཆོས་དེ་དག་ཐམས་ཅད་ཀྱང་གཏེར་དུ་སྦས་པ་པོ་དང་གཏེར་ནས་འདོན་པ་པོ་གང་ཡིན་ན། ཁོང་གི་གཟུངས་མ་མཁར་ཆེན་བཟའ་ཡེ་ཤེས་མཚོ་རྒྱལ་རེད། ཨོ་རྒྱན་རིན་པོ་ཆེ་སྲིན་ཡུལ་དུ་བྱོན་པའི་རྗེས་སུ། མཁར་ཆེན་བཟའ་མཚོ་རྒྱལ་གྱིས་ལོ་བདུན་གྱི་བར་དུ་ཨོ་རྒྱན་རིན་པོ་ཆེའི་གསུང་ཚང་མ་བཀའ་བསྡུ་མཛད། ས་གནས་སོ་སོ་ལ་གཏེར་དུ་སྦས། སྨོན་ལམ་བཏབ་པས། ད་ལྟ་ཡང་སྤྲུལ་པའི་གཏེར་སྟོན་རྒྱུན་མི་ཆད་པར་འབྱུང་བ་ནི་ཡེ་ཤེས་མཚོ་རྒྱལ་གྱི་བདག་རྐྱེན་ཡིན།

བོད་གངས་རིའི་ལྗོངས་ཀྱི་ཨོ་རྒྱན་རིན་པོ་ཆེའི་ཆོས་བརྒྱུད་འཛིན་པ་ཚང་མ་ལ་བསམ་བློ་བཏང་ན། ཨོ་རྒྱན་རིན་པོ་ཆེ་དང་ཁྱད་པར་མེད་པའི་བཀའ་དྲིན་ཆེ་བ་དེ་ཡེ་ཤེས་མཚོ་རྒྱལ་ཁོང་ཁོ་ན་ཡིན། ཨོ་རྒྱན་རིན་པོ་ཆེ་སྲིན་ཡུལ་དུ་གཤེགས་པའི་རྗེས་སུ། ཡེ་ཤེས་མཚོ་རྒྱལ་གྱིས་ལོ་བདུན་གྱི་རིང་ལ་འཇམ་དཔལ་རྫོགས་པ་ཆེན་པོའི་ཆོས་ཉམས་སུ་བླངས་ཏེ། འཕོ་བ་ཆེན་པོའི་སྐུར་གྲུབ་ནས་རྔ་ཡབ་པདྨ་འོད་ཀྱི་ཕོ་བྲང་དུ་ཨོ་རྒྱན་རིན་པོ་ཆེ་དངོས་ཀྱི་སྐུ་མདུན་དུ་བྱོན་ནས་ད་ལྟ་ཡང་དེ་རུ་བཞུགས་ཡོད། དེ་ལྟ་བུའི་བཀའ་དྲིན་ཅན་གྱི་ཨོ་རྒྱན་ཡབ་ཡུམ་གཉིས། ད་ལྟ་ཐག་རིང་པོ་རྔ་ཡབ་སྲིན་པོའི་གླིང་དུ་ཡོད་པས་གསོལ་བ་བཏབ་ཀྱང་བྱིན་རླབས་མི་འབྱུང་སྙམ་ན་དེ་ཡང་མིན་ཏེ། ཨོ་རྒྱན་རིན་པོ་ཆེས། དད་པ་ཅན་ལ་གང་དུ་མ་བཞུད་བཞུགས། །འགྲོ་དྲུག་གང་དུ་སྐྱེས་ཀྱང་ང་ཡིས་འདྲེན། །ཞེས་གསུངས།

ཨོ་རྒྱན་རིན་པོ་ཆེ་ལ་གསོལ་བ་བཏབ་ནས་བསྒྲུབ་ན། སངས་རྒྱས་དང་བྱང་ཆུབ་སེམས་དཔའ་གཞན་གང་ལས་ཀྱང་བྱིན་རླབས་ཆེ་བ་ཡིན། ཁྱད་པར་དུ་འདི་བླ་མའི་སྒྲུབ་པ་ཡིན། རང་རེ་སྔ་འགྱུར་གསང་སྔགས་རྙིང་མའི་ཆོས་ཉམས་སུ་ལེན་མཁན་ཚང་མས་བླ་མ་ཨོ་རྒྱན་ཆེན་པོ་སྒྲུབས་དང་། ལྷ་སྐུ་འབུམ་ཕྲག་བསྒོམ་པ་ལས་བླ་མ་སྐད་ཅིག་ཙམ་ལ་དྲན་ན་ཕན་ཡོན་ཆེ། བསྙེན་སྒྲུབ་ས་ཡ་བྱེ་བ་མང་པོ་འདོན་པ་ལས་བླ་མར་གསོལ་འདེབས་ལན་གཅིག་བྱས་ན་ཕན་ཡོན་ཆེ་ཞེས་རྒྱུད་སྡེ་ཐམས་ཅད་ཀྱི་ནང་དུ་གསུངས་ཡོད་པས། གང་ནས་བསམ་བློ་བཏང་ཡང་ཨོ་རྒྱན་རིན་པོ་ཆེ་ལ་གསོལ་བ་བཏབ་ན་བྱིན་རླབས་ལྷག་པར་ཆེ་བ་ཡིན། སྨོན་ལམ་གྱི་དབང་གིས་ཨོ་རྒྱན་རིན་པོ་ཆེ་སངས་རྒྱས་གཞན་དང་མི་འདྲ་བར་འཛམ་བུ་གླིང་གི་སེམས་ཅན་རྣམས་ལ་ཐུགས་ལྷག་པར་བརྩེ་བ་ཡིན།

ཨོ་རྒྱན་རིན་པོ་ཆེའི་རྣམ་ཐར་གྱི་ནང་དུ། འཛམ་བུ་གླིང་དུ་འགྲོ་བའི་དོན་ལ་བྱོན། །ཉི་ཟེར་འཆར་སྡུད་མདངས་ལ་ཆིབས་ཏེ་བྱོན། །ཞེས་དུས་རྟག་ཏུ་ཉི་མ་འཆར་བ་དང་ནུབ་པའི་དུས་ཀྱི་ཟེར་ལ་ཆིབས་ཏེ་འཛམ་བུ་གླིང་གི་སེམས་ཅན་གྱི་དོན་ལ་བྱོན་ནས་འགྲོ་དོན་མཛད་པར་གསུངས་ཡོད། དེ་བཞིན་དུ་ཁོང་གི་ཞལ་ནས། སྤྱིར་སངས་རྒྱས་ཐམས་ཅད་ཀྱི་ཐུགས་རྒྱུད་ཀྱི་ཡོན་ཏན་གཅིག་པ་ཡིན་ཡང་། སྨོན་ལམ་གྱི་སྟོབས་ཀྱིས་ཁོང་བསྒྲུབ་ན་སངས་རྒྱས་གཞན་བསྒྲུབ་པ་ལས་བརྒྱ་འགྱུར་སྟོང་འགྱུར་གྱིས་བྱིན་རླབས་ཆེ་བ་དང་ཐུགས་རྗེ་མྱུར་བ་ཡིན་གསུངས།

ཨོ་རྒྱན་རིན་པོ་ཆེ་རང་ཉིད་ཀྱི་ཞལ་ནས། ང་བཀུར་སངས་རྒྱས་ཐམས་ཅད་བཀུར། །ང་མཐོང་སངས་རྒྱས་ཐམས་ཅད་མཐོང་། །ང་ཉིད་བདེ་གཤེགས་འདུས་པ་ཡིན། །ཞེས་ཁོང་བསྒྲུབ་ན་སངས་རྒྱས་ཐམས་ཅད་བསྒྲུབས་པའི་གོ་ཆོད། ཁོང་མཇལ་ན་སངས་རྒྱས་ཐམས་ཅད་ཀྱི་ཞལ་མི་མཇལ་བ་གཅིག་ཀྱང་མེད། ཁོང་བདེ་གཤེགས་ཐམས་ཅད་འདུས་པའི་ངོ་བོ་ཡིན་པར་གསུངས་ཡོད། བདེ་གཤེགས་ཐམས་ཅད་འདུས་པ་ཇི་ལྟར་ཡིན་ན། ཨོ་རྒྱན་རིན་པོ་ཆེ་རང་ཉིད་ཀྱི་ཞལ་ནས། སྔོན་ཚེ་སྣང་བ་མཐའ་ཡས་འོད་དཔག་མེད། །རི་བོ་ཏ་ལར་མགོན་པོ་སྤྱན་རས་གཟིགས། །དྷ་ན་ཀོ་ཤ་པདྨ་འབྱུང་གནས་ང་། །མཚོན་ཚུལ་ཙམ་ལ་སྐུ་གསུམ་སྣང་གྱུར་ཀྱང་། །དོན་ལ་དབྱེར་མེད་སོ་སོར་ཐ་མི་དད། །ཆོས་དབྱིངས་གནས་སུ་ཀུན་ཏུ་བཟང་པོ་དང་། །སྟུག་པོ་བཀོད་དུ་རྡོ་རྗེ་འཆང་ཆེན་པོ། །རྡོ་རྗེ་གདན་དུ་ཐུབ་པ་ཆེན་པོ་ཉིད། །གཉིས་མེད་པདྨ་ང་རུ་ལྷུན་གྱིས་གྲུབ། །ཞེས་དེ་གསུམ་པོ་ཡང་ཁོང་ཡིན་པར་གསུངས།

དེས་ན་སངས་རྒྱས་དང་བྱང་ཆུབ་སེམས་དཔའ་གཞན་ལ་བསྐལ་པ་མང་པོའི་བར་དུ་གསོལ་བ་བཏབ་པ་དང་སྒོམ་སྒྲུབ་བྱེད་པ་ལས། ཨོ་རྒྱན་རིན་པོ་ཆེ་ལ་ཐུན་ཐུང་ངུ་ཙམ་ལ་གསོལ་བ་བཏབ་ན་བྱིན་རླབས་དང་དངོས་གྲུབ་མྱུར་བ་ཤེས་དགོས།

ཚིག་བདུན་གསོལ་འདེབས།

ཨོ་རྒྱན་རིན་པོ་ཆེ་སྒྲུབ་པའི་ཐབས་དེ་ཡང་རྒྱས་པར་གཏེར་ཁ་སོ་སོ་ན་ཆེས་ཤིན་ཏུ་མང་པོ་ཡོད་ཀྱང་། སྒྲུབ་ཐབས་ཐམས་ཅད་ཀྱི་མཐར་ཐུག་པ་ནི་རྡོ་རྗེའི་ཚིག་བདུན་པོ་འདི་ལ་བརྟེན་ནས་བསྒྲུབ་པར་བྱ་བ་ཁོ་ན་ཡིན། ཚིག་བདུན་གསོལ་འདེབས་ཞེས་བྱ་བ་འདི་ནི་གང་ཟག་ཐ་མལ་བ་ཞིག་གིས་ཆེད་དུ་བརྩམས་པ་མིན་པར། ཆོས་ཉིད་སྐྱེ་བ་མེད་པའི་ཀློང་དང་ལོངས་སྐུ་འགག་པ་མེད་པའི་རྩལ་ལས་ཤར་ཡོང་བའི་རྡོ་རྗེའི་རང་སྒྲ་རང་ཤུགས་ཀྱི་ཚུལ་དུ་གྲགས་ཡོང་བ་ཡིན།

ཨོ་རྒྱན་རིན་པོ་ཆེའི་རྗེས་འཇུག་གི་སྤྲུལ་བའི་གཏེར་སྟོན་ཞིག་ཡིན་ནས་བཟུང་སྟེ། དེའི་གཏེར་ཁ་ན་ཚིག་བདུན་གསོལ་འདེབས་ཤིག་མེད་པ་མི་སྲིད་པ་ལྟ་བུ་ཡིན། འདི་ནི་སྔོན་གྱི་དུས་སུ་ཨོ་རྒྱན་རིན་པོ་ཆེ་ཚོགས་ཀྱི་འདུ་བ་ལ་སྤྱན་འདྲེན་པའི་མཁའ་འགྲོ་མ་རྣམས་ཀྱི་བརྡ་སྐད་ཀྱང་ཡིན་པའི་ཕྱིར་ན། འདི་ཡི་དོན་མ་ཤེས་པར་ཚིག་རྐྱང་བ་བརྗོད་པས་ཀྱང་ཨོ་རྒྱན་རིན་པོ་ཆེ་རྔ་ཡབ་དཔལ་རི་ནས་བྱོན་ཏེ་རྒྱུད་བྱིན་གྱིས་བརླབ་པར་འགྱུར་བ་ཡིན། ཚིག་བདུན་གསོལ་འདེབས་འདི་ཡིས་གཞིའི་དུས་ན་རྣམ་ཤེས་ཚོགས་བདུན་མཚོན། ལམ་གྱི་དུས་ན་བྱང་ཆུབ་ཡན་ལག་བདུན་མཚོན། འབྲས་བུའི་དུས་ན་དོན་དམ་དཀོར་བདུན་ཡང་མཚོན་པ་ཡིན།

ཚིག་བདུན་གསོལ་འདེབས་ཀྱིས་གུ་རུ་རིན་པོ་ཆེ་སྒྲུབ་ཐབས་ལ། ཕྱི་ལྟར་གསོལ་འདེབས་ཀྱི་ཚུལ་དུ་བྱས་པའི་སྒྲུབ་ཐབས་དང་། ནང་ལྟར་བསྐྱེད་རིམ་དང་སྦྱར་བའི་སྒྲུབ་ཐབས། གསང་བ་གྲོལ་ལམ་ལྟར་དུ་སྒྲུབ་ཐབས། ཤིན་ཏུ་གསང་བ་ཐབས་ལམ་ལྟར་དུ་སྒྲུབ་ཐབས། མཐར་ཐུག་རྫོགས་པ་ཆེན་པོའི་མན་ངག་དང་སྦྱར་ནས་སྒྲུབ་ཐབས་ཀྱང་ཡོད། དེ་ཐམས་ཅད་ཀྱང་ཚིག་བདུན་གསོལ་འདེབས་རང་གི་ཚིག་ཁོ་ན་མ་གཏོགས་ཚིག་གཞན་གྱིས་ལྷན་པོ་སྦྱར་ནས་འགྲེལ་མི་དགོས། ཁོ་རང་གི་ནང་དུ་དེ་ཐམས་ཅད་ཀྱི་དོན་ཆ་ཚང་བ་ཞིག་བཤད་ཡོད།

འདིར་ཚིག་བདུན་གསོལ་འདེབས་དེ་ཕྱི་ལྟར་རྡོ་རྗེ་ཚིག་བདུན་བླ་མའི་རྣལ་འབྱོར་ལྟར་སྒྲུབ་པའི་ཚིག་མདོར་བསྡུས་ཙམ་ཞིག་བཤད་ན། ཁྱེད་རང་རྣམས་ཐ་མལ་དུ་གནས་པའི་མདུན་དུ་ཨོ་རྒྱན་དྲི་མེད་དྷ་ན་ཀོ་ཤའི་མཚོ་གཏིང་ཟབ་པ་ཡན་ལག་བརྒྱད་ཀྱི་ཆུས་གང་བའི་ནང་ན། རང་བྱུང་པདྨའི་སྡོང་པོའི་རྩེར་ཨོ་རྒྱན་རིན་པོ་ཆེ་དང་ཡེ་ཤེས་མཚོ་རྒྱལ་དཀར་ལ་དམར་བའི་མདངས་ཆགས་པ། ཡབ་ཡུམ་གཉིས་མེད་དུ་འཁྲིལ་བ། འཁོར་དུ་དཔའ་བོ་དང་མཁའ་འགྲོ་ཆོས་སྐྱོང་སྲུང་མའི་ཚོགས་ཐམས་ཅད་བཀྲ་ལམ་མེར་བཞུགས་ཡོད་པ་ཞིག་གསལ་འདེབས་དགོས། བདག་གིས་དུས་ད་ནས་བཟུང་སྟེ་བྱང་ཆུབ་སྙིང་པོ་མ་ཐོབ་ཀྱི་བར་དུ་སྐྱིད་སྡུག་ལེགས་ཉེས་མཐོ་དམན་ཅི་བྱུང་ཡང་། ཨོ་རྒྱན་རིན་པོ་ཆེ་ཁྱེད་མ་གཏོགས་པའི་རེ་ས་དང་སྐྱབས་གནས་གཞན་དུ་མི་འཚོལ། ཁྱེད་ཁོ་ནས་བདག་རྒྱུད་བྱིན་གྱིས་བརླབ་པར་མཛད་དུ་གསོལ་སྙམ་ནས་དད་མོས་དྲག་པོ་བསྐྱེད་དགོས།

རང་གཞན་སེམས་ཅན་ཐམས་ཅད་ཀྱིས་ལུས་ངག་ཡིད་གསུམ་གྱི་གུས་འདུད་དང་ལྡན་པའི་སྒོ་ནས་ཕྱག་འཚལ་བར་བགྱི་བ་དང་། དངོས་འབྱོར་ཡིད་སྤྲུལ་གྱི་མཆོད་པ་སྣ་ཚོགས་འབུལ་བ། ཚེ་རབས་ཐོག་མེད་ནས་བསགས་པའི་སྡིག་ལྟུང་ཐམས་ཅད་ལ་འགྱོད་སེམས་དྲག་པོའི་སྒོ་ནས་ཡོངས་སུ་བཤགས་པ་སྟེ་ཡན་ལག་དང་པོ་གསུམ་བསྐྱེད་དགོས། རང་གཞན་གྱིས་དུས་གསུམ་དུ་བསགས་པའི་དགེ་བ་རྣམས་ལ་ཕྲག་དོག་མེད་པར་རྗེས་སུ་ཡི་རང་བ་དང་། འཆི་མེད་ཞི་བ་དམ་པའི་སྐུར་རྟག་ཏུ་བཞུགས་སུ་གསོལ་བ་དང་། འགྲོ་བ་རྣམས་ལ་ཆོས་ཀྱི་འཁོར་ལོ་བསྐོར་བར་བསྐུལ་བ་དང་། དེ་ཚེ་དགེ་རྩ་བསགས་པ་ཀུན་ཀྱང་ཨོ་རྒྱན་རིན་པོ་ཆེའི་གོ་འཕང་འཐོབ་པར་བྱ་བའི་ཕྱིར་ཡོངས་སུ་བསྔོ་བ་སྟེ་ཡན་ལག་ཕྱི་མ་བཞི་ཡང་ཚུལ་བཞིན་དུ་ཉམས་སུ་ལེན་དགོས།

དེ་ལྟར་གུ་རུ་རིན་པོ་ཆེ་ལ་གསོལ་བ་བཏབ་ཅིང་ཡན་ལག་བདུན་གྱི་ཚོགས་བསགས་པའི་མཐུས། གུ་རུ་རིན་པོ་ཆེའི་སྐུ་ལས་འོད་ཟེར་སྣ་ཚོགས་པ་འཕྲོས། བདག་དང་སེམས་ཅན་ཐམས་ཅད་ལ་ཕོག་པས་ལུས་ངག་ཡིད་གསུམ་གྱི་སྒྲིབ་པ་དག སྐུ་གསུང་ཐུགས་ཀྱི་དངོས་གྲུབ་ཐོབ་པའི་སྐལ་བ་ཅན་དུ་བྱས་པར་མོས་ལ། ཚིག་བདུན་གསོལ་འདེབས་དང་བཛྲ་གུ་རུ་ཅི་རིགས་བགྲང་དགོས།

ཧཱུྃ༔ ཨོ་རྒྱན་ཡུལ་གྱི་ནུབ་བྱང་མཚམས༔ པདྨ་གེ་སར་སྡོང་པོ་ལ༔

ཡ་མཚན་མཆོག་གི་དངོས་གྲུབ་བརྙེས༔ པདྨ་འབྱུང་གནས་ཞེས་སུ་གྲགས༔

འཁོར་དུ་མཁའ་འགྲོ་མང་པོས་བསྐོར༔ ཁྱེད་ཀྱི་རྗེས་སུ་བདག་བསྒྲུབ་ཀྱིས༔

བྱིན་གྱིས་རློབས་ཕྱིར་གཤེགས་སུ་གསོལ༔ གུ་རུ་པདྨ་སིདྡྷི་ཧཱུྃ༔

ཨོཾ་ཨཱཿ ཧཱུྃ་བཛྲ་གུ་རུ་པདྨ་སིདྡྷི་ཧཱུྃ༔

སྔོན་ཆད་མཁའ་འགྲོ་མ་རྣམས་ཀྱི་བརྡ་སྐད་དུ་ཡང་། འདི་ལྟ་བུའི་ཚིག་བདུན་གསོལ་འདེབས་དང་བཛྲ་གུ་རུ་འདོན་པའི་སྲོལ་ཡོད་ཀྱང་། ད་ལྟ་མཁའ་འགྲོའི་བརྡ་སྐད་ཀྱི་སྲོལ་དེ་འུ་ཅག་སུ་གཅིག་གིས་ཀྱང་ལབ་མི་ཤེས་པས། ཁྱེད་རྣམ་པས་འདོན་པའི་གནས་སྐབས་ན་བོད་སྐད་གཞིར་བཞག་གིས་ཐོན་དང་། ཨོ་རྒྱན་རིན་པོ་ཆེ་རང་ཉིད་ཀྱིས་ཞལ་གྱིས་བཞེས་ཤིང་བྱིན་གྱིས་བརླབས་པའི་ཚིག་ཡིན།

ཚིག་བདུན་གསོལ་འདེབས་དེ་མཁའ་འགྲོའི་བརྡ་སྐད་དུ་གཏན་ནས་འདོན་མི་ཤེས་པ་ཞིག་ཡིན་ནམ་སྙམ་ན། འདོན་ཤེས་པ་ཡིན་ཏེ། སྤྲུལ་པའི་གཏེར་སྟོན་རྣམས་ཀྱིས་འདོན་ཤེས་པ་ཡིན། མཁའ་འགྲོ་མའི་བརྡ་ཡིག་དེ་ལའང་མཁའ་འགྲོའི་ཡུལ་གླིང་གཙོ་བོའི་རིགས་སུམ་ཅུ་སོ་གཉིས་ལ་བརྡ་ཡིག་མི་འདྲ་བ་སུམ་ཅུ་སོ་གཉིས་ཡོད། དེའི་བརྡ་སྐད་ཚང་མ་ལ་རྡོ་རྗེ་ཚིག་བདུན་འདི་ཉིད་སྔོན་ཆད་ནས་གྲགས་ཟིན་ཡང་། སྤྲུལ་པའི་གཏེར་སྟོན་སུས་ཀྱང་མཁའ་འགྲོའི་བརྡ་སྐད་དུ་བསླབ་སྲོལ་མེད་པར་བོད་སྐད་ཀྱིས་བསླབས་པ་ཡིན། དེས་ན་ཁྱེད་རྣམས་ཀྱིས་ཀྱང་བོད་སྐད་ཀྱིས་ཐོན།

མཁའ་འགྲོ་མ་རྣམས་ཀྱི་བརྡ་སྐད་ལྟར་དུ་བསླབ་ན་ཡང་། མཁའ་འགྲོ་མ་རྣམས་ཀྱིས་དེའི་དོན་གོ་རྒྱུ་རེད་མ་གཏོགས་གཞན་པ་རྣམས་ཀྱིས་དེའི་ཚིག་དོན་ལ་གོ་བ་མི་ལོན། ཚིག་འགའ་རེ་གོ་བའི་དབང་དུ་བྱས་ཀྱང་། གུ་རུ་དྲག་པོའི་མཚན་སྔགས་ཨ་རྩིག་ནེ་རྩིག་སོགས་སུ་གཅིག་གིས་ཀྱང་མི་གོ་བ་དེ་ལྟ་བུ་ཞིག་ཡིན། བོད་སྐད་ཀྱི་ཚིག་དེ་འགྲེལ་དགོས་ན་ཡང་འུ་ཅག་ཚང་མས་འགྲེལ་ཤེས་ངེས་ཡིན། མཁའ་འགྲོའི་བརྡ་སྐད་དེ་ཇི་ལྟ་བུ་ཞིག་ཡིན་ན། འུ་ཚོ་བོད་ལུང་པ་ན་སྤྱིར་ཡུལ་སྐད་མང་པོ་ཡོད་ཀྱང་། དེའི་ནང་ནས་རྒྱལ་རོང་གི་ཡུལ་སྐད་འགའ་ཞིག་གཞན་སུས་ཀྱང་མི་གོ་བ་ལྟ་བུ་ཡིན། མཁའ་འགྲོའི་བརྡ་སྐད་ཀྱང་དེ་དང་འདྲ་བོ་རེད།

དེ་ལྟར་ཁྱེད་ཅག་གིས་ཨོ་རྒྱན་རིན་པོ་ཆེ་ལ་གསོལ་བ་རྩེ་གཅིག་ཏུ་བཏབ་པའི་མཐར། ཨོ་རྒྱན་རིན་པོ་ཆེའི་སྤྱི་བོ་མགྲིན་པ་སྙིང་ག་གསུམ་ནས་འོད་ཟེར་དཀར་དམར་མཐིང་གསུམ་བྱུང་ནས་ཁྱེད་རང་རྣམས་ཀྱི་གནས་གསུམ་དུ་ཐིམ་པས་གུ་རུའི་སྐུ་གསུང་ཐུགས་ཀྱི་བྱིན་རླབས་དང་དངོས་གྲུབ་མ་ལུས་པ་ཐོབ་པའི་མོས་པ་མཛོད། མཐར་གུ་རུ་ཡབ་ཡུམ་འོད་དུ་ཞུ་ནས་ཐིག་ལེ་དཀར་ལ་དམར་བའི་མདངས་ཆགས་པ། ཧཱུཾ་ཡིག་གིས་མཚན་པ་ཞིག་རང་གི་སྙིང་གར་ཐིམ་པས་བླ་མའི་ཐུགས་དང་རང་སེམས་དབྱེར་མེད་དུ་གྱུར་ཅིང་། སེམས་རྩེ་གཅིག་ཏུ་སྤྲོ་བསྡུ་གང་ཡང་མེད་པའི་ངང་ལ་མཉམ་པར་ཞོག མཐར་ཏིང་ངེ་འཛིན་ལས་ལྡང་བ་ན་སྣང་བ་ཐམས་ཅད་བླ་མའི་སྐུ་དང་། སྒྲ་གྲགས་ཐམས་ཅད་བླ་མའི་གསུང་། དྲན་རྟོག་ཐམས་ཅད་བླ་མའི་ཐུགས་སུ་ཤེས་པར་གྱིས་ལ་ཟ་ཉལ་འགྲོ་འདུག་གི་སྤྱོད་ལམ་རྣམ་པ་བཞི་ལ་འཇུག་པར་བྱ་དགོས། དེ་དག་ནི་གུ་རུ་རིན་པོ་ཆེ་དངོས་སུ་སྒྲུབ་ཐབས་ཡིན།

ལས་རབ་འབྱམས་སྒྲུབ་པའི་ཐབས་ནི། ཨོ་རྒྱན་རིན་པོ་ཆེའི་བསམ་པ་ལྷུན་འགྲུབ་མའི་ནང་གི་ཡིད་བཞིན་ནོར་བུ་ལྟ་བུའི་མན་ངག་བཅུ་གསུམ་དང་ལྡན་པའི་ཚིག་བདུན་གསོལ་འདེབས་འདིའི་སྒོ་ནས་སྒྲུབ་དགོས། དེས་ན་སངས་རྒྱས་ཀྱི་ཆོས་ཚུལ་རབ་འབྱམས་ཀྱི་ནང་ན་ཟབ་པའི་མཐར་ཐུག་པ་དེ་ནི་བླ་མ་ཨོ་རྒྱན་ཆེན་པོ་ལ་གསོལ་བ་འདེབས་པ་དང་། འོད་གསལ་རྫོགས་པ་ཆེན་པོ་ཉམས་སུ་ལེན་པ་འདི་ལས་བཟང་བ་དང་ཟབ་པ་ཞིག་རྩ་བ་ནས་མེད་པས། ཁྱེད་རྣམས་ཀྱིས་ཀྱང་རྒྱུན་དུ་དེ་ལྟ་བུ་ཐུགས་ལ་བཟུང་ནས་ཉམས་སུ་ལེན་པར་ཞུ།

དྲན་ངོགས་ཀྱི་ནུབ་བསྐྱོད་ལས་ཡུལ་ཉིའུ་ཡོག་གི་མཛད་རིམ་ལེགས་པར་གྲུབ་པའི་སྐབས་ཏེ་དྲུག་པའོ། །

འབབ་ཚུགས་བདུན་པ། ཨ་རིའི་བྷོ་སི་ཐིན།

༼ ༨·༩~༨·༡༦ ༽

མཛད་རིམ།

ཕྱི་ཟླ་༨པའི་ཚེས་༩ཉིན། བྷོ་སི་ཐིན་ལ་འབྱོར།

ཕྱི་ཟླ་༨པའི་ཚེས་༡༠ཉིན། རྡོ་རྗེ་ཕུར་པའི་དབང་གནང་།

ཕྱི་ཟླ་༨པའི་ཚེས་༡༡ཉིན། གུ་རུ་རྡོ་རྗེ་གྲོ་ལོད་ཀྱི་དབང་གནང་།

ཕྱི་ཟླ་༨པའི་ཚེས་༡༢ཉིན། མཁའ་འགྲོ་སྙིང་ཐིག་གི་དབང་གནང་།

ཕྱི་ཟླ་༨པའི་ཚེས་༡༣ཉིན། འཇམ་དཔལ་ཞི་སྒྲུབ་ཀྱི་དབང་དང་ཞལ་གདམས་གནང་།

ཕྱི་ཟླ་༨པའི་ཚེས་༡༤ཉིན། སངས་རྒྱས་ལག་སྟེར་གྱི་ཁྲིད་གནང་།

ཕྱི་ཟླ་༨པའི་ཚེས་༡༥ཉིན། སངས་རྒྱས་ལག་སྟེར་གྱི་ཁྲིད་གནང་།

ཕྱི་ཟླ་༨པའི་ཚེས་༡༦ཉིན། གེ་སར་གྱི་དབང་དང་ཞལ་གདམས་གནང་།

བྷོ་སི་ཐིན་དུ་ཆོས་གསུང་བ།

ང་ཚོ་ཉིའུ་ཡོག་གྲོང་ཁྱེར་དང་གྱེས་ནས་རླངས་འཁོར་ལ་བསྡད་དེ་དུས་ཚོད་བཞི་ལྷག་བསྐྱོད་པ་ན། ཨ་རིའི་རིག་གནས་ཀྱི་གྲོང་ཁྱེར་བྷོ་སི་ཐིན་（Boston）ལ་འབྱོར།

འདི་ནི་ཨ་རིའི་ཆེས་གནའ་ཉམས་ལྡན་ཞིང་རིག་གནས་རིན་ཐང་གི་ཁྱད་ཆོས་འབུར་དུ་ཐོན་པའི་གྲོང་ཁྱེར་ཞིག་སྟེ། གནས་འདི་རུ་ཡོ་རོབ་ཀྱི་གོམས་སྲོལ་ལྡན་ལ་ཨ་རིའི་རིག་གནས་ཀྱི་བྲོ་བའང་མ་ཉམས་པར་ཡོད། ཉིའུ་ཡོག་ལྟ་བུའི་སྟོབས་འབྱོར་རྒྱས་ཤིང་འདུ་ལོང་བྲེལ་ཟིང་གིས་ཁེངས་པ་ཞིག་མིན་ན་ཡང་། གནའ་བོའི་སྲོལ་རྒྱུན་རིག་གནས་ཀྱིས་ཀུན་ནས་ཕྱུག་པ་ཞིག་རེད། བྷོ་སི་ཐིན་གྲོང་ཁྱེར་ནི་ཨ་རི་རྒྱལ་ཁབ་ཀྱི་འབངས་སྤེལ་དུས་རབས་ནས་རྒྱལ་ཁབ་རང་བཙན་གྱི་དུས་སྐབས་དང་། ད་ལྟ་དར་རྒྱས་ཕུན་སུམ་ཚོགས་པ་བྱུང་བའི་འགྱུར་ལྡོག་གི་ལོ་རྒྱུས་རིང་མོའི་མཐོང་དཔང་ལྟ་བུར་གྱུར་ཡོད།

བྷོ་སི་ཐིན་ནི་ཐོག་མར་གནའ་བོའི་དབྱིན་ཇིའི་ཆོས་ཚོགས་ཀྱི་སྤོས་དམངས་རྣམས་ཀྱིས་གསར་དུ་བཙུགས་པ་ཡིན་ལ། ཁོ་ཚོས་ཨོ་ཁཱི་སཱི་ཧྥོར་ཏི་སློབ་ཆེན་དང་（University of Oxford）ཁམ་བྷི་རཱེད་ལྗི་སློབ་ཆེན་（University of Cambridge）ནས་སྲོལ་རྒྱུན་གྱི་མཐོ་རིམ་སློབ་གསོ་མྱོང་ཡོད་ཅིང་། རང་གི་བུ་རབས་ཚ་རྒྱུད་རྣམས་ཀྱིས་ས་ཆ་གསར་བ་འདི་ནས་སློབ་གསོ་བཟང་པོ་ཐོབ་པའི་ཆེད་དུ། ཕྱི་ལོ་༡༦༣༦ལོར། ཁོ་ཚོས་ཨ་རིའི་ལོ་རྒྱུས་སྟེང་གི་ཆེས་ཐོག་མའི་སློབ་ཆེན་ཏེ་ཧཱ་ཝར་ཌི་གཙུག་ལག་སློབ་ཆེན་བཙུགས་ཤིང་། རིམ་བཞིན་དུ་མཱ་སཱི་ཆུའུ་སེད་སཱི་ཁུལ་གྱི་ཚན་རྩལ་ཞིབ་འཇུག་སློབ་གླིང་（Massachusetts Institute of Technology）སོགས་སློབ་ཆེན་རྣམས་གཅིག་རྗེས་གཉིས་མཐུད་ཀྱིས་བཙུགས་པས། གྲོང་ཁྱེར་འདིར་རིག་གནས་ཀྱི་མཁའ་དབུགས་སྟུག་པོ་ཞིག་བསྐྲུན་ཡོད།

ཆོས་རྗེ་ཉིད་བྷོ་སི་ཐིན་གྲོང་ཁྱེར་ནས་གཟའ་འཁོར་གཅིག་ལ་བཞུགས་ཤིང་། ཉིན་རེའི་ཆོས་ཁྲིད་ཀྱི་མཛད་རིམ་གཤམ་གསལ་ལྟར་ཡིན།

・ཕྱི་ཟླ་༨པའི་ཚེས་༡༠ཉིན། གཟའ་མིག་དམར། རྡོ་རྗེ་ཕུར་པའི་དབང་། ཞུ་ཡོན་ཨ་སྒོར་སུམ་ཅུ།

・ཕྱི་ཟླ་༨པའི་ཚེས་༡༡ཉིན། གཟའ་ལྷག་པ། གུ་རུ་རྡོ་རྗེ་གྲོ་ལོད་ཀྱི་དབང་། ཞུ་ཡོན་ཨ་སྒོར་སུམ་ཅུ།

・ཕྱི་ཟླ་༨པའི་ཚེས་༡༢ཉིན། གཟའ་ཕུར་བུ། མཁའ་འགྲོ་སྙིང་ཐིག་གི་དབང་། ཞུ་ཡོན་ཨ་སྒོར་སུམ་ཅུ།

・ཕྱི་ཟླ་༨པའི་ཚེས་༡༣ཉིན། གཟའ་པ་སངས། འཇམ་དཔལ་ཞི་སྒྲུབ་ཀྱི་

དབང་། ཞུ་ཡོན་ཨ་སྒོར་སུམ་ཅུ།

・ཕྱི་ཟླ་༨པའི་ཚེས་༡༤ནས་༡༥ཉིན། གཟའ་སྤེན་པ་དང་ཉི་མ། ཁྲིད་ཡིག་སངས་རྒྱས་ལག་སྟེར་གྱི་ཁྲིད། ཞུ་ཡོན་ཨ་སྒོར་བརྒྱ་དང་ཉེར་ལྔ།

༼ཉིན་དེ་གཉིས་རིང་གི་དུས་ཚོད་བཀོད་སྒྲིག ༨:༣༠ཞོགས་ཟས། ༩:༠༠སྒོམ་རྒྱག ༡༠:༠༠ཆོས་ཁྲིད། ༡༢:༠༠གུང་ཚིགས། ༡༣:༣༠བགྲོ་གླེང་། ༡༤:༡༥སྒོམ་རྒྱག ༡༥:༠༠-༡༧:༠༠ཆོས་ཁྲིད། ༢༠:༠༠གཟའ་ཉི་མའི་གསོལ་སྟོན།༽

・ཕྱི་ཟླ་༨པའི་ཚེས་༡༦ཉིན། གཟའ་ཟླ་བ། གེ་སར་གྱི་དབང་། ཞུ་ཡོན་ཨ་སྒོར་སུམ་ཅུ།

ས་གནས། ཆོས་དབྱིངས་བསམ་གཏན་ལྟེ་གནས་ཀྱི་ཆོས་རྒྱལ་མྱ་ངན་མེད་ཐོག་ཁང་།

ཆོས་ཉན་པ་ལ་རིན་སྤྲད་དགོས།

ནུབ་ཕྱོགས་སུ་ཆོས་ཚོགས་གང་ནས་ཆོས་ཞུས་ཀྱང་དེ་ལ་རིན་དངུལ་སྤྲོད་དགོས་པ་ཡིན། དེ་ནི་ང་ཚོ་ཤར་ཕྱོགས་པ་དང་ལྷག་པར་དུ་བོད་པ་རྣམས་ལ་མཚོན་ན་ཤིན་ཏུ་དང་ལེན་དཀའ་བའི་གནས་ཤིག་ཡིན། དེ་ལྟ་ནའང་། ཁོང་ཚོས་ནང་པ་སངས་རྒྱས་པའི་ཆོས་བཙོང་ནས་དངུལ་སྒོར་གྱི་ཁེ་སྤོགས་གསོག་པ་མིན་པར། ནུབ་ཕྱོགས་ཀྱི་ཆོས་འཆད་ཉན་གྱི་ཁོར་ཡུག་དང་གནས་བབས་ནི་ཤར་ཕྱོགས་དང་ཡེ་ནས་མི་འདྲ་བས་ཡིན།

ཆོས་ཚོགས་དེ་དག་ལ་འབུལ་བ་ཕུལ་མཁན་གྱི་སྦྱིན་བདག་ཤིན་ཏུ་ཉུང་ཞིང་། ཁོངས་མི་རྣམས་ཀྱིས་ཀྱང་ཚོགས་མིའི་རིན་དངུལ་སྤྲོད་དགོས་པར་མ་ཟད། ཆོས་ཚོགས་མུ་མཐུད་དུ་རྒྱུན་སྐྱོང་བ་ལ་ཁང་གླ་དང་ཆུ་རིན། གློག་རིན། ཞིག་གསོའི་འགྲོ་གྲོན། དེ་མིན་ཁྲལ་སྣ་ཚོགས་སྤྲད་དགོས་པ་ཡིན། ཁྱད་པར་དུ་བླ་མ་ཞིག་གདན་ཞུ་བྱ་དགོས་ན། བླ་མ་གང་དེའི་ལམ་གླ་དང་སྡོད་རིན། ཟས་རིན། འགྲིམ་འགྲུལ་གླ་ཆ་སོགས་ཆོས་ཚོགས་རང་གིས་ཐག་གཅོད་བྱེད་དགོས་པས། གལ་ཏེ་གྲོན་དངུལ་ངེས་ཅན་མ་བསྡུས་ན། ཆོས་ཚོགས་དེ་དག་ཡུན་རིང་པོར་རྒྱུན་སྐྱོང་ཐབས་མེད།

དེ་ལྟར་བྱས་ན་ཆོས་ཞུ་མཁན་ལ་སྒོ་ཐེམ་ཇེ་མཐོར་སོང་ནས། དཔལ་འབྱོར་གྱི་ཆ་རྐྱེན་དམན་པ་དག་ལ་ཆོས་ཞུ་བའི་གོ་སྐབས་མེད་པར་འགྱུར་བ་སྟེ། བོད་ཡུལ་དང་རྩ་བ་ནས་མི་འདྲ་བར་འདུག དཔེར་ན་ཆོས་རྗེ་ཉིད་ཀྱིས་ཝ་ཧྲིང་ཐོན་ནས་ཆོས་གསུང་སྐབས། རྒྱ་ནག་གི་སློབ་ཆེན་སློབ་མ་ཞིག་གིས་ཁྲིད་ཡིག་སངས་རྒྱས་ལག་སྟེར་གྱི་ཆོས་ཐུན་དང་པོ་ཞུས་ཀྱང་། ཕྱི་མ་རྣམས་ཞུ་བར་རིན་དངུལ་གྱིས་མ་འདང་བས་ཕྱིར་འབུད་བྱ་དགོས་ཐུག་པ་ན། བདག་གིས་དེ་ལ་ཨ་སྒོར་བདུན་ཅུ་སྤྲད་ནས་ཆོས་ཐུན་ཕྱི་མ་གཉིས་ལའང་མཉན་དུ་བཅུག་པ་ཡིན།

སྲོལ་རྒྱུན་དེ་དག་ང་ཚོའི་ཆོས་ཞུ་སྟངས་དང་མི་མཐུན་པར་ཆགས་ཡོད་མོད། འོན་ཀྱང་ཕྱོགས་གཞན་ཞིག་ནས་བལྟས་ན། ཁོ་རང་ཚོས་ཆོས་ཐུན་རེ་རེ་བཞིན་རིན་དངུལ་ངེས་ཅན་ཞིག་སྤྲད་ཟིན་པས། ཁྲིད་ཐུན་རེ་རེའང་ཤིན་ཏུ་གལ་ཆེ་བའི་དོན་དུ་བརྩིས་ནས་མཐོང་ཆེན་བྱེད་ཅིང་། ཆོས་ཞུ་བའི་རྣམ་འགྱུར་ལེགས་པ་མ་ཟད་མཇུག་འབྲས་ཀྱང་ཧ་ཅང་བཟང་པོ་ཐོབ་པར་མཐོང་།

དེས་ན་བྱ་བ་གང་ཡིན་ཡང་། རྒྱུས་ལོན་དང་ཤེས་རྟོགས་ལེགས་པོ་མེད་པར་མཐའ་གཅིག་ཏུ་འདི་ཡིན་འདི་མིན་གྱི་ཁ་ཚོན་ཆོད་དཀའ་བས། ཡུལ་ཁམས་མི་འདྲ་བར་དམ་པའི་ཆོས་སྤེལ་བ་ལ་ཡུལ་དུས་ཀྱི་སྲོལ་རྒྱུན་དང་གོམས་གཤིས། རིག་གནས། དངོས་ཡོད་གནས་ཚུལ་དང་བསྟུན་པ་ནི་ཆེས་གལ་ཆེ་བར་སྣང་ངོ་། །

ནུབ་ཏུ་མེད་པའི་ཉི་མ།

ཕྱི་ཟླ་༨པའི་ཚེས་༡༣ཉིན། འཇམ་དཔལ་ཞི་སྒྲུབ་ཀྱི་དབང་གི་སྐབས་སུ་འདི་ལྟར་གསུང་།

ང་ཡུལ་ཁམས་རེ་ནས་འགྲོ་བའི་དུས་སུ་དད་པ་དང་དུང་བ་ཧ་ཅང་ཆེ་མཁན་རྣམས་ཀྱིས་དཔེར་ན་མ་དང་བུ་འབྲལ་བའི་གནས་སྐབས་བཞིན་དུ་མིག་ནས་མཆི་མ་ཐོན་པའི་སྐྱེ་བོའང་མང་པོ་བྱུང་ཐལ། དེ་བས་ད་རེས་ཆོས་བཤད་པའི་གནས་སྐབས་འདིར་ཚོགས་པ་ཙམ་དུ་མ་ཚད་ཚེ་རབས་ནས་ཚེ་རབས་ཀྱི་བར་དུ་མི་འགྱུར་བའི་མཛའ་བརྩེ་བརྟན་པོ་ཆགས་སོང་།

ངས་ད་ཞག་རི་བོ་རཱོ་ཁཱེས་ཀྱི་ནང་པའི་ཆོས་ཚོགས་སུ་ཆོས་བཤད་བཞིན་པའི་སྐབས་ལམ་སང་ལུང་བསྟན་གྱི་ཚིག་དེ་ཡིད་ལ་དྲན་ཐལ། དེའི་ཚིག་དེ་ཇི་ལྟར་ཡིན་ཞེ་ན། ཀུན་ཕན་ཉི་མའི་དཀྱིལ་འཁོར། །ཤར་རིའི་རྩེ་ནས་ཤར་ཡང་། །འོད་སྟོང་ནུབ་ལ་འཕྲོས་བྱུང་། །ཤེས་མེད་རི་ཕྲན་ཕལ་ཆེར། །ང་མཐོ་སྙམ་ནས་མ་འགྱིངས། །རང་དྲུང་གྲིབ་མས་གཡོགས་ལ། །རེ་ཞིག་ཁྱོད་ཉིད་དབང་ཡང་། །ནམ་ཞིག་སྣང་བས་ཁྱབ་ཡོང་། །ཞེས་དཔེར་ན་ཉི་མ་ཤར་ཚེ་རི་བོ་འགའ་ཤས་ཤིག་གིས་ཉི་མ་སྒྲིབ་མི་ཐུབ་པ་བཞིན་དུ། རིམ་གྱིས་ཡུལ་ཁམས་ཚང་མ་ལ་ཆོས་འདི་དར་རྒྱས་ཕུན་སུམ་ཚོགས་པ་ཞིག་འབྱུང་རྒྱུ་ཡོད་ཅེས་པའི་དོན་དེ་ཁྲོལ་སོང་། རྟགས་དང་མཚན་མ་གང་ལ་བསམ་ཡང་དེ་ལྟར་ཡིན་འདུག་པས་ངས་ཚོགས་ཐོག་ནས་ཚང་མ་ལ་བསྒྲགས་པ་ཡིན།

སྤྱིར་ང་རང་གིས་བྱ་བ་ཆེ་ཆུང་གང་ཞིག་བསྒྲུབ་དགོས་ན་ཡང་། ཡུན་རིང་པོའི་བར་དུ་བླ་མ་དང་ལྷག་པའི་ལྷ་ལ་གསོལ་བ་བཏབ་ནས། བརྟག་དཔྱད་ཞིབ་མོ་ཞིག་མ་བྱས་བར་དུ་བྱ་བ་དེ་ལ་འཇུག་པའི་སྲོལ་མེད་ཀྱང་། ད་ལོའི་གནས་སྐབས་ལ་མཚོན་ན་སྔར་དང་ཅུང་མི་འདྲ་བར་གྱུར། ང་རང་ཨ་རིའི་ལུང་པ་ལ་ཡོང་རྒྱུ་དེའང་ཡུལ་ཁམས་འདིའི་མི་ཚང་མ་ལ་ཕན་ཐོགས་རེ་ཨེ་ཡོང་བསམ་པ་དང་། སངས་རྒྱས་ཀྱི་བསྟན་པ་རེ་སྤེལ་ཨེ་ཐུབ་སྙམ་པའི་བསམ་པ་མ་གཏོགས། ཉིའུ་འོག་ནས་བཤད་པ་ལྟར་སྒོར་མོ་ཨེ་ལོན་བསམས་ནས་དེའི་དོན་ལ་ཡོང་བ་མིན་ལ། ཐོབ་གོ་གནས་ཤིག་ཨེ་ལོན་བསམས་ནས་ཡོང་བ་མིན། འོན་ཀྱང་མགོན་པོ་འཇམ་པའི་དབྱངས་ཀྱི་ཐུགས་རྗེ་དང་བྱིན་རླབས་ཤིག་གིས་ང་རང་དབང་མེད་པར་ཨ་རིའི་ལུང་པ་འདི་ལ་ཐོན་སོང་།

དེ་ཡིན་ན་ད་རེས་ཁྱེད་རྣམ་པ་ཐམས་ཅད་ལ་ཕན་ཐོགས་པའི་འཕྲིན་ལས་དུས་ལ་བབས་ནས། ང་མགོན་པོ་འཇམ་པའི་དབྱངས་ཀྱི་བྱིན་རླབས་ཀྱི་སྟོབས་ཀྱིས་གནས་འདིར་བསྐྱལ་བ་རེད་བསམ་པ་དང་། ཁྱེད་རྣམ་པ་ཚང་མ་ལ་ཡང་ཉིན་རེར་ཡོང་སྒོ་མང་པོ་ཡོད་ཀྱང་དེ་དག་ཐམས་ཅད་ཕར་གཡུགས་ཏེ། རང་དབང་མེད་པར་འཁོར་དུ་འདུ་ཡོང་བ་དེ་འཇམ་པའི་དབྱངས་ཀྱི་བྱིན་གྱིས་བརླབས་པ་རེད་སྙམ། མདོར་ན་འུ་ཅག་ཚང་མ་ཡང་དེ་རིང་ས་འདིར་ལྷན་དུ་འཛོམས་རྒྱུ་དེ་འཇམ་པའི་དབྱངས་ཁོ་ནའི་ཐུགས་རྗེ་ཡིས་བསྡུས་ཡོང་བ་རེད་བསམ།

ད་སྐབས་ཁྱེད་རྣམ་པས་ཀྱང་ཆོས་ཐོས་པ་ཙམ་དུ་མ་ཟད། ཆོས་འདི་རང་གིས་ཉམས་སུ་ལེན་པ་དང་རྗེས་མ་གཞན་ལ་རྒྱ་ཆེར་སྤེལ་བ་དེ་ངའི་རེ་བ་ཡིན་ལ་ཁྱེད་རྣམ་པའི་ལས་འགན་ཡང་རེད། དེ་ལྟར་བསྒྲུབ་པར་བྱས་ན་རང་གཞན་ཀུན་ལ་ཕན་པ་རྒྱ་ཆེན་པོ་འབྱུང་རྒྱུ་རེད། དེ་ཡང་སྔོན་ཆད་ལོ་རྒྱུས་ཀྱི་དབང་དུ་བྱས་ན་དབྱིན་ཇིས་འཛམ་གླིང་ལ་དབང་སྒྱུར་བྱེད་པའི་སྐབས་སུ། ཁོ་ཚོའི་དར་ཆ་བསྒྲེངས་པའི་ས་ཆ་ལ་ཉི་མ་ནུབ་པའི་དུས་ཚོད་ཅིག་མེད་ཅེས་བསྒྲགས་གཏམ་བཏང་མྱོང་བ་ཡིན། དཔེ་དེ་བཞིན་དུ་ད་ལྟ་འུ་ཅག་གིས་ཀྱང་ཆོས་འདིའི་སྟེང་ལ་ནུས་པ་དང་རྩལ་ཤུགས་གཅིག་ཏུ་བསྐྱེད་ན། འཇམ་དཔལ་ཞི་སྒྲུབ་ཀྱི་ཆོས་འདི་ཉམས་སུ་ལེན་པའི་གང་ཟག་གི་མགོ་ལ་ཉི་མ་ཤར་མེད་པའི་དུས་ཚོད་ཅིག་མེད་ཅེས་བཤད་ན་ཡང་སྨྲ་ཐུབ་པའི་སྐལ་བ་བཟང་པོ་ཞིག་ཤར་སོང་།

དེའི་དོན་ནི། ཁྱེད་ཨ་རིའི་ལུང་པ་ལ་ཉི་མ་མ་ཤར་བར་གཉིད་ཡོད་པའི་སྐབས་སུ། ངེད་ཨེ་ཤ་ཡའི་རྒྱལ་ཁབ་ཀྱི་སློབ་བརྒྱུད་ཚང་མས་ཆོས་འདི་ཉམས་སུ་བླངས་ནས་ཨོཾ་ཨ་ར་པ་ཙ་ན་དྷཱི་ཟེར་ནས་འདོན་པ་དང་། ངེད་རྣམས་གཉིད་ཡོད་སྐབས་ཁྱེད་རྣམ་པས་ཨོཾ་ཨ་ར་པ་ཙ་ན་དྷཱི་ཞེས་ཁྱེད་ཅག་གི་མགོར་ཉི་མ་ཤར་ཡོད། དེ་བས་འཛམ་བུ་གླིང་ན་ཆོས་འདི་ཉམས་སུ་ལེན་མཁན་གྱི་མགོ་ལ་ཉི་མ་ནུབ་མི་སྲིད་ཟེར་ཆོག་པ་ཡིན། ད་སྐབས་ཆུ་ཚོད་བཅུ་གཅིག་ལ་ཐོན་རན་འདུག་པས། ཆོས་འདི་ཉམས་སུ་ལེན་པའི་ཨེ་ཤ་ཡའི་ས་ཆ་ན་ཡོད་པའི་མི་ཕལ་ཆེར་ཉལ་ཚར་བ་མ་ཟད་གཉིད་ཡོད་ཀྱང་། འདི་ན་འཇམ་པའི་དབྱངས་ཀྱི་དབང་བསྐུར་ནས་ཨོཾ་ཨ་ར་པ་ཙ་ན་དྷཱི་ཟེར་ནས་འདོན་བཞིན་ཡོད། དོ་དགོང་འུ་ཅག་ཉལ་ཚེ་ཨེ་ཤའི་རྒྱལ་ཁབ་ལ་སོགས་པའི་སློབ་བརྒྱུད་ཚང་མས་ཨ་ར་པ་ཙ་ན་དྷཱི་ཞེས་ཉམས་ལེན་མི་བྱེད་པའི་དུས་ཚོད་ཅིག་མེད་པ་ཡིན།

ང་རང་ཉིད་ཀྱང་གཞེས་ཉིན་ནས་ཨ་རིའི་ལུང་པ་དང་ཁ་བྲལ་ནས་འགྲོ་རན་པ་ཡིན་ཡང་། ང་ཚོ་བོད་ཀྱི་རྒྱལ་བ་ཚངས་དབྱངས་རྒྱ་མཚོ་ཟེར་བ་ཞིག་ཡོད་པ་དེའི་མགུར་གླུའི་ནང་དུ། བྲིས་པའི་ཡི་གེ་ནག་ཆུང་། །ཆུ་དང་ཐིགས་པས་འཇིག་སོང་། །མ་བྲིས་སེམས་ཀྱི་རི་མོ། །བསུབས་ཀྱང་བསུབ་རྒྱུ་མི་འདུག །ཅེས་གསུངས་པ་ལྟར། དཔེར་ན་ཤོག་བུ་ཞིག་གི་ངོར་མཚལ་ཡིག་ཅིག་བྲིས་རྗེས་དེར་ཐམ་ག་ཞིག་བརྒྱབ་ན། དེ་འབྱུང་བཞིའི་གནོད་པ་སྣ་ཚོགས་པས་འཇིག་སྲིད་ཀྱང་། འུ་ཅག་གི་སེམས་ཀྱི་མཛའ་བརྩེ་དང་ཆོས་ཀྱི་བརྒྱུད་པ་དེ་ནམ་ཡང་འཇིག་པ་མེད་པར་སེམས་དཀྱིལ་དུ་རི་མོ་བཞིན་འབྲི་དགོས། ད་སྐབས་ཨ་རིའི་ལུང་པ་ན་ཡོད་པའི་ང་རང་གི་སློབ་མར་གྱུར་པ་མང་པོ་ཞིག་གིས། ཁྱེད་ཨ་རིའི་ལུང་པ་ལ་ཡང་ནས་ཡང་དུ་འོང་རྒྱུའི་རེ་བ་ཡོད་ཟེར། ང་རང་གི་བསམ་ཚོད་ལ་ཕྱོགས་གང་ཐད་ནས་ཡོང་ཐུབ་རྒྱུ་མ་རེད་མོད། རྗེས་མ་ངས་སེམས་ནས་མི་བརྗེད།

མདོར་ན་ང་ཨ་རིའི་ལུང་པ་ལ་ཡང་བསྐྱར་དུ་ཡོང་རྒྱུ་བྱུང་ན་ཡང་འདྲ། མ་བྱུང་ན་ཡང་འདྲ། ཁྱེད་རྣམ་པས་ཆོས་འདི་ཉམས་ལེན་ལྷོད་པ་མེད་པ་གྱིས་དང་གནད་གཅིག་པ་ཡིན། ཁྱེད་ཨ་རིའི་ལུང་པར་ཡོད་པའི་ང་རང་གི་སློབ་མ་ཐམས་ཅད་ཀྱི་བསམ་པ་དེ་མ་འགྱུར། ཆོས་ལ་དད་པ་དེ་མ་འགྱུར་དང་། ང་རང་མི་འགྱུར་སེམས་ཐག་གོར་མའི་རྡོ་ཡིན། ཉི་མ་ཟླ་བའི་འཁོར་ཕྱོགས། ནོར་ཡོང་བསམ་རྒྱུ་ཞིག་རྩ་བ་ནས་མི་འདུག

དབུས་ཀྱི་རི་རྒྱལ་ལྷུན་པོ། །མ་འགྱུར་བརྟན་པོར་བཞུགས་དང་། །ཉི་མ་ཟླ་བའི་འཁོར་ཕྱོགས། །ནོར་ཡོང་བསམ་པ་མི་འདུག ། ༼ཐལ་སྒྲ།༽

ཅེས་ཆོས་རྗེ་ཉིད་ཀྱིས་ཚང་མར་ཐུགས་སྨོན་གྱི་ཚུལ་དུ་མགུར་གླུ་འདི་སྙན་པའི་དབྱངས་ལ་བརྒྱུས་ཏེ་ཐེངས་གསུམ་ལ་གསུངས།

ནུབ་རྒྱ་མཚོ་ཆེན་མོར་གཟིགས་སྐོར་ལ་ཕེབས།

བྷོ་སི་ཐིན་དུ་སྡོད་པའི་རིང་ལ། ངེད་ཚོའི་སྡོད་གནས་དང་ཐག་མི་རིང་བའི་མཚམས་ནས་ནུབ་ཀྱི་རྒྱ་མཚོ་ཆེན་མོ་མཐོང་ཐུབ་ཅིང་། ཉིན་ཞིག་ཆོས་རྗེ་ཉིད་རྒྱ་མཚོའི་འགྲམ་ལ་གཟིགས་སྐོར་དུ་བྱོན། ཁོང་གིས་ཟིལ་རླབས་དགུང་ལ་འཕྱོ་བའི་ནུབ་ཀྱི་རྒྱ་མཚོ་ཆེན་མོར་གཟིགས་བཞིན། དེ་གའི་མི་རྣམས་ཀྱིས་ངོ་སྤྲོད་སྣ་ཚོགས་བྱས་པར་གསན་ནས་ཐུགས་སྣང་ཧ་ཅང་སྤྲོ་མོ་བྱུང་།

མཚོ་རྒྱུད་ཀྱི་བྲག་རྡོའི་བར་དང་འགྲམ་རྣམས་སུ། ཆུ་རྡོ་དང་འདྲ་བའི་མཚོ་འབུ་མུའུ་ལི་（Oyster）ཞེས་པ་མང་པོ་གཡོ་འགུལ་མེད་པར་འབྱར་འདུག་པ་མཐོང་། དེ་ནི་མཚོ་འགྲམ་གྱི་མི་ཚོས་རྒྱུན་དུ་ཁ་ཟས་སུ་བྱེད་པའི་ཉ་སོག་གི་རིགས་ཤིག་རེད། འགའ་ཞིག་གིས་ཆོས་རྗེ་ཉིད་ལ་གཟིགས་འབུལ་བྱས་པ་ན། ངེད་ཚོས་ཐེངས་དང་པོར་སྐོགས་ཤུན་ཅན་གྱི་སྙི་ལུས་སྲོག་ཆགས་དེ་མཐོང་བ་ཡིན་པས་ཧ་ལས་པར་གྱུར་ཅིང་། ཆོས་རྗེ་ཉིད་ཀྱིས། སེམས་ཅན་གྱི་ལས་སྣང་ནི་བསམ་གྱིས་མི་ཁྱབ་པ་ཡིན་པར་གསུངས་ནས་ཆེད་དུ་དེ་དག་ལ་བྱིན་རླབས་གནང་།

དེ་ཡང་ཆོས་རྗེ་ཉིད་དང་དམ་པ་གོང་མ་སུ་ཡིན་ཡང་། སྣང་ཚུལ་དུ་རྒྱ་མཚོ་ལ་དགྱེས་ཚོར་ཆེན་པོ་གནང་གིན་འདུག ཐ་ན་ཁོ་བོས་ཀྱང་རྒྱ་མཚོ་ཆེན་པོའི་འགྲམ་དུ་སོང་ནས་བལྟས་ན། རྣམ་པར་རྟོག་པའི་རྦ་རླབས་ཐམས་ཅད་མུ་མཐའ་མེད་པའི་དབྱིངས་ཀྱི་མཚོ་མོར་ཞི་ནས། མཚོ་མཁའ་གཅིག་ཏུ་འདྲེས་པའི་རང་གཤིས་དབྱིངས་རིག་དབྱེར་མེད་ཀྱི་ལྟ་བ་མངོན་དུ་གྱུར་བ་ལྟ་བུའི་སྣང་བ་ཁྱད་པར་བ་འབྱུང་གིན་འདུག

ཕྱི་ལོ་༡༩༩༠ལོར། བདག་གིས་ཆོས་རྗེ་ཉིད་དང་མཉམ་དུ་ཧིན་རྡུ་རྒྱ་མཚོ་ལ་ལྟ་མྱོང་ཞིང་། ད་ལན་ཁོང་དང་མཉམ་དུ་ཞི་བདེ་རྒྱ་མཚོ་དང་ནུབ་རྒྱ་མཚོ་ཆེན་མོར་ལྟ་བའི་སྐལ་བ་བྱུང་། སྤྱིར་རྒྱ་མཚོ་དེ་དག་ལ་ལྟར་སྣང་དུ་ཁྱད་པར་ཆེན་པོ་མི་འདུག་མོད། བདག་གིས་ཁོང་དང་མཉམ་དུ། རྒྱ་མཚོ་ཆེན་པོ་བཞི་ལས་བྱང་འཁྱགས་དར་རྒྱ་མཚོ་ལའང་ཐེངས་གཅིག་བལྟ་བའི་གོ་སྐབས་བྱུང་ན་ཅི་མ་རུང་སྙམ་པའི་གཞོན་དུས་ཀྱི་ནར་མ་སོན་པའི་རྨི་ལམ་ཞིག་ཡོད་ཀྱང་མངོན་དུ་འགྱུར་ཐུབ་མ་བྱུང་།

ངོ་མཚར་བའི་ཤམ་བྷ་ལ།

ཕྱི་ཟླ་༨པའི་ཚེས་༡༦ཉིན། ཆོས་རྗེ་ཉིད་ཤམ་བྷ་ལའི་ཆོས་ཚོགས་སུ་བྱོན་ནས་འདི་ལྟར་གསུང་།

དེ་རིང་གི་གནས་སྐབས་འདི་ལ་བྱ་བ་རྣམ་པ་གཉིས་ཡོད། ཤམ་བྷ་ལའི་ངོ་སྤྲོད་ཅིག་དང་འཛམ་གླིང་སེང་ཆེན་རྒྱལ་པོའི་དབང་བསྐུར་རྒྱུ་ཡིན།

ཤམ་བྷ་ལའི་རྒྱལ་རྒྱུད་བྱུང་ཚུལ།

ཐོག་མར་ཤམ་བྷ་ལའི་ངོ་སྤྲོད་ནི། སྤྱིར་ཤམ་བྷ་ལར་ཆོས་ཇི་ལྟར་བྱུང་ཚུལ་དང་། ཤམ་བྷ་ལ་ན་ཡོད་པའི་རྒྱལ་པོ་རྣམས་ཀྱི་མཛད་སྟངས་སོགས་ངོ་སྤྲོད་བྱེད་པ་ཡིན་ལ། དང་པོ་ནི་རང་རེ་རྣམས་ཀྱི་སྟོན་པ་ཐབས་མཁས་ལ་ཐུགས་རྗེ་ཆེན་པོ་དང་ལྡན་པ་འདི་ཉིད་ཀྱིས། བསྐལ་པ་དཔག་ཏུ་མེད་པའི་གོང་རོལ་ནས་ཐོག་མར་བྱང་ཆུབ་མཆོག་ཏུ་སེམས་བསྐྱེད། བར་དུ་བསྐལ་ཆེན་གྲངས་མེད་གསུམ་ལ་ཚོགས་བསགས། མཐར་རྒྱ་གར་རྡོ་རྗེ་གདན་དུ་མངོན་པར་རྫོགས་པར་སངས་རྒྱས་པའི་ཚུལ་བསྟན་ནས། ལྷ་དང་བཅས་པའི་འགྲོ་བ་རྣམས་ལ་ཕན་པ་དང་བདེ་བ་འབྱུང་བར་བྱ་བའི་ཕྱིར་དུ་ཡུལ་ཝཱ་རཱ་ཎ་སཱིའི་དྲང་སྲོང་ལྷུང་བ་རི་དྭགས་ཀྱི་ནགས་སུ་བཀའ་དང་པོ་བདེན་པ་བཞིའི་ཆོས་ཀྱི་འཁོར་ལོ་བསྐོར་བ་ཡིན་ལ། དེང་སང་འཛམ་བུ་གླིང་ན་སིང་གྷ་ལ་དང་། འབར་མ་སོགས་རྒྱལ་ཁབ་མང་པོ་ཞིག་གིས་བཅོམ་ལྡན་འདས་ཀྱི་བཀའ་དང་པོའི་ཆོས་དེ་ཉམས་སུ་ལེན་བཞིན་ཡོད། གནས་བྱ་རྒོད་ཕུང་པོའི་རི་ལ་སོགས་པར་བཀའ་བར་བ་མཚན་ཉིད་མེད་པའི་ཆོས་ཀྱི་འཁོར་ལོ་བསྐོར་བ་ཡིན། ཆོས་ཚུལ་དེ་དེང་སང་ཡང་རྒྱ་ནག་དང་ཉི་ཧོང་ལ་སོགས་པའི་མི་མང་པོ་ཞིག་གིས་ཉམས་བཞེས་མཛད་བཞིན་ཡོད། གནས་པདྨ་ཅན་ལ་སོགས་པར་བཀའ་ཐ་མ་ལེགས་པ་རྣམ་པར་ཕྱེ་བའི་ཆོས་ཀྱི་འཁོར་ལོ་བསྐོར་བ་རེད། དེ་ནི་གཙོ་བོ་མདོ་དང་སྔགས་གཉིས་ཀ་མཚམས་སྦྱོར་བྱེད་ཀྱི་ཆོས་ཡིན། དེ་ནས་ལྷ་དང་ཀླུ་དང་གནོད་སྦྱིན་དྲི་ཟ་ལ་སོགས་པའི་ཡུལ་མི་འདྲ་བ་རྣམས་སུ་སྐལ་བ་དང་ལྡན་པའི་གང་ཟག་རྣམས་ལ་གསང་སྔགས་རྡོ་རྗེ་ཐེག་པའི་ཆོས་འཁོར་བསྐོར་བ་རེད། དེ་ཡང་བོད་དང་། འབྲུག་ཡུལ། ཨ་རི་གཙོས་མི་མང་པོ་ཞིག་གིས་གསང་སྔགས་རྡོ་རྗེ་ཐེག་པའི་ཆོས་དེ་གཙོ་བོ་ཉམས་སུ་ལེན་བཞིན་ཡོད།

སྟོན་པ་ཐུགས་རྗེ་ཅན་གྱིས་དགུང་ལོ་བརྒྱད་ཅུ་གྱ་གཅིག་པ་ལྕགས་འབྲུག་ནག་པ་ཟླ་བའི་ཚེས་བཅོ་ལྔ་ལ་རྒྱ་གར་ལྷོ་ཕྱོགས་དཔལ་ལྡན་འབྲས་སྤུངས་མཆོད་རྟེན་ཆེན་པོ་རུ་དཔལ་ལྡན་དུས་ཀྱི་འཁོར་ལོ་དང་། འཇམ་དཔལ་མཚན་བརྗོད་ལ་སོགས་གསང་སྔགས་རྡོ་རྗེ་ཐེག་པའི་ཆོས་གསུངས། དེའི་འཁོར་དུ་གྱུར་པ་མི་དང་མི་མ་ཡིན་པ་ལྷ་དང་གནོད་སྦྱིན་ལ་སོགས་པའི་འགྲོ་བ་ཆེས་ཤིན་ཏུ་མང་པོ་ཞིག་ལ་ཆོས་དེ་བསྟན་པ་རེད།

དེའི་ནང་གི་སློབ་མ་ཐམས་ཅད་ཀྱི་གཙོ་བོར་གྱུར་པ་ནི་ཤམ་བྷ་ལའི་གྲོང་གི་རྒྱལ་པོ་ཆོས་རྒྱལ་ཟླ་བ་བཟང་པོ་ཡིན། ཟླ་བ་བཟང་པོས་དུས་ཀྱི་འཁོར་ལོའི་ཆོས་རྣམས་ཕྱོགས་གཅིག་ཏུ་བསྡུས་ནས་ཤོ་ལོ་ཀ་སྟོང་ཕྲག་བཅུ་གཉིས་སུ་བཀའ་བསྡུ་མཛད་པ་རེད། དེ་ནས་ཟླ་བ་བཟང་པོ་དང་། ཁོང་གི་སྲས། ཡང་དེའི་སྲས་སོགས་ཆོས་རྒྱལ་བདུན་གྱི་རིང་ལ་ཆོས་དེ་ཐོས་བསམ་སྒོམ་གསུམ་གྱིས་ཉམས་སུ་བླངས་པ་ཡིན། དེ་ཡན་ཆོད་ཀྱི་དུས་སུ་གོང་བཤད་ཆོས་རྒྱལ་དེ་དག་གི་རིང་ལ་ཤམྦྷ་ལར་རིགས་བཞི་ཡོད་པའི་ནང་ནས་རྡོ་རྗེའི་རིགས་ཁོ་ན་ལ་བསྟན་གྱི། གཞན་གསུམ་ལ་བསྟན་པར་མ་ནུས་པར་རིགས་ལྡན་དུ་མི་འཇོག་གོ །དེ་ནས་རིགས་ལྡན་འཇམ་དཔལ་གྲགས་པ་དེ་ཆོས་རྒྱལ་བདུན་གྱི་རྗེས་སུ་བྱུང་བ་ཡིན། ཁོང་གིས་བཅོམ་ལྡན་འདས་ཀྱི་བསྟན་པ་འཛིན་སྐྱོང་བྱེད་མཁན་ལ་རིགས་དང་རུས་སོགས་གང་ཡང་གཙོ་བོ་མིན། ཡོན་ཏན་སུ་ལ་ཡོད་ན་དེ་གཙོ་བོ་ཡིན་པས་དེས་བསྟན་པའི་གཞི་འཛིན་དགོས་ཞེས་གསུངས་ཏེ་གདུལ་བྱ་མི་རིགས་བཞི་པོ་ཐམས་ཅད་རྡོ་རྗེའི་རིགས་སུ་རིགས་གཅིག་པར་བྱས་ནས་དབང་བསྐུར་བས་རིགས་ལྡན་གྱི་རྒྱལ་པོར་འཇོག་སྟེ། རྩ་རྒྱུད་ལས། རིགས་བཞི་རིགས་གཅིག་བྱས་གང་དེས། །རིགས་ལྡན་ཚངས་པའི་རིགས་ཀྱིས་མིན། །ཞེས་གསུངས་པ་ཡིན་ནོ། །ཁོང་གི་མཛད་པ་དེ་ད་ལྟ་ཡང་ཤམ་བྷ་ལར་སྐྱོང་བཞིན་ཡོད། ཤམ་བྷ་ལའི་ཡུལ་ན་རིགས་མཐོ་དམན་མེད་པར་སུས་ཆོས་ལ་བསླབ་ཀྱང་ཆོག་པ་ཡིན། རིགས་ལྡན་འཇམ་དཔལ་གྲགས་པ་ཟེར་བ་དེ་རིགས་ལྡན་ཐམས་ཅད་ཀྱི་ཐོག་མ་རུ་བྱོན་པ་ཡིན། ཁོང་གིས་སྔར་ཆོས་རྒྱལ་བདུན་གྱི་རིང་གི་དུས་འཁོར་ཀྱི་ཆོས་ཡོངས་རྫོགས་ཚུར་བསྡུས་ནས་བཤད་པ་ལ་བསྡུས་པའི་རྒྱུད་ཅེས་ལེའུ་ལྔ་ཡོད་པ་ཞིག་བརྩམས། ཁོང་གི་མཛད་པ་དེ་ནི་སྔར་ཡབ་མེས་བདུན་གྱི་རིང་ལས་ཀྱང་ཁྱད་པར་དུ་གྱུར་པ་དང་མཆོག་ཏུ་གྱུར་པ་ཞིག་བྱུང་བ་ཡིན། དེའི་རྗེས་སུ་ཁོང་གི་སྲས་རིགས་ལྡན་པདྨ་དཀར་པོ་ཞེས་བྱ་བས་རྒྱལ་སྲིད་བཟུང་ཞིང་། རིགས་ལྡན་པདྨ་དཀར་པོས་ཡབ་ཀྱིས་བརྩམས་པའི་དུས་འཁོར་བསྡུས་རྒྱུད་དེ་ལ་འགྲེལ་བ་དྲི་མེད་འོད་ཅེས་བྱ་བ་བརྩམས། དེ་ནས་ད་ལྟའི་བར་དུ་གཙོ་བོ་ཉམས་ལེན་བྱ་རྒྱུ་དེ་དུས་འཁོར་རྩ་རྒྱུད་དང་བསྡུས་རྒྱུད་འདི་གཉིས་ཁོ་ན་ཡིན། རྩ་རྒྱུད་ཟེར་བ་ནི་གོང་གི་ཆོས་རྒྱལ་བདུན་གྱི་རིང་ལ་བྱུང་བའི་རྒྱུད་དེ་དང་། བསྡུས་རྒྱུད་ཟེར་བ་དེ་རིགས་ལྡན་འཇམ་དཔལ་གྲགས་པས་མཛད་པའི་ལེའུ་ལྔ་ཅན་གྱི་རྒྱུད་དེ་ཡིན། རིགས་ལྡན་རྣམས་ཀྱིས་ལོ་བརྒྱ་རེ་ལ་གསེར་ཁྲིའི་སྟེང་དུ་འཁོད་ནས་མངའ་དབང་བསྒྱུར་ཅིང་། དེ་ནས་དེའི་སྲས་ཀྱིས་རྒྱལ་སྲིད་འཛིན་པ་ཡིན། དེའི་ནང་དུ་དམིགས་བསལ་རྒྱལ་དཀའ་དང་རྣམ་རྒྱལ་ཟེར་བ་གཉིས་ཡོད། དེ་གཉིས་ཀས་ལོ་བཞི་བརྒྱ་དང་གསུམ་ལ་རྒྱལ་སྲིད་བཟུང་། དེ་མིན་པ་ཚང་མས་རྒྱལ་སྲིད་བཟུང་ནས་ལོ་བརྒྱ་རེར་བཞུགས་པ་ཡིན། དེ་ཡང་ཁོང་རྣམས་ཀྱི་སྐུ་ཚེའི་ཚད་དེ་ལྟར་ཡིན་ཟེར་བའི་དོན་མིན་ལ། སྐུ་ཚེ་ཡི་དབང་དུ་བྱས་ན་དང་པོ་རྒྱལ་ས་མ་ཐོབ་པའི་སྔོན་དུ་ཡང་ལོ་མང་པོ་ལ་བཞུགས་ཤིང་། རྗེས་སུ་རང་ཉིད་ཀྱི་སྲས་དེས་རྒྱལ་ས་འཛིན་སྐབས་ཀྱང་ལོ་མང་པོ་ཞིག་ཏུ་བཞུགས་རྒྱུ་རེད།

དེས་ན་དེང་སང་རིགས་ལྡན་ཉེར་གཅིག་པ་ཡིན་ལ། ཁོང་གི་མཚན་ལ་རིགས་ལྡན་མ་འགགས་པ་ཟེར། ཁོང་གསེར་ཁྲིའི་སྟེང་དུ་འཁོད་ནས་ལོ་ངོ་དྲུག་ཅུ་རེ་བདུན་ཡིན། དེའི་རྗེས་སུ་ཁོང་གི་སྲས་རིགས་ལྡན་ཉེར་གཉིས་པ་མིའི་སེང་གེ་ཟེར་བ་དེ་རྒྱལ་སྲིད་ལ་བཀོད་ཅིང་། དེས་ལོ་བརྒྱ་ལ་རྒྱལ་སྲིད་བཟུང་བའི་རྗེས་སུ་དེའི་སྲས་རིགས་ལྡན་ཉེར་གསུམ་པ་དབང་ཕྱུག་ཆེན་པོས་རྒྱལ་སྲིད་འཛིན་པ་ཡིན་ལ། དེ་ནས་ཁོང་གི་སྲས་རིགས་ལྡན་ཉེར་བཞི་པ་མཐའ་ཡས་རྣམ་རྒྱལ་གྱིས་རྒྱལ་སྲིད་བཟུང་མཐར། དེའི་སྲས་རིགས་ལྡན་དྲག་པོ་ལྕགས་ཀྱི་འཁོར་ལོ་ཅན་བྱོན་པ་ཡིན།

རིགས་ལྡན་ཉེར་ལྔ་པ་ཁོང་གི་མཛད་སྤྱོད་ནི། འཛམ་བུ་གླིང་དང་གླིང་གཞན་གྱི་སེམས་ཅན་ཐམས་ཅད་ལ་མི་བདེ་བ་དང་སྡུག་བསྔལ་རྣམ་པ་སྣ་ཚོགས་བྱུང་བའི་གནས་སྐབས་ན། ཁོང་དྲག་པོའི་སྐུར་བཞེངས་ནས་སེམས་ཅན་ཐམས་ཅད་བདེ་བ་ལ་འགོད་པར་བྱེད་པ་ཡིན། འཛམ་བུ་གླིང་གི་སེམས་ཅན་རྣམས་ཀྱི་ལུས་དང་སྲོག་ལ་གནོད་པ་སྐྱེལ་མཁན་གྱི་མ་རུངས་པའི་སེམས་ཅན་མང་པོ་ཞིག་ཚར་གཅོད་པར་བྱེད་པ་མ་ཟད། ནུབ་བ་ལང་སྤྱོད་དང་། བྱང་སྒྲ་མི་སྙན། ཤར་ལུས་འཕགས་པོ་སོགས་ཚང་མ་མངའ་འོག་ཏུ་བསྡུ་བར་བྱེད་པ་ཡིན། དེའི་དུས་སུ་ཁོང་གསེར་ཁྲི་ལ་འཁོད་ནས་དཔལ་དུས་ཀྱི་འཁོར་ལོ་གཙོ་བོར་གྱུར་པའི་ཆོས་རྒྱ་ཆེར་སྤེལ་བས། དུས་སྐབས་དེ་ལ་ཆོས་དང་སྲིད་གང་གི་ཐད་ནས་བསམ་བློ་བཏང་ན་ཡང་སྔོན་ཆད་ཡབ་མེས་གོང་མ་ཆོས་རྒྱལ་བདུན་དང་། རིགས་ལྡན་ཉེར་བཞི་ལས་ལྷག་པའི་བྱ་བ་རྒྱ་ཆེན་པོ་ཞིག་མཛད་པ་ཡིན། ཁོང་གི་མཛད་པ་དེ་རྒྱུན་སྐྱོང་མཁན་རྣམས་ཀྱིས་ཀྱང་ལོ་སྟོང་ཕྲག་ཁ་ཤས་ཀྱི་བར་དུ་མི་ནུབ་པར་བྱེད་པ་ཡིན་ལ། དེའི་རྒྱུན་སྐྱོང་བ་པོ་ཁོང་གི་སྲས་ཚངས་པ་དང་ལྷ་དབང་གཉིས་ཀས་ཁོང་གི་ཕ་ཡབ་ཀྱི་མཛད་སྤྱོད་དེ་རྒྱ་ཆེར་སྐྱོང་རྒྱུ་རེད། དེ་ནི་ཤམ་བྷ་ལའི་ཡུལ་དུ་རྒྱལ་པོ་རྣམས་ཇི་ལྟར་བྱུང་ཚུལ་གྱི་ལོ་རྒྱུས་མདོར་བསྡུས་ཙམ་ཞིག་ཁྱེད་རྣམས་ལ་ཞུས་པ་ཡིན།

ཤམ་བྷ་ལའི་ཡུལ་ཁམས་ཆགས་ཚུལ།

དེ་ནས་ཤམ་བྷ་ལའི་ཡུལ་དེ་གང་དུ་ཡོད་ཅེ་ན། ཡུལ་དབུས་རྡོ་རྗེ་གདན་གྱི་བྱང་ཕྱོགས་ན་ལི་ཡུལ་དང་། དེའི་ཕ་རོལ་ན་གངས་རི་དཔལ་དང་ལྡན་པ་ཟེར་བ་ཞིག་ཡོད་ལ། དེའི་བྱང་ཕྱོགས་ན་ཤམ་བྷ་ལའི་ཡུལ་ཁམས་ཡོད། གངས་རི་དེ་གང་དུ་ཡོད་ཅེ་ན། ཡུལ་དབུས་རྡོ་རྗེ་གདན་གྱི་བྱང་ཕྱོགས་སུ་ཧ་ཅང་མཐོ་བའི་རི་ནག་པོ་དགུ་བརྒལ་བའི་ས་དེར་ཡོད། གངས་རི་དཔལ་དང་ལྡན་པའི་ཕ་རོལ་ན་སྤོས་ངད་ལྡན་པ་ཞེས་བྱ་བའི་རི་ཞིག་ཡོད། རི་སྤོས་ངད་ལྡན་པ་དང་གངས་རི་དཔལ་ལྡན་གཉིས་ཀའི་བར་དེ་ན་མཚོ་མ་དྲོས་པ་ཞེས་བྱ་བའི་མཚོ་ཆེན་པོ་ཞིག་ཡོད། འཛམ་བུ་གླིང་གི་ཆུ་ཀླུང་ཡོད་ཚད་ཀྱི་རྩ་བ་མཚོ་མ་དྲོས་པ་དེ་ལ་ཐུག་ཡོད་ཅིང་དེ་ནས་བབས་ཡོང་བ་རེད། རི་སྤོས་ངད་ལྡང་བའི་ཕ་རོལ་ན་ཤམ་བྷ་ལའི་གྲོང་ཁྱེར་ཆགས་ཡོད་ཅིང་། རི་ནག་པོ་དགུ་དང་གངས་རི་དཔལ་ལྡན་ཟེར་བ་དེ་ཡང་ཆུང་ཆུང་མ་ཡིན་པར་ཧ་ཅང་གི་རི་ཆེན་པོ་ཡིན། ཧ་ལམ་ཞིག་ཚོད་འཇོག་བྱས་ན། དཔེར་ན་དེང་སང་བོད་དང་བལ་པོ་གཉིས་ཀྱི་མཚམས་ན་ཧི་མ་ལ་ཡ་ཞེས་པའི་རི་རྒྱུད་ཅིག་ཡོད། དེའི་ཆེས་མཐོ་སའི་མཚོ་འཕགས་ལ་སྨི་སྟོང་ཕྲག་བརྒྱད་དང་བརྒྱད་བརྒྱ་བཞི་ཅུ་ཞེ་བརྒྱད་ཡོད། ད་ལྟ་འཛམ་བུ་གླིང་འདིར་རྒྱལ་ཁབ་བརྒྱ་དང་བརྒྱད་ཅུ་ལྷག་འདུག དེ་ཐམས་ཅད་ཀྱི་ནང་ན་འདི་ལྟ་བུའི་རི་གཅིག་ཀྱང་མེད། དེའི་འཕྲོ་ནས་ནུབ་ཕྱོགས་སུ་རི་མཐོ་ཤོས་ལྷོ་ཨ་མེ་རི་ཀའི་རི་བོ་མོང་ཐཱི་མའེ་ཁཱན་ལེས་（Mount McKinley）ཡིན་ལ། མཚོ་འཕགས་༦༠༠༠ལྷག་ཡོད། རི་ནག་པོ་དགུ་ཟེར་རྒྱུ་དེ་དཔེར་ན་ཧི་མ་ལ་ཡི་རི་འདྲ་ཞིག་ཡིན་ན་མ་གཏོགས་རང་བཞིན་གྱི་རི་ཕལ་བ་ཞིག་མིན། དེ་ན་མཚོ་དང་གངས་རི་དང་བྲག་རི་དང་ནགས་ཚལ་ལ་སོགས་པ་ཕལ་ཆེར་རྫུ་འཕྲུལ་དང་ལྷག་པའི་ལྷས་རྗེས་སུ་བཟུང་ཡོད་པའི་གང་ཟག་མ་གཏོགས་རང་གར་གྱིས་བགྲོད་དཀའ་བ་ཡིན།

ཡང་མང་ཆེ་བས་བསམ་ན་ཤམ་བྷ་ལའི་གནས་ཟེར་བ་རྩ་བ་ནས་མི་སྲིད། འཛམ་བུ་གླིང་གི་ཚན་རིག་པ་སུས་ཀྱང་མ་མཐོང་བས་མེད་བསམས་ན། འཛམ་བུ་གླིང་གི་ཚན་རིག་པ་ཐམས་ཅད་སྤྱིར་ཧ་ཅང་བཟང་པོ་ཡིན་ཡང་། ད་དུང་ཇེ་བཟང་ཇེ་གསལ་ཇེ་རྒྱས་སུ་འགྲོ་རྒྱུ་ཡོད་པས། བཅོམ་ལྡན་འདས་ཀྱི་མཁྱེན་པ་དང་འདྲ་བ་མ་ཡིན་ལ། བཅོམ་ལྡན་འདས་ཀྱིས་ཤམ་བྷ་ལ་ཡོད་ཅེས་གསུངས་ཡོད་པ་དེ། སྔོན་གྱི་དུས་སུ་དགེ་བསྙེན་ཙི་ལུ་པ་ལ་སོགས་མང་པོ་ཞིག་བྱོན་ནས་དེ་ཡོད་པ་ར་སྤྲོད་བྱུང་ཡོད། འཛམ་བུ་གླིང་གི་སྨན་གྱི་ཐད་ནས་བསམ་ན་ཨ་རིའི་རྒྱལ་ཁབ་དེ་ཨང་དང་པོ་རེད། འོན་ཀྱང་ནད་གསར་བ་མང་པོ་ལ་གཉེན་པོ་མ་རྙེད་ནས་སྨན་པ་རྣམས་ཀྱིས་ཞིབ་འཇུག་བྱེད་བཞིན་པའི་སྒང་ཡིན་པ་ལྟ་བུ་དང་། གལ་ཏེ་ཚན་རིག་པ་ཞིག་གིས་ས་ཆ་འདི་ལ་རླུང་ཆེན་པོ་ཞིག་འོང་རྒྱུ་རེད་ཟེར་ན། རླུང་ཆེན་པོ་འོང་རྒྱུ་ཡོད་པ་དེ་གོ་ཡང་རླུང་ཆེན་པོ་དེ་མི་འོང་ཐབས་ཇི་ལྟར་ཡིན་མི་ཤེས་པ་ཡང་ཡོད། སྟོན་པ་སངས་རྒྱས་ཡིན་ན་རླུང་དེ་འོང་བ་ཤེས་ན་དེ་འགོག་ཐབས་མི་ཤེས་ཟེར་བ་ཞིག་རྩ་བ་ནས་མི་སྲིད། དེས་ན་བྱིས་པ་རྣམས་རིམ་གྱིས་ནར་སོན་དགོས་པ་བཞིན་ད་རུང་ཇེ་བཟང་དང་ཇེ་འཕེལ་དུ་འགྲོ་རྒྱུ་ཡོད་པ་ཡིན། གཞན་ཡང་ཚན་རིག་པ་ཞིག་གིས་འཛམ་བུ་གླིང་གི་རྒྱལ་ཁབ་ཡོངས་རྫོགས་གསལ་ཐུབ་པའི་ཉི་འོད་དང་འདྲ་བའི་གློག་ཆེན་པོ་ཞིག་ཤར་རྒྱུ་ཡོད་ཚུལ་སྤྱི་བསྒྲགས་བྱས་པ་རེད་ཅེས་ཐོས། དུས་སྐབས་དེར་ཐམས་ཅད་ཀྱིས་ལྟ་བཞིན་པ་མ་ཟད། ང་ལའང་མི་མང་པོས་དེ་ལྟ་བུ་ཞིག་གསལ་འོང་རྒྱུ་རེད་ཟེར་ནས་སྐད་ཆ་བཤད་བྱུང་། ངས་དེ་རྩ་བ་ནས་སྲིད་རྒྱུ་མ་རེད་སྙམ། ཕྱིས་སུ་གློག་དེ་ལ་སྐྱོན་ཞུགས་པས་མ་གསལ་བ་རེད་ཟེར། དེ་འདྲའི་སྐད་ཆ་ཞིག་བཅོམ་ལྡན་འདས་ཀྱིས་ཐོག་མཐའ་བར་གསུམ་ཀུན་ཏུ་གསུངས་མི་སྲིད།

དེ་ལྟ་བུའི་ཤམ་བྷ་ལའི་ཆགས་ཚུལ་དང་། ཆོས་རྒྱལ་རྣམས་འབྱུང་ཚུལ་ཚང་མ་བཅོམ་ལྡན་འདས་ཀྱིས་གསུངས་ཡོད། ཤམ་བྷ་ལའི་ཡུལ་ཁམས་ཀྱི་ཆེ་ཆུང་གི་དབང་དུ་བྱས་ན་འཛམ་བུ་གླིང་གི་སུམ་ཆ་གཉིས་ཙམ་ཤམ་བྷ་ལའི་གྲོང་ཁྱེར་གྱིས་བཟུང་ཡོད་ལ། ཤམ་བྷ་ལའི་གྲོང་ཁྱེར་དེའི་ཕྱི་རུ་གངས་རིས་བསྐོར་བའི་ནང་དུ་གྲོང་ཁྱེར་ཆེན་པོ་འབུམ་ཕྲག་དགུ་བརྒྱ་དྲུག་ཅུ་གནས་པ་དང་། དེའི་ནང་དུ་ཡང་གངས་རིས་བསྐོར་བའི་དབུས་སུ་ཤམ་བྷ་ལའི་རྒྱལ་པོ་རྣམས་བཞུགས་སའི་གྲོང་ཁྱེར་ཀ་ལཱ་པ་ཞེས་བྱ་བ་ཞིག་ཡོད། ཤམ་བྷ་ལའི་ཆུ་ཐམས་ཅད་ཀྱི་སྣེ་དེ་གྲོང་ཁྱེར་ཀ་ལཱ་པར་བཞུར་གྱིན་ཡོད་ཅིང་། ཤམ་བྷ་ལའི་གྲོང་གི་མཐའ་གངས་དང་མཚོ་ལ་སོགས་པ་མང་པོས་བསྐོར་ཡོད་པས་རྫུ་འཕྲུལ་བཟང་པོ་ཞིག་ཐོབ་མེད་ན་རང་བཞིན་གྱིས་མི་འགྲོ་མི་ཐུབ། རྫུ་འཕྲུལ་དང་ལྡན་པའི་གང་ཟག་པདྨ་སམ་བྷ་ཝ་ཤམ་བྷ་ལའི་གྲོང་དུ་སོང་ནས་སྔར་ཆོས་རྒྱལ་ཟླ་བ་བཟང་པོའི་སྐུ་མདུན་དུ་དུས་ཀྱི་འཁོར་ལོ་དང་རྫོགས་པ་ཆེན་པོ་ཞུས། ཤམ་བྷ་ལའི་གྲོང་ཁྱེར་གྱི་མི་དང་རྒྱལ་པོ་ཚང་མའི་མཛད་སྤྱོད་དེ་ཅི་འདྲ་ཡིན་ན། སེམས་ཅན་ཐམས་ཅད་ལ་གནོད་ཅིང་འཚེ་བར་བྱེད་པ་ཐམས་ཅད་ལ་དྲག་པོའི་མཛད་སྤྱོད་དང་། སྐལ་བ་དང་ལྡན་པའི་གང་ཟག་རྣམས་ལ་དམ་པའི་ཆོས་དགེ་བའི་མཛད་སྤྱོད་དེ་རྣམ་པ་གཉིས་ཡོད།

དཔེར་ན་རིགས་ལྡན་དྲག་པོ་ལྕགས་འཁོར་ཅན་ཞེས་བྱ་བ་དེ་ནི་སྔོན་གྱི་དུས་ན་ཨོ་རྒྱན་པདྨ་སམ་བྷ་ཝ་རེད། བར་དུ་འཛམ་བུ་གླིང་དུ་མི་བདེ་བ་དང་སྡུག་བསྔལ་རྣམ་པ་སྣ་ཚོགས་དར་ཡོང་ཚེ་དེ་དག་ཐམས་ཅད་མེད་པར་བྱེད་པ་པོ་ང་ཚོ་བོད་ཡུལ་གྱི་མདོ་ཁམས་སྨད་ཀྱི་ས་ཆ་རུ་འཛམ་གླིང་སེང་ཆེན་རྒྱལ་པོ་ཞེས་བྱ་བའི་སྐུར་བཞེངས་པ་ཡིན། དེ་ཡང་ལ་ལས་གེ་སར་དེ་ལྷ་སྒྲུང་ཙམ་ཡིན་ཟེར། ལ་ལས་དོན་དངོས་ཐོག་ན་གེ་སར་ཟེར་བ་ཞིག་ཡོད་ཟེར། གེ་སར་ཟེར་བ་དེ་བཤད་སྲོལ་ཙམ་ལས་མི་ངོ་མ་ཞིག་མེད་ཟེར་བ་ནི། མི་འོན་པ་དང་ལོང་བ་ལ་བཤད་ན་མ་གཏོགས་སུ་གཅིག་གི་རྣ་བར་འགྲོ་བའི་སྐད་ཆ་ཞིག་མིན། གཙོ་བོ་གེ་སར་ཁོང་དང་བློན་ཆེན་འདུག་སའི་ས་གནས་མཁར་ཤུལ་ཚང་མ་ད་ལྟ་མངོན་སུམ་དུ་ང་ཚོའི་ས་ཆ་རུ་ལྟ་སྐོར་དུ་སོང་ན་མཇལ་ས་ཡོད། དཔེར་ན་གེ་སར་གྱི་སྐུ་མཁར་སེང་འབྲུག་སྟག་རྩེ་ཟེར་བ་ཞིག་ཡོད། ང་ཡང་ཕྱི་ལོ་༡༩༩༠ལོར་མཚོ་སྔོན་ཕྱོགས་སུ་སོང་བ་ན། ཧ་ལམ་གེ་སར་གྱི་སྐུ་མཁར་སེང་འབྲུག་སྟག་རྩེ་སྔོན་ཆད་ཡོད་སའི་ས་ཆ་དེ་འདི་ཨེ་ཡིན་སྙམ་ནས་ངོས་འཛིན་བྱས། སྐབས་དེར་སྤང་ཐང་ཞིག་མ་གཏོགས་ཤུལ་ཙམ་ཡང་མི་འདུག དེའི་རྗེས་སུ་གེ་སར་གྱི་སྐུ་མཁར་དེ་ཡར་བཞེངས་སྐབས་སྔར་གྱི་གེ་སར་གྱི་ཁང་པའི་རྩིག་པ་དང་རྒྱུ་རྫས་མང་པོ་ཡང་ས་དེ་ནས་བྱུང་བ་ཡིན་པར་བཤད། དེང་སང་ཡང་བོད་དང་རྒྱ་ནག་གི་གེ་སར་ཞིབ་འཇུག་པ་ཚང་མས་དེ་ལ་ཡིད་ཆེས་དང་དགའ་སྤྲོ་བྱེད་བཞིན་ཡོད། དེ་དུས་ཁང་པ་ལས་སའི་ས་ངོས་སྙོམས་པའི་སྐབས་སུ་མཁན་པོ་རྣམ་གྲོལ་དང་དངོས་གྲུབ་རྡོ་རྗེ་གཉིས་ཀྱང་ང་ཚོའི་གྲལ་དུ་ཡོད། དེ་ལྟ་བུའི་གེ་སར་དེ་ཐ་མའི་དུས་སུ་རིགས་ལྡན་དྲག་པོ་ལྕགས་འཁོར་ཅན་གྱི་སྐུར་བཞེངས་པ་ཡིན།

ཤམ་བྷ་ལའི་ཆོས་ཚོགས་ཀྱི་ངོ་སྤྲོད།

འདིར་ཡོད་པའི་ཤམ་བྷ་ལའི་ཆོས་ཚོགས་ཀྱང་ཁྱེད་རྣམས་ཀྱི་ཐུགས་ལ་གསལ་བཞིན་པ་ཡིན་ཏེ། སློབ་ཚུལ་རྣམ་པ་གཉིས་ཡོད། གཅིག་དེ་ནི་ཤམ་བྷ་ལའི་སློབ་སྦྱོང་དང་། ཅིག་ཤོས་ནི་ནང་བསྟན་གྱི་སློབ་སྦྱོང་ཡིན། ཤམ་བྷ་ལའི་ཆོས་ལ་སློབ་སྦྱོང་བྱེད་རྒྱུ་དེ་ཅི་འདྲ་ཞིག་ཡིན་ཞེ་ན། འཁོར་དེ་ནང་པ་སངས་རྒྱས་པ་ཡིན་ཡང་ཆོག་ལ་མིན་ཡང་ཆོག སྐྱེ་བོ་སུ་འདྲ་ཡིན་ཡང་རང་གི་མོས་པ་བཞིན་བྱེད་ཆོག་པ་དང་། འཛམ་བུ་གླིང་གི་རྒྱལ་ཁབ་སུ་དང་གང་ལ་ཡང་གོང་མ་ལ་ཕྲག་དོག་མེད་པ། འོག་མ་ལ་བརྙས་བཅོས་མེད་ཅིང་ཐམས་ཅད་ལ་བྱམས་སེམས་འཆང་བའི་བྱ་བ་ཞིག་ཡིན་པས། གཙོ་བོ་བྱམས་སྙིང་རྗེ་གཞིར་བཞག་གི་སྟེང་ནས་སེམས་ཅན་མཆོག་དམན་རབ་འབྲིང་ཐམས་ཅད་ལ་ཐབས་རྣམ་པ་སྣ་ཚོགས་ཀྱིས་ཕན་ཅི་ཐོགས་བྱེད་པའི་བྱ་བ་དེ་རེད།

ལ་ལས་བསམས་ན་ཤམ་བྷ་ལའི་འཁོར་དེ་ན་རྡོ་རྗེ་བཀའ་སྲུང་དང་རྡོ་རྗེའི་ཆོས་སྲུང་ཞེས་དམག་གི་ལས་ཀ་ལྟ་བུ་མང་ཙམ་འདུག་པས། འདི་རྒྱལ་ཁབ་དང་སེམས་ཅན་ལ་གནོད་པའི་ལས་ཀ་ཡིན་སྙམ་ན་དེ་རྩ་བ་ནས་མིན། དེ་ནི་ལོ་རྒྱུས་སྔ་མ་ལ་ཕྱིར་བལྟས་བྱས་ན་གསལ་བོ་མཐོང་ཐུབ། དཔེར་ན་རྒྱལ་ཁབ་འདིར་ཤམ་བྷ་ལའི་ཆོས་ཚོགས་དབུ་ཚུགས་ནས་ཡུན་རིང་པོ་སོང་ཡང་། དེའི་རིང་ལ་ཆོས་ཚོགས་འདིར་བསྟེན་ནས་ཨ་རིའི་རྒྱལ་ཁབ་གཙོ་བོར་གྱུར་པའི་རྒྱལ་ཁབ་སུ་གཅིག་ལ་ཡང་གནོད་པ་ཁབ་རྩེ་ཙམ་ཞིག་སྐྱེལ་མ་མྱོང་། སེམས་ཅན་མཆོག་དམན་རབ་འབྲིང་སུ་ལ་ཡང་གནོད་པའི་བྱ་བ་སྣ་གཅིག་རྩོམ་མ་མྱོང་པ་དེས་ཀྱང་ཤེས་ཐུབ། རྡོ་རྗེའི་བཀའ་སྲུང་དང་རྡོ་རྗེའི་སྐུ་སྲུང་རྣམས་ཀྱི་སྤྱོད་པ་དེས་ཀྱང་། མ་འོངས་པའི་དུས་ན་རིགས་ལྡན་དྲག་པོ་ལྕགས་འཁོར་ཅན་གྱི་འཁོར་དུ་སྐྱེས་ནས། སེམས་ཅན་ལ་ཕན་པ་རྒྱ་ཆེན་པོ་འབྱུང་བའི་རྟེན་འབྲེལ་ད་ལྟ་ནས་བསྒྲིགས་པ་རེད། དེས་ན་ཤམ་བྷ་ལའི་ཆོས་ཚོགས་ཀྱི་སློབ་སྦྱོང་དེ་ཡང་འཚེ་མེད་ཞི་བའི་ལམ་ཡིན་པས། རྒྱལ་ཁབ་འདིའི་མི་མང་དག་ལ་ཕན་ཐོགས་ཆེ་བ་ཞིག་རེད་སྙམ་པ་མ་གཏོགས་གཞན་གང་ཡང་མེད་པས། འདི་ཡག་པོ་ཞིག་ཡོང་དགོས་རྒྱུ་རེད།

ཤམ་བྷ་ལའི་ཆོས་ཚོགས་ཀྱི་སློབ་སྦྱོང་གཉིས་པ་དེ་ནང་བསྟན་ལ་སློབ་སྦྱོང་བྱེད་པ་དེ་རེད། དེས་ན་ཚོགས་པ་འདིར་སྔོན་ཆོས་ཉམས་སུ་ལེན་པའི་གང་ཟག་ཐམས་ཅད་ལ་སྔོན་འགྲོ་དང་། ཞི་གནས་སྒོམ་ཚུལ། རྡོ་རྗེ་རྣལ་འབྱོར་མ་བསྐྱེད་ཚུལ་བཤད། དེ་ནས་ཕྱག་རྒྱ་ཆེན་པོ་དང་རྫོགས་པ་ཆེན་པོ་ལ་སློབ་སྦྱོང་བྱེད་ཚུལ་བཤད་པ་ཡིན། ཁྱེད་རྣམ་པས་ཤམ་བྷ་ལའི་ཆོས་རྒྱུན་རྐྱང་པ་ལ་སློབ་སྦྱོང་བྱས་ན་ཡང་ཆོག་ལ། ནང་བསྟན་རྐྱང་པ་ལ་སློབ་སྦྱོང་བྱས་ན་ཡང་ཆོག་རྒྱུ་རེད། གཙོ་བོ་ཤམ་བྷ་ལའི་སློབ་སྦྱོང་དེ་དང་ནང་བསྟན་གྱི་སློབ་སྦྱོང་གཉིས་འགལ་མེད་གནད་གཅིག་ཏུ་ཉམས་སུ་བླངས་ན་ཚེ་འདིར་ཡང་བདེ། ཕྱི་མ་ཡང་བདེ་བས་བདེ་དགེ་ཕུན་སུམ་ཚོགས་པ་བསམ་གྱིས་མི་ཁྱབ་པ་ཞིག་འབྱུང་བ་ཡིན། ཡུན་རིང་པོའི་བར་ཆོས་ཚོགས་འདིའི་ཕྱག་བཞེས་སྐྱོང་བའི་སློབ་མ་མང་པོ་ཡང་འབྱུང་རྒྱུ་རེད། དེས་ན་ཁྱེད་རྣམས་ཀྱིས་ཤམ་བྷ་ལའི་སློབ་སྦྱོང་དང་། ནང་བསྟན་གྱི་སློབ་སྦྱོང་དེ་མི་དམན་པ་ཞིག་བྱེད་པ་ཅི་ནས་ཀྱང་གལ་ཆེ།

གཙོ་བོ་ཁྱེད་རྣམ་པས་ཤེས་གསལ་ལྟར། ངས་ཀྱང་ཤམ་བྷ་ལའི་ཆོས་ཚོགས་ཀྱི་མཛད་སྤྱོད་གཙང་མ་དེ་ངོ་སྤྲོད་མདོར་བསྡུས་ཙམ་ཞིག་ཞུས་པ་ཡིན། དེ་འདྲའི་མཛད་སྤྱོད་དེ་རང་གིས་མ་ཤེས། གཞན་ལ་ཡང་བསྒྲགས་མ་ཐུབ་ན་ཆོས་ཚོགས་འདི་ལ་རྙོག་འཛིང་མང་པོ་ཡོང་སྲིད་པ་ཡིན། རྙོག་འཛིང་ཇི་ལྟར་འབྱུང་སྙམ་ན་ལ་ལས་བསམས་ན། ཤམ་བྷ་ལའི་སློབ་སྦྱོང་དེ་རྒྱལ་ཁབ་ལ་གནོད་བྱེད་ཀྱི་ལས་དང་མིའི་ལུས་ལ་གནོད་བྱེད་ཀྱི་ལས་ཡིན་སྙམ་པའི་དོགས་པ་འབྱུང་སྲིད། ཆོས་ཚོགས་ནང་ནས་ཀྱང་ཤམ་བྷ་ལའི་སློབ་སྦྱོང་བྱེད་པ་དང་། ནང་བསྟན་ལ་སློབ་སྦྱོང་བྱེད་པ་གཉིས་གནད་གཅིག་ཡིན་པ་མ་ཤེས་ན་ནང་ཕན་ཚུན་འགལ་འདུ་མང་པོ་འབྱུང་སྲིད་རྒྱུ་རེད། མདོར་ན་ངས་གོང་དུ་བཤད་པ་བཞིན་དུ་ཤམ་བྷ་ལའི་ཆོས་ཚོགས་ཀྱི་སློབ་སྦྱོང་དེ་ཡང་འཚེ་མེད་ཞི་བའི་ལམ་ཁོ་ན་ཡིན་པ་དང་། སློབ་ཚན་གཉིས་ཀ་འགལ་མེད་གནད་གཅིག་ཡིན་པ་ཤེས་ན་ཁྱེད་རྣམས་ལ་ཕན་པ་འབྱུང་བ་དང། རྒྱལ་ཁབ་ལ་ཕན་པ་འབྱུང་བར་མ་ཟད་སྙན་གྲགས་ཀྱང་ཇེ་རྒྱས་སུ་སོང་ནས། མཛད་པ་ཡང་ཇེ་རྒྱས་སུ་འགྲོ་བ་ཡིན།

གེ་སར་གྱི་དབང་།

གཉིས་པ་གེ་སར་གྱི་དབང་སྐུར་རན་ནི་ཡིན། ཚང་མས་གྲ་སྒྲིག་གྱིས། ཇི་ལྟར་བལྟམས་པ་ཙམ་གྱིས་ནི། །སོགས་ཁྲུས་དང་ཡིག་བརྒྱ་བགེགས་སྤྲད་བཅས་གསུངས།

ད་ནི་སྐྱེས་བུ་ཆེན་པོའི་དབང་བསྐུར་བྱ་བའི་སྐབས་སུ་བབས་པ་ཡིན་པས་ཁྱེད་རང་རྣམས་ཀྱིས་གསོལ་བ་འདེབས་པ་འདིའི་རྗེས་ཟློས་མཛོད། དགའ་ཆེན་ཁྱོད་བདག་སྟོན་པ་སྟེ། །སློབ་དཔོན་ཁྱོད་ནི་དགོངས་སུ་གསོལ། །ཐར་བའི་གྲོང་དུ་བདག་གཞུག་ཕྱིར། །དབང་སྐུར་བྱིན་རླབས་བསྩལ་དུ་གསོལ། །༼ལན་གསུམ་གསུངས།༽ སློབ་དཔོན་སེང་ཆེན་རྒྱལ་པོ་དངོས་སུ་གསལ་བའི་མཐའ་སྐོར་དུ་རྩ་བ་གསུམ་གྱི་ལྷ་ཚོགས་སྤྲིན་འཐིབས་པ་ལྟར་བཞུགས་པའི་དྲུང་དུ་སྐྱབས་སུ་འགྲོ་བ་དང་། བྱང་ཆུབ་ཏུ་སེམས་བསྐྱེད་པ་དང་། དམ་ཚིག་རྒྱུད་ལ་གཟུང་སྙམ་པས་རྗེས་ཟློས་གྱིས། ནམ་མཁའི་གནས་སུ་ནམ་མཁའ་གང་བ་ཡི། །བླ་མ་ཡི་དམ་མཁའ་འགྲོའི་ཚོགས་རྣམས་དང་། །སངས་རྒྱས་ཆོས་དང་འཕགས་པའི་དགེ་འདུན་ལ། །བདག་དང་འགྲོ་དྲུག་གུས་པས་སྐྱབས་སུ་མཆི། །༼ལན་གསུམ་གསུངས།༽བདག་དང་མཐའ་ཡས་སེམས་ཅན་རྣམས། །ཡེ་ནས་སངས་རྒྱས་ཡིན་པ་ལ། །ཡིན་པར་ཤེས་པའི་བདག་ཉིད་དུ། །བྱང་ཆུབ་མཆོག་ཏུ་སེམས་བསྐྱེད་དོ། །༼ལན་གསུམ་གསུངས།༽དེང་ནས་བྱང་ཆུབ་སྙིང་པོའི་བར། །བླ་མེད་མི་སྤང་བླ་མ་བཀུར། །སྔགས་དང་ཕྱག་རྒྱ་རྒྱུན་མི་གཅད། །ཡང་དག་ལམ་དུ་ཞུགས་ལ་བྱམས། །གསང་བའི་དོན་ཕྱིར་སྨྲ་མི་བྱ། །ཆོས་ཐམས་ཅད་མི་དམིགས་པ་སྟོང་པའི་ངང་ལས་གནས་འདི་ཉིད་མཁའ་སྤྱོད་མཐོང་བ་ཀུན་སྨོན་གྱི་ཞིང་ཁམས་དབྱིབས་དང་རྒྱན་དང་བཀོད་པ་ཚད་མེད་པས་མངོན་པར་མཛེས་པའི་དབུས་སུ། གནས་ཁང་འདི་ཡང་བདེ་མཆོག་ནོར་བུའི་ཕོ་བྲང་། ཁྱོད་རང་རྣམས་སྲས་ཆུང་གཡུ་འོད་འབུམ་མེ་དངོས་ཡིན་སྙམ་པའི་ང་རྒྱལ་བསྐྱེད་མ་ཐག་རང་དང་སློབ་དཔོན་གྱི་ཐུགས་ཀ་ནས་འོད་ཟེར་ལྕགས་ཀྱུ་ལྟ་བུ་འཕྲོས་ནས་དགྲ་བླ་ཝེར་མ་རྒྱ་མཚོ་ལ་རྡུལ་འཚུབ་པ་ལྟར་བྱོན་ཏེ་ཁྱོད་རང་ལ་སིབ་སིབ་ཐིམ་པས་སྔོན་གནས་རྗེས་སུ་དྲན་པ་སོགས་ཀྱི་ཡོན་ཏན་དཔག་མེད་རྒྱུད་ལ་སྐྱེས་བར་སྒོམས་ཤིག སྔོན་འགྲོ་ཐབས་ལམ་སྤྱོད་པའི་ཤེས་རབ་ཅན་ལ་ཏ་ན་ག་ནའི་དབང་བྱིན་པ་ནི། ནེའུ་ཆུང་གི་སྐུ་བྱིན་ལ། ཐོག་མར་གླིང་གི་དྭངས་སྨན་ཐམས་ཅད་ཀྱི་གཙོ་མོ་ནེའུ་ཆུང་ལུ་གུའི་ཚར་ཡག་དེའི་དབང་བསྐུར་བ་ཡིན། ཧྲཱིཿ སྟོང་པ་ཉིད་དགའ་འདོད་ཆགས་བློ། །སྲིད་པའི་འདོད་ཆགས་སོགས་སྤངས་པ། །བཅུ་དྲུག་ཕྱེད་ཕྱེད་ཐིག་ལེ་ཅན། །བདེ་སྟོང་ཡེ་ཤེས་མངོན་གྱུར་ཤོག །མ་ཧཱ་སུ་ཁ་ཨ་བྷི་ཥིཉྩ་སྟྭཾ། དཔའ་ཐུལ་ཐམས་ཅད་ཀྱི་གཙོ་བོ་འདན་མའི་དབང་བསྐུར་བ་རེད། འདན་མའི་སྐུ་གཏད་ལ། ཧྲཱིཿ ཤེས་རབ་རལ་གྲི་མདའ་གཞུ་ཐོགས། །ཉོན་མོངས་མི་ཤེས་གཡུལ་ངོ་སེལ། །དཔའ་བོ་བདུད་དགྲ་བདུད་འདུལ་བ། །སྐྱེས་བུ་མཆོག་གི་མཐུ་ཐོབ་ཤོག །མ་ཊཾ་རཱུ་ཏྲ་མ་ར་ཡ་ཕཊཿ ཨབྷི་ཥིཉྩ་སྟྭཾ། དངོས་གཞི་རང་དོན་ནུས་པའི་བརྩོན་འགྲུས་ཅན་ལ་རྒྱུད་བྱིན་གྱིས་བརླབས་ནས་སྐུ་གསུང་ཐུགས་དབང་བསྐུར་བ་ནི། སློབ་བུས་སློབ་དཔོན་སེང་ཆེན་རྒྱལ་པོ་དངོས་ཡིན་སྙམ་པའི་དད་པ་དང་མོས་གུས་ཚད་མེད་པའི་ངང་ནས་གསོལ་བ་གདབ་པ་ནི། སློབ་བུ་རྣམས་ཀྱིས་འདིའི་རྗེས་ཟློས། སྐྱེས་བུ་ཆེན་པོ་ཁྱེད་ཀྱི་སྐུ་གསུང་ཐུགས་ཀྱི་ཡོན་ཏན་མཐའ་དག་བདག་གི་རྒྱུད་ལ་འཕོས་ནས་བསྟན་པ་དང་སེམས་ཅན་གྱི་དོན་རྒྱ་ཆེན་པོ་འགྲུབ་པར་བྱིན་གྱིས་བརླབ་ཏུ་གསོལ། ཧཱུྃ༔ཨོ་རྒྱན་ཡུལ་གྱི་ནུབ་བྱང་མཚམས༔ པདྨ་གེ་སར་སྡོང་པོ་ལ༔ ཡ་མཚན་མཆོག་གི་དངོས་གྲུབ་བརྙེས༔ པདྨ་འབྱུང་གནས་ཞེས་སུ་གྲགས༔ འཁོར་དུ་མཁའ་འགྲོ་མང་པོས་བསྐོར༔ ཁྱེད་ཀྱི་རྗེས་སུ་བདག་སྒྲུབ་ཀྱིས༔ བྱིན་གྱིས་བརླབ་ཕྱིར་གཤེགས་སུ་གསོལ༔ གནས་མཆོག་འདི་རུ་བྱིན་ཕོབ་ལ༔ སྒྲུབ་མཆོག་བདག་ལ་དབང་བཞི་སྐུར༔ བགེགས་དང་ལོག་འདྲེན་བར་ཆད་སོལ༔ མཆོག་དང་ཐུན་མོང་དངོས་གྲུབ་སྩོལ༔ ནམ་མཁའ་གང་བའི་རྩ་གསུམ་ལྷ་ཚོགས་ཁྱེད་རང་ལ་ཐིམ་པས་དགོངས་བརྒྱུད་རྟོགས་པའི་ཕ་ཕོག་རྩོལ་མེད་དུ་རྒྱུད་ལ་སྐྱེས་བར་སྒོམས་ཤིག །དེ་ནས་སྐྱེས་བུ་སེང་ཆེན་རྒྱལ་པོའི་སྐུ་གཟུགས་སྤྱི་བོར་བཞག་ལ། ཧྲཱིཿ སྤྲུལ་པའི་སྐུ་སྟེ་སྐུ་ཡི་མཆོག །སངས་རྒྱས་སྤྲུལ་པའི་རྒྱུ་འཆང་བ། །ཕྱོགས་བཅུར་སྤྲུལ་པ་སྣ་ཚོགས་འགྱེད། །སྐྱེས་མཆོག་སྐུ་ཡི་དབང་ཐོབ་ཤོག །ཀ་ཡ་ཨ་བྷི་ཥིཉྩ་ཨོཾ། ཡིད་བཞིན་ནོར་བུ་མགྲིན་པར་བཞག་ལ། སེམས་ཅན་ཀུན་ཡིད་ཚིམ་པར་བྱེད། །ནོར་བུ་ཆེན་པོ་འོད་ཆགས་དཔལ། །སངས་རྒྱས་སྤྲུལ་པའི་རྒྱན་དང་ལྡན། །སྐྱེས་མཆོག་གསུང་གི་དབང་ཐོབ་ཤོག །ཝཱཀྐ་ཨ་བྷི་ཥིཉྩ་ཨ། རྡོ་རྗེ་སྙིང་གར་བཞག་ལ། ཧྲཱིཿ སྟོབས་ཆེན་ཕ་རོལ་གནོན་པ་པོ། །སྲིད་པའི་རི་བོ་ཆེན་པོ་འཇོམས། །མཁྲེགས་ཤིང་རྡོ་རྗེ་ཆེན་པོ་འཆང་། །སྐྱེས་མཆོག་ཐུགས་ཀྱི་དབང་ཐོབ་ཤོག །ཙིཏྟ་ཨ་བྷི་ཥིཉྩ་ཧཱུྃ། རྗེས་གཞན་དོན་སྒྲུབ་པའི་སྙིང་སྟོབས་ཅན་ལ་ཚར་གཅོད་རྗེས་སུ་འཛིན་པའི་གནང་བ་སྦྱིན་པ་ནི། རིགས་ཀྱི་བུ་དར་ཟབ་ཀྱི་གདན་དང་ཟླ་གམ་གྱི་གོས་བསྟན་ལ། གདན་དང་གོས་འདི་ལ་ལྟོས་ཤིག བརྡ་དོན་གོའམ། རྒོལ་བ་ཚར་ཆོད་ལ་སྐལ་ལྡན་རྗེས་སུ་ཟུངས་ཤིག་ཅེས་བརྡ་ངོ་ཤེས་པར་གྱིས་ཤིག ད་དབང་འགྲིམ་རན་པ་ཡིན།

ཁྱེད་རྣམས་ལ་འཇིགས་རུང་སྲིན་པོའི་ལུང་ཞིག་འདོན་ཞེས་བཀའ་གནང་སྟེ། ཧཱུཾ་ཧྲཱི་འཇིགས་རུང་སྲིན་པོའི་སོགས་གསོལ་ཁའི་ལུང་ཞིག་གསུངས།

དེ་ནི་ཁྱེད་རྣམས་ཀྱི་བསམ་པ་ལམ་དུ་འགྲོ་བའི་ཕྱིར་དུ་ངས་ཆོས་སྐྱོང་ལ་འཕྲིན་བཅོལ་བྱས་པ་ཡང་ཡིན། རྗེས་མ་ཁྱེད་རྣམས་ཀྱིས་གསོལ་ཁ་དེ་འདོན་ན་རྒྱས་པ་འབྲིང་པོ་བསྡུས་པ་གསུམ་ཐོན་དང་དེ་ཐམས་ཅད་ཀྱི་ལུང་ཡང་བྱིན་པ་ཡིན།

དྲན་ངོགས་ཀྱི་ནུབ་བསྐྱོད་ལས་ཡུལ་བྷོ་སི་ཐིན་གྱི་མཛད་རིམ་ལེགས་པར་གྲུབ་པའི་སྐབས་ཏེ་བདུན་པའོ། །

འབབ་ཚུགས་བརྒྱད་པ། ཁེ་ན་ཏའི་ཧཱ་ལི་ཧྥ་ཁི་སི།

༼ ༨·༡༧~༨·༢༢ ༽

མཛད་རིམ།

ཕྱི་ཟླ་༨པའི་ཚེས་༡༧ཉིན། སྔ་དྲོར་ཁེ་ན་ཏར་འབྱོར་ཞིང་། ཕྱི་དྲོར་བཅར་འདྲི་དང་ལེན་མཛད།

ཕྱི་ཟླ་༨པའི་ཚེས་༡༨ཉིན། དགོང་མོར་དཱལ་ཧོབ་སེ་སློབ་ཆེན་དུ་ཁྲོམ་བསྒྲགས་གསུང་བཤད་གནང་།

ཕྱི་ཟླ་༨པའི་ཚེས་༡༩ཉིན། སྔ་དྲོར་རྡོ་རྗེ་འདན་མ་གླིང་དུ་འབྱོར་ཞིང་། ཕྱི་དྲོར་ཁྲོམ་བསྒྲགས་ཞལ་གདམས་གནང་།

ཕྱི་ཟླ་༨པའི་ཚེས་༢༠ཉིན། འཇམ་དཔལ་ཡེ་ཤེས་སེམས་དཔའི་དབང་དང་ཞལ་གདམས་གནང་།

ཕྱི་ཟླ་༨པའི་ཚེས་༢༡ཉིན། སྔ་དྲོར་ཕུར་པ་མགུལ་ཁུག་མ་དང་རྡོ་རྗེ་གྲོ་ལོད་ཀྱི་དབང་དང་ཞལ་གདམས་གནང་ཞིང་། ཉིན་གུང་ཤམྦྷ་ལའི་དམག་སྦྱོང་ལ་གཟིགས།

ཕྱི་ཟླ་༨པའི་ཚེས་༢༢ཉིན། གྱེས་ཁའི་ཞལ་གདམས་གནང།

ཁེ་ན་ཏ་རུ་འབྱོར་བ།

ཕྱི་ཟླ་༨པའི་ཚེས་༡༧ཉིན། ཆོས་རྗེ་མཆོག་གི་ཨ་རིའི་མཛད་རིམ་རྣམས་ལེགས་པར་གྲུབ་ནས། ས་ཚུགས་ཕྱི་མ་སྟེ་ཁེ་ན་ཏའི་ཕྱོགས་སུ་འཕུར་སྐྱོད་གནང་།

ཁེ་ན་ཏ་རྒྱལ་ཁབ་ནི་སྔོན་ཆད་དུས་རབས་བཅུ་བདུན་པའི་ནང་དུ་ཧྥ་རན་སིའི་འབངས་སྤེལ་གྱི་གནས་ཡིན་ལ། ཕྱིས་སུ་དབྱིན་ཇི་རྒྱལ་ཁབ་ཀྱིས་མངའ་དབང་བསྒྱུར་ཅིང་། ཕྱི་ལོ་༡༩༨༢ལོར་ད་གཟོད་རང་བཙན་ཐོབ་པ་ཡིན། ཕྱི་ལོ་༡༩༩༣ལོར་ངེད་ཅག་ཁེ་ན་ཏ་རུ་འགྲོ་སྐབས། རྒྱལ་ཁབ་དེར་མི་གྲངས་བྱེ་བ་གསུམ་ལ་ཉེ་བ་ཙམ་ལས་མེད་ཀྱང་རྒྱལ་ཁབ་ཀྱི་མངའ་ཁོངས་ཀྱི་ས་ཁྱོན་ནི་ཨ་རི་དང་རྒྱ་ནག་ལས་ཀྱང་ཆེ་བས། འཛམ་གླིང་སྟེང་ཨུ་རུ་སུ་རྒྱལ་ཁབ་ཀྱི་འཕྲོ་ནས་མངའ་ཁོངས་ཆེས་ཆེ་བའི་རྒྱལ་ཁབ་ཏུ་གྱུར་ཡོད།

ཁེ་ན་ཏ་དང་ཨ་རི་གཉིས་ཁྱིམ་མཚེས་ལྟར་དུ་ཆགས་པས་འཚོ་བ་སྤྱོད་སྟངས་སོགས་ཕལ་ཆེར་འདྲ་ནའང་། ཁེ་ན་ཏའི་མི་རྣམས་ནི་བྲེལ་འཚུབ་མེད་ཅིང་ངང་རྒྱུད་རིང་བ་དང་། དུས་ཚོད་ཀྱི་ཁོམ་ལོང་ཡོད་པ་སོགས་བོད་ཡུལ་གྱི་འཚོ་བ་དང་ཕྱོགས་འདྲ་བར་འདུག་པས་ང་ཚོར་ཅུང་ཟད་འཕྲོད་པའི་སྣང་བ་ཤར། གནས་འདིར་ཐོན་པ་ན། སེམས་ཀྱི་གནོན་ཤུགས་སོགས་རང་བཞིན་ཤུགས་ཀྱིས་མེད་པར་གྱུར་ཏེ་ཆེས་གུ་ཡངས་བག་ཕེབས་ཀྱི་ཚོར་སྣང་དམིགས་བསལ་བ་ཞིག་ཀྱང་སྐྱེས།

ཨ་རིའི་བྷོ་སི་ཐིན་ནས་ཁེ་ན་ཏའི་ཧཱ་ལི་ཧྥ་ཁི་སིའི་（Halifax）བར་དུ་དུས་ཚོད་གཅིག་ལྷག་གི་རིང་གནམ་གྲུར་ཞུགས་ནས་ཡོང་ཞིང་། རྒྱལ་ཁབ་འདི་གཉིས་ཀྱི་འབྲེལ་བ་བཟང་པོ་ཡོད་པས་རྒྱལ་མཚམས་འགག་སྒོ་ཡང་ཐོགས་རྡུགས་མེད་པར་བདེ་བླག་ངང་བརྒལ་ཐུབ་པ་བྱུང་། ང་ཚོ་གནམ་གྲུ་ཐང་ནས་ཐོན་རྗེས། རླངས་འཁོར་ལ་བསྡད་དེ་ཤར་ཆེན་གླིང་（Sharchen Ling）ཞེས་པའི་ཆོས་ཚོགས་སུ་ཕྱིན་ཅིང་དེར་ཞག་གཉིས་ལ་གནས་སྡོད་བྱས།

སྡོད་ཤག་ཐད་སྔོན་དང་ཅུང་མི་འདྲ་ས་ནི། ད་ཐེངས་ཆོས་རྗེ་ཉིད་ཀྱང་ཁང་བརྩེགས་གསུམ་པ་རུ་བཞུགས་པ་ཡིན། སྡོད་ཁང་གི་ཕྱི་ལོགས་སུ་ཉི་ཁྱམས་ཧ་ཅང་ཡངས་པོ་ཞིག་འདུག་ཅིང་། དེ་ནས་བལྟས་ན་མུ་མཐའ་མེད་པའི་རྒྱ་མཚོ་དང་གླིང་ཕྲན། གྲོང་ཁྱེར་བཅས་ཀྱི་མཛེས་སྡུག་གི་བཀོད་པ་མིག་ལམ་དུ་གསལ་ལྷང་ངེར་མཐོང་ཐུབ།

ཟླ་བརྒྱད་པའི་ཁེ་ན་ཏ་ནི། ལོ་ཧྲིལ་པོའི་ནང་གནམ་གཤིས་ཆེས་ལེགས་པའི་དུས་ཚོད་ཡིན་པས། བཞའ་ཚན་ཆུང་ལ་ནམ་མཁའ་གཡའ་དག་ཅིང་ཉི་འོད་རབ་ཏུ་འཚེར་བར་བྱེད། ཕྱི་དྲོར། ཆོས་རྗེ་ཉིད་ཀྱང་ཉི་ཁྱམས་སུ་བཞུགས་ཏེ་འཁོར་སློབ་འགའ་དང་མཉམ་དུ་གསོལ་ཇ་བཞེས་ཤིང་གསུང་མོལ་ལྷོད་པོར་གནང་། ཁོང་གིས་གནམ་མཚོ་གཅིག་ཏུ་འདྲེས་ཤིང་ལྟ་ན་སྡུག་པའི་རང་བྱུང་གི་བཀོད་པ་ལ་གཟིགས་བཞིན། ས་ཆ་འདི་ངོ་མ་སྐྱིད་པོ་རེད། གནམ་སྔོན་པོ་དང་མཚོ་ཆེན་པོ། རི་ཀླུང་དང་ནགས་ཚལ་གང་ལ་བལྟས་ཀྱང་། ཡུལ་འདི་ནི་ང་ཚོ་སོང་མྱོང་བའི་ས་ཆ་རྣམས་ལས་ཆེས་མཛེས་སྡུག་ལྡན་ཞིང་སྤྲོ་སྣང་བསྐྱེད་པའི་གནས་མཆོག་ཅིག་རེད་ཅེས་བསྔགས་བརྗོད་མཛད།

སྤྱིར་ཆོས་རྗེ་ཉིད་ཉིན་འདི་དག་གི་རིང་ལ་སྐུ་ཁམས་ཅུང་ཟད་མི་དྭངས་བར་ཡོད་ཀྱང་། ཉིན་འདིར་ཐུགས་སྣང་ཧ་ཅང་སྤྲོ་བའི་ཚུལ་མཛད་ཅིང་དགུང་ལོའང་ཇེ་གཞོན་ལྟ་བུར་གྱུར་འདུག་པས། བདག་གིས་པར་ཆས་བླངས་ཏེ་འདྲ་པར་སྣ་ཚོགས་བླངས། རྗེ་ཉིད་ཀྱི་པར་ལེགས་པོ་རེ་ལེན་ཐུབ་ན། དགེ་འདུན་པ་རྣམས་ལ་ཆེས་བཟང་བའི་ཕ་འབབ་བམ་ལེགས་སྐྱེས་སུ་འགྱུར་བས། ཁང་པའི་ཕྱི་ནང་གཉིས་ནས་པར་མང་དུ་བཏབ། དེར་མ་ཟད། བདག་གིས་ཆོས་རྗེ་ཉིད་ལ། ཁྱེད་ཀྱིས་ཐུགས་གཏད་གནང་རོགས། རྗེས་སུ་པར་འདི་དག་དགེ་འདུན་པ་རྣམས་ལ་དད་རྟེན་གྱི་ཚུལ་དུ་དབུལ་རྒྱུ་ཡིན་ཞེས་ཞུས་ཚེ། ཁོང་གིས་ཞལ་གྱིས་བཞེས་ཤིང་རིག་པ་བཅོས་མེད་ཀྱི་ངང་དུ་བཞུགས་ནས་འབྱུང་འགྱུར་ཁོང་གི་སྐུ་པར་མཇལ་བའི་སེམས་ཅན་རྣམས་ལའང་ཐུགས་སྨོན་མཛད།

ནམ་རྒྱུན་ཆོས་རྗེ་ཉིད་ཕྱི་ལོགས་སུ་འབྱོན་སྐབས། སློབ་གླིང་དུ་རྒྱུན་བཞུགས་ཀྱི་སློབ་འབངས་རྣམས་ཀྱིས་རེ་སྒུག་ཆེས་ཆེར་བྱེད་ས་ནི་ཁོང་གི་སྐུ་པར་ཡིན་ཞིང་། ཆོས་རྗེ་ཉིད་ཀྱི་སྐུ་པར་རྣམས་ལ་མི་རེ་རེ་བཞིན་རིན་པོ་ཆེ་རྙེད་པ་ལྟ་བུའི་དང་བ་དང་དགའ་སྤྲོ་ཡོད་དེ། ལ་ལས་ལྷ་ཁང་དུ་བཤམས་ཤིང་། ལ་ལས་གྱང་ངོས་སུ་འགེལ། ལ་ལས་ལུས་ལ་འབྲལ་མེད་དུ་འཆང་བ་སོགས་རང་རང་གི་གསོལ་འདེབས་དང་སྒོམ་སྒྲུབ་ཀྱི་དད་རྟེན་བྱེད་ཀྱིན་ཡོད། དེ་ལས་ཁོང་ཚོས་རང་གི་རྩ་བའི་བླ་མར་བཟུང་བའི་རྣམ་དག་གི་དད་སེམས་གཙང་མའང་མཚོན་ཡོད།

ཁྱད་པར་དུ་བླ་མ་བསོད་དོན་གྱི་ཁྱིམ་དུ་ཆོས་རྗེ་ཉིད་ཀྱི་པར་ཁང་མང་པོས་བཀང་ཡོད་ཅིང་། ཁོས་ནམ་རྒྱུན་ང་ལ། ཁྱོད་ཀྱིས་བླ་མའི་སྐུ་པར་སྒྲོན་སྐབས། ཁོང་གི་སྐུ་ལུས་ཆ་ཚང་ལེན་པ་དང་། ཆོས་ཁྲི་དངོས་པོ་གཞན་གྱིས་མ་བསྒྲིབས་པ། ཉེ་ཟུར་ན་མི་གཞན་མེད་པ། ཞལ་ལ་འཛུམ་མདངས་དང་ལྡན་པའི་པར་ལེགས་པོ་ལེན་རྒྱུ་མ་འཆུགས་ཞེས་བསྐུལ་བས། སྐབས་འདིར་བླངས་པའི་པར་འགའ་རེས་བླ་མ་བསོད་དོན་སོགས་ཆོས་གྲོགས་རྣམས་ཀྱི་ཐུགས་དམ་བསྐང་ཐུབ་ངེས་ཡིན་སྙམ་པ་བྱུང་ཞིང་། རྗེས་སུའང་སྐུ་པར་འདི་དག་ལ་དགའ་བསུ་ཚད་མེད་ཐོབ་པར་མ་ཟད་དར་ཁྱབ་ཀྱང་ཤིན་ཏུ་ཆེ་བར་གྱུར།

བཅར་འདྲི་ཉི་ཤུ།

ཉིན་དེའི་ཕྱི་དྲོར། ས་གནས་དེའི་ནང་ཆོས་འཕྲིན་སྦྱོར་སྡེ་ཁག་ཅིག་གིས་རྗེ་ཉིད་ལ་བཅར་འདྲི་བྱས་པའི་ནང་དོན་གཤམ་གསལ་ལྟར།

༡ དྲི་བ། རིན་པོ་ཆེ་ལགས། ཁྱེད་རང་ཉིད་ངོ་སྤྲོད་ཅིག་གནང་རོགས། ཁྱེད་ལ་ཀུན་ཀྱིས་བླ་མ་ཞེས་འབོད་པའི་རྒྱུ་མཚན་གང་ཡིན་ནམ།

ལན། ང་དང་པོ་སྐྱེས་ས་ནི་བོད་ས་ཁུལ་གྱི་དེང་སང་མཚོ་སྔོན་ཞིང་ཆེན་ཁོངས་གཏོགས་རྫུ་མེད་ཆོས་ལྷས་ཞེས་པའི་ས་ཆ་དེ་ཡིན་ལ། རྒྱུན་དུ་བསྡད་ཡོད་ས་ནི་སི་ཁྲོན་ཞིང་ཆེན་གྱི་མངའ་ཁོངས་གསེར་རྟ་ཞེས་པ་དེ་ཡིན།

ངས་གཙོ་བོ་ནང་པ་སངས་རྒྱས་པའི་ཆོས་ལ་སློབ་སྦྱོང་ཡུན་རིང་བྱས་པས་མཁན་པོ་ཞེས་པའི་མིང་ཙམ་ཐོགས་པ་དང་། སྔར་དང་དེ་དུས་ཀྱི་བླ་མ་ཁ་ཤས་ཀྱི་ལུང་བསྟན་ལྟར་གཏེར་སྟོན་ལས་རབ་གླིང་པའི་སྤྲུལ་སྐུའི་མིང་བཏགས། ངའི་མི་ཚེ་གཅིག་གི་བྱ་བ་དེ་བཤད་དང་སྒྲུབ་པའི་སྒོ་ནས་སངས་རྒྱས་ཀྱི་བསྟན་པ་ལ་རྩེ་གཅིག་ཏུ་ནན་ཏན་བྱེད་བཞིན་པ་འདི་ཡིན། དེ་ལྟར་བྱས་པའི་དབང་གིས་ཕྱོགས་སོ་སོའི་དད་ལྡན་སློབ་མ་ཡང་མང་ཙམ་ཞིག་འཁོར་དུ་འདུས་པས། ད་ལྟ་བླ་མ་ཞེས་པའི་མིང་ཙམ་ཐོགས་པའི་རྒྱུ་མཚན་དེ་ཡིན།

༢ དྲི་བ། ཁྱེད་ཀྱིས་རྡོ་ལ་ཞབས་རྗེས་བཞག་པ་རེད་ཟེར་བས། དེ་ཧ་ཅང་ངོ་མཚར་ཆེ་བས་བདེན་པ་ཡིན་ནམ།

ལན། བདེན་པ་ཡིན། སྟེས་དབང་གིས་དེ་འདྲ་ཐེངས་འགའ་ལ་བྱུང་། ༼དགོད་སྒྲ།༽

༣ དྲི་བ། ཁྱེད་ནུབ་ཕྱོགས་ཀྱི་རྒྱལ་ཁབ་འདིར་ཕེབས་དོན་གང་ཡིན།

ལན། ང་རང་འདིར་ཡོང་དོན་གཙོ་བོ་ནི། ནུབ་ཕྱོགས་ཀྱི་རྒྱལ་ཁབ་འདི་ལ་བོད་ཡུལ་ནང་བཞིན་དུ་ཆོས་ཧ་ཅང་དར་བ་མ་རེད་ཅེས་པའི་སྐད་ཆ་འགའ་རེ་ཐོས་མྱོང་། དེས་ན་འདིར་ཡོང་ནས་ཆོས་རེ་བཤད་ན་སངས་རྒྱས་ཀྱི་བསྟན་པ་ལ་ཕན་རེ་ཐོགས་པ་དང་། དད་ལྡན་གྱི་སྐྱེ་བོ་ཁ་ཤས་འཁོར་དུ་འདུས་ན་དེ་དག་ལ་ཡང་ཕན་རེ་ཐོགས། སེམས་ཅན་གྱི་བདེ་སྐྱིད་ལའང་ཕན་པ་རེ་འབྱུང་སྲིད་རྒྱུ་རེད་སྙམ་ནས་ཡོང་བ་ཡིན།

༤ དྲི་བ། ཁྱེད་གྲོང་ཁྱེར་ཉིའུ་ཡོག་ལ་ཕེབས་དུས་ཚོར་སྣང་གང་འདྲ་སྐྱེས་སོང་།

ལན། སྤྱིར་ཉིའུ་ཡོག་གྲོང་ཁྱེར་ལ་བསམ་བློ་བཏང་ན་ཨ་མེ་རི་ཀའི་གྲོང་ཁྱེར་ཆེ་ཤོས་ཡིན་པར་མ་ཟད། འཛམ་གླིང་གི་རྒྱལ་ཁབ་བརྒྱ་དང་བརྒྱད་ཅུ་གྱ་བཞི་ཙམ་ཞིག་སྟབས་གཅིག་ཏུ་འཚོགས་པའི་མཉམ་འབྲེལ་རྒྱལ་ཚོགས་ཡོད་སའི་གནས་བཟང་པོ་ཞིག་རེད། འདིར་རྒྱལ་ཁབ་གཅིག་གི་མི་རིགས་མ་ཟད་མི་རིགས་གཞན་མང་པོ་ཡང་འདུ་ས་རེད། ཁང་པའི་མཐོ་ཚད་ཀྱང་འཛམ་གླིང་གི་ཨང་གཉིས་པ་དེ་ས་ཆ་དེ་ན་ཡོད་པས། ང་རང་ཉིད་ཀྱིས་སྔོན་ཆད་མཐོང་མ་མྱོང་བའི་ངོ་མཚར་གྱི་བཀོད་པ་ཆེས་མང་པོ་ཞིག་མཐོང་སོང་།

༥ དྲི་བ། ཁྱེད་རང་ཁེ་ན་ཏའི་ཆོས་ཚོགས་འདིར་ཕེབས་པའི་རྒྱུ་མཚན་ཅི་ཡིན་ནམ།

ལན། སྤྱིར་ཡོང་དོན་ནི་གོང་དུ་བཤད་པ་བཞིན། བསྟན་པ་དང་སེམས་ཅན་སྤྱི་ལ་ཕན་ཨེ་ཐོགས་སྙམ་པ་དང་། དེའི་ཞོར་དུ་རང་གིས་ཀྱང་རྒྱལ་ཁབ་ཁ་ཤས་ལ་ལྟ་སྐོར་ཐུབ་ན་ཡག་པོ་ཡོད་རྒྱུ་རེད་སྙམ་ནས་ལྟ་སྐོར་གྱི་ཆེད་དུའང་ཡོང་བ་ཡིན།

༦ དྲི་བ། ཁྱེད་ཀྱིས་ང་ཚོ་ནུབ་ཕྱོགས་པ་རྣམས་ལ་རེ་བསྐུལ་ཅི་ཞིག་ཡོད།

ལན། སྤྱིར་ཨ་རིའི་ལུང་པ་གཅིག་པུ་མ་ཡིན་པར་ས་ཆ་གང་དང་གང་ལ་སོང་ཡང་། ངའི་ཚེ་གཅིག་གི་ཉམས་ལེན་དེ་ནི་བྱམས་པ་དང་སྙིང་རྗེ་ལ་བསྟེན་ནས་སེམས་ཅན་ལ་ཕན་ཨེ་ཐོགས་བལྟ་རྒྱུ་དེ་ཡིན། ཁྱེད་རྣམ་པས་ཀྱང་འཚེ་མེད་ཞི་བའི་ལམ་བཟང་ཁོ་ནས་སེམས་ཅན་ཐམས་ཅད་ལ་ཕན་ཅི་ཐོགས་བྱ་རྒྱུ་དེ་ནི་ངའི་སློབ་སྟོན་དང་རེ་བའང་ཡིན། དེ་མ་གཏོགས་མང་པོ་མེད།

༧ དྲི་བ། བོད་ཡུལ་དང་ནུབ་ཕྱོགས་གཉིས་ལ་མཚོན་ན་ནང་ཆོས་དར་ཁྱབ་ཆེ་བའི་ཡུལ་དེ་གང་ཡིན་རྒྱུ་རེད།

ལན། ང་ཚོ་བོད་ཡུལ་ལ་མཚོན་ན། བོད་མི་ཚང་མ་ལས་བརྒྱ་ཆ་དགུ་བཅུ་གོ་དགུ་ཙམ་ཆོས་ལ་དགའ་མཁན་དང་དད་པ་ཡོད་མཁན་ཁོ་ན་ཡིན། དེ་ལ་རབ་ཏུ་བྱུང་བ་དང་ཁྱིམ་པ་གཉིས་ཡོད་ཅིང་། རབ་ཏུ་བྱུང་བའི་ཕྱོགས་དེ་ཡང་ཧ་ཅང་མང་པོ་ཡོད། དེ་དང་བསྡུར་ན་སྟོབས་དང་ལྡན་པའི་ནུབ་ཕྱོགས་ཀྱི་རྒྱལ་ཁབ་ལ་ཆོས་ཀྱི་ཕྱོགས་ནས་གངས་རིའི་ལྗོངས་བཞིན་དུ་སངས་རྒྱས་ཀྱི་བསྟན་པ་དར་ཡོད་རྒྱུ་མ་རེད་བསམ།

༨ དྲི་བ། ནུབ་ཕྱོགས་པས་དཔལ་འབྱོར་གྱི་ཆེད་དུ་འབད་རྩོལ་རྒྱ་ཆེར་བྱས་པ་ལ་དགོངས་ཚུལ་གང་འདྲ་ཡོད། ཁྱེད་ཀྱིས་སེམས་ཁམས་ཅི་འདྲ་ཞིག་གིས་དཔལ་འབྱོར་རྩོལ་སྒྲུབ་བྱས་ན་བསམ།

ལན། མི་ཞིག་ཡིན་ནས་བཟུང་སྟེ་འཇིག་རྟེན་འདི་ན་ཆེས་གཅེས་པ་ནི་རང་སྲོག་ཟེར་བ་ཡིན། སྲོག་དེ་ཧ་ཅང་ཕངས་པས་དེའི་ཆེད་དུ་སྒོར་མོ་བསོག་རྒྱུ་དེ་ཡང་ལོས་ཡིན། གཙོ་བོ་བྱམས་པ་དང་སྙིང་རྗེ་ཟུང་དུ་འབྲེལ་ནས་སྒོར་མོ་བསགས་ན་ཆོས་འཇིག་རྟེན་གཉིས་ཀ་མཉམ་དུ་འགྲུབ་ཡོང་། གཞན་ལ་གནོད་པ་འབའ་ཞིག་གི་བསམ་པ་དང་སྦྱོར་བ་ཁོ་ནས་སྒོར་མོ་རྐྱང་བ་བསགས་ན་དེ་ཙམ་ཕན་པ་ཡོད་རྒྱུ་མ་རེད་སྙམ།

༩ དྲི་བ། ཁྱེད་ཀྱིས་དྲུང་པ་རིན་པོ་ཆེ་ལ་དགོངས་ཚུལ་གང་འདྲ་ཡོད་པ་གསུང་རོགས།

ལན། དྲུང་པ་རིན་པོ་ཆེ་ནི་དེང་སང་གི་དུས་རབས་སུ་བོད་ཡུལ་གྱི་བླ་མ་ཡོངས་རྫོགས་ལས་ཨ་རིའི་རྒྱལ་ཁབ་ལ་ཕེབས་མཁན་སྔོན་མ་ལྟ་བུ་ཡིན། ཁོང་གིས་ཐབས་རྣམ་པ་གཉིས་ལ་བརྟེན་པ་སྟེ། ནང་པ་སངས་རྒྱས་པའི་ཆོས་ལ་དངོས་སུ་འཇུག་འདོད་མེད་པ་རྣམས་ལ་རེ་ཞིག་ཤམྦྷ་ལའི་སློབ་སྦྱོང་སྤྲད་ནས་ཁོ་ཚོར་ཕན་པའི་ཐབས་སྣ་ཚོགས་མཛད། ནང་ཆོས་ལ་དད་འདུན་ཡོད་མཁན་ཚོར་ནང་བསྟན་གྱི་ཆོས་སློབ་ཏུ་བཅུག་པས། ད་ལྟ་ཁོང་གི་མཛད་པ་དེ་གཞན་གང་དང་ཡང་མི་འདྲ་བར་རྒྱ་ཆེན་པོར་ཁྱབ་ཡོད་པ་ཧ་ཅང་ངོ་མཚར་བའི་གནས་སུ་གྱུར་པ་རེད་སྙམ་བཞིན་ཡོད།

༡༠ དྲི་བ། ཁྱེད་ཀྱིས་ཡེ་ཤུའི་ཆོས་ལུགས་ལ་རྒྱུས་ལོན་ཞིབ་མོ་ཨེ་ཡོད། དེ་ལ་ལྟ་ཚུལ་ཅི་ཡོད།

ལན། ང་རང་གིས་གོ་ཚོད་ཀྱི་དབང་དུ་བྱས་ན་ཡེ་ཤུའི་ཆོས་ལུགས་ཀྱིས་ཀྱང་། གཙོ་བོ་བྱམས་པ་དང་སྙིང་རྗེ་གཉིས་རྩལ་འདོན་བྱས་ནས་ཆོས་ཉམས་སུ་ལེན་པ་རེད་ཟེར། དེ་ཡིན་ན་ཧ་ཅང་བཟང་པོ་རེད་སྙམ།

༡༡ དྲི་བ། ཁྱེད་ཀྱིས་དགོངས་ན་ནུབ་ཕྱོགས་པའི་བྱམས་སྙིང་རྗེའི་སློབ་གསོ་དེ་ཤར་ཕྱོགས་པར་བསྡུར་ན་ཇི་འདྲ་ཞིག་ཡིན།

ལན། སོ་སོའི་སེམས་ཅན་ལ་ཕན་བདེ་སྒྲུབ་པའི་དམིགས་ཡུལ་ཧ་ལམ་ཕྱོགས་འདྲ་ཡིན་ཡང་། སྒྲུབ་ཐབས་རྣམ་པ་སྣ་ཚོགས་ཡོད་པས། རང་རང་གི་སྒྲུབ་སྟངས་ཁ་ཁ་སོ་སོ་ཡིན་རྒྱུ་རེད།

༡༢ དྲི་བ། ཁྱེད་ཀྱིས་བལྟས་ན་ཆོས་ཚོགས་འདི་ནང་བསྟན་ལྟེ་གནས་ཆེ་ཤོས་ཤིག་ཏུ་འགྱུར་ཐུབ་བམ།

ལན། དེ་ནི་སྔོན་གྱི་བླ་མ་རྣམ་པའི་ལུང་བསྟན་དང་། ཁྱད་པར་དུ་ཁྱེད་ཚོའི་བླ་མས་བཀའ་སློབ་བསྩལ་བ་སོགས་ལ་བལྟ་དགོས་རྒྱུ་རེད་མ་གཏོགས། ད་ལྟ་ང་ལ་དམིགས་བསལ་འདི་རེད་ཟེར་ནས་ངོས་འཛིན་རྒྱུ་ཅི་ཡང་མེད།

༡༣ དྲི་བ། ཁྱེད་ལ་མཚོན་ན་ཕ་ཡུལ་གྱི་མི་དང་ཕྱི་གླིང་གི་མི་གཉིས་ལས་གང་ལ་དགའ་ཞེན་ཆེ་བ་ཡོད།

ལན། མི་སུ་ཡིན་ཡང་བག་ཆགས་ཀྱི་ནུས་པ་དབང་བཙན་པ་ཡིན། ང་རང་གི་སྲིང་མོ་དང་ཤ་ཉེ་སོགས་ཉེ་རིང་རྩ་གསུམ་ཚང་མ་བོད་ཡུལ་ན་ཡོད་པས། ཕལ་ཆེར་ཕ་ཡུལ་ལ་དགའ་ཞེན་ཆེ་རྒྱུ་རེད། ཨ་རིའི་ལུང་པར་ཐོན་ནས་ཡུན་རིང་པོ་མིན་ན་ཡང་། ཨ་རིའི་ཡུལ་གྱི་མི་རྣམས་ནི་མི་གཤིས་བཟང་ཞིང་། ངམ་དཀར་པོ། ཁྱད་པར་དུ་ང་ལ་ཧ་ཅང་དགའ་ཞེན་ཆེན་པོ་བྱས་ཡོང་དུས། གཞན་དང་མི་འདྲ་བར་ཕ་ཡུལ་ལུང་པའི་མི་དང་འགྲན་བཟོད་པ་ལྟ་བུའི་དགའ་ཞེན་ཆེན་པོ་སྐྱེས་ཐལ།

༡༤ དྲི་བ། ཡུལ་འདིའི་མི་རྣམས་ཀྱི་སེམས་ཁམས་སྤྲོ་པོ་མེད་པ་ལ་དགོངས་ཚུལ་གང་འདྲ་ཡོད།

ལན། དེ་སུ་གཅིག་གིས་ཁ་ཚོན་ཆོད་རྒྱུ་མ་རེད། དཔེར་ན་ང་ཚོ་ཁྱིམ་འདིའི་མི་རྣམས་ལ་མཚོན་ན། ནད་ཡོད་མེད་སོགས་ཀྱི་དབང་གིས་ལུས་ཁམས་དང་སེམས་ཁམས་མི་འདྲ་བ་རེད། དེས་ན་འགའ་རེའི་སེམས་ཁམས་སྐྱིད་པོ་ཡོད་པ་དང་། འགའ་རེའི་སེམས་ཁམས་སྐྱོ་པོ་ཡིན། བོད་ཀྱི་ལུང་པ་ལ་ཡང་མི་འགའ་རེའི་སེམས་ཁམས་སྤྲོ་པོ་ཡིན་པ་དང་། འགའ་རེའི་སེམས་ཁམས་སྡུག་པོ་ཡིན་པས། ནུབ་ཕྱོགས་ཀྱི་ལུང་པ་ཡང་དེ་བཞིན་རེད། མི་རེ་རེ་བཞིན་དུ་སེམས་ཁམས་མི་འདྲ་བས། ནུབ་ཕྱོགས་ཀྱི་མི་དང་བོད་ཀྱི་མི་གཉིས་ལས་སེམས་ཁམས་སུའི་སྐྱིད་ཟེར་ན། དེ་སུས་ཀྱང་སྨྲ་ཤེས་པ་མིན། དཔེར་ན། སངས་རྒྱས་དང་འཇིགས་མེད་གཉིས་ལས་སེམས་ཁམས་ལ་བདེ་སྐྱིད་ཡོད་པ་དེ་སུ་ཡིན་ཞེས་དྲིས་པ་ལྟ་བུ་ཡིན།

༡༥ དྲི་བ། ཁྱེད་ཀྱིས་མེ་གླིང་བྱང་མའི་མི་རྣམས་ཀྱིས་ལུས་ཁམས་བདེ་ཐང་ཡོང་ཆེད་ལུས་རྩལ་སྦྱོང་བ་ལ་དགོངས་ཚུལ་གང་འདྲ་ཡོད།

ལན། ད་ལྟ་འཛམ་བུ་གླིང་གི་རྒྱལ་ཁབ་ཚང་མས་ནད་མེད་པར་བྱ་ཆེད། ལུས་ཀྱི་རྩལ་སྦྱོང་རྒྱུ་དེ་ཧ་ཅང་གལ་ཆེན་ལ་བརྩི་བཞིན་ཡོད་པས། ངའི་ལྟ་ཚུལ་ཡང་དེ་ལྟ་བུ་མ་གཏོགས་གཞན་པ་ཅི་ཡང་མེད།

༡༦ དྲི་བ། ཚད་མེད་བཞི་ཉམས་སུ་ལེན་པའི་སྙིང་དོན་དེ་གང་འདྲ་ཞིག་ལ་ངོས་འཛིན་དགོས།

ལན། ཚད་མེད་བཞི་ནི་སེམས་ཀྱི་སྒོ་ནས་སེམས་ཅན་ཐམས་ཅད་བདེ་བ་དང་ལྡན་འདོད། སྡུག་བསྔལ་དང་བྲལ་བར་འདོད་པ་ལ་སོགས་པ་ཡིན། ལུས་ཀྱི་སྒོ་ནས་སེམས་ཅན་ལ་གནོད་པའི་སྲོག་གཅོད་པ་ལ་སོགས་སྤོང་བ་དང་སྦྱིན་པ་གཏོང་བ་སོགས་ལ་ཅི་ནུས་སུ་འཇུག་རྒྱུ་དེ་ལ་ཟེར་བ་ཡིན།

༡༧ དྲི་བ། བོད་དང་ནུབ་ཕྱོགས་གཉིས་ལ་ནང་ཆོས་དར་ཚུལ་གྱི་ཁྱད་པར་གང་ཡོད།

ལན། གོང་དུ་བཤད་པ་བཞིན་མི་གྲངས་ཀྱི་སྒོ་ནས་བརྒྱ་ཆར་གཞལ་ཡོང་ན། བོད་ཡུལ་ལ་དར་བ་ལྟ་བུ་ཞིག་ནུབ་ཕྱོགས་ལ་དར་མེད་ཀྱང་། རིམ་གྱིས་བོད་ལས་ཀྱང་ལྷག་པ་ཞིག་དར་བའི་ཕྱིར་དུ་ཁྱེད་རྣམ་པས་བརྩོན་ལེན་བྱ་དགོས། ངས་ཀྱང་དེ་ལྟར་དར་ཡོང་རྒྱུ་རེད་སྙམ་ནས་ཡིད་ཆེས་ཡོད་ཅིང་སྨོན་ལམ་ཡང་འདེབས་ཀྱིན་ཡོད།

༡༨ ཤམྦྷ་ལའི་སློབ་སྦྱོང་ལ་དགོངས་ཚུལ་ག་རེ་ཡོད།

ལན། བླ་མས་ཐབས་མཁས་ཀྱི་སྒོ་ནས་ཐོག་མར་ཤམྦྷ་ལའི་སྦྱོང་བརྡར་སྤྲད་པ་དེ་ཡང་། གཙོ་བོ་གཞན་ལ་འཚེ་བ་མེད་པ་དང་ཕན་པའི་ཐབས་བསྒྲུབས་པ་ཡིན། དེ་ནས་སངས་རྒྱས་ཀྱི་བསྟན་པ་ལ་རིམ་གྱིས་འཇུག་པར་བྱེད་པ་དེ་ཧ་ཅང་གལ་ཆེ་བ་རེད་སྙམ།

༡༩ དྲི་བ། ཁྱེད་ལ་དོགས་འཚེར་རམ་སེམས་མི་སྐྱིད་པའི་དུས་ཡོད་དམ། དེ་ལ་ཐབས་ཤེས་ག་རེ་གནང་གི་ཡོད།

ལན། ང་ལ་ནི་སེམས་བདེ་མོ་དང་སྡུག་པོ་གང་བྱུང་ཡང་དུས་རྒྱུན་དུ་བླ་མ་དཀོན་མཆོག་གསུམ་ཁོ་ན་ལ་གསོལ་བ་འདེབས་རྒྱུ་མ་གཏོགས་ཐབས་གཞན་མང་པོ་ཞིག་སྒྲུབ་པ་ལ་བརྩོན་ལེན་བྱེད་ཀྱིན་མེད།

༢༠ དྲི་བ། བསྟན་རྒྱམ་རིན་པོ་ཆེ་དང་ཁྱེད་གཉིས་ལ་འབྲེལ་བ་གང་འདྲ་ཡོད།

ལན། ཁོང་གི་སྐུ་སྐྱེ་གོང་མ་དང་ང་རང་གི་སྐྱེ་བ་གོང་མ་གཏེར་སྟོན་ལས་རབ་གླིང་པ་གཉིས་ལ་བླ་སློབ་ཀྱི་འབྲེལ་བ་ཧ་ཅང་ཆེན་པོ་ཡོད། གཙོ་བོ་དེའི་རྒྱུ་མཚན་གྱིས་ཕྱི་ལོ་༡༩༩༠ལོར་ང་ཕྱོགས་དེར་འགྲོ་བའི་སྐབས་སུ་ཁོང་དང་མཇལ་འཕྲད་ཡོང་བ་ཙམ་དུ་མ་ཟད་བརྩེ་གཟིགས་ཀྱང་རྒྱ་ཆེན་པོ་མཛད་ཐལ།

ཆོས་རྗེ་ཉིད་སྐུ་བསྙུངས་སོང་།

ཕྱི་ཟླ་༨པའི་ཚེས་༡༨ཉིན་གྱི་དགོང་མོར། ཆོས་རྗེ་ཉིད་ཀྱིས་དཱལ་ཧོབ་སེ་སློབ་ཆེན་དུ་འཆད་ཁྲིད་གནང་དགོས་ཀྱང་། ཉིན་དེར་ཁོང་ཁྲག་ཤེད་མཐོ་ཞིང་ཚ་བ་རྒྱས་པ་དང་། ཡུན་རིང་དུ་སྐྱུག་པ་སོགས་སྐུ་གཟུགས་ཤིན་ཏུ་སྙུང་བཞིན་པས། ཨ་ནེ་མེ་སྒྲོན་གྱིས་སེམས་ཁུར་ཆེན་པོའི་སྒོ་ནས། ཁྲག་ཤེད་མཐོ་བ་དེ་ཤིན་ཏུ་ཉེན་ཁ་ཆེ་ཞིང་། ནད་རིགས་གཞན་གྱི་སྣ་འདྲེན་ཡིན་པས་གནས་ཚུལ་གང་འདྲ་འབྱུང་མི་ཤེས་ཟེར། ངེད་ཅག་གིས་ཆོས་རྗེ་ཉིད་ཉེ་ཟུར་གྱི་སྨན་ཁང་དུ་བསྐྱལ་ཏེ་གནམ་ཁབ་ལ་བརྟེན་ནས་ཁྲག་ཤེད་དམའ་རུ་གཏོང་བའི་རེ་བ་བཟུང་ཡང་། ཁེ་ན་ཏའི་རྒྱལ་ཁབ་ནས་གང་འདོད་དུ་གནམ་ཁབ་དང་ཁབ་ཆུང་རྒྱག་མི་ཆོག་པར་མ་ཟད། སྨན་ཡང་ལས་སླ་པོར་མི་འཚོང་ཞིང་། ཁོ་ཚོས་རྗེ་ཉིད་ཀྱི་ཁྲག་ལ་བརྟག་དཔྱད་ཙམ་ལས་སྨན་བཅོས་ཅི་ཡང་མ་བྱས་སྟབས་སེམས་འཚབ་ཆེན་པོ་ལངས་ཀྱང་ཅི་བྱ་གཏོལ་མེད་ཀྱི་ངང་དུ་ལུས།

ཉིན་ཤས་སྔོན་བྷོ་སི་ཐིན་དུ་སྡོད་སྐབས། བླ་མ་མུ་མཚོའང་བསྙུངས་ནས་སྨན་ཁང་དུ་བྱོན་དགོས་ཐུག་ཅིང་། ཐེངས་གཅིག་གི་དབང་སྐུར་བའི་ལས་རིམ་ཡང་མཚམས་མི་འཇོག་ཀ་མེད་བྱུང་། ང་ཚོས་ཆོས་རྗེ་ཉིད་ལའང་དགོང་མོའི་ཆོས་ཁྲིད་དེ་གནས་སྐབས་ཕྱིར་འཐེན་བྱ་བའི་ཞུ་བ་ཕུལ་ཡང་། ཁོང་གི་ཞལ་ནས། མི་ཧ་ཅང་མང་པོ་ཞིག་ཆོས་མཉན་དུ་ཡོང་འདུག་པར་གོ་བས། གང་ལྟར་ཆོས་ཁྲིད་འཆད་རྒྱུ་ཡིན་གསུངས། རྗེ་ཉིད་ཆོས་ཁྲིད་ལ་འབྱོན་རན་སྐབས། གསང་སྤྱོད་ཁང་དུ་ཡུན་རིང་ལ་བསྐྱུགས་སོང་བས། ངེད་ཅག་ཉེ་གནས་རྣམས་ཀྱི་སེམས་སུ་བཟོད་དཀའ་བའི་ན་ཟུག་དང་དངངས་འཚབ་སྐྱེས་ནས་ཅི་བྱེད་འདི་བྱེད་མེད་པར་གྱུར། ཡིན་ནའང་བསམ་ཡུལ་ལས་འདས་པ་ཞིག་ལ། ཆོས་རྗེ་ཉིད་ཀྱིས་ཆོས་ཁྲིད་དངོས་སུ་གསུང་ཙ་ན། ནམ་རྒྱུན་བདེ་ཐང་གི་སྐབས་དང་འདྲ་བར་སྙུང་གཞི་ཅིའང་མེད་པ་ལྟར་གྱུར་ཏེ་ཆོས་ཁྲིད་ལེགས་པར་གསུང་ཐུབ་སོང་།

ཆོས་ཁྲིད་གསུངས་ཚར་རྗེས། སླར་ཡང་སྐུ་གཟུགས་སྙུང་བའི་ཚུལ་མཛད་པར་མ་ཟད། སྙུན་ཚབས་ཤིན་ཏུ་ཆེ་བ་ལྟར་བྱུང་བས། སྔོན་ཆད་སྐྱབས་རྗེ་བདུད་འཇོམས་རིན་པོ་ཆེ་དང་ཀརྨ་པ་སྐུ་ཕྲེང་བཅུ་དྲུག་པ་དག་ཀྱང་ཕྱི་རྒྱལ་ནས་དགོངས་པ་རྫོགས་ཏེ། སྐུ་གདུང་གནམ་གྲུ་ལས་ཕྱིར་རང་ཡུལ་དུ་ཁྱེར་བ་ལྟ་བུའི་དོན་རྐྱེན་འབྱུང་བར་གྱུར་ན། ངས་ཇི་ལྟར་བྱ་སྙམ་དུ་སེམས་ལ་འཚུབ་ཆ་ཆེན་པོ་ལངས།

མ་གཞི་ཆོས་རྗེ་ཉིད་ད་དུང་མུ་མཐུད་དུ་ཡོ་རོབ་ཀྱི་རྒྱལ་ཁབ་འགའ་ལ་འབྱོན་རྒྱུའི་ལས་རིམ་ཞིབ་ཚགས་བཀོད་སྒྲིག་བྱས་ཟིན་ཀྱང་། ང་ཚོས་ཁོང་གི་སྐུ་ལུས་ཀྱིས་ལྕོགས་མིན་ཐད་གྲོས་སྡུར་མང་དུ་བྱས་མཐར། མཛད་རིམ་ཕྱི་མ་རྣམས་བསྟུང་སྟེ་དབྱིན་ཇི་དང་ཧོ་ལན་རྒྱལ་ཁབ་སོགས་སུ་མི་འབྱོན་པར། ཧྥ་རན་སི་རྒྱལ་ཁབ་ལ་འཁྱུག་ཙམ་ཕེབས་རྗེས་རང་ཡུལ་དུ་ལོག་རྒྱུའི་གྲོས་ཐག་བཅད།

སྤྱིར་ནུབ་ཕྱོགས་སུ་ཆོས་ཁྲིད་བྱེད་པ་དེ་ང་ཚོ་བོད་ཡུལ་དང་མི་འདྲ་སྟེ། ཆོས་ཁྲིད་གསུང་རྒྱུ་གཏན་ཁེལ་བྱས་པ་ལ་གློ་བུར་བའི་འགྱུར་བ་གཏང་དགོས་ན། ཆོས་ཚོགས་དེ་དག་ལའང་དཔལ་འབྱོར་གྱི་གྱོང་གུད་ཆེན་པོ་ཐེབས་པར་འགྱུར་སྲིད་ཀྱང་། ད་ལན་རྗེ་ཉིད་ཀྱི་བདེ་ཐང་ལ་བསམ་བློ་བཏང་ནས་འགྱུར་བ་མི་གཏོང་ཐབས་མེད་དུ་གྱུར་ཅིང་། གལ་ཏེ་དཔལ་འབྱོར་གྱི་གྱོང་གུད་བྱུང་བ་དག་བདག་མི་སྒེར་གྱིས་གསབ་དགོས་ཀྱང་ཐབས་ཤེས་འཐེན་དགོས་པ་རེད་སྙམ་པ་བྱུང་། ཡིན་ན་ཡང་། རྗེས་སུ་ཆོས་ཚོགས་དེ་དག་གིས་རྗེ་ཉིད་སྐུ་སྙུང་བཞིན་པའི་གནས་ཚུལ་ཤེས་རྟོགས་བྱུང་བས། ཁོང་ཚོས་དོན་དེ་དང་ལེན་བྱས་ཤིང་དཔལ་འབྱོར་གྱི་གྱོང་གུད་རྣམས་ཀྱང་ཁོ་རང་ཚོས་ཐག་གཅོད་བྱས།

དེའི་ཕྱིར། ད་ཐེངས་ཆོས་རྗེ་ཉིད་དབྱིན་ཇི་དང་ཧོ་ལན་རྒྱལ་ཁབ་སོགས་སུ་འབྱོན་རྒྱུ་དེ་རེ་ཞིག་རྟེན་འབྲེལ་འཕྲོ་ཅན་དུ་གྱུར་སོང་བ་ཡིན།

ཤེས་རབ་དང་སྙིང་རྗེ།

ཉིན་དེའི་དགོང་མོར། ཆོས་རྗེ་ཉིད་དཱལ་ཧོབ་སེ་སློབ་ཆེན་（Dalhousie University）དུ་འབྱོར་ནས། ས་གནས་དེའི་དད་ལྡན་དང་དགེ་སློབ་འགའ་ཞིག་ལ། ཤེས་རབ་དང་སྙིང་རྗེ་ལས་བརྩམས་པའི་ཁྲོམ་བསྒྲགས་གསུང་བཤད་གནང་།

དཱལ་ཧོབ་སེ་སློབ་ཆེན་ནི། ཕྱི་ལོ་༡༨༡༨ལོར་དཱལ་ཧོབ་སེ་མི་རབས་དགུ་པའི་བློན་ཆེན་གྱིས་གསར་དུ་བསྐྲུན་པ་ཡིན་ལ། ཁོང་ཚོའི་དམིགས་ཡུལ་གཙོ་བོ་ནི་གྲལ་རིམ་དང་ཆོས་ལུགས་ཀྱི་དབྱེ་བ་མེད་པར་རིས་མེད་དུ་སློབ་སྦྱོང་བྱ་སའི་མཐོ་རིམ་སློབ་གླིང་ཞིག་འཛུགས་སྐྲུན་བྱེད་པ་དེ་ཡིན་འདུག སློབ་གླིང་དེ་རིམ་གྱིས་འཕེལ་རྒྱས་བྱུང་ནས་ད་ལྟ་ཁེ་ན་ཏའི་རྩེར་སོན་སློབ་ཆེན་ཞིག་ཏུ་གྱུར་ཡོད་དེ། སློབ་གྲྭ་འདི་ནས་ཁེ་ན་ཏའི་སྲིད་འཛིན་གསུམ་དང་ནོ་ཝེར་བྱ་དགའ་བཞེས་མཁན་གྱི་མི་སྣ་གཅིག་བཅས་བྱུང་བ་རེད།

སློབ་གྲྭ་འདིའི་དཱལ་ཧོབ་སེ་སྒྱུ་རྩལ་ལྟེ་གནས་（Dalhousie Arts Centre）ཀྱི་མི་སྟོང་ཕྲག་ལྷག་ཤོང་སའི་ཚོགས་ཁང་ཆེན་མོའི་ནང་དུ། ཆོས་རྗེ་ཉིད་བཞུགས་ཁྲིར་མ་འཁོད་པའི་སྔོན་ནས། མི་རྣམས་འཚང་ཁ་ཤིག་ཤིག་གིས་གང་འདུག་ཅིང་། མདོ་འཛིན་པས་སྤྲོ་སེམས་འཁོལ་བའི་ངང་ངོ་སྤྲོད་གནང་བ་འདི་ལྟར།

ཐོག་མར་ཆོས་རྗེ་འཇིགས་མེད་ཕུན་ཚོགས་ཀྱིས་གསུང་བཤད་གནང་བ་ལ་མཉན་དུ་ཡོང་བའི་སྐུ་མགྲོན་ཚང་མར་དགའ་བསུ་ཞུ།

ཆོས་རྗེ་འཇིགས་མེད་ཕུན་ཚོགས་ནི། ཕྱི་ལོ་༡༩༣༣ལོར་བོད་ཀྱི་བྱང་ཤར་ཕྱོགས་སུ་སྐུ་འཁྲུངས་པ་དང་། ཁོང་གིས་ལོ་བཅུ་ཕྲག་ལྷག་གི་སྔོན་ནས་བཟུང་བོད་ཡུལ་གྱི་ས་ཆ་སྟོད་སྨད་བར་གསུམ་དུ་དམ་པའི་ཆོས་རྒྱ་ཆེར་སྤེལ་ཡོད་པ་སྟེ། སངས་རྒྱས་ཀྱི་བསྟན་པ་ལོ་བཅུ་ཕྲག་ཙམ་ལ་དམ་དུ་བཅིངས་པའི་བཀག་སྡོམ་གྱི་རྒྱ་ལས་ཅུང་ཟད་གྲོལ་བ་ན། སླར་ཡང་བསྟན་པ་སྤེལ་བའི་ཁུར་ཆེན་ཕྲག་ཏུ་བླངས་ཡོད།

ཆོས་རྗེ་ཁོང་ད་ལན་བོད་ཡུལ་ནས་ཐོན་ཏེ། ནུབ་ཕྱོགས་སུ་ཆོས་སྟོན་པར་ཕེབས་ཐུབ་པ་ནི་ང་ཚོ་ཚང་མར་མཚོན་ན་ཆེས་གཟི་བརྗིད་ལྡན་པ་ཞིག་ཏུ་ཆགས་ཡོད། དེ་སྔོན་ཕྱི་ལོ་༡༩༩༠ལོར། ཁོང་རྒྱ་གར་གྱི་ཕྱོགས་སུ་འཚམ་འདྲིར་བྱོན་པ་དང་། ད་ལན་ཐེངས་དང་པོར་ནུབ་ཕྱོགས་སུ་བསྐྱོད་པར་མ་ཟད། ལྷག་པར་དུ་ནའོ་ཝཱ་སི་ཁོ་ཤཱ་（Nova Scotia）ཞིང་ཆེན་དུ་ཕེབས་པས། ང་ཚོ་ཚང་མར་ཆེས་བླ་ན་མེད་པའི་སྐལ་བ་བཟང་པོ་ཐོབ་བྱུང་།

འདི་ནས་གླེང་དགོས་པ་ཞིག་ལ། ཁེ་ན་ཏར་བྱོན་པའི་མཛད་རིམ་ནི་རྗེས་སུ་གསར་དུ་བསྣན་པ་ཡིན་ལ། རྗེ་ཉིད་ཀྱིས་ཁོང་གནས་འདིར་ཕེབས་འདོད་ཡོད་གསུངས་ནས་བྱོན་ཡོང་བ་ཡིན་པས། ཚང་མས་བསམ་བློ་ཐོངས་དང་། ང་ཚོ་ནི་ཧ་ཅང་བསོད་ནམས་ཆེ་བས་དགའ་སྤྲོ་འཕེལ་འོས་པའི་དོན་ཞིག་མ་ཡིན་ནམ། གཤམ་དུ་ཆོས་རྗེ་རིན་པོ་ཆེ་མཆོག་གིས་ཚང་མ་ལ་གསུང་བཤད་གནང་རྒྱུ་རེད།

དེ་ནས་ཆོས་རྗེ་ཉིད་ཀྱིས་འདི་ལྟར་གསུང་།

དེ་རིང་གི་དུས་ཚེས་ཕུན་སུམ་ཚོགས་པ་འདི་ལ་ང་རང་ཤར་ཕྱོགས་ཨེ་ཤ་ཡའི་རྒྱལ་ཁབ་ནས། ཡུལ་ཁྱད་པར་ཅན་འཛམ་བུ་གླིང་གི་བྱང་ཕྱོགས་སུ་ཉེ་བ་ཁེ་ན་ཏའི་རྒྱལ་ཁབ་འདིར་ཐོན་པར་མ་ཟད། ཁྱེད་ཚོ་མི་སེར་བརྒྱ་ཕྲག་མང་པོ་དང་མཇལ་ཕྲད་ཡོང་བ་ལ་ཧ་ཅང་དགའ་སྤྲོ་བྱུང་། རང་རེ་ཚང་མ་ཡུལ་ཁྱད་པར་ཅན་ལྷོ་རྒྱལ་འཛམ་བུ་གླིང་གི་ཡུལ་དུ་སྐྱེས། རྟེན་ཁྱད་པར་ཅན་དལ་འབྱོར་གྱི་མི་ལུས་རིན་པོ་ཆེ་ཐོབ་པའི་སྐབས་འདིར། རང་དང་གཞན་ལ་ཕན་པ་སྒྲུབ་པའི་ཐབས་དང་གནོད་པ་སྤོང་བའི་ཐབས་ལ་ཅི་ནས་ཀྱང་ཚང་མས་བསམ་བློ་ཞིབ་མོ་ཞིག་གཏོང་དགོས།

ཆོས་ལུགས་གང་རུང་ལ་ཞུགས་དགོས་ཚུལ།

བསམ་བློ་ཇི་ལྟར་གཏོང་དགོས་ཤེ་ན། འཛམ་བུ་གླིང་གི་མི་རྣམས་ལ་མཚོན་ན་ཆོས་ལུགས་གང་ལའང་མ་ཞུགས་པའི་སྐྱེ་བོ་ཕལ་བ་ཞིག་དང་། ཆོས་ལུགས་གང་རུང་ལ་ཞུགས་པའི་གང་ཟག་སྟེ་རིགས་གཉིས་ཡོད། ཆོས་ལུགས་གང་ལ་ཡང་མ་ཞུགས་པའི་གང་ཟག་རྣམས་ཀྱིས་ནི། ཟས་གོས་འབའ་ཞིག་དོན་དུ་གཉེར་ནས་ཚེ་འདིའི་འཚོ་ཐབས་ཙམ་ལ་བསམ་བློ་གཏོང་བ་ལས། སྐྱེ་བ་ཕྱི་མ་དང་། དགེ་སྡིག་བླང་དོར་སོགས་ལ་དོ་སྣང་གང་ཡང་བྱེད་མི་ཤེས། རང་གི་ལྟོ་རྒྱབ་ལ་བསམ་བློ་བཏང་ནས་བཟའ་བཏུང་རྩོལ་སྒྲུབ་བྱེད་པ་ཙམ་རྟ་དང་བ་ལང་སོགས་ཀྱིས་ཀྱང་ནུས་པས། དེ་དག་ཅུང་ཟད་བླུན་པོའི་རིགས་སུ་གཏོགས་པ་ཡིན། ཆོས་ལུགས་གང་རུང་ལ་ཞུགས་པའི་གང་ཟག་རྣམས་ནི། མི་ཕལ་བ་ཚོ་ལ་ལྟོས་ན་ལྷག་པར་ཁྱད་ཆོས་ཅན་ཞིག་ཡིན་ཏེ། ཟས་གོས་རྐྱང་པ་ཙམ་མ་ཟད་འཕྲལ་ཡུན་གྱི་ཕན་བདེ་སྒྲུབ་པའི་ཆེད་དུ་ཁོས་བསམ་བློ་བཏང་ནས་གྲུབ་མཐའ་དེ་ལ་ཞུགས་པ་ཡིན། རང་ལ་མི་ལུས་ཐོབ་པའི་གནས་སྐབས་འདིར་དེ་ཆུད་ཟོས་སུ་བཏང་ན་རང་ཉིད་ཀྱང་ཧ་ཅང་ངོ་ཚ་བ་དང་། གཞན་རྒྱུ་མཚན་ཤེས་པའི་གང་ཟག་གིས་བལྟས་ན་ཡང་ཁྲེལ་འོས་པའི་གནས་སུ་གྱུར་པ་ཞིག་ཡིན་པས། ཆོས་ལུགས་གང་ཡང་རུང་བ་ལ་ཞུགས་རྒྱུ་དེ་ཧ་ཅང་གལ་ཆེ་བ་ཞིག་ཡིན། ཆེས་མཆོག་ཏུ་གྱུར་པའི་ཆོས་ལུགས་དེ་གང་ཡིན་ལ་ཡང་བསམ་བློ་ཞིབ་མོ་ཞིག་མ་བཏང་ན། ཆོས་ཞེས་པ་དེ་ཡུན་རིང་པོ་ཞིག་གི་ཕན་བདེ་སྒྲུབ་པའི་ཐབས་ཡིན་པས། བརྟག་དཔྱད་ཙམ་ཡང་མི་བྱེད་པར་ཐད་ཀར་ཞུགས་པ་ནི་ཧ་ཅང་ནོར་ཚབས་ཆེ་བ་ཞིག་ཡིན།

ཆོས་ལུགས་ལ་བརྟགས་དཔྱད་མི་བྱེད་པར་གར་བབ་བབ་ཏུ་འཇུག་པ་ནི་ང་ཚོ་བོད་ཀྱི་ཚིག་དཔེ་ལ། ཁྱི་ལྟོགས་དང་གློ་བ་ཕྲད་པ་ལྟ་བུ་ཟེར། ཤ་ཐམས་ཅད་ཀྱི་ནང་ནས་ཐ་ཆད་པ་དེ་གློ་བ་རེད། ཁྱི་ལྟོགས་ཀྱིས་དེ་ཞིམ་མིན་ལ་མི་བལྟ་བར་འཕྲད་མ་ཐག་ཐད་ཀར་ཟ་འགྲོ་བ་ཡིན། དེ་བཞིན་དུ་ཆོས་ལུགས་དང་བླ་མ་གང་རུང་རེ་ལ་འཕྲད་པ་ན་བརྟག་དཔྱད་མི་བྱེད་པར་བླ་མ་དེ་བསྟེན་པ་དང་། ཆོས་ལུགས་དེར་ཞུགས་པ་ནི་ཧ་ཅང་བླུན་པོའི་ལུགས་ཡིན། ཆོས་ཞེས་པ་ནི་ཡུན་རིང་པོའི་འདུག་ཆུས་ཤིག་ཡིན་པས་བསམ་བློ་གཏོང་ལོས་དགོས། དཔེར་ན་ང་ཚོས་ཉིན་གཅིག་གི་ཟས་ལ་ཡང་བཟང་ངན་གྱི་བརྟག་དཔྱད་རྒྱ་ཆེན་པོ་ཞིག་བྱེད་པ་རེད། ཉིན་གཅིག་གི་ཟ་མ་དེ་ངོ་མ་བཤད་ན་བཟང་རུང་ངན་རུང་ཅུང་ཙམ་ནས་མི་གཙང་བར་གྱུར་འགྲོ། ཚེ་རབས་གཏན་གྱི་འདུག་ཆུས་ཀྱི་ཆོས་དེའི་འཇུག་སྒོ་ནོར་སོང་ན་ཡུན་རིང་པོའི་མདུན་ལམ་འཆུགས་སོང་བ་ཡིན་པས་ངེས་པར་དུ་དཔྱད་པ་ཞིབ་མོ་ཞིག་བྱེད་དགོས།

ཡང་དག་པའི་ཆོས་ལུགས་ངོས་བཟུང་བ།

དེ་ཡང་ཆོས་ལུགས་འགའ་ཞིག་དེ་ཇི་ལྟ་བུ་ཞིག་རེད་ཅེ་ན། གཞན་ལ་འཚེ་བའམ་ཞེ་སྡང་ཆོས་སུ་སྨྲ་བ་དང་། གཞན་གྱི་ཆུང་མ་སོགས་ལ་ལོག་པར་སྤྱོད་པ་དང་མ་བྱིན་པའི་རྒྱུ་ནོར་ལེན་པ་ལྟ་བུའི་འདོད་ཆགས་ཆོས་སུ་སྨྲ་བ་དང་། འགའ་ཞིག་གིས་བསམ་བློ་ཅི་ཡང་མི་གཏོང་བར་རང་གིས་གང་བསམ་ཐམས་ཅད་ཐད་ཀར་གཞན་ལ་སློབ་པས་གཏི་མུག་ཆོས་སུ་སྨྲ་བའི་ཆོས་ལུགས་ཀྱང་ཡོད། དེ་ཚོར་བསམ་བློ་ཐོང་དང་ཞེ་སྡང་ཆོས་སུ་སྨྲ་བ་ཡང་ཆོས་རྣམ་དག་མ་རེད་བསམ་རྒྱུ་ཞིག་ཚང་མས་གོ་ཐུབ་སྟེ། གཞན་ཞིག་གིས་ང་ཚོ་ཚུར་བསད་པ་དང་བརྡུངས་བ་ན་དེ་འདོད་མཁན་ནམ་དགའ་མཁན་གཅིག་ཀྱང་མེད། གཞན་ཕ་རོལ་པོ་ལ་ཡང་གསོད་པ་དང་རྡུང་བ་སོགས་བྱེད་པ་དེ་འདོད་མཁན་ཞིག་རྩ་བ་ནས་སྲིད་པ་མིན། དེས་ན་ཞེ་སྡང་ཆོས་སུ་སྨྲ་བ་དེ་ཡང་ཕྱིན་ཅི་ལོག་ཡིན་པར་ཤེས་དགོས།

འདོད་ཆགས་ཆོས་སུ་སྨྲ་བའི་ཆོས་ལུགས་དེར་བསམ་བློ་བཏང་ན། དཔེར་ན་རང་གི་ཆུང་མ་གཞན་གྱིས་དབང་མེད་དུ་འཕྲོགས་སོང་སྐབས་དེར་དགའ་པོ་མི་བྱེད་པ་དང་། རང་གི་རྒྱུ་རྫས་ལོངས་སྤྱོད་གཞན་གྱིས་འཕྲོགས་སོང་ན་དེ་སུས་ཀྱང་མི་འདོད། དེ་བཞིན་དུ་གཞན་ཕ་རོལ་པོ་ལ་འདོད་ཆགས་ཀྱི་བསམ་པ་ཡིས་གནོད་པ་བྱས་ན་དེ་ཡང་མི་འགྲིག་པས། འདོད་ཆགས་ཆོས་སུ་སྨྲ་བ་ཡང་ཕལ་ཆེར་ཕྱིན་ཅི་ལོག་ཡིན་སྙམ།

གཏི་མུག་ཆོས་སུ་སྨྲ་བ་ཞེས་པ་ནི་ལམ་ལོག་པ་དང་ལམ་ནོར་བ་ལ་འཇུག་བྱེད་ཡིན་པས། དེ་ཡང་རྩ་བ་ནས་དགའ་སའི་ཡུལ་ཞིག་མིན། དཔེར་ན་ཁེ་ན་ཏའི་རྒྱལ་ས་ལ་འགྲོ་བར་འདོད་པའི་གང་ཟག་ཅིག་ཨ་རིའི་ཝ་ཧྲིང་ཐོན་དུ་ཁྲིད་སོང་ན་སུས་ཀྱང་མི་འདོད་པ་བཞིན་དུ། ཚེ་རབས་གཏན་གྱི་འདུག་ཆུས་དེ་ལམ་ལོག་པར་ཁྲིད་སོང་ན་སུས་ཀྱང་མི་འདོད། དེའི་ཕྱིར་ན་གཏི་མུག་ཆོས་སུ་སྨྲ་བ་ཡང་ཆོས་རྣམ་དག་མ་རེད་ཅེས་ཁ་ཚོན་བཅད་ནས་སྨྲ་དགོས།

ཕན་བདེ་སྒྲུབ་པའི་ཐབས་ཁྱད་པར་ཅན་གང་དུ་བསྟན་ཡོད་པ་དེ་ཆོས་རྣམ་དག་ཡིན་པར་ངོས་འཛིན་དགོས་ལ། ཕན་བདེ་སྒྲུབ་སྟངས་ཀྱང་ཆོས་ལུགས་འགའ་ཞིག་ལ་རང་དང་རང་གི་ཉེ་ས། རང་གི་རྗེས་སུ་འཇུག་པ་ཐམས་ཅད་ལ་ཕན་པ་སྒྲུབ་པ་ལས་གཞན་ཐམས་ཅད་ལ་ཕན་པ་མི་བསྒྲུབ་པ་ཡོད། དེ་ཆོས་ཕྱིན་ཅི་ལོག་མིན་ཡང་ཅུང་དམན་པ་ཞིག་ཏུ་ངོས་འཛིན་དགོས། འགའ་ཞིག་གི་ཆོས་ལུགས་ལ་རང་རྐྱང་བར་མ་ཟད་འགྲོ་བ་མིའི་རིགས་སུ་གྱུར་པ་ཚང་མ་ལ་ཕན་པ་སྒྲུབ་ཀྱང་། གཞན་དུད་འགྲོ་སོགས་ལ་ཕན་པ་མི་བསྒྲུབ་པའི་ལུགས་ཡོད་མོད། དེ་ཡང་ཆེས་མཆོག་ཏུ་གྱུར་པའི་ཆོས་ལུགས་མིན་ཏེ། འགྲོ་བ་མིའི་རིགས་སུ་གྱུར་པ་ཐམས་ཅད་རང་གི་ལུས་དང་སྲོག་ལ་གཅེས་སྤྲས་ཅི་ཙམ་ཡོད་པ་དེ་ཙམ་དུ། རྟ་དང་བ་ལང་ལ་སོགས་པའི་སྲོག་ཆགས་གཞན་ཐམས་ཅད་ལ་ཡང་གཅིག་མཚུངས་ཡིན། དེ་བཞིན་དུ་མིའི་རིགས་ལ་གནོད་པ་བྱས་ན་སྡུག་བསྔལ་འབྱུང་བ་བཞིན་དུ། དུད་འགྲོ་རྣམས་ལ་ཡང་གནོད་པ་བྱས་ན་སྡུག་བསྔལ་འབྱུང་བས། འགྲོ་བ་སེམས་ཅན་ཐམས་ཅད་ལ་ཕན་པ་སྒྲུབ་པའི་ཐབས་སྟོན་པའི་ལམ་ནི་ཆོས་ཡང་དག་ཡིན་པར་ངོས་འཛིན་དགོས། སེམས་ཅན་ཡོངས་ལ་བདེ་བ་དང་ལྡན་འདོད་ཀྱི་བྱམས་པ། སྡུག་བསྔལ་དང་བྲལ་འདོད་ཀྱི་སྙིང་རྗེའི་སེམས་ཀྱིས་ཀུན་ནས་བསླངས་པའི་སྒོ་ནས་སུ་ལའང་ཕན་ཅི་ཐོགས་ཀྱི་ལུས་ངག་གི་སྤྱོད་པ་དེ་ཆོས་རྣམ་པར་དག་པ་ཡིན།

འཛམ་བུ་གླིང་འདིར་ཆོས་ལུགས་ཤིན་ཏུ་མང་པོ་ཞིག་ཡོད་ཀྱང་། འཚེ་མེད་ཀྱི་བསམ་པ་ལ་གནས་ནས་འཚེ་མེད་ཀྱི་སྤྱོད་པའི་ཆ་ནས། ཡེ་ཤུའི་ཆོས་ལུགས་དང་སངས་རྒྱས་ཆོས་ལུགས་གཉིས་འདྲ་བ་ཙམ་ཡོད། ནང་གསེས་ཡེ་ཤུའི་ཆོས་ལུགས་དང་སངས་རྒྱས་ཆོས་ལུགས་ལ་ཡང་ཁྱད་པར་ཤིན་ཏུ་མང་པོ་ཡོད་སྲིད་ཀྱང་། ང་རང་གིས་ཇི་བཞིན་དུ་བཤད་མི་ཤེས། རྒྱུ་མཚན་ནི་ང་ཚོ་བོད་ཀྱི་ལུང་པ་ན་ཡེ་ཤུའི་ཆོས་ལུགས་ཟེར་བ་ཧ་ཅང་ཉུང་ཉུང་ཡིན། ཡེ་ཤུ་པའི་ཆོས་དཔོན་རྣམས་ཀྱིས་གསུངས་པའི་ཡིག་ཆ་ཡང་མང་པོ་མཐོང་མ་མྱོང་། ནུབ་ཕྱོགས་རྒྱལ་ཁབ་ལ་ཐོན་ནས་ཟླ་བ་གཉིས་ལྷག་ཙམ་ཞིག་ལས་མིན། ཞིབ་འཇུག་ཅུང་ཟད་བྱས་ཀྱང་རྒྱ་ཆེན་པོ་མ་ཡོང་བས། ཡེ་ཤུའི་ཆོས་ལུགས་དང་སངས་རྒྱས་ཆོས་ལུགས་གཉིས་ལ་འདི་ལྟ་བུའི་ཁྱད་པར་འདུག་ཟེར་ནས་གཏན་ཁེལ་བ་ཞིག་བཤད་ཤེས་མ་སོང་། ཁྱེད་རྣམ་པས་ཡེ་ཤུའི་ཆོས་ལུགས་དང་། སངས་རྒྱས་ཆོས་ལུགས་གཉིས་ལ་ཐོག་མཐའ་བར་གསུམ་ཀུན་ཏུ་ཁྱད་པར་མེད་པར་དགོངས་ན་གཉིས་ཀའང་ཁྱད་མེད་དུ་ཉམས་སུ་ལོངས། གལ་ཏེ་བཟང་ངན་གྱི་ཁྱད་པར་ཅུང་ཟད་རེ་ཡོད་ན་ཞིབ་ཏུ་བསམ་བློ་བཏང་ནས་གང་བཟང་བ་དེ་ཉམས་སུ་ལོངས། ང་རང་ཉིད་ནང་པ་སངས་རྒྱས་པའི་ཆོས་སྨྲ་བའི་གང་ཟག་ཅིག་ཡིན་པས། ནང་པ་སངས་རྒྱས་པའི་ཆོས་ཀྱི་གནས་བབ་དེ་ཁྱེད་རྣམ་པ་ལ་མདོར་བསྡུས་ཤིག་ཞུ།

ནང་ཆོས་ཀྱི་སྙིང་དོན།

ནང་པ་སངས་རྒྱས་པའི་ཆོས་ལ་གཞན་གནོད་གཞི་དང་བཅས་པ་སྤོང་བའི་ལུགས་སྲོལ་ཞིག་དང་། དེའི་སྟེང་དུ་གཞན་ཕན་གཞི་དང་བཅས་པ་སྒྲུབ་པའི་ལུགས་སྲོལ་ཏེ་གཉིས་ཡོད་ལ། དང་པོ་ནི་དེང་སང་ཐེ་ལན་དི་དང་འབར་མ་ལ་སོགས་པའི་ཡུལ་ལ་དར་བའི་ནང་ཆོས་དེ་ཡིན། གཉིས་པ་ནི་གཞན་ལ་གནོད་མི་བྱེད་པར་མ་ཟད། རང་ལས་ཀྱང་གཞན་གཅེས་པར་བཟུང་ནས་གཞན་ཕན་འབའ་ཞིག་སྒྲུབ་པ་ནི་ཐེག་ཆེན་སྤྱིའི་ལུགས་ཡིན། དེ་གཙོ་བོ་རྒྱ་ནག་སོགས་ལ་དར་འདུག གཞན་སེམས་ཅན་རྣམས་ཀྱི་དོན་རྒྱ་ཆེན་པོ་ཡང་དཀའ་ཚེགས་མེད་པར་མགྱོགས་མྱུར་དུ་འགྲུབ་པའི་ཐབས་ལ་བརྩོན་རྒྱུ་དེ་ཐེག་ཆེན་གསང་སྔགས་ཀྱི་ཆོས་ཡིན། དེ་གཙོ་བོ་བོད་དང་རྒྱ་གར་གྱི་ཡུལ་ཕལ་ཆེར་ལ་དར་བའི་ནང་ཆོས་དེ་ཡིན།

དེ་ལྟ་བུའི་ནང་པ་སངས་རྒྱས་པའི་ཆོས་ཚང་མ་ཡང་སྟོན་པ་གཅིག་དང་། ཉམས་སུ་བླང་བྱའི་ཆོས་གཅིག་དང་། མཐར་ཐུག་གི་འབྲས་བུ་ཡང་གཅིག་པ་ཡིན་ཏེ། དེ་གསུམ་ལ་ནང་གསེས་ཀྱི་སྒོ་ནས་བསམ་བློ་བཏང་ན། ཕན་པ་སྒྲུབ་པའི་ཐབས་ཆུང་ཆུང་ཞིག་དང་། ཕན་པ་སྒྲུབ་པའི་ཐབས་ཆེན་པོ་ཞིག་དང་། ཕན་པ་སྒྲུབ་པའི་ཐབས་ཆེན་པོ་དེ་ཡང་མགྱོགས་མྱུར་ཏུ་འགྲུབ་ཐབས་ཡོད་པས། སྔ་མ་སྔ་མ་ལས་ཕྱི་མ་ཕྱི་མ་བཟང་པོ་ཉིད་དུ་ངོས་འཛིན་དགོས། དེས་ན་ནང་པ་སངས་རྒྱས་པའི་ཆོས་ཡོད་ཚད་ཀྱི་བསྟན་བྱ་དེ་མཐར་ཐུག་གི་དོན་ལ་གཅིག་ཡིན། གཞན་ལ་གནོད་མི་བྱེད་པ་དང་། རང་གི་སེམས་ཡོངས་སུ་འདུལ་བར་བྱེད་པ་གཉིས་ཀྱི་ནང་དུ་འདུ་བ་ཡིན། དེ་ཡང་ཐོག་མར་རང་རྒྱུད་མ་ཐུལ་ན་གཞན་ལ་ཕན་པ་སྒྲུབ་པའི་ཐབས་མི་ཤེས། གཞན་ལ་གནོད་པ་མི་བྱེད་བསམ་ཡང་བག་མེད་ཀྱི་དབང་གིས་གནོད་པ་སྐྱེལ་འོང་། དེ་ལ་ཐོག་མར་རང་རྒྱུད་འདུལ་བ་ནི་རྩ་བ་ཡིན་པས། སྙིང་རྗེ་ཁྱད་པར་ཅན་དང་ཤེས་རབ་ཁྱད་པར་ཅན་གཉིས་ཀྱི་སྒོ་ནས་རང་རྒྱུད་འདུལ་དགོས།

སྙིང་རྗེ།

སྙིང་རྗེ་དེ་ཇི་ལྟ་བུ་ཞིག་ཡིན་ཞེ་ན། མཐའ་ཡས་པའི་སེམས་ཅན་ཐམས་ཅད་སྡུག་བསྔལ་དང་བྲལ་བར་གྱུར་ན་ཅི་མ་རུང་སྙམ་ནས་བསམ་པ་བཟང་པོ་བསྐྱེད་པ་དང་། སྡུག་བསྔལ་དང་བྲལ་བའི་ཐབས་ལ་ཅི་ནུས་སུ་བརྩོན་པ་ཡིན།

སྙིང་རྗེ་ཁྱད་པར་ཅན་དེ་ཡང་བདག་གཞན་མཉམ་པ་དང་། བདག་བས་གཞན་གཅེས་ཀྱི་ཐབས་རྣམ་པ་གཉིས་ལ་བརྟེན་ནས་སྒོམ་དགོས། བདག་གཞན་མཉམ་པ་དེ་ཇི་ལྟར་སྒོམ་པ་ཡིན་ཞེ་ན། དཔེར་ན་མི་གཅིག་གི་ལུས་པོ་ལ་མགོ་དང་རྐང་ལག་སོགས་མང་པོ་ཞིག་ཡོད་ཀྱང་། དེ་ཐམས་ཅད་ལ་གནོད་པ་མི་འབྱུང་བའི་ཐབས་ལ་བརྩོན་དགོས་པ་བཞིན། སེམས་ཅན་སུ་ལ་སྡུག་བསྔལ་བྱུང་ཡང་སྡུག་བསྔལ་ཡིན་པའི་ཕྱིར་ན། རང་དང་འདྲ་བར་སྡུག་བསྔལ་མི་འབྱུང་བའི་ཐབས་དང་། བདེ་བ་སྒྲུབ་པའི་ཐབས་ལ་བརྩོན་པ་དེར་བདག་གཞན་མཉམ་པ་ཟེར། གཞན་ལ་ཕན་པ་བསྒྲུབ་དགོས་པའི་རྒྱུ་མཚན་ནི། མཐའ་ཡས་པའི་སེམས་ཅན་ཐམས་ཅད། ཐོག་མ་མེད་པའི་དུས་ནས་རང་གི་ཕ་མར་མ་གྱུར་པ་གཅིག་ཀྱང་མེད་པར་བཅོམ་ལྡན་འདས་ཀྱིས་གསུངས་ཡོད། ཕ་མར་གྱུར་པའི་དུས་སུ་ནི་གཅན་གཟན་གཏུམ་པོ་སྟག་དང་གཟིག་ལྟ་བུ་ཡིན་ཡང་། ད་ལྟའི་ང་ཚོའི་ཕ་མ་ལྟར་རང་གི་བུ་ཕྲུག་ལ་ལྷག་པར་བརྩེ་བས་བསྐྱངས་པའི་དྲིན་ཆེན་ཤ་སྟག་ཡིན། དེས་ན་སེམས་ཅན་དྲིན་པོ་ཆེ་དེ་དག་གི་དྲིན་ལན་མི་གསབ་པར་མ་ཟད་གནོད་འཚེ་བྱེད་པ་ནི་ཤིན་ཏུ་ཁྲེལ་འོས་པ་ཞིག་ཡིན།

དེ་ཡང་བཅོམ་ལྡན་འདས་ཀྱིས་ཀྱང་འདི་སྐད་དུ་གསུངས་ཡོད། འཇིག་རྟེན་གྱི་ཁམས་འདིར་བདེ་བ་དང་ལེགས་པ་ཇི་སྙེད་ཅིག་ཡོད་པ་ཐམས་ཅད། གཞན་བདེ་བ་དང་ལྡན་ན་སྙམ་པའི་བསམ་པ་བཟང་པོ་དང་སྤྱོད་པ་བཟང་པོ་ལས་བྱུང་བ་དང་། ནད་མུག་མཚོན་འཁྲུག་ལ་སོགས་པའི་སྡུག་བསྔལ་ཇི་སྙེད་ཅིག་ཡོད་པ་ཐམས་ཅད་ནི་རང་ཁོ་ན་བདེ་འདོད་དང་། གཞན་མ་སྐྱིད་ན་མ་བདེ་ན་སྙམ་པའི་བསམ་ངན་ལས་བྱུང་བ་ཡིན་པར་གསུངས་ཡོད། དེའི་རྒྱུ་མཚན་ནི་བདག་ཅག་གི་སྟོན་པ་ཐབས་མཁས་ལ་ཐུགས་རྗེ་ཆེན་པོ་དང་ལྡན་པ་དེ་ཉིད་ཀྱིས། གཞན་དོན་འབའ་ཞིག་སྒྲུབ་པར་མ་ཟད། རང་གི་སྐུ་སྲོག་ལའང་ཕངས་པ་མེད་པར་ཚེ་རབས་མང་པོའི་བར་དུ་སེམས་ཅན་རྣམས་ལ་ཕན་པ་བསྒྲུབས་པས། བདེ་བ་དང་དགའ་བ་བསམ་གྱིས་མི་ཁྱབ་པའི་འབྲས་བུ་མཐར་ཐུག་གི་གོ་འཕང་ཐོབ་པ་དང་། སེམས་ཅན་ཕལ་བ་རྣམས་ཀྱིས་ཐོག་མ་མེད་པའི་དུས་ནས་རང་གཅིག་པུ་བདེ་ན་བསམ་པ་དང་། གཞན་མ་བདེ་ན་བསམ་པས་ད་རུང་ཡང་སྡུག་བསྔལ་མུ་མཐའ་མེད་པ་ལ་སྤྱོད་བཞིན་ཡོད། དེས་ན་གཞན་ཕན་སྒྲུབ་པའི་ཐབས་དེ་ཡང་རང་ལས་མཆོག་ཏུ་གྱུར་པ་ཐམས་ཅད་ལ་ཕྲག་དོག་མེད་པ་དང་། རང་དང་མཉམ་པ་ཐམས་ཅད་ལ་ཟུར་ཟ་མེད་པ། རང་ལས་དམན་པ་ཐམས་ཅད་ལ་བརྙས་བཅོས་མེད་པ་ཞིག་གི་སྒོ་ནས་ཐོག་མར་རང་རྒྱུད་དྲང་པོའི་ལམ་ལ་གནས་དགོས། དེ་ལྟ་བུའི་སྤྱོད་པ་ཕུན་སུམ་ཚོགས་པས་སེམས་ཅན་རྣམས་བདེ་བ་དང་ལྡན་འདོད་ཀྱི་བྱམས་པ་དང་། སྡུག་བསྔལ་དང་བྲལ་འདོད་ཀྱི་སྙིང་རྗེ། བདེ་བ་དང་ལྡན་པ་ལ་དགའ་བ། རང་གི་ཉེ་བ་རྣམས་ལ་ཆགས་པ་དང་གཞན་དགྲ་བོ་སོགས་ལ་སྡང་བ་མེད་པའི་བཏང་སྙོམས་ཏེ། ཚད་མེད་བཞི་ལ་དུས་རྒྱུན་དུ་གོམས་པར་བྱེད་པ་ནི་སྙིང་རྗེའི་ཉམས་ལེན་ཡིན།

ཤེས་རབ།

སེམས་ཅན་ཐམས་ཅད་བདེ་བ་དང་ལྡན། སྡུག་བསྔལ་དང་བྲལ་ན་བསམས་ཀྱང་བདེ་བ་སྒྲུབ་པའི་ཐབས་དང་། སྡུག་བསྔལ་སེལ་བའི་ཐབས་མ་ཤེས་པར་རང་གར་སེམས་ཅན་ཐམས་ཅད་ལ་སྙིང་རྗེ་སྐྱེ་བ་ཙམ་གྱིས་མི་ཆོག དེའི་གྲོགས་སུ་ཤེས་རབ་དྲི་མ་མེད་པ་ཞིག་རང་རྒྱུད་ལ་བསྐྱེད་དགོས། ཤེས་རབ་དྲི་མ་མེད་པ་དེ་ཡང་རང་དང་སེམས་ཅན་ཐམས་ཅད་ལ་ཕན་པ་སྒྲུབ་པའི་ཐབས་ཤེས་པ་དང་། གནོད་པ་ལས་བསྲུང་བའི་ཐབས་ཤེས་པ་ལ་གོ་ཞིང་། དེ་ལྟ་བུའི་ཤེས་རབ་ཁྱད་པར་ཅན་དེ་རྒྱུ་མེད་རྐྱེན་མེད་ཀྱིས་མི་སྐྱེ་ལ། རང་རྐྱང་བས་བསམ་བློ་བཏང་ཡང་ཐབས་དེ་ཤེས་མི་ཐུབ། དེ་ཤེས་པར་བྱེད་པ་ལ་སངས་རྒྱས་ཀྱི་ཆོས་སོགས་ལ་རང་ལས་ལྷག་པའི་སྦྱང་བརྩོན་ལྡན་པའི་ཤེས་ཡོན་ཅན་གྱི་བླ་མ་དང་། དགེ་རྒན་གང་རུང་ཞིག་བསྟེན་ནས་དེའི་དྲུང་དུ་སངས་རྒྱས་ཀྱིས་གསུངས་པའི་ཆོས་ལ་སྦྱང་བརྩོན་རྒྱ་ཆེན་པོ་ཞིག་བྱ་དགོས། བླ་མའི་དྲུང་ནས་མཉན་རྒྱུའི་ཆོས་དེའང་། བོད་ལུང་པ་ལྟ་བུ་ལ་མཚོན་ན་རྒྱ་གར་འཕགས་པའི་ཡུལ་ནས་བརྒྱུད་ཡོང་བའི་ནང་ཆོས་བཀའ་དང་བསྟན་བཅོས་གཉིས་ལ་ཕལ་ཆེར་པོ་ཏི་ཆེ་ཚད་སུམ་བརྒྱ་ལྷག་འདུག བོད་རང་གི་བླ་མ་རྣམས་ཀྱིས་བརྩམས་པའི་ཆོས་ཚུལ་ལ་ཡང་པོ་ཏི་སྟོང་ཕྲག་མང་པོ་ཡོད། རབ་ན་དེ་ཚང་མ་ལ་སློབ་སྦྱོང་བྱེད་པ་དང་། དེ་ཙམ་མ་ནུས་ཀྱང་རང་དང་གཞན་ལ་ཕན་པ་སྒྲུབ་པའི་ཐབས་དང་། གནོད་པ་ལས་སྲུང་བའི་ཐབས་གསལ་བར་སྟོན་པའི་བྱང་ཆུབ་སེམས་དཔའི་སྡེ་སྣོད་རྣམས་ལ་ངེས་པར་དུ་བླ་མའི་དྲུང་ནས་ལེགས་པར་མཉན་དགོས། མཉན་བྱའི་ཚིག་དང་དོན་གྱི་ཆ་རྣམས་རང་གིས་ལག་ལེན་དགོས་ན་ཤེས་སམ་མི་ཤེས་བརྟག་དཔྱད་ཞིབ་འཇུག་བྱས་ནས་བསམ་བློ་གཏང་དགོས། ཐོས་པ་རྐྱང་བ་ལས་དཔྱད་པ་གཅིག་ཀྱང་མ་བྱས་ན་ཆོས་དེ་ཡང་དག་པ་ཞིག་ཤེས་པའི་གོ་སྐབས་མེད། དཔེར་ན། སློབ་ཕྲུག་ཅིག་གིས་ལོ་བཅུ་ཕྲག་ལྷག་གི་བར་དུ་སློབ་སྦྱོང་བྱས་པའི་སློབ་ཚན་རྣམས་ལ་མཉན་ཡང་ཁོས་བསམ་བློ་རྩ་བ་ནས་མ་བཏང་ན་ཚིག་གཅིག་ཀྱང་མི་ཤེས། དཔྱད་པ་ཕྱོགས་ཙམ་ཞིག་གིས་ཀྱང་ལག་ལེན་གདབ་མི་ཤེས་ཏེ། རླངས་འཁོར་སྐོར་བ་ལ་ལག་པས་བསྐོར་རྒྱུ་དང་རྐང་པས་གནན་རྒྱུ་ཡོད་པར་སྨྲས་པ་ཙམ་གྱིས་རླངས་འཁོར་བསྐོར་ནས་ལམ་ལ་འགྲོ་མི་ཤེས་པས་ལག་ལེན་མཐར་ཕྱིན་པ་ཞིག་ཤེས་དགོས། ཤེས་ཟིན་པའི་དོན་དེ་རང་རྒྱུད་ལ་མ་སྦྱར་ན་ཤེས་པ་ཙམ་གྱིས་ཕན་པ་མེད། རླངས་འཁོར་སྐོར་ཤེས་ཀྱང་མ་བསྐོར་ན་མ་ཤེས་པ་དང་ཁྱད་མེད་པ་ལྟ་བུ་ཡིན་པས། ཤེས་རབ་ཆེན་པོ་དེ་རང་རྒྱུད་ལ་སྐྱེད་པར་བྱེད་པ་ལ། དང་པོ་ཐོས་པ་དང་། བར་དུ་བསམ་པ། ཐ་མར་སྒོམ་པ་གསུམ་རིམ་བཞིན་དུ་བྱང་ཆུབ་པ་ཞིག་དགོས།

ཤེས་རབ་དང་སྙིང་རྗེ་གཉིས་ཉམས་སུ་ལེན་ཚུལ།

དེས་ན་ད་རེས་སྐབས་སུ་བབས་པ་ནི་ཤེས་རབ་དང་སྙིང་རྗེ་གཉིས་ཉམས་སུ་ལེན་སྟངས་མདོར་བསྡུས་པ་ཞིག་ཁྱེད་རྣམ་པ་ལ་ཞུ། དེ་ཇི་ལྟར་བསྒོམ་དགོས་ན། མཐའ་ཡས་པའི་སེམས་ཅན་ཐམས་ཅད་ཐོག་མ་མེད་པའི་དུས་ནས་ཕ་མར་མ་གྱུར་པ་གཅིག་ཀྱང་མེད། ཕ་མར་གྱུར་པའི་དུས་སུ་ད་ལྟའི་ཕ་མ་བཞིན་དུ་ཟས་ཀྱི་ཕུད་བྱིན། གོས་ཀྱི་རྩེས་གཡོགས། བསམ་སྦྱོར་གཉིས་ཀྱིས་ཤིན་ཏུ་བྱམས་པས་བསྐྱངས་པའི་དྲིན་ཆེན་ཤ་སྟག་ཡིན། དྲིན་ཅན་དེ་དག་གིས་འདོད་རྒྱུ་བདེ་བ་འདོད་ཀྱང་བདེ་བའི་རྒྱུ་བསྒྲུབ་མི་ཤེས། སྡུག་བསྔལ་མི་འདོད་ཀྱང་སྡུག་བསྔལ་གྱི་རྒྱུ་ལ་ངང་གིས་འཇུག་བཞིན་ཡོད་པས། དེ་དག་ཐམས་ཅད་ལ་སྙིང་རེ་རྗེ་བསམ་དགོས་པ་ཡིན། སེམས་ཅན་དེ་དག་གིས་ཞེ་འདོད་དང་ལག་ལེན་གཉིས་རྒྱབ་འགལ་དུ་གྱུར་ནས། ལམ་ལོག་མགོ་རྨོངས་ལོང་བ་ཐང་དཀྱིལ་དུ་ལུས་པ་ལྟ་བུ་ཞིག་ཏུ་གྱུར་ཡོད་དེ། དཔེར་ན། ཕལ་ཆེ་བ་ཞིག་གིས་རང་གི་ཚེ་རིང་བའི་ཕྱིར་དུ། དགྲ་ཞིག་ཡིན་ན་དེ་མ་བསད་ན་ཚུར་གསད་ཡོང་བ་ལ་དོགས་ནས་དགྲ་བོ་ཇི་ལྟར་བཏུལ་ཡང་གོང་འཕེལ་དུ་འགྲོ་བ་དང་། ཁྱད་པར་དུ་སེམས་ཅན་གཅིག་བསད་ན་སྲོག་ལན་ལྔ་བརྒྱའི་བར་དུ་གཞལ་དགོས། དེས་ཀྱང་ཞེ་འདོད་དང་ལག་ལེན་ཕྱིན་ཅི་ལོག་ཏུ་གྱུར་བ་ཡིན། གཞན་ཡང་ནོར་ལོངས་སྤྱོད་ཐོབ་པའི་ཕྱིར་གཞན་ལ་ཅི་ཙམ་བརྐུས་ན། རང་ལ་ཡང་མི་འདོད་པ་སྣ་ཚོགས་འབྱུང་ནས་རང་གི་རྒྱུ་རྫས་རྣམས་ཀྱང་གཏོར་བརླག་ཏུ་འགྲོ་བའི་རྒྱུ་དང་། ཁྱད་པར་དུ་ལས་ཀྱི་ལན་ཆགས་ཀྱིས་ཅི་ཙམ་བརྐུས་པ་དེ་ཙམ་དབུལ་བོ་ཉིད་དུ་གྱུར་འགྲོ་ཡང་ཁོས་མི་ཤེས། དེས་ན་སེམས་ཅན་དེ་དག་ཐམས་ཅད་ཀྱིས་བདེ་བ་བསྒྲུབ་མི་ཤེས་ཤིང་སྡུག་བསྔལ་སྤང་མི་ཤེས་པས། བདག་གིས་སེམས་ཅན་ཐམས་ཅད་བདེ་བ་ལ་བཀོད་ནས་སྡུག་བསྔལ་དང་བྲལ་བའི་ཐབས་ཤིག་བྱ་སྙམ་དགོས། འོན་ཀྱང་འགྲོ་བ་སེམས་ཅན་ཐམས་ཅད་ལ་ཕན་པ་སྒྲུབ་པའི་ནུས་པ་ད་ལྟ་བདག་ལ་མེད་ཀྱང་ཕན་པ་སྒྲུབ་པའི་ནུས་པ་གང་ནས་རྙེད་སྙམ་དུ་བསམ་བློ་བཏང་ན། དཀའ་ངལ་གང་ཡང་མེད་པར་མྱུར་བ་ཉིད་དུ་སེམས་ཅན་ཐམས་ཅད་ཕན་བདེ་ལ་འགོད་པའི་ནུས་པ་དང་ལྡན་པ་ནི། སངས་རྒྱས་བཅོམ་ལྡན་འདས་ཀྱི་གོ་འཕང་ཡིན་པ་ཤེས་པར་བྱས་ནས། སེམས་ཅན་ཐམས་ཅད་ཀྱི་དོན་དུ་བདག་གིས་སངས་རྒྱས་ཀྱི་གོ་འཕང་བསྒྲུབ་པར་བྱ་སྙམ་པའི་དམ་བཅའ་རྒྱུད་ལ་བརྟེན་པ་དང་། སངས་རྒྱས་ཀྱི་གོ་འཕང་དེ་ཡང་རྒྱུ་མེད་རྐྱེན་མེད་དུ་མི་འབྱུང་བས་དེའི་རྒྱུ་ལ་འབད་དགོས།

དེ་ཡང་སངས་རྒྱས་འགྲུབ་བྱེད་ཀྱི་རྒྱུ་དེ་ལ་ཕ་རོལ་ཏུ་ཕྱིན་པ་དྲུག་ཡོད་དེ། དང་པོ་སྦྱིན་པའི་ཕར་ཕྱིན་ནི། རང་གི་ལུས་དང་ལོངས་སྤྱོད་དགེ་བ་དང་བཅས་པ་སེམས་ཅན་རྣམས་ལ་ཕངས་མེད་དུ་བྱིན་པ་ལ་ཟེར། གཉིས་པ་ཚུལ་ཁྲིམས་ཀྱི་ཕར་ཕྱིན་ནི། སེམས་ཅན་རྣམས་ལ་གནོད་མི་བྱེད་པར་མ་ཟད་སེམས་ཅན་རྣམས་ལ་ཕན་བདེ་སྒྲུབ་པའི་ཐབས་ལ་བརྩོན་པ་ལ་ཟེར། གསུམ་པ་བཟོད་པའི་ཕར་ཕྱིན་ནི། སེམས་ཅན་སུ་ཡིན་ཡང་རང་ལ་ཇི་ལྟར་གནོད་པ་བྱས་རུང་དེ་ལ་ཞེ་སྡང་མེད་པར་མ་ཟད་ཕན་པ་དཔག་ཏུ་མེད་པ་སྒྲུབ་པའི་ཐབས་ལ་བརྩོན་རྒྱུ་ལ་ཟེར། བཞི་པ་བརྩོན་འགྲུས་ཀྱི་ཕར་ཕྱིན་ནི། སེམས་ཅན་རྣམས་ཀྱི་དོན་དུ་ཕན་པ་དང་བདེ་བའི་བྱ་བ་སྒྲུབ་པ་ལ་ལྷག་པར་སྤྲོ་ནས་དགེ་བ་རྣམ་དག་སྒྲུབ་པ་ལ་ཟེར། ལྔ་པ་བསམ་གཏན་གྱི་ཕར་ཕྱིན་ནི། རང་གི་སེམས་འདོད་ཆགས་དང་། ཞེ་སྡང་། གཏི་མུག་གི་དབང་དུ་མི་འགྲོ་བར་དགེ་བའི་བསམ་པ་ལ་རྩེ་གཅིག་ཏུ་འཇོག་པར་བྱེད་པ་ལ་ཟེར། དྲུག་པ་ཤེས་རབ་ཀྱི་ཕར་ཕྱིན་ནི། ལས་རྒྱུ་འབྲས་བསླུ་མེད་ཡིན་པར་ཤེས་ནས་ཤེས་བྱའི་དོན་ལ་རྨོངས་པ་མེད་པར་འཇུག་པ་དེ་ཡིན། དེ་དག་སྒོམ་པ་ལ་སྙིང་རྗེས་སེམས་ཅན་ལ་དམིགས་པའི་ཟུར་དང་། ཤེས་རབ་ཀྱིས་རྫོགས་བྱང་ལ་དམིགས་པའི་ཟུར་གཉིས་ཚང་བ་ཡིན་པས། དེ་ལྟ་བུའི་ཉམས་ལེན་ལ་དུས་རྒྱུན་དུ་བརྩོན་པ་དེར་ནང་པ་སངས་རྒྱས་པའི་ཆོས་ཀྱི་སྙིང་པོའི་གནད་ཡོངས་སུ་རྫོགས་པ་འདུས་ཤིང་། ནང་ཆོས་ཉམས་སུ་ལེན་འདོད་པ་ཐམས་ཅད་ཀྱིས་ཉམས་སུ་བླང་བྱའི་སྙིང་པོ་ནི། སྙིང་རྗེ་དང་ཤེས་རབ་འདི་གཉིས་ཡིན་པས་དེ་ལ་རྩེ་གཅིག་ཏུ་ཉམས་ལེན་གྱིས། ནང་པ་སངས་རྒྱས་པའི་ཆོས་དེ་རྣམ་པར་དག་པ་ཡིན་མིན་ལ་ཞིབ་འཇུག་བྱེད་མཁན་རྣམས་ཀྱིས་ཀྱང་འདི་ལ་བསམ་བློ་ཐོང་དང་། སྙིང་རྗེ་དྲི་མ་མེད་པ་སྒོམ་པ་དང་ཤེས་རབ་རྣམ་པར་དག་པ་རྒྱུད་ལ་སྦྱར་རྒྱུ་དེ་སྐྱོན་ཅན་ཡིན་ན། ནང་པ་སངས་རྒྱས་པའི་ཆོས་དེ་སྐྱོན་ཅན་ཡིན་པ་དང་། དེ་སྐྱོན་མེད་ཡིན་ན་ནང་པ་སངས་རྒྱས་པའི་ཆོས་དེའང་སྐྱོན་མེད་དུ་གྱུར་པ་ཡིན། གལ་ཏེ་ནང་པ་སངས་རྒྱས་པའི་ཆོས་དེ་སྐྱོན་མེད་ཅིག་ཡིན་པར་གོ་ན་ངེས་པར་དུ་རང་ཐག་རང་གིས་བཅད་ནས་ཆོས་དེ་ལ་འཇུག་དགོས་པ་ཡིན།

ནང་པ་སངས་རྒྱས་པའི་ཆོས་དེ་ཡང་དག་པ་ཡིན་པར་ཤེས་བཞིན་དུ་ད་དུང་མི་འཇུག་པར། ངེད་ཚང་གི་ཨ་ཕའི་ཆོས་ལུགས་འདི་ཡིན། ཨ་མྱེ་ཡི་ཆོས་ལུགས་འདི་ཡིན་ཟེར་ནས་དེར་ཞེན་ལྟ་བྱེད་པ་ནི་ཧ་ཅང་གླེན་པ་ཡིན་ཏེ། ང་ཚོ་བོད་ཀྱི་ཚིག་དཔེ་ལ། གླེན་པ་ཆུ་མཆོང་ལུག་མཆོང་ཟེར། དེའི་དོན་ནི་ལུག་གཅིག་ཆུ་ནང་དུ་སྔོན་ལ་མཆོངས་ན་ལུག་གཞན་པ་རྣམས་ཀྱིས་ཀྱང་། ཆུས་ཁྱེར་མི་འཁྱེར་ལ་མི་བརྟག་པར་དེའི་རྗེས་སུ་ཚམ་ཚོམ་མེད་པར་མཆོངས་འགྲོ་བ་ལ་ཟེར་བས་དེ་ལྟར་བྱ་མི་རུང་། ཁྱེད་ཚོ་ཁེ་ན་ཏའི་ཡུལ་ཁམས་ཀྱི་ལུག་རྣམས་དེ་འདྲ་བ་ཞིག་ཨེ་ཡིན་མི་ཤེས། ང་ཚོ་བོད་ཀྱི་ལུག་རྣམས་དེ་ལྟ་བུ་ཞིག་ཡིན། སྔ་མ་དེ་ཆུ་ལ་མཆོངས་སོང་ན་རྗེས་མ་རྣམས་ཀྱིས་སྔ་མ་ཆུས་ཁྱེར་སོང་བ་མཐོང་ཡང་ཁོ་རང་མཆོངས་འགྲོ་བ་ཡིན། དེས་ན་ཕ་མེས་ཀྱི་རིང་ནས་བརྒྱུད་པའི་ཆོས་ལུགས་ཡིན་ན་ཡང་། ཞིབ་འཇུག་མི་བྱེད་པར་དེར་ཞེན་ལྟ་བྱས་པ་ལ་ཆུ་མཆོང་ལུག་མཆོང་ཟེར། དེ་ནི་ཤིན་ཏུ་སྨད་པའི་གནས་སུ་གྱུར་པ་ཞིག་ཡིན། ༼དགོད་སྒྲ།༽

ང་ཚོ་བོད་ཀྱི་བླ་མ་ཞིག་གིས་འདི་ལྟར་གསུངས་ཡོད། མཁས་པ་རང་གིས་དཔྱོད་ཤེས་ཀྱི། །བླུན་པོ་གྲགས་པའི་རྗེས་སུ་འབྲང་། །ཁྱི་རྒན་ཀུ་ཅོ་འདོན་པ་ན། །རྒྱུ་མཚན་མེད་པར་གཞན་དག་རྒྱུག །ཅེས་པ་སྟེ། མཁས་པ་ཡིན་ན་རང་གིས་བསམ་བློ་བཏང་ནས་ལམ་ལ་འཇུག་པ་དང་། བླུན་པོ་ཡིན་ན་གཞན་ཟེར་གྱི་རྗེས་སུ་འཇུག་པར་བཤད་ཡོད། དཔེར་ན། གྲོང་སྟོད་ཀྱི་ཕྱོགས་ནས་ཁྱི་རྒན་ཞིག་གིས་ཀུ་ཅོ་འདོན་པ་ན་ཁྱི་གཞན་པ་ཐམས་ཅད་ཀྱིས་ཀྱང་རྒྱུ་མཚན་ཅི་ཡང་མེད་པར་ཀུ་ཅོ་འདོན་པ་ལྟར། བརྟག་དཔྱད་མེད་པར་གཞན་ཟེར་གྱི་རྗེས་སུ་འཇུག་མི་རུང་། ཁྱེད་རྣམ་པས་ཀྱང་ངོ་མ་བསམ་བློ་ཞིབ་མོ་ཞིག་ཐོང་དང་། ང་ནང་པ་སངས་རྒྱས་པའི་ཆོས་སྨྲ་བའི་གང་ཟག་ཅིག་ཡིན་པས་དེའི་ཕྱོགས་ནས་སྐད་ཆ་བཤད་པ་རེད་མ་བསམ། ང་རང་ལོ་བདུན་གྱི་དུས་སུ་ནང་པ་སངས་རྒྱས་པའི་ཆོས་སྒོར་ཞུགས་པ་ཡིན། ད་ལྟ་ལོ་དྲུག་ཅུ་ཐམ་པར་སླེབས་ཀྱང་རྨོངས་དད་བྱས་ནས་ནང་པ་སངས་རྒྱས་པའི་ཆོས་འདི་ཡག་པོ་ཞིག་ཡིན་རྒྱུ་རེད་བསམ་མ་མྱོང་། ནང་ཆོས་ལ་བརྟག་དཔྱད་ཞིབ་མོ་ཞིག་བྱས་ནས་ཚེ་གང་བོར་བསམ་བློ་བཏང་བའི་གྲུབ་འབྲས་ནི། འཛམ་བུའི་གླིང་གི་ཆོས་ལུགས་ཡོངས་རྫོགས་ཀྱི་ཕུལ་དུ་བྱུང་བ། གོལ་འཆུག་མེད་པ་དེ་ནང་པ་སངས་རྒྱས་པའི་ཆོས་འདི་རེད་སྙམ་བཞིན་ཡོད།

དེའི་ཕྱིར་ན་རང་གིས་ཀྱང་བསྒོམ་རྒྱུའི་སྙིང་པོ་ནི་དྲི་མ་མེད་པའི་ཤེས་རབ་དང་། སྙིང་རྗེ་ཆེན་པོ་གཉིས་ཡིན་ལ། སྐྱབས་གནས་མཐར་ཐུག་པ་དེ་དཀོན་མཆོག་གསུམ་པོ་ཡིན། ཁྱེད་རྣམས་ཀྱི་ཐུགས་ལ་འཕྲོད་ན་དེ་བཞིན་དུ་ཉམས་སུ་ལོངས། ད་རེས་ང་ནུབ་ཕྱོགས་ཀྱི་རྒྱལ་ཁབ་ལ་ལྟ་སྐོར་དུ་ཡོང་སྐབས་ཨ་རིའི་ལུང་པ་ནས་ཟླ་བ་གཉིས་འགོར་ཐལ། ཨ་རིའི་ལུང་པའི་མི་ཚང་མ་ཡང་གཤིས་ཀ་བཟང་ཞིང་། ངམ་དཀར་བ། དགོད་འཛུམ་ཅན་གྱི་མི་ཉམས་སྤྲོ་པོ་ཞིག་ཏུ་མཐོང་སོང་། དེ་བཞིན་དུ་ཁེ་ན་ཏའི་མི་རྣམས་ཀྱང་ཨ་རིའི་ཡུལ་གྱི་མི་ལྟར་ཧ་ཅང་ཉམས་སྤྲོ་དང་ལྡན་པ་ཞིག་རེད། ང་ཡང་སེམས་ཧ་ཅང་སྤྲོ་སོང་བས། དོ་ནུབ་ཡུན་རིང་པོའི་བར་དུ་ངས་རེས་འགའ་ཆོས་བཤད་པ་དང་། རེས་འགའ་ཉམས་མཚར་གྱི་སྐད་ཆ་རེ་བཤད་འདོད་ཀྱང་། ད་རེས་ངའི་ལུས་ཁམས་ལ་ཧ་ཅང་མི་བདེ་བ་ཞིག་བྱུང་འདུག་པས་དེ་ཙམ་ཞིག་མ་གཏོགས་བཤད་ཐུབ་མ་སོང་། དགོངས་འགལ་མེད་པར་ཞུ། ད་རེས་ང་ཁེ་ན་ཏའི་ས་ཁུལ་ལ་ཐོན་པའི་གནས་སྐབས་སུ། གྲོང་ཁྱེར་ཆེ་ཆུང་གི་མགོ་ཁྲིད་རྣམས་ཀྱིས་ཀྱང་། དགའ་བསུ་ཞུ་བ་ཙམ་དུ་མ་ཟད་རྗེས་མ་ཡང་ཡང་འཕྲད་པའི་སྨོན་འདུན་བཟང་པོ་ཞུས་ཐལ། དེ་བཞིན་དུ་ཁྱེད་རྣམ་པས་ཀྱང་རྣམ་འགྱུར་ཧ་ཅང་བཟང་པོས་ང་ལ་དགའ་བསུ་ཚད་མེད་བྱས་པས། ཁ་ཞེ་གཉིས་མེད་ཀྱིས་ཐུགས་རྗེ་ཆེ་ཞུ་བ་ཡིན།

མཇུག་མཐར་ཞུ་རྒྱུ་ལ། ང་ཚོ་ཚེ་འདིར་ཡང་ཡང་འཕྲད་ནས་ནང་པ་སངས་རྒྱས་པའི་ཆོས་ལ་ཉམས་ལེན་མཛད་པར་འགྱུར་བའི་སྨོན་འདུན་དང་། ཕྱི་མ་ནུབ་ཕྱོགས་བདེ་བ་ཅན་གྱི་ཞིང་ཁམས་སུ་སྐྱེས་ནས། མགོན་པོ་འོད་དཔག་མེད་ཀྱི་ཞབས་དྲུང་དུ་ལྷན་ཅིག་ཏུ་འཛོམས་པའི་སྨོན་འདུན་བཟང་པོ་ཞུས་པ་ཡིན། བཀྲ་ཤིས་བདེ་ལེགས།

དཀོན་མཆོག་གསུམ་ལ་དད་པ་བསྐྱེད་ཚུལ།

ཕྱི་ཟླ་༨པའི་ཚེས་༡༩ཉིན་གྱི་སྔ་དྲོར། ཆོས་རྗེ་ཉིད་ཤར་ཆེན་གླིང་དང་ཁ་བྲལ་ནས་ཆུ་ཚོད་གཉིས་ཙམ་ལ་རླངས་འཁོར་དུ་བཞུགས་ཏེ་རྡོ་རྗེ་འདན་མ་གླིང་（Dorje Denma Ling）དུ་ཕེབས། སློབ་གླིང་གཞིས་ཀ་（Schoolhouse）ཞེས་པའི་སྤྲོ་ཁང་དེར་བཞུགས་ཤིང་། ཆོས་རྗེ་ཉིད་ཀྱིས་ཆོས་ཚོགས་འདིར་ཉིན་བཞི་ཡི་རིང་ལ་དབང་ཁྲིད་གནང་།

རྡོ་རྗེ་འདན་མ་གླིང་ནི་གླིང་གེ་སར་རྒྱལ་པོའི་བློན་ཆེན་འདན་མའི་མཚན་ཐོག་ནས་བཏགས་པ་ཡིན་འདུག་ལ། བློན་ཆེན་འདན་མ་ནི་ཆོས་རྗེ་ཉིད་ཀྱི་སྐུ་སྐྱེ་གོང་མ་འདན་སྲས་གཡུ་འོད་འབུམ་མེའི་ཕ་ཡབ་རེད། ཆོས་ཚོགས་འདི་ནི་ཧཱ་ལི་ཧྥ་ཁི་སི་གྲོང་ཁྱེར་ནས་སྤྱི་ལེ་༡༤༠ཙམ་གྱི་མཚམས་སུ་ཡོད་པ་དང་། ཤམྦྷ་ལའི་སློབ་མ་དག་རྒྱུན་སྡོད་བྱས་ཏེ་སྒོམ་སྒྲུབ་བྱ་སའི་ལྟེ་གནས་ཤིག་ཀྱང་ཡིན་ལ། ཐཱེ་ཐཱ་མཱ་ཀའོ་ཁྲི་（Tatamagouche）ཞེས་པའི་གྲོང་རྡལ་ཞིག་གི་མངའ་ཁོངས་སུ་ཆགས་ཡོད། ས་ཆ་འདི་ནི་ལོ་སྟོང་ཕྲག་འགའ་ནས་ད་ལྟའི་བར་དུ་མེ་གླིང་གི་གདོད་མའི་མི་རིགས་ཀྱི་འདུས་སྡོད་གནས་ཡུལ་ཡིན་པར་གྲགས། གནས་འདིར་གྲོང་ཁྱེར་གྱི་འུར་ཟིང་དང་འདུ་འཛིས་དབེན་ཞིང་། ཁོར་ཡུག་ཀུན་ནགས་ཚལ་དང་སྤང་ལྗོངས་ཀྱིས་བརྒྱན་པས་ཡིད་དབང་འཕྲོག་པའི་སྒོམ་སྒྲུབ་ཉམས་ལེན་བྱ་སའི་དབེན་གནས་སྐྱིད་པོ་ཞིག་རེད།

ཕྱི་དྲོར། ཆོས་རྗེ་ཉིད་ཀྱིས་ཆོས་ཚོགས་འདིའི་སློབ་མ་དང་། ཨ་རི་དང་ཁེ་ན་ཏའི་ཕྱོགས་སོ་སོ་ནས་ཡོང་བའི་སློབ་མ་སྟོང་ཕྲག་འགའ་ལ་ཧ་ཅང་ངོ་མཚར་ཆེ་བའི་ཆོས་ཁྲིད་འདི་ལྟར་གནང་།

དེ་རིང་གང་གླེང་བར་བྱ་བའི་གཏམ་གྱི་གཞི་ནི། གཙོ་བོ་ནང་པ་སངས་རྒྱས་པའི་ཆོས་ལུགས་དང་མཐུན་པའི་གཏམ་བཤད་མདོར་བསྡུས་ཙམ་ཞིག་ཞུ་བ་ཡིན།

མཐུན་རྐྱེན་འཛོམས་པ།

འདིར་ད་རེས་ང་ཚོ་སྐལ་བ་བཟང་པོ་ཞིག་ཏུ་གྱུར་ཡོད་པ་ཤེས་དགོས། དེ་ཡང་སྐལ་བ་ཇི་ལྟར་བཟང་ཞེ་ན། སྐྱེ་བར་དཀའ་བ་ལྷོ་རྒྱལ་འཛམ་བུ་གླིང་དུ་སྐྱེས་པས་ཡིན། འཛམ་བུ་གླིང་ཤིན་ཏུ་ཕུན་སུམ་ཚོགས་པ་ཡིན་པའི་རྒྱུ་མཚན་ཡང་། དཔེར་ན་ཤར་ལུས་འཕགས་པོ་དང་། ནུབ་བ་ལང་སྤྱོད། བྱང་སྒྲ་མི་སྙན་སོགས་མིའི་ཡུལ་གཞན་མང་པོ་ཡོད་པ་དེ་དག་ལ། ལོངས་སྤྱོད་དང་བདེ་སྐྱིད་ནི་ཕུན་སུམ་ཚོགས་པ་ཡོད་ཀྱང་དམ་པའི་ཆོས་སྒྲུབ་པའི་སྐལ་བ་མེད་པས། འཛམ་བུ་གླིང་ནི་དེ་དག་ལས་ཁྱད་པར་དུ་འཕགས་པ་ཡིན་པར་ཤེས་དགོས།

འཛམ་བུ་གླིང་འདིར་མི་ལུས་རིན་པོ་ཆེ་ཐོབ་པ་འདི་ནི་ཧ་ཅང་རྙེད་པར་དཀའ་བ་དང་། རྙེད་པ་དེ་ཡང་སྐལ་བ་བཟང་པོ་མཆོག་ཏུ་གྱུར་བ་ཡིན་པ་ཤེས་དགོས། དེ་ཡང་གཙོ་བོ་དམྱལ་བ་དང་ཡི་དྭགས། དུད་འགྲོ། ལྷ་མ་ཡིན་ལ་སོགས་པའི་གནས་སུ་སྐྱེ་བར་གྱུར་ན་སྡུག་བསྔལ་བཟོད་དུ་མེད་ཅིང་། དམ་པའི་ཆོས་ལ་ལོངས་སྤྱོད་པའི་གོ་སྐབས་ཀྱང་མེད་པའི་ཕྱིར་ན་ཧ་ཅང་ཐ་ཆད་པ་ཡིན། ལྷ་ཡི་ཡུལ་ཞེས་བྱ་བར་ཤིན་ཏུ་ངོ་མཚར་ཞིང་བདེ་སྐྱིད་ཕུན་སུམ་ཚོགས་པ་ཡོད་ཀྱང་། དེ་ལ་སྐྱེས་ན་རྟག་ཏུ་བག་མེད་འབའ་ཞིག་གིས་གཡེངས་ཏེ་ཆོས་སྒྲུབ་པའི་སྐལ་བ་མེད་པས། དེ་ཡང་མི་ལུས་ཐོབ་པ་འདིའི་ཕྱོགས་ཙམ་ལ་ཉེ་བ་མིན།

དེར་མ་ཟད་སངས་རྒྱས་ཀྱི་གསུང་དེ་ལ་ཉན་ཐོས་ཀྱི་ཆོས་དང་བྱང་ཆུབ་སེམས་དཔའི་ཆོས། སྔགས་ཀྱི་ཆོས་ཞེས་རྣམ་པ་གསུམ་གསུངས་ཡོད་པ་དེ་དག མི་ཡི་ལུས་རྟེན་འདིར་བསྒྲུབ་ན་འགྲུབ་པ་དང་སྒྲུབ་པའི་སྐལ་བའང་ཡོད་པ་ཡིན། ལྷ་ལ་སོགས་པའི་འགྲོ་བ་གཞན་ལ་ནི། ལུས་རྟེན་དེར་ལམ་ཆ་ཚང་ཞིག་འགྲུབ་ཐབས་མེད་ལ་སྒྲུབ་པའི་སྐལ་བའང་མེད་པས་ན་མི་ལུས་ནི་ཧ་ཅང་རྙེད་པར་དཀའ་བ་ཡིན། སྟོན་པ་བཅོམ་ལྡན་འདས་རྗེས་འབྲང་དང་བཅས་པ་ཐམས་ཅད་ཀྱིས། ལྷ་ལས་ལྷག་པའི་ལུས་ཞེས་ཆེད་དུ་བསྔགས་བརྗོད་མཛད་ས་དེའང་མི་ལུས་རིན་པོ་ཆེ་ཡིན། ད་ལྟ་རང་རེ་རྣམས་ལ་མི་ལུས་འདི་ཐོབ་པར་དགའ་སྤྲོ་ཁྱད་པར་ཅན་བསྐྱེད་དགོས།

སངས་རྒྱས་འཇིག་རྟེན་དུ་འབྱུང་བ་དེ་ཡང་ཤིན་ཏུ་རྙེད་པར་དཀའ་བ་ཞིག་སྟེ། སངས་རྒྱས་འཇིག་རྟེན་དུ་བྱོན་པའི་དུས་ཚོད་ལ་སྒྲོན་མེའི་བསྐལ་པ་ཞེས་བྱ་བ་དང་། སངས་རྒྱས་འཇིག་རྟེན་དུ་མ་བྱོན་པའི་དུས་ཚོད་ལ་མུན་པའི་བསྐལ་པ་ཞེས་ཟེར་བ་ཡིན། དེ་ཡང་མུན་པའི་བསྐལ་པ་ཞེས་པ་ཡང་ནས་ཡང་དུ་གྲངས་མང་པོ་ཞིག་འབྱུང་བ་དང་། སྒྲོན་མེའི་བསྐལ་པ་ཞེས་སངས་རྒྱས་འཇིག་རྟེན་དུ་བྱོན་པའི་བསྐལ་པ་བཟང་པོ་དེ་ནི་རེ་འགའ་ཙམ་མ་གཏོགས་མི་འབྱུང་བས་ཧ་ཅང་དཀོན་མོ་ཡིན། སངས་རྒྱས་འཇིག་རྟེན་དུ་བྱོན་པ་དེ་ལྟ་བུའི་རྙེད་པར་དཀའ་བ་ཡིན་པའི་རྒྱུ་མཚན་ཡང་། འགྲོ་བ་རྣམས་ཀྱིས་དམ་པའི་ཆོས་ཉམས་སུ་ལེན་པའི་སྐལ་བ་བཟང་པོའི་དུས་ཚོད་དེ་ཧ་ཅང་དཀོན་པའི་རྒྱུ་མཚན་གྱིས་སངས་རྒྱས་མི་བྱོན་པ་རེད།

ད་ལྟ་སངས་རྒྱས་འཇིག་རྟེན་དུ་བྱོན་པར་མ་ཟད། ཆོས་ཀྱི་འཁོར་ལོ་རིམ་པ་གསུམ་ཡང་བསྐོར་ནས། བསྟན་པ་མ་ནུབ་པར་གནས་པའི་སྒང་ཡིན་པ་འདི་ནི་ཧ་ཅང་རྙེད་པར་དཀའ་བ་དང་སྐལ་བ་བཟང་པོ་ཡིན་ཞིང་དགའ་སྤྲོ་བྱ་བའི་འོས་སུ་གྱུར་པ་ཡིན།

སངས་རྒྱས་ཀྱིས་ཆོས་གསུངས། བསྟན་པ་གནས་སུ་ཟིན་ཀྱང་། དོན་མ་ནོར་བར་སྟོན་པའི་བླ་མ་དགེ་བའི་བཤེས་གཉེན་དང་འཕྲད་དགོས་མ་གཏོགས། གལ་ཏེ་བླ་མ་དང་མ་འཕྲད་ན། རང་སྟོབས་ཀྱིས་སངས་རྒྱས་ཀྱི་གསུང་རྣམས་ཉམས་སུ་ལེན་པའི་ཐབས་མི་ཤེས་པས། བླ་མ་དགེ་བའི་བཤེས་གཉེན་དང་འཕྲད་ཅིང་། བླ་མས་སངས་རྒྱས་ཀྱི་གསུང་རྣམས་ཚུལ་བཞིན་ཉམས་སུ་ལེན་པའི་ཐབས་སྟོན་པ་དེ་ཡང་ཆེས་དཀོན་པ་ཡིན། ད་ལྟ་ང་ཚོ་ཚང་མར་དེ་ལྟ་བུའི་མཐུན་རྐྱེན་ཚང་བ་སྟེ། སྐྱེ་བར་དཀའ་བ་ལྷོ་འཛམ་བུ་གླིང་དུ་སྐྱེས། བྱོན་པར་དཀའ་བ་སངས་རྒྱས་འཇིག་རྟེན་དུ་བྱོན། གསུང་བར་དཀའ་བ་དམ་པའི་ཆོས་ཀྱང་གསུངས། དམ་པའི་ཆོས་གསུངས་བར་མ་ཟད་བསྟན་པའང་ད་དུང་མ་ནུབ་པར་གནས། དེ་སྟོན་པའི་བླ་མ་དང་འཕྲད། བླ་མ་དང་འཕྲད་པར་མ་ཟད་བླ་མས་ཆོས་སྟོན་པའི་སྐལ་བ་བཟང་པོ་འདི་ནི། ཨུ་དུམ་ཝཱ་ར་འཇིག་རྟེན་དུ་འབྱུང་དཀའ་བ་ལས་ཀྱང་ཤིན་ཏུ་དཀའ་བ་ཡིན་པར་ཤེས་ཏེ་དགའ་སྤྲོ་སྒོམ་དགོས།

དད་པ་གསུམ།

གཞན་ངོས་ནས་དེ་ལྟ་བུའི་མཐུན་རྐྱེན་འཛོམས་པའི་གནས་སྐབས་འདིར། རང་ངོས་ནས་དད་པ་ཕུན་སུམ་ཚོགས་པ་ཞིག་ནི། རང་རྒྱུད་ལ་མེད་ཐབས་མེད་པ་ལྟ་བུར་གྱུར་ཡོད། དད་པ་དེ་ཡང་ཇི་ལྟ་བུ་ཡིན་ཞེ་ན། དད་པ་ལ་དབྱེ་ན་དང་བའི་དད་པ་དང་། འདོད་པའི་དད་པ། ཡིད་ཆེས་པའི་དད་པ་སྟེ་རྣམ་པ་གསུམ་ཡོད། དེ་ལྟ་བུའི་དད་པ་དེ་ཡང་། སངས་རྒྱས་དཀོན་མཆོག་ལ་དམིགས་ཏེ་དང་བའི་དད་པ་དང་། ཆོས་དཀོན་མཆོག་ལ་དམིགས་ཏེ་འདོད་པའི་དད་པ། དགེ་འདུན་དཀོན་མཆོག་ལ་དམིགས་ཏེ་ཡིད་ཆེས་པའི་དད་པ་སྟེ་རྣམ་པ་གསུམ་བསྐྱེད་དགོས།

དང་པོ་སངས་རྒྱས་ལ་དམིགས་པའི་དང་བའི་དད་པ།

སངས་རྒྱས་ལ་དམིགས་ཏེ་དགའ་བ་དང་སྤྲོ་བ་ཁྱད་པར་ཅན་སྐྱེས་པ་ལ་དང་བའི་དད་པ་ཟེར་བ་ཡིན། དེ་ལྟ་བུའི་སངས་རྒྱས་ལ་དགའ་བ་ཁྱད་པར་ཅན་བསྐྱེད་དགོས་པའི་རྒྱུ་མཚན་ནི། འཇིག་རྟེན་གྱི་ཁམས་འདིར་དབང་ཕྱུག་དང་། ཁྱབ་འཇུག ཚངས་པ་ལ་སོགས་མང་པོ་ཞིག་བྱོན་མྱོང་ཡང་། དེ་དག་གང་དང་ཡང་མི་འདྲ་བའི་བཅོམ་ལྡན་འདས་ལ་ཡོན་ཏན་རྨད་དུ་བྱུང་བ་ཡོད་པའི་རྒྱུ་མཚན་གྱིས་དེ་ལ་དགའ་བ་བསྐྱེད་དགོས་པ་ཡིན། བཅོམ་ལྡན་འདས་ལ་དེ་དག་དང་མི་འདྲ་བའི་ཡོན་ཏན་ཇི་ལྟ་བུ་ཡོད་ཅེ་ན། དཔེར་ན་ས་ལ་གནས་པའི་བྱང་ཆུབ་སེམས་དཔའ་ཆེན་པོ་ཞིག་གིས། བཅོམ་ལྡན་འདས་ཀྱི་ཡོན་ཏན་རྐྱང་པ་ལོ་འབུམ་ཕྲག་དུ་མར་བཤད་ནའང་། བཅོམ་ལྡན་འདས་ཀྱི་ཡོན་ཏན་ཆ་ཚང་བ་ཞིག་ནམ་ཡང་བཤད་མི་ཐུབ།

སྤྱིར་བཅོམ་ལྡན་འདས་ལ་ཡོན་ཏན་ཚད་མེད་པ་ཡོད། དེ་དག་ཆ་ཚང་བ་ཞིག་མ་ཤེས་ཀྱང་། རང་ཅག་རྣམས་ལ་ཉེ་བར་མཁོ་བ་དང་། རང་རེ་རྣམས་ལ་མེད་དུ་མི་རུང་བའི་བཅོམ་ལྡན་འདས་ཀྱི་ཡོན་ཏན་དེ་ཤེས་དགོས། རང་ཅག་ལ་ཉེ་བར་མཁོ་བའི་ཡོན་ཏན་དེ་གང་ཡིན་ཞེ་ན། གནས་སྐབས་ལྷ་དང་མིའི་བདེ་བ་ཕུན་སུམ་ཚོགས་པ་སྒྲུབ་པ་དང་། མཐར་ཐུག་ཡོན་ཏན་མཐའ་དག་རྫོགས་པའི་སངས་རྒྱས་ཀྱི་གོ་འཕང་སྒྲུབ་པའི་ཐབས་ཤེས་དགོས་པ་ཡིན།

བཅོམ་ལྡན་འདས་ལ་ཡོན་ཏན་མང་པོ་ཞིག་ཡོད་དུ་ཟིན་ཀྱང་། རང་ཅག་རྣམས་ལ་ཕན་པ་མེད་ན། དེ་ལ་དགའ་ཞིང་སྤྲོ་བ་སྐྱེ་དགོས་དོན་ཡོད་པ་མ་རེད། དཔེར་ན། འཇིག་རྟེན་གྱི་ཁམས་འདིར་རྒྱལ་པོ་དབང་ཆེ་བ་ཆེས་མང་པོ་ཞིག་ཡོད་ཀྱང་། རང་རེ་རྣམས་ལ་ཕན་པ་མེད་ན་དེ་ལ་དགའ་སྤྲོ་ཅི་ལ་བྱེད། རྒྱལ་པོ་གང་ཞིག་གིས་རང་ཅག་རྣམས་ལ་ཕན་པ་ཡོད་ན། དེ་ལྟ་བུའི་རྒྱལ་པོ་ལ་ལྷག་པར་དགའ་དགོས་པ་ལྟ་བུ་ཡིན། དེས་ན་བཅོམ་ལྡན་འདས་ཀྱི་ཡོན་ཏན་དེ་ཡང་། རང་ཅག་རྣམས་ལ་ཕན་པའི་ཆེད་དུ་ཡིན་པ་ངེས་པར་དུ་ཤེས་དགོས་པ་ཡིན། རང་ཅག་ལ་ཉེ་བར་མཁོ་བའི་བཅོམ་ལྡན་འདས་ཀྱི་ཡོན་ཏན་དེ་གང་ཡིན་ཞེ་ན། མཁྱེན་པའི་ཡོན་ཏན་དང་། བརྩེ་བའི་ཡོན་ཏན། ནུས་པའི་ཡོན་ཏན་ཏེ་གསུམ་ཡོད།

དེ་ཡང་བཅོམ་ལྡན་འདས་ཀྱིས་མཐའ་ཡས་པའི་སེམས་ཅན་ཐམས་ཅད་བདེ་བ་ལ་འགོད་པའི་ཐབས་དང་། སྡུག་བསྔལ་ལས་སྲུང་བའི་ཐབས་མ་ཤེས་ན། བཅོམ་ལྡན་འདས་ཀྱིས་སེམས་ཅན་ལ་ཕན་པ་སྒྲུབ་མི་ཐུབ་ནའང་། བཅོམ་ལྡན་འདས་ནི་ཤེས་བྱ་ཐམས་ཅད་མ་ལུས་པར་མཁྱེན་པའི་བདག་ཉིད་ཅན་ཡིན། དེས་ན་བཅོམ་ལྡན་འདས་ལ་མཁྱེན་པའི་ཡོན་ཏན་ཚད་མེད་པ་ཡོད་དུ་ཟིན་ཀྱང་། བརྩེ་བའི་ཡོན་ཏན་ཡོད་དགོས་མ་གཏོགས། གལ་ཏེ་བརྩེ་བའི་ཡོན་ཏན་མེད་ན་གདུལ་བྱ་ལ་ཕན་འདོགས་པའི་ཐབས་མེད་དེ། དཔེར་ན་མི་ཞིག་ལ་ཤེས་ཡོན་བསམ་གྱིས་མི་ཁྱབ་པ་ཡོད་ཀྱང་། མི་དེ་གཞན་ལ་བསམ་པ་ནག་པོ་དང་སྦྱོར་བ་རྩུབ་མོ་ཅན་ཞིག་ཡིན་ན། དེས་གཞན་ལ་ཕན་པ་སྒྲུབ་མི་སྲིད་པས་བརྩེ་བའི་ཡོན་ཏན་དེ་ཡོད་དགོས།

བཅོམ་ལྡན་འདས་ལ་བརྩེ་བའི་ཡོན་ཏན་ཇི་ལྟ་བུ་ཡོད་ཅེ་ན། དཔེར་ན། བུ་གཅིག་པུ་ལས་མེད་པའི་མ་དེ་བུ་ལ་བརྩེ་བ་ལས་བརྒྱ་འགྱུར་སྟོང་འགྱུར་དུ་ལྷག་པའི་གདུལ་བྱ་ལ་བརྩེ་བ་དེ་བཅོམ་ལྡན་འདས་ལ་མངའ་བ་རེད། དེ་ཡང་མ་ལས་ལྷག་པའི་བརྩེ་བ་ཇི་ལྟར་ཡོད་ཅེ་ན། བཅོམ་ལྡན་འདས་སྔོན་སློབ་པ་ལམ་གྱི་གནས་སྐབས་དང་། མངོན་པར་རྫོགས་པར་སངས་རྒྱས་པའི་དུས་སྐབས་ཐམས་ཅད་དུ། རང་གི་ལུས་དང་སྲོག་ལའང་མི་བལྟ་བར་སེམས་ཅན་གྱི་དོན་མཛད་པ་རེད།

དེ་ཡང་བཅོམ་ལྡན་འདས་ཀྱིས་སྔོན་གྱི་གནས་སྐབས་ན། རང་གི་སྐུ་སྲོག་ལ་མ་ལྟོས་པར་སེམས་ཅན་གྱི་དོན་ཇི་ལྟར་མཛད་སྙམ་ན། བཅོམ་ལྡན་འདས་ཀྱིས་ཆོས་འཁོར་དང་པོ་སྐོར་ས་ཡུལ་ཝཱ་ར་ནཱ་སིའི་དྲང་སྲོང་ལྷུང་བ་རི་དྭགས་ཀྱི་ནགས་སུ། སེམས་ཅན་མང་པོར་ཕན་པ་དང་བདེ་བ་འབྱུང་བའི་ཆེད་དུ། བཅོམ་ལྡན་འདས་ཀྱིས་དབུ་ཡང་ལན་འབུམ་ཕྲག་མང་པོར་སྦྱིན་པ་བཏང་བ་ཡིན་ཞེས་བཅོམ་ལྡན་འདས་རང་ཉིད་ཀྱིས་ཞལ་གྱིས་བཞེས་པ་རེད། བཅོམ་ལྡན་འདས་ཀྱིས་སེམས་ཅན་གྱི་དོན་དུ་སྐུ་སྲོག་བཏང་བ་དེ་ཡང་། ཡུལ་ཝཱ་ར་ནཱ་སི་རྐྱང་པ་ཙམ་མ་ཡིན་པར་འཛམ་བུ་གླིང་གི་ས་ཆ་གཞན་དང་། འཛམ་བུ་གླིང་ལས་གཞན་པའི་ཡུལ་ཁམས་མང་པོར། སེམས་ཅན་གྱི་དོན་ལ་བཅོམ་ལྡན་འདས་ཀྱིས་སྐུ་སྲོག་ལན་མང་པོའི་བར་དུ་སྦྱིན་པ་བཏང་ཡོད་པ་རེད།

དེ་བཞིན་བཅོམ་ལྡན་འདས་ཀྱི་བརྩེ་བ་ཡང་ཕྱོགས་རིས་ཅན་མིན་ཏེ། དཔེར་ན་རང་གི་ཉེ་ས་རྩ་ས་མཐུན་ས་དག་དང་། བཅོམ་ལྡན་འདས་ལ་དགའ་བ་དང་གུས་པ་ཡོད་པ་ཐམས་ཅད་ལ་བརྩེ་བ་དང་། གཞན་རྣམས་ལ་བརྩེ་བ་མེད་ན། དེ་ལྟ་བུ་ནི་བརྩེ་བ་ཕྱོགས་རིས་ཅན་ཡིན་ནའང་། བཅོམ་ལྡན་འདས་ཀྱི་བརྩེ་བ་ནི་དེ་ལྟ་བུའི་ཕྱོགས་སུ་མ་ཆད་པ་ཞིག་ཡིན། དེ་ཡང་ཇི་ལྟར་ཡིན་ཞེ་ན། བཅོམ་ལྡན་འདས་དངོས་སུ་བཞུགས་པའི་དུས་སུ། སྐུའི་གཡས་ཕྱོགས་ནས་ལྷ་དབང་བརྒྱ་བྱིན་གྱིས་ཙནྡན་གོར་ཤིརྵའི་ཆུ་ཡིས་གུས་འདུད་ཀྱི་སྒོ་ནས་ཁྲུས་བྱེད་པ་དང་། སྐུའི་གཡོན་ཕྱོགས་ནས་བསམ་པ་ངན་པའི་སྒོ་ནས། བདུད་ལྷས་སྦྱིན་གྱིས་མཚོན་གྱིས་བསྣུན་པ་ན། དེ་གཉིས་ཀར་བཅོམ་ལྡན་འདས་ཀྱིས་ཐུགས་བརྩེ་ཚུལ་ལ་ཁྱད་པར་གང་ཡང་མེད་པར། གཉིས་ཀ་ཕན་དང་བདེ་བའི་གནས་ལ་དགོད་པར་བྱེད་པ་ཡིན། བཅོམ་ལྡན་འདས་ཀྱི་བརྩེ་བ་དེ་ཡང་། གང་ཟག་རིགས་མཐོ་བ་དང་ལོངས་སྤྱོད་ཅན་རྣམས་ལ་བརྩེ་བ་ཡོད་པ་དང་། དམན་པ་རྣམས་ལ་བརྩེ་བ་མེད་པ་ཞིག་ཡིན་ན། བརྩེ་བ་དེ་ལྟ་བུ་ནི་ཕྱོགས་སུ་ལྷུང་བ་ཡིན་ནའང་། དེ་ཙམ་མ་ཡིན་པར་བཅོམ་ལྡན་འདས་ཀྱི་བརྩེ་བ་ནི། མཐོ་བ་ལས་ཀྱང་དམན་པ་ཉམ་ཐག་པའི་སེམས་ཅན་རྣམས་ལ་ལྷག་པར་ཐུགས་བརྩེ་བའི་བདག་ཉིད་ཅན་ཡིན།

བཅོམ་ལྡན་འདས་ཀྱི་བརྩེ་བ་ནི། དེང་དུས་ཀྱི་ཆབ་སྲིད་མཁན་གྱི་བརྩེ་བ་ལྟ་བུའི་རྒྱ་ཆུང་བ་ཞིག་ནམ་ཡང་མིན། དེང་སང་གི་ཆབ་སྲིད་མཁན་ཇི་ལྟ་བུ་ཡིན་ཞེ་ན། ཆབ་སྲིད་སྒྲུབ་མཁན་གྱི་མི་དེས་མི་བརྒྱ་སྟོང་མང་པོ་འོང་ན། སྐབས་དེར་རང་གི་ཁེ་ཕན་ལ་དམིགས་ཏེ་བརྩེ་བ་དང་དགའ་ཚོར་ཆེན་པོ་ཡོད་པ་ལྟ་བུའི་རྣམ་འགྱུར་སྟོན་ཡང་། ཉམ་ཐག་པའི་མི་རེ་ཟུང་གི་དོན་དུ་དགའ་ཚོར་དང་ཕན་པ་མི་བྱེད་པ་ཡིན། བཅོམ་ལྡན་འདས་ཀྱི་མཛད་པ་ནི། ཉམ་ཐག་པའི་སེམས་ཅན་གཅིག་གི་དོན་དུའང་། ཁོང་གི་སྐུ་སྲོག་ལན་མང་གཏོང་དགོས་ཀྱང་ཕངས་སེམས་ཅི་ཡང་མེད་པ་དང་། ལོ་དུང་ཕྱུར་མང་པོའི་རིང་ལ་སེམས་ཅན་གཅིག་གི་ཆེད་དུ་དཀའ་བ་མཛད་དགོས་ནའང་། བཅོམ་ལྡན་འདས་ཀྱི་ཐུགས་ལ་སྐྱོ་བ་མེད་པར་བརྩེ་བའི་སྙིང་རྗེ་ཕུལ་བྱུང་མངའ་བ་ཞིག་ཡིན།

དེ་ལྟར་ཡིན་པའི་རྒྱུ་མཚན་ཡང་། སྔོན་བཅོམ་ལྡན་འདས་དམྱལ་བའི་ཡུལ་དུ་གྱད་པཀྵི་ཏ་ཞེས་པའི་བྱང་ཆུབ་སེམས་དཔའི་སྐྱེ་བ་བཞེས་ཤིང་། སྐབས་དེར་ཁོང་ལ་གྲོགས་ཀཱ་མ་རུ་པ་ཟེར་བ་ཞིག་ཡོད། དམྱལ་བའི་ལས་མཁན་དག་གི་ཤིང་རྟ་ཁོང་གཉིས་ཀྱི་སྐེ་ལ་བཏགས་ཏེ་འདྲུད་དགོས་པར་མ་ཟད། ཁོང་གཉིས་དམྱལ་བའི་ལས་མཁན་གྱིས་གཅར་རྡུང་བྱེད་སྐབས། བྱང་ཆུབ་སེམས་དཔའི་བསམ་པ་ལ། ང་ལ་སྡུག་བསྔལ་བྱུང་ཡང་སླ་ཡི། གྲོགས་པོ་འདི་བདེ་བར་གནས་པའི་ཐབས་ཤིག་ཨེ་ཡོད་སྙམ་སྟེ། ལས་མཁན་ཆེན་པོ་བདག་ལ་གསོན་ཅིག གྲོགས་པོའི་ལས་སྐལ་བདག་གཅིག་པུས་ལེན་རྒྱུ་ཡིན། ཤིང་རྟའི་ཐག་པ་ངའི་སྐེ་ལ་ཐོགས་དང་ང་གཅིག་པུས་འདྲུད་རྒྱུ་ཡིན། གྲོགས་པོ་འདི་བདེ་བར་སྡོད་དུ་འཇུག་རོགས་ཞེས་ཞུས་ཚེ། དམྱལ་བའི་སྲུང་མ་དེ་ཞེ་སྡང་དྲག་པོ་ལངས་ཏེ། དམྱལ་བའི་སེམས་ཅན་རྣམས་ཀྱིས་རང་རང་གི་ལས་སྐལ་མྱོང་དགོས་པས། དེ་ལ་བགོ་བཤའ་སུ་ཞིག་གིས་བྱེད་ཅེས་མགོ་ལ་ཐོ་བས་བསྣུན་མ་ཐག་ཏུ། བྱང་ཆུབ་སེམས་དཔའ་ཚེ་འཕོས་ཏེ་སུམ་ཅུ་རྩ་གསུམ་དུ་སྐྱེས་པའི་ལོ་རྒྱུས་ཡོད། དེར་མ་ཟད་བཅོམ་ལྡན་འདས་སྐུ་ཚེ་གང་པོར་འགྲན་ཟླར་བཟུང་སྟེ་གནོད་པ་རྩོམ་མཁན་ལྷས་བྱིན་ཟེར་བ་དེས། ཚེ་རབས་སྔ་མ་སྔ་མ་རྣམས་སུ་དུས་རྟག་ཏུ་བཅོམ་ལྡན་འདས་ལ་གནོད་པ་འབའ་ཞིག་བརྩམས་ཤིང་། སྐུ་ཚེ་དེ་ལའང་གནོད་པ་འབའ་ཞིག་རྩོམ་པར་བྱས་ནའང་། ལྷས་སྦྱིན་གྱི་ཆེད་དུ་བཅོམ་ལྡན་འདས་ཀྱིས་སྐུ་སྲོག་ལ་མ་འཛེམ་པར་ཕན་པ་མཛད་པའི་ཚུལ་དེ་ནི་སུས་ཀྱང་གཞལ་མི་ནུས་པ་ལྟ་བུ་རེད།

དེས་ན་བཅོམ་ལྡན་འདས་ལ་དེ་ལྟ་བུའི་མཁྱེན་པ་དང་བརྩེ་བའི་ཡོན་ཏན་ཡོད་དུ་ཟིན་ཀྱང་། ནུས་པའི་ཡོན་ཏན་ཡོད་དགོས་པ་རེད་མ་གཏོགས། ནུས་པའི་ཡོན་ཏན་མེད་ན་མཁྱེན་བརྩེ་རྐྱང་པས་གར་ཡང་མི་ཕྱིན། ནུས་པའི་ཡོན་ཏན་མེད་ན། དཔེར་ན་མ་རྒན་མིག་དང་ལག་པ་མེད་པ་ཞིག་གིས་རང་གི་བུ་ཆུས་ཁྱེར་སོང་ན། དེ་ལ་སྙིང་རྗེ་བསམ་གྱིས་མི་ཁྱབ་པ་ཞིག་ཡོད་དུ་ཟིན་ཀྱང་། བུ་ཆུ་བོ་ལས་སྒྲོལ་མི་ཐུབ་པ་བཞིན་དུ་ནུས་པ་མེད་ན་སེམས་ཅན་རྣམས་ལ་སྙིང་བརྩེ་བ་ཙམ་གྱིས་ཕན་ཐོགས་ཡོད་པ་དཀའ་མོ་ཡིན་ཡང་། བཅོམ་ལྡན་འདས་ལ་ནུས་པ་ཇི་ལྟ་བུ་ཡོད་ཅེ་ན། ཁོང་ལ་སྐུའི་ནུས་པ་དང་། གསུང་གི་ནུས་པ། ཐུགས་ཀྱི་ནུས་པ་སྟེ་གསུམ་ཡོད།

དེ་ཡང་བཅོམ་ལྡན་འདས་ཀྱི་སྐུ་ལ་ནུས་པ་ཇི་ལྟ་བུ་ཡོད་ཅེ་ན། བཅོམ་ལྡན་འདས་ཀྱི་ཞལ་མཇལ་བ་ཙམ་གྱིས་སྲིད་པ་ཁམས་གསུམ་འཁོར་བའི་སྡུག་བསྔལ་ལས་གྲོལ་ཏེ། གཏན་དུ་བདེ་བ་ཞི་བའི་གོ་འཕང་ལ་སྦྱོར་བར་བྱེད་པ་ཡིན། བཅོམ་ལྡན་འདས་ཀྱི་སྐུ་དངོས་མཐོང་ན་དེ་ལྟ་བུའི་ཕན་ཡོན་ཡོད་ན་ཡང་། ད་ལྟ་རང་ཅག་ལ་དེ་ལྟ་བུའི་ཡོན་ཏན་འབྱུང་ངམ་ཞེ་ན། དེ་ཡང་འབྱུང་བ་ཡིན། ཇི་ལྟར་འབྱུང་ཞེ་ན་བཅོམ་ལྡན་འདས་རང་ཉིད་ཀྱི་ཞལ་ནས། སྐུ་གཟུགས་རྣམ་པ་མང་པོ་དེར་སྤྲུལ་ཏེ། །འགྲོ་བ་དགེ་ལ་སྦྱོར་བའི་དོན་བྱེད་དོ། །ཞེས་གསུངས་པ་ལྟར། བཅོམ་ལྡན་འདས་གང་ཉིད་བླུགས་སྐུ་དང་བྲིས་སྐུ་སོགས་སྐུ་གཟུགས་འདྲ་མིན་རྣམ་པ་སྣ་ཚོགས་སུ་སྤྲུལ་ཏེ། སེམས་ཅན་རྣམས་ཀྱི་དོན་མཛད་པར་བྱེད་པ་ཡིན།

བཅོམ་ལྡན་འདས་ཀྱི་གསེར་སྐུ་དང་ས་སྐུ། ཤིང་སྐུ། རྡོ་སྐུ་སོགས་གང་ཡིན་ཡང་ཆོག དེ་དག་ལ་ཕྱག་འཚལ་བ་དང་། མཆོད་པ་འབུལ་བ། སྨོན་ལམ་འདེབས་པ་སོགས་བྱས་ན། བཅོམ་ལྡན་འདས་དངོས་ལ་ཕྱག་མཆོད་བྱས་པ་དང་ཁྱད་པར་མེད་ཚུལ་མདོ་སྡེ་རྣམས་སུ་གསུངས་ཡོད། བྲིས་སྐུ་ལ་བསམ་བློ་བཏང་ན། བཅོམ་ལྡན་འདས་ཀྱི་སྐུ་གཟུགས་དེ་རི་མོ་ཤིན་ཏུ་མཛེས་པ་ཡིན་ནའང་འདྲ། ཐ་ཆད་པ་ཡིན་ནའང་འདྲ། གང་ལྟར་དེ་མཇལ་བའི་གང་ཟག་ཐམས་ཅད་ལ་ཕན་པ་དང་བདེ་བ་བསམ་གྱིས་མི་ཁྱབ་པ་འབྱུང་བ་ཡིན།

དེ་ལྟར་བཅོམ་ལྡན་འདས་ཀྱི་སྐུ་གཟུགས་ལ་དད་པ་དང་གུས་པས་མཇལ་ན་བསོད་ནམས་བསམ་གྱིས་མི་ཁྱབ་པ་ཡོད་པ་སྨོས་མ་དགོས། དེར་མ་ཟད་སེམས་ཞེ་སྡང་དང་བཅས་བཅོམ་ལྡན་འདས་ཀྱི་སྐུ་གཟུགས་ལ་བལྟས་ན་ཡང་། དེའི་བསོད་ནམས་ཀྱི་སྟོབས་ཀྱིས། ཡུན་རིང་པོ་མི་དགོས་པར་ནམ་ཞིག་སངས་རྒྱས་ཀྱི་གོ་འཕང་འཐོབ་པར་མདོ་སྡེ་རྣམས་ལས་གསལ་པོར་གསུངས་ཡོད།

བཅོམ་ལྡན་འདས་ཀྱི་གསུང་གི་ཡོན་ཏན་ལ་བསམ་བློ་བཏང་ན། སྔོན་བཅོམ་ལྡན་འདས་དངོས་སུ་བཞུགས་པའི་སྐབས་གསུང་དངོས་སུ་ཐོས་པའམ། ཡང་ན་ད་ལྟའི་གནས་སྐབས་སུ་བཅོམ་ལྡན་འདས་ལ་དད་པས་གསོལ་བ་རྩེ་གཅིག་ཏུ་བཏབ་སྟེ་ཞལ་དངོས་སུ་མཇལ་བའམ། ཉམས་སྣང་དང་རྨི་ལམ་དུ་མཇལ་ནས་ཆོས་གསན་པ་དེ་དག་ཐམས་ཅད་ཀྱང་། མྱུར་བ་ཉིད་དུ་ཡོན་ཏན་ཁྱད་པར་ཅན་དུ་གྱུར་ཏེ་སངས་རྒྱས་ཀྱི་གོ་འཕང་འཐོབ་པར་འགྱུར་བ་རེད། ༼ང་ལ་སྐད་སྦུག་བཞག་མི་འདུག་སྙམ་ཡང་། འདིར་བཞག་འདུག ངས་མ་གོ། སྐོབ་སྒྲ་སྒྲོག་མཁན་ཁྱེད་གཉིས་རེད་དམ་ང་རེད། ང་ཡིན་ས་རེད་པ། ངས་ཧ་མ་གོ། སྐད་སྦུག་མི་འདུག་སྙམ་ཏེ་སྐད་ཆེར་བཀྱགས་ཀྱང་། སྐོབ་སྐོབ་ཀྱི་སྒྲ་བྱུང་། དེ་ང་རང་གི་ཟུར་ནས་སྐོབ་སྒྲ་བྱུང་བ་ཡིན་འདུག༽ དེར་མ་ཟད་བཅོམ་ལྡན་འདས་ཀྱི་གསུང་ད་ལྟ་ཡིག་ཐོག་ན་བཀོད་ཡོད་པའི་ཆོས་དེ་ཡང་། དངོས་སུ་ཐོས་ན་ཕན་ཡོན་བསམ་གྱིས་མི་ཁྱབ་པ་ངན་སོང་གི་སྐྱེ་སྒོ་ཁེགས་པ་དང་། དེ་བཞིན་ཚེ་རིང་བ་དང་ནད་མེད་པ་ལོངས་སྤྱོད་ཆེ་བ་སོགས་སྨྲོས་མ་དགོས་པ་ཡིན། ངེད་ཅག་ལྟ་བུའི་བཅོམ་ལྡན་འདས་ཀྱི་གསུང་ལ་དངོས་སུ་ཉན་པའི་སྐལ་བ་མེད་པ་དང་། བྱ་དང་རི་དྭགས་ལ་སོགས་པ་ལྟ་བུ་ཞིག་ཡིན་ནའང་། བཅོམ་ལྡན་འདས་ཀྱིས་ཆོས་གསུང་བའི་དུས་སྐབས་བསྟན་པའི་ཆེད་དུ། རྔའམ་དུང་སོགས་བུས་པའི་སྒྲ་ཐོས་ན་དེ་ཡང་རིང་པོར་མི་ཐོགས་པར་འཁོར་བའི་སྡུག་བསྔལ་ལས་ཐར་བར་འགྱུར་བ་ཡིན།

བཅོམ་ལྡན་འདས་ཀྱི་ཐུགས་ཀྱི་ཡོན་ཏན་དེ་ཇི་ལྟ་བུ་ཡིན་ཞེ་ན། བཅོམ་ལྡན་འདས་ཀྱིས་བརྩེ་བའི་ཐུགས་རྗེ་ཆེན་པོ་དང་ཕྲིན་ལས་ཀྱིས་དུས་དང་རྣམ་པ་ཐམས་ཅད་དུ་སེམས་ཅན་གྱི་དོན་མཛད་པ་རེད། དཔེར་ན་རྒྱ་མཚོ་ཆེན་པོར་རླབས་མེད་པའི་དུས་སྐབས་ཤིག་མི་སྲིད་པ་བཞིན། བཅོམ་ལྡན་འདས་ཀྱིས་སེམས་ཅན་ཐམས་ཅད་ཀྱི་དོན་མཛད་པ་ལའང་ཡལ་བར་བཏང་སྙོམས་སུ་བཞག་པའི་དུས་ཤིག་རྩ་བ་ནས་མི་སྲིད། དེ་ཡང་བཅོམ་ལྡན་འདས་ཀྱིས་ཕྱོགས་བཅུའི་སྤྲུལ་པའི་ཞིང་རྣམས་སུ། སངས་རྒྱས་ཀྱིས་གདུལ་བར་བྱ་བ་རྣམས་ལ་སངས་རྒྱས་སུ་སྤྲུལ་ཏེ་སེམས་ཅན་གྱི་དོན་མཛད་པ་དང་། བྱང་ཆུབ་སེམས་དཔས་གདུལ་བར་བྱ་བ་རྣམས་ལ་བྱང་ཆུབ་སེམས་དཔར་སྤྲུལ་ཏེ་སེམས་ཅན་གྱི་དོན་མཛད། ཉན་ཐོས་དང་རང་སངས་རྒྱས་ཀྱིས་གདུལ་བར་བྱ་བའི་སེམས་ཅན་རྣམས་ལ་ཉན་ཐོས་དང་རང་སངས་རྒྱས་སུ་སྤྲུལ་ཏེ་སེམས་ཅན་གྱི་དོན་མཛད་པ་རེད།

དེ་བཞིན་བཅོམ་ལྡན་འདས་ཀྱིས་མི་མ་ཡིན་པའི་འགྲོ་བ་རྣམས་སུ། བྱ་ལ་བྱ་རུ་སྤྲུལ་པ་དང་། རི་དྭགས་ལ་རི་དྭགས་སུ་སྤྲུལ། ཆུ་གནས་ལ་ཆུ་གནས་སུ་སྤྲུལ། སེམས་ཅན་མང་པོའི་རྣམ་པར་སྤྲུལ་ཏེ་སེམས་ཅན་གྱི་དོན་མཛད། དེར་མ་ཟད་རི་དང་ནགས་ཚལ། ལྗོན་ཤིང་ལ་སོགས་པ་རྣམས་ལས་དམ་པའི་ཆོས་འབྱུང་བ་དང་། དེ་དག་གིས་སེམས་ཅན་ལ་ཕན་བདེ་དཔག་ཏུ་མེད་པ་བསྩལ་ཏེ་སེམས་ཅན་གྱི་དོན་མཛད་པ་རེད། དེས་ན་སེམས་ཅན་རེ་རེ་བཞིན་དུ། བཅོམ་ལྡན་འདས་ཀྱིས་དུས་རྟག་པ་རྒྱུན་དུ། ཉིན་ལན་གསུམ་དང་མཚན་ལན་གསུམ་དུ། སེམས་ཅན་རྣམས་ལ་ཕན་པ་སྒྲུབ་པའི་ཐབས་སུ་དགོངས་ཏེ། སེམས་ཅན་ལ་ཕན་པ་སྒྲུབ་པ་ལས་གཡོལ་མི་སྲིད།

ད་ནི་གོང་དུ་སྨྲས་པའི་ཚིག་དག་བསྐྱར་ཟློས་བྱས་ཏེ་ལན་གཅིག་ཞུ།

སྟོན་པ་སངས་རྒྱས་ཀྱིས་སེམས་ཅན་རྣམས་ཕན་བདེ་ལ་འགོད་པའི་ཐབས་མ་མཁྱེན་ན་བཅོམ་ལྡན་འདས་ལ་དགའ་དོན་ཅི་ཡང་མེད་ཀྱང་། དེ་མིན་པར་ཐབས་དེ་བཅོམ་ལྡན་འདས་ཀྱིས་མཁྱེན་པ་ཡིན། བཅོམ་ལྡན་འདས་ལ་མཁྱེན་པ་ཡོད་དུ་ཟིན་ཀྱང་། བརྩེ་བའི་སྙིང་རྗེ་ཆེན་པོ་མེད་ན་གདུལ་བྱ་རྣམས་ལ་ཐར་བའི་ལམ་མི་སྟོན་ནའང་། བཅོམ་ལྡན་འདས་ལ་བརྩེ་བའི་སྙིང་རྗེའང་ཆེན་པོ་ཡོད་པ་རེད། དེ་མཚུངས་བཅོམ་ལྡན་འདས་ལ་མཁྱེན་པ་དང་བརྩེ་བའི་སྙིང་རྗེ་ཆེན་པོ་ཡོད་དུ་ཟིན་ཀྱང་། སེམས་ཅན་རྣམས་ལ་ཕན་བདེ་སྒྲུབ་པའི་ནུས་མཐུ་མེད་ན་སེམས་ཅན་གྱི་དོན་སྒྲུབ་མི་ཐུབ་ཀྱང་། བཅོམ་ལྡན་འདས་ལ་ཐོགས་པ་མེད་པའི་ནུས་པ་ཡང་ཡོད་པ་ཡིན། དེ་ལྟ་བུའི་མཁྱེན་བརྩེ་ནུས་གསུམ་གྱི་ཡོན་ཏན་འགྲན་ཟླ་དང་བྲལ་བ་བཅོམ་ལྡན་འདས་ཁོ་ན་ལ་ཡོད་པ་རེད་མ་གཏོགས། གཞན་འཇིག་རྟེན་ཁམས་ཀྱི་སུ་དང་གང་ལའང་ཡོད་པ་མ་རེད། དེས་ན་བསམ་པ་རྣལ་དུ་ཕོབ་ལ་ཞིབ་ཏུ་རྟོག་དཔྱོད་ཅིག་གྱིས་དང་། ཁོག་པའི་ནང་ན་སྙིང་མེད་པ་དང་། མགོ་བོའི་ནང་ན་ཀླད་པ་མེད་པའི་གང་ཟག་ཅིག་ཡིན་ན་མ་གཏོགས། ཞིབ་དཔྱད་ཅིག་བྱས་ན་བཅོམ་ལྡན་འདས་ལ་དང་བ་མི་སྐྱེ་ཀ་མེད་དུ་གྱུར་ཡོད།

གཉིས་པ་ཆོས་ལ་དམིགས་པའི་འདོད་པའི་དད་པ།

བཅོམ་ལྡན་འདས་ཀྱིས་གསུངས་པའི་དམ་པའི་ཆོས་དེ། ཇི་བཞིན་ཉམས་སུ་ལེན་པར་འདོད་པའི་མོས་པ་ཁྱད་པར་ཅན་སྐྱེ་དགོས་པ་ཡིན། དེ་ཡང་བཅོམ་ལྡན་འདས་ཀྱིས་གསུངས་པའི་ཆོས་དེ་ཇི་ལྟར་ཉམས་སུ་ལེན་དགོས་ཤེ་ན། དགེ་བའི་ཕྱོགས་ཐམས་ཅད་བསྒྲུབ་དགོས་པ་དང་། མི་དགེ་བའི་ཕྱོགས་ཐམས་ཅད་སྤང་དགོས་པ་ཡིན།

དགེ་བའི་ཕྱོགས་གང་ཡིན་ཟེར་ན། སེམས་ཅན་ཐམས་ཅད་ལ་གནོད་ཅིང་འཚེ་བའི་བསམ་པ་མེད་པར་བྱམས་པ་དང་སྙིང་རྗེ་སྒོམ་པ་ནི་དགེ་བའི་ཕྱོགས་ཡིན། མི་དགེ་བའི་ཕྱོགས་གང་ལ་ཟེར་ཞེ་ན། སེམས་ཅན་མཆོག་དམན་རབ་འབྲིང་གང་ལའང་བསམ་པ་ངན་པ་དང་། སྦྱོར་བ་རྩུབ་མོའི་ལས་བྱེད་པ་དེ་ལ་མི་དགེ་བ་ཞེས་ཟེར། སེམས་ཅན་ལ་གནོད་པ་མི་བྱེད་པའི་ཚུལ་དེ་ཡང་། བཅོམ་ལྡན་འདས་ཀྱིས་དགེ་སྦྱོང་གི་ཆོས་བཞི་ཞེས་གསུངས་ཡོད། དགེ་སྦྱོང་གི་ཆོས་བཞི་ཞེས་ཟེར་བའི་རྒྱུ་མཚན་ཡང་། བཅོམ་ལྡན་འདས་ཀྱི་རྗེས་འཇུག་དག་ལ་དགེ་སྦྱོང་ཟེར་བ་ཡིན།

དེ་ལ་ཚང་མས་ཉམས་སུ་ལེན་པའི་ཆོས་རྣམ་པ་བཞི་ཡོད་དེ། དེ་དག་ལས་དང་པོ་ཁྲོ་ཡང་སླར་མི་ཁྲོ་བ་ནི། གཞན་དག་ཚུར་ལ་ཚིག་པ་ཟ་རུང་རང་ཉིད་ཕར་ལ་ཚིག་པ་མི་ཟ་བ་ལ་ཟེར། གཉིས་པ་གཤེ་ཡང་སླར་མི་གཤེ་བ་ནི། སེམས་ཅན་གཞན་གྱིས་རང་ལ་ཇི་ལྟར་གཤེ་སྟེ་ཚིག་རྩུབ་བརྗོད་ཀྱང་སླར་དེ་ལ་གཤེ་མི་རུང་བ་ཡིན། གསུམ་པ་བརྡེགས་ཀྱང་སླར་མི་རྡེག་པ་ནི། ཚུར་ལ་རྡོ་དང་དབྱུག་པ་མཚོན་སོགས་ཀྱིས་བསྣུན་པར་བྱས་ཀྱང་། དེ་ལ་བཅོམ་ལྡན་འདས་ཀྱི་རྗེས་འཇུག་དག་མ་ཡིན་ན་ཕར་ལན་སྤྲད་མི་རུང་བ་ཡིན། བཞི་པ་མཚང་འབྲུ་བ་ལ་སླར་མཚང་མི་འབྲུ་བ་ནི། ཁྱོད་ཀྱི་ཕ་མི་བཟང་། མ་མི་བཟང་། ཁྱོད་རང་ལ་གཟུགས་མེད། རྒྱུ་མེད། ཁྱོད་རྐུན་མ་རེད། ཁྱོད་ཤོབ་རྐྱལ་རེད་སོགས་ཚུར་ལ་ཇི་ལྟར་མཚང་བྲུས་ནའང་ཕར་ལ་མཚང་འབྲུ་མི་རུང་བ་ཡིན། དེ་ནི་བཅོམ་ལྡན་འདས་ཀྱི་ཆོས་ཀྱི་ནང་ན། ཁེ་དང་རྒྱལ་ཁ་གཞན་ལ་སྦྱིན། །གྱོང་དང་བུབ་ཁ་རང་གིས་བླངས། །ཞེས་ལེགས་ཕྱོགས་དང་ཁེ་ཁ་གང་དང་ཅི་ཡོད་ཀྱང་གཞན་ལ་སྦྱིན་དགོས་ཤིང་། གྱོང་དང་ཉེས་ཁ་ཅི་ཡོད་ན་རང་གིས་ལེན་དགོས།

དེ་ལྟ་བུའི་བཅོམ་ལྡན་འདས་ཀྱི་དགེ་སྦྱོང་གི་ཆོས་བཞི་པོ་ཡང་དག་པ་ཞིག་ཉམས་སུ་ལེན་ཐུབ་ན། དེ་ལ་བཅོམ་ལྡན་འདས་ཀྱི་རྗེས་འཇུག་ཨང་དང་པོ་ཟེར་བ་ཡིན། དེ་ཉམས་སུ་མི་ལེན་པར་བཅོམ་ལྡན་འདས་ཀྱི་རྗེས་འཇུག་གི་ཚུལ་ཙམ་འཛིན་པ་རྣམས་ནི། ཁ་ཙམ་གྱིས་རྗེས་འཇུག་ཡིན་པར་བཤད་ཀྱང་དོན་ལ་དགེ་སྦྱོང་གི་ཆོས་བཞི་པོ་གང་ཡང་རྒྱུད་ལ་མེད་པས། དེ་ལ་བཅོམ་ལྡན་འདས་ཀྱི་རྗེས་འཇུག་གི་མིང་ཙམ་ཡོད་པ་མ་གཏོགས་རྗེས་འཇུག་རྣམ་པར་དག་པ་མ་རེད། དེ་ཡང་ཇི་ལྟར་སྒོམ་དགོས་ཤེ་ན། དཔེར་ན། སྤྱིར་གང་ཟག་རང་ག་བ་ཞིག་གིས་རང་ལ་གནོད་པ་བྱས་ན་དེ་ལ་ཕར་ཞེ་སྡང་སྐྱེ་ག་ལ་རུང་སྟེ། དེར་མ་ཟད་བདག་གིས་དུས་རྒྱུན་བུ་བཞིན་དུ་གཅེས་པར་བསྐྱངས་བའི་མི་ཞིག་གིས། རང་ལ་ཉེས་སྐྱོན་གང་ཡང་མེད་བཞིན་དུ་ཚུར་གནོད་པ་བསྐྱལ་ནའང་། དེ་ལ་ཕར་ཁོང་ཁྲོ་བར་བྱ་མི་རུང་བ་ཡིན། དཔེར་ན་མ་ཞིག་གི་བུ་སྨྱོ་ནད་ཀྱིས་ཐེབས་ཡོད་ཚེ། བུ་དེས་མ་ལ་ཇི་ལྟར་གནོད་པ་བྱས་ཀྱང་མ་རྒན་བུ་དེར་ཞེ་སྡང་ལངས་བ་མ་རེད། མོའི་བུ་དེ་ནམ་ཞིག་ན་ནད་ལས་གྲོལ་བར་འགྱུར་འོང་སྙམ་པ་བཞིན། རང་གིས་ཕར་ལ་ཕན་པ་བྱས་པའི་མིས་རང་ལ་ཚུར་གནོད་པ་བྱེད་སྐབས། ནམ་ཞིག་ན་ཉོན་མོངས་ངན་པ་འདི་ལས་གྲོལ་བའི་ཐབས་ཤིག་ཡོད་དམ་སྙམ་ཞིང་སྙིང་རྗེ་ཡང་དེ་ལྟར་བསྒོམ་དགོས།

རང་གིས་ཕར་གནོད་པ་བྱས་ཏེ། ཚུར་ལ་གནོད་ལན་བྱས་ན་དེ་ལ་ཕར་ཞེ་སྡང་སྐྱེ་ག་ལ་རུང་། དེར་མ་ཟད་བདག་ལ་ཉེས་པ་ཁབ་རྩེ་ཙམ་ཡང་མེད་བཞིན་དུ། གནོད་པ་ཆེན་པོ་མགོ་བོ་བཅད་ཀྱང་དེ་ལ་ཞེ་སྡང་མི་སྐྱེ་བར་མ་ཟད། དེའི་སྡིག་པ་ཐམས་ཅད་དང་སྡུག་བསྔལ་ཡོད་དོ་ཅོག་བདག་ལ་སྨིན་པར་གྱུར་ཅིག་སྙམ་ནས་བསམ་པ་བཟང་པོ་ཡང་བསྐྱེད་དགོས། ཡང་མི་རེ་ཟུང་གིས་མཚང་བྲུས་ན་དེ་ལ་ཞེ་སྡང་སྐྱེ་ག་ལ་རུང་སྟེ། དེར་མ་ཟད་རྒྱལ་ཁབ་མང་པོར་ཁྱབ་འགྲོ་བའི་ཚིག་ངན་དང་མཚང་འབྲུ་ཇི་ལྟ་བུ་བྱས་ནའང་། དེ་ལ་དགའ་སྤྲོ་བྱས་ཏེ་སླར་ཡང་དེའི་ཡོན་ཏན་བརྗོད་དགོས་པ་རེད། ཡང་རང་ལས་ལྷག་པ་ཞིག་གིས་རང་ལ་བརྙས་བཅོས་བྱས་ན་དེ་བྱེད་འོས་པ་ཞིག་ཡིན་པས་མི་ཁྲོ་བར་མ་ཟད། རང་ལས་ཤིན་ཏུ་དམན་པ་ཞིག་གིས་ཀྱང་རང་ལ་བརྙས་བཅོས་རྣམ་པ་སྣ་ཚོགས་བྱེད་སྐབས། དེ་ལ་ཞེ་སྡང་མི་སྐྱེ་བ་མ་ཟད་གུས་བཀུར་དང་ལེན་བྱེད་དགོས་པ་འདི་ཡང་བཅོམ་ལྡན་འདས་ཀྱི་བསྟན་པའི་སྲོལ་རེད།

དེས་ན་བཅོམ་ལྡན་འདས་ཀྱི་དམ་པའི་ཆོས་དེ་ནི་འཚེ་བ་མེད་པ་དང་། གཞན་ལ་ཕན་པ་འབའ་ཞིག་སྒྲུབ་པའི་འཚེ་མེད་ཞི་བའི་ལམ་བཟང་ཁོ་ན་ཡིན་ཟེར་བའི་རྒྱུ་མཚན་ཡང་དེ་ལ་ཐུག་ཡོད། ད་ཁྱེད་རྣམ་པས་བསམ་བློ་བཏང་ན། བཅོམ་ལྡན་འདས་ཀྱི་བསྟན་པ་འདི་ཧ་ཅང་ཡག་པོ་དང་བཟང་པོ་ཞིག་ཡིན་འདུག་ཀྱང་། དེ་ལ་སློབ་ཐུབ་མཁན་ཞིག་ཡོད་དཀའ་བས། ཆོས་དེ་ཉམས་སུ་ལེན་ཐུབ་མཁན་སུ་ཡང་ཡོད་པ་མ་རེད་སྙམ་ན། དེ་ལའང་ཐབས་ཤེས་ཤིག་ཡོད་པ་ཡིན།

ཆོས་དེ་དང་པོ་ནས་ཉམས་སུ་ལེན་དགོས་ན། ཁྱེད་རྣམ་པ་ལྟ་བུའི་སངས་རྒྱས་པའི་ཆོས་ལ་གསར་དུ་ཞུགས་པའི་གང་ཟག་ཅིག་ལ་དཀའ་བར་མ་ཟད། ང་ལ་དཔེ་མཚོན་ན་བོད་ཀྱི་གྲྭ་པ་ཞིག་རེད། གྲྭ་པ་མ་ཟད་བླ་མ་ཞིག་ཡིན་ནའང་། ངས་ཀྱང་དོན་ངོ་མ་ཞིག་ཉམས་སུ་ལེན་ཐུབ་མེད། དེས་ན་ང་ཚོ་ཚང་མས་རང་གིས་ནུས་ཚོད་དང་བསྟུན་ནས། བཅོམ་ལྡན་འདས་ཀྱིས་གསུངས་པའི་ཆོས་འདི་ལ་རིམ་པ་བཞིན་དུ་ཡར་བསླབ་ཏེ་འགྲོ་དགོས། དཔེར་ན་ང་ཚོ་བོད་ཡུལ་ན་ཡོད་པའི་བླ་མ་སེར་མོ་ཨང་དང་པོ་ཞིག་ཡིན་ན། ངོ་མ་ཁོའི་སྲོག་ལ་ཐུག་ཀྱང་སེམས་ཅན་གཞན་གྱི་སྲོག་གཅད་རྒྱུ་དང་། སེམས་ཅན་གཞན་གྱི་རྒྱུ་རྫས་རྐུ་བ་སོགས་རྩ་བ་ནས་བྱེད་མི་སྲིད། དེས་ན་ཁྱེད་རྣམ་པ་ལ་དཔེ་མཚོན་ན། ཁྱེད་རྣམ་པས་ཀྱང་དེ་རིང་ཉི་མ་ཕན་ཆོད་ནས་སེམས་ཅན་གཅིག་གི་སྲོག་མི་གཅད་རྒྱུ་དང་། སེམས་ཅན་གཅིག་གི་རྒྱུ་རྫས་མི་བརྐུ་བར་གནོད་པའི་ལས་རྩ་བ་ནས་མི་བྱེད་ཟེར་བ་དཀའ་མོ་ཡིན་ཡང་། ཅི་ནུས་གང་ནུས་ཀྱིས་རིམ་པ་བཞིན་དུ་བསླབས་ཏེ། མདོར་ན་སེམས་ཅན་ལ་གནོད་པའི་ལས་མི་བྱེད་པའི་ཐབས་ལ་བརྩོན་དགོས་པ་ཡིན།

དེས་ན་བཅོམ་ལྡན་འདས་ཀྱི་བསྟན་པ་ལས། གཞན་ལ་འཚེ་བ་དགེ་སྦྱོང་མ་ཡིན་ནོ། །ཞེས་གསུངས་པ་ལྟར། སེམས་ཅན་གཞན་ལ་བསམ་པ་ངན་པ་དང་སྦྱོར་བ་རྩུབ་མོ་བྱེད་མཁན་ཡིན་ན། དེ་བཅོམ་ལྡན་འདས་ཀྱི་རྗེས་འཇུག་རྣམ་དག་མིན་ཞེས་བཅོམ་ལྡན་འདས་ཀྱིས་ཐུགས་ཐག་བཅད་དེ་གསུངས་ཡོད། བཅོམ་ལྡན་འདས་ཀྱིས། རང་གི་སེམས་ནི་ཡོངས་སུ་འདུལ། །གཞན་གྱི་སེམས་ནི་དཀྲུག་མི་བྱ། །འདི་ནི་སངས་རྒྱས་བསྟན་པ་ཡིན། །ཞེས་གསུངས་པ་ལྟར། ཚང་མས་རང་གི་སེམས་གཟབ་གཟབ་བྱས་ཏེ་བསྲུང་དགོས་ཤིང་། གཞན་གྱི་སེམས་མི་དཀྲུག་པ་ལ་རང་ནུས་གང་ཡོད་ཀྱིས་ནུས་པ་རྩལ་སྤྲུགས་བྱས་ཏེ་བསླབ་དགོས།

རང་གི་སེམས་ཇི་ལྟར་བསྲུང་དགོས་སྙམ་ན། རང་གི་རྒྱུད་ལ་བཅོམ་ལྡན་འདས་ཀྱི་ཆོས་དང་མི་མཐུན་པའི་ཞེ་སྡང་ངན་པ་དང་། འདོད་ཆགས་ངན་པ། གཞན་ལ་ཕྲག་དོག་ངན་པ། གཞན་ལས་ང་ལྷག་སྙམ་པའི་ང་རྒྱལ་ལྟ་བུའི་བསམ་པ་ངན་པ་སྐྱེས་འོང་སྐབས། ལམ་སང་དེ་སྐྱེ་ཡོད་པ་ངོ་ཤེས་པར་བྱས། འདི་ལྟ་བུའི་རྟོག་པ་ངན་པ་དེ་སྐྱེ་བར་འཇུག་མི་རུང་སྙམ་ཞིང་དྲན་ཤེས་ཀྱིས་བཟུང་སྟེ། ཕྱིན་ཆད་འདི་ལྟ་བུའི་རྟོག་ངན་མི་སྐྱེ་བར་བླ་མ་དཀོན་མཆོག་གསུམ་གྱིས་བྱིན་གྱིས་བརླབ་ཏུ་གསོལ་སྙམ་ཞིང་། དཀོན་མཆོག་རྣམ་པ་གསུམ་ལ་གསོལ་བ་ཡང་ཅི་ནུས་སུ་འདེབས་དགོས།

གཞན་གྱི་སེམས་མི་དཀྲུག་པ་ནི། རང་གི་ལུས་ཀྱི་སྤྱོད་པ་ངན་པ་དང་། ངག་གི་གཏམ་སྨྲ་ཚུལ་ངན་པ། སེམས་ཀྱི་དྲན་རྟོག་ངན་པ་དེ་དག་གིས་གཞན་གྱི་སེམས་དཀྲུག་པར་འགྱུར་བ་ཡིན། དེས་ན་གཞན་སེམས་དཀྲུག་པའི་བྱ་སྤྱོད་ངན་པ་དེ་དག་རང་གི་རྒྱུད་ལ་འབྱུང་བའི་སྐབས་སུ། རབ་ན་རྩ་བ་ནས་སྤང་ཨེ་ཐུབ་བལྟ་དགོས། གལ་ཏེ་དེ་ཙམ་མི་ནུས་ན་རང་གིས་རང་ལ་བསྐུལ་ཏེ་ང་བཅོམ་ལྡན་འདས་ཀྱི་རྗེས་འཇུག་ཅིག་ཡིན་ཡང་། ད་དུང་གཞན་སེམས་དཀྲུག་པའི་ལས་ཀ་འདི་འདྲ་བྱེད་ཀྱིན་འདུག ད་ཕྱིན་ཆད་ལས་ཀ་འདི་འདྲ་རྩ་བ་ནས་བྱེད་མི་རུང་བསམས་ཏེ་དམ་བཅའ་བརྟན་པོ་རེ་བྱ་རྒྱུ་དང་། དཀོན་མཆོག་གསུམ་ལ་གསོལ་བ་ཡང་འདེབས་དགོས་པ་ཡིན།

དེ་ལྟར་སེམས་ཅན་ལ་གནོད་པ་མི་བྱེད་ཅིང་། རང་གི་སེམས་བསྲུང་ན་དགོས་པ་ཅི་ཡོད་ཅེ་ན། ཚེ་འདིར་ཡང་ཚེ་རིང་བ་དང་ནད་མེད་པ། ལོངས་སྤྱོད་ཆེ་བ། གཟི་བརྗིད་བཟང་བ། གཞན་གྱིས་བཀུར་འོས་པའི་གནས་སུ་གྱུར་པ་ལ་སོགས་པའི་ཡོན་ཏན་ཆེས་མང་པོ་ཞིག་འབྱུང་བ་དང་། ཚེ་ཕྱི་མར་ཡང་བདེ་བ་ཅན་ལ་སོགས་པའི་དག་པའི་ཞིང་རྣམས་སུ་སྐྱེ་ཞིང་། སངས་རྒྱས་ཀྱི་གོ་འཕང་འཐོབ་པར་འགྱུར་བ་སོགས་སྡུག་བསྔལ་ཐམས་ཅད་དང་བྲལ་བའི་བདེ་བ་ཕུན་སུམ་ཚོགས་པ་འཐོབ་རྒྱུ་རེད།

དེས་ན་བཅོམ་ལྡན་འདས་ཀྱིས་གསུངས་པའི་དམ་པའི་ཆོས་འདི། མི་གཅིག་གིས་ཉམས་སུ་བླངས་ན་མི་ཁོ་རང་བདེ་བ་དང་ལྡན་ལ་སྡུག་བསྔལ་དང་བྲལ་བ་དང་། ཁྱིམ་ཚང་གཅིག་གི་མིས་ཆོས་འདི་ཉམས་སུ་བླང་ན་ཁྱིམ་ཚང་གང་པོ་བདེ་བ་དང་ལྡན་པ་ཡིན། གྲོང་ཁྱེར་གཅིག་གི་མི་རྣམས་ཀྱིས་ཆོས་འདི་ཉམས་སུ་བླངས་ན་གྲོང་ཁྱེར་དེ་ཡང་གནས་སྐབས་དང་མཐར་ཐུག་ཀུན་ཏུ་བདེ་རྒྱུ་རེད། རྒྱལ་ཁབ་གཅིག་གི་མི་རྣམས་ཀྱིས་ཆོས་འདི་ཉམས་སུ་བླངས་ན་རྒྱལ་ཁབ་དེར་ཡང་བདེ་བ་ཕུན་སུམ་ཚོགས་པ་ཡོང་རྒྱུ་རེད། དེར་མ་ཟད་འཛམ་བུ་གླིང་གི་མི་ཚང་མས་སངས་རྒྱས་ཀྱི་བསྟན་པ་འདི་ཉམས་སུ་བླངས་ན། འཛམ་བུ་གླིང་འདི་ཡང་བདེ་ཞིང་སྐྱིད་པ་ཕུན་སུམ་ཚོགས་པ་དང་། འཛམ་གླིང་ཞི་བདེའི་དཔལ་ཡོན་དེ་ཡང་མངོན་དུ་འགྱུར་ཞིང་། སྡུག་བསྔལ་ཅན་གྱི་སེམས་ཅན་གང་ཡང་མེད་པར་བདེ་དགེ་ཕུན་སུམ་ཚོགས་པ་འབྱུང་རྒྱུ་རེད།

དེས་ན་སེམས་ཅན་སུ་ཡིན་ཡང་བདེ་བ་བྱུང་ན་དགའ་བ་དང་། སྡུག་བསྔལ་མ་བྱུང་ན་དགའ་མཁན་ཞིག་ལས། བདེ་བ་མ་བྱུང་ན་བསམ་མཁན་དང་། སྡུག་བསྔལ་བྱུང་ན་བསམ་མཁན་སུ་ཡང་ཡོད་མི་སྲིད། དེ་བས་སེམས་ཅན་ཐམས་ཅད་ལ་བདེ་བ་སྒྲུབ་པར་བྱེད་པའི་ཐབས་དང་། སྡུག་བསྔལ་མེད་པར་བྱེད་པའི་ཐབས་ནི་བཅོམ་ལྡན་འདས་ཀྱིས་གསུངས་པའི་ཆོས་འདི་ཁོ་ན་ཡིན། གོང་བཤད་ལྟར་བསམ་བློ་ཞིབ་ཏུ་བཏང་སྟེ་བརྟག་དཔྱད་ཅིག་བྱས་ན། ཁོག་པའི་ནང་ན་སྙིང་མེད་པའི་གང་ཟག་དང་། མགོ་བོའི་ནང་ན་ཀླད་པ་མེད་པའི་གང་ཟག་ཅིག་ཡིན་ན་མ་གཏོགས། བཅོམ་ལྡན་འདས་ཀྱི་ཆོས་འདི་ལ་མོས་པ་མེད་པ་ཞིག་མི་སྲིད་པ་ལྟ་བུར་གྱུར་ཡོད།

དེས་ན་ཞིབ་མོའི་བློས་ད་དུང་བརྟག་དཔྱད་གྱིས་དང་། ཡང་ནས་ཡང་དུ་བརྟགས་ན། བཅོམ་ལྡན་འདས་ཀྱི་བསྟན་པ་འདི་ལ་མི་དད་པ་དང་མི་མོས་པའི་གང་ཟག་ཅིག་ཡོད་ན། ང་ཚོ་བོད་མིས་དེ་ལ་ཀླད་མེད་པོ་དང་། སྙིང་མེད་པོ་ཞེས་པའི་ཐ་སྙད་འདོགས་སྲོལ་ཡོད། དེ་ལྟར་བཤད་པ་ཁོག་པའི་ནང་ན་སྙིང་མེད་པ་དང་། མགོ་བོའི་ནང་ན་ཀླད་པ་མེད་པ་ལ་ཟེར་བ་མ་ཡིན་པར། བཅོམ་ལྡན་འདས་ཀྱི་རྗེས་འཇུག་ཞིག་གིས་ལྟ་ཚུལ་ལ། ཤ་རྡོག་པོ་ཞིག་ཁོག་པའི་ནང་ན་ཡོད་ན་དེ་ལ་སྙིང་ཞེས་ཧ་ཅང་གཅེས་པོ་བྱེད་པ་མིན་ལ། ཀླད་པའི་ནང་ན་ཞོ་མིན་ཞོ་ལྟར་ཉག་ཉོག་ཞིག་ཡོད་པ་དེ་ལ་རྩིས་པོ་ཆེར་བྱེད་པ་མ་ཡིན་པར། སུ་ཞིག་གིས་རང་ཉིད་འགྲོ་སའི་མདུན་ལམ་ཡང་དག་པ་ཞིག་ཤེས་ན། ད་གཟོད་དེ་ལ་སྙིང་ཡོད་འདུག ཀླད་པ་ཡོད་འདུག་ཟེར་བ་ཡིན།

རང་ལ་སྙིང་དང་ཀླད་པ་ཡོད་པར་འདོད་ན། རང་གིས་ཉམས་སུ་བླང་རྒྱུའི་ཆོས་དེ་མ་ནོར་བ་ཞིག་ཤེས་དགོས་མ་གཏོགས། ཁྱོད་ཉལ་ཤེས་པ་དང་། འགྲོ་ཤེས་པ། མི་གཙང་བ་འདོར་ཤེས་པ། གོས་གྱོན་ཤེས་པ་ཙམ་གྱིས་སྙིང་ཡོད་དང་ཀླད་ཡོད་ཅེས་པའི་ཐ་སྙད་དེ་སུས་ཀྱང་འདོགས་པ་མིན། ཆོས་ལ་དམིགས་པའི་འདོད་པའི་དད་པ་ཟེར་བ་དེ་ལྟ་བུ་ཞིག་ལ་གོ་དགོས།

གསུམ་པ་དགེ་འདུན་ལ་དམིགས་པའི་ཡིད་ཆེས་ཀྱི་དད་པ།

དེ་ཡང་དགེ་འདུན་དཀོན་མཆོག་ནི་བཅོམ་ལྡན་འདས་ཀྱི་རྗེས་སུ་འཇུག་པ་རྣམས་ལ་ཟེར་བ་ཡིན། བཅོམ་ལྡན་འདས་ཀྱི་རྗེས་འཇུག་ཅིག་ཡིན་ནས་བཟུང་། གཙོ་བོ་རང་དང་གཞན་ལ་ཕན་པ་སྒྲུབ་པའི་ཐབས་ཁོ་ནར་བརྩོན་མཁན་ཞིག་ཡིན།

འཛམ་བུ་གླིང་འདིའི་བཅོམ་ལྡན་འདས་ཀྱི་རྗེས་སུ་འཇུག་པའི་གང་ཟག་རྣམས་ཀྱི་དབང་དུ་བྱས་ན། སེམས་ཅན་ལ་གནོད་པ་མི་སྐྱེལ་བ་ཐེག་པ་དམན་པའི་ལུགས་དང་། སེམས་ཅན་ལ་གནོད་པ་མི་བྱེད་པར་མ་ཟད་སེམས་ཅན་ལ་ཕན་པ་སྒྲུབ་པ་ཐེག་པ་ཆེན་པོའི་ལུགས། སེམས་ཅན་ལ་ཕན་པ་སྒྲུབ་པ་དེའང་རྒྱ་ཆེན་པོ་དང་དཀའ་ཚེགས་མེད་པར་མྱུར་དུ་སྒྲུབ་པ་གསང་སྔགས་རྡོ་རྗེ་ཐེག་པའི་ལམ་ཉམས་སུ་ལེན་པའི་དགེ་འདུན་ཏེ་རིགས་གསུམ་ཡོད། དེ་ལྟ་བུའི་བསྟན་པ་འཛིན་པའི་སྐྱེས་བུ་གསུམ་ཡང་། སེམས་ཅན་ལ་ཕན་པ་སྒྲུབ་པའི་གང་ཟག་ཡིན་པར་ངོ་ཤེས་ན། དེ་ལ་ཡིད་མི་ཆེས་པའི་གང་ཟག་སུ་ཡང་ཡོད་སྲིད་རྒྱུ་མ་རེད་སྙམ།

དཔེར་ན། ཁྱོད་ལ་གྲོགས་པོ་ཞིག་ཡོད་པའི་དབང་དུ་བྱས་ན། གྲོགས་པོ་དེ་དངོས་སུ་འཕྲད་པའི་གནས་སྐབས་ན་ཁྱོད་ལ་དགའ་བ་དང་སྤྲོ་བས་བཀུར་བསྟི་བྱེད་ལ། ལྐོག་ནས་ཀྱང་ཁྱོད་ལ་བསྟོད་པ་བྱེད་ཅིང་བྱ་བ་གང་ཅིའི་ཐད་ནས་ཕན་པ་འབའ་ཞིག་སྒྲུབ་པའི་གྲོགས་པོ་དེ་ལ་ཡིད་ཆེས་ཡོད་པ་ཡིན། དེ་མིན་གྲོགས་པོ་ཁ་ཅིག་གིས་ངོ་ལ་བལྟས་ཏེ་བསྟོད་པ་བྱས་ཀྱང་ལྐོག་ནས་སྨད་པ་བྱེད་པ་དང་། གནོད་པ་སྣ་ཚོགས་བྱེད་པའི་གྲོགས་པོ་དེ་ལ་ཡིད་ཆེས་ཡོད་སྲིད་རྒྱུ་མ་རེད། དེས་ན་དགེ་འདུན་དཀོན་མཆོག་ལ་ཡིད་ཆེས་པའི་དད་པ་བསྐྱེད་དགོས་ཞེས་བཤད་པའི་རྒྱུ་མཚན་ཡང་དེ་ལ་ཐུག་ཡོད།

གོང་དུ་དཀོན་མཆོག་གསུམ་གྱི་ཡོན་ཏན་མདོར་བསྡུས་པ་ཙམ་ཞིག་བཤད་པ་ཡིན། ད་ཁྱེད་རྣམ་པ་ཚང་མ་དཀོན་མཆོག་གསུམ་ལ་དགའ་བ་སྐྱེས་སམ། སྤྲོ་བ་ཨེ་བྱུང་། ཡ་དཀོན་མཆོག་གསུམ་ལ་དགའ་མཁན་རྣམས་ཀྱིས་ལག་པ་རྐྱོངས་དང་ཅི་འདྲ་འདུག ད་དཀོན་མཆོག་གསུམ་ལ་མི་དགའ་མཁན་ཅི་ཙམ་འདུག དེ་རྣམས་ཀྱིས་ལག་པ་རྐྱོངས་དང་། ཧ་ཅང་ཡག་པོ་རེད། ཚང་མ་དཀོན་མཆོག་གསུམ་ལ་དགའ་བར་འདུག ༼དགོད་སྒྲ།༽

སྐྱབས་འགྲོའི་སྡོམ་པ།

དེས་ན་ཁྱེད་རྣམ་པས་དུས་ད་ནས་བཟུང་སྟེ། སྐྱེ་བ་ཚེ་རབས་ཀུན་ཏུ་སྟོན་པ་ཕུན་སུམ་ཚོགས་པ་སངས་རྒྱས་ལ་གསོལ་བ་འདེབས་པ་དང་། གཞན་ལ་འཚེ་བ་མེད་པའི་དམ་པའི་ཆོས་དེ་ཉམས་སུ་ལེན་པ་དང་། ཆོས་ཡང་དག་པར་ཉམས་སུ་ལེན་པའི་གྲོགས་དགེ་འདུན་པ་ཐམས་ཅད་དང་དུས་རྟག་ཏུ་འགྲོགས་ཏེ། སངས་རྒྱས་ཀྱི་ཆོས་ཉམས་སུ་ལེན་པའི་དམ་བཅའ་རྒྱུད་ལ་སྐྱེ་བར་མཛོད་ཅིག དེ་ལྟ་བུའི་དམ་བཅའ་དང་ལྡན་པའི་སྒོ་ནས་ཐལ་མོ་སྙིང་གར་སྦྱོར་ལ་ཚིག་འདིའི་རྗེས་ཟློས་གྱིས།

བླ་མ་ལ་སྐྱབས་སུ་མཆིའོ། །སངས་རྒྱས་ལ་སྐྱབས་སུ་མཆིའོ། །ཆོས་ལ་སྐྱབས་སུ་མཆིའོ། །དགེ་འདུན་ལ་སྐྱབས་སུ་མཆིའོ། ། ༼ལན་གསུམ།༽

ད་ཁྱེད་རྣམ་པ་ཚང་མ་ལ་སྐྱབས་འགྲོའི་སྡོམ་པ་ཐོབ་པ་ཡིན། ཁྱེད་རྣམ་པ་ཚང་མ་དུས་དེ་རིང་ནས་བཟུང་སྟེ་ནང་པ་སངས་རྒྱས་པ་མཚན་ཉིད་དང་ལྡན་པར་གྱུར་པ་ཡིན་ཞིང་། དུས་ད་ནས་བཟུང་སྟེ་ཁྱེད་རྣམ་པས་ཆོས་དང་འཇིག་རྟེན་གྱི་བྱ་བ་གང་བསྒྲུབས་ཀྱང་འགལ་རྐྱེན་མེད་པར་བསམ་པ་བཞིན་དུ་བསྒྲུབ་ཐུབ་རྒྱུ་རེད་ལ། དེ་ནས་མི་དང་མི་མ་ཡིན་པ་འདྲེ་བགེགས་ལ་སོགས་པའི་གནོད་པ་རྣམ་པ་སྣ་ཚོགས་ཀྱང་། དཀོན་མཆོག་གསུམ་གྱི་ཐུགས་རྗེ་ཡིས་སྐྱོབ་ཐུབ་རྒྱུ་རེད། ཁྱེད་རྣམ་པས་དུས་ནམ་ཡང་དཀོན་མཆོག་གསུམ་ལ་བློ་ཁ་མ་ལོག་པར་ལེགས་པར་བསྡད་ན་ཚེ་འདིར་བདེ་བར་མ་ཟད། ཚེ་ཕྱི་མར་ཡང་དམྱལ་བ་ཡི་དྭགས་དུད་འགྲོ་ལ་སོགས་ངན་པའི་སྐྱེ་བ་ལེན་དགོས་པ་མ་རེད། དེས་ན་ཁྱེད་རྣམ་པས་ད་རེབ་ཀྱི་དམ་བཅའ་དང་ཡིད་ཆེས་དེའི་སྟེང་གི་འགྱུར་བ་མེད་པ་གྱིས་དང་། ཁྱེད་ཚོས་མི་ལུས་ཐོབ་པ་དེ་ཡང་དོན་དང་ལྡན་པར་གྱུར་བ་ཡིན།

ངས་བསམ་ན་ཁྱེད་རྣམ་པ་ཕལ་ཆེ་བ་ཁེ་ན་ཏ་རྒྱལ་ཁབ་ཏུ་སྐྱེས་པའི་མི་ཡིན་པ་དང་། འགའ་རེ་ཨ་རིར་སྐྱེས་པའི་མི་ཡིན་ས་རེད། གང་ལྟར་ཡང་ཁྱེད་རྣམ་པར་ཚེ་གང་པོ་ལ་དེ་རིང་གི་བྱ་བ་འདི་ལྟ་བུའི་གྲུབ་འབྲས་རྒྱ་ཆེན་པོ་ཐོབ་མྱོང་ཡོད་པ་མ་རེད་སྙམ། དེ་ཟེར་བའི་རྒྱུ་མཚན་ཡང་ཁྱེད་རྣམ་པ་ཕལ་ཆེར་གྱིས་མི་ཚེ་གང་པོར། ཨ་རིའི་ལུང་པ་དང་ཁེ་ན་ཏ་ནས་གཟའ་སྤེན་པ་དང་གཟའ་ཉི་མ་གཉིས་པོར་མ་གཏོགས། ཟས་གོས་དང་སྙན་གྲགས། སྒོར་མོ་རྙེད་ཆེད་འབད་པ་བྱས་པ་རེད། དངོས་གནས་མི་ཚེ་གང་པོར་འབད་རྩོལ་བྱེད་ལུགས་དེ་ལ་བསམ་བློ་བཏང་ན། ད་ལྟ་ཨ་རིའི་ཕྱུག་པོ་རཱོ་ཁི་ཧྥེ་ལིར་（John Davison Rockefeller）གྱི་རྒྱུ་རྫས་དེ་ང་ཚོར་ཐོབ་ན་ཆོག་པའི་འབད་པ་བྱས་མྱོང་བ་ཚང་མའི་ཞེ་ན་ཡོད་པ་ཡིན། འབད་རྩོལ་བྱས་མྱོང་རུང་ད་ལྟ་རྒྱུ་འབྱོར་ཡང་དེ་ཙམ་དང་། ཟས་གོས་སྙན་གྲགས་ཡང་དེ་ཙམ་མ་གཏོགས། གང་ཡང་འགྲུབ་མེད་པས་མི་ཚེ་གང་པོར་འབད་པ་དོན་མེད་ལྟ་བུར་གྱུར་འདུག དེས་ན་ང་ཚོའི་མི་ཚེ་གང་པོའི་བྱ་བ་ལས་ལྷག་པའི་གྲུབ་འབྲས་ཤིག་དེ་རིང་ཐོབ་ཡོད་ཅེས་བཤད་པའི་རྒྱུ་མཚན་ཡང་དེ་ཡིན།

ཁྱེད་རྣམ་པ་མང་ཤོས་སྔར་ནས་ནང་པ་སངས་རྒྱས་པ་ཡིན་པ་དང་། འགའ་རེ་དེ་རིང་ནང་པ་སངས་རྒྱས་པར་གྱུར་ཡོད་པ་རེད། གང་ལྟར་ཡང་ནང་པ་སངས་རྒྱས་པའི་ཆོས་དེ་ལ་ཡིད་ཆེས་ཁྱད་པར་ཅན་སྐྱེས་ན་ང་ཡང་ས་ཆ་འདི་ལ་སླེབས་པ་དོན་དང་ལྡན་པར་གྱུར་པ་དང་། ཁྱེད་རྣམ་པ་ཡང་ཆོས་ཚོགས་ལ་འཚོགས་པ་འདི་ངས་བལྟས་ན་སྐལ་བ་བཟང་པོ་རེད་སྙམ།

དེ་ནས་སྐྱབས་འགྲོའི་བསླབ་བྱ་ནི། དུས་ད་ནས་བཟུང་སྟེ་སངས་རྒྱས་ལ་རྒྱུན་ཏུ་གསོལ་བ་འདེབས་རྒྱུ་མ་བརྗེད། ཆོས་ལ་སྐྱབས་སུ་སོང་བ་ཡིན་པས་སེམས་ཅན་ལ་གནོད་འཚེ་མི་བྱེད་པ་ལ་ཅི་ནུས་སུ་འབད་པར་གྱིས། དགེ་འདུན་ལ་སྐྱབས་སུ་སོང་བ་ཡིན་པས་སངས་རྒྱས་ཀྱི་རྗེས་འཇུག་ཚང་མར་གུས་བཀུར་དང་ཡིད་ཆེས་ཅི་ནུས་སུ་བསྐྱེད་དང་། དེ་ནས་བསམ་པ་ཐམས་ཅད་ཡོངས་སུ་རྫོགས་པར་འགྲུབ་འོང་བ་ཡིན།

གོང་དུ་ཁྱེད་རྣམ་པ་ལ་ཕན་པ་རྒྱ་ཆེན་པོ་འབྱུང་བའི་ཆེད་དུ་ངས་དཀོན་མཆོག་གསུམ་ལ་དད་པ་ཇི་ལྟར་བསྐྱེད་ཚུལ་གྱི་གཏམ་བཤད་དེ་དག་བྱས་པ་ཡིན། ང་སྐད་ཆ་ལ་མཁས་པ་ཞིག་མིན་ལ། སྐད་གདངས་དེ་ཡང་སྙན་མོ་མིན་པས་ཁྱེད་རྣམ་པ་ཐུགས་ཧ་ཅང་སྤྲོ་བོ་བྱུང་མེད་ནའང་། ཚིག་དེས་བཤད་པའི་སྙིང་དོན་ནི། ཁྱེད་རྣམ་པ་ལ་འདི་ཕྱི་ཀུན་ཏུ་ཕན་པ་འབྱུང་བའི་གཏམ་བཤད་བཟང་པོ་ཡིན་པས་ཁྱེད་རྣམ་པས་ཐུགས་ཉམས་སུ་བསྟར་བའི་རེ་བ་ཡོད། དེ་རིང་གི་ལས་རིམ་དེ་ཙམ་ཡིན། དེ་ནས་སང་ཉིན་གནངས་ཉིན་གྱི་ལས་རིམ་གྱི་བཀོད་སྒྲིག་ལ་ཁྱེད་རྣམ་པ་ཅི་མོས་ཀྱིས་འཇུག་པར་མཛོད།

ཆེ་བ་བཞི་ལྡན་གྱི་ཆོས།

ཕྱི་ཟླ་༨པའི་ཚེས་༢༠ཉིན། ཆོས་རྗེ་ཉིད་ཀྱིས་འཇམ་དཔལ་ཡེ་ཤེས་སེམས་དཔའི་དབང་གི་སྔོན་དུ་འདི་ལྟར་གསུང་།

འཇམ་དཔལ་ཡེ་ཤེས་སེམས་དཔའི་སྒྲུབ་ཐབས་བྱིན་རླབས་མྱུར་སྩོལ་ཞེས་བྱ་བ་འདི་ཉིད་ཀྱི་དབང་བསྐུར་བའི་སྐབས་སུ་བབས་པ་ཡིན། འདིའི་བྱུང་ཚུལ་གྱི་ལོ་རྒྱུས་མདོར་བསྡུས་པ་ཙམ་ཞིག་ཞུ་ན། སྤྱིར་ལྷོ་རྒྱལ་འཛམ་བུ་གླིང་འདི་ཡི་དབུས་ན་དུས་གསུམ་སངས་རྒྱས་ཐམས་ཅད་མངོན་པར་རྫོགས་པར་འཚང་རྒྱ་བའི་གནས་རྒྱ་གར་རྡོ་རྗེ་གདན་ཞེས་བྱ་བ་ཡོད། དེ་མཇལ་བ་དང་ཕྱག་འཚལ་བ། སྨོན་ལམ་བཏབ་པ་ཙམ་གྱིས་ཀྱང་ཐོག་མེད་ནས་བསགས་པའི་སྡིག་ལྟུང་མ་ལུས་པ་ཡོངས་སུ་བྱང་བར་བྱེད་པའི་གནས་མཆོག་ཁྱད་པར་ཅན་ཞིག་ཡིན། དེ་ཡང་རྡོ་རྗེ་གདན་གྱི་ཤར་ཕྱོགས་སུ་མ་ཧཱ་ཙི་ན་ཞེས་བྱ་བའི་ཡུལ་གྲུ་ཆེན་པོ་ཞིག་ཆགས་ཡོད། དེ་ན་རྒྱ་ནག་རི་བོ་རྩེ་ལྔ་ཞེས་བྱ་བ་རི་རྩ་བ་གཅིག་ལ་རྩེ་མོ་ལྔ་ཡོད་པ། མགོན་པོ་འཇམ་པའི་དབྱངས་སྔར་ནས་ད་ལྟའི་བར་མངོན་སུམ་དུ་བཞུགས་པའི་གནས་མཆོག་ཁྱད་པར་ཅན་ཞིག་ཡོད། དེ་ལ་དུས་ཁྱད་པར་ཅན་རབ་བྱུང་བཅུ་བདུན་པའི་ཐོག་མ་མེ་ཡོས་ལོའི་བོད་ཟླ་བཞི་པའི་ཚེས་བཅོ་ལྔ་ལ་བབས་པའི་དུས་ན། ཆོས་ཁྱད་པར་ཅན་བཟང་པོ་སྤྱོད་པའི་སྨོན་ལམ་ལ་སོགས་པ་ཆེད་དུ་གདབ་པར་བྱ་བའི་ཕྱིར་དུ། འཁོར་ཁྱད་པར་ཅན་དང་བཅས་ཏེ་ང་རང་གནས་དེར་ཕྱིན་པ་ཡིན། དེའི་དུས་སུ་སྐྱེས་བུ་མཆོག་དམན་རབ་འབྲིང་ཚང་མ་ལའང་མགོན་པོ་འཇམ་པའི་དབྱངས་ཀྱི་ཐུགས་རྗེའི་བྱིན་རླབས་ཀྱི་འོད་ཟེར་དང་། སྤྲུལ་པ་རྣམ་པ་སྣ་ཚོགས་མ་མཇལ་བ་མེད་པ་ལྟ་བུར་གྱུར། དེའི་དུས་ན་མགོན་པོ་འཇམ་པའི་དབྱངས་ཀྱི་ཐུགས་རྗེ་དང་བྱིན་རླབས་ཀྱི་སྟོབས་ཀྱིས་ཁོ་བོའི་ཡིད་ལས་ཀྱང་ཆོས་ཚུལ་འདི་ལྟ་བུ་ཞིག་རྡོལ།

ཆོས་ཚུལ་འདི་ནི་སྐྱེས་བུ་མཆོག་དམན་སུས་ཉམས་སུ་བླངས་ཀྱང་། ཕན་པ་དང་བདེ་བ་བསམ་གྱིས་མི་ཁྱབ་པ་ཞིག་འབྱུང་བ་ཡིན། ཁྱད་པར་དུ་ནུབ་ཕྱོགས་ཀྱི་མི་རྣམས་ཀྱི་གཙོས་པའི་འགྲོ་བ་མང་པོ་ལ་ཆེད་དུ་བྱིན་རླབས་མྱུར་བ་དང་། ཁྱེད་རྣམས་ཀྱི་ཆོས་སྐལ་ཏུ་གྱུར་པའི་ཆོས་ཚུལ་ཟབ་མོ་ཉིད་དུ་གྱུར་ཡོད་པ་ཡིན། ད་ལོའི་གནས་སྐབས་ན་མགོན་པོ་འཇམ་པའི་དབྱངས་ཀྱི་ཐུགས་རྗེའི་བྱིན་རླབས་ཀྱི་སྟོབས་ཀྱིས་དབང་མེད་དུ་ཡུལ་ཁམས་འདི་ལ་བཀུག་འོང་བ་དང་། དེའི་སྐབས་སུ་ཁྱེད་འཁོར་སློབ་མང་པོ་ཡང་སྔོན་གྱི་ལས་ཀྱི་དབང་གིས་རང་བཞིན་གྱིས་འདུས་པ་རེད།

ད་རེས་ང་རང་གི་འཁོར་དུ་ཡོད་པའི་སློབ་ཚོགས་རྣམས་དང་ཁྱེད་འདིར་འཁོད་རྣམ་པ་འདུས་པ་དང་པོ་ལྟ་བུར་གྱུར་ཡོད་པས། ཆོས་འདི་ཉམས་སུ་བླངས་ན་བྱིན་རླབས་ལྷག་པར་དུ་ཆེ་བ་ཡིན། ཆོས་འདིའི་སྒྲུབ་ཐབས་དང་ཁྲིད་ཡིག་གང་ལ་བསམ་ཡང་ཆེ་བ་བཞི་དང་ལྡན་པ་ཡིན་ཏེ། གཅིག་ཆོས་འདིའི་ཚིག་ནི་ཧ་ཅང་ཉུང་ཉུང་དང་། དོན་ནི་སངས་རྒྱས་བཅོམ་ལྡན་འདས་རྗེས་འབྲང་དང་བཅས་པས་གསུངས་པའི་ཆོས་ཀྱི་གནད་མཐའ་དག་གཞུང་འདི་ཉིད་ལ་རྫོགས་ཡོད་པས་གནད་འདུས་པ་ཡིན། གཉིས་ཆོས་ཚུལ་གཞན་དང་མི་འདྲ་བར་ཡུན་རིང་པོའི་བར་དུ་སྦྱངས་པ་མ་བྱས་ཀྱང་བདེ་བླག་ཏུ་ཤེས་ནུས་པའི་ཞལ་ཧ་ཅང་གསལ་བ་ཡིན། གསུམ་བྱིན་རླབས་ཀྱི་ཚན་ཁ་ཡང་གཞན་ལས་ལྷག་པས་དུས་བབ་ཀྱི་ཆོས་ཡིན། དུས་སུ་བབ་ཅེས་པ་དེ་ཇི་ལྟ་བུ་ཞིག་ཡིན་ཞེ་ན། ཕྱི་རོལ་གྱི་དུས་དེ་ལ་འཕོ་འགྱུར་མང་པོ་ཞིག་འབྱུང་བས། དུས་རེ་རེ་བཞིན་དུ་དེ་དང་འཚམས་པའི་ཆོས་ཤིག་ཡོད་དགོས། དེ་ཡང་ཁ་རྩང་དེ་རིང་གི་དུས་ཚོད་ཏག་ཏག་འདི་ལ་ཉམས་སུ་ལེན་དགོས་པའི་ཆོས་ཤིག་ཡིན་འདུག བཞི་ཁྱེད་རྣམ་པ་ལྟ་བུ་ལ་ངེས་པར་དུ་ཕན་པའི་སྒེར་ཆོས་ཡིན། དཔེར་ན། ཚད་པའི་ནད་ལ་ག་བུར་ཐེབས་པ་ལྟ་བུར་རྒྱུད་ཀྱི་ལས་དང་ཉོན་མོངས་པ་ཐམས་ཅད་སེལ་བ་དང་། ཕན་པ་དང་བདེ་བ་སྦྱིན་པར་བྱེད་པའི་ཆོས་རྣམ་པར་དག་པ་ཞིག་ཡིན་པས། ད་ལྟ་ཁྱེད་རྣམས་ཀྱིས་དད་གུས་ཕུན་སུམ་ཚོགས་པ་དང་ལྡན་པའི་སྒོ་ནས་ཉོན། དེ་ལྟར་བཤད་མ་ཐག་པའི་ཆེ་བ་བཞི་དང་ལྡན་པའི་ཆོས་འདིའི་དབང་དང་ཁྲིད་ཞུ་བར་གྱིས། རྗེས་སུ་ཡང་ཁྱེད་རྣམ་པ་རང་རང་གིས་ཉམས་ལེན་བྱས་ནས་གཞན་སྐལ་བ་དང་ལྡན་པའི་གང་ཟག་རྣམས་ལའང་ཆོས་འདི་རྒྱ་ཆེར་སྤེལ་བར་གྱིས།

མདོར་ན་མགོན་པོ་འཇམ་པའི་དབྱངས་ཀྱི་བརྒྱུད་པ་ཟིན་ངེས་པར་བྱེད་པ་དེ་ཅི་ནས་ཀྱང་གལ་ཆེ་བ་ཡིན་པས་ཚང་མས་ཐུགས་ལ་ཞོག དེ་ལྟ་བུའི་ལོ་རྒྱུས་མདོར་བསྡུས་པ་ཙམ་ཞིག་གིས་ཁྱེད་རྣམས་ཀྱི་ཐུགས་ལ་སྤྲོ་བ་བསྐྱེད་ནས། དབང་ཞུ་བ་ལ་ནི་བླ་མ་ཉིད་ཀྱང་ཐ་མལ་མ་དག་པའི་གང་ཟག་མ་ཡིན་པར་འཇམ་དཔལ་ཡེ་ཤེས་སེམས་དཔའ་དངོས་ཡིན་སྙམ་པའི་དད་གུས་དང་ལྡན་པའི་སྒོ་ནས་བདག་ལ་སྨིན་བྱེད་ཀྱི་དབང་བསྐུར་ཟབ་མོ་གནང་བར་མཛད་དུ་གསོལ།

ཆོས་རྗེ་ཉིད་ཀྱིས་དབང་དོན་གྱི་ཡེ་ཤེས་ངོ་སྤྲོད་པའི་སྐབས་སུ་འདི་སྐད་དུ་གསུང་།

འཁོར་འདས་ཀྱི་ཆོས་ཐམས་ཅད་རང་གི་སེམས་ཀྱི་ཆོ་འཕྲུལ་ཙམ་མ་གཏོགས་ཕྱི་རོལ་ན་གང་ཡང་ཡོད་པ་མ་ཡིན་པའི་དོན་དེ་ཐོག་མར་ཤེས་དགོས། སེམས་དེ་ནི་མ་བརྟགས་ན་ཆུ་ནང་གི་ཟླ་གཟུགས་ལྟར་དུ་ཡོད་ཡོད་འདྲ་བ་ལྟ་བུར་སྣང་ཡང་། བརྟགས་ན་གང་ཡང་མི་གྲུབ་པའི་སྟོང་པ་ཉིད་ཀྱི་བདག་ཉིད་ཅན་དུ་ངོ་ཤེས་དགོས་པ་ཡིན། དེ་ཡང་ངོ་ཤེས་པ་ཙམ་གྱིས་མི་ཆོག་པར་དུས་རྒྱུན་དུ་ལྟ་བ་དེའི་ངང་དུ་འཇོག་དགོས། དེ་ལྟར་སྒོམ་པའི་ཚེ་ན་རྐྱེན་སྣང་བཟང་ངན་ཅི་འདྲ་བ་ཤར་ཡང་། དེ་ལ་དགག་སྒྲུབ་དང་རྟོག་དཔྱོད་མི་བྱེད་པར་ལྟ་བ་རང་གི་ངོ་བོའི་རྒྱུན་སྐྱོང་དགོས་པ་ཡིན། དེ་ལྟར་ཡང་ནས་ཡང་དུ་སྒོམ་པར་བྱས་ན་ད་ལྟ་རང་རང་རྣམས་ཀྱི་རྒྱུད་ལ་ཡོད་པའི་འདོད་ཆགས་དང་། ཞེ་སྡང་། གཏི་མུག ང་རྒྱལ། ཕྲག་དོག་ལ་སོགས་པ་ཤིན་ཏུ་མ་རུངས་བའི་རྟོག་པ་ངན་པ་འདི་དག་ཀུན་ཀྱང་ནམ་ཞིག་ན། རླུང་ནག་དྲག་པོ་ནམ་མཁའ་ལ་ཡལ་བ་བཞིན་དུ་དབྱིངས་སུ་དེངས་ནས། སངས་རྒྱས་ཀྱི་ཐུགས་རྒྱུད་ཀྱི་ཡོན་ཏན་ཐམས་ཅད་ཀྱང་མ་བཙལ་ལྷུན་གྱིས་གྲུབ་པར་འགྱུར་བ་ཡིན། དེས་ན་དོན་དེ་དག་ལ་རྫོགས་པ་ཆེན་པོའམ་ཕྱག་རྒྱ་ཆེན་པོའི་ལྟ་བ་དང་། སྒོམ་པ། སྤྱོད་པ། འབྲས་བུ་ཡང་ཟེར་བ་ཡིན།

བདག་གི་འགྲམ་སོ་གཅིག་སྦས་ཡོད།

ངེད་ཅག་རྡོ་རྗེ་འདན་མ་གླིང་དུ་སྡོད་སྐབས། དེའི་ཁོར་ཡུག་གི་མཛེས་ལྗོངས་ཧ་ཅང་ཡིད་དབང་འཕྲོག་པ་ཞིག་ཡིན་ཡང་། ང་ལ་དེར་ལོངས་སུ་སྤྱོད་པའི་མོས་འདུན་མེད་དེ། གཅིག་ནས་ཆོས་རྗེ་ཉིད་ཀྱི་སྐུ་འགྲམ་དུ་བྱ་བ་ཧ་ཅང་མང་བས་ཉིན་རེ་བཞིན་ཁོམ་ལོང་གི་སྐབས་ཤིན་ཏུ་ཉུང་བ་དང་། གཉིས་ནས་བདག་གི་སོ་གློ་བུར་དུ་ན་ནས་ཉིན་ཁ་ཤས་ལ་གཉིད་ཀྱང་མི་ཁུག་པར་ཟུག་གཟེར་གྱིས་གདུང་བར་གྱུར་བས། ང་ཚོ་བོད་ཀྱི་གཏམ་དཔེ་ལ། འཆི་བའི་ནད་ལ་མགོ་ནད་སྐྱིད། །མི་འཆིའི་ནད་ལ་སོ་ནད་སྡུག །ཅེས་ཟེར་བ་དེ་ངོ་མ་བདེན་པ་རེད་སྙམ་པ་བྱུང་།

དེ་ལྟར་སོ་ན་ནས་དུས་ཡུན་ངེས་ཅན་སོང་ཡང་དྲག་སྐྱེད་མ་བྱུང་རྐྱེན། ཉིན་ཞིག་བདག་གཅིག་པུར་ཉེ་ཟུར་གྱི་གྲོང་ནང་དུ་སྨན་ཁང་འཚོལ་དུ་སོང་ཞིང་། ཕལ་ཆེར་སྤྱི་ལེ་གཅིག་ཙམ་སོང་བ་ན་སོ་ནད་བརྟག་བཅོས་ཁང་ཞིག་རྙེད། སྨན་ཁང་དེའི་སྨན་པའི་རྣམ་འགྱུར་ཤིན་ཏུ་ལེགས་ཤིང་། ང་ལ་བཟི་སྨན་བཏང་སྟེ་འགྲམ་སོ་གཅིག་བཏོན་སོང་། སོ་བཅད་པའི་སྨན་ཡོན་ལ་ཁེ་ན་ཏའི་སྒོར་མོ་བདུན་ཅུ་ཙམ་རེད་ལ། དམངས་སྒོར་ལ་བསྒྱུར་ན་སྒོར་༣༥༠ལྷག་ཐོབ་འདུག་པས། རིན་གོང་མཐོན་པོ་ཡིན་པ་ཤེས་རྗེས་སོ་མི་ན་ཡང་སེམས་ཅུང་ཟད་ན་བར་གྱུར། སྐབས་དེར་ང་ཚོ་བོད་ཡུལ་ནས་སོ་གཅིག་བཅད་ན་ཇི་ལྟར་གོང་ཆེ་ཡང་དམངས་སྒོར་ཁ་ཤས་ལས་སྤྲད་མི་དགོས།

བདག་ཕྱིར་ལོག་པའི་ལམ་བར་གྱི་ས་སྟོང་ཞིག་ཏུ། རིན་གོང་མཐོན་པོ་སྤྲད་ནས་བཅད་པའི་སོ་དེ་སྨོན་ལམ་བཟང་པོའི་མཚམས་སྦྱོར་དང་བཅས་ཏེ་ས་འོག་ཏུ་སྦས་པ་ཡིན། རྗེས་སུ་ཁེ་ན་ཏར་འགྲོ་རྒྱུའི་གོ་སྐབས་རེ་བྱུང་ན། ས་ཆ་དེ་ནས་སོ་སྦེད་ཡུལ་དེ་ཡང་འཆུགས་མེད་དུ་རྙེད་སྲིད།

དབང་གཉིས་བསྐུར་བ།

ཕྱི་ཟླ་༨པའི་ཚེས་༢༡ཉིན་གྱི་སྔ་དྲོར། དབང་གཉིས་གནང་བའི་དང་པོ་ཕུར་བ་མགུལ་ཁུག་མའི་དབང་གི་སྔོན་དུ་བྱ་བའི་ཆོས་རྣམས་གོང་དུ་གྲུབ་ཟིན་ནས་དབང་གི་ལོ་རྒྱུས་གསུང་པའི་སྐབས་སུ་བབས་པ་ན། ཆོས་རྗེ་མཆོག་གིས་འདི་ལྟར་གསུང་།

སྔོན་གྱི་དུས་སུ་ཨོ་རྒྱན་སངས་རྒྱས་གཉིས་པས་བོད་ཀྱི་ལྷ་སྲིན་མ་རུངས་པ་ཐམས་ཅད་དམ་འོག་ཏུ་བཙུད་པ་དང་། བོད་ཡུལ་དུ་སངས་རྒྱས་ཀྱི་བསྟན་པ་དར་ཞིང་རྒྱས་པར་བྱ་བའི་ཆེད་དུ། བལ་ཡུལ་ཡང་ལེ་ཤོད་ཀྱི་བྲག་ཕུག་ནས་རྩེ་གཅིག་ཏུ་བསྙེན་སྒྲུབ་ལ་གཞོལ་བའི་དུས་སུ་དཔལ་རྡོ་རྗེ་གཞོན་ནུ་དང་སྐལ་བ་མཉམ་པའི་དངོས་གྲུབ་ཐོབ། ཕྱག་རྒྱ་ཆེན་པོ་མཆོག་གི་ས་ནོན་ཏེ། ཕུར་པའི་རྒྱུད་དང་སྒྲུབ་ཐབས་མཐའ་དག་གི་དོན་ཡང་ཁོང་གི་ཐུགས་ལམ་དུ་བཀྲ་ལམ་མེར་ཤར། དེའི་དུས་སུ་ཨོ་རྒྱན་རིན་པོ་ཆེས་དགོས་པ་ཁྱད་པར་ཅན་གཟིགས་ལ། དེ་ཡང་གཏེར་གཞུང་རྩ་བ་ལས། རང་བྱུང་པདྨ་རྒྱལ་པོ་ངས། །བྷི་ཏོ་ཏ་མའི་རྒྱུད་ཀུན་ཀྱི། །སྙིང་པོ་མཐར་ཐུག་འདི་ཁོ་ན། །ཛི་ན་མི་ཏྲ་ཁྱོད་ལ་གཏད། །ཡལ་བར་མ་དོར་ཉམས་སུ་ལོངས། །ཕྱིས་འབྱུང་དུས་ཀྱི་ཐ་མ་ལ། །ཁྱོད་ཀྱི་སྤྲུལ་པའི་སྐྱེས་བུ་དང་། །འཕྲད་ནས་བསྟན་པ་སྐྱོང་བར་འགྱུར། །ཞེས་ཉེ་བའི་གདུལ་བྱ་བལ་པོའི་རྒྱལ་པོ་ཛི་ན་མི་ཏྲ་ལ་སོགས་པའི་འཁོར་ཚོགས་ལྔ་དང་། ཕྱི་མའི་དུས་ཀྱི་ཚེ་ན་སྐྱེ་བོ་མང་པོ་ལ་ཕན་ཞིང་བདེ་བར་བྱ་བའི་ཕྱིར་དུ། ཕུར་པ་མགུལ་ཁུག་མའི་གདམས་པ་འདི་ཉིད་ཨོ་རྒྱན་རིན་པོ་ཆེས་རང་གི་མགུལ་ཁུག་ལས་ཕྱུང་སྟེ། ཛི་ན་མི་ཏྲ་ལ་སྨོན་ལམ་གྱི་གཏད་རྒྱ་དང་བཅས་ཏེ་ཡོངས་སུ་གཏད་པ་དང་། ཕུར་སྲུང་མ་མོ་བཅུ་གཉིས་ལ་སོགས་པའི་ཆོས་སྐྱོང་བའི་སྲུང་མ་རྣམས་ལ་ཕྲིན་ལས་གཉེར་དུ་གཏད་དེ། ཕྱི་མའི་དུས་ན་དར་ཞིང་རྒྱས་ལ་ཕུན་སུམ་ཚོགས་པ་འོང་དགོས་པའི་ལུང་བསྟན་དང་བཅས་ཏེ་གསལ་བར་བཀའ་བསྩལ་བ་བཞིན། ཕྱིས་སུ་གནས་དང་། དུས། འཁོར་གྱི་རྟེན་འབྲེལ་ཕུན་སུམ་ཚོགས་པའི་སྐབས་དེར་རྗེས་དྲན་གྱི་ཚུལ་དུ་ཆོས་འདི་གཏན་ལ་ཕབ་པ་ཡིན། དེ་དག་གི་ལོ་རྒྱུས་ནི་སྔོན་ཆད་རི་བོ་རཱོ་ཁཱེས་ཀྱི་རི་ཁྲོད་དུ་ཅུང་ཟད་རྒྱས་སྤྲོས་ཀྱི་ཚུལ་དུ་བཤད་པ་དེ་ཚང་མས་ཐུགས་ལ་ངེས་པར་གྱིས།

དེ་ནས་རྡོ་རྗེ་གྲོ་ལོད་ཀྱི་དབང་གི་སྐབས་སུ་འཕྲོས་དོན་གསུང་པ་འདི་ལྟར།

དེ་ལ་གང་གསན་པར་བྱ་བའི་ཆོས་ནི། འབྲུག་ཡུལ་སྤ་གྲོ་སྟག་ཚང་གི་གནས་སུ་གྲོ་ལོད་བདེ་གཤེགས་ཡོངས་འདུས་ཀྱི་གཏེར་ཁ་ཟབ་མོ་ལས་ཁོལ་དུ་བྱུང་བའི་ལུས་དཀྱིལ་མདོར་བསྡུས་པ་ཞིག་ཡོད་པ་འདི་ཉིད་ཀྱི་དབང་བསྐུར་བའི་སྐབས་སུ་བབ་པ་ཡིན། ཆོས་ཚུལ་འདི་ནི་འཛམ་བུ་གླིང་གི་སྐྱེ་འགྲོ་མཆོག་དམན་སུས་ཉམས་སུ་བླངས་ཀྱང་ཚེ་འདིར་ཚེ་རིང་བ་དང་། ནད་མེད་པ་དང་། ལོངས་སྤྱོད་ཆེ་བ་དང་། ཁྱད་པར་དུ་འགལ་རྐྱེན་བར་ཆད་ཐམས་ཅད་ཡོངས་སུ་ཞི་བར་བྱ་བའི་དགོས་པ་ཁྱད་པར་ཅན་ཞིག་ཡོད་པ་ཡིན། ཚེ་འདི་འཕོས་མ་ཐག་ཏུ་རྔ་ཡབ་དཔལ་གྱི་རི་བོ་པདྨ་འོད་ཀྱི་ཕོ་བྲང་ངམ་ནུབ་ཕྱོགས་བདེ་བ་ཅན་གྱི་ཞིང་ཁམས་སུ་སྐྱེས་ཏེ། ཟག་པ་མེད་པའི་བདེ་འབྲས་བསམ་གྱིས་མི་ཁྱབ་པ་ལ་ལོངས་སྤྱོད་ནས། ཞི་བ་མཆོག་ཐམས་ཅད་མཁྱེན་པའི་གོ་འཕང་འཐོབ་པར་བྱེད་པའི་ཉེར་རྒྱུ་ཐུན་མོང་མ་ཡིན་པ་ཞིག་ཡིན། ཁྱད་པར་དུ་ཆོས་ཚོགས་འདིའི་སློབ་མ་ཚང་མས་ཆོས་འདི་ཉམས་སུ་བླངས་ན་བསམ་པ་ཐམས་ཅད་ཡིད་བཞིན་དུ་འགྲུབ་པའི་དགོས་པ་ཁྱད་པར་ཅན་ཞིག་ཡོད། དེའི་རྒྱུ་མཚན་དེ་ཡང་མཁའ་འགྲོའི་བརྡ་ལུང་སོགས་ལས་གསལ་པོར་ཐག་ཆོད་པ་ཞིག་མ་བྱུང་ཡང་། ང་རང་གིས་ཚོད་འཇོག་གི་ཡིད་ཆེས་ཀྱི་དབང་དུ་བྱས་ན། དྲུང་པ་རིན་པོ་ཆེས་སྔོན་ཆད་རྡོ་རྗེ་གྲོ་ལོད་ཀྱི་གཏེར་ཆོས་ཤིག་འབྲུག་སྤ་གྲོ་སྟག་ཚང་ནས་བཏོན་པ་དེ་དང་། འདི་གཉིས་ཀའང་ཆོས་གཅིག་པ་ལྟ་བུ་རུ་གྱུར་ཡོད་པ་རེད་བསམ། དེས་ན་ང་རང་གིས་བླངས་པའི་རྡོ་རྗེ་གྲོ་ལོད་ཀྱི་ཆོ་ག་དེ་ཉམས་བཞེས་བྱས་ན་ཁྱེད་ཆོས་ཚོགས་ཀྱི་སློབ་མ་ཚང་མའི་ཐུགས་བཞེད་གེགས་མེད་དུ་འགྲུབ་པ་དང་། སངས་རྒྱས་ཀྱི་བསྟན་པ་ལ་ཕན་ཐོགས་རྒྱ་ཆེན་པོ་འོང་རྒྱུ་རེད་སྙམ་པའི་ཡིད་ཆེས་ང་ལ་ཡོད། རྗེས་མ་ཡང་ཆོས་འདི་ཉམས་སུ་ལེན་སྟངས་ནི། ཁྱེད་རྣམ་པས་ང་རང་གི་གཏེར་ཆོས་འདི་ཉམས་སུ་བླངས་ན་ཆོག་ལ། ཁོང་གིས་གསུངས་པའི་ཆོས་དེ་ཉམས་སུ་བླངས་ན་ཡང་ཆོག གང་ལྟར་ཆོས་ཚོགས་འདིའི་སློབ་མ་ཚང་མས་ཐུགས་དམ་གྱི་རྩ་བ་དེ་འདི་ཁོ་ན་བྱེད་དགོས་པར་སྣང་། དེ་ཡང་ངས་བྷོ་སི་ཐིན་ནས་སྤྱི་དང་བྱེ་བྲག་གི་དགོས་པ་ཡོད་ཚུལ་གྱི་ལོ་རྒྱུས་རྒྱ་ཆེན་པོ་ཞིག་བཤད་ཡོད། དེ་འགའ་ཞིག་གི་ཐུགས་ལ་ལོན་ཚར་ཡོད་རྒྱུ་རེད། དེར་མ་གཏོགས་པའི་གཞན་ཞིག་བཤད་རྒྱུ་མེད། ང་ཨ་མེ་རི་ཁའི་ཡུལ་ཁམས་འདི་ལ་ཐོན་ནས་ཟླ་བ་གཉིས་ཡིན་ཡང་དབང་འདི་ཁྱེད་ཚོའི་ཆོས་ཚོགས་མ་གཏོགས་མང་པོར་བསྐུར་མེད། དེས་ན་ཁྱེད་ཚོའི་ཆོས་ཚོགས་རྐྱང་པའི་སྒེར་གྱི་ཆོས་སྐལ་ཞིག་ཡིན་པ་གོ་བར་གྱིས། བདག་གིས་གཞན་ལ་སྦྱིན་མ་བྲ་བའི་ཟ་མ་ཞིམ་པོ་ཞིག་ཡོད་པ་ཁྱེད་ཚོའི་ཆོས་ཚོགས་སྒེར་ལ་སྦྱིན་པ་ལྟ་བུ་ཡིན་པ་དེ་གོའམ། ༼དགོད་སྒྲ།༽

དབང་བསྐུར་ནས་དངོས་གཞིའི་སྐབས་ཤིག་ཏུ་སླར་ཡང་འདི་ལྟར་གསུང་།

དཔེར་ན་ནམ་མཁའི་ཁམས་ལ་སྤྲིན་དང་རླུང་ལ་སོགས་པ་ཇི་ལྟར་གཡོས་ཀྱང་། དང་པོ་ཤར་ཡང་ནམ་མཁའི་ཀློང་ནས་ཤར། ཐིམ་ཡང་ནམ་མཁའི་ཀློང་དུ་ཐིམ། ནམ་མཁའི་ཀློང་ལས་གཞན་དུ་མི་འགྱུར་བ་བཞིན་དུ་སྣང་བ་སྣོད་ཀྱི་འཇིག་རྟེན་དང་། སྲིད་པ་བཅུད་ཀྱི་སེམས་ཅན་ཇི་སྙེད་ཅིག་སྣང་བ་ཐམས་ཅད་ཀུན་ཀྱང་། རྨི་ལམ་གྱི་སྣང་བ་བཞིན་དུ་སེམས་ཀྱི་ཆོ་འཕྲུལ་ཡིན་པར་ཐོག་མར་ཐག་གཅད་དགོས་པ་ཡིན། འཕྲོ་གཞི་སེམས་དེ་ཅི་འདྲ་ཞིག་ཡིན་སྙམ་ན། མ་བརྟག་ན་ཆུ་ནང་དུ་ཟླ་བའི་གཟུགས་བརྙན་ཤར་བ་བཞིན་དུ་ཡོད་ཡོད་འདྲ་བ་ལྟར་སྣང་ཡང་། རྣམ་པར་བརྟགས་ཤིང་དཔྱད་ན་ཕྱི་ནང་བར་གསུམ་གང་དུ་ཡང་མ་གྲུབ་པའི་སྟོང་པ་ཉིད་ཀྱི་རང་བཞིན་ཅན་ལ་སེམས་ཐག་ཆོད་པ་དེ་ལ་ལྟ་བ་ཞེས་བྱ། ལྟ་བ་དེའི་རྒྱུན་སྐྱོང་པ་ལ་ནི་སྒོམ་པ་ཞེས་བྱ། སྒོམ་པ་དེའི་རྩལ་སྦྱོང་བར་བྱེད་པ་ལ་སྤྱོད་པ་ཞེས་བྱ། དེ་ནས་སྒོམ་པའི་བཙན་ས་ཟིན་པ་ལ་འབྲས་བུ་ཞེས་བྱ། དེ་ལྟ་བུའི་དོན་ཇི་བཞིན་དུ་རྟོགས་པ་དེ་ནི་ཀརྨ་པ་པཀྵི་ཞེས་བྱ་བ་ཡིན་ལ། གུ་རུ་རྡོ་རྗེ་གྲོ་ལོད་ཀྱང་དེ་ཡིན། མདོར་ན་དེ་གཉིས་ཀ་ཡང་རང་གི་སེམས་དང་དབྱེར་མེད་པའི་རང་བཞིན་ཅན་ཡིན་པ་དེ་ངོ་ཤེས་པར་གྱིས་ཤིག་ཅེས་ངོ་སྤྲོད་པའི་ཚིག་འདི་ལ་གསན་པར་ཞུ། བོད་ཀྱི་བླ་མ་རྣམས་ཀྱི་ནང་ནས་ཀརྨ་པ་པཀྵི་དམིགས་བསལ་དུ་བཤད་དགོས་དོན་དེ་ལ་རྒྱུ་མཚན་ཞིག་ཡོད། སྤྱིར་དྲུང་པ་རིན་པོ་ཆེའི་རྡོ་རྗེ་གྲོ་ལོད་དེ་ཡང་ཀརྨ་པ་པཀྵི་དང་གུ་རུ་རྡོ་རྗེ་གྲོ་ལོད་གཉིས་ངོ་བོ་དབྱེར་མེད་དུ་སྒྲུབ་པའི་སྒྲུབ་ཐབས་ཤིག་ཡིན། སྔོན་གྱི་ལོ་རྒྱུས་ཀྱི་དབང་དུ་བྱས་ན་ཡང་། ཨོ་རྒྱན་རིན་པོ་ཆེའི་བླ་མ་དགོངས་པ་འདུས་པའི་ནང་ན། ཀརྨ་པ་དུས་གསུམ་མཁྱེན་པ་དང་པཀྵི་ལ་སོགས་པ་ཚང་མ་ཡང་ཨོ་རྒྱན་རིན་པོ་ཆེ་ཁོང་གི་སྤྲུལ་པ་ཡིན་ཞེས་ལུང་བསྟན་པ་ཡིན། ཀརྨ་པ་པཀྵི་རྒྱ་ནག་རྒྱལ་པོའི་དབུ་བླ་ལ་འཁོད་པའི་དུས་སུ་ཁོང་ཉིད་ཀྱིས་ཀྱང་རྫུ་འཕྲུལ་རྣམ་པ་སྣ་ཚོགས་བསྟན་ནས། ང་རེས་འགའ་ཨོ་རྒྱན་པདྨ་འབྱུང་། །རེས་འགའ་གྲུབ་ཆེན་ས་ར་ཧ། །ཞེས་ཁོང་གིས་ཀྱང་ཨོ་རྒྱན་རིན་པོ་ཆེ་ཡིན་པར་ཞལ་གྱིས་བཞེས་ཡོད། དེ་ཡང་ངས་དམིགས་ཡུལ་གཞན་པའི་སྒོ་ནས་ཁྱེད་རྣམ་པ་དགའ་བའི་ཆེད་དུ་སྐད་ཆ་དེ་བཤད་པ་མིན། དོན་དངོས་སུ་ཀརྨ་པ་པཀྵི་དང་གུ་རུ་རྡོ་རྗེ་གྲོ་ལོད་གཉིས་རང་སེམས་དང་དབྱེར་མེད་པ་ལྟ་བུར་གྱུར་ཡོད་པས་ཡིན།

ཆོས་འདིའི་མཇུག་ཏུ་ཆོས་གཞན་བཞིན་དུ་བཀྲ་ཤིས་དང་སྨོན་ལམ་གཞན་འདོན་རྒྱུ་མིན། ཐམས་ཅད་ཀྱིས་སྣང་བ་རྡོ་རྗེ་གྲོ་ལོད་ཀྱི་སྐུ་དང་། སྒྲ་གྲགས་རྡོ་རྗེ་གྲོ་ལོད་ཀྱི་གསུང་། དྲན་རྟོག་རྡོ་རྗེ་གྲོ་ལོད་ཀྱི་ཐུགས་ཀྱི་རང་བཞིན་ཅན་གྱི་ང་རྒྱལ་དང་མ་བྲལ་བའི་ངང་ནས། སྤྱོད་ལམ་གཞན་ལ་འཇུག་དགོས་གསུངས་འདུག་པས་དེ་མ་གཏོགས་གཞན་ཅི་ཡང་ཡོད་པ་མིན།

དབང་ཐམས་ཅད་བསྐུར་ཚར་བའི་རྗེས་སུ་ཞལ་གདམས་གསུང་པ་འདི་ལྟར།

ང་རང་ད་ལོ་ནུབ་ཕྱོགས་ཀྱི་རྒྱལ་ཁབ་ཨ་རིའི་སྐམ་སྒང་ཆེན་པོ་ལ་ཐོག་མར་ཐོན་པ་ནས་བཟུང་། ཁྱེད་ཚོའི་ཆོས་ཚོགས་དང་འཕྲད་ཅིང་རང་ཅག་མཉམ་དུ་ཐེག་པ་ཆེན་པོའི་ཆོས་ཀྱི་དགའ་སྟོན་བསམ་གྱིས་མི་ཁྱབ་པ་ལ་རོལ། ད་ལྟ་ཨ་རིའི་རྒྱལ་ཁབ་དང་ཁེ་ན་ཏའི་རྒྱལ་ཁབ་གཉིས་ཆར་གྱི་ཆོས་ཀྱི་མཛད་སྒོ་ཚང་མ་མཇུག་དྲིལ་བའི་གནས་སྐབས་ནའང་། ཆོས་ཚོགས་འདི་དང་མཉམ་དུ་གཏམ་བཤད་བྱས་ཏེ་འགྲོ་བའི་དུས་ལ་བབ་ཐལ། འུ་ཅག་ཚང་མས་ཐོག་མཐའ་བར་གསུམ་དུ་ཕན་ཚུན་ཆེད་དུ་འབྲེལ་བ་ཁོ་ན་བྱས་ཏེ་བསྒྲུབས་པ་མིན་ཡང་། རྟེན་འབྲེལ་བཟང་པོ་མ་བསྒྲིགས་རང་འགྲིགས་སུ་གྱུར་བས། དགེ་ལེགས་ཕུན་སུམ་ཚོགས་པའི་བྱ་བ་བཟང་པོ་ལེགས་པར་གྲུབ་སོང་། དེའི་རྒྱུ་མཚན་ཡང་སྔོན་གྱི་སྨོན་ལམ་དང་རྟེན་འབྲེལ་གྱི་གནད་བསམ་གྱིས་མི་ཁྱབ་པ་ཞིག་ཡོད་རྒྱུ་རེད། ཁྱེད་རྣམ་པ་ཚང་མས་ང་ལ་ཆོས་ཀྱི་འབྲེལ་པ་བཞག་པར་མ་ཟད། འཇིག་རྟེན་ཕྱོགས་ཀྱི་མཛའ་བརྩེ་ཡང་བསམ་གྱིས་མི་ཁྱབ་པ་གནང་བ་ལ་ཐུགས་རྗེ་ཆེ་ཞེས་ཞུ་བ་ཡིན། ཁྱེད་ཆོས་ཚོགས་ཁག་ཕན་ཚུན་ཐུགས་མཐུན་པ་དང་། བྱ་བ་གཅིག་འགྱུར་གྱི་སྒོ་ནས་ཆོས་དང་མཐུན་པའི་བྱ་བ་ཡར་རྒྱས་སུ་འགྲོ་བའི་སྨོན་འདུན་བཟང་པོ་ཞུ་རྒྱུ་ཡིན། ངས་ཡང་བསྐྱར་དུ་ཞུ་རྒྱུ་ཞིག་ལ། དྲུང་པ་རིན་པོ་ཆེས་དཀའ་བ་དང་དུ་བླངས། ངལ་བ་ཁྱད་དུ་བསད། ལུས་སྲོག་འབེན་དུ་བཙུགས་ནས་ནུབ་ཕྱོགས་ཀྱི་རྒྱལ་ཁབ་འདི་ལ་འོང་ནས་བསྟན་པ་དང་སེམས་ཅན་གྱི་དོན་སྒྲུབ་པའི་རེ་བ་དེ། ཁྱེད་རྣམ་པས་ཀྱང་ནི་མཐར་འཁྱོལ་དུ་བྱུང་བ་ལ་འབད་རྩོལ་བྱེད་པར་སྙིང་ནས་ཞུ་བ་ཡིན། ཁོང་གི་མཛད་པ་དག་འུ་ཅག་གིས་དྲན་དགོས། དེ་ཡང་དང་པོའི་གནས་སྐབས་ན་ནུབ་ཕྱོགས་ཀྱི་རྒྱལ་ཁབ་རྣམས་ལ་ཆོས་མ་དར་བའི་སྐབས་ཡིན་པས་ན། ཁོང་གིས་མེ་ཏོག་རེ་རྨོས། ལྗོན་ཤིང་རེ་བཙུགས་པ་ལྟ་བུའི་མཐུན་འཇུག་གི་སྤྱོད་པ་མཛད་ནས་དཀའ་ལས་ཆེན་པོ་ཞིག་བརྒྱབ། རྗེས་མར་ཆོས་ཚོགས་ཁག་འདི་ལྟ་བུ་ཚུགས་ཐུབ་པ་དེ་ནི་དཔེར་ན་རྒྱལ་སྲས་འཇམ་དཔལ་དཔའ་བོའི་སྙིང་སྟོབས་ལྟ་བུའི་སྙིང་སྟོབས་ཚད་མེད་པ་ཞིག་རེད་བསམས་ནས། ངས་ཁོང་གི་མཛད་པ་དེ་ལ་སྙིང་རྗེ་ཡང་སྐྱེས་ཐལ། དད་པ་ཡང་སྐྱེས་ཐལ། གསོལ་འདེབས་ཀྱང་བྱེད་དགོས་ཐུག་ཐལ། ཁྱེད་རྣམ་པས་ཀྱང་དེ་ལྟར་ཡིད་ལ་ཟུངས། འུ་ཅག་དཔོན་སློབ་ཚང་མ་ཚེ་འདིར་ཡང་ནས་ཡང་དུ་འཕྲད་ཅིང་ཐེག་པ་ཆེན་པོའི་ཆོས་ལ་མཉམ་དུ་ལོངས་སྤྱོད་པ་དང་། ཚེ་འདི་འཕོས་མ་ཐག་ཏུ་ནུབ་ཕྱོགས་བདེ་བ་ཅན་གྱི་ཞིང་ཁམས་སུ་སྐྱེས་ནས་མགོན་པོ་འོད་དཔག་མེད་ཀྱི་དྲུང་དུ་ཞལ་འཛོམས་འོང་བའི་སྨོན་འདུན་ཞུ་བ་ཡིན། བཀྲ་ཤིས་བདེ་ལེགས།

ཐུན་མིན་གྱི་དད་པ།

ཉིན་དེའི་ཉིན་གུང་། ཆོས་རྗེ་ཉིད་ཁེ་ན་ཏའི་ས་ཆ་ནས་འབྱོན་གྲབས་ཡིན་པས། རྡོ་རྗེ་ཆོས་ཚོགས་ཀྱི་ཆོས་སྲུང་རྣམས་ཀྱིས། ཁོ་རང་ཚོའི་སྲོལ་རྒྱུན་ལྟར་ཆེས་ཚད་མཐོ་བའི་གུས་ཞབས་ཀྱི་རྣམ་པའི་སྒོ་ནས། ཆོས་རྗེ་ཉིད་ལ་ཤམྦྷ་ལའི་དམག་སྦྱོང་འཁྲབ་སྟོན་དང་ཤམྦྷ་ལའི་བསྟོད་གླུ་བླངས་ནས་ཆོས་ཀྱི་མཆོད་པ་དམིགས་བསལ་གྱིས་ཕུལ་བར་མ་ཟད། མ་འོངས་པར་ནང་པ་སངས་རྒྱས་པའི་ཆོས་ལུགས་བདུད་སྲིན་ལས་རྣམ་པར་རྒྱལ་བའི་རྟེན་འབྲེལ་བསྒྲིགས།

ཆོས་རྗེ་ཉིད་བོད་ཡུལ་དུ་བཞུགས་སྐབས་ཀྱང་། རྡོ་རྗེའི་གླུ་གར་དང་གེ་སར་གྱི་སྒྲུང་འཁྲབ་སྟོན་སོགས་ལ་ཐུགས་ཤིན་ཏུ་མཉེས་པོ་ཡོད་པས། ཁོང་གིས་ཧ་ཅང་གཟབ་ནན་གྱིས་འཁྲབ་སྟོན་ལ་གཟིགས་ཤིང་ཐུགས་ཀྱང་རབ་ཏུ་དགྱེས་པའི་ཚུལ་མཛད།

འདི་འདྲའི་དམག་སྦྱོང་ནི་ཆོས་རྗེ་དྲུང་པ་རིན་པོ་ཆེས་གདུལ་བྱ་རྣམས་ལ་ཤེས་རབ་དང་དྲན་ཤེས་ཀྱི་སྒོ་ནས་རིག་ངོ་བསྐྱངས་ཏེ། འདོད་ཆགས་དང་ཞེ་སྡང་། གཏི་མུག་བཅས་དུག་གསུམ་བཏུལ་ནས་ཐམས་ཅད་དགེ་བའི་ཕྱོགས་ལ་འཁྲིད་པའི་ཐབས་མཁས་ཀྱི་སྤྱོད་པ་ཞིག་ཡིན། ལྟར་སྣང་ལ་རང་དབང་ཁོ་ན་སྙེགས་པ་ལས་སྒྲིགས་ལམ་སོགས་ཀྱི་བཀག་རྒྱ་ལ་མི་དགའ་བའི་ནུབ་ཕྱོགས་པ་རྣམས་ཀྱིས་ཀྱང་། ཆོས་ཚོགས་འདིར་དམག་མི་ངོ་མ་ལྟར་ཕྲེང་བསྒྲིགས་ཤིང་ཁ་འབོད་བསྒྲགས་ཏེ། དད་གུས་ཀྱི་སྒོ་ནས་སྒྲིགས་ལམ་བརྩི་ཞིང་བཀའ་ལ་ཉན་པ་ནི་ཆེས་བསམ་ཡུལ་ལས་འདས་པ་ཞིག་ཏུ་སྣང་།

ང་ཚོས་འཁྲབ་སྟོན་དེར་ལྟད་མོ་བལྟས་རྗེས། ཆོས་རྗེ་ཉིད་ཀྱིས་རྡོ་རྗེ་ཆོས་སྲུང་རྣམས་ལ་ཞལ་གདམས་གསུངས་ཤིང་། གསུང་བཤད་གནང་བའི་བརྒྱུད་རིམ་ཁྲོད་དུ། ཆོས་རྗེ་དྲུང་པ་རིན་པོ་ཆེའི་མཚན་བརྗོད་ཐེངས་རེ་རེར། དེར་འཁོད་ཀྱི་མི་ཚང་མའི་མིག་ནས་མཆི་མ་ཐོན་ཞིང་དད་པ་བླ་ལྷག་ཏུ་སྐྱེས་པའི་རྣམ་པ་མངོན། ཁེ་ན་ཏ་ཙམ་དུ་མ་ཟད། ང་ཚོ་ཨ་རིའི་ཆོས་ཚོགས་རྣམས་སུ་འགྲོ་སྐབས་ཀྱང་། ཁོང་གི་སློབ་མ་རྣམས་ཀྱིས་ནམ་རྒྱུན་དེ་ལྟར་མཛད་ཀྱིན་པ་མཐོང་།

བདག་གིས་ཆོས་ཚོགས་དེའི་མི་འགའ་ལ། དྲུང་པ་རིན་པོ་ཆེའི་མཚན་བརྗོད་པ་ན་སློབ་མ་རྣམས་ལ་ནམ་རྒྱུན་དང་མི་འདྲ་བའི་རྣམ་འགྱུར་བྱུང་བ་ཅིའི་ཕྱིར་ཡིན་ཞེས་དྲིས་པ་ན། ང་ཚོས་ཀྱང་རྒྱུ་མཚན་ཤེས་ཀྱིན་མེད་མོད། ནམ་རྒྱུན་བླ་མའི་མཚན་ཐོས་ཐེངས་རེར། སྔོན་བླ་མ་དང་ངེད་ཚོ་ལྷན་ཅིག་ཏུ་གནས་པའི་བདེ་སྐྱིད་ལྡན་པའི་ཡུལ་ངོས་དག་དྲན་སོས་ཡོང་ཞིང་། སེམས་གཏིང་དུ་ཉར་བའི་བླ་སློབ་ཀྱི་བརྩེ་བ་ཁྱད་པར་ཅན་དེའང་བསླངས་ཡོང་བས། རང་དབང་མེད་པར་མིག་ཆུ་བཞུར་ཡོང་གིན་འདུག་ཟེར།

སྤྱིར་བཏང་བླ་མའི་དགོངས་བརྒྱུད་ཀྱི་བྱིན་རླབས་སློབ་མའི་རྒྱུད་ལ་འཕོས་ནས། སློབ་མ་ལ་བརྗོད་ལས་འདས་པའི་ཕན་པ་བྱུང་བ་ནི་ཆོས་པ་ཞིག་ལ་མཚོན་ན་ཆེས་གལ་ཆེ་བ་ཡིན་ཞིང་། ཆོས་རྗེ་དྲུང་པ་རིན་པོ་ཆེས་སློབ་མ་རྗེས་སུ་འཛིན་སྟངས་དེ་སྲོལ་རྒྱུན་གྱི་ཐབས་ཚུལ་དང་ཅུང་ཟད་མི་འདྲ་ཡང་། ཁོང་གི་ཐུགས་བསྐྱེད་རྒྱ་ཆེན་པོ་དང་ཐབས་མཁས་ཀྱི་སྤྱོད་སྟངས་ལ་བརྟེན་ནས་སློབ་མ་འབོར་ཆེན་གྱི་གཤིས་རྒྱུད་རྩ་བ་ནས་བསྒྱུར་ཅིང་མི་ཚེ་ལ་འགྱུར་བ་ཆེན་པོ་བྱུང་འདུག ལོ་ངོ་བཅུ་ཕྲག་ལྷག་གི་རྗེས་སུ། བདག་ནུབ་ཕྱོགས་སུ་སོང་ནས་ཆོས་ཁྲིད་བྱེད་སྐབས། ཆོས་གྲལ་དུ་ཡོད་པའི་སློབ་མ་རྒན་པ་རྣམས་ཀྱིས་བླ་མའི་མཚན་ཐོས་མ་ཐག་དད་པ་དང་གུས་པ་ཆེན་པོས་མིག་ནས་མཆི་མ་བཏང་བའང་ལན་མང་དུ་མཐོང་བྱུང་།

ཁོ་ཚོའི་བླ་མ་དྲན་པའི་འདུན་པ་ནི། དུས་ཚོད་ཀྱི་ཆུ་རྒྱུན་དྲག་པོས་གསུབ་མ་ནུས་པར། ནམ་ཡང་སེམས་སུ་འགྱུར་མེད་བརྟན་པོར་གནས་ཡོད་པར་སྣང་།

དུས་རབས་ལས་བརྒལ་བའི་རླབས་ཆེན་གྱི་མི་བུ།

ཆོས་རྗེ་ཉིད་ཆོས་ཚོགས་འདིར་བཞུགས་པའི་རིང་ལ། མི་ཧ་ཅང་མང་པོས་ཁོང་ལ་ཆེས་ཤིན་ཏུ་དད་པའི་རྣམ་པ་མངོན་ཞིང་། དེའི་ནང་ནས་སྐུ་ཞབས་རའེ་ཆཱར་ཊི་རའེ་སེན་ཀིར་（Richard Peissinger）ནི་བླ་མའི་སྣེ་ལེན་ཞབས་ཞུ་བ་དང་བདེ་སྲུང་གི་འགན་ཁུར་མཁན་ཡིན། ཉེ་ཆར་ང་ཚོས་ཁོང་ལ་འབྲེལ་གཏུག་བྱེད་ཐུབ་སོང་བས། ཁོང་གིས་ལོ་དེའི་བྱ་བ་རྣམས་ཕྱིར་དྲན་བྱས་པ་འདི་ལྟར།

ལོ་དེར་ང་རང་ལོ་ཞེ་གསུམ་ཡིན་ལ་ཆོས་རྗེ་དྲུང་པ་རིན་པོ་ཆེའི་སློབ་མ་བྱས་ནས་ལོ་བཅུ་བདུན་སོང་ཡོད། སྐབས་དེར་ངས་གཙོ་བོ་རྡོ་རྗེ་སྐུ་སྲུང་གི་དམར་སེར་དམག་གི་དམག་དཔོན་གྱི་ལས་འགན་ཁུར་ཡོད་པས། ང་རང་ལ་ཆོས་རྗེ་རིན་པོ་ཆེ་མཇལ་བའི་སྐལ་བ་བཟང་པོ་ཐོབ་སོང་། རྡོ་རྗེ་སྐུ་སྲུང་ནི་རྡོ་རྗེ་ཆོས་སྐྱོང་གི་ཡན་ལག་ཅིག་ཡིན་ལ། གཙོ་བོའི་ལས་དོན་ནི་བླ་མ་རྣམས་ལ་བསྙེན་བཀུར་དང་སྲུང་སྐྱོབ་བྱེད་པ་དེ་ཡིན། དམར་སེར་ནི་སྟག་སེང་ཁྱུང་འབྲུག་གི་ནང་ནས་ཞི་བའི་རྒྱ་སྟག་མཚོན་བྱེད་ཡིན་པ་དང་། དཔའ་བོའི་འགྲུལ་བཞུད་ཀྱི་རྨང་གཞི་ནི་གཟབ་ནན་དང་ཏན་ཏིག ཁེངས་སྐྱུང་དང་ཞི་དུལ་བཅས་ཀྱི་མཚོན་དོན་ལྡན་ཡོད། རྒྱ་སྟག་གི་སྦྱོང་བརྡར་ནི་ང་རྒྱལ་འདུལ་བ་དང་རང་གཞན་ལ་ཕན་པའི་སྤྱོད་བཟང་སྐྱོང་བ་དེ་ཡིན།

དེ་ནི་རྡོ་རྗེ་འདན་མ་གླིང་དུ་ཐེངས་དང་པོར་འཚོགས་པའི་ཆོས་ཚོགས་ཆེ་ཤོས་ཡིན་ལ། ཚོགས་ཡུལ་ནི་གསར་དུ་ཕུབ་པའི་གུར་ཆེན་པོ་ཞིག་གི་ནང་རེད། ངས་དྲན་ཚོད་ལ། ཁོང་འབྱོན་ཁར་ངེད་ཅག་རྡོ་རྗེ་སྐུ་སྲུང་གི་ཚོ་ཆུང་ལ་མཇལ་ཁ་གནང་བར་མ་ཟད། རྡོ་རྗེ་སྐུ་སྲུང་རྣམས་ལ་ངོ་མཚར་བའི་གདེང་འཇོག་ཀྱང་མཛད། སྐབས་དེར་ཆོས་རྗེ་ཉིད་ཀྱིས་ང་ཚོར་ཞལ་གདམས་གསུངས་པའི་ཟིན་བྲིས་ད་ལྟ་རྙེད་མིན་མི་ཤེས་མོད། གང་ལྟར་ཡང་། ང་རང་རྡོ་རྗེ་སྐུ་སྲུང་ཡིན་པའི་ངོས་ནས། དིལ་མགོ་མཁྱེན་བརྩེ་རིན་པོ་ཆེ་དང་ཀརྨ་པ་སྐུ་ཕྲེང་བཅུ་དྲུག་པ་སོགས་ཧ་ཅང་རླབས་ཆེ་བའི་བླ་མ་མང་པོར་སྣེ་ལེན་བྱེད་པའི་གོ་སྐབས་ཐོབ་སོང་། དེ་དག་གི་བརྒྱུད་རིམ་ཁྲོད། ངས་རང་གི་རྣོ་མྱུར་གྱི་ཤེས་རབ་ལ་བརྟེན་ནས་རྟོགས་པ་དང་ལྡན་པའི་གང་ཟག་གི་ཐུན་མོང་མ་ཡིན་པའི་ཁྱད་ཆོས་མང་པོ་ཞིག་མཐོང་སོང་ལ། ཆོས་རྗེ་ཉིད་ཀྱི་སྐུ་ལས་ཁྱད་ཆོས་དེ་དག་མཐོང་བ་ནི་ཆེས་སླ་མོ་ཞིག་ཏུ་གྱུར་འདུག སྤྱིར་སྐབས་དེར་ཁོང་གི་སྐུ་ལུས་ཐང་པོ་མེད་ཀྱང་། ཁོང་ནི་དངོས་གནས་ནང་པ་སངས་རྒྱས་པའི་ཉི་མ་ལྟ་བུ་རེད་འདུག་སྟེ། ནང་ཆོས་ཀྱི་དོན་རྣམས་ཆུ་བོ་བཞུར་བ་ལྟར་རང་བཞིན་གྱིས་ཞལ་ནས་རྡོལ་ཡོང་གིན་འདུག

ང་ལ་བག་ཆགས་ཆེས་ཟབ་པ་ཞིག་བཞག་པ་ནི། ཆོས་རྗེ་ཉིད་ཀྱི་སྐུ་གཟུགས་ལས་གཟི་བྱིན་གྱི་འོད་ཟེར་འཕྲོས་ཤིང་། ཁོང་ནི་དྲང་བདེན་དང་རང་རྟོན། སྟོབས་ཤུགས་རྒྱས་པ། ཐམས་ཅད་དབང་དུ་བསྒྱུར་བའི་ཟིལ་རྔམ་ཅན་ཞིག་ཏུ་མཐོང་། ངས་ཁོང་གིས་མི་ཚེ་གང་པོར་ཤར་ཕྱོགས་བོད་ཀྱི་ཡུལ་དུ་འཚོ་བ་བསྐྱལ་བ་དང་། འདི་ནི་ཐེངས་དང་པོར་ནུབ་ཕྱོགས་སུ་བསྐྱོད་པ་ཡིན་པ་ཤེས་མོད། འོན་ཀྱང་། ཁོང་ལ་རྒྱུས་མེད་ཀྱི་ཁོར་ཡུག་ལ་མི་འཕྲོད་པ་སྤུ་ཙམ་ཡང་མེད་པར་མ་ཟད། དེ་ལས་ཀྱང་ཤིན་ཏུ་རང་དབང་དང་གུ་ཡངས་ཀྱི་རྣམ་པས་ཐམས་ཅད་ལ་དབང་བསྒྱུར་བ་མིའི་རྒྱལ་པོ་ལྟ་བུ་ཞིག་ཏུ་འདུག ད་དུང་དྲན་སོས་པ་ཞིག་ལ། ཁོང་གི་བཞིན་རས་ནི་ཅུང་ཟད་རྩུབ་རེག་གི་རྣམ་པ་ཅན་ཞིག་ཡིན་ཡང་། དེས་ཀྱང་བདག་གི་སེམས་དབང་མེད་དུ་འཕྲོག་སོང་སྟེ། ད་ལྟ་ཕྱིར་དྲན་བྱས་ན། དེ་ཕལ་ཆེར་གཞི་རྒྱུ་དང་འབྲེལ་བ་ཟབ་མོ་ཡོད་པས། གུ་རུ་རྡོ་རྗེ་གྲོ་ལོད་ཀྱི་ཞལ་རས་ཀྱང་དེ་འདྲ་ཡིན་ངེས་སྙམ་པའི་ཚོར་སྣང་བྱུང་།

ཆོས་རྗེ་ཉིད་ཀྱིས། ཤམྦྷ་ལ་དང་ངེད་ཅག་གི་བླ་མའི་སྐོར་ནས་མ་འོངས་ལུང་བསྟན་ཅི་རིགས་གསུངས་བྱུང་། དེ་ནི་ངེད་ཅག་གི་བླ་མར་དམ་པ་གཞན་གྱིས་དེ་འདྲའི་གདེང་འཇོག་མཛད་པ་ཐོས་ཐེངས་དང་པོ་ཡིན་པས། ངས་སྐབས་དེའི་ཁོང་གི་ཞལ་གསུང་རྣམས་ལ་ཡང་ནས་བསྐྱར་དུ་མཉན་དགོས་བྱུང་ལ། ཞལ་གསུང་འདི་དག་གིས་ཆོས་རྗེ་ཉིད་ཀྱི་འཇིག་རྟེན་ལས་འདས་པའི་མཁྱེན་དཔྱོད་ལ་བརྟེན་ནས་ཁོང་དང་ཤམྦྷ་ལའི་བར་དུ་རྟེན་འབྲེལ་ཐུན་མོང་མ་ཡིན་པ་ཞིག་བསྒྲིགས་ཡོད་སྙམ།

ཆོས་རྗེ་མཆོག་རྡོ་རྗེ་འདན་མ་གླིང་དུ་བཞུགས་པའི་དུས་ཚོད་ཐུང་ཐུང་ལས་མིན་རུང་། ཁོང་དེར་ཕེབས་པའི་ཤུགས་རྐྱེན་ཧ་ཅང་རྒྱུན་རིང་ཞིང་གཏིང་ཟབ་པ་ཡིན་ལ། ད་ལྟ་ད་དུང་ཡང་ང་ཚོར་རྟག་ཏུ་བྱིན་རླབས་མཛད་ཀྱིན་ཡོད་ངེས་ཤིང་། ཁོང་ནི་ངོ་མ་དུས་རབས་ལས་བརྒལ་བའི་མི་བུ་རླབས་ཆེན་ཞིག་རེད་ཅེས་བཤད།

འདན་མ་གླིང་དང་ཞལ་གྱེས་ཁའི་གསུང་བཤད།

ཕྱི་ཟླ་༨པའི་ཚེས་༢༢ཉིན་གྱི་སྔ་དྲོར། ཆོས་རྗེ་ཉིད་ཀྱིས་རྡོ་རྗེ་འདན་མ་གླིང་གི་འཁོར་ཚོགས་ཐམས་ཅད་ལ་ཐོག་མར་དབང་སྡུད་གསོལ་འདེབས་གསུངས་རྗེས་བཀའ་སློབ་བསྡུས་པ་ཞིག་གནང་བ་འདི་ལྟར།

ད་ལོའི་གནས་སྐབས་ན་ང་རང་ཉིད་ཨ་རི་དང་ཁེ་ན་ཏའི་རྒྱལ་ཁབ་འདི་ལ་སླེབས་ནས་དེ་རིང་བར་ཟླ་གཉིས་དང་ཞག་མ་ལྔ་སོང་ཟིན་ཐལ། ང་རང་གིས་ཀྱང་ཨ་རི་དང་ཁེ་ན་ཏའི་མི་ཁྲི་ཕྲག་མང་པོ་ལ་འབྲེལ་བ་བཞག་ཅིང་། སངས་རྒྱས་པའི་ཆོས་འཆད་སྤེལ་བྱས་ཏེ་བསམ་པ་ཐམས་ཅད་ཡོངས་སུ་རྫོགས་ནས་དེ་རིང་བཀྲ་ཤིས་བདེ་ལེགས་ཀྱི་ངང་ནས་མཇུག་གྲོལ་བ་ཡིན། ཁྱེད་སློབ་ཚོགས་ཚང་མ་ལ་ཡང་སྔར་ཐུགས་རྒྱུད་ན་ཡོད་པའི་ཡོན་ཏན་གོང་འཕེལ་དུ་གྱུར་པ་དང་། སྔར་མེད་པའི་ཡོན་ཏན་མང་པོ་གསར་དུ་སྐྱེས་ནས་བཀྲ་ཤིས་བདེ་ལེགས་ཀྱི་སྣང་བས་ཁྱབ་པར་གྱུར། ང་རང་གིས་ཀྱང་དུས་ད་ནས་བཟུང་སྟེ་སངས་རྒྱས་ཀྱི་གོ་འཕང་མ་ཐོབ་ཀྱི་བར་དུ། དགྲ་འདུལ་གཉེན་སྐྱོང་ལ་སོགས་པའི་འཇིག་རྟེན་པའི་བྱ་བ་ཐམས་ཅད་རང་ནུས་གང་ཡོད་ཀྱིས་ཆེ་བཞག་ཆུང་བསྐྱུར་བྱས་ནས། བསྟན་པ་དང་སེམས་ཅན་གྱི་དོན་ལ་བརྩོན་པར་བྱ་རྒྱུ་དེ་དམ་བཅའ་ཡིན།

ཁྱེད་རྣམ་པ་ཚང་མ་ཡང་སྔོན་གྱི་དུས་སུ་གུ་རུ་རྡོ་རྗེ་གྲོ་ལོད་དང་། ད་ལྟའི་གནས་སྐབས་ན་འཛམ་གླིང་སེང་ཆེན་རྒྱལ་པོ། ཕྱི་མའི་དུས་ན་རིགས་ལྡན་དྲག་པོ་ལྕགས་ཀྱི་འཁོར་ལོ་ཅན་གྱི་རྗེས་སུ་སློབ་མཁན་ཡིན། ཁོང་རྣམ་པ་གསུམ་གྱི་མཛད་སྤྱོད་ནི་སངས་རྒྱས་ཀྱི་བསྟན་པ་རིན་པོ་ཆེ་སྤེལ་བ་དང་འཛིན་པ། སྲུང་བ་རྣམ་པ་གསུམ་གྱི་ལས་ཡིན་པས་ཀྱང་དེ་ལྟ་བུའི་མཛད་རྗེས་ལ་སློབ་པའི་རེ་བ་ཡོད།

དེ་དག་གིས་བསྟན་པ་ཅི་ལྟར་སྤེལ་བ་ཡིན་ཞེ་ན། སྔོན་གྱི་དུས་སུ་ཨོ་རྒྱན་རིན་པོ་ཆེས་བོད་ཡུལ་དུ་སངས་རྒྱས་ཀྱི་བསྟན་པའི་མིང་ཙམ་མེད་པའི་གནས་སྐབས་ན། རྒྱ་གར་གྱི་ནང་ཆོས་མ་ལུས་པ་བོད་ཡུལ་དུ་བསྒྱུར་ནས་བསྟན་པ་སྤེལ། དེ་ལ་བར་དུ་གཅོད་པའི་བདུད་བགེགས་དམ་སྲི་ལ་སོགས་པ་ཐམས་ཅད་ཚར་བཅད་ནས་བསྟན་པ་སྲུང་བར་བྱས་པ་ཡིན། སངས་རྒྱས་ཀྱི་བསྟན་པ་ཉམས་དམའ་བར་གྱུར་པའི་གནས་སྐབས་ན་གླིང་སེང་ཆེན་རྒྱལ་པོས་འཛམ་བུ་གླིང་ལ་སངས་རྒྱས་ཀྱི་བསྟན་པ་སྤེལ། ཉེ་བར་འཚེ་བའི་བདུད་སྡེ་མ་རུངས་བ་ཐམས་ཅད་ཚར་བཅད་པ་ཡིན། མ་འོངས་པའི་གནས་སྐབས་ན་རིགས་ལྡན་དྲག་པོ་ལྕགས་ཀྱི་འཁོར་ལོ་ཅན་གྱིས་ཀྱང་། སངས་རྒྱས་ཀྱི་བསྟན་པ་ཕལ་ཆེར་ཀླ་ཀློས་ཉམས་པར་བྱེད་པའི་གནས་སྐབས་ན། བསྟན་དགྲ་དེ་དག་ཐམས་ཅད་ཚར་བཅད། དཔལ་དུས་ཀྱི་འཁོར་ལོའི་རྒྱུད་དགོངས་འགྲེལ་དང་བཅས་པ་ཐམས་ཅད་རྒྱ་ཆེར་སྤེལ་ནས་བསྟན་པ་བཟུང་། རྗེས་སུ་ལོ་སྟོང་ཕྲག་དུ་མའི་བར་དུ་བསྟན་པ་འཕེལ་རྒྱས་ཕུན་སུམ་ཚོགས་པར་མཛད་རྒྱུ་རེད།

སྔོན་ཆད་ཁེ་ན་ཏའི་ས་ཆ་འདི་ལ་སངས་རྒྱས་ཀྱི་བསྟན་པ་རྒྱ་ཆེར་མི་དར་བའི་གནས་སྐབས་ན། བོད་ཀྱི་བླ་མ་རྣམས་ཀྱིས་གཙོ་བོར་བྱས་ཏེ་སངས་རྒྱས་ཀྱི་བསྟན་པའི་དབུ་བཙུགས་ཏེ་འཛིན་པར་བྱས། ད་ལྟ་ཁྱེད་ནང་བསྟན་པ་རྣམས་ཀྱིས་བསྟན་པ་སྤེལ་བར་བྱས་ཤིང་། ཤམ་བྷ་ལར་སློབ་སྦྱོང་མཛད་པ་ཐམས་ཅད་ཀྱིས་བསྟན་པ་དེ་སྲུང་བར་བྱེད་པ་རེད།

དེ་ལྟར་དང་པོ་བསྟན་པ་བཙུགས་པ་དང་། བར་དུ་བསྟན་པ་འཛིན་པ། དུས་རྒྱུན་དུ་བསྟན་པ་སྲུང་བ་སྟེ། དེ་གསུམ་གྱི་ནང་དུ་ཁྱེད་རྣམ་པ་ཚང་མའི་མཛད་སྤྱོད་ཀྱང་འདུ་བ་ཡིན་པས། ཐམས་ཅད་ཀྱི་ཞེ་འདོད་མཐར་ཐུག་པ་ནི། སེམས་ཅན་ཐམས་ཅད་ལ་བདེ་སྐྱིད་འབྱུང་བའི་ཕྱིར་དུ་སངས་རྒྱས་ཀྱི་བསྟན་པ་འདི་ཁོ་ན་འཛིན་སྐྱོང་སྤེལ་གསུམ་བྱེད་པ་ལ་ཐུག་ཡོད་པ་ཡིན།

དེས་ན་ཤམ་བྷ་ལར་སློབ་སྦྱོང་མཛད་པའི་རྡོ་རྗེ་བཀའ་སྲུང་དང་སྐུ་སྲུང་ལ་སོགས་པ་ནི་ལྕགས་རི་བཟང་པོ་ལྟ་བུ་དང་། ནང་བསྟན་ལ་སློབ་སྦྱོང་བྱེད་མཁན་རྣམས་ནི་དེའི་ནང་ན་གནས་པའི་སྐྱེད་མོའི་ཚལ་བཟང་པོ་ལྟ་བུ་ཡིན། གནས་སྐབས་སུ་སློབ་སྦྱོང་བྱེད་སྟངས་མི་འདྲ་བ་ཅུང་ཙམ་ཡོད་ཀྱང་། མཐར་ཐུག་གི་དོན་ནི་སེམས་ཅན་ལ་བདེ་སྐྱིད་འབྱུང་བའི་ཕྱིར་དུ་སངས་རྒྱས་ཀྱི་བསྟན་པ་ཁོ་ན་ཉམས་བཞེས་མཛད་པ་ལ་ཐུག་ཡོད་པས་ཚང་མའི་ཐུགས་ལ་དེ་ལྟར་འཇོག་པར་ཞུ།

སངས་རྒྱས་བསྟན་པ་དར་ཞིང་རྒྱས་པར་ཤོག །

སེམས་ཅན་ཐམས་ཅད་བདེ་ཞིང་སྐྱིད་པར་ཤོག །

ཉིན་དང་མཚན་དུ་ཆོས་ལ་སྤྱོད་པར་ཤོག །

རང་གཞན་དོན་གཉིས་ལྷུན་གྱིས་འགྲུབ་པར་ཤོག །

རྡོ་རྗེ་སློབ་དཔོན་ཞབས་བརྟན་བཞེད་པ་འགྲུབ། །

དགེ་འདུན་སྡེ་འཕེལ་བཤད་སྒྲུབ་བསྟན་པ་དར། །

དཔོན་སློབ་སྦྱིན་བདག་མངའ་ཐང་འབྱོར་པ་རྒྱས། །

བསྟན་པ་ཡུན་རིང་གནས་པའི་བཀྲ་ཤིས་ཤོག །

བསླབ་པ་གསུམ་ལྡན་ངུར་སྨྲིག་འཛིན་པ་ཡི། །

འདུས་པའི་ཚོགས་ཀྱིས་གནས་འདིར་ཡོངས་གང་ཞིང་། །

རྟག་ཏུ་བཤད་སྒྲུབ་བྱ་བས་སྲིད་མཐའི་བར། །

ཐུབ་བསྟན་ཕྱོགས་མཐར་རྒྱས་པའི་བཀྲ་ཤིས་ཤོག །

ཅེས་སྨོན་ཚིག་འདི་དག་གསུངས་རྗེས། ཆོས་རྗེ་ཉིད་ཀྱིས་ཐམས་ཅད་ལ་ཕྱག་དབང་དང་བྱིན་རླབས་མཛད་ཅིང་། དེ་མཚུངས་སུ་མི་རེ་རེ་བཞིན་དུ་ཕྱག་མདུད་རེའང་གནང་། ཆོས་ཚོགས་དེའི་འགྲོ་ལུགས་ལྟར། བླ་མ་འབྱོན་ཁར་སློབ་མ་རྣམས་ལམ་འགྲམ་དུ་གྲལ་བསྒྲིགས་ཏེ་སྐྱེལ་མ་བྱས་ཤིང་། ཐམས་ཅད་ཀྱིས་ཀི་ཀི་བསྭ་བསྭ་ལྷ་རྒྱལ་ལོ་ཞེས་སོགས་མི་སེམས་སྒུལ་བའི་རྡོ་རྗེ་གླུ་དབྱངས་ཀྱི་ཁྲོད། ཆོས་རྗེ་ཉིད་འབྲལ་མི་ཕོད་པ་ལྟ་བུའི་ངང་རླངས་འཁོར་ལ་བཞུགས་ཏེ། གནས་འདིའི་མཛེས་སྡུག་ལྡན་པའི་ཕྱིར་དྲན་རྣམས་ཁྱེར་ནས་ལམ་ལ་ཆས།

ཕྱག་རྗེས་བཞག་པའི་ཆུ་ཤེལ།

ངེད་ཅག་གནམ་གྲུ་ཐང་དུ་འགྲོ་བའི་ལམ་བར་ནས། ཆོས་རྗེ་ཉིད་ཀྱིས་ཁེ་ན་ཏའི་མཚོ་ངོགས་ཀྱི་མཛེས་ལྗོངས་དང་གྲོང་ཁྱེར་གྱི་འཛུགས་སྐྲུན་བཟོ་བཀོད་ལ་གཟིགས་མོ་མཛད།

ཕྱི་དྲོར་ཧཱ་ལི་ཧྥ་ཁི་སི་གྲོང་ཁྱེར་དང་ཞལ་གྱེས་ཏེ་དུས་ཚོད་གཉིས་ཙམ་ལ་འཕུར་བ་ན། སླར་ཡང་ཨ་རིའི་བྷོ་སི་ཐིན་གྲོང་ཁྱེར་གྱི་གནམ་ཐང་དུ་འབྱོར་ཞིང་། དགོང་མོར་ཡོ་རོབ་ཀྱི་རྒྱལ་ཁབ་ཧྥ་རན་སིའི་ཕྱོགས་སུ་འཕུར་སྐྱོད་བྱེད་པའི་སྟ་གོན་བྱས།

ཨ་རི་དང་ཁེ་ན་ཏའི་སློབ་མ་མང་པོ་རྗེ་ཉིད་ལ་སྐྱེལ་མ་བྱེད་པར་གནམ་གྲུ་ཐང་དུ་སླེབས་འདུག རྒྱ་སྤྲུལ་རིན་པོ་ཆེ་རྗེ་ཉིད་དང་ཁ་འབྲལ་སྐབས། ཆོས་རྗེ་མཆོག་གིས་ཕྱག་ཏུ་ཆུ་ཤེལ་ཞིག་བསྣམས་ཏེ། འདི་ཁྱེད་ལ་དད་རྟེན་དུ་བྱིན་པ་ཡིན་ཞེས་གསུངས་ཤིང་། ཕྱག་གཉིས་ཀྱིས་གཅིར་གཅིར་ལན་འགའ་མཛད་ནས་ཁོང་ལ་སྤྲད།

རྗེས་སུ་ཆུ་ཤེལ་དེར་རྗེ་ཉིད་ཀྱི་ཕྱག་མཛུབ་ཀྱི་རྗེས་ཤུལ་རྣམས་གསལ་བར་དོད་ནས་ལན་ཆགས་བཟོས་པ་ལྟར་གྱུར་ཡོད་པ་ཤེས་རྟོགས་བྱུང་། ད་ལྟ་ཆུ་ཤེལ་དེ་བཀྲ་ཤིས་ཆོས་གླིང་དགོན་དུ་ཉར་ཚགས་མཛད་ཡོད་ཅིང་དངོས་སུ་མཇལ་ཆོག་པར་འདུག འདི་ནི་ཆོས་རྗེ་ཉིད་མེ་གླིང་དང་ཁ་འབྲལ་ཁར། ནུབ་ཕྱོགས་ཀྱི་སློབ་མ་རྣམས་ལ་རྫུ་འཕྲུལ་གྱི་སྒོ་ནས་བཞག་པའི་བྱིན་རྟེན་ཁྱད་པར་ཅན་ཞིག་ཡིན་པར་སྣང་།

ཁོང་འབྱོན་ཁར་རིན་ཐང་ཆེ་བའི་མན་ངག་ཚིག་གསུམ་གནང་བ་ནི། ཁྱེད་ཅག་ནུབ་ཕྱོགས་རྒྱལ་ཁབ་ཀྱི་དད་ལྡན་རྣམས་ཀྱིས་ཀྱང་། ཐོག་མར་གལ་ཆེ་བ་བླ་མ་དཀོན་མཆོག་གསུམ་ལ་ཡིད་ཆེས་རྩེ་གཅིག་གི་དད་པའི་སྒོ་ནས་སྐྱབས་སུ་འགྲོ་བ་དང་། བར་དུ་གལ་ཆེ་བ་བསམ་པ་བཟང་པོ་བྱམས་པ་དང་སྙིང་རྗེས་ཀུན་ནས་བསླངས་ཏེ་བྱང་ཆུབ་མཆོག་ཏུ་སེམས་བསྐྱེད་པ། མཐར་འོད་གསལ་རྫོགས་པ་ཆེན་པོའི་ལམ་ཉམས་སུ་བླངས་ཏེ། ཚེ་གཅིག་གིས་ཟུང་འཇུག་གི་གོ་འཕང་སྒྲུབ་པར་བྱེད་པ་ནི་ཅི་ནས་ཀྱང་གལ་ཆེ་བ་ཡིན། ཞེས་གསུངས་པ་དེ་ཡིན།

དྲན་ངོགས་ཀྱི་ནུབ་བསྐྱོད་ལས་ཡུལ་ཧཱ་ལི་ཧྥ་ཁི་སིའི་མཛད་རིམ་ལེགས་པར་གྲུབ་པའི་སྐབས་ཏེ་བརྒྱད་པའོ། །

འབབ་ཚུགས་དགུ་པ། ཧྥ་རན་སིའི་མོན་ཐི་ཕཱེ་ལེར།

༼ ༨·༢༣~༨·༣༠ ༽

མཛད་རིམ།

ཕྱི་ཟླ་༨པའི་ཚེས་༢༣ཉིན། ལས་རབ་གླིང་དུ་འབྱོར།

ཕྱི་ཟླ་༨པའི་ཚེས་༢༤ཉིན། སྔ་དྲོར་རྟེན་འབྲེལ་ཉེས་སེལ་གྱི་དབང་གནང་།

ཕྱི་ཟླ་༨པའི་ཚེས་༢༥ཉིན། ལས་རབ་གླིང་གི་མཐོ་རིམ་ལས་གཉེར་པ་རྣམས་ལ་མཇལ་ཕྲད་མཛད་དེ་བསླབ་སྟོན་གནང་།

ཕྱི་ཟླ་༨པའི་ཚེས་༢༦ཉིན། ལས་རབ་གླིང་གི་དཔོན་སློབ་ཡོངས་དང་མཉམ་དུ་རྟེན་འབྲེལ་ཉེས་སེལ་གྱི་ཆོ་གའི་ཚོགས་འཁོར་རྒྱ་ཆེན་བསྐོར།

ཕྱི་ཟླ་༨པའི་ཚེས་༢༧ཉིན། ཕུར་པ་ཡང་ཟབ་སྙིང་པོའི་དབང་དང་ཞལ་གདམས་གནང་།

ཕྱི་ཟླ་༨པའི་ཚེས་༢༨ཉིན། ཚེ་གཅིག་རྫོགས་འཚང་རྒྱ་བའི་གསང་གནད་ཅེས་པའི་འཆད་ཁྲིད་གནང་།

ཕྱི་ཟླ་༨པའི་ཚེས་༢༩ཉིན། ཕྱི་དྲོར་སེམས་ངོ་མཛུབ་ཚུགས་ཀྱི་མན་ངག་གསུངས།

ཕྱི་ཟླ་༨པའི་ཚེས་༣༠ཉིན། སྔ་དྲོར་འཇམ་དཔལ་ཡེ་ཤེས་སེམས་དཔའི་དབང་དང་ལྷུན་གྲུབ་ཐོད་རྒལ་གྱི་ཁྲིད་གནང་རྗེས་གྱེས་ཁའི་སྙིང་གཏམ་གསུངས་ཤིང་། ཕྱི་དྲོར་བཅར་འདྲི་དང་ལེན་གནང་།

ལས་རབ་གླིང་དུ་འབྱོར་བ།

ཆོས་རྗེ་ཉིད་ཨ་རིའི་བྷོ་སི་ཐིན་ནས་གནམ་གྲུར་ཞུགས་ཏེ་ནུབ་རྒྱ་མཚོ་ཆེན་མོའི་མཁའ་ལམ་བརྒྱུད་ནས་ཆུ་ཚོད་བདུན་ལྷག་ལ་འཕུར་སྐྱོད་གནང་རྗེས། ཧྥ་རན་སིའི་རྒྱལ་ས་ཕེ་རིས་（Paris）ལ་འབྱོར། སླར་ཡང་གནམ་གྲུ་གཞན་ཞིག་ལ་ཞུགས་ནས་ཆུ་ཚོད་གཅིག་ཕྱེད་ཙམ་ལ་འཕུར་བ་ན། ཧྥ་རན་སིའི་གྲོང་ཁྱེར་མོན་ཐི་ཕཱེ་ལེར་（Montpellier）དུ་སླེབས་ཤིང་། དེ་ནས་ཆུ་ཚོད་གཅིག་ལྷག་ལ་རླངས་འཁོར་ལ་བརྟེན་ནས་ལས་རབ་གླིང་གི་ཕྱོགས་སུ་ཆིབས་ཁ་བསྒྱུར།

ལས་རབ་གླིང་དུ་འབྱོར་ལ་ཉེ་བའི་རི་ལམ་གྱི་གཡས་གཡོན་གཉིས་སུ། སྔ་མོ་ནས་བསྒུགས་པའི་ཆོས་ཚོགས་ཀྱི་སློབ་མ་རྣམས་ཕྲེང་བསྒྲིགས་ཤིང་དར་དཀར་བཏེགས་ཏེ། རྗེ་ཉིད་ལ་ཧ་ཅང་གཟབ་རྒྱས་ངང་དགའ་བསུ་དང་སྣེ་ལེན་མཛད།

ལས་རབ་གླིང་དུ་འབྱོར་བ་ན། ཆོས་རྗེ་ཉིད་ཆོས་ཚོགས་དེའི་བླ་བྲང་དུ་བཞུགས་སུ་གསོལ་བ་སྟེ། ཁོང་བཞུགས་སའི་གཟིམས་ཁང་ནི། སྐྱབས་རྗེ་གྲུབ་དབང་པད་ནོར་རིན་པོ་ཆེ་དང་ས་སྐྱ་གོང་མ་སོགས་སྐྱེས་ཆེན་དམ་པ་མང་པོ་བཞུགས་མྱོང་སའི་ཆེས་ངོ་མཚར་ཞིང་བྱིན་རླབས་ལྡན་པའི་ཕོ་བྲང་ཞིག་ཡིན་པར་བཤད།

ལས་རབ་གླིང་གི་གདན་ས་འདི་ནི། བོད་ཀྱི་སྐྱེ་འཆིའི་རྣམ་གཞག་ཅེས་པའི་བསྟན་བཅོས་མཛད་པ་པོ་བསོད་རྒྱལ་རིན་པོ་ཆེས་ཕྱག་བཏབ་གནང་བའི་ཆོས་ཚོགས་ཤིག་ཡིན་ལ། ཕྱི་ལོ་༡༩༩༠ལོར། དིལ་མགོ་མཁྱེན་བརྩེ་རིན་པོ་ཆེས་ས་དཔྱད་གནང་སྟེ་གནས་འདིར་གདབ་རྒྱུ་གཏན་ཁེལ་མཛད་ཅིང་། ཕྱི་ལོ་༡༩༩༡ལོར། ཆོས་ཚོགས་ཀྱི་རྨང་གཞིའི་འཛུགས་སྐྲུན་རྣམས་གྲུབ་པ་མ་ཟད། རྡོ་གྲུབ་རིན་པོ་ཆེ་བྱོན་ནས་རབ་གནས་དང་བྱིན་རླབས་གནང་བ་དང་། ད་ལྟ་ཧྥ་རན་སིའི་བོད་བརྒྱུད་ནང་བསྟན་གྱི་ཆོས་ཚོགས་ཆེ་ཤོས་སུ་གྱུར་ཡོད། ཆོས་ཚོགས་འདིའི་ཡུལ་ལྗོངས་ཀྱི་བཀོད་པ་ནི་བོད་ཡུལ་དང་ཤིན་ཏུ་འདྲ་བར། མཐའ་འཁོར་རྣམས་སུ་སྔོ་ལྗང་གི་ནགས་ཚལ་དང་མཛེས་སྡུག་གི་རི་ཀླུང་ཉམས་དགའ་བས་བསྐོར་འདུག་པས། བོད་ཡུལ་གྱི་དགོན་པ་ཞིག་དང་ཀུན་ནས་མཚུངས། ནམ་རྒྱུན་དབྱར་དུས་སུ། གནས་འདི་ནས་དགེ་འདུན་པ་དང་དད་ལྡན་མང་པོས་དུས་ཚོད་ངེས་གཏན་ཡོད་མེད་གང་རུང་གི་སྒོ་ནས་ཆོས་ཀྱི་མཛད་སྒོ་སྤེལ་བཞིན་ཡོད།

ཆོས་རྗེ་ཉིད་བྱོན་པའི་སྐབས་དེ་ནི། ཁོ་ཚོའི་དབྱར་ཟླ་གསུམ་གྱི་སྒོམ་སྒྲུབ་ཀྱི་དུས་སུ་ཁེལ་འདུག་པས། རྒྱང་རིང་གི་རི་ལྷས་ཀྱི་སྟེང་དུ་ཁ་དོག་དང་རྣམ་པ་གཅིག་པའི་གུར་ཆུང་བརྒྱ་ཕྲག་མང་པོ་སྒར་བཏབ་པ་བཞིན་ཚར་དུ་དངར་བར་ཕུབ་ནས། ཆོས་པ་རྣམས་ཀྱིས་ཉམས་ལེན་ལ་གཞོལ་གྱིན་པ་ནི་ཆེས་རྔམ་བརྗིད་ལྡན་པ་ཞིག་རེད། ནམ་རྒྱུན་ཁོ་ཚོས་མཉམ་ཚོགས་ཀྱིས་ཆོས་འཆད་ཉན་དང་སྒོམ་སྒྲུབ་བྱེད་ས་ནི། ཉེ་ཟུར་དུ་གུར་ཆེན་པོ་ཞིག་འདུག་པ་དེའི་ནང་ཡིན་ལ། ད་ལན་ཆོས་རྗེ་ཉིད་ཀྱིས་ཀྱང་གནས་དེ་ནས་གཟའ་འཁོར་གཅིག་གི་རིང་ལ་ཆོས་གསུངས་པ་ཡིན། སྐབས་དེའི་སྐད་སྒྱུར་པ་ནི་རི་མགུལ་རིན་པོ་ཆེ་ཡིན།

ཉེ་བའི་ཆར་ཆོས་རྗེ་ཉིད་ཁེ་ན་ཏ་ནས་ཨ་རིར་འཕུར་སྐྱོད་གནང་ཞིང་། དེ་ནས་སླར་ཡང་ཧྥ་རན་སིར་ཕེབས་པ་ཡིན་པས། ཕེབས་ལམ་ཆེས་ཤིན་ཏུ་རིང་པོ་སྟེ། གནམ་གྲུར་ཞུགས་པ་དང་། གནམ་གྲུ་སྒུག་པ། རླངས་འཁོར་དུ་ཞུགས་པའི་དུས་ཚོད་རྣམས་ཕྱོགས་གཅིག་ཏུ་བསྡོམས་ན། བྱོན་ཐེངས་གཅིག་ཁོ་ནར་དུས་ཚོད་ཉི་ཤུ་ཡས་མས་འགོར་ཡོད་པས། སྐུ་ལུས་ཀྱང་ཅུང་ཟད་ཐང་ཆད་པའི་ཚུལ་མཛད།

བསོད་རྒྱལ་རིན་པོ་ཆེས་ཁོང་གི་གནས་ཚུལ་དག་མཐོང་ནས། ད་ཐེངས་ཁྱེད་ནུབ་ཕྱོགས་སུ་ཆོས་གསུང་བར་བྱོན་ནས་དུས་ཡུན་དེ་འདྲའི་རིང་པོ་སོང་འདུག་ལ། མཛད་རིམ་གྱི་དུས་ཚོད་བཀོད་སྒྲིག་ཀྱང་ཤིན་ཏུ་ཚགས་དམ་པོ་ཡིན་པས། འོ་བརྒྱལ་ཧ་ཅང་ཆེན་པོ་མྱངས་ཡོད་ཐག་ཆོད་ཡིན། ཆོས་ཚོགས་འདི་ནས་གཞན་གྱི་ཆོས་ཚོགས་དང་མི་འདྲ་བར་ཁྱེད་ཉིད་ཀྱིས་སྐུ་ངལ་གསོ་རྒྱུ་དེ་གཙོ་བོར་མཛད་དགོས། ཆོས་ཚོགས་འདིའི་མཛད་རིམ་བཀོད་སྒྲིག་གི་དབང་ཆ་ཚང་མ་ང་ལ་ཡོད་པས། ཇི་ལྟར་མཛད་དགོངས་ན་དེ་ལྟར་གནང་ན་འགྲིག་གི་རེད། ཁྱེད་ཀྱིས་དང་པོར་སྐུ་ངལ་ལེགས་པོ་གསོས་དང་། ཁྱེད་ཐུགས་མཉེས་པོ་ཡོང་བ་ནི་ཆོས་ཀྱི་རྩ་བ་ཡིན་ཞེས་ཞུས།

དངོས་གནས་ཆོས་རྗེ་ཉིད་ཀྱིས་ལམ་ཐག་རིང་པོ་ནས་འོ་བརྒྱལ་ཆེན་པོ་མཛད་ཡོད་དེ། སྐུ་ལུས་ལ་སྙུང་གཞི་མང་བ་དང་། ཆོས་ཁྲིད་རྣམས་གཅིག་རྗེས་གཉིས་མཐུད་དུ་བཀོད་སྒྲིག་བྱས་པ། མཚན་མོར་གཟིམས་ལེགས་པོ་མི་ཁུག་པ། ཞལ་ཟས་གསོལ་བའི་ཡི་ག་མེད་པ། དུས་ཁྱད་སྙོམ་ལོང་མེད་པ་སོགས་ཕྱོགས་གང་ཅིའི་ཐད་ནས་སྐུ་ལུས་དང་ཐུགས་སེམས་གཉིས་ལ་ཚོད་བགམ་ཆེན་པོ་ཞིག་ཏུ་གྱུར་པས། ཁོང་གིས་དེ་ལྟར་གསུངས་པ་གསན་ཚེ། ཆོས་རྗེ་ཉིད་ཀྱང་ཐུགས་ཤིན་ཏུ་ལྷོད་པོའི་ངང་བག་ཕེབས་པར་བཞུགས།

དེ་ལྟ་ནའང་། རྗེས་སུ་ཆོས་རྗེ་ཉིད་ཀྱིས་བཀོད་སྒྲིག་ལྡན་ཞིང་དུས་ཚོད་དམ་འཛིན་གྱི་སྒོ་ནས། ལས་རབ་གླིང་གི་ཆོས་ཚོགས་སུ་ཟབ་ཆོས་གསུངས་པ་ནི། ཆོས་ཚོགས་གཞན་དག་ལས་ཀྱང་ལྷག་པ་ཞིག་བྱུང་སོང་།

ང་རང་ལས་རབ་གླིང་པ་ཡིན་ནམ།

ཕྱི་ཟླ་༨པའི་ཚེས་༢༤ཉིན་གྱི་སྔ་དྲོར། ཆོས་རྗེ་ཉིད་ཀྱིས་རྟེན་འབྲེལ་ཉེས་སེལ་གྱི་དབང་མ་གནང་བའི་སྔོན་དུ། བསོད་རྒྱལ་རིན་པོ་ཆེས་དད་གུས་དང་སྤྲོ་སེམས་གྱི་ངང་ནས་ཐམས་ཅད་ལ་ངོ་སྤྲོད་འདི་ལྟར་གནང་།

ཆོས་རྗེ་ཡིད་བཞིན་ནོར་བུ་འཇིགས་མེད་ཕུན་ཚོགས་འབྱུང་གནས་ནི། དུས་རབས་བཅུ་དགུ་པའི་ནང་ཆེས་རླབས་ཆེ་བའི་གཏེར་སྟོན་བསོད་རྒྱལ་ཏེ་ལས་རབ་གླིང་པའི་སྤྲུལ་སྐུ་ཡིན་ཞིང་། ཁོང་གི་ཕ་ཡབ་ནི་སྐྱབས་རྗེ་བདུད་འཇོམས་མཆོག་གི་ཁྱིམ་རྒྱུད་ལས་འཁྲུངས་པ་དང་། རྡོ་གྲུབ་རིན་པོ་ཆེ་སྐུ་ཕྲེང་གསུམ་པ་ནི་ཁོང་གི་ཕ་ཡབ་ཀྱི་ཁུ་བོ་ཡིན། ཆོས་རྗེ་མཆོག་གིས་སྐུ་ན་ཆུང་དུས་ནས། སྔ་འགྱུར་དཔལ་ཡུལ་དགོན་པའི་ཡན་ལག་ཏུ་གྱུར་པའི་གནུབས་ཟུར་དགོན་དུ་ནང་པའི་ཆོས་ལ་ཐོས་བསམ་མཛད། དགུང་ལོ་བཅོ་བརྒྱད་ཀྱི་ཐོག་རྫ་སྟོད་ལྕང་མ་རི་ཁྲོད་དུ་བྱོན་ཏེ། ཐུབ་དགའ་ཡིད་བཞིན་ནོར་བུ་རྩ་བའི་བླ་མར་བསྟེན་ནས་བགྲང་བྱ་དྲུག་ཙམ་ལ་ཆོས་ཕྱིར་དཀའ་སྤྱད་མཛད་མཐར། བླ་མའི་ཐུགས་རྒྱུད་ཀྱི་ཡོན་ཏན་མ་ལུས་བུམ་པ་གང་བྱོའི་ཚུལ་དུ་ཐོབ་པར་མ་ཟད། རྡོ་རྗེ་ཐེག་པ་སྤྱི་དང་ཁྱད་པར་རྫོགས་པ་ཆེན་པོ་ལ་མངའ་དབང་འབྱོར་བར་གྱུར།

ཁོང་གིས་བོད་ཡུལ་དུ་ཐོས་བསམ་སྒོམ་སྒྲུབ་བྱེད་སའི་སློབ་གླིང་དང་ཆོས་ཚོགས་མང་དུ་བཙུགས་ཡོད་ཅིང་། ཁྱད་པར་དུ། གསེར་རྟ་ལྔ་རིག་ནང་བསྟན་སློབ་གླིང་ནི་ཆོས་ལུགས་དང་གྲུབ་མཐའ་རིས་མེད་ཀྱི་སྒོ་ནས་ནང་ཆོས་སློབ་གཉེར་བྱ་སའི་ཚད་མཐོ་བའི་སློབ་གླིང་ཆེན་པོ་ཞིག་སྟེ། ད་ལྟ་དགེ་འདུན་པ་སྟོང་ཕྲག་མང་པོ་རྒྱུན་བཞུགས་ཀྱིས་སློབ་གཉེར་གནང་བཞིན་ཡོད། ཆོས་རྗེ་མཆོག་གིས་སྐུ་ཚེ་ཧྲིལ་པོའི་རིང་ལ། ཆོས་པ་ཕོ་མོ་ཁྲི་སྟོང་མང་པོར་དབུ་སྐྲ་བསིལ་ཏེ་རབ་བྱུང་བསྒྲུབས་པར་མ་ཟད། ངོ་མཚར་བའི་གཏེར་ཆོས་ཀྱང་མང་དུ་བཞེས་ཡོད།

ད་ལོར་ཁོང་ཐེངས་དང་པོར་ནུབ་ཕྱོགས་སུ་བྱོན་ཏེ་ཆོས་ཀྱི་འཁོར་ལོ་བསྐོར་བ་ཡིན་ལ། ཨ་རི་དང་ཁེ་ན་ཏ་སོགས་བརྒྱུད་ནས་ཧྥ་རན་སིར་ཕེབས་ཤིང་། ད་ལྟ་ང་ཚོའི་ལས་རབ་གླིང་དུ་བྱོན་ཐུབ་པ་ལ། ཐོག་མར་ངས་རང་ཉིད་སྒེར་གྱི་ཚབ་བྱས་ཏེ་ཁྱེད་ཉིད་ཀྱི་ཕེབས་འབྱོར་ལ་སྤྲོ་སེམས་རབ་ཏུ་འཁོལ་བའི་སྒོ་ནས་དགའ་བསུ་ཞུ་རྒྱུ་ཡིན།

བདག་ཅག་རྣམས་ལ་མཚོན་ན། ཁྱེད་ཉིད་ཐུགས་བརྩེ་བ་ཆེན་པོའི་སྒོ་ནས་ལས་རབ་གླིང་དུ་བྱོན་ཏེ་ཆོས་འཁོར་བསྐོར་ཞིང་། ཆེས་བླ་ན་མེད་པའི་བྱིན་རླབས་བསྩལ་བའི་བཀའ་དྲིན་ནི་སྨྲ་བརྗོད་ཙམ་གྱིས་མཚོན་ཐབས་བྲལ་བ་ཞིག་ཡིན། ལས་རབ་གླིང་ནི་གཏེར་སྟོན་ལས་རབ་གླིང་པའི་མཚན་ཐོག་ནས་བཏགས་པ་ཡིན་ལ། ཁྱེད་ཉིད་ནི་གཏེར་ཆེན་ལས་རབ་གླིང་པའི་སྐུ་སྐྱེ་དངོས་ཡིན་པས། ད་ལན་སྐུ་དངོས་སུ་གནས་འདིར་ཕེབས་པ་ལ། དོན་སྙིང་ཆེན་པོ་ལྡན་པའི་རྟེན་འབྲེལ་ཁྱད་པར་ཅན་ཞིག་ཀྱང་ཡོད་ངེས་ཡིན།

ཁྱེད་ནི་གཏེར་སྟོན་ལས་རབ་གླིང་པའི་སྤྲུལ་སྐུ་ཙམ་དུ་མ་ཟད། རང་ངོས་ནས་ཀྱང་ཧ་ཅང་རླབས་ཆེ་བའི་དགེ་བའི་བཤེས་གཉེན་ཡིན་ཏེ། ང་ཚོས་དུས་ཡུན་རིང་པོ་ནས། ཁྱེད་ཀྱི་མི་སེམས་སྒུལ་ཞིང་བསྟོད་པའི་འོས་སུ་གྱུར་པའི་རླབས་ཆེན་གྱི་མཛད་འཕྲིན་སྣ་ཚོགས་པ་གོ་ཐོས་བྱུང་ཞིང་། དུས་དང་རྣམ་པ་ཀུན་ཏུ་དད་གུས་ཆེན་པོས་རྗེས་སུ་ཡི་རང་ཞུ་བཞིན་ཡོད། ཁྱེད་ནི་རྫོགས་པ་ཆེན་པོར་མངའ་དབང་འབྱོར་བའི་བསྟན་འཛིན་གྱི་སྐྱེས་བུ་ཆེན་པོ་དང་། དུས་རབས་འདིའི་ཨོ་རྒྱན་རིན་པོ་ཆེ་ཡི་རྒྱལ་ཚབ། ཟབ་མོ་གཏེར་གྱི་བརྒྱུད་པ་འཛིན་ནུས་པའི་གཏེར་སྟོན་ཞིག་ཀྱང་ཡིན། ང་ཚོ་ཚང་མས་བོད་ཡུལ་དུ་ཁྱེད་ཀྱིས་བརྗོད་ལས་འདས་པའི་བསྟན་འགྲོའི་དོན་ཆེན་བསྒྲུབས་པའི་མཛད་འཕྲིན་རྣམས་གོ་ཐོས་བྱུང་ཞིང་། སྐུ་ཉིད་ཀྱི་མཚན་སྙན་ནི་སྔ་མོ་ནས་ཕྱོགས་ཀྱི་ཐ་གྲུ་ཀུན་ཏུ་ཁྱབ་འདུག་པ་མ་ཟད། ཉིད་ཀྱིས་བོད་ཡུལ་དུ་ཡང་དར་བསྟན་པའི་འཕྲིན་ལས་ཀྱི་ཁུར་ཆེན་བཞེས་ཤིང་། སེམས་ཅན་གྲངས་མེད་པ་ལ་ནང་ཆོས་ཉམས་ལེན་གྱི་ལམ་བསྟན་པའི་མཛད་འཕྲིན་ནི་གཞན་སུས་ཀྱང་འགྲན་དུ་མེད་པར་ངེས་ཏེ། ནུབ་ཕྱོགས་སུ་ཡོད་པའི་བོད་བརྒྱུད་ནང་བསྟན་གྱི་སློབ་མ་རྣམས་ལའང་ཡིད་འགུལ་ཆེན་པོ་ཐེབས་པར་བྱས་ཡོད། ང་ཚོས་འདི་ནས་ནང་ཆོས་དར་སྤེལ་གྱི་བྱ་བ་སྒྲུབ་ཁུལ་བགྱི་བ་ནི། ཁྱེད་ཀྱི་རླབས་ཆེ་བའི་མཛད་འཕྲིན་དང་བསྡུར་ན་ཤིན་ཏུ་ཉག་ཕྲ་བ་ཞིག་ཡིན།

དེ་ལྟ་ནའང་ང་ཚོའི་སེམས་སུ་ཁྱེད་ཉིད་ནི་བདག་ཅག་དང་ཐུགས་ཐག་ཉེ་ཞིང་རང་བཞིན་གཅིག་པ་ལྟ་བུར་མཐོང་བས། ཁྱེད་ཀྱི་ཡོད་ཚད་ནས་ཡོད་ཚད་ལ་ནམ་ཡང་ཡིད་སྨོན་དང་རྗེས་སུ་ཡི་རང་ཞུ་བ་ཡིན། ད་ལན་འདི་ནས་ཐུགས་བརྩེ་བ་ཆེན་པོས་ངེད་ཅག་ལ་དབང་དང་བཀའ་ཆོས་གནང་བར་བཀའ་དྲིན་བླ་ན་མེད་པ་ཞུ་ཞུ།

དེ་ནས་ཆོས་རྗེ་ཉིད་ཀྱིས་འདི་ལྟར་གསུང་།

དུས་ཚེས་ཕུན་སུམ་ཚོགས་པ་འདི་ལ། ལས་རབ་གླིང་པའི་གདན་ས་འདིར་ངེད་ཅག་གཞིས་བྱེས་གཉིས་དང་གཏེར་ཆེན་ལས་རབ་གླིང་པ་ཁོང་གི་སྤྲུལ་བའི་སྐུ་མཆོག་བསོད་རྒྱལ་རིན་པོ་ཆེ་དངོས་སུ་འདིར་བཞུགས་ཡོད་པ་དེ་དང་ཞལ་འཛོམས་བྱུང་བ་ཙམ་དུ་མ་ཟད། ཕན་ཚུན་དགའ་བཞིན་སྤྲོ་བཞིན་དུ་ཐེག་པ་ཆེན་པོའི་ཆོས་ལ་ལོངས་སྤྱོད་པའི་སྐལ་པ་བཟང་པོ་ཐོབ་པ་ལ་ང་རང་ཧ་ཅང་དགའ་སྤྲོ་ཆེ།

ད་རེས་སྔོན་དུ་བསོད་རྒྱལ་རིན་པོ་ཆེས་གསུང་མཛད་གནང་བ་ལ་ཐུགས་རྗེ་ཆེ་ཞུ། ཁོང་གིས་དེ་ལྟ་བུའི་གསུང་མཛད་གནང་བ་ཚང་མ་ཡང་དགོས་པའི་དབང་གིས་གསུངས་པ་རེད་མ་གཏོགས། ང་ལ་དོན་དངོས་ཐོག་ན་དེ་ལྟ་བུའི་ཡོན་ཏན་ཞིག་ཡོད་པ་ཨེ་རེད་ཅེ་ན་རྩ་བ་ནས་ཡོད་པ་མ་ཡིན། ཁོང་གིས་ཀྱང་དགོས་པ་ཁྱད་པར་ཅན་དུ་གཟིགས་ཏེ། དཔེར་ན་ཁྱི་ལ་སེང་གེའི་མིང་བཏགས་པ་བཞིན་དུ་ང་ལྟ་བུའི་སྐྱོན་གྱི་ཆ་ནི་ཆ་ཚང་བ་དང་། ཡོན་ཏན་གྱི་ཆ་ནི་ངོ་མ་དངོས་དག་གིས་སྣ་གཅིག་ཀྱང་མེད་པ། ཕར་ལྟར་སྣང་ལ་ཆོས་པའི་མིང་དང་ཆོས་པའི་གཟུགས་བརྙན་ཙམ་ཞིག་བཟུང་བ་ལ་དེ་ལྟར་གསུངས་པ་རེད།

དེས་ན་ང་ལྟ་བུ་ཞིག་ཤཱཀྱ་སེང་གེའི་བསྟན་པའི་མཇུག་མ་འདི་ལ་ཆོས་ཀྱི་ཁྲི་ཆེན་པོའི་སྟེང་དུ་བསྡད་ནས་སྐྱེ་བོ་མང་པོ་ལ་ཆོས་སྨྲ་དགོས་ཐུག་པ་དེའང་སུས་ཀྱང་བཟློག་ཏུ་མེད་པ་ཞིག་ཡིན། དེ་ཡང་སྔོན་སངས་རྒྱས་འོད་སྲུང་གི་བསྟན་པ་ལ་རྒྱལ་པོ་ཀྲི་ཀྲིས་རྨི་ལྟས་མི་འདྲ་བ་བཅོ་བརྒྱད་རྨིས་པ་ལས། རྨི་ལྟས་གཅིག་ལ་ནི་སྤྲེའུ་ངན་པ་ཞིག་རྒྱལ་པོའི་ཁྲི་ཆེན་པོ་རུ་བཞུགས་ཏེ། སྤྲེའུ་མང་པོ་ཞིག་གིས་དེ་ལ་བཀུར་བཞིན་ཆོས་ཉན་པ་ཞིག་རྨིས། དེ་ཅི་རེད་ཅེས་ཞུས་པ་ན། མ་འོངས་པར་སངས་རྒྱས་ཤཱཀྱ་ཐུབ་པའི་བསྟན་པའི་མཇུག་མ་ལ་ཐོན་པའི་གནས་སྐབས་ན། ཡོན་ཏན་སྣ་གཅིག་ཀྱང་མེད་པའི་སྤྲེའུ་ལྟ་བུ་དེའང་ཁྲི་ཐོག་ལ་བསྡད། ཡོན་ཏན་གྱི་ཆ་ཡོངས་སུ་རྫོགས་པར་ཚང་བའི་སྤྲེའུ་ལྟ་བུ་མང་པོའང་འཁོར་སློབ་ཏུ་འདུ་བའི་སྔ་ལྟས་རེད་ཅེས་གསུངས། དེ་ནི་གཙོ་བོ་ང་ལྟ་བུ་ལ་ལྷག་ཏུའང་འབྲེལ་ཆགས་པ་དང་སུས་ཀྱང་བཟློག་ཐབས་མེད་པ་ཞིག་རེད།

ང་རང་ཆུང་དུས་དཔེ་ཆ་ལ་སློབ་སྦྱོང་བྱས་ཏེ་ཧ་ཅང་བཙུན་པ་ཡིན་སྣང་ཤར་བའི་གནས་སྐབས་ན། ང་ལས་རབ་གླིང་པ་རེད་ཅེས་མིང་བཏགས་པ་ཡིན། དེའི་སྐབས་སུ་ངས་དེ་དག་ལ་རྒོལ་གཏམ་བཏང་བ་ཡིན། གཏེར་སྟོན་ལས་རབ་གླིང་པ་ཟེར་བ་དེ། རྡོ་རྗེ་བདུད་འཇོམས་སྐུ་ཡི་སྤྲུལ་བ་སྟེ། །རྡོ་རྗེ་ཕག་མོའི་གསུང་གི་བྱིན་གྱིས་བརླབས། །པདྨ་འབྱུང་གནས་ཐུགས་ཀྱི་སྒྱུ་འཕྲུལ་གར། །ཟབ་གཏེར་སྒོ་འབྱེད་འགྲོ་འདུལ་རིག་པ་འཛིན། །ལས་རབ་གླིང་པའི་ཞབས་ལ་གསོལ་བ་འདེབས། །ཞེས་ཁོང་སངས་རྒྱས་ཡིན་པར་གསུངས་འདུག སངས་རྒྱས་འཁོར་བ་ལ་འཁོར་སྲིད་རྒྱུ་ཨེ་རེད། གལ་ཏེ་འཁོར་བ་ལ་འཁོར་སྲིད། སེམས་ཅན་ཐ་མལ་པ་ཞིག་ཏུ་འགྱུར་སྲིད་ན་ང་ཡང་དེའི་སྤྲུལ་སྐུ་ཡིན་ཐང་མ་གཏོགས། ཡིན་སྲིད་པ་མ་རེད་ཅེས་ཁས་ལེན་རྩ་བ་ནས་བྱེད་མ་མྱོང་།

ང་རང་ལོ་ལོན་ནས་དེང་སང་གི་གནས་སྐབས་ལ་ཐོན་འོང་དུས། དཔལ་སྤྲུལ་ཚང་གིས། མགོ་དམ་མཇུག་ལྷོད་དགེ་སློང་བྱེད་རེ་ཤི །ཁ་འཇམ་རྒྱུད་རྩུབ་བྱང་སེམས་བྱེད་རེ་ཤི །ཞེས་གསུངས་པ་ལྟར། ངའི་དགེ་སློང་གི་སྡོམ་པ་དེ་མགོ་དམ་པོ་ཞིག་ཡིན་ཡང་རྔ་མ་ཅུང་ཙམ་ལྷོད་པོ་རུ་གྱུར་ཐལ། ལྷོད་ཐལ་ཟེར་བའི་རྒྱུ་མཚན་ནི། ངས་བསམ་བློ་མང་པོ་བཏང་བ་ན། ལས་རབ་གླིང་པ་ཁོང་དང་ཁོང་གི་སློབ་མ་ཆོས་ཀྱི་བདག་པོ་མང་ཆེ་བ་ཞིག་གིས་དོན་དངོས་ཐོག་ནས་ང་ལ་མིང་དེ་བཏགས་པར་འདུག མིང་བཏགས་པས་ང་ཁོང་ལ་གྱུར་སོང་བ་རྩ་བ་ནས་མ་རེད་མོད། འོན་ཀྱང་དེ་ལ་དགོས་པ་ཞིག་ཡོད་རྒྱུ་རེད་བསམས་ནས་ང་ལས་རབ་གླིང་པ་མིན་ཟེར་བའི་རྒོལ་གཏམ་དེ་རྩ་བ་ནས་མཚམས་འཇོག་བྱས་པ་ཡིན། རྒོལ་གཏམ་མི་གཏོང་བའི་རྩ་བའང་གཅིག་ནས་ང་ལ་ལས་རབ་གླིང་པའི་མིང་ཞིག་ཐོགས་ན། ང་རང་ངོས་ནས་ཀྱང་བསྟན་པ་དང་སེམས་ཅན་ལ་ཕན་ཅུང་ཙམ་རེ་ཐོགས་པ་ཨེ་ཡིན་བསམས། གཉིས་ནས་ལས་རབ་གླིང་པའི་གསུང་ཆོས་ཚང་མ་རྒྱུན་ཆད་ལ་ཁད་དང་ནུབ་ལ་ཁད་པར་ཐུག་འདུག་པས། དེ་གསོ་བའི་ཆེད་དུ་ཁོང་གི་མཚན་དེ་ང་ལ་གསོལ་ན། དགོས་པ་ཞིག་ཡོད་པར་གཟིགས་པ་ཨེ་ཡིན་བསམས་ནས་རྒོལ་གཏམ་མི་གཏོང་བར་མ་ཟད། ཁོང་གི་གསུང་ཚང་མ་གང་ཐུབ་ཐུབ་ཀྱིས་སྤེལ། གསུང་ཆོས་པར་ཤིང་ལྟ་བུ་ལ་མཚོན་ན་ཡང་། ཕྱོགས་སོ་སོར་ཐོར་འདུག་པ་རྣམས་དཔེ་བསྡུ་བྱས་ཤིང་། པར་ཤིང་རྙིང་པ་བྱི་བ་སོགས་ཀྱིས་གཏོར་བརླག་བཏང་བ་སོགས་པར་དུ་བརྐོས། ཁོང་གི་གདན་ས་དེ་ལ་ཡང་བདག་པོ་རེ་བྱས་ནས་ད་ལྟའི་བར་དུ་བསྡད་པ་ཡིན།

དེས་ན་གཏེར་ཆེན་ལས་རབ་གླིང་པ་ནི་སྔོན་གཏེར་སྟོན་ཡོངས་རྫོགས་ཀྱི་ཐོག་མ་གཏེར་སྟོན་སངས་རྒྱས་བླ་མ་ནས་བཟུང་སྟེ། ད་ལྟའི་བར་དུ་ཁོང་འདྲ་བའི་གྲུབ་པ་དང་མཁས་པ། མཛད་པ་མཐའ་ཡས་པ་ཅན་ཞིག་རྩ་བ་ནས་བྱོན་མ་མྱོང་བ་ལྟ་བུ་ཡིན། དེ་ཡིན་པའི་རྒྱུ་མཚན་དེ་ཡང་། གཏེར་སྟོན་ཁོང་བཞུགས་པའི་དུས་སུ་བོད་གངས་རིའི་ལྗོངས་ན་རྒྱལ་དབང་སྐུ་ཕྲེང་བཅུ་གསུམ་པ་ཐུབ་བསྟན་རྒྱ་མཚོ་དང་། ཀརྨ་པ་སྐུ་ཕྲེང་བཅོ་ལྔ་པ་མཁའ་ཁྱབ་རྡོ་རྗེ། ས་སྐྱ་དང་རྙིང་མ་སོགས་གང་གི་དབང་དུ་བྱས་ནའང་ཆོག་པ་འཇམ་དབྱངས་མཁྱེན་བརྩེ་དབང་པོ་དང་ཀོང་སྤྲུལ་ཡོན་ཏན་རྒྱ་མཚོ། གཞན་ཡང་ཀུན་མཁྱེན་མི་ཕམ་རྒྱ་མཚོ་ལ་སོགས་པའི་ས་སྐྱ་དང་དགེ་ལྡན། རྙིང་མ། བཀའ་བརྒྱུད། བོན་པོ་སོགས་ཀྱི་མཁས་ཤིང་གྲུབ་པ་ཚང་མས་བླ་མ་ཉིད་དུ་བཀུར་ཅིང་གདེང་འཇོག་མཐོན་པོ་གནང་སའི་སྤྲུལ་པའི་གཏེར་སྟོན་ཆེན་པོ་ཞིག་ཡིན། སྤྱིར་བོད་གངས་རིའི་ལྗོངས་འདིར་མཐའ་དམག་དེ་ཡང་རྣམ་པ་བཅུ་གཉིས་ཀྱི་བར་དུ་འབྱུང་རྒྱུ་ཡོད་ཅིང་། གཏེར་སྟོན་ལས་རབ་གླིང་པའི་དུས་སུ་མཐའ་དམག་དགུ་པ་དེ་བོད་ལ་འབྱུང་བའི་དུས་སྐབས་ཡིན་པས། རྒྱལ་དབང་བཅུ་གསུམ་པས་ཁོང་མཐའ་དམག་དགུ་པ་མ་ལུས་པར་བཟློག་ཅིང་། བོད་གངས་ཅན་གྱི་རྒུད་པ་ཐམས་ཅད་སེལ་བའི་བྱེད་པ་པོ་ཉིད་དུ་མངའ་གསོལ་བ་ཡིན། ཁོང་གི་སྐུ་ཚེ་གཅིག་ལ་ཡང་བོད་གངས་ལྗོངས་ཀྱི་བསྟན་འགྲོའི་དོན་དུ་སྐུ་ཚེགས་འོ་བརྒྱལ་བསམ་གྱིས་མི་ཁྱབ་པ་མཛད། དེས་ན་ཁོང་སྐུ་བཞུགས་པའི་དུས་སུ་བོད་ལ་ནད་མུག་མཚོན་འཁྲུག་སོགས་གང་གིས་ཀྱང་གནོད་པ་ཅི་ཡང་མ་བྱུང་བ་ཡིན།

གཏེར་ཆེན་ལས་རབ་གླིང་པ་ཁོང་གི་སློབ་མ་ཐམས་ཅད་ཀྱི་རྩ་བའི་རྩ་བར་གྱུར་པ་ནི། རྒྱལ་དབང་ཐུབ་བསྟན་རྒྱ་མཚོ་དང་རྡོ་གྲུབ་བསྟན་པའི་ཉི་མ་རྣམ་པ་གཉིས་ཡིན་ལ། རྡོ་གྲུབ་བསྟན་པའི་ཉི་མ་ལ་དཔེར་མཚོན་ན། འཇམ་དབྱངས་མཁྱེན་བརྩེ་དབང་པོས་དགུང་ལོ་ལྔ་བཅུ་མ་གཏོགས་མི་བཞུགས་པར་གསུངས་མོད། འོན་ཀྱང་གཏེར་ཆེན་ལས་རབ་གླིང་པས་ཁོང་འདས་མ་སོང་གི་བར་དུ་སློབ་མ་ཆོས་བདག་གཉིས་པོ་ཡང་མི་འདའ་བའི་ཞལ་བཞེས་གསལ་པོར་གནང་། ཁོང་ལ་གཉེར་བ་ཨ་འཕྲིན་ཟེར་བ་ཞིག་ཡོད་པ་དེ་དང་། ཆོས་བདག་རྩ་བ་ཤུགས་འབྱུང་སྤྲུལ་སྐུ་ཚུལ་ཁྲིམས་བཟང་པོ། རྡོ་གྲུབ་བསྟན་པའི་ཉི་མ། རྒྱལ་དབང་ཐུབ་བསྟན་རྒྱ་མཚོ། ཁོང་བཞི་པོ་གལ་ཏེ་གདན་ས་ཆེན་པོ་ལྷ་སའི་པོ་ཏ་ལ་རུ་འཚོགས་ཐུབ་པ་དང་། གཏེར་སྟོན་ཁོང་གིས་ཕབ་ཚར་བའི་སྒྱུ་འཕྲུལ་གསང་སྙིང་གི་སྒྲུབ་ཐབས་དང་། རྒྱུད་འགྲེལ་སོགས་ཁྲིད་མང་པོ་ཞིག་གསུངས་ཡོད་པ་དེ་བཤད་པའི་དུས་བཟང་པོ་འགྲིག་ན། ཁོང་གི་ཡང་སྤྲུལ་དང་ཡང་སྤྲུལ་ཕྱི་མའི་དུས་སུ་ཡང་བོད་གངས་རིའི་ལྗོངས་ལ་རྒུད་པ་རྩ་བ་ནས་མི་འབྱུང་བའི་ཞལ་བཞེས་གནང་རུང་། སེམས་ཅན་གྱི་ལས་དང་བསོད་ནམས་དམན་པའི་སྟོབས་ཀྱིས་རྡོ་གྲུབ་རིན་པོ་ཆེ་བྱོན་མ་ཐུབ་པ་ཡིན། འོན་ཀྱང་རྒྱལ་བ་ཐུབ་བསྟན་རྒྱ་མཚོས་དེར་དགོངས་ཏེ་བང་ཆེན་པ་བཏང་ནས་གདན་འདྲེན་དུ་མངགས་པ་ཡིན།

དེའི་དུས་སུ་ཤུགས་འབྱུང་སྤྲུལ་སྐུས་ཨ་སྐྱོའི་ཚུལ་མཛད་དེ་ང་སྔོན་དུ་སོང་སྟེ་བསྒུག་འདུག་ཅེས་གསུངས་ནས་ལྷ་སར་བྱོན། གྲུབ་ཆེན་བསྟན་པའི་ཉི་མས་དགྱེས་ཚོར་ཆེན་པོ་བྱས་ཏེ་ལྷ་སར་འགྲོ་བའི་ལམ་ལ་ཆས་པ་ན། ཟུར་ན་རྡོ་ཆུ་ཟེར་བའི་ཆུ་ཆེན་པོ་ཞིག་ཡོད་པ་དེ་ལ་ཁལ་མ་རྣམས་འབུད་དུ་མ་བཏུབ་སྐབས། གྲྭ་པ་རྣམས་ཀྱིས་ལྕག་དང་རྡོ་ཡིས་རྡུང་རྡེག་བྱས་པ་ན། ཁོང་ཧ་ཅང་བཙུན་པ་ཡིན་པས་ཐུགས་སུན་ཏེ། རྒྱང་གྲགས་གཅིག་ལྷག་ཙམ་གྱི་ས་མཚམས་ནས་དེ་འདྲ་བའི་སྡིག་པ་ཚབས་ཆེན་བསོག་དགོས་ན། འདི་ལྟར་ལྷ་སར་སོང་ན་དགེ་བ་ལས་ཀྱང་སྡིག་པའི་ལས་ཆེ་བར་འདུག་སྙམ་ནས། ཁོང་རྩ་བ་ནས་ཕེབས་རྒྱུ་མིན་གསུངས་ཏེ་ཕྱིར་ལ་ལོག དེ་མ་ཐག་ཏུ་གཉེར་བ་ཨ་འཕྲིན་ཡང་འདས་སོང་བ་ཡིན།

དེ་ནས་ཧོར་ཟླ་དང་པོའི་ཚེས་གཅིག་གི་ཉིན་ལ་གཏེར་ཆེན་ལས་རབ་གླིང་པ་གྲུབ་ཆེན་རིན་པོ་ཆེ་བསྟན་པའི་ཉི་མའི་སྐུ་མདུན་ལ་ཕེབས་ནས། ཁོང་རྣམ་པ་གཉིས་ཞལ་གྱེས་སྐབས། གྲུབ་ཆེན་རིན་པོ་ཆེས་སྔོན་ཆད་ཡིན་ན་ཕར་འགྲོ་དུས་དར་ཁ་འབུལ་སྲོལ་མེད་ཀྱང་། ད་ཐེངས་ཁྱེད་ལ་དར་ཁ་ཞིག་དབུལ་རྒྱུ་ཡིན། སྐྱེ་བ་ད་རེས་ཀྱི་ལུས་ཐོག་ལ་དེ་ལས་འཕྲད་པ་མེད་ཀྱང་སྐྱེ་བ་ཚེ་རབས་ཀྱི་བར་དུ་འབྲལ་བ་མེད་ཅེས་ཞལ་བཞེས་གནང་།

གཞན་ཡང་ཤར་ཕྱོགས་གཉན་པོ་གཡུ་རྩེའི་གཏེར་ནས་བཞེས་པའི་རྟ་ཕག་གི་བླ་རྡོ་ཟེར་བ་ཞིག་ཡོད། དེ་ནི་རྒྱལ་བ་ཐུབ་བསྟན་རྒྱ་མཚོའི་ཕྱག་དངོས་ལ་ཐོག་མར་གསང་བའི་སྒོ་ནས་འཕྲོད་ཅིང་། སྐུ་ཕྲེང་རིམ་བྱོན་རྣམས་རྟེན་དེ་དང་མ་འབྲལ་ན་ལེགས་ཞེས་ཁོང་གིས་ཞལ་བཞེས་གནང་། དེ་རྗེས་བསྟན་རྒྱམ་རིན་པོ་ཆེའི་ཕྱག་ཏུ་འཕྲོད་ཡོད་པར་མ་ཟད། དེང་སང་ཡང་ཁོང་གི་ཕྱག་ན་བཞུགས། དགུ་བཅུ་ཐམ་པའི་ལོར་ངས་ཁོང་དང་མཇལ་འཕྲད་བྱེད་པའི་གནས་སྐབས་ན། ཁོང་གིས་རྟ་ཕག་གི་བླ་རྡོ་དེ་ང་ལ་མཇལ་ཁ་གནང་ཐལ། ཁོང་ནོར་བུ་གླིང་ག་ནས་ཕྱི་ཕྱོགས་སུ་ཕེབས་པའི་དུས། ཁོང་གི་ཐུགས་ལ་དཀའ་ཁག་འདི་ལྟ་བུ་ལ་ཐུག་ཚེ་སྐུ་སྲོག་སྐྱོབ་ངེས་ཅན་གྱི་རྟེན་དེ་གང་ཡིན་སྙམ་ནས་བསམ་བློ་ཞིབ་མོར་བཏང་ཚེ། གཏེར་སྟོན་བསོད་རྒྱལ་གྱིས་གཏེར་ནས་བཞེས་པའི་སྐུ་ཚབ་ཉེར་ལྔ་ལས་སྐུ་ཚབ་གཉིས་པའི་རྟེན་འདི་ཡིན་རྒྱུ་རེད་དགོངས་སོང་གསུངས། རྟ་ཕག་གི་བླ་རྡོའི་སྟེང་ན་རྟ་མགྲིན་གྱི་སྐུ་རང་བྱུང་དུ་ཡོད་པ། འོག་ན་བྃ་ཧཱ་རི་ནི་ས་དོད་ཡོད་པ་ཞིག་རེད། དེས་ན་ངོ་མ་དངོས་ཐོག་གིས་ད་ལྟ་ཁོང་བར་ཆད་ཀྱི་དབང་དུ་རྩ་བ་ནས་འགྲོ་སྲིད་རྒྱུ་མ་རེད་སྙམ།

དེ་བཞིན་དུ་གཏེར་ཆེན་ལས་རབ་གླིང་པའི་སྐུ་སྐྱེ་གོང་མ་སྔགས་པ་རྡོ་རྗེ་བདུད་འཇོམས་དེ་ཡང་ཨོ་རྒྱན་རིན་པོ་ཆེ་དང་ཆོས་རྒྱལ་ཁྲི་སྲོང་ལྡེ་བཙན་གྱི་ཐུགས་ཟིན་པ་ལ་གཞན་གང་དང་ཡང་མི་འདྲ་བར་ཞབས་ཞུ་ལྷག་པར་བསྒྲུབས་ཡོད། དེའི་རྟེན་འབྲེལ་གྱིས་ཁོང་གི་སྐྱེ་བ་ཕྱི་མ་ཕྱི་མ་རྣམས་སུ་མཛད་པ་རྒྱ་ཆེ་བ་དང་འགྲོ་དོན་རྒྱ་ཆེན་པོ་འབྱུང་བའང་ཡིན། ཁྲི་སྲོང་ལྡེ་བཙན་གྱི་ཞབས་ཞུ་བསྒྲུབ་ཚུལ་ལ་བསམ་བློ་བཏང་ན། ཁོང་ནི་ཁྲི་སྲོང་ལྡེ་བཙན་གྱི་བློན་པོ་ཡོངས་ཀྱི་གཙོ་བོ་ཡིན་ལ་ལོ་ཙཱ་བའང་ཡིན། ཨོ་རྒྱན་སངས་རྒྱས་གཉིས་པ་བོད་ཡུལ་དུ་གདན་འདྲེན་པའི་བྱེད་པ་པོ་ཡང་ཡིན། ཁྲི་སྲོང་ལྡེ་བཙན་གྱི་སྐུ་ཚེ་གཅིག་གི་རིང་ལ་རྒྱལ་པོའི་མཛད་པ་ཅི་མཛད་དགོས་པ་ཐམས་ཅད་ཀྱང་སྔགས་པ་རྡོ་རྗེ་བདུད་འཇོམས་ཀྱིས་མཛད། རྗེས་མ་ལྷ་སྲས་མུ་ཁྲི་བཙད་པོ་དང་། མུ་ཏིག་བཙད་པོ་ལ་སོགས་པའི་སྐུ་དུས་ན་ཡང་རྒྱལ་པོའི་བྱ་བ་ཚང་མ་ཁོང་བློན་པོ་གཅིག་གིས་མཛད། ཆོས་རྒྱལ་ཆེན་པོའི་ཐུགས་ཀྱིས་ཟིན་ཡོད་པ་ཁོང་འདྲ་བ་ཞིག་རྩ་བ་ནས་ཡོད་པ་མ་ཡིན།

ཨོ་རྒྱན་སངས་རྒྱས་གཉིས་པ་ལ་བསམ་བློ་བཏང་ན་ཡང་། རྡོ་རྗེ་བདུད་འཇོམས་ཀྱིས་ཞབས་ཞུ་སྒྲུབ་པ་ལྟ་བུ་ཞིག་རྗེ་འབངས་སུས་ཀྱང་བསྒྲུབས་ཐུབ་ཡོད་པ་མིན། ཁོང་གིས་ཐེངས་དང་པོར་ཨོ་རྒྱན་རིན་པོ་ཆེ་གདན་ཞུ་བྱས་ཤིང་། བལ་ཡུལ་ཡང་ལེ་ཤོད་ནས་བོད་ཡུལ་བར་དུ་ཁུར་བོ་ཁུར་ཏེ་ཁོང་ལ་ཞབས་ཞུ་སྒྲུབ་ནས་ཡོང་བ་ཡིན། རྡོ་རྗེ་བདུད་འཇོམས་ཀྱིས་ཕུར་བའི་ཆོས་བཀའ་ཞུ་བའི་སྐབས་ལ། འབུལ་བ་ཡོན་གྱི་རྣམ་གྲངས་ཀྱང་གསེར་དང་དངུལ། གཡུ། བྱུ་རུ་ལ་སོགས་པ་ཡོ་བྱད་སུས་ཀྱང་བློ་ཡུལ་དུ་མི་ཤོང་བ་ཕུལ་བར་མ་ཟད། སེམས་ཅན་གཅིག་ལ་ཡང་གནོད་པ་མེད་པར་ཚོགས་ཤ་རྒྱ་ཆེན་པོ་དུས་གཅིག་ལ་འབུལ་བ་ཕུལ་ཚུལ་ཕུར་བའི་ལོ་རྒྱུས་ལས་གསུངས་ཡོད་པ་ཡིན། ཨོ་རྒྱན་རིན་པོ་ཆེས་ཀྱང་སློབ་མ་ཡོངས་རྫོགས་ཀྱི་ནང་ན། རྡོ་རྗེ་བདུད་འཇོམས་རླུང་ལྟར་ཐོགས་པ་མེད། །ཅེས་གྲུབ་པ་བརྙེས་པ་ལ་ཐོགས་པ་མེད་པ་ཙམ་དུ་མ་ཟད་ཕྱིན་ཆད་ཨོ་རྒྱན་རིན་པོ་ཆེའི་རྗེས་འཇུག་ཡོངས་རྫོགས་ལས། རྔ་རྡུང་ཕུར་ཐོགས་ཡོངས་ཀྱི་གཙོ་བོ་ཉིད་དུ་མངའ་གསོལ་བས། རྔ་རྡུང་བ་ལ་རྡོ་རྗེ་བདུད་འཇོམས་ལས་བཟང་མེད་པ་དང་། ཕུར་བ་འཛིན་པ་ལ་ཡང་རྡོ་རྗེ་བདུད་འཇོམས་ལས་ནུས་པ་ཆེ་བ་ཞིག་མེད་པ་ཡིན།

དེ་ཡིན་ན་ད་ལྟ་རྡོ་རྗེ་བདུད་འཇོམས་དེ་ངེད་གཉིས་སུ་གྱུར་ཡོད་པར་བཤད་པས། ངེད་གཉིས་ཀ་ལ་ཡང་ནུས་པ་ཅུང་ཙམ་རེ་ཡོད་རྒྱུ་རེད། ཁོང་གི་ལག་ལ་རྔ་ཞིག་དང་ངའི་ལག་ལ་ཕུར་བ་ཞིག་ཞོག་དང་ངེད་གཉིས་ཀྱི་ནུས་པ་དེ་ཇི་ལྟ་བུ་ཞིག་ཡིན་འཛམ་བུ་གླིང་ལ་གསལ་པོར་མངོན་ཡོང་རྒྱུ་རེད། ༼དགོད་སྒྲ།༽

དེར་མ་ཟད་རྡོ་རྗེ་བདུད་འཇོམས་ཀྱིས་གུ་རུ་རིན་པོ་ཆེའི་ཐུགས་མཉེས་པ་དང་ཡོན་ཕུལ་བའི་ཚུལ་དེ་གཞན་གང་དང་ཡང་མི་འདྲ་བའི་རྒྱུ་མཚན་གྱིས། རྗེས་མ་བདུད་འཇོམས་ཀྱི་སྐྱེ་མཐའ་ཚང་མའི་གཏེར་རྫས་དེ་ཡང་། གཞན་གང་དང་ཡང་མི་འདྲ་བའི་རྒྱུ་རྩ་ཧ་ཅང་ཁྱད་དུ་འཕགས་ཤིང་སྒྲོས་ཆ་ཡང་ཕུལ་དུ་བྱུང་བ་ཞིག་ཡིན། དེ་ནི་རིག་འཛིན་རྒོད་ལྡེམ་ཅན་གྱི་གཏེར་རྫས་ཕལ་ཆེར་དང་། ཁྱད་པར་དུ་གཏེར་ཆེན་ལས་རབ་གླིང་པའི་གཏེར་རྫས་དེ་དག་ང་ལ་ཡང་མང་པོ་ཡོད། སྤྱི་ཁྱབ་ཀྱི་གཏེར་རྫས་ཚང་མ་ཆོས་བདག་རྣམས་ལ་བགོས་བཞག་པས་ཡུལ་ཁམས་ཚང་མ་ལ་ཡང་ཁོང་གི་གཏེར་རྫས་ཀྱིས་ཁྱབ་ཡོད།

མདོར་ན་ང་གཏེར་ཆེན་ལས་རབ་གླིང་པ་མིན་མི་ཟེར་བ་དེའང་ང་རང་གི་རང་དོན་ལ་བསམ་བློ་བཏང་ནས་དེ་ལ་ངོ་རྒོལ་གྱི་སྐད་ཆ་མ་བཤད་པ་ཡིན། ཇི་ལྟར་ཡིན་ཞེ་ན། རྡོ་རྗེ་བདུད་འཇོམས་དང་གཏེར་ཆེན་ལས་རབ་གླིང་པའི་མིང་ཙམ་ཐོགས་པ་དེས་ཀྱང་བསྟན་པ་དང་སེམས་ཅན་ལ་ཕན་བསམ་གྱིས་མི་ཁྱབ་པ་ཞིག་ཐོགས་རྒྱུ་རེད་བསམ། ཉེ་སྔོན་ང་ཨ་མེ་རི་ཁའི་ལུང་པ་ན་ཡོད་པའི་སྐབས་སུ། ཨ་རིའི་བྷོ་སི་ཐིན་ལ་རླུང་འཇིག་ཆེན་པོ་ཞིག་འོང་རྒྱུ་རེད་ཅེས་ཁ་པར་ཐོན་ཐལ། ང་ལ་དཔའ་གདེང་ཡོད་པས་བཤད་པ་མིན་ཡང་། ངས་རྒྱ་སྤྲུལ་རིན་པོ་ཆེ་ལ་ཉམས་མཚར་དུ། དེ་སྐྱོན་རྒྱུ་མ་རེད། ད་སྔོན་ཡན་ཆད་ལ་རླུང་འཇིག་དེ་བྱུང་ཡོད་ན་ང་ལ་འགན་མེད་མ་གཏོགས། ད་ཕྱིན་ཆད་འབྱུང་རྒྱུ་མ་རེད། རྒྱུ་མཚན་ནི་ང་ལ་སྔགས་པ་རྡོ་རྗེ་བདུད་འཇོམས་ཀྱི་མིང་ཐོགས་ཡོད་པས། ངས་རྡོ་རྗེ་བདུད་འཇོམས་ཀྱི་མིང་ཐོག་དེས་བྱ་བ་ཞིག་བྱས་ན་སྣང་སྲིད་ལྷ་འདྲེ་ཞིག་གིས་གནོད་པ་གཏན་ནས་བྱེད་རྒྱུ་མ་རེད། དཔེ་བཞག་ན། འཇོན་ཐང་གི་ཡོན་ཏན་གང་ཡང་མེད་པའི་མི་ཞིག་ལ་ཨ་རི་རྒྱལ་ཁབ་ཀྱི་སྲིད་འཛིན་གྱི་མིང་ཐོགས་ཡོད་ན། ཁོས་སྲིད་འཛིན་གྱི་མིང་ཐོག་ནས་ཐམ་ག་ཞིག་བརྒྱབ་པ་རྐྱང་པས་ཀྱང་ཤུགས་རྐྱེན་རེ་ཐེབས་རྒྱུ་རེད། ང་རྡོ་རྗེ་བདུད་འཇོམས་རྩ་བ་ནས་ཡིན་རྒྱུ་མ་རེད་མོད། འོན་ཀྱང་ངས་རྡོ་རྗེ་བདུད་འཇོམས་ཀྱི་མཚན་ཐོག་ནས་སྣང་སྲིད་ཀྱི་ལྷ་འདྲེ་ཐམས་ཅད་ལ་བཀའ་ཞིག་བསྒོས་ནའང་ཕན་ཐོགས་ཡོད་རྒྱུ་རེད་སྙམ། དེས་ན་རྡོ་རྗེ་བདུད་འཇོམས་ཀྱི་སྐུ་སྐྱེ་ལས་རབ་གླིང་པ་མིན་མི་ཟེར་བའི་རྒྱུ་མཚན་ཡང་དེ་ཡིན།

དེས་ན་ངས་གཏེར་ཆེན་ལས་རབ་གླིང་པ་མིན་ཟེར་བའི་རྒོལ་གཏམ་མ་བཤད་པ་རེད་མ་གཏོགས། ང་ཁོང་ཡིན་ཟེར་བའི་ཁས་ལེན་གཙང་མ་ཞིག་སྔར་ནས་ད་ལྟའི་བར་གཏན་ནས་བྱས་མ་མྱོང་བ་དེ་ངོ་མ་དངོས་དག་ཡིན། འོན་ཀྱང་ཁོང་གི་བྱིན་རླབས་ཁྱད་པར་ཅན་ཞིག་ང་ལ་འགོས་ཡོད་རྒྱུ་རེད་སྙམ་པའི་ཡིད་ཆེས་ཡོད།

སྤྱིར་གཏེར་སྟོན་གཞན་ལ་བསམ་བློ་བཏང་ན། འབྲས་བུའི་དུས་དང་སྒྲུབ་པའི་དུས། ལུང་གི་དུས། རྟགས་ཙམ་འཛིན་པའི་དུས་ཏེ། གཏེར་སྟོན་རང་རང་ལ་བསྟན་པའི་གནས་ཚད་ཅིག་བཤད་རྒྱུ་ཡོད་ལ། གཏེར་སྟོན་རང་ཉིད་བཞུགས་པའི་ཚེ་ལྷག་པར་དུ་བྱིན་རླབས་ཆེ་ཡང་། དེའི་སློབ་མ་ཐམས་ཅད་ཀྱི་རིང་ལ་བྱིན་རླབས་དེ་ཙམ་མི་ཆེ་བ་དང་། དེ་ནས་བཟུང་བྱིན་རླབས་ཇེ་དམན་དུ་འགྲོ་བ་ཡིན་མོད། འོན་ཀྱང་གཏེར་ཆེན་ལས་རབ་གླིང་པའི་མཛད་པ་ནི་ཁོང་རང་གི་སྐུ་དུས་ལས་ཀྱང་། ཡང་སྤྲུལ་གྱི་དུས་ན་ཕྲིན་ལས་དང་ནུས་པ། བྱིན་རླབས་སོགས་གང་ཅིའི་ཐད་ནས་ཀྱང་བརྒྱ་འགྱུར་གྱིས་ཆེ་བར་གསུངས་པ་དང་། ཁོང་གི་སྒེར་གྱི་བསྟན་པའི་གནས་ཚད་དེའང་མི་ལོ་ལྔ་བརྒྱའི་བར་དུ་ཉམས་རྒུད་གང་ཡང་མི་འབྱུང་བར་དར་རྒྱས་ཕུན་སུམ་ཚོགས་པ་ཡོང་ཞེས་ཞལ་བཞེས་མཛད་ཡོད།

དེ་རིང་ལས་རབ་གླིང་པའི་གདན་སར་ཐོན་ནས་སེམས་ཧ་ཅང་དགའ་སོང་བས། ངའི་སྐད་ཆ་དེའང་ཉོག་པ་དང་དུས་ཚོད་ཀྱང་ཡུན་རིང་བརྒྱངས་ཐལ། ཉེས་སེལ་གྱི་དབང་ཧ་ཅང་གི་བསྡུས་པོ་ཞིག་ཡིན། ཁྱེད་རྣམ་པ་ཡུད་ཙམ་ཞིག་སྡོད་དང་དཀའ་ངལ་ཆེན་པོ་མི་དགོས།

ཕུར་པའི་ཆོས་དར་ཁྱབ་བྱུང་བའི་རྟེན་འབྲེལ།

ཕྱི་ཟླ་༨པའི་ཚེས་༢༥ཉིན། ཆོས་རྗེ་ཉིད་ཀྱིས་ལས་རབ་གླིང་གི་མཐོ་རིམ་ལས་གཉེར་པ་རྣམས་ལ་མཇལ་ཕྲད་མཛད་དེ་བསླབ་སྟོན་གནང་། ཉིན་དེར་ཁོང་ལ་ཁྲོམ་བསྒྲགས་ཆོས་ཁྲིད་གནང་བའི་བཀོད་སྒྲིག་མེད་པས། མཁན་རྣམ་གྲོལ་མཆོག་གིས་དེར་འཁོད་རྣམས་ལ་ཆོས་ཁྲིད་དང་བཀའ་སློབ་གནང་།

ཕྱི་ཟླ་༨པའི་ཚེས་༢༦ཉིན། བོད་རྩིས་ཀྱི་ཚེས་བཅུ་ལ་ཁེལ་ཡོད་པས། ཆོས་རྗེ་ཉིད་ལས་རབ་གླིང་གི་དཔོན་སློབ་ཡོངས་དང་མཉམ་དུ་རྟེན་འབྲེལ་ཉེས་སེལ་གྱི་ཆོ་གའི་སྒོ་ནས་ཚོགས་འཁོར་རྒྱ་ཆེན་པོ་བསྐོར།

ཕྱི་ཟླ་༨པའི་ཚེས་༢༧ཉིན། ཆོས་རྗེ་ཉིད་ཀྱིས་འདུས་པ་ཡོངས་ལ་གཏེར་ཆེན་ལས་རབ་གླིང་པའི་ཕུར་པ་ཡང་ཟབ་སྙིང་པོའི་དབང་གནང་བའི་ཐོག་མར་འདི་ལྟར་གསུང་།

འོ་ཡ། ད་དབང་སྐུར་བར་བྱེད་པ་ལ་ཐོག་མར་སློབ་དཔོན་གྱི་བྱ་བ་དང་། སློབ་མའི་བྱ་བ་གཉིས་སུ་ཡོད་པ་ལས་སློབ་དཔོན་གྱི་བྱ་བ་དེ་བླ་མ་བརྒྱུད་པའི་ཕྱག་བཞེས་ཇི་བཞིན་དུ་མདོར་ཧ་ཅང་བསྡུས་པ་ཞིག་སྔོན་དུ་སོང་ནས། གཉིས་པ་སློབ་མའི་ངོ་སྐལ་དུ་གྱུར་པའི་དབང་ཞུ་བ་ལ་འགལ་རྐྱེན་བསལ་བ་དང་། མཐུན་རྐྱེན་སྒྲུབ་པ་གཉིས་ཡོད་པ་ལས། འགལ་རྐྱེན་བསལ་བ་ལ་ནི། ནང་གི་སྒྲིབ་པ་སྦྱང་བ་ཁྲོ་བོ་བདུད་རྩི་འཁྱིལ་བ་བསྐྱེད་པའི་སྐུ་ལུས་ལ་བརྟེན་ནས་ཁྲུས་བྱ་བ་དང་། རྣམ་པར་རྟོག་པའི་དབང་གིས་བྱུང་བའི་ཕྱི་རོལ་གྱི་གདོན་བགེགས་འབྱུང་པོ་རྣམས་རྒྱང་རིང་དུ་བསྐྲད་དེ་སྲུང་འཁོར་སྒོམ་པ་དང་གཉིས་ཡོད་པ་ལས་གཉིས་ཀ་ཡང་གྲུབ་ཟིན། གཉིས་པ་མཐུན་རྐྱེན་སྒྲུབ་པ་ལ་བྱང་ཆུབ་མཆོག་ཏུ་སེམས་བསྐྱེད་པ་དང་། མཎྜལ་འབུལ་བ་གཉིས་སུ་ཡོད་པ་ལས། དང་པོ་བྱང་ཆུབ་མཆོག་ཏུ་སེམས་བསྐྱེད་པ་ནི། ཁྱེད་རང་རྣམས་ཀྱིས་བསམ་པ་འདི་བཞིན་དུ་བཅོས་པར་བྱ་སྟེ། ནམ་མཁའ་དང་མཉམ་པའི་སེམས་ཅན་ཐམས་ཅད་ཀྱི་དོན་དུ་ཟུང་འཇུག་སྐུ་བཞི་ཡེ་ཤེས་ལྔའི་བདག་ཉིད། ཁྱབ་བདག་གདོད་མའི་མགོན་པོ། ཆོས་སྐུ་ཀུན་ཏུ་བཟང་པོའི་གོ་འཕང་སྐུ་ཚེ་འདི་ཉིད་ལ་མངོན་དུ་བསྒྲུབ་པར་བྱ། དེའི་ཕྱིར་དུ་སྨིན་བྱེད་ཀྱི་དབང་བསྐུར་ཟབ་མོ་ཞུས་ནས། གྲོལ་བྱེད་ལམ་གྱི་རིམ་པ་རྣམས་ཚུལ་བཞིན་ཉམས་སུ་བླང་བར་བགྱིའོ་སྙམ་པའི་བྱང་ཆུབ་མཆོག་ཏུ་ཐུགས་བསྐྱེད་པ་དང་བཅས་ཏེ་གསན་འཚལ།

དེ་ལ་གང་གསན་པར་བྱ་བའི་ཆོས་ནི། བདག་ཅག་གི་སྟོན་པ་ཐབས་མཁས་ལ་ཐུགས་རྗེ་ཆེན་པོ་དང་ལྡན་པ་འདི་ཉིད་ཀྱིས་གདུལ་བྱའི་ཁམས་དབང་མོས་པ་བསམ་པའི་བྱེ་བྲག་དང་མཐུན་པར། ཆོས་ཀྱི་རིམ་པ་བསམ་གྱིས་མི་ཁྱབ་པ་ཞིག་གསུངས་ཤིང་། དེ་དག་ཐམས་ཅད་རིགས་བསྡུ་ན་གཞན་གནོད་གཞི་བཅས་སྤོང་བ་ཉན་ཐོས་ཀྱི་ཐེག་པའི་ལམ་དང་། གཞན་ཕན་གཞི་དང་བཅས་པ་སྒྲུབ་པ་བྱང་ཆུབ་སེམས་དཔའི་ཐེག་པ་དང་། གཞན་ཕན་དེ་ཡང་ཐབས་ལ་མཁས་པ་དང་། ཤེས་རབ་ཆེན་པོའི་ཁྱད་པར་ལ་བརྟེན་ནས་ལམ་བདེ་མྱུར་དུ་སྒྲུབ་པར་བྱེད་པ་གསང་སྔགས་རྡོ་རྗེ་ཐེག་པ་དང་གསུམ་དུ་ཡོད་པ་ལས། ད་རེས་སྐབས་སུ་བབས་པ་ནི་གསང་སྔགས་རྡོ་རྗེ་ཐེག་པ་ཡིན་ལ། དེ་ལ་ཡང་མི་ཚེ་གསུམ་དང་བཅུ་དྲུག་ལ་སོགས་པ་ཚེ་རབས་གཞན་ལ་སངས་རྒྱས་ཀྱི་གོ་འཕང་བསྒྲུབ་པར་འདོད་པ་ཕྱི་རྒྱུད་དང་། ཚེ་གཅིག་གིས་སངས་རྒྱས་ཀྱི་གོ་འཕང་བསྒྲུབ་པར་འདོད་པ་སྔགས་ནང་རྒྱུད་དང་གཉིས་ཡོད་པ་ལས། ད་རེས་སྔགས་ནང་རྒྱུད་ཀྱི་ཕྱོགས་སུ་གཏོགས་པ་ཡིན། ཚེ་ལུས་གཅིག་གིས་རྡོ་རྗེ་འཆང་གི་གོ་འཕང་སྒྲུབ་པར་བྱེད་པ་སྔགས་བླ་མེད་ཀྱི་རྒྱུད་སྡེ་དེ་ལའང་། བོད་དུ་ཇི་ལྟར་དར་ཚུལ་གྱི་དབང་དུ་བྱས་ན། ཐོན་མི་སམ་བྷོ་ཊ་ནས་བཟུང་སྟེ་ལོ་ཙཱ་བ་རོང་ཟོམ་ཆོས་བཟང་ཡན་ཆོད་ཀྱིས་བསྒྱུར་བའི་མདོ་རྒྱུད་ཐམས་ཅད་ལ་གསང་སྔགས་སྔ་འགྱུར་རྙིང་མ་ཞེས་ཡོངས་སུ་གྲགས་པ་དང་། ལོ་ཆེན་རིན་ཆེན་བཟང་པོ་མན་ཆོད་ཀྱི་ལོ་ཙཱ་བ་ཐམས་ཅད་ཀྱིས་བསྒྱུར་བ་ལ་ཕྱི་འགྱུར་གསར་མ་ཞེས་ཡོངས་སུ་གྲགས་པ་གཉིས་སུ་ཡོད་པ་ལས། ད་རེས་ཀྱི་ཆོས་འདི་ནི་སྔ་འགྱུར་གྱི་ཁོངས་སུ་གཏོགས་པ་ཡིན། དེ་ལྟ་བུའི་སྔ་འགྱུར་གྱི་ཆོས་དེ་ལ་ཡང་རྡོ་རྗེ་འཆང་ནས་བཟུང་སྟེ་རྒྱལ་བ་རྣམས་དགོངས་པའི་བརྒྱུད་པ་དང་། རིག་འཛིན་རྣམས་བརྡ་ཡི་བརྒྱུད་པ། གང་ཟག་རྣམས་རྣ་བར་བརྒྱུད་པའི་བརྒྱུད་པ་གསུམ་བར་མ་ཆད་དུ་བྱུང་བའི་ཆོས་ཚུལ་དེ་ལ་བཀའ་མ་ཞེས་ཡོངས་སུ་གྲགས་པ་དང་། དེ་ནས་བརྒྱུད་པ་དེ་ལྟ་བུའི་སྟེང་དུ་བརྒྱུད་པ་གཞན་གསུམ་ཡང་ཚང་བར་གཏེར་མ་ཞེས་གཉིས་སུ་ཡོད་པ་ལས། སྐབས་སུ་བབས་པའི་ཆོས་འདི་ནི་གཏེར་མའི་ཁོངས་སུ་གཏོགས་པ་ཡིན།

གཏེར་མ་དེ་ལ་ཡང་སྤྱིར་གཏེར་མའི་རིགས་ཙམ་དང་ལས་འཕྲོའི་གཏེར་དངོས་གཉིས་ཡོད་པ་ལས། དང་པོ་གཏེར་མའི་རིགས་ཙམ་ཞིག་ནི་སྔོན་ནས་ཡོད་པ་ཡིན་ཏེ། སྔོན་གསང་བའི་བདག་པོས་དམ་པའི་རིགས་ཅན་དྲ་མ་ལྔ་ལ་གསང་སྔགས་ཀྱི་རྒྱུད་སྡེ་གསུངས་པ་རྣམས་དང་། ཁྱད་པར་དུ་སྒྲུབ་སྡེའི་སྐོར་ཐམས་ཅད་མཆོད་རྟེན་བདེ་བྱེད་བརྩེགས་པ་རུ། མཁའ་འགྲོ་མ་ལས་ཀྱི་དབང་མོས་གཏེར་དུ་སྦས་པ་ཉིད་རྗེས་སུ་འཕགས་ཡུལ་གྱི་གྲུབ་ཆེན་བརྒྱད་ཀྱིས་གཏེར་ནས་བཏོན་པ་ལྟ་བུ་དང་། མ་ཟད་རྒྱ་ནག་པོའི་སློབ་དཔོན་ཤྲཱི་སེངྷས་རྫོགས་པ་ཆེན་པོ་ལ་སྙན་བརྒྱུད་དང་བཤད་བརྒྱུད་གཉིས་སུ་ཡོད་པ་ལས། སྙན་བརྒྱུད་ཀྱི་ཆོས་སྐོར་རྣམས་རྡོ་རྗེ་གདན་དུ་གཏེར་དུ་སྦས་པ་དེ་ཉིད་རྗེས་མར་ཛྙཱ་ན་སུ་ཏྲས་གཏེར་ནས་བཞེས་ཚུལ་སོགས་དེ་འདྲའི་གཏེར་མའི་རིགས་ཙམ་ཞིག་ནི་ཨོ་རྒྱན་རིན་པོ་ཆེའི་སྔོན་དུའང་ཡོད་པ་ཡིན། དེང་སང་ཡོངས་སུ་གྲགས་པའི་གཏེར་མ་དངོས་དེ་མ་ཡིན། དེ་དག་ལ་ནི་སྒྲུབ་བྱེད་མང་པོ་ཡོད་ཀྱང་དེ་རིང་གི་སྐབས་སུ་རྒྱས་སྤྲོས་མི་བྱེད། གཉིས་པ་གཏེར་མ་དངོས་ནི་ཨོ་རྒྱན་རིན་པོ་ཆེ་རྔ་ཡབ་སྲིན་པོའི་གླིང་དུ་འབྱོན་ཁར་རྗེ་འབངས་འདུས་པའི་འཁོར་རྣམས་ལ་སྨོན་ལམ་གྱིས་གཏད་རྒྱ་མཛད་པ་དང་། མ་ཚད་དེང་སང་གི་གནས་སྐབས་ནའང་ཟངས་མདོག་དཔལ་གྱི་རི་བོ་པདྨ་འོད་ཀྱི་ཕོ་བྲང་དུ། སྐལ་པ་དང་ལྡན་པའི་གང་ཟག་རྣམས་ལ་སྐབས་སྐབས་སུ་སྨོན་ལམ་གྱིས་གཏད་རྒྱ་མཛད་པ་རྣམས་ཡིན།

ཡོངས་གྲགས་ཀྱི་གཏེར་མ་དངོས་དེ་ལ་ཡང་ནང་གསེས་རིགས་ཀྱི་སྒོ་ནས་དབྱེ་ན་ཆོས་གཏེར་དང་ཟབ་གཏེར། རྫས་གཏེར། ཐུགས་གཏེར། དགོངས་གཏེར་སོགས་གཏེར་རིགས་བཅོ་བརྒྱད་ལ་སོགས་པ་ཡོད་པ་ཡིན། དེའི་ནང་གི་ཆོས་གཏེར་རྐྱང་པ་ལ་བསམ་བློ་བཏང་ན་ཟབ་པ་ས་ཡི་གཏེར་དང་། རྒྱ་ཆེ་བ་དགོངས་པའི་གཏེར་ཏེ་རྣམ་པ་གཉིས་སུ་ཡོད། ད་རེས་འདི་ནི་ཟབ་པ་ས་གཏེར་གྱི་ཁོངས་སུ་གཏོགས་པ་ཡིན། གཏེར་ཆེན་ལས་རབ་གླིང་པ་ལྟ་བུ་ལ་མཚོན་ན། ཁོང་གཏེར་རིགས་བཅོ་བརྒྱད་ཐམས་ཅད་ཀྱི་བདག་པོར་གྱུར་ཚུལ་རྒྱས་པ་ནི་རྣམ་ཐར་ལས་གསལ་བོར་བསྟན་ཡོད། གཏེར་ཆོས་འདི་ལ་ཡང་བརྒྱུད་པ་སྔ་མ་གསུམ་གྱི་སྟེང་དུ་སྨོན་ལམ་གཏད་རྒྱའི་བརྒྱུད་པ་དང་། བཀའ་བབས་ལུང་བསྟན་གྱི་བརྒྱུད་པ། ཤོག་སེར་ཚིག་གི་བརྒྱུད་པ་སྟེ་བརྒྱུད་པ་དྲུག་ཀྱང་ཡོད་པ་ཡིན།

དེ་ཡང་ཆོས་འདི་ནི་སྔོན་གྱི་དུས་སུ་ཨོ་རྒྱན་རིན་པོ་ཆེས་བོད་ཡུལ་གྱི་ནག་ཕྱོགས་དྲེགས་པ་ཅན་མ་ལུས་པ་ཐམས་ཅད་ཚར་བཅད། དཀར་ཕྱོགས་རྣམས་དབང་དུ་བསྡུས། བོད་ཡུལ་དུ་སངས་རྒྱས་ཀྱི་བསྟན་པའི་གཞི་བཙུགས་པའི་གནས་སྐབས་སུ། བསམ་ཡས་མཆིམས་ཕུ་བྲག་དམར་ཀེའུ་ཚང་དུ་རྗེ་འབངས་སྙིང་གི་བུ་དགུ་ལ། སྒྲུབ་པ་བཀའ་བརྒྱད་ཀྱི་དཀྱིལ་འཁོར་གཉན་པོའི་ཞལ་ཕྱེས་ཏེ་དབང་བསྐུར་བ་ན། རང་རང་གི་སྐལ་བ་དང་འཚམ་པའི་ལྷག་པའི་ལྷའི་མེ་ཏོག་རེ་བབས། ཁྱད་པར་དུ་ཡེ་ཤེས་མཚོ་རྒྱལ་ལ་ནི་ཕྲིན་ལས་ཕུར་པའི་དཀྱིལ་འཁོར་དུ་མེ་ཏོག་བབས་པ་ཡིན། དེ་ནས་ཡེ་ཤེས་མཚོ་རྒྱལ་གྱིས་རྡོ་རྗེ་ཕུར་པའི་དཀྱིལ་འཁོར་ཞལ་ཕྱེས་ཏེ་ཕུར་པ་རྡོ་རྗེ་གཞོན་ནུ་དང་སྐལ་པ་མཉམ་པ་དང་། དམ་ཅན་མ་མོ་བཅུ་གཉིས་ལ་སོགས་པ་བྲན་དུ་འདུ་བར་གྱུར་པ་ལ་སོགས་པའི་མཆོག་དང་ཐུན་མོང་གི་དངོས་གྲུབ་ཀྱང་ཐོབ་པར་གྱུར། དེ་དག་ནི་ཨོ་རྒྱན་རིན་པོ་ཆེའི་སྒྲུབ་སྡེའི་ཆོས་བཀའ་རྣམས་ཀྱི་འདུས་པ་དང་པོའི་འཁོར་ཡིན།

དེའི་དུས་སུ་རྡོ་རྗེ་བདུད་འཇོམས་འཁོར་དུ་བཞུགས་མེད་པས། རྡོ་རྗེ་བདུད་འཇོམས་ཀྱིས་ཡེ་ཤེས་མཚོ་རྒྱལ་དེ་ཕུར་པའི་རྣལ་འབྱོར་མ་ཡིན་པར་ཐུགས་ཀྱིས་དགོངས་ནས་གསེར་གྱི་དོང་ཙེ་བདུན་དང་། ཡིག་འཕྲིན་ཞིག་ཕུག་རོན་གྱི་མགུལ་དུ་བཏགས་ནས། བདག་ལ་ཕུར་པའི་དབང་བཀའ་མ་ལུས་པ་གནང་བར་མཛད་དུ་གསོལ་ཞེས་ཡེ་ཤེས་མཚོ་རྒྱལ་ལ་ཞུ་བ་ཕུལ་བ་ན། ཡེ་ཤེས་མཚོ་རྒྱལ་གྱིས་ཕུག་རོན་གྱི་མགུལ་ནས་ཡི་གེ་བཏོན་ཏེ་བཀླགས། གསེར་གྱི་དོང་ཙེ་རྣམས་བཞེས། ཡིག་ལན་གང་ཡང་མེད་པར་རྡོ་རྗེ་ཕུར་པའི་བསྙེན་སྒྲུབ་ཀྱི་ཐུགས་དམ་ལ་རྩེ་གཅིག་ཏུ་གཞོལ་བར་མཛད།

དེ་ནས་ཞག་བདུན་གྱི་ནམ་གུང་གི་དུས་སུ་ཕུར་སྲུང་མ་མོ་བཅུ་གཉིས་མངོན་སུམ་དུ་བྱོན་ནས། ད་ནི་རྡོ་རྗེ་བདུད་འཇོམས་ལ་སོགས་པའི་སྐལ་བ་དང་ལྡན་པ་རྣམས་ལ་ཕུར་པའི་ཆོས་བཀའ་ཟབ་མོའི་སྒོ་ཕྱེ་བ་དང་། བླ་མ་ཨོ་རྒྱན་ཆེན་པོ་ལ་ཞུ་བསྐུལ་བྱེད་པའི་དུས་ལ་བབས་པ་རེད་ཅེས་ཞུས་པ་ན། ཡེ་ཤེས་མཚོ་རྒྱལ་གྱིས་ཕུར་སྲུང་བཅུ་གཉིས་ལ་ཚིག་འཇམ་པོ་ཙམ་གྱི་ལན་ཡང་མེད་པར། ཁྱེད་ཁ་རོག་སྡོད་ཅིག་བྲན་མོ་རྣམས། །ངས་བླ་མའི་བཀའ་ལ་ཉན་ཉན་ནས། །ཁྱེད་ལྷ་འདྲེ་ཙམ་ཞིག་ངས་ཀྱང་ཤེས། །ཞེས་གསུངས་ནས་ལན་ཅི་ཡང་མ་བཏབ་པར་དགོངས་པ་ལ་རྩེ་གཅིག་ཏུ་མཉམ་པར་བཞག་ནས་བཞུགས།

ཐོ་རངས་ཀྱི་ཆ་ལ་ཡི་དམ་རྡོ་རྗེ་གཞོན་ནུས་མངོན་སུམ་དུ་ཞལ་གཟིགས་ནས། ད་ནི་ཕུར་པའི་ཆོས་བཀའ་རབ་འབྱམས་རྣམས་སྤེལ་བའི་དུས་ལ་བབས་པ་ཡིན། བླ་མ་ཨོ་རྒྱན་ཆེན་པོ་ལ་ཞུས་ཤིག་ཅེས་གསུང་པའི་གནས་སྐབས་ན། ཡེ་ཤེས་མཚོ་རྒྱལ་གྱི་ཐུགས་དགོངས་ལ་ཡི་དམ་ཡང་བསམ་གྱིས་མི་ཁྱབ་པ་ཡིན་མོད། འོན་ཀྱང་བླ་མ་དེ་ལས་ཀྱང་ལྷག ཇི་སྲིད་དུ་བླ་མ་ཨོ་རྒྱན་ཆེན་པོས་བཀའ་མ་བསྩལ་གྱི་བར་དུ་ནི་ཅི་ཡང་མི་སྨྲ་བར་འདུག་དགོས་དགོངས་ནས། ཡི་དམ་ལ་ཡང་ཚིག་ལན་མ་བྱིན་པར་རྩེ་གཅིག་ཏུ་ཏིང་ངེ་འཛིན་ལ་མཉམ་པར་བཞག་སྟེ་བཞུགས།

དེས་ན་བོད་དུ་ཕུར་པའི་ཆོས་བཀའ་རབ་འབྱམས་ད་ལྟའི་བར་དུ་དར་ཁྱབ་རྒྱ་ཆེན་པོ་བྱུང་བ་དང་། བར་ཆད་གང་ཡང་མེད་པའི་རྟེན་འབྲེལ་གྱི་སྣ་ཁ་དེ་ནས་འགྲིགས། བླ་མ་དང་ལྷག་པའི་ལྷ་གཉིས་ལས་བཟང་བ་དེ་ལྷག་པའི་ལྷ་ཡིན་བསམ་ན་རྟེན་འབྲེལ་ཐམས་ཅད་དེས་རལ་འགྲོ་བ་ཡིན། སྔོན་བོད་ཀྱི་བླ་མ་ལ་ལས་བླ་མ་དང་ཡི་དམ་ལྷག་པའི་ལྷ་གཉིས་ལས་ཡི་དམ་གཙོ་བོར་བཟུང་ནས་རྟེན་འབྲེལ་ཅུང་ཟད་རལ་བའི་ལོ་རྒྱུས་ཀྱང་ཡོད། ཁྱེད་རྣམ་པས་གོ་དགོས་པ་ཞིག་ལ། དུས་རྒྱུན་དུ་བླ་མ་དང་ལྷག་པའི་ལྷ་གཉིས་ལས་བླ་མ་གཙོ་བོར་འཛིན་དགོས། དེ་རིང་ཡི་དམ་རྡོ་རྗེ་གཞོན་ནུ་དངོས་སུ་བྱོན་འོང་ན། ཁྱེད་རྣམ་པ་ཕལ་ཆེར་གྱིས་བསོད་རྒྱལ་རིན་པོ་ཆེའི་སྐུ་མདུན་ནས་ཆོས་མང་པོ་ཐོབ་སོང་། དེ་རིང་ཡི་དམ་གྱི་སྐུ་མདུན་ནས་ཆོས་ཞུ་བ་ཡིན་ཟེར་བའི་ཚིག་དེ་ཐོན་ཨེ་ཡོང་བསམ། དེ་ཡང་ངོ་མ་འགྲིག་ནི་མ་རེད། དེ་སྔོན་དེ་ལྟ་བུའི་རྣམ་རྟོག་ངན་པ་ཡོད་ན་བསལ་ནས། དུས་གསུམ་གྱི་སངས་རྒྱས་ཐམས་ཅད་འདུས་པའི་ངོ་བོ་བླ་མ་ཡིན་པས་བླ་མ་དེ་གཙོ་བོར་འཛིན་དགོས།

ད་ངས་སྐད་ཆ་ཧ་ཅང་མང་སོང་ཡང་ཁྱེད་རྣམ་པའི་ཐུགས་མ་སུན། གཅིག་ནས་ཁྱེད་རྣམ་པས་ཟླ་བ་གསུམ་གྱི་བར་དུ་སྒྲུབ་པ་ཉམས་ལེན་མཛད་ནས་དཀའ་ངལ་མཐོང་བ་དང་། ཁྱད་པར་དུ་ཁར་རྩང་ཉི་མ་གཅིག་ལ་ཚོགས་ཀྱི་འཁོར་ལོ་རྒྱ་ཆེན་པོ་བསྐོར་ནས་ནམ་གང་པོར་འོ་བརྒྱལ་མྱངས་ཐལ། དེ་རིང་ཡང་ངས་སྐད་ཆ་ལབ་ལོབ་མང་པོ་བཤད་ན་དེ་ལས་ཀྱང་དཀའ་ངལ་མྱོང་པ་ཡིན། ཁྱེད་རྣམ་པས་སྙིང་སྟོབས་སྐྱེད་དང་། ཉིན་གསུམ་གྱི་མཇུག་ལེགས་པར་གྲུབ་རན་པ་ཡིན། བདག་ཅག་གི་སྟོན་པ་ཐུགས་རྗེ་ཅན་གྱིས་ཀྱང་སྔོན་སློབ་པ་ལམ་གྱི་གནས་སྐབས་ན། དྲང་སྲོང་སྐར་རྒྱལ་རིའི་ཕུག་པ་ན་བཞུགས་པའི་དུས་སུ། སྐྱེས་བུ་ཁྱུ་མཆོག་ཁྱོད་འདྲའི་དགེ་སྦྱོང་ཆེན་པོ་གཞན་དག་ལྷ་ཡུལ་ས་ལའང་མེད། །འཇིག་རྟེན་འདི་ནའང་ཡོད་པ་མ་ཡིན་རྣམ་ཐོས་བུ་ཡི་གནས་ནའང་ཡོད་མ་ཡིན། །ཞེས་བསྟོད་པའི་ཚིགས་སུ་བཅད་པ་གཉིས་ཀློག་བཞིན་རྐང་པ་ཡ་གཅིག་གིས་བཏེགས་ནས་ཞག་བདུན་གྱི་བར་དུ་བཞུགས་པས་བརྩོན་འགྲུས་ཀྱི་ཕ་རོལ་དུ་ཕྱིན་པ་རྫོགས་སོང་བ་ཡིན་ན། ད་ངེད་ཚོས་ཀྱང་མདང་མཚན་གང་པོ་དང་དེ་རིང་ཉིན་གང་པོར་སྙིང་སྟོབས་སྐྱེད་དང་ཕལ་ཆེར་བརྩོན་འགྲུས་ཀྱི་ཕ་རོལ་ཏུ་ཕྱིན་པ་ཡང་རྫོགས་འོང་ཤས་ཆེ།

དབང་བཞི་པའི་སྐབས་སུ་ཆོས་རྗེ་ཉིད་ཀྱིས་འདི་ལྟར་གསུང་།

དབང་བཞི་པ་འདི་ལ་ནི། བདེ་བ་ཆེན་པོའི་དབང་དང་། བརྡ་ཡི་དབང་། ཚིག་གི་དབང་སྟེ། རྒྱུད་སྡེ་སོ་སོའི་ཁྱད་པར་གྱི་དབང་གིས་གསུམ་ཡོད་ལ། དང་པོ་བདེ་བ་ཆེན་པོའི་དབང་ཞེས་བྱ་བ་ནི།

རྒྱུད་གསང་བ་འདུས་པ་དང་། དཔལ་གསང་བའི་སྙིང་པོའི་དངོས་བསྟན་གྱི་དབང་བཞི་པ་སྟེ། བཀའ་སྡེ་ཟུར་པའི་ལུགས་སྲོལ་ལས་བྱུང་བ་བཞིན་དུ། གསུམ་པའི་ཡས་བབ་ཀྱི་དགའ་བ་བཅུ་དྲུག་མྱོང་བའི་མཐར་དེ་ལ་བརྟེན་ནས་བདེ་བ་ཆེན་པོའི་ཡེ་ཤེས་ངོ་སྤྲད་པ་དེ་ཡིན།

གཉིས་པ་བརྡའི་དབང་ནི། རྫོགས་པ་ཆེན་པོའི་རྒྱུད་བཅུ་བདུན་དང་ཁྱད་པར་དུ་ཡ་བཞི་ལ་སོགས་པའི་རབ་ཏུ་སྤྲོས་མེད་ཀྱི་དབང་བསྐུར་བའི་སྐབས་སུ། གཙོ་བོ་ཐོད་རྒལ་གྱི་དབང་དེ་ཉིད་བརྡ་ཐབས་ལ་བརྟེན་ནས་སྐུར་སྟངས་དེ་ཡིན།

གསུམ་པ་ཀ་དག་ཚིག་གི་དབང་ནི། ཚིག་གི་བརྗོད་ཐབས་ལ་བརྟེན་ནས་རིག་པ་རང་བྱུང་གི་ཡེ་ཤེས་མངོན་སུམ་དུ་གསལ་བར་བྱེད་པ་དེ་ལ་ཟེར་ཞིང་གཙོ་བོ་ཁྲེགས་ཆོད་ཀྱི་དབང་བསྐུར་ཡིན། དེ་ནི་ཨོ་རྒྱན་རིན་པོ་ཆེའི་གཏེར་མ་ཕལ་ཆེར་གྱི་དབང་བཞི་པ་སྐུར་སྟངས་ཡིན།

དེ་ནས་རྫོགས་པ་ཆེན་པོའི་ལྟ་སྒོམ་སྤྱོད་འབྲས་སྐོར་ཞིག་ཀྱང་འདི་ལྟར་གསུང་།

ད་ཁྱེད་ཅག་གིས་སེམས་ཀྱིས་སེམས་ལ་ལྟ་བའི་ཚེ། སེམས་ཀྱི་རང་གཤིས་ཡེ་ནས་མ་གྲུབ་པ་ནམ་མཁའ་སྟོང་པ་ལྟ་བུ་ལ་ཁོ་ཐག་ནང་ནས་ཆོད་ཅིང་། འཛིན་ཞེན་གང་ཡང་མེད་པ་ལྟ་བུ་ཞིག་ཏུ་དཔེ་ཆའི་གོ་བ་དང་གཏན་ཚིགས་ཀྱིས་དཔྱད་པ་ཙམ་མ་ཡིན་པར་ཡོངས་སུ་རྟོགས་པ་ལ་ནི་ལྟ་བ་ངོ་འཕྲོད་པ་ཞེས་བྱ།

ཡང་ན་ད་ཁྱེད་ཅག་གིས་སེམས་ཀྱིས་སེམས་ལ་ལྟོས་དང་། སེམས་དེ་ཡེ་ནས་གྲུབ་མ་མྱོང་བའི་སྟོང་ཧ་རེ་བ་ཡིན་པར་ཉམས་མྱོང་གི་སྟོབས་ཀྱིས་གོ་ན་དེ་ལ་རྫོགས་ཆེན་གྱི་ལྟ་བ་ཞེས་བྱ། དེ་ལས་གཞན་གང་ཡང་ཡོད་པ་མ་རེད། དེའི་ངང་དུ་རྒྱུན་བསྐྱངས་ནས་གོམས་པ་ལ་སྒོམ་པ་ཟེར། རྣམ་རྟོག་དང་སྣང་བ་གང་ཤར་ན་ཡང་དེའི་རྗེས་སུ་འགྲོ་རུ་མི་འཇུག་པར། རིག་པ་ཁོ་རང་གིས་རང་ས་ཨེ་ཟིན་བལྟ་བ་ལ་སྤྱོད་པ་ཟེར། ནམ་ཞིག་སྒོམ་པའི་སྐབས་སུ་ཁ་སང་དེ་རིང་གི་འདི་འདྲའི་རྣམ་རྟོག་ངན་པའི་དབང་དུ་མི་འགྲོ་བར། རིག་པ་འབའ་ཞིག་རྗེན་ལ་འབུད་འོང་བ་ལ་འབྲས་བུ་ཞེས་ཟེར།

དེ་ཚང་མས་གོ་དགོས་པ་ཡིན། དེ་གོ་སོང་ན་ནོར་བ་རྩ་བ་ནས་མི་སྲིད། ཉམས་མྱོང་རྒྱ་ཆེན་པོ་མེད་ཀྱང་རྫོགས་པ་ཆེན་པོའི་དོན་གྱི་ཆ་ལ་གོམས་ཆ་ཅུང་ཟད་ཡོད་དགོས། དེས་རྒྱུད་ལུང་མན་ངག་ཐམས་ཅད་ཀྱི་དོན་མདོར་བསྡུས་སུ་བཤད་པ་ཡིན།

བླ་མའི་དྲུང་ན་ཡོད་དུས།

མི་མང་པོ་ཞིག་གིས། བླ་མ་དང་མཉམ་དུ་རྒྱལ་ཁབ་མང་པོར་ལྗོངས་རྒྱུ་དང་སྤྲོ་གསེང་ལ་འགྲོ་བའི་གོ་སྐབས་ལྡན་ན། བློ་བདེ་སེམས་སྐྱིད་ངང་གནས་ཡུལ་མི་འདྲ་བ་ཀུན་ཏུ་མྱོང་རོལ་བྱེད་ཆོག་པས་ཧ་ཅང་སྐྱིད་པོ་ཡིན་སྣང་འཆར་ཡང་། དོན་དུ་ཞབས་འབྲང་པ་སུ་ཡིན་ཡང་། ནམ་རྒྱུན་གོང་བླ་མའི་ཐུགས་དགོངས་འཚོ་དགོས་ཤིང་། འོག་དད་ལྡན་རྣམས་ཀྱི་སེམས་བསྲུང་དགོས་ལ། བར་མི་ཆེན་བླ་ཆེན་དག་ལ་ངོ་ལེན་ཞུ་ཤེས་དགོས་པར་མ་ཟད། ད་དུང་ཕྱི་ནང་གི་བྱ་བ་མང་པོར་རྟག་ཏུ་བྲེལ་འཚུབ་བྱེད་དགོས་པའི་དབང་གིས། སེམས་པ་དེ་གཟུགས་མེད་ཀྱི་ཐག་པས་བསྡམས་པ་ཇི་བཞིན་དལ་ཞིང་ལྷོད་པའི་སྒོ་ནས་ཟས་ཟ་ལོང་དང་གཉིད་ཁུག་ལོང་ཡང་མེད་པ་ལྟ་བུ་ཡིན།

ཆོས་རྗེ་ཉིད་བྱོན་བཞུགས་ཀྱི་དུས་ཚོད་བཀོད་སྒྲིག་རྣམས་ཤིན་ཏུ་ཚགས་དམ་པོར་བྱས་ཡོད་པའི་ཁར། ཁོང་གི་ཐུགས་གཤིས་ཀྱང་ཧ་ཅང་བྲེལ་མོ་ཡིན་སྟབས། རྒྱུན་དུ་འབབ་ཚུགས་གཅིག་ནས་ཆོས་ཁྲིད་གསུངས་ཚར་མ་ཐག མགྱོགས་མྱུར་ངང་ས་ཚུགས་ཕྱི་མ་རྣམས་སུ་འབྱོན་དགོས་པས། ཆོས་ཁྲིད་ཀྱི་བར་མཚམས་སུ་ངལ་གསོ་བའི་དུས་ཚོད་ཀྱང་ཕལ་ཆེར་མེད། ནམ་རྒྱུན་རྗེ་ཉིད་ཀྱིས་གསོལ་ཚིགས་བཞེས་པའི་སྐབས་ནི། ང་ཚོས་ལམ་ཆས་བསྡུ་གསོག་རྒྱག་པ་དང་ཤུལ་དུ་ཅི་ཞིག་ལྷག་ལུས་བྱུང་ཡོད་མེད་ལ་ཞིབ་བཤེར་བྱེད་ཆོག་པའི་དུས་ཚོད་བཟང་ཤོས་ཡིན་པར་མ་ཟད། རྗེ་ཉིད་ཀྱི་གསོལ་ཚིགས་ཀྱི་སྐབས་དང་བསྟུན་ཏེ། ས་ཚུགས་རྗེས་མར་གྲ་སྒྲིག་ཅི་ཞིག་དགོས་པ་དང་། དབང་བསྐུར་བར་ཉེ་བར་མཁོ་བའི་དངོས་པོ་གང་དག་འཁྱེར་དགོས་པ། མི་སྣ་སུ་དང་མཇལ་འཕྲད་གནང་བ། ཡུལ་ངོས་ཀྱི་གནས་སྟངས་ག་འདྲ་ཡིན་པ་སོགས་ལ་རྒྱུས་ལོན་ཞིབ་ཚགས་བྱས་ཏེ་དེར་མཐུན་གྱི་སྟ་གོན་སྣ་ཚོགས་བྱེད་དགོས་པ་ལས། རང་ཉིད་ཀྱང་མགྲོན་པོ་བཞིན་དུ་རྗེ་ཉིད་དང་མཉམ་དུ་ཟས་ཅོག་གི་མཐར་བསྡད་དེ་ལྷོད་ལྷོད་ངང་ཟས་ལ་རོལ་བའི་དུས་ཚོད་ཡེ་ནས་མེད་ཅིང་། ཚང་མས་ཟ་མ་ཟོས་ཚར་རྗེས་ང་ཚོ་ལ་ཟ་མ་ཆེད་དུ་ལས་སུ་འཇུག་པ་ནི་དེ་ལས་ཀྱང་ག་ལ་སྲིད། དེ་བས་ནམ་རྒྱུན་བྱ་བ་སྒྲུབ་ཞོར་དུ་སོབ་གོར་ཙམ་རེ་ཟ་རྒྱུ་ཡོད་ན་ཡིད་ཤིན་ཏུ་ཚིམ་པར་འགྱུར་བ་ཡིན།

དེ་བཞིན་དུ་ཆོས་ཚོགས་སོ་སོའི་སྣེ་ལེན་པ་རྣམས་ཀྱིས་ནི། གཙོ་བོ་ཆོས་རྗེ་ཉིད་ལ་བཞུགས་གནས་དང་གསོལ་ཆས་སོགས་ཀྱི་བསྙེན་བཀུར་ཇི་ལྟར་ཞུ་བར་བློ་སེམས་གཏོད་པ་ལས། ཞབས་འབྲིང་རྣམས་ལ་ལྟ་སྐྱོང་ལེགས་པོ་བྱེད་ཐུབ་པའི་ངེས་པ་ཁྱོན་ནས་མེད་པའི་རྐྱེན་གྱིས། ང་ཚོར་བཀོད་སྒྲིག་བྱས་པའི་གནས་མལ་དག་ཀྱང་། མཚམས་རེར་རྗེ་ཉིད་ཀྱི་བཞུགས་གནས་དང་བར་ཐག་རིང་དྲགས་པ་དང་ཐེངས་རེར་ཐག་ཉེ་དྲགས་པ་སོགས་ཡིད་ཚིམ་པོ་ཞིག་འོང་ཐབས་མི་འདུག དེ་བས་རྗེ་ཉིད་ཀྱི་བདེ་འཇགས་དང་སྟབས་བདེ་སོགས་ལ་དམིགས་ཏེ། ཁོང་གི་གཟིམས་ཁང་དང་ཐག་ཅུང་ཟད་ཉེ་བའི་མཚམས་ཀྱི་གྲུ་ཟུར་སོགས་སུ། ཉལ་ཐུལ་དང་མགོ་སྔས་ཀྱང་མེད་པར་མཚན་བསྐྱལ་བ་མང་དུ་ཡོད།

ཁྱད་པར་དུ་རྗེ་ཉིད་སྐུ་ཁམས་ཅུང་ཟད་མི་བདེ་བའི་སྐབས་སུ། བོས་པ་ཙམ་གྱིས་ཚོར་ཐུབ་པའི་གནས་སུ་ཉལ་དགོས་པ་སོགས་རྒྱུ་རྐྱེན་དམིགས་བསལ་བ་མང་པོ་ཡོད་པས། ཐེངས་རེར་རྗེ་ཉིད་དང་མི་རིང་བའི་ཁྲི་རྩ་ནས་ཉལ་བ་དང་། སྐབས་རེར་སྐས་ཁ་ནས་ཉལ་བ་སོགས་ཀྱང་ཅི་རིགས་སུ་ཡོད། མ་གཞི་ཆོས་ཚོགས་རྣམས་ཀྱིས་ཀྱང་འདི་འདྲའི་མཚན་ཉིད་དང་ལྡན་པའི་བླ་མ་ཞིག་གདན་ཞུ་བྱེད་ཐུབ་པ་ནི་ལས་སླ་མོ་རང་མིན་པས། ཁོང་ལ་སྣེ་ལེན་ཕུན་སུམ་ཚོགས་པ་ཡོང་ན། ངེད་ཅག་སྐུ་འཁོར་རྣམས་ལ་ཅི་བྱས་ཀྱང་མི་འགྲིག་པ་ཆེར་མི་འདུག་སྙམ་ནས་རྒྱུན་དུ་བཀའ་དྲིན་ཞུ་བཞིན་ཡོད།

ཆོས་རྗེ་ཉིད་ནུབ་ཕྱོགས་སུ་འབྱོན་སྐབས། བདག་གིས་དེ་སྔོན་རྒྱ་གར་ལ་ཕེབས་དུས་ལྟར། ཁོང་གི་གསོལ་ཆས་དང་མནབས་གོས། བྱོན་བཞུགས་སོགས་ཀྱི་ཞབས་ཞུ་དང་། མགྲོན་པོ་སྣ་ཚོགས་ལ་མཇལ་ཕྲད་གནང་བར་ཞབས་འདེགས་ཞུ་བ་སོགས་ཀྱི་བྱ་བ་སྒྲུབ་དགོས། ཡིན་ཡང་། བྱ་བ་དེ་དག་ལ་འགྱུར་ལྡོག་མང་པོ་འབྱུང་བས། ནམ་རྒྱུན་ཉིན་ཧྲིལ་པོར་ཕར་རྒྱུག་ཚུར་རྒྱུག་བྱས་ཏེ་བྲེལ་འཚུབ་ཤིན་ཏུ་ཆེ། དེ་ལྟ་ནའང་། བདག་གི་སེམས་ལ་སུན་སྣང་གང་ཡང་མེད་པར་རྒྱུན་དུ་སྤྲོ་སྣང་གིས་ཁེངས་ཡོད། སྤྱིར་བཏང་རང་ཉིད་ཀྱི་ལུས་ཁམས་དེ་འདྲ་བཟང་པོ་མིན་ཡང་། ནམ་རྒྱུན་ཆོས་རྗེ་ཉིད་དང་མཉམ་དུ་ཕྱི་ལོགས་སུ་འབྱོན་དུས་ནི། ལུས་པོས་ཀྱང་ང་ལ་དཀའ་ངལ་ཆེན་པོ་གཏོད་ཀྱིན་མེད།

བདག་གིས་ཆོས་རྗེ་ཉིད་ཀྱི་སྐུ་གཟུགས་ལ་ལྟ་སྐྱོང་ཞབས་ཞུ་དགོས་པར་མ་ཟད། ཁོང་གིས་མཐོང་ཆེན་གནང་ཡུལ་རྣམས་ལའང་དེ་ལྟར་བྱས་པ་ཡིན། སྤྱིར་ཁོང་གིས་སེམས་ཅན་ཐམས་ཅད་ལ་མཐོང་ཆེན་གནང་ཞིང་། སྒོས་སུ་ཤར་ཕྱོགས་དང་ནུབ་ཕྱོགས་སོགས་རིགས་རུས་ཀྱི་དབྱེ་བ་མེད་པར་མི་ཀུན་ལ་ཐུགས་གཏིང་ནས་ཤིན་ཏུ་བརྩེ་བ་ཡིན། ཉིད་ཀྱི་སྐུ་གཟུགས་ལ་སྙུང་གཞི་ལྕི་བའི་སྐབས་མ་གཏོགས། རྒྱང་རིང་ནས་ཡོང་བའི་སྐུ་མགྲོན་དང་མཇལ་མཁན་སུ་ཡིན་ཡང་། མཇལ་ཁ་གནང་ཞིང་བྱིན་རླབས་ཀྱང་སྩོལ་གྱིན་ཡོད་པས། བདག་གིས་ཀྱང་རང་ནུས་གང་ཡོད་ཀྱི་སྒོ་ནས། ཞི་འཇམ་གྱི་སྐད་ཆ་དང་བྱམས་བརྩེའི་རྣམ་འགྱུར་བཟུང་སྟེ། མི་ཐམས་ཅད་ཀྱི་འདོད་པ་བསྐང་བ་དང་ཞབས་ཞུ་ཅི་འགྲུབ་ལ་བརྩོན་པ་ལས། སྒེར་གྱི་སེམས་ཁམས་དང་བསྟུན་ཏེ་སྣང་མེད་དང་སླ་བཅོས་བྱས་པ་ཡེ་ནས་མེད།

མི་འགའ་རེ་བླ་མའི་མདུན་ནས་ཡུན་རིང་དུ་ཕྱག་ཕྱིར་བསྡད་པའི་རྐྱེན་གྱིས། རང་ཉིད་ཀྱི་ང་རྒྱལ་ཇེ་མཐོར་སོང་ནས་ཐམས་ཅད་ལ་མཐོང་ཆུང་བྱེད་པ་དང་མིག་ལམ་དུ་མི་འཇོག་པ་ནི་ཆེས་ཤིན་ཏུ་མི་ལེགས་པས། བདག་ཅག་གིས་རྟག་ཏུ་དྲན་ཤེས་བག་ཡོད་བརྟེན་ནས་ཞབས་ཞུ་མ་བྱས་ན། བླ་མ་བྱམས་སེམས་ཆེ་བ་ཡང་། འཁོར་སློབ་རྣམས་ང་རྒྱལ་ཆེ་ཞིང་ཁྲོ་སྐྱེན་པ་ལས། སྐུ་མགྲོན་དང་དད་ལྡན་རྣམས་ལ་སྣེ་ལེན་ལེགས་པོ་བྱ་མ་ནུས་ཚེ། བླ་མའི་འཕྲིན་ལས་ལའང་ཤུགས་རྐྱེན་མི་ལེགས་པ་འབྱུང་ངེས་ཡིན་པས་ཐུགས་མཉེས་པར་འགྱུར་དཀའ་བ་ཡིན།

ཁྱད་པར་དུ་བླ་མ་ལ་བསྟན་འགྲོའི་དོན་མཛད་པའི་ཐུགས་དགོངས་དང་རྟེན་འབྲེལ་ཡོད་ཀྱང་། སློབ་མས་བླ་མ་ཉིད་རང་གི་རྒྱུ་ནོར་ལྟར་བདག་ཏུ་བཟུང་སྟེ། རྟག་ཏུ་སྲུང་འདུག་པ་ལས་དད་ལྡན་རྣམས་ལ་མཇལ་བའི་གོ་སྐབས་མི་སྤྲོད་པ་དང་། འབྲེལ་ཐོགས་ཐམས་ཅད་རྒྱང་དུ་སྐྲོད་པ་ནི་ཤིན་ཏུ་མི་འོས་ཏེ། དེ་ནི་བླ་མའི་འཕྲིན་ལས་ཀྱི་སྒོ་བཀག་པ་ཡིན་པས། བླ་མ་ལ་མཚོན་ནའང་ཤིན་ཏུ་གྱོང་རྒུད་ཆེ་ཞིང་བློ་ཕངས་བའི་གནས་ཡིན་པས། བླ་མའི་སྐུ་གཟུགས་ཀྱིས་ལྕོགས་ཤིང་དགོངས་པ་ཐོབ་ན། ཉེ་གནས་དག་ཇི་ལྟར་དཀའ་ཡང་སེམས་ཅན་རྣམས་དང་ཆོས་འབྲེལ་ཐོགས་པར་མཐུན་རྐྱེན་གང་ལེགས་སྒྲུབ་འོས། མི་མང་པོ་ཞིག་ལ་ནམ་རྒྱུན་བླ་མའི་མདུན་ནས་ཆོས་ཞུ་བའི་སྐལ་བ་མི་ལྡན་ལ། མི་ཚེ་གཅིག་ལ་ཐེངས་གཅིག་མཇལ་བ་ཙམ་གྱི་གོ་སྐབས་ལས་མེད་སྲིད་པས། བླ་མས་ཕྱག་དབང་ལན་གཅིག་གནང་བའམ་ཡང་ན་གཟུངས་སྔགས་ཀྱི་བྱིན་རླབས་ཐེངས་གཅིག་མཛད་པ་ཙམ་གྱིས་ཀྱང་། དེ་དག་གི་རྒྱུད་ལ་ཐར་བའི་ས་བོན་ཐེབས་ངེས་པ་ཡིན།

བདག་ལ་མཚོན་ན། ཆོས་རྗེ་ཉིད་ལ་འབྲེལ་བ་ཐོགས་པའི་སེམས་ཅན་ཇི་ལྟར་མང་པོ་བྱུང་ན་དེ་ལྟར་དགའ་ཞིང་སྤྲོ་བཞིན་ཡོད། འདི་འདྲའི་ས་ལ་གནས་པའི་བྱང་ཆུབ་སེམས་དཔའ་ཁོང་ལྟ་བུ་ལ། སེམས་ཅན་གཅིག་གིས་འབྲེལ་བ་ཅུང་ཟད་རེ་ཐོགས་ནའང། དེ་ལ་ཕན་པ་བརྗོད་ལས་འདས་པ་འབྱུང་ངེས་པས། གང་ཟག་སུ་ཞིག་གིས་རྗེ་ཉིད་ལ་མཇལ་ཁ་ཞུ་འདོད་ཀྱང་། བདག་གིས་ཅི་ནུས་ཀྱིས་མཐུན་རྐྱེན་སྦྱར་བ་ཡིན།

ཆོས་རྗེ་ཉིད་ཀྱིས་དད་ལྡན་རྣམས་ལ་བྱིན་རླབས་མཛད་སྐབས། ཐེངས་རེར་ཕྱག་དངོས་དང་ལན་རེར་རྒྱལ་མཚན་ལྟ་བུའི་ཅོད་པན་ཞིག་ཡོད་པ་དེ་ཁོ་ཚོའི་སྤྱི་བོར་བཞག་སྟེ། ཞལ་ནས་འཇམ་དཔལ་གྱི་བསྙེན་པ་དང་གུ་རུ་སིདྡྷི། ཚིག་བདུན་གསོལ་འདེབས་སོགས་གསུངས་ཏེ་བྱིན་རླབས་མཛད་ཅིང་། ཆོས་པ་དམིགས་བསལ་བ་རྣམས་ལ། ཧོཿ གདོད་མའི་མགོན་པོ་རང་བྱུང་ཡེ་ཤེས་སྐུ། །སྙིང་ལ་དབྱེར་མེད་ཞུགས་པའི་འོད་ཟེར་གྱིས། །འཁྲུལ་སྣང་འཁོར་བའི་མུན་པ་མ་ལུས་པ། ། མཉམ་ཉིད་བདེ་ཆེན་དབྱིངས་སུ་ཞི་བར་མཛོད། །ཅེས་གསུངས་ཏེ་བྱིན་རླབས་གནང་བ་ཡིན།

བྱིན་རླབས་གནང་བྱེད་ཀྱི་ཅོད་པན་ནི་ཁོང་སྐུ་དངོས་ཀྱིས་བཟོས་པ་དང་། དེའི་ནང་རིམ་ནི་བཏགས་གྲོལ་དང་ཐོས་གྲོལ། རེག་གྲོལ་གྱི་ཡི་གེ་དང་རྟེན་བྱིན་རླབས་ཅན་གྱིས་གྲུབ་པ་ཞིག་ཡིན་ལ། རྒྱུན་དུ་ཕྱི་ལོགས་སུ་འབྱོན་སྐབས་ཅོད་པན་དེ་ཡིས་དད་ལྡན་རྣམས་ལ་བྱིན་རླབས་གནང་བར་བྱེད། ཐེངས་རེར་གཞན་ལ་བྱིན་རླབས་གནང་ཚར་རྗེས། ཅོད་པན་དེ་ངེད་ཅག་གི་མགོ་ལ་བཞག་ནས་བྱིན་རླབས་མཛད་དར། ཁོང་གི་དབྱེས་ཆེ་ལ་དྲོད་ཁོལ་ལྡན་པའི་ཕྱག་བདག་ཅག་གི་མགོ་ལ་བཞག་ནས་ཕྱག་དབང་གནང་སྐབས་ལྗིད་ཏིག་གེ་བ་ཞིག་ཡོད་ཅིང་། སེམས་སུ་དགའ་དད་ཚད་མེད་འཕེལ་ནས་ཉོན་མོངས་པ་རྣམས་ཀྱང་རང་སར་ཞི་སོང་བ་ལྟ་བུའི་སྣང་བ་སྐྱེས།

བདག་ཁོང་གི་ཕྱག་ཕྱིར་སྡོད་སྐབས། ཐེངས་རེར་མི་གཞན་གྱིས་ལྐོག་ནས་བླ་མ་ལ་དབྱེན་སྦྱོར་གྱི་ཚིག་ཞུ་བ་ཡོད་ཀྱང་། དེ་དག་མི་སུ་ཡིན་དང་དམིགས་ཡུལ་ཅི་ཡོད་ཤེས་ཀྱང་དོ་སྣང་ཆེར་མ་བྱས། སྐབས་ལན་རེར་ཆོས་རྗེ་ཉིད་ཀྱི་ཐུགས་ཅུང་ཟད་མི་དགྱེས་པར་གྱུར་ནའང་། བདག་གིས་ཕྲ་མ་སྨྲ་མཁན་གང་དེར་སྡང་སེམས་མ་བཅངས་པར། དེ་ནི་རང་ཉིད་ཀྱི་སྐྱོན་དུ་བལྟས་ཏེ་རང་ལ་རྟོག་དཔྱོད་ཡང་ཡང་བྱས་པ་ལས། དབྱེན་སྦྱོར་བྱེད་མཁན་ལ་བདའ་འདེད་མ་བྱས་ཤིང་ཆོས་རྗེ་མཆོག་ལའང་ལོག་ལྟ་རྩ་བ་ནས་སྐྱེས་མ་མྱོང་།

མདོར་ན་མི་གཞན་པའི་ལྟར་སྣང་ལ། བླ་མའི་མདུན་ན་ཡོད་པའི་གང་ཟག་ནི་ཆེས་སྐྱིད་པོ་ཞིག་ཡིན་སྣང་འཆར་ཡང་། དོན་དུ་ལུས་སེམས་གཉིས་ཀྱི་སྟེང་ནས་བྱ་བ་ཆེ་ཆུང་སྣ་ཚོགས་ལ་གདོང་ལེན་བྱེད་དགོས་པས་དེ་འདྲའི་ལས་སླ་མོ་ཞིག་ནི་མ་ཡིན་ནོ། །

ཚེ་གཅིག་རྫོགས་འཚང་རྒྱ་བའི་གསང་གནད།

ཕྱི་ཟླ་༨པའི་ཚེས་༢༨ཉིན་གྱི་སྔ་དྲོར། ཆོས་རྗེ་ཉིད་ཀྱིས་བོད་ཀྱི་གྲུབ་མཐའ་སོ་སོ་ཕན་ཚུན་མི་འགལ་བའི་ཚུལ་དང་རྫོགས་པ་ཆེན་པོའི་ཐུན་མིན་ཁྱད་ཆོས་སྐོར་འདི་ལྟར་གསུང་།

དེ་ལ་གང་གསན་པར་བྱ་བའི་ཆོས་ནི། བདག་ཅག་གི་སྟོན་པ་ཐབས་མཁས་ལ་ཐུགས་རྗེ་ཆེན་པོ་དང་ལྡན་པ་འདི་ཉིད་ངེས་པའི་དོན་དུ་ཡེ་ནས་མངོན་པར་རྫོགས་པར་སངས་རྒྱས་སུ་ཟིན་ཀྱང་། གདུལ་བྱའི་སྣང་ངོར་དང་པོ་བྱང་ཆུབ་མཆོག་ཏུ་ཐུགས་བསྐྱེད། བར་དུ་བསྐལ་པ་གྲངས་མེད་གསུམ་དུ་ཚོགས་བསགས། མཐར་རྒྱ་གར་རྡོ་རྗེ་གདན་དུ་མངོན་པར་རྫོགས་པར་སངས་རྒྱས་ནས། ཡུལ་ཝ་ར་ཎཱ་སི་དྲང་སྲོང་ལྷུང་བ་རི་དྭགས་ཀྱི་ནགས་སུ་བཀའ་དང་པོ་བདེན་པ་བཞིའི་ཆོས་འཁོར་དང་། གནས་བྱ་རྒོད་ཕུང་པོའི་རི་ལ་བཀའ་བར་པ་མཚན་ཉིད་མེད་པའི་ཆོས་འཁོར། ཡུལ་པདྨ་ཅན་ལ་སོགས་པའི་གནས་མ་ངེས་པ་རྣམས་སུ་བཀའ་ཐ་མ་ལེགས་པར་རྣམ་པར་ཕྱེ་བའི་ཆོས་ཀྱི་འཁོར་ལོ་བཅས་བསྐོར་ཏེ། ཐུན་མོང་གི་གདུལ་བྱ་རྣམས་ཡང་དག་པའི་ལམ་ལ་འགོད་པར་མཛད་པ་ཡིན།

གསང་སྔགས་ཀྱི་རྒྱུད་སྡེ་དར་ཚུལ།

ཐུན་མོང་མ་ཡིན་པའི་གདུལ་བྱ་རྣམས་ཀྱི་ངོར་ལྷ་ཀླུ་གནོད་སྦྱིན་དྲི་ཟ་ལ་སོགས་པའི་ཡུལ་དུ་གསང་སྔགས་ཀྱི་ཆོས་རྒྱ་ཆེན་པོ་གསུངས་ཤིང་། མི་ཡུལ་དུའང་ཨོ་རྒྱན་གྱི་ཡུལ་དུ་གསང་བ་འདུས་པ་དང་། འབྲས་སྤུངས་ཀྱི་མཆོད་རྟེན་ཆེན་པོ་རུ་དུས་ཀྱི་འཁོར་ལོ་གསུངས་པས་མཚོན་གསང་སྔགས་ཀྱི་ཆོས་མདོར་བསྡུས་པ་ཙམ་ཞིག་ཁོང་གི་སྐུ་ཚེ་དེ་ཉིད་ལ་གསུངས། དེ་ནས་དགོངས་པ་ཡོངས་སུ་མྱ་ངན་ལས་འདའ་ཁར་གསང་སྔགས་ཐུན་མོང་གི་གདུལ་བྱ་རྣམས་ལ་ནི་ཐུན་མོང་གི་ཆོས་རྒྱ་ཆེར་བསྟན་པ་ཡིན་མོད། འོན་ཀྱང་ཐུན་མོང་མ་ཡིན་པ་ངེས་དོན་གསང་སྔགས་རྡོ་རྗེ་ཐེག་པའི་ལམ་དེ་ནི་མ་འོངས་ཕྱི་མའི་དུས་ཀྱི་ལོ་ཉི་ཤུ་རྩ་བརྒྱད་ཙམ་ན་རྒྱ་ཆེར་འབྱུང་བར་འགྱུར་རོ་ཞེས་གསུངས་པ་བཞིན་དུ། རྒྱལ་པོ་ཛའི་ཁང་སྟེང་དུ་རྡོ་རྗེ་སེམས་དཔའི་སྐུ་རྟེན་དང་གསང་སྔགས་ཀྱི་གླེགས་བམ་བབས་ནས་མ་ཧཱ་ཡོ་ག་དར་བ་དང་། གསང་བའི་བདག་པོས་དམ་པའི་རིགས་ཅན་དྲྭ་མ་ལྔ་ལ་གསང་སྔགས་རྒྱ་ཆེར་གསུངས་ནས་ཨ་ནུ་ཡོ་ག་དར་བར་མ་ཟད། རིག་འཛིན་དགའ་རབ་རྡོ་རྗེ་ལ་རྫོགས་པ་ཆེན་པོའི་རྒྱུད་ལུང་མན་ངག་ཐམས་ཅད་ཀུན་ཀྱང་གསལ་རྒྱས་སུ་གསུངས་པས་ཨ་ཏི་ཡོ་ག་དར་བར་བྱས་པ་ཡིན།

དེ་ལྟ་བུའི་སྟོན་པ་ཐུགས་རྗེ་ཅན་གྱི་གསུང་དེ་དག་ཐམས་ཅད་ཀྱང་གནད་ཚུར་བསྡུ་ན། སྤང་བྱ་ལ་ལྟོས་ནས་ཆོས་ཀྱི་སྒོ་མོ་བརྒྱད་ཁྲི་བཞི་སྟོང་དུ་འདུ་བ་ཡིན་ལ། འབྲས་བུ་ཐོབ་ཚུལ་གྱི་དབང་དུ་བྱས་ན་བསྐལ་ཆེན་གྲངས་མེད་དུ་མའི་མཐར་མངོན་པར་རྫོགས་པར་འཚང་རྒྱ་བར་འདོད་པ་དང་། མི་ཚེ་འགའ་ཞིག་གི་རྗེས་སུ་འཚང་རྒྱ་བར་འདོད་པ་དང་། ཚེ་འདི་ལ་སངས་རྒྱ་བར་འདོད་པ་སྟེ། ཆོས་ཚུལ་ལམ་གནད་རྣམ་པ་གསུམ་གྱི་ནང་དུ་འདུ་བ་ཡིན། དེ་དག་ཀྱང་ད་ལྟ་སངས་རྒྱས་མ་ཡིན་པའི་སེམས་ཅན་ཞིག་གིས་གདོད་སངས་རྒྱས་བསྒྲུབ་པར་འདོད་ནས་བསྐལ་པ་མང་པོའི་མཐར་འཚང་རྒྱ་བར་འདོད་པ་ནི་མདོ་ཕར་ཕྱིན་ཐེག་པའི་ལམ་དང་། སེམས་ཅན་ཡིན་པ་ལ་ཐབས་བུལ་བའི་སྒོ་ནས་མི་ཚེ་མང་པོའི་མཐར་འཚང་རྒྱ་བར་འདོད་པ་ནི་ཕྱི་རྒྱུད་སྡེ་གསུམ་གྱི་ལུགས་དང་། ད་ལྟ་ནས་སངས་རྒྱས་ཡིན་པ་ལ་ཡིན་པའི་རང་ངོ་ཤེས་པའི་ལམ་སྒྲུབ་ནས་ཚེ་གཅིག་གིས་སངས་རྒྱས་ཀྱི་གོ་འཕང་འཐོབ་པར་འདོད་པ་ནི་སྔགས་བླ་ན་མེད་པའི་ལུགས་སྲོལ་ཡིན།

བླ་ན་མེད་པའི་རྒྱུད་སྡེ་ལ་ཡང་སྤྱིར་བསམ་གྱིས་མི་ཁྱབ་པ་ཞིག་ཡོད་ཀྱང་། གཙོ་བོའི་བརྗོད་བྱ་ཆེ་རིགས་ཀྱི་དབང་དུ་བྱས་ན། རིམ་པ་ལྔའི་ཉམས་ལེན་གཙོ་བོར་སྟོན་པ་ཕ་རྒྱུད་གསང་བ་འདུས་པ་དང་། ལམ་འབྲས་བུ་དང་བཅས་པའི་ཆོས་ཚུལ་གསལ་བོར་སྟོན་པ་མ་རྒྱུད་ཀྱཻ་རྡོ་རྗེ་ལྟ་བུ། གཉིས་མེད་རྩོལ་མེད་ཀྱི་ལམ་ཉམས་སུ་ལེན་པ་དཔལ་དུས་ཀྱི་འཁོར་ལོ་རྫོགས་རིམ་སྦྱོར་བ་དྲུག་གི་ཉམས་ལེན་ལྟ་བུ་ཡིན། དེ་དག་ལས་ཀྱང་མཆོག་ཏུ་གྱུར་པ་ནི། དཔལ་དུས་ཀྱི་འཁོར་ལོ་རྫོགས་རིམ་སྦྱོར་བ་དྲུག་གི་ཉམས་ལེན་འདི་ཁོ་ན་ཡིན་ཏེ། གསང་འདུས་རིམ་ལྔ་དང་། ཀྱཻ་རྡོ་རྗེའི་ལམ་འབྲས་དང་། དགྱེས་པ་རྡོ་རྗེའི་ཆོས་ཚུལ་ལ་སོགས་པ་ཐམས་ཅད་ཀུན་ཀྱང་དུས་ཀྱི་འཁོར་ལོ་ལ་ལྟོས་ན། རྩོལ་བ་དང་བཅས་པའི་ལམ་ཡིན་པའི་ཕྱིར་ན་གསང་སྔགས་གསར་མའི་རྒྱུད་སྡེ་ཀུན་ཀྱི་ནང་ནས་ཆེས་མཆོག་ཏུ་གྱུར་པ་ནི་དཔལ་དུས་ཀྱི་འཁོར་ལོ་འདི་ཁོ་ན་ཡིན། དེས་ན་ང་ཚོ་བོད་ཀྱི་ཡུལ་དུ་ཕྱི་འགྱུར་གསར་མའི་ཆོས་ལུགས་ཆེན་པོ་བཞི་དར་བ་ཡང་རྒྱུད་སྡེ་སོ་སོའི་རྗེས་འབྲང་གི་དབང་གིས་དར་བ་སྟེ། དཔེར་ན་གསང་བ་འདུས་པའི་ལམ་ཉམས་སུ་ལེན་པར་བྱེད་པ་ལ་བཀའ་གདམས་གསར་རྙིང་གཉིས་དང་། ཀྱཻ་རྡོ་རྗེའི་ལམ་འབྲས་བུ་དང་བཅས་པ་ཉམས་སུ་ལེན་པར་བྱེད་པ་དཔལ་ལྡན་ས་སྐྱ་བ། དགྱེས་པ་རྡོ་རྗེའི་ཐབས་ལམ་ནཱ་རོ་ཆོས་དྲུག་དང་གྲོལ་ལམ་ཕྱག་རྒྱ་ཆེན་པོ་ཉམས་སུ་ལེན་པ་ལ་འགྲོ་མགོན་བཀའ་བརྒྱུད་པ། དཔལ་དུས་ཀྱི་འཁོར་ལོའི་བསྐྱེད་རིམ་ཕྱི་ནང་གཞན་གསུམ་གྱི་མན་ངག་དང་རྫོགས་རིམ་སྦྱོར་བ་དྲུག་གིས་ཉམས་སུ་ལེན་པ་ལ་ཇོ་ནང་པ་ཞེས་ཡོངས་སུ་གྲགས། དེ་ཐམས་ཅད་ཀུན་ཀྱང་སངས་རྒྱས་ཀྱི་བཀའ་སོ་སོའི་རྗེས་སུ་འབྲངས་ནས་ཉམས་ལེན་གཙོ་བོའི་དབང་གིས་མིང་ཐོགས་པ་ཡིན།

སྔ་འགྱུར་རྙིང་མ་པ་རྣམས་ལ་ནི་དེ་དག་ཐམས་ཅད་ལ་མ་གྲགས་པའི་མན་ངག་ཁྱད་པར་ཅན་མཆོག་ཏུ་གྱུར་པ། ཐབས་བསྐྱེད་པའི་རིམ་པ་གཙོ་བོར་སྟོན་པ་ཕ་རྒྱུད་མ་ཧཱ་ཡོ་ག་དང་། ཤེས་རབ་རྫོགས་པའི་རིམ་པ་གཙོ་བོར་སྟོན་པ་མ་རྒྱུད་ཨ་ནུ་ཡོ་ག གཉིས་མེད་རང་གནས་ཀྱི་ཡེ་ཤེས་གཙོ་བོར་སྟོན་པ་རྫོགས་པ་ཆེན་པོ་ཨ་ཏི་ཡོ་གའི་ཆོས་ཚུལ་ཏེ་རྣམ་པ་གསུམ་ཡོད།

ཆོས་ལུགས་རྣམས་འགལ་བ་མེད་ཚུལ།

དེས་ན་འགྱུར་སྔ་ཕྱིའི་དབང་གིས་སྔ་འགྱུར་རྙིང་མ་དང་། ཕྱི་འགྱུར་གསར་མ་ཞེས་ཡོངས་སུ་གྲགས་ཤིང་། ཕྱི་འགྱུར་གསར་མ་ཟེར་བ་དེ་ཡང་། ཁ་རྩང་ཞུས་པ་ལྟར་ལོ་ཆེན་རིན་ཆེན་བཟང་པོ་མན་ཆོད་ཀྱི་ས་སྐྱ་བཀའ་བརྒྱུད་དགེ་ལྡན་ལ་སོགས་པ་ཐམས་ཅད་ལ་ཕྱི་འགྱུར་གསར་མ་ཞེས་ཟེར། འོ་ན་རྙིང་མ་ལ་དུས་ཀྱི་འཁོར་ལོ་དང་གསང་བ་འདུས་པ་ལ་སོགས་པའི་ཉམས་ལེན་ཡོད་པ་ཨེ་རེད་ཟེར་ན། དེ་ཡང་གནད་ཆ་ཚང་བ་ཞིག་ཡོད་པ་ཡིན། སྔོན་བྱོན་དམ་པའི་ཞལ་ནས། མདོ་སྔགས་ཆོས་ཚུལ་ཚང་ལ་མ་ནོར་བ། །མཁས་ཤིང་གྲུབ་བརྙེས་རིག་འཛིན་བརྒྱུད་པའི་སྲོལ། །ཐུབ་བསྟན་སྙིང་པོ་གསང་སྔགས་སྔ་འགྱུར་བའི། །ཞེས་མདོ་སྔགས་ཡོངས་རྫོགས་ཀྱི་ཆོས་ཚུལ་ཆ་ཚང་བ་ཞིག་བསྒྱུར་ཡོད་པ་དེ་གསང་སྔགས་སྔ་འགྱུར་བ་ཁོ་ན་རེད་མ་གཏོགས། ཕྱི་འགྱུར་གྱི་ལོ་ཙཱ་བས་ཐ་རེ་ཐོ་རེ་ཙམ་ལས་མ་བསྒྱུར། དེའི་ཕྱིར་ན་ལུགས་སྲོལ་འདི་ནི་གཙོ་བོ་མདོ་སྔགས་ཆོས་ཚུལ་ཆ་ཚང་བ་ཞིག་དང་། དེའི་ནང་ནས་ཀྱང་ནང་རྒྱུད་ཡོ་ག་གསུམ། དེ་ལས་ཀྱང་རྫོགས་པ་ཆེན་པོ་ཉམས་སུ་ལེན་པ་དེ་གསང་སྔགས་སྔ་འགྱུར་རྙིང་མ་པའི་མཚན་ཉིད་དུ་ངོ་ཤེས་དགོས། འོ་ན་སྔ་འགྱུར་རྙིང་མའི་བསྟན་པ་དང་ཕྱི་འགྱུར་གསར་མའི་བསྟན་པ། སྔ་འགྱུར་རྙིང་མའི་མཁས་གྲུབ་དང་ཕྱི་འགྱུར་གསར་མའི་མཁས་གྲུབ་རྣམས་ཀྱི་དགོངས་པ་འགལ་བ་མིན་ནམ་སྙམ་ན། དེ་ཡང་མ་ཡིན་ཏེ། བསྟན་པ་འཛིན་པའི་སྐྱེས་བུ་རྣམས་ཀྱི་དབང་དུ་བྱས་ན། མཉམ་མེད་ཇོ་བོ་རྗེ་དཔལ་ལྡན་དཱི་པཾ་ཀ་ར་དང་། རྗེ་བདག་ཉིད་ཆེན་པོ་བློ་བཟང་གྲགས་པ་ཡང་ཨོ་རྒྱན་རིན་པོ་ཆེའི་སྤྲུལ་པ་ཡིན་ཚུལ་བཀའ་གདམས་བུ་ཆོས་ལས་གསལ་བར་གསུངས་ཡོད་པ་དང་། དེ་བཞིན་དུ་འཇམ་མགོན་ས་སྐྱ་པཎ་ཆེན་ཡང་ཨོ་རྒྱན་སངས་རྒྱས་གཉིས་པའི་སྤྲུལ་པ་ཡིན་པར་ཁོང་རང་གི་རྣམ་ཐར་ལས་ཀྱང་གསལ་བར་གསུངས་ལ། ཨོ་རྒྱན་རིན་པོ་ཆེ་ཉིད་ཀྱིས་ཀྱང་གཏེར་ལུང་དུ་མ་ནས་ལུང་བསྟན་ཡོད། གཞན་ཡང་ཇོ་ནང་ཀུན་མཁྱེན་དོལ་པོ་བ་དང་། བཀའ་བརྒྱུད་ཕྱོགས་ཀྱི་དྭགས་པོ་ལྷ་རྗེ་དང་། ཀརྨ་པ་པཀྵི་ལ་སོགས་པ་ཡང་ཨོ་རྒྱན་རིན་པོ་ཆེ་དངོས་ཀྱི་སྤྲུལ་པ་ཡིན་ཚུལ་གསུངས་པའི་ཕྱིར། མདོར་ན་བོད་འདིར་བསྟན་པ་འཛིན་པའི་སྐྱེས་བུ་ཇི་སྙེད་ཅིག་ཡོད་པ་ཚང་མ་ཡང་ཨོ་རྒྱན་བདག་ཉིད་ཆེན་པོ་འབའ་ཞིག་གི་སྤྲུལ་པ་ཡིན་པས། བསྟན་པ་འཛིན་པའི་སྐྱེས་བུ་ཚང་མའི་དགོངས་པ་ཡང་འགལ་བ་མ་ཡིན་ལ། དེ་ཐམས་ཅད་ཀྱི་བསྟན་པའི་གནད་ཀྱང་རྩོལ་བ་དང་བཅས་མ་བཅས་ཙམ་ལས་ཁྱད་ཆེར་མེད། འོ་ན་གསར་མ་དང་རྙིང་མ་གཉིས་ཀྱི་ཆོས་ལ་ཁྱད་པར་ཅི་ཡོད་ཅེ་ན། གསར་མའི་རྒྱུད་སྡེ་ལ་ཡང་ཚེ་གཅིག་ལུས་གཅིག་ལ་ཟུང་འཇུག་རྡོ་རྗེ་འཆང་གི་གོ་འཕང་འགྲུབ་པར་བྱེད་པའི་ཐབས་ཡོད་ཅེས་རྒྱུད་སྡེ་རང་གི་སྐབས་ན་གསལ་ཁ་དང་བཅས་ཏེ་གསུངས་ཡོད་ལ། རྙིང་མའི་ཕ་རྒྱུད་དང་མ་རྒྱུད་ལ་སོགས་པའི་སྐབས་ན་ཡང་། ཚེ་གཅིག་ལུས་གཅིག་ལ་སངས་རྒྱས་ཀྱི་གོ་འཕང་འགྲུབ་པར་བྱེད་པའི་ཐབས་བསྟན་ཡོད་པ་ལ་གཅིག་མཚུངས་ཡིན། ཁྱད་པར་ཆེ་ཤོས་དེ་རྙིང་མ་རང་ལ་ཡང་སྤྱིར་རྫོགས་པ་ཆེན་པོའི་དབང་དུ་བྱས་ན་སྙིགས་དུས་ཀྱི་ཚེ་ཐུང་གཅིག་ལ་སངས་རྒྱས་འགྲུབ་པར་འདོད་པ་དང་། དེ་ལས་ཀྱང་གསང་བ་མན་ངག་སྡེའི་དབང་དུ་བྱས་ན། ལོ་གསུམ་མམ། ཟླ་བ་དྲུག་གིས་ཀྱང་མངོན་པར་རྫོགས་པར་འཚང་རྒྱ་བའི་ཐབས་བསྟན་ཡོད་པས། ལམ་མྱུར་བུལ་གྱི་ཁྱད་པར་ཙམ་ལས་མེད། བསྟན་པ་ཐམས་ཅད་སངས་རྒྱས་ཀྱི་བཀའ་དང་། བླ་མ་ཐམས་ཅད་ཨོ་རྒྱན་རིན་པོ་ཆེའི་སྤྲུལ་པ་ཡིན་པ་ཚང་མས་ངོས་ཟིན་དགོས།

སློབ་མ་ལ་གདམས་པ།

དེས་ན་སྐབས་འདིར་ངས་ཁྱེད་རྣམ་པ་ལ་བསམ་པ་དཀར་བའི་ཤ་ཚའི་གྲོས་འདེབས་ཚིག་གཅིག་ཡོད། དེ་ནི་ཁྱེད་རྣམ་པས་ཐུགས་ལ་འཛིན་པར་ཞུ། དེ་གང་ཡིན་ཞེ་ན། སྔོན་གྱི་དུས་སུ་བསྟན་རྒྱམ་རིན་པོ་ཆེ་གཙོ་བོར་གྱུར་པའི་སྐྱེས་ཆེན་དམ་པ་མཁྱེན་བརྩེ་ཆོས་ཀྱི་བློ་གྲོས་དང་། བདུད་འཇོམས་ཡང་སྤྲུལ། ཀརྨ་པ། དིལ་མགོ་མཁྱེན་བརྩེ་རིན་པོ་ཆེ་ལ་སོགས་པས་ཡུན་རིང་པོའི་བར་དུ་ཐུགས་བསྐྱེད་རྨད་དུ་བྱུང་བའི་དཀའ་བ་བརྒྱ་ཕྲག་སྤྱད་པའི་གྲུབ་འབྲས་ད་ལྟ་མངོན་དུ་གྱུར་ནས། ཁྱེད་ནུབ་ཕྱོགས་ཀྱི་རྒྱལ་ཁབ་ཚང་མ་ལ་ཡང་སངས་རྒྱས་ཀྱི་བསྟན་པའི་ཉི་རྩེ་གསར་དུ་ཤར་བཞིན་པའི་གནས་སྐབས་ལྟ་བུར་གྱུར་ཡོད།

ད་སྐབས་ངེད་བོད་ཡུལ་ལུང་པའི་ཐེག་པ་ཆེན་པོའི་བསྟན་པ་དེ་ཁོང་རྣམ་པའི་སྐུ་དུས་ལས་ཀྱང་ལྷག་པར། ནུབ་ཕྱོགས་ཀྱི་རྒྱལ་ཁབ་ལ་ཧ་ཅང་དར་རྒྱས་ཕུན་སུམ་ཚོགས་པ་ཞིག་བྱུང་ཡོད་པ་ནི། ང་རང་གིས་ཀྱང་ཕྱི་ནང་གསང་གསུམ་གྱི་རྟགས་མཚན་གང་ལ་བསམ་བློ་བཏང་ན་ཡང་། ངེས་པར་དུ་འདིར་བཞུགས་པའི་རིན་པོ་ཆེ་རྣམས་དང་དུས་མཉམ་ཡིན་པའི་བོད་ཀྱི་བླ་མ་མང་ཆེ་བ་ཞིག་རྒྱ་གར་གྱི་ཡུལ་ན་བཞུགས་པའི་སྐུ་དུས་ཚུན་ཆད་ལ་དར་ཡོང་བ་ཡིན་གྱི་རེད་སྙམ། དེས་ན་ཆོས་ཟབ་པ་ན་ནག་པོའི་བདུད་ཀྱང་ཟབ་ཟེར་བ་ལྟར། འདི་ལྟ་བུའི་བསྟན་པ་དང་བསྟན་འཛིན་གྱི་སྐྱེས་བུའི་ཕྲིན་ལས་དུས་སུ་སྨིན་པར་གྱུར་པའི་སྐབས་སུ། ཁྱེད་རྣམ་པ་ཚང་མ་ཡང་ལོག་པའི་ལམ་དུ་ཁྲིད་པར་བྱེད་པའི་ལོག་པའི་གང་ཟག་དང་ལོག་པའི་བཤེས་གཉེན་འགའ་ཞིག་ཀྱང་འབྱུང་སྲིད། དེ་ལ་དོགས་གཟབ་བྱ་དགོས། དེ་ནི་ཇི་ལྟར་འབྱུང་བ་ཡིན་ཞེ་ན། ང་ཚོ་བོད་ཡུལ་དུ་དར་བའི་བསྟན་པ་ཆེ་ཤོས་ལ་སྒྲུབ་བརྒྱུད་ཤིང་རྟ་བརྒྱད་ཟེར་བ་ཡོད་ཅིང་། དེ་ཚང་མ་ཡང་སངས་རྒྱས་བཅོམ་ལྡན་འདས་ཀྱིས་གསུངས་པ་དང་ཆོས་རྣམ་པར་དག་པ་ཡིན་པ་ལ་ནི་ཁྱད་པར་གང་ཡང་ཡོད་པ་མིན། འོན་ཀྱང་ཁྱེད་རྣམ་པ་ལ་རྗེས་སུ་ལ་ལ་ཞིག་གིས། བླ་མ་འགའ་རེ་ནི་གྲུབ་པ་ཐོབ་པ། བླ་མ་ཕལ་ཆེར་ནི་བདུད་རེད་ཟེར་མཁན་ངེས་པར་དུ་འབྱུང་རྒྱུ་རེད། སྔོན་ཆད་བོད་ཀྱི་ལོ་རྒྱུས་ཀྱི་ཐོག་དེ་འདྲ་བྱུང་མྱོང་བ་ཡིན་ཏེ། དཔེར་ན་རྒྱལ་པོ་གླང་དར་མ་སྤྱན་རས་གཟིགས་ཀྱི་སྤྲུལ་པ་དང་། ཨོ་རྒྱན་རིན་པོ་ཆེ་བདུད་ཀྱི་སྤྲུལ་པ་རེད་ཟེར་བ་དང་། གཞན་ཡང་རྗེ་བློ་བཟང་གྲགས་པ་ལ་སོགས་པ་མང་པོ་ཞིག་བདུད་དང་བདུད་ཀྱི་ཆོ་འཕྲུལ་རེད་ཟེར་མཁན་ཡང་མང་པོ་བྱུང་། དེ་བཞིན་དུ་ཆོས་འགའ་ཞིག་ནི་རྣམ་པར་དག་པ་དང་འགའ་ཞིག་ནི་ཕྱིན་ཅི་ལོག་ཡིན། དཔེར་ན་ང་ཚོ་རྙིང་མ་བའི་ཆོས་འདི་ནི་རྣམ་པར་དག་པ་ཡིན། གཞན་གསར་མ་དང་ས་སྐྱ་བཀའ་བརྒྱུད་ལ་སོགས་པའི་ཆོས་དེ་དག་ནི་ཆོས་ལོག་ཡིན་ཟེར་བ་དང་། ཡང་འགའ་ཞིག་གིས་གསར་མ་བའི་ཆོས་དེ་ལམ་རྣམ་པར་དག་པ་ཡིན། དེ་མ་གཏོགས་རྙིང་མ་པའི་ཆོས་དེ་ནི་ལོག་པ་རེད་ཟེར་ན། དེ་ལྟ་བུའི་སྐད་ཆ་ལ་གཏན་ནས་ཉན་རུང་བ་མ་ཡིན། དེ་དག་ནི་བདུད་ངེས་ཅན་ཡིན་པ་ཁྱེད་ཅག་གིས་ཤེས་དགོས། དེས་ལོག་ལམ་ལ་ཁྲིད་ནས་བདུད་ཀྱི་ལམ་བསྟན་པ་ཡིན་ཞིང་། ཁྱེད་ཅག་གི་ཚེ་རབས་གཏན་གྱི་འདུག་ཆུས་དེ་བརླགས་ནས་ངན་འགྲོ་མུ་མཐའ་མེད་པའི་གནས་སུ་འཁྲིད་པར་བྱེད་པའི་བདུད་ཀྱི་བཤེས་གཉེན་ཟེར་བའང་དེ་ཡིན།

ལམ་ངན་པ་སྟོན་པའི་བཤེས་གཉེན་དང་འཕྲད་པ་ཡིན་ནའང་འདྲ། ཁྱེད་རྣམ་པའི་རྒྱུད་ལ་དེ་ལྟ་བུའི་ལོག་རྟོག་སྐྱེ་ཡོང་བའི་གནས་སྐབས་ན་མཚན་ཉིད་དང་ལྡན་པའི་བླ་མ་དགེ་བའི་བཤེས་གཉེན་རྣམས་ལ་འདྲི་གཏུགས་གྱིས། ངས་ཀྱང་བོད་ལུང་པ་ལ་འདི་ལྟ་བུའི་གནད་དོན་ནི་ཤུགས་ཆེན་པོའི་སྒོ་ནས་བཤད་མྱོང་། ངོ་མ་དངོས་གནས་ཀྱིས་བསམ་བློ་བཏང་ན། ད་སྐབས་ང་རང་གི་མིག་མི་གསལ་ཞིང་། བློ་རིག་ཀྱང་ཧ་ཅང་ཇེ་རྟུལ་དུ་སོང་ཡང་། སྒྲུབ་བརྒྱུད་ཤིང་རྟ་བརྒྱད་ཀྱི་བསྟན་པ་འཛིན་པའི་སྐྱེས་བུ་ཐམས་ཅད་དགོངས་པ་གཅིག་ཡིན་པ་དང་། དེའི་བསྟན་པ་ཚང་མ་ཡང་རྣམ་པར་དག་པ་ཡིན་པ་ནི་ང་རྐྱང་པས་ཀྱང་བསྒྲུབ་ཐུབ་ཀྱི་རེད། དེས་ན་ཁྱེད་རྣམ་པ་ལོག་པའི་ལམ་ལ་མི་འགྲོ་རྒྱུར་མ་འཆུགས། རྗེས་མར་ཁྱེད་ཅག་གིས་ལྟོས་དང་། བསྟན་འཛིན་གྱི་སྐྱེས་བུ་ལ་ལ་བཟང་། ལ་ལ་ངན། ཆོས་ལ་ལ་བཟང་། ལ་ལ་ནི་ཆོས་ལོག་རེད་ཅེས་འདྲ་མི་འདྲ་ཟེར་མཁན་དེ་ང་ཤི་ཟིན་པའི་རྗེས་དང་མ་ཤི་གོང་ནས་ཀྱང་ཧ་ཅང་མང་པོ་ཡོང་སྲིད་པས་དེ་ལ་དོགས་གཟབ་གྱིས། དེ་ནི་ངའི་ཁ་ཞེ་གཉིས་མེད་ཀྱི་ཤ་ཚའི་གྲོས་འདེབས་ཡིན།

འོན་ཀྱང་ཆོས་རྣམས་ཀྱི་བརྗོད་བྱ་ལ་ཟབ་མིན་གྱི་ཁྱད་པར་ཡོད་པ་ནི་སྨོས་མ་དགོས་པ་སྟེ། དཔེར་ན་རྙིང་མ་པ་རང་གི་གཞུང་ལ་བསམ་བློ་བཏང་ན་ཡང་། ཕ་རྒྱུད་དང་མ་རྒྱུད་ལ་ལྟོས་ན་གཉིས་མེད་ཀྱི་རྒྱུད་སྡེ་ཨ་ཏི་ཡོ་ག་དེ་ཤིན་ཏུ་ཟབ་པ་དང་། མྱུར་བ། ཉམས་ལེན་བདེ་བ་སོགས་གནམ་དང་ས་ལྟ་བུའི་ཁྱད་པར་ཡོད་ནའང་། དེ་ཅིག་ཤོས་ངན་པ་དང་ཅིག་ཤོས་བཟང་པོ་ཡིན་པས་མིན། དེ་དག་ནི་གང་ཟག་གི་ཁམས་དབང་མོས་པ་བསམ་པའི་བྱེ་བྲག་དང་བསྟུན་ནས་བཅོམ་ལྡན་འདས་ཀྱིས་སོ་སོར་གསུངས་པ་ཡིན།

དེ་དག་ལས་སངས་རྒྱས་བཅོམ་ལྡན་འདས་ཀྱིས་ཇི་སྙེད་གསུངས་པའི་ཐེག་པ་ཐམས་ཅད་ཀྱི་རྩེ་མོའམ་ཕུལ་དུ་བྱུང་བ་ནི་རྫོགས་པ་ཆེན་པོ་ཨ་ཏི་ཡོ་ག་ཡིན་ལ། རྫོགས་པ་ཆེན་པོ་འདི་ནི་སངས་རྒྱས་ཀྱི་གསུང་མཐའ་དག་གི་གནད་གསལ་བར་སྟོན་པ། ལུང་ཐམས་ཅད་ཀྱི་སྤྱི་འགྲེལ། དུས་གསུམ་སངས་རྒྱས་ཐམས་ཅད་ཀྱི་དགོངས་པའི་ཞེ་ཕུག་དམ་པ། ཐམས་ཅད་ཀུན་ཀྱང་མངོན་པར་རྫོགས་པར་འཚང་རྒྱ་བའི་ལམ་ཚང་ལ་མ་ནོར་བ་ཡིན་པར་ཚང་མས་ངོ་ཤེས་དགོས་པ་ཡིན།

རྫོགས་ཆེན་ཐུན་མིན་གྱི་ཁྱད་ཆོས།

དེ་ལ་འགའ་ཞིག་གིས་འདི་ལྟར་བསམ་ཡང་སྲིད་དེ། ང་ཚོ་བོད་ལ་ནེ་ཙོའི་ཁ་ཡི་ཆོས་བཤད་ཟེར་རྒྱུ་ཞིག་ཡོད་དར། ནེ་ཙོས་འབུ་མ་གསོད་འབུ་མ་གསོད་ཟེར་བཞིན་དུ་ཁོ་རང་གིས་འབུ་ཟ་འགྲོ་བ་བཞིན། གྲུབ་མཐའ་ལ་ཕྱོགས་རིས་མ་བྱེད་ཟེར་ནས་རྫོགས་པ་ཆེན་པོ་ཁོ་ན་ལ་བསྟོད་ཀྱིན་འདུག་བསམ་ན། ༼དགོད་སྒྲ།༽ དེ་རྩ་བ་ནས་མིན། དེ་ལ་ཡིད་ཆེས་པའི་ཁུངས་རྣམ་པ་དུ་མ་ཞིག་ཡོད།

༡ ལོ་རྒྱུས་ལ་བསྙེགས་པ།

ཐོག་མར་སྔོན་གྱི་ལོ་རྒྱུས་ལ་བསམ་བློ་བཏང་ན། རིག་འཛིན་དགའ་རབ་རྡོ་རྗེ་ནས་བཟུང་འཇམ་དཔལ་བཤེས་གཉེན། ཤྲཱི་སེང་ཧ། ཛྙཱ་ན་སུ་ཏྲ་ལ་སོགས་པ་འཇའ་ལུས་འཕོ་བ་ཆེན་པོའི་སྐུར་བཞེངས་པ་མ་ཟད། ཨོ་རྒྱན་སངས་རྒྱས་གཉིས་པ་དང་པཎ་ཆེན་བི་ལ་མི་ཏྲ་རྣམ་པ་གཉིས་ནི་སྐུ་ལུས་ཀྱང་མ་བརྗེས་པར། ད་ལྟ་ཡང་ཨོ་རྒྱན་རིན་པོ་ཆེ་ལྷོ་ནུབ་རྔ་ཡབ་དཔལ་རི་ན་བཞུགས་པ་དང་། པཎ་ཆེན་བི་མ་ལ་མི་ཏྲ་རྒྱ་ནག་རི་བོ་རྩེ་ལྔར་བཞུགས་པ་སོགས་རྙིང་མ་པའི་བླ་མ་བརྒྱུད་པ་དང་བཅས་པ་ཐམས་ཅད་ཀུན་ཀྱང་འཇའ་ལུས་རྡུལ་བྲལ་ལམ། འཇའ་ལུས་འཕོ་ཆེན་གང་རུང་གི་སྐུར་མ་བཞེངས་པ་མེད་པ་ལྟ་བུ་ཡིན། དེང་སང་གི་དུས་སྐབས་ན་ཡང་། བོད་ཡུལ་གྱི་ས་ཆའི་སྟོད་སྨད་བར་གསུམ་ཀུན་ཏུ་རྫོགས་པ་ཆེན་པོའི་ལམ་ཉམས་སུ་ལེན་པའི་གང་ཟག་ལ། ཕྱི་ནང་གསང་གསུམ་གྱི་རྟགས་མཚན་དང་འཇའ་ལུས་ཀྱི་སྐུར་བཞེངས་པ་ཡང་མང་པོ་ཡོད་ཚུལ་རྒྱས་པར་སྐྱབས་རྗེ་བདུད་འཇོམས་པ་ཆེན་པོའི་ཆོས་འབྱུང་ལས་ཇི་སྐད་གསུངས་པ་ལྟ་བུ་ཡིན། ད་རུང་ཡང་བདུད་འཇོམས་ཀྱི་ཆོས་འབྱུང་ནང་དུ་བཀོད་མེད་པའི་འཇའ་ལུས་པ་འདི་དང་འདི་ལྟ་བུ་འབྱུང་ཡོད་ཅེས་དང་། ད་ལྟ་ཡང་ལམ་གྲུབ་པའི་རྟགས་མཚན་ཅན་འདི་འདྲ་ཡོད་ཅེས་བཤད་དགོས་ནའང་མང་པོ་ཡིན། དེ་རྐྱང་པ་ལ་བསམ་བློ་བཏང་ན་ཡང་རྫོགས་པ་ཆེན་པོའི་ཆོས་ལྟ་བུ་ཞིག་ད་སྔོན་སའི་སྟེང་མ་ལུས་པ་ཀུན་ཏུ་བྱུང་མ་མྱོང་བ་ལྟ་བུ་ཡིན།

༢ ལམ་མྱུར་བ།

དེ་ནས་ལམ་མྱུར་བུལ་ལ་བསམ་བློ་བཏང་ན། གཞུང་རང་རང་གི་སྐབས་ན་བཤད་པ་དེ་ཚད་མ་ཉིད་དུ་འཛིན་དགོས་པ་ཡིན། དཔེར་ན་གསང་བ་འདུས་པ་དང་དུས་ཀྱི་འཁོར་ལོ་ལ་སོགས་པའི་གཞུང་ལ་བསམ་བློ་བཏང་ན། བརྩོན་འགྲུས་དང་ཤེས་རབ་མཆོག་དང་ལྡན་པས་ཚེ་གཅིག་གིས་སངས་རྒྱས་ཀྱི་གོ་འཕང་འགྲུབ་པར་འགྱུར་རོ་ཞེས་ཚེ་གཅིག་གི་ངོས་འཛིན་དེ་ཡང་ཚེ་ལོ་བརྒྱ་པ་ལྟ་བུ་ལ་ངོས་བཟུང་ཡོད། དེ་མ་གཏོགས་གཞུང་རང་གི་ནང་དུའང་མ་བཤད་པ་ཡིན། མ་བཤད་པ་ཞིག་བཙན་ཐབས་ཀྱིས་དེའི་མགོར་གླན་ནས་དེ་ལས་མྱུར་བ་ཞིག་ཡིན་ཟེར་ཐབས་མེད་ལ། རྫོགས་པ་ཆེན་པོ་འདིར་ཅི་ཞིག་བཤད་ཡོད་པ་ཡིན་ན། སྙིང་ཐིག་ཡ་བཞི་ལ་སོགས་པའི་སྐབས་ན་བརྩོན་འགྲུས་མཆོག་དང་ལྡན་ན་ལོ་གསུམ་གྱིས་ཟུང་འཇུག་གི་གོ་འཕང་འགྲུབ་པར་འགྱུར་བར་གསུངས། ད་རུང་མན་ངག་གི་ཡིག་ཆ་ལྕེ་བཙུན་སྙིང་ཐིག་ཆེན་མོ་ལས་དབང་པོ་མཆོག་དང་ལྡན་པའམ་ཁྱད་པར་དུ་དད་པའི་དབང་པོ་མཆོག་དང་ལྡན་ན། ཟླ་བ་དྲུག་གིས་འཕོ་བ་ཆེན་པོའི་སྐུ་འགྲུབ་པར་འགྱུར་རོ་ཞེས་པ་ནི་གཞུང་རང་གི་བསྟན་བྱ་ཡིན། དེ་ཚད་མ་ཉིད་དུ་བཟུང་ན་རྫོགས་པ་ཆེན་པོ་ལྟ་བུའི་འབྲས་བུ་ཐག་ཉེ་མོ་འདི་འདྲ་བཤད་ཡོད་ས་གསར་མའི་རྒྱུད་སྡེ་གང་ལ་ཡང་དཀོན་མོ་ཡིན།

༣ ཉམས་ལེན་བདེ་བ།

དེ་ནས་ལམ་ཉམས་སུ་ལེན་བདེ་ཚུལ་ལ་བསམ་བློ་བཏང་ན། དཔེར་ན་གསང་སྔགས་གསར་མའི་རྒྱུད་སྡེ་ཐམས་ཅད་ཀྱི་ཆེས་མཆོག་ཏུ་གྱུར་བ་དཔལ་དུས་ཀྱི་འཁོར་ལོ་ཡིན་ལ། དེ་ལས་ལྷག་པ་ཞིག་གསང་སྔགས་གསར་མའི་རྒྱུད་སྡེ་ལ་མེད། དེའི་རྩོལ་མེད་ཀྱི་ལམ་ནི་རྫོགས་རིམ་སྦྱོར་བ་དྲུག་གི་ཉམས་ལེན་རེད། དེ་ཉམས་སུ་ལེན་པའི་དབང་དུ་བྱས་ན་ཡང་ཁྱེད་རྣམ་པས་ཞིབ་པར་སྦྱོར་བ་དྲུག་ལ་ལྟོས་དང་། དང་པོ་སོ་སོར་སྡུད་པའི་རྣལ་འབྱོར་ལ་ལྟ་དུས་ཧ་ལམ་རྫོགས་ཆེན་དང་འདྲ་བར་ལུས་ངག་ཡིད་གསུམ་པོ་རང་བབས་སུ་ཞོག་ཅེས་དང་། ནམ་མཁའ་ཆུ་འཛིན་བྲལ་བ་དག་ལ་བགྲད་པའི་མིག་གིས་བལྟ་བར་བྱ་ཞེས་གསུངས་ཡོད་ཀྱང་། རྗེས་མ་བསམ་གཏན་དང་རྗེས་དྲན་གྱི་སྐབས་སུ་དེ་ལ་གེགས་ཀྱང་ཧ་ཅང་མང་། གོལ་ས་ཡང་ཧ་ཅང་མང་། བོགས་འདོན་གྱི་མན་ངག་ཀྱང་ཤིན་ཏུ་མང་པོ་དགོས། ཁྱད་པར་དུ་བླ་མ་དེ་ཡང་ཧ་ཅང་མཁས་པ་དང་གྲུབ་མཐའ་ལ་བྱང་བ། ཉམས་མྱོང་ཚད་དང་ལྡན་པ་ཞིག་རྒྱུན་དུ་མ་བསྟེན་ན་རྩ་བ་ནས་ལམ་མཐར་ཕྱིན་པའི་ཐབས་མེད། དེའི་ཚུལ་ཡང་ཇོ་ནང་ཀུན་མཁྱེན་གྱི་ཁྲིད་ཡིག་མཐོང་བ་དོན་ལྡན་ལ་སོགས་པའི་སྐབས་ན་ཇི་ལྟར་བཤད་པ་བཞིན་ཡིན། དེང་སང་གི་གནས་སྐབས་ན་ལམ་དེ་ལྟར་ཉམས་སུ་ལེན་དགོས་ཟེར་ན་ཧ་ཅང་དཀའ་མོ་ཡིན། དེས་ན་རྫོགས་པ་ཆེན་པོ་ཉམས་སུ་ལེན་པར་བྱེད་པ་ལ་བླ་མར་སངས་རྒྱས་དངོས་མཐོང་གི་དད་པ་ཡོད། དེ་ལ་གསོལ་བ་ཐོབ། རང་བཞག་གི་མན་ངག་གཅིག་གི་ཐོག་ཏུ་སྡོད་དང་། དེ་མ་གཏོགས་ཅི་ཡང་མི་དགོས། ལྕེ་བཙུན་སྙིང་ཐིག་ཆེན་མོའི་ནང་ན། ཁྱད་པར་བཅོས་མ་མ་ཡིན་པའི་མོས་གུས་དྲག་པོས་བླ་མ་ལ་ནན་ཏན་དུ་གསོལ་བ་གདབ་པ་ནི་གེགས་སེལ་དང་བོགས་འདོན་ཐམས་ཅད་ཀྱི་མཆོག་ཏུ་འགྱུར་རོ༔ ཞེས་གསུངས་ཡོད་པས། དེ་མ་གཏོགས་གང་ཡང་ཡོད་དགོས་པ་མིན། དེ་ནས་སྐྱིད་སྐྱིད་བྱས་ནས་ཉལ་བསྡད་ན་ཡང་ཆོག འདི་ལ་བསམ་བློ་བཏང་ན་རྫོགས་པ་ཆེན་པོ་ནས་བཤད་པ་ལྟ་བུ་ཞིག་གང་ནའང་ཡོད་པ་མིན།

༤ དུས་བབ་ཀྱི་ཆོས།

དེ་ནས་དུས་བབ་ཀྱི་ཆོས་ཡིན་ཚུལ་ལ་བསམ་བློ་བཏང་ན། སེམས་ཅན་རྣམས་ཉོན་མོངས་ཇི་ཙམ་རགས་པ་དེ་ཙམ་དུ་ཆོས་དེ་ཡང་ཇེ་ཟབ་ཇེ་ཟབ་ཏུ་འགྲོ་དགོས་པ་ཡིན། དཔེར་ན། མི་ཞིག་ནད་ཚབས་ཆེན་ཞིག་གིས་ཐེབས་ན་དེའི་གཉེན་པོ་སྨན་ཡང་ཕན་ནུས་ཆེ་བ་ཞིག་མ་བཏང་ན་དྲག་ཐབས་མེད་པ་བཞིན་དུ། རྫོགས་ལྡན་དང་པོའི་གནས་སྐབས་སུ་སེམས་ཅན་རྣམས་ཉོན་མོངས་ཧ་ཅང་ཆུང་བ་ཡིན་པས་དེའི་གཉེན་པོར་བྱ་རྒྱུད་དང་། གསུམ་ལྡན་དུ་སྤྱོད་རྒྱུད། ཉིས་ལྡན་གྱི་གནས་སྐབས་ན་རྣལ་འབྱོར་རྒྱུད། རྩོད་ལྡན་གྱི་གནས་སྐབས་ན་ཉོན་མོངས་ཧ་ཅང་རགས་པས་བླ་མེད་ཀྱི་རྒྱུད་བསྟན། རྩོད་ལྡན་ལས་ཀྱང་དེང་སང་སྙིགས་མ་ལྔ་བདོ་བ་སྐྱེ་བོ་རྣམས་ཧ་ཅང་གདུལ་བར་དཀའ་བའི་གནས་སྐབས་ན། རྫོགས་པ་ཆེན་པོ་འདི་ཁོ་ན་མ་གཏོགས་གཞན་གང་གིས་ཀྱང་གདུལ་བར་མི་ནུས་པས། ཀཿ ཐོག་བདུད་འདུལ་གྱིས་ཀྱང་། ཐེག་བརྒྱད་གྲུབ་མཐས་གདུལ་བར་དཀའ་བའི་ཚེ། །ཐེག་རྩེ་ཨ་ཏིའི་བསྟན་པ་གསལ་བར་མཛད། །ཅེས་དེང་སང་ཐེག་པ་བརྒྱད་གང་གིས་ཀྱང་གདུལ་བར་དཀའ་བའི་དུས་སུ་ཐེག་རྩེ་ཨ་ཏི་ཡོ་ག་ཁོ་ན་དུས་བབ་ཀྱི་ཆོས་ཡིན་པས་ཆེས་རྨད་དུ་བྱུང་བ་ཞིག་ཡིན།

༥ བསྟན་པའི་གནས་ཚད།

དེ་ནས་བསྟན་པའི་གནས་ཚད་ལ་བསམ་བློ་བཏང་ན། སྤྱིར་སངས་རྒྱས་ཀྱི་བསྟན་པ་ཕལ་ཆེར་རྫོགས་ལ་ཉེ་བ་ཡིན་ཏེ། དཔེར་ན། འབྲས་བུའི་དུས་དང་བསྒྲུབ་པའི་དུས། ལུང་གི་དུས། རྟགས་ཙམ་འཛིན་པའི་དུས་བཅས་རྣམ་པ་བཞི་ཡོད་པ་ལས། ད་ལྟ་ཕལ་ཆེར་ལུང་གི་དུས་ཀྱི་ཚུལ་ཁྲིམས་ཀྱི་དུས་ཡོལ་ནས་ཏིང་འཛིན་གྱི་དུས་ལ་ཐུག་ཡོད་པ་ཡིན། རྒྱུད་སྡེ་སྤྱི་ཁྱབ་ཀྱི་དབང་དུ་བྱས་ན་ཡང་རེ་རེ་བཞིན་དུ་བསྟན་པའི་གནས་ཚད་ཕལ་ཆེར་རྫོགས་འགྲོ་བཞིན་ཡོད། དཔལ་དུས་ཀྱི་འཁོར་ལོར་མཚོན་ན། ཆོས་རྒྱལ་བདུན་དང་རིགས་ལྡན་ཉེར་ལྔའི་རིང་ལ་བསྟན་པ་སྔ་དར་རྒྱ་ཆེར་སྤེལ། རིགས་ལྡན་དྲག་པོ་ལྕགས་ཀྱི་འཁོར་ལོ་ཅན་གྱི་སྲས་རྣམ་པ་གཉིས་ཀྱིས་དུས་ཀྱི་འཁོར་ལོའི་ཕྱི་དར་གྱི་བསྟན་པ་སྤེལ་དགོས་ན། ད་ལྟ་སྔ་དར་གྱི་བསྟན་པ་སྟེ་ཆོས་རྒྱལ་བདུན་ཡང་རྫོགས། རིགས་ལྡན་ཉེར་ལྔ་ལས་རིགས་ལྡན་ཉེར་གཅིག་པ་མ་འགགས་པ་ཡང་གསེར་ཁྲི་ལ་འཁོད་ནས་ད་ལོ་དགུང་ལོ་དྲུག་བཅུ་རེ་དྲུག་ཡིན་པས། སྔ་དར་གྱི་བསྟན་པ་ཕལ་ཆེར་རྫོགས། འོན་ཀྱང་བསྟན་པའི་གནས་ཚད་རྫོགས་ལ་ཇི་ཙམ་ཉེ་བར་ཆོས་ཀྱི་བྱིན་རླབས་སམ་ནུས་པ་ནི་ཇེ་བུལ་ཇེ་བུལ་དུ་འགྱུར་རྒྱུ་ཡིན་མོད། རྫོགས་པ་ཆེན་པོའི་བསྟན་པ་ནི། སྒྲ་ཐལ་འགྱུར་རྩ་བའི་རྒྱུད་ལས། དེ་ནས་མཁའ་འགྲོ་དཔལ་འཛིན་མས། །བསྟན་པ་འདི་ཉིད་བཟུང་ནས་ནི། །ཚེ་ལོ་བཅུ་པའི་དུས་ལ་དར། །དེ་ནས་མི་གནས་ངོ་བོའོ། །ཞེས་ཁ་རྩང་དེ་རིང་གི་དུས་ཚོད་ཏག་ཏག་ཏིག་ཏིག་འདིར་རྫོགས་པ་ཆེན་པོའི་བསྟན་པ་ཧ་ཅང་དར་བའི་དུས་ཚོད་ཡིན། དེ་ཡང་རྗེས་སུ་མང་ཆེ་བ་ཞིག་བུད་མེད་ཀྱི་ལུས་རྟེན་ལ་འཇའ་ལུས་འཕོ་བ་ཆེན་པོའི་སྐུ་འགྲུབ་པར་འགྱུར་བར་གསུངས་ཡོད། ལྷག་པར་ཚེ་ལོ་བཅུ་པའི་དུས་སུ་མཁའ་འགྲོ་དཔལ་འཛིན་མ་ཞེས་བྱ་བས་མཐོང་ཐོས་དྲན་རེག་གི་སེམས་ཅན་ཐམས་ཅད་འཕོ་བ་ཆེན་པོའི་སྐུར་བཞེངས་བའི་ས་ལ་འགོད་པར་བྱེད་ཅེས་རྒྱ་ཆེར་བཤད་ཡོད་པས། རྫོགས་པ་ཆེན་པོ་འདི་ནི་ད་སྐབས་ཧ་ཅང་དར་རྒྱས་ཕུན་སུམ་ཚོགས་པ་ཞིག་དང་། ཉམས་སུ་བླངས་ན་བསམ་གྱིས་མི་ཁྱབ་པའི་ཆོས་ཚུལ་ཞིག་ཡིན།

དེས་ན་རྫོགས་པ་ཆེན་པོའི་མན་ངག་གི་ཆེ་བ་འདི་ཉིད་གཟུངས་ཐོབ་པའི་བྱང་ཆུབ་སེམས་དཔའ་ཞིག་གིས་བཤད་ན། བསྐལ་པ་ནས་བསྐལ་པའི་བར་དུ་བཤད་ཀྱང་འཛད་མཐའ་མེད་པ་ཞིག་ཡོད་པ་ནི་སྨོས་མ་དགོས་པ་ཡིན་ལ། དཔེར་ན་དམན་པ་བདག་ལྟ་བུས་བཤད་ན་ཡང་ཞག་ཁ་ཤས་ཀྱི་བར་དུ་མི་འཛད་པའི་སྐད་ཆ་ལབ་ལོབ་མང་པོ་ཞིག་བཤད་རྒྱུ་ཡོད་ཀྱང་། དེ་རིང་དེ་ཙམ་ཞིག་གིས་མཚམས་འཇོག་བྱ།

མཇུག་སྡུད།

ངས་རྟེན་འབྲེལ་གྱི་ཆེད་དུ་མཇུག་སྡུད་ཀྱི་ཚུལ་དུ་ལུང་གཉིས་འདྲེན་རྒྱུ་ཡིན།

དང་པོ་ནི། རིག་འཛིན་དགའ་རབ་རྡོ་རྗེའི་བསྟན་པ་བུ་གཅིག་གི་འགྲེལ་བའི་མཇུག་རྩོམ་དུ། དུས་གསུམ་སངས་རྒྱས་ཐམས་ཅད་ལ། །ཐུན་མོང་མན་ངག་བསམ་འདས་ཀྱང་། །མཆོག་གི་མན་ངག་སྲས་གཅིག་པོ། །འདི་ལས་ཟབ་པ་ཞིང་ཁམས་ནི། །མཐའ་མེད་དག་ན་ཡོད་རེ་ཀན། །ཞེས་འདས་མ་འོངས་ད་ལྟ་དུས་གསུམ་གྱི་སངས་རྒྱས་ཐམས་ཅད་ལ་ཆོས་ཀྱི་ཚུལ་བསམ་གྱིས་མི་ཁྱབ་པ་ཞིག་ཡོད་ཀྱང་མཐར་ཐུག་གི་གནད་ཡོངས་སུ་རྫོགས་པ་དྲིལ་བ་ནི། སངས་རྒྱས་ཐམས་ཅད་ཀྱི་སྲས་གཅིག་པོ་རང་བྱུང་བསྟན་པ་བུ་གཅིག་གི་རྒྱུད་རྫོགས་པ་ཆེན་པོ་འདི་ལས་ལྷག་པ་ཞིག་ཡོད་པ་མིན། ཞེས་ང་ཚོ་བོད་ཀྱིས་ཉི་མ་ལྷ་ས་ཟེར་ནས་མནའ་བསྐྱལ་བ་ལྟར། རིག་འཛིན་དགའ་རབ་རྡོ་རྗེས་འུ་ཅག་ཡིད་ཆེས་པའི་ཆེད་དུ་དབུ་སྙུང་བཞེས་པ་ཡིན། དེ་ཚང་མས་ཐུགས་ལ་ཟུང་།

ལུང་གཉིས་པ་ནི། རང་རེ་རྣམས་ལ་བཀའ་དྲིན་མཚུངས་ཟླ་དང་བྲལ་བ། རྒྱལ་བ་ཐམས་ཅད་ཀྱི་ཐུགས་རྣམ་པར་མི་རྟོག་པའི་ཡེ་ཤེས། དགེ་བའི་བཤེས་གཉེན་གྱི་ཚུལ་དུ་སྣང་བ། ཀུན་མཁྱེན་མི་ཕམ་རྒྱ་མཚོ་ཞེས་ཡོངས་སུ་གྲགས་པ་དེ་ཉིད་ཀྱི་ཞལ་སྔ་ནས་ཀྱང་། སྙིགས་མའི་རྒུད་པ་མུན་ལྟར་འཁྲིགས་ན་ཡང་། །རྒྱལ་དབང་པདྨའི་ཕྲིན་ལས་ཟླ་ལྟར་གསལ། །ཞེས་སྙིགས་མ་ལྔ་བདོ་བའི་སྐབས་འདིར་ནད་མུག་མཚོན་དང་། ཁྱད་པར་དུ་ནང་གི་ཉོན་མོངས་པ་འདོད་ཆགས་ཞེ་སྡང་གཏི་མུག་ལ་སོགས་པ་ཇི་ཙམ་རྒྱས་པ་དེ་ཙམ་དུ་རྒྱལ་དབང་པདྨ་ཀ་རའི་འཕྲིན་ལས་ནི་དེ་བས་ཀྱང་གསལ་བ་ཡིན།

དཔེར་ན་སྨག་ཇི་ཙམ་ནག་ན་ཟླ་བའི་འོད་དེ་ཙམ་གྱིས་གསལ་བ་ལྟར། སྙིགས་མའི་མུན་པ་ཇི་ཙམ་ཞིག་འཁྲིགས་པ་ན་རྒྱལ་དབང་པདྨའི་འཕྲིན་ལས་ནི་དེ་ཙམ་གྱིས་མྱུར་བ་ཡིན་ཞེས་གསུངས་པ་ཡིན་ན། ཁྱེད་རྣམ་པ་ཚང་མས་ཀྱང་ཆོས་དེ་རྫོགས་པ་ཆེན་པོ་ཁོ་ན་ལ་ཉམས་བཞེས་མཛད་པ་དང་། བླ་མ་ནི་ཨོ་རྒྱན་རིན་པོ་ཆེ་ཁོ་ན་ལ་གསོལ་བ་རྩེ་གཅིག་ཏུ་འདེབས་པ་དེ་ནི་ངས་ཁྱེད་ཅག་ལ་གསོལ་བ་བཏབ་པའི་སྙིང་པོ་ཡིན།

ང་དང་བསོད་རྒྱལ་རིན་པོ་ཆེ་གཉིས་ལས་རབ་གླིང་པའི་སྤྲུལ་པ་ཡིན་པར་བཤད་ཀྱིན་ཡོད་ན། ངེད་གཉིས་ཀྱིས་ཀྱང་ཚེ་གཅིག་རེ་ལྟོས་འཆའ་ས་ནི་བླ་མ་ཨོ་རྒྱན་ཆེན་པོ་ཁོ་ན་ཡིན་ལ། ཐུབ་རུང་མ་ཐུབ་རུང་ཉམས་སུ་ལེན་རྒྱུ་ནི་རྫོགས་པ་ཆེན་པོ་ཁོ་ན་ཡིན་ན། ཁྱེད་རྣམ་པས་ཀྱང་ང་དང་ཁྱད་པར་དུ་ཁྱེད་ཅག་གི་བླ་མའི་རྗེས་སུ་འཇུག་པར་འདོད་ན་དེ་བཞིན་དུ་མཛད་པར་སླར་ཡང་ཞུ་བ་ཡིན།

དེ་རིང་བཤད་དགོས་རྒྱུའི་སྙིང་པོ་ནི་རྫོགས་པ་ཆེན་པོ་ཁོ་ན་ལས་བརྩམས་པའི་སྐད་ཆ་དེ་བཤད་དགོས་པ་ཡིན། དེ་ནི་ཁྱེད་ཅག་གི་བླ་མའི་ཐུགས་བཞེད་ཀྱང་ཡིན། ངོ་མ་ངས་གཤོབ་དང་རྫུན་བཤད་པ་མིན། ལས་རབ་གླིང་པའི་ཆོས་ཚོགས་འདི་ལ་ཐོན་ནས་བཟུང་། ངས་གྲ་སྒྲིག་ཚིག་གཅིག་ཀྱང་བྱས་མེད་ཀྱང་སྐད་ཆ་ཕར་འཕྲོས་སོང་དུས་མཚམས་འཇོག་རྩ་བ་ནས་མི་ཐུབ་པ་བྱུང་། དེས་ན་དེ་རིང་རྫོགས་པ་ཆེན་པོའི་དངོས་གཞིའི་ཁྲིད་བཤད་པའི་སྐབས་ལ་ཐོན་མ་ཐུབ་ཀྱང་། རྫོགས་པ་ཆེན་པོའི་དངོས་གཞིའི་ཆོས་ནི་ཁྱེད་རྣམ་པས་སྔར་དང་ད་ལྟ་དང་ཕྱིས་ཀྱང་ཉམས་སུ་ལེན་དང་ལེན་བཞིན་པའི་སྒང་རེད། དེའི་ཕྱིར་ན་དེ་དག་གིས་འཐུས་པར་བྱས་ནའང་ཆོག་མོད། གལ་ཏེ་སླར་ཡང་ཁོམ་སྐབས་ཡོད་ན་མདོར་བསྡུས་ཙམ་རེ་སང་ཉིན་གནངས་ཉིན་གྱི་དུས་ཚོད་ལའང་ངས་ཅུང་ཟད་རེ་ལབ་ཀྱང་ཆོག གལ་སྲིད་ཁོམ་པ་མ་བྱུང་ནའང་རང་རང་གི་བླ་མ་ཡུན་རིང་པོའི་བར་དུ་བསྟེན་ནས་འདྲི་གཅོད་གྱིས་དང་དེས་མ་འཐུས་པ་མི་འདུག ད་ཡང་བླ་རྒན་ཐུགས་ཐོག་ནས་ཅུང་ཟད་བུད་ཡོད་པས། མཚམས་འཇོག་རྒྱུ་མི་ལོན་སེམས་ཐག་གོར་མོ་རྡོ་རེད། ད་རུང་རང་བབ་ལ་བཞག་བཏང་ན་ཉི་མ་ནུབ་སོང་ཡང་གཏམ་ལ་ཟད་མཐའ་མི་འདུག ཆུ་ཚོད་ཀྱིས་ཀྱང་ང་ལ་མཚམས་འཇོག་རན་ཐལ་ཟེར་གྱིན་འདུག དེ་ཙམ་གྱིས་ཆོག་པར་བྱ།

ལས་གླིང་ཆོས་ཚོགས་མཐའ་རྒྱ་ནམ་མཁའ་འདྲ། །

བསོད་རྒྱལ་སྤྲུལ་སྐུའི་བྱིན་རླབས་ཉི་འོད་འདྲ། །

ཁོ་བོའི་ངག་ལ་ཟད་མཐའ་མེད་པས་ན། །

མཐའ་གཅིག་ཚང་བར་བརྗོད་པར་དཀའ་ན་ཡང་། །

རེ་ཞིག་དུས་ཚོད་དབང་གིས་དེ་ཙམ་མོ། །

བདག་གིས་ཀྱང་ཆོས་ཁྲིད་འགའ་རེ་བཤད།

ཉིན་དེའི་དགོང་མོར། ཆོས་ཚོགས་ཀྱི་དད་ལྡན་རྣམས་ཀྱིས་རེ་བསྐུལ་བྱས་པ་ལྟར། བདག་གིས་དེར་འཁོད་རྣམས་ལ་ཆོས་ཁྲིད་ཅིག་བཤད་པ་ཡིན་ལ། དེའི་ནང་དོན་གཙོ་བོ་ནི་གཏེར་ཆེན་ལས་རབ་གླིང་པ་དང་ཁོང་གི་ཡང་སྤྲུལ་གྱི་སྐོར་དང་། ཁྱད་པར་དུ་ཆོས་རྗེ་ཉིད་ཀྱི་རྣམ་ཐར་དང་སྦྲགས་ནས་ཁོང་གི་སྐུ་གསུང་ཐུགས་ཀྱི་ཡོན་ཏན་རྣམས་ངོ་སྤྲོད་བྱས་པ་ཡིན།

ཐེངས་འདིར་ཕྱི་ལོགས་སུ་ཆོས་རྗེ་ཉིད་ཀྱི་ཕྱག་ཕྱིར་འགྲོ་བའི་རིང་ལ། བདག་གིས་ལས་རབ་གླིང་ཙམ་དུ་མ་ཟད། ས་ཚུགས་གཞན་དག་ནས་ཀྱང་ཆོས་ཁྲིད་ལན་འགར་བཤད་པ་སྟེ། དཔེར་ན། ནཱ་ཕཱ་ལུང་དུ་འཇམ་དཔལ་གྱི་སྒོམ་ཐབས་བཤད་ཅིང་ཡུལ་ངོས་དྲི་བ་དྲིས་ལན་ཐེངས་གཉིས་བྱས། བྷོ་སི་ཐིན་དུ་དམ་པ་གསུམ་དང་བདག་མེད་ཀྱི་སྐོར་བཤད་ཅིང་། ཕུར་པའི་ལས་ཆོག་གི་ལུང་བཏོན་པ་ཡིན།

ཁྱད་པར་དུ་བདག་མེད་ཀྱི་སྐོར་འཆད་པའི་སྐབས་སུ། བདག་གིས་སྔོན་གྱི་སློབ་དཔོན་རྣམས་ཀྱི་དགོངས་པ་དང་བསྟུན་པ་སྟེ། སློབ་དཔོན་ཀླུ་སྒྲུབ་ཀྱི་རྩ་ཤེས་ལས་བསྟན་པའི་རྣམ་ལྔ་ཤིང་རྟའི་རིགས་པ་དང་། ཟླ་གྲགས་ཀྱི་དབུ་མ་འཇུག་པའི་རྣམ་བདུན་ཤིང་རྟའི་རིགས་པ། ཞི་བ་འཚོའི་དབུ་མ་རྒྱན་གྱི་གཅིག་ཏུ་བྲལ་གྱི་རིགས་པ། ཞི་བ་ལྷའི་སྤྱོད་འཇུག་ལས་བསྟན་པའི། སོ་དང་སྐྲ་སེན་བདག་མ་ཡིན། །ནས་རྣམ་ཤེས་དྲུག་ཀྱང་བདག་མིན་པའི་སྐོར་སོགས་ཏེ། ལུང་དང་རིགས་པ་ལ་བརྟེན་ནས་ཅུང་ཟད་ཞིབ་ཕྲའི་སྒོ་ནས་བདག་མེད་ཀྱི་ལྟ་བ་ངོ་སྤྲོད་བྱས་ཤིང་། གཏན་ཚིགས་ཡང་དག་གི་ལམ་ནས་བདག་མེད་པའི་ཚུལ་ཤེས་པར་བྱེད་པ་དང་བདག་མེད་སྒོམ་སྟངས་སོགས་ཀྱང་འཆད་ཁུལ་བྱས་པ་ཡིན།

འོན་ཀྱང་ནུབ་ཕྱོགས་རྣམས་སུ་བསྟན་འགྲོའི་དོན་མཛད་པ་ལ། ཡང་ན་ཆོས་རྗེ་ཡིད་བཞིན་ནོར་བུ་ལྟ་བུའི་ཐུན་མོང་མ་ཡིན་པའི་བརྒྱུད་པའི་བྱིན་རླབས་དང་ཉམས་རྟོགས་ཀྱི་གདེང་དང་ལྡན་པ། དད་ལྡན་ཚེ་འདིར་གྲོལ་བ་དང་འབྲེལ་ཐོགས་སེམས་ཅན་རྣམས་ཀྱི་རྒྱུད་ལ་དགེ་རྩ་ལེགས་པར་བསྐྲུན་ནུས་པའི་སྐྱེས་བུ་དམ་པའམ། ཡང་ན་ནུབ་ཕྱོགས་སུ་ལོ་མང་འཚོ་བ་བསྐྱལ་བས་ཁོ་ཚོའི་སྡུག་བསྔལ་དང་དགའ་ཕྱོགས། རིག་གནས་སོགས་ལ་རྒྱུས་མངའ་གཏིང་ཟབ་ཡོད་པ་གཞིར་བཞག་ཐོག དེང་རབས་ཀྱི་སེམས་ཁམས་རིག་པ་སོགས་སེམས་འདུལ་སྦྱོང་གི་ཐབས་ཤེས་ཁོང་དུ་ཆུད་མཁན་ཞིག་ཡིན་ན་འགྲོ་དོན་ཆེན་པོ་ཡོང་ངེས་རེད་མ་གཏོགས། རྒྱུད་ན་ཉམས་དང་རྟོགས་པས་དབུལ་ཞིང་ནུབ་ཕྱོགས་ཀྱི་རིག་གནས་ལ་རྒྱུས་ལོན་ཉུང་བ་བདག་ལྟ་བུ་ཞིག་གིས། ཆོས་ཁྲིད་འགའ་ཞིག་བཤད་པ་ཙམ་གྱིས་ནི། ཁོ་ཚོ་ལ་ནུས་པ་ཆེར་མི་ཐོན་ཞིང་ཕན་ཅི་ཐོགས་འདི་ཐོགས་མི་འདུག་སྙམ།

དེས་ན་འདིར་གཙོ་བོ་ཆོས་རྗེ་ཉིད་ཀྱི་རྡོ་རྗེའི་གསུང་རྣམས་སྒྲིག་སྦྱོར་བྱས་པ་ལས། གཞན་པའི་འཆད་ཁྲིད་རྣམས་ནི་རེ་ཞིག་བཏང་སྙོམས་སུ་བཞག་གོ །

བླ་མ་མུ་མཚོ།

ཕྱི་ཟླ་༨པའི་ཚེས་༢༩ཉིན་གྱི་སྔ་དྲོར། བླ་མ་མུ་མཚོས་འདུས་པ་ཡོངས་ལ་རྡོ་རྗེ་གྲོ་ལོད་ཀྱི་དབང་གསུངས་ཤིང་། ད་ལན་ཕྱི་ཕྱོགས་སུ་ཕེབས་པའི་རིང་ལ། ཕལ་ཆེར་ས་ཚུགས་རེ་རེ་བཞིན་ཆོས་ཚོགས་སོ་སོས་དབང་གང་བསྐུར་བར་གསོལ་བ་ལྟར། ཁོང་གིས་ཕུར་པ་མགུལ་ཁུག་མ་དང་འཇམ་དཔལ་ཡེ་ཤེས་སེམས་དཔའ། རྟེན་འབྲེལ་ཉེས་སེལ། སྤྱན་རས་གཟིགས་སོགས་ཀྱི་དབང་མང་པོ་གནང་བར་མཛད།

ཕོ་མོ་འདྲ་མཉམ་ལ་གཙིགས་ཆེན་བྱེད་པའི་ནུབ་ཕྱོགས་པའི་མི་མང་པོ་ཞིག་གིས། བླ་མ་མུ་མཚོ་མཆོག་ལ་ལྷག་པར་དུ་དགའ་གུས་བྱེད་ཅིང་། ཆོས་ཚོགས་རེ་རེ་བཞིན་ཁོང་ལ་གཞན་དང་མི་འདྲ་བའི་དགའ་བསུ་ཆེན་པོ་ཐོབ། དེའི་རྒྱུ་མཚན་ཡང་། ནུབ་ཕྱོགས་རྒྱལ་ཁབ་རྣམས་སུ་ཆོས་གསུང་བར་ཕེབས་པའི་བླ་མ་དག་གི་ཁྲོད་དུ་བུད་མེད་གྱི་རྟེན་ཅན་ཡིན་པ་ཧ་ཅང་ཉུང་ཞིང་། དབང་ཁྲིད་གནང་མཁན་གྱི་མཁའ་འགྲོ་མ་དང་བུད་མེད་སྤྲུལ་སྐུ་ནི་དེ་ལས་ཀྱང་ཤིན་ཏུ་དཀོན་པས་ཡིན། བླ་མ་མུ་མཚོ་མཇལ་བའི་མི་མང་པོ་ཞིག་གིས། ཁོང་ནི་བྱམས་བརྩེའི་རང་གཟུགས་སུ་མཐོང་ཞིང་། བརྩེ་སེམས་དང་འཛུམ་མདངས་ཀྱིས་མི་རྣམས་ཀྱི་ཡིད་ལ་དྲོད་ཁོལ་བྱིན་པར་མ་ཟད། ཁོང་གི་ཞལ་ཐེངས་གཅིག་མཇལ་བ་ཙམ་གྱིས་ཀྱང་། ཐུན་མིན་ཆོས་པའི་རང་གཤིས་ཀྱིས་ཡིད་དབང་འཕྲོག་གིན་འདུག ལྷག་པར་དུ་བུད་མེད་ཆོས་པ་རྣམས་ལ་ཆོས་སྒྲུབ་པའི་རེ་འདུན་དང་སྤོབས་སེམས་གསར་བ་སྟེར་གྱིན་ཡོད་པར་བཤད།

བདག་ཆོས་རྗེ་ཉིད་ཀྱི་ཕྱག་ཕྱིར་རྒྱལ་ཕྱི་ནང་གི་ས་ཆ་མང་པོར་སོང་བའི་སྐབས་དག་ལ། བླ་མ་མུ་མཚོ་མཆོག་ལའང་ཅུང་ཟད་ཐག་ཉེ་བའི་སྒོ་ནས་བསྙེན་བཀུར་ཞུ་མྱོང་ཡོད། ཁོང་ལ་འཇིག་རྟེན་ལས་འདས་པའི་ཉམས་རྟོགས་དང་། མདོ་སྔགས་ཀྱི་ཆོས་ལ་མཁྱེན་རྒྱ་ཡངས་བའི་ཁྱད་མཚར་གྱི་ཤེས་རབ་མངའ་བར་མ་ཟད། རྒྱུན་ལྡན་གྱི་འཚོ་བའི་ཁྲོད་དུ་གཞན་ལ་འབྲེལ་འདྲིས་དང་བྱ་བ་སྒྲུབ་སྟངས་ཐད་ནས་ཀྱང་། འཇིག་རྟེན་གྱི་བུད་མེད་དཀྱུས་མ་འགའ་རེ་ལྟར་སྤོབས་པ་ཆུང་བ་དང་ཚོར་བ་སྐྱེན་པོ། དགའ་སྡུག་མ་ངེས་པ་ལྟ་བུ་མ་ཡིན་པར། ལྷན་སྐྱེས་སུ་རང་བཞིན་ཞི་ཞིང་དུལ་ལ་ངག་སྨྲ་བ་ཉུང་བ། འཇིག་རྟེན་གྱི་འདོད་ཡོན་ལ་མངོན་ཞེན་ཆུང་བ། བཟའ་བཏུང་དང་སྡོད་གནས་སོགས་ཀྱིས་མ་འགྲིགས་པ་མེད་པར་སྤྱོད་ལམ་གང་ལའང་ཆོག་ཤེས་ལྡན་པ་ཞིག་ཡིན།

ལྷག་པར་དུ། དུས་རྟག་ཏུ་ཁོང་གི་ཞང་པོ་ཆོས་རྗེ་ཡིད་བཞིན་ནོར་བུ་དང་མ་ཡུམ་ཨ་ནེ་མེ་སྒྲོན་གཉིས་དང་འབྲལ་བ་མེད་པར། བློ་གཅིག་སེམས་གཅིག་གིས་བསྙེན་བཀུར་ཞུ་བ་ལས་ཁོང་ཁྲོ་ལངས་ཏེ་ཚིག་རྩུབ་སྨྲ་བ་ཐེངས་གཅིག་ཀྱང་མཐོང་མ་མྱོང་ལ། ཆོས་རྗེ་ཉིད་དང་འཁོར་སློབ་རྣམས་ཀྱི་བར་ལའང་། དབྱེན་སྦྱོར་དང་ཕྲ་མས་རྩོད་སློང་གི་ལས་སོགས་ཡེ་མི་བྱེད་པར། དུས་དང་རྣམ་པ་ཀུན་ཏུ་མི་ཐམས་ཅད་ལ་བརྩེ་སེམས་འབའ་ཞིག་གིས་ཐུགས་ཁུར་མཛད་མཁན་ཞིག་ཡིན།

ཁོང་ལ་མི་ཕལ་བ་ལས་ལྷག་པའི་ཤེས་རབ་དང་ཡིད་འཛིན་མངའ་བའང་ཡིན་ཏེ། དཔེར་ན། བདག་ཅག་གི་ཅ་ལག་གང་ཞིག་གནས་གང་ལ་བཞག་པ་བརྗེད་ཙ་ན། ཁོང་གིས་ལམ་སང་ཐུགས་ལ་འཆར་ཡོང་ཞིང་། གནས་ཚུལ་གང་བྱུང་ཐམས་ཅད་ཀྱི་ཞིབ་ཕྲའི་དུས་ཚོད་ཚུན་ཆད་ཀྱང་གསལ་པོར་དྲན་ཐུབ་པ་མ་ཟད། རྒྱུན་དུ་སྔགས་བཟླ་བ་དང་ཁ་ཏོན་འདོན་པ། རྩེ་གཅིག་ཏུ་ཉམས་ལེན་བྱེད་པ་ལ་ཐུགས་དགྱེས་པོ་ཡོད་པ་ལས། རང་བཞིན་གྱི་གཏམ་འཁྱར་སྨྲ་བ་སོགས་ལ་སྤྲོ་བ་ཁྱོན་ནས་མེད།

བདག་རང་ཉིད་ལ་མཚོན་ན། ཁོང་ནི་ཆོས་དང་འཇིག་རྟེན་གང་ཐད་ནས་ཀྱང་བཀའ་དྲིན་བླ་ན་མེད་པ་ཡིན་ཞིང། ད་ལྟ་ཡང་བླ་རུང་ལྔ་རིག་ནང་བསྟན་སློབ་གླིང་གི་དགེ་འདུན་པ་སྤྱིའི་རྡོ་རྗེ་སློབ་དཔོན་ཉིད་དུ་སྐུ་འཚོ་ཞིང་གཞེས་ལ། རྟག་ཏུ་དབང་ཁྲིད་གནང་བཞིན་བཞུགས་ཡོད། ཁོང་གི་སྐུ་ཚེ་བསྐལ་བརྒྱར་བརྟན་ཅིང་ཆོས་ཀྱི་འཁོར་ལོ་རྟག་ཏུ་བསྐོར་བའི་གསོལ་བ་ཡང་ཡང་འདེབས་པ་ལགས།

མཛེས་ལྗོངས་ལ་མྱོང་རོལ།

བླ་མ་མུ་མཚོས་དབང་གནང་བའི་རྗེས་སུ། བསོད་རྒྱལ་རིན་པོ་ཆེས་གདན་ཞུ་བྱས་པ་ལྟར། ཆོས་རྗེ་ཉིད་ལས་རབ་གླིང་གི་རྒྱབ་རིའི་རི་རྩེ་རུ་བསང་མཆོད་ལ་འབྱོན་པར་ཞལ་བཞེས་མཛད།

བདག་ཅག་རླངས་འཁོར་དུ་བསྡད་ནས་རི་རྩེར་སོང་བ་ན། དེར་གེ་སར་དང་རྟེན་འབྲེལ་ཉེས་སེལ་གྱི་དར་སོགས་དར་ཆ་མང་དུ་བཙུགས་ཡོད་པ་དང་། ལས་རབ་གླིང་ཆོས་ཚོགས་ཀྱི་སློབ་མ་རྣམས་དུས་ཆེན་ཁྱད་པར་ཅན་རྣམས་སུ་གནས་འདིར་ཡོང་ནས་རི་བསང་བྱེད་སྲོལ་ཡང་ཡོད་འདུག རི་རྩེ་འདི་ནི་ཧ་ཅང་ཁོད་ཡངས་ཤིང་ཕྱོགས་ཀྱི་རི་ལུང་ཐམས་ཅད་ཧྲིལ་གྱིས་མིག་འོག་ཏུ་ཆུད་པར་མ་ཟད། རྒྱང་ཐག་མི་རིང་བའི་སར་སི་ཕེན་དང་ཧྥ་རན་སིའི་རྒྱལ་མཚམས་ཀྱི་ཕི་རཱེ་ནེ་ཨོ་སིའི་རི་རྒྱུད་（Pyrenees）ཀྱང་གསལ་བོར་མཐོང་ཐུབ། ཁོང་ཚོས་ཆོས་རྗེ་ཉིད་ལ་ཉེ་འཁོར་གྱི་རི་རྒྱུད་དང་ཡོ་རོབ་ཀྱི་རྒྱལ་ཁབ་སོ་སོའི་གནས་ཕྱོགས་སོགས་ངོ་སྤྲོད་བྱས་པ་དང་། དེ་རྗེས་ཆོས་རྗེ་ཉིད་ཀྱིས་ཚང་མ་དང་མཉམ་དུ་དབྱངས་རྟ་ཧ་ཅང་སྙན་མོའི་སྒོ་ནས། རི་ཁྲུས་དང་བསང་མཆོད་ཀྱི་ཆོ་ག་རྒྱས་སྤྲོས་ཀྱི་ཚུལ་དུ་གསུངས་ཤིང་། བསྟན་པ་རིན་པོ་ཆེ་དར་ཞིང་རྒྱས་ལ། སེམས་ཅན་ཐམས་ཅད་བདེ་ཞིང་སྐྱིད་པའི་ཐུགས་སྨོན་རྒྱ་ཆེར་གནང་།

དེ་ནས་རི་ལས་བབས་ཏེ་གུང་ཚིགས་གསོལ་རྗེས། ཆོས་རྗེ་ཉིད་དེར་འཁོད་ཀྱི་བླ་མ་འགའ་དང་མཉམ་དུ་ཇ་ཁང་（Teahouse）ཞེས་པ་རུ་བྱོན། ཇ་ཁང་ཞེས་པ་ནི་བསོད་རྒྱལ་རིན་པོ་ཆེས་ནགས་གསེང་དུ་བསྐྲུན་པའི་ཤིང་ཁང་ཆུང་ཆུང་ཞིག་ཡིན་ལ། དེ་ཡང་ཁོང་གིས་ཆོས་ཁྲིད་གསུང་སའི་གུར་ཆེན་གྱི་འོག་ཕྱོགས་ཀྱི་འབབ་ཆུའི་བཞུར་སྒྲ་ལྷུང་ལྷུང་སྒྲོག་པའི་ལུང་ཁུག་ཏུ་གནས་ཡོད། དེར་བགྲོད་པར་རི་ལམ་ཀྱག་ཀྱོག་ཅིག་ལས་མེད་སྟབས་རླངས་འཁོར་ཐོན་ཐབས་མི་འདུག དེར་བརྟེན། བདག་ཅག་གིས་ཆོས་རྗེ་ཉིད་ཀྱི་ཕྱག་ནས་བསྐྱོར་ཏེ་ཡར་མར་གཉིས་ལ་བྱོན་པས། སྐུ་ལ་འོ་བརྒྱལ་ཅུང་ཟད་མྱོང་དགོས་པ་བྱུང་།

ཇ་ཁང་ཞེས་པ་དེར་ཐོན་པ་ན། ཆོས་རྗེ་ཉིད་ཀྱིས་ཁོར་ཡུག་གི་མཛེས་ལྗོངས་ལ་མྱོང་རོལ་གནང་བཞིན། གུ་རུ་རིན་པོ་ཆེ་དང་མཁན་པོ་བོ་དྷི་ས་ཏྭ་བོད་ཡུལ་དུ་བྱོན་ནས་ཆོས་གསུངས་པའི་སྐོར་དང་། ལས་རབ་གླིང་ཆོས་ཚོགས་ཀྱི་ད་ལྟའི་གནས་བབས་སོགས་ཡུན་རིང་དུ་བག་ཕེབས་ངང་གསུང་མོལ་ལྷོད་པོར་གནང་།

སེམས་ངོ་མཛུབ་ཚུགས་ཀྱི་མན་ངག

ཕྱི་དྲོར་ཇ་ཁང་ནས་ཕྱིར་ཕེབས་རྗེས་སློབ་ཚོགས་རྣམས་ལ་ཚིག་དོན་བཅུ་གཅིག་དང་ཀ་དག་ཁྲེགས་ཆོད་ཀྱི་སྐོར་འདི་ལྟར་གསུང་།

དེ་ལ་འདིར་གང་གསན་པར་བྱ་བའི་ཆོས་ནི། ཐེག་པ་ཐམས་ཅད་ཀྱི་རྩེ་རྒྱལ། དུས་གསུམ་སངས་རྒྱས་ཐམས་ཅད་ཀྱི་དགོངས་པ་མཐར་ཐུག འོད་གསལ་རྫོགས་པ་ཆེན་པོ་འདི་ཉིད་ནས་བརྩམས་ཏེ་ཚིག་ཁ་ཤས་ཤིག་ཁྱེད་རྣམས་ལ་ཞུ་བར་བྱེད་པ་ལ། དེང་སང་གི་དུས་སུ་དར་བའི་རྫོགས་པ་ཆེན་པོའི་བསྟན་པ་འདི་མིའི་ཡུལ་དུ་ཐོག་མར་རིག་འཛིན་དགའ་རབ་རྡོ་རྗེ་ལ་བཀའ་བབས། ཁོང་གིས་རྫོགས་པ་ཆེན་པོའི་ཆོས་ཐམས་ཅད་ཤོ་ལོ་ཀ་འབུམ་ཕྲག་དྲུག་ཅུ་རྩ་བཞི་རུ་བཀའ་བསྡུས་པར་མཛད། དེ་ཉིད་སློབ་དཔོན་འཇམ་དཔལ་བཤེས་གཉེན་གྱིས་ཕྱི་སེམས་སྡེ། ནང་ཀློང་སྡེ། གསང་བ་མན་ངག་གི་སྡེ་གསུམ་དུ་བསྡུས། མན་ངག་གི་སྡེ་དེ་ཉིད་ལ་ཡང་སློབ་དཔོན་ཤྲཱི་སེངྷས་ཕྱི་སྐོར་དང་། ནང་སྐོར། གསང་སྐོར། ཡང་གསང་སྙིང་ཐིག་གི་སྐོར་ཏེ་སྐོར་ཚོ་ཆེན་པོ་བཞི་རུ་བསྡུས། དེ་ཉིད་པཎྜི་ཏ་ཆེན་པོ་བི་མ་ལ་མི་ཏྲས་ཚེ་འདིར་གྲོལ་བའི་མན་ངག་ཐམས་ཅད་ལ་བཤད་བརྒྱུད་དང་། བར་དོ་རང་སྣང་གི་ཡེ་ཤེས་སུ་གྲོལ་བར་བྱེད་པའི་མན་ངག་ཐམས་ཅད་ལ་སྙན་བརྒྱུད་ཅེས་པའི་བཤད་ཐབས་རྣམ་པ་གཉིས་སུ་མཛད།

བོད་གངས་ལྗོངས་འདིར་བཤད་བརྒྱུད་དང་སྙན་བརྒྱུད་ཀྱི་ཆོས་ཚུལ་ཆེན་པོ་དེ་གཉིས་ཀྱང་། ཀུན་མཁྱེན་ཀློང་ཆེན་རབ་འབྱམས་ཀྱིས་མཛོད་ཆེན་བདུན་དང་ངལ་གསོ་སྐོར་གསུམ་ལ་སོགས་པར་རྒྱ་ཆེ་བ་པཎྜི་ཏའི་ལུགས་ཀྱི་བཤད་སྟངས་ལྟར་དང་། སྙིང་ཐིག་མ་གཉིས་བུ་གཉིས་ཀྱིས་ཟབ་པ་ཀུ་སཱ་ལིའི་བཤད་སྟངས་ལྟར་གཏན་ལ་ཕབ། དེ་ལྟ་བུའི་མན་ངག་གི་བརྒྱུད་པ་དེ་ལ་ཡང་ཡིག་ཆའི་དབང་དུ་བྱས་ན། དེང་སང་རྒྱུད་ལུང་མན་ངག་གསུམ་དུ་བཞུགས། རྒྱུད་ཀྱི་དབང་དུ་བྱས་ན། གཙོ་བོ་ཡང་ཟབ་སྙིང་པོའི་རྒྱུད་ཆེན་བཅུ་བདུན་དང་། ཀློང་གསལ་འབར་མའི་རྒྱུད་དང་བཅོ་བརྒྱད། བཀའ་སྲུང་ནག་མོ་ཁྲོས་མའི་རྒྱུད་དང་བཅུ་དགུ་སྟེ་རྒྱུད་རྣམ་པ་བཅུ་དགུར་བཞུགས། ལུང་གི་དབང་དུ་བྱས་ན། གསེར་ཡིག་ཅན་དང་། གཡུ་ཡིག་ཅན། དུང་ཡིག་ཅན། ཕྲ་ཡིག་ཅན་ཏེ་ཟབ་པ་པོད་བཞིར་བཞུགས་ཡོད་པ་ཡིན། མན་ངག་གི་དབང་དུ་བྱས་ན། མན་ངག་སྙིང་པོ་བརྒྱ་དང་བཅུ་དགུ་རུ་བཞུགས། དེ་དག་ཐམས་ཅད་ཀྱི་གནད་གཅིག་ཏུ་བསྡུས་ཏེ་ཉམས་སུ་ལེན་པའི་ཚུལ་ནི། ཀུན་མཁྱེན་ཆོས་ཀྱི་རྒྱལ་པོ་ཀློང་ཆེན་རབ་འབྱམས་ཀྱི་བླ་མ་ཡང་ཏིག་ཡིད་བཞིན་ནོར་བུར་ཆོས་སྡེ་ལྔ་བཅུ་ང་གཅིག་བཞུགས་པ་བཞིན་དུ་ཉམས་སུ་བླང་ན་ཆ་ཚང་ལ་མ་འདུས་པ་མེད་པ་ཡིན།

ཚིག་དོན་བཅུ་གཅིག

བླ་མ་ཡང་ཏིག་གི་མན་ངག་དེ་ཡང་རྒྱུད་གང་གི་རྗེས་སུ་འབྲངས་ནས་བཤད་པ་ཡིན་ཞེ་ན། གཙོ་བོ་མུ་ཏིག་ཕྲེང་བའི་རྒྱུད་ཀྱི་རྗེས་སུ་འབྲངས་ཏེ་ཚིག་དོན་རྣམ་པ་བཅུ་གཅིག་གི་སྒོ་ནས་བཤད་པ་ཡིན། ཚིག་དོན་བཅུ་གཅིག་དེ་གང་ཡིན་ཞེ་ན། གཞི་དང་འཁྲུལ་ཚུལ་ཁྱབ་ཚུལ་དང་། །གནས་དང་ལམ་དང་སྒོ་དང་ཡུལ། །ཉམས་ལེན་ཚད་དང་བར་མ་དོ། །གྲོལ་ས་ཉིད་དང་བཅུ་གཅིག་གོ །ཞེས་གསུངས་པ་ལྟར་ཡིན།

དེ་ཡང་ཚིག་དོན་དང་པོ་གཞི་ནི། ཐོག་མར་རྟོགས་ཏེ་སངས་རྒྱས་མ་བྱུང་། མ་རྟོགས་ཏེ་སེམས་ཅན་མ་བྱུང་བའི་སྔོན་རོལ་ན། གཞི་རང་གི་ངོ་བོ་ལུང་མ་བསྟན་དུ་བཞུགས། དེ་ཡང་ངོ་བོ་སྟོང་པ། རང་བཞིན་གསལ་བ། ཐུགས་རྗེའི་གདངས་འཆར་རུང་གི་ཚུལ་དུ་བཞུགས། དེ་ལ་ཡང་ཆ་ཤས་ཀྱིས་དབྱེ་ན་སྐུ་ལྔ་དང་། ཡེ་ཤེས་ལྔ། རླུང་ལྔ། མཁའ་འགྲོ་ལྔ། འོད་ལྔ་ལ་སོགས་པ་ལྔ་ཚན་ལྔའི་ཡོན་ཏན་དུ་མ་ཡང་ཡོད་པ་ཡིན།

ཚིག་དོན་གཉིས་པ་འཁྲུལ་ཚུལ་ནི། ངོ་བོས་གོ་ཕྱེས། རང་བཞིན་ཡུལ་དང་ཐུགས་རྗེ་སེམས་སུ་བཟུང་སྟེ། རྒྱུ་གསུམ་དང་རྐྱེན་བཞིའི་སྒོ་ནས་སེམས་ཅན་རྣམས་འཁོར་བའི་གནས་སུ་ལུ་གུ་རྒྱུད་དུ་འཁྱམས། དེ་ལས་རྒྱུ་གསུམ་ནི། བདག་ཉིད་གཅིག་པའི་མ་རིག་པ་དང་། ལྷན་ཅིག་སྐྱེས་པའི་མ་རིག་པ། ཀུན་ཏུ་བརྟག་པའི་མ་རིག་པ་སྟེ་གསུམ་གྱི་དབང་གིས་འཁྲུལ་བ་ཡིན། རྐྱེན་བཞི་ནི་བདག་པོའི་རྐྱེན་དང་། དམིགས་པའི་རྐྱེན། རྒྱུའི་རྐྱེན། དེ་མ་ཐག་པའི་རྐྱེན་ཏེ་བཞིའི་སྒོ་ནས་འཁྲུལ། གཞི་ལས་གཞི་སྣང་ཤར་བའི་གནས་སྐབས་ན། ཀུན་ཏུ་བཟང་པོས་གཞི་སྣང་ལ་རང་སྣང་དུ་ཤེས་པས་དེ་མ་ཐག་ཏུ་གྲོལ། གྲོལ་ཚུལ་དེ་ལའང་ཁྱད་ཆོས་དྲུག་གམ་དེ་ཡང་བསྡུ་ན་གསུམ་དུ་ཡོད། ཁྱད་ཆོས་རྣམ་པ་གསུམ་པོ་དེ་གང་ཡིན་ཞེ་ན། རྒྱུ་ལས་མ་བྱུང་བའི་འབྲས་བུ། ལུང་ལས་མ་བྱུང་བའི་མན་ངག སེམས་ལས་མ་བྱུང་བའི་སངས་རྒྱས་ཏེ་རྣམ་པ་གསུམ་གྱི་སྒོ་ནས་གྲོལ་བར་གྱུར་བ་ཡིན།

ཚིག་དོན་གསུམ་པ་ཁྱབ་ཚུལ་ནི། དེ་ལྟར་འཁོར་འདས་ཀྱི་སྣང་བ་མུ་མེད་པ་ཞིག་ཤར་ཡང་བདེ་བར་གཤེགས་པའི་རང་བཞིན་ཅན་ལས་གཞན་དུ་གཡོས་མ་མྱོང་བ་སྟེ། དེ་ཡང་མདོ་ཕར་ཕྱིན་ཐེག་པའི་དབང་དུ་བྱས་ན། བཀའ་འཁོར་ལོ་ཐ་མའི་སྙིང་པོ་བསྟན་པའི་མདོ་བཅུ་དང་། དེ་དག་གི་དགོངས་པ་འགྲེལ་བར་བྱས་པ་ལ་རྒྱལ་ཚབ་བྱམས་པ་མགོན་པོའི་རྒྱུད་བླ་མར་དཔེ་དགུ་དོན་དགུ་དང་། མགོན་པོ་ཀླུ་སྒྲུབ་ཀྱིས་ཆོས་དབྱིངས་བསྟོད་པ་ལས་དཔེ་དྲུག་དང་དོན་དྲུག་གིས་གཏན་ལ་ཕབ། སྔགས་རྡོ་རྗེ་ཐེག་པའི་དབང་དུ་བྱས་ན། སྒྱུ་འཕྲུལ་གསང་བའི་སྙིང་པོ་དང་སངས་རྒྱས་མཉམ་སྦྱོར་གྱི་རྒྱུད་ཀྱི་རྗེས་སུ་འབྲངས་ཏེ། རོང་ཟོམ་ཆོས་ཀྱི་བཟང་པོས་སྣང་བ་ལྷ་རུ་སྒྲུབ་པ་དང་ཡུལ་ཅན་ཡེ་ཤེས་སུ་སྒྲུབ་པ། གཞན་ཡང་ཀུན་མཁྱེན་ཆེན་པོའི་ལེགས་བཤད་མང་པོ་ལས་གསུངས་པ་བཞིན་དུ་ཤེས་དགོས་པ་ཡིན།

ཚིག་དོན་བཞི་པ་ཡེ་ཤེས་ཀྱི་གནས་ནི། རིག་པ་རང་བྱུང་གི་ཡེ་ཤེས་དེ་གང་ལ་གནས་ན། དངོས་ནི་ཙིཏྟ་རིན་པོ་ཆེ་ཟུར་བརྒྱད་པ་ལ་གནས། དེའི་གདངས་ནི་དུང་ཁང་བྷནྡྷའི་གཞལ་ཡས་དང་། ལྟ་བྱེད་མིག་གི་གཞལ་ཡས་དང་། འགྱུ་བྱེད་རྩ་ཡི་གཞལ་ཡས་ཏེ་གཞལ་ཡས་ཆེན་པོ་བཞི་ལ་བཞུགས། དེ་ཡང་སྙིང་ཁ་རིན་ཆེན་གྱི་གཞལ་ཡས་ན་ཞི་བ་སྐུའི་བདག་ཉིད་ཅན་དུ་བཞུགས་ཡོད། དུང་ཁང་བྷནྡྷའི་གཞལ་ཡས་ན་ཁྲོ་བོ་ལྷ་ཚོགས་ཀྱི་ཚུལ་དུ་བཞུགས་ཡོད། ལྟ་བྱེད་མིག་གི་གཞལ་ཡས་ན་ཟེར་གྱི་ཚུལ་དུ་བཞུགས་ཡོད། འགྱུ་བྱེད་རྩ་ཡི་གཞལ་ཡས་ན་འོད་ཀྱི་རང་བཞིན་ཅན་དུ་བཞུགས་ཡོད་པ་ཡིན།

ཚིག་དོན་ལྔ་པ་ཡེ་ཤེས་ཀྱི་ལམ་ནི། རྩ་ཀ་ཏི་ཤེལ་གྱི་སྦུ་གུ་ཅན་ཡལ་ག་གཉིས་སུ་གྱེས་པ་ཕྲ་ལ་འཁྲིལ་བ་དང་། དར་དཀར་སྣལ་མ་བཞིན་དུ་མིག་གཡས་གཡོན་གཉིས་ལ་ཟུག་པ་ལས་བརྒྱུད་དེ་འཆར།

དྲུག་པ་སྒོ་གང་ལ་འཆར་ན། ཆུ་བུར་གྱི་མིག་འདི་ཡི་དབུས་ན་རྩ་བ་ཕྲ་ལ། རྩེ་མོ་ཆེ་བ། བ་མེན་གྱི་རྭ་ལྟ་བུ་འོད་དྭངས་ལ་གསལ་བ་རྒྱང་ཞགས་ཆུ་ཡི་སྒྲོན་མ་ཞེས་བྱ་བ་དེ་ཉིད་ཀྱི་སྒོ་ནས་འཆར།

བདུན་པ་ཡུལ་གང་ལ་འཆར་ན། ནམ་མཁའ་རྐྱེན་བྲལ་ལ། ཆོས་སྐུའི་རྟེན་ཉི་མ་དང་། ལོངས་སྐུའི་རྟེན་ཟླ་བ། སྤྲུལ་སྐུའི་རྟེན་མར་མེ་དག་ལ་བརྟེན་ནས་དང་པོའི་དུས་སུ་འཆར་ལ། དེ་ཡང་དབྱིངས་རྣམ་དག་གི་སྒྲོན་མ་མཐིང་དབྱིངས་ཁྱབ་པ་ཆེན་པོ་འོད་ལྔའི་མུ་ཁྱུད་ཅན་དང་། ཐིག་ལེ་སྟོང་པའི་སྒྲོན་མ་བཀོད་མའི་ཆུ་ལ་རྡོ་བསྐྱུར་བ་ལྟ་བུ་ཕྱི་ནང་རིམ་པ་ཅན་དུ་སྣང་བ་དང་། རིག་གདངས་རྡོ་རྗེ་ལུ་གུ་རྒྱུད་གསེར་གྱི་སྐུད་པ་ལ་ཤེལ་ཕྲེང་གིས་བརྒྱན་པ་ལྟ་བུར་སྣང་།

ཚིག་དོན་བརྒྱད་པ་ཉམས་སུ་ལེན་སྟངས་ནི། གཞི་ཀ་དག་གིས་བཟུང་ན་ལམ་ཁྲེགས་ཆོད་ཀྱིས་བསྐྱངས་ཏེ་འབྲས་བུ་རྡུལ་ཕྲན་དུ་དེངས་བ་དང་། གཞི་ལྷུན་གྲུབ་ཀྱིས་བཟུང་ན་ལམ་ཐོད་རྒལ་གྱིས་བསྐྱངས་ཏེ་འབྲས་བུ་འོད་སྐུ་རུ་གྲོལ་དགོས་པ་ཡིན།

ཚིག་དོན་དགུ་པ་གོམས་པའི་ཚད་ནི། ཆོས་ཉིད་མངོན་སུམ་དང་། ཉམས་གོང་འཕེལ། རིག་པ་ཚད་ཕེབས། ཆོས་ཉིད་ཟད་ས་སྟེ་རྣམ་པ་བཞི་ཡིས་འཛིན།

ཚིག་དོན་བཅུ་པ་བར་དོའི་མན་ངག་ནི། གསང་སྐོར་མན་ཆོད་ཀྱི་བཤད་ཚུལ་གྱི་དབང་དུ་བྱས་ན་བར་དོ་དྲུག་དང་། ཡང་གསང་སྙིང་ཐིག་གི་བཤད་ཚུལ་ཐུན་མོང་མ་ཡིན་པའི་དབང་དུ་བྱས་ན་བར་དོ་རྣམ་པ་བཞི་ཡོད་ཅིང་། དེ་ལ་ཡང་ཞིབ་ཕྲའི་སྒོ་ནས་བཤད་ན། པད་འབྱུང་དང་བི་མ་གཉིས་ལ། ས་མཚམས་འཇོག་ཚུལ་ཅུང་མི་འདྲ་བ་ཡོད་ཀྱང་། སྤྱིར་བཤད་ན་རང་བཞིན་གྱི་བར་དོ་དང་། འཆི་ཁའི་བར་དོ། ཆོས་ཉིད་བར་དོ། སྲིད་པ་བར་དོ་སྟེ་རྣམ་པ་བཞི་རུ་འདུ། དེ་ཡང་རང་བཞིན་གྱི་བར་དོར་ཐོས་བསམ་ལ་སྒྲོ་འདོགས་ཆོད་པ་ཐི་བྱ་ཚང་ལ་འཇུག་པ་ལྟ་བུའི་གདམས་པ་དྲན་པ། འཆི་ཁའི་བར་དོར་མི་གསལ་བ་ལ་གསལ་འདེབས་པ་སྒེག་མོ་ལ་མེ་ལོང་བསྟན་པ་ལྟ་བུའི་གདམས་པ་དྲན་པ། ཆོས་ཉིད་ཀྱི་བར་དོར་རང་སྣང་དུ་ཡིད་ཆེས་པ་མ་པང་དུ་བུ་འཇུག་པ་ལྟ་བུའི་གདམས་པ་དྲན་པ། སྲིད་པའི་བར་དོར་ལས་བཟང་པོས་འཕྲོ་མཐུད་པ་ཡུར་བ་རྐང་ཆད་པ་ལ་ཝ་འཛུགས་པ་ལྟ་བུའི་གདམས་པ་དྲན་པར་བྱ་བ་དེ་དག་ཡིན།

ཚིག་དོན་བཅུ་གཅིག་པ་གྲོལ་ས་ནི། ཡང་དག་པར་རྫོགས་པའི་སངས་རྒྱས་དང་། མངོན་པར་རྫོགས་པའི་སངས་རྒྱས་ཏེ། རྣམ་པ་གཉིས་གང་རུང་དུ་གྲོལ་བར་འགྱུར་བ་ཡིན།

ཚིག་དོན་བཅུ་གཅིག་པོ་དེ་དག་གིས་རྫོགས་པ་ཆེན་པོའི་རྒྱུད་ལུང་མན་ངག་གི་གནད་མཐའ་དག་ཡོངས་སུ་རྫོགས་པ་བསྡུས་ལ། དེ་དག་ཀུན་ཀྱང་པདྨ་སཾ་བྷ་ཝས་བསམ་ཡས་མི་འགྱུར་ལྷུན་གྱིས་གྲུབ་པའི་གཙུག་ལག་ཁང་གི་བར་ཁང་གཡུ་ཞལ་འབར་བ་རུ། སྔགས་པ་རྡོ་རྗེ་བདུད་འཇོམས་ལ་ཇི་ལྟར་གནང་བའི་ཚུལ་མདོར་བསྡུས་ཏེ་བཤད་པ་ཡིན་ལ། དེ་དག་ཐམས་ཅད་ཀྱང་ཕལ་ཆེར་རྒྱ་ཆེ་བ་པཎྜི་ཏའི་ལུགས་ཀྱི་བཤད་སྟངས་རེད། དེ་རིང་ཐད་ཀར་འུ་ཅག་ལ་གོ་རྒྱུ་ཆེན་པོ་ཞིག་མེད་ཀྱང་། ངས་རྟེན་འབྲེལ་གྱི་དབང་གིས་རྫོགས་པ་ཆེན་པོའི་རྒྱུད་མཐའ་དག་གི་གནད་མདོར་བསྡུས་པ་ཙམ་ཞིག་ལས་རབ་གླིང་པའི་ཆོས་ཚོགས་ཀྱི་གདན་ས་འདི་ཉིད་ནས་བཤད་པ་ཡིན།

ཀ་དག་ཁྲེགས་ཆོད།

ད་སྐབས་སུ་བབས་པའི་སྙིང་དོན་དངོས་ནི། བསོད་རྒྱལ་རིན་པོ་ཆེས་ཀ་དག་ཁྲེགས་ཆོད་ཀྱི་ལྟ་བ་དེ་མདོར་བསྡུས་ཤིག་བཤད་དགོས་ཞེས་གསུངས་པས་དེ་མདོར་བསྡུས་པ་ཙམ་ཞིག་ཞུ་རྒྱུ་ཡིན། ཁྲེགས་ཆོད་དེ་ཡང་རིག་འཛིན་སོ་སོའི་དགོངས་པའི་གནད་གཅིག་ཡིན་ཡང་སོ་སོར་བཤད་སྟངས་མི་འདྲ་བ་ཡོད་དེ། རིག་འཛིན་དགའ་རབ་རྡོ་རྗེས་ངོ་རང་ཐོག་ཏུ་སྤྲད་པ་དང་། ཐག་གཅིག་ཐོག་ཏུ་བཅད་པ། གདེང་གྲོལ་ཐོག་ཏུ་བཅའ་བ་སྟེ་ཚིག་གསུམ་གྱི་གནད་དུ་བརྡེག་ནས་གསུངས། དེ་ནས་རྒྱ་ནག་པོའི་སློབ་དཔོན་ཤྲི་སིངྷས་ཆོས་ཟད་ཀ་དག་ཆེན་པོར་ལ་བཟླ་བ་དང་། བྱ་བྲལ་ཟང་ཐལ་རྗེན་པར་འགག་བསྡམ་པ། ཡོངས་གྲོལ་མཉམ་པ་ཆེན་པོར་ཆིངས་སུ་བཅིངས་བ་སྟེ་རྣམ་པ་གསུམ་གྱི་སྒོ་ནས་གསུངས། པདྨ་ཀ་རས་ངོ་བོ་སྟོང་པ་ཆོས་སྐུ་རུ་ངོ་སྤྲད། རང་བཞིན་གསལ་བ་ལོངས་སྐུ་རུ་ངོ་སྤྲད། ཐུགས་རྗེ་ཀུན་ཁྱབ་སྤྲུལ་སྐུ་རུ་ངོ་སྤྲད་དེ་གཏན་ལ་འབེབས་པར་བྱེད། ཛྙཱ་ན་སུ་ཏྲའི་བཞག་ཐབས་ཀྱི་མན་ངག་ཅེས་བྱ་བ་སྟེ། ལྟ་བ་ཅོག་བཞག་དང་། སྒོམ་པ་ཅོག་བཞག སྤྱོད་པ་ཅོག་བཞག འབྲས་བུ་ཅོག་བཞག་སྟེ་རྣམ་པ་བཞིའི་སྒོ་ནས་གཏན་ལ་འབེབས་པར་བྱེད། ཀུན་མཁྱེན་ཀློང་ཆེན་རབ་འབྱམས་ལ་སྤྱིར་བཤད་སྟངས་མང་དུ་ཡོད་ཀྱང་། ཁྱད་པར་དུ་གནས་ལུགས་རིན་པོ་ཆེའི་མཛོད་ཀྱི་དབང་དུ་བྱས་ན། མེད་པ་དང་། གཅིག་པུ། ཕྱལ་བ། ལྷུན་གྲུབ་སྟེ་བཞིའི་སྒོ་ནས་གཏན་ལ་འབེབ་པར་བྱེད་པ་ཡིན། དཔལ་རོང་ཟོམ་མ་ཧཱ་པཎྜི་ཏས་རྫོགས་པ་ཆེན་པོའི་དོན་ཤེས་བཞིན་ཆེན་པོའི་སྣོད་ཀྱིས་ཟིན་པ་དང་། བཏང་སྙོམས་ཆེན་པོའི་ངང་དུ་གནས་པ་སྟེ་ཚིག་རྣམ་པ་གཉིས་ཀྱི་སྒོ་ནས་རྫོགས་པ་ཆེན་པོའི་རྒྱུད་ལུང་མན་ངག་གི་གནད་མཐའ་དག་བསྡུས་ཏེ་སྟོན་པར་མཛད་པ་ཡིན།

དེ་ལྟ་བུའི་རིག་འཛིན་བརྒྱུད་པ་དང་བཅས་པའི་མན་ངག་ཐམས་ཅད་ཀྱི་གནད་གཅིག་ཏུ་བསྡུས་པ་ཀུན་མཁྱེན་མི་ཕམ་རྒྱ་མཚོའི་རྗེས་སུ་འབྲངས་ཏེ་མདོར་བསྡུས་པའི་ཚིག་གཅིག་ཞུ་བ་ལ། དེ་ཡང་བླ་མའི་ལག་ཁྲིད་ཀྱི་དབང་དུ་བྱས་ན། ཞི་གནས་སྒོ་ཅན་གྱི་ཁྲིད་དང་ལྷག་མཐོང་སྒོ་ཅན་གྱི་ཁྲིད་དེ་ཁྲིད་སྟངས་རྣམ་པ་གཉིས་ཡོད་པ་སྟེ། ཞི་གནས་སྒོ་ཅན་གྱི་ཁྲིད་ནི་སྒོམ་ཐོག་ནས་ལྟ་བ་འཚོལ་བ་ཞེས་ཕྱག་ཆེན་དང་ཆ་འདྲ་བའི་བཤད་སྲོལ་ཞིག་དང་། ལྷག་མཐོང་སྒོ་ཅན་གྱི་ཁྲིད་ནི་ལྟ་ཐོག་ནས་སྒོམ་པ་འཚོལ་བ་ཞེས་རྫོགས་ཆེན་སྤྱི་ཁྱབ་ཀྱི་འགྲོ་ལུགས་དང་མཚུངས་པ་ཞིག་ཡིན། དེ་ཡང་ལྷག་མཐོང་སྒོ་ཅན་གྱི་ཁྲིད་དེ། ངོ་བོ་སྟོང་པའི་ལྟ་བ་རྩལ་དུ་བཏོན་པ་དེ་ནི། ཀུན་མཁྱེན་རོང་ཟོམ་ཆོས་བཟང་རྗེས་འབྲང་དང་བཅས་པ་ཐམས་ཅད་ཀྱིས་གཏན་ལ་འབེབ་སྟངས་ཡིན། དེ་ནས་རང་བཞིན་གསལ་བའི་ཡེ་ཤེས་རྩལ་དུ་བཏོན་པ་དེ་ནི། ཀུན་མཁྱེན་ཀློང་ཆེན་རབ་འབྱམས་རྗེས་འབྲང་དང་བཅས་པས་དེང་སང་གི་བར་དུ་གཏན་ལ་འབེབས་སྟངས་གཙོ་བོ་ཡིན། ཀུན་མཁྱེན་མི་ཕམ་རྒྱ་མཚོས་རོང་ཀློང་རྣམ་གཉིས་ཀྱི་དགོངས་པ་ཆུ་བོ་གཅིག་འདྲེས་སུ་སྦྱར་ཏེ་གཏན་ལ་འབེབས་པར་བྱེད་པ་ཡིན།

དེ་ལ་ཀུན་མཁྱེན་མི་ཕམ་རྒྱ་མཚོའི་གསུང་རྒྱ་ཆེ་ན་ཡང་། ཡོངས་རྫོགས་ཀྱི་གནད་བསྡུ་ན་རང་ངོ་ཤེས་པ་དང་། རང་བབས་སུ་བཞག་པ་ཞེས་པའི་ཚིག་འདི་གཉིས་མ་གཏོགས་གཞན་པའི་རྫོགས་ཆེན་གྱི་གནད་བཤད་རྒྱུ་མེད་པར་དེའི་ནང་དུ་འདུ་བ་ཡིན། དེ་ཡང་གང་ལ་ཟེར་ན། སེམས་འདི་གནས་ཀྱང་རུང་འགྱུ་ཡང་རུང་། རང་གི་སེམས་ཀྱི་ངོ་བོ་ལ་ལྷན་ནེར་བལྟས་པའི་ཚེ་ན། སེམས་འདི་ཕྱི་ནང་བར་གསུམ་གང་དུ་ཡང་མ་གྲུབ་པའི་བར་སྣང་སྟོང་པ་ནམ་མཁའ་ལྟ་བུར་ངོ་ཤེས་པ་འདི་ལ་རང་ངོ་ཤེས་པ་ཞེས་བྱ། སེམས་སྟོང་ཉིད་སྐྱེ་བ་མེད་པར་ངོ་ཤེས་པ་དེའང་རིག་བྱ་རིག་བྱེད་གཉིས་སུ་མེད་ཀྱང་། རང་གི་རང་བཞིན་ལ་རང་གིས་ཁོ་ཐག་ནང་ནས་ཆོད་པ་ཉིན་པར་མིག་ལྡན་གྱིས་གཟུགས་ལ་བལྟས་པ་ལྟ་བུའི་ལྟ་བ་མངོན་དུ་གྱུར་བ་དེ་ནི་རང་བབས་སུ་བཞག་པ་ཡིན། དེ་ཡང་སྐྱེ་མེད་དུ་ཤེས་པ་དང་རང་ངོ་རང་གསལ་དུ་ཤེས་པ་གཉིས་ལ་ནི་རང་བཞིན་སྐྱོང་བའི་ལྟ་བ་ཞེས་བྱ།

སྒོམ་པའི་ཚེ་ན་སྐྱེ་མེད་ཀྱི་ངང་མ་ཤོར་བར་གནས་པ་དང་རྣམ་རྟོག་གི་འགྱུ་བ་གང་ཡང་མེད་པའི་ངང་དུ་འཇོག་པ་སྟེ། སྐྱེ་མེད་དུ་ཤེས་པ་དེ་ལ་སྔར་རོང་ཟོམ་ཆོས་བཟང་གིས་ཤེས་བཞིན་ཆེན་པོའི་སྣོད་ཀྱིས་ཟིན་པ་ཞེས་དང་། རྣམ་རྟོག་གི་བྱ་ར་གང་ཡང་མ་ཞུགས་པར་དེའི་རང་ངོ་ཤེས་བཞིན་པའི་ངང་དུ་འཇོག་པ་དེ་ལ། བཏང་སྙོམས་ཆེན་པོའི་ངང་དུ་གནས་པ་ཞེས་པ་དེར་སྒོམ་པ་ཞེས་བྱ་བ་ཡིན།

སྤྱོད་པ་ནི། རྣམ་རྟོག་བཟང་ངན་གང་ཤར་ཡང་དེའི་ངོ་བོ་ལ་མི་བལྟ། རྗེས་སུ་མི་འབྲང་། གཉེན་པོས་རྡུང་རྡེག་མི་བྱེད་པ། རིག་པ་ཁོ་རང་གིས་རང་ས་བཟུང་ནས་རྒྱུན་སྐྱོང་བར་བྱེད་པ་དེ་ནི་རང་ངོ་ཤེས་པ་དང་རང་བབས་སུ་འཇོག་པའི་མན་ངག་ཡིན།

དེ་གཉིས་ཀྱི་རྩལ་རྫོགས་པ་འབྲས་བུའི་གནས་སྐབས་ན་ནི། ཆོས་སྐུ་དང་གཟུགས་ཀྱི་སྐུ་རྣམ་པ་གཉིས་ཡོངས་སུ་འགྲུབ་པར་འགྱུར་ལ། ཡང་ན་མན་ངག་གཞན་གྱི་སྒོ་ནས་ངོ་སྤྲོད་གནད་བསྡུས་བྱས་ན། རྫོགས་པ་ཆེན་པོའི་ལྟ་བ་ཞེས་པ་དེ་སྐྱེ་མེད་དུ་ཤེས་པ་ལ་ཟེར། སྐྱེ་མེད་ཅེས་པ་ལ་ཅང་མི་ཤེས་རྒྱུ་མེད། རང་གི་སེམས་ལ་ལྟོས་དང་སེམས་འདི་འཕྲོ་རུང་གནས་རུང་གཞི་གཏན་ནས་གྲུབ་མ་མྱོང་བ་དཔེར་ན་མེ་ལོང་ནང་གི་གཟུགས་བརྙན་འདྲ་ཞིག་ཡིན་པ་ཧ་གོ་ན། དེའི་མིང་ལ་ལྟ་བ་ཞེས་བྱ། འདི་ལ་ཧ་མི་གོ་རྒྱུ་རྩ་བ་ནས་ཡོད་པ་མ་རེད། རྡོ་གྲུབ་བསྟན་པའི་ཉི་མས། ཁ་ནང་དུ་ལོག་ཙམ་པའི་མཚམས་ནས་རྙེད་པར་གསུངས་པ་ཡིན། དེའི་རྗེས་ནས་བཙལ་དགོས་དུས་གཏན་ནས་རྙེད་རྒྱུ་མེད་པ་དཔེར་ན་ཆུ་ནང་དུ་ཟླ་གཟུགས་ཤར་བའི་ཚེ་ལྟ་དགོས་པ་མ་གཏོགས། ཟླ་གཟུགས་གར་ཡོད་དབྱུག་པས་དཀྲུག་ན་གཏན་ནས་མི་འཆར་བ་ལྟ་བུ་རེད། ཁྱེད་རྣམས་ཀྱིས་ནང་དུ་སེམས་ཀྱིས་སེམས་ལ་ལྟོས་དང་། སེམས་ཁོ་རང་ཡེ་ནས་མ་གྲུབ་པ་ཞིག་ཡིན་པ་དེ་རིག་པ་ཡིན། སླར་ཡང་སེམས་ཀྱིས་སེམས་ལ་ལྟོས་དང་། སེམས་ཀྱི་ངོ་བོ་དེ་ཅི་འདྲ་ཞིག་ཡིན་མཐོང་ཡོང་རྒྱུ་རེད། སེམས་ཀྱི་ངོ་བོ་ས་ལེ་བ་མཐོང་ན་དེའི་མིང་ལ་རིག་པའང་ཟེར་བ་ཡིན། དེ་ལས་གཞན་པའི་རིག་པ་ཞིག་མེད། རང་བབས་སུ་བཞག་པའི་སེམས་ལ་ལྟོས་དང་། སྒྲོ་མ་བཏགས་ལ་སྐུར་བ་མ་བཏབ་པར་ད་ལྟའི་སེམས་འདི་ཅི་འདྲ་ཞིག་ཡིན་ན་དེ་ལ་རིག་པ་ཟེར་བ་ཡིན། ཨོ་རྒྱན་ཆེན་པོས་ཀྱང་། ད་ལྟའི་ཤེས་རིག་མ་འགགས་ས་ལེ་བ། །ཀུན་བཟང་གདོད་མའི་མགོན་པོ་དེ་ཀའོ། །ཅིར་ཡང་མ་གྲུབ་སྟོང་དབྱིངས་ཀུན་བཟང་མོ། །དེ་ཉིད་རྟོགས་ན་སྐད་ཅིག་རྫོགས་སངས་རྒྱས། །ཞེས་གསུངས་པས། རང་གི་སེམས་ཀྱིས་སེམས་ལ་ལྟོས་དང་ཕྱི་ནང་བར་གསུམ་གང་དུ་ཡང་མ་གྲུབ་པའི་ཆ་དེ་ལ་ཡུམ་ཀུན་ཏུ་བཟང་མོ་ཞེས་པའི་ཐ་སྙད་བཏགས། སྟོང་བཞིན་དུ་ཡང་སྣ་ཚོགས་སུ་འགྱུ་བའི་རྩལ་མི་འགག་པ་དེ་ལ་ནི་ཡབ་ཀུན་ཏུ་བཟང་པོ་ཞེས་ཟེར་བ་ཡིན། དེ་གཉིས་དབྱེར་མེད་པའི་རང་བཞིན་ཅན་དུ་ངོ་ཤེས་པར་གྱུར་ན། སྐད་ཅིག་དེ་ལ་རྫོགས་པའི་སངས་རྒྱས་ཀྱི་གོ་འཕང་འཐོབ་པར་འགྱུར་ཞེས་གསུངས་ཡོད། དོན་ངོ་མར་དེ་ལྟ་བུ་ཡིན་ཡང་། དེ་འདྲའི་སླ་མོ་ཞིག་ཡིན་ནམ། དེ་ལས་ཅུང་ཟད་དཀའ་མོ་ཞིག་ཨེ་ཡོད་བསམ་པ་དེ་གོལ་ས་ཡིན། བླ་མ་མི་ཕམ་གྱིས། སླ་བས་ཡིད་མ་ཆེས་པ་སེམས་ཀྱི་གསང་། །བླ་མའི་མན་ངག་སྟོབས་ཀྱིས་མཐོང་གྱུར་ཅིག །ཅེས་གསུངས་པས། ཧ་ཅང་སླ་མོ་ཞིག་ཡིན་པས་ཡིད་མི་ཆེས་པ་དེ་ནི་བླ་མའི་གསུང་གི་སྟེང་ནས་ཐག་བཅད་དེ་ངོ་ཤེས་དགོས་པ་ཡིན། དེའི་ངང་དུ་རྟག་ཏུ་རྒྱུན་སྐྱོང་པ་དེ་ལ་སྒོམ་པ་ཞེས་བྱ།

སྒོམ་པའི་སྐབས་སུ་དེའི་ངང་མི་བརྗེད་པར་འདུག་པ་མ་གཏོགས་སྒོམ་འོང་རྒྱུ་ཞིག་མེད་དེ། བདུད་འཇོམས་གླིང་པའི་ཞལ་ནས། སྒོམ་པའི་ཚེ་ན་ཅི་ཡང་མི་བསྒོམ་པར། །ནམ་མཁའ་མིག་གིས་མ་བོར་ཙམ་གྱིས་ཆོག །ཅེས་གསུངས།

སྤྱོད་པ་ནི། བོགས་འདོན་ཆེད་རྩལ་སྦྱོང་བའི་མིང་ལ་ཟེར། དེ་ཡང་རྣམ་རྟོག་གང་ཤར་ན་དགའ་སྡུག་གང་ཡང་མེད་པར་རྒན་པོས་བུ་ཆུང་གི་རྩེད་མོ་ལ་བལྟས་པ་ལྟ་བུ་དགོས་ཏེ། རིག་པ་ཁོ་རང་གིས་རང་ས་འཛིན་པ་མ་གཏོགས་རྣམ་རྟོག་བཟང་ངན་ལ་དགའ་སྡུག་མི་བྱེད་པ་དེ་ཡིན།

འབྲས་བུ་ནི། ད་ལྟར་རིག་པ་མ་ཡིན་པའི་ཆོས་ཤིག་མེད་ཀྱང་། རིག་པའི་རྩལ་ལས་ཤར་བའི་རྣམ་རྟོག་གི་རྗེས་སུ་འབྲངས་པས། ནམ་ཞིག་ན་རིག་པ་ཁོ་རང་གིས་རང་ས་ཟིན་ནས་རྣམ་རྟོག་གང་གིས་ཀྱང་བསྐྱོད་དུ་མེད་པར་གྱུར་བའི་གནས་སྐབས་ན་འབྲས་བུའི་རྩལ་རྫོགས་པ་ཞེས་བྱ། དེར་ང་ལ་བཤད་སྟངས་གཉིས་ཡོད་དེ། སྐབས་རེར་རྫོགས་ཆེན་ལས་སླ་ཞིག་དང་སྐྱིད་ཅིག་མི་འདུག་སེམས་པར་བྱེད་པའི་བཤད་སྟངས་ཤིག་དང་། སྐབས་རེར་རྫོགས་པ་ཆེན་པོ་ལོ་ནས་ལོ་དང་བསྐལ་པ་ནས་བསྐལ་པའི་བར་དུ་བསྒོམས་ཀྱང་ཤེས་ཐུབ་རྒྱུ་མ་རེད་སྙམ་པ་གཉིས་ལས། དེ་རིང་ཁྱེད་རྣམ་པ་ལ་དང་པོའི་དབང་དུ་བྱས་ཏེ་བཤད་པ་ཡིན། དེས་ནི་ཁྱེད་རྣམས་ལ་རྫོགས་པ་ཆེན་པོའི་ཆོས་ཡོངས་སུ་རྫོགས་པ་ཐོབ་པ་ཡིན།

མཇུག་སྡུད་དུ་ཁྱེད་རྣམ་པ་ལ་སྤྲོ་བ་བསྐྱེད་པའི་ཆེད་དུ་ཀུན་མཁྱེན་བླ་མའི་ལུང་གཉིས་འདྲེན་ན། ཀུན་མཁྱེན་ཀློང་ཆེན་པས་ཐེག་མཆོག་རིན་པོ་ཆེའི་མཛོད་དུ། འུ་བུ་ཅག་དཔོན་སློབ་རྣམས་ཆོས་ཅན། བསྐལ་པ་གྲངས་མེད་མང་པོར་ཚོགས་བསགས་སྒྲིབ་པ་སྦྱངས་བ་ཡིན་ཏེ། ཀུན་བཟང་ཐུགས་ཀྱི་བསྟན་པ་དང་འཕྲད་པའི་ཕྱིར། ཞེས་འུ་ཅག་གིས་དེ་སྔ་ཡན་ཆོད་ཀྱི་བསྐལ་པ་མང་པོ་ཞིག་ལ་ཚོགས་བསགས་སྒྲིབ་པ་སྦྱངས་ནས། ད་རེས་རྫོགས་ཆེན་གྱི་བསྟན་པ་དང་འཕྲད་པ་ཡིན་པས་དགའ་སྤྲོ་ཆེན་པོ་སྐྱེས་ཨེ་བྱུང་། ཡང་འོ་སྐོལ་དཔོན་སློབ་ཆོས་ཅན། ཚེ་འདིའམ་བར་དོའམ་རང་བཞིན་སྤྲུལ་སྐུའི་ཞིང་གང་རུང་དུ་མྱུར་དུ་སངས་རྒྱས་འགྲུབ་ངེས་པ་ཡིན་ཏེ། སངས་རྒྱས་འགྲུབ་ངེས་ཀྱི་རྒྱུ་ནུས་པ་ཐོགས་མེད་བསྟན་པ་དག་པ་འབྲས་བུའི་ཐུས་ཀ་དང་ཕྲད་ནས་དེ་ལ་མོས་པས་སྤྱོད་པ་ཡིན་པའི་ཕྱིར། ཞེས་ཁོང་གིས་གསུངས་པ་དེ་ཡང་གཏན་ཚིགས་ཡང་དག་གམ་འཁྲུལ་བ་མེད་པ་ཞིག་ཡིན། ཚང་མས་བླ་མ་ལ་འགལ་བ་འགྲོ་རུ་མ་འཇུག ཆོས་ལ་ལོག་ལྟ་མ་སྐྱེ་དང་། ངེས་པར་དུ་རབ་ན་ཚེ་འདི་དང་མིན་ན་ཡང་ཤི་ནས་ཅུང་ཙམ་ནས་སངས་རྒྱས་པ་ལ་གཏན་ནས་བསླུ་བ་ཡོད་པ་མ་ཡིན། དེས་ན་འུ་ཅག་སྐལ་བ་བཟང་པོ་རེད། དེ་ནི་དཔལ་སྤྲུལ་ཚང་གིས། དབེན་པའི་རྣལ་འབྱོར་སྨྱོན་པ་རྒྱལ་ཁམས་ཀྱི་གཅེས་ཕྲུག །ལྷག་བསམ་བྱང་སེམས་འབྱུང་བ་འགྲོ་ཀུན་གྱི་སྐྱབས་མགོན། །ང་ཁྱོད་ཕྱོགས་རིས་སྤངས་པ་ཐམས་ཅད་ཀྱི་བྱམས་ཡུལ། །ང་ཅག་གང་དུ་སོང་ཡང་སྐྱིད་པོ་རང་འདུག་གོ །ཞེས་གསུངས་ཡོད་པས་འུ་ཅག་ཚེ་འདི་ལ་ཡང་སྐྱིད་པོ། ཕྱི་མ་ལ་ཡང་སྐྱིད་པོ། མདོར་ན་སྐྱིད་པོ་མ་གཏོགས་སྡུག་པོ་ཤར་རྒྱུ་ཡོད་པ་མ་རེད། དེ་ལ་ཐམས་ཅད་དགའ་སྤྲོ་ཨེ་འདུག ༼དགོད་སྒྲ།༽ དེ་བཞིན་དུ་ཀུན་མཁྱེན་མི་ཕམ་རྒྱ་མཚོས་ཀྱང་། སྲིད་པ་ཐ་མའི་ཆོས་ལ་བག་ཆགས་ཤིག་བཞག་ཡོད། །མ་བསྒོམ་དེ་གར་ལུས་ཀྱང་སྐྱིད་པོ་རང་འདུག་གོ །ཇི་བཞིན་ཕྱོགས་ཙམ་མི་ཤེས་ཆོ་ངེ་རང་སྒྲོག་མོད། །བརྒྱུད་གསུམ་བླ་མའི་མན་ངག་ཡིད་གཏིང་དུ་ཁེལ་བས། །བློ་འདས་ཡེ་ཤེས་རྩི་སྨན་ཅུང་ཟད་ཅིག་ཐེབས་པས། །མ་གོམས་དེ་གར་ལུས་ཀྱང་སྐྱིད་པོ་རང་འདུག་གོ །ཞེས་འུ་ཅག་གིས་སྲིད་པ་ཐ་མའི་ཆོས་ལ་བག་ཆགས་བཞག་ཚར་བ་ཡིན་པས། བསྒོམ་ན་རབ་རེད། མ་བསྒོམ་ནས་ཉལ་བསྡད་ཀྱང་འུ་ཅག་ལས་སྐྱིད་ཅིག་ས་འདིའི་སྟེང་ན་མི་འདུག དེ་ལྟར་དགའ་དགའ་སྐྱིད་སྐྱིད་ཀྱིས་ཆོས་མཚམས་བྱས་པ་ཡིན།

མཐོང་དུ་ཡོད་པའི་ལས་དབང་།

ཆོས་རྗེ་ཉིད་ལས་རབ་གླིང་དུ་བཞུགས་ཡུན་མི་རིང་མོད། འོན་ཀྱང་བགྲང་བྱ་སུམ་ཅུ་འདས་པའི་དེང་གི་དུས་སུའང་། ཁོ་ཚོ་མི་མང་པོ་ཞིག་ལ་ཆོས་རྗེ་ཉིད་གནས་དེར་ཕེབས་པའི་སྐོར་གླེང་བ་ན། ཡིད་ལ་གསལ་ལྷང་ངེར་དྲན་ཐུབ་ཅིང་ཚོར་སྣང་ཡང་ཟབ་མོ་བཞག་འདུག ཉེ་ཆར་ང་ཚོས་ལས་རབ་གླིང་གི་འཛམ་གླིང་སོ་སོར་ཡོད་པའི་རིག་པ་ཆོས་ཚོགས་ཞེས་པའི་སློབ་མ་རྒན་པ་འགའ་ལ་བཅར་འདྲི་བྱེད་སྐབས། ཁོ་ཚོས་རང་ཉིད་ཀྱི་མྱོང་བ་གླེང་བ་གཤམ་གསལ་ལྟར།

༡ ལྕམ་ཁཱེ་རིན་སྦེ་རེན་ཐི་（Karin Behrendt）ནི་རིག་པ་ཆོས་ཚོགས་ཀྱི་སློབ་མ་རྒན་པ་ཞིག་ཡིན་ལ། མོས་ཆོས་རྗེ་ཉིད་གླེང་སྐབས་འདི་ལྟར་བཤད།

ངས་ནམ་རྒྱུན་ཆོས་རྗེ་ཉིད་དྲན་ཡོང་དུས། ཚོར་བ་ཧ་ཅང་དམིགས་བསལ་བ་ཞིག་འབྱུང་གིན་འདུག ཁོང་ནི་གཟུགས་སྟོབས་ཆེ་ལ་གཟི་བརྗིད་ལྡན་པ་དང་། བསམ་ཡུལ་འདས་པའི་ཁེངས་སྐྱུང་ཅན་ཞིག་སྟེ། ང་ཚོ་ལ་རང་ཤུགས་ཀྱིས་བྱམས་བརྩེ་དང་དྲོད་ཁོལ་གྱི་སྣང་བ་ཚད་མེད་གནང་མཁན་ཞིག་ཡིན།

ང་རང་ཆེས་སེམས་འགུལ་ཐེབས་པ་ཞིག་ནི། ཆོས་རྗེ་མཆོག་དང་བསོད་རྒྱལ་རིན་པོ་ཆེ་གཉིས་ཀྱིས་ནང་ཕན་ཚུན་ལ་ཧ་ལས་པའི་གུས་བཀུར་དང་སྙིང་ཉེ་པོ་མཛད་ཀྱིན་ཡོད་པ་དེ་རེད།

ཆོས་རྗེ་ཉིད་ཀྱི་ཕངས་པ་མེད་པའི་ཆོས་སྦྱིན་དང་བསྟན་འགྲོར་བརྩོན་པའི་ཐུགས་སྟོབས་ལ་ངས་བཀའ་དྲིན་ཚད་མེད་ཞུ་བ་མ་ཟད། ཁོང་ལས་རབ་གླིང་དུ་བྱོན་ནས། ང་ཚོ་ཁོང་དང་མཉམ་གཅིག་ཏུ་གཏེར་ཆེན་ལས་རབ་གླིང་པའི་མཛད་རྣམ་ལ་འཇུག་ཏུ་བཅུག་པ་ནི་དེ་ལས་ཀྱང་ཆེས་བཀའ་དྲིན་ཆེ་བ་ཡིན། ཐེངས་གཅིག་མཇལ་བ་ཙམ་གྱིས་ཀྱང་ཁོང་གི་རྒྱ་ཆེ་བའི་ཤེས་རབ་དང་གཏིང་ཟབ་པའི་མངོན་རྟོགས་རྣམས་གསལ་པོར་མཐོང་ཐུབ་ཅིང་། དེས་ང་ཚོའི་མི་ཚེ་ལ་ཤུགས་རྐྱེན་ལེགས་པོ་ག་འདྲ་ཐེབས་པ་ནི། སོ་སོའི་སྐྱེ་བོའི་རྣམ་པར་རྟོག་པའི་སྤྱོད་ཡུལ་ལས་རིང་དུ་འདས་པ་ཞིག་རེད་སྙམ་དུ་ང་ལ་ཡིད་ཆེས་བརྟན་པོ་ཡོད།

༢ ལྕམ་ལྗ་པོར་ཨར་ནོལ་（Jaborah Arnoul） ནི་འཇར་མན་དུ་ཡོད་པའི་རིག་པ་ཆོས་ཚོགས་ཀྱི་དགེ་རྒན་ཞིག་ཡིན། མོས་ཕྱི་ལོ་༡༩༩༣ལོར་ཆོས་རྗེ་ཉིད་ལས་རབ་གླིང་དུ་འབྱོན་སྐབས་མཇལ་མྱོང་ཞིང་འདི་ལྟར་གླེང་།

ངས་ཐེངས་དང་པོར་ཆོས་རྗེ་མཆོག་མཇལ་བ་ན། སེམས་ལ་རང་ཤུགས་ཀྱིས་གཏིང་ཟབ་ཅིང་ཤུགས་དྲག་པའི་དད་པ་ཁྱད་པར་ཅན་ཞིག་སྐྱེས་སོང་། ངས་ཁོང་ལ་ཡོད་ཚད་ནས་ཡོད་ཚད་དབུལ་བར་བགྱི་སྙམ་ཡང་། སྐབས་དེར་ང་ལ་དཔལ་འབྱོར་གྱི་ཆ་རྐྱེན་དེ་ཙམ་བཟང་པོ་མེད་པས། སྒོར་མོ་དང་རིན་པོ་ཆེ་ཉུང་ཤས་ཙམ་ལས་དབུལ་རྒྱུ་མ་རྙེད་པས་སེམས་ཧ་ཅང་ཕམ་པོ་བྱུང་། ཡིན་ན་ཡང་། སྐབས་དེར་ངས་སེམས་ལ་དེ་ལྟར་བསམ་པ་མ་ཟད་ལག་ལེན་དུའང་དེ་བཞིན་དུ་བགྱིས་པ་ཡིན།

༣ ལྕམ་ལྗ་ནཱེས་ཕཱེ་ཁི་ཧཱམ་（Jane Peckham）ནི་བསོད་རྒྱལ་རིན་པོ་ཆེའི་སློབ་མ་རྒན་པ་ཞིག་ཡིན་ལ་མོས་འདི་ལྟར་གླེང་།

ངས་ཕྱི་ལོ་༡༩༩༤ལོར་གཟོད་བསོད་རྒྱལ་རིན་པོ་ཆེ་བླ་མར་བསྟེན་པ་ཡིན་པས། སེམས་ཤིན་ཏུ་ཕངས་པ་ཞིག་ལ། ང་ལ་ཆོས་རྗེ་མཆོག་དངོས་སུ་མཇལ་བའི་གོ་སྐབས་མ་བྱུང་། ཡིན་ན་ཡང་། བསོད་རྒྱལ་རིན་པོ་ཆེས་རྒྱུན་དུ་ཁོང་གི་ཡོན་ཏན་བརྗོད་ཀྱིན་ཡོད་པར་མ་ཟད། ད་དུང་ལས་རབ་གླིང་དང་འཛམ་གླིང་གི་ས་ཆ་སོ་སོའི་རིག་པ་ཆོས་ཚོགས་ཀྱིས་ཉིན་རེ་བཞིན་མཉམ་གཅིག་ཏུ་རྟེན་འབྲེལ་ཉེས་སེལ་གྱི་ཚོགས་འཁོར་སྐོར་སྐབས། ཆོས་རྗེ་མཆོག་གིས་གསུངས་པའི་དབང་སྡུད་གསོལ་འདེབས་ཀྱི་སྒྲ་དེ་ཚང་མ་ལ་གཏོང་གིན་ཡོད་ཅིང་། སྲོལ་རྒྱུན་དེ་ད་ལྟའི་བར་དུ་ལེགས་པར་རྒྱུན་བསྐྱངས་ནས་གནས་ཡོད།

དེ་བས་ངས་ཆོས་རྗེ་སྐུ་དངོས་ཀྱི་ཞལ་རས་མཇལ་མ་མྱོང་ཡང་། ཉིན་རེའི་ཚོགས་འཁོར་གྱི་སྐབས་སུ། ཁོང་གིས་གསུངས་པའི་གསོལ་འདེབས་ཀྱི་སྒྲ་ལས་ང་ཚོ་ཚང་མར་བྱིན་རླབས་ཐོབ་པའི་ཚོར་བ་མྱོང་ཐུབ་ཀྱིན་འདུག

༤ ལྕམ་རཱེ་ནཱ་ཐུ་ཧན་དྷོལ་（Renate Handel）ཞེས་པ་ནི། ཕྱི་ལོ་༡༩༩༣ལོར་བསོད་རྒྱལ་རིན་པོ་ཆེའི་ཞབས་ཞུ་མཁན་ཞིག་ཡིན་ལ་མོས་འདི་ལྟར་བཤད་བྱུང་།

ཆོས་རྗེ་འཇིགས་མེད་ཕུན་ཚོགས་རིན་པོ་ཆེས་ང་ལ་བཞག་པའི་ཚོར་བ་ཧ་ཅང་ཟབ་པ་སྟེ། ངས་དེ་སྔོན་མཇལ་མྱོང་བའི་བླ་མ་སུ་དང་གང་ལའང་མི་འདྲ་བར་ནམ་ཡང་བརྗེད་དུ་མེད། ཁོང་ནི་བྱིན་རླབས་ཀྱི་ནུས་པ་ཤིན་ཏུ་ཆེ་ཞིང་ཐུགས་གཤིས་འཇམ་པ། བྱམས་བརྩེ་ལྡན་པའི་བླ་མ་ཁྱད་པར་ཅན་ཞིག་ཡིན།

སྐབས་དེར་ཁོང་གིས་ཆོས་ཁྲིད་གསུངས་པའི་ནང་དོན་རྣམས་ད་ལྟ་གསལ་པོར་དྲན་གྱིན་མེད་མོད། འོན་ཀྱང་ཁོང་ནི་དེ་འདྲའི་བྱིན་རླབས་ཀྱི་ནུས་པ་ཆེན་པོ་ཅན་ཞིག་ཡིན་པ་ད་དུང་ཡང་དྲན་ཐུབ་པར་འདུག དེ་ལྟར་རྗེས་སུ་དཔག་ན། གཏེར་ཆེན་ལས་རབ་གླིང་པ་ཞེས་པ་དེའང་། སྐབས་དེ་དུས་གཞན་གང་དང་ཡང་མི་འདྲ་བའི་མི་སྣ་ཞིག་ཡིན་ཐག་ཆོད་རེད།

ངས་ད་དུང་དྲན་སོས་པ་ཞིག་ལ། བསོད་རྒྱལ་རིན་པོ་ཆེས་ཆོས་རྗེ་མཆོག་དང་ཁོང་གི་སྐུ་འཁོར་རྣམས་ལ་སྣེ་ལེན་ཆེས་ལེགས་པོ་ཡོང་བར་ཧ་ཅང་གཙིགས་ཆེན་གནང་བ་སྟེ། ཆོས་རྗེ་མཆོག་ལས་རབ་གླིང་དུ་བྱོན་རྗེས། བཞུགས་ས་སྐྱིད་པོ་ཡོང་ཡོད་མེད་དང་གསོལ་བཅའ་འཕྲོད་མིན་སོགས་ལ་ཧ་ཅང་དོ་སྣང་བྱེད་པར་མཐོང་། དེ་སྔོན་ང་ཚོས་བླ་མ་དེ་འདྲའི་མང་པོ་ཞིག་གདན་ཞུ་བྱེད་མྱོང་ཡང་། སྐབས་དེའི་ཆོས་རྗེ་མཆོག་གི་སྣེ་ལེན་ལ་ཐོག་མཐའ་བར་གསུམ་དུ་ཐུགས་ཁུར་མཛད་པ་ལྟ་བུ་ནི་ཡེ་ནས་ཡོད་མ་མྱོང་།

སྐབས་དེར་ང་རང་གཏེར་ཆེན་ལས་རབ་གླིང་པའི་སྐུ་སྐྱེ་དངོས་ལ་མཇལ་བའི་སྐལ་བ་ཐོབ་པ་ནི། མི་ཚེ་འདིའི་ནང་གི་ཆེས་ཁྱད་འཕགས་ཀྱི་བྱུང་བ་ཞིག་ཡིན་པར་ངེས།

༥ ལྕམ་ལྗ་ནེན་ཤོའུ་ཚི་（Janine Schulz）ཞེས་པས་ཆོས་རྗེ་ཉིད་གླེང་སྐབས་ཕྱིར་དྲན་གྱི་སྐད་ཆ་འདི་ལྟར་བཤད།

ཕྱི་ལོ་༡༩༩༣ལོར། བོད་ཡུལ་གྱི་གཏེར་སྟོན་ལས་རབ་གླིང་པའི་སྤྲུལ་སྐུ་ཆོས་རྗེ་འཇིགས་མེད་ཕུན་ཚོགས་མཆོག་ལས་རབ་གླིང་དུ་འཚམ་འདྲིར་ཕེབས་ནས། བསོད་རྒྱལ་རིན་པོ་ཆེ་དང་མཇལ་ཕྲད་གནང་།

སྐབས་དེར་ང་ལ་དོན་དག་གཉིས་ཀྱིས་ཚོར་སྣང་ཟབ་མོ་བཞག་བྱུང་། དོན་དག་དང་པོ་ནི། ཆོས་རྗེ་ཉིད་ལས་རབ་གླིང་དུ་བྱོན་ནས་ཅང་མ་འགོར་བར། ཐེངས་ཤིག་གུར་ཆེན་པོའི་ནང་ནས་ཆོས་ཁྲིད་གསུང་སྐབས། ཁོང་གིས་དེར་འཁོད་ཀྱི་མི་ཚང་མ་ལ། བསོད་རྒྱལ་རིན་པོ་ཆེ་ནི་གཏེར་ཆེན་ལས་རབ་གླིང་པའི་ཡང་སྤྲུལ་ཡེ་ཤེས་སྒྱུ་མའི་རོལ་གར་གྲུབ་སྨྱོན་དངོས་རེད་ཅེས་གསུངས། ཁོང་གིས་དེ་ལྟར་གསུང་དོན་ནི་ངེད་ཅག་ལ་ཐེ་ཚོམ་ཡོད་པས་མ་ཡིན། དོན་དག་གཉིས་པ་ནི། ཆོས་རྗེ་མཆོག་གིས་རྒྱུན་དུ་བསྙེན་སྒྲུབ་སོགས་གནང་མི་དགོས་པའི་སྐབས་སུ། བསྙེན་ཕྲེང་དམར་པོ་དེ་ཁོང་གི་སྙན་ཆེན་པོ་དེ་ལ་བཀལ་ནས་བཞུགས་ཀྱིན་ཡོད།

ལྷུན་གྲུབ་ཐོད་རྒལ་གྱི་ཁྲིད།

ཕྱི་ཟླ་༨པའི་ཚེས་༣༠ཉིན་གྱི་སྔ་དྲོར། འཇམ་དཔལ་ཡེ་ཤེས་སེམས་དཔའི་དབང་གནང་། དེ་མཚུངས་སུ་རྫོགས་པ་ཆེན་པོའི་ལྷུན་གྲུབ་ཐོད་རྒལ་གྱི་ཁྲིད་འདི་ལྟར་གསུང་།

དེ་ལ་གང་གསན་པར་བྱ་བའི་ཆོས་ནི། འདིར་ཐེག་པ་ཐམས་ཅད་ཀྱི་ཡང་རྩེ། ལུང་ཐམས་ཅད་ཀྱི་སྤྱི་འགྲེལ། དུས་གསུམ་སངས་རྒྱས་ཐམས་ཅད་ཀྱི་དགོངས་པ་ཟབ་པ་ལས་ཀྱང་ཆེས་ཟབ་པ་ཡང་གསང་རྫོགས་པ་ཆེན་པོ་དེ་ལ་ཡང་། ཕྱི་ནང་གསང་གསུམ་གྱི་དབྱེ་བ་མང་པོ་ཞིག་ཡོད་པ་ལས། སྐབས་འདིར་ཡང་གསང་སྙིང་ཐིག་གི་ལུགས་སྲོལ་དྲི་མ་མེད་པ་གསང་སྐོར་མན་ཆད་དུ་ཟུར་ཙམ་ཡང་མ་གྲགས་པའི་འོད་གསལ་ཐོད་རྒལ་གྱི་ཉམས་ལེན་མདོར་བསྡུས་ཙམ་ཞིག་ཞུ་བར་བྱེད་པ་ལ། སྔོན་འགྲོ་དང་། དངོས་གཞི། རྗེས་ཀྱི་རིམ་པ་དང་གསུམ་དུ་ཡོད་པ་ལས།

སྔོན་འགྲོའི་རིམ་པ་ལ། སྒོ་གསུམ་གྱི་སྣ་ཁྲིད་པར་བྱེད་པ་ལུས་ངག་ཡིད་ཀྱི་སྔོན་འགྲོ། སྐུ་གསུམ་གྱི་སྣ་ཁྲིད་པར་བྱེད་པ་འབྱུང་བཞིའི་རྣལ་འབྱོར། རིག་པའི་སྣ་ཁྲིད་པར་བྱེད་པ་འཁོར་འདས་རུ་ཤན་གྱི་སྤྱོད་པ་དང་གསུམ་ཡོད་པ་ལས། དང་པོ། སྒོ་གསུམ་གྱི་སྣ་ཁྲིད་པར་བྱེད་པ་ལུས་ངག་ཡིད་ཀྱི་སྔོན་འགྲོ་སྟེ། ལུས་རྡོ་རྗེ་སྔོན་པོ་རྩེ་གསུམ་པ་ཉིད་དུ་གསལ་ལ་རྡོ་རྗེའི་འདུག་སྟངས་ཡུན་རིང་དུ་བྱས་པས། རྣམ་རྟོག་གི་འཕྲོ་བ་ཐམས་ཅད་རྒྱུན་ཆད་པར་གྱུར་པའི་ཚེ། རྗེས་ཤེས་ཀྱི་ངོ་བོ་ལ་བལྟས་ཏེ་རང་བབས་སུ་བཞག་ལ་ཡུན་རིང་པོའི་བར་དུ་བསྐྱང་བར་བྱ་བ་ནི་ལུས་ཀྱི་སྔོན་འགྲོ་ཞེས་བྱ་བ་ཡིན།

དེ་ནས་ལུས་ངག་ཡིད་གསུམ་ཆུན་གཅིག་སྒྲིལ་དུ་ཧཱུྃ་ལ་དམིགས་པ་བཟུང་སྟེ། རྒྱས་གདབ་པ་དང་། རྩལ་སྦྱང་བ་དང་། མཉེན་བཙལ་བ་དང་། ལམ་དུ་གཞུག་པ་སྟེ་རྣམ་པ་བཞི་ལ་རྩེ་གཅིག་ཏུ་སྙིང་ཐིག་ཆེན་པོའི་ཡིག་ཆ་ལས་ཇི་ལྟར་འབྱུང་བ་བཞིན་དུ་བསླབ་པར་བྱ་བ་ནི་ངག་གི་སྔོན་འགྲོ་ཞེས་བྱ་བ་ཡིན།

དེ་ནས་སེམས་ལ་དང་པོ་བྱུང་ས་དང་། བར་དུ་གནས་ས། ཐ་མར་འགྲོ་ས་རྣམས་རྣམ་པར་བཙལ་བའི་གནས་སྐབས་ན། དང་པོ་བྱུང་ས་མེད་པ་ཆོས་ཀྱི་སྐུ་རུ་ངོ་སྤྲད། བར་དུ་གནས་ས་མེད་པ་ལོངས་སྤྱོད་རྫོགས་པའི་སྐུ་རུ་ངོ་སྤྲད། ཐ་མར་འགྲོ་ས་མེད་པ་སྤྲུལ་པའི་སྐུ་རུ་ངོ་སྤྲད་པར་བྱས་པ་ཡིད་ཀྱི་སྔོན་འགྲོ་སྟེ་འདི་དག་ལ་ལུས་ངག་ཡིད་ཀྱི་སྔོན་འགྲོ་ཞེས་བྱ་བ་ཡིན།

གཉིས་པ་སྐུ་གསུམ་གྱི་སྣ་ཁྲིད་པར་བྱེད་པ་འབྱུང་བཞིའི་རྣལ་འབྱོར་དེ་ནི། ཕལ་ཆེར་ཀུན་མཁྱེན་ཆོས་ཀྱི་རྒྱལ་པོ་ཡན་ཆད་ཀྱི་སྐུ་དུས་སུ་སྦྱང་སྲོལ་རྒྱ་ཆེན་པོར་ཡོད་ཀྱང་། དེ་མན་ཆད་ནས་དེང་སང་གི་ཕྱག་བཞེས་ལ་ཆེར་མེད་པ་ལྟ་བུར་སྣང་མོད། འོན་ཀྱང་རྒྱུད་རང་གི་དགོངས་པ་ལྟར་དུ་བྱས་ན། ས་ཆུ་མེ་རླུང་གི་སྒྲ་ལ་སེམས་ཐིམ་འགྲོ་བ་ལྟར་གཏད་དེ་རིག་པའི་ངོ་བོའི་ངང་སྐྱོང་བར་བྱེད་པ་ལ་བྱ་བ་ཡིན།

གསུམ་པ་རིག་པའི་སྣ་ཁྲིད་པར་བྱེད་པ་འཁོར་འདས་རུ་ཤན་གྱི་སྤྱོད་པ་ནི། འགྲོ་དྲུག་གི་བསམ་སྤྱོད་བརྗོད་པ་ཐམས་ཅད་བློ་ཡིས་བླངས་ལ་ངག་གིས་བརྗོད་དེ་འཕྲོ་བདོ་བ་ན། ཐབས་ཤེས་ཀྱི་ཡི་གེ་ཕཊ་སྒྲ་དྲག་པོས་གློ་བུར་དུ་མཚམས་བཅད་ཅིང་། རྗེས་ཤེས་ཀྱི་ངོ་བོ་ལ་ཡང་ནས་ཡང་དུ་བལྟས་ཏེ། འཁོར་བའི་རུ་དང་མྱང་འདས་ཀྱི་རུ་གཉིས་ཀྱི་ཤན་འབྱེད་པར་བྱེད་པ་ལ་བྱ་བ་ཡིན།

དེ་ལྟར་རུ་ཤན་མཐར་ཕྱིན་པའི་རྗེས་སུ་ལུས་མི་གཡོ། ངག་མི་སྨྲ། སེམས་རྩེ་གཅིག་ཏུ་གནས་པ་རྣལ་དུ་དབབ་པའི་ཏིང་ངེ་འཛིན་ལ་གནས་པར་བྱ། དེའི་རྗེས་སུ་ཞི་གནས་དང་ལྷག་མཐོང་ཟུང་དུ་འཇུག་པའི་ཏིང་ངེ་འཛིན་དེ་ལམ་ལ་གཞུག་པའམ་སོར་གཞུག་པར་བྱ་བའི་ཕྱིར་དུ། དང་པོ་ཉན་ཐོས་དང་མཐུན་པར་སྤྱོད་ལམ་ཞི་བ། བར་དུ་བྱང་སེམས་དང་མཐུན་པར་སྤྱོད་ལམ་འབྲིང་པོ། མཐར་ཁྲོ་བོའི་སྤྱོད་པ་དང་བསྟུན་པའི་སྤྱོད་ལམ་དྲག་པོ་དང་བསྲེས་ཏེ་རྒྱུན་གྱི་སྤྱོད་ལམ་ལ་འཇུག་པར་བྱ་བ་ནི་སྔོན་འགྲོའི་རིམ་པ་མདོར་བསྡུས་པ་ཙམ་ཞིག་ཡིན།

བར་དུ་དངོས་གཞི་ཐོད་རྒལ་གྱི་རིམ་པ་དེ་ལ་ཡང་། སྤྱིར་རིག་འཛིན་སོ་སོའི་ཁྲིད་ཚུལ་རྣམ་པ་མི་འདྲ་བ་མང་པོ་ཞིག་ཡོད་ཀྱང་། འདིར་གཙོ་བོ་ཀུན་མཁྱེན་མི་ཕམ་རྒྱ་མཚོའི་རྗེས་སུ་འབྲངས་ཏེ་གནད་རྣམ་པ་དྲུག་ལ་བརྟེན་ནས་བཤད་པར་བྱ་བ་ལ། ཐོག་མར་ལུས་ཀྱི་གནད་སྐུ་གསུམ་གྱི་བཞུགས་སྟངས་ཏེ། ཆོས་སྐུའི་བཞུགས་སྟངས་སེངྒེ་འགྱིང་བ་ལྟ་བུ། ལོངས་སྐུའི་བཞུགས་སྟངས་གླང་ཆེན་ཉལ་བ་ལྟ་བུ། སྤྲུལ་སྐུའི་བཞུགས་སྟངས་དྲང་སྲོང་ཙོག་པུ་ལྟ་བུ་ལས་གང་རུང་ལ་གནས་པར་བྱ་བ་དང་། ངག་གི་གནད་སྨྲ་བ་བཅད་ལ་རླུང་ཁ་ནས་དལ་བུར་བུད་དེ་རང་བབས་སུ་བཞག་སྟེ་རྩེ་གཅིག་ཏུ་བསྒོམ་པར་བྱ་བ་དང་། ཡིད་ཀྱི་གནད་འདས་མ་འོངས་ད་ལྟ་དུས་གསུམ་གྱི་རྟོག་ཚོགས་ཐམས་ཅད་དབྱིངས་སུ་བཅད་ལ་རང་བབས་སུ་བཞག་སྟེ་བསྒོམ་པར་བྱ་བ་ནི་སྒོ་གསུམ་གྱི་གནད་ཡིན།

དེ་ནས་སྒོའི་གནད་ནི་ཆོས་སྐུའི་གཟིགས་སྟངས་མིག་གྱེན་དུ་ལྟ་བ་དང་། ལོངས་སྐུའི་གཟིགས་སྟངས་ཟུར་ལ་མིག་གཉིས་མཉམ་པོར་ལྟ་བ་དང་། སྤྲུལ་སྐུའི་གཟིགས་སྟངས་ཐུར་དུ་ལྟ་བ་སྟེ་གཟིགས་སྟངས་རྣམ་པ་གསུམ་ལ་བརྟེན་ནས་སྒོམ་པ་དང་། ཡུལ་གྱི་གནད་ནམ་མཁའ་རྐྱེན་བྲལ་དང་ཉི་ཟླ་མར་མེ་སོགས་ལ་བརྟེན་ནས། སྣང་བའི་གནད་དབྱིངས་རྣམ་དག་གི་སྒྲོན་མ་མཐིང་དབྱིངས་ཁྱབ་པ་ཆེན་པོ་འོད་ལྔའི་མུ་ཁྱུད་ཅན་དང་། ཐིག་ལེ་སྟོང་པའི་སྒྲོན་མ་བཀོད་མའི་ཆུ་ལ་རྡོ་བསྐྱུར་བ་ལྟ་བུ་ཕྱི་ནང་རིམ་པ་ཅན་དུ་སྣང་བ་དང་། རིག་གདངས་རྡོ་རྗེ་ལུ་གུ་རྒྱུད་གསེར་གྱི་སྐུད་པ་ལ་ཤེལ་ཕྲེང་གིས་བརྒྱན་པ་ལྟ་བུ་གཡོ་ལ་འཁྱོག་པའི་རྣམ་པ་ཅན་དུ་སྣང་བ་ལ། ནང་དུ་ཤེས་རབ་རང་བྱུང་གི་སྒྲོན་མ་ཁྲེགས་ཆོད་ཅོག་བཞག་བཞིའི་ལྟ་བ་དང་ལྡན་པའི་སྒོ་ནས། རིག་གདངས་རྡོ་རྗེ་ལུ་གུ་རྒྱུད་གར་འགྲོ་སའི་རྗེས་སུ་ཡིད་མིག་རླུང་གསུམ་མི་འགྲོ་བར་དབྱིངས་ཐིག་གི་ར་བར་བཙོན་དུ་བཟུང་ལ་རྩེ་གཅིག་ཏུ་བསྒོམ་པར་བྱ་བ་ནི། ཐོད་རྒལ་སྒོམ་པའི་དངོས་གཞིའི་གནད་རྣམ་པ་དྲུག་ཏུ་ཆ་ཚང་བ་ཡིན།

དེ་ལྟར་སྒོམ་པའི་གནས་སྐབས་ན། དང་པོ་དབྱིངས་ཐིག་རིག་པ་རྣམས་ཡོངས་སུ་སྣང་བ་ནི་ཆོས་ཉིད་མངོན་སུམ་དང་། དེ་ཉིད་ཇེ་གསལ་དང་ཇེ་བརྟན། ཇེ་རྒྱས་སུ་གྱུར་བ་ནི་ཉམས་གོང་འཕེལ་དང་། དེ་ནས་མ་དག་པའི་སྣང་བ་ཐམས་ཅད་དག་ནས། དབྱིངས་སྣང་ཞིང་ཁམས་སུ་དག ཐིག་ལེ་གཞལ་ཡས་ཁང་དུ་རྫོགས། རིག་པ་སྐུར་སྨིན་ཏེ། དག་པ་འབའ་ཞིག་གི་རྩལ་རྫོགས་པར་གྱུར་པ་ནི་རིག་པ་ཚད་ཕེབས་ཡིན། མཐར་དག་པའི་སྣང་བ་དེ་དག་ཀུན་ཀྱང་ནང་གསལ་གཞོན་ནུ་བུམ་སྐུའི་ཀློང་དུ་བཙན་ས་ཟིན་པར་གྱུར་པ་ནི་ཆོས་ཉིད་ཟད་པའི་སྣང་བ་ཞེས་བྱ་བ་ཡིན།

མཐར་རྗེས་ཀྱི་རིམ་པ་ནི་དེ་ཉིད་དུ་མི་འགུལ་བ་གསུམ་ལ་གཞི་བཅའ་བ་དང་། སྡོད་པ་གསུམ་གྱིས་ཚད་བཟུང་བ། ཐོབ་པ་གསུམ་གྱིས་གཟེར་གདབ་པ། གདེང་བཞིའི་གྲོལ་ཚད་དང་ལྡན་པ་རྣམས་ཀྱིས་ཉམས་ལེན་ལ་ཇི་བཞིན་དུ་འཇུག་དགོས་པར་བྱ་བ་ཡིན་པས། དེ་དག་ཐམས་ཅད་ནི་འོད་གསལ་ཐོད་རྒལ་གྱི་ཉམས་ལེན་གནད་བསྡུས་ལ་ཆ་ཚང་ཞིང་མ་ནོར་བ་རིག་འཛིན་བརྒྱུད་པའི་མན་ངག་བཞིན་དུ་བཤད་གྲུབ་པ་ལགས།

གྱེས་ཁའི་སྙིང་གཏམ།

དེ་ནས་ཆོས་ཐུན་མཇུག་རྫོགས་ལ་ཉེ་སྐབས་ཐམས་ཅད་ལ་འདི་ལྟར་གསུང་།

ད་རེས་ངེད་ཅག་རྟེན་འབྲེལ་གྱི་དབང་གིས་འགྲོ་དྲུག་འདྲེན་པའི་ཐུབ་པ་དྲུག་གི་གྲངས་ལྡན་གྱི་ཁྲིམས་ལྡན་སྡེ་སྣོད་འཛིན་པའི་མིང་ཙམ་འཛིན་པ་དཔོན་གཡོག་དྲུག ཉི་མ་དང་ཟླ་བའི་རང་འགྲོས་ཀྱི་ཕྱོགས་དང་བསྟུན་ནས་འཛམ་གླིང་ལ་སྐོར་བ་བྱེད་པའི་གནས་སྐབས་སུ། ཁྱེད་རིག་པ་འཛིན་པའི་ཆོས་ཚོགས་དང་འཕྲད། འཕྲད་པ་ཙམ་དུ་མ་ཟད་བསོད་རྒྱལ་རིན་པོ་ཆེ་དབུར་བཞུགས། ཆོས་ཚོགས་ཀྱི་སློབ་མ་ཡོངས་ཀྱིས་མའི་དྲུང་དུ་བུ་ཐོན་པ་ལྟ་བུའི་བརྩེ་གཟིགས་བྱམས་སྐྱོང་བསམ་གྱིས་མི་ཁྱབ་པ་མཛད་པ་དེ་ལ་སྙིང་ཐག་པ་ནས་བཀའ་དྲིན་ཆེ་ཞུ་བ་ཡིན། ཁྱེད་རྣམ་པས་ཆོས་རྣམ་པར་དག་པ་ཞིག་སྒྲུབ་བཞིན་ཡོད་པ་ལ་ངོ་མཐོང་གི་སྐད་ཆ་ཙམ་མ་ཡིན་པར་ཁ་ཞེ་གཉིས་མེད་ཀྱིས་རྗེས་སུ་ཡི་རང་ཞུ།

ད་རེས་གོང་དུ་ལས་རབ་གླིང་པའི་སྐུ་ཚབ་རྣམ་པ་གཉིས་ལ་སྐུ་ཚེགས་ཧ་ཅང་ཆེ་ཟེར་བ་དེ་དངོས་གནས་དྲང་གནས་བདེན་པ་རེད། དེ་ནི་ཁོང་གིས་གསུངས་པ་ལྟར། ཁོང་ལ་མགོ་སེར་པོ་ཅན་རྣམས་གདུལ་བར་དཀའ་བ་བཞིན་དུ། ང་ལ་ཡང་མགོ་ནག་པོ་ཅན་རྣམས་གདུལ་བར་དཀའ་ལས་ཁག་པོ་འདུག ༼དགོད་སྒྲ།༽ ཡིན་ན་ཡང་ངེད་གཉིས་ཀའི་ཚེ་འདིའི་དཀའ་བ་དེ་དཀའ་བ་ཆུང་ཆུང་ཡིན། ད་རུང་ཡང་མདུན་ལམ་དེ་དཀའ་ངལ་ཆེ་བ་དང་ཀྱག་ཀྱོག་མང་བ་ཞིག་ཡིན། ངེད་གཉིས་ཀྱི་བསམ་སྤྱོད་དེ་ཡང་རྒྱལ་སྲས་སྤྱིའི་མཛད་སྤྱོད་དང་མཐུན་པར་ནམ་མཁའ་ཇི་སྲིད་དུ་བསྟན་པ་དང་སེམས་ཅན་གྱི་དོན་མཛད་དགོས་ན། སྙིགས་མའི་རྒུད་པ་ཤིན་ཏུ་འཁྲིགས་བཞིན་པས་ཧ་ཅང་དཀའ་ངལ་ཆེ་བའི་སྒང་ཡིན། དེ་འདྲའི་དཀའ་ངལ་དེ་ཁྱེད་སློབ་ཚོགས་ཚང་མས་ཀྱང་མཐོང་ན། ངེད་གཉིས་ཀ་ལ་ཚེ་འདིའི་སྟེང་གི་ཟ་རྒྱུ་འཐུང་རྒྱུ་རེ་བྱིན་ན་བཀའ་དྲིན་ཆེ་ཡང་མ་བྱིན་ནའང་རང་མགོ་ཐོན་འོང་རྒྱུ་རེད། སེམས་ཅན་གྱི་དོན་མཛད་པ་དེ་ནི་དཀའ་ངལ་ཧ་ཅང་ཆེན་པོ་ཞིག་ཡིན་པས། ཁྱེད་ཅག་གིས་བླ་རྒན་གཅིག་པུ་ས་མཐར་བསྐྱལ་ནས་སྐྱུར་མི་འཇོག་པར་རྣམ་པ་ཚང་མས་ཀྱང་དཔུང་གྲོགས་བྱས་ཏེ་བསམ་པ་བཟང་པོ་དང་། སྦྱོར་བ་ཕུན་སུམ་ཚོགས་པས་བསྟན་པ་དང་སེམས་ཅན་གྱི་དོན་མཛད་རྒྱུ་ལ་སྙིང་ཐག་པ་ནས་རེ་ཞུ་བྱས་པ་ཡིན།

རང་རེ་དཔོན་སློབ་ཀྱི་མཛད་ཕྲིན་དེ་ནི། བོད་ཀྱི་ཁ་དཔེ་ལ། སྔར་བཤད་ཚིག་གི་དར་གྱི་མདུད་པ། ཕྱི་གཏམ་དར་ཐོག་ཐམ་བཞག་ཟེར་བ་བཞིན། ཚེ་འདི་ཙམ་མ་ཟད་སྐྱེ་བ་ཚེ་རབས་ཀྱི་བར་དུ་འགྱུར་བ་ཡོད་པ་མ་རེད། དེ་ནི་རྒྱལ་བ་ཚངས་དབྱངས་རྒྱ་མཚོས། བྲིས་པའི་ཡི་གེ་ནག་ཆུང་། །ཆུ་དང་ཐིགས་པས་འཇིག་སོང་། །མ་བྲིས་སེམས་ཀྱི་རི་མོ། །བསུབས་ཀྱང་བསུབ་རྒྱུ་མི་འདུག །ཅེས་པ་ནང་བཞིན་ཡིན།

དེ་ནས་རྗེས་མའི་རྗེས་མ་སོགས་ལའང་བསོད་རྒྱལ་རིན་པོ་ཆེ་ཁོང་སྨོས་མ་དགོས་པ་རེད། ཁོང་གི་སློབ་ཚོགས་ཡིན་ངེས་པའི་གང་ཟག་སུ་དང་སུ་འདྲ་བ་ཞིག་བོད་ཡུལ་དུ་འོང་ན་ཡང་། རང་གིས་ཞེ་ཐག་པ་ནས་དགའ་བསུ་ཞུ་རྒྱུ་ཡིན། ངས་ཞབས་ཞུ་རྒྱ་ཆེན་པོ་ཞིག་འགྲུབ་ཟེར་ན་རྫུན་ཡིན་ཏེ། ང་ལ་ས་འདིའི་སྟེང་ན་ད་ལྟ་གྲུབ་དབང་པད་མ་ནོར་བུ་ལས་བཀའ་དྲིན་ཆེ་ཞིང་གཉན་པོ་ཞིག་མེད་ཀྱང་། ཁོང་ན་ནིང་བོད་ལ་འབྱོན་སྐབས་འབྱོར་བའི་ཐད་ནས་སྒོར་ཟུར་གཅིག་ཀྱང་འབུལ་རྒྱུ་མ་ལོན། དེ་ལྟར་ཡིན་པས་རྒྱ་ཆེན་པོ་ཞིག་མི་འགྲུབ་རུང་། ཞབས་ཞུ་མི་བསྒྲུབ་བསམ་པ་ཞིག་གཏན་ནས་མེད། རང་ནུས་གང་ཡོད་ཀྱིས་ཚང་མ་ལ་ཞབས་ཞུ་བསྒྲུབ་རྒྱུ་ཡིན།

དེ་ནས་རྒྱལ་བ་སྲས་བཅས་དཔང་པོར་བཞག་སྟེ་བདག་གིས་སྨོན་འདུན་གྱི་ཚིག་ཁ་ཤས་ཞུས་ན། བསོད་རྒྱལ་རིན་པོ་ཆེ་ཁོང་གི་སྐུ་ཚེ་བརྟན་ཅིང་མཛད་ཕྲིན་རྒྱས་པའི་སྨོན་འདུན་དང་པོ་ཞུ། རིག་པ་འཛིན་པའི་ཆོས་ཚོགས་འདི་ཡང་ཡར་རྒྱས་ཕུན་སུམ་ཚོགས་པ་སྡེ་བཞིའི་དཔལ་ལ་ངང་གིས་སྤྱོད་པའི་སྨོན་འདུན་གཉིས་པ་ཞུ། སློབ་ཚོགས་ཚང་མ་ཡང་བསམ་པ་བཟང་པོ་དང་སྤྱོད་པ་ཕུན་སུམ་ཚོགས་པའི་སྒོ་ནས་འཛམ་གླིང་ཞི་བདེའི་རྩ་དོན་ལ་བརྩོན་ལེན་བྱས་ཏེ། ཆོས་དང་སྲིད་ཀྱི་ལེགས་ཚོགས་ཐམས་ཅད་ཇི་བཞིན་དུ་འགྲུབ་པའི་སྨོན་འདུན་གསུམ་པ་ཞུ། རང་རེ་དཔོན་སློབ་ཚང་མ་ཚེ་འདིར་ཡང་ནས་ཡང་དུ་འཕྲད་ཅིང་ཐེག་པ་ཆེན་པོའི་ཆོས་ལ་ལོངས་སྤྱོད་པ་དང་། ཚེ་འདི་འཕོས་མ་ཐག་ཏུ་ནུབ་ཕྱོགས་བདེ་བ་ཅན་གྱི་ཞིང་ཁམས་སུ་སྐྱེས་ཏེ་མགོན་པོ་འོད་དཔག་མེད་པའི་ཞལ་མཇལ་གསུང་ཐོས་བྱང་ཆུབ་ཏུ་ལུང་བསྟན་ཐོབ། དེ་ནས་རྒྱལ་སྲས་འཇམ་དཔལ་དཔའ་བོ་དང་རྟག་ཏུ་འགྲོགས་ནས་ནམ་མཁའ་ཇི་སྲིད་དུ་བསྟན་པ་དང་སེམས་ཅན་གྱི་དོན་རྒྱ་ཆེན་པོ་ལ་བརྩོན་པར་བྱེད་པའི་སྨོན་འདུན་ཐ་མའང་ཞུ་བ་ཡིན།

དེ་ལྟར་ཕྱོགས་དུས་ཀྱི་རྒྱལ་བ་སྲས་དང་བཅས་པ་སྤྱི་དང་། ཁྱད་པར་དུ་ཚོགས་པ་འདིར་བཞུགས་པའི་བླ་སྤྲུལ་དགེ་བའི་བཤེས་གཉེན་གྲངས་མང་ཞིང་ཚར་དུ་དངར་བ་དེ་དང་། དད་པ་དང་ཤེས་རབ་ཕུན་སུམ་ཚོགས་པ་ལྡན་པའི་སློབ་ཚོགས་ཡོངས་ཀྱིས་ཀྱང་དེ་དག་ཐམས་ཅད་ལེགས་པར་འགྲུབ་པའི་མཐུན་འགྱུར་དམ་པ་གནང་བར་ཞུ་ཞུ།

སླར་ཡང་དྲི་བ་ཉི་ཤུ་བཏོན།

ཕྱི་དྲོར་ཆོས་རྗེ་ཉིད་ལ་ལས་རབ་གླིང་གི་འཕྲིན་སྦྱོར་སྡེ་ཁག་གི་གསར་འགོད་པས་བཅར་འདྲི་བྱས་པ་གཤམ་གསལ།

༡ དྲི་བ། བཀའ་འདྲི་ཞུ་རྒྱུ་འདི་མི་ཚང་མའི་སློབ་སྦྱོང་གི་ཆེད་ཡིན། ང་ཚོར་དྲི་བ་མང་པོ་ཞུ་རྒྱུ་འདུག་ཀྱང་དེ་དག་གི་ལན་ཉེ་སྔོན་རིན་པོ་ཆེས་བཀའ་ཆོས་གནང་སྐབས་གསུངས་ཚར་སོང་། དེའི་ནང་ནས་འགའ་ཞིག་འདིར་ཞུས་ན་འགྲིག་གམ།

ལན། ཡ་ཡ།

༢ དྲི་བ། ད་ཐེངས་རིན་པོ་ཆེ་ཁྱེད་ནུབ་ཕྱོགས་སུ་ཐོག་མར་ཕེབས་པ་ཡིན་ཞིང་། དུས་ཚོད་འདིར་ཁྱེད་ཕེབས་པར་དགོས་དོན་དམིགས་བསལ་བ་ཡོད་དམ།

ལན། སྤྱིར་བསྟན་པ་དང་སེམས་ཅན་ལ་ཕན་ཅུང་ཟད་རེ་ཨེ་ཐོགས་བསམས་ནས་ནུབ་ཕྱོགས་ལུང་པ་རུ་ཡོང་བ་ཡིན། དེའི་སྐབས་སུ་མི་ཐམས་ཅད་ཀྱི་རྣམ་འགྱུར་དང་སེམས་ཁམས་ཀྱི་འགྱུར་བ་སོགས་ཕྱོགས་གང་ལ་བལྟས་ཀྱང་། སངས་རྒྱས་ཀྱི་བསྟན་པས་ཁོང་ཚོར་ཕན་ཐོགས་ཆེན་པོ་ཡོང་ས་རེད་སྙམ་པའི་ཡིད་ཆེས་བྱུང་། དེ་མིན་དུས་ཚོད་འདི་འདྲར་གཏད་དགོས་པའི་དམིགས་ཡུལ་ཅི་ཡང་མེད།

༣ དྲི་བ། ནུབ་ཕྱོགས་སུ་ཡོད་པའི་ཆོས་པ་རྣམས་ལ་རིན་པོ་ཆེ་ཁྱེད་ཀྱིས་གཟིགས་སྣང་ག་འདྲ་བྱུང་། ཁྱེད་ཀྱིས་བོད་དུ་ཡོད་པའི་ཆོས་པ་དང་ནུབ་ཕྱོགས་སུ་ཡོད་པའི་ཆོས་པ་གཉིས་ལ་མི་འདྲ་ས་ག་རེ་གཟིགས་སོང་།

ལན། ནུབ་ཕྱོགས་ཀྱི་ཆོས་པ་རྣམས་ཧ་ཅང་ཡག་པོར་འདུག རབ་ཏུ་བྱུང་བ་དེ་བོད་ལུང་པ་ན་ཤིན་ཏུ་མང་པོ་རེད། ནུབ་ཕྱོགས་སུ་རབ་བྱུང་བ་དཀོན་ཡང་ཆོས་ལ་དད་མོས་ཡོད་པ་དག་ཀྱང་བསམ་གྱིས་མི་ཁྱབ་པའི་མང་པོ་རེད། དེ་མ་གཏོགས་ཁྱད་པར་ཆེན་པོ་མེད་པ་འདྲ།

༤ དྲི་བ། སྤྱིར་བཏང་ནུབ་ཕྱོགས་རྒྱལ་ཁབ་ཀྱི་གནས་སྟངས་དེ་བོད་ཡུལ་དང་རྩ་བ་ནས་མི་འདྲ་ཞིང་། ནུབ་ཕྱོགས་སུ་རྣམ་གཡེང་གི་རྒྱུ་ཆེས་མང་པོ་ཡོད། ནང་པའི་ཆོས་ལ་ཐབས་མི་འདྲ་བ་མང་པོ་ཡོད་པས། རྣམ་པ་གང་ཞིག་ཁྱབ་སྤེལ་བྱས་ན་ནུབ་ཕྱོགས་ཀྱི་མི་རྣམས་ལ་ཕན་པར་འགྱུར་བའི་ཐད་ལ་དགོངས་ཚུལ་ག་འདྲ་ཡོད།

ལན། སྤྱིར་ནང་པ་སངས་རྒྱས་པའི་ཆོས་ཟེར་བ་དེའི་རྩ་བ་ནི་འཇིག་རྟེན་ཆོས་བརྒྱད་མགོ་སྙོམས་ཅི་ཐུབ་བྱེད་རྒྱུ་དེ་ཡིན་ལ། ཆོས་ཀྱི་སྙིང་པོ་ཡང་བྱམས་སྙིང་རྗེ་འབའ་ཞིག་ཡིན། ཡིན་ནའང་ཉི་མ་གཅིག་གིས་འཇིག་རྟེན་ཆོས་བརྒྱད་ཀྱི་མགོ་སྙོམས་ཐུབ་དགོས་ན་དཀའ་མོ་ཡིན་པས། ག་ལེར་བྱས་ནས་དེའི་མགོ་སྙོམས་ཅི་ཐུབ་བྱེད་དགོས། དེ་ནས་བྱམས་སྙིང་རྗེ་ཡིས་སློབ་གསོ་གཙོ་བོར་བྱས་ན་དེ་དག་ལ་ཕན་ཆེན་པོ་ཐོགས་རྒྱུ་རེད།

༥ དྲི་བ། ལགས་སོ། །ནུབ་ཕྱོགས་པས་ཀྱང་དེའི་སྐོར་ཉམས་བཞེས་བྱ་རྒྱུ་དེ་གཙོ་བོ་རེད་དམ།

ལན། རེད།

༦ དྲི་བ། ཁྱེད་ཀྱིས་གསུངས་པ་ནང་བཞིན་བསོད་རྒྱལ་རིན་པོ་ཆེས་ཀྱང་དུས་རྟག་ཏུ་གསུངས་པས། བླ་མ་ལ་དད་པ་དང་མོས་གུས་བྱེད་རྒྱུ་དེ་གནད་འགག་ཆེ་ཤོས་ཡིན་པ་ང་ཚོས་ཤེས་ཡོད། རིན་པོ་ཆེ་ཁྱེད་ཀྱི་རྩ་བའི་བླ་མ་དེ་མཁན་པོ་ཐུབ་དགའ་ཡིན་པར་གོ་བྱུང་། མཁན་པོ་ཐུབ་དགའི་ལོ་རྒྱུས་དང་མཛད་རྣམ་གྱི་གཙོ་བོ་གང་དག་ཐུགས་ལ་དྲན་སོས་ཀྱིན་འདུག་གསུང་རོགས།

ལན། དེ་ནི་རྫོགས་ཆེན་མཁན་པོ་ཨ་བུ་ལྷ་དགོངས་ཀྱིས། ཐུབ་བསྟན་འདུལ་བའི་ཚུལ་ཁྲིམས་རྣམ་པར་དག །ལུང་རྟོགས་ཆོས་ཚུལ་བཤད་སྒྲུབ་མཛད་བཟང་སྤེལ། །ཆོས་བརྒྱད་བདུད་སྡེའི་འཆིང་ཞགས་གཅོད་མཛད་པའི། །དཔལ་ལྡན་བླ་མ་མཆོག་ལ་གསོལ་བ་འདེབས། །ཞེས་གསུངས་པ་དེ་ཐུབ་དགའ་ཡིད་བཞིན་ནོར་བུའི་མཛད་རྣམ་གྱི་གཙོ་བོ་རེད།

༧ དྲི་བ། ལགས་སོ། །ཁོང་གིས་སློབ་མ་རྣམས་ལ་རྫོགས་ཆེན་གྱི་བཀའ་ཆོས་གནང་སྟངས་ཐད་གཞན་དང་མི་འདྲ་བའི་ཁྱད་ཆོས་ཅི་ཞིག་ཡོད།

ལན། ཁོང་གིས་སྐལ་བ་དང་ལྡན་པའི་གང་ཟག་རེ་རེ་གཉིས་རེ་ཙམ་མ་གཏོགས་རྫོགས་པ་ཆེན་པོའི་སྨིན་ཁྲིད་རྒྱ་ཆེན་པོར་བྱས་ནས་གསུང་བའི་སྲོལ་མེད།

༨ དྲི་བ། ལགས་སོ། །སྤྱིར་ཁོང་གིས་གཙིགས་ཆེན་གནང་ས་དེ་གང་ཡིན།

ལན། གོང་དུ་གསོལ་འདེབས་ལས་བསྟན་པ་བཞིན། ཁོང་རང་དང་འཁོར་སློབ་ཚང་མས་གཙིགས་ཆེན་གནང་ས་ནི་ཚུལ་ཁྲིམས་དག་རྒྱུ་དང་། ལུང་རྟོགས་ཀྱི་བསྟན་པ་ལ་བྱ་བ་བྱེད་རྒྱུ། ཆོས་བརྒྱད་བདུད་སྡེའི་འཆིང་ཞགས་གཅད་རྒྱུ་བཅས་ཡིན་ཞིང་། ཁོང་རྣམ་པས་སྐུ་ཚེ་གཅིག་གི་ཉམས་བཞེས་དང་གཞན་ལ་སློབ་གསོ་མཛད་རྒྱུ་ཡང་དེ་ཡིན།

༩ དྲི་བ། རིན་པོ་ཆེ་ཁྱེད་ནི་ད་ལྟ་གཏེར་སྟོན་ལས་རབ་གླིང་པའི་སྤྲུལ་སྐུ་རྣམ་པ་གཉིས་སམ་གསུམ་ཡོད་པའི་ནང་གི་གཅིག་རེད། སྤྱིར་ང་ཚོ་ནུབ་ཕྱོགས་པ་རྣམས་ཀྱིས་ཡང་སྤྲུལ་གཅིག་ཡོད་རྒྱུ་དེ་ལ་བསམ་བློ་གཏོང་བདེ་པོ་འདུག་ཀྱང་། དུས་མཚུངས་སུ་ཡང་སྤྲུལ་མང་པོ་ཡོད་རྒྱུ་དེ་བློ་ཡུལ་དུ་མི་ཤོང་བ་ལྟ་བུར་འདུག་པས། དེའི་སྐོར་ནས་བཀའ་སློབ་གནང་རོགས།

ལན། དཔེར་ན་ས་དང་པོ་ཐོབ་པ་ནས་བཟུང་དུས་མཐའི་སྐད་ཅིག་མ་གཅིག་གི་ཡུན་ལ་སྤྲུལ་བ་བརྒྱ་ཕྲག་གཅིག་འགྱེད་ནུས་པ་དང་། ས་གཉིས་པ་ལ་སྟོང་ཕྲག་དང་གསུམ་པ་ལ་འབུམ་ཕྲག་སོགས་སངས་རྒྱས་ཀྱིས་འཇིག་རྟེན་ཁམས་ཀྱི་རྡུལ་གྱི་གྲངས་དང་མཉམ་པའི་སྤྲུལ་བ་འགྱེད་དགོས་ཀྱང་ཐུབ་པ་ཡིན། ལས་རབ་གླིང་པ་སྒེར་ངོས་ནས་བསམ་བློ་བཏང་ན། སྐུ་དངོས་སུ་བཞུགས་སྐབས་ཁོང་གི་སྤྲུལ་བ་རེ་རྒྱ་ནག་ཏུ་བྱོན་ཅིང་། སྤྲུལ་བ་རེ་དབུས་གཙང་ཕྱོགས་སུ་བྱོན་ནས་ཆོས་གསུངས་ཚུལ་རྣམ་ཐར་ནང་དུ་ཡོད། དེས་ན་སྤྲུལ་བ་གཉིས་སམ་གསུམ་ཙམ་འབྱུང་བ་ནི་ཆེས་སླ་མོ་རེད་ཨང་།

༡༠ དྲི་བ། གཏེར་སྟོན་ལས་རབ་གླིང་པའི་སྤྲུལ་སྐུ་རྣམས་ཀྱི་སྐོར་ལ་བཀའ་སློབ་གནང་རྒྱུ་ཡོད་དམ།

ལན། གཏེར་སྟོན་ལས་རབ་གླིང་པ་ཁོང་གི་ལུང་བསྟན་ནང་དུ་སྤྲུལ་སྐུ་བརྒྱ་རྩ་གཅིག་འབྱོན་ཞེས་གསུངས་ཡོད་ཟེར། དེ་ཁོང་གི་རྩ་བའི་ཆོས་བདག་དང་སློབ་མ་ཚོས་གསུངས་པ་ཚོར་མྱོང་བ་མ་གཏོགས་ཡིག་ཆ་གསལ་བོར་མ་མཐོང་། བཀའ་ཡོངས་རྫོགས་འདུས་པའི་མདོ་བྱང་ཕྱི་མ་ལས་དེའི་སྐོར་ཅུང་ཟད་གསལ་བོར་གསུངས་ཡོད།

༡༡ དྲི་བ། ལས་རབ་གླིང་པའི་སྤྲུལ་སྐུ་རྣམས་ཀྱི་མ་འོངས་མཛད་འཕྲིན་རྣམས་ཇི་ལྟར་ཡིན་ཚུལ་གསུང་རོགས།

ལན། ཁོང་གི་སྐུ་དུས་ཀྱི་མི་ཐོག་གཅིག་གི་འཕྲོར་འཕྲིན་ལས་སྔར་ལས་དར་བར་འགྱུར་ཅིང་། དེ་ཡང་མི་ལོ་ལྔ་བརྒྱའི་བར་དུ་བསྟན་པ་གནས་པར་འགྱུར་ཞེས་གསུངས་པ་དེས་གོ་ཐུབ་པ་ཡིན།

༡༢ དྲི་བ། བླ་མ་ཆེན་པོ་མང་པོ་ཞིག་གིས་རིན་པོ་ཆེ་ཁྱེད་ནི་གཏེར་སྟོན་ལས་རབ་གླིང་པའི་སྤྲུལ་སྐུ་རེད་ཅེས་ངོས་འཛིན་གནང་ཡོད་པས། ཁྱེད་ཉིད་ལ་སྔོན་གནས་རྗེས་སུ་དྲན་པ་སོགས་ཡོད་དམ།

ལན། ང་རང་ངོས་ནས་ཆེན་པོ་མེད། ཡོད་ཀྱང་དེ་ནང་བ་སངས་རྒྱས་པ་རྣམས་ཀྱི་གསང་བ་ཡིན། ང་རང་དགེ་སློང་ཞིག་རེད། དགེ་སློང་གིས་དགོས་པ་ཁྱད་པར་ཅན་མེད་ན་དེ་ལྟ་བུ་བཤད་པའི་སྲོལ་མེད།

༡༣ དྲི་བ། གཏེར་སྟོན་ལས་རབ་གླིང་པ་དེ་ཧ་ཅང་ངོ་མཚར་བའི་གཏེར་ཆེན་ཞིག་རེད། ཁོང་གི་གཏེར་རྫས་དང་གཏེར་ཆོས་ལ་གཞན་དང་མ་འདྲ་བའི་དམིགས་བསལ་གྱི་ཁྱད་ཆོས་ཅི་ཡོད།

ལན། ཁོང་གི་གཏེར་རྫས་ལ་བསམ་བློ་བཏང་ན། ཞག་གཅིག་གཉིས་ཀྱི་ཡུན་ལ་གསེར་སྐུ་དང་སྒྲོམ་བུ་སོགས་སྒམ་མང་པོ་ལེན་རྒྱུ་ཡོད་ཅིང་། གཏེར་ཆོས་ལ་བསམ་ན་ཡང་ཚེ་སྒྲུབ་ཡིད་བཞིན་ནོར་བུ་ལྟ་བུའི་སྔོན་གངས་རིའི་ལྗོངས་སུ་བྱུང་མ་མྱོང་བའི་ཟབ་ཆོས་བསམ་གྱིས་མི་ཁྱབ་པ་དག་ཡོད་པ་རེད།

༡༤ དྲི་བ། རྟེན་འབྲེལ་ཉེས་སེལ་དེ་ནུབ་ཕྱོགས་སུ་ཡོད་མཁན་གྱི་མཁའ་འགྲོ་མའམ་གཞན་ཞིག་གི་རོགས་རམ་ལ་བརྟེན་ནས་གཏེར་སྒོ་ཕྱེས་པ་རེད་ཅེས་བཤད་བཞིན་འདུག་པས། དེ་བདེན་པ་ཡིན་ནམ།

ལན། དེ་ནི་རྣམ་ཐར་ནང་དུ་བལྟ་དགོས་པ་ལས་ངས་ད་ལྟ་ཐད་ཀར་ཡིད་ལ་གསལ་ཁ་ཅན་ཞིག་དྲན་གྱིན་མི་འདུག

༡༥ དྲི་བ། ད་ལྟ་ང་ཚོའི་ཆོས་ཚོགས་ཚང་མས་རྟག་པར་རྟེན་འབྲེལ་ཉེས་སེལ་དང་ཕུར་བ་གཉིས་ཉམས་སུ་ལེན་བཞིན་ཡོད། གཏེར་སྟོན་ལས་རབ་གླིང་པའི་གཏེར་ཆོས་ལས་དེ་མིན་གཞན་གང་ཞིག་གཙོ་བོར་བྱས་ནས་ཉམས་སུ་ལེན་དགོས་པའི་སྐོར་གྱི་བཀའ་སློབ་གནང་རོགས།

ལན། ཁོང་གི་སྐུ་དུས་ན་ཡང་གཙོ་བོ་དེ་གཉིས་ཉམས་སུ་ལེན་པ་རེད། ད་ལྟ་ཡང་གཏེར་སྟོན་ལས་རབ་གླིང་པ་ལ་གསུང་ཆོས་མང་པོ་ཡོད་པས། དེ་དག་ཐམས་ཅད་ཅི་ཐུབ་གང་ཐུབ་ཀྱིས་ཉམས་བཞེས་མཛད་ན་ཡག་རྒྱུ་མ་གཏོགས་ཉམས་ལེན་བྱེད་ཆེ་སོང་ཟེར་བ་ཞིག་མེད། གཙོ་བོ་རྟེན་འབྲེལ་ཉེས་སེལ་དང་ཕུར་བ་གཉིས་ཉམས་སུ་བླངས་ན་ཡག་པོ་རེད།

༡༦ དྲི་བ། སྔོན་གཏེར་སྟོན་མང་པོ་བྱུང་ནས་གཏེར་མའི་ཆོས་སྐོར་རྒྱུན་བསྐྱངས་བ་རེད། མ་འོངས་པར་བོད་ཡུལ་སོགས་སུ་གཏེར་ཆོས་དར་ཁྱབ་ཅི་འདྲ་ཡོང་བའི་ཕྱོགས་ལ་གཟིགས་སྣང་ག་འདྲ་ཡོད།

ལན། སངས་རྒྱས་ཀྱི་བསྟན་པ་མ་ནུབ་བར་ཨོ་རྒྱན་རིན་པོ་ཆེའི་ཕྲིན་ལས་མི་ནུབ། ཨོ་རྒྱན་རིན་པོ་ཆེའི་ཕྲིན་ལས་མ་ནུབ་བར་དུ། ཇི་སྐད་དུ། གཏེར་སྟོན་ལང་མ་ལང་མ་འབྱུང་། །གཏེར་སྟོན་སྤང་ལ་ཤྭ་མོ་རྡོལ་བཞིན་འབྱུང་། །ཞེས་པ་ལྟར་ད་དུང་ཡང་གཏེར་སྟོན་དང་གཏེར་ཆོས་རྒྱུན་ཆད་མེད་པར་ཅི་མང་འབྱུང་རྒྱུ་རེད།

༡༧ དྲི་བ། འོ་ན་གཏེར་སྟོན་དེ་ནུབ་ཕྱོགས་སུ་འབྱུང་སྲིད་དམ།

ལན། ལོས་སྲིད། གཏེར་སྟོན་འགྲོ་དོན་གང་དུ་ཡོད་ན་དེ་ལ་འབྱོན་རྒྱུ་རེད་མ་གཏོགས་མཐའ་གཅིག་ཏུ་ས་ཆ་གཅིག་ནས་སྡོད་འདུག་རྒྱུ་ག་ལ་ཡིན།

༡༨ དྲི་བ། རིན་པོ་ཆེ་ཁྱེད་སྐུ་ཚེ་གཅིག་ལ་བོད་ཡུལ་དུ་བཞུགས་པ་རེད། སྐབས་དེར་ཁོ་ཚོས་ནང་ཆོས་རྩ་མེད་དུ་གཏོང་དུས། རིན་པོ་ཆེས་མཚམས་མ་བཞག་པར་རང་གིས་ཆོས་ཉམས་བཞེས་དང་གཞན་ལ་འཆད་སྤེལ་གནང་ཐུབ་པ་དེ་ག་འདྲ་བྱས་ནས་བྱུང་བ་ཡིན།

ལན། བླ་མ་དཀོན་མཆོག་གསུམ་ལ་གསོལ་བ་བཏབ་པའི་ཐུགས་རྗེ་ཁོ་ནས། ང་རང་ལ་གནོད་འཚེ་དང་དཀའ་ངལ་གང་ཡང་བྱུང་མ་སོང་ལ། ཆོས་ཀྱི་ཉམས་ལེན་སོགས་ལའང་བར་ཆད་གང་ཡང་མ་བྱུང་། དེ་དཀོན་མཆོག་གསུམ་གྱི་ཐུགས་རྗེ་ཡིས་ཡིན།

༡༩ དྲི་བ། ཉེ་ཆར་རིན་པོ་ཆེ་ཁྱེད་རྒྱ་ནག་པེ་ཅིང་གི་མཐོ་རིམ་ནང་བསྟན་སློབ་གྲྭ་རུ། དགེ་རྒན་ཆེན་མོའི་མིང་ཐོག་ནས་གདན་འདྲེན་ཞུས་ཤིང་བཀའ་སློབ་གནང་རྒྱུ་བྱུང་བར་བཤད། དེའི་སྐབས་སུ་ཁོང་ཚོས་བཀའ་ཆོས་དེ་ཡག་པོ་ཞིག་མཉན་ཏེ་ཉམས་ལེན་བྱས་པ་ཡིན་ནམ། རྒྱ་མིའི་ལྟ་སྟངས་དེ་གཞི་རྩ་ནས་འགྱུར་བཞིན་པའི་རྣམ་པ་ལྟ་བུ་ཞིག་ཡོད་དམ།

ལན། དེར་སློབ་ཚོགས་ཧ་ཅང་མང་པོ་མེད་པར་ཉུང་ཤས་རེད། ཉུང་ཤས་དེ་ཚང་མ་ཁ་ཞེ་གཉིས་མེད་ཀྱིས་ཆོས་ལ་དགའ་བ་དང་སྤྲོ་བ། མོས་པ་ཡོད་མཁན་རེད་འདུག ངས་ཆོས་བཤད་པའི་གནས་སྐབས་ན་ཚང་མའི་སེམས་དགའ་ཞིང་སྤྲོ་བར་འདུག་ལ། ཉམས་སུའང་ལེན་ས་རེད་སྙམ་པ་བྱུང་། དེ་མ་གཏོགས་རྒྱ་མི་སྤྱི་ཁྱབ་ཀྱི་གནས་བབས་ངས་ཧ་གོ་བ་མ་རེད།

༢༠ དྲི་བ། མཇུག་མཐར་ང་ཚོ་ཚང་མ་ལ་དམིགས་བསལ་གྱི་བསླབ་སྟོན་ཞིག་གནང་རོགས།

ལན། ཡ་ཡ། ཁྱེད་རྣམ་པས་སྤྱིར་དཀོན་མཆོག་གསུམ་དང་། སྒོས་སུ་རང་གི་བླ་མ་རིན་པོ་ཆེ་ལ་དད་པ་ཞོག སེམས་ཅན་ཐམས་ཅད་ལ་སྙིང་རྗེ་སྒོམས། ཉེ་ལམ་རྨད་དུ་བྱུང་བ་འོད་གསལ་རྫོགས་པ་ཆེན་པོའི་ཆོས་དེ་ལ་ཉམས་བཞེས་ལྷོད་པ་མེད་པར་གྱིས་དང་དེ་ལས་ལྷག་པའི་བསླབ་བྱ་སྟོན་རྒྱུ་མེད།

སྒེར་མཇལ་ཡུད་ཙམ་ཞིག

རི་མགུལ་སྤྲུལ་སྐུ་ནི་ཆོས་རྗེ་ཉིད་ལས་རབ་གླིང་དུ་བཞུགས་རིང་གི་ལོ་ཙཱ་བ་ཡིན་ཞིང་། ལོ་མང་འདས་པའི་རྗེས་སུ་ང་ཚོས་བཅར་འདྲི་བྱེད་སྐབས། ཁོང་གིས་འདི་ལྟར་གསུང་།

མཁན་ཆེན་འཇིགས་མེད་ཕུན་ཚོགས་སྐུ་འཁོར་ཕྱི་ལོ་༡༩༩༣ལོར་ཧྥ་རན་སི་རྒྱལ་ཁབ་ཏུ་ཡོད་པའི་ལས་རབ་གླིང་ཆོས་ཚོགས་སུ་ཕེབས་ཏེ། ཆོས་ཀྱི་འཁོར་ལོ་བསྐོར་གནང་བའི་སྐབས་དེར་ཕྲན་ལ་དབྱིན་སྐད་ཀྱི་གསུང་བསྒྱུར་ཞུ་རྒྱུའི་གོ་སྐབས་རྨད་དུ་བྱུང་བ་ཞིག་ཐོབ་པ་རེད། མཁན་ཆེན་ཡིད་བཞིན་ནོར་བུ་ནི་ཉིད་ཀྱི་ལྕམ་སྲིང་དང་སྐུའི་ཚ་མོ་རྗེ་བཙུན་མ་མུ་མཚོ། དེ་བཞིན་དུ་དེ་དུས་སྐུ་ན་གཞོན་ཡང་མཁྱེན་རབ་མཆོག་ཏུ་བཀྲ་བའི་མཁན་པོ་རྣམ་པ་གཉིས་ཏེ། མཁན་ཆེན་རྣམ་གྲོལ་དང་མཁན་ཆེན་བསོད་དར་རྒྱས་ཀྱང་མཉམ་དུ་ཕེབས་འདུག མཁན་ཆེན་ཡིད་བཞིན་ནོར་བུ་མཆོག་གི་ངོ་མཚར་བའི་ལོ་རྒྱུས་མང་པོ་གོ་མྱོང་ཡོད་པ་དང་བླ་རུང་སྒར་གྱི་སྐོར་ལ་ཡང་ཆ་རྒྱུས་ཅུང་ཟད་ཅིག་ཡོད། ལྷག་པར་དུ་དེ་དུས་ཟབ་གསང་བླ་ན་མེད་པའི་དབང་དང་གདམས་ངག་ཐོབ་པའི་སྐལ་བ་བཟང་པོ་ནི་རང་ཉིད་ཀྱི་མི་ཚེའི་ནང་ཆེས་རྨད་དུ་བྱུང་བའི་དུས་ཚོད་ཅིག་ཏུ་གྱུར་སོང་།

མཁན་ཆེན་སྐུ་གཟུགས་ཅུང་བདེ་མིན་ལ་བརྟེན་དམིགས་བསལ་མཇལ་ཁ་ཞུ་མ་ཕོད་ཀྱང་། སྔ་དྲོ་ཞིག་ལ་མཁན་པོ་ཞིག་གིས་ཕྲན་ཡིད་བཞིན་ནོར་བུའི་གཟིམས་ཆུང་དུ་ཡིད་ལ་མེད་པར་ཁྲིད་ནས་མཇལ་ཁ་ཞིག་གནང་མཛད་བྱུང་། ནམ་རྒྱུན་དུ་ཡང་ཕྲན་ནི་མཁས་གྲུབ་ཀྱི་སྐྱེས་བུ་ཆེན་པོ་ཞིག་གི་སྐུ་མདུན་དུ་བསླེབས་སྐབས་དྲི་བ་དང་ཞུ་འདོད་ཐམས་ཅད་བརྗེད་འགྲོ་བ་ཞིག་ཡིན་པས། ཅི་ཞུ་མེད་པར་ཕྲན་གྱི་དགོན་པའི་སྐོར་ལ་ཅུང་ཟད་ཞུ་རྒྱུ་རེད་སོང་། ཕྲན་གྱི་དགོན་པ་ནི་རི་མགུལ་དགོན་པ་ཟེར་བའི་ཁམས་ཕྱོགས་སུ་ཡོད་པའི་ཀརྨ་བཀའ་བརྒྱུད་ཀྱི་དགོན་པ་ཆུང་ཆུང་ཞིག་ཡིན། དེ་སྐབས་དགོན་པ་དེ་ས་གནས་ཀྱི་མི་མང་དང་གསར་བརྗེ་སྐབས་ལུས་ཡོད་པའི་གྲྭ་རྒན་རྣམས་ནས་གསར་བཞེངས་བྱེད་བཞིན་པའི་སྐབས་ཡིན་པ་དང་། གྲྭ་པ་གསར་པ་རྣམས་ལ་སློབ་ཁྲིད་གནང་མཁན་མཁན་པོ་ཐོབ་དཀའ་ཚུལ། ཕྲན་ནས་ཀྱང་དངུལ་ཅུང་ཟད་ཐོབ་པ་རྣམས་དེར་བཏང་ནས་དེ་རྣམས་གྲྭ་པ་གཞོན་པ་ཚོར་སློབ་སྦྱོང་ཁོ་ནར་བེད་སྤྱོད་གནང་རོགས་ཞུ་གི་ཡོད་ཚུལ་སོགས་ཞུ་རྒྱུ་བྱུང་སོང་། མཁན་ཆེན་མཆོག་ནས་ཀྱང་སློབ་སྦྱོང་ཐོས་བསམ་གལ་གནད་ཆེ་ཚུལ་དང་། ཆོས་ལ་ཐོས་བསམ་མེད་ན་ཆོས་ངོ་མ་སྒྲུབ་མི་ཤེས་པའི་ཚུལ་སོགས་བཀའ་གནང་སོང་།

དེ་ལྟར་ཕྲན་སྐུ་མདུན་དུ་ཡུན་རིང་བསྡད་མེད་ལ། ཁོང་གི་བཀའ་ཁྲིད་ཐོབ་པ་ལས་ལྷག་ཞུ་རྒྱུ་དང་དགོས་རྒྱུ་མེད་ཅིང་། དེ་ལས་ལྷག་པའི་རེ་བའང་ཅི་ཡང་བྱས་མེད།

དེ་ནས་ལོ་འགའ་ཕྱིན་པའི་རྗེས་ལ་གསར་འགྱུར་ཞིག་ཐོས་པ་དེས་ཡ་མཚན་དང་ངོ་མཚར་སྙིང་གཡོ་བ་ཞིག་བྱུང་། མཁན་ཆེན་འཇིགས་མེད་ཕུན་ཚོགས་བོད་དུ་ཕྱིར་ཕེབས་ནས་རང་ཉིད་ཀྱི་སྒར་དེ་ཉིད་དུ་བཀའ་བརྒྱུད་ཀྱི་བཤད་གྲྭ་ཞིག་བཙུགས་གནང་བ་མ་ཟད། དེར་རང་ཉིད་ཀྱི་མཁན་པོ་མཁས་ཤིང་ཉམས་མྱོང་དང་ལྡན་པ་ཞིག་ལ་བཀའ་བརྒྱུད་ཀྱི་གཞུང་ལུགས་རྣམས་ཁྲིད་བཅུག་གནང་འདུག ཕྲན་གྱིས་གོ་ཐོས་ལ། དེ་ལྟར་གནང་དགོས་པའི་རྒྱུ་མཚན་མང་པོ་ཡོད་པའི་ནང་ནས་གཅིག་ནི། ཁོང་ནུབ་ཕྱོགས་སུ་ཕེབས་སྐབས་བཀའ་བརྒྱུད་པའི་སྤྲུལ་སྐུ་ཁོང་ལ་གསུང་བསྒྱུར་ཞུ་མཁན་ཞིག་གིས་ཞུ་བ་ཕུལ་བྱུང་ཞེས་གསུངས་ཡོད་པར་གྲགས། འོན་ཀྱང་འདི་བདེན་པ་ཡིན་མིན་མི་ཤེས། ཁོང་ལ་བཀའ་བརྒྱུད་སྤྲུལ་སྐུ་གསུང་བསྒྱུར་བ་གཞན་ཡོད་མེད་ཀྱང་མི་ཤེས། གང་ལྟར་བཀའ་བརྒྱུད་བཤད་གྲྭ་འདི་ནས་བཀའ་བརྒྱུད་ཀྱི་མཁན་པོ་རྨད་དུ་བྱུང་བ་མང་པོ་ཞིག་བསྐྱེད་བསྲིངས་ཡོད། ཕྲན་གྱི་དགོན་པ་ནས་ཀྱང་གྲྭ་པ་འགའ་བླ་རུང་སྒར་དུ་སློབ་སྦྱོང་བྱེད་དུ་སོང་ཡོད་ཅིང་། དེ་དག་མཁས་པར་གྱུར་པ་མ་ཟད་ཆོས་པ་བཟང་པོ་རེ་ཡང་བྱུང་སོང་། བླ་རུང་སྒར་དུ་ཅུང་ཟད་རེ་སྡོད་མཁན་ཚང་མས་བཤད་རྒྱུར། ཆོས་སྒར་དེའི་ནང་དུ་ཞུགས་མ་ཐག་དེའི་ཆོས་པའི་འཁོར་ཡུག་གི་བྱིན་རླབས་ལྟ་བུས་རང་ཉིད་ཀྱི་ཚོར་སྣང་འགྱུར་འགྲོ་བ་མ་ཟད། དེར་སྡོད་རིང་ཆོས་སྒྲུབ་པའི་འདོད་པ་རང་ཤུགས་ཀྱིས་བསླེབ་ཡོང་བ་དང་། ཆོས་སྒྲུབ་པ་ལ་དཀའ་ངལ་མེད་པ་ཞིག་ཡོང་གི་འདུག་ཅེས་བཤད་མཁན་མང་པོ་བྱུང་།

བླ་རུང་སྒར་ནི་ད་ལྟར་ཡང་མཁན་ཆེན་ཡིད་བཞིན་ནོར་བུ་འཇིགས་མེད་ཕུན་ཚོགས་འབྱུང་གནས་མཆོག་གི་བྱིན་རླབས་ཀྱི་གཟི་བྱིན་ལས། མཁན་པོ་བཀའ་དྲིན་ཅན་རྣམས་ཀྱིས་དེ་ཉིད་ཀྱི་རྒྱུན་དྲི་མ་མེད་པ་མ་ཉམས་པར་སྐྱོང་བཞིན་ཡོད་འདུག བླ་རུང་སྒར་ནི་སྔར་བཞིན་འཛམ་གླིང་འདིར་ནང་པ་སངས་རྒྱས་པའི་ཆོས་སྒར་ཆེ་ཤོས་དེ་ཡིན་པ་ཙམ་མ་ཟད། དེའི་ཆོས་ཕྱོགས་ཀྱི་ཤུགས་རྐྱེན་ཡང་གླིང་འདིར་ཆེ་ཤོས་ཤིག་ཡིན་སྲིད་ཀྱི་རེད།

བརྗེད་དུ་མེད་པའི་བྱིན་རླབས།

སྐུ་ཞབས་ཕཱ་ཁྲཱེར་ཁི་གྷ་ཧྥི་ནེ་（Patrick Gaffney）ནི། ཁེམ་བྷི་རད་ལྗི་སློབ་ཆེན་ནས་སློབ་ཐོན་བྱུང་བའི་ལོ་ཙཱ་བ་དང་རྩོམ་པ་པོ་ཞིག་ཡིན་ལ། ཆོས་རྗེ་ཉིད་ལས་རབ་གླིང་དུ་འབྱོན་སྐབས། ཁོང་ནི་ཆོས་ཚོགས་དེའི་བཀོད་སྒྲིག་ཚན་ཆུང་གི་མི་སྣ་ཞིག་ཀྱང་ཡིན། ཁོང་ལ་ཆོས་རྗེ་ཉིད་ཕེབས་པའི་སྐོར་གྱི་ཕྱིར་དྲན་དང་ཚོར་སྣང་མང་དུ་ཡོད་པ་འདི་ལྟར་གླེང་།

ཕྱི་ལོ་༡༩༩༣ལོར། ཆོས་རྗེ་འཇིགས་མེད་ཕུན་ཚོགས་ཧྥ་རན་སིའི་ལས་རབ་གླིང་དུ་འབྱོན་སྐབས། ང་རང་ཆོས་ཚོགས་དེའི་བཀོད་སྒྲིག་ཚན་ཆུང་གི་མི་སྣ་ཞིག་ཡིན་པས་སྐལ་བ་ཧ་ཅང་བཟང་སོང་། ང་ཚོས་སྔོན་ཆད་ནས་ཆོས་རྗེ་མཆོག་གིས་ཡ་གླིང་དུ་བོད་བརྒྱུད་ནང་བསྟན་གྱི་བསླབ་སྒོམ་སྲོལ་རྒྱུན་སླར་གསོ་མཛད་པའི་བརྗོད་ལས་འདས་པའི་རླབས་ཆེན་གྱི་མཛད་འཕྲིན་རྣམས་གོ་ཐོས་བྱུང་མྱོང་ཞིང་། དེ་དང་ཆབས་ཅིག་གཏེར་ཆེན་ལས་རབ་གླིང་པའི་སྤྲུལ་བའི་སྐུ་མཆོག་རྣམ་གཉིས་དངོས་སུ་མཇལ་འཕྲད་ཡོང་བར་རེ་སྒུག་ཆེན་པོ་བྱས་པ་ཡིན།

ལོ་སུམ་ཅུའི་སྔོན་དུ། ཆོས་རྗེ་མཆོག་ལས་རབ་གླིང་དུ་ཕེབས་ཏེ། གཞི་རྒྱ་ཡངས་པའི་གུར་ཆེན་པོ་ཞིག་གི་ནང་དུ་དད་ལྡན་རྣམས་ལ་ཆོས་ཁྲིད་གནང་ཞིང་། སྐབས་དེའི་ཆོས་ཞུ་མཁན་རྣམས་ཀྱི་ཁྲོད་དུ་ཆོས་ཀྱི་ཉམས་མྱོང་གིས་ཕྱུག་པའི་བླ་མ་ཡོད་ལ། མང་ཆེ་བ་ནི་ལས་གླིང་ཆོས་ཚོགས་ཀྱི་དབྱར་ཟླ་གསུམ་གྱི་མཚམས་སྒྲུབ་ལ་ཞུགས་པའི་ཆོས་པ་རྣམས་ཡིན། ཆོས་རྗེ་ཉིད་ཀྱི་བཀའ་སློབ་ཐོས་མ་ཐག ཁོང་གི་བྱིན་རླབས་དང་སྤྲོ་སེམས། ཐུགས་བརྩེ་ཡི་ནུས་པ་ཆེན་པོས་ང་ཚོ་ཚང་མའི་ཡིད་སེམས་དབང་མེད་དུ་ཕྲོགས་ཤིང་། ཁྱད་པར་དུ་ཁོང་གི་རྒྱ་ཆེ་བའི་ཤེས་རབ་དང་གཏིང་ཟབ་པའི་མན་ངག་དེས་ང་ཚོ་ཧ་ལས་པར་བྱས་སོང་། ཆོས་རྗེ་མཆོག་སྐུ་བརྗིད་ཆགས་པའི་ངང་དུ་ཆོས་ཁྲིར་བཞུགས་པ་མཇལ་བ་དང་ཆོས་གསུང་བའི་སྒྲ་སྐད་ཐོས་པ་ཙམ་གྱིས་ཀྱང་། ང་ཚོ་ཚང་མར་བསམ་ཡུལ་ལས་འདས་པའི་བྱིན་མཐུ་ཞིག་བསྩལ་སོང་། ཆོས་རྗེ་ཉིད་ཀྱིས་ཉིན་རེ་བཞིན་ང་ཚོར་ཆོས་གསུང་བའི་སྐབས། རྙིང་མ་སྤྱི་དང་ཁྱད་པར་རྫོགས་པ་ཆེན་པོའི་ཆོས་སྐོར་ཏེ། ཕུར་པ་རྡོ་རྗེ་གཞོན་ནུའི་སྒྲུབ་ཐབས་དང་ཀ་དག་ཁྲེགས་ཆོད། ལྷུན་གྲུབ་ཐོད་རྒལ་གྱི་ཆོས་རྣམས་ཤེས་རབ་དང་སྤོབས་པའི་རྩལ་ལས་འབད་མེད་ཀློང་བརྡོལ་དུ་བྱུང་བས། ང་ཚོ་ཚང་མའི་ཡིད་སེམས་དབང་མེད་དུ་བཀུག་སོང་ལ། དེར་བཞུགས་པའི་མཁས་པ་ཚང་མས་ཀྱང་ཁོང་གི་རྨད་དུ་བྱུང་བའི་ཤེས་རབ་ལ་བསྟོད་བསྔགས་ཀྱི་མེ་ཏོག་ཆར་དུ་བསྙིལ།

ཆོས་རྗེ་མཆོག་གིས་གཏེར་ཆེན་ལས་རབ་གླིང་པའི་རྟེན་འབྲེལ་ཉེས་སེལ་དང་ཕུར་པ་ཡང་གསང་སྙིང་པོ་གཉིས་ཀྱི་དབང་གསུངས་ཤིང་། ཆོས་སྐོར་དེ་གཉིས་ནི་རིག་པ་ཆོས་ཚོགས་ཀྱི་ཉམས་ལེན་གྱི་གཙོ་བོ་ཡིན། དེར་མ་ཟད། ཆོས་རྗེ་རང་ཉིད་ཀྱི་གཏེར་ཆོས་འཇམ་དཔལ་རྫོགས་པ་ཆེན་པོའི་དབང་ཡང་གསུངས། ང་ཚོར་དབང་གནང་བའི་སྐབས་སུ། ཁོང་གིས་འཇིག་རྟེན་ལས་འདས་པའི་ལྟ་དགོངས་ཟབ་མོར་བརྟེན་ནས། དག་མཉམ་བདེན་པ་དབྱེར་མེད་ཀྱི་ལྟ་བ་ངོ་སྤྲོད་མཛད་དེ་འཇིག་རྟེན་ཐམས་ཅད་དག་པ་རབ་འབྱམས་སུ་གྱུར་པའི་སྣང་ཤེས་ཀྱི་བྱིན་རླབས་ཐོབ་པར་བྱས། རྫོགས་པ་ཆེན་པོའི་ཆོས་གསུང་སྐབས། ཁོང་གིས་རང་རྟོན་དང་ཁོ་ཐག་ཆོད་པའི་སྒོ་ནས་སེམས་ཀྱི་རང་བཞིན་ངོ་སྤྲོད་གསལ་ཐག་ཆོད་པ་ཞིག་གནང་ནས། ང་ཚོ་ཚང་མར་རྫོགས་ཆེན་གྱི་བརྒྱུད་པའི་བླ་མ་རྣམས་ཀྱི་ཆོས་བརྒྱུད་ལ་འབྲེལ་བ་ཟབ་མོ་བཞག་སོང་། རྫོགས་པ་ཆེན་པོའི་ཆོས་ཐོག་མར་མི་ཡུལ་དུ་དར་བར་མཛད་པའི་སློབ་དཔོན་དགའ་རབ་རྡོ་རྗེ་ནས་བཟུང་། ད་ལྟའི་རྩ་བའི་བླ་མ་ཡན་ཆོད་དུ་བར་མ་ཆད་པར་བྱོན་པའི་བླ་མ་རེ་རེ་བཞིན་ཁོང་ལ་སྒེར་ངོས་ནས་འབྲེལ་བ་ཟབ་མོ་རེ་ཡོད་རྒྱུ་རེད་སྙམ་པའི་སྣང་བ་སྟེར་བར་མ་ཟད། ཁོང་ནི་དེ་འདྲའི་བྱམས་བརྩེ་དང་ལྷག་བསམ། ཁེངས་སྐྱུང་དང་དམན་ས་འཛིན་པའི་སྤྱོད་ལམ་ལྡན་པ་ཞིག་རེད།

ཆོས་ཁྲིད་གསུངས་རྗེས་ངེད་ཅག་གིས་ཁོང་ལ་བཅར་འདྲི་བསྡུས་པ་ཞིག་བྱེད་པའི་གོ་སྐབས་བྱུང་། ཁོང་གིས་ངལ་གསོ་མཛད་པའི་དུས་སུ་བཅར་འདྲིའི་བཀའ་གནང་ཐོབ་ཅིང་། རུ་མགུལ་རིན་པོ་ཆེས་སྐད་སྒྱུར་མཛད། བཅར་འདྲི་བྱེད་ས་ནི་ལས་རབ་གླིང་གིས་ཆེས་ཐོག་མར་འཛུགས་སྐྲུན་བྱས་པའི་སྔོན་ཆད་ཀྱི་ཁང་ཤག་ཅིག་ཡིན། ཉིན་དེའི་ཕྱི་དྲོར། ཁོང་གཟིམས་ཁྲིའི་སྟེང་དུ་བཞུགས་ཤིང་སྐུ་བསྙེས་ནས་ངལ་གསོ་བྱེད་བཞིན་བཅར་འདྲི་དང་ལེན་གནང་། བར་སྐབས་ཤིག་ཏུ་ངས་ཀྱང་སྙིང་སྟོབས་ཆེར་བསྐྱེད་ཀྱིས་ཁོང་ལ། ཁྱེད་ཀྱིས་རིག་གསར་གྱི་དུས་ངན་དེ་ཇི་ལྟར་བརྒལ་བ་ཡིན་ཞེས་དྲིས་པ་ན། ཁོང་གིས་ཚིག་ཉུང་ངུ་ཞིག་གིས་ང་རང་མི་སྨྲ་བའི་བརྟུལ་ཞུགས་འཛིན་པའི་གནས་སུ་བཀོད་སོང་སྟེ། ཁོང་གི་ཞལ་ནས། ངས་དཀོན་མཆོག་གསུམ་ལ་རྩེ་གཅིག་ཏུ་དད་པ་བྱས་པས། དཀའ་ཁག་ཐམས་ཅད་རང་ཤུགས་ཀྱིས་སེལ་ཐུབ་པ་བྱུང་། ཞེས་ཚིག་གཅིག་གིས་སུས་ཀྱང་བརྒལ་དུ་མི་བཏུབ་པའི་ལན་གསལ་བོར་བཏབ་པ་ལས། དད་པ་ཁོ་ནའི་སྟོབས་ཀྱིས་ཐམས་ཅད་གེགས་མེད་དུ་འགྲུབ་པ་ཡིན་པར་བསྟན།

རླབས་ཆེན་གྱི་སྐྱེས་བུ་ཁོང་ལ་ཐུན་མིན་གྱི་ཡོན་ཏན་དང་མངོན་རྟོགས་ཀྱི་བྱིན་རླབས་ལྡན་པར་མ་ཟད། ཁོང་ང་ཚོའི་ལས་རབ་གླིང་དུ་བྱོན་པས་ཤུགས་རྐྱེན་ག་འདྲ་ཐེབས་པར་ངས་རྟག་ཏུ་བསམ་བློ་བཏང་བ་ན། ཁོང་ལས་རབ་གླིང་དུ་ཕེབས་ཏེ་ཆོས་གསུངས་པ་ནས་བཟུང་། ང་ཚོའི་ཆོས་ཚོགས་དེ་ཉིན་རེ་བཞིན་དུ་དར་ཞིང་རྒྱས་པར་གྱུར་ནས། ཆོས་ཀྱི་འཆད་ཉན་དང་ཆོས་ཚོགས་འཚོགས་པ། མཚམས་བསྙེན་སྒྲུབ་ཀྱི་མཛད་སྒོ་རྣམས་ད་ལྟའི་བར་རྒྱུན་མ་ཆད་པར་ལེགས་པར་སྤེལ་ཐུབ་པ་ཆགས་ཡོད། ཆོས་རྗེ་ཉིད་གནས་འདིར་ཕེབས་པས། ང་ཚོ་སློབ་མ་རྣམས་ཀྱི་སེམས་སུ་བརྗེད་དུ་མེད་པའི་ཕྱིར་དྲན་བཞག་པར་མ་ཟད། ལས་རབ་གླིང་ཆོས་ཚོགས་ཀྱི་མ་འོངས་འཕེལ་རྒྱས་ལའང་གཏིང་ཟབ་ལ་རྒྱུན་རིང་བའི་ཤུགས་རྐྱེན་བཟང་པོ་ཐེབས་སོང་།

ང་ཚོ་ལ་མཚོན་ན། ཆོས་རྗེ་འཇིགས་མེད་ཕུན་ཚོགས་རིན་པོ་ཆེ་གནས་འདིར་ཕེབས་པ་ནི། དོན་སྙིང་ཆེ་ཞིང་བརྗེད་ཐབས་བྲལ་བའི་བྱིན་རླབས་དང་ལྡན་པའི་ལོ་རྒྱུས་རང་བཞིན་གྱི་རྡོ་རིང་ཞིག་ཡིན་ལ། ཁོང་གི་དེ་འདྲའི་བླ་ན་མེད་མའི་རླབས་ཆེན་གྱི་མཛད་བཟང་དག་ནི། དུས་རྟག་ཏུ་ང་ཚོའི་སེམས་ཀྱི་ཀློང་ནས་བརྗེད་དུ་མེད་པ་ཞིག་ཡིན། ཞེས་ཟེར།

སྐུ་ཞབས་ཕཱ་ཁྲཱེར་ཁི་གྷ་ཧྥི་ནེས་ཕྱིན་དྲན་ལྟར་གླེང་བའི་ཆོས་ཚོགས་ལ་ཐེབས་པའི་ཤུགས་རྐྱེན་དེ་འདྲ་བ་ནི་ལས་གླིང་ཆོས་ཚོགས་ཙམ་དུ་མ་ཟད། སྐབས་དེར་དབུ་བརྙེས་ནས་ཡུན་རིང་མ་ལོན་པའི་རྡོ་རྗེ་འདན་མ་གླིང་དང་འཛི་སྒར་ཀོང་སྤྲུལ་རིན་པོ་ཆེའི་ཆོས་ཚོགས། རྒྱ་སྤྲུལ་རིན་པོ་ཆེའི་བཀྲ་ཤིས་ཆོས་གླིང་དང་ཡེ་ཤེས་སྙིང་པོའི་ཆོས་ཚོགས་སོགས་ཀྱིས་ཀྱང་ད་ལྟའི་བར་དུ་ཆོས་ཀྱི་མཛད་པ་བསྐྱངས་ནས་དར་ཞིང་རྒྱས་པའི་ངང་གནས་ཡོད་པས། ཕྱི་ལོ་༡༩༩༣ལོར་རྗེ་ཉིད་ནུབ་ཕྱོགས་སུ་ཆོས་གསུང་བར་ཕེབས་པའི་རྟེན་འབྲེལ་གྱིས། ཆོས་ཚོགས་མང་པོ་ཞིག་ལའང་ཕན་པ་རྒྱ་ཆེན་པོ་འབྱུང་ཞིང་ཤུགས་རྐྱེན་ཆེས་ལེགས་པོར་ཐེབས་ཡོད་ས་རེད་སྙམ་མོ། །

དྲན་ངོགས་ཀྱི་ནུབ་བསྐྱོད་ལས་ཡུལ་མོན་ཐི་ཕཱེ་ལེར་གྱི་མཛད་རིམ་ལེགས་པར་གྲུབ་པའི་སྐབས་ཏེ་དགུ་པའོ། །

འབབ་ཚུགས་བཅུ་པ། སླར་ལོག་པ་།

༼ ༨·༣༡~༩·༢༤ ༽

མཛད་རིམ།

ཕྱི་ཟླ་༨པའི་ཚེས་༣༡ཉིན། ལས་རབ་གླིང་དང་ཞལ་གྱེས།

ཕྱི་ཟླ་༩པའི་ཚེས་༡ཉིན། ཕེ་རིས་ནས་གནམ་གྲུ་བརྗེ་འདུག་མཛད།

ཕྱི་ཟླ་༩པའི་ཚེས་༢ཉིན། ཧོང་ཀོང་ལ་འབྱོར།

ཕྱི་ཟླ་༩པའི་ཚེས་༣ཉིན། འཇམ་དཔལ་ཞི་སྒྲུབ་ཀྱི་དབང་གནང་།

ཕྱི་ཟླ་༩པའི་ཚེས་༤ཉིན། རྟེན་འབྲེལ་ཉེས་སེལ་གྱི་དབང་གནང་།

ཕྱི་ཟླ་༩པའི་ཚེས་༥ཉིན། ཕུར་པ་མགུལ་ཁུག་མའི་དབང་དང་ཞལ་གདམས་གནང་།

ཕྱི་ཟླ་༩པའི་ཚེས་༦ཉིན། ཐའེ་ཝན་དུ་འབྱོར།

ཕྱི་ཟླ་༩པའི་ཚེས་༧ཉིན། ཨོ་རྒྱན་རིན་པོ་ཆེའི་དབང་དང་སྐྱབས་འགྲོའི་བསླབ་བྱ་གནང་།

ཕྱི་ཟླ་༩པའི་ཚེས་༨ཉིན། ཕུར་པ་ཡང་ཟབ་སྙིང་པོའི་དབང་དང་ཞལ་གདམས་གནང་།

ཕྱི་ཟླ་༩པའི་ཚེས་༩ཉིན། འཇམ་དཔལ་ཡེ་ཤེས་སེམས་དཔའི་དབང་དང་ཞལ་གདམས་གནང་།

ཕྱི་ཟླ་༩པའི་ཚེས་༡༠ཉིན། འཕོ་བ་དང་བདེ་བ་ཅན་དུ་སྐྱེ་བའི་སྐོར་གྱི་ཆོས་ཁྲིད་གསུངས།

ཕྱི་ཟླ་༩པའི་ཚེས་༡༡ཉིན། འཇམ་དཔལ་རྫོགས་པ་ཆེན་པོ་དང་ཕུར་པ་མགུལ་ཁུག་མའི་དབང་གནང་།

ཕྱི་ཟླ་༩པའི་ཚེས་༡༢ཉིན། གུ་རུ་རྡོ་རྗེ་གྲོ་ལོད་ཀྱི་དབང་དང་རྫོགས་ཆེན་སྐོར་གསུངས།

ཕྱི་ཟླ་༩པའི་ཚེས་༡༣ཉིན། ཧོང་ཀོང་ལ་ལོག

ཕྱི་ཟླ་༩པའི་ཚེས་༡༤ཉིན། ཧྲེན་ཀྲེན་བརྒྱུད་ནས་ཁྲེང་ཏུའུ་ལ་འབྱོར།

ཕྱི་ཟླ་༩པའི་ཚེས་༡༥ཉིན། སྔ་དྲོར་ཆིང་ཏིང་བླ་མར་ཚེ་དབང་གསུངས་ཤིང་ཕྱི་དྲོར་སྨན་ཁང་ནས་སྡོད་བཅོས་བྱས།

ཕྱི་ཟླ་༩པའི་ཚེས་༡༦ནས་ཚེས་༡༧བར། སྐུ་ལུས་ལ་བརྟག་བཤེར་མཛད།

ཕྱི་ཟླ་༩པའི་ཚེས་༡༨ཉིན། བཅོས་ཐོན་བྱུང་།

ཕྱི་ཟླ་༩པའི་ཚེས་༡༩་ནས་ཚེས་༢༠བར། ཁྲ་ཏེན་ཙིར་དད་ལྡན་རྣམས་ལ་ཆོས་ཁྲིད་དང་དབང་བསྐུར།

ཕྱི་ཟླ་༩པའི་ཚེས་༢༡ནས་ཚེས་༢༢བར། དར་མདོར་འབྱོར་རྗེས་འབྲེལ་ཡོད་ལས་ཁུངས་ལ་ཕྱི་བསྐྱོད་སྙན་ཞུ་ཕུལ།

ཕྱི་ཟླ་༩པའི་ཚེས་༢༣ནས་ཚེས་༢༤བར། དར་མདོ་ནས་ཐོན་ཏེ་བླ་རུང་དུ་འབྱོར།

ཧོང་ཀོང་བརྒྱུད་ནས་ཡོང་།

ཕྱི་ཟླ་༨པའི་ཚེས་༣༡ཉིན། ཆོས་རྗེ་ཉིད་ལས་རབ་གླིང་དང་ཞལ་གྱེས་ཏེ་རླངས་འཁོར་དུ་བཞུགས་ནས་མོན་ཐི་ཕཱེལ་ལེར་（Montpellier）གནམ་ཐང་དུ་འབྱོར། དེ་ནས་སླར་ཡང་གནམ་གྲུར་ཞུགས་ཏེ་དུས་ཚོད་གཅིག་ཕྱེད་ཙམ་འཕུར་རྗེས་ཕེ་རིས་གྲོང་ཁྱེར་དུ་སླེབས་ཤིང་དགོང་མོ་དེར་ཞག་སྡོད་བྱས། ཕྱི་ཉིན་ཕྱི་དྲོར། ཕེ་རིས་ནས་གནམ་གྲུ་བརྗེས་ཏེ་ཆུ་ཚོད་བཅུ་ལྷག་ལ་འཕུར་བའི་རྗེས་སུ་སྟེ། ཕྱི་ཟླ་༩པའི་ཚེས་༢ཉིན་ཧོང་ཀོང་ལ་འབྱོར་ཞིང་། ཧོང་ཀོང་དཔལ་ཡུལ་ཆོས་ཚོགས་སུ་བསྡད་པ་ཡིན།

ཧོང་ཀོང་དཔལ་ཡུལ་ཆོས་ཚོགས་ནི་སྐྱབས་རྗེ་པད་ནོར་རིན་པོ་ཆེས་འཛམ་གླིང་གི་ས་ཆ་སོ་སོར་ཆོས་ཚོགས་མང་དུ་བཙུགས་ཡོད་པའི་གྲས་ཀྱི་གཅིག་ཡིན་ལ། ཆོས་ཚོགས་འདི་ཕྱི་ལོ་༡༩༩༠ལོའི་ལོ་སྟོད་དུ་ཚུགས། ལོ་དེའི་ལོ་མཇུག་ཏུ་ངེད་ཅག་བལ་བོ་ནས་ཕྱིར་ཡོང་བའི་ལམ་བར་དུ་ཧོང་ཀོང་བརྒྱུད་སྐབས་ཀྱང་། གནས་འདི་ནས་ཞག་གཉིས་གསུམ་ལ་བསྡད་པ་ཡིན། ཆོས་ཚོགས་འདི་ནི་སྐྱབས་རྗེ་པད་ནོར་རིན་པོ་ཆེ་མཆོག་གི་རྒྱ་གར་རྣམ་གྲོལ་གླིང་དུ་གཏོགས་ཤིང་། རྣམ་གྲོལ་གླིང་ནས་བླ་མ་མངགས་ཏེ་བདག་གཉེར་བྱེད་པ་དང་ཆོས་ཁྲིད་གསུང་སའི་ས་ཚུགས་གཙོ་བོ་ཞིག་ཡིན།

ད་ལན་ཆོས་རྗེ་ཉིད་མེ་གླིང་དང་ཡོ་རོབ་ཀྱི་རྒྱལ་ཁབ་སོ་སོར་བཀའ་ཆོས་གནང་བར་ཕེབས་ཏེ་གནས་འདིར་ཐོན་པ་ན། སྐུ་ངལ་ཆེན་པོ་མྱངས་ཡོད་ཀྱང་ངལ་གསོ་མ་མཛད་པར་ཧོང་ཀོང་དུ་ཉིན་གསུམ་རིང་ཆོས་ཀྱི་མཛད་སྒོ་སྤེལ། སྐབས་དེར་བདག་གིས་རྒྱ་སྐད་ཀྱི་ལོ་ཙཱ་བྱས་ཤིང་གཞན་ཞིག་གིས་སླར་ཡང་ཡུའེ་སྐད་（粤语）དུ་བསྒྱུར།

ཕྱི་ཟླ་༩པའི་ཚེས་༣ནས་༤བར། དཔལ་ཡུལ་ཆོས་ཚོགས་ཀྱི་སློབ་མ་ནང་མ་རྣམས་ལ་བཀའ་དབང་གཉིས་དང་ཆོས་ཁྲིད་གསུངས་ཤིང་། ཉིན་དང་པོར་འཇམ་དཔལ་རྫོགས་པ་ཆེན་པོའི་དབང་དང་ཉིན་གཉིས་པར་རྟེན་འབྲེལ་ཉེས་སེལ་གྱི་དབང་གནང་།

ཕྱི་ཟླ་༩པའི་ཚེས་༥ཉིན། ཆོས་རྗེ་ཉིད་ཀྱིས་མི་སྟོང་ཕྲག་ལྷག་ཤོང་བའི་ཚོགས་ཁང་ཆེན་མོར་རྡོ་རྗེ་ཕུར་པའི་ཆོས་ཚོགས་འཚོགས་ནས། ཕུར་པ་མགུལ་ཁུག་མའི་བཀའ་དབང་ཟབ་མོ་དང་། སྐྱབས་འགྲོའི་སྡོམ་པ། བྱམས་སྙིང་རྗེ། བྱང་ཆུབ་ཀྱི་སེམས་ཀྱི་སྐོར་ནས་བསླབ་བྱ་གནང་། ཆོས་ཞུ་མཁན་རྣམས་ཀྱིས་ཆོས་རྗེ་ཉིད་ལ་དད་པ་རྩེ་གཅིག་ཏུ་བཞག་ནས་ཉན་གྱིན་འདུག་ལ། ཆོས་ཁྲིད་ཀྱི་བར་སྐབས་སུ། གཙོ་སྒྲུབ་ཕྱོགས་ཀྱིས་གཟེངས་རྟགས་རྒྱན་ལེན་གྱི་བྱེད་སྒོ་སྤེལ་བས། ཡུལ་ངོས་ཀྱི་རྣམ་པ་ནི་ཤིན་ཏུ་སྤྲོ་སྐྱིད་དང་ལྡན་པ་ཞིག་ཏུ་གྱུར།

ཐེངས་འདིར་ཆོས་རྗེ་ཉིད་ནུབ་ཕྱོགས་སུ་བསྐྱོད་ནས་ཟླ་བ་གསུམ་སོང་བའི་རིང་ལ། ཤར་ཕྱོགས་དང་ནུབ་ཕྱོགས་ཀྱི་མིའི་གཤིས་ཀ་ལ་ཁྱད་པར་ཆེན་པོ་འདུག་པར་མཐོང་བ་སྟེ། ཁོ་ཚོའི་སེམས་འགུལ་ཆེན་པོ་ཐེབས་ནས་སྡུག་གི་མཆི་མ་འདོན་ས་དང་སྐྱིད་ཀྱི་དགོད་སྒྲ་འབྱིན་ས་གཉིས་ཡེ་ནས་མི་འདྲ་བར་འདུག སྐབས་དེར་ཧོང་ཀོང་ཡང་དབྱིན་ཇིའི་མངའ་ཞབས་སུ་ཡོད་པ་ལས་རྒྱ་ནག་ལ་སྤྲད་མེད་ཀྱང་། ཧོང་ཀོང་གི་མི་རྣམས་ཀྱི་གཤིས་ཀ་ནི་ཕལ་ཆེར་ཤར་ཕྱོགས་དང་འདྲ་བར། ཚོར་ཤེས་རྣོ་བ་དང་སྤྲོ་སེམས་ཆེ་བ། སྣང་བ་སྐྱིད་པོ་ཡིན་པས། ཁོ་ཚོའི་སེམས་སུ་ཅི་ཡོད་ཐམས་ཅད་འཛེམ་པ་མེད་པར་ངག་གི་སྐད་ཆ་དང་ལུས་ཀྱི་རྣམ་འགྱུར་ལས་ཐོན་ཡོང་ཞིང་། སྤྲོ་སེམས་འཁོལ་བའི་རྣམ་པ་འདི་ཡང་། ཆོས་རྗེ་ཉིད་ཀྱིས་ཆོས་གསུང་བར་ཆེས་ལྷོད་པོ་དང་གུ་ཡངས་ཀྱི་མཐུན་རྐྱེན་དུ་སོང་སྟབས། ཁོང་གིས་དེར་འཁོད་རྣམས་ལ་ཕན་པ་ཆེ་བའི་ཞལ་གདམས་མང་དུ་གནང་སོང་།

ཐའེ་ཝན་དུ་ཕྱིན་པ།

ཕྱི་ཟླ་༩པའི་ཚེས་༦ཉིན། ཆོས་རྗེ་ཉིད་ཧོང་ཀོང་ནས་གནམ་གྲུར་བཞུགས་ཏེ་ཆུ་ཚོད་གཅིག་ལྷག་ལ་འཕུར་རྗེས་ཐའེ་ཝན་（台湾）གྱི་ཐའོ་ཡོན་（桃园）གནམ་གྲུ་ཐང་དུ་འབྱོར་ཅིང་། དེར་རྒྱ་བརྒྱུད་དང་བོད་བརྒྱུད་ཀྱི་རབ་བྱུང་པ་དང་ཆོས་པ་མང་པོས། དར་དཀར་དང་མེ་ཏོག་བསྣམས་ནས་ཕེབས་བསུ་རྒྱ་ཆེན་ཞུས།

གནམ་གྲུ་ཐང་ནས་ཐོན་ཏེ་ཐད་ཀར་ཐའེ་པེ་（台北）གྲོང་ཁྱེར་གྱི་དཔལ་ཡུལ་ཆོས་ཚོགས་སུ་བྱོན། ཆོས་ཚོགས་དེ་ནི་སྐྱབས་རྗེ་པད་ནོར་རིན་པོ་ཆེས་ཐའེ་ཝན་དུ་དཔལ་ཡུལ་བྱང་ཆུབ་དར་རྒྱས་གླིང་ཞེས་ཆོས་ཚོགས་བདུན་བཙུགས་པའི་ནང་ཚན་ཞིག་ཡིན་ལ། ཆོས་རྗེ་ཉིད་ཀྱིས་ཐའེ་ཝན་ནས་ཉིན་དྲུག་གི་རིང་ཆོས་ཀྱི་མཛད་སྒོ་སྤེལ་བའི་སྐབས་ཐམས་ཅད་དུ་གནས་འདི་ནས་བཞུགས་པ་དང་། བདག་གིས་ཉིན་རེ་བཞིན་དུ་རྗེ་ཉིད་ཀྱིས་གསུངས་རྣམས་རྒྱ་སྐད་དུ་བསྒྱུར་བ་ཡིན།

ཕྱི་ཟླ་༩པའི་ཚེས་༧ཉིན་གྱི་ཕྱི་དྲོར། ཆོས་རྗེ་ཉིད་ཀྱིས་དཔལ་ཡུལ་ཆོས་ཚོགས་སུ་ཨོ་རྒྱན་རིན་པོ་ཆེའི་དབང་དང་སྐྱབས་འགྲོའི་སྐོར་གྱི་བསླབ་བྱ་གནང་ཞིང་། བླ་མ་མུ་མཚོས་སྤྱན་རས་གཟིགས་ཀྱི་དབང་གསུངས།

ཕྱི་ཟླ་༩པའི་ཚེས་༨ཉིན་གྱི་སྔ་དྲོར། དཔལ་ཡུལ་ཆོས་ཚོགས་སུ་ཕུར་པ་ཡང་ཟབ་སྙིང་པོའི་དབང་དང་བྱང་ཆུབ་སེམས་ཀྱི་སྐོར་ནས་གདམས་ངག་གནང་།

ཕྱི་ཟླ་༩པའི་ཚེས་༩ཉིན། རྗེ་ཉིད་དུས་ཚོད་གསུམ་རིང་རླངས་འཁོར་དུ་བཞུགས་ཏེ་ཐའེ་ཀྲུང་（台中）དུ་བྱོན་ཅིང་། དགེ་བསྙེན་ཐེན་པི་ཧྲོང་（田璧双）གིས་ཕྱི་ལོ་༡༩༨༥ལོར་བཙུགས་པའི་གསང་སྙིང་གླིང་ཞེས་པ་རུ་འཇམ་དཔལ་ཡེ་ཤེས་སེམས་དཔའི་དབང་དང་བྱིན་རླབས་གནང་བར་མ་ཟད། གསང་སྔགས་ཀྱི་ཆོས་ཉམས་སུ་ལེན་པའི་གལ་ཆེན་རང་བཞིན་གསུངས་ཤིང་དགོང་མོར་སླར་ཡང་ཐའེ་པེ་ལ་ལོག

ཕྱི་ཟླ་༩པའི་ཚེས་༡༠ཉིན་གྱི་སྔ་དྲོར། དཔལ་ཡུལ་ཆོས་ཚོགས་སུ་འཕོ་བ་དང་བདེ་སྨོན་སྐོར་གྱི་ཆོས་ཁྲིད་གསུངས།

ཕྱི་ཟླ་༩པའི་ཚེས་༡༡ཉིན་གྱི་ཕྱི་དྲོར་། ཐའེ་ཐིའེ་ཐོག་ཁང་ཆེན་མོའི་སྒྱུ་རྩལ་འཁྲབ་སྟོན་ཁང་ཚོམས་（台铁大楼演艺厅）སུ་འཇམ་དཔལ་རྫོགས་པ་ཆེན་པོ་དང་ཕུར་པ་མགུལ་ཁུག་མའི་དབང་གནང་།

ཕྱི་ཟླ་༩པའི་ཚེས་༡༢ཉིན་གྱི་སྔ་དྲོར། སླར་ཡང་དཔལ་ཡུལ་ཆོས་ཚོགས་སུ་གུ་རུ་རྡོ་རྗེ་གྲོ་ལོད་ཀྱི་དབང་དང་། རྫོགས་པ་ཆེན་པོའི་ལོ་རྒྱུས་དང་ཕན་ཡོན་གྱི་སྐོར་གསུངས། ཕྱི་དྲོར་དེར་འཁོད་རྣམས་དང་མཉམ་དུ་ཚོགས་ཀྱི་དགའ་སྟོན་ལ་རོལ་ཅིང་། བཀོད་སྒྲིག་ཚན་ཆུང་གི་མི་སྣ་རྣམས་ལ་དམིགས་བསལ་གྱི་མཇལ་ཁ་གནང་།

ཕྱི་ཟླ་༩པའི་ཚེས་༡༣ཉིན། ཧོང་ཀོང་ལ་ཕྱིར་ལོག

སྐྲ་ལོ་འཇའ་ཚོན་མ།

ཉེ་ཆར་ང་ཚོས་ལྕམ་ཏིང་ནའེ་ཀྲུའུ་（丁乃竺）ལ་བཅར་འདྲི་བྱས་པ་ཡིན། མོ་རང་ནི་ཆོས་རྗེ་ཉིད་ཐའེ་ཝན་ལ་འབྱོན་སྐབས་ཀྱི་ལས་རིམ་བཀོད་སྒྲིག་མི་སྣ་ཞིག་ཡིན་ལ། ཐའེ་ཝན་བོད་བརྒྱུད་ནང་བསྟན་གྱི་ཆེས་སྔོན་གྲས་ཀྱི་སློབ་མ་ཞིག་ཀྱང་ཡིན། དུས་རབས་གོང་མའི་ལོ་རབས་བརྒྱད་ཅུའི་ནང་དུ། ཁོ་ཚོས་བོད་བརྒྱུད་ནང་བསྟན་གྱི་སྐྱེས་ཆེན་དམ་པ་མང་པོ་ཐའེ་ཝན་ལ་བཀའ་ཆོས་གནང་བར་གདན་ཞུ་བྱས་མྱོང་ཞིང་། མོ་རང་གིས་ཆོས་རྗེ་ཉིད་གླེང་བའི་སྐབས་སུ་ཕྱིར་དྲན་བྱས་པ་འདི་ལྟར།

ང་རང་གིས་ཐའེ་ཝན་སློབ་ཆེན་གྱི་མཚན་ཉིད་རིག་པའི་སྡེ་ཁག་ཏུ་སློབ་སྦྱོང་བྱེད་བཞིན་པའི་སྐབས་སུ་བོད་བརྒྱུད་ནང་བསྟན་གྱི་ཆོས་དང་འཕྲད་པ་ཡིན། གྲོགས་པོ་ཞིག་གིས་ངོ་སྤྲོད་བྱས་པ་བརྒྱུད། རི་རྩེ་ལྔ་པའི་ལྷོ་ཕྱོགས་ཀྱི་རིན་ཆེན་འབྱུང་ལྡན་ཞིང་གི་ཆོས་ཚོགས་ལ་ཞུགས་ཤིང་། དེ་ནི་ཐའེ་ཝན་གྱི་ཆེས་སྔ་ཤོས་ཀྱི་བོད་བརྒྱུད་ནང་བསྟན་གྱི་ཆོས་ཚོགས་ཤིག་རེད། ལོ་རབས་བརྒྱད་ཅུ་པ་ནས་བཟུང་། ངས་རིན་པོ་ཆེ་འགའ་ཞིག་ཐའེ་ཝན་ལ་ཆོས་གསུང་པར་གདན་ཞུ་བྱས་ཤིང་། རྙིང་མ་པའི་ཆོས་ལུགས་ཀྱི་གཙོ་འཛིན་སྐྱབས་རྗེ་གྲུབ་དབང་པད་ནོར་ཡང་གདན་ཞུ་བྱེད་ཐུབ་པ་བྱུང་། ཁོང་ཐེངས་དང་པོར་ཐའེ་ཝན་ལ་ཕེབས་སྐབས་ང་རང་གི་ཁྱིམ་དུ་བཞུགས་ཤིང་། རྗེས་སོར་ཡང་ཐེངས་འགའ་ལ་བྱོན་པར་མ་ཟད། ལོ་ཁ་ཤས་ཀྱི་རིང་དུ་དཔལ་ཡུལ་བྱང་ཆུབ་དར་རྒྱས་གླིང་གི་ཆོས་ཚོགས་བཙུགས་ནས་སློབ་མའང་ཆེས་མང་པོ་རྗེས་སུ་བཟུང་།

ཕྱི་ལོ་༡༩༩༠ལོ་ཡས་མས་ཤིག་ལ། པད་ནོར་རིན་པོ་ཆེ་ཐའེ་ཝན་ལ་འབྱོན་སྐབས། ཁོང་གིས་ང་ལ། ཆོས་རྗེ་འཇིགས་མེད་ཕུན་ཚོགས་ནི་ང་ཡི་རྩ་བའི་བླ་མ་ཡིན། ཁོང་ཐའེ་ཝན་ལ་འབྱོན་སྐབས་ཁྱོད་ཀྱིས་ནུས་པ་གང་ཡོད་ཀྱིས་སྣེ་ལེན་དང་ཞབས་ཞུ་ཡག་པོ་གྱིས་ཞེས་གསུངས་མ་ཐག ང་རང་ཅུང་ཟད་ཡ་མཚན་པར་གྱུར་ཏེ། པད་ནོར་རིན་པོ་ཆེ་ནི་དེ་འདྲའི་བླ་མ་ཕུལ་དུ་བྱུང་བ་ཞིག་དང་། རྟོགས་པའི་གདེང་ཚད་མཐོན་པོར་སོན་པ་ཞིག་ཡིན་ན། ཁོང་གི་རྩ་བའི་བླ་མ་དེ་ཅི་འདྲ་ཞིག་ཡིན་ནམ་སྙམ་པ་བྱུང་།

དེ་རྗེས་ངེད་ཅག་གིས་ཆོས་རྗེ་འཇིགས་མེད་ཕུན་ཚོགས་ཐའེ་ཝན་ལ་བྱོན་ནས་བཀའ་སློབ་གནང་བའི་སྐོར་ལ་མཐོང་ཆེན་རྒྱ་ཆེན་པོའི་སྒོ་ནས། དཔལ་ཡུལ་ཆོས་ཚོགས་དང་གསང་སྙིང་གླིང་གཉིས་མཉམ་འབྲེལ་གྱིས་སྣེ་ལེན་བྱེད་པའི་སྟ་གོན་འཐུས་ཚང་བྱས། ཕྱི་ལོ་༡༩༩༣ལོའི་ཕྱི་ཟླ་༩པའི་ནང་། ཆོས་རྗེ་འཇིགས་མེད་ཕུན་ཚོགས་དུས་བཏབ་པ་ལྟར་དུ་ཐའེ་ཝན་ལ་ཕེབས་ཐུབ་པ་བྱུང་ཞིང་། ཁོང་གིས་བཀའ་ཆོས་གནང་བའི་རླབས་ཆེན་གྱི་མཛད་པ་རྣམས་རང་ཅག་སྐལ་ལྡན་རྣམས་ཀྱི་མཐོང་ཆོས་སུ་གྱུར།

ཆོས་རྗེ་ཉིད་ཀྱིས་ཐའེ་པེ་དང་ཐའེ་ཀྲུང་གི་གནས་གང་དུ་ཆོས་ཀྱི་མཛད་སྒོ་སྤེལ་ཡང་། ཕྱོགས་སོ་སོ་ནས་ཡོང་བའི་དད་ལྡན་ཧ་ཅང་མང་པོ་ལྷན་ཅིག་ཏུ་འདུས་པར་གྱུར། དེ་ལས་འགའ་རེ་བོད་བརྒྱུད་ནང་བསྟན་པ་དང་འགའ་རེ་ནི་རྒྱ་བརྒྱུད་ནང་བསྟན་པ་སྟེ། ཁོ་ཚོའི་ཆོས་བརྒྱུད་ཐ་དད་ཡིན་ཡང་། རླབས་ཆེན་གྱི་བླ་མ་ཁོང་དང་ཆོས་ཀྱི་འབྲེལ་བ་འཇོག་ཚུལ་ལ་ཁྱད་པར་མེད་པར་ལྷན་འཛོམས་བྱུང་། སྐབས་དེར། ཐའེ་ཐིའེ་ཐོག་ཁང་ཆེན་མོའི་སྒྱུ་རྩལ་འཁྲབ་སྟོན་ཁང་ཚོམས་སུ་རྒྱ་ཆེ་བའི་དབང་བསྐུར་མཛད་སྒོ་སྤེལ། ཉིན་དེའི་དབང་བསྐུར་ཆོས་ཚོགས་ཀྱི་ཆེད་དུ། ང་ཚོས་སྔོན་ནས་སྨི་གཉིས་ཙམ་མཐོ་བའི་ཆོས་ཁྲི་ཆེན་པོ་ཞིག་བཟོས་ཤིང་། བཀྲ་ཤིས་རྟགས་བརྒྱད་དང་མེ་ཏོག་སྣ་ཚོགས་ཀྱི་མཆོད་པས་ཚོགས་ར་ཡོངས་སུ་ལེགས་པར་བརྒྱན་པ་ཡིན།

ཐེངས་དང་པོར་ཆོས་རྗེ་འཇིགས་མེད་ཕུན་ཚོགས་མཇལ་བ་ན། ངའི་སེམས་གཏིང་དུ་ཁོང་ནི་ཧ་ཅང་བྱིན་རླབས་དང་ནུས་མཐུ་ཅན་གྱི་བླ་མ་ཞིག་ཡིན་པའི་ཚོར་སྣང་ཟབ་མོ་བྱུང་བ་སྟེ། ཁོང་གི་ཐུགས་རྗེ་ཤུགས་དྲག་པོའི་ནུས་མཐུ་ཡིས་ང་རང་ཧ་ལས་པར་གྱུར། ཆོས་རྗེ་འཇིགས་མེད་ཕུན་ཚོགས་མ་མཇལ་བའི་ཡར་སྔོན་དུ། ང་ལ་སྐྱབས་རྗེ་བདུད་འཇོམས་རིན་པོ་ཆེ་དང་དིལ་མགོ་མཁྱེན་བརྩེ་རིན་པོ་ཆེ་རྣམ་གཉིས་ཆེས་ཐག་ཉེ་པོའི་སྒོ་ནས་མཇལ་བའི་སྐལ་བ་ཐོབ་མྱོང་། ཁོང་རྣམ་པ་གཉིས་ལའང་བྱིན་མཐུ་ཧ་ཅང་ཆེན་པོ་ལྡན་པ་ཡིན་ཏེ། སྐྱབས་རྗེ་བདུད་འཇོམས་རིན་པོ་ཆེ་ལ་མ་གཤིས་དང་ཉེ་བའི་ཞི་འཇམ་གྱི་རྣམ་པ་ལྡན་ཞིང་། དིལ་མགོ་མཁྱེན་བརྩེ་རིན་པོ་ཆེ་ནི་སྐུ་བོངས་ཆེ་ཞིང་གཟི་བརྗིད་ཀྱི་ཉམས་དང་ལྡན་ཡོད། ཆོས་རྗེ་འཇིགས་མེད་ཕུན་ཚོགས་ཀྱི་ཟིལ་རྔམ་ལྡན་པའི་སྐུ་གཟུགས་ལས། མཚོན་ཆ་རྣོན་པོ་ལུས་ལ་ཟུག་པ་ལྟ་བུའི་བྱིན་རླབས་ཀྱི་ཚན་ཁ་དམིགས་བསལ་བ་ཞིག་སྟེར་གྱིན་འདུག དེ་འདྲའི་བྱིན་མཐུ་ཁྱད་པར་ཅན་དེས་ང་རང་ལ་བག་ཆགས་ཤིན་ཏུ་ཟབ་མོ་བཞག་བྱུང་།

ད་དུང་ཆོས་རྗེ་འཇིགས་མེད་ཕུན་ཚོགས་དང་མཉམ་དུ་ཕེབས་པའི་བཙུན་མ་གཉིས་ཡོད་དེ། གཅིག་ནི་ཁོང་གི་སྐུ་སྲིང་མ་ཡིན་ལ། གཞན་དེ་ནི་ཁོང་གི་ཚ་མོ་སྟེ་མཁའ་འགྲོ་མ་ཡེ་ཤེས་མཚོ་རྒྱལ་གྱི་སྤྲུལ་པ་ཡིན་པར་འདུག དེ་མིན་གྲྭ་པ་འགའ་ཞིག་ཡོད་པ་ལས་གཅིག་ནི་མཁན་པོ་བསོད་དར་རྒྱས་རེད། ལོ་ན་ཆུང་བའི་བོད་ཀྱི་རབ་བྱུང་ཁོང་གིས་རྒྱ་ཡིག་ལེགས་པོ་མཁྱེན་གྱིན་ཡོད་པས། སྐབས་དེར་ང་རང་ཧ་ཅང་ངོ་མཚར་བར་གྱུར་ཅིང་། ཁོང་ནི་ལོ་ན་ཤིན་ཏུ་གཞོན་ལ་སྨྲ་བ་ཉུང་ཞིང་སྒམ་ཚུགས་ལྡན་པ། ཀུན་སྤྱོད་གཙང་ལ་བྱད་གཟུགས་ཤིན་ཏུ་ལེགས་པོ་ཞིག་འདུག་སྙམ་པ་བྱུང་།

ཆོས་རྗེ་ཉིད་ཀྱི་ཐའེ་ཝན་གྱི་མཛད་རིམ་མང་ཆེ་བར་དབང་བསྐུར་བ་ཡིན་ལ། ང་ཚོས་ཁོང་གི་ཞབས་དྲུང་ནས་ཐོབ་པའི་ཆོས་རེ་རེ་བཞིན་དུ་ཧ་ཅང་གཙིགས་ཆེན་དང་གཅེས་སྤྲས་བྱས་པ་ཡིན། ཁོང་གིས་དབང་བསྐུར་བའི་རྗེས་སུ། ཚ་མོ་རྗེ་བཙུན་མ་དེས་ང་ཚོ་ལ་དབང་བསྐུར་དང་འབྲེལ་བའི་ཆོ་ག་དང་ཁྲིད་ཡིག་རྣམས་ཀྱི་ལུང་གསུངས། ཁོང་གི་ཚ་མོ་ནི་དེ་འདྲའི་དགུང་ལོ་ཆུང་ཞིང་བཞིན་རས་ལེགས་པ། ཞི་དུལ་དང་ལྡན་པ་ཞིག་སྟེ། མོའི་སྐུ་གཟུགས་ལས་ཀྱང་ཆུ་བོ་བཞུར་བ་ལྟ་བུའི་མཉེས་གཤིན་གྱི་ཉམས་ཤིག་མངོན་ནས་ཡོད། ལོ་རབས་དེའི་ནང་དུ། ཐའེ་ཝན་མ་ཟད་ནུབ་ཕྱོགས་སུའང་བུད་མེད་རྟེན་ཅན་གྱི་བླ་མས་ཆོས་གསུང་བ་ཤིན་ཏུ་དཀོན་པས། སྐབས་དེ་དུས་ཀྱི་སྣང་བརྙན་ཐམས་ཅད་ད་ལྟའང་ངའི་སེམས་སུ་གསལ་པོར་དྲན་གྱིན་ཡོད།

དབང་གནང་བའི་བར་སྐབས་རྣམས་སུ། ཆོས་རྗེ་ཉིད་ཀྱིས་ང་ཚོ་ལ་ཁོང་གི་རྣམ་ཐར་འགའ་རེའང་གསུངས་བྱུང་། ངས་དྲན་སོས་པ་ཞིག་ལ། ཐེངས་ཤིག་ཁོང་གིས་ངོ་མཚར་བའི་གཏེར་ཞིག་བཞེས་རབས་གསུངས་ཤིང་། གཏེར་དེ་ནི་གནམ་གྲུ་ནས་འཕུར་སྐྱོད་མཛད་སྐབས་བྱུང་བ་དང་། སྐབས་དེར་ཁོང་གཟིམས་ཟིན་རྗེས་གཟོད་གཏེར་དེ་བཞེས་པའི་སྐོར་གསུངས་ཀྱང་ད་ལྟ་ཞིབ་ཕྲ་དྲན་གྱིན་མི་འདུག

ད་དུང་ངས་མི་གཞན་གྱི་ངག་ཐོག་ནས་གོ་ཐོས་བྱུང་བ་ལྟར་ན། ཆོས་རྗེ་ཉིད་དགུང་ལོ་གཞོན་དུས་ཐོས་བསམ་སྒོམ་གསུམ་ལ་ཧ་ཅང་བརྩོན་འགྲུས་མཛད་བཞིན་པའི་ཉིན་ཞིག་ལ། ན་གཞོན་མཛེས་མ་ཞིག་ཁོང་གི་གམ་དུ་ལྷགས་ནས། ང་ནི་ཁྱེད་དང་སྐྱེ་བ་སྔ་མའི་ལས་འབྲེལ་ཡོད་པའི་ལས་ཀྱི་ཕྱག་རྒྱ་མོ་ཞིག་ཡིན་པས། ཉིད་ཀྱིས་དང་དུ་ལེན་པར་མཛོད་ཅེས་པ་ན། ཁོང་གིས་དང་ལེན་མ་མཛད་ཀྱང་། མོ་རང་གིས་ས་ཆ་ག་གེ་མོ་ནས་ཟླ་བ་གཅིག་ལ་བསྒུག་རྒྱུ་ཡིན་ཟེར་ནས་སོང་། དེ་ནས་ཟླ་བ་གཅིག་སོང་ཡང་ཆོས་རྗེ་ཉིད་ཀྱིས་ད་དུང་དང་ལེན་མ་བྱས་པས། རྗེས་སུ་བུད་མེད་དེ་ཉིད་ཀྱང་མི་སྣང་བར་གྱུར་སོང་སྐད། རྗེས་སོར་ཁོང་གི་བླ་མ་ཞིག་གིས། ད་ཁྱེད་རང་གིས་ཅུང་ཟད་ཅིག་ཉེས་སོང་། ཁྱེད་ཀྱིས་ནི་བཙུན་པའི་ཡོན་ཏན་ཁོ་ན་ལ་དགོངས་པ་གཏད་པ་ལས་གཞན་པའི་དགོས་པ་མ་ཤེས་པར་འདུག་ཅེས་གསུངས།

ཆོས་རྗེ་ཉིད་ཀྱི་མཛད་པ་འདིས་བདག་ལ་སེམས་འགུལ་ཆེན་པོ་ཐེབས་ཤིང་། ཁྱད་པར་དུ་ཁོང་གི་བླ་མས་གསུངས་པའི་ཚིག་དེས་ནི། ཆོས་རྣམ་དག་ཅིག་བསྒྲུབ་པར་རབ་བྱུང་ཁོ་ན་ཡིན་མི་དགོས་པར། ཁྱིམ་པ་དང་རབ་བྱུང་སུ་ཡིན་ཡང་འགྲུབ་ངེས་ཡིན་ལ། ནང་ཆོས་ཀྱི་བྱིན་རླབས་ལ་བརྟེན་ན་རབ་ཏུ་བྱུང་བ་དང་ཁྱིམ་པའི་རྟེན་ཅན་ཐམས་ཅད་ལའང་འབྲས་བུ་མཆོག་ཏུ་འཐོབ་པར་འགྱུར་ཞེས་པའི་དོན་ཡིན་པ་ཤེས་སོང་།

སྐབས་དེར་ང་རང་སྣེ་ལེན་པ་ཞིག་ཡིན་པས། རྗེ་ཉིད་དང་སྒེར་ངོས་ནས་མཇལ་འཕྲད་གནང་བའི་གོ་སྐབས་བཟང་པོ་བྱུང་ལ། ངས་བུ་མོ་ཁྲིད་ནས་ཆོས་རྗེ་ཉིད་ལས་ཕྱག་དབང་བླངས་ཏེ་མོ་རང་གི་རྒྱུད་ལ་ཐར་བའི་ས་བོན་བཞག ཁོང་གིས་ཅུང་ཟད་དབྱེས་ཆེ་བའི་ཕྱག་དེ་བདག་གི་མགོ་ལ་བཞག་ནས་མཚན་སྔགས་གསུང་ཞོར་བྱིན་རླབས་གནང་བ་ན། བཤད་མི་ཤེས་པའི་དྲོད་རྒྱུན་ཞིག་ལུས་ཀྱི་རྩ་ལམ་ཐམས་ཅད་ལ་ཁྱབ་པར་གྱུར། དེ་དུས་ཆོས་རྗེ་ཉིད་ཀྱི་སྤྱན་སྙུང་བཞིན་ཡོད་པས་ཁོར་ཡུག་རྣམས་གསལ་པོར་མི་གཟིགས་པར་བཤད་ཀྱང་། ང་ཚོས་ཐག་ཉེ་པོའི་སྒོ་ནས་མཇལ་སྐབས་སྤྱན་སྙུང་བཞིན་ཡོད་པའི་རྣམ་པ་གང་ཡང་མཐོང་མ་སོང་།

དེའི་སྐབས་སུ། ང་རང་གིས་ཉིན་དཀར་ལས་ཞུགས་དང་བུ་མོ་གཉིས་ལ་ལྟ་སྐྱོང་བྱེད་དགོས་པར་མ་ཟད། ཞོར་དུ་ཁྱོ་ག་ལའེ་ཧྲེང་ཁྲོན་（赖声川）དང་མཉམ་དུ་འཁྲབ་སྟོན་ལས་སྒྲུབ་ཚོགས་པའི་བྱ་བར་རོགས་འདེགས་བྱེད་དགོས་པས་བྲེལ་འཚུབ་ཧ་ཅང་ཆེ་ཡང་། ཆོས་རྗེ་འཇིགས་མེད་ཕུན་ཚོགས་ཐའེ་ཝན་ལ་བྱོན་ནས་བཀའ་ཆོས་གནང་སྐབས། ངས་དུས་ཚོད་བཀོད་སྒྲིག་ཚགས་དམ་པོར་བྱས་ཏེ། ཁོང་གི་ཐའེ་ཝན་གྱི་ཆོས་ཀྱི་མཛད་སྒོ་ཚང་མར་ཞུགས་ཐུབ་པར་བྱས་པ་ཡིན། ཁོང་གནས་འདིར་བྱོན་པ་དེ་ནི། ང་ཚོ་མི་རེ་རེར་མཚོན་ནའང་སྐལ་བ་ཧ་ཅང་བཟང་པོར་གྱུར་པས་བཀའ་དྲིན་ཤིན་ཏུ་ཆེ།

ཆོས་རྗེ་ཉིད་ཞིང་དུ་གཤེགས་ནས་ད་ལྟ་ལོ་ཉི་ཤུ་སོང་ཟིན་ཀྱང་། ངས་ནམ་རྒྱུན་ཁོང་དྲན་ཐེངས་རེ་རེར། སྟོབས་ཤུགས་ཆེ་བའི་བྱིན་མཐུ་ཁྱད་པར་ཅན་ཞིག་གིས་ང་རང་ཡོངས་སུ་བཅིངས་བ་ལྟ་བུའི་སྣང་བ་སྐྱེས།

བཅར་འདྲི་མཇུག་རྫོགས་པར་ཉེ་བ་ན། ལྕམ་ཏིང་ནའེ་ཀྲུའུ་ཡིས་རང་གི་སྐྲ་ལོར་ལག་པས་རེག་ཙམ་བྱས་ནས་ཉམས་མཚར་གྱི་ཚུལ་དུ། ངས་སྐྲ་ལོའི་ཁ་དོག་འཇའ་ཚོན་ལྟར་དུ་བསྒྱུར་ཡོད། དེའི་རྒྱུ་མཚན་ནི་ང་རང་འཇའ་ཚོན་ལ་ཧ་ཅང་དགའ་བས་ཡིན། ང་རང་ཚེ་འདིར་འཇའ་ལུས་འོད་སྐུར་མ་འགྲུབ་ཀྱང་། འཇའ་ཚོན་ཐོད་ལ་བཏེགས་པའི་རྟེན་འབྲེལ་ལུས་ལ་བསྒྲིགས་ན། ནམ་ཞིག་སྐྱེ་བ་གང་རུང་ལ་འཇའ་ལུས་འོད་སྐུར་འགྲུབ་ངེས་ཡིན་ཞེས་བཤད།

ཕྱིར་ཁྲེང་ཏུའུ་ལ་འབྱོར།

ཕྱི་ཟླ་༩པའི་ཚེས་༡༤ཉིན་གྱི་ཞོགས་པར། ངེད་ཚོ་ཧོང་ཀོང་ནས་རླངས་འཁོར་ལ་ཞུགས་ཏེ་རྒྱལ་མཚམས་འགག་སྒོ་བརྒལ་ནས་ཧྲེན་ཀྲེན་གྲོང་ཁྱེར་དུ་འབྱོར། ནམ་རྒྱུན་རྒྱལ་མཚམས་འགག་སྒོ་རྒལ་སྐབས། ཁོ་ཚོས་ལྟ་བཤེར་ཞིབ་མོ་བྱས་ཏེ་སྙད་ཀ་སྣ་ཚོགས་འདོགས་ཡོང་བས་སེམས་ཁུར་ཅུང་ཟད་འདུག་ཀྱང་། ད་ལན་ནི་ཚེགས་མེད་བདེ་བླག་ཏུ་ཕྱིར་ལོག་ཐུབ་པ་བྱུང་།

རྒྱལ་མཚམས་འགག་སྒོ་བརྒལ་རྗེས། ཆོས་རྗེ་ཉིད་ཀྱིས་ཟས་ཚོམས་ཤིག་ཏུ་ཞོགས་ཟས་གསོལ་ཅིང་། ཧོང་ཀོང་ནས་ཆོས་རྗེ་ཉིད་ལ་ཆེད་དུ་སྐྱེལ་མ་ཞུ་བར་ཡོང་མཁན་རྣམས་ཀྱི་རེ་བ་ལྟར། རྗེ་ཉིད་ཀྱིས་བོད་ཡིག་གི་ལམ་ནས། སངས་རྒྱས་འཕྲིན་ལས་ཕྱོགས་བཅུར་རྒྱས། །བཀྲ་ཤིས་དཔལ་དུ་འབར་གྱུར་ཅིག །སྦྱིན་བདག་ཚེ་རིང་ནད་མེད་ཅིང་། །ལོངས་སྤྱོད་ཕུན་སུམ་ཚོགས་པར་ཤོག །འཇིགས་མེད་ཕུན་ཚོགས་འབྱུང་གནས་ནས། ཞེས་སྨོན་ཚིག་ཅིག་ཕྱག་བྲིས་གནང་། འདི་ཉིད་ནི་ད་ཐེངས་ངེད་ཚོ་ཕྱི་ལོགས་སུ་འགྲོ་སྐབས་འབྲེལ་བ་ཐོགས་ཚད་ལ་ཐུགས་སྨོན་དུ་མཛད་པ་ཡིན་པར་གསུངས།

དེ་རྗེས་ཧྲེན་ཀྲེན་གནམ་ཐང་ནས་ཆུ་ཚོད་གཉིས་ལྷག་ལ་འཕུར་སྐྱོད་བྱས་རྗེས་ཁྲེང་ཏུའུ་གྲོང་ཁྱེར་གྱི་ཧྲོང་ལིའུ་（双流）གནམ་ཐང་དུ་འབྱོར། ཁྲེང་ཏུའུ་ཡི་གནམ་གཤིས་ཧ་ཅང་ཚ་དྲོད་ཆེ་ཡང་། དེ་ནི་སློབ་འབངས་ཀྱི་ཚོགས་མང་དུ་འདུས་པའི་སྤྲོ་སེམས་ཀྱི་ཚ་རླབས་འཕྱུར་བ་དང་བསྡུར་ཐབས་མི་འདུག་སྟེ། སྤྲུལ་སྐུ་བསྟན་འཛིན་རྒྱ་མཚོ་དང་མཁན་པོ་ཚུལ་ཁྲིམས་བློ་གྲོས། མཁན་པོ་ཤེས་རབ་བཟང་པོ། མཁན་པོ་འཆི་མེད་རིག་འཛིན་སོགས་ཀྱི་གཙོས་བླ་རུང་ནང་བསྟན་སློབ་གླིང་གི་རབ་བྱུང་པ་ཤིན་ཏུ་མང་པོ་ཞིག་གིས། ཆོས་རྗེ་ཉིད་ཕྱིར་ཕེབས་པ་ཤེས་རྗེས་གནས་འདིར་བྱོན་ནས་ཉིན་མང་པོར་བསྒུགས་འདུག་པར་མ་ཟད། ཁོང་ཚོས་རྗེ་ཉིད་ཀྱི་ཕེབས་འབྱོར་ལ་དགའ་བསུ་ཚད་མེད་ཞུས། ད་དུང་རྒྱ་ནག་གི་ཞིང་ཆེན་སོ་སོའི་ཆོས་པ་མང་པོ་ཞིག་ཀྱང་གནས་དེར་འཛོམས་པས་མི་ཚོགས་ཀྱི་འདུ་བ་ལང་ལོང་དུ་གཡོ་བར་བྱས། ཁོ་ཚོས་དུས་ཡུན་རིང་པོར་རེ་སྒུག་བྱས་པའི་ཆོས་རྗེ་ཉིད་དངོས་སུ་འབྱོན་པར་མཇལ་བ་ན། ཉིན་ཞག་བརྒྱ་ཕྲག་ལྷག་གི་དྲན་གདུང་དེ་དགའ་སྤྲོའི་མིག་ཆུ་རུ་གྱུར་བ་དང་། འཚང་ཁ་ཤིག་ཤིག དགའ་འབོད་ལྷང་ལྷང་གི་སྒོ་ནས་དད་གུས་ཀྱི་རྣམ་པ་སྣ་ཚོགས་མངོན་པར་བྱས། དེ་ནི་གནམ་ཐང་དེ་ཚུགས་ནས་བཟུང་ཆེས་འདུ་འཛི་ཆེ་བའི་ཉིན་ཞིག་ཡིན་པར་བཤད།

དེ་རྗེས་ཆོས་རྗེ་ཉིད་དར་མདོ་མགྲོན་ཁང་༼དེང་སྐབས་ཀྱི་དཀར་མཛེས་མགྲོན་བྲང་༽ དུ་བྱོན་ཅིང་། ལམ་བར་ནས་མཁན་པོ་འཆི་མེད་རིག་འཛིན་དང་མཁན་པོ་ནོར་པ་ངེད་ཅག་རླངས་འཁོར་གཅིག་ཏུ་བསྡད་དེ། དགའ་སྤྲོའི་ངང་རང་རང་གི་ཕྱོགས་ནས་གླེང་མོལ་སྣ་ཚོགས་བྱེད་ཀྱིན་སོང་། བདག་ལ་ཟླ་བ་གསུམ་གྱི་རིང་དུ་འཕྲིན་སྐྱེལ་སྟབས་བདེ་པོ་མེད་རྐྱེན། ཁོང་གཉིས་ལ་བདག་གི་ཕ་མ་གཉིས་བདེ་འཚམས་ཡིན་མིན་དྲིས་པ་ན། ཕ་མ་གཉིས་ཀྱིས་ད་ལྟ་བླ་རུང་སྒར་དུ་ཁྱེད་ཕྱིར་ཡོང་བར་བསྒུགས་ནས་འདུག་ཟེར།

ངེད་ཅག་མགྲོན་ཁང་དུ་སླེབས་རྗེས། ཆོས་རྗེ་ཉིད་ཀྱི་ཉེ་འཁོར་དུ་སློབ་མ་རྒན་པ་རྣམས་ཀྱིས་ཡོངས་སུ་བསྐོར་བར་མཐོང་བ་ན། རྗེ་ཉིད་ཕྱི་ལོགས་སུ་འབྱོན་སྐབས་ཀྱི་བྱ་བ་མང་པོ་ཞིག་ལ་བདག་གཅིག་པུས་འགན་ལེན་དགོས་པས་སེམས་ཁུར་ཆེ་ནའང་། ད་ལྟ་ཕྱི་རྒྱལ་ནས་གནད་དོན་ཅི་ཡང་མ་བྱུང་བར་བདེ་བླག་ངང་རང་ཡུལ་དུ་ཕེབས་ཐུབ་པ་བྱུང་བས་ཤིན་ཏུ་ལེགས་སོ་སྙམ་བཞིན། ཕྲག་སྟེང་གི་ཁུར་བོ་སར་ཕབ་པ་ལྟར་བློ་བདེ་བག་ཕེབས་སུ་གྱུར།

ཉིན་དེའི་དགོང་མོར། བདག་ལ་ཟླ་བ་གསུམ་རིང་ཡོང་མ་མྱོང་བའི་གཉིད་ཧ་ཅང་སྐྱིད་པོ་ཞིག་ཀྱང་ཁུག་སོང་།

འགྱུར་མེད་ཀྱི་དད་པ།

ཐེངས་འདིར་ཕྱི་ལོགས་སུ་རྗེ་ཉིད་ཀྱི་ཞབས་ཞུར་ཕྱིན་པ་ནས་བཟུང་། ཁོང་ལ་སྔར་ལས་ཀྱང་གཡོ་བ་མེད་པའི་དད་པ་བརྟན་པོ་ཞིག་བདག་ལ་སྐྱེས་སོང་།

ཆོས་རྗེ་ཉིད་ནི་ཚེ་འདིའི་སྦྱངས་པ་ཁོ་ནས་མཁས་པའི་གྲལ་མགོར་སླེབས་པ་ལྟ་བུ་མ་ཡིན་པར། སྐུ་སྐྱེ་སྔ་མ་རྣམས་ཀྱི་སྐབས་སུ་ཡང་ཡང་གོམས་པའི་ཁྱད་འཕགས་ཀྱི་མཁྱེན་རབ་དང་མངོན་རྟོགས་སོགས་གནས་གང་དུ་རྐྱེན་ག་གེ་མོ་ཞིག་གིས་བསླངས་པ་ཙམ་གྱིས། འབད་མེད་རང་ཤུགས་ཀྱི་ཚུལ་དུ་རིག་ཀློང་ནས་རྡོལ་ཡོང་བ་ཞིག་ཡིན། ཁོང་གི་ཞལ་གསུང་རྨད་དུ་བྱུང་བ་འདི་དག་ནི། ཤེས་རབ་ཀྱི་ཉིང་བཅུད་དང་ལེགས་བཤད་ཀྱི་དྭངས་མ་ཡིན་པར་མ་ཟད། ཚེ་སྔ་ཕྱི་ཡོད་པའི་སྒྲུབ་བྱེད་ཀྱི་དན་རྟགས་གསལ་པོར་ཡང་འགྱུར་ཆོག་ཆོག་ཡིན།

བདག་གི་སེམས་ཁོངས་སུ། བླ་མ་དགེ་བའི་བཤེས་གཉེན་ཟེར་བ་དེ་ཁོང་ལྟ་བུ་ཞིག་ལོས་ཡིན་སྙམ་ཞིང་། ཁོང་ལས་ལྷག་པ་ཞིག་ནི་ཡོད་མི་སྲིད་ལ། ཡོད་ཀྱང་མི་དགོས་ཏེ། ཨོ་རྒྱན་སངས་རྒྱས་གཉིས་པ་དང་ཀུན་མཁྱེན་ཀློང་ཆེན་རབ་འབྱམས་སོགས་སྐྱེས་ཆེན་གོང་མ་རྣམས་ཀྱང་། བྱོན་པའི་དུས་རབས་མི་གཅིག་པ་ཙམ་མ་གཏོགས། གལ་ཏེ་ཁོང་ཚོའི་དྲུང་དུ་ཡོད་ནའང་འདི་ལས་ཁྱད་པར་ཅི་ཡང་མེད་སྙམ་པའི་བཅོས་མིན་གྱི་དད་པ་ཞིག་རྟག་ཏུ་སྐྱེ་བཞིན་ཡོད།

དད་པ་དེ་ནི་ཆེད་དུ་བཅོས་ནས་དག་སྣང་སྒོམ་པ་ཙམ་མིན་པར། རྗེ་ཉིད་ཀྱི་མཛད་སྤྱོད་གང་ལ་བལྟས་ཀྱང་སྐྱེ་བོ་ཕལ་བའི་སྤྱོད་ཡུལ་ལས་ཡོངས་སུ་འདས་པ་ཞིག་ཡིན་པས། གང་ཟག་སུ་ཡིན་ཡང་། ཁོང་གི་སྐུ་མཇལ་བ་ཙམ་གྱིས་སེམས་སུ་འགྱུར་བ་ཆེན་པོ་འབྱུང་ཞིང་། གསུང་ཐོས་པ་ཙམ་གྱིས་ཡིད་ཀྱི་དང་བ་རབ་ཏུ་འདྲེན་པར་བྱེད་ལ། གསོལ་བ་བཏབ་པ་ཙམ་གྱིས་རྒྱུད་ལ་བྱིན་རླབས་ཆེན་པོ་འཇུག་པར་འགྱུར་བས། འདི་ནི་སངས་རྒྱས་བྱང་སེམས་དང་དབྱེར་མ་མཆིས་པའི་བྱིན་མཐུ་ཁྱད་པར་བ་ཞིག་གིས་ལོས་ཡིན་སྙམ།

བདག་གིས་ཕྱི་ལོ་༡༩༨༥ལོར་རྗེ་ཉིད་ཐོག་དང་པོར་མཇལ་བ་ནས་བཟུང་། མཐར་ཕྱི་ལོ་༢༠༠༤ལོར་ཁ་བྲལ་བའི་བར་གྱི་བགྲང་བྱ་༡༩ཙམ་ལ་བླ་མར་བསྟེན་པའི་གོ་རིམ་ཁྲོད། ལོག་ལྟ་ཐེངས་གཅིག་ཙམ་ཡང་སྐྱེས་མ་མྱོང་བ་ནི་བདག་གི་མི་ཚེ་འདིའི་དོན་སྙིང་ལྡན་ཞིང་རིན་ཐང་ཡོད་པའི་ཕྱིར་དྲན་ཞིག་ཡིན།

ཆོས་རྗེ་ཉིད་ཀྱིས་ནམ་རྒྱུན་སློབ་མ་རྣམས་ལ། བཟང་པོའི་བླ་མ་འདི་དང་དུས་རྟག་ཏུ། །མི་འབྲལ་འགྲོགས་པར་འདོད་ཀྱང་འབྲལ་བར་ངེས། །ཞེས་གསུངས་ཤིང་། ཁོང་ཞིང་ལ་གཤེགས་པ་ནས་བཟུང་། བདག་ཅག་ནི་བྱམས་ལྡན་ཨ་མ་དང་བྲལ་བའི་དྭ་ཕྲུག་ཇི་བཞིན་འཇིག་རྟེན་འདིར་ཁེར་རྐྱང་དུ་ལུས་སོང་བས། ནམ་རྒྱུན་བླ་མ་ཁོང་ཡིད་ལ་དྲན་ཐེངས་རེར། སེམས་པ་ཧ་ཅང་སྟོང་ལྷང་ངེར་གནས་པ་ན། རང་གིས་རང་ལ་ངའི་བླ་མའི་གཟུགས་སྐུའི་བཀོད་པ་རེ་ཞིག་ཆོས་ཀྱི་དབྱིངས་སུ་བསྡུས་ཟིན་ཀྱང་། ཆོས་ཀྱི་སྐུ་ནི་ནམ་ཡང་བདག་ཅག་དང་འབྲལ་བ་མེད་ཅེས་སེམས་གསོ་ཡང་ཡང་བྱེད་ཀྱིན་ཡོད། དེ་ལྟ་ནའང་། ད་ལྟ་བརྙན་ཕབ་ལས་སྐུ་བརྙན་མཇལ་བ་ཙམ་དང་སྒྲ་ཕབ་ལས་གསུང་སྐད་ཐོས་པ་ཙམ། རྨི་ལམ་དུ་སྐུ་ཉིད་དང་འཕྲད་པ་ཙམ་ལས། རྒྱ་ཆེ་བའི་འཇིག་རྟེན་འདི་ནས་བདག་གི་བླ་མ་དངོས་ནི་ཇི་ལྟར་བཙལ་ཀྱང་རྙེད་དུ་མེད་པར་གྱུར།

མང་པོ་ཞིག་གིས། རྒྱུན་དུ་བླ་མའི་གམ་དུ་བཅར་ནས་ཉེ་བར་བསྟེན་དྲགས་ན། བླ་མ་དེ་སྐྱེ་བོ་ཕལ་བ་ཇི་བཞིན་སྐྱོན་གྱི་ཆའང་མང་དུ་མཐོང་ཡོང་བར་བཤད་ཀྱང་། བདག་ནི་དེ་ལས་ལྡོག་སྟེ། བླ་མ་ཇི་ལྟར་ཉེ་བར་བསྟེན་པ་དེ་ལྟར་དུ་དད་པ་ཤུགས་དྲག་པོར་འཕེལ་ཡོང་སྟེ། བགྲང་བྱ་ཅི་ཙམ་འགོར་ཡང་དད་པ་ལ་འགྱུར་བ་ཁབ་རྩེ་ཙམ་སོང་མེད་པར་མ་ཟད། སྔར་ལས་ཀྱང་ཇེ་བས་ཇེ་བརྟན་དུ་འགྲོ་བཞིན་འདུག བླ་མ་ཞིང་དུ་གཤེགས་པ་ནི་ཕ་མ་སོགས་འཇིག་རྟེན་གཞན་དུ་ཆས་པ་དང་མི་འདྲ་བར། ཉིན་རེ་ནས་ཉིན་རེ་བཞིན་དུ་དྲན་གདུང་ཆེ་རུ་འགྲོ་བཞིན་ཡོད། དེ་ཡང་སྔོན་ཆད་ཁོང་གི་ཞལ་ནས། ང་ཤི་ཚར་རྗེས་ཁྱེད་ཅག་ང་རང་ལ་དད་པ་ཇེ་ཆེར་འགྲོ་ཤས་ཆེ་ཞེས་གསུངས་པ་དེ་ནི་ངོ་མ་བདེན་པར་འདུག་སྙམ་མོ། །

སྙུང་གཞི་དྭངས་པར་གྱུར།

ཕྱི་ལོ་༡༩༩༡ལོར་ང་ཚོས་མེན་དབྱང་（绵阳）གྲོང་ཁྱེར་དང་ཁྲུང་ཆིང་（重庆）གྲོང་ཁྱེར་སོགས་སུ་བཙུགས་པའི་ཆོས་ཚོགས་ཀྱི་སློབ་མ་རྣམས་ཀྱིས་གདན་ཞུ་བྱས་པ་ལྟར། ཕྱི་ཟླ་༩པའི་ཚེས་༡༥ཉིན། ཆོས་རྗེ་ཉིད་ཆོས་ཚོགས་དེ་དག་ཏུ་བྱོན་ནས་ཆོས་གསུང་རྒྱུའི་བཀོད་སྒྲིག་ཡོད་ཀྱང་། ཉིན་དེར་གློ་བུར་དུ་ཆིང་ཏིང་（清定）བླ་མའི་སྙུན་གཞི་ཇེ་སྡུག་ཏུ་སོང་ཚུལ་ཐོས་པ་དང་། ཨ་ནེ་མེ་སྒྲོན་ཡང་ཚབས་ཆེ་ཙམ་ཞིག་སྙུང་བཞིན་པས། ཆོས་རྗེ་ཉིད་ཀྱི་མཛད་རིམ་དེ་དག་ཀྱང་གནས་སྐབས་སུ་ཕྱིར་འཐེན་མི་བྱེད་ཐབས་མེད་དུ་གྱུར་སྟབས། ཁོང་གི་སྐུ་ཚབ་ལ་མཁན་པོ་ཚུལ་ཁྲིམས་བློ་གྲོས་དང་སྤྲུལ་སྐུ་བསྟན་འཛིན་རྒྱ་མཚོ་སོགས་མཁན་སྤྲུལ་བཞི་ཆོས་ཚོགས་དེ་དག་ལ་ཆོས་གསུང་དུ་མངགས།

སྔ་དྲོར་ཆོས་རྗེ་ཉིད་ཁྲེང་ཏུའུ་གྲོང་ཁྱེར་གྱི་ཀྲའོ་ཅུའེ་（昭觉）དགོན་དུ་ཆིང་ཏིང་བླ་མ་ལ་སྙུན་འདྲིར་བྱོན་པ་ན། ཁོང་ནི་ཞལ་མདངས་ཉམས་ཤིང་སྐུ་ཤ་རིད་པར་གྱུར་ནས་ཧ་ཅང་སྙུང་བའི་ཚུལ་མཛད་ཀྱིན་ཡོད། སྐབས་དེར་ཆོས་རྗེ་ཉིད་ཀྱིས་ཁོང་ལ་ཚེ་དབང་བསྐུར་བའི་རྟེན་འབྲེལ་གྱིས་སྐུ་ཁམས་ཀྱང་རིམ་གྱིས་ཇེ་དྭངས་ལ་སོང་།

ཨ་ནེ་མེ་སྒྲོན་སྐམ་དམག་གི་སྤྱིའི་སྨན་ཁང་དུ་བྱོན་ནས་བརྟག་དཔྱད་བྱས་པ་ན། ཁོང་ལ་མྱུར་གཤིས་རྒྱུ་ལྷག་གི་ནད་ཡོད་པར་ངོས་བཟུང་ཞིང་། ཆོས་རྗེ་ཉིད་ཀྱང་ཕྱི་ལོགས་སུ་འབྱོན་སྐབས་སྐུ་ངལ་ཧ་ཅང་ཆེ་བས་སྐུ་གཟུགས་ལ་བརྟག་དཔྱད་བྱ་ཕྱིར། ཉིན་དེར་ཁོང་རྣམ་པ་སྨན་ཁང་དེར་སྡོད་བཅོས་མཛད་ཅིང་བདག་གིས་སྐད་སྒྱུར་སོགས་ཀྱི་ཞབས་ཞུ་བསྒྲུབས་པ་ཡིན། ཐོག་མར་ཨ་ནེ་མེ་སྒྲོན་ལ་གཤག་བཅོས་བྱེད་དགོས་པར་བཤད་ཀྱང་། གནམ་ཁབ་ཀྱིས་ཚ་སེལ་ཉིན་གཅིག་ཙམ་བྱས་པས་གཤག་བཅོས་མ་དགོས་པར་སྙུང་གཞི་ཡོངས་སུ་དྭངས་པར་གྱུར། ཆོས་རྗེ་ཉིད་ལ་ཉིན་གཅིག་གཉིས་རིང་བརྟག་དཔྱད་བྱས་ཀྱང་སྐུ་ལུས་ལ་སྙུན་གཞི་གཞན་ཆེར་མི་འདུག་པས། ཉིན་གཉིས་ཙམ་གྱིས་ཚང་མ་སྨན་ཁང་ནས་བཅོས་ཐོན་བྱུང་།

དེ་ནས་ཆོས་རྗེ་ཉིད་ཁྲ་ཏེན་ཙིར་（茶店子）བཞུགས་ནས་ཉིན་འགའ་ལ་རྒྱ་སྨན་བསྟེན་ནས་སྐུ་གཟུགས་གསོས་ཤིང་། དེ་དང་མཉམ་དུ། ནངས་སྔ་མོ་ནས་ཕྲེང་བསྒྲིགས་ཤིང་འཚང་ཁ་ཤིག་ཤིག་གིས་ཕྱོགས་སོ་སོ་ནས་ཡོང་བའི་དད་ལྡན་རྣམས་ཀྱི་རེ་བ་བསྐང་ཕྱིར། རྗེ་ཉིད་ཀྱིས་ཉིན་གང་པོར་ཆོས་འཆད་དང་དབང་ཁྲིད། ཕྱག་དབང་། བྱིན་རླབས་གནང་བ་སོགས་ཀྱིས་དུས་འདའ་བར་མཛད།

སྐབས་དེར། བླ་རུང་སྒར་གྱི་ཇོ་སེར་དགེ་འདུན་སྤྱི་ལ་སྟབས་བདེ་བའི་ཆེད་དུ། ཆོས་རྗེ་ཉིད་ཀྱིས་ཤར་རླུང་རྟགས་ཅན་གྱི་རླངས་འཁོར་ཆེན་པོ་གཉིས་ཉོས་ཤིང་། དེའི་ནང་དུ་དགེ་འདུན་པ་རྣམས་ལ་གནང་རྒྱུའི་འབྲས་སྒྱེ་མང་པོ་བརྩིགས།

བདག་གིས་ཀྱང་རྗེ་ཉིད་ནུབ་ཕྱོགས་སུ་འབྱོན་སྐབས་ཀྱི་སྐུ་པར་ལེགས་པོ་འགའ་རེ་ཆེད་དུ་བཀྲུས་ཏེ། ཆོས་ཀྱི་མཆེད་གྲོགས་རྣམས་ལ་ཕ་འབབ་གྲ་སྒྲིག་བྱས་པ་ཡིན།

ཕྱིར་བླ་རུང་དུ་འབྱོར།

ཕྱི་ཟླ་༩པའི་ཚེས་༢༡ཉིན། ཁྲེང་ཏུའུ་གྲོང་ཁྱེར་ནས་དར་རྩེ་མདོ་རུ་སླེབས་རྗེས། ཆོས་རྗེ་ཉིད་དེར་ཉིན་གཅིག་ལ་བཞུགས་ཏེ་འབྲེལ་ཡོད་ལས་ཁུངས་ལ་ཕྱི་ལོགས་སུ་སོང་བའི་སྐོར་གྱི་སྙན་ཞུ་ཕུལ་ཅིང་བཞུགས་མོལ་ཚོགས་འདུ་ལ་ཞུགས།

ཚེས་༢༣ཉིན་དར་མདོ་ནས་ཐོན་ཏེ་ལྷ་སྒང་དུ་འབྱོར་བ་ན། ལྷ་སྒང་དགོན་པའི་དགེ་འདུན་པ་རྣམས་ཀྱིས་གདན་ཞུ་བྱས་པ་ལྟར། ཐོག་མར་རིང་བསྲེལ་ལྷ་ཁང་དུ་བྱོན་ནས་རབ་གནས་བྱིན་རླབས་མཛད་ཅིང་། དེ་ནས་ལྷ་སྒང་ཇོ་བོའི་མདུན་དུ་ཐམས་ཅད་དང་མཉམ་དུ་བཟང་སྤྱོད་སྨོན་ལམ་གསུངས་བར་མ་ཟད། དེར་འཁོད་ཀྱི་དད་ལྡན་པ་རྣམས་ལ་མཇལ་ཁའང་གནང་།

བར་སྨད་དམ་དཔལ་སྨད་དུ་སླེབས་པ་ན། སྤྲུལ་སྐུ་ལུང་རྟོགས་ཀྱིས་ད་ལྟའི་ཁོང་གི་གདན་ས་ཡོད་སར་གུར་ཆེན་པོ་ཞིག་ཕུབ་ནས་རྗེ་ཉིད་གདན་ཞུ་བྱས། ཁོང་གིས་སྐབས་དེར་ཆོས་དུང་ཆེན་པོ་གཉིས་རྗེ་ཉིད་ལ་ཕུལ་བ་དེ། ཆོས་རྗེ་ཉིད་ཀྱིས་ལམ་སང་འབུད་འབུད་འགའ་མཛད་ནས་ངེད་བདུད་ལས་རྣམ་རྒྱལ་གླིང་ལ་གནང་བྱུང་།

དགོང་མོར་ནགས་བྲིན་རྩྭ་ཐང་གི་རབ་སྒང་དགོན་པར་སླེབས། སྐབས་དེར་རྗེ་ཉིད་ཀྱི་སྐུ་འཁོར་ཅུང་ཟད་མང་བས། རབ་སྒང་དགོན་པའི་གྲྭ་པ་རེ་རེས་མི་རེ་རེར་སྣེ་ལེན་བྱས་ཤིང་། ལྷག་མ་རྣམས་གཙུག་ལག་ཁང་གི་ནང་དུ་སྣེ་ལེན་བྱས་པས་དེར་ཞག་སྡོད་བྱས་པ་ཡིན།

ཚེས་༢༤ཉིན་གྱི་སྔ་དྲོར། རབ་སྒང་དགོན་ནས་ཐོན་ཏེ་རྟའུ་རྫོང་དུ་སླེབས་པ་ན། དེ་གའི་དད་ལྡན་མང་པོའི་རེ་བསྐུལ་ཞུས་པ་ལྟར། ཆོས་རྗེ་ཉིད་ཀྱིས་རྟའུའི་མཆོད་རྟེན་དཀར་པོར་རབ་གནས་དང་། མང་ཚོགས་རྣམས་ལ་བཀའ་སློབ་དང་བྱིན་རླབས་གནང་།

སླར་ཡང་ལམ་དུ་ཆས་པ་ན། ལམ་འགྲམ་དག་ཏུ་ཕྱོགས་ཀྱི་དགོན་པ་སོ་སོའི་དགེ་འདུན་པ་རྣམས་དང་དད་ལྡན་མང་པོ་འདུས་ཏེ། འགའ་རེས་སྦྲ་གུར་ཕུབ་ནས་རྗེ་ཉིད་ཀྱིས་སྐུ་ངལ་གསོ་བར་གདན་ཞུ་བྱེད་ཅིང་། འགའ་རེས་ལྷ་བསང་ཕུད་དེ་ཆོས་རྗེ་ཉིད་ཕྱིར་ཕེབས་པར་དགའ་བསུ་ཞུས། ཁོང་གིས་དེ་དག་གི་འདོད་པ་བསྐང་བའི་ཆེད་དུ། རླངས་འཁོར་གྱི་དཀར་ཁུང་གི་ཤེལ་ཡོལ་མར་ཕབ་སྟེ་ཕྱག་དབང་དང་བྱིན་རླབས་གནང་ཞིང་། མཚམས་རེར་ཆོས་འབྲེལ་བསྡུས་པ་རེ་གསུང་བཞིན་འབྱོན་པར་མཛད།

ཕྱི་དྲོའི་མཚམས་སུ་ད་གཟོད་བླ་རུང་ཆོས་སྒར་དུ་འབྱོར་བ་དང་། དེར་དགེ་འདུན་པ་རྣམས་ཀྱིས་ཆོས་གོས་མནབས་ཏེ་སེར་ཕྲེང་ཚར་དུ་དངར་བ་བསྒྲིགས་ཤིང་། བསང་དུད་ཀྱི་ཕུང་པོ་རབ་ཏུ་འཁྲིགས་པའི་ཀློང་དུ་རོལ་མོ་སྣ་ཚོགས་ཀྱི་དབྱངས་སྙན་དང་བཅས་ཕེབས་བསུ་རྒྱ་ཆེན་པོའི་ངང་ནས་གདན་ལ་འཇགས་པར་མཛད། ཆོས་རྗེ་ཉིད་ཐད་ཀར་ཀུན་དགའ་ར་བའི་ནང་དུ་ཕེབས་ནས། དགེ་འདུན་པ་རྣམས་ལ་ཕྱི་ལོགས་སུ་བྱོན་པའི་མཛད་རིམ་གྱི་སྐོར་བསྡུས་པ་ཞིག་གསུངས་རྗེས། དཔོན་སློབ་རྣམས་གཞིས་བྱེས་ལྷན་འཛོམས་བྱུང་བའི་དགའ་སྤྲོའི་ཡོ་ལང་གི་ཁྲོད་ནས་རང་རང་གི་གཟིམས་ཤག་ཏུ་བྱོན་ནོ། །

དྲན་ངོགས་ཀྱི་ནུབ་བསྐྱོད་ལས་ཕྱིར་ལོག་པའི་མཛད་རིམ་ལེགས་པར་གྲུབ་པའི་སྐབས་ཏེ་བཅུ་པའོ། །

མཇུག་བྱང་།

ཕྱི་ཟླ་༡༠པའི་མཇུག་ཏུ། སྤྲུལ་སྐུ་བསྟན་འཛིན་རྒྱ་མཚོ་དང་ངེད་གཉིས་གསེར་རྟ་རྫོང་དུ་སོང་ནས། ཉིན་ལྔ་ཡི་རིང་ལ་བདག་གིས་ཕྱི་ལོགས་ནས་ཁྱེར་ཡོང་བའི་སྒྲ་གཟུགས་རྣམས་ཕྱོགས་གཅིག་ཏུ་བསྡུ་སྒྲིག་བྱས་རྗེས། རྒྱ་སྐད་དང་བོད་སྐད་ཀྱི་མཚམས་སྦྱོར་དང་བཅས་ཏེ། ཆོས་རྗེ་ཉིད་ནུབ་ཕྱོགས་སུ་ཕེབས་ནས་ཆོས་གསུངས་པའི་སྐོར་གྱི་དངོས་ཟིན་གློག་བརྙན་དུས་ཚོད་གསུམ་ཡོད་པ་ཞིག་བརྙན་སྡེར་དུ་བཟོས་རྗེས་སློབ་གླིང་དུ་འགྲེམ་སྤེལ་བྱས།

དེ་ནས་ཆོས་རྗེ་ཉིད་ཨ་རིར་བཞུགས་དུས་སུ་སྔགས་སྲུང་མས་ལུང་བསྟན་གནང་བ་བཞིན། ཁོང་དང་ལོ་ཚོད་མཉམ་པའི་མི་སྐྱ་རྒན་པ་དང་གནས་སྐབས་རབ་ཏུ་བྱུང་བའི་སྐལ་བ་མི་ལྡན་པའི་ཁྱིམ་པ་རྣམས་ལ་དགོངས་ཏེ། ལེགས་ཚོགས་ཆར་འབེབས་གླིང་ཞེས་པའི་དགེ་བསྙེན་གྱི་སྡེ་ཞིག་གཟུག་རྒྱུ་གཏན་ཁེལ་མཛད་ནས་ཆོས་ཚོགས་དེའི་གཙུག་ལག་ཁང་བཞེང་བའི་མགོ་བརྩམས། སྐབས་དེར་དགེ་བསྙེན་གྱི་ཆོས་སྡེ་ལ་འཇུག་མཁན་རྣམས་ཐོ་འགོད་བྱེད་དུས། ཐོག་མར་ཁྱིམ་ཚང་བཞི་ལས་མི་འདུག་ཅིང་། དེ་དག་ལས་གཅིག་ནི་བདག་གི་ཕ་མ་རྣམ་གཉིས་ཡིན། དེ་རྗེས་རིམ་བཞིན་དུ་ཆོས་སྡེ་འདི་གཞི་རྒྱ་ཇེ་ཆེ་དང་དགེ་བསྙེན་གྱི་གྲངས་ཇེ་མང་དུ་སོང་སྟེ། ཕྱིས་སུ་བླ་རུང་ལུང་པའི་སྨད་ཕྱོགས་ཀྱི་ཉིན་སྲིབ་གཉིས་ཀ་གང་བར་གྱུར། སྔོན་ཆད་བོད་ཡུལ་དུ་དགེ་བསྙེན་གྱི་ཆོས་སྡེ་འཛུགས་པའི་སྲོལ་མེད་པས། རྗེ་ཉིད་ཀྱི་མཛད་པ་དེས་ནི་བོད་བརྒྱུད་ནང་བསྟན་ལ་སྲོལ་རྒྱུན་གསར་པ་ཞིག་གི་དབུ་ཁྱུད་བྲིས་པའང་ཡིན།

དགེ་བསྙེན་གྱི་ཆོས་སྡེ་ཙམ་མ་ཟད། རྗེ་ཉིད་ལ་ནང་བསྟན་དང་འབྲེལ་བའི་བློ་ཡུལ་ལས་འདས་པའི་གསར་གཏོད་རང་བཞིན་གྱི་མཛད་པ་མང་དུ་ཡོད་དེ། དཔེར་ན། རིག་གསར་གྱི་དུས་སུ་གངས་ལྗོངས་ཀྱི་བསྟན་པ་རྙོག་མ་ཅན་དུ་གྱུར་པ་ན། རྗེས་སུ་བསླབ་ཁྲིམས་དང་དམ་ཚིག་ཉམས་པ་རྣམས་དགེ་འདུན་པ་དང་མཉམ་དུ་འཚོགས་མི་ཆོག་པར་བྱས་ཏེ་བསྟན་པ་དག་ཐེར་མཛད་པ་དང་། བླ་རུང་དུ་གཞི་རྒྱ་ཆེན་པོའི་སྒོ་ནས་བཙུན་མའི་ཆོས་སྡེ་བཙུགས་ཏེ་བུད་མེད་རྟེན་ཅན་གྱི་རབ་བྱུང་པ་མང་པོ་རྗེས་སུ་བཟུང་བ། རྒྱ་ནག་ཏུ་ནང་ཆོས་འཆད་ཉན་གྱི་བསྟན་པ་སྤེལ་ཏེ་རྒྱ་རིགས་སློབ་མ་རྣམས་རྗེས་སུ་བཟུང་བ་སོགས། ནང་བསྟན་གྱི་ལོ་རྒྱུས་ཐོག་འགྱེལ་དུ་མེད་པའི་རྡོ་རིང་གསར་བ་བཙུགས་པ་ལྟ་བུའི་མཛད་བཟང་རེ་རེ་ཡིས། རྗེ་ཉིད་ལ་མ་འོངས་འབྱུང་འགྱུར་གྱི་བྱ་བ་རྣམས་རྗེན་པར་གཟིགས་པའི་མཁྱེན་དཔྱོད་དང་། འཇིག་རྟེན་ལས་འདས་པའི་ཐུགས་བསྐྱེད་རྒྱ་ཆེར་མངའ་བ་སོགས་ལེགས་པར་མཚོན་ཐུབ་པ་ཡིན།

ཆོས་རྗེ་ཉིད་ཕྱིར་བླ་རུང་དུ་བྱོན་པ་ནས་བཟུང་། མུ་མཐུད་དུ་དགེ་འདུན་པ་རྣམས་ལ་ཆོས་ཁྲིད་གནང་བའི་རྒྱུན་བསྐྱངས་ཤིང་། དགུན་དུས་སུ་རྒྱལ་བའི་དབང་པོ་ཀློང་ཆེན་རབ་འབྱམས་ཀྱི་བསྟན་བཅོས་ཆེན་མོ་རྫོགས་པ་ཆེན་པོ་སེམས་ཉིད་ངལ་གསོའི་འགྲེལ་ཆེན་ཤིང་རྟ་ཆེན་པོའི་བཀའ་ཁྲིད་གནང་བ་ན། བོད་ཡུལ་གྱི་གནམ་གཤིས་ནི་ཧ་ཅང་གྲང་ངར་དང་ལྡན་པ་ཡིན་ཡང་། རྗེ་ཉིད་ཀྱི་ཞབས་དྲུང་ནས་ཐེག་པ་ཆེན་པོའི་ཟབ་ཆོས་ཀྱི་བདུད་རྩིར་ལོངས་སུ་སྤྱོད་པའི་སྐལ་བ་ལྡན་པའི་སློབ་མ་རེ་རེའི་སེམས་ནི་དྲོད་ཁོལ་དང་བདེ་སྐྱིད་ཀྱིས་ཁེངས་ནས་ཡོད།

དེ་ལྟར་ངེད་ཅག་སློབ་འབངས་རྣམས་ཀྱིས། སྔར་བཞིན་ཆོས་རྗེ་བླ་མ་དམ་པའི་སྐུ་དྲུང་ནས་མུ་མཐུད་དུ་ཐོས་བསམ་སྒོམ་གསུམ་གྱི་བྱ་བས་དུས་འདའ་བར་བྱས་པ་ལགས་སོ། །

གང་གི་ཞལ་གསུང་བདུད་རྩི་མངར་མོའི་བཅུད། །

བྱིན་རླབས་དྲོད་ཀྱི་ཁ་རླངས་མ་ཡལ་བ། །

ལས་ཅན་བློ་གསལ་གཞོན་ནུའི་དགའ་སྟོན་དུ། །

དམིགས་ཏེ་གསུང་མཆོག་ཡི་གེའི་རིས་སུ་སྤེལ། །

ལུས་ཀྱི་ལང་ཚོ་མར་མར་རྒུད་ན་ཡང་། །

སེམས་ཀྱི་ཉི་གཞོན་ཆེ་ཆེར་གསལ་བ་འདི། །

རྩེ་གཅིག་དད་པས་བླ་མ་ལེགས་བསྟེན་ནས། །

ཟབ་ཆོས་གདམས་པའི་བདུད་རྩི་མྱོང་བའི་དྲིན། །

དྲིན་ལྡན་བླ་མའི་ཞལ་རྒྱུན་གདམས་དོན་གྱི། །

ཚིག་ཟུར་ཙམ་ཞིག་ཉམས་ལའང་ཕངས་པའི་བློས། །

སྙིང་རུས་བསྐྱེད་དེ་ཡི་གེར་བཀོད་ལགས་ན། །

སྐལ་ལྡན་ཐར་འདོད་ཚོགས་རྣམས་དགྱེས་གྱུར་ཅིག །

དོན་གྱི་གནད་ལ་འཁྲུལ་བ་མི་མངའ་ཡང་། །

ཚིག་གི་སྡེབ་སྦྱོར་འགལ་དང་མ་འབྲེལ་བའི། །

ཉེས་པ་ཅི་མཆིས་རྩ་གསུམ་ཆོས་སྐྱོང་དང་། །

རྡོ་རྗེ་མཆེད་པོ་རྣམས་ལ་སྙིང་ནས་འཆགས། །

འདིར་འབད་དགེ་བའི་དངོས་པོ་ཅུང་མཆིས་ན། །

མར་གྱུར་འགྲོ་བ་མ་ལུས་ཀུན་ལ་བསྔོ། །

དཔལ་ལྡན་བླ་མའི་གོ་འཕང་མངོན་གྱུར་ནས། །

ཕྱམ་གཅིག་གདོད་མའི་ས་ལ་ཕྱིན་པར་ཤོག །

ཅེས་བསོད་དར་རྒྱས་ནས་བོད་ཆུ་ཡོས་ལོའི་ཟླ་བ་གཉིས་པའི་ཚེས་ཉེར་ལྔ འི་ཉིན་༼ཕྱི་ལོ་༢༠༢༣ལོའི་ཟླ་༤པའི་ཚེས་༡༥༽ལ་སྦྱར་བ་དགེའོ།། །།

ཆོས་རྗེ་ཉིད་ཀྱིས་ལོ་མང་སྤྱད་པའི་སྒྲ་ཕབ།

མདོ་སྔགས་རིག་པའི་གཙུག་ལག་ཁང་ལ་རབ་གནས་མཛད་བཞིན་པ།

རྗེ་ཉིད་ཀྱིས་ཉི་ཧོང་གི་སློབ་མ་དག་ལ་ཞལ་གདམས་གནང་བཞིན་པ།

ཧཱ་ཝ་ཡེའི་གནས་ཆུང་དགོན་པའི་གནས་ཆུང་ཆོས་སྐྱོང་།

གཡོན་གྱི་དང་པོ་མཁན་རྣམ་གྲོལ། གཉིས་པ་དངོས་གྲུབ་རྡོ་རྗེ། གསུམ་པ་སྐད་སྒྱུར་མཁན་སངས་རྒྱས་མཁའ་འགྲོ།

གནས་ཆུང་དགོན་དུ་བཞག་པའི་ཆོས་རྗེའི་ཞབས་ལྷམ།

ཆོས་རྗེ་ཉིད་ཀྱི་ཞབས་ལྷམ།

སན་ཧྥི་རན་སའེ་སི་ཁོའི་གནམ་ཐང་དུ།

མར་པའི་ཕོ་བྲང་།

ཆོས་རྗེ་བཞུགས་སའི་ཤིང་ཁང་།

རྗེ་ཉིད་ཀྱིས་རི་བོ་རྩེ་ལྔར་ཆོས་གསུང་བཞིན་པ།

ལྗོབ་ཤཱ་མའོ་ཏིར།༼གཡོན་གྱི་དང་པོ།༽

ད་ལྟའི་ཁོང་།

འཇམ་དཔལ་ཞི་སྒྲུབ་ཀྱི་ཆ་ལག་ཁྲིད་ཡིག་སངས་རྒྱས་ལག་སྟེར་དང་འཇམ་དཔལ་ཞི་སྒྲུབ་ཀྱི་འདོན་ཆོག

ཆོས་རྗེ་ལ་ཞབས་ཞུ་སྒྲུབ་མཁན་གྱི་མི་རྒྱ་བོ་དེ། ༼གཡས་ཀྱི་དང་པོ།༽

ནཱ་ཕཱ་ལུང་གི་མཛད་རིམ་རེའུ་མིག

ད་ལྟའི་ཁའེ་ཧེན་རཱེ།

ད་ལྟའི་ལྗེ་མཱེ།

ད་ལྟའི་ལཱོན་ཧཱིལ།

ད་ལྟའི་ལྗོན་སི་ཝེར་ཀྱེན།

ཆོས་རྗེ་ཉིད་རི་བོ་རྩེ་ལྔའི་ནུབ་རིར་བཞུགས་པ།

ཆོས་རྗེ་ཉིད་ཀྱིས་རི་བོ་རྩེ་ལྔའི་ཤར་རིའི་རྩེ་རུ་ཆོས་གསུང་བཞིན་པ།

ཆོས་རྗེ་ཉིད་རི་བོ་རྩེ་ལྔའི་ནོར་བཟང་ཕུག་པར་བཞུགས་པ།

རའེ་ཐུ་སྤུན་མཆེད་གཉིས་ཀྱི་འཕུར་སྐྱོད་པ་དང་པོ།

ད་ལྟའི་ལྗ་ནའེ་ཐུ་རྒྱ་མཚོ།

བཅར་འདྲིའི་སྐབས་ཀྱི་ཨེ་བོན།

སྐུ་ཞབས་དཱལ་ཧོབ་སེ།

ནཱ་ཕཱ་ལུང་།

ཉིའུ་ཡོག

ཧཱ་ཝ་ཡེ།

བྷོ་སི་ཐིན།

ནཱ་ཕཱ་ལུང་།

ནཱ་ཕཱ་ལུང་།

ད་ལྟའི་ལས་རབ་གླིང་།

ད་ལྟའི་རི་མགུལ་རིན་པོ་ཆེ།

ད་ལྟའི་སྐུ་ཞབས་ཕཱ་ཁྲཱེར་ཁི་གྷ་ཧྥི་ནེ།

མཁན་པོ་བསོད་དར་རྒྱས་ཀྱི་གསུང་འབུམ། ༩ རྡོ་རྗེ་ཕ་ལམ་གྱི་ཕྲེང་རྡོག་༣༦༥

མཁན་པོ་བསོད་དར་རྒྱས་ཀྱི་གསུང་འབུམ། ༡ བསླབ་བྱ།

མཁན་པོ་བསོད་དར་རྒྱས་ཀྱི་གསུང་འབུམ། ༢ འོད་དཔག་མེད་ཀྱི་ཞིང་ཡིད་ལ་བྱེད་པའི་མདོ།

མཁན་པོ་བསོད་དར་རྒྱས་ཀྱི་གསུང་འབུམ། ༣ ས་ཡི་སྙིང་པོའི་རྩ་བའི་སྨོན་ལམ་གྱི་མདོ།

མཁན་པོ་བསོད་དར་རྒྱས་ཀྱི་གསུང་འབུམ། ༤ བཀྲ་ཤིས་པའི་མདོ་ཞེས་བྱ་བ།

མཁན་པོ་བསོད་དར་རྒྱས་ཀྱི་གསུང་འབུམ། ༥ ཕ་མའི་དྲིན་ལན་གཞལ་དཀའ་བའི་མདོ་ཞེས་བྱ་བ།

མཁན་པོ་བསོད་དར་རྒྱས་ཀྱི་གསུང་འབུམ། ༦ ཕ་མ་སྐྱོབ་པའི་མདོ་ཞེས་བྱ་བ།

མཁན་པོ་བསོད་དར་རྒྱས་ཀྱི་གསུང་འབུམ། ༧ བུ་མོ་མ་ཏཾ་གའི་མདོ་ཞེས་བྱ་བ།

མཁན་པོ་བསོད་དར་རྒྱས་ཀྱི་གསུང་འབུམ། ༨ ལུང་དག་ལྡན་ཞེས་བྱ་བ།

མཁན་པོ་བསོད་དར་རྒྱས་ཀྱི་གསུང་འབུམ། ༩ སངས་རྒྱས་འདའ་ཁའི་ཞལ་ཆེམས་ཀྱི་མདོ་ཞེས་བྱ་བ།

མཁན་པོ་བསོད་དར་རྒྱས་ཀྱི་གསུང་འབུམ། ༡༠ རབ་བྱེད་ཞེ་གཉིས་པའི་མདོ་ཞེས་བྱ་བ།

མཁན་པོ་བསོད་དར་རྒྱས་ཀྱི་གསུང་འབུམ། ༡༡ རབ་ཏུ་བྱུང་བའི་ཕན་ཡོན་ལ་བསྟོད་པ་ཚིགས་སུ་བཅད་པའི་མདོ་ཞེས་བྱ་བ།

མཁན་པོ་བསོད་དར་རྒྱས་ཀྱི་གསུང་འབུམ། ༡༢ བདེ་ཆེན་ཞིང་སྦྱོང་གི་བསྟན་བཅོས་ཚིགས་བཅད་མའི་རྣམ་པར་བཤད་པ།

མཁན་པོ་བསོད་དར་རྒྱས་ཀྱི་གསུང་འབུམ། ༡༣ རྒྱ་ནག་རི་བོ་རྩེ་ལྔའི་གནས་བཤད་མཐོང་ལྡན།

མཁན་པོ་བསོད་དར་རྒྱས་ཀྱི་གསུང་འབུམ། ༡༤ སྙིང་གཏམ་སྙིང་གི་ཐིག་ལེའི་འགྲེལ་བ།

མཁན་པོ་བསོད་དར་རྒྱས་ཀྱི་གསུང་འབུམ། ༡༥ དྲན་ངོགས་ཀྱི་ནུབ་བསྐྱོད།

མཁན་པོ་བསོད་དར་རྒྱས་ཀྱི་གསུང་འབུམ། ༡༦ དྲན་ངོགས་ཀྱི་རྨི་སྣང་།

འབྲེལ་ཡོད་ཀློག་དེབ།

མ་གཟའ་དམ་གསུམ།

གླེང་བསླང་བ་།

༼ ༦.༡༢~༦.༡༧ ༽

མཛད་རིམ།

ཕྱི་ཟླ་༦པའི་ཚེས་༡༢ཉིན། བླ་རུང་ནས་ཆས་ཏེ་དར་མདོར་སླེབས།

ཕྱི་ཟླ་༦པའི་ཚེས་༡༣ཉིན། ཁྲེང་ཏུའུ་ལ་འབྱོར།

ཕྱི་ཟླ་༦པའི་ཚེས་༡༤ཉིན། ཀོང་ཀྲོའུ་ལ་འཕུར།

ཕྱི་ཟླ་༦པའི་ཚེས་༡༥ཉིན། ཧྲེན་ཀྲེན་ནས་མཚོ་འགག་བརྒལ་ནས་ཧོང་ཀོང་ལ་ཕེབས།

ཕྱི་ཟླ་༦པའི་ཚེས་༡༦ཉིན། འཇར་པན་གྱི་གྲོང་ཁྱེར་ཐོ་ཁེ་ཡོ་བརྒྱུད།

ཕྱི་ཟླ་༦པའི་ཚེས་༡༧ཉིན། ཨ་རིའི་ཧཱ་ཝ་ཡེའི་ཕྱོགས་སུ་འཕུར།

ལོ་གསུམ་གྱི་གསང་རྒྱ།

མ་གཞི་བླ་མ་ཡིད་བཞིན་ནོར་བུ་༡༩༩༠ལོར་རྒྱ་གར་དུ་བྱོན་དུས་ནས། ནུབ་ཕྱོགས་སུ་ཆོས་གསུང་པར་འབྱོན་རྒྱུའི་འཆར་གཞི་ཡོད་པ་སྟེ། ཐེངས་ཤིག ཁོང་གིས་བདག་ཟུར་དུ་བོས་ནས། ད་ནས་ལོ་གསུམ་བཞི་ཙམ་གྱི་རྗེས་སུ་བདག་ཨ་རི་སོགས་ནུབ་ཕྱོགས་རྒྱལ་ཁབ་འགའ་ལ་ཆོས་གསུང་བར་འགྲོ་རྩིས་ཡོད་པས། གལ་ཏེ་ཁྱོད་རང་ལ་མོས་མཐུན་ཡོད་ཅིང་ཁྱིམ་མི་སོགས་ཀྱི་བློ་ལ་བབས་ན་ཁྲིད་དེ་འགྲོ་ཆོག དེ་ལྟ་ན་ཡང་། བྱ་བ་འདི་ལ་འགལ་རྐྱེན་འབྱུང་སྲིད་པས་གནས་སྐབས་སུ་སུ་ལའང་བཤད་མི་རུང་། སྤྱིར་བདག་ཅག་ཕྱི་རྒྱལ་སོགས་སུ་ཆོས་སྟོན་དུ་འགྲོ་བར་བཤད་མི་རུང་བ་གང་ཡང་མེད་ཀྱང་། བྱ་བ་འདི་ལེགས་འགྲུབ་ཡོང་ཆེད་གསང་རྒྱ་བྱེད་པ་ཅིས་ཀྱང་གལ་ཆེ། ཁྱོད་ངག་སྒོ་དམ་པོ་ཅན་ཞིག་ཡིན་པས་མི་སྐྱོན་ཡང་། དེའི་ཕྱོགས་ལ་གཟབ་ནན་བྱ་དགོས་ཞེས་གསུངས།

བདག་གིས་ལགས་སོ་ཞུས་པ་ཡིན་ལ། ཕྱོགས་གཅིག་ནས་སྤྲོ་སྣང་ཆེན་པོ་སྐྱེས་ཤིང་ཕྱོགས་གཅིག་ནས་རང་ཉིད་ཀྱིས་འབྲེལ་ཡོད་ལས་ཀ་རྣམས་ལེགས་པར་འགྲུབ་བམ་སྙམ་པའི་གནོན་ཤུགས་ཀྱི་ཚོར་སྣང་ཡང་སྐྱེས། གང་ལྟར། བླ་མ་ཉིད་ལ་ཞབས་ཕྱི་ལེགས་པོ་བསྒྲུབས་ནས་ཐུགས་མཉེས་པོར་འོང་བ་ཞིག་ལ་བརྩོན་པ་སྔར་ལས་ལྷག་པ་བྱ་དགོས་སྙམ་དུ་རང་སེམས་ལ་དམ་བཅའ་ཡང་ཡང་བྱས།

དེ་ནས་ཕྱི་ཕྱོགས་ཀྱི་བྱ་བ་རྣམས་མཁན་རྣམ་གྲོལ་གྱིས་འབྲེལ་གཏུག་བྱེད་པ་དང་ནང་ཕྱོགས་ཀྱི་འབྲེལ་ཡོད་བྱ་བ་རྣམས་བདག་གིས་འགན་ཁུར་བྱས། བདག་གིས་མངོན་ཆུང་གི་ཚུལ་གྱིས་སྔོན་འགྲོའི་གྲ་སྒྲིག་སྣ་ཚོགས་ཏེ། ཆོས་རྗེ་མཆོག་གིས་གསུང་དགོས་པའི་ཆོས་ཀྱི་དཔེ་ཆ་འཚོལ་སྡུད་དང་། ཕྱི་རྒྱལ་དུ་འགྲོ་བའི་ལམ་ཡིག་ལེན་པ། ལག་དངུལ་གསོག་འཇོག རྒྱུ་སྤུས་ཅུང་ལེགས་པའི་པར་ཆས་ཉོ་བ། འབྲེལ་ཡོད་ཡིག་ཆ་ཀློག་པ་སོགས་བྱས། སྐབས་དེར་དེང་སང་ལྟར་བརྡ་འཕྲིན་དང་དྲྭ་རྒྱ་སོགས་སྟབས་བདེ་པོ་མེད་པས། ཐབས་ཚུལ་གཞན་དང་ཡིག་རིགས་གཞན་ལ་བརྟེན་ནས། ནུབ་ཕྱོགས་ཀྱི་མི་རྣམས་ཀྱི་གཤིས་ཀ་དང་གོམས་སྲོལ། བྱ་བ་སྒྲུབ་སྟངས། འཚོ་བ་རོལ་སྟངས་སོགས་ལའང་རྒྱུས་ལོན་ཅུང་ཟད་རེ་བྱས་པ་ཡིན།

དེའི་དུས་སུ། ཕྱི་ལོ་༡༩༩༠ལོ་ནས་བཟུང་ཆོས་རྗེ་བླ་མའི་སྤྱན་གྱིས་ཡི་གེ་དེ་ཙམ་མི་གཟིགས་པས། དབང་ཆོག་བསྡུས་པ་འགའ་རེ་ཐུགས་ཐོག་ཏུ་ཡོད་པ་མ་གཏོགས། གསུང་བྱའི་དབང་ཆོག་དང་གཞུང་གཞན་རྣམས་སྔོན་ནས་སྒྲ་འཇུག་བྱེད་དགོས་ཤིང་། མཁན་པོ་འཆི་མེད་རིག་འཛིན་ཀློག་ལ་མཁས་པས། བདག་གིས་ཁོང་ལ་ལྕེ་བཙུན་སྙིང་ཐིག་དང་མཁའ་ལྡིང་གཤོག་རླབས་སོགས་ཀྱི་སྒྲ་ལེན་དུ་བཅུག དེ་ཡང་ཆོས་རྗེ་ཉིད་ཀྱིས་དབང་ཁྲིད་གནང་སྐབས་སྒྲ་ཕབ་ལས་དུམ་བུ་རེར་གསན་རྗེས་འཕྲལ་སྡོད་འཐེབ་ཏུ་གནོན་ཙམ་བྱས་ནས་མུ་མཐུད་དུ་གསུང་བར་སྟབས་བདེ་བྱས་པ་ཡིན། ཐེངས་ཤིག་ཁོང་གིས། ཁྱེད་ཀྱིས་འདི་དག་སྒྲ་འཇུག་བྱས་ནས་ཅི་བྱ། བླ་མ་ཡིད་བཞིན་ནོར་བུ་ཡུལ་ཁམས་གང་ཞིག་ལ་འབྱོན་རྩིས་ཡོད་དམ་ཞེས་དྲིས་ཀྱང་། བདག་གིས་གླེང་ཕྱོགས་གཞན་དུ་བསྐོར་ནས་དྲི་བ་དེར་གཡོལ་ཐབས་བྱས་པ་ཡིན།

དེའི་རིང་ལ། ཨ་རི་སོགས་ཡོ་རོབ་ཀྱི་རྒྱལ་ཁབ་གཞན་གྱི་ཆོས་ཚོགས་དག་གིས་གདན་ཞུའི་ཡི་གེ་ཚང་མ་དབྱིན་ཡིག་གི་ལམ་ནས་བསྐུར་བྱུང་བས། སྐབས་དེར་སློབ་གླིང་དུའང་དབྱིན་ཡིག་ཤེས་མཁན་ཆེར་མེད་ལ། ཡོད་ཀྱང་ཐད་ཀར་སྟོན་པ་སོགས་སྟབས་མི་བདེ་བས། བདག་གིས་ཐབས་ལམ་དམིགས་བསལ་བ་སྤྱད་ནས། གདན་ཞུའི་ཡི་གེ་རྣམས་ཀྱི་ནང་དོན་ཡང་གསང་སྟབས་ཀྱིས་བླ་མར་སྙན་ཞུ་བྱས། དེ་ལྟར། ནུབ་ཕྱོགས་སུ་ཕེབས་པའི་ཉེར་མཁོའི་སྟ་གོན་གྱི་བྱ་བ་རྣམས། ལོ་གསུམ་གྱི་རིང་ལ་གསང་བའི་སྒོ་ནས་ལེགས་པར་བསྒྲུབས་པ་ཡིན།

ཐེངས་དང་པོའི་བདེ་ཆེན་ཞིང་སྒྲུབ་ཆེན་མོ།

ཆོས་རྗེ་བླ་མ་ཉིད་དགུང་ལོ་དྲུག་ཅུ་སྟེ་ཆུ་མོ་བྱ་ཡི་ལོ་༼ཕྱི་ལོ་༡༩༩༣ལོ་༽ལ། བླ་རུང་སྒར་སྤྱི་ལ་གཉུག་སེམས་ཟུར་དཔྱད་རྡོ་རྗེ་རིན་ཆེན་ཕྲེང་བ་གསུངས་ཤིང་། སྐབས་དེར། ངེད་བདུད་ལས་རྣམ་རྒྱལ་གླིང་གི་ཐོག་མའི་མདོ་སྔགས་རིག་པའི་གཙུག་ལག་ཁང་ལེགས་འགྲུབ་བྱུང་བའི་རབ་གནས་ཀྱི་མཛད་སྒོའི་སྟེང་དུ་བྱོན་ནས། རྗེ་ཉིད་ཀྱིས་རྫོགས་པ་ཆེན་པོའི་བཀའ་དབང་དང་སེམས་ཉིད་རང་གྲོལ་གྱི་སྨིན་ཁྲིད་གནང་། དེ་ནས། མདོ་མང་དགོན་པའི་སྤྲུལ་རིན་པོ་ཆེ་ཏིཥྛ་དང་མཁན་ཏེ་པ་གཉིས་གདན་ཞུ་བྱས་ཏེ། སློབ་གླིང་སྤྱིའི་དགེ་འདུན་པ་རྣམས་ལ་སྤྱི་མདོ་དགོངས་འདུས་ཀྱི་དབང་དང་ཁྲིད་གསུང་དུ་བཅུག་ཅིང་། ཆོས་རྗེ་བླ་མ་ཁོང་ཉིད་བྲག་མགོ་དང་དཀར་མཛེས། དཔལ་ཡུལ། ཉག་རོང་། རྟའུ་སོགས་སུ་བྱོན་ནས་སྙིང་ཐིག་ཡ་བཞི་དང་དུས་འཁོར་དབང་ཆེན་སོགས་དབང་ལུང་མན་ངག་གི་དམ་པའི་ཆོས་སྤེལ།

ང་རང་སྐབས་དེར་རང་ལོ་སོ་གཅིག་ལ་སོན་ཞིང་། སྒར་སྤྱིའི་དགེ་འདུན་པ་རྣམས་དང་མཉམ་དུ་ཟླ་ཕྱེད་ཀྱི་རིང་ལ་སྤྲུལ་རིན་པོ་ཆེ་ཏིཥྛའི་མདུན་ནས་འདུས་མདོའི་དབང་ཡོངས་རྫོགས་ཞུས་ཤིང་། མཁན་ཏེ་པའི་མདུན་ནས་དགོངས་འདུས་འགྲེལ་ཆེན་གྱི་ཁྲིད་ཀྱང་ཞུས། དུས་མཚུངས་སུ། བདག་གིས་རྒྱ་རིགས་དད་ལྡན་རྣམས་ལ་སྒྱུ་མ་ངལ་གསོའི་འགྲེལ་བ་ཤིང་རྟ་བཟང་པོ་དང་། བསམ་གཏན་ངལ་གསོའི་འགྲེལ་བ་ཤིང་རྟ་རྣམ་དག་སོགས་ཁྲིད་ཁུལ་བྱས། ཟླ་བ་གཅིག་ལྷག་གི་རྗེས་སུ། སྐྱབས་རྗེ་ཉིད་ཕྱིར་སྒར་ལ་བྱོན། དེ་ནས། དམ་པ་གོང་མ་དག་གིས་རྗེ་ཉིད་ལ་འབྲེལ་བ་ཐོགས་ཚད་བདེ་བ་ཅན་དུ་སྐྱེ་བ་སོགས་ལུང་བསྟན་པའི་དོན་བཞིན། སྐྱེ་བོ་གྲངས་མེད་པ་ཞིག་བདེ་ཆེན་དག་པའི་ཞིང་ལ་འདྲེན་པར་བྱེད་པའི་ཆོས་མཆོག་བདུད་རྩིའི་སྦྲང་ཆར་ཆེན་པོ་འབེབ་པའི་ཕྱིར། སྐབས་དང་པོའི་བདེ་ཆེན་ཞིང་སྒྲུབ་ཆེན་མོ་དེ་བོད་ཟླ་བཞི་པ་སྟེ། ས་ག་ཟླ་བའི་ཚེས་གཅིག་ནས་ཚེས་བཅོ་ལྔའི་བར་ལ་འཚོག་རྒྱུར་གཏན་ཁེལ་མཛད།

དེ་ལ་ཕྱོགས་བཞི་མཚམས་བརྒྱད་ནས་མི་གྲངས་ཁྲི་བཅུ་ཕྲག་མང་པོ་ཡོངས་སུ་འདུས་ནས། ཐམས་ཅད་ཀྱིས་གནུབས་ཟུར་ཡུལ་ཤོག་གི་ལོ་པཎ་བསུ་སྐྱེལ་ཐང་དུ་སྦྲ་གུར་ཕུབ་ནས་ཆོས་ཚོགས་ལ་ཞུགས། དེ་དུས། ཡུལ་ལུང་ཐམས་ཅད་སྦྲ་གུར་གྱིས་གང་ཞིང་། མི་ཚོགས་ཀྱི་འདུ་བ་ནི་མུ་མཐའ་མེད་པའི་རྒྱ་མཚོ་འཕྱུར་བ་དང་འདྲ་ལ། དད་ལྡན་རྣམས་ཀྱིས་དར་དཀར་ཕུལ་བའི་རྣམ་པ་ནི་རྒྱ་མཚོའི་རླབས་ཕྲེང་མཁའ་ལ་འཕྱོ་བ་དང་ཀུན་ནས་མཚུངས། ཆོས་ཀྱི་སྒྲ་དབྱངས་ཀྱི་ངར་སྐད་ཀྱང་འབྲུག་སྟོང་དུས་གཅིག་ཏུ་ལྡིར་བ་དང་མཚུངས་པས། མདོར་ན་ཞིང་སྒྲུབ་ཆེན་མོ་དེ་རྣམ་པ་རྒྱ་ཆེ་ཞིང་བསམ་ཡུལ་ལས་འདས་པ་ཞིག་བྱུང་། རང་ཡུལ་ཕྱོགས་ནས་ཀྱང་དད་ལྡན་ཆེས་མང་པོ་འབྱོར་ཞིང་། བདག་གི་དྲིན་ཆེན་ཕ་མ་གཉིས་ལའང་ཆོས་ཚོགས་དེར་ཞུགས་པའི་སྐལ་བ་བཟང་པོ་ལྡན་པར་གྱུར། ཆོས་རྗེ་བླ་མ་ཡིད་བཞིན་ནོར་བུ་ཉིད་ཀྱིས་ཐམས་ཅད་ལ་འོད་དཔག་མེད་ཀྱི་དབང་གནང་ཞིང་། ཉིན་རེ་བཞིན་འོད་མདོ་དང་དྲང་སྲོང་ལུང་ཉི་སོགས་ཀྱི་བཀའ་ཁྲིད་བསྩལ་བ་མ་ཟད། མི་རེས་འོད་མཚན་བྱེ་བ་རེ་བཏོན་ན། ཆོས་སྤོང་དང་མཚམས་མེད་བྱས་པ་མ་གཏོགས་པའི་སྐྱེ་བོ་ཐམས་ཅད་བདེ་བ་ཅན་དུ་སྐྱེ་བར་འགྱུར་ངེས་ཡིན་ཞེས་ནན་གྱིས་གསུངས་བྱུང་། རྗེ་བཙུན་མ་མུ་མཚོ་མཆོག་གིས་ཀྱང་སྤྱན་རས་གཟིགས་ཀྱི་དབང་དང་རྒྱལ་སྲས་ལག་ལེན་གྱི་ཁྲིད་སོགས་དབང་ཁྲིད་ཀྱི་བཀའ་དྲིན་བསྐྱངས། དེ་ནི་ཡུལ་ཁམས་འདིའི་ཞིང་སྒྲུབ་ཐམས་ཅད་ཀྱི་ཐོག་མ་ཡིན་ཞིང་། ཚད་མེད་པའི་སེམས་ཅན་རྣམས་བདེ་ཆེན་དག་པའི་ཞིང་ལ་འཁྲིད་པར་བྱེད་པའི་ཁྱད་དུ་འཕགས་པའི་རྟེན་འབྲེལ་གྱི་སྒོ་འཕར་དང་པོ་ཕྱེས་པའང་ཡིན་ནོ། །

ངོ་མཚར་བའི་ཁ་པར།

བདེ་ཆེན་ཞིང་སྒྲུབ་ཆེན་མོའི་ཉིན་དང་པོའི་ཕྱི་དྲོར། ཆོས་རྗེ་ཉིད་ཀྱིས་ཆོས་ཁྲིད་གསུངས་ཟིན་མ་ཐག གློ་བུར་དུ་མི་ཞིག་ཆོས་རྗེ་ཉིད་ཀྱི་ཆོས་ཁྲིའི་གམ་དུ་བཅར་ནས། མཁན་པོ་རྣམ་གྲོལ་གྱིས་ཁྱེད་ལ་ཁ་པར་འབྱོར་བྱུང་བས། ཁྱེད་རང་གནུབས་ཟུར་ཡུལ་ཤོག་གི་སྲིད་གཞུང་གི་གཞུང་ལས་ཁང་དུ་བྱོན་ནས་གསན་རོགས་ཞུ་ཞེས་ཞུས་མ་ཐག ཁོང་གིས་བཟང་སྤྱོད་སྨོན་ལམ་ཡང་འདོན་ལོང་མེད་པར་ཆོས་ཁྲིའི་སྟེང་ནས་ཡར་བཞེངས་ཏེ། བདག་ལ་འགྲོ་རོགས་བྱོས་ཞེས་གསུངས། སྐབས་དེར། གནུབས་ཟུར་ཡུལ་ཤོག་ཡོངས་ལ་གདན་འཇོག་ཁ་པར་གཅིག་མ་གཏོགས་མེད་ཅིང་། ཞིང་སྒྲུབ་འཚོག་ས་ནས་ཡུལ་ཚོའི་སྲིད་གཞུང་བར་སྤྱི་ལེ་ཕྱེད་ཙམ་གྱི་བར་ཐག་ཡོད། བདག་ཅག་རླངས་འཁོར་ལ་བསྡད་ནས་དེར་ཐོན་ཚེ། ཆོས་རྗེ་ཉིད་ཀྱིས་ཁ་པར་བླངས་ཏེ་གསུང་སྐད་མཐོན་པོས་ང་འཇིགས་ཕུན་ཡིན་ཞེས་ལན་འགར་གསུངས་ཀྱང་། ཁ་པར་གྱི་རྒྱུ་སྤུས་ངན་ཞིང་འཛེར་སྐད་ཆེ་བས་ལེགས་པོ་ཞིག་ཚོར་མ་ཐུབ། སྐབས་རེར་བདག་གིས་ཉན་ལ་སྐབས་རེར་བླ་མས་གསན་ནས་དུས་ཚོད་རིང་ཙམ་འགོར་རྗེས་གཟོད་གོ་བརྡ་འཕྲོད་ཐུབ་པ་བྱུང་།

མཁན་པོ་རྣམ་གྲོལ་ཁོང་རྒྱ་གར་ནས་ཕྱིར་ཁྲེང་ཏུའུ་（成都）ལ་སླེབས་ཏེ། ཆོས་རྗེ་ཉིད་ཕྱི་ཕྱོགས་སུ་འབྱོན་སྐབས་ཀྱི་ཆོས་གསུང་སའི་ས་ཚིགས་དང་དུས་ཚོད་སོགས་ཕལ་ཆེར་གཏན་ཁེལ་བྱས་ཟིན་པས། ཕྱི་རྒྱལ་དུ་འགྲོ་མཁན་རྣམས་ཀྱི་ཐོབ་དཔང་དང་ལམ་ཡིག་རྣམས་ཁྱེར་ནས་ཐོངས་མཆན་དགོད་དུ་ཡོང་དགོས་ཟེར། རྗེ་ཉིད་ནི་ཆོས་ཚོགས་ཆེན་པོའི་མཚམས་གཅད་རྒྱུ་མེད་པས་འབྱོན་ཐབས་མི་འདུག དེ་བས་བདག་གིས་ལམ་ཡིག་སོགས་འབྲེལ་ཡོད་རྒྱུ་ཆ་དག་བཟུང་ནས་ཁྲེང་ཏུའུ་རུ་སོང་བ་ཡིན། དེར་ཐོན་རྗེས། མཁན་པོ་རྣམ་གྲོལ་དང་ཐུག་ཕྲད་བྱས་ཏེ་ཨ་རིའི་གཞུང་ཚབ་ཁང་དུ་སོང་། གཞུང་ཚབ་ཁང་ལ་རྒྱ་ཁྱོན་ཆུང་བའི་ཁང་ཤག་གཉིས་དང་ར་སྐོར་ཆུང་ཆུང་ཞིག་ལས་ཅིའང་མི་འདུག ཉིན་དེར། མི་མང་པོ་ཞིག་ལ་ཐོངས་མཆན་བཀག་འདུག་པས། བུད་མེད་སློབ་ཆེན་པ་ཞིག་ངུས་ནས་གཏམ་ཡང་སྨྲ་མི་ཐུབ་པར་གྱུར་འདུག་ལ། གང་ཟག་གཞན་ཞིག་གི་ལམ་ཡིག་སྟེང་དུ་ཕྱིས་སུ་རྒྱལ་ཁབ་དེར་འགྲོ་མི་ཆོག་པའི་ཐེལ་ཙེ་བརྒྱབས་པ་སོགས་མཐོང་། བདག་ནི་སྐབས་དེར་ཨ་རི་སོགས་ནུབ་ཕྱོགས་རྒྱལ་ཁབ་ཏུ་འགྲོ་འདོད་ཆེ་ལ། ཆོས་རྗེ་ཉིད་དང་མཉམ་དུ་ཡུལ་དེ་དག་ལ་འགྲོ་རྒྱུ་བྱུང་ན་སྙམ་པའི་འདུན་པ་ལྷག་ཏུ་ཆེ་ནའང་། དེ་རིང་ཕལ་ཆེར་ཐོངས་མཆན་ལོན་ཐུབ་རྒྱུ་མ་རེད་སྙམ།

དེ་ནས་བདག་གིས་ཆོས་རྗེ་ཉིད་དང་ཨ་ནེ་མེ་སྒྲོན། བླ་མ་མུ་མཚོ། བདག་རང་ཉིད་བཅས་ཀྱི་ལམ་ཡིག་རྣམས་ཕར་སྤྲད་ཚེ། ཐོངས་མཆན་འགོད་མཁན་གྱི་རྒད་པོ་མགོ་སེར་དེས། ཁྱེད་ཅག་ཚང་མ་ཨ་རི་ལ་འགྲོ་བ་ཡིན་ནམ། གཞན་རྣམས་མི་དངོས་སུ་མ་ཐོན་ན་ཐོངས་མཆན་འགོད་ཐབས་མེད་ཟེར། བདག་གིས། ཁོང་བླ་མ་ཆེན་པོ་ཞིག་ཡིན་ཞིང་། ད་ལྟ་མི་ཁྲི་ཕྲག་མང་པོར་ཆོས་ཚོགས་འཚོག་བཞིན་ཡོད། གཞན་གཉིས་ནི་ཁོང་གི་ཁྱིམ་མི་ཡིན། ཁྱེད་ཅག་གཞུང་ཚབ་ཁང་གིས་གཟའ་འཁོར་རེར་ཉིན་གཉིས་ཙམ་ལས་སྒོ་མི་ཕྱེ་བར་འདུག ངེད་ཅག་གིས་ཨ་རི་སོགས་ཀྱི་ལས་རིམ་དུས་ཚོད་གཏན་ཁེལ་བྱས་ཟིན་སྟབས་ད་ལྟ་སྒུག་ལོང་མེད་པས། ཁྱེད་ཀྱིས་ཐོངས་མཆན་དགོད་རོགས་བྱས་ན་འགྲིག་གམ་ཞེས་བཤད་ཚེ། མི་དེས་ང་ཚོས་རབ་བྱུང་གི་གོས་གྱོན་ཡོད་པ་ལ་དགའ་བའི་ཉམས་འགྱུར་བླ་ལྷག་དང་བཅས་ཏེ།“very good”ཞེས་ཟེར་བཞིན་ཐོངས་མཆན་བཀོད་བྱུང་།

ཐོངས་མཆན་བཀོད་ཐུབ་སོང་བ་དེས་བདག་ལ་དགའ་ཚོར་ཆེན་པོ་སྐྱེས་ཤིང་། ཕྱིར་མཁན་པོ་རྣམ་གྲོལ་གྱི་མགྲོན་ཁང་དུ་སོང་བ་ན། ཁོང་བཞུགས་སའི་མགྲོན་ཤག་ནང་དུ་གདན་འཇོག་ཁ་པར་ཞིག་འདུག དེ་ནི་བདག་གིས་གདན་འཇོག་ཁ་པར་ཡོད་པའི་ཚད་མཐོའི་མགྲོན་ཤག་མཐོང་ཐེངས་དང་པོ་ཡིན་ལ། དེ་བཞིན་ངེད་གཉིས་ཕན་ཚུན་གླེང་མོལ་བྱེད་དུས། ཁོང་གིས། ཉིན་དེར་ཁྱེད་ཅག་གིས་ངའི་མགྲོན་ཤག་གི་ཁ་པར་ཨང་གྲངས་ཇི་ལྟར་ཤེས་ཏེ་འབྲེལ་གཏུག་བྱས་པ་ཡིན་ཞེས་ཟེར། བདག་གིས། ཁྱེད་ཀྱིས་གནུབས་ཟུར་ཡུལ་ཤོག་གི་གཞུང་ལས་ཁང་དུ་ཁ་པར་བཏང་པ་མ་ཡིན་ནམ་ཞེས་དྲིས་ཚེ། ཁོང་ཤིན་ཏུ་ཡ་མཚན་པའི་སྒོ་ནས། ངས་གནུབས་ཟུར་ཡུལ་ཤོག་ལ་ཁ་པར་ཡོད་པ་ཙམ་ཡང་མི་ཤེས་པས་ག་ལ་ཡིན་ཟེར། ད་དུང་མུ་མཐུད་དུ། ང་རང་ཁྲེང་ཏུའུ་རུ་སླེབས་པའི་ཕྱི་ཉིན་ནངས་མོར་ཆོས་རྗེ་ཉིད་ལ་འབྲེལ་གཏུག་བྱ་འདོད་ཀྱང་། སྤྱིར་གསེར་རྟའི་འཕྲིན་སྐྱེལ་སྟབས་བདེ་མིན་པས་ཁ་པར་ཡོད་ས་མང་པོ་མེད་ལ། ཡོད་པ་དེ་དག་ལའང་འབྲེལ་བ་བྱེད་ཐུབ་མ་སོང་། བྲེལ་བ་ཆེ་ཡང་དེ་རིང་གི་དུས་ཚོད་འཕྲོ་བརླག་ཏུ་གཏོང་བ་ལས་ཐབས་མི་འདུག་སྙམ་པ་བྱུང་། ཕྱི་དྲོར་ཅུང་ཙམ་གཉིད་དུ་ཡུར་བའི་སྐབས་སུ། གློ་བུར་དུ་མགྲོན་ཤག་གི་ཁ་པར་གྱི་སྒྲ་གྲགས་བྱུང་། ངས་གཉིད་མ་སད་ཀྱིས་ཁ་པར་ཡར་བླངས་ནས་ཉན་ཚེ། ཆོས་རྗེ་ཉིད་ཀྱིས་ང་འཇིགས་ཕུན་ཡིན་ཞེས་སོགས་གསུངས་བྱུང་ཞེས་ཟེར།

སྐབས་དེར་རྒྱང་རིང་དུ་ཁ་པར་གཏོང་དགོས་ན་གླ་ཆ་ཅུང་ཆེ་ཡང་། ང་ཚོས་ནི་ཕན་ཚུན་དུ་ཁ་པར་བཏང་བ་མིན་ལ་གླ་ཆའང་སྤྲད་མེད་རུང་། ཕྱོགས་གཉིས་ནས་ངོ་མཚར་བའི་ངང་དུ་འབྲེལ་མཐུད་ཐུབ་པ་བྱུང་བས། ད་ལྟ་ད་དུང་ཡང་ངེད་གཉིས་ཀྱིས་ནམ་རྒྱུན་དོན་དེ་གླེང་སྐབས། ཆེས་ངོ་མཚར་བ་ཞིག་ཏུ་བརྩི་བཞིན་ཡོད་པ་མ་ཟད། དེ་ནི་ཆོས་སྐྱོང་སྲུང་མའི་ནུས་མཐུ་གཞན་ཞིག་ཡིན་ཡང་སྲིད་སྙམ།

བོད་ཡུལ་དང་གྱེས་པ།

ཐོངས་མཆན་ཐོབ་རྗེས་ང་རང་མྱུར་དུ་ཆོས་སྒར་ལ་ཕྱིར་ལོག སྐབས་དེར་ད་དུང་བདེ་ཆེན་ཞིང་སྒྲུབ་ཆེན་མོའང་གྲོལ་མི་འདུག བདག་གིས་འབྲེལ་ཡོད་གནས་ཚུལ་རྣམས་ཆོས་རྗེ་ཉིད་ཀྱི་སྙན་ལ་ཞིབ་མོར་ཞུས་པས། ཁོང་ཐུགས་ཤིན་ཏུ་མཉེས་པར་གྱུར། ཞིང་སྒྲུབ་ཆོས་ཚོགས་མཇུག་དྲིལ་ལ་ཉེ་བའི་སྐབས་སུ། ཁོང་གིས་ཕྱི་ཕྱོགས་ལ་ཕེབས་རྒྱུའི་འཆར་གཞི་དེ་ཀུན་ལ་བསྒྲགས་པ་སྟེ། བདག་ནུབ་ཕྱོགས་ཀྱི་རྒྱལ་ཁབ་འགའ་རེར་འགྲོ་རྩིས་ཡོད་ཅིང་། དེ་ནི་རང་བཞིན་གྱི་ཡུལ་སྐོར་དང་སྤྲོ་འཁྱམ་སོགས་ཀྱི་ཆེད་མ་ཡིན་པར། སངས་རྒྱས་ཀྱི་བསྟན་པ་སྤེལ་བའི་དགོས་པ་དང་རྟེན་འབྲེལ་ཁྱད་པར་བ་ཡོད། ད་ལན་བདག་ཅག་ཕྱི་རུ་འགྲོ་བ་ནི་གནས་གཞན་དུ་འགྲོ་བ་དང་མི་འདྲ་བས། ཁྱེད་དགེ་འདུན་པ་རྣམས་ཀྱིས་ཆོས་སྐྱོང་ལ་འཕྲིན་བཅོལ་དང་ཐུགས་གཏད་གཟབ་རྒྱས་གནང་རོགས། བདག་གིས་ཞབས་འབྲིང་ལ་ཕྱི་ཕྱོགས་ནས་མཁན་པོ་རྣམ་གྲོལ་དང་དངོས་གྲུབ་རྡོ་རྗེ་གཉིས་དང་། ནང་ལོགས་ནས་བསོད་དར་རྒྱས་འཁྲིད་རྒྱུ་ཡིན། རྒྱལ་ཁབ་དེ་དག་ཁ་ཐག་ཤིན་ཏུ་རིང་བའི་སར་ཡོད་པས། ངེད་ཅག་ཕྱིར་ལོག་ཐུབ་མིན་ཡང་མི་ཤེས། གལ་ཏེ་བསོད་དར་རྒྱས་ཕྱིར་ལོག་མ་ཐུབ་ནའང་། མདོ་དགོན་གྱི་སྤྲུལ་ཏིཥྛ་དང་མཁན་ཏེ་པ་གཉིས་ཀྱིས་བདག་ལ་གྱོད་རྒྱག་མི་ཡོང་སྙམ་པའི་ཡིད་ཆེས་ཡོད། ཁྱེད་གཞིས་སྡོད་ཀྱི་དགེ་འདུན་པ་རྣམས་ཀྱིས། མཁན་པོ་དང་མཁན་མོ་དག་གི་མདུན་དུ་ཆོས་ཁྲིད་ལེགས་པར་ཞུས་ནས། ཐོས་བསམ་སྒོམ་གསུམ་ལ་མུ་མཐུད་དུ་བརྩོན་པ་གནང་རྒྱུ་མ་འཆུགས་ཞེས་གསུངས།

ཕྱི་ཕྱོགས་སུ་འགྲོ་ཁར། བདག་གིས་རྒྱའི་མཁན་པོ་དང་མཁན་མོ་གཉིས་བསྐོ་བཞག་བྱས་ནས། བདུད་ལས་རྣམ་རྒྱལ་གླིང་གི་རྒྱའི་དགེ་འདུན་པ་རྣམས་ལ་སྤྱོད་འཇུག་གསུང་དུ་བཅུག ཕ་མ་གཉིས་ཀྱང་གནས་སྐབས་སུ་བླ་རུང་ནས་འགྲོ་འདོད་མེད་པས། སྦྲ་ནག་གཅིག་གཡར་ནས་ཆོས་སྒར་དུ་འདུག་བཅུག་པ་ཡིན།

སྤྱིར་སྔོན་ཆད་ནས་རྒྱ་གར་སོགས་ལ་སོང་བས་རྗེ་ཉིད་ལ་ཞབས་ཕྱི་བྱེད་པའི་ཉམས་མྱོང་ཅུང་ཟད་ཡོད་ཀྱང་། ད་ལན་སྔར་དང་མི་འདྲ་བར་ཆོས་རྗེ་ཉིད་ཀྱི་བྱོན་བཞུགས་ཀྱི་གསོལ་ཆས་དང་ན་བཟའ། བདེ་སྲུང་སོགས་འགན་ལེན་དགོས་པས་མི་ཚད། ཆོས་ཁྲིད་གསུང་རྒྱུའི་འབྲེལ་ཡོད་བྱ་བ་རྣམས་ཀྱང་བཀོད་སྒྲིག་བྱ་དགོས་པས་གནོན་ཤུགས་ཧ་ཅང་ཆེན་པོ་འདུག དེ་བས། བདག་གིས་རྒྱུན་སྤྱོད་ཀྱི་གསོལ་སྨན་དང་པར་ཆས། སྒྲ་ཕབ། འབྲི་དེབ་སོགས་ཅ་ལག་ལྗིད་ཏིག་གེ་བ་བཅུག་པའི་རྒྱབ་ཁུག་སེར་པོ་དེ་རྒྱུན་དུ་ཁུར་ནས་འགྲོ་དགོས།

ཕྱི་ཟླ་༦པའི་ཚེས་༡༢ཉིན་ཏེ་ཞིང་སྒྲུབ་མཇུག་རྫོགས་པའི་ཕྱི་ཉིན། ངེད་ཅག་དཔོན་སློབ་རྣམས་ཆོས་སྒར་དང་ཞལ་གྱེས་ཏེ་ལམ་ལ་ཆས་ཤིང་ཕྱི་དྲོར་དར་རྩེ་མདོར་སླེབས། དེར་ཆོས་རྗེ་ཁོང་ཉིད་ཀྱི་གྲོགས་པོ་རྙིང་པ་སྤྱི་བདེ་ལས་ཁུངས་ཀྱི་མགོ་ཁྲིད་ཅིག་ཡོད་པ་ལ་ཐུག་ཕྲད་གནང་། མགོ་ཁྲིད་དེས། ད་ལྟ་ཕྱི་ནང་གི་གནས་བབས་ཛ་དྲག་ཆེ་ཞིང་རྙོག་དྲ་མང་བས། མྱུར་དུ་ཕྱི་ཕྱོགས་སུ་མ་སོང་ན་གནས་ཚུལ་ལ་འགྱུར་ལྡོག་འགྲོ་སྲིད། ཞིང་ཆེན་གྱི་འབྲེལ་ཡོད་ལས་ཁུངས་ལ་མ་གཏུགས་ཀྱང་ཆོག ཐད་ཀར་ཞིང་ཆེན་གཞན་བརྒྱུད་ནས་འགྲོ་བའམ་ཧོང་ཀོང་（香港）སོགས་ནས་ཕྱི་རྒྱལ་དུ་སོང་ན་བཟང་ས་རེད་ཅེས་དྲན་སྐུལ་བྱས་བྱུང་།

ཕྱི་ཟླ་༦པའི་ཚེས་༡༣ཉིན། ངེད་ཅག་དར་མདོ་ནས་ཁྲེང་ཏུའུ་རུ་སླེབས། ཚེས་༡༤ཉིན་གྱི་ཞོགས་པའི་ཆུ་ཚོད་ལྔ་པའི་སྟེང་ནས་གནམ་གྲུར་ཞུགས་ཏེ་ཀོང་ཀྲོའུ་（广州）ལ་སླེབས། དེར་གོས་དམར་པོ་གྱོན་པའི་བུད་མེད་དགེ་བསྙེན་ཞིག་གིས། མགྲོན་ཁང་སོགས་མོ་རང་གིས་གྲ་སྒྲིག་བྱས་ཡོད་ཅེས་སྣེ་ལེན་བྱས་ཀྱང་། ངེད་ཅག་སུས་ཀྱང་ངོ་མི་ཤེས་པས་ཡིད་མ་ཆེས་པར་གྱུར་སྐབས། ཆོས་རྗེ་ཉིད་ཀྱིས། བལྟས་ཚོད་ལ་མོ་རང་ཆོས་པ་རྣམ་དག་ཅིག་ཡིན་པ་འདྲ། དེ་ལྟར་བྱས་ན་མི་འགྲིག་རྒྱུ་མི་འདུག་ཅེས་གསུངས་པས། ངེད་ཅག་ཀོང་ཀྲོའུ་ནས་ཞག་གཅིག་ལ་བསྡད་པ་ཡིན།

བརྒལ་དཀའ་བའི་འགག་སྒོ།

ཕྱི་ཟླ་༦པའི་ཚེས་༡༥ཉིན། ཧྲེན་ཀྲེན་（深圳）གྲོང་ཁྱེར་ནས་རྒྱལ་མཚམས་འགག་སྒོ་བརྒལ་ཏེ་ཧོང་ཀོང་ལ་འགྲོ་བའི་ལམ་དུ་ལམ་ཡིག་ལ་ལྟ་བཤེར་བྱས་པས། སྟབས་མ་ལེགས་པར་རྒྱལ་མཚམས་འགག་སྒོའི་ལྟ་བཤེར་པས་ཁྱེད་ཅག་གི་ལམ་ཡིག་ལ་གནད་དོན་འདུག་སྟེ། ཕྱི་ལོ་༡༩༩༠ལོར་རྒྱ་གར་ལ་འགྲོ་དུས་ལམ་ཡིག་སྟེང་དུ་ཐེལ་ཙེ་ཕོག་འདུག་ཀྱང་། ཕྱིར་ནང་དུ་ལོག་ཚེ་ཐེལ་ཙེ་བརྒྱབས་མི་འདུག་པས། དེ་ནི་ཁྲིམས་འགལ་རེད་ཅེས་ཟེར། མ་གཞིར། ལོ་དེར་བདག་ཅག་བལ་ཡུལ་ནས་ཕྱིར་བོད་དུ་ཡོང་སྐབས། གསེར་སྐུ་སོགས་སྐྱེལ་འདྲེན་སྟབས་བདེ་བའི་ཆེད་དུ། བལ་ཡུལ་ནས་གནས་སྐབས་ཀྱི་ལམ་ཡིག་བཟུང་ནས་ཡོང་བ་ཡིན་ལ། སྐབས་དེར་དེ་ལྟར་འགྲོ་བ་ནི་ཆེས་རྒྱུན་ལྡན་ཞིག་ཡིན་ཚུལ་གྱི་འགྲེལ་བཤད་སྣ་ཚོགས་ཁོ་ཚོར་དུས་ཡུན་རིང་པོར་བྱས་ཀྱང་། ཁོ་ཚོས་ཨུ་ཚུགས་མཐའ་སྐྱེལ་གྱིས་ངེས་པར་དུ་གོང་རིམ་ལ་ཡར་ཞུ་བྱ་དགོས་ཞེས་ངེད་ཅག་ཁང་པ་གཞན་ཞིག་གི་ནང་དུ་བཙུད་བྱུང་།

སྐབས་དེར་འུ་ཅག་གིས་ཆོས་རྗེ་ཉིད་ལ། འགལ་རྐྱེན་འདི་སེལ་བའི་ཆེད་དུ་ཁྱེད་ཀྱིས་ཐུགས་བསྐྱེད་དང་འཕྲིན་བཅོལ་ཅི་ཡོད་དགོས་ས་རེད་མ་གཏོགས་ཅུང་དཀའ་བར་འདུག་ཅེས་ཞུས་ཚེ། ཁོང་གིས་འོ་ཡ་ཞེས་གསུངས་ནས། མཉམ་བཞག་ལྟ་བུའི་ངང་དུ་ཨོ་རྒྱན་ཆེན་པོ་ལ་གསོལ་འདེབས་དང་། གེ་སར་རྒྱལ་པོ་དང་གནོད་སྦྱིན་ཙིའུ་དམར་ལ་འཕྲིན་བཅོལ་མཛད་པ་སོགས་དར་ཅིག་ལ་བཟླས་བརྗོད་ཤུབ་བུར་མཛད། སྐར་མ་ཁ་ཤས་འགོར་རྗེས། ལྟ་བཤེར་མཁན་ནང་དུ་ཡོང་ནས། ཁྱེད་ཅག་ལ་གནས་ཚུལ་རྙོག་དྲ་ཅན་འདུག་ཀྱང་། ད་ལན་འགྲོ་ཆོག་པར་བྱ་ཞེས་མངགས་བྱུང་བས། བདག་གི་སེམས་ལ། ཛ་དྲག་གི་བར་ཆད་དེ་གློ་བུར་དུ་ངོ་མཚར་བའི་སྒོ་ནས་སེལ་ཐུབ་པ་བྱུང་བ་ནི། ལྷ་བླ་མ་དང་ཆོས་སྐྱོང་སྲུང་མའི་བྱིན་རླབས་དང་ནུས་མཐུ་བློ་ཡུལ་ལས་འདས་པ་ཞིག་རེད་སྙམ་པའི་ངེས་ཤེས་དང་ཚོར་སྣང་ཟབ་མོ་སྐྱེས།

ངེད་ཅག་ཧྲེན་ཀྲེན་ནས་རླངས་འཁོར་ལ་བསྡད་དེ་ཧོང་ཀོང་ལ་ཐོན་རྗེས། གནས་དེའི་དཔལ་ཡུལ་ཆོས་ཚོགས་སུ་ཞག་གཅིག་ལ་བཞུགས། ཕྱི་ཉིན་སྔ་མོར། ཆོས་རྗེ་ཉིད་ཀྱིས་ཉིན་སྔ་མའི་འགག་སྒོ་བརྒལ་སྐབས་ཀྱི་གསོལ་འདེབས་དེ་ཡི་གེར་བཀོད་པ་འདི་ལྟ་སྟེ།

༄༅། །ཧྲེན་ཀྲེན་དང་ཧོང་ཀོང་གི་ས་མཚམས་སུ་ལམ་ཡིག་ལ་ཞིབ་དཔྱད་བགྱིད་སྐབས། སེམས་ལ་ཡ་ང་བར་གྱུར་ཚེ་ཨོ་རྒྱན་པདྨ་ཐོད་ཕྲེང་རྩལ་དང་སེང་ཆེན་ནོར་བུ་དགྲ་འདུལ། གནོད་སྦྱིན་ཙིའུ་དམར་པོ་བཅས་ཀྱི་ཞལ་ཉམས་སྣང་དུ་མཇལ་སྐབས་བདག་གིས་གསོལ་བ་འདི་ལྟར་བཏབ་བོ། །

མུ་མེད་ཞིང་གི་སྲས་བཅས་རྒྱལ་ཀུན་གྱི། །

གསང་གསུམ་ཡོན་ཏན་གཅིག་ཏུ་འདུས་པའི་སྐུ། །

པདྨ་ཐོད་ཕྲེང་རྩལ་ལ་གསོལ་བ་འདེབས། །

བསམ་པ་ལྷུན་གྱིས་འགྲུབ་པར་བྱིན་གྱིས་རློབས། །

མཁྱེན་བརྩེ་ནུས་པའི་ཡོན་ཏན་མཐའ་རུ་ཕྱིན། །

གངས་ལྗོངས་འགྲོ་བ་ཡོངས་ལ་བུ་བཞིན་བརྩེ། །

དོན་གྲུབ་ཝེར་མ་དཀར་པོ་ད་དགོངས་ཤིག །

མཐུན་རྐྱེན་ཡིད་བཞིན་འགྲུབ་པར་བྱིན་གྱིས་རློབས། །

བོས་ན་ཐུགས་རྗེ་ནམ་མཁའི་གློག་ལས་མྱུར། །

རྦད་ན་ནུས་སྟོབས་གནམ་ལྕགས་ཐོག་ལས་ངར། །

གནོད་སྦྱིན་དགྲ་བླའི་རྒྱལ་པོ་ཙིའུ་དམར། །

འགལ་རྐྱེན་བར་ཆད་འཕྲལ་དུ་ཞི་བར་མཛོད། །

ཅེས་པས་གསོལ་བ་བཏབ་པའི་ཚེ། །

འཇིགས་སྐྲག་འཁྲུལ་སྣང་དབྱིངས་སུ་ཞི། །

བདག་དང་ལྷ་ཡི་འཛིན་པ་ཀུན། །

མི་དམིགས་ཆོས་སྐུའི་དབྱིངས་སུ་ཡལ། །

ཞེས་པ་འདི་ནི་ཉིན་དེའི་ཕྱིར་ནངས་ཧོང་ཀོང་གྲོང་ཁྱེར་གྱི་གྲུབ་དབང་པདྨ་ནོར་བུའི་གཟིམ་ཆུང་དུ་ཡི་གེར་སྤེལ་བ་དགེ ཞེས་པའོ། །

ཧོང་ཀོང་དུ་སྡོད་པའི་སྐབས་སུ། མཁན་པོ་རྣམ་གྲོལ་གྱིས་བདག་ལ་ནང་ལྭ་སེར་པོ་ཞིག་དང་སྟོད་འགག་ཅིག་གནང་ནས། ཁོང་གིས་རྒྱ་གར་ནས་ཁྱེར་ཡོང་བའི་རས་རྒྱུ་ཡག་ཤོས་ཤིག་ཡིན་ཞེས་གསུངས། གོས་འདི་གཉིས་ནི་བདག་ཕྱི་རྒྱལ་དུ་འགྲོ་བའི་རིང་ལ་ཆོས་རྗེ་ཉིད་ཀྱིས་དབང་ཁྲིད་ཟབ་ཆོས་སྟོན་པའི་སྐབས་ཀུན་ཏུ་གྱོན་པ་ཡིན་པས། བརྩེ་འདང་དམིགས་བསལ་བ་ཞིག་ཆགས་སོང་། ད་བར་ལོ་༣༠སོང་ཡང་སྔར་བཞིན་རྒྱུ་སྤུས་བཟང་ཞིང་ཚོན་མདོག་ལའང་འགྱུར་བ་ཆེར་སོང་མི་འདུག་ལ། བདག་ཕྱི་ལོགས་རྣམས་སུ་འགྲོ་སྐབས་རྒྱུན་དུ་གྱོན་བཞིན་ཡོད། དེ་ནི་འཛིན་པ་ཞིག་ཡིན་སྲིད་ལ་དད་པ་ཞིག་ཀྱང་ཡིན་སྲིད་དོ། །

ཞི་བདེ་རྒྱ་མཚོའི་སྟེང་གི་འཕུར་སྐྱོད།

ཆོས་རྗེ་ཉིད་ཕྱི་རྒྱལ་ལ་བྱོན་པའི་ལོ་རབས་དེར། རྒྱལ་ཁབ་སོ་སོའི་བར་དུ་སྒོ་ཕྱེས་པ་དེང་སང་ལྟར་དེ་ཙམ་གུ་ཡངས་པོ་ཞིག་མིན་པས། ངེད་ཅག་རྣམས་ནི་བོད་ཡུལ་ནས་ཐད་ཀར་ཨ་རི་ལ་འགྲོ་མཁན་གྱི་བོད་རིགས་ཐོག་མ་ལྟ་བུ་ཡིན་ཡང་སྲིད།

སྐབས་དེར། ཨ་རིའི་དབྱར་དུས་སུ་ཁེལ་ཡོད་པས། ང་ཚོས་ཆོས་རྗེ་ཉིད་ལ་མནབས་ཆས་སྲབ་བུ་ཆ་གཉིས་དང་ནང་གོས་འགའ་རེ་གྲ་སྒྲིག་བྱས། ད་དུང་ཅ་ལག་འཇུག་སའི་སྒམ་སྤུས་ལེགས་འགའ་ཞིག་ཀྱང་ཉོས་པ་ཡིན། ཐེངས་སྔོན་མ་རྒྱ་གར་ལ་འགྲོ་བ་དང་བསྡུར་ན། ད་ལན་ཟས་རིགས་སྐོར་གྱི་ཅ་ལག་ཅུང་ཟད་ཉུང་དུ་བཏང་ནས་སྟབས་བདེར་བྱས་ཡོད།

ཕྱི་ཟླ་༦པའི་ཚེས་༡༦ཉིན། ངེད་ཅག་ཧོང་ཀོང་ནས་གནམ་གྲུར་བསྡད་དེ་ཆུ་ཚོད་བཞི་ལ་འཕུར་རྗེས་འཇར་པན་（Japan）ནམ་ཉི་ཧོང་གི་རྒྱལ་ས་ཐོ་ཁེ་ཡོའམ་（Tokyo）ཏུང་ཅིང་གི་རྒྱལ་སྤྱིའི་གནམ་ཐང་དུ་བབས། ཉི་ཧོང་གི་གནམ་ཐང་ནི་ཆུ་ཤེལ་ལས་གྲུབ་པའི་འཇིག་རྟེན་དང་འདྲ་བར། གཙང་ཞིང་དྭངས་ལ་རྒྱ་ཆེ་ཞིང་འོད་དུ་འཚེར་བ། ཕྱོགས་ཐམས་ཅད་རྡུལ་གྱི་དྲི་མས་མ་གོས་པ་ཞིག་རེད། རྐང་ཐང་ལ་འགྲོ་སྐབས་རང་ཉིད་ཀྱི་ལྡོག་བརྙན་ཡང་པང་གཅལ་ངོས་སུ་གསལ་བར་འཆར་བ་སོགས་བཀོད་པ་ཤིན་ཏུ་ལེགས་པས། ངས་མི་ཚེ་འདིར་འཕེལ་རྒྱས་སུ་སོང་ཟིན་པའི་རྒྱལ་ཁབ་ཀྱི་རྣམ་པ་དེ་ཐེངས་དང་པོར་མཐོང་བས། འཇིག་རྟེན་གཞན་ཞིག་ཏུ་སླེབས་པ་ལྟ་བུའི་སྣང་བ་སྐྱེས།

ཆོས་རྗེ་ཉིད་ཉི་ཧོང་ནས་དུས་ཡུན་རིང་པོར་མ་བཞུགས་ཀྱང་། དེའི་ཡུན་ལ་ཤར་བརྒྱུད་པའི་སྔགས་པ་དང་བོད་བརྒྱུད་ཀྱི་སྐལ་བ་ལྡན་པ་འགའ་ལ། སྙིང་རྗེ་དང་ཤེས་རབ་ལས་བརྩམས་པའི་ཞལ་གདམས་གནང་ཞིང་། ནང་ཆོས་དང་ཚན་རིག་སྐོར་ནས་བགྲོ་གླེང་ཡང་མཛད། ཆོས་རྗེ་ཉིད་ཀྱིས། ཚན་རིག་དང་ནང་ཆོས་གཉིས་ནི་འགྲོ་བ་མིའི་རིགས་ལ་མེད་དུ་མི་རུང་བ་ཡིན་ཏེ། ཚན་རིག་གིས་མི་རྣམས་ཀྱི་ཕྱི་དངོས་པོའི་དགོས་འདོད་བསྐངས་ཤིང་། ནང་ཆོས་ཀྱིས་ནང་སེམས་ཀྱི་བདེ་བ་སྟེར་བར་བྱེད་པས། ནང་ཆོས་མེད་པར་དངོས་པོའི་ལོངས་སྤྱོད་ཁོ་ནར་བསྙེགས་ན། འབྲས་བུ་དང་རེ་འདུན་གཉིས་གོ་ལྡོག་ཏུ་འགྱུར་ངེས་ཡིན། དེས་ན། ཡ་གླིང་སོགས་ཀྱི་རྒྱལ་ཁབ་མང་པོའི་མཐོ་བ་རྩེ་མོར་སོན་པའི་ཕྱུག་པོ་དང་དམའ་སྤྱི་དམངས་ཕལ་བ་ཡན་ཆད་ལ་དམ་པའི་ཆོས་ཀྱི་བདུད་རྩི་འདི་ཆེས་མཁོ་གལ་ཆེ་བ་ཡིན་ཞེས་པ་སོགས་གསུངས་པས། དེར་འདུས་རྣམས་ལ་སེམས་འགུལ་གཏིང་ནས་ཐེབས་ཤིང་། དགའ་བ་དང་གུས་པའི་རྣམ་པ་མང་དུ་མངོན།

དེ་ནས། རྗེ་ཉིད་གྲུ་ཤག་དཀྱུས་མར་（经济舱）བཞུགས་ཏེ་ཨ་རིའི་（America）ཧཱ་ཝ་ཡེའི་（Hawaii）ཕྱོགས་སུ་སོང། ཨ་རིའི་གནམ་གྲུར་རིན་མེད་བཟའ་བཏུང་མེད་ཅིང་། མཁའ་ལམ་ཞབས་ཞུ་པ་རྣམས་ཀྱང་ལོ་ན་མཐོན་པོ་ཤ་སྟག་རེད། གནམ་གྲུ་མུ་མཐའ་མེད་པའི་ཞི་བདེ་རྒྱ་མཚོའི་མཁའ་དབྱིངས་ནས་ཡུན་རིང་པོར་འཕུར་ཞིང་། ནམ་མཁའ་དང་རྒྱ་མཚོ་ཆེན་པོའི་གཡུ་མདངས་གཅིག་ཏུ་འདྲེས་ཤིང་བཻཌཱུརྱའི་ཞུན་མ་ལྟར་མཛེས་སྡུག་ལྡན་པས་ཡིད་སེམས་ཀྱི་བརྟན་པ་དབང་མེད་དུ་འཕྲོག་པར་བྱས། དེ་ལྟ་ནའང་། རྒྱ་མཚོའི་སྟེང་ནས་ཡུན་རིང་དུ་འཕུར་བས། མཚམས་ལན་རེར་སེམས་སུ་ཁེར་རྐྱང་དང་སྐྱོ་ལྷང་ངེ་བའི་སྣང་བ་ཞིག་ཀྱང་དབང་མེད་དུ་སྐྱེས།

རྗེ་ཉིད་ཀྱིས་སྨན་གསོལ་དུས་ཆུ་ཚན་དགོས་པས། བདག་གིས་ཀྱང་སྔ་ས་ནས་དབྱིན་སྐད་ཅུང་ཟད་རེ་རང་སྦྱོང་བྱས་པ་ཡིན་ལ། “hot water”ཞེས་ཐོག་མར་བེད་སྤྱོད་བྱས་པའང་ཡིན། རྗེ་ཉིད་ཀྱིས་སྐབས་འགར་ཅིའང་མི་གསུང་བར་ཕྱག་ཕྲེང་དམར་པོ་དེ་འདྲེན་བཞིན་སྒེའུ་ཁུང་ལས་ཕྱི་རོལ་ཏུ་ཡུན་རིང་ལ་གཟིགས་ཤིང་། སྐབས་འགར་གླེང་མོལ་ཉུང་ཙམ་རེ་གནང་ལ། སྐབས་འགར་དགོངས་པ་ཉམས་ལེན་གྱི་ངང་དུ་བཞུགས་པ་ལྟ་བུ་མཛད་པ་སོགས་ད་ལྟའང་དྲན་གྱིན་ཡོད། དུས་ཚོད་བདུན་ལ་འཕུར་བའི་རྗེས་སུ། ཨ་མེ་རུ་ཁའི་ཧཱ་ཝ་ཡེའི་ཙན་དན་རི་བོའི་རྒྱལ་སྤྱིའི་གནམ་ཐང་དུ་སླེབས།

འབབ་ཚུགས་དང་པོ། ཨ་རིའི་ཧཱ་ཝ་ཡེ།

༼ ༦·༡༨~༦·༢༡ ༽

མཛད་རིམ།

ཕྱི་ཟླ་༦པའི་ཚེས་༡༨ཉིན། སྔ་དྲོར་གནས་ཆུང་དགོན་ནས་བྱང་ཆུབ་སེམས་དཔའི་སྡོམ་པ་གནང་།

ཕྱི་ཟླ་༦པའི་ཚེས་༡༩ཉིན། སྔ་དྲོར་འཇམ་དཔལ་ཞི་སྒྲུབ་ཀྱི་དབང་དང་། ཕྱི་དྲོར་ཁྲིད་ཡིག་སངས་རྒྱས་ལག་སྟེར་གསུངས།

ཕྱི་ཟླ་༦པའི་ཚེས་༢༠ཉིན། སྔ་དྲོར་རྟེན་འབྲེལ་ཉེས་སེལ་གྱི་དབང་གནང་། ཕྱི་དྲོར་ཁྲིད་ཡིག་སངས་རྒྱས་ལག་སྟེར་གསུངས་རྗེས། ཞི་བདེ་རྒྱ་མཚོའི་འགྲམ་གྱི་མེ་རི་དང་ཧཱ་ཝ་ཡེ་རྒྱལ་ཁབ་མེ་རིའི་སྤྱི་གླིང་དུ་གཟིགས་སྐོར་ལ་བྱོན།

ཕྱི་ཟླ་༦པའི་ཚེས་༢༡ཉིན། སྔ་དྲོར་ཕུར་པ་མགུལ་ཁུག་མའི་དབང་གནང་། ཕྱི་དྲོར་བྱེ་ནག་སྤྱི་གླིང་དུ་གཟིགས་སྐོར་ལ་ཕེབས་ཤིང་། དགོང་མོར་འབབ་ཚུགས་ཕྱི་མའི་ཕྱོགས་སུ་བསྐྱོད།

འགག་སྒོའི་གསོལ་རྩམ།

ཧཱ་ཝ་ཡེ་ཞེས་པ་འདི་ནི་འཛམ་གླིང་ན་གྲགས་ཆེ་བའི་ཡུལ་སྐོར་སྤྲོ་འཆམ་གྱི་ལྟེ་གནས་ཤིག་སྟེ། ཚང་ཚིང་འཁྲིགས་པའི་ཙན་དན་གྱི་ནགས་ཀླུང་དང་། བྱུར་དམར་གྱི་སྡོང་པོ། དངུལ་དཀར་གྱི་བྱེ་ཐང་། རྨ་བྱའི་ཟློས་གར། གཡུ་མདོག་གི་རྒྱ་མཚོ། སྤྲིན་དཀར་གྱི་བླ་བྲེ། དྲོད་འཇམ་གྱི་མཚོ་རླུང་སོགས་རང་བྱུང་གི་བཀོད་པ་དུ་མས་རབ་ཏུ་བརྒྱན་པའི་གནས་མཆོག་ཅིག་ཡིན་པ་གོ་ཚོར་བྱུང་བས། ད་ཐེངས་གནས་འདིར་དངོས་སུ་སླེབས་པར་སྤྲོ་སྣང་རབ་ཏུ་འཕེལ། ཡིན་ནའང་། བདག་གིས་གནམ་གྲུའི་ནང་ནས་ས་ཁྲར་ལྟ་སྐབས། གླིང་ཕྲན་འདི་ནི་རྒྱ་མཚོ་ཆེན་པོའི་དཀྱིལ་དུ་ལྷུང་བའི་སྲིན་བུ་ཞིག་གི་ཆེ་ཆུང་ཙམ་ལས་མི་འདུག་པས། ང་ཚོ་མཐའ་མེད་པའི་རྒྱ་མཚོའི་དཀྱིལ་གྱི་ཁེར་རྐྱང་གི་གླིང་ཕྲན་གང་དེར་འབྱོར་སོང་བ་རེད་ཨང་བསམ་ན། ཁེར་རྐྱང་དང་འཇིགས་སྣང་གི་ཚོར་བའང་ངང་གིས་སྐྱེ་ཡོང་།

འདི་ནས་ཨ་རིའི་རྒྱལ་མཚམས་ཀྱི་འགག་སྒོ་རྒལ་བའི་སྐབས་སུ། གློ་བུར་བའི་གནས་ཚུལ་ཞིག་དང་འཕྲད་བྱུང་སྟེ། ངེད་ཅག་གིས་བོད་ཡུལ་ནས་ཁྱེར་ཡོང་བའི་གསོལ་རྩམ་ཅུང་ཟད་ཡོད་པ་དེ། ཉེན་ཁྱིས་ཤེས་སོང་བས་ཉེན་རྟོག་པ་རྣམས་ང་ཚོའི་མཐར་རུབ་ནས། རྩམ་པ་ཁུག་མ་དེ་ནི་ཉལ་ཐའམ་དུག་རྫས་ཤིག་ཏུ་ངོས་བཟུང་ཞིང་། ང་ཚོ་ནི་ཉལ་ཐ་འབོར་ཆེན་ལྐོག་འཚོང་རྒྱག་པའི་ཚོགས་པ་ཞིག་ཏུ་འཁྲུལ་སོང་།

ངེད་ཅག་གིས་འདི་ནི་ཟས་རིགས་ཤིག་ཡིན་པར་བསྙད་ནས་འགྲེལ་བཤད་མང་དུ་བྱས་ཀྱང་ཡིད་མ་ཆེས་པས། ཡུལ་དངོས་ནས་ཁམ་འགའ་ཟོས་ཏེ་ཚོད་ལྟ་བྱས་ཚེ་ད་གཟོད་འགྲོ་ཆོག་པར་བྱས། འགྲོ་ཁར་ཉེན་རྟོག་པ་ཞིག་གིས། མི་དམངས་ཀྱི་བདེ་འཇགས་དང་བདེ་ཐང་གི་ཆེད་དུ། ཨ་རི་ལ་ཕྱི་ལོགས་ནས་ཡོང་བའི་ཟས་རིགས་ལ་ལ་བཀག་རྒྱ་ཡིན་པས། ཐེངས་རྗེས་མར་དེ་འདྲ་མི་འཁྱེར་རོགས་ཞེས་དྲན་སྐུལ་ཡང་བྱས་བྱུང་།

དོན་དག་དེའི་རྐྱེན་གྱིས་དུས་ཐོག་ཏུ་ཙན་དན་རི་བོ་ནས་ཧི་ལོ་（Hilo）ཞེས་པའི་ཡན་ལག་གི་གླིང་ཕྲན་ཞིག་ཏུ་འགྲོ་དགོས་ཀྱང་གནམ་གྲུའི་རྗེས་མ་ཆོད་པས། འཕུར་རེས་རྗེས་མའི་གནམ་གྲུ་ཅུང་ཙམ་ཡུན་རིང་དུ་སྒུག་དགོས་བྱུང་། ཆོས་རྗེ་ཉིད་དུས་ཚོད་ཡུན་རིང་དུ་གནམ་གྲུར་བཞུགས་ནས་ཡོང་བ་དང་། བོད་ཡུལ་དང་ས་གནས་འདི་གཉིས་བར་ལ་དུས་ཁྱད་ཆུ་ཚོད་བཅོ་བརྒྱད་ཡོད་ཅིང་། ཉིན་མཚན་ལྡོག་པར་གྱུར་ཡོད་པས་ཁོང་གིས་ཀྱང་འོ་བརྒྱལ་ཅུང་ཙམ་ཞིག་མྱོང་དགོས་བྱུང་། དེ་ནས་གནམ་གྲུ་ཆུང་བ་ཞིག་ཏུ་བསྡད་དེ་ཆུ་ཚོད་གཅིག་ཙམ་ལ་འཕུར་རྗེས། གནས་ཆུང་སྒྲ་དབྱངས་གླིང་གི་དགོན་པར་（Nechung Dorje Drayang Ling）འབྱོར།

རྒྱལ་སྤྱིའི་རྒྱང་རིང་ཁ་པར།

ངེད་ཅག་དགོན་པ་དེར་བདེ་འཚམས་ངང་གནས་སྡོད་བྱས་ཚར་རྗེས། ཆོས་རྗེ་ཉིད་ཀྱིས་བདག་ལ། ཁྱོད་སོང་ནས་སློབ་གླིང་དུ་ཁ་པར་ཞིག་ཨེ་འཕྲོད་ལྟོས་ལ། ངེད་ཅག་བདེ་བླག་ངང་ཨ་རིར་འབྱོར་སོང་ཞེས་ཤོད། དར་རྩེ་མདོ་ཡི་སྤྱི་བདེ་ལས་ཁུངས་ཀྱི་མགོ་ཁྲིད་ལ་ཡང་འདིར་ཐོན་ཡོད་རབས་ཤོད་ཅེས་བཀའ་བསྒོས་བྱུང་། སྐབས་དེར་དྲྭ་རྒྱ་དང་འཕྲིན་ཕྲན་སོགས་གང་ཡང་མེད་པར་ཁ་པར་ཁོ་ནར་བརྟེན་དགོས་ཤིང་། དགོང་མོ་དེར་འཕྱིས་དྲགས་པས་ཕྱི་རོལ་ཏུ་ཁ་པར་འཚོལ་བར་སྟབས་མི་བདེ་ཕྱིར་དགོན་དཔོན་བླ་མ་བློ་བཟང་དོན་ལྡན་ལ་ཐབས་ཡོད་མེད་ཞུས་ཚེ། ཁོང་གིས་ང་ལ་ལག་འཕྲིན་（Cellular phone）ཞེས་པའི་ཁ་པར་ཞིག་གཡར་བྱུང་། བདག་གིས་སློབ་གླིང་དུ་ཁ་པར་ལན་མང་བརྒྱབས་ཀྱང་འཕྲོད་ཐབས་མ་བྱུང་ཡང་། རྗེ་ཉིད་ཀྱི་གྲོགས་པོ་མགོ་ཁྲིད་དེར་ཁ་པར་འཕྲོད་སོང་བས། ཁོང་ལ་ང་ཚོ་བདེ་བླག་ངང་ཨ་རིར་འབྱོར་བའི་སྐད་འདི་སློབ་གླིང་དུ་འཕྲོད་ཐབས་གནང་རོགས་ཞེས་མངག་བཅོལ་བྱས་པ་ཡིན། སྐབས་དེར་ཁོ་རང་ཆང་གིས་ཅུང་ཟད་བཟི་འདུག་ཀྱང་རིག་པ་དྭངས་བར་གནས་པས། ད་འགྲིག་སོང་། ཁྱེད་རྣམ་པ་ཕར་སོང་བའི་ཕྱི་ཟླ་༦པའི་ཚེས་༡༦ཉིན། གོང་རིམ་ནས་ད་ལོར་ཁྱེད་ཅག་ཕྱི་རྒྱལ་དུ་འགྲོ་མི་ཆོག་པའི་ཡིག་ཆ་ཐོན་བྱུང་། ད་ཁྱེད་ཚོ་བདེ་བླག་ཏུ་འབྱོར་ཟིན་པས་བཟང་འདུག་ཟེར། བདག་གིས་ཁོང་ལ་སྐད་ལན་བྱིན་པའི་སྐབས་སུ། མཁན་རྣམ་གྲོལ་གྱིས། མང་པོ་ལབ་ཀི་མ་འདུག རྒྱལ་སྤྱིའི་རྒྱང་རིང་ཁ་པར་རིན་གོང་ཤིན་ཏུ་ཆེ་བས་མཚམས་ཞོག་ཅེས་གསུངས་པས་མཚམས་བཞག་པ་ཡིན།

ཕྱི་ཉིན། ཆོས་རྗེ་ཉིད་ཀྱིས་ཀྱང་གྲོགས་པོ་མགོ་པ་དེར་ཁ་པར་བརྒྱབས་ནས་ཡུན་རིང་ཙམ་ལ་གླེང་མོལ་མཛད་པས། མཁན་རྣམ་གྲོལ་གྱིས་ཐེངས་འགར་ཁོང་ལ་ལྟ་ཙམ་རེ་བྱེད་པ་ལས་དྲན་སྐུལ་ཞུ་མ་ཕོད་སྟབས། བདག་ལ་མཚར་སྣང་སྐྱེས་ཤིང་ཁོང་དགོད་ཤོར། གཞན་ཡང་ཆོས་རྗེ་ཉིད་ཀྱི་ཐེངས་འདིའི་ཆོས་ཁྲིད་གསུང་སྐབས་ཀྱི་དབྱིན་ཇིའི་སྐད་སྒྱུར་པ་ནི་སངས་རྒྱས་མཁའ་འགྲོ་ཞེས་པའི་ཨ་རིའི་བུད་མེད་ཅིག་ཡིན་ལ། མོ་རང་གིས་སྔོན་ཆད་ཀྱང་བོད་བརྒྱུད་ནང་བསྟན་གྱི་བླ་མ་མང་པོས་ཆོས་གསུང་དུས་སྐད་སྒྱུར་བྱས་མྱོང་འདུག ད་ལན་མོ་རང་ཁཱ་ལི་ཧྥོར་ནེ་ཡ་（California）ནས་ཆེད་དུ་གནམ་གྲུར་བསྡད་ནས་ཐོན་ཞིང་རྗེ་ཉིད་དང་མཇལ་ཁ་ཞུས། དུས་དེ་ནས་བཟུང་། ཆོས་རྗེ་ཉིད་ཀྱིས་ཨ་རི་ནས་གདུལ་བྱ་རྣམས་ལ་ཆོས་ཀྱི་བདུད་རྩི་གནང་བའི་དབུ་བརྩམས་པ་ཡིན།

ཐེངས་དང་པོའི་ཆོས་ཁྲིད།

ཕྱི་ཟླ་༦པའི་ཚེས་༡༨ཉིན་གྱི་སྔ་དྲོར། ཆོས་རྗེ་བླ་མ་ཉིད་ཀྱིས་གནས་ཆུང་དགོན་པ་རུ། ཆོས་ཁྲིད་ཀྱི་མཛད་སྒོ་ལ་ཐོག་མར་བྱང་ཆུབ་སེམས་དཔའི་སྡོམ་པ་གནང་ཞིང་། ནུབ་ཕྱོགས་སུ་གནང་བའི་ཆོས་ཁྲིད་ཐེངས་དང་པོ་ཡིན་པའི་རྐྱེན་གྱིས། གཙོ་སྒྲུབ་ཕྱོགས་ཀྱི་དགོན་པས་ཆོས་རྗེ་ཉིད་ལ་ཚིགས་སུ་བཅད་པའི་སྒོ་ནས་བཀྲ་ཤིས་པའི་བསྟོད་དབྱངས་ཕུལ་རྗེས། མདོ་འཛིན་པས་ངོ་སྤྲོད་འདི་ལྟར་མཛད།

དེ་རིང་ནི་བཀྲ་ཤིས་པའི་ཉི་མ་ཞིག་སྟེ། ངེད་ཅག་ཐམས་ཅད་འདིར་དགའ་བའི་ལྷན་འཛོམས་བྱུང་བས་རྟེན་འབྲེལ་ཕུན་སུམ་ཚོགས་པ་བྱུང་། ཆོས་རྗེ་བླ་མ་རིན་པོ་ཆེ་ས་ཆ་འདི་ནས་ཉིན་བཞི་ཙམ་མ་གཏོགས་ཡུན་རིང་པོར་བཞུགས་ལོང་མེད་པས། ཆེས་རིན་ཐང་བྲལ་བའི་དུས་ཚོད་ཐུང་ཐུང་འདི་ལ། ངེད་ཅག་ཚང་མས་བློ་གཅིག་སེམས་གཅིག་གིས་ཆོས་ཞུ་བ་དང་། ཆོས་ཀྱི་དོན་ཉམས་སུ་ལེན་ཐུབ་པར་འདུན་པ་དྲག་པོས་སྨོན་ལམ་བཏབ་ནས། འཕྲད་པར་དཀའ་བའི་གོ་སྐབས་ལེགས་པོ་འདི་དམ་འཛིན་བྱེད་འོས་པ་ཡིན།

ཁོང་བོད་ཡུལ་ན་བཞུགས་དུས། རྒྱ་གར་དང་བོད་ཀྱི་ས་ཆ་གཞན་ནས་ཡོང་བའི་མཇལ་སྐོར་བ་དང་ཆོས་པ་རྣམས་ཀྱིས། ཆོས་རྗེ་ཉིད་ཀྱི་སྐུ་མདུན་ནས་ཆོས་འབྲེལ་རེ་ཐོབ་པའི་ཕྱིར་དུ། རྒྱང་ཐག་ཇི་འདྲ་རིང་ཡང་དཀའ་བ་བརྒྱ་ཕྲག་ཁྱད་དུ་བསད་ཅིང་། ངལ་བ་སྣ་ཚོགས་དང་དུ་བླངས་ནས་མདུན་དུ་གཅར་ཐབས་བྱེད་ཀྱིན་ཡོད་ལ། ཁོང་བཞུགས་སའི་ཡུལ་དེའང་གྲང་ངར་ཧ་ཅང་ཆེ་ཞིང་འཚོ་བའི་ཆ་རྐྱེན་ཞན་པས། གནས་དེར་སྡོད་པ་ལྟ་ཞོག འགྲོ་དགོས་པ་ཙམ་ཡང་དཀའ་ཁག་ཤིན་ཏུ་ཆེ་བ་ཡིན། འོན་ཀྱང་། ཆོས་དོན་གཉེར་བ་ཤིན་ཏུ་མང་པོས་དཀའ་ངལ་སྣ་ཚོགས་ལ་བཟོད་བསྲན་བགྱིས་ཏེ་རྒྱུན་དུ་གནས་དེར་བསྡད་ནས་ཆོས་ཞུ་བཞིན་ཡོད།

ད་ལན་ངེད་ཅག་ལ་མཚོན་ན། འདི་ལྟར་ལས་སླ་མོ་ཞིག་གིས་རིན་པོ་ཆེ་ཉིད་ཀྱི་གསེར་ཞལ་མཇལ་བ་དང་ཆོས་ཀྱི་བདུད་རྩི་མྱོང་བའི་སྐལ་བ་ཐོབ་པ་ནི། དངོས་གནས་སྔོན་གྱི་སྨོན་ལམ་རྣམ་པར་དག་པའི་མཐུ་ལས་བྱུང་བ་ཡིན།

ཁྱེད་ཅག་འདིར་བཞུགས་རྣམས་འཚོ་བ་ཧ་ཅང་བྲེལ་འཚུབ་ཆེ་ཞིང་མི་མང་པོ་ཞིག་ལ་བྱ་བ་གལ་ཆེན་ཡོད་ཀྱང་། ཉིན་འདི་དག་གི་རིང་ལ་བྱ་བ་གཞན་རྣམས་ཟུར་དུ་བསྐྱུར་ཏེ། སེམས་རྩེ་གཅིག་གིས་ཆོས་ཁྲིད་ལེགས་པོ་ཞིག་ཞུ་ཐུབ་ན་དེར་འབྲས་བུ་བཟང་པོ་འཐོབ་ངེས་ཡིན། དེ་བཞིན་ཉིན་འདི་དག་གི་ཆོས་ཁྲིད་སོ་སོའི་ཁྲིད་ཡུན་ཡང་དེ་ཙམ་རིང་པོ་མིན་པས། འཇིག་རྟེན་གྱི་བྱ་བ་རྣམས་ཆེ་བཞག་ཆུང་བསྐྱུར་བྱས་ཏེ་ནན་ཏན་གྱིས་ཆོས་ཞུ་བ་ནི་ཧ་ཅང་གལ་ཆེ་ལ། ཕྱིན་ཆད་ནས་འདི་འདྲའི་སྐྱེས་བུ་དམ་པར་འཕྲད་པ་ཤིན་ཏུ་དཀའ་ངེས་པས། ད་རེས་ངེད་ཅག་ཆོས་པ་མང་པོས་འདི་ལྟར་ལྷན་ཅིག་ཏུ་ཆོས་ཞུས་པ་ཡིན་ན། ཀུན་གྱིས་བསམ་པ་བཟང་པོ་རེ་བསྐྱེད་ནས་ཡང་དག་པའི་ཆོས་ཀྱི་དོན་རྣམས་གཞན་ལ་སྤེལ་པར་བྱ་རྒྱུའང་ངེད་ཅག་ཐུན་མོང་གི་རེ་བ་ཡིན་པར་བཤད།

དེ་ནས་ཆོས་རྗེ་བླ་མ་ཉིད་ཐུགས་བརྩེ་བ་ཆེན་པོས་ཆོས་ཁྲི་ལ་འཁོད་ནས། ཆོས་ཁྲིད་དངོས་སུ་གསུང་བར་ཉེ་བ་ན། སྔར་གསུང་མ་མྱོང་བའི་བཀྲ་ཤིས་པའི་ཚིགས་སུ་བཅད་པ་འདི་ཉིད་ཐུགས་ཀློང་ནས་བརྡོལ་བ་སྟེ།

མཁའ་ལ་བཀྲ་ཤིས་ལྷ་མོའི་འཇའ་སྤྲིན་གཏིབ། །

ས་ལ་བཀྲ་ཤིས་མི་རྣམས་དགེ་བཅུར་སྤྱོད། །

ལོགས་ལ་བཀྲ་ཤིས་ཞི་ཁྲོའི་བཀོད་པ་རྫོགས། །

བཀྲ་ཤིས་འདི་ཡང་དར་རྒྱས་ཕུན་ཚོགས་ཤོག །

ཅེས་ཆོས་རྗེ་ཉིད་ཀྱིས་ཚང་མར་བཀྲ་ཤིས་བདེ་ལེགས་ཀྱི་མཚམས་འདྲི་དང་བཅས་འདི་ལྟར་བཀྲལ།

དེ་ཡང་ཚིག་རྐང་དང་པོའི་ནང་དུ། ཁར་རྩང་གི་དུས་སུ་བཀྲ་ཤིས་པའི་ལྷ་མོས་ནམ་མཁའ་ལ་འཇའ་ཤར་ཞིང་སྤྲིན་གཏིབ་པ་སོགས་དགའ་བའི་རྣམ་འགྱུར་དཔག་ཏུ་མེད་པ་ངོམས་འདུག་ཅེས་དང་། ཚིག་རྐང་གཉིས་པར། འདིར་འཚོགས་པའི་ནང་པ་སངས་རྒྱས་པའི་ཆོས་ལ་དགའ་བ་ཐམས་ཅད། དགེ་བཅུའི་ལམ་ལ་རྟག་ཏུ་སྤྱོད་ཀྱིན་ཡོད་པ་ཡང་བཀྲ་ཤིས་ཕུན་སུམ་ཚོགས་པ་ཞིག་རེད་ཅེས་པའི་དོན་ཡིན། ཚིག་རྐང་གསུམ་པའི་དོན་ནི། བདེ་བ་ཅན་གྱི་ཞིང་གི་བཀོད་པ་ལྟར་ཕུན་སུམ་ཚོགས་པ་དང་ལྡན་པའི་ས་གཞི་འདི་ལྟ་བུ་ནི་ཞི་བའི་ཞིང་གི་བཀོད་པ་དང་། ལོགས་སུ་ལྷ་མོས་ཁྲོ་བོའི་དཀྱིལ་འཁོར་སྟོན་པའི་གནས་སྐབས་ན། སྟེང་ཕྱོགས་མེ་རི་འབར་བའི་ཞིང་ཁམས་ལ་འགྲན་བཟོད་པའི་མེ་རི་དང་མེ་དཔུང་གི་སྣང་བ་ཡོངས་སུ་རྒྱས་པ་ལྟ་བུ་ནི་ཁྲོ་བོའི་ཞིང་ཁམས་ཀྱི་བཀོད་པ་ཡོངས་སུ་རྫོགས་པས་བཀྲ་ཤིས་གསུམ་པ་རེད། ཚིག་རྐང་ཕྱི་མས་དེ་ལྟ་བུའི་བཀྲ་ཤིས་ཕུན་སུམ་ཚོགས་པ་འདི་དར་ཞིང་རྒྱས་ལ། ཡུན་ནས་ཡུན་དུ་གནས་ཤིང་ཕུན་སུམ་ཚོགས་པ་ཉིད་དུ་འགྱུར་བར་ཤོག་ཅིག་ཅེས་སྨོན་འདུན་ཞུས་པ་ཡིན།

ཁོང་རྣམ་པས་བསྟོད་ཚིག་གི་གླུ་དབྱངས་སྙན་མོ་གསར་དུ་བླངས་འོངས་དུས། ངའི་ཞེ་ལའང་རྩོམ་འདི་ཐད་ཀར་གསལ་པོ་ཤར་ཡོང་བ་ཡིན་མ་གཏོགས། སྔར་ནས་བཀོད་སྒྲིག་ལྟར་བརྩམས་པ་ཞིག་མིན།

ཆོས་རྗེ་ཉིད་ཀྱིས་དེ་ལྟར་གསུངས་པ་ན། འཁོར་རྣམས་ཀྱི་སེམས་སུའང་ཉི་འོད་འཕྲོས་པ་ཇི་བཞིན་རབ་ཏུ་དགའ་བར་གྱུར་ཅིང་། ཡ་མཚན་པ་ཞིག་ལ། དགོན་པའི་མདུན་ཐང་དུ་བག་ཡངས་སུ་རྒྱུ་བའི་རྨ་བྱ་དག་གིས་དབྱངས་སྙན་སྒྲོག་གིན་པ་དེའང་། ལྷ་ཁང་དུ་ཆོས་ཉན་བཞིན་པའི་འཁོར་རྣམས་ཀྱི་རྣ་བའི་དཔྱིད་དུ་སོན། དེ་ནས་རིམ་གྱིས་བྱང་སྡོམ་གསུང་པའི་ཆོས་ཁྲིད་དངོས་ལ་ཞུགས།

དུས་གསུམ་སངས་རྒྱས་ཐམས་ཅད་ཀྱི་ངོ་བོ་རིགས་དང་དཀྱིལ་འཁོར་རྒྱ་མཚོའི་ཁྱབ་བདག་བཀའ་དྲིན་མཚུངས་པ་མེད་པ་རྗེ་བཙུན་དཔལ་མགོན་རྩ་བའི་བླ་མ་རིན་པོ་ཆེ་རྣམས་ཀྱི་ཞབས་ཀྱི་རྡུལ་དྲི་མ་མེད་པ་ལ་མགོ་བོས་རབ་ཏུ་བཏུད་དེ་གུས་པས་ཕྱག་འཚལ་ཞིང་སྐྱབས་སུ་མཆིའོ་བྱིན་གྱིས་བརླབ་པར་མཛད་དུ་གསོལ།

གང་གི་ཞལ་བཟང་ལྟ་བས་མི་ངོམས་གེ་སར་འཛུམ་པའི་མདངས་བཀྲ་ཞིང་། །

མཚན་དཔེའི་གཟི་འོད་ཟེའུ་འབྲུ་གསལ་བས་འགྲོ་ཀུན་མིག་གི་བདུད་རྩིར་གྱུར། །

ཐུགས་རྗེའི་འདབ་མ་ཀུན་ནས་དཀྱུས་རིང་འཇིག་རྟེན་གསུམ་གྱི་ཁོངས་ཁྱབ་པ། །

ཐུབ་དབང་པད་མ་དཀར་པོའི་ཞབས་པད་དེ་རིང་བདག་བློའི་པད་མཚོར་སྐྱོངས། །

རྒྱལ་ཀུན་མཁྱེན་བརྩེ་ནུས་པའི་ངོ་བོ་ཉིད། །

བགྲང་ཡས་དཀྱིལ་འཁོར་འཁོར་ལོ་ལེགས་འཆང་ནས། །

ཞིང་འདིར་སློབ་དཔོན་ཚུལ་བཟུང་ཐེག་མཆོག་གི །

སྟོན་པ་མཚུངས་མེད་པདྨ་ཀ་ར་རྒྱལ། །

ཆོས་ཟད་ཀློང་དུ་ཆོས་སྐུའི་དགོངས་པ་བརྙེས། །

འོད་གསལ་དབྱིངས་སུ་ལོངས་སྐུའི་ཞིང་སྣང་གཟིགས། །

གདུལ་བྱའི་སྣང་ངོར་སྤྲུལ་སྐུའི་འགྲོ་དོན་མཛད། །

ཀུན་མཁྱེན་ཆོས་ཀྱི་རྒྱལ་པོ་ལ་ཕྱག་འཚལ། །

སྨྲ་བའི་སེང་གེའི་མཁྱེན་རབ་སྙིང་ལ་ཤར། །

ཀུན་ཏུ་བཟང་པོའི་སྨོན་ལམ་རྣམ་པར་སྦྱངས། །

སྲས་བཅས་རྒྱལ་བའི་ཕྲིན་ལས་འཛིན་མཛད་པ། །

འཇམ་དབྱངས་བླ་མའི་ཞབས་ལ་ཕྱག་འཚལ་ལོ། །

དགོངས་བརྡ་སྙན་བརྒྱུད་རིག་འཛིན་བླ་མ་དང་། །

ཞི་ཆགས་ཁྲོ་བོའི་ཚུལ་འཆང་ཡི་དམ་ལྷ། །

གནས་གསུམ་མཁའ་འགྲོ་རྒྱུད་གསུམ་དྲེགས་ཚོགས་བཅས། །

རབ་འབྱམས་རྩ་གསུམ་ལྷ་ལ་མགོས་ཕྱག་འཚལ། །

གང་ཚེ་བདག་གིས་གཞན་ཕན་སེམས་ཀྱིས་སུ། །

སྙིང་དབུས་པདྨོར་གཞོན་ནུ་ཁྱེད་དྲན་ནས། །

ལེགས་བཤད་བདུད་རྩིའི་སྒྲ་དབྱངས་སྒྲོག་བགྱིད་ན། །

འཇམ་དཔལ་བདག་གི་ཡིད་ལ་དཔལ་སྩོལ་ཅིག །

སྲིད་གསུམ་སྡུག་བསྔལ་ཇི་འདྲ་ཁྱེད་ཀྱིས་མཁྱེན། །

དམྱལ་སོགས་མེ་དཔུང་ཞི་བར་བགྱིད་ལ་སོགས། །

སེམས་ཅན་དོན་ལ་མྱུར་དུ་བདག་བརྩོན་ན། །

དམ་པ་རྣམས་ཀྱིས་ནུས་མཐུ་བསྩལ་དུ་གསོལ། །

གང་དག་ཕྱོགས་བཅུ་སྟོང་གི་འཇིག་རྟེན་ན། །

བདེ་གཤེགས་སློབ་མར་གྱུར་བ་གང་སུ་དག །

དེང་འདིར་སྟོན་པའི་ཆོས་ཀྱི་ཆར་འབེབས་ཀྱིས། །

གསན་པར་འདོད་པ་ཐམས་ཅད་འདིར་གཤེགས་ཤིག །

ནམ་མཁའ་དང་མཉམ་པའི་སེམས་ཅན་ཐམས་ཅད་ཀྱི་དོན་དུ་གཏན་བདེ་བླ་ན་མེད་པ་ཡང་དག་པར་རྫོགས་པའི་སངས་རྒྱས་ཀྱི་གོ་འཕང་རིན་པོ་ཆེ་འཐོབ་པར་བྱ། དེའི་ཕྱིར་དུ་དམ་པའི་ཆོས་གང་ཞིག་གསན་ནས་དོན་ཉམས་སུ་བླང་བར་བགྱིའོ་སྙམ་པའི་བྱང་ཆུབ་མཆོག་ཏུ་ཐུགས་བསྐྱེད་པ་དང་བཅས་ཏེ་གསན་འཚལ། དེ་ལ་གང་གསན་པར་བྱ་བའི་ཆོས་ནི་བྱང་ཆུབ་སེམས་དཔའི་སྡོམ་པ་འབོག་རྒྱུ་དེ་ཡིན།

དེ་རིང་ངའི་སེམས་ཀྱང་ཧ་ཅང་དགའ་པོ་བྱུང་། དེའི་རྒྱུ་མཚན་ནི། འདིར་དུས་ཚེས་སྟོན་འཁོར་ཆོས་ལ་སོགས་པ་ཐམས་ཅད་ཀྱང་ཕུན་སུམ་ཚོགས་པ་ཞིག་བྱུང་བས་ཡིན།

ཕུན་སུམ་ཚོགས་པ་ལྔ།

དེ་ལ་གནས་དུས་སྟོན་འཁོར་ཆོས་ཕུན་སུམ་ཚོགས་པ་ལྔ་ལས།

དུས་ཕུན་སུམ་ཚོགས་པ་ནི། ཟླ་བ་འདི་བདག་ཅག་གི་སྟོན་པ་ཐུགས་རྗེ་ཅན་ལྷུམས་སུ་ཞུགས་པ་དང་། མངོན་པར་རྫོགས་པར་སངས་རྒྱས་པ། མྱང་ངན་ལས་འདའ་བ་སྟེ། སྟོན་པ་ཐུགས་རྗེ་ཅན་གྱིས་དང་པོའི་མཛད་པ་ནས་བཟུང་སྟེ་ཐ་མའི་བར་གྱི་མཛད་པ་ཆ་ཚང་སྟོན་སའི་དུས་ཚོད་ལ་ཁེལ་ཡོད་པའི་ཕྱིར་ན། མ་བསྒྲིགས་རང་འགྲིག་ཏུ་གྱུར་པ་འདི་ལ་བསམ་ནས་ཀྱང་འུ་ཅག་དགའ་སྤྲོ་སྐྱེ་འོས་པ་ཡིན།

ཁྱད་པར་དུ་ང་རང་ངོས་ནས་བསམ་བློ་བཏང་ན། ཟླ་བ་འདིའི་སྟོད་ལ་བོད་ཡུལ་ནས་བླ་སེར་ཁྲི་ཕྲག་གསུམ་ཙམ་དང་མི་སྐྱ་འབུམ་ཕྲག་གཉིས་ཙམ་ལ་བདེ་ཆེན་ཞིང་སྒྲུབ་ཅེས་པ་ཚོགས་ནས་མི་མང་པོའི་རྒྱུད་ལ་ཐར་པའི་ས་བོན་ཐེབས་པའི་དུས་ཚེས་བཟང་པོ་ཡིན།

གནས་ཕུན་སུམ་ཚོགས་པ་ནི། འཛམ་གླིང་ན་སྟོབས་ལྡན་རྒྱལ་ཁབ་ཅེས་ཡོངས་སུ་གྲགས་པའི་ཨ་མེ་རི་ཁའི་ས་ཆ་འདིར་ཐོན་ནས། ཟླ་བ་འདིའི་མཇུག་ལ་དད་ལྡན་གྱི་མི་དམངས་ཐམས་ཅད་ལ་ཆོས་བཤད་རྒྱུའི་སྐལ་བ་བཟང་པོ་བྱུང་བས་དགའ་སྤྲོ་སྐྱེས་བྱུང་།

ཆོས་ཕུན་སུམ་ཚོགས་པ་ནི། སྤྱིར་འཛམ་བུ་གླིང་ན་ཆོས་ལུགས་མང་པོ་ཡོད་ཀྱང་། དེའི་ནང་ནས་ནང་པ་སངས་རྒྱས་པའི་ཆོས་ནི་འཚེ་མེད་ཞི་བའི་ལམ་བཟང་ཁོ་ན་སྟེ། རང་གཞན་ཐམས་ཅད་བདེ་སྐྱིད་ཀྱི་ལམ་ལ་འགོད་པར་བྱེད་པའི་ཆོས་བཟང་པོ་འདིར་ཕྲད་པའང་སྐལ་བ་བཟང་།

སྤྱིར་སངས་རྒྱས་པའི་ཆོས་ལ་ཡང་ཐེག་པ་དམན་པ་ཞེས་རང་དོན་འབའ་ཞིག་སྒྲུབ་པ་དང་། ཐེག་པ་ཆེན་པོ་ཞེས་གཞན་དོན་གཙོར་བྱས་ནས་སྒྲུབ་པ་གཉིས་ཡོད་པ་ལས། ད་ལན་འུ་ཅག་ཚང་མ་ཐེག་པ་ཆེན་པོའི་ཆོས་དང་འཕྲད། དེ་ལས་ཀྱང་མྱུར་བ་ཉིད་དུ་ཚེ་འདི་ཉིད་ལ་ཟུང་འཇུག་གི་སྐུ་འགྲུབ་པར་བྱེད་པའི་སྔགས་རྡོ་རྗེ་ཐེག་པའི་ཆོས་ལ་མཉམ་དུ་སྤྱོད་རྒྱུའི་སྐལ་བ་ལྡན་པར་གྱུར་པས་ཧ་ཅང་དགའ་པོ་བྱུང་།

སྟོན་པ་ཕུན་སུམ་ཚོགས་པ་ནི། ང་རང་གི་ངོ་སྤྲོད་མདོར་བསྡུས་ཙམ་ཞིག་ཞུས་ན། སྤྱིར་སྐྱེས་མ་ཐག་པ་ནས་ཆོས་དང་ཕྲད་པ་ཞིག་ཡིན་ཞིང་། ལོ་བཅུ་བཞིའི་དུས་ནས་བཟུང་སྟེ་གཞན་ལ་ཆོས་འཆད་པ་དང་རྩོམ་པ་ལ་སོགས་པའི་ཁུར་བླངས་ནས་ད་ལྟའི་བར་ཐུག་སོང་བ་ཡིན། ཆོས་རྐྱང་བའི་ངོས་ནས་བསམ་བློ་བཏང་ན་སྔོན་ཆད་ཤེས་ཡོན་འབྲིང་ཙམ་ཞིག་ཡོད་ཀྱང་། ད་སྐབས་ནི་ལོ་ཧ་ཅང་མཐོ་བ་དང་ནད་ཚབས་ཆེ་བ། མིག་གིས་ཀྱང་ཡི་གེ་གཏན་ནས་མི་མཐོང་བས་ཆོས་ཀྱི་ཤེས་ཡོན་དེ་ཡང་ཧ་ཅང་གི་སྡུག་པོ་རེད་སོང་།

དེ་ལས་གཞན་པའི་ཆབ་སྲིད་ཀྱི་འགྲོ་ཕྱོགས་དང་རྒྱལ་ཁབ་སོ་སོའི་གནས་སྟངས། ཚན་རིག་གི་ཤེས་བྱ་སོགས་གང་ཅིའི་ཐད་ནས་ཧ་ཅང་དབུལ་པོ་ཡིན། ཐ་ན་འཛམ་གླིང་རྒྱལ་ཁབ་སོ་སོའི་མི་རྣམས་ཀྱི་ཟ་མ་ཟ་སྟངས་ཙམ་ཡང་ལེགས་པོར་ཤེས་ཀྱིན་མེད། དེས་ན། ད་རེས་ཀྱི་གནས་སྐབས་སུ་ཡང་ཁྱེད་རྣམ་པ་ལྟ་བུའི་ཤེས་ཡོན་ཅན་དག་གི་ཀླད་ནས་ཆོས་ཀྱི་སྐད་ཆ་ཞིག་བཤད་དགོས་ནའང་ངོ་ཧ་ཅང་གནོང་མོ་རེད། འོན་ཀྱང་སྐྱེ་བ་སྔོན་གྱི་ལས་ཀྱིས་འདི་ལྟ་བུ་ཞིག་བཤད་པའི་དུས་སྐབས་ལ་ཐུག་སོང་བ་རེད། གང་ལྟར་ཡང་ངས་བཤད་ལུགས་ཀྱིས་མ་ཐོན་པ་དང་ནོར་བ། འཆུགས་པ་སོགས་ཡོད་ན་ཁྱེད་རྣམ་པས་དྲང་བཅོས་བྱ་རྒྱུའི་རེ་བ་ཡིན།

འཁོར་ཕུན་སུམ་ཚོགས་པ་ནི། ཁྱེད་ཅག་འདིར་བཞུགས་ཀྱི་ཆོས་པ་ཚང་མ་ས་ཆ་དང་རྒྱལ་ཁབ་སོ་སོ་ནས་ལྷགས་ཤིང་མི་རིགས་ཀྱང་མི་འདྲ་བའི་དད་པ་དང་ཤེས་རབ་ལྡན་པ་ཤ་སྟག་ཡིན་པས་བདག་ལ་དགའ་སྤྲོ་སྐྱེས།

ཐུན་མོང་གི་སྔོན་འགྲོ།

ད་ཆོས་ཁྲིད་དངོས་ལ་འཇུག་པ་ནི། ད་རེས་ཀྱི་གནས་སྐབས་ན་ངེད་ཅག་གིས་ཆོས་སྒྲུབ་པའི་སྐལ་བ་དང་ལྡན་པའི་མི་ལུས་རིན་པོ་ཆེ་འདི་རྙེད་ཡོད། འདི་ནི་ཤིན་ཏུ་ནས་ཀྱང་རྙེད་པར་དཀའ་བ་ཞིག་ཡིན། ཅིའི་ཕྱིར་ཞེ་ན། ལུས་རྟེན་འདི་རྒྱུའི་སྒོ་ནས་རྙེད་པར་དཀའ་སྟེ། སྐལ་པ་མང་པོར་དགེ་སྒྲུབ་སྡིག་སྤོང་བྱས་པའི་འབྲས་བུ་ལས་འདི་ལྟ་བུའི་ཆོས་ལྡན་གྱི་ལུས་རྟེན་ཞིག་ཐོབ་ཐུབ་པ་མ་གཏོགས། རང་བཞིན་ཅི་མ་གང་ཡིན་གྱིས་ཐོབ་མི་སྲིད།

དེ་བཞིན་དུ་དཔེའི་སྒོ་ནས་རྙེད་དཀའ་ཚུལ་ནི། གྱང་ངོས་འཇམ་པོ་ལ་སྲན་མ་སྤར་གང་གཏོར་ན་དེར་ཆགས་མི་སྲིད་པ་ལྟར་མི་ལུས་འདི་ཤིན་ཏུ་རྙེད་པར་དཀའ།

གྲངས་ཀྱི་སྒོ་ནས་རྙེད་དཀའ་ཚུལ་ནི། ཆོས་མིན་ལ་སྤྱོད་པའི་སེམས་ཅན་དེ་ས་ཆེན་པོའི་རྡུལ་ཙམ་ཞིག་ཡོད་སྲིད་ན། ཆོས་སྒྲུབ་པའི་གང་ཟག་ནི་སེན་མོའི་སྟེང་ལ་ཆགས་པའི་རྡུལ་ཙམ་ཞིག་ལས་མེད་ཅེས་བཅོམ་ལྡན་འདས་ཀྱི་མདོ་སྡེ་ལས་གསུངས་པ་ཡིན།

དེ་ལྟ་བུའི་ལུས་རྟེན་ཡང་རྙེད་ན་དོན་ཆེ་བ་དང་ལྡན་པ་ཞིག་ཡིན་ཏེ། འུ་ཅག་གི་ལུས་རྟེན་འདིའི་སྟེང་ནས་ཆོས་རྣམ་དག་ཅིག་བསྒྲུབས་ན། ཚེ་འདིར་ཚེ་རིང་བ་དང་ནད་མེད་པ། ལོངས་སྤྱོད་ཆེ་བ། སྙན་གྲགས་རྒྱས་པ་སོགས་ལུས་རྟེན་འདིར་བརྟེན་ནས་སྒྲུབ་ཆོག་ཅིང་། ཚེ་ཕྱི་མ་སྟེ་འཇིག་རྟེན་གཞན་དུའང་ལུས་དང་སེམས་ལ་སྡུག་བསྔལ་ཅུང་ཟད་ཙམ་མེད་པར། བདེ་སྐྱིད་ལོངས་སྤྱོད་བསམ་གྱིས་མི་ཁྱབ་པ་ཡོད་པའི་སངས་རྒྱས་ཀྱི་གོ་འཕང་དེ་བསྒྲུབ་པར་འདོད་ན་ཡང་། འུ་ཅག་གི་ལུས་རྟེན་འདིའི་སྟེང་ནས་བསྒྲུབས་ཐུབ་པ་ཡིན།

དེ་འདྲའི་དོན་ཆེན་གྱི་ལུས་རྟེན་འདི་ཐོབ་དུས། རང་དོན་དང་གཞན་དོན་གང་བསྒྲུབ་དགོས་རུང་མྱུར་དུ་མ་བསྒྲུབས་ན། ཤི་བ་ཟེར་བ་གློ་བུར་དུ་ཐོན་ཡོང་ཞིང་། འཆི་བའི་དུས་སུ་ལས་དབང་གིས་འཇིག་རྟེན་གཞན་དང་གཞན་དུ་སྐྱེས་ནས་དགེ་བ་བསྒྲུབ་བསམ་ཞིང་བདེ་བ་འཐོབ་པར་འདོད་ཀྱང་རང་དབང་ཡོད་མི་སྲིད་པས། ད་ལྟ་རང་དབང་ཡོད་པའི་གནས་སྐབས་འདིར་དགེ་བ་རྣམ་པར་དག་པ་ཞིག་བསྒྲུབ་དགོས་པ་ཡིན།

དེས་ན་དགེ་བ་སྒྲུབ་པར་བྱེད་པ་ལའང་སྟོན་པ་ཐུགས་རྗེ་ཅན་ཤཱཀྱ་ཐུབ་པས་ཐབས་མང་པོ་ཞིག་གསུངས་ཡོད་དེ། དཔེར་ན་འཇིག་རྟེན་གྱི་རྒྱུ་རྫས་ཕལ་པ་དང་འདྲ་བའི་ཆོས་སྒྲུབ་སྟངས་དང་། གསེར་ལྟ་བུའི་ཆོས་སྒྲུབ་སྟངས། རྡོ་རྗེ་ཕ་ལམ་དང་མཚུངས་པའི་ཆོས་སྒྲུབ་སྟངས་བཅས་ཡོད། དེ་ཐམས་ཅད་ལས་ཁྱད་པར་དུ་འཕགས་པ་ནི་ཡིད་བཞིན་ནོར་བུ་ལྟ་བུའི་ཆོས་སྒྲུབ་སྟངས་དེ་ཡིན། དེ་ལྟ་བུའི་ཆོས་ལ་རྣམ་གྲངས་ཀྱི་རིམ་པ་མང་པོ་ཞིག་བཅོམ་ལྡན་འདས་ཀྱིས་གསུངས་ཡོད་ན། ཁྱེད་རྣམ་པས་དེ་དག་ལས་གང་བསྒྲུབ་འདོད་དམ། ཆོས་ཨང་དང་པོ་དེ་བསྒྲུབ་བསམ་མམ། ཡང་ན་གཞན་གང་རུང་ཞིག་བསྒྲུབ་བསམ་པར་འདུག ཅེས་དྲིས་པར། མང་པོ་ཞིག་གིས་ཨང་དང་པོ་དེ་བསྒྲུབ་འདོད་ཅེས་ཞུས། ༼དགོད་སྒྲ།༽

འོ་ཡ་ཡ། ད་ཨང་དང་པོ་དེ་བསྒྲུབ་བསམ་ན། སངས་རྒྱས་ཀྱིས་ཆོས་ཀྱི་སྒོ་མོ་བརྒྱད་ཁྲི་བཞི་སྟོང་གི་ནང་དུ་ཡང་བྱང་ཆུབ་ཀྱི་སེམས་དང་རྫོགས་པ་ཆེན་པོའི་ཆོས་ལས་ལྷག་པ་ཞིག་གསུངས་ཡོད་པ་མིན།

དེ་ཡང་བྱང་ཆུབ་ཀྱི་སེམས་ཞེས་པ་ནི། ཐེག་ཆེན་པ་ཡོངས་སུ་རྫོགས་པའི་བསྒྲུབ་བྱ་ཡིན་ལ། རྫོགས་པ་ཆེན་པོ་ཞེས་པ་ནི། ཐེག་ཆེན་གྱི་ནང་ནས་ཐེག་ཆེན་ཁྱད་པར་བ་སྟེ། གསང་སྔགས་རྡོ་རྗེ་ཐེག་པ་ཞེས་གང་ཟག་ཆེས་མཆོག་ཏུ་གྱུར་པ་ཞིག་མ་གཏོགས། གཞན་ཐེག་ཆེན་པ་ཡིན་ཡིན་གྱིས་བསྒྲུབ་མི་ཆོག་པའི་ཆོས་ཟབ་མོ་ཞིག་ཡིན། དེས་ན་ཁྱེད་ཅག་གིས་དེ་གཉིས་ཀ་བསྒྲུབ་བསམ་མམ། ཅིག་ཤོས་དེ་བསྒྲུབ་འདོད་པ་ཡིན། ཞེས་དྲིས་ཚེ། ཚང་མས་གཉིས་ཀ་བསྒྲུབ་འདོད་ཅེས་ཞུས། ༼དགོད་སྒྲ།༽

འོ་དེ་ནི་ཧ་ཅང་ཡག་པོ་རེད། འུ་ཅག་ཚང་མས་གཉིས་ཀ་བསྒྲུབ་དགོས་པ་ཡིན། ངེད་བོད་ཡུལ་ལུང་པ་ན་ཡོད་པའི་བླ་མ་བཟང་པོ་ཞིག་ཡིན་ནས་བཟུང་སྟེ། ཚང་མས་ཀྱང་གཉིས་ཀ་སྒྲུབ་པ་ལས་གང་རུང་ཞིག་ཡ་བྲལ་བྱས་ནས་སྒྲུབ་ཀྱིན་ཡོད་པ་མིན། ཁྱེད་རྣམ་པས་ཀྱང་གཉིས་ཀ་བསྒྲུབ་ཟེར་རྒྱུ་དེ་ཧ་ཅང་ཡག་པོ་རེད།

དེས་ན་དང་པོ་བྱང་ཆུབ་ཀྱི་སེམས་འདི་ལས་འཕྲོས་པའི་གཏམ་མདོར་བསྡུས་ཙམ་ཞིག་ཁྱེད་རྣམ་པ་ལ་ཞུ།

བྱང་ཆུབ་སེམས་ཀྱི་ཕན་ཡོན།

དེ་ལ་བྱང་ཆུབ་ཀྱི་སེམས་ཞེས་པ་འདི་ནི། བདག་ཅག་གི་སྟོན་པ་ཐུགས་རྗེ་ཅན་གྱིས་བསྐལ་པ་གྲངས་མེད་དཔག་ཏུ་མེད་པ་མང་པོའི་གོང་རོལ་ནས། ཡང་ནས་ཡང་དུ་བློ་ཤེས་རབ་ཀྱིས་རྣམ་པར་བརྟགས་ཤིང་དཔྱད་ནས་སེམས་ཅན་ཐམས་ཅད་ལ་ཕན་པའི་ཐབས་དང་། སྡུག་བསྔལ་སེལ་བའི་ཐབས་ལ་གང་དགའ་གང་དྲག་དགོངས་པ་ན། མཐར་སེམས་ཅན་ལ་ཕན་བདེ་སྒྲུབ་པར་རིན་ཆེན་བྱང་ཆུབ་ཀྱི་སེམས་འདི་ལས་ལྷག་པའི་ཐབས་ཤིག་མེད་པར་མཁྱེན་ནས་འདི་ཉིད་གསུངས་བ་རེད།

བྱང་ཆུབ་ཀྱི་སེམས་འདི་ཉིད་ཀྱིས། གནས་སྐབས་སུ་ལྷ་དང་མིའི་བདེ་འབྲས་ཕུན་སུམ་ཚོགས་པ་འགྲུབ་པར་བྱེད་ཅིང་། མཐར་ཐུག་སངས་རྒྱས་ཀྱི་གོ་འཕང་ཡང་བདེ་བླག་ཏུ་འགྲུབ་པར་བྱེད་པ་ཡིན། དེའི་ཕྱིར་འཇིག་རྟེན་ཁམས་ཀྱི་སྡུག་བསྔལ་ཐམས་ཅད་མེད་པར་འདོད་པ་དང་། བདེ་བ་ཐམས་ཅད་འཐོབ་པར་འདོད་པའི་གང་ཟག་ཅིག་ཡིན་ནས་བཟུང་སྟེ། ངེས་པར་དུ་བྱང་ཆུབ་ཀྱི་སེམས་འདི་ཉིད་རྒྱུད་ལ་བསྟེན་དགོས་པ་ཡིན།

བྱང་ཆུབ་ཀྱི་སེམས་འདི་ཉིད་རྒྱུད་ལ་སྐྱེས་ན། གང་ཟག་དེའི་མིང་ཡང་གནས་འགྱུར་འགྲོ་སྟེ། སྔོན་རང་བཞིན་གྱི་སེམས་ཅན་དང་མི་ཞེས་པ་ལས་མིང་གཞན་མེད་ཀྱང་། དེ་ནས་བཟུང་སྟེ་རྒྱལ་བའི་སྲས་དང་བྱང་ཆུབ་སེམས་དཔའ་ཞེས་པར་མིང་གནས་འགྱུར་བ་ཡིན། དོན་ཡང་གནས་འགྱུར་ནས་འཇིག་རྟེན་གྱི་ཆེ་དགུ་ལྷ་དང་ཀླུ། གནོད་སྦྱིན། དྲི་ཟ། མི་མ་ཡིན་ལ་སོགས་ཡོད་ཚད་ཚང་མས་ཀྱང་གུས་བཀུར་དང་ལེན་གྱིས་ཕྱག་འཚལ་བའི་འོས་སུ་འགྱུར་བ་ཡིན། དེའི་ཕྱིར་ན་བྱང་ཆུབ་ཀྱི་སེམས་འདི་ཉིད་བསྒོམ་དགོས།

དཔེར་ན་འཇིག་རྟེན་ཁམས་ན་གསེར་འགྱུར་གྱི་རྩི་ཞེས་པ་སྲང་གང་གིས་ལྕགས་ཕལ་པ་སྲང་སྟོང་ཕྲག་ཡོད་པ་ཡང་སྐད་ཅིག་ཉིད་ལ་གསེར་དུ་བསྒྱུར་བ་བཞིན་དུ། བྱང་ཆུབ་ཀྱི་སེམས་འདིས་ཀྱང་ད་སྔོན་ངེད་ཅག་གི་མི་གཙང་བ་ཡིད་དུ་མི་འོང་བའི་རང་བཞིན་གྱི་ལུས་འདི་ཡང་། མྱུར་བ་ཉིད་དུ་སངས་རྒྱས་ཀྱི་སྐུ་མཚན་དང་དཔེ་བྱད་ལྡན་པ། མཐོང་ན་མི་མཐུན་པ་མེད་པ། དུས་རྟག་ཏུ་སེམས་ཅན་རྣམས་ལ་ཕན་བདེ་སྟེར་བའི་སྐུ་ཉིད་དུ་བསྒྱུར་བར་བྱེད་པ་ཡིན།

བྱང་ཆུབ་སེམས་ཀྱིས་མ་ཟིན་པའི་ལུས་ཀྱིས་ཕྱག་འཚལ་བ་དང་སྐོར་བ་བྱེད་པ། ཁ་ཏོན་འདོན་པ་ལ་སོགས་པའི་དགེ་རྩ་གཞན་ཐམས་ཅད་ནི། དཔེར་ན་ཆུ་ཤིང་གི་སྡོང་པོ་དང་འདྲ་བར་འབྲས་བུ་ལན་ཅིག་བསྐྱེད་ནས་ཟད་པའམ་སྐམ་པར་འགྱུར་བ་ཡིན། བྱང་ཆུབ་སེམས་ཀྱིས་ཟིན་པའི་དགེ་རྩ་དེ་ནི། ལྷའི་དཔག་བསམ་གྱི་ཤིང་ལྟར་དུ་འབྲས་བུ་ཡུན་ནས་ཡུན་དུ་བསྐྱེད་ནས། གནས་སྐབས་སུ་མིའི་ཡུལ་དུ་འཁོར་ལོ་བསྒྱུར་རྒྱལ་དང་། ལྷའི་གནས་སུ་དབང་པོ་དང་ཚངས་པ་ལ་སོགས་པའི་སྐྱེ་བ་བླངས་ནས། མཐར་ཐུག་སངས་རྒྱས་ཐོབ་པའི་གནས་སྐབས་ན་ཡང་འབྲས་བུ་མི་འཛད་པར། སེམས་ཅན་གྱི་དོན་རྟག་ཁྱབ་ལྷུན་གྲུབ་ཆེན་པོ་རུ་འབྱུང་བར་བྱེད་པའི་ཕྱིར་ན། བྱང་ཆུབ་ཀྱི་སེམས་འདི་ཉིད་བསྒོམ་པ་ཤིན་ཏུ་གལ་ཆེ།

བྱང་ཆུབ་ཀྱི་སེམས་འདི་ཉིད་ཀྱིས་ཚེ་རབས་ཐོག་མེད་ནས་བསགས་པའི་སྲོག་བཅད་པ་དང་མ་བྱིན་པ་བླངས་པ་ལ་སོགས་པའི་སྡིག་པ་མི་དགེ་བ་ཆུང་རིམ་ཐམས་ཅད། རྩྭ་ཕུང་སྐམ་པོ་ལ་མེ་མཆེད་པ་བཞིན་དུ་སྐད་ཅིག་དེ་ཉིད་ལ་ལྷག་མེད་དུ་བྱང་བར་བྱེད་ཅིང་། སྡིག་པ་ཆེན་པོ་ཕ་བསད་པ་དང་མ་བསད་པ་ལྟ་བུའི་སེམས་ཅན་ངན་སོང་དུ་འགྲོ་དགོས་ངེས་ཅན་དེ་དག་གིས་ཀྱང་ཡུན་ཐུང་ངུ་སེ་གོལ་གཏོགས་ཡུན་ཙམ་མ་གཏོགས་ངན་སོང་གི་སྡུག་བསྔལ་ཡུན་རིང་པོར་མྱོང་མི་དགོས།

དེའི་ཕྱིར་ན་སྡིག་པ་འདག་པར་འདོད་པ་རྣམས་ཀྱིས་ཀྱང་བྱང་ཆུབ་ཀྱི་སེམས་འདི་ཉིད་བསྒོམ་དགོས།

དེ་ནི་བྱང་ཆུབ་སེམས་ཀྱི་ཕན་ཡོན་འབྲིང་པོའི་ཚུལ་དུ་བཤད་པ་ཡིན་ཞིང་། ད་དུང་རྒྱས་པར་ཤེས་འདོད་པ་རྣམས་ཀྱིས་སྡོང་པོ་བཀོད་པའི་མདོ་ལས་དཔེ་བརྒྱ་དང་ལྷག་ཙམ་གྱི་སྒོ་ནས་གསལ་པོར་བཤད་པ་དེ་དག་ལས་ཤེས་དགོས་པ་ཡིན།

དེ་ནས་བྱང་ཆུབ་སེམས་ཀྱི་ཕན་ཡོན་མདོར་བསྡུས་ཤིག་བཤད་ན། དོན་ཚན་གསུམ་གྱི་སྟེང་ནས་ཤེས་དགོས།

གཅིག བྱང་ཆུབ་ཀྱི་སེམས་རྒྱུད་ལ་སྐྱེས་པའི་གང་ཟག་རྣམས་ངན་སོང་གསུམ་དུ་སྐྱེ་བར་མི་འགྱུར།

གཉིས། མཐོ་རིས་ལྷ་དང་མིའི་བདེ་བ་ཐམས་ཅད་ཀུན་ཀྱང་འབད་མེད་དུ་འབྱུང་བ་ཡིན།

གསུམ། རྒ་ཤི་མེད་པའི་སངས་རྒྱས་ཀྱི་གོ་འཕང་འཐོབ་པར་བྱེད་པ་ཡིན།

དེ་རིང་འུ་ཅག་གིས་མཉམ་དུ་བྱང་ཆུབ་སེམས་ཀྱི་སྡོམ་པ་ཞིག་ལེན་རྒྱུ་ཡིན།

སྔོན་འགྲོ་སྐྱབས་སུ་འགྲོ་བ།

ཐོག་མར་སྐྱབས་སུ་འགྲོ་བར་བྱེད་པ་ལ། དགོངས་སུ་གསོལ་བ་གསུམ་སྔོན་དུ་འགྲོ་དགོས། དེ་ནི་ཕྱོགས་བཅུའི་རྒྱལ་བ་སྲས་དང་བཅས་པ་དང་། བླ་མ་རྡོ་རྗེ་འཛིན་པ་ཐམས་ཅད་རང་གི་མདུན་གྱི་ནམ་མཁར་སྒོམས། དེའི་མདུན་ནས་བྱང་ཆུབ་མཆོག་ཏུ་སེམས་བསྐྱེད་པ་ཡིན་སྙམ་དུ་ཚིག་འདི་རྗེས་ཟློས་གྱིས།

ཕྱོགས་བཅུ་ན་བཞུགས་པའི་སངས་རྒྱས་བཅོམ་ལྡན་འདས་ཐམས་ཅད་དང་ས་བཅུ་ལ་གནས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་དང་། བླ་མ་རྡོ་རྗེ་འཛིན་པ་ཆེན་པོ་རྣམས་བདག་ལ་དགོངས་སུ་གསོལ།

བྱང་ཆུབ་མཆོག་ཏུ་སེམས་བསྐྱེད་པར་བྱེད་པ་ལ་ཐོག་མར་སྐྱབས་སུ་འགྲོ་དགོས་ཤིང་། སྐྱབས་སུ་མ་སོང་ན་ནང་པ་སངས་རྒྱས་པའི་ཆོས་གང་ཡང་སྒྲུབ་ཐབས་མེད། དེས་ན་ཐོག་མར་སྐྱབས་སུ་འགྲོ་བའི་སྡོམ་པ་འདི་འབོག་རྒྱུ་ཡིན།

སྐྱབས་སུ་འགྲོ་བའི་དམིགས་རིམ་ནི། ཁྱེད་རྣམ་པས་དུས་ད་ནས་བཟུང་སྟེ་སྐྱེ་བ་ཚེ་རབས་ཐམས་ཅད་དུ་སྟོན་པ་དེ་སངས་རྒྱས་ཤཱཀྱ་ཐུབ་པ་ཁོང་མ་གཏོགས་གཞན་མི་བསྟེན་སྙམ་དུ་དམ་བཅའ་བ་ནི་སངས་རྒྱས་ལ་སྐྱབས་སུ་འགྲོ་བ་ཡིན་ལ། སངས་རྒྱས་བཅོམ་ལྡན་འདས་ཀྱིས་གསུངས་བའི་ཆོས་དེ་ཁོ་ན་ཉམས་སུ་ལེན་པ་ལས་གཞན་གང་ཡང་ཉམས་སུ་མི་ལེན་སྙམ་པའི་དམ་བཅའ་བ་ནི་ཆོས་ལ་སྐྱབས་སུ་འགྲོ་བ་དང་། སངས་རྒྱས་ཤཱཀྱ་ཐུབ་པའི་རྗེས་འཇུག་མགོན་པོ་འཇམ་དཔལ་དབྱངས་དང་ཕྱག་ན་རྡོ་རྗེ། སྤྱན་རས་གཟིགས། ཨོ་རྒྱན་རིན་པོ་ཆེ་ལྟ་བུ་སོགས་དང་ལྟ་སྤྱོད་མཐུན་པར་བྱ་ཞིང་། གསུང་ལ་མཉན། རྗེས་སུ་སློབ་སྙམ་པའི་ཁས་ལེན་དམ་བཅའ་བྱེད་པ་ནི་དགེ་འདུན་ལ་སྐྱབས་སུ་འགྲོ་བ་ཡིན།

མདོར་ན་རང་གི་སྲོག་ལ་ཐུག་ཀྱང་དཀོན་མཆོག་གསུམ་མི་སྤོང་བར། དཀོན་མཆོག་གསུམ་ཁོ་ན་སྐྱབས་སུ་བསྟེན་སྙམ་པའི་ཁས་ལེན་དམ་བཅའ་དང་ལྡན་པའི་སྒོ་ནས་ཚིག་འདི་རྗེས་ཟློས་གྱིས།

བྱང་ཆུབ་སྙིང་པོར་མཆིས་ཀྱི་བར། །སངས་རྒྱས་རྣམས་ལ་སྐྱབས་སུ་མཆི། །

ཆོས་དང་བྱང་ཆུབ་སེམས་དཔའ་ཡི། །ཚོགས་ལའང་དེ་བཞིན་སྐྱབས་སུ་མཆི། །

འོ་ཡ། ད་སྐྱབས་འགྲོའི་སྡོམ་པ་རྒྱུད་ལ་སྐྱེས་པ་ཡིན། ཁྱེད་ཅག་གིས་གོ་སོང་ངམ།

སྐྱབས་སུ་མ་སོང་ན་ནང་པ་སངས་རྒྱས་པ་ཟེར་བ་མིན་པས། དུས་དེ་རིང་ནས་བཟུང་སྟེ་ཁྱེད་རྣམ་པ་ཚང་མ་ནང་པ་སངས་རྒྱས་པར་གྱུར་བ་ཡིན། དེ་ཡིན་པར་ཧ་གོ་དགོས་པ་རེད། ད་ནས་བཟུང་སངས་རྒྱས་ཀྱི་ཆོས་གང་དང་གང་ལ་བསླབ་ན་ཡང་འདི་ལྟ་བུའི་འདུན་པ་བསྐྱེད་དགོས་ཏེ། ཁྱེད་ཅག་གིས་ཆོས་གང་བསྒྲུབ་ཀྱང་སྔར་དང་མི་འདྲ་བའི་འབྲས་བུ་དང་ནུས་པ་ཆེན་པོ་འཐོབ་རྒྱུའང་ཤེས་དགོས། དེ་བཞིན་དུ་འཇིགས་པ་དང་སྡུག་བསྔལ་ཇི་ལྟ་བུ་བྱུང་ཡང་དཀོན་མཆོག་གསུམ་ཁོ་ན་ལ་གསོལ་བ་འདེབས་པ་ལས། སྐྱབས་གཞན་ལ་མ་བསྟེན་ན་དཀོན་མཆོག་གསུམ་པོས་སྐྱོབ་མི་ཐུབ་པ་ཞིག་རྩ་བ་ནས་མེད། བདེ་འབྱོར་སྙན་གྲགས་སོགས་གང་དང་གང་ཞིག་འདོད་ན་ཡང་དཀོན་མཆོག་རིན་པོ་ཆེ་འདི་ཁོ་ན་ལ་གསོལ་བ་རྩེ་གཅིག་ཏུ་ཐོབས་དང་། དེས་སྟེར་མི་ཐུབ་པ་ཞིག་རྩ་བ་ནས་མེད།

སྐྱབས་སུ་འགྲོ་བའི་བསླབ་བྱ་ནི། དུས་རྒྱུན་དུ་སེམས་ཅན་མཆོག་དམན་རབ་འབྲིང་སུ་ལ་ཡང་གནོད་མི་སྐྱེལ་བར་ཕན་པ་བསྒྲུབ་རྒྱུ་ཁོ་ན་དང་དུ་ལེན་དགོས་པ་དེ་རྩ་བ་ཡིན།

དངོས་གཞི་སེམས་བསྐྱེད་པ།

བྱང་ཆུབ་མཆོག་ཏུ་སེམས་བསྐྱེད་པ་དངོས་ལ། སྨོན་པ་སེམས་བསྐྱེད་དང་འཇུག་པ་སེམས་བསྐྱེད་གཉིས་ཡོད།

སྨོན་པ་སེམས་བསྐྱེད་ཅེས་པ་ནི། སེམས་ཅན་ཐམས་ཅད་སངས་རྒྱས་ཀྱི་གོ་འཕང་ཐོབ་པར་གྱུར་ན་ཅི་མ་རུང་སྙམ་པ་དང་། འཇུག་པ་སེམས་བསྐྱེད་ནི་སེམས་ཅན་ཐམས་ཅད་སངས་རྒྱས་ཀྱི་གོ་འཕང་འཐོབ་པའི་ཕྱིར་དུ་སྦྱིན་པ་གཏོང་བ་དང་། ཚུལ་ཁྲིམས་སྲུང་བ། བཟོད་པ་སྒོམ་པ་ལ་སོགས་པའི་དགེ་བའི་བྱ་བ་རྣམས་ལ་དངོས་སུ་འཇུག་པར་བྱེད་པ་དེ་ཡིན།

འོག་གི་བྱང་སྡོམ་གྱི་ཚིག་རྣམས་རྗེས་ཟློས་ལན་གསུམ་དགོས་པ་ལས། རྗེས་ཟློས་དང་པོའི་དུས་སུ། རང་གི་རྒྱུད་ལ་སྨོན་པ་སེམས་བསྐྱེད་སྐྱེས་སོང་བར་སོམས། གཉིས་པའི་དུས་སུ་རྒྱུད་ལ་འཇུག་པ་སེམས་བསྐྱེད་སྐྱེས་སོང་བར་སོམས། གསུམ་པའི་དུས་སུ་གཉིས་ཀ་བརྟན་པར་གྱུར་ཅིང་རང་ཉིད་བྱང་ཆུབ་སེམས་དཔའ་ཉིད་དུ་གྱུར་སོང་བར་སོམས་ལ་འདི་ལྟར་རྗེས་ཟློས་གྱིས།

ཇི་ལྟར་སྔོན་གྱི་བདེ་གཤེགས་ཀྱིས། །བྱང་ཆུབ་ཐུགས་ནི་བསྐྱེད་པ་དང་། །

བྱང་ཆུབ་སེམས་དཔའི་བསླབ་པ་ལ། །དེ་དག་རིམ་བཞིན་གནས་པ་ལྟར། །

དེ་བཞིན་འགྲོ་ལ་ཕན་དོན་དུ། །བྱང་ཆུབ་སེམས་ནི་བསྐྱེད་བགྱི་ཞིང་། །

དེ་བཞིན་དུ་ནི་བསླབ་པ་ལའང་། །རིམ་པ་བཞིན་དུ་བསླབ་པར་བགྱི། །

ད་ནས་རིན་ཆེན་བྱང་ཆུབ་ཀྱི་སེམས་ཞེས་པ་དེ་ཁྱེད་རྣམ་པའི་རྒྱུད་ལ་སྐྱེས་པ་ཡིན་ལ། དུས་ད་ནས་བཟུང་སྟེ་བྱང་ཆུབ་སེམས་དཔའ་ཞེས་མིང་གནས་གྱུར་བ་དང་། ཁྱད་པར་དུ་ཁྱེད་རྣམ་པས་བསམ་པ་འདིའི་ཐོག་ནས་ལུས་ངག་གི་དགེ་བ་ཞིག་བསྒྲུབས་ན་འཇུག་པ་སེམས་བསྐྱེད་དུ་འགྱུར་འགྲོ་ཞིང་། སྨོན་འཇུག་གཉིས་ལས་བཟང་ཤོས་ནི་འཇུག་པ་སེམས་བསྐྱེད་དེ་ཡིན།

དེ་བཞིན་སྨོན་པ་སེམས་བསྐྱེད་ཡོད་ན་གོང་དུ་བཤད་པའི་ཕན་ཡོན་ཆ་ཚང་ཐོབ་ཀྱང་། འཇུག་པ་སེམས་བསྐྱེད་རྒྱུད་ལ་སྐྱེ་བ་ནས་བཟུང་སྟེ། དངོས་སུ་དགེ་བ་མ་བསྒྲུབས་པར་བག་མེད་པར་གྱུར་པ་དང་། གཉིད་ལོག་པར་གྱུར་པ། དུས་རྟག་ཏུ་དོན་མེད་འབའ་ཞིག་ལ་གཡེང་ན་ཡང་། དགེ་བ་དེ་རྒྱུན་ཆགས་སུ་གོང་ནས་གོང་དུ་ཆུ་ཀླུང་ཆེན་པོའི་རྒྱུན་བཞིན་རང་གི་རྒྱུད་ལ་འཕེལ་ཡོང་བ་ཡིན། འཇུག་པ་སེམས་བསྐྱེད་ཀྱི་ཕན་ཡོན་ནི་ནམ་མཁའི་ཁམས་ལ་ཡང་མི་ཤོང་བ་ལྟ་བུའི་བསམ་གྱིས་མི་ཁྱབ་པ་ཞིག་ཡིན། དེས་ན་སྨོན་འཇུག་གཉིས་ལས་གཙོ་བོ་འཇུག་པ་སེམས་བསྐྱེད་འདི་ལ་བསླབ་དགོས།

བྱང་ཆུབ་ཀྱི་སེམས་ཞེས་པ་ལ་དེ་ལྟ་བུའི་ཕན་ཡོན་རྒྱ་ཆེན་པོ་ཡོད་པའི་རྒྱུ་མཚན་ཅི་ཡིན་ཞེ་ན། དཔེར་ན། ནམ་མཁའ་སྟོང་པ་འདིས་མ་ཁྱབ་ས་ཞིག་མེད། འདིས་ཁྱབ་ཚད་ལ་སེམས་ཅན་གྱིས་ཁྱབ་ཡོད། དེ་དག་རེ་རེ་བཞིན་དུ་བདེ་བ་དང་ལྡན། སྡུག་བསྔལ་དང་བྲལ་ན་སྙམ་པའི་བསམ་པ་སྐྱེས། ལག་ལེན་དུ་ཡང་དེ་དག་བདེ་ཐབས་སྐྱིད་ཐབས་ལ་བརྩོན་པར་བྱས་ན། དེ་ལ་ཕན་ཡོན་གཞལ་དུ་མེད་པ་ཞིག་ཡོད་པ་ནི་རྗེས་སུ་དཔག་པ་ལས་ཀྱང་ཤེས་ཐུབ།

འོ་ན་བསམ་པ་བཟང་པོས་སེམས་ཅན་ཐམས་ཅད་བདེ་སྐྱིད་དང་ལྡན་ན་སྙམ་པའི་བསམ་པ་རྐྱང་བ་ཙམ་ལ་དེ་འདྲའི་ཕན་ཡོན་ཅིའི་ཕྱིར་ཡོད་སྙམ་ན། དེ་ལ་ཕན་ཡོན་ཡོད་པའི་རྒྱུ་མཚན་ཞིག་ངོ་སྤྲད་རྒྱུ་ཡོད་དེ། སྔོན་བསྐལ་པ་མང་པོ་ཞིག་གི་སྔོན་རོལ་ན། དེད་དཔོན་མཛའ་བོའི་བུ་མོ་ཞེས་པ་དེ་ལས་ཀྱི་དབང་གིས་ངན་སོང་དུ་སྐྱེས། ཁོ་འཇིག་རྟེན་མི་ཡུལ་དུ་སྡོད་པའི་སྐབས་སུ་མ་ལ་རྡོག་ཐོས་བསྣུན་པའི་རྣམ་སྨིན་གྱིས་ཀླད་པ་ལ་ལྕགས་ཀྱི་འཁོར་ལོ་ཟུག་ནས་འཁོར་བ་ཡིན། དེ་དུས་ཁོའི་བསམ་པ་ལ་འདི་ལྟ་བུའི་སྡུག་བསྔལ་མྱོང་བཞིན་ཡོད་པའི་སེམས་ཅན་དེ་དག་སྙིང་རེ་རྗེ། འདི་དག་གི་སྡུག་བསྔལ་མེད་སོང་ན་ཅི་མ་རུང་སྙམ་པའི་བསམ་པ་བཟང་པོ་ཞིག་སྐྱེས་མ་ཐག་ཏུ། ཀླད་པའི་འཁོར་ལོ་དེ་ནམ་མཁར་ཡལ་ནས་ཁོ་རང་བདེ་བ་དང་ལྡན་པར་གྱུར་པ་ཡིན།

སེམས་ཅན་གཅིག་ཙམ་སྡུག་བསྔལ་དང་བྲལ་ན་བསམ་པ་ལ་ཡང་དེ་ལྟ་བུའི་ཕན་ཡོན་དཔག་ཏུ་མེད་པ་ཞིག་ཡོད་ན། ནམ་མཁས་གར་ཁྱབ་ཀྱི་སེམས་ཅན་ཐམས་ཅད་བདེ་བ་དང་ལྡན་ཞིང་སྡུག་བསྔལ་དང་བྲལ་བར་འདོད་ན་ཕན་ཡོན་དཔག་ཏུ་མེད་པ་ཡོད་པ་སྨོས་མ་དགོས་པ་ཡིན།

བྱང་ཆུབ་སེམས་ཀྱི་ཕན་ཡོན་ནི་དུས་གསུམ་གྱི་སངས་རྒྱས་ཐམས་ཅད་ལ་ལོ་དུང་ཕྱུར་མང་པོའི་བར་དུ་རིན་པོ་ཆེ་དང་། ཟས། རྒྱན་ཆ་ལ་སོགས་རྣམ་པ་སྣ་ཚོགས་ཀྱིས་མཆོད་པ་ཕུལ་བ་ལས། སེམས་ཅན་ཐམས་ཅད་སངས་རྒྱས་ཀྱི་གོ་འཕང་འཐོབ་པར་གྱུར་ཅིག་སྙམ་པའི་བསམ་པ་བཟང་པོ་འདི་ལན་ཅིག་སྐྱེས་ན་དེ་ཉིད་ཀྱི་ཕན་ཡོན་ཆེ་བ་ཡིན།

མཇུག་རང་གཞན་དགའ་བ་སྒོམ་པ།

དེས་ན་འདི་ལྟ་བུའི་བྱང་ཆུབ་ཀྱི་སེམས་དེ་ནི། རྙེད་པར་དཀའ་བ་ཡིད་བཞིན་གྱི་ནོར་བུ་ལྟ་བུ་ཡིན། ཡིད་བཞིན་གྱི་ནོར་བུ་ཟེར་བ་ནི་སྔོན་བསྐལ་པ་བཟང་པོའི་དུས་སུ་ཡོད་ཀྱང་དེང་སང་མཐོང་རྒྱུ་མེད། འཁོར་ལོས་བསྒྱུར་བའི་རྒྱལ་པོ་འཇིག་རྟེན་གྱི་ཁམས་སུ་བྱོན་དུས་ཡིད་བཞིན་གྱི་ནོར་བུ་ཟེར་བ་དེ་འབྱུང་ལ། དེས་དཔག་ཚད་རེ་རེར་ཡང་ཟས་འདོད་པ་ལ་ཟས་དང་། གོས་འདོད་པ་ལ་གོས། ནོར་འདོད་པ་ལ་ནོར་གྱི་ཆར་བ་འབེབ་པར་བྱེད་ཀྱང་། མི་དབུལ་པོ་ཞིག་གིས་ནི་རྙེད་མི་སྲིད་པ་ཡིན།

དེ་ལས་ཀྱང་རྙེད་པར་དཀའ་བའི་བྱང་ཆུབ་ཀྱི་སེམས་རིན་པོ་ཆེ་འུ་ཅག་གི་རྒྱུད་ལ་སྐྱེས་པ་འདིར། ང་རེ་དགའ་ལ་ང་རེ་སྤྲོ་སྙམ་པའི་དགའ་སྤྲོ་བསྒོམ་དགོས། དེ་ལྟར་དུ་རང་གིས་དགའ་བ་སྒོམ་བཞིན་ཚིག་འདི་རྗེས་ཟློས་གྱིས།

དེང་དུས་བདག་ཚེ་འབྲས་བུ་ཡོད། །མི་ཡི་སྲིད་པ་ལེགས་པར་ཐོབ། །

དེ་རིང་སངས་རྒྱས་རིགས་སུ་སྐྱེས། །སངས་རྒྱས་སྲས་སུ་ད་གྱུར་ཏོ། །

ད་ནི་བདག་གིས་ཅི་ནས་ཀྱང་། །རིགས་དང་མཐུན་པའི་ལས་བརྩམས་ཏེ། །

སྐྱོན་མེད་བཙུན་པའི་རིགས་འདི་ལ། །རྙོག་པར་མི་འགྱུར་དེ་ལྟར་བྱ། །

ལོང་བས་ཕྱག་དར་ཕུང་པོ་ལས། །ཇི་ལྟར་རིན་ཆེན་རྙེད་པ་ལྟར། །

དེ་བཞིན་ཅི་ཞིག་ལྟར་སྟེས་ནས། །བྱང་ཆུབ་སེམས་ནི་བདག་ལ་སྐྱེས། །

དེ་ནས་གཞན་དགའ་བ་སྒོམ་པ་ཟེར་བ་ནི། འཇིག་རྟེན་གྱི་ཁམས་ན་ལྷ་ཀླུ་སྡེ་བརྒྱད་མི་མ་ཡིན་ལ་སོགས་པ་མཐུ་བོ་ཆེ་ཁྱེད་རྣམས་ཀྱིས་དགའ་བ་སྒོམས་ལ་སྤྲོ་བར་གྱིས། ང་ལ་མཐུན་རྐྱེན་སྡོང་གྲོགས་སྒྲུབས་དང་། ངས་ཁྱེད་ཅག་ཚང་མ་འཁོར་བའི་སྡུག་བསྔལ་ལས་བསྒྲལ་ནས་སངས་རྒྱས་ཀྱི་གོ་འཕང་ལ་དགོད་པར་བྱ་ཞེས་ཁས་བླངས་ཤིང་དམ་བཅས་ཚར་བ་ཡིན་པས། ཁྱེད་ཅག་གིས་དགའ་བ་སྒོམས་ཤིག་ཅེས་འཇིག་རྟེན་ཁམས་ཀྱི་མི་མ་ཡིན་ཐམས་ཅད་ལ་དེ་ལྟར་བསྒྲགས་དགོས་པ་ཡིན། ཁྱད་པར་དུ་འུ་ཅག་ཧཱ་ཝ་ཡེ་ཡི་ཡུལ་ཁམས་འདི་ལ་དབང་བསྒྱུར་བའི་ལྷ་མོ་འཇིགས་བྱེད་དྲག་མོ་（Goddess of Volcanoes and Fire:Pele）ཞེས་སྐུ་ལ་མེ་འབར་གྱིན་ཡོད་པ་དེ་གཙོ་བོར་གྱུར་པའི་སྣང་སྲིད་ཀྱི་ལྷ་འདྲེ་དྲེགས་པ་ཅན་ཐམས་ཅད་དགའ་བར་གྱིས་ལ་སྤྲོ་བར་གྱིས་དང་། ངས་ཁྱེད་རྣམས་ལ་འགལ་སྤོང་མཐུན་སྒྲུབ་ཀྱི་ཐབས་ལ་བརྩོན་པར་བྱེད་ལ། ཁྱེད་རྣམས་ཀྱིས་ཀྱང་ཡུལ་ཁམས་འདི་ལ་ཁ་འཛིན་སྡོང་གྲོགས་དང་། སྒོས་སུ་ངས་བྱང་ཆུབ་བསྒྲུབ་པ་ལ་ཁ་འཛིན་སྡོང་གྲོགས་གྱིས་སྙམ་པའི་སྒོ་ནས་རྗེས་ཟློས་བྱེད་དགོས་པ་ཡིན།

བདག་གིས་དེ་རིང་སྐྱོབ་པ་ཐམས་ཅད་ཀྱི། །

སྤྱན་སྔར་འགྲོ་བ་བདེ་གཤེགས་ཉིད་དང་ནི། །

བར་དུ་བདེ་ལ་མགྲོན་དུ་བོས་ཟིན་གྱིས། །

ལྷ་དང་ལྷ་མིན་ལ་སོགས་དགའ་བར་གྱིས། །

བྱང་ཆུབ་སེམས་མཆོག་རིན་པོ་ཆེ། །

མ་སྐྱེས་པ་རྣམས་སྐྱེ་གྱུར་ཅིག །

སྐྱེས་པ་ཉམས་པ་མེད་པར་ཡང་། །

གོང་ནས་གོང་དུ་འཕེལ་བར་ཤོག །

རྗེ་ཉིད་ཀྱིས་དེ་ལྟར་གསུངས་པའི་སྡོམ་ཆོག་འདི་ཆེས་རིན་ཐང་ཆེ་ཞིང་། བྱང་སྡོམ་གྱི་མན་ངག་དང་འབོགས་ཆོག་སོགས་གནད་འདུས་ལ་ལག་ལེན་སླ་བ་ཡིན་པས། རང་གིས་ཉམས་སུ་ལེན་པའམ་གཞན་ལ་གནང་ནའང་ཕན་པ་ཤིན་ཏུ་ཆེ་བར་སྣང་།

སྐབས་འདིར་མང་པོ་ཞིག་གིས་ཆོས་ཁྲིད་ཀྱི་ནང་དོན་སྐོར་ལ་དྲི་བ་འགའ་རེ་ཡོད་ཟེར་བས། འདི་ལྟར་དྲི་བ་དྲིས་ལན་གྱི་གོ་སྐབས་ཤིག་ཀྱང་གནང་བྱུང་།

དྲི་བ། དཀོན་མཆོག་གསུམ་ལ་སྐྱབས་སུ་འགྲོ་སྟངས་དེ་ཤེས་མ་སོང་བས། དེ་གཅིག་གསུངས་རོགས་གནོངས།

ལན། དཀོན་མཆོག་གསུམ་ལ་སྐྱབས་སུ་འགྲོ་ཚུལ་ནི། སྟོན་པ་ནི་སངས་རྒྱས་ཁོ་ན་དང་། རང་གིས་བསྒྲུབ་རྒྱུ་དེ་ནི་དམ་པའི་ཆོས་ཁོ་ན། གྲོགས་ནི་འཕགས་པའི་དགེ་འདུན་པ་ཁོ་ན་ཡིན་ཞིང་། དེ་དག་ཁོ་ནར་བསྟེན་བསམ་རྒྱུའི་དམ་བཅའ་བ་ནི་སྐྱབས་སུ་འགྲོ་བ་ཡིན།

དྲི་བ། འཇུག་པ་སེམས་བསྐྱེད་སྐོར་གྱི་ཕར་ཕྱིན་དྲུག་ལས། སྦྱིན་པ་དང་ཚུལ་ཁྲིམས། བཟོད་པ་གསུམ་གསུངས་སོང་། བརྩོན་འགྲུས་དང་བསམ་གཏན། ཤེས་རབ་ཀྱི་སྐོར་དེ་གང་འདྲ་ཡིན་ཚུལ་གསུང་རོགས།

ལན། བརྩོན་འགྲུས་ནི་དགེ་བར་སྤྲོ་བ་དང་། བསམ་གཏན་ནི་སེམས་གཞན་དུ་མི་གཡེང་བ། ཤེས་རབ་ནི་སྟོང་ཉིད་རྟོགས་པའི་བློ་ལ་ཟེར་བ་ཡིན།

དྲི་བ། ཐེག་པ་ཞེས་པའི་དོན་གང་ཡིན། མཚན་ཉིད་ཐེག་པ་དང་རྡོ་རྗེ་ཐེག་པ་གཉིས་ཀྱི་དོན་སོ་སོར་གསུང་རོགས་ཞུ།

ལན། ཐེག་པ་ཞེས་པ་སྤྱིར་ཡར་འདེགས་ནུས་པའི་དོན་ལ་གོ་ཞིང་། དེ་ལ་འདིས་འདེགས་པ་རྒྱུ་ཡི་ཐེག་པ་ཞེས་དང་པོ་རྒྱུ་ལ་བརྟེན་ནས་འདེགས་པ་དང་། འདིར་འདེགས་པ་འབྲས་བུའི་ཐེག་པ་ཞེས་འདེགས་འགྲོ་སའི་ཡུལ་དེ་ལ་འབྲས་བུའི་ཐེག་པ་ཟེར་བ་ཡིན། སྡུད་པ་ལས། ཐེག་པ་འདི་ནི་མཁའ་འདྲ་གཞལ་མེད་ཁང་ཆེན་ཏེ། །དགའ་སྐྱིད་བདེ་བ་མངོན་པར་འཐོབ་བྱེད་ཐེག་པའི་མཆོག །དེ་གང་ཞོན་ནས་སེམས་ཅན་ཐམས་ཅད་མྱ་ངན་ཟློ། །ཞེས་ཐེག་པའི་སྒྲ་དོན་དང་བཅས་གསུངས་པ་ལྟ་བུ་ཡིན། མདོ་མཚན་ཉིད་ཐེག་པ་ནི། ད་ལྟ་སངས་རྒྱས་མ་ཡིན་པ་ཞིག་གིས་སངས་རྒྱས་ཀྱི་ལམ་ལ་བསླབ་ནས་གཟོད་སངས་རྒྱས་ཐོབ་པ་སྟེ་གཞི་དང་འབྲས་བུ་གཉིས་ཐ་དད་དུ་འདོད། རྡོ་རྗེའི་ཐེག་པས་ནི་སེམས་ཅན་རྣམས་གཞི་ནས་སངས་རྒྱས་ཡིན་པ་ལ་ཡིན་པར་ངོ་ཤེས་པ་ཙམ་ལ་འབྲས་བུའི་ཐེག་པ་ཞེས་ཟེར་ཞིང་། གཞི་འབྲས་གཉིས་ཀ་སོ་སོར་དབྱེར་མེད་པར་འདོད་པ་ཡིན།

དྲི་བ། ཁྱེད་ས་ཆ་འདིར་ཕེབས་པར་ཕྲན་དགའ་སྤྲོ་ཆེན་པོ་སྐྱེས་སོང་། དེང་སང་བོད་ཀྱི་ལུང་པ་ལ་དབང་སྒྱུར་པ་དག་གིས་སྡུག་པོ་གཏོང་བ་སོགས་རྙོག་དྲ་འདྲ་མིན་འབྱུང་བཞིན་ཡོད་ཅེས་གོ་བྱུང་། སྤྱིར་གང་ན་ཡང་རྙོག་དྲ་ཕྲན་བུ་ཙམ་རེ་ཡོད་ཀྱང་། བོད་ཀྱི་ལུང་པ་ན་ནང་པའི་ཆོས་རྒྱ་ཆེར་དར་ཞིང་། ས་ཆ་བྱིན་རླབས་ཅན་རེད། མི་ཐམས་ཅད་བྱང་ཆུབ་སེམས་རྒྱུད་ལྡན་ཡིན་ན། དེ་འདྲའི་རྙོག་དྲ་དེ་ཇི་ལྟར་བྱུང་ཡོང་བ་ཡིན་ནམ།

ལན། བྱང་ཆུབ་སེམས་དཔའ་ལ་དེ་ལྟ་བུའི་རྙོག་དྲའམ་གཞན་གྱི་གནོད་པ་བསྐྱལ་བ་ཤིན་ཏུ་ཉུང་ཞིང་། གལ་ཏེ་ཡོད་ནའང་ཧ་ཅང་དགའ་བ་བསྒོམ་སའི་ཡུལ་ཡིན་ཏེ། བདག་ཅག་གི་སྟོན་པ་ཐུགས་རྗེ་ཅན་གྱིས་ཐེངས་མང་པོར་རང་གི་དབུའང་སེམས་ཅན་རྣམས་ལ་སྦྱིན་པ་བཏང་མྱོང་བས་དེ་ཡང་སེམས་ཅན་གྱི་དོན་རེད། དེའི་རྒྱུ་མཚན་གཞན་ཤེས་པར་འདོད་ན་མང་པོ་གླེང་རྒྱུ་ཡོད་ཀྱང་དེ་ཙམ་གྱིས་ཆོག་པར་བྱ།

དྲི་བ། བྱང་ཆུབ་ཀྱི་སེམས་དེ། སེམས་ཤིག་རེད་དམ། ལུས་དང་འབྲེལ་བ་ཡོད་པ་ཞིག་རེད།

ལན། བྱང་ཆུབ་གྱི་སེམས་དེ་སེམས་ཡིན་ལ། འུ་ཅག་གི་ལུས་འདི་ཡོད་པའི་རིང་ལ་ལུས་པོ་དང་འབྲེལ་བ་ཡོད་པ་རེད།

འཇམ་དཔལ་གྱིས་གནང་བའི་འཇམ་དཔལ།

ཕྱི་ཟླ་༦པའི་ཚེས་༡༨ཉིན་གྱི་སྔ་དྲོའི་ཆོས་ཁྲིད་དང་བྱང་སྡོམ་གསུངས་རྗེས། མ་གཞི་ཕྱི་དྲོའི་དུས་སུ་ཆོས་རྗེ་ཉིད་ཀྱིས་ངལ་གསོས་ཏེ་དུས་ཁྱད་སྙོམ་སྒྲིག་བྱ་དགོས་ཀྱང་། མཇལ་ཁ་དང་བྱིན་རླབས་ཞུ་རུ་ཡོང་བའི་མི་མང་བས་ཁོང་གིས་མི་རེ་རེ་བཞིན་གྱི་འདོད་པ་བསྐངས་ལ། ཁྱད་པར་དུ་ནུབ་ཕྱོགས་པ་དག་དྲི་བ་འདྲི་བར་དགའ་པོ་ཡོད་པས། ཆོས་རྗེ་ཉིད་དང་བླ་རུང་། བོད་ཡུལ་སོགས་དང་འབྲེལ་བའི་དྲི་བ་མང་པོ་དྲིས།

བདག་གི་དྲན་པའི་ཡོལ་བའི་ངོས་སུ་རྗེ་ཉིད་ལ་མི་ཞིག་གིས་འདི་ལྟར་དྲིས་པ་འཆར་ཡོང་སྟེ། ཁྱེད་ཉིད་རིག་གསར་གྱི་དུས་སུ་བོད་ཡུལ་དུ་སྒྲུབ་ཕུག་གི་ནང་དུ་སྐུ་མཚམས་ལ་བཞུགས་སྐབས་དམར་སྲུང་དམག་མི་རྣམས་ཀྱིས་ཕྱིར་དྲུད་པ་ན། ཁྱེད་ཀྱི་སྐུ་ལུས་ཇེ་ཆེ་དང་ཇེ་ལྕིར་སོང་ནས་འདྲུད་མ་ཐུབ་པ་རེད་ཟེར་བ་ཐོས་པས། ཁྱེད་ཀྱིས་དེ་ཇི་ལྟར་བྱས་པ་ཡིན་ཞེས་དྲིས་པ་ལ། རྗེ་ཉིད་ཀྱིས། དེ་ནི་ཁོ་རང་ཚོར་དེ་ལྟར་སྣང་བ་ཙམ་རེད། བདག་གིས་ཁོ་ཚོ་དང་མཉམ་དུ་རྩེད་མོ་བརྩེས་པ་ཙམ་ཡིན་ཞེས་གསུངས།

དེར་མཱེས་ཀཱེལ་（Miguel Schwabe）ཞེས་པའི་ནུབ་ཕྱོགས་པ་ཞིག་ཡོད་ཅིང་། ཁོང་ནི་གནས་ཆུང་དགོན་ནས་ངེད་ཅག་ལ་སྣེ་ལེན་བྱེད་མཁན་གཙོ་བོ་ཞིག་ཡིན་ལ་བོད་སྐད་ཀྱང་ཉུང་ཙམ་ཤེས། རྗེ་ཉིད་ལ་ཆོས་ཁྲིད་མེད་སྐབས། ཁོ་རང་རྒྱུན་དུ་སྐུ་མདུན་དུ་བཅར་ནས་གླེང་མོལ་བྱེད་ཅིང་དྲི་བ་སྣ་ཚོགས་འདོན་གྱིན་ཡོད་པར་མ་ཟད། སྐབས་དེར་ཆོས་རྗེ་ཉིད་ཀྱིས་མི་དེར་གྲུབ་རྟགས་ཤིག་ཀྱང་བསྟན་མྱོང་ཞེས་བདག་གིས་ཐོས་པས། རྗེས་སུ་ངས་དོན་དེ་བདེན་མིན་རྩར་གཅོད་པར་མི་ཞིག་ཆེད་དུ་མངགས་ཤིང་། དེས་ཕྱི་ལོ་༢༠༡༧ལོའི་ཟླ་༡༠པའི་ཚེས་༢༠ཉིན་མཱེས་ཀཱེལ་ལ་བཅར་འདྲི་བྱས་པའི་ནང་དོན་ཡི་གེར་བཀོད་པ་གཤམ་གསལ་ལྟར།

བདག་གིས་ཆོས་རྗེ་རིན་པོ་ཆེ་ལ། ཁྱེད་རྣམས་རྒྱ་ནག་རི་བོ་རྩེ་ལྔ་རུ་བྱོན་པ་དེ་ཇི་ལྟར་ཡིན་ཞེས་དྲིས་པ་ན། ཁོང་གིས། སྐབས་དེར་མི་ཧ་ཅང་མང་པོ་ཡོད་ཅིང་། མི་རྣམས་ཀྱིས་ངེད་ཅག་རི་བོ་རྩེ་ལྔ་ལ་གནས་མཇལ་དུ་འགྲོ་བ་ཐོས་པས། ལམ་བར་ནས་མེ་འཁོར་དུ་ཞུགས་མཁན་ཡང་ཇེ་མང་ནས་ཇེ་མང་དུ་སོང་སྟེ་ཉེན་རྟོག་པ་རྣམས་ཀྱང་བྲེལ་འཚུབ་ཆེན་པོ་ལངས་དགོས་ཐུག ཚང་མ་ང་དང་མཉམ་དུ་གནས་མཇལ་དང་གནས་སྐོར་ལ་འགྲོ་འདོད་པ་ཙམ་ལས། སྐབས་དེར། རྒྱ་ནག་གི་མི་རྣམས་བོད་བརྒྱུད་ནང་བསྟན་ལ་རྒྱུས་ལོན་དེ་ཙམ་མེད། བདག་ས་ཆ་མང་པོར་འགྲོ་མ་འདོད་པར་མཚམས་ལ་བསྡད་པ་ཡིན་གསུངས།

ངས་ཁོང་ལ་ཁྱེད་ཀྱིས་འཇམ་དཔལ་དབྱངས་མཇལ་ཨེ་བྱུང་ཞེས་དྲིས་པར། ཁོང་གིས། མཇལ་བྱུང་། ངས་ནོར་བཟང་ཕུག་པ་ནས་མཚམས་གྲོལ་ལ་ཉེ་ཁར་འཇམ་དཔལ་དབྱངས་དངོས་སུ་མཇལ་བྱུང་ལ། སྐབས་དེའི་མཚམས་སྒྲུབ་ལ་གྲུབ་འབྲས་ཧ་ཅང་ཡག་པོ་ཐོབ་སོང་ཞེས་གསུངས།

ངས་འཇམ་དཔལ་དབྱངས་ཀྱིས་ཁྱེད་ལ་ཅི་ཞིག་གནང་བྱུང་ཞེས་དྲིས་ཚེ། ཁོང་གིས། གནང་བྱུང་ཡ་ཞེས་གསུང་ཞོར་དུ་ཕྱག་གིས་དབུ་ལ་ཉུག་ཉུག་མཛད་ནས། ཆེ་ཆུང་མཐོ་གང་ཙམ་གྱི་སྐུ་ཆེན་པོ་ཞིག་ཕྱག་ཏུ་བླངས་བྱུང་། དེ་ནི་ཁོང་གིས་ཁུག་མའི་ནང་ནས་བཙལ་བ་མ་ཡིན་ལ། ཅོག་ཙེའི་སྟེང་ནས་བླངས་པའང་མིན་པར་དབུ་ལ་ཉུག་ཉུག་བྱེད་སྐབས། གློ་བུར་དུ་ནམ་མཁའ་ནས་འཇམ་དཔལ་དབྱངས་ཀྱི་སྐུ་ཞིག་བླངས་བྱུང་བ་བདག་གིས་མངོན་སུམ་དུ་མཐོང་བྱུང་།

ཁོང་གིས་སྐུ་དེ་ང་ལ་གཏད་པ་ན། ངས་ལག་པ་གཉིས་ཀྱིས་བླངས་ནས་མགོ་ཐོག་ཏུ་གཏུག་ཙམ་བྱས་ཏེ། མིག་གཉིས་མ་བཙུམ་པར་གཟབ་ནན་གྱིས་སྐུ་དེར་རྩེ་གཅིག་ཏུ་བལྟས་ཤིང་། འདི་ནི་ཆེས་དམིགས་བསལ་བ་ཞིག་སྟེ། ང་ལ་འཇམ་དཔལ་དབྱངས་དངོས་ཀྱིས་གནང་བའི་འཇམ་དཔལ་དབྱངས་ལག་ཏུ་ལེན་པའི་སྐལ་བ་ཐོབ་པ་ནི། ཅི་འདྲའི་བསོད་ནམས་བཟང་བ་ལ་ཨང་སྙམ་བཞིན་སེམས་པ་ཤིན་ཏུ་དགའ་བའི་ངང་སྐུ་དེར་ཞིབ་ཏུ་མཇལ་བ་ན། དེའང་སྤུས་ཀ་དང་བཟོ་བཀོད་ཤིན་ཏུ་ལེགས་ཤིང་། ལག་ཏུ་བླངས་ན་ལྗིད་ཏིག་གེར་ཡོད་པས་འཁྲུལ་བའི་སྣང་བ་ནི་མིན་ཐག་ཆོད་ཡིན། ངས་དེ་ལྟར་སྐར་མ་གསུམ་བཞི་ཙམ་ལ་མཇལ་ནས་སླར་ཆོས་རྗེ་རིན་པོ་ཆེའི་ཕྱག་ཏུ་གཏད་པ་ན། དེ་ཉིད་ཁོང་གི་ཕྱག་ནས་གློ་བུར་དུ་འཇའ་ཡལ་བ་ལྟར་མི་སྣང་བར་གྱུར་སོང་།

གནས་ཚུལ་དེ་དངོས་སུ་མཐོང་སྐབས་ངའི་ཡིད་ལ། འདི་རྫུ་འཕྲུལ་དང་གྲུབ་རྟགས་བསྟན་པ་ཡིན་ནམ་སྙམ། སྔོན་ཆད་བདག་གིས་བླ་མ་ལ་ལ་མཚམས་ལ་བཞུགས་སྐབས་གྲུབ་རྟགས་བསྟན་པ་འགའ་ཞིག་མཐོང་མྱོང་ཡང་། ཆོས་རྗེ་རིན་པོ་ཆེའི་ཚུལ་འདི་ནི་གཞན་དང་མི་འདྲ་བར་ཆེས་ཧ་ལས་ཤིང་ངོ་མཚར་བའི་གནས་སུ་གྱུར་པ་ཞིག་རེད། དེ་ནི་ཁོང་གཏེར་ཆེན་ལས་རབ་གླིང་པ་དང་འབྲེལ་བ་ཡོད་པས་ཡིན་ཤས་ཆེ།

ད་ལྟ་གནས་ཚུལ་དེ་འདྲ་མཇལ་རྒྱུའི་གོ་སྐབས་མང་པོ་མེད་པས། ང་ནི་ཤིན་ཏུ་སྐལ་བ་བཟང་པོ་དང་ལྡན་པ་ཡིན་སྙམ་བཞིན་ཡོད། ཅེས་ཟེར།

ནུབ་ཕྱོགས་ཀྱི་མི་རྣམས་ནི་ཆུང་དུས་ནས་དྲང་བདེན་དང་དངོས་ཐོག་བདེན་འཚོལ་གཙོ་བོར་བྱེད་པ་ཡིན་པས། དོན་འདི་ནི་སྒྲོ་བཏགས་པ་ཙམ་མིན་པར་ཡིད་ཆེས་ནས་ཡི་གེར་བཀོད་པ་ཡིན།

རྫོགས་ཆེན་གྱི་རྣམ་གཞག་ངོ་སྤྲོད།

ཆོས་རྗེ་ཉིད་ཀྱིས་ཆོས་ཁྲིད་སྐབས་སུ། བོད་བརྒྱུད་ནང་བསྟན་གྱི་ཟབ་ཆོས་གཉིས་ནི་བྱང་ཆུབ་ཀྱི་སེམས་དང་རྫོགས་པ་ཆེན་པོ་ཡིན་པར་གསུངས་པ་ལས། བྱང་ཆུབ་སེམས་ཀྱི་སྐོར་ནི་སྔ་དྲོའི་བྱང་སྡོམ་གནང་སྐབས་རྒྱས་པར་ངོ་སྤྲོད་གནང་ཟིན་ལ། འཇམ་དཔལ་ཞི་སྒྲུབ་ཀྱི་དབང་དང་ཁྲིད་ཡིག་སངས་རྒྱས་ལག་སྟེར་སོགས་རྫོགས་པ་ཆེན་པོའི་སྐོར་དེ་ཉིན་གཉིས་པ་ནས་བཟུང་སྟེ་གསུང་རྩིས་ཡིན་ཡང་། རྫོགས་པ་ཆེན་པོའི་ཆོས་ལ་རྒྱུས་ལོན་ནམ་དང་བ་སྐྱེ་བའི་ཕྱིར་དུ་ཐམས་ཅད་ལ་དགོང་མོའི་དུས་སུ་འདི་ལྟར་གསུང་།

དེ་ཡང་ཕྱི་རོལ་མུ་སྟེགས་པ་དང་ནང་པ་སངས་རྒྱས་པ་གང་དང་གང་ཡིན་ནའང་། ཐོག་མར་ཆོས་འཆད་ཉན་དང་སྒོམ་སྒྲུབ་ཀྱི་དུས་སུ་རང་གང་མོས་ཀྱི་ལྷ་ལ་ཕྱག་འཚལ་བ་དང་མཆོད་པར་བརྗོད་པ་སྔོན་དུ་འགྲོ་བ་དེ་ནི་གྲུབ་མཐའ་འཛིན་པ་སྤྱིའི་འགྲོ་ལུགས་ཡིན་པ་ལྟར། ད་ལྟ་བདག་གིས་ཀྱང་རང་གི་ལྷག་པའི་ལྷ་ལ་ཕྱག་འཚལ་བ་དང་མཆོད་པར་བརྗོད་པ། གདུལ་བྱ་རྣམས་ལ་ཆོས་ཀྱི་འཁོར་ལོ་བསྐོར་བར་དམ་བཅས་པ་རྣམས་སྔོན་དུ་སོང་བ་རེད།

ནང་པ་སངས་རྒྱས་པའི་ཐེག་ཆེན་ཐུན་མོང་མ་ཡིན་པའི་ལུགས་སྲོལ་འདི་ལ། ཆོས་འཆད་ཉན་སྒོམ་སྒྲུབ་གང་གི་དུས་སུ་ཡང་། ད་ནངས་བཤད་ཟིན་པ་ལྟར་བྱང་ཆུབ་མཆོག་ཏུ་སེམས་བསྐྱེད་པ་ནི་དུས་རྒྱུན་མེད་དུ་མི་རུང་བ་ཡིན་ལ། ཆོས་ཉན་སྟངས་ཀྱི་ཆ་ནས་ནི། བདག་གིས་སེམས་ཅན་ཐམས་ཅད་སངས་རྒྱས་ཀྱི་གོ་འཕང་ལ་དགོད་པར་བྱ་བའི་ཆེད་དུ་ཆོས་འདི་ཉན་པ་ཡིན་སྙམ་པའི་ཀུན་སློང་སྔོན་དུ་སོང་ནས་མཉན་དགོས།

དེ་ལྟར་ཆོས་ཉན་པ་ལ་སེམས་ཅན་ཐམས་ཅད་སངས་རྒྱས་འཐོབ་བྱེད་ཀྱི་ནུས་པ་ཇི་ལྟར་ལྡན་ནམ་སྙམ་ན། དེ་ལ་བཅོམ་ལྡན་འདས་ཀྱིས། སྒྲུབ་པ་ལོ་དགུར་བྱེད་པ་ལས་ཆོས་ལན་གཅིག་འཆད་ཉན་བྱས་པའི་ཕན་ཡོན་ཆེ་ཞེས། འུ་ཅག་གིས་སྒོམ་སྒྲུབ་ཉམས་ལེན་ལོ་དགུར་བྱས་པ་ལས། བླ་མའི་དྲུང་ནས་ཆོས་ཉན་ཞིང་དེའི་དོན་ལ་སེམས་པ་ཕན་ཡོན་ཆེ་བར་གསུངས་པས། སེམས་ཅན་གཞན་གྱི་དོན་སྒྲུབ་པར་བྱེད་པ་ལ་ཆོས་མཉན་རྒྱུ་དེ་ཅི་ནས་ཀྱང་གལ་ཆེ་བ་རེད།

དེར་མ་ཟད། ཆོས་འཆད་པའི་དུས་སྟོན་པའི་ཕྱིར་དུ་ཐོག་མར་རྔ་རྡུང་བ་དང་དུང་འབུད་པ། མཁར་རྔ་རྡུང་བ་ལ་སོགས་པའི་སྒྲ་སྐད་རྣམས་དུད་འགྲོའི་སྐྱེ་གནས་སུ་གཏོགས་པའི་བྱ་བྱེའུ་རི་དྭགས་ཡན་ཆད་ཀྱི་རྣ་ལམ་དུ་ཐོས་པ་ཙམ་གྱིས་ཀྱང་ངན་སོང་གི་སྐྱེ་སྒོ་ཁེགས་ནས་ལུས་རྟེན་དམན་པའི་སྐྱེ་བ་མི་ལེན་པར་གསུངས་ན། ཆོས་དངོས་སུ་ཐོས་པ་ལ་ཕན་ཡོན་བསམ་གྱིས་མི་ཁྱབ་པ་ཡོད་པ་སྨོས་ཅི་དགོས། ཆོས་ཐོས་པས་ནི་རང་རྒྱུད་ཀྱི་མི་ཤེས་པ་དང་རྨོངས་པའི་ཆ་ཐམས་ཅད་སེལ་བར་བྱེད་པའང་ཡིན།

གཞན་ཡང་མཁས་པ་ཤེས་རབ་ཅན་དང་འཕྲད་ན། སྐྱེས་ཐམས་ཅད་ཀྱི་མཆོག་ཏུ་གྱུར་པའང་ཐོས་པ་འདི་ཉིད་ཡིན་པའི་ཕྱིར། ཚེ་འདིར་འབྱུང་བའི་ཕན་ཡོན་ཡང་བསམ་གྱིས་མི་ཁྱབ་པ་ཡོད་ཅིང་། ཚེ་ཕྱི་མར་འབྱུང་བའི་ཕན་ཡོན་ལ་བསམ་བློ་བཏང་ན། ཡར་དཀོན་མཆོག་གི་ཞིང་ས་ལ་མཆོད་པ་དུ་མ་བྱས་པ་དང་། མར་ངན་སློང་གི་སེམས་ཅན་ཐམས་ཅད་ལ་ལོ་མང་པོའི་རིང་དུ་སྦྱིན་པ་བྱས་པ་ལས། ཐོས་པ་ལན་གཅིག་བྱས་པའི་ཕན་ཡོན་ཆེ་ལ། ས་སྟེང་མ་ལུས་པ་ཐམས་ཅད་རིན་པོ་ཆེ་སྣ་བདུན་ལས་བྱས་པའི་མཆོད་རྟེན་དང་སྐུ་གཟུགས་རྣམ་པ་སྣ་ཚོགས་ཀྱིས་བཀང་བ་ལས། ཐེག་པ་ཆེན་པོའི་ཆོས་ཚིག་བཞི་གཅིག་ཉན་ན་དེའི་ཕན་ཡོན་ཆེ་བར་མདོ་སྡེ་རྣམས་སུ་གསུངས་ཡོད།

དེ་བཞིན་དུ་ཕྱོགས་བཅུའི་ཞིང་རབ་འབྱམས་པ་ན་བཞུགས་པའི་རྒྱལ་བ་དང་དེའི་སྲས་བྱང་ཆུབ་སེམས་དཔའི་ཚོགས་ཐམས་ཅད་ལ། ཉིན་རེ་བཞིན་དུ་ཡོ་བྱད་རྣམ་པ་སྣ་ཚོགས་ཀྱིས་མཆོད་པ་དང་བསྙེན་བཀུར་སྣ་ཚོགས་བྱེད་པ་ལས། ཐེག་པ་ཆེན་པོའི་ཆོས་ཚིག་བཞི་བའི་ཚིགས་སུ་བཅད་པ་གཅིག་ཉན་ན་དེའི་ཕན་ཡོན་ཆེ་ཚུལ་ཡང་མདོ་སྡེ་དང་བསྟན་བཅོས་མང་པོར་གསུངས་ཡོད། དེ་ལྟ་བུའི་ཐེག་པ་ཆེན་པོའི་ཆོས་མཉན་པ་ནི་དེ་འདྲའི་ཕན་ཡོན་ཆེན་པོ་དང་ལྡན་པའི་ཕྱིར་ན། བདག་གིས་ཆོས་འདི་ཉན་པའི་དགེ་བ་ཡིས། སེམས་ཅན་ཐམས་ཅད་བདེ་བ་དང་ལྡན་ཞིང་སྡུག་བསྔལ་དང་བྲལ་བར་གྱུར་ཅིག་སྙམ་པའི་བསམ་པ་བཟང་པོ་སྔོན་དུ་སོང་ནས་ཆོས་ལ་མཉན་དགོས་པ་ཡིན།

སྟོན་པ་བྱོན་ཚུལ།

སྐབས་སུ་བབས་པའི་འཆད་བྱའི་ཆོས་དེ་གང་ཡིན་ཞེ་ན། དེ་ཡང་བསྐལ་པ་གྲངས་མེད་པའི་སྔོན་རོལ་དུ། བདག་ཅག་གི་སྟོན་པ་ཐུགས་རྗེ་ཅན་མཉམ་མེད་ཐུབ་པའི་དབང་པོ་ཀུན་མཁྱེན་བུ་རམ་ཤིང་པ་དེ་ཉིད་སློབ་པ་ལམ་གྱི་གནས་སྐབས་ན། དེ་བཞིན་གཤེགས་པ་ཤཱཀྱ་ཐུབ་ཆེན་ཞེས་བྱ་བ་འཇིག་རྟེན་གྱི་ཁམས་འདིར་བྱོན་པ་དང་མཇལ་བས། ཁོང་གིས་དེ་ལ་མཆིལ་ལྷམ་ཟུང་གཅིག་དང་ཀ་ཤི་ཀའི་གདུགས། འགྲོན་བུ་ལྔ་བརྒྱ་བཅས་ཕུལ་ནས། སེམས་ཅན་ཐམས་ཅད་ཀྱི་དོན་དུ་བྱང་ཆུབ་སེམས་དཔའི་ལམ་ལ་བསླབ་པར་བྱའོ་ཞེས་དང་པོ་བྱང་ཆུབ་མཆོག་ཏུ་ཐུགས་བསྐྱེད་ཅིང་། རིམ་གྱིས་སྦྱིན་པ་དང་ཚུལ་ཁྲིམས། བཟོད་པ། བརྩོན་འགྲུས། བསམ་གཏན་ཏེ་དམིགས་བཅས་བསོད་ནམས་ཀྱི་ཚོགས་དང་། ཤེས་རབ་བདག་མེད་རྟོགས་པའི་ཡེ་ཤེས་ཏེ་དམིགས་མེད་ཡེ་ཤེས་ཀྱི་ཚོགས་ཏེ་ཚོགས་གཉིས་ཟུང་འབྲེལ་དུ་བསྒོམས་ནས། བསྐལ་ཆེན་གྲངས་མེད་གཅིག་ལ་ཚོགས་ལམ་དང་སྦྱོར་ལམ་སྟེ་སོ་སོའི་སྐྱེ་བོའི་ལམ་གཉིས་བགྲོད་པར་མཛད། དེ་ནས་བསྐལ་ཆེན་གྲངས་མེད་གཅིག་གིས་ཚོགས་བསགས་སྒྲིབ་པ་སྦྱངས་བའི་ལག་རྗེས་ལ། མཐོང་ལམ་རབ་ཏུ་དགའ་བའི་ཡེ་ཤེས་ཞེས་བྱ་བ་དང་སྒོམ་ལམ་གྱི་མ་དག་ས་བདུན་རིམ་བཞིན་བགྲོད་པར་གྱུར། དེ་ནས་བསྐལ་ཆེན་གྲངས་མེད་གཅིག་གི་རིང་ས་བརྒྱད་པ་དང་དགུ་པ། བཅུ་པ་སྟེ་དག་པ་ས་གསུམ་ཐོབ་པར་གྱུར།

ས་བཅུའི་རྒྱུན་མཐའ་ལ་དགའ་ལྡན་ལྷའི་གནས་སུ་ལྷའི་བུ་དམ་པ་ཏོག་དཀར་པོ་ཞེས་བྱ་བའི་སྐྱེ་བ་བཞེས་ནས། དགའ་ལྡན་པའི་ལྷ་རྣམས་ལ་ཆོས་ཀྱི་འཁོར་ལོ་རྒྱ་ཆེར་བསྐོར་བར་མཛད། དེ་ནས་ས་མོ་ལུག་གི་ལོའི་བོད་ཟླ་དྲུག་པ་དབྱར་འབྲིང་ཆུ་སྟོད་ཟླ་བའི་ཚེས་བཅོ་ལྔ་ལ། འཛམ་བུ་གླིང་གི་སེམས་ཅན་རྣམས་ཡོངས་སུ་གདུལ་བར་བྱ་བའི་ཕྱིར། དགའ་ལྡན་ལྷ་ཡི་གནས་ནས་མི་ཡུལ་སེར་སྐྱའི་དྲུང་དུ་ཡུམ་སྒྱུ་མ་ལྷ་མཛེས་མའི་ལྷུམས་སུ་ཞུགས་ཤིང་། ཟླ་བ་བཅུ་རྫོགས་པའི་དུས་སུ་ལུམྦི་ནིའི་སྐྱེད་ཚལ་ཞེས་བྱ་བར་ཡུམ་གྱི་མཆན་ཁུང་གཡས་པ་ནས་སྡུག་བསྔལ་མེད་པར་སྐུ་བལྟམས་པར་མཛད། ༼ལུམྦིའི་ཚལ་ནི་ད་ལྟའི་ནེ་པ་ལའམ་བལ་ཡུལ་གྱི་ས་ཆ་ཡིན།༽ དེ་ནས་དགུང་ལོ་ཉི་ཤུ་རྩ་དགུའི་རིང་དུ་རྒྱལ་པོ་ཟས་གཙང་མའི་རྒྱལ་སྲིད་བཟུང་ནས་སེར་སྐྱའི་གནས་སུ་བཞུགས། དགུང་ལོ་ཉེར་དགུའི་སྟེང་། འཁོར་བ་མཐའ་དག་ལ་སྐྱོ་བ་སྐྱེས་ནས་མཆོད་རྟེན་རྣམ་དག་གི་དྲུང་དུ་དབུ་སྐྲ་བསིལ་ཏེ་རབ་ཏུ་བྱུང་། ཆུ་བོ་ནེ་རཉྫ་ནའི་འགྲམ་དུ་ཉིན་རེར་ཆུ་ཐིགས་པ་རེ་དང་འབྲས་ཉག་མ་རེ་གསོལ་ནས་ལོ་དྲུག་གི་རིང་དུ་དཀའ་བ་སྤྱད་ནས་བཞུགས་ཤིང་། དེ་ནི། ཕྱིས་འབྱུང་གི་གང་ཟག་ཐམས་ཅད་ཀྱིས་ཆོས་ཉམས་སུ་ལེན་པར་དཀའ་སྤྱད་སྙིང་རུས་དགོས་ཞེས་གདམས་པའི་དོན་དུ་དཀའ་སྤྱད་ཀྱི་ཚུལ་མཛད་པ་རེད། དཔྱིད་ཟླ་ཐ་ཆུང་སྟེ་ས་ག་ཟླ་བའི་ཚེས་བཅོ་ལྔ་ལ་རྒྱ་གར་རྡོ་རྗེ་གདན་དུ་མངོན་པར་རྫོགས་པར་སངས་རྒྱས་ཤིང་། དེ་ནས་ཞག་བདུན་ཕྲག་བདུན་ཏེ་བདུན་བདུན་བཞི་ཅུ་ཞེ་དགུའི་རྗེས་སུ། ཡུལ་ཝཱ་ར་ཎཱ་སིའི་དྲང་སྲོང་ལྷུང་བ་རི་དྭགས་ཀྱི་ནགས་སུ་བཀའ་དང་པོ་བདེན་པ་བཞིའི་ཆོས་ཀྱི་འཁོར་ལོ་བསྐོར་ལ། བྱ་རྒོད་ཕུང་པོའི་རི་ལ་བཀའ་བར་བ་མཚན་ཉིད་མེད་པའི་ཆོས་ཀྱི་འཁོར་ལོ་བསྐོར། ཡངས་པ་ཅན་ལ་སོགས་པའི་ཡུལ་ངེས་མེད་རྣམས་སུ་བཀའ་ཐ་མ་ལེགས་པར་རྣམ་པར་ཕྱེ་བའི་ཆོས་ཀྱི་འཁོར་ལོ་བསྐོར་ནས། མཐར་རྩྭ་མཆོག་གྲོང་དུ་ཐུན་མོང་གི་གདུལ་བྱ་རྣམས་རྟག་འཛིན་ལས་བཟློག་པར་བྱ་བའི་ཕྱིར་དུ་སྐུ་མྱ་ངན་ལས་འདའ་བའི་ཚུལ་བསྟན།

དེ་དག་ནི་མདོ་ཕར་ཕྱིན་ཐེག་པ་ལས་བསྟན་པ་ལྟར་སངས་རྒྱས་ཇི་ལྟར་བྱོན་པའི་ཚུལ་མདོར་བསྡུས་པ་ཙམ་བཤད་པ་ཡིན།

ལུང་གིས་བསྟན་ཚུལ།

དེ་ནས་གསང་སྔགས་རྡོ་རྗེ་ཐེག་པའི་བསྟན་པ་ཇི་ལྟར་དར་ཚུལ་ནི། སངས་རྒྱས་དངོས་སུ་བཞུགས་པའི་གནས་སྐབས་སུ་ནུབ་ཕྱོགས་ཨོ་རྒྱན་གྱི་ཡུལ་དུ་ཨིནྡྲ་བྷུ་ཏི་ལ་དཔལ་གསང་བ་འདུས་པའི་ཆོས་ཀྱི་འཁོར་ལོ་བསྐོར་ཞིང་། རྒྱ་གར་ལྷོ་ཕྱོགས་དཔལ་ལྡན་འབྲས་སྤུངས་ཀྱི་མཆོད་རྟེན་ཆེན་པོ་རུ། ཤམ་བྷ་ལའི་ཆོས་རྒྱལ་ཟླ་བ་བཟང་པོ་ལ་སོགས་པའི་འཁོར་འདུས་པ་བསམ་གྱིས་མི་ཁྱབ་པ་ལ་འཇམ་དཔལ་མཚན་བརྗོད་དང་དཔལ་དུས་ཀྱི་འཁོར་ལོའི་རྒྱུད་སྡེ་རྣམས་གསུངས། གཞན་ཡང་ལྷ་དང་ཀླུ་དང་གནོད་སྦྱིན་དང་དྲི་ཟ་ལ་སོགས་པའི་ཡུལ་རྣམས་སུ། གདུལ་བྱ་སྐལ་བ་དང་ལྡན་པ་ཉུང་ཤས་ལ་གསང་སྔགས་རྡོ་རྗེ་ཐེག་པའི་ཆོས་བསྟན་ཡོད། དེ་བཞིན་གཤེགས་པ་མྱ་ངན་ལས་འདའ་ཁར། ཁོང་གིས་སྔོན་བདག་གིས་གདུལ་བྱ་མང་པོ་ལ་མཚན་ཉིད་རྒྱུའི་ཐེག་པའི་ཆོས་རྒྱ་ཆེར་བསྟན་པ་ལས། འབྲས་བུ་གསང་སྔགས་རྡོ་རྗེ་ཐེག་པ་ཞེས་པ་ཁྱབ་བརྡལ་དུ་མ་བཤད་ཀྱང་། མ་འོངས་པའི་གནས་སྐབས་སུ་གསང་སྔགས་ཀྱི་ཆོས་དེ་རྒྱ་ཆེན་པོ་དར་ཞིང་རྒྱས་པར་འགྱུར་རོ་ཞེས་ལུང་བསྟན་གནང་། གསང་སྔགས་ཆོས་ཀྱི་འཁོར་ལོ་སྐོར་བ་པོའི་ཐད་ལ། བཅོམ་ལྡན་འདས་ཀྱིས་ཁོང་མྱ་ངན་ལས་འདས་ནས་ལོ་ཉི་ཤུ་རྩ་བརྒྱད་ཀྱི་རྗེས་སུ། དམ་པའི་རིགས་ཅན་དྲྭ་མ་ལྔ་ཞེས་པས་བསྐུལ་ནས་གསང་སྔགས་ཀྱི་ཆོས་རྒྱ་ཆེན་པོ་སྟོན་པར་འགྱུར་ལ། དེར་མ་ཟད། དམ་པའི་རིགས་ཅན་དྲྭ་མ་ལྔ་སིང་ག་ལ་ཡི་རི་བོ་མ་ལ་ཡ་གནམ་ལྕགས་འབར་བ་ཞེས་བྱ་བའི་ཡུལ་གང་དེར་བྱོན་ནས་གསང་སྔགས་ཀྱི་ཆོས་སྟོན་པར་འགྱུར་རོ་ཞེས་ཡུལ་ཁམས་ཀྱང་ལུང་གིས་བསྟན་ཡོད། ཁོང་མྱ་ངན་ལས་འདས་ནས་ལོ་བརྒྱད་ཀྱི་དུས་སུ་ཨོ་རྒྱན་མཚོ་སྐྱེས་རྡོ་རྗེ་ཞེས་པ་བྱོན་ནས། གསང་སྔགས་ཀྱི་བསྟན་པ་རྒྱ་ཆེན་དར་བར་འགྱུར་ཞེས་ལུང་བསྟན། ད་ལྟ་མང་པོ་ཞིག་གི་བཤད་སྲོལ་ལྟར་ན། ཨོ་རྒྱན་མཚོ་སྐྱེས་རྡོ་རྗེ་ནི་ཡུལ་ཕ་ཀི་སི་ཐན་（Pakistan）གྱི་མཚོ་འོ་མ་ཅན་ཞེས་བྱ་བར་འཁྲུངས་པ་ཡིན་པར་འདོད།

གཞན་ཡང་བཅོམ་ལྡན་འདས་ཀྱི་ལྷ་མོ་དྲི་མ་མེད་པའི་མདོ་ལས། སངས་རྒྱས་ཀྱི་བསྟན་པ་འདི་བྱང་ནས་བྱང་དུ་བྱང་ཕྱོགས་ཁ་བ་ཅན་གྱི་ཡུལ་དུ་དར་བར་གསལ་པོར་གསུངས་པ་དང་། གཞན་ཡང་ལྷོ་ནས་ལྷོ་རུ་དར་བར་འགྱུར་ཞེས་སོགས་ལུང་དུ་བསྟན་ཡོད། ད་ལྟ་ཡང་སངས་རྒྱས་ཀྱི་བསྟན་པ་རྒྱ་ཆེར་དར་སའི་སྙིང་པོ་ལྟ་བུ་ནི་སིང་ག་ལ་ཡིན་ཞིང་། དེར་ཐེག་པ་ཐུན་མོང་གི་ཆོས་རྒྱ་ཆེར་དར་ལ། བོད་ཡུལ་དུ་ཐེག་པ་ཆེན་པོ་གསང་སྔགས་ཀྱི་ཆོས་འདི་རྒྱ་ཆེར་དར་བར་གྱུར།

དེ་བཞིན་དུ་བཅོམ་ལྡན་འདས་ཀྱི་མདོ་སྡེ་རྣམས་སུ། རྒྱ་གར་གྱི་ཡུལ་དུ་འབྱོན་པར་འགྱུར་བའི་སློབ་དཔོན་ཀླུ་སྒྲུབ་དང་ས་ར་ཧ་པ་ལ་སོགས་པའི་མཁས་པ་དང་གྲུབ་པ་མང་པོ་ལུང་དུ་བསྟན་ལ། བོད་གངས་རིའི་ལྗོངས་ཀྱི་ཆོས་རྒྱལ་རིམ་བྱོན་མང་པོ་ཞིག་ཀྱང་ལུང་དུ་བསྟན་ཡོད། དེར་མ་ཟད་རྙིང་མའི་ཨོ་རྒྱན་རིན་པོ་ཆེ་དང་། གསར་མའི་རྗེ་རིན་པོ་ཆེ་བློ་བཟང་གྲགས་པ། ས་སྐྱའི་གོང་མ་རྣམས། གཞན་ཡང་མི་ལ་རས་པ་སོགས་ཀུན་ཀྱང་སངས་རྒྱས་ཀྱི་བཀའ་ལས་ལུང་དུ་བསྟན་ཡོད།

དེ་དག་ཐམས་ཅད་ལ་བསམ་བློ་བཏང་ན། འུ་ཅག་གི་སྟོན་པ་ནི་གཞན་གང་དང་ཡང་མ་འདྲ་བ་ཞིག་སྟེ། འཇིག་རྟེན་ཁམས་ཀྱི་ཚན་རིག་པ་རྣམས་ཀྱིས་སྔར་མང་དུ་དཔྱད་མྱོང་ལ། ད་ལྟ་ཡང་དཔྱད་བཞིན་པ་རེད། མ་འོངས་པར་ཡང་དཔྱད་པར་འགྱུར་བ་ཡིན་ཡང་། འབྱུང་འགྱུར་གྱི་དོན་རྣམས་གནད་ཐིག་པར་དངོས་སུ་སྟོན་ཐུབ་པ་རང་ཅག་གི་སྟོན་པ་ལྟ་བུ་ས་སྟེང་གང་དུ་ཡང་བྱོན་པ་ཉུང་ལ། དེ་ལྟ་བུའི་མངོན་ཤེས་དང་ལྡན་ཞིང་ཐུགས་རྗེ་ཅན་བཅོམ་ལྡན་འདས་ཀྱིས་ལུང་བསྟན་པ་བཞིན། གསང་སྔགས་ཀྱི་བསྟན་པ་དེ་རྗེས་སུ་རིམ་བཞིན་དུ་ཕྱོགས་ཀྱི་ཡུལ་གྲུ་མང་པོར་དར་བར་གྱུར།

རྫོགས་ཆེན་དར་ཚུལ།

སྤྱིར་གསང་སྔགས་ཀྱི་ཆོས་ལ་ཡང་ཕྱི་རྒྱུད་སྡེ་གསུམ་དང་། ནང་རྒྱུད་ཡོ་ག་གསུམ་གྱི་དར་ཚུལ་སོགས་མང་དུ་འཆད་རྒྱུ་ཡོད་ཀྱང་། དེ་དག་ཁྱེད་རྣམ་པས་རེ་བསྐུལ་བྱས་པའི་ཆོས་མིན་པས་གནས་སྐབས་མི་བཤད། ད་རེས་སྐབས་སུ་བབས་པ་རྫོགས་པ་ཆེན་པོའི་ཆོས་ཇི་ལྟར་དར་ཚུལ་འཆད་རྒྱུ་ཡིན།

རྫོགས་པ་ཆེན་པོའི་བསྟན་པ་ཇི་ལྟར་དར་བ་ཡིན་ཞེ་ན། དང་པོ་སངས་རྒྱས་ཐམས་ཅད་ཀྱི་ཐོག་མ་ཆོས་སྐུ་ཀུན་ཏུ་བཟང་པོ་ཞེས་པ་མངོན་པར་རྫོགས་པར་སངས་རྒྱས་ཤིང་། དེ་ནས་ཀུན་ཏུ་བཟང་པོའི་བྱིན་རླབས་ཀྱི་རྩལ་ལས་སྐུ་རྟེན་དུ་རྡོ་རྗེ་སེམས་དཔའི་སྐུ་ཚེ་ལོ་བརྒྱ་པའི་མིའི་ལུས་ཚད་དང་མཉམ་པ་རིན་པོ་ཆེ་བརྒྱ་རྩ་གཅིག་གིས་གྲུབ་པ་ཞིག་དང་། གསུང་རྟེན་དུ་བསྟན་པ་བུ་གཅིག་གི་རྒྱུད་ཅེས་པ་བཻཌཱུརྱའི་ཤོག་བུ་ལ་གསེར་གྱི་སྣག་ཚའི་ཡི་གེ་རང་བྱུང་གི་ཚུལ་དུ་དོད་ཡོད་པའི་གླེགས་བམ་སོར་བཞི་པ། ཐུགས་རྟེན་དུ་ཤེལ་གྱི་རྡོ་རྗེ་ཚེ་ལོ་བརྒྱ་པའི་མིའི་ཕྱག་གང་བ་ཞིག་བཅས་རང་བྱུང་དུ་འཁྲུངས་པར་གྱུར་བ་ལ་བསྟན་པའི་བཙས་གསུམ་མམ་རྒྱལ་ཚབ་གསུམ་ཞེས་གསོལ། དེ་དག་ཞིང་ཁམས་གང་དུ་ཡོད་ན་ཡུལ་དེར་བདེ་བ་དང་ལྡན་ལ་སྡུག་བསྔལ་དང་བྲལ་ཞིང་། གསང་སྔགས་རྡོ་རྗེ་ཐེག་པའི་ཆོས་ཀྱང་རང་ཤུགས་སུ་འབྱུང་བ་མ་ཟད། སྐྱེ་བོ་ཐམས་ཅད་ཀྱང་འབད་པ་མི་དགོས་པར་རང་ཤུགས་ཀྱིས་གྲུབ་པ་ཐོབ་པར་འགྱུར་བ་ཡིན།

དེ་གསུམ་གྱི་བྱིན་རླབས་ཀྱིས། རྫོགས་ཆེན་སྟོན་པའི་སྟོན་པ་བཅུ་གཉིས་ཞིང་ཁམས་གཞན་དང་གཞན་རྣམས་སུ་འབྱོན་པར་འགྱུར། འོག་མིན་གྱི་གནས་སུ་བསྟན་པའི་བཙས་གསུམ་པོ་རང་བྱུང་བའི་ཚེ་ན། ཀུན་ཏུ་བཟང་པོའི་ཐུགས་ཀྱི་རྩལ་ལས། རྒྱལ་བ་རིགས་ལྔ་ལ་རྫོགས་པ་ཆེན་པོའི་ཆོས་འདི་ཉིད་རང་གིས་རང་ལ་དགོངས་པ་གཏད་པ་ཙམ་གྱིས་འཕོས་པར་གྱུར་ལ། ལོངས་སྐུའི་ཞིང་ཁམས་འོག་མིན་དུ། དཔལ་རྡོ་རྗེ་སེམས་དཔའི་ཕྱག་ཏུ་རང་བྱུང་བསྟན་པ་བུ་གཅིག་གི་རྒྱུད་འདི་ཉིད་བབས་ནས། རྫོགས་པ་ཆེན་པོའི་ཆོས་དེ་ལྷ་ཀླུ་མི་ལ་སོགས་དག་པའི་རིགས་ཅན་གྱི་ཞིང་དུ་དར་ཞིང་རྒྱས་པར་གྱུར་ཅིང་། རང་བྱུང་བསྟན་པ་བུ་གཅིག་གི་རྒྱུད་འདི་སྤྲུལ་སྐུའི་ཞིང་ཁམས་ཏེ་རྒྱ་གར་རྡོ་རྗེ་གདན་གྱི་སྟེང་གི་ནམ་མཁའ་རུ་རང་སྒྲ་དང་བཅས་ཏེ་ད་ལྟ་ཡང་མངོན་སུམ་དུ་བཞུགས་ཡོད་པ་མ་ཟད། མ་འོངས་པའི་ལོ་མང་པོའི་རིང་ལའང་རྡོ་རྗེ་གདན་གྱི་ནམ་མཁར་བཞུགས་པར་འགྱུར་བ་ཡིན། དེའི་རིང་ལ་རྫོགས་པ་ཆེན་པོའི་བསྟན་པ་འདི་མི་ནུབ་པར་དར་ཞིང་རྒྱས་ནས། འཛམ་བུ་གླིང་གི་སེམས་ཅན་སུས་བསྒོམ་ནའང་གྲུབ་པ་ཐོབ་པ་དང་མཆོག་གི་དངོས་གྲུབ་བརྙེས་པར་འགྱུར་ལ། སྐུ་རྟེན་དང་ཐུགས་རྟེན་གྱིས་ཞིང་ཁམས་གཞན་དང་གཞན་ལ་འགྲོ་དོན་མཛད་ཀྱིན་ཡོད་པ་རེད།

བསྟན་པ་བུ་གཅིག་གི་རྒྱུད་ཀྱི་བྱིན་རླབས་ཀྱིས། སློབ་དཔོན་དགའ་རབ་རྡོ་རྗེ་ཞེས་པ་ཕ་ཡི་རྒྱུ་རྐྱེན་ལ་མ་ལྟོས་པར་ནུབ་ཕྱོགས་ཨོ་རྒྱན་གྱི་ཡུལ་དུ་འཁྲུངས་ཤིང་། ཁོང་སེ་གོལ་གཅིག་གཏོགས་པའི་ཡུན་ལ་འོག་མིན་གྱི་གནས་སུ་རྡོ་རྗེ་སེམས་དཔའི་དྲུང་དུ་བྱོན་ནས། རྫོགས་པ་ཆེན་པོའི་རྒྱུད་འབུམ་ཕྲག་དྲུག་ཅུ་རྩ་བཞི་དང་རྩལ་དབང་རྒྱལ་ཐབས་སྤྱི་བླུག་ལ་སོགས་པའི་དབང་ཁྲིད་མན་ངག་ཐམས་ཅད་ཀྱང་རྫོགས་པར་ཞུས། རྡོ་རྗེ་སེམས་དཔའི་དྲུང་ནས་ཞུས་ཚད་ལ་ཤོ་ལོ་ཀ་འབུམ་ཕྲག་དྲུག་ཅུ་རྩ་བཞི་ཡོད་པ་དེ་ནི། དགའ་རབ་རྡོ་རྗེས་ཐུགས་ལ་བཟུང་ཞིང་བསྡུས་པའི་རྫོགས་པ་ཆེན་པོའི་ཆོས་ཡིན།

སློབ་དཔོན་དགའ་རབ་རྡོ་རྗེས་དེ་ལྟར་ཆོས་ཀྱི་འཁོར་ལོ་སྐོར་བཞིན་པའི་སྐབས་སུ། རྒྱ་གར་གྱི་ཡུལ་དུ་སློབ་དཔོན་འཇམ་དཔལ་བཤེས་གཉེན་ཞེས་རིག་པའི་གནས་བཅུ་ལ་མཁས་པ་ཞིག་ཡོད་པ་དེས་གསན་ཏེ། ད་ལྟ་རྒྱུ་འབྲས་ལས་འདས་པའི་ཆོས་སྟོན་མཁན་ཞིག་འདུག་པ་དེ་ལ་ཁོང་གིས་རྩོད་དགོས་ཞེས་སྨྲས་ནས་དགའ་རབ་རྡོ་རྗེའི་དྲུང་དུ་བྱོན་ཀྱང་། སློབ་དཔོན་དགའ་རབ་རྡོ་རྗེ་ལ་ཐེག་པ་མཐོ་དམན་གང་ནས་བརྩད་ཀྱང་མ་ཐུབ་ལ། རྫུ་འཕྲུལ་སྣ་ཚོགས་བསྟན་ནས་བརྩད་ཀྱང་འགྲན་མ་བཟོད་པའི་གནས་སྐབས་ན། རང་གིས་ཉེས་པ་དེ་ཉེས་པ་ཡིན་པར་ཤེས་ནས། དགའ་རབ་རྡོ་རྗེ་ལ་བཟོད་གསོལ་ཞུས་ཤིང་ཁོང་གི་རྗེས་སུ་ཞུགས་ཏེ་རྫོགས་པ་ཆེན་པོའི་ཆོས་མ་ལུས་པ་ཞུས།

དེ་ལྟར་སློབ་དཔོན་དགའ་རབ་རྡོ་རྗེའི་མཛད་པ་ཐམས་ཅད་རྫོགས་ནས་ཆུ་བོ་དན་ཏིག་ཅེས་པའི་སར་སྐུ་མྱ་ངན་ལས་འདས་པའི་ཚུལ་སྟོན་པའི་དུས་སུ། འཇམ་དཔལ་བཤེས་གཉེན་གྱིས། ཁྱེད་ཡོངས་སུ་མྱ་ངན་ལས་འདའ་བར་འགྱུར་ན། སངས་རྒྱས་ཀྱི་བསྟན་པའི་སྒྲོན་མེ་ནུབ་པར་འགྱུར་ཞིང་། འགྲོ་བ་རྣམས་སྡུག་བསྔལ་གྱི་གནས་ལ་སྦྱར་བར་འགྱུར་རོ་ཞེས་གདུང་བའི་སྨྲེ་སྔགས་བཏོན་པ་ན། ཁོང་གི་སྐུ་ལུས་ཀྱང་མི་སྣང་བར་འོད་དུ་དེངས་པའི་ནམ་མཁའི་འོད་ཕུང་གི་དཀྱིལ་ནས་ཕྱག་གཡས་པའི་གྲུ་མོ་མན་ཆད་ཕྱུང་ཞིང་། འདས་རྗེས་ཚིག་གསུམ་གནད་དུ་བརྡེག་པའི་མན་ངག་ཅེས་པ་འཇམ་དཔལ་བཤེས་གཉེན་གྱི་ཕྱག་ཏུ་བབས། དེ་ནས་འཇམ་དཔལ་བཤེས་གཉེན་གྱིས་སློབ་དཔོན་དགའ་རབ་རྡོ་རྗེའི་གསུང་འབུམ་ཕྲག་དྲུག་ཅུ་རྩ་བཞི་བཀའ་བསྡུ་བྱས་ནས། ཕྱི་སེམས་སྡེ་དང་། ནང་ཀློང་སྡེ། གསང་བ་མན་ངག་གི་སྡེ་ཞེས་སྡེ་ཆེན་པོ་གསུམ་གྱི་ནང་དུ་བསྡུས་ནས་བཀྲལ་བ་རེད།

དུར་ཁྲོད་ཆེན་པོ་སོ་ས་གླིང་ཞེས་པར་འཇམ་དཔལ་བཤེས་གཉེན་གྱིས་མི་དང་མི་མ་ཡིན་པ་ཐམས་ཅད་ལ་ཆོས་ཀྱི་འཁོར་ལོ་སྐོར་བའི་དུས་སུ། རྒྱ་ནག་པོའི་བཀྲ་ཤིས་ཁྲི་སྒོ་༼ད་ལྟའི་ཞི་ཨན་༽ ཞེས་པ་ན་སློབ་དཔོན་ཤྲཱི་སིངྷ་ཞེས་ཐུན་མོང་གི་གྲུབ་པ་བརྒྱད་ལ་མངའ་དབང་འབྱོར་ཞིང་། རིག་པའི་གནས་བཅོ་བརྒྱད་ལ་ཆགས་ཐོགས་མེད་པའི་མཁས་པ་ཆེན་པོ་ཞིག་ཡོད་པ་དེ་ལ། ཐུགས་རྗེ་ཆེན་པོ་སྤྱན་རས་གཟིགས་དབང་ཕྱུག་གིས་རིགས་ཀྱི་བུ་ཁྱོད་ཀྱི་ཚེ་རབས་ལས་ཀྱི་བླ་མ་རྒྱ་གར་གྱི་དུར་ཁྲོད་ཆེན་པོ་སོ་ས་གླིང་དུ་བཞུགས་པས་ཁོང་གི་དྲུང་དུ་སོང་ཞིག་ཅེས་ལུང་བསྟན་པ་དང་། ཤྲཱི་སིངྷ་རྒྱ་ནག་ནས་རྒྱ་གར་བར་ས་ལ་ཁྲུ་གང་མ་རེག་པ་ཙམ་གྱི་ནམ་མཁར་ཞག་བདུན་གྱི་རིང་རྫུ་འཕྲུལ་གྱིས་བྱོན་ཏེ། འཇམ་དཔལ་བཤེས་གཉེན་གྱི་དྲུང་ནས་གདམས་པ་མ་ལུས་པ་ཞུས་པར་མཛད་པའི་རྗེས་སུ། འཇམ་དཔལ་བཤེས་གཉེན་གྱི་སྐུ་ལུས་ཀྱང་འོད་ཀྱི་ཕུང་པོ་གཅིག་ཏུ་གྱུར་ཏེ་མི་སྣང་བར་གྱུར་སོང་། དེའི་ཚེ་ཤྲཱི་སིངྷས་སྨྲེ་སྔགས་བཏོན་ཅིང་གསོལ་བ་བཏབ་པ་ན། ནམ་མཁའ་ནས་འདས་རྗེས་སྒོམ་ཉམས་དྲུག་པ་ཞེས་བྱ་བ་བབས་ཤིང་། ཤྲཱི་སིངྷས་དེ་ཉིད་བཀླགས་པ་ཙམ་གྱིས་དཔོན་སློབ་དགོངས་པ་དབྱེར་མེད་དུ་གྱུར།

ཤྲཱི་སིངྷ་རང་ཡུལ་དུ་ཕེབས་ནས། རྒྱ་ནག་རི་བོ་རྩེ་ལྔའི་འདབས་ན་དུར་ཁྲོད་ཆེན་པོ་བསིལ་སྦྱིན་ཞེས་པ་ཞིག་ཡོད་པ་དེར་སྒོམ་ལ་རྩེ་གཅིག་ཏུ་མཉམ་པར་བཞག་པའི་དུས་སུ། རྒྱ་གར་ཤར་ཕྱོགས་ཀྱི་པཎྜི་ཏ་ཆེན་པོ་སློབ་དཔོན་ཛྙཱ་ན་སུ་ཏྲ་དང་བི་མ་ལ་མི་ཏྲ་གཉིས་ནི་ཚེ་རབས་ལྔ་བརྒྱའི་རིང་ལ་ལྷན་ཅིག་ཏུ་ཆོས་ཞུས་པའི་གྲོགས་པོ་ཡིན་ལ་ཐུགས་ཀྱང་ཧ་ཅང་མཐུན་པས། ཉིན་ཞིག་སྐྱེད་མོའི་ཚལ་དུ་སྐྱོ་བསང་ལ་སོང་ཚེ། ནམ་མཁའི་ཁམས་ནས་རྡོ་རྗེ་སེམས་དཔའ་བྱོན་ནས། རིགས་ཀྱི་བུ་ཁྱེད་གཉིས་ཀྱིས་སྐྱེ་བ་ལྔ་བརྒྱར་པཎྜི་ཏའི་སྐྱེ་བ་བརྒྱུད་མར་བླངས་ཀྱང་ད་དུང་སངས་རྒྱས་ཀྱི་འབྲས་བུ་མ་ཐོབ་པ་རེད། ཚེ་འདིར་སངས་རྒྱས་ཐོབ་པར་འདོད་ན། རྒྱ་ནག་པོའི་དུར་ཁྲོད་བསིལ་སྦྱིན་དུ་སོང་ཞིག་ཅེས་ལུང་བསྟན། བི་མ་ལ་མི་ཏྲ་ནི་ཐུགས་ཐག་ཐུང་ཞིང་སྙིང་སྟོབས་ཆེ་བ་ཡིན་པས། དེ་མ་ཐག་ཏུ་ཁྱིམ་ལ་བྱོན་ནས་ཆོས་གོས་དང་ལྷུང་བཟེད་བསྣམས་ཏེ། རྒྱ་ནག་གི་ཡུལ་དུ་བྱོན་ནས་ལོ་དགུའི་རིང་ལ་ཤྲཱི་སིངྷའི་སྐུ་མདུན་དུ་དབང་ཁྲིད་དང་གདམས་པ་མ་ལུས་པ་ཡོངས་སུ་རྫོགས་པ་ཞུས། ལོ་དགུའི་རྗེས་སུ། ཛྙཱ་ན་སུ་ཏྲ་བྱོན་ནས་ཤྲཱི་སིངྷ་སློབ་དཔོན་དུ་བསྟེན་ཅིང་། ལོ་ཉི་ཤུ་རྩ་གཅིག་གི་རིང་དུ་དབང་ཁྲིད་གདམས་པ་སོགས་སྔར་ལས་ལྷག་པའི་ཆོས་མང་པོ་ཞུས་པ་རེད།

ཤྲཱི་སིངྷ་རྒྱ་ནག་བསིལ་སྦྱིན་ན་བཞུགས་པའི་དུས་སུ། སློབ་དཔོན་པདྨ་འབྱུང་གནས་དང་ལོ་ཆེན་བཻ་རོ་ཙ་ན་རྣམ་པ་གཉིས་ཀྱང་ཁོང་གི་སྐུ་མདུན་ལ་བྱོན་ནས་རྫོགས་པ་ཆེན་པོའི་ཆོས་ཞུས། ཤྲཱི་སིངྷ་ཡོངས་སུ་མྱ་ངན་ལས་འདས་པ་ན་ཛྙཱ་ན་སུ་ཏྲ་ལ་འདས་རྗེས་གཟེར་བུ་བདུན་པ་ཞེས་པ་བབས་ནས་དཔོན་སློབ་དགོངས་པ་དབྱེར་མེད་དུ་གྱུར། ཛྙཱ་ན་སུ་ཏྲ་ཡོངས་སུ་མྱ་ངན་ལས་འདས་པའི་དུས་སུ། འོད་ཕུང་གི་དཀྱིལ་ནས་འདས་རྗེས་བཞག་ཐབས་བཞི་པ་ཞེས་པ་དེ་བི་མ་ལ་མི་ཏྲའི་ཕྱག་ཏུ་བབས།

དེའི་ཡན་ཆད་ཀྱི་བླ་མ་མིའི་རྣམ་པས་བྱོན་ཚད་ཚང་མ་ཡང་སྐུ་ལུས་འོད་དུ་གྱུར་ནས་མི་སྣང་བར་གྱུར། ཨོ་རྒྱན་རིན་པོ་ཆེ་ནི་ད་ལྟ་ཡང་སྐུ་མྱ་ངན་ལས་མ་འདས་པར་ལྷོ་ནུབ་རྔ་ཡབ་སྲིན་པོའི་གླིང་དུ་སྲིན་པོ་རྣམས་ཀྱི་ཁ་གནོན་མཛད་ནས་བཞུགས་ཡོད་ཅིང་། བི་མ་ལ་མི་ཏྲ་ནི་རྒྱ་ནག་རི་བོ་རྩེ་ལྔ་རུ་སྐུ་ལུས་མ་སྤང་པར་ད་ལྟ་ཡང་མངོན་སུམ་དུ་བཞུགས་ནས་ལོ་བརྒྱ་རེའི་མཚམས་ན་བོད་ཡུལ་དུ་ཁོང་གི་སྤྲུལ་པ་དངོས་རེ་འབྱོན་གྱིན་ཡོད་ཅིང་། རྒྱུན་དུ་ཡང་སྤྲུལ་པ་བར་མ་ཆད་པར་འབྱོན་གྱིན་ཡོད།

ཕྱི་ལོ་༡༩༨༧ལོར། ང་ཚོ་བོད་མི་ཁྲི་ཕྲག་གཅིག་རི་བོ་རྩེ་ལྔར་བི་མ་མི་ཏྲ་མཇལ་དུ་སོང་བ་ཡིན། སྐབས་དེར་མི་རྣམས་ཀྱི་ནང་ནས་ལ་ལས་ནམ་མཁའི་དཀྱིལ་ནས་བི་མ་ལ་མི་ཏྲ་དང་འཇམ་དཔལ་དབྱངས་ཀྱི་སྐུ་དངོས་མཇལ་ཞིང་། ལ་ལས་སེང་གེ། ལ་ལས་འཇའ། ལ་ལས་མི་དང་བྱ་ལ་སོགས་པའི་རྣམ་པར་ངོ་མཚར་བའི་ལྟས་བསམ་གྱིས་མི་ཁྱབ་པ་མཇལ་ལ། ད་ལྟ་ཡང་མི་མང་ཆེ་བས་དེ་ལྟར་མཇལ་ཐུབ་ཀྱིན་ཡོད།

བི་མ་ལ་མི་ཏྲའི་ཡེ་ཤེས་སྒྱུ་མའི་སྐུ་སླར་ཡང་མངོན་སུམ་དུ་བོད་ཡུལ་ལ་བྱོན་ནས་ལྕེ་བཙུན་སེང་གེ་དབང་ཕྱུག་ལ་དབང་ཁྲིད་ཅིང་མན་ངག་རྫོགས་པར་གནང་བར་མཛད། ལྕེ་བཙུན་སེང་གེ་དབང་ཕྱུག་གིས་མཁའ་འགྲོ་མ་བྱེ་བ་འབུམ་གྱི་དབུས་སུ་ཚོགས་ཀྱི་འཁོར་ལོ་སྐོར་བཞིན་པའི་སྐབས་སུ་སྐུ་མི་སྣང་བར་འོད་ཀྱི་གོང་བུ་ཉིད་དུ་གྱུར་བའི་ཚེ། མཁའ་འགྲོ་མ་རྣམས་ཀྱིས་གསོལ་བ་བཏབ་པའི་ངོར་འདས་རྗེས་དུམ་བུ་གསུམ་པ་ཞེས་པ་བབས་པ་རེད།

དེ་ལྟར་བླ་མ་ཐམས་ཅད་རིམ་བཞིན་དུ་བྱོན་ཅིང་ཆོས་འདི་ཉམས་སུ་ལེན་པའི་གང་ཟག་མང་དུ་བྱུང་སྟེ། དཔེར་ན་ཁམས་ཕྱོགས་ཀྱི་ཀཿ ཐོག་དགོན་ཞེས་པར་དུས་ཐོག་གཅིག་ལ་འཇའ་ལུས་པ་འབུམ་ཕྲག་རེ་བྱོན་མྱོང་བ་མ་ཟད། སྐུ་ལུས་འཇའ་དང་འོད་དུ་དེངས་ནས་མི་སྣང་བར་འཇའ་ལུས་སུ་གྲུབ་པ་ཐོབ་པ་བསམ་གྱིས་མི་ཁྱབ་པ་བར་མ་ཆད་པར་ད་ལྟའི་བར་དུ་ཡང་བྱུང་བ་རེད། དེ་དག་དཔེ་མཚོན་ཙམ་ཞིག་བཤད་ན། སྐྱབས་རྗེ་བདུད་འཇོམས་ཀྱི་ཆོས་འབྱུང་དུ་བཀོད་པ་ཁྱེད་རྣམ་པ་མང་ཆེ་བའི་ཐུགས་ལ་གསལ་རྒྱུ་རེད། རྫོགས་པ་ཆེན་པོའི་ཆོས་ཉམས་སུ་ལེན་མཁན་ཡིད་ལྷུང་གི་རྒན་པོ་བསོད་རྒྱལ་ཞེས་པ་ཡང་འཇའ་ལུས་སུ་དེངས་སོང་བར་གསུངས།

ད་ལྟ་ང་ཚོའི་སློབ་གླིང་བཙུགས་ཡོད་ས་ནི་ད་ལྟའི་སྐྱབས་རྗེ་བདུད་འཇོམས་པ་ཁོང་གི་སྐུ་ཐོག་སྔ་མའི་གདན་ས་ཡིན་ལ། གདན་ས་དེར་དུས་གཅིག་ཏུ་འཇའ་ལུས་པ་བཅུ་གསུམ་བྱོན་མྱོང་། དེ་བཞིན་དུ་བོད་ཡུལ་གྱི་དགོན་པ་སོ་སོ་དང་ང་ཚོའི་སློབ་བརྒྱུད་མང་ཆེ་བ་ཞིག་འཇའ་ལུས་སུ་འཕོ་བ་དང་། སྐུ་ལུས་ཇེ་ཆུང་ལ་སོང་བའི་རྟགས་མཚན་ཅན་གྱི་གང་ཟག་ད་ལྟའི་བར་དུའང་ཆེས་མང་པོ་ཞིག་སྔར་བྱུང་ལ། ད་ལྟ་ཡང་འབྱུང་བཞིན་པ་ཡིན། མདོར་ན་རྫོགས་ཆེན་གྱི་དོན་དངོས་གནས་ཉམས་སུ་ལེན་པའི་གང་ཟག་རྣམས་ལས། བརྒྱ་ཆ་དྲུག་ཅུ་ཡས་མས་ལ་གྲུབ་པའི་རྟགས་མཚན་ཅི་རིགས་མངོན་དུ་གྱུར་ཡོད།

དེ་ནི་རྫོགས་ཆེན་གྱི་ཆོས་ལ་ཡིད་ཆེས་བསྐྱེད་པའི་ཆེད་དུ་ལོ་རྒྱུས་ཅུང་ཟད་བརྗོད་པ་ཡིན། ཆོས་རྣམ་པར་དག་པ་ཡིན་མིན་དེ་ཉམས་སུ་ལེན་པའི་གང་ཟག་རྣམས་ལ་རྟགས་མཚན་ཐོན་མིན་ལ་བལྟ་དགོས་ཤིང་། ད་ལྟའི་བར་དུ་རིག་འཛིན་བརྒྱུད་པའི་གྲུབ་ཐོབ་བར་མ་ཆད་པར་བྱུང་བ་ནི་རྫོགས་པ་ཆེན་པོ་ཞེས་པའི་ཆོས་དེ་རྣམ་པར་དག་པ་ཡིན་པའི་རྟགས་མཚན་མིག་མཐོང་ལག་ཟིན་ཡིན།

རྫོགས་ཆེན་གྱི་ཐུན་མིན་ཁྱད་ཆོས།

འོ་ན། རྫོགས་པ་ཆེན་པོའི་ཆོས་དེ་ཇི་ལྟར་ཤེས་དགོས་པ་རེད་ཅེ་ན། རྒྱ་ཆེན་པོ་ཤེས་དགོས་ན་ཚིག་དོན་རྣམ་པ་བཅུ་གཅིག་གི་སྒོ་ནས་ཤེས་དགོས་ཏེ། དེ་དག་གི་གནད་བསྡུས་ན་ཉམས་ལེན་གྱི་སྙིང་པོ་ཀ་དག་ཁྲེགས་ཆོད་དང་། ལྷུན་གྲུབ་ཐོད་རྒལ་ཞེས་རྣམ་པ་གཉིས་ཡོད་པ་རེད།

ཁྲེགས་ཆོད་ཅེས་པ་ཅི་འདྲ་ཡིན་ཞེ་ན། ཆོས་ཐམས་ཅད་སྟོང་ཉིད་དུ་གོ་བྱེད་ཀྱི་ཉམས་ལེན་ལ་ཟེར་ཞིང་། དེ་ནི་ཕལ་ཆེར་ས་སྐྱ་དང་། རྙིང་མ། བཀའ་བརྒྱུད། དགེ་ལྡན་ལ་སོགས་པ་ཐམས་ཅད་ལ་མན་ངག་གི་ཆ་ཤས་རེ་ཉམས་སུ་ལེན་ཐབས་ཡོད་དེ། དཔེར་ན། གསར་མ་པའི་རྗེ་ཙོང་ཁ་པ་ཆེན་པོའི་བདུད་རྩི་སྨན་མཆོག་ཅེས་པར་མཚོན་ན། རྙིང་མ་པའི་རྫོགས་པ་ཆེན་པོ་དང་ཐོག་མཐའ་བར་གསུམ་ཀུན་ནས་ཁྱད་པར་ཅུང་ཟད་ཀྱང་མེད་པའི་ཆོས་ཡིན་ལ། དེར་མ་ཟད། གསར་མའི་རྗེ་རིན་པོ་ཆེའི་ཆོས་བརྒྱུད་འཛིན་པ་ལའང་རྫོགས་པ་ཆེན་པོ་ཉམས་སུ་ལེན་མཁན་ལྕང་སྐྱ་རོལ་བའི་རྡོ་རྗེ་སོགས་གྲུབ་བརྙེས་ཀྱི་གང་ཟག་མང་པོ་བྱོན་མྱོང་།

ལྷུན་གྲུབ་ཐོད་རྒལ་ཞེས་པ་ནི་གཞན་གང་ན་ཡང་ཕལ་ཆེར་མེད་པ་ཞིག་སྟེ། རྫོགས་པ་ཆེན་པོ་རང་གི་ཆོས་ལ་ཡང་སྐོར་ཚོ་ཆེན་པོ་བཞིར་ཡོད་དེ། སློབ་དཔོན་འཇམ་དཔལ་བཤེས་གཉེན་གྱི་རྒྱུད་འབུམ་ཕྲག་དྲུག་ཅུ་རྩ་བཞི་དེ་ཕྱི་སེམས་སྡེ་དང་། ནང་ཀློང་སྡེ། གསང་བ་མན་ངག་གི་སྡེ་གསུམ་ལ་བསྡུས་ནས་བསྟན་ཅིང་། སློབ་དཔོན་ཤྲཱི་སིངྷས་གསང་བ་མན་ངག་གི་སྡེའང་ལ་ཕྱི་སྐོར་དང་། ནང་སྐོར། གསང་སྐོར། ཡང་གསང་གི་སྐོར་ཏེ་སྐོར་ཚོ་བཞིར་བྱས་པ་ལས། ཡང་གསང་སྙིང་ཐིག་གི་སྐོར་མ་གཏོགས་གཞན་རྫོགས་པ་ཆེན་པོ་རང་གི་ནང་དུ་ཡང་ཐོད་རྒལ་ཉམས་སུ་ལེན་ཚུལ་བསྟན་མེད།

ཉམས་སུ་ལེན་ཚུལ་གྱི་དབང་དུ་བྱས་ན། ཁྲེགས་ཆོད་དང་ཐོད་རྒལ་གཉིས་ཀྱི་སྒོ་ནས་ཉམས་སུ་ལེན་དགོས། དེ་ལ་པདྨའི་མཁའ་འགྲོ་སྙིང་ཐིག་དང་། བི་མའི་བི་མ་སྙིང་ཐིག་སྟེ་སྙིང་ཐིག་མ་གཉིས་དར་ཞིང་། བོད་ཡུལ་དུ་པདྨ་འབྱུང་གནས་དང་། བི་མ་ལ་མི་ཏྲ་གཉིས་ལ་སྙིང་ཐིག་གི་བཀའ་ཐོག་མར་བབས་པས་སྙིང་ཐིག་མ་གཉིས་སུ་གྲགས་པ་རེད། རྗེས་སུ་ཀུན་མཁྱེན་ཀློང་ཆེན་རབ་འབྱམས་ཀྱིས་བི་མ་སྙིང་ཐིག་གི་བུ་ཡིག་བླ་མ་ཡང་ཏིག་དང་། མཁའ་འགྲོ་སྙིང་ཐིག་གི་བུ་ཡིག་མཁའ་འགྲོ་ཡང་ཏིག་གཉིས་མཛད་པས། སྙིང་ཐིག་མ་གཉིས་དང་བུ་གཉིས་ཞེས་སྙིང་ཐིག་ཡ་བཞི་རུ་གྲགས། དེ་དག་གི་ཟབ་གནད་ཕྱོགས་གཅིག་ཏུ་བསྡུས་པ་ཟབ་མོ་ཡང་ཏིག་ཅེས་པའང་མཛད།

ཆོས་དེ་རྣམས་ཉམས་སུ་ལེན་སྟངས་ལ། བཤད་རྒྱུད་དང་སྙན་རྒྱུད་གཉིས་སུ་ཕྱེས་ཏེ་གསུངས་ཡོད་ཅིང་། སྙན་རྒྱུད་ཅེས་པ་ནི་སྐལ་ལྡན་མཁས་པ་རེ་ཟུང་ལ་བཤད་བྱའི་གསང་སྐོར་གྱི་ཆོས་དེ་རེད།

བཤད་པའི་རྒྱུད་ཅེས་བྱ་བ་ནི། གང་ཟག་ལས་འཕྲོ་དང་ལྡན་པ་ཡིན་ན། ཚོགས་པ་མང་པོ་ལའང་སྤེལ་རུང་བ་ཡིན། ཀུན་མཁྱེན་ཀློང་ཆེན་རབ་འབྱམས་ཡན་ཆད་ཀྱི་བླ་མ་རྣམས་ཀྱིས། རྫོགས་པ་ཆེན་པོའི་ཆོས་འདི་སློབ་མ་གཅིག་ནས་གཅིག་ཏུ་བརྒྱུད་པ་མ་གཏོགས་གང་ཟག་མང་པོ་ལ་སྤེལ་མ་མྱོང་། ཀུན་མཁྱེན་ཆེན་པོ་མན་ཆད་ནས་སློབ་མའི་གྲངས་ཇེ་མང་ནས་ཇེ་མང་དུ་སོང་ཞིང་། སློབ་མ་སྣོད་ལྡན་ཡིན་ལ་བླ་མ་ཡང་གྲུབ་པ་ཐོབ་པ་ཡིན་ན་མི་བརྒྱ་ཕྲག་དང་ཁྲི་ཕྲག་མང་པོ་ལ་སྟབས་གཅིག་ཏུ་གསུངས་ཆོག་པ་སྟེ། དཔེར་ན། ད་ལྟ་བོད་ཡུལ་དུ་ཡོད་པའི་བླ་མ་གྲུབ་པ་བརྙེས་པ་རྣམས་ཀྱིས་ཁྲོམ་ཚོགས་མང་པོར་གསུང་བཞིན་འདུག་ལ། དེ་བཞིན་དུ། རྒྱ་གར་ལུང་པ་ལ་སོགས་པའི་ཡུལ་ཁམས་གཞན་དུ་བྱོན་པའི་སྐྱབས་རྗེ་བདུད་འཇོམས་རིན་པོ་ཆེ་དང་། དིལ་མགོ་མཁྱེན་བརྩེ་རིན་པོ་ཆེ། གྲུབ་དབང་པདྨ་ནོར་བུ་ལ་སོགས་པ་རྣམས་ཀྱིས་ཀྱང་། ཚོགས་པ་མང་པོ་ལ་རིན་ཆེན་གཏེར་མཛོད་དང་སྙིང་ཐིག་ཡ་བཞི་སོགས་གསང་སྔགས་ཀྱི་དབང་བསྐུར་དང་སྐུར་བཞིན་པ་རེད།

དེ་ལྟར་གསུངས་པའི་རྒྱུ་མཚན་ཅི་ཡིན་ཟེར་ན། དེ་ནི་སྔོན་གྱི་དུས་སུ་སྣོད་ལྡན་གྱི་སློབ་མ་ཉུང་བ་དང་། དེང་སང་སྣོད་ལྡན་གྱི་སློབ་མ་མང་བས་རེད།

དེ་ལྟར་བཤད་ན་ཐམས་ཅད་ལ་དོགས་པ་ཞིག་སྐྱེ་སྲིད་དེ། སྤྱིར་ནང་པ་སངས་རྒྱས་པའི་ཆོས་ཀྱི་བཤད་ཚུལ་གྱི་དབང་དུ་བྱས་ན། རྒྱལ་བ་བྱམས་པ་མ་བྱོན་གྱི་བར་དུ་དུས་ཇེ་ངན་དང་བསྐལ་པ་ཇེ་སྙིགས། སེམས་ཅན་རྣམས་ལས་དང་སྐལ་བ་ཇེ་ངན་ནས་ཇེ་ངན་དུ་འགྲོ་བ་ལས་ཇེ་བཟང་དུ་འགྲོ་རྒྱུ་མེད་གསུངས་ཡོད་ན། ཆོས་འདི་ཇེ་བཟང་ནས་ཇེ་བཟང་ལ་འགྲོ་བ་འདི་ཅི་ཡིན་སྙམ་ན།

དེ་ནི་རྒྱུད་སྡེ་སྤྱིའི་འགྲོ་ཚུལ་ཏེ། ཉོན་མོངས་པ་ཇི་ལྟར་མང་ན་ཆོས་ཀྱང་དེ་ལྟར་ཟབ་དགོས་པ་ཡིན་ལ། ཆོས་ཟབ་ཀྱིན་ཟབ་ཀྱིན་ཉོན་མོངས་པ་ཤིན་ཏུ་བདོ་བས་བག་མེད་ཆེ་བའི་དུས་ལ་ཆོས་དེ་གནད་ཐོག་ཏུ་འགྲོ་བ་ཡིན། སྤྱིར་བྱ་རྒྱུད་ནི་ཚེ་ལོ་དཔག་མེད་ཀྱི་དུས་སུ་དར་ཞིང་རྒྱུད་སྡེ་ཐམས་ཅད་ཀྱི་དམའ་ཤོས་དེ་ཡིན་ལ། ཚེ་ལོ་བརྒྱད་ཁྲིའི་དུས་སུ་སྤྱོད་རྒྱུད་ཀྱི་ཆོས་དར། ཚེ་ལོ་སུམ་ཁྲིའི་དུས་སུ་རྣལ་འབྱོར་གྱི་རྒྱུད་དར། རྩོད་ལྡན་གྱི་དུས་སྙིགས་མ་ལྔ་བདོ་བའི་སྐབས་སུ་རྣལ་འབྱོར་བླ་ན་མེད་པའི་རྒྱུད་དར་བ་རེད། དུས་ཇི་ལྟར་སྙིགས་ན་རྒྱུད་སྡེ་ཐམས་ཅད་དེ་ལྟར་ཇེ་ཟབ་ནས་ཇེ་ཟབ་བྱས་ནས་གདུལ་བྱ་རྣམས་ལ་སྟོན་པ་ཡིན་ལ། བསྐལ་པ་མར་མར་སྙིགས་ནས་ནམ་ཞིག་མི་རྣམས་ཀྱིས་ཚེ་ལོ་བཅུ་མ་གཏོགས་མི་ཐུབ་པའི་དུས་ཤིག་འབྱུང་ཞིང་། དེའི་ཚེ་རྫོགས་པ་ཆེན་པོ་སྔར་ལས་ཀྱང་དར་ཁྱབ་ཆེ་བར་གྱུར་ནས། མཁའ་འགྲོ་མ་དཔལ་འཛིན་ཞེས་བྱ་བ་ཞིག་གིས་ཆོས་འདི་བསྟན་ནས་མཐོང་ཐོས་དྲན་རེག་གི་སེམས་ཅན་ཐམས་ཅད་གྲོལ་བར་འགྱུར་བ་ཡིན། ཆོས་གཞན་རྣམས་ནི་དུས་ཚོད་སྙིགས་པ་དང་མཉམ་དུ་ཆོས་ཀྱི་ནུས་པའང་ཇེ་ཆུང་ནས་ཇེ་ཆུང་ལ་འགྲོ་བ་ཡིན་ཡང་། རྫོགས་པ་ཆེན་པོའི་ཆོས་ཀྱི་ནུས་པ་ནི་དུས་ཇི་ལྟར་སྙིགས་ན་དེ་ལྟར་ཇེ་ཆེར་འགྲོ་བ་ཡིན་ཏེ། ཀུན་མཁྱེན་མི་ཕམ་རྒྱ་མཚོའི་ཞལ་ནས། སྙིགས་མའི་རྒུད་པ་མུན་ལྟར་འཁྲིགས་ན་ཡང་། །རྒྱལ་དབང་པདྨའི་འཕྲིན་ལས་ཟླ་ལྟར་གསལ། །ཞེས་གསུངས་པ་ལྟར་ཡིན།

སངས་རྒྱས་ཀྱི་བཀའ་ལས། འབྲས་བུའི་དུས་དང་སྒྲུབ་པའི་དུས། ལུང་གི་དུས་དང་རྟགས་ཙམ་འཛིན་པའི་དུས་རྣམས་ལས། འབྲས་བུའི་དུས་ཡོལ་ཞིང་སྒྲུབ་པའི་དུས་ཀྱང་ཡོལ་ནས་དེང་སང་ལུང་གི་དུས་ལ་ཐུག་ཡོད་པས། འཆད་ཉན་བྱེད་པ་ཙམ་མ་གཏོགས་མདོ་ཕྱོགས་ཀྱི་བསྟན་པ་ཟབ་མོ་ཞིག་མེད་པར་གསུངས་ཡོད། སངས་རྒྱས་ཀྱི་བཀའ་སྤྱིའི་དབང་དུ་བྱས་ན་བསྟན་པའི་ནུས་པ་ལྡབ་འགྱུར་གྱིས་ཇེ་ངན་ལ་སོང་ཚར་བ་རེད།

དངོས་ཐོག་ར་སྤྲོད་ཀྱི་སྟེང་ནས་བསམ་བློ་བཏང་ན་ཡང་ངོ་མ་དེ་འདྲ་ཞིག་སྟེ། དཔེར་ན། སྔོན་གྱི་དུས་སུ་སློབ་དཔོན་པདྨ་འབྱུང་གནས་དང་། པཎ་ཆེན་བི་མ་མི་ཏྲ་ཁོང་རྣམ་གཉིས་རྒྱ་གར་གྱི་ཤར་ལྷོ་ནུབ་བྱང་ཐམས་ཅད་ལ་བྱོན་པར་མ་ཟད་བོད་ཡུལ་དུ་ཡང་བྱོན་པ་རེད། ཡིན་ཡང་སྐབས་དེར་རྫོགས་པ་ཆེན་པོ་དར་ཁྱབ་ལ་དེ་ཙམ་སོང་མེད། དེང་དུས་སུ་བོད་ཀྱི་བླ་མ་རྣམ་པའང་ཕྱིའི་རྒྱལ་ཁབ་མང་ཆེ་བར་བྱོན་ནས་ཆོས་གསུངས་ཤིང་དབང་སྐུར་གྱིན་ཡོད་དེ། འཛམ་གླིང་གི་སྟོབས་ལྡན་རྒྱལ་ཁབ་ཨང་དང་པོ་ཨ་མེ་རི་ཁའི་ཡུལ་ཁམས་ལའང་རྫོགས་པ་ཆེན་པོའི་ཆོས་དར་ཁྱབ་ཏུ་འགྲོ་བཞིན་པ་ནི། རྫོགས་པ་ཆེན་པོའི་ཆོས་ཀྱི་ནུས་པ་ཇེ་བཟང་དུ་སོང་བའི་རྟགས་རེད།

དེ་ནི་ཚོགས་པ་འདིར་ཡོད་པའི་མི་རྣམས་ཀྱི་སེམས་ཁམས་ལ་བལྟས་ནའང་དཔག་ཐུབ་སྟེ། སྤྱིར་ཁྱེད་ཅག་སངས་རྒྱས་ཀྱི་ཆོས་ལ་དད། བྱེ་བྲག་བོད་བརྒྱུད་ནང་བསྟན་ལ་དད། ཁྱད་པར་དུ་རྫོགས་པ་ཆེན་པོའི་ཆོས་ལ་ལྷག་པར་མོས་འདུན་ཡོད་པ་ནི། ཁྱེད་རྣམས་ཀྱི་རྒྱུད་ལ་རྫོགས་པ་ཆེན་པོའི་ཆོས་ཀྱི་བྱིན་རླབས་འཇུག་པའི་དུས་ལ་བབས་ཤིང་ཆོས་རྫོགས་པ་ཆེན་པོའི་གདུལ་བྱར་གྱུར་བའི་རྟགས་རེད། ཁྱེད་ཅག་གིས་དེ་འདྲ་ཞིག་རེད་བསམ་མམ། ༼དགོད་སྒྲ།༽

བོད་ཡུལ་ནི་ལུང་པ་ཆུང་ཆུང་ཡིན་པས། དེང་རབས་ཀྱི་ཚན་རིག་སོགས་ཤེས་པའི་མི་ཤེས་རྒྱ་ཆེན་པོ་ཅན་མང་པོ་མེད་ཀྱང་། ཆོས་ཟབ་མོ་བྱིན་རླབས་ཅན་རྫོགས་པ་ཆེན་པོ་འདི་ཉིད་དར་བའི་སྟབས་ཀྱིས། ད་ལྟ་བོད་ཀྱི་བླ་མ་རྣམས་ཀྱིས་འཛམ་གླིང་གི་ཡུལ་ཁམས་སོ་སོ་ལ་སངས་རྒྱས་ཀྱི་བསྟན་པ་སྤྱི་དང་། ཁྱད་པར་དུ་རྫོགས་པ་ཆེན་པོའི་ཆོས་འདི་དར་སྤེལ་མཛད་བཞིན་པ་ནི། སྤྱིར་ཐེག་པ་ཆེན་པོའི་ཆོས་དང་སྒོས་སུ་རྫོགས་པ་ཆེན་པོའི་ཆོས་ལ་དེ་འདྲའི་བྱིན་རླབས་དང་ནུས་མཐུ། ཡོན་ཏན་བསམ་གྱིས་མི་ཁྱབ་པ་ཡོད་པའི་རྟགས་མངོན་གསལ་ཡིན།

ཡང་ཁྱེད་རྣམས་ལ་འདི་འདྲའི་དོགས་པ་ཞིག་སྐྱེ་སྲིད་དེ། སྔོན་གྱི་དུས་སུ་རྫོགས་པ་ཆེན་པོའི་རྣལ་འབྱོར་པ་ལ་ལས་སྐུ་ལུས་མ་སྤངས་པར་རིག་འཛིན་གྱི་ས་ལ་གཤེགས་ཏེ་ད་སྐབས་མངོན་སུམ་དུ་ཞིང་ཁམས་སུ་བཞུགས་ཡོད་ལ། ཕལ་ཆེར་འོད་སྐུར་གྲོལ་སོང་བ་ཡིན་ཡང་། རྫོགས་པ་ཆེན་པོ་ཉམས་ལེན་ཆེ་བའི་ཚད་དུ་འཇོག་པ་སྐྱབས་རྗེ་བདུད་འཇོམས་པ་དང་། དིལ་མགོ་མཁྱེན་བརྩེ་ལ་སོགས་པ་རྣམས་ཀྱིས་ཀྱང་སྐུ་ལུས་ཤུལ་དུ་བཞག་ཡོད་པ་ཅི་ཡིན་ནམ་སྙམ་ན།

ཁོང་རྣམ་པའི་སྐུ་གདུང་ཤུལ་དུ་འཇོག་རྒྱུ་དེར་རྒྱུ་མཚན་རྣམ་པ་གཉིས་ཡོད་དེ། གཅིག་ཏུ་ཁོང་གི་སྐུ་ལུས་འོད་སྐུར་དེངས་ནུས་ཀྱང་ཆེད་དུ་གདུལ་བྱ་རྣམས་ལ་དད་པའི་རྟེན་དུ་བཞག་པ་ཞིག་ཀྱང་ཡོད། དེ་ཡང་དད་རྟེན་དུ་སྐུ་ལུས་ཧྲིལ་པོ་བཞག་པས་འགྲོ་དོན་ཡོང་ན་སྐུ་ལུས་ཧྲིལ་བོར་འཇོག་རྒྱུ་དང་། དབུ་སྐྲ་དང་སེན་མོ་ཙམ་གྱིས་འགྲོ་དོན་ཡོང་ན་སྐྲ་སེན་མ་གཏོགས་སྐུ་ལུས་འཇའ་འོད་དུ་དེངས་འགྲོ་བ་རེད། དེང་སང་བླ་མ་ལ་ལས་སྐྲ་སེན་ཤུལ་དུ་བཞག་ཡོད་པ་དང་། ལ་ལས་སྐུ་ལུས་ཧྲིལ་བོར་བཞག་ཡོད་པ་ནི། སྐུ་ལུས་ཀྱིས་ཀྱང་དད་པ་དང་ཕྱག་འཚལ་བ། སྐོར་བ་བྱེད་པའི་སེམས་ཅན་ཐམས་ཅད་ངན་སོང་གི་གནས་ནས་ཟློག་པར་བྱེད་པའི་དགོས་པ་ཁྱད་པར་ཅན་ཡོད་པ་ལ་དགོངས་ནས་བཞག་པ་ཡིན།

རྒྱུ་མཚན་གཉིས་པ་ནི། སློབ་མ་རྣམས་ཀྱི་ངོས་ནས་ཀྱང་ལས་མ་དག་པ་མང་པོ་ཡོད་ན། དེ་དག་གི་གྲིབ་ཕོག་ནས་སྐུ་ལུས་ཡོངས་རྫོགས་འོད་དུ་དེངས་མི་ཐུབ་པ་ཡང་ཡོད།

དེས་ན་གདུལ་བྱའི་ཁམས་ལ་བསམ་བཞིན་དུ་སྐུ་གདུང་བཞག་པ་དེ་དང་། སྐུ་གདུང་འོད་དུ་ཞུ་མི་ཐུབ་པར་ལྷག་འགྲོ་བ་གཉིས་ཀྱི་ཁྱད་པར་ཅི་ཞིག་ལ་ངོས་འཛིན་དགོས་སྙམ་པའི་དོགས་པ་ཞིག་ཀྱང་སྐྱེ་སྲིད་རྒྱུ་རེད།

དེ་ནི་དཔེར་ན། སྐྱབས་རྗེ་བདུད་འཇོམས་པ་ཆེན་པོ་དང་དིལ་མགོ་མཁྱེན་སྤྲུལ་ལྟ་བུ་ལ་མཚོན་ན། བདུད་འཇོམས་རིན་པོ་ཆེ་ནི་ཨོ་རྒྱན་རིན་པོ་ཆེ་བསམ་བཞིན་མི་ཡུལ་དུ་བྱོན་པ་དངོས་ཡིན་པས། ཁོང་གི་སྐུ་ལུས་ལ་ས་སྟེང་དམ་ཉམས་ཀྱིས་གང་ཡང་སྒྲིབ་ཐུབ་རྒྱུ་མ་རེད། དིལ་མགོ་མཁྱེན་བརྩེ་རིན་པོ་ཆེ་ནི། ཆོས་རྒྱལ་ཁྲི་སྲོང་ལྡེ་བཙན་གྱི་སྤྲུལ་པ་རེད། ཁོང་ལ་ཡང་ས་སྟེང་གི་སྐྱེ་འགྲོ་ཐམས་ཅད་དམ་སློབ་མ་ཡོངས་རྫོགས་དམ་ཉམས་སུ་གྱུར་སོང་ཡང་རྩ་བ་ནས་སྒྲིབ་ཐུབ་རྒྱུ་མ་རེད། དེས་ན་ཁོང་རྣམ་པ་གཉིས་ཀྱི་སྐུ་གདུང་བཞག་ཡོད་རྒྱུ་ནི། ད་ལྟ་ཁྱེད་རྣམ་པའི་གཙོས་དད་ལྡན་རྣམས་ལ་ཕྱག་མཆོད་སྐོར་བ་བྱེད་སའི་རྟེན་དུ་བཞག་པ་རེད།

འུ་ཅག་ལྟ་བུའི་ཐ་མལ་བ་དང་ལས་དང་པོ་པ་ཞིག་གིས། རྫོགས་པ་ཆེན་པོའི་ལམ་བསྒོམས་ཤིང་དོན་རྟོགས་ནས་འཇའ་ལུས་ལ་དེངས་དགོས་ན། སློབ་མ་ལ་གཟབ་དགོས་པ་རེད་མ་གཏོགས། སྤྱིར་ལུས་པོ་འདི་དང་པོ་ཉིད་ནས་སྡུག་བདེན་དང་མ་དག་པའི་ཕུང་པོ་རེད། དེའི་ཁར་སློབ་མ་དམ་ཉམས་ཡོད་ན་དེ་ཡིས་བསྒྲིབས་ནས་འཇའ་ལུས་སུ་དེངས་མི་ཐུབ་པར་སྐུ་ལུས་ཤུལ་དུ་ལྷག་འགྲོ་བ་ཡིན། འུ་ཅག་འདི་ན་ཡོད་ཚད་ཚང་མའི་རྒྱུད་ཚོད་མི་ཟིན་ཀྱང་། དཔེར་ན། ང་འདྲ་བ་དག་གིས་སློབ་མ་ལ་གཟབ་གཟབ་མ་བྱས་ན། སློབ་མའི་དམ་སེལ་གྱིས་བསྒྲིབས་ནས་འཇའ་ལུས་སུ་དེངས་ཐུབ་པ་མིན། དེ་ནི་རྫོགས་པ་ཆེན་པོའི་ལོ་རྒྱུས་ཀྱི་སྐོར་ཡིན།

རྫོགས་ཆེན་གྱི་བྱིན་རླབས།

རྫོགས་པ་ཆེན་པོ་ལ་ཕན་ཡོན་ཅི་འདྲ་ཡོད་ཟེར་ན། རྫོགས་ཆེན་རྣ་ལམ་དུ་དངོས་སུ་ཐོས་པའི་གང་ཟག་ཅིག་ཇི་ལྟར་འཕྱི་རུང་སྐྱེ་བ་བདུན་གྱི་རྗེས་སུ་འཚང་མི་རྒྱ་བ་གཏན་ནས་མི་སྲིད། རྫོགས་པ་ཆེན་པོའི་དབང་དང་ཁྲིད་ཐོབ་པ་མ་ཟད། བླ་མ་ལ་ལོག་ལྟ་སྐུར་འདེབས་མ་བྱས། ཆོས་ལ་དད་པ་མ་ལོག་ན་ཇི་ལྟར་འཕྱི་ཡང་བར་དོར་ངེས་པར་དུ་གྲོལ་ངེས་ཡིན།

རྫོགས་པ་ཆེན་པོའི་དབང་ཁྲིད་ཐོབ་ཅིང་དེའི་དོན་ཤེས་ནས་ནན་ཏན་གྱིས་བསྒོམ་ན། དད་པ་བཟང་པོ་ཡོད་ན་ཟླ་བ་དྲུག་དང་། འབྲིང་ཙམ་ཡོད་ན་ལོ་བདུན། ཐ་མ་ཞིག་ཡོད་ནའང་ལོ་བཅུ་གཉིས་ཀྱི་དུས་སུ་ངེས་པར་དུ་སངས་རྒྱས་ཀྱི་གོ་འཕང་འཐོབ་པར་འགྱུར་བའི་ཐབས་ཡོད། གཞན་དབང་ཁྲིད་ཐོབ་ཅིང་སྒོམ་མ་ནུས་ནའང་། དམ་ཚིག་མ་ཉམས་ན་དེའི་གླེགས་བམ་ལུས་ལ་རེག་པ་ཙམ་གྱིས་ཀྱང་བར་དོ་ན་སངས་རྒྱས་པར་འགྱུར་ལ། རྫོགས་པ་ཆེན་པོའི་ཆོས་དེ་སེམས་ཅན་འཆི་ཁ་མའི་རྣ་ལམ་དུ་བསྒྲགས་པ་དང་། རྫོགས་པ་ཆེན་པོའི་གླེགས་བམ་མགོ་སྔས་སུ་བཞག་ནས་དེར་ཕྱག་འཚལ་ཞིང་སྐོར་བ་བྱས། མར་མེ་ཕུལ་བ་སོགས་བྱས་ན། དེ་ཡང་རིང་པོར་མི་ཐོགས་པར་འཚང་རྒྱ་བར་འགྱུར།

དེས་ན་ཐེག་པ་ཐམས་ཅད་ཀྱི་རྩེ་མོ་ཡིན་པའི་རྒྱུ་མཚན་ནི། ཐེག་པ་རིམ་དགུའི་ཆོས་གང་དང་ཡང་མི་འདྲ་བ་འདི་ཉིད་མཐོང་ཚད་དང་། རེག་ཚད། དྲན་ཚད། ཐོས་ཚད་ཀུན་འཚང་རྒྱ་བར་འགྱུར་བས། རྫོགས་པ་ཆེན་པོ་ནི་ཐོས་གྲོལ་དང་རེག་གྲོལ་ཡིན་ཞེས་ཟེར་བའང་དེ་ཡིན། རྫོགས་པ་ཆེན་པོ་ནི་དེ་འདྲའི་ཆོས་བསམ་གྱིས་མི་ཁྱབ་པ་ཡིན་པས། ད་ནས་བཟུང་སྟེ་འུ་ཅག་གིས་ཆོས་དང་བླ་མ་ལ་ལོག་པར་མ་བལྟས་ཤིང་སྐུར་འདེབས་སོགས་མ་བྱས་ན། མྱུར་བ་ཉིད་དུ་སངས་རྒྱས་པ་མ་གཏོགས་ལུས་ལ་ན་ཚ་དང་སེམས་ལ་སྡུག་བསྔལ་གཏན་ནས་མྱོང་དགོས་པ་མ་རེད། ཁྱེད་རང་ཚོ་དགའ་བོ་བྱུང་སོང་ངམ། ༼དགོད་སྒྲ ། ༽

ཆོས་སྒྲུབ་པའི་རྨང་གཞི།

ཕྱི་ཟླ་༦ཚེས་༡༩ཡི་སྔ་དྲོར། གནས་ཆུང་དགོན་པའི་དད་ལྡན་དང་གནས་གཞན་ནས་འོངས་པ་དག་ལ་རྗེ་རང་ཉིད་ཀྱི་གཏེར་ཆོས་ཏེ། འཇམ་དཔལ་ཞི་སྒྲུབ་ཀྱི་དབང་བསྐུར་བའི་ཐོག་མར་འདི་སྐད་དུ།

དེ་རིང་འཇམ་དཔལ་ཞི་སྒྲུབ་ཀྱི་ཆོས་སྐོར་གྱི་ཆོས་ཞུ་བའི་སྐབས་སུ་ཁྱེད་རྣམ་པས་འདི་ལྟར་སོམས། ངས་འཛམ་གླིང་གི་འགྲོ་བ་མཐའ་དག་ལ་ཕན་པའི་ཆེད་དུ་ཆོས་འདི་ཉན་པ་དང་སྤེལ་བ་ཡིན་སྙམ་དུ་སེམས་སྐྱེད། ཁྱེད་རྣམ་པས་ཆོས་འདི་ཡུལ་ཁམས་སོ་སོའི་ཡི་གེའི་ཐོག་ནས་དེབ་སྣ་ཚོགས་བསྒྲིག་རྒྱུ་དང་། ཆོས་འདི་སྐད་རིགས་སྣ་ཚོགས་ཀྱི་སྒོ་ནས་བཤད་དེ། འཛམ་གླིང་གི་རྒྱལ་ཁབ་སོ་སོར་དར་ཁྱབ་རྒྱ་ཆེ་བ་ཞིག་ཡོང་བར་བརྩོན་ལེན་བྱེད་པར་ངས་གནང་བ་ཐོབ་པ་ཡིན།

ཁྱེད་རྣམ་པ་ཚང་མ་ལ་ནང་ཆོས་དར་ཁྱབ་ལ་གཏོང་བའི་འོས་འགན་ཡོད་དེ། དཔེར་ན། མཁན་པོ་རྣམ་གྲོལ་ཀྱིས་རྒྱ་གར་ཡུལ་གྱི་བོད་ཀྱི་བླ་སེར་མང་པོར་རྒྱ་ཆེར་སྤེལ་བ་མ་ཟད། ཐེ་ཝན་དང་ཧོང་ཀོང་ལ་སོགས་པའི་ཡུལ་དུ་ཡང་དར་སྤེལ་དུ་བཏང་བས། བསྟན་འགྲོའི་དོན་རྒྱ་ཆེན་པོ་ཞིག་བསྒྲུབས་མྱོང་ཡོད། དེ་བཞིན་དུ་ཁྱེད་རྣམ་པ་རང་རང་ལའང་ནུས་པ་རེ་ཡོད་ངེས་པས། ཆོས་འདི་དར་ཁྱབ་རྒྱ་ཆེན་པོར་བཏང་ན། ཐེག་པ་ཆེན་པོའི་ལམ་གྱི་བསླབ་བྱ་གཙོ་བོ་སྟེ། སེམས་ཅན་ཐམས་ཅད་ལ་ཕན་རྒྱ་ཆེན་པོ་ཐོགས་པ་ཡིན། ཁྱེད་རང་ཚོས་ང་ལ་འོས་འགན་མེད་མ་བསམ་རོགས། ཐམས་ཅད་ལ་འོས་འགན་ཡོད་པ་ཡིན་པས། ཀུན་གྱིས་འགན་དེ་གཙང་བཞེས་བྱ་རྒྱུ་མ་འཆུགས། ཡང་དཔེར་ན། མཁན་པོ་བསོད་དར་རྒྱས་ཀྱིས་ཀྱང་རྒྱ་ནག་གི་ཞིང་ཆེན་སོ་སོའི་རབ་བྱུང་བ་དང་དགེ་བསྙེན་མང་པོ་ལ་ཆོས་འདི་རྒྱ་ཆེར་སྤེལ་བ་རེད། དེ་བཞིན་དུ་ཁྱེད་རྣམས་པས་ཀྱང་ཡུལ་ཁམས་སོ་སོར་ཆོས་འདི་དར་རྒྱས་ཕུན་སུམ་ཚོགས་པ་འབྱུང་བར་བརྩོན་ལེན་བྱ་རྒྱུ་མ་བརྗེད།

དབང་བསྐུར་རྗེས་ཉིན་གཉིས་ཀྱི་རིང་ལ་འཇམ་དཔལ་ཞི་སྒྲུབ་ཀྱི་ཁྲིད་ཡིག་སངས་རྒྱས་ལག་སྟེར་གསུངས་ཤིང་། ཉིན་དང་པོར་ཁྲིད་ཡིག་གི་མགོ་ནས་སེམས་བསྐྱེད་བར་གསུངས་ལ། སྐབས་དེར་གསུངས་པའི་ཚིག་དོན་རྣམས་མཐར་ཆགས་སུ་རེ་རེ་ནས་མ་བཀོད་པར། འཕྲོས་དོན་ཆ་ཤས་ཤིག་འགོད་པ་ནི་འདི་ལྟ་སྟེ།

ཆོས་འདི་གསན་པའི་ཐོག་མར། གོང་དུ་ཞུས་པ་བཞིན་དུ་ཁྱེད་རྣམ་པས་ནམ་མཁས་གར་ཁྱབ་ཀྱི་སེམས་ཅན་ཐམས་ཅད་སངས་རྒྱས་ཀྱི་གོ་འཕང་ལ་དགོད་པར་བྱ། དེའི་ཆེད་དུ་བདག་གིས་དམ་པའི་ཆོས་འདི་ཉན་ནས་དོན་ཉམས་སུ་བླང་བར་བགྱིའོ་སྙམ་པའི་ཀུན་སློང་སྔོན་དུ་སོང་བའི་སྒོ་ནས་གསན་པར་ཞུ། གང་གསན་པར་བྱ་བའི་ཆོས་ནི། འཇམ་དཔལ་ཞི་སྒྲུབ་ཀྱི་ཆ་ལག་ཁྲིད་ཡིག་སངས་རྒྱས་ལག་སྟེར་འདི་ཡིན།

འཇམ་དཔལ་ཞི་སྒྲུབ་ཀྱི་ལམ་འདི་ཉིད་ཉམས་སུ་ལེན་པར་བྱེད་པ་ལ། ཐོག་མར་ལམ་གྱི་རིམ་པ་སྤྱིར་བསྟན་པ་དང་། ལམ་སྒོམ་པའི་མན་ངག་བྱེ་བྲག་ཏུ་བཤད་པ་གཉིས་ཡོད་པ་ལས།

དང་པོ་ལམ་གྱི་རིམ་པ་སྤྱིར་བསྟན་པ་ནི། ཆོས་འདིའི་ཆ་ལག་སྙིང་གཏམ་སྙིང་གི་ཐིག་ལེ་ལས་གསལ་བོར་བསྟན་ཡོད་ཅིང་། ལམ་སྒོམ་པའི་མན་ངག་ཉམས་སུ་ལེན་ཚུལ་དེ། ཁྲིད་ཡིག་སངས་རྒྱས་ལག་སྟེར་གྱིས་གསལ་བོར་བསྟན་ཡོད། དེ་གཉིས་ཀྱི་བཤད་སྟངས་དེ་ཡང་། སྔ་མ་ནི་རྒྱ་ཆེ་བ་པཎྜི་ཏའི་ལུགས་ཀྱི་བཤད་སྟངས་ཡིན་ལ། ཕྱི་མ་ནི་ཟབ་པ་ཀུ་སཱ་ལིའི་ལུགས་ཀྱི་བཤད་སྟངས་ཡིན།

དེ་གཉིས་གང་ལྟར་དུ་ཉམས་སུ་བླངས་ཀྱང་། སྐྱེས་བུ་གཅིག་མངོན་པར་རྫོགས་པར་འཚང་རྒྱ་བའི་ལམ་ཚང་ལ་ནོར་བ་མེད་པ་ཡིན་པར་གཞུང་རང་རང་གི་ནང་དུ་བསྟན་ཡོད་ལ། ད་རེས་ཁྲིད་ཡིག་སངས་རྒྱས་ལག་སྟེར་འདི་ཉིད་འཆད་རྒྱུ་ཡིན། འདི་ཉིད་འཆད་པར་བྱེད་པ་ལ། ཐོག་མར་ལམ་གྱི་ཆ་ལག་ཆ་ཤས་ཤིག་སྙིང་གཏམ་སྙིང་གི་ཐིག་ལེ་ལས་ཁ་གསབ་བྱ་དགོས་པས། ངས་སྤྱི་དོན་གྱི་ཚུལ་དུ་ཁྱེད་རྣམ་པ་ལ་ཚིག་འགའ་ཞིག་འཆད།

འདོད་ཆུང་ཆོག་ཤེས།

འུ་ཅག་གིས་ཆོས་རྣམ་པར་དག་པ་ཞིག་སྒྲུབ་པར་བྱེད་པ་ལ་ཐོག་མར་འདོད་པ་ཆུང་ཞིང་ཆོག་ཤེས་པ་ཞིག་དགོས། དེ་ཡང་། གཞན་ལ་རྒྱུ་རྫས་མང་པོ་དང་ཐོབ་མངའ་ཐང་། མཚན་སྙན་གྲགས་སོགས་ཡོད་ན། དེ་དག་ང་ལ་ཐོབ་སོང་ན་ཅི་མ་རུང་སྙམ་པའི་བསམ་པ་རྩ་བ་ནས་སྤངས་ཐུབ་ན་འདོད་པ་ཆུང་བ་ཡིན། ཆོག་ཤེས་པ་ནི། རང་ལ་བཟའ་རྒྱུ་འཐུང་རྒྱུ་བཟང་ངན་ཅི་ཡོད་ན་དེ་ཙམ་ཞིག་གིས་ཆོག་པར་བྱས་ནས། འདོད་རྔམ་གྱིས་ཟས་ནོར་འཚོལ་བའི་བྱ་བ་མང་པོ་མི་སྒྲུབ་པ་ཞིག་ལ་ཟེར། དེ་འདྲའི་འདོད་ཆུང་ཆོག་ཤེས་ཀྱི་སྒོ་ནས་ཚེ་འདིའི་བདེ་འབྱོར་སྙན་གྲགས་ལ་ཞེན་ཆགས་མེད་པ་ཞིག་དགོས་པ་རེད་མ་གཏོགས། ཚེ་འདི་ཁོ་ནར་ཞེན་ཆགས་སྐྱེས་ནས་བཟུང་སྟེ་ཆོས་པ་རྣམ་དག་ཅིག་ཡོང་ཐབས་མེད། དེའི་རྒྱུ་མཚན་ནི། འདོད་པའི་ལོངས་སྤྱོད་ལ་ཅི་ཙམ་སྤྱད་ཀྱང་སྲེད་པ་འཕེལ་བ་ལས་ཚིམ་ཞིང་ངོམས་པའི་དུས་མེད། དཔེར་ན། མི་ཞིག་ལ་གསེར་རྒྱ་མ་གང་ཡོད་ཚེ་གསེར་རྒྱ་མ་དོ་ཡོད་ན་བསམ་ཡོང་ཞིང་། ཡུལ་ཁམས་གཅིག་གི་བདག་པོར་གྱུར་ཀྱང་ཡུལ་ཁམས་གཉིས་ཀྱི་བདག་པོར་གྱུར་ན་སྙམ། རྒྱལ་ཁབ་གཅིག་གི་བདག་པོར་གྱུར་ཀྱང་གཉིས་ཀྱི་བདག་པོར་ཨེ་འགྱུར་བསམ་ནས་འདོད་པའི་ཁ་གང་བའི་དུས་ཤིག་ཡོང་རྒྱུ་མེད། དེའི་ཕྱིར་འདོད་པ་ཆུང་བ་ལ་སློབ་དགོས། ཚེ་འདིའི་བྱ་གཞག་ཐམས་ཅད་ཇི་ལྟར་བསྒྲུབས་ཀྱང་འགྲུབ་པའི་དུས་ཤིག་མི་ཡོང་། མི་ཚེ་གཅིག་ལ་བདེ་བ་དང་། འབྱོར་བ། སྙན་གྲགས་ཐོབ་པའི་ཆེད་དུ་ཉིན་རེའི་བྱ་བ་ཡང་སྒྲུབ་བསྐྱར་སྒྲུབ་བྱེད་པར་ཇི་ལྟར་འབད་ཀྱང་། གང་ཡང་འགྲུབ་པ་མེད་པར་ནམ་ཞིག་རང་ཉིད་འཆི་དགོས་པ་ཡིན།

དེས་ན་བྱ་བ་ཐམས་ཅད་ཆེ་བཞག་ཆུང་བསྐྱུར་བྱས་ནས་དགེ་བ་འབའ་ཞིག་བསྒྲུབ་དགོས་ཤིང་། དེ་མིན་སྲིད་པའི་བདེ་འབྱོར་དང་སྙན་གྲགས་གང་ལ་བསམ་ཡང་། རྨི་ལམ་གྱི་ནང་དུ་ཚོང་ལས་བྱེད་པ་རྨིས་ན། སྐབས་རེར་ཁེ་བཟང་ཐོབ་པས་དགའ་སྣང་སྐྱེས་ཤིང་། ཐེངས་རེར་ཕམ་ཁ་བྱུང་བས་ཡིད་ཆད་སྐྱེས་པ་ལ་སྙིང་པོ་མེད་དེ། རྨི་ལམ་ནང་དུ་ཚོང་བྱེད་པ་ལ་རྒྱལ་ཕམ་དང་ཐོབ་ཤོར་སོགས་བདེན་པར་མ་གྲུབ་པ་བཞིན་དུ། ཚེ་འདིའི་བདེ་འབྱོར་སྙན་གྲགས་སོགས་ཀྱི་སྣང་བ་འདི་དག་ཐམས་ཅད་ཀྱང་བདེན་པར་མ་གྲུབ་པ་རྨི་ལམ་གྱི་སྣང་བ་དང་ཁྱད་པར་གང་ཡང་མེད། དཔེར་ན། རང་ཅག་ཁྱིམ་ཚང་གང་བོ་འདི་ལ་བསམ་བློ་བཏང་ན། སྐྱེས་ནས་ད་བར་དུ་མི་ལ་ལས་ཚེ་སྟོད་ལ་བདེ་སྐྱིད་ཆེན་པོ་མྱོང་ཞིང་། ལ་ལས་སྡུག་བསྔལ་མང་པོ་མྱོང་། ལ་ལས་བདེ་སྡུག་རེས་མོས་སུ་མྱོང་ཡང་། དེ་དག་ནི་མདང་སུམ་རྨིས་པའི་རྨི་ལམ་དང་ཁྱད་པར་ཅི་ཡང་མེད་དེ། དེ་རིང་སེམས་ཀྱིས་དྲན་པ་ཙམ་ལས་བདེ་སྡུག་དེ་དག་ཡང་བསྐྱར་མྱོང་རྒྱུ་ཡོད་པ་མིན། འདས་པའི་དོན་རྣམས་སོང་ཟིན་ཡང་ད་ལྟ་འུ་ཅག་ལ་སྐྱིད་སྡུག་འདི་དག་འདུག་བསམ་ན། དེ་ཡང་རྨི་ལམ་གྱི་སྣང་བ་དང་འདྲ་བ་ཡིན་ཏེ། རྨི་ལམ་གྱི་སྐབས་སུ་སྐྱིད་པོ་རྨིས་ན་དགའ་ཞིང་སྡུག་པོ་རྨིས་ན་མི་དགའ་བའི་སྣང་བ་འཆར་ཡང་། ཕྱི་ཉིན་ཡར་སད་དུས་གང་ཡང་མེད། དེ་བཞིན་དུ་འུ་ཅག་ལ་དེ་རིང་སྐྱིད་སྡུག་ཅི་སྣང་ཡང་། སང་ཉིན་ནམ་ལངས་དུས་གང་ཡང་ཡོད་པ་མིན་པས་སྙིང་པོ་མེད་ཚུལ་རྨི་ལམ་དང་མཚུངས། དེ་བཞིན་དུ་སང་ཉིན་དང་གནངས་ཉིན་གྱི་སྣང་བ་ཡང་། སང་ནུབ་དང་གནངས་ནུབ་ཀྱི་རྨི་ལམ་གྱི་སྣང་བ་དང་ཁྱད་པར་མེད་ཅིང་རྟག་བརྟན་མིན་པས། བདེ་སྡུག་གི་སྣང་བ་འདི་དག་གཏན་ནས་གྲུབ་མ་མྱོང་ཞིང་འཁྲུལ་བ་ཡིན་པས་ཞེན་ཆགས་སྐྱེ་མི་རུང་བ་ཡིན།

མི་སུ་དང་སུ་ཡིན་ཡང་ཆོས་རྣམ་དག་ཅིག་སྒྲུབ་བསམ་པ་ནས་བཟུང་སྟེ། འཁྱག་ལྟོག་མེད་པ་ཙམ་གྱིས་འགྲིག་སྙམ་པའི་ཆོག་ཤེས་བྱ་དགོས་པ་ཡིན། དེ་ལས་གཞན་པའི་རྩོལ་སྒྲུབ་མང་པོ་བྱས་ན་ཆོས་རྣམ་དག་ཅིག་འགྲུབ་མི་སྲིད། དེས་ན་བཟའ་རྒྱུ་དང་གོན་རྒྱུ་ཅུང་ཙམ་ཞིག་ཡོད་ན་དེ་ཙམ་གྱིས་ཆོག་ཤེས་བྱ་རྒྱུ་མ་གཏོགས། འུ་ཅག་འཛམ་བུ་གླིང་གི་བདག་པོའམ་རྒྱལ་པོར་གྱུར་སོང་ཡང་། བཟའ་རྒྱུ་དང་གོན་རྒྱུ་ཙམ་ཞིག་མ་གཏོགས་གང་ཡང་ལོངས་སུ་སྤྱད་རྒྱུའི་སྐལ་བ་མེད་པས། རྒྱུ་ལོངས་སྤྱོད་དང་མཚན་སྙན་གྲགས། བདེ་འབྱོར་མང་པོ་ཞིག་ལ་དགོས་པ་ཅི་ཡང་མེད་པའང་ཤེས་དགོས།

འཇིག་རྟེན་ཚེ་འདིའི་བྱ་གཞག་ཐམས་ཅད་ལ་ཅུང་ཙམ་ཡང་མི་ཆགས་པར། ཆོས་ཁོ་ན་བསྒྲུབ་བསམ་པའི་གང་ཟག་ནི། ནང་པ་སངས་རྒྱས་པའི་ལུགས་ཀྱི་ཆོས་པ་ཨང་དང་པོ་ཡིན། དེ་ལྟར་མ་ཡོང་ན། ཚེ་འདིའི་བདེ་བ་དང་འབྱོར་བ་བསྒྲུབ་རྒྱུ་དང་དམ་པའི་ཆོས་བསྒྲུབ་རྒྱུ་གཉིས་ཀ་འདྲ་མཉམ་གྱི་སྒོ་ནས་ལག་ལེན་བྱས་ན། དེས་ཀྱང་ཆོས་པ་འབྲིང་ཙམ་ཞིག་ཡོང་རྒྱུ་རེད། ཚེ་འདིའི་བདེ་འབྱོར་ལ་ཞེན་ཆགས་ཆེན་པོ་ཡོད་ཀྱང་ཆོས་ལ་ཅུང་ཙམ་དགའ་ན་དེས་ཆོས་པ་ཐ་མ་ཞིག་ཡོང་རྒྱུ་རེད། ཚེ་འདིའི་བདེ་འབྱོར་ཁོ་ན་མ་གཏོགས་ཆོས་སྒྲུབ་འདོད་ཀྱི་འདུན་པ་རྩ་བ་ནས་མེད་ན་ནམ་ཡང་ཆོས་པར་འགྱུར་ཐབས་མེད་ཅིང་། ནང་པ་སངས་རྒྱས་པའི་གྲལ་དུ་ཚུད་ཐབས་གཏན་ནས་མེད། དེས་ན་ཁྱེད་རྣམས་ཀྱིས་རང་རང་སོ་སོའི་རྒྱུད་ཚོད་ལ་བརྟག་ནས། རང་ཉིད་སྔོན་ཆད་ཆོས་པ་ཞིག་གཏན་ནས་མིན་ནའང་། ད་ནས་ཆོས་པ་ཐ་མ་ཞིག་ཡོང་ཐབས་བྱ་རྒྱུ་དང་། ཆོས་པ་ཐ་མ་ཞིག་ཡིན་ན་ཆོས་པ་འབྲིང་ཞིག་གི་གོ་གནས་ལོན་ཐབས་བྱ་རྒྱུ། ཆོས་པ་འབྲིང་ཞིག་ཡིན་ན་ཆོས་པ་ཨང་དང་པོ་ཚེ་འདི་ལ་ཞེན་པ་གཏན་ནས་མེད་པ་ཞིག་ཡོང་ཨེ་ཐུབ་བལྟ་དགོས་པ་ཡིན།

བླ་མ་ཞིག་བསྟེན་དགོས།

ཆོས་པ་ཡང་དག་ཡོང་བ་ལ་ཐོག་མར་འདོད་ཆུང་ཆོག་ཤེས་ཉམས་སུ་ལེན་རྒྱུ་ཅིས་ཀྱང་གལ་ཆེ་ལ། འདོད་ཆུང་ཆོག་ཤེས་དང་ལྡན་པ་གཞིར་བཞག་གི་སྟེང་ནས་བླ་མ་ཞིག་བསྟེན་དགོས།

བླ་མ་བསྟེན་དགོས་པའི་རྒྱུ་མཚན་གང་ཡིན་ཟེར་ན། རང་རྒྱུད་དུ་སྐྱོན་ངན་པ་སངས་རྒྱས་ཀྱི་ཆོས་དང་མི་མཐུན་པ་ཡོད་པ་ཐམས་ཅད་ཟད་ཅིང་། སྔར་མེད་པའི་སངས་རྒྱས་ཀྱི་ཆོས་དང་དམ་པའི་ཡོན་ཏན་ཐམས་ཅད་གསར་དུ་རྒྱུད་ལ་སྐྱེ་བའི་དགོས་པ་ཡོད། བསྟེན་བྱའི་བླ་མ་ཅི་འདྲ་ཞིག་དགོས་ཤེ་ན། ནང་པ་སངས་རྒྱས་པའི་ཆོས་སྐད་དུ་མཚན་ཉིད་དང་ལྡན་པའི་བླ་མ་ཟེར་ཞིང་། དེ་ལྟ་བུའི་བླ་མ་ཚད་དང་ལྡན་ཞིང་ཡོན་ཏན་ཕུན་སུམ་ཚོགས་པ་ལྡན་པ་ཞིག་བསྟེན་དགོས་པ་ཡིན། བླ་མའི་ཡོན་ཏན་ནི། ཐུགས་རྒྱུད་ན་རང་ཤུགས་ཀྱིས་སེམས་ཅན་ཐམས་ཅད་བདེ་བ་དང་ལྡན་འདོད་ཀྱི་བྱམས་པ་དང་། སེམས་ཅན་ཐམས་ཅད་སྡུག་བསྔལ་དང་འབྲལ་འདོད་ཀྱི་སྙིང་རྗེ་གཉིས་ཐུགས་ལ་མངའ་བ་གཞིར་བཞག་ཐོག སངས་རྒྱས་ཀྱི་ཆོས་སེམས་ཅན་རྣམས་ལ་ཡང་དག་པར་འཆད་ཤེས་མཁན་ཞིག་ཡིན་ན། དེ་ལ་བླ་མ་མཚན་ཉིད་དང་ལྡན་པ་ཟེར་བས། དེ་ལྟ་བུའི་བླ་མ་ཞིག་བསྟེན་དགོས་པ་ཡིན།

སློབ་མས་བླ་མ་ཇི་ལྟར་བསྟེན་དགོས་ཟེར་ན། རབ་ན་བླ་མ་དགྱེས་པའི་ཕྱིར་དུ་བླ་མས་གསུངས་པའི་ཆོས་ཉམས་སུ་ལེན་དགོས་པ་ཡིན་ལ། འབྲིང་ན་བླ་མའི་ཐུགས་མཉེས་པའི་ཕྱིར་དུ་བླ་མ་ལ་ཞབས་ཞུ་རྣམ་དག་ཅི་ནུས་ཅི་ལྕོགས་ཀྱིས་སྒྲུབ་དགོས། ཐ་མ་ཡིན་ན་རང་གིས་བླ་མའི་ཐུགས་ལོན་པ་དང་བཀའ་དྲིན་གཟོ་བའི་ཆེད་དུ། འབྱོར་བ་གང་ཡོད་བླ་མའི་ཕྱོགས་སུ་ཕུལ་ནས་ཞབས་ཞུ་སྒྲུབ་དགོས་པ་ཡིན་ལ། དེ་དག་ནི་མཉེས་པ་གསུམ་གྱི་སྒོ་ནས་བླ་མ་བསྟེན་ཚུལ་ཡིན།

དེ་ནས་བླ་མའི་དྲུང་ནས་ཆོས་ཞུ་དགོས་པ་ཡིན་ལ། ཞུ་བྱའི་ཆོས་དེ་ཡང་། རབ་ན་སངས་རྒྱས་ཀྱི་བཀའ་དང་། དེ་མིན་འཕགས་ཡུལ་དུ་བྱོན་པའི་རྒྱན་དྲུག་མཆོག་གཉིས་སོགས་ཀྱིས་མཛད་པའི་སངས་རྒྱས་ཀྱི་བཀའ་ཡི་དགོངས་པ་འགྲེལ་བའི་བསྟན་བཅོས་དང་། བོད་གངས་ཅན་གྱི་སྒྲུབ་བརྒྱུད་ཤིང་རྟ་བརྒྱད་སོགས་མཁས་གྲུབ་རྣམས་ཀྱི་གསུང་ཆོས་ཡོད་ཚད་བླ་མ་ལས་ཞུ་དགོས་ཤིང་། བླ་མའི་དྲུང་ནས་མཉན་པ་ཙམ་གྱིས་མི་འཇོག་པར་ཚིག་དོན་ཐམས་ཅད་ཡིད་ལ་འཇགས་དགོས་པ་ཡིན། གལ་ཏེ་དེ་འདྲའི་རྒྱ་ཆེན་པོ་ཞིག་མ་ཤེས་ཀྱང་། གང་ཉམས་སུ་བླང་བྱའི་ཆོས་དེ་ངེས་པར་དུ་ཤེས་དགོས། དཔེར་ན། འུ་ཅག་གིས་གོང་དུ་འཆད་ཉན་བྱས་པའི་འཇམ་དཔལ་ཞི་སྒྲུབ་ལྟ་བུའི་ཟབ་ཆོས་འདིར་མཚོན་ན། དེའི་ཆ་ལག་ཡོངས་སུ་རྫོགས་ཤིང་ཆ་ཚང་བ་ཞིག་བླ་མའི་དྲུང་དུ་མཉན་ནས་ཚིག་དོན་ལ་སྒྲོ་འདོགས་གཅད་དགོས་ངེས་ཡིན། དེ་མིན། རང་གིས་དཔེ་ཀློག་བྱས་པ་ཙམ་དང་གདམས་ངག་ལ་ཚོད་དཔག་བྱས་པ་ཙམ་གྱིས་སངས་རྒྱས་ཀྱི་ཆོས་རྩ་བ་ནས་ཤེས་ཐུབ་པ་མིན།